رواية أجرام مستباح لثلاث ندبات الفصل التاسع عشر 19 - بقلم الكاتبــة ايلول

مساء الخير ...

#أجرام_مستباح_لثلاث_ندبات

aylol. بقلم الكاتبه

ins: t8_fe3 للتواصل

𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒

وهـذيـچ انتِ
الخطيـة المارضت تغفـر خطايانة
رمتنـا و حملتنا هموم فــوگ اهمــوم  دنيانة

( جــــمرة)

𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁

جــــمرة ::- صار مايرجع للبيت اهواي حتى ما اسأل على شي يجي على كد وقت الاكل يوكلني وهو ساكت ويرجع يطلع وبالليل من انام يجي احس بيه من يتمدد بصفي

واني الف سؤال ببالي أريـــــد اجوبتهن بديت اشتاق الاهلي حيل بديت اخاف يصير شي على مصطفى وانا ماشايفته خفت الحجية يصير بيها شي أريـــــد ارجع الاهلي الامي ومن احاجية مايجاوب صار الليــــل ومانمت انتظرت يجي

اتاخر كلش بديت اغفي وسمعتة،فتح الباب كعدت على حيلي. شغل الضوه وباوعلي ابتسم بيدة علاكة

:- همزين لحكت عليج جبتلج حلاوة

- بقيت كاعدة بفراشي وهو عافها طلع غسل ورجع كعد كدامي فتح العلاكة طلع بقلاوة رفعها يريد يوكلني دفعت أيــــدة.
رجعلها للعلاگة وباوعلي بنفاذ صبر

:- شبيج جــــمرة؟

- بقيت ساكته اباوع بوجهه دنك راسه ابين ادية سد العلاكة شالاها تمددت رجع سحبني من ايدي كعدني وكعد كدامي

:- شنو التردينة فهميني؟

- دفعت أيــــدة فلتت نفـــــسي ورجعت للمخده مثل ماهوا يسوي وياي احاجي ويغلس يسوي نفسه مايسمعني ويخليني افرفح

- سنايبر مو احاجيج شبيج؟

- ليش نقهرت من ما اجاوبك...... انت هم ماتجاوبني من اسأل على شي

بقى ساكت كام غير ملابسه طفه الاضوية وتمدد بفراشة وراي ثنينا ساكتين

غمضت عيني هادئة وهو يتگلب بفراشة الغرفة ظلمة  مشغل المكيف وموجهة علينا شويه وگال

- جــــمرة نمتي؟

-فتحت عيني وبقيت ساكتة منطيتة ظهري حتى صوته ما أريـــــد اسمعه

- سنايبر؟

-درت وجهي عليه ::- هــــا

-نامي على صدري

- مد ايدة يلزم ايدي دفعتها ::- وخــــر من يومين احجي واسأل وانت مسوي نفسك ماتسمع من يجي الليــــل تصير حنين

::- يعني انا مو حنين

-المحنة بوادي وانت بوادي مستحيل تنجمعون مجـــرم انت مجرررم كافر حقيرر. عاايش بقوقعة اجررام
غلط كلك غلط حتى وجودك

حجيتها وجريت مخدتي ابتعدت منطيتة ظهري امسح بعيوني نار،بگلبي بقى ساكت شوية وگال
بصوت مخنوگ

:- " تمونين على الروح الچميها شگد ماتردين"

-غطيت وجهي بيدي مدري شبيهه محروگة حرك بجيت اناشغ
::- الله يحرك كلبك على اعز ناسك مثل ما حارك گـــــلبي على اهلي

مد أيــــدة بسرعه سد حلكي يحجي بخوف

:- لا جــــمرة لاتدعين

- نگلبت على ظهري وسحبت أيــــدة من حلكي ابجي وارجف
::- أخـــوي مريض أريـــــد ارجع اشوفة قبل لاياخذه الموت مني اذا صار بيه شي وانا يمك ما اسمحك لو تموت

:- ما اگدر لاتحجين وتتعبين ماگدر اخليج ترحين حدي وحدج للموت

- متت افور كمت بــــس دموعي تنزل حسيت گـــــلبي طك أريـــــد اهلي. مسحت عيوني. ومديت ايدي اتلمس خليتها على گلبه

:- عسى كلبك مايبرد بشوفة اخوانك تموت وانت بحسرتهم تنحرم منهم للموت مثل ماحرمتني من اهلي واخواني

- دفع ايدي من صدرة كام طلع وانا من كل عقلي بنفس الحظة تندمت على الحجيتة  ماجان من گـــــلبي بــــس لغوة لسان احرك كلبه مثل ماحارك گـــــلبي

مارجع للغرفة كمت طلعت اني لكيتة كاعد بالمطبخ ماد رجلية ومخلي ظهرة على حايط غافي وهو كاعد تقربت يـــــمة متندمة على الحجيتة دغيته بكتفه بدون صوت. مره مرتين بالثالثة فتح عينه بخفوت بــــس لمحني كعد عدل فرك وجــــهة. مدنك ورجع باوعلي

::- هــــا

- باوعت بعينه شفتي ترجف دنكت راسي
::- جذب اتمنى تشوفهم بــــس لاتحرگ گـــــلبي وتخليني احجي كلام ما اريده

:- بشنو حارگ گلبج جــــمرة؟

:-من احاجيك تغلس اسألك ماتجاوب بكلشي تحرك گـــــلبي

كام وكف على حيلة ابتسم وسحبني من ايدي وراه تمدد ولازم بيدي

::- تعالي هنا واسألي اجاوبج على كلشي

- جريت نفس وتقربت تمددت راسي على صدرة بارده ماعندي اي شعور لمني بحضنة حيل جر نفس بغمج وحجة

:- اسألي

:- شوكت تعوفني

:- من اشوف اباذر ودرة واضمن الهم عيشة بيها خير اعوفج لان وقتها هاي هي ينتهي جـــــندل

- تنسجن؟ تسلم نفسك

-ما ادري

- ليش ما تعوف قسام من هسه وتعوفني واللـــه ما اجيب اسمك بشي ولا احجي كلمة وابقى اتواصل وياك واذا تحتاج شي اساعدك بيه حتى  توصل الاخوانك اساعدك بــــس لا تبقى مجـــرم يـــــوم عن يـــــوم احقد عليك اكثر واحلف اخذ حقي منك

:- ما اكدر جــــمرة انتي تعرفين شي وانا اعرف شي

:- أبــــــهر والقران اذا عفتني هسه انسه كلشي بــــس واللـــه وغلات امي اذا بقيت حابسني اكثر وحارمني من اهلي اكسرك اكثر من ما انت مكسور اخليك تعض اصابيعك ندم واللـــه

لمني  بحضنة حيل باس شعري
::- ميخالف

- ليش هيج تسوي ليش ما اتوب

- من شنو اتوب جــــمرة انا من اصبع رجلي الراسي خطأ كلشي عايشة ومسوية عبارة عن اخطاء واجرام داخلي وصخ حد لعبان النفس

" انتي الصح الوحيد بحياتي "

-:من تعرف كلشي خطأ ليش مستمر؟

:- مجبور رگبتي بأيد قسام ههه انتي تخيلي يعلكني بسلاسل يومين وانواع التعذيب اشوفة ومن تصير عنده مهمة ينزلني وانا اروح انفذ مثل الشاطر

- رفعت ايدي خليتها على عيوني وانا على صدرة احس ماكو طريقة اكدر اقنعه بيها وصبري خلص

-: خلصت حجتك وياي بعدين لادكلي ليش هيج سويتي حتى لو بعدك ما لاگي اخوانك وتصير بيدي فرصة راح استغلها حتى اخذ حقي واسجنك

- باس شعري ورفع أيــــدة على وجهي يضحك

:-  زين اذا صارت فرصة وطلعتي من يمي
وردتي تشتكين عليه شنو تكولين الأبـــــهر لو جـــــندل

- سكتت صافنة وافكر حتى لو صارت اني اريده يتحاسب هو بــــس كون مايصير شي على اخوانة رفعت راسي اريد اباوع بوجهه

:- يا اسم يضر اكثر

:- ثنينهن جـــــندل اذا نطيتي مواصفاتي راح انعرف الاشتغل عند قسام واذا كلتي الأبـــــهر راح تلطخين سجلي وتنعرف شخصيتي

:- اختار

:- كولي جـــــندل حتى اذا اباذر ودرة متورطين بشي مايوصلولهم لاتنطين اسمي الحقيقي من اطلع اطلع باسم وسجل نظيف الأبـــــهر

:- امي تعرف اسمك الأبـــــهر

:- توصينها ماتحجي

- سكتت يحجي بضحك حسيته ماخذني على كد عقلي هيج بــــس مسايسني. رجعت راسي على صدرة افكر أريـــــد اسأل بعد عندي اهواي اسئلة بــــس نسيتهن. رجعت رفعت راسي ساكته گال

:- هــــا

:- شبيك .....
سكت شوية حجة بخفوت

:- شبيه

- نزلت راسي على گلبة اتنصت
::- كلبك يدك حيل ...خايف؟

- وخــــر راسي من صدرة خلاه على ايدة ونگلب صار مقابيلي ملامحة بالكوه اشوفهن. رفع ايدة على خدي

:- لا ماخايف بــــس لان انتي بحضني
ليش كلبج مايدك هيج ماتحسين بشي؟

- سكتت صافنة اتنصت الدكات گـــــلبي مابيهن شي جنت اجارية بالكلام مابالي شي المهم احجي واسولف واخلي علاقتنا طيبة الحد مايصير يثق بيه رجعت باوعت عليه وحجيت

:- لا كلشي ماكو

- زين جــــمرة اذا متت تبجين؟

- لا واللـــه  لان ارجع الاهلي بــــس انقهر لان ماشفت اخوانك

:- واذا كتلج اريدج حتى من الكه اخواني ما أريـــــد اعوفج

:- هااا وتكول ما احبج هاي شيسموها واللـــه تحبني. انا الك الا افلش كلبك.

ضحك وجراني الحضنه حيل يضحك

:- شحب منج رجال ونايم بحضني

- ضحكت اني هم افلت بنفسي من حضنة
:- ههههه  وخر يله لا تجلب مو انطيتك مجال

:- السانج سنايبر السانج يرش خرب روحــــــج

:- خرب روحك انت ...
دفعته ورجعت لفراشي. سحبني من ايدي فلتت نفـــــسي ودفرتة تمدد بفراشة ضحك

:- المصلحچية اخذت اجوبتها وراحت

:- ايع احس ملمس صدرك بعده بخدي ....
حجيتها بضحك وهو هم ضحك لفيت نفـــــسي بالغطه ساكتة شوية وگال

:- جــــمرة تلعب نفسج مني تكش روحــــــج؟

- سكتت افكر هو نظيف يسبح كل مايجي من برا ويغير ملابسه مابيه ريحة مو حلوة بــــس
روحـــــي تكش من اشوف جسمة ماكو مكان بكد جف الايد صاحي بكل مكان اثر وحرك
ومو تلعب نفـــــسي بــــس جسمي يقشعر احس بوجعهن جاوبته

:- مو تلعب نفـــــسي بــــس گـــــلبي يوجعني من اشوف الاثار البجسمك وبنفسي اعرف الاثر الچبير البجهة كلبك شلون صار

حسيت بيه انگلب التفتت شفتة منطيني. ظهرة ساكت
:- احجيلي بصفتك الأبـــــهر العمرة 13 سنة مو جـــــندل والصبح انسه الحجيتة

جر نفي مختنك وحجة بخفوت
:- شحجي؟

- كل جرح شنو سببة ....
حسيت بيه كعد على حيلة اني هم كعدت شغل ضوة التليفون قفلة وخلاة بايدي نزع الفانيلة ودار منطيني ظهرة همس مختنك

:- اسئلي

- تقربت بخوف شلون كل هل جروح بجسمة ومايوجعنة اباوع ابينهن ماكو مجال اربع اصابع ابين جرح وجرح اصلا صايرات واحد فوك الثاني. تقربت اكثر ايدي ترجف.  خليت اصابعي على اثر كلش جبير الجلد متجمع وملفوف مثل الحبل صاير اول مالزمتة ميل ظهرة متقشعر وجر نفس بقوة حركت ايدي خايفة حجة هو

:- حركني بشيش من نار

- ليش

:- صارت سالفة مو حلوة ماريد احجيها وعاركت ضربت واحد من اليشتغلون وياه  شكيت راسة وعاقبني

:- وهذا ..نزلت ايدي يم خاصرتة اثر منا ومنا بنفس المكان ونفس الاثر ... يرجف جسمة ومختنك

:- جــــمرة تتأذين من احجيلج تعذيب ياثر عليج توجعج روحــــــج ما أريـــــد

:- أريـــــد اسمع أبــــــهر

:- بــــس لا تنقهرين لان مايوجعني هسه لا تضوجين متفقين؟

- رفعت ايدي مسحت وجهي همست
:- اي اي تمام ما انقهر ....
وانا احس گـــــلبي راح ينفجر گال

- هذا قبل لا يرحون اخواني من يمي لكيتة مطلع درة تشتغل وانا بوقتها اشتغل بمكان ثلث اشخاص حتى اخواني يبقون بالبيت بس هو يخليني اطلع وياخذهم الغير تقاطع من عرفت تعاركت وياه ضربتة وعلكني

اكو كترات مال باتري سيارة مثل القراصات
هو شغله كله بالنار خلاهن بالنار وكرص جسمي بيهن

والبقية اثر السوط والاثار القوية كلهن حرك
بالعودة الحديد

- دموعي نزلن وشفتي ترجف اختنكت حيل همست :- الجرح البگلبك؟

سكت دنك راسه واني ما اشوفة لان ورا ظهرة وايدي اتحسس الاثار...... ضحك

:- من خطفتة وصوبتة.....ورا ما عفتة علكني بالمخزن و بسجينة جرحني
يمشي السجينة بالجلد ويحجي وياي مجبور اجاوب وما اصيح لان يعذبني اكثر نفس السجينة خلاها بالنار من تصير حمرة يجيبها كدام عيني يخليني اشوفها بلكي اخاف واتوسل.
لزكها فوك الجرح جــــمرة جنت اسمع وشة جسمي شلون ينشوي من النار

:- بجيت اناشغ التفت عليه بسرعة ضميت وجهي ابين ادية فاقدة واغلط واسب بقسام
جراني الصدرة حاضني واني ارجف شي يفوق الاستيعاب

:- ليش ليشش تحملت ليش ماشردت ليش خليتة يعذبك ليشش شيطيب جسمك شلون يرحن شلوون

::- اشش شبيج مو كتلج ما احجي ليش لحيتي اششش

- گـــــلبي يوجعني واللـــه گـــــلبي يوجعني

تهسترت خلصت طاقة تحملي تمدد منومني على صدرة بــــس روحـــــي شايغة وجسمي يرجف اتخيل الوجع وافرفح من يمي اموت
بعقلي رسمت شلون معلكة ويچوي بجسمة شلون يكتم صوتة ومايصيح وكل ما اتخيل ازيد وابجي

:- كـــــافي جــــمرة اشش اسكتي لا تندميني لان حجيت شبيج

: غمضت عيني امسح بدموعي بــــس شي نرسم بعيني شلون انساه بعد ماحسيت بنفسي من نمت

وكعدت ماكدر احرك جسمي احس بلاعيمي يوجعني وجفني ثگيل فتحت عيني راسي يوجعني حيل مديت ايدي على كصتي سحبت العليها
كمادات وبصفي علاجات. كوه فاتحة عيني مابيه حيل اكعد شوية ودخل للغرفة

:- كعدي يله شنو اخذج الواهس

- غمضت عيني مابيه حيل حتى احجي اجة يمي سحبني من ايدي وكفني ولف الشال على شعري

:- تعالي غسلي حتى تاكلين وتشربين علاج يله

- مشيت وياه للحمام اسمع صوت عمر بالمطبخ كل شوية يصيح
:- اشتغل عندك وعد مرتك الخادم مالكم انا

- غسلت وطلعت رجعت للغرفة تلفلفت بالغطا ارجف وبس أريـــــد انام جاب اكل واجه كعد كدامي اكلت شوية ساكته حرف مانطقت
بــــس شال الصينية رجعت تمددت هستوني غفيت سمعته گـــــال
:- جــــمرة

- فكيت عيني شفتة كاعد بصفي يخلط ابرة ساحبها ويرج بيها فكيت عيني حيل وكعدت بسرعة
:- شجاي تسوي

:- انطيج ابرة الصخونة مافكتج

:- روح روح تنطيني ابرة شنو انت مجـــرم لاتسوي روحك عليه دكتور

- رحت لصيدلاني علمني شلون لاتخافين تغمضين عينج تفتحين تلكين روحــــــج يم الملائكة

- ضحك واني خازرته دفعت أيــــدة
:-  وخــــر كتلك واللـــه لو تموت تريد تتعلم براسي

:- اي يجوز ابدل شغلي من مجرم الدكتور خوش مهنة

:- جـــــندل ترا خلكي هلكدوتة صاير. عـــــوفني بصخونتي لا اصرخ والم عليك الناس انت ماتفهم شكد خطرة الابرة يمكن تخليني انشل

:- لا صدك اعرف تعلمت من قبل وهذا عمر كدامج مرة جكيتة ابرة كلشي مابيه

::- وخرررر يابه وخــــر شكد تلح انته وخــــر
دفعته سحلت فراشي بصف الحايط لطشت بالحايط وتمددت مغمضة كام طفة الضوة
يريد يتعلم براسي حتى انشل مااشايفة مجـــرم ينطي ابر بــــس يم أبــــــهر كلشي يرهم

جنت ارطن بصوت ناصي واغلط حسيت علية گلبني على بطني وبسرعة كعد على رجلية صرخت

:- خرب وخــــر اغلط واللـــه واسب اهلك عـــــوفني

:- اشش تتأذين

- اتحرك ولاثبتت احرك جسمي وهو طابك ادية ورا ظهري ويسحب بالبطانية

:- نعلعله وخــــر شثكلك الثور كسرت رجلي وخــــر خرب. خررب ..
كلساع أريـــــد اسب واتذكر اهله والزم نفـــــسي بــــس گـــــلبي يفور

فلتت رجلي ودفرتة ماكدرلي وكفت وصرخت بكل صوتي شغل الضوه يباوع للابرة بايدة النيدل صار اعوج

:- صرخي بعد اذا مارجعتج للبيت المسكون معتب

- سديت اذاني وصرخت حيل
:- لا تهددد لا تهدد ما اخاف ما اخااااف منك

- طلع من الغرفة واني رجعت لفيت نفـــــسي بالغطة وبقيت كاعدة عيوني يحركني
نذل حقير يريد يتعلم براسي بالله نشليت بالله متت المجرم الثور الكافر

امسح بوجهي واغلط بصوت.. محروكة روحـــــي
التفتت من فتح الباب دخل وقفلة جاي احجي وشفت بيدة منديل وكفت بسرعة
بلعت ريك بخوف

:-  لا أبــــــهر باوع واللـــه اخاف

رجعت ليوره وهو يجي عليه كعدت بالزاوية ولامة الغطة عليه

- ما اصرخ بعد واللـــه ما اصرخ أبــــــهر لاتخليني اكرهك اكثر لاتسوي هيج

- بجيت وهو كعد كدام
::- أريـــــد تصيرين زينة حتى اروح عندي شغل جــــمرة فتيتي مرارتي

- حس واللـــه جسمي يتعب وروحي احسها تطلع من هذا عفيه حــباب ما اصرخ بعد

- مد ايدة الثانية يمسح بعيوني والبيها منديل مخليها على رجلية يمسح وجهي ويوخر بشعري

-:هاي هيه اسكتي لاتبجين

- رفعت ايدي امسح بوجهي واحجي
:- ما ابجي وهسه اشرب بعد حبـــوب وشراب اصير زينة ما احتاج ابرة بعد هاي هيه

بغفلة جر راسي على رجله وخله المنديل على وجهي نزلن دموعي واني اباوع بعينة ومجلبة بايدة الحد ماغمضت ونمت. ماحسيت بشي ...

......
نــــهله ::- من رجعنا من الزيارة جنا حيل تعبانين ادريــــــس عنده دوام ولا ارتاح بــــس وصل للبيت بدل وطلع الدوامة احنا نمنا ماكعدت الحد ماسمعت اسمر يصيح

:- يمعودين متنا من الجوع

- لفيت حجابي وطلعت من الغرفة بسرعة. لكيتة كاعد بالصالة يلعب بلي. التفتلي

:- زيارة مقبولة

:- قبل اعمالك شلونك

:- الحمدلله شنو مــــحد كاعد

- وصلنا تعبانين كلهم ناموا

-ابوي وين سيارتة ماكو

:- طلع الدوامة ....حجيتها وفتت للمطبخ فتحت الثلاجة أريـــــد اسويلهم غده وهو يتقصد يصيح بصوت عالي حتى يكعدهم ويرجع يباوعلي ويكول
:- شيكعدهم

- خليهم شتريد منهم ......
ابتسم فرحان. مد راسة يباوع بوجهي گـــــال

:- أمي اجت أريـــــد اخذهم الها

- باوعتله ساكته مانطقت شي بــــس ابالي ادريــــــس مايقبل. اكيد راح يرفض مو نيتي احرمها من اطفالها بــــس ما أريـــــد تعبي يضيع صار اشهر. اعلم الحد ما مشيتهم لطريق الصح ويرحون ساعات ينسون كلشي علمته الهم
وماريدهم يرجعون يمرون بموقف تحرش

كام اسمر كعدهم حتى على غـــــدير دگ الباب

اجه غيث للمطبخ يفرك بعيونة يريد يبجي
::- ماما شفتي الساعة شكد وانا ما مصلي

- حبيبي صلي هسه كعدتكم وقت الصلاة ماقبلتوا تكعدون روح توضى صلي الظهر قضاء والعصر بوقتها

:- تعالي علميني

- روح اتوضى هسه اجي

-  كملت البيدي ركض ورحتله علمتة ورجعت كعدت غدير والملم بالبيت
صبيتلهم غده بـعدهم ياكلون كالهم اسمر

:- ماما تريد تشوفكم

- التفتولي ثنينهم ساكتين دنكت ماعندي شي احجية وهم حسبالك منتظرينها فرصة. يسألون  عليها واسمر يجاوبهم اباوعلهم والوب حقهم امهم مهما يكون امهم

خلصوا غدا كالهم يله بدلوا
باوعتله
:- ابوك يدري؟

- لا بــــس هاي امي يعني عادي مو الا يدري

:- خابره گله يبقى يحجي عليه اذا طلعوا بدون علمه

:- خابرية انتي بــــس استعجلي

- هزيت راسي موافقة ودخلت للغرفة اتصلت عليه جاوبني بتعب
:- عفية ادريــــــس اسمر يريد ياخذ اخوانة البيت جده امهم جاية شلون شسوي

بقى ساكت وانا الحيرة ماكله گـــــلبي
::- خليهم يرحون وهسه اخابرة يبقى وياهم ساعه ساعتين ويجيبهم

:- ادريــــــس بــــس... خاف يغفل عنهم اسمر
خاف خالتهم ترجع تتعرضلهم

:- نــــهله شسوي گليلي؟

:- لايرحون للبيت. خليها تجي هنا

:- لاااا ماتدخل بيتي

:- عفيه ماريد يرحون بيت جدهم يغفل عنهم اسمر والله ماينتبهة

:- شسوي؟

- سكتت محتارة وكلبي يلوب
:- اخذهم انت روحوا مكان عام وخليها تشوفهم ..

بقى ساكت وانا گـــــلبي جمر خايفة عليهم

:-  ما أريـــــد اشوفها انا هسه اخابر اسمر
يعزمها المكان وياخذهم الها ماشي؟

- خوش ..

- سد الخط طلعت من الغرفة  اتصل على اسمر جاوب ابوه وباوعلي رافع حاجبة عفته وفتت للغرفة اخليلهم عطر اخذهم وطلع وهبه تبجي وراهم...

صارت بالستة وادريس ما اجة خابرتة گـــــال اتاخر عندي لود بالشغل سكتت
حضرت العشا وفتحت باب البيت الخارجي. نصيت صوت التلفزيون وبقيت اسمع صوت الاذان من الجامع وادعي. ..

صليت وكعدت يم غـــــدير ومصطفى
ساعة وساعتين مرن لا ادريس ولا الجهال

اتصلت على اسمر بسرعة جاوبني
:- هــــا اسمر شوكت تجون

:- ما نجي انبات يم امي تردين شي

:- بلعت ريك ساكتة همست لا
وسديت الخط ارجف مدري شبيه واقنع بنفسي

:- امهم يمهم مايصيرلهم شي اكيد تخاف عليهم اكثر مني ما معقولة تغفل عنهم وتخليهم بــــس ويا خالتهم

ما ارتاحيت رجعت اتصلت على اسمر كتله
:- بــــس أريـــــد احاجي غفران على شغلة

سمعتة صاح
:- يـــــمة وين غفران

وهي جاوبتة صوتها ناعم
:- كلها خالتها دتسبحها جسم البنية مفتل شهر ما واصلتلة ليفة

- سمعتها وكلبي رجف حيل اسمر كالي
:- دتسبح شنو تردين منها كليلي

:- اسمر عفيه

:- شكو

:- سكتت الوب سديت الخط منه متت من القهر شسوي احجي الاسمر لو اموت مايصدكني
اتصلت على ادريــــــس مايجاوب بقيت اتحركن
دمي يفور هبه وغدير تعشن وانا لكمه مافاتت البطني نار بكلبي عشيت مصطفى وكل شوية اتصل على ادريــــــس مايجاوب ونوب انغلق جهازة

واجت رسالة من عـــــلي
بصمة گـــــال
:- عندة شغل خالة جهازة يمي بــــس يكمل اخلي يتصل عليج

- سكتت عبرت ال 11 وهو ماكو هبه مطنكرة تريدهم وغدير تدرس ..عفتهن وفتت المكتب ادريــــــس

دفتر عندي جنت اكتب بيه تسبيحات وادعية وهو يعرفة دفتري ومخلية ويا اغراضة دائما يقرأ منه كعدت بمكانة ادور،على الدفتر وماكو فتحت الجرارات ادور عليه اخر جرارة فتحتها وصفنت سحبت الحجاب فتحتة وكع منه الدعاء الكتبتة اله لفيتهن ورجعتهن المكانهن من سمعتة اجة

طلعت من المكتب قبل لا اطلع من الغرفة دخل وكفت بمكاني التفتلي مبتسم وغابت ابتسامتة من باوع بوجهي

:- شبيج؟

-مابيه شي اسويلك عشا؟

-اي والله جوعان بــــس خلي اسبح

-  طلعتله ملابس وفتت للمطبخ اسويلة اكل شفتة من طلع من الحمام فات للغرفة ورجع كعد بالصالة بيه طريقة حلوة ينتبه البسة دائما محترم وجود غـــــدير بفانيلة داخلية مايبقى
..اخذت الصينية نزل بالگاع كعدت على جهة هستوه ياكل وباوعلي

::- شبيج منو غاثج

-محد مابيه شي ... درت عيني منه اكل اول لكمة گـــــال

:- شنو الجهال نايمين

-التفتت اباوع بعينة ..عاف اللكمة من ايدة رفعت اكتافي عيوني يحركني
:- راح يباتون يم امهم

- كام على حيلة جر السويج
::- اصبر هي امهم حقها تريدهم يباتون يمها بــــس تكدر تحجيلها على اختها وتوصيها تنتبهلهم ادريــــــس احاجيك

. عافني وطلع بسرعه بدون مايحجي
ساعة اكول احسن خلي يجيبهم ومن افكر بامهم يوجعني گـــــلبي وانقهر جهالها وتريدهم شلون بكلبها

دك تليفوني حسبالي هو بــــس طلع رقم جاوبت بسرعة واجالي صوتها غلط ومسبة سديته بوجها رجعت اتصلت ماجاوبت دزت على البرنامج رحت الغدير كتلها احذفي كلامها بدون ماتقرين وتسمعين هي ماكالت باطل حظرتها

شوية وشفتة دخل السيارة ونزلو غفران وغيث يبجون تلكيتهم للباب خايفة جلبوا بيه دخلتهم الغرفتهم لايبة روحـــــي اسكت بيهم غسلتلهم وبدلوا تمددت يم غفران وهي حاضنتني بخوف غيث سكت وبقى يلعب بايبادة الا غفران تناشغ تقربت الاذني تهمس

:- لاتخليني اروح بعد

- لميتها بحضني حيل
:- ابد ما اخليج هاي هي

الحد مانامت وغيث نام طفيت الضوه وطلعت من يمهم فتت للمكتب ماخذ فراشة ومتمدد
:- تاكل

:-لا ما أريـــــد

- طلعت من الغرفة حميت عشاه ورجعت اخذتة اله كعد على حيلة
:- مو كتلج ما اريد

:- سمعتك كلت اي أريـــــد

خليت الصينية يـــــمة ابتسم وهز راسة باسف
:- احس روحـــــي مكتوبلي ينشلع گـــــلبي من المهد للحد

:- هي دنيا فانية مو دار راحة وانت مؤمن والمؤمن مبتلى

:- الحمدلله على كل حال

- اكل شوية وكام اخذت المواعين وسويتلة جاي رجعت كعدت يـــــمة احجي وياه گـــــال

:- أريـــــد اعزم اخواتي البنات صارلهن مدة ما ملتمات

:- هنا لو ابيت اهلك

:- لا هنا ابيتنا اختي الهام ماتحجي ويا مرة ابراهيم وكل ماينجمعن ينغثن يمي ماينغثن

:- هاي هي التريدة غدا لو عشا

:- لا عشا بـــس احسبي حسابج ترا اهواي عدهن بنات اولد شباب اجيب سمر تساعدج

:- ضحكت. :- لا ما اريدها ام اكل محروك

- بــــس ماعندي مسواك
:- أنطــــيني فلوس وانا اتسوك

:- اني اروح الله لايعوزنا الك ....
احجي بضحك أريـــــد اغير عليه ضحك

:- خوش هاي هيه الصبح اخذج انا للسوك

:- ماشي تصبح على خير
عفتة وطلعت تمددت بفراشي. احس عليه كلساع يطلع من الغرفة ما مرتاح سمعتة فتح باب البيت طلعت ورا شفته كاعد بالمرجوحة البلكراج رافع راسة للسما ومغمض عينه

نزلت ورا انتبهلي. ابتعد وسوالي مكان بصفة كعدت ساكتة گال
:- ارفعي رجليج

- طبكت رجلية ورفعتهن وهو حرك المرجوحة ورجع وكفها گال
:- دخت

- بقيت ساكتة الساعة تقريبا 2:30
أريـــــد اسأل شنو مضوجة ومترددة
التفتت باوعلي نزل راسة على رجلية ومد جسمة على مرجوحة غمضت عيني متشنجة

:- اوخر؟

- فتحت اباوعلة هزيت راسي لا
:- شبيك ضايج؟

:- ما ادري

- حجه وخله ايدة فوك عيونة

- رفعت راسي للسما صافية والنجوم مبينات يسكل واضح كمرة والهوا طيب بــــس گـــــلبي
جان حتى النفس يوجعة

رجعت دنكت اباوع بوجهة
:- شفتها؟

:- اممم

- حجاها وجر نفس بغمج رجلي حسيتها خدرت وهو رجله يخليها على جذع الشجرة وهو متمدد يدفعها حتى يحرك المرجوحة على كيف

:- حسيت نفسك مشتاقلها؟

:- هههه

- ضحك ولم شفتة الداخل حلكة سكتت گـــــلبي يدك حيل وبخوف مديت ايدي على ايدة وخرتها من عيونة فتح عينة يباوعلي ولازم ايدي ابين اصابيعه

:- مشتاقلها؟؟

:- لاا

:-ليش من شفتها الهسه مقهور وحتى ماكدرت تنام

- الاما عـــــلي (عليه السلام)  قال ::-

احذر اللئيم إذا أكرمته

وهي انسان لئيم الابعد الحدود سترتها وحافظت على صورتها بنظر اولادها راحت سافرت وبنت حياتها بعيد تزوجت وخلفت وهسه رجعت تريد ترفع دعوى حتى تاخذهم

:- ما انطيهم

رفع عينه يباوعلي رجفت كلي احتركت حرك
:- خلي تجي تشوفهم كل يـــــوم واذا تريد تبات هنا ميخالف خليها بــــس لاتاخذهم هناك

:- حتى محكمة ما اخليها توصل تهديد بسيط الزوجها تنساهم

:- لا تحرمها منهم لو شيصير تبقى امهم كـــــافي تعب الحمل والولادة واكيد كلبها يحن عليهم مثلا كلها اذا بقيتي ابيت وحدج وتردينهم يجون يمج ميخالف بــــس ابيت اهلج لا

:- لا هو انا حركت الدنيا من رحت كتلها جهالج التردينهم يباتون هناا كل ما يرجعون متعرضين للتحرش ...

- سكتت محتارة رجع أيــــدة على عيونة وايدة الثانية لازم ايدي فوگ صدرة سكت فترة واني ساكتة. شوية كتله

:- بــــس جاوبني الصدك واذا تعتبره سؤال مو من حقي لا تجاوب

:- اسألي انا وروحي وعقلي وادريس كله حقج

:- ليش مقهور بس لان حجت عليك
لو مشتاقلها لو حنيت الايامها لو غرت من زوجها احجيلي

حجيت بسرعه وسكتت بعد ايدة عاكد حواجبة درت عيوني ما أريـــــد اباوع بعيونة يضيعني

:- كل عقلج نــــهله؟  تحجين صدك؟

احنلها شنو اشتاقلها شنو ابوية انتي هاي خاينتني تعرفين شنو يعني خاينتني بغرفتي بفراشي.....

نقهرت لان حسيت گـــــلبي متروس حقد عليها ما أريـــــد هل شي هذا الكره والحقد البگلبي ما اريده ما اعرف شلون اوصفلج بــــس ماريدلها شي بحياتي ولا اي شعور حتى الكره ما اريده

:- فهمتك ليش عصبت ماكلت شي؟

:- ما معصب عيوني انتي اعذريني اذا عليت صوتي

- تريد مايبقى بكلبك شي عليها يعني ماتكرها ولا تحقد عليها

:- اي

:- دائما ردد ((اللهم اجعلني من الكاظمين الغيض والعافين عن الناس))

- ابتسم يباوع بوجهي واني مدنكة گال
:- انتي تعرفين بهيج سوالف وتسبيحات وهاي

:- اي

:- عندي صديق يحب زوجته بــــس يحس زوجته ماتحبه شيگول حتى تحبه

- سكتت وهو مبتسم منتظرني احجي ارتبكت

:- هن كلمتين بــــس لازم يرددهن
250 مره

:- عسى ما الفين مرة شنو هل كلمتين

:- ياعزيز ياقريب
بنية كسب محبة شخص
:-شكد يرددهم
::- 250 مرة

- هز راسة موافق دار عينة ورجع باوعلي گال بشك
::-هم  مرددتهن انتي ؟

-  فكيت عيني ودرت بسرعة نظرتة وحجية متهماتني
:- هــــا هــــا نهول المنو مرددتهم اعترفي

:- ما مرددتهم

:- جذابة واللـــه اعترفي

- درت وجهي ساكتة وهو يعصر راسة على رجلية حيل عود احجي حسيت نفـــــسي تخليت بموقف مابية مهرب ضغط عليه كلش

:- الابو جــــمرة .........
اختفت ضحكتة يباوعلي ساكت كملت كلامي عيني بعينة
ردتة يحبني ويحب جهالة حتى نخلص من الضرب بــــس حتى لو اختم القرآن على راسة الف مرة مايجيب نتيجة

:- هم حبيتية؟

- هزيت راسي لا

- ابد ولا شوية

- شعورك اتجاهه زوجتك هسه نفسة جان بكلبي
ومثلك ماردت يبقى بداخلي شي عليه حتى شعور الكرهه تخلصت منه

:- انتي زوجتي هي طليقتي وشعوري تجاها مو نفسة تجاهج فرق بينهن من السما للگاع

- دنكت ساكته احتار وين اودي وجهي من أريـــــد اشرد من عيونة اذا هو بحضني ومن ادنك تصير عيني بعينة گال

:- انا اسألج هل مرة. ....تعرفين الحب شنو او حبيتي قبل من كنتي مراهقة يعني اكو مرة حسيتي بنفسج حابة شخص

- لا اعرف بــــس حب العائلة ههه

:- لاتصيرين لوتية سؤالي واضح وقصدي واضح

:- لا واللـــه غير كتلك لا

:- ابد ولا مرة ؟

:- ولامره ...ورجلي خدرت كوم راسك شثگلة

كعد وضحك بصوت
:- حقودة باقرب فرصة تنتقمين

:- لا مو حقودة بــــس أريـــــد اضحكك كوم نام نعست

كمت أريـــــد امشي ماكدر رجلي منملة رجعت كعدت وهو كعد بالكاع يضحك ويريد يعصرها وانا ادفع بيدة
:- هسه تفك بــــس لا تلزمني

:- هسه لو احن شباب جان شلتج بس فاتنا القطار بعد

:- بس لا تلزمني واحجي عن نفسك. فاتك القطار انا بعدني شباب

:- تره اكبر منج بسنتين سنة طايحة تضل سنة يعني بكدج لاتسويلي بيها انتي شباب وانا شايب

- ضحكت وهو ضحك تغير مزاجة ويعاند يريد يلزم رجلي.  كل شوية ادفع ايدة. الحد مافكت رجلي مد ايدة لزمتها وكمت گال

:- هي ماتگوم الا امدلها ايدي ودكول شباب امشي عمي امشي الشابة

:- ههههه .....
اني فتت للغرفة وهو راح يتاكد من باب السطح مقفول طفيت الضوه وتمددت بفراشي شوية واجة سد الباب وبقي واكف بالغرفة مافات للمكتب گال

:- نــــهله تثقين بيه؟

- مديت ايدي شغلت التيبل باوعتلة وكعدت
هزيت راسي اي
:- اكيد اثق بيك لعد شلون عايشة وياك

:- لاقصدي اذا نطيتج كلمة لشي معين تثقين بكلمتي

:- اي .....حجيتها بحيرة رفع ايدة اشر على الجهة الثانية من الجرباية گال

:- انام هنا وخلي ابينا مخده

- نام انت وانا انام بالمكتب

:- لا ثنينا

- دنكت محتارة وين أريـــــد اوصل اني شنو الاريدة لافاهنة نفـــــسي ولا فاهمه ادريــــــس رجعت باوعتلة هزيت راسي تمام اجة للجرباية سحب مخدة گال

:- بــــس تعالي انتي بهاي الجهه ما احبها اني

- ابتعدت للجهة الثانية وهو تمدد بجهتي وخلة مخدة بالنص يحشش عليه

:- هاي ساتر بيني وبينج

- بقيت ساكتة هستوني نمت وفزيت للصلاة
كعدتة وياي صلينا كعدت اقرأ قرآن وهو رجع نام
بعد ماكدرت انام لان خلص الليــــل حتى لو مانايمه ولا ساعة صعب انام الا اذا تعبانة كلش ....نزلت رشيت الحديقة وغسلت الكراج والدرج. شوية وصعدت بعد وكت مو مال اكعدهم. شغلت الشاشة مشتغل دعاء كميل

حضرت الجاي اخذت فلوس وعبايه ونزلت للمحل كلش حلو جو الصبح. اشتريت ومن جاي ارجع اسمع صوت بزون اتلفتت ماكو
الرصيف بيه اشجار وثيل واسمع صوتها بــــس ما اشوفها لمحتها بالنهاية تمشي وتعرج صغيرة وصوتها. كوه ينسمع. تمشي شوية وتوكف ترفع رجلها تكسر الگلب افتريت اشوفها لونها احمر واسود بــــس وصخة ومكتولة. يـــــمة احسها دكلي خذيني عفت الاغراض بالگاع وتقربت ما اريدها تشرد
:- تعالي بسبس تعاي

اجيت يمها كلش ماشردت بــــس من مديت ايدي مدري شبيها خافت. وبتعدت نزعت الجف من ايدي بسرعة واجيت يمها. خلتني الزمها شلتها مكسور گـــــلبي عليها. مكتولة وجوعانة بطنها مخسوف رجعت شلت الريوك بايد وهي بايد مشيت للبيت

شفت ادريــــــس طلع بالباب ابتسمتلة من بعيد وهو خله أيــــدة وره ركبتة يتمغط مبتسم ومن لمح شي بايدي. عكد حواجبة حجة من بعيد

:- شنو هاي راح تسوينها النه ريوگ

- اجه عليه اخذها من ايدي
:- خطيه مدري منو ضاربها لكيتها هناك يم البيت الاصفر خلي اعالجها ومن تصير زينة اعوفها

:- خاف مريضة تمرضكم اخذها للبيطري بالاول

- ماشي ....رجعنا صعدنا هو غسلها وبالمعقم مسح الجروح البجسمها من طلعو الجهال للمدرسة وغدير للكلية رحنا اول شي للبيطري وراها للسوك اتاخر على دوامة. بسرعة تسوكنا رجعني للبيت وراح

:- طبخت من وكت وخابرت سمر اجت ساعدتني
كتلها
:- ردت اخابرج وابوج گـــــال لامانريدها ام اكل محروك

اتصلت عليه تتعارك وياه وهو ينكر
ويكلها لا هي دكول. بــــس ماتصدكة الحد ماكتلها صدك انا الكلت

العصر اجن اخواتة وهو اجة من وكت. علمودهن
حبابات ويونسن حتى بناتهن بــــس يضحكن وره العشا تجمعن بالغرفة يم غـــــدير واخواتة يمي بالصالة هو طلع ويا ولدهن يشتريلهم

كعدنا لمت نسوان. والعدها شي تحجية ام تبارك كالت
::- بنيتــــي شايله همها ماخلت دكتور ماراحتله ماكو ماصار عدها طفل

:- باوعتلها ساكتة واخواتها يحجن وينطن اسماء دكاترة ردت احجي مترددة خاف تجيني حجاية بــــس نكسرت ماكدرت كتلها

:- اعرف ختمة قرأنية اذا تلتزم بيها تجيب نتيجة

:- وينها تلتزم عمي ماخلت شي ماسوتة

:- هسه اجيبها ماحافظتها على گـــــلبي ....

عفتهن وفتت للمكتب طلعت الدفتر واجيت يمها
فتحت تسجيل بتليفونها واني اردلهن
تخلي نيتها طلب الذرية. ..وتردد

رب لاتذرني فردا وانت خير الوارثين 70مرة
حملت حملا خفيفا 117مرة
كهيعص 55
فتقبلها ربها بقبول حسن وأنبتها نباتا حسنا 40مرة
يامانح يامناح 100مرة
أستغفر الله ربي وأتوب اليه100مرة
اللهم صل على محمد وآل محمد 100مرة
يامكون يا ذاری 111 مرة
يامكون ياخالق 199مرة
يخرج من بين الصلب والترائب إنه على رجعه لقادر 100مرة
يامنجح الطلبات 100مرة
رب هب لي من لدنك ذرية طيبة إنك سميع الدعاء 11مرة
قالوا لا توجل إنا نبشرك بغلام حليم ٥٤مرة
قالوا بشرناك بالحق فلا تكن من القانطين 56مرة
فبشرناه بغلام حلیم ۱۰۲مرة
وأصلحنا له زوجه انهم كانوا يسارعون بالخيرات
ويدعوننا رغبا ورهبا وكانوا لنا خاشعين 91مرة
مع تسبيح ياحسين يامظلوم 1000 مرة
والاكثار من الاستغفار وصلاة الليل وزيارة عاشوراء
لمدة 40 يوم بدون ماتقطع ولايوم تنسه

- ينطيج العافية ويرزقج ويترس حضنج واللـــه لو صارت وصار عدها طفل تاخذين بشارتج مني

:- ابتسمتلها ...... :- ان شاءالله الله يرزقها

جاي اسد الدفتر كالت اختها الهام
:- ياا جا وانا هم عدي مشاكل اطيني شقرة شگول

ام تبارك ::- جذابة خيه ماعدها شي

:- لا وعلي عدي رجلي يموت على النسوان موتني

نــــهله. ::- ههههه كلبت بالدفتر اتذكر كاتبة هيج شي اغلبهن ماخذتهن من امي

لكيتها فتحت تليفونها تسجل

يا قهار 1000 مرة
يامعين الضعيف يا الله
100 مرة
بنية ابعاد الزوج عن النساء

ميس ::- لعد وانا هم اخت زوجج هم أنطــــيني شي

نــــهله. ::- شبيج انتي خيه شو جنج ورد عين الله عليج

:- مو الي عندي ابني الجبير دوم. ضايج ومكتئب ما ادري شبيه

- ويلتزم ؟
- اي اي بــــس علميني

يخلي ايدة على صدرة ويگول

(( فمن يرد الله ان يهديه يشرح صدرة للأسلام
ومن يرد ان يضله يجعل صدرة ضيقآ حرجا كانما يصعد في السماء كذلك يجعل الله الرجس. على الذين لا يؤمنون ))
سبع مرات

(( قال رب اشرح لي صدري))
سبع مرات

((  الم نشرح لك صدرك ووضعنا عنك وزرك الذي انقض ظهرك ورفعنا لك ذكرك فإن مع العسر يسر أن مع العسر يسر فإذا فرغت فانصب والى ربك فارغب ))

سبع مرات

ام تبارك: :- عليج الله ماعندج شي بعد متحاجية ويا ابوهم

:- طبكت الدفتر عفتة على جهه مبتسمة وهن يضحكن ويسولفن كتلها

عن الامام الصادق عليه السلام اوصى بسورة المعارج
اقري سورة المعارج 80 مرة بنية الاصلاح بينج وبين الشخص التردينة

..سجلن كلشي وبقينا كاعدين نسولف ل11 يله راحن .........

يتبــــــع⋆𓍯

🚫مهم

امتحاناتي تبلش يـــــوم 27/8
راح اوقف القصة حتى اگدر ادرس وارجعلكم يـــــوم 11 بشهر الـ 9 يعني اغيب عنكم بــــس 25 يـــــوم
اتمنى تعذروني احب التزم بوقت التنزيل بس هل مرة انجبرت اترك القصة فترة ❤️

أيـــــــلول⋆𓄼𓂁 🌿