رواية أجرام مستباح لثلاث ندبات الفصل الخامس وأربعون 45 - بقلم الكاتبــة ايلول

مساء الخير ...

#أجرام_مستباح_لثلاث_ندبات

                                              بقلم الكاتبة أيلول

     ins: t8_fe3 للتواصل

𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒

الحِزن متفَطِر بِـ روحي صَعب يلتَم.

..................................................................

اباذر ::- جريت أبــــــهر الصدري فقد يدك على گلبه ويصيح

::- ولك ضيعتكم تبهذلتوا وتعذبتوا ما لميتكم ما خلصتكم وحافظت عليكم ضيعتكم اباذر گـــــلبي يوجعني واللـــه گـــــلبي يوجعني

- نزلت أيــــدة من گلبه وجريته الگلبي يشهك بحضني
::- اشش فدوه اروحلك أبــــــهر يا عمري لا تحجي هيج ما بيدك شي يا روحـــــي انـــتَ

الأبـــــهر ::- اااخ يا روحـــــي يا دره يا خوية

اباذر: :- رفعت وجــــهة امسح دموعه ويمسح دموعي

::- ابهري نجمعنا نجمعنا بعد 17 سنه احنا اخوة اباذر والابهر ودره رجعنا نجمعنا .

- سحبني الصدره يرجف ولازم ايد دره اباوع وجها تعبان يم حنكها اكو اثر ابتعد الأبـــــهر افتر للجهه الثانية طلع ايدها رفع الردن منها ابتسم ورفعها الي

::- شامتها باوع.

اباذر ::- ما اتذكرها

::- ههه انا اتذكرها من جانت تبجي لان نگلها دوده على ايدج اتذكر كلشي اتذكر من امي تبوسها هيج

- حجه ودنك على ايدها باسها ودموعه توكع عليها مسحت وجهي ما مصدك نجمعت باخوتي گـــــال

الأبـــــهر ::- اباذر شنو انگول من تكعد خاف ما تصدك ما توقع تتذكرنا شلون

اباذر ::- فركت وجهي محتار اكثر منه وهو يمسح بوجها ويعدل بالفراش طلع غسل ورجع كعدنا كدامها ثانين ركبنا ثنينا ودموعنا مغطيه وجهنه

بدت تتحرك عاصره عيونها حيل اباوع الابهري ايده ترجف مخليها على رجليه لزمتها عاصرها بايدي تحسر بقهر هد حيلي

فتحت عينها بوجع تتلفت بــــس لمحتنا كاعدين كدامها فزت مخروعه ورجعت ليوره تصرخ وتلم بنفسها تغطي بجسمها والابهر انتهى حجي ماكدر يحاجيها

دره ::- منو انتم شتردون مني منو منو

اباذر ::- اشش اشش بــــس على كيفج بــــس نحاجيج ما نريد شي

- نحشكت بالزاوية تصرخ وحاضنه رجليها على گلبها مــــحد كدر يحاجيها الكلمة نغص بيها شلون نكلها احنا اخوتج كام الأبـــــهر على حيله يريد يروحلها تخبلت تبجي وتتوسل

::- لا تسويلي شي لا تسويلي شي

أبــــــهر ::- اااخ يا روحـــــي يا عمري موتيني ما اسويلج شي يا نظر عيني باوعيلي ما تردين تعرفين اهلج منو انتي مو يتيمه؟

اباذر ::- سكتت تباوع بوجهنه كمت يم الأبـــــهر تقربنا كعدنا كدامها نتوسل تسمعنا كتلها

::- باوعي انتِ اسمج الحقيقي دره

- هزت راسها اي تمسح بدموعها والابهر رفع راسه ليفوك مختنك دكيت على رجله

::- باوعي دره احنا اخوتج انا انا اباذر وهذا الأبـــــهر اخوانج

- فتحت عينها مصدومة ما مستوعبه تهز براسها لا زحفت لجهه الثانية تريد تشرد لزمتها وهي تصرخ لميت ايديها ابين ايديه اتوسل بيها

::- بــــس اسمعي واللـــه ما نأذيج اخوانج احنا اخوتج

الأبـــــهر ::- بــــس اسمعي مني دره بــــس خلي نسولفلج لا تصرخين فدوه اروحلج

اباذر ::- ما تنطي مجال بــــس تصرخ وتدفر عجزنا نهديها حتى تفهم نصدمت من الأبـــــهر سحب سلاحه وهي شهكت تباوعله وترجف دموعه يحركن بروحي درت للأبهر ماقابل خله سلاحة براسة وصيح عليها بحركة

أبــــــهر ::- بــــس اسكتي خلي افهمج ولج عمري خلص وانا ادور عليج نهد حيلي على فراگج نهد حيلي باوعي طلعي ايدج اباذر

- دار عينه الي وهي بــــس تشهك خايفه وترجف مدينه ايدينا الها وسحبت ايدها بصف ايدينا

أبــــــهر ::- باوعي اخذونا عصابة من ماتوا اهلنا وباعونا كلمن الشخص فرقونا وقبل لا نفترق انا حركتكم وحركت ايدي باوعي كلنا عدنا نفس الحرك

اباذر ::- سحبت ايدي طلعت تليفوني بسرعه الصور الخلاهن عندي الأبـــــهر مصورهن طلعتن بسرعه اراويها

::- باوعي باوعي هاي انتِ من جنتي طفلة باوعي هاي ثلاثتنا وهاي امنا وابونا باوعي واللـــه اخوانج ما تتذكرين بــــس حاجيني ماتتذكرين

- تهز راسها وتبجي خايفة من عدنا جرت ايدها ولمت روحها تبجي وتصيح

::- جذب جذابين جذابين

أبــــــهر ::- باوعي دره ..

اباذر ::- رفعنا ايدينا بوسنا اصابعنا ونزلناها على گلبنه مثل ماعلمناها

شهكت فاتحه عينها حيل كالت وهي ترجف وتناشغ

دره::- شنو شن شنو اسمكم

الأبـــــهر ::- الأبـــــهر الأبـــــهر واباذر هــــا تتذركينا تذكرتينا دره تذكرتي ؟

دره ::- اخواني؟  لا تجذب ما عندي اخوان تعرفونها هي جذبت عليه قبل لا تموت هــــا وانتم تعرفونها مو صح تعرفونها جذابين وتعرفوني اسوي هيج تعرفون اسوي هاي الحركه مال الايد

الأبـــــهر ::- باوعي نثبتلج احنا اخوانج احجيلنا منو هاي المره حتى نفهم ونفهمج

دره ::- مره ما اعرف شنو تقربلي جانت تجدي بيه بالشارع اتذكر عمري 9 سنوات وهي تمرضت كالت اول ما اشتريتج جنتي تبجين على اخوانج اسمهم اباذر والابهر بــــس انا ما اتذكر شي ما اتذكر ما اتذكر ما اتذكر غير الوجع ما اتذكر غير الضرب والكتل ما اتذكر

اباذر ::- بجت تصرخ جراها الأبـــــهر الصدره يبجي وياها وكفت ارجف صعبه واللـــه صعبه ما حمينا اختنا ولا حافظنه عليها رجعت كعدت يمهم مهدود حيلي .

- سحبت ايدها ابوسها ::- يا عيون اخوج يا نظر عيني

- سكتت دفعتنا ابتعدت صاحت ::- بعديش طلعتوا حقيقة وانا الحسبتكم وهم جنت كل يـــــوم اكول يجوز حجيها صح وعندي اخوان يجوز راح يجون ويخلصوني بــــس عفتوني عفتوني اتعذب عفتوني

الأبـــــهر ::- جنت ادور عليكم باوعي حتى على اباذر جنت ادور لكيته ونوب لكيتج دره عمري انتِ روحـــــي انتِ بــــس لا تبجين باوعيلي خلي احاجيج

اباذر ::- فقدت ملخت روحها ما تخلينه نلزمها جرت ملابسها طلعت رجلها وكف النفس ببلعومي وانا اشوف رجلها اثر الحرك بيها صايرة عباره عن تجاعيد كلها محتركة والابهر جمد يباوعلها صرخت تبجي وتصيح

::- وينكم عني وينكم بعديش طلعتولي من شبعت ظيم

اباذر ::- حرف ماكدرنا نحاجيها شنو تحجي حقها مو كفو وحميناها بجت وصرخت الحد ما نهد حيلها سندت راسها على حايط بــــس تشهك
مسحت عيوني. اباوع للابهر أريـــــد يحجي أريـــــد يقنعها بأي طريقة مسح وجــــهة فتح قميصه غمضت عيني گـــــلبي يوجعني من منظر جسمه

شمر القميص وهي مغمضه باوعلي اشرلي بعيونه انزع قميصك نزعته ودرت اراويها ظهري وهو هم غمض عينه كالها

::- هذا التحملته حتى اشوفكم دره يحركوني وما اصيح لان يهددوني بيكم لازم اتحمل الوجع واسكت واباذر هم ينضرب ويسكت حتى يلكانا دره ما متقصدين نضيعج غصب عنا ضعتي

اباذر ::- التفتنا عليها تباوع ساكته مسحت وجها ودارت عينها منعدنا همست بصوت هادئ

دره::- ما اتذكر شي ما اعرف منو اهلي كل الاعرفه اسمي دره  جنت عد مره اسمها اسمهان تنومني على كارتونه بالشارع وتكعد يمي رافعه ايدها وتصيح مريضة بنتي مريضة والناس تشمر عليها فلوس ربع وخمسمية

للظهر تاخذني للبيت سحل عدها جهال اكبر مني ثلث ولد وثنين بنات وزوجها سكير ويريد فلوس جانت من ترجع تطبخلهم غده بــــس ما يخلوني اكل وياهم اليبقى تشمره بالزبل واروح اني اكله بــــس حتى اشبع

صغيره اني حتى الطباخ ما الوحه بــــس تكطعني اذا ما نظفت واشتغلت للعصر ترجع تاخذني وتطلع للشارع لو للسوك هم تنومني على كارتونه
الحد الليــــل ترجعني سحل تموتني من الكتل حتى من تنقهر اذا جهالها ما يدرسون تعوفهم وتجي عليه تضربني اذا زوجها تعارك وياها تجي تكتلني الي

نعرفت بالسوك والناس كامت ماتنطيها فلوس
غيرت مكانها وقبل لا نوصل تلزمني تضرب راسي بالحايط حتى يطلع دم وتلف راسي بوصله بيضة
واذا الدم ما عبر على الوصله ترجع تضربني الحد ما يبين

الأبـــــهر ::- اشش موتيني اسكتي اااخ يا روحـــــي عمت عيون اخوج

دره ::- ههه لا اسمع بعد اسمع الجاي هسه تكلها انا اخوج باوع مره سمعت اكو مؤسسة تساعد اذا عدها طفل مريض تدفعلها فلوس العلاج ههه تدري شسوت

اباذر ::- مسحت على گـــــلبي ما اكدر اتحمل كلامها اخذت روحـــــي طلعت رجلها وهي تمسح بدموعها كالت

::- بالليل كالتلي فوري مي بالجدر رحت شعلت الطباخ وترست جدر كوه اكدر ارفعه للطباخ ضعيفه وصغيره وبقيت واكفه يمه رغم نعسانه أريـــــد مثل كل يـــــوم انام بالمطبخ بــــس اخاف تجي وتضربني المي كام يفور اجت مستعجله شافته يفور لزمت وصلت مسح شالت بيها الجدر فاتت للحمام  وصاحت تعالي طرت من الفرح عبالي راح تسبحني. مثل جهالها ركض دخلت والضحكة على وجهي سدت الباب وكعدتني على بلوكة مخلينها بالحمام حيل فرحانه لان هي ابد ما تسبحني بالبوگة اغسل النفسي جرت الطاسة وسحبت رجلي تباوع بعيني كالت اذا صرختي اذبحج شالت المي اليفور بالطاسة وذبته على رجليه صرخت ادفر واكمز وهي تسحل بيه خنكتني بجسمها وخلت رجلي ببطن الجدر

اباذر ::- غطيت وجهي بايدي ابجي والابهر كام من يمها كعد بالزاويه الثانيه يصيح ويبجي بحركة جريت رجلها المحتركة ابوسها واتوسل تسكت وهي تشهك تباوع بوجهي ترجف وتصيح

دره ::- لا اسمعوا ليش اسكت اسمعوا عافتني بالحمام وطلعت خلتني الوب ومحتارة بالنار والوجع الماكل روحـــــي بقيت مخليه رجلي بالمي البارد والليل كله مانمته من البجي والصبح
من كعدت  وشافت رجلي كلها صايره فركاسات جبرتني تزلغهن وحتى مو بوصله نظيفة بمال المسح لزمتهن وصلختهن. لفتها واخذتني حتى ينطونها كم فلس وهم ما انطوها غير العلاج
رجعتني للبيت وحتارت شتسوي بيه من الكتل ورجلي تزلغها تصدك جهالها جانوا يكيفون ويضحكون من يشوفونها تعذبني بــــس الجبير جان يكلها كـــــافي صوتها دوختنا ختولي

بقت تجدي بيه بالشارع وراها كامت تطلعني وياها ننظف بيوت وهم شافت ماكو نتيجة ما استفادت مني علمتني اسوي كبه وتجبرني من الصبح الحد الليــــل انا الف هيج حصلت فلوس وهي كاعده حيل استفادت وكيفت بــــس مابطلت من الكتل مره اشتهيت الحشو مال الكبه بــــس ردت اتذوق طعمه هيج واللـــه هيج هلكدوتها اخذت

اباذر ::- رفعت ايدها لامه اصابعها وتأشر دموعها على خدها كملت كلامها مختنكة

دره ::- وهي شافتني اخذت خلت ايدها بحلكي وجبرتني اتقيئ وباضافرها زلغت لثتي بحيث ما اكدر ابلع ريك من كد ما ورمن وحركتني هنا باوع هذا الاثر

- اشرت على فكها. وكملت ترجف

::- الحد ما نصابت بالسرطان وبقت بالفراش مــــحد الها وحتى اني اكرهه حيل ما اكدر ادير بالي عليها بناتها يتململن منها يـــــوم منهن صاحت عليه فتت يمها كالت من جنتي صغيره جنتي تبجين على اخوانج اسمهم اباذر والابهر وكل يـــــوم بالليل تبوسين ايدج وتخلينها على كلبج تبجين
انتِ عندج اهل بــــس ما اعرفهم انا مشتريتلج من غير مره .

هي تحجي بــــس اني ما جنت اتذكر شي وحتى بوسة الايد ما جنت اعرف شنو سببها ابالي متعوده عليها

الأبـــــهر ::- من مات ابونا امنا علمتنا نسوي هيج

دره ::- ما اتذكر شي

اباذر ::- باوعي واللـــه نعوضج صح العمر الراح مو هين والوجع العشتيه ما ينسي بــــس ننطيج عيونا وروحنا ونعوض على كل ساعة بقيتي بيها بعيدة عنا

- ضحكت مسحت دموعها والابهر رجع كعد يمها ماد رجله ويمسح على رجلها المحتركة كالت

دره ::- اصلاً ما راح تتقبلون اخت مثلي هههه راح ترجعوني الهم

اباذر ::- هزيت راسي لا مسحت وجها تتنهد مبتسمه بوجع كالت

دره ::- من ماتت اسمهان صار الكل يضربني ولدها بناتها زوجها بقيت اسوي كبه لان يردون مني فلوس اذا ما سويت يحتارون شلون يعذبوني
الحد ما صار عمري 12 ولدها كبروا وكاموا يطلعون يشتغلون بــــس فلوس البيت لازم اني اطلعهن من شغل الكبه ولازم اخدمهم واحد واحد واتحمل ضربهم وتلذذهم باهانتي من ينزلوني ابوس رجليهم هواي فكرت اشرد بــــس اخاف من الشارع اقلها هنا بيت ومحافظة على نفـــــسي اذا طلعت انوكل ما جنت اعرف بنفس البيت المحتمية بيه انوكل

بايام الشتاء البارده جان ابنهم الجبير احمد اسمه
راد عشا وجاي اسويله واخوه الثاني صاح عليه افرش افراشة ما رحت لان اكمل العشا بيومها كتلوني ثنينهن وشمروني بالطارمة بنص البرد كعدت ارجف وابجي الحد ما اجه ابوهم تعارك وياهم ودخلني للبيت بسرعة تمددت بالمطبخ ارجف بــــس اريد اغفى شوية وحسيته يرفع بملابسي بعمر ال12 سنة اول اغتصاب تعرضتله
من ابوهم عافني بالگاع وراح ولا كأنو مسوي شي

اباذر ::- زحف الأبـــــهر يسد حلكها بأيده يرجف اصعب من كلشي عشناه من تسولف دره على العاشته احس تحرك روحـــــي وتطحن بگلبي حجاياتها حسيت النفس ضاگ بصدري

نزلت ايد أبــــــهر تباوع بعينه كالتله

دره ::- وراها شردت ولزموني الشرطه على اساس انا بايكه منهم فلوس وشارده طفله عمري 12 وهم يضحكون عليه بالمركز ويلزمون بجسمي يدفعوني من واحد الواحد يفشرون واني اتوسل يعوفوني واحلف ما بايگة شي

الحد ما اجه احمد ورجعني للبيت شبعني كتل بــــس بالوقت نفسه حماني من ابوه كام يفوتني انام بغرفته صح يضربني بــــس المهم ماخلاني بره جنت مكيفه وكمت اشتغل بذمة وضمير حتى ارضيهم ومحد يمد أيــــدة عليه بــــس نفس الشي الحد ما تزوجن البنات ثنينهن وابوهم مات ارتاحيت وخلصت

هم يلتهون بشغلهم ومحد يمد أيــــدة عليه يلكوني محضرتلهم اكل وملابس والبيت نظيف وكله من شغل الكبه عمري 16 ههه اجه احمد سكران تعرضت للأغتصاب للمره الثانيه وقتها انتهي كلشي الموت صار امنيتي

اباذر ::- كـــــافي فدوه اروح لعيونج كـــــافي

دره ::- هاي اختكم متعرضة للاغتصاب مرتين شارده ثلث مرات وبالثلاثة تتعرض للانكس من الاغتصاب ويرجعونها تزوجوا هم وانا اخدمهم واخدم نسوانهم اليحيرن شيسمعني من كلام وشنو يعاملني وهم زادوا ما نقصوا بالضرب والاهانه بالمنطقة اسمي الخدامة مالتهم هههه اخوهم الصغير راد يبعني الصديقة بــــس احمد ماقبل منو تشتغل وتنظف شنو التردون تسمعونه اكثر شنو تتقبلون هيج اخت همممم تتقبلوها لو ترجعونها منين ما خطفتوها

الأبـــــهر ::- احنا المقصرين احنا الغلط وانتِ الصح شنو التردينه روحـــــي ترخصلج انتِ اليا ريت تتقبلين اخوان مثلنا اخوان مو كفو يحمون اختهم وضيعوها اخوان تحملوا تعذيب سنين حتى يلگوها دره يا عيوني انتِ يا روحـــــي تعالي الحضني تعالي للابهر رديلي روحـــــي الفرفحت بفراگكم

اباذر ::- سحبني من ايدي بصفه ورافعلها أيــــدة مثل الطفل مديتلها ايدي هم تباوعلنا وتبجي نتوسل النظرة من عيونها مسحت دموعها مدت ايدها النا بسرعه سحبناها الحضنه لمانا الأبـــــهر بحضنه  صوته راح وهي تعــــبت وتبجي بقهر هيج بقينا بحضنه الحد ما سكتنا وبس هي تشهك

الأبـــــهر ::- اخذ حگج وحگج وحك لوعة گـــــلبي عليج

اباذر ::- مسحت دموعها اتأمل وجها وعيونها

::- كل ايد نمدت عليج نعاقبها رجعوا اخوتج يا نظر عينهم.

- غمضت عينها ساكته رفعت راسي من كتف الأبـــــهر سحبت الغطا عليها ورجعت راسي الحضنه بصفها هاي هي هاي هي ما أريـــــد شي  من الدنيا بعد هذا الحضن الجنت احلم يرجع يلمنا هاي الايد الجنت احلم ترجع تنلف عليه
غمضت عيني براحه لازم ايدها .الحد ما غفيت

شوية وفزيت عبالي احلم طمنتي ابتسامة الأبـــــهر كاعد بصفها يباوع بوجها ومخلي راسنا على مخده درت عيني الها رفعت ايدي الخدها وعلى الاثر البحنكها مسحت عليهن ودرت عيني للأبهر كعدت اباوعله

::- أبــــــهر راح اطلع القاء قبض عليهم اخيسهم بالسجن

- هز راسة لا وعينه ما فاركت وجــــهة دره نطق وهو يباوعلها

::- اكتلهم واحد واحد

- خزرتهه وكمت سحبته من أيــــدة طلعنا من الغرفة اعصابي ترجف وهو هادئ حيل لزمت وجــــهة بين ايديه

::- ديربالك تسوي هيج أبــــــهر لا تضيعنا من جديد

::- اول وتالي انحكم اعدام خليني اصفي حسابي واخذ حگ لوعتنا ولوعت كل طفل

::- مو من حقك فهمت مو من حقك اكو سجن اكو عقوبة أبــــــهر لا تتورط اكثر لا تكسرني خليني اعرف اطلعك من الانتَ بيه

- سكت يباوع بعيني خابرت كدامه على ابو اسمر گـــــال نفذ ورجعت نطيت خبر للولد سديت الخط اباوعله تحسرت فرك وجــــهة بحيره عاصر عــــــيونة حيل

::- واللـــه ما اخليهم يطلعون من الحبس وانتَ  لا تسوي شي من وراي أبــــــهر فدوه اروحلك لا تعوفنه بعد كـــــافي العشناه كـــــافي خلي ينلم شملنا

-رفع راسه ابتسم لزمني من ركبتي عينه ما فاركت محجر عيني گـــــال

::- لكيتكم بعد يكفي انتم تعيشون بخير مو مهم

::- مهم مهم ما الك حق تكسرنا بخسارتك أبــــــهر تعوف كلشي وانا انظف كل سجلك

- دنك هز راسة لا جريته حيل فقدت بعد ما اكدر اخسر واحد منهم گـــــال

::- مطلوب الاكثر من عصابة اذا ابقى قريب منكم تتأذون وشغلهم شي مرتبط بشي واغلبه على طريقنا اذا ابتعدت حتى الوياي يصيرون ضدي مجبور ابقى بنصهم بالاضافة اكو اطفال بين فترة وفترة يجيبون وجبه اذا ما خلصتهم من هسه مصيرهم مثلي مجرمين ويغطون بالاجرام

اباذر ::- هههه يعني من الاخير هم تريد تعوفنه

- التفتنا على صوت دره فتنا يمها بعدها مستغربة منعدنا واحنا نريد كل شوية نحضنها كالها الأبـــــهر

أبــــــهر ::- عندج هوية شي حتى يجيبونها الج بعد ما ترجعين الهذاك البيت

::- ما عندي شي

اباذر ::- الهوية مالتج عدنا بالبيت

- رجعت فتحت تليفوني طلعت صورة الهوية ودرته عليها مبتسم

::- باوعي اقري اسمج باوعي

- بالهفه احجي والابهر مبتسم وياي هزت راسها ابـــــتسمت باوعت بوجهنه

دره::- ما اعرف اقرأ

- رخت ايدي الحد ما نزلت التليفون وهي عينها بعيني تقرب الأبـــــهر سحب راسها الصدره ساكت بــــس يبوس بشعرها ويشمها غمضت عينها ونزلن دموعها من جديد.

غـــــدير ::- عبرت البيت عـــــمو مقهوره على حال جــــمرة وعمه مكابلتها وتبجي اربعة وعشرين ساعة .
الدكتور طلعلها الف مرض نفـــــسي منهن اضطراب ثنائي القطب ويكلهم تتعالج بالمستشفى رفضوا ثنينهم واخذوها الغير دكتور هم شخص حالتها بهذا المرض وبدأ وياها جلسات علاج جان يحذر عــــمة دائماً ويكلها ديري بالج لا تخلين يمها شي حاد ممكن تفكر بالانتحار .

فتت يمها للغرفة جانت ساكته متمدده وبس فاتحه عينها كعدت يمها خايفة احاجيها شي وتنفعل مسحت على ايدها بيه اثر كانولا غمضت عينهــــا وجرت نفس بغمج دارت محجر عينها الي همست

::- تعرفين شي عن الأبـــــهر؟

- هزيت راسي لا رجعت غمضت عينها ساكته

عفتها وطلعت يم عــــمة كاعده تدرس الجهال وكل شوية تصفن لبعيد وعيونها يدمعن اباوع الغيث مراقب عيونها بــــس يلمحها تصفن يحاجيها شي حتى تنتيه وما تبجي كملت دروسهم فاتوا الغرفهم باوعتلي ابـــــتسمت تسأل

::- شلونج غدوره مرتاحة عــــمة؟  اعذريني ملتهيه وحتى ما اسأل عليج

- ابـــــتسمت لزمت ايدها ابوسها
::- الحمدلله بخير لا يضل بالج شنو شتشوفين جــــمرة ما احسن؟

- دارت عينها للغرفة بقهر رجعت باوعتلي وحجت بحسرة

::-  ربج كريم ما يعوفها هذا خوش دكتور فاهم وجاي تندمج وياه الشي الما حبيته يكرهها بالابهر صح أريـــــد تخلص منه بــــس ما أريـــــد تكرهه ما أريـــــد بنتي تحقد

::- واللـــه عــــمة كل الصار صدمة

- هزت راسها بأسف ودخل عـــــمو ابتسم من شافني گـــــال

::-:مو انا اكول البيت منور ونوره طاغي على الشارع

غـــــدير ::- رفعت ياختي متباهيه كمل كلامه وهو يباوع العمه

::- طلعت نــــهله كاعده بالصاله ونورها واصل للشارع

غـــــدير ::- عـــــمو بــــس مشاعري نسحلت بالكاع لو شويه تراعيها

- ضحكو ثنينهم سأل على جــــمرة فات يمها وعمه بقت تلوب تخاف من جــــمرة تفشر على عـــــمو .

جــــمرة ::- المرض النفسي اصعب من مرض الجسد جنت ارتاح من احجي للدكتور وبالوقت نفسه من ارجع للبيت اتندم افكاري متشتته ما اعرف شنو الاريده اشتاقله حيل وحاقده عليه اشتاق الحضنه للمسة أيــــدة لسوالفه الاهتمامه

ومن احجي للدكتور العشته واتذكر شكد صعب احقد عليه خاصه بالوقت الخلاني مدمنه وبالوقت القسام عذبني بيه جان يمر الليــــل وانا بــــس صافنه حتى لو انام شوية وافز مخروعه وتعبانه

الشخص الوحيد الكاسر گـــــلبي امي من اسوي نفـــــسي نايمه تجي تبجي يمي وتلوم نفسها
فزيت من افكاري على فتحة الباب دنكت عيني من لمحتة زوجها تقرب كعد يم رجليه لميتهن وكعدت منزله عيني

::- شلونج عـــــمو جــــمرة؟

- هزيت راسي ساكتة گـــــال

::- تجين نطلع بالسيارة شوية تغيرين جو

- رفعت عيني اباوعله ساكته ابتسم وجر نفس

::- باوعي جــــمرة بابا انتِ هسه من عائلتي وانا انسان مخلي عائلتي بالمقدمة افضل راحتهم على كلشي احب اوفرلهم كل اليحتاجونه احب يدرسون ويعتمدون على نفسهم بالوقت ذاته

يمكن انتِ حاقده عليه وكارهتني بــــس أريـــــد تفهمين شي واحد انا ما ماخذ امج منج هي امج قبل لا تكون زوجتي تحبج اكثر من كلشي

تفضلج عليه وعلى بيتها وجهالي تعوفني وتعوف الكل الخاطر عيونج شوفيهــــا مخلصه الليــــل تبجي على حالج وانتِ اذا تبقين محبوسة بالغرفة ما راح تساعدين نفسج وتتخطين

انا جنت اخاف منج ودائماً اكلها قوة جمره تخوف ما تخيلت يجي يـــــوم وتضعفين هل شكل وينها الجانت معيشه عائلتها تشتغل وتدرس وتدير بالها على اهلها معقولة نفسج جــــمرة

جــــمرة ::- دنكت راسي احس مو دموع جمر ينزل من عيني رفع وجهي بين ايديه مسح وجهي مبتسم

::- ارجعج للكلية بابا؟ 

- هزيت راسي اي ::- من اكمل علاج ما اريد اداوم وانا هيج

::- تدللين بعيوني واذا ما تحبين تبقين بالبيت اوفرلج شغل بعد الكليه هــــا؟

- سكتت مدنكه ورجعت باوعتله

::- اسألك شي؟

- ابتسم مسح على شعري ::- اسألي اليعجبج

::- أبــــــهر راح ينسجن؟

::- تردين ينسجن؟

- سكتت گـــــلبي يدك حيل گـــــال

::- ينسجن اصلاً هسه واحد مختلف على الثاني وواحد يعترف على الثاني متغاضي عنه لان يدور على اخته وليوم لكاها

::- لكاها؟

- ابتسم هز راسة اي دنكت احس گـــــلبي طار اتخيل فرحته ابـــــتسمت گـــــال

::- فرحتي؟

::- اي جان يبجي عليها ودائماً يفكر بيها

- سكت وكف وسحب ايدي

::- تعالي يم نهوله ام دميعه ما طالعه عليج قوية بس تبجي

::- ديربالك اسمعك تصيح عليها

- التفتلي مبتسم وسأل ::-شتسوين؟

::- اذبحك

::- تنحكمين اعدام؟

::- ميخالف

- ضحك طلعنا للصاله امي تباوعلنا وهو يردد

::- قوية قوية بنت نــــهله بعد

- امي وغدير واكفات يياوعن تقربت امي بهدوء حضنتني وهو صاح

::- شوفيها جــــمرة شوفيها هم بجت

- رفعت راسي من صدرها مسحت دموعها مبتسمه

::- شبيج ماما باوعيلي ما بيه شي صرت زينه

- احجي واني بنفسي ما مقتنعه لان هو هيج مرات احس بنفسي كلش زينه وما بيه شي ومرات احس روحـــــي مريضة واريد اصرخ واعارك أريـــــد اطلع منهم أريـــــد ارجع يـــــمة مرات افكر بالموت.

غدير ::- دك تليفوني التفتوا كلهم وياي جاوبته مبتسمه كبل گـــــال

::- بالبيت انتِ غـــــدير؟

::- لا يم بيت عـــــمو

::- غدير لكينا دره ههههههه جبتها وياي غدوره

- جمدت ساكته سد الاتصال بــــس كتلهم لكه دره ورجعت للبيت ركض مدري شبيه مرتبكة وكفت بالمطبخ منتظرتهم الحد ما شفته فتح باب الكراج دخل السيارة طلعت وكف بباب المطبخ اباوعلها كاعده يـــــمة ابـــــتسمت گـــــلبي دك حيل الفرحته ولهفته عليها افتر فتح الباب نزلها تلكيتها وهو طاير من الفرح يضحك ويكلها

::- دره هاي زوجتي

- ابـــــتسمت هي ساكته خجلانه وايدها ترجف دخلت جوا وركض حضرتلهم عشا اباوع البسام كل شوية يكوم من يمها يختل بالحمام ويرجع عــــــيونة حمر دم يكعد.يسولف وياها صبيتلهم وهو يريد يوكلها لهفته عليها تجنن ما اكلت شوية وبتعدت متشنجة وخجلانه حيل عفتهم وكمت اسوي چاي رجعت لكيتها بحضنه ويبجون ثنينهم وهي تشهك وتصيح

::- وينكم عني ليش عفتوني انذل ليش

- سديت الباب وطلعت من يمهم عفتهم براحتهم
نص ساعة وطلع بــــسام عــــــيونة حمر وميت قهر كعد يمي بالصالة گـــــال

::- نامت

- تقربت كعدت كدامه حضنت وجــــهة بأيدي ::-ليش مقهور هاي اختك لكيتها بــــسام شبيك

- بقى مدنك راسه احس دموعه يوكعن بأيدي نزل راسة الكتفي يشهك

::- ولج شايفة الموت اختي شايفة الموت

- گـــــلبي تكطع عليه شوية وكام فات يمها مد فراش وتمدد بصفها اني هم سحلتلي فراش واجيت يمهم.
..

نــــهله ::- شكد فرحت بضحكتها بقيت كاعده يمها مشغلة دعاء كميل واباوع الوجها غمضت عينها كالت

::- روحـــــي نــــــامي ماما

- دنكت بست خدها وطلعت لكيت اسمر بالمطبخ يسوي اكل ابتسم رفع أيــــدة يهوس بصوت ناصي

::- باجر اطلك

- ضحكت عفته وفتت للغرفة ادريــــــس نايم هستوني تمددت وسمعت تليفوني يدك يم راسي سحبته وطلعت من الغرفة شفته رقم فتحت خط ساكتة صوت هواء جاي اسد الخط وسمعت صوته يحجي بخنك

الأبـــــهر ::- عــــمة بــــس اسمع صوتها

- سكتت رجع گـــــال

::- بغلاتها عندج أريـــــد اموت خليني اشوفها

::- بنتي جاي تتعالج فدوه العينك عوفها

- سكت صوته راح يريد يحجي مختنك كح وكال

::- بالباب انا خليني لو بــــس المحها لو بــــس اسمع حرف منها

::- أبــــــهر عمه وليرحم والديك عوفها

جــــمرة ::- أنطــــيني؟!

- التفتت امي عليه فازة والتليفون بأيدها اخذته منها

سكت هادئ

::- أبــــــهر

- ماحجة بقي ساكت اسمع صوت نفسه وخنگتة

جــــمرة ::- لكيت اختك؟

الأبـــــهر ::- وضيعتج

- حجاها وشهك حيل سكتت اباوع بعيون امي

::- جــــمرة أنا بالباب

- سديت التليفون ورجعت للغرفة بــــس البس شال والقمصله اجت امي وراي كالت

::- وين جــــمرة

::- بالباب ماما اشوفة واجي اخر مره

- سكتت تباوع بعيني شفتها طفت الكامرات طلعت اباوع لمحت سيارته قريبة على الركن لميت القمصلة عليه ومشيت مدنكة الف روحـــــي حيل بيها والهوا البارد يكص خشمي. قبل لا اوصل فتح الباب صعدت ساكته وهادئة حرك السيارة رجع ليورة بمكان ما بيه ضوة شغل ضوة السيارة الفوك راسنا ثنينا ساكتين

::- شلونها دره؟

- ضحك التفتت عليه هز راسه زينه وبقى يباوع ليگدام دنك جر نفس بحسرة ورفع راسة الي صوته راح مختنك بالكلمه وعيونه مركزات ويا رمشة عيني

::- مشتاقلج جــــمرة

- ابـــــتسمت احس دموعي تجمعت بعيني

::- جاي تتعالجين؟

::- اي شخصيتي متقلبة هسه عاقلة وبعد ساعتين مجنونه وراها ما أريـــــد اي انسان غيرك وراها النوم يحاربني والافكار تهاجمني
يعني هاي مخلفات اعمالك والعيشتنياه

- بلع ريك نزل راسة ورفع أيــــدة يريد يلزم ايدي
ابتسم ايدينا ثنينهن يرجفن قربها لزمهن حرك أيــــدة فوكهن يدفيهن

::- أريـــــد اموت على فراگج

- رفعت عيني اله گـــــلبي يدك حيل برودة جو وبرودة مشاعر احس حتى النفس ينسمع التفت ليوره سحب مظلات وتقرب يخليهن على الجامات اخر وحـــدة  اليمي غمضت عيني ارجف وجهي بركبته صار علكها وبقى بمكانة همس صوته رايح

::- جــــمرة

::- همم

::- اتكطع على ريحة ركبتج روحـــــي تلوب على شمة عطرج

- جمدت بمكاني هادئة أريـــــد امنعه وما أريـــــد حس من ميلت ركبتي مبتعده همس

::- اخر مره جــــمرة راح اروح بعد

- دفعته من صدره ابتعد مدنك وانا عاكده حاجبي بصدمة
::- وين؟

::- لو موت لو سجن!

::- ليش؟

- دار عينه للكشن الوره سحب ايدي گـــــال

::- حولي وره

- رفعت رجليه عبرت وره وهو نزل افتر يمي رجعت سألته

::- ليش

::- يا هم يكتلوني يا أخـــوي وزوج امج ينجبرون يسجنوني

::- لا تموت

::- انسجن؟

- هزيت راسي اي اباوع لعيونه ابتسم لزم ايديه باسهن ورجع باوعلي

::- وشلون اتحمل السجن بدون ما اشمج شلون اعيش وريحتج ما تترس ريتي

::- اجي لك زيارة

- ضحك سحب. رجلي فوك الكشن كعدت ورجع ظهري على الباب رفع أيــــدة الهازتها الرجفة يفتح شالي مبتسم وشفته ترجف فتح الشال اخذه بايده ومد ايده على شعري تخللن اصابعه بفروة راسي غمضت عيني گـــــلبي صوت دكته مسموع فتحت عيني من حسيت أيــــدة على القمصلة

::- أبــــــهر

- رفع عينه الي ذبلن عــــــيونة حيل ومدمعات

::- هاا ها

::- شتسوي؟

- دك بأيده على وسط صدري

::- أريـــــد اخذ نفس يكفيني ويصبرني على فراگج

- تحركت ساكته دنك عينه فتح سحاب التشيرت بعده من الجهتين وقرب وجهة غمضت عيني مقشعر بدني من نغزات وجــــهة وشفايفه، بايده لف القمصلة فوك راسة احس بشفتة وخشمه وداخلي يرجف همس

::- شلون بيه جــــمرة شلون انتهي بدونج اموت

-  بلعت ريك ساكته مرتبكة لزمت زنده كازه على اسناني

::- أبــــــهرررر

- رفع أيــــدة سد حلكي يبوسني بشوغة وشهگة احس بدموعه بللن وجهه نزل راسة الحضني على رجليَ المطبوگات لم نفسه لازم ايدي خلاها على گلبه  هيج بقى ساكت اكثر من نص ساعه ودك.تليفونه جاوب بــــس كالها اي راح تجي

- حجاها وكعد سد القمصلة ولف الشال عليه مسح على خدي مبتسم يباوع العيني

::- اشوفج بخير جمراية سنايبري

- دنكت ساكته نزلت ورجعت للبيت.

اباذر ::- ابو اسمر قنع الأبـــــهر يبقى بشغلة بــــس جاسوس النا راساً قبل رغم يعرف اذا نكشف شيصير ما جنت مرتاح الوب عليه حتى دره ما كدرت اهتم بيها يومين انا وابو اسمر ما راجعين للبيت كله بالشغل لا شفت دره ولا شفت الأبـــــهر كل اليوصل تسجيلات ومتبعينها الحد يـــــوم المداهمه جنت لازم گـــــلبي بأيدي حيل خايف عليه خايف ينكشف بأخر لحظة واخسر أخـــوي

داهمنا ونجحت خطتنا مو منطقة وحـــدة ولا عصابة وحـــدة كل اليعرفهم الأبـــــهر نلزموا بالجرم مع الادله مكيف واكفين يم السيارات واهمس

::- خلصنا أبــــــهر خلصنه

::-  ضحك ضرب على جتفي وتقدم خطوتين مد ايديه الابو اسمر فكيت عيني احس النفس نحشر ببلعومي وانا اباوع الابو اسمر يخلي الكلبجات بأيده

لزمت ايديه بسرعة اهز راسي لا

::- سيدي

أبــــــهر ::- اششش سبعي خلي بالك على دره عوضها كل دمعه.

اباذر ::- لااا لا وخــــر عوفه باوع ساعدنا هو ساعدنا ليش

- صرت بينه وبين ابو اسمر حضنته حيل احس روحـــــي الجاي تنوخذ مني يحجي باذني همس

أبــــــهر ::- اباذر سبعي اششش ما أريـــــد احد يشوف دموعك.

يتبــــــع⋆𓍯

الكــــاتبة أيـــــــلول⋆𓄼𓂁

💚🌿
.البيج الخاص بالرواية