رواية أجرام مستباح لثلاث ندبات الفصل السادس وأربعون 46 - بقلم الكاتبــة ايلول

مساء الخير ...

#أجرام_مستباح_لثلاث_ندبات

                                                بقلم الكاتبة أيلول

  ins: t8_fe3 للتواصل

𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒

‏أشتهيت أرتاح من ڪل صوت
يا روحي شحــــلات المـــــوت
..............................................................

اباذر ::- حيل لميته بحضني كل ذرة بروحي توجعني على أخـــوي هسه لكيته ما اتحمل افارگه من جديد حجاياته يهمسهن باذني جراه ابو اسمر من ايدي يمشي بيه للسيارة وهو عــــــيونة عليه مبتسم وشفايفه يتحركن

وكعت على اركبي هذا حدي مو كد هل حمل والله مو كده يا روحـــــي يا أبــــــهر يالمتعذب طول عمرك

احس جمر يطلع من عيوني سحبني مرتضى عفتهم كلهم اخذت السيارة وتبعت سيارة ابو اسمر وصلت للمركز وراهم دفعت باب المكتب اصيح

::- ليش هيج سويت ليش

- أشر بالقلم على اكتافي خازرني مسحت وجهي نار تلهب بروحي اديت التحية وطلعت من يـــــمة اروح الروحي اروح الاخوي الضيع عمره الخاطرنا

غـــــدير ::- بــــس رجعت من الكليه عــــمة دزت علينا اني ودره رغم هي خجوله حيل حتى اكل ما تاكل وبالليل بــــس تبجي اسمعها تخلص الليــــل نحيب وبجي اخذتها ورحنا البيت عــــمة جــــمرة نايمه وعمه تكول ابقن هنا دام بسام ما موجود

شوية واجه عـــــمو اعصاب وكف يباوع الدره الي لازمه بايدي وخايفه رفع شعره من وجــــهة وسلم رديت وعمه كامت وراه دخل الغرفته وهي صاحت بصوت

::- ليش هيج ادريــــــس ليش شنو هل ظلم

- بقيت اباوع بوجهه دره وهي تباوعلي ما فاهنين شي وفزينا على صوت الباب طلعنا نركض دخل بــــسام فتحت عيني على وسعهن مصدومة بشكلة ودره ختلت بظهري صاح بحركة

::- عفت الرتب تعال حاجيني هسه عفتهن

::- بــــسام

- باوع بوجهي وصيح بحركه

::-:لج سجن أبــــــهر سجن أخـــوي

- تخبل يبجي ويصيح طلع عـــــمو وعمه مسح وجــــهة وكعد على اركبه يجر نفس ويصيح

::- ليش ساعدنا واللـــه ساعدنا ليش سجنته ليش حاجي خاله حاجي بروح مصطفى حاجي سجن أخـــوي

غـــــدير ::- گـــــلبي راح وهو يمسح على كلبه ودموعه يحركن بروحي عـــــمو ادريــــــس صيح عليه يريد يوكف على حيله وبسام عاط بصوت عالي

::- ما الي حيل بدونه ما الي حيل كسرتني وحق هو الله كسرتني .

ادريــــــس ::- تريده يبقى طول  عمره مطلوب؟  شارد ويتختل ؟

غـــــدير ::- نزل راسة يبجي وعمه من بعيد تصبر عليه وخرت دره من ظهري تقدمت بخوف كعدت على اركبها كدامه وهي تبجي حضنها مرد گـــــلبي بصياحه من يكلها

::- اخونا دره اخونا ضاع عمره يا أبــــــهر يا خويه يا روحـــــي .

- التفتنا على صوت جــــمرة مجلبه بباب المطبخ وجها احمر وكوه فاتحه عينها همست تباوع البسام

::- أبــــــهر وين؟

- دنك بــــسام وكلنا ساكتين مسحت وجها ورجعت تحجي بحركه

::- وينه؟

- رفع راسه بــــسام مختنك كالها ::- انسجن

- فتحت عينها بصدمة وعمه ركضتلها تريد تلزمها وكعت على اركبها بباب المطبخ تجر نفس بشهكه اختنكت تخبلنا كلنا ركضنالها حتى بــــسام نريدها بــــس تسحب نفس ماكو تشهك وعمو يمسح بوجها ويصيح

::- واللـــه اطلعه واللـــه ابرئه واطلعه جــــمرة بابا

- دفعت أيــــدة منها وكامت للغرفة مجلبة بالحايط وتشهك بدون دموع

نــــهله ::- كمت مهدود حيلي فتت وراها للغرفة كاعده بالكاع تقربت ارجف اباوعلها أريـــــد المها بحضني جلبت بايدي وزحفتلي تبجي وتصيح

::-  خلي يطلعه خلي يعيش ويا اخوانه كـــــافي يتعذب كـــــافي

- حضنتها حيل امسح على راسها صرخت تبجي

::- أريـــــد اموت أريـــــد اموت روحـــــي جاي تحترك

::- من عمري العمرج يا عيون امج .

- دفعتني من ايدي وكفت ترجف ::- جــــمرة

- ما حاجتني جرت القمصلة مالته لبستها ولفت شالها فوك راسها تمسح بدموعها جلبت بأيده

::- جــــمرة

- دفعت ايدي وركضت ركضت وراها اصيح وكف بسام بباب البيت مانعها تطلع

جــــمرة ::- فركت وجهي ارجف رفعت راسي ليفوك راح تمطر راح تنزل قطرات المطر بارده بــــس ما تكدر تطفي نار البروحي رجعت باوعت الاباذر يمسح بدموعه

::- أريـــــد اروح اله

ادريــــــس ::- تعالي انا اخذج اله

جــــمرة ::- التفتت عليه امي حاجته ما قابله وكف يمها يطمنها طلعت وياه صعدت وهو حرك السيارة باوعت بالمراية اباذر هم طلع ورانا بسيارته احس بروحي ما اعرف اتصرف شي بــــس أريـــــد اروح الحضنه التفتت الادريس ورجعت باوعت للشارع مخنوكه وبلعومي محتقن

::- ليش سجنته؟

::- انطلب

::- يطلع؟

- سكت درت عيني عليه باوعلي ورجع باوع للطريق

::- من اسأل جاوب

- ابتسم وجاوب ::- اذا ما ثبتت عليه ولا تهمه يطلع

::- انـــتَ تكدر تساعده؟

::- لا

::- تكدر

::- انتِ تكدرين

- سكتت مسحت دموعي اباوعله ::- شلون؟

::- تشهدين الصالحه وتكولين فعلاً جنتوا مسافرين وهو ما خاطفج .

- هزيت راسي اي بسرعه والتفتت ليوره اباذر  ورانا فتنا بازدحام صار بصفنا ماد أيــــدة من الجامه لازم بيها جكاره وايده ترجف

الحد ما وصلنا للمركز نزل ادريــــــس  من سيارته وفتر فتحلي الباب نزلت وكفت اباوع للجنود دنك مد أيــــدة سد سحاب القمصلة واجه اباذر  يمنا عــــــيونة حمر باوعلي وحجه بخفوت

::- بروح اخوج لا تحجين اي شي يقهره

- هزيت راسي لا مشيت ورا ادريــــــس وبسام وراي الجندي النفوت من يـــــمة ياخذ تحيه دخلنا المكتب على الميز اسم ادريــــــس كعد واني بقيت واكفه التفتت البسام كاله

ادريــــــس ::- روح بــــسام .

- باوعتله ساكته طلع بــــسام وهو أشر على الكرسي وكام وكف

::- اكعدي عـــــمو هسه يجي زوجج

- حجاها وطلع رفعت راسي ليفوك امسح دموعي احس فجأة بردت لهفتي اله والوم بنفسي شعليه  ليش نقهرت ليش اجيت شنو علاقتي

وبمجرد سمعت صوته يم الباب يحجي ويا اباذر رجع شوگي اله رجعت ارجف وبس أريـــــد المحه شوكت ينفتح الباب شوكت عيني تلتقي بعينه

دخل اباذر وهو وراه بــــس لمحني فتح عينه بصدمه ودار بهدوء خزره  ورجع فر عيونه الي رخت ملامحه حيل بلع ريك ونز جسمه فاز من نسد الباب وراه

اباوع بعيونه واحس نار تطلع من عيوني رفع ايديه فتحهم بهدوء الي شهكت ابجي وركضت الحضنه رفعني من الكاع حاضني حيل ابجي واشهك وهو يهمس بأذني

::- هــــا جمره هاا يمج ليش تبجين يمج

- نزلني للكاع رفع وجهي بأيد مبتسم ورجع سحبي الصدره ولف ايديه فوكايه سكتت بــــس صوت نفـــــسي عالي وشهكتي شكت گـــــلبي غمصت عيني وحاضنه خصره بايدي من جوه القمصله الابسها

بــــسام ::- شبيك خازرني هو ابو اسمر جاباها

الأبـــــهر ::- منو عاتب عليكم تدخلونها مركز

جــــمرة ::- رفعت وجهي اباوع الوجهه دنك عينه الي رفع أيــــدة يريد يمسح دموعي باوع الاصابعه مسحهن بقمصتله يله خلاهن على خدي يمسح دموعي ويباوع العيني

::- ليش اجيتي

::- مو جنت تكول سجلي نظيف ليش نسجنت

::- فتنت عليهم وفتنوا عليَ هههه

- رجعت راسي الصدره حيل حاضنته ::- اموت اني أبــــــهر اموت

- سحبني من ايدي يريد يكعد وأشر الاباذر اطلع بقى كاعد كعد الأبـــــهر مقابيل اباذر واني واكفه ولازمه بأيده كاله

الأبـــــهر ::- روح شوية وتعال

اباذر ::- ليش

جــــمرة ::- درت عيني اله ابتسم مسح وجــــهة الأبـــــهر كاله

::- أريـــــد اكعدها بحضني تبقى مشاهد؟

اباذر ::- هههه لا تضحكني ترا گـــــلبي نار

الأبـــــهر ::- لا اطيح حظك عليمن مو زين ما متت

جــــمرة ::- وكف اباذر مكسور حيل يحاول يبتسم بــــس مبين عليه مايكدر يخفي كسرته
طلع مي من ثلاجة صغيره بالمكتب خلاه يمنا وطلع

الأبـــــهر سحب ايدي وبعد رجليه عن بعضهم رفعت راسي ليفوك اباوع گـــــال

::- تعالي معليج يم اباذر كعدي

- كعدت على رجله اباوع الوجهه والابتسامته الحزينه رفعت ايدي على خده

::- وخرها لا تضحك جذب

- اختفت راساً مركز عينه بعيني ::- ليش اجيتي

::- راح تنسجن هواي؟

::- يمكن مؤبد يمكن اعدام

::- لا تحجي هيج شبيك

- ضحك ورفع أيــــدة يضم شعري جوه الحجاب حرك ابهامه على خدي

::- بعدج ما كارهتني بعدهن عيونج يحبن يشوفني

::- احبك اني شلون اكرهك بــــس باوع باوع

- غمض عينه حيل وجر نفس صاك اسنانه بقوة مديت ايدي على خده

::- باوع أبــــــهر باوع

- فتح عــــــيونة الذبلانه يتبــــع رمشات جفني حجه بخفوت

::- باوعت يا روح الأبـــــهر

::- ساعات اكرهك بــــس ما أريـــــد مو بأيدي ما اتمنالك الاذيه اتمنى تطلع من السجن اتمنى تعيش ويا اخوانك مرتاح وما تتعذب ومرات احس بروحي كارهتك حيل أبــــــهر باوع بــــس واللـــه اني ما اريد اكرهك حيل احبك.

- ابتسم لازم حنكي ::- هالحظة حابتني؟

::- حيل حابتك

- ابتسم وتقرب يحضني حضنته مخنوگة حيل همس بصوت خافت

::- اموت يمج وبلاياج جــــمرة اموت

::- لا

- ضحك بتعدت وهو ابتعد يلم بالقمصلة عليه حيل
::- شفتي دره؟

::- اي

::- مو كتلج جنت حاس بيها تتعذب

::- متعذبه ؟

::- عذابي يم عذابها نقطه ببحر

- نزلت شفايفي ساكته مدنكه رجعت باوعت لعيونه ركز بعيني مايرمش وانا عيوني تعبن كد ما متابعه حركة عــــــيونة بلع ريك رمش بثگل

::- خايف يجي يـــــوم وما اشوف هالنظرة بعيونج خايف يكرهني

- سكتت وبتعدت من اندك الباب فات ابو اسمر وكف الأبـــــهر واني كعدت على كرسي المقابيلة گـــــال

ادريــــــس ::- ارتاحيت استاذ أبــــــهر كلها نگلبت ضدي جمرتك وامها وبسام وكل عائلتي

الأبـــــهر ::- هههه اعذرهم ما يعرفون الظروف

جــــمرة ::- يا ظروف

- التفتلي مبتسم وحجه بصوت خافت حتى ادريــــــس مايسمع كلمة عيب مبتسم عينه بعيني همس

::- رديها

- هزيت راسي لا ودرت الادريس گـــــال

::- يله عـــــمو امج راح تحركني

- وكفت حسيت شي عادي صار أريـــــد اروح كـــــافي المهم شفته باوعتله رفعت سحاب القمصلة كله ورفعت ايدي اشرتله باي ابتسم وأشر براسة روحـــــي.

غـــــدير ::- شكد تعذبوا من اشوفهم اكول الظاهر مستحيل يرتاحون بــــسام ابتعد عني يخلص يوميه يركض بالشغل يريد يثبت الأبـــــهر جان مسافر واسمه الأبـــــهر مو جـــــندل وبشهادة زوجته جــــمرة الي كل ساعة برأي ساعه تكول اي اشهد الصالحة ساعة
تتخبل وبس تبجي

الحد مابدت ترجع هذيج جــــمرة القوية بنفس البرود بنفس القوة وكفت ويا بــــسام وساعدته
كل يـــــوم تجي وتسأل شنو الصار وشنو الجديد وهو يجاوبها ويشرح الحد تاريج جلسة المحكمة

بــــسام ::- حقدت على ابو اسمر بالبداية بعدها اكتشفت هو يساعدني حتى بدون علمي بتخفي  واجهته گـــــال لازم تثبت هو جان مسافر واول ما اجه للعراق احنا الدزيناه جاسوس وياهم الصالحنه  وهو فعلًا كان ضدهم ومخرب هواي شغل الهم وهذا الشي الساعدني اركض من محامي المحامي من محكمة المحكمة ومن ارجع راساً الغرفة التحقيق اطلع حركة روحـــــي بالجانت عدهم دره بحيث يطلعون من جوه ايدي بيهم بــــس نفس.

جــــمرة ::- جذب مرت ليلة وما بجيت على فراگه كل تفكيري هم يعذبونه بالسجن هم ينضرب
يجي الليــــل ويخلص وانا بــــس حاضنه قمصلته الكلبي

الحد ما بدأت حالتي تستقر اقترح الدكتور ارجع اختلط بالناس والافضل اداوم وزوج امي گـــــال ارجعها للكلية اول يومين مالي خلك وبنص المحاضرة اطلع اضوج ما اكدر اتحمل صوتهم والوب على صوته هو

بيوم منهن رجعنا بسام للبيت اني وغدير الدنيا بارده ومطر ورعد عيوني تراقب قطرات المطر التنزل على الجامه التفتت على صوت اباذر اباوع الايده المادها الي ليوره بيها ورقة صغيرة اخذتها منه واباوعله بالمراية گـــــلبي يدك حيل گـــــال.

::- من الأبـــــهر

- رجفت ايدي ودرت عيني على غـــــدير الكاعده كدام ودايره وجــــها الي ابـــــتسمت تباوع العيني

عصرت الورقة عقجتها بأيدي الرجعتلها الرجفة ورقة مشگوكة من دفتر صغيره كلش فتحتها روحـــــي رايحه اول ما صارت عيوني على خطة ابـــــتسمت اول كلمة مفشر بكلمة من جان يحرك گـــــلبي اكولها اله

جواها كاتب بخط يسد النفس جريمتي المستباحه

ابـــــتسمت مركزة عيني كلها بالورقة مخليتها بحضني ومدنكة اباوعلها بــــس ارمش دموعي تنزل فاتحه عيني كلها مدنكة واكل بشفتي اتبع خطه المائل واقرأ حرف حرف

الحد مانزلن دموعي وكعن على الورقة بدأ حبر الكلمتين ينحل وينطش بالورقة وعيوني مراقبة شلون بدت الكلمات تخرب من كلمة جريمتي بقن بــــس اول حرفين ومن كلمة مستباحه اخر حرفين طبكتها بأيدي وخليتها بين الملازم

ورفعت راسي اباوع من الجامه قبل لا نوصل گـــــال بــــسام

::- جــــمرة ما بقى شي للجلسة لا تغدرينه تشهدين الصالحة

- هزيت راسي اي ونزلت فتحت باب الكراج دخلت اريد بــــس افوت للغرفة واكعد وحدي

فتت بهدوء اسمع صوت امي تنوعي وتبجي كعدت بالمطبخ اسمع كلماتها وهي تصيح

::- يا مصيفي يا يـــــمة يا كاسرني

- بقيت كاعده بمكاني نار نار بروحي بــــس دموعي جامده بعيوني رفعت راسي من نفتح باب المطبخ دخل اسمر وبقى واكف بمكانه يباوعلي واختفى صوت امي ويا شهكتها التاخذ الروح سمعت فتحت باب الغرفة شغلت شاشة الصالة على قرآن التفتت للمطبخ لمحتنا وكفت مستغربة ابـــــتسمت كالت

::- اجيتوا؟

- وكفت هزيت راسي اي وفتت للغرفة بــــس نزعت شالي طلعت الورقة وتمددت بمكاني امسح عليها باصابعي هادئة حيل درت عيني فتحت الباب امي عيونها حمر وترسم ابتسامة على وجها خافيه حزنها

::- اصب لج غدا

- ابـــــتسمت هزيت راسي لا بقت واكفه بمكانها لازمة اليده مال الباب. ::- بيج شي ماما؟

- سكتت اباوعلها حركني عيوني سدت الباب واجت كعدت على جرباية يمي قربت راسي الحضنها ساكته وايدها تمسح على شعري وترتل قرآن بصوت ناصي

::- جــــمرة ماما

::- ما بيه شي

- سكتت تمسح على شعري الحد ما نمت.

غـــــدير ::- دخلنا للبيت ركضت من المطر بــــس بسام كعد. بالكراج والمطر على راسة مدنك طلعت دره اجت يمي تباوعله وياي همست

::- الله يساعدج

- درت عليها بستها ::- يا روحـــــي مليتي وحدج؟

- دنكت هزت راسها لا ورجعت باوعت البسام كالت

::- شبيه اباذر؟

- رفعت اكتافي ما ادري لبست نعال وطلعت بخطوات ثگيله كعدت كدامه على اركبها

اباذر ::- رفعت عيني مهدود حيلي باوعتلها مكرفصة كدامي على ركبها تباوع لعيوني مسحت وجهي مبتسم الها خوش اعوضج واعوضج تالي حتى ما لحكت اكعد وياها ياخذني الفجر ويردني الليــــل

حجت بصوتها الخافت

دره ::- أبــــــهر بيه شي؟

- هزيت راسي لا مبتسم ::- ما بقى شي لمحكمته اندعيله

::- يطلع غير؟

::- اذا الله راد وجمره ما نسحبت

- باوعت لعيوني رفعت وجهي الحاجبها بنهايته عدها شامه واضحه هاي اتذكرها من الطفولة ابـــــتسمت ومديت ايدي أريـــــد الزمها رجعت ليوره نازه وخايفه بلعت ريك اباوعلها رجعت وجها الايدي وتقربت الحضني لميتها حيل

::- يا روح اخوج انتِ يا نظر عيني

دره ::- عفيه طلع أبــــــهر أريـــــد اعيش بينكم اباذر أريـــــد اشوفة

- وخرتها من حضني مسحت دموعها
::- ان شاءالله يطلع وتشوفينه مايقبل اخذج اله

غـــــدير ::- رفع راسه الي ابـــــتسمت كومها وفاتوا ملابسهم تقطر مي كالت دره

::- هسه ابدل وانشف ارضية المطبخ

غـــــدير ::- ضحكت اهز راسي لا واحجي بكلبي انتِ على الضيم الشفتيه المفروض بعد ما تلزمين كشاية بــــسام سحب ايديها باس باطنهن وخلاهن على وجــــهة منا ومنا وهي دموعها تصب كالها

::- ممنوع انتِ ممنوع تلزمين شي انا اخدمج انا اخليج بعيوني وبروحي

غـــــدير ::- شهكت ابجي بصوت وهم التفتوا عليه فازين ثنينهن كعدت على حيلي ابجي حيل موتوني كل شوية يخنكوني واحبس البجيه بداخلي بسام مات من الضحك ويصيح لج شبيج ودره تمسح على ظهري بخجل وتحجي بخفوت

::- ضوجناج غدير ضوجناج. هــــا عمري ضجتي

- عبرت ايدي وحضنتهم ثنينهم بــــسام يهتز من الضحك وانا جني زعطوطه طلعت البجيه الحابستها وخرتهم.مسحت دموعي اباوعلهم
ضحكت وهم ضحكوا دخلت للغرفة اطلعله ملابس اجه وراي صيحت

::- ابقى لا تجي تنكع الفرشة

- تقدم بسرعة سحبني اله ::- فدوه الي

::- راح تتمرض ملابسك مبلله

- ابتسم يباوع العيني وايده على خصري تقرب باسني بخفه وابتعد

::- بــــس اخلص من الضيم الهاد حيلي اعوضج

::- ما مقصر حتى تعوض

::- تــــدرين بيه احبج؟

-ابـــــتسمت وهزيت راسي لا جر خشمي حيل

::- كلشي تــــدرين اكبر شيطانه

- جر أيــــدة من خشمي باوعلها وصاح
::- منشوله شبيج

::- لا ايدك مبلله

::- لا هاي من خشمج شوفي

- باوعت الايده اضحك مسحتها واحجي ::- والله هي ايدك مبلله

.

جــــمرة ::- كعدت العصر دافيه حيل بفراشي حركت السوار من ايدي الخرز طابع بيها وصاير اثر قربتهن الشفتي بستهن ابد ما توقعت راح اشتاق الايامي وياه ابد كمت غسلت اباوع للجهال جانو يلعبون ومن طلعت كعدوا عاقلين وامي بالمطبخ تسوي كهوه

::- ماما

::- هــــا ماما هــــا يـــــمة

- التفتت علي بالهفه تباوع اشرت عليهم
::- هذول شنو يخافون مني؟

::- لا بــــس اني موصيتهم جــــمرة ما لها خلك فـ من يشوفونج يكعدون عاقلين

- سكتت وهي دارت صبت الكهوه بفنجان واجت يمي

::- تودينه الابو اسمر بمكتبه؟

- هزيت راسي اي رفعت القميص من يم ركبتي مسحت وجهي واخذته منها دكيت باب المكتب گـــــال

::- تعالي عمري

- بقيت واكفه بمكاني يكول الامي عمري؟ 
وليش مقهوره؟  خلصت عمرها كلمه حلوه ما سامعه ليش مستثگله عليها الراحه هسه ليش؟

فتحت الباب بــــس لمحني اختفت ابتسامته وكف
::- العفو عـــــمو تعالي

- دخلت اخذ الكهوه مني وكال

::- اكعدي بابا تفضلي

- كعدت كدامه اباوع المكتبة على الصورة درت عيني اله شرب شوية كهوه وحجه

::- شلونج شخبارج الدراسة شلونها وياج

::- عاديه جاي امل ماكدر اكمل المحاضرات الصوت يأذي راسي

::- ليش ما جاي ترحين للدكتور؟

::- جاي اروح

::- لازم تكملين دراستج عـــــمو خلي هدف كدام عينج واسعي حتى توصلين ما راح تسوين شي ولا تحاربين اذا ماعندج هدف او طموح مقررة توصلين اله

::- ما اعرف شنو الاريده

::- تردين تشتغلين؟

- هزيت راسي لا دنكت عيني حسيته افتر كعد بالكرسي المقابيلي. رفعت عيني اله

::- اكدر اساعدج بشي؟

::- شوكت محكمة الأبـــــهر وراح يطلع لو لا؟

- تأجل موعدها للأسبوع اليجي

::- ليش كل اسبوع تتأجل؟

::- انا جاي أخليهم يأخرونها حتى بــــسام يكمل الادله ومن اولها  يطلع اذا بقي نقص يرجعونه وتصير سالفة

::- يعني جاي تساعدهم

- تحسر حيل خله أيــــدة على خشمة من يم حواجبة دنك ورجع باوعلي گـــــال

::- عـــــمو انا لا اكدر اساعد مجـــرم ولا اكدر اشوف انسان ينظلم

أبــــــهر ظالم ومظلوم مجـــرم وبريئ صح وخطأ ابيض واسود سهل وصعب  .

::- ميخالف ساعده خلي يطلع انـــتَ السجنته

::- سجنته حتى يطلع نظيف ما يبقي طول عمره عليه نقطة سوده سجنته حتى اخوه يثبت برائته

- سكتت دنكت افتر رجع المكانه گـــــال

::- بكل الاحوال شهادتج الصالحه صح؟

- هزيت راسي اي ضحك گـــــال

::- مو تنطكرين وتكولين خاطفني ترا تودينه وره الشمس

- هزيت راسي لا گـــــال

::- من يطلع تنفصلين منه؟

- جريت نفس احس روحـــــي محتركه ::- اي

- حجيتها ووكفت طلعت من يـــــمة شفت امي ركضت للحمام تتقيئ رحت وراها سدت الباب دكيته

::- ماما شبيج حاجيني

- ماتحجي مختنكة وتكح طلع زوجها ابتعدت اباوع الخوفه عليها دك الباب مرتبك

::- نــــهله شبيج

- فتحت الباب واني على جهه اباوع روحها رايحه كوه تجر النفس مسح حلكها بأيده يلزم بوجها ويحجي بخوف

::- شبيج عمري شبيج نــــهله

- عافته يحجي ورجعت للحمام تتقيئ دخل وياها وسد الباب گـــــلبي يوجعني عليها واكفه بمكاني واهز رجلي واصبعي اطبكه حيل طلعت لازمها من اكتافها گـــــال

::- جيبي عبايتها وجواريبها عـــــمو

- فتت الغرفتها حتى ما اندلهن اجت وراي هي سانده نفسها على ميز طلعتهن ترجف تقربت اخذت الجفوف منها لبستهن الها وكعدت البسها جواريبها

وكفت خليت عبايتها على راسها اباوع العينها
::- شبيج.

- هزت راسها ساكته كومتها من ايدها كالت

::- خلي بالج على اخوتج

- هزيت راسي اي اخذها وطلعوا درت للجهال يباوعولي ساكتين كعدت يمهم حرف ما نطقوا واني هم بــــس ساكته شوية وندك الباب على بالي رجعوا كمت أريـــــد افتح الباب صاح غيث
خايف

::- باوعي بالكامره بالاول

- رحت للكامره شفتها غـــــدير ودره فتحتلهن الباب دخلن دره مستغربتني وانا مستغريتها ما بينا حديث شوية وباوعتلي  تعصر باصابعها متوتره كالت

::- جــــمرة تجين احاجيج شوية

- باوعت الغدير ساكته كمت طلعت كدامها للكراج اجت وراي وكفت اباوعلها منزله عينها وساكته

::- هــــا دره

- باوعتلي شفايفها يرجفن جرت نفس بشهكه وبجت

::- جــــمرة حبابه مو تشهدين ضد الأبـــــهر عشت مثل الحواوين طول هاي السنين أريـــــد احس عندي اهل أريـــــد انلم بحضنهم وما ابقى ضايعه باوعي بعدني ما اعرفهم بعدني ما متعوده عليهم واحد انسجن وواحد يركض بشغله وحتى ما شفته وعرفت عنه اكثر

::- لا تبجين اني اريده يطلع ليش عبالكم راح اشهد ضده

::- مو اباذر گـــــال ساجنته قبل

::- كسر گـــــلبي وكسرت گلبه وهسه أريـــــد يطلع ماعندي شي وياه بعد اتمنى بــــس يطلع

-جرتني باست خدي ورجعنا فتنا يمهم دره حلوه حيل رغم الاثر البحنكها رغم تعبها بــــس ملامحها حيل حلوه  اركز بملامحها احس بيها شبهه منه ومن تحجي اركز وياها احس روحـــــي سامعته هو.

شوية واجه اسمر بقى واكف بالباب سلم ودنك فات الغرفته لمن اجت امي جايبين وياهم عشا وهي تباوعلي وتنصي افتر وراها واسأل شبيج شكو شكالوا تهز راسة ماكو شي

الحد وره العشا من راحن البنات فتت للغرفة قفلتها فرشت قمصتله على الجرباية وطلعت الورقة اباوعلها والسوار على شفتي

::- لو بــــس تدري شكثر مشتاقتلك

- ضميت الورقة بسرعة من ندك الباب فتحته دخلت امي مدنكه عينها كعدت بصفي اباوعلها ساكته وهي عيونها تفتر تحسرت

::- أريـــــد اكلج شي

- هزيت راسي اي ركزت بعيوني بلعت ريك وهمست

::- اني حامل

- لحظة احس گـــــلبي فز فرح لو حزن مركزه بعيونها بملامحها التتوسل ما انقهر ابـــــتسمت همست

::- الف مبروك

- مسحت وجها ودنكت.  ايديها تلف حافة الغطا وترجع تفتحها ورجلها تهتز رجعت باوعت بعيني
بجت غطت وجها وهي مختنكة تحجي

::- جــــمرة واللـــه ما فرحانه كاسرتج ادري بروحي ادري جابرتج

- اباوعلها ساكته أريـــــد اسحبها الصدري متردده تجرأت مديت ايدي الايدها بــــس انتبهت سحبتني هي الصدرها تبجي بخنك ابتعدت مسحت دموعها اباوع لوجها الصار احمر ابـــــتسمت

::- ما مسويتلي شي تحملتي كلشي حتى تعيشينا حتى ما ننذل تحملتي ضرب وحجي هواي وانتِ ساكته الخاطرنا سهرتي ليل الصيف تهفين علينا الحد ما تورم ايدج وسهرتي ليل الشتا تغطين بينا وتحمينا من قطرات المطر
اشتغلتي طول النهار حتى توفريلنا لگمه ناكلها
سويتي كلشي حتى نكمل دراستنا اتذكر من جنتي توكفين بنص المطر وشايله كارتونه وفوگاها نايلون حتى ترجعينا للبيت بدون ما نتبلل وانتِ عادي تتبللين وتتمرضين وتكومين رغم مرضج تشتغلين وانا بشنو جازيت تعبج بالعناد ما يـــــوم حجيت وياج كلمة حلوه ما يـــــوم سمعت منج

- بجيت جريت ايدها بستها لاول مره اعترف
::- بشنو اجازي تعبج بشنو ؟عشتي هواي النا هل مره عيشي الروحج

- بوستني وهي تبجي غطتني وطلعت ايام عاديه وممله يين الدكتور بين الجامعه الما هاويتها بين محاكمة الأبـــــهر شهرين مرن تمرمرت شلون انساه ما ادري شلون اتعايش ويا فراگة شهرين انا امي التمشط شعري شهرين هي التوكلني واخيراً تحدد الموعد

اباذر جان خايف مني خايف اكون ضده رحنا للمحكة أريـــــد المحه اخته هم موجوده وادريس واباذر اجه يمي يحلفني

::- بروح مصطفى ..

- ماخليته يكمل كلامه ::- كـــــافي اباذر

- سكت وفتنا من صار الموعد كاعده متحركنه
اريد التفت اريد اشوفه وعقلي رافض انتفض كلبي حيل الصوته هياتني راح التفت راح اشوفه ما اكدر غصب عني عيوني دارن اله افترن عيونه ولمحني جمد واني عيوني ما رمشن

وين جـــــندل الاعرفه شعره صاير عالي ومشطه
ليفوك ومن يم گذلته مخليها على جهه شوية مرفوعه وتتحرك ويا الهوا لحيته عاليه وخافيه اغلب الاثار ماعدا البكصته واليم حاجبه وملابسه مو ملابس مجرمين احس كل الموجودين بالقاعة سمعوا دكت گـــــلبي

- دنكت عيني ارجف كلي اهتز گـــــلبي حيل اسمع باهتمام المحامي قدم الادله التثبت سجل الأبـــــهر عايش بالنرويج وتاريخ زواجنا وسفرنا
بحيث حتى فواتير مال معيشة قدمهن صاحب الأبـــــهر دزاهن من الخارج كلشي مرتبين وادلة من عـــــمو ادريــــــس تثبت الأبـــــهر اول ما اجه شاف اطفال بالشارع وأتفق يشغله وياهم جاسوس وابد ما ثبتت عليه اي تهمة قتل ولا انجابلهن طاري لا عــــمة ولا ابو الهيل ولا قسام
مدري وين مودي جثثهم جان الكلام على اساس اختفوا قسام وابو الهيل وجندل

نطقت شهادتي الصالحه وانا زوجته لهذا اليوم.قدمنا عقد زواج اصلي سواه بــــسام بنفس تاريخ زواجنا رجعت اراقب احس اذني نطرشت ماكدرت اركز بشي دنكت راسي مغمضة عيني روحـــــي تلوب طلعني ادريــــــس من القاعه اختنكت حيل طلعنا برا اجر النفس كوه

::- شبيج عـــــمو

- هزيت راسي ::- رجعني للبيت

- گـــــال فد شويه ونطلع رجع وشوية واجه طلعنا للسياره مدري شبيه محروكة روحـــــي قبل لا نوصل للبيت دك تليفونه جاوب. بلهفه گـــــال

::- اااي الف الحمدلله

- سد الخط ودار عينه الي مبتسم ::- هــــا؟

ابتسم يباوع العيني ::- طلع بريئ ما عليه ولا تهمه

- جريت نفس براحه درت عيني للشارع ودموعي تنزل رجعت باوعتله

::- يعني هسه راح يجي للبيت

::- ما ادري بعد يكملون التقارير المهم بريئ

- بــــس وصلني للبيت وراح دخلت للغرفة مسحت دموعي اتحدى نفـــــسي هاي هي سويتس العليج انسيه بعد ما مسموح تفكرين بيه لا تهينين نفسج لا تنسين شكد عذبج
رجعن دموعي ينزلن كعدت على حيلي لميت رجليه الصدري ابجي شلون انساه شلون حيلي مهدود بفراگة شيصبرني شلون اتعود بدونه .

غـــــدير ::- فرحة بــــسام تسوا عمري. طاير طاير بيهم ما يعرف شيسوي وصل دره ورجع وهي تركض وياي هم فرحانه تفتر وراي وتصيح

::- اساعدج بشي كليلي اسوي شي

- لو اكلها رتبي فراشة لو اخليها تخلي وجــــهة للمخده احس مو لازم تسوي شي ابد ابد ما لازم تشتغل اشتغلت كلشي بعمر صغير هسه المفروض بــــس تدلل

طلعت من اجو جان بــــسام بنفسه يجيب فرقة بــــس الأبـــــهر ما قابل دخلوا نزل من السيارة. شكله حيل متغير قبل فعلاً وجــــهة جنه مجـــرم هسه عبالك نرسمت بيه برائه وكف مبتسم فتح أيــــدة الدره راحتله وهي تبجي وبسام افتر يركض ويضحك يصيح

::- وانا وانا

- دخل بحضنه وياهم جانوا مبتسمين ويضحكون شوية وبجوا

وخرهم من حضنه مسح دموعهم مبتسم ويحجي

::- ندبات روحـــــي نلم شملنا ونتهى فراگنا ماينعاد

- رجع سحبهم الصدره بــــسام ابتعد وهو يضحك اجه حضني ويصيح

::- ابوسج يوجهه الخير عليه

- ضحك الأبـــــهر لاف أيــــدة فوك كتف دره كاله

::- مو كدامنا

غـــــدير ::- فتنا جوه ركضت أريـــــد اخذله مي واباوعلهم يخبلون تمنيت عندي اخوان مثلهم مخلين دره بنصهم واحد لازم ايدها واحد يوخر شعرها من وجــــهة والابهر كل شوية حاضنها وبايسها وهي تسولف الهم

بيومها بيتنا بيه روح ساعة يضحكون ساعه يبجون بالليل اجو عــــمة وعمو كعدوا وياه وهو يتشكر من عـــــمو على وكفته كاله

::- ما سويت شي ابد

اباذر ::- أبــــــهر جذب شكثر ساعدني

ادريــــــس ::- بــــسام

::- العفو سيــــدي انا الجذاب هههههه

غـــــدير ::- نضحك حيل فرحانين ومتونسين سكت الكل من عـــــمو گـــــال

::- ارتاح اسبوع اكعد ويا اخوتك اشبع منهم وراها نحدد موعد حتى تطلك جــــمرة

- سكت الأبـــــهر يباوع بعيونهم بلع ريك دنك راسه
عيني مركزه وياه حيل عض شفته يريد يسيطر على رجفته رفع عينه وهز راسة اي ساكت ابد ما حجه

نــــهله ::-  اصعب شي من ما تعرف شنو القرار المناسب من تمنع نفسك تدخل لان اساساً ما عندك نصيحه صحيحة تقدمها.
الأبـــــهر تبرأ وصاحبه عمر نحكم سنتين

رجعنا للبيت گـــــال ادريــــــس
::- حيل يحبها

::- وهي حيل تحبه

::- ما اتوقع لو تحبه ما تكلج روحوا كلوله خلي يطلكني

::- بنتي تعاند حتى روحها تدوس على گلبها وما تتنازل وهو كد ما مداريها مأذيها معيشها رعب ومواقف ماتكدر تنساهن تكلي يـــــمة ايام الادمان ماينسن من اتذكرهن اتعب

- سكت يباوعلي اجه يمي لزم ايدي مبتسم

::- وعيونج الحلوه تحن اله وتسامح اذا تحبه لان هو مبين شكد يحبها

- سكتت دنك عينه البطني خله أيــــدة عليها بضحك. ورجع باوعلي

::- خليها حتى تربي اخوها خو ما نلتهي بيه احنا

::- هــــا جا سمر تريد تخلف وتنطيني اربيهم الهــــا وانا قبلت

::- دختولي بكيفها شنو راسها محشفر

- ضحكنا وفتنا للبيت لكينا اسمر وغيث يلعبون بلي واسمر غالب غيث وهو متخبل يبجي ويلعب وذاك يضحك عليه كعد ادريــــــس بمكان غيث وغيث يشجعه يفوز على اسمر عفتهم وباوعت للبنات يلعبن بالايباد

نزعت عبايتي ورحت الغرفة جــــمرة متمدده مغمضة تليفوني عدها مشغله بصوت خافت اغنيه تقربت اركز بكلماتها

لا صوت باقي ولا صدى

حست عليه وباوعلتي فزت طفتها وكعدت

::- مو كتلج من تضوجين اسمعي سورة يس مو اغاني تزيد خنگتج ماما

::- شفتي الأبـــــهر؟

- باوعت بعينها ساكته هزيت راسي اي دنكت عصرت اصابعها حيل ورجعت حجت بصوت مخنوك

::- شگال

::- سكت بــــس هز راسة اي

- حجت بدون مبالاة ::- اي خوش

-ورجعت تمددت  اخذت تليفوني وانطيتها تليفون الها عفتها وطلعت

جــــمرة ::- قفلت الباب وكعدت صافنه بالفراغ لو خاطفني وجابرني اعيش وياه بدون اذيه بدون ادمان وما حارمني من شوفة أخـــوي لاخر مره مستحيل اطلب يطلكني

كشفت ظهري اباوعله بالمراية كله اثر زلغ من جنت مدمنه واحك ظهري بحافة الحايط الحد مايصب دم وايدي البيها اثر حرك وصدري ورجفتي وافكاري وتشتتي شلون انسه كل هذا شلون

رجعت لفراشي ضامه وجهي بقمصلته والسوار والورقة على گـــــلبي اعز من روحـــــي صارن

ثاني يـــــوم جمعه بقيت بالغرفة كاعده الحد ما اختنكت العصر وطلعت للحديقة كعدت بالمرجوحه ورجف گـــــلبي حيل من سمعت صوته يحاجي بــــسام متت وكلبي انطحن حيل

غمضت عيني مركزه بكل حرف يحجي مركزه بضحكته مرتاح بدوني لكه اخوانه عذبني سنه كامله وياه ومن لكاهم بعد ما اهتم الي

كمت دخلت للبيت ميته قهر. بعد ما طلعت

غـــــدير ::- اول ليله اله ببيتنا بــــسام لزمهم يسولفلهن قصة عـــــلي وگمرته دره تبجي والابهر مبتسم لان سامعها قبل وبسام يشرح ويسولف عدل الابهر باوعلي گـــــال

::- أريـــــد فراشات هنا بالگاع

- باوعت البسام وللغرفة المحضرينها اله ضحك وكام هو طلع فراشات مداهن ثلاثة واحد بصف الثاني تمددو بحضن الأبـــــهر واحد منا واحد منا اختفت ضحكتهم وهو أيــــدة بشعرهم ويهمس

::- لميتكم بحضني اباذر دره يمي انتم

غـــــدير ::- طلعت وسديت الباب عليهم يكسرون الگلب. ثلث ايام مرن بــــسام ماخذ اجازه وابد ابد ما تفاركوا من الصبح لليل كاعدين سوا ضحك وسوالف وساعات يتذكرون ويبجون متت من الضحك من كعدوا يظفرون شعر دره كصيبتين منا ومنا وهي مخليه ايديها بحضنها وساكته منتظره يكملون سووهن ولموهن ليوره وشدوهن بقراصتها القديمة .

جــــمرة ::- تمرضت يومين احس بروحي تطلع ثالث يومين كعدتني امي كمت غسلت وبدلت كالت اسمر يوصلج وياه وهي تفتر وراي الاكل بايدها شايله الفه وكلاص جاي عضيت للگمة وشربت شوية غسلت وطلعت سديت باب الكراج اسمر. سيارته كدامي وموجود بيها هستوني اخطي ونز گـــــلبي فاز الصوته وراي

::- جــــمرة

- بقيت بمكاني واكفه احس عيوني غصب عني يردن يلتفتن بلعت ريك لزمت الملازم بأيدي حيل وغصبت نفـــــسي اخطي ليگدام وهو صوته يتردد بأذني وكل حواسي تستمعله

::- جمره بــــس احاجيج

- صعدت بالسيارة گـــــلبي ينتفض عيوني يحركني بدون دموع

اسمر ::- ارجعج للبيت؟

- باوعتله هزيت راسي لا ساكته وصلت وغدير وراي نزلها زوجها صيحت عليه ولحكتني تمشي وياي وتحجي

::- ليش ما اجيتي ويانا

- مشيت ساكته لزمت ايدي التفتت عليها

::- جــــمرة الأبـــــهر يريد يحجي وياج جــــمرة يحبج وعنده موضوع وياج اسمعيه

- جريت ايدي منها ورحت ما فتت ولا محاضره اكو مكان يصير وره الكليه كلها بظهرها هدوء ومحد بيه كعدت بيه ساكته مالي حيل ولا محاضره فززني تليفوني دك بايدي رقم جاوبت ساكته احسه هو شوية واجه صوته يرجف

::- مشتاااااگلج حييل

- رجف گـــــلبي ساكته بعدت التليفون مني اتنفست حيل ورجعت قربته الي حجيت ببرود

::- شوكت ننفصل

::- اموت

::- هههه واني شكو

::- كرهتيني؟

::- اي حيل

::- عيونج بالمحكمة جانن يباوعلي بنفس النظره الاحبها جــــمرة مشتاقتلج

- رفعت عيني للسما زفرت النفس جسمي يرجف

::- تشتاقلك العافيه استعجل شوية وخلصني منك

::- تدللين بــــس أريـــــد احجي وياج اخر مره

::- اني ما أريـــــد

::- بباب الجامعه احاجيج وروحي اخر مره

- سكتت أريـــــد اشوفة أريـــــد اباوع بوجهه من قرب همست

::- تمام

::- بالباب انا منتظرج

- سديت الخط اباوع الايدي حيل ترجف بشكل
مشيت وكلبي مشتعل نار احس أريـــــد اتقيئ گـــــلبي كد الوجع البيه عيوني وحركتهن الذبحتني

طلعت للبوابة اتلفت دك هورن بسيارة اباذر مشيت.  بخطوات ترجف فتحت الباب اليمه صعدت وركزت عيني بعينه داخلي يرجف عكس مظهري ابـــــتسمت

::- شلونك

::- بلياج مو زين

::- هههه لا زين زين مبين

::- انتِ شخبارج دراستج شلونها

- نزلت شفايفي ما ادري رفع كاسات عصير ثنين اخذت وحـــدة وهو شرب من وحـــدة ودار عينه للجهه الثانيه ساكت شربت دايره عيني بلكي گـــــلبي يبرد مثل برودة هل عصير

::- جــــمرة ما أريـــــد ننفصل

- درت عيني اله خازرته ::- غصباً عليك ننفصل

- هز راسه لا گـــــال ::-كرهتيني؟

- درت عيني للشارع همست ::-حيل كرهتك حيل

- ضحك درت عيني اله يياوع الايدي رفع عينه الي گـــــال

::- لو كارهتني ما تبقين لا بسه السوار

::- لابسته لان تعودت عليه

- حجيتها وحسيت عيوني غوشن سحب العصير من ايدي. وانا احس روحـــــي بدت تغيب همست
::- شسويت

::- صح تبرأت بــــس وياج ابقى مجـــرم

- ردت ادفع أيــــدة ماكدرت اخذني النعاس غمضت وانا كلي حقد عليه

كعدت وره فترة احس قليلة وراسي ما يوجعني مو مثل قبل جريت ايدي مربوطات اتلفتت بسرعه جواي بساط وبمكان خرابه شهكت
هو مجـــرم شيغيره شيعدله

لمحته كاعد كدامي صيحت اسب واغلط فرفحت روحـــــي الحد ما تعــــبت رجعت راسي على حايط بــــس دموعي ينزلن همس

::-اعوضج
-ابـــــتسمت باستهزاء ::-عن ياجررح؟

::-كلهن اداويهن واحد واحد وامسح اثرهن

-البجسمي؟ البروحي ؟لو البگلبي؟شيمسح اثرهن؟

:-انطيني فرصة جــــمرة  رجعيني الحياتج

-رفعت عيني العينة تنهدت وابتسمت بطرف شفتي
::-تحلم

-وهوا عيونة يتوسلن النظرة من عيني حجيت بحركه گـــــلبي محروك

:: -وحگ كل لوعة عيشتنياها وحگ ليالي الادمان الماغفت عيني بيهن لو تصير الضوء لعيوني المتعوبات ..اعميهن

::-الهالدرجة جــــمرة ؟

::-واكثررر" حل ايدي كاااافي مهزلة

-ابتسم بلع ريك شفايفة يرجفن رفع ايده
يمسح وجهة الحيرة ماليته دار عيونة مني يلمعن بدموع
هز راسة موافق وتقرب يفتح ايدي ويحجي بقهر

::-هاي هيه التردينة انتي يصير حقج شما تحجين حقجج

-وكفت انكث بملابسي من التراب وهوا يباوعلي بقهر ماخليت عيني بعينة گلبي احس يريد ينفجر دنكت اشيل جنطتي من الگاع واحجي واغلط
وروحي مفرفحة

::- حقير متعلم على الخطف ماتتوب مجرم شيغيرك انته شيغيررررك لو يخلوك بمي زمزم ماتتغيررر تبقه مجررم "

-مسحت الدمعة النزلت من عيني ماريد ابجي

وكف كدامي مكتف ايدية عاض شفتة بقهر
بلع ريك ونزل ايدة ترجف كال مختنك

::-احضنج؟ اخر مرة

-فكيت عيني اريد املخة واملخ روحي نزلت دمعة من عينة دنك متلافي نظراتي وانا مدري شصار بحالي شي بيه يرجف اله وشي يتذكر كل لحظة.عذبني بيها وكل لحظة اهتمام منه اريده واحقد على نفسي من تحن اله

::-اخر مرة ماراح تشوفيني بعدها

-عيونة المتوسلات صوتة المخنوك هدوء المكان جبروني اسكت .'مد ايده يلزم ايدي سحبني بهدوء الحضنه خايف ويرجف عبر ايده على ظهري حضني حيييل غمضت عيوني وهوا يشمني ويقوي حضنة يريد يدخلني لبين اضلوعة

ماكدرت حتى اعبر ايدي واحضنة منزلة ايدي احس كل الجاي يصير فوك طاقتي وماعاد اكدر اتحمل شي بعدها

هستوه جاي يبتعد ودفعني على الحايط حييل
شال ايدة بيها كلنس خلاها على وجهي واني اقاوم ما اتنفس وادفع بيدة

وهوا عيونة فاضت دموع وويصيح

::-اخرر ذكرى مني اخر ذكرى

-غمضت عيني وداخلي يصرخ اخر اذية لحد ما اختنكت وتنفست راسا غمضت.

يتبــــــع⋆𓍯

الكــــاتبة أيـــــــلول⋆𓄼𓂁

💚🌿

الصور من جــــمرة 👇

البارت من زمان كاتبته بــــس اليوم البصرة بيها مطر والكهرباء خطيه. تخاف بــــس تسمج صوت الرعد تنطفي