رواية أجرام مستباح لثلاث ندبات الفصل الثاني وأربعون 42 - بقلم الكاتبــة ايلول

مساء الخير ...

#أجرام_مستباح_لثلاث_ندبات

                                           بقلم الكاتبة أيلول

    ins: t8_fe3 للتواصل

𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒

أنتِ جمرة شوك بيدي
مدري أذبها مدري أچوي
سنيني بيها مدري أخلي
العمر يتباهى بضواها ؟.

.................................................................

جــــمرة ::- شهكت ارجف وهو عينه بعيني بــــسام فشر عليه وهو يضحك ضربوه الجنود صاح على بــــسام

الأبـــــهر ::- ويا منو تورطت

- اخر كلمه حجاها وجروه وكعت على اركبي ابجي واقنع بنفسي هاي هي خلصت خلصت كسرته مثل ما لوع گـــــلبي كعد بــــسام بمستواي يحجي

::- كومي يا عيني واللـــه اخيسه بالحبس العار

- رفعت عيني العينه ارجف گـــــلبي تگطع شسويت خليته يسجن اخوه بدل ما يحضنه احجي اكله انـــتَ اباذر والسجنته الأبـــــهر گـــــال

::- كومي اوصلج

- كمت جريت السوار لبسته وطلعت ويا بــــسام مختنكة وضايعه لحظه اتندم ولحظة احس السويته حق عشت بتناقض ضايعه صعدت مغمضة عيني رجعت النفس الوقت الحجيت بيه ويا بــــسام من شفته يريد يطلع وصحت عليه

::- بــــسام

- اجه يمي يتلفت گـــــال ::- هــــا خوية

::- محتاجتك بشغله بــــس توعدني ماتطلع الاحد بيني وبينك حتى زوج امي مايعرف

::- تفضلي مــــحد يعرف بشنو اكدر اساعدج

::- زوجي

- سكت يباوع بعيني عاكد حواجبه واني ارجف خايفه كملت كلامي

::- جذب احنا ما مسافرين هو مجـــرم جبرني اقبل بيه هددني باهلي ولهسه يهددني اذا احجي يأذيهم

- ضحك ما مصدكني الحد ما بجيت كعد يمي بصدمة سولفتله شلون خطفني وهددني وابد ماجبت طاري اسمه ولا قصتة وتجنبت اذكر قسام خاف يعرفة گـــــال خليها وراي سهله وثاني يـــــوم انطاني جهاز اتذكر كلشي سويته وكلبي ينعصر.
فززني صوت تليفونه من دك اتصال مسحت وجهي اباوع للطريق فتح التليفون على السيارة والصوت عالي جندي كاله

::-سيــــدي منتظرينك

::- هههه جاي خوش وليمه هــــا؟

::- على مزاجك مو تحب الصعب هذا مبين ماكو اصعب منه

::- يمي يسهل

جــــمرة ::- اباوعله فاكه عيني كلها سد الاتصال باوعلي ورجع باوع للشارع

::- شنو راح تسوي؟

-التفت ابتسم بطرق شفته ::- ناخذ حقج ونعلمه الله حق

::- تضربه؟

- ضحك عينه للطريق مسحت وجهي متخبله
::- ديربالك تمد ايدك عليه فهمت ديربالك لا تضربه هو متعذب لا تمد ايدك عليه

بــــسام ::- شبيها هاي مو صاحيه هزيتلها راسي اي بــــس أريـــــد تسكت وهي ساعه تبجي ساعة تصفن وصلتها البيت امها ونزلت وياها أريـــــد افهمهم دخلنا للكراج هي تبجي وطلعت امها متخبله وغدير وراها كعدت على حيلها ام مصطفى حاضنتها وتصيح

::- يـــــمة شبيج بــــسام بنتي شبيها

::- خاله زوجها واحد مجـــرم وكل هل فترة هو خاطفها مو مسافرين وين ابو اسمر

- يتصايحن ويبجن غـــــدير كالت راح للدوام

عفتهن وطلعت للمركز لكيت مرتضى بالباب يدخن ضحك گـــــال

::- مستعجل على وليمتك؟

::- كلش

::- هههه يعدل مزاجك مبين صعب مثل ما تحب

- دكيت على جتفة اضحك ::- مو على بــــسام

- عفته وفتت جابوه الغرفة التحقيق وكفت متنرفز من ضحكته يمي جندي يريد يكتب التقرير ضحك الضحكة جـــــندل خزرته

::- اسمك الكامل؟

جـــــندل ::- تعرفه

::- أريـــــد اسمعه منك

::- هههههههه السؤال الك شنو عقوبة اليعتدي على مواطن بريئ؟

- دكيت بأيدي على مكتب گدامه اصيح
::- منو البريئ؟

- رفع حاجبه يضحك وحجه بنبرة هادئة
::- انا

- اختفت ضحكته مركز بعيني بلع ريك ضحكت

::- هــــا استوعبت انـــتَ مجـــرم؟

- سكت أيــــدة على راسة. باوعلي ورجع نصه يهز راسة لا رجعت سألته
::- اسمك عمرك؟

- بقى ساكت بالعاده اليشلع كلبنا بضربة يعترف سحبته من ياخته ضربته رجع ليوره يمسح خشمه ويضحك مسح وجهه  باوعـــــلي يضحك حيل والجندي على ضحكته مبتسم گـــــال

::- الافضل الك ما ترفع ايدك حتى ماتخسرها من اطلع .

- رجعت ضربته حيل وأنفتح الباب صاح مرتضى

::- سيــــدي الـ.......... ادريــــــس يريدك.

- دفعته من ايدي وطلعت غسلت ايديه ورحت المكتبة اول ما دخلت وكف خازرني وبسرعة اجه عليه ضربني بلعت ريك ساكت منزل عيني وهو يغلط ويسب متخبل لزمني من فكي بغضب ينتر ويصيح

::- تشتغل عندي لو اشتغل عندك تلعب من وراي الف مره حذرررتك حيوان

::- سيــــدي ..

- جر الرتب من كتفي ودفعني للباب حيل يصيح على مرتضى وعلي

::- ما اشوفك هنا فصل امشي منا واللـــه وقسم بالله اليوصل معلومة اله اسجنهم ثنينهم حول القضيه للسيد

- بقيت واكف بمكاني عيني عليه مستهظم حيل ولا اكدر ارد   من ماتحركت كام من مكانه جراني من ياختي طلعني برا دفعني وهو يغلط هاني كدام جنودي وحتى السيارة اخذ سويجهاا بــــس اسلاحي بخصري.

احس نار تاكل بروحي هي بــــس وضيفتي بقت الي وهسه يريد ياخذها مني مسحت وجهي محتار اخذت تكسي ورجعت للبيت.

غـــــدير ::- احس عقلي ما يستوعب بــــسام عافنه وسط هوسة وطلع وجمره بــــس تبجي بحضن عــــمة كوه كومناها دخلناها للبيت وهي على فرد بجية عــــمة حاضنتها على كلبها تريد تفهم

نــــهله ::- كعدتها كدامي مسحت دموعها اباوع بعينها

::- معلول گـــــلبي لا تزيدين ناري فهميني

- جرت نفس تشهك وتحجي متهستره ما افهم شي منها

::- هو خطفني اغتصبني لا ما اغتصبني گـــــال اغتصبتج عذبني باوعي باوعلي خلاني اشرب مخد*رات وخلاني محبوسة بالبيت وحدي وخلاني ببيت مسكون ماما واللـــه هو أذاني هو يستاهل اسوي بيه هيج يستاهل اغشه واكسر كلبه

- رجعت ضمت وجها بصدري تبجي بنتي متخبله ساعة تحجي وياي ساعة تهمس بصوت ناصي ويا نفسها الحد ما غفت عفتها بفراشها وكمت مهدود حيلي بعده جرحي على ابني اخضر وطلعتلي جــــمرة بجرح اكبر

جــــمرة ::- حضنت السوار الگلبي المشتعل نار أريـــــد انام ما أريـــــد افكر ما أريـــــد احس نفـــــسي غلطانه هاي هي هذا الازم يصير غمضت حيل ما أريـــــد اتخيل يعذبونه الحد ما غفيت بتعب احس أيــــدة على وجهي وصوته بأذني يهمس

::- سنايبر

- فزيت مخروعة اصيح واتلفت بالغرفة ادور وارجف دخلت غـــــدير خايفة حضنتني اسمع صوت زوج امي يحجي بصياح باوعت الغدير

::- شبيه هذا

غـــــدير ::- مسحت عيوني مختنگة كتلها
::- فصل بــــسام وعمه ما قابلة عليه .

::- وهو كل يوم يصيح على امي هيج؟

::- لا واللـــه واصلاً ما جاي يصيح عليها بــــس محروك گلبه من بــــسام .

- عكدت حاجبها تتنصت عليهم صاحت عــــمة عليه طلعتلها كالت

::- روحـــــي الزوجج شوفيه نوب اليسوي خير ينفصل

ادريــــــس ::- لا حول ولا قوة الا بالله اكلها يشتغل من وراي محذرة اكثر من مرة

غـــــدير ::- عفتهم وطلعت مرت اسمر بالكراج بــــس شافتني صاحت

::- ايع شلون شكول تلفي علينا ما كـــــافي عليه خلقتج نوب هاي المخبله

- عفتها ورحت فتحت الباب درت عليها بعدها واكفه كتلها.

::- ديربالج هاي المخبلة ماعندها عيب ومايصير التلزمة تگطعه.

- سديت الباب ورحت البيتي دخلت ادور عليه لكيته بالغرفة يدخن  كاعد على حيله القراصة والسلاح والدفتر وصورة عـــــلي گدامه رفع عينه باوعلي عــــــيونة حمر اشر بأيده روحـــــي

::- بــــسام.

:;- روحـــــي ارجعي روحـــــي باقرب وقت ننفصل

- فتحت عيني على وسعهن كام على حيله سحبني للباب يحجي بحركة

::- ما اريدج  روحـــــي گبل ما ياخذج مني لو الموت لو اضيعج روحـــــي انا مايبقى الي احد كل الاعزهم افارگهم فارگيني من هسه

- دفعني للباب وسداه عافني بالشارع بصدمه امسح دموعي ويرجعن ينزلن نار اكلت گـــــلبي

رجعت خطوتي ترجف فتحت باب بيت عـــــمو دخلت هند بعدها بالمرجوحه غمتني وكفت على حيلها كالت

::- انتِ ما عندج كرامه نطردج وترجعين؟

- اباوعلها ساكته ودموعي تنزل فززتني جــــمرة وصياح عــــمة عليها طلعت مبدلة وتصيح

::- رايحه البيتنا اني ما ابقى ببيت هذا ابقي انتِ عنده

غـــــدير ::- جلبت بيها عــــمة تبجي جرت ايدها منها منهاره وما تعرف شتحجي رفعت اصبعها ترجف كالتلها

::- ابقي ابقي عند زوجج اصلا لو ما متزوجه جان خلصت منه لان شردت واجيت لبيتنا وما لكيتج لو ما متزوجه جا شفت مصطفى.

غـــــدير ::- سحبت ايدها حيل مفاتيح البيت يخرش صوتهن ويا رجفتها طلعت من البيت تركض وعمه وكعت على اركبها باوعتلها وباوعت للباب طلعت وراها ركضت التفتت تباوعلي وتمشي سريع وصلت يمها كوه اجر النفس مديت ايدي لزمت ايدها. التفتتلي ساكته عصرت ايدي وسط ايدها ومشينا.

نــــهله ::- بنتي ادريــــــس بنتي

::- بــــس على كيفج كومي عوفيها وبالليل نروحلها

::- شلون اعوفها شلون اعوفها بنتي متخبله

- بجيت گـــــلبي متكطع اجو الجهال من المدرسة يباوعولي بصدمة رفعت راسي اباوع الادريس مسحت دموعي عيني بعينه

::- راح اروح

- فتح عينه بصدمة وكفت على حيلي ارجف
::- ما اكدر اعوفها هيج بــــس افهمها وافهم منها اجيبها واجي

- وكف وياي مد أيــــدة على وجهي مسح دموعي
::- براحتج

- جريت الجهال للغرفة مستعجله ::- بدلوا بسرعه

غيث ::- وكتبنا ماما

::- لا حبيبي

- عفتهم يبدلون وركضت طلعت عربانة صوفي نكثتها ادريــــــس يباوعلي بالصالة احجي وياه وامشي

::- نبقى يمها الحد ما نقنعها واللـــه جــــمرة بــــس بالبداية تعصب وتهوس الدنيا وبعدين تننازل

احجي وامشي بالعربانة الغرفة صوفي أريـــــد اخليه بيها صاح ادريــــــس

::- نــــهله

- ما اهتميت فتحت باب الغرفة دخلت العربانة اعدل بيها اخذتها يم الجرباية ودرت عيني اله
وكفت اجر نفس اباوع المكانه فارغ رجفت حسيت ايد ادريــــــس على راسي سحبني الصدرة بجيت مختنگة

::- يـــــمة يا مصيفي يا روح امك شيعودني على فراكك ولك يـــــمة هديت حيلي.

- ابتعدت امسح بدموعي ضيعت جهالي واحد واحد صاحت هبه كملنا ماما

عفت ادريــــــس لبست عبايتي وجواريبي اخذت اغراضي بايدي جريتهم. طلعنا للكراج وطلع ورانا ادريــــــس صاح

::- غيث غفران

- وكفت التفتوا الابوهم اشرلهم براسة ارجعوا لزمتهم قوي ساكتة تقدم يمنا سحبهم من ايدي فتحت عيني مصدومة وهم يبجون

::- روحـــــي عوفيهم

::- ليش؟

::- جــــمرة تغار منهم تأذيهم

::- لا واللـــه لا تعالوا

- مديت ايدي الهم سحبهم حيل وهم يبجون ويصيحون

::- ماما

- گـــــلبي تگطع وين اروح كل الاختبارات صعبة الدفنته اعز من روحـــــي وهذيج بنتي وكلبي وهذول بمعزت جهالي شلون اعوفهم شلون اجر ايدي من ايدهم سد حلكهم وهم فرفحوا

::- ادريــــــس واللـــه ما اكدر اعوفهم وراي

::- روحـــــي.

- جراهم للبيت وهم شايطه روحهم بــــس يردون يفلتون من أيــــدة ويجون عليه وهبه تبجي على بجيهم

سحبتها وطلعت

غـــــدير ::- اخذنا تكسي وهي حتى ويا ابو التكسي تريد تتعارك نزلنا قريب على منطقتنا مشينا مشي لازمتني وتجر بيه وراها ترجف وتحجي وهي تمشي تغلط وتسب وترجع تصيح

::- كله منك اذيتني ما ردت اسوي هيج بــــس كسرت گـــــلبي حرمتني من مصطفى تستاهل

- وصلنا الباب البيت خفت منها سحبت ايدي وهي تفتح بالباب التفتت عليه خازرتني صاحت

::- شعندج لاحكتني ؟

- بلعت ريك مرتبكه اباوع بعيونها اشرت للشارع
::- لا ما لحكتج اجيت وياج بالتكسي.

- هزت راسها اي ورجعت تفتح بالباب دخلنا بيتنا نصة تراب وهي دخلت گبل للغرفة القديمة جرت فراش نكثته من التراب مدته وتمددت عليه تبجي وتبوس السوار البأيدها تحجي همس

::- يارب ما يعذبونه يا رب بــــس يسجنونه ومايتعذب

- طلعت من يمها ساكته دك تليفوني بايدي شفته بــــسام انطيته رفض شمرت الصايه والحجاب  وكمت انظف بالبيت وكل شوية افتح باب الغرفة اباوعلها وارجع الحد ما اجت عــــمة كعدت بالطارمه مهدود حيلها من اباوعلها ايديها يرجفن وتغص بالكلمه بــــس غسلت ايديها اوجها فاتت للغرفة كعدت جــــمرة حضنتها ساكته وهي تكلها

::- عفتيهم واجيتي الي خيولون اصلا يصيح عليج .

::- اي

جــــمرة ::- رفعت راسي من حضنها اباوع بوجها رفعت ايدي كدامها

::- هذا السوارع هو سواه الي

- عكدت حواجبها ما فاهمه كعدت على حيلي مسحت دموعي اباوع بوجها

::- احجيلج كلشي؟

- هزت راسها اي التفتت اباوع الغدير شمرت وصلت المسح واجت كعدت يمنا وهبه بصف امي
سولفت كلشي شلون خطفني شلون خلاني مدمنه شلون مات ابوه شلون عــــمة اغتصب امه شلون انتحرت شكد ساعد اطفال وشكد تعذب والاثار البجسمه سولفت هواي وتجنبت اذكر اسماء اخوانه ولا كتلها بــــسام هو نفسه اباذر هي فاتحه عينها على وسعها من سكتت كالت بقهر

::- كله من ايدي انا سلمتج اله بــــس جــــمرة جــــمرة حرام السويتيه وهو يدور على اخوانه

- فتحت عيني بعينها خازرتها ::- عذبني

- جــــمرة خطيه واللـــه خطيه شلون يشوف اخوانه بعد المفروض تخلصين منه بــــس ماتسجنينه.

::- وخرري لا يشوفهم اني ما شقت مصطفى بسببه لا يشوفهم وخري عوفيني

::- اشش ما اعوفج بعد ما اعوفج

غـــــدير ::- سحبتها حاضنتها وهي تفشر عليه تمسد على راسها ساكته رجعت نامت وهي تشهك كمت من يمهن ما مستوعبة رجعت لكيت مكالمات من بــــسام هم ما جاوبت يطردني شوكت ما يعجبه ويتصل شوكت مايعجبه للساعة عشرة بالليل دك تليفون عــــمة وهي غافيه يم جــــمرة اخذته ورديت اني

::- هــــا عـــــمو

ادريــــــس ::- هــــا غدوره عـــــمو شلونكم

::- الحمدلله

::- عمتج وين

:;- نايمه

::- راح اجيب غيث وغفران صار عندي واجب خارج المحافظة

::- وبسام

::- خلي ينام بالبيت ويتأدب من يتعلم الشغل يرجع

- سكتت وهو سد الاتصال رحت كعدت عــــمة فزت تفرك بأيدها هبه كالتلها

::- ماما متت من الجوع

نــــهله ::- هسه اروح اشتريلكم

- كمت غسلت صليت واجت غـــــدير تليفوني بايدها كالت عـــــمو كملت ورجعت اتصلت عليه جاوبني مستعجل

::- نــــهله بسرعه نريد نطلع اوكفيلي بالباب

- لبست عبايتي وطلعت فتحت الباب على كيف وكفن سياراتهم بالباب نخمش گـــــلبي نزل بايده غيث وغفران اشرلهم يتحركون وبقن بــــس سيارتين وره سيارته اجو يركضون حضنتهم اشمهم وابوسهم

::- يا روح امكم فوتوا.

- راحوا الهبه وكفت عدل دخل هو بملابسة العسكرية عيونه تتلافى عيوني گـــــال

::- ما اكدر اعوفهم بالبيت مــــحد موجود سمر اجت تعاركت ويا مرة اسمر وهو وداها الاهلها

::- وين راح تروح

::- واجب ما اطول يومين

::- وزوج جــــمرة

::- شبيه

::- جاي اسأل عنه ما اعرف

::- بعده ماةفارغله حولت قضيتة الانسان دقيق جــــمرة اذا الها حگ يـــــمة ناخذه لا يضل بالج

::- بــــس اكو هواي اشياء ما تعرفها تخصه

::- خلي ارجع ونتفاهم حيل مستعجل

- سكتت هزيت راسي اي تقرب باس راسي والتفت يريد يطلع رجع گـــــال

::- خاف ما تحصليني لايضل بالج مرات تغطيه ماكو .

::- بحفظ الرحمن

- طلع قفلت الباب وراه ادعي رجعت للغرفة جــــمرة كاعده تخزرهم من بعيد وهم يحضنون بهبه ويسولفون وياها كعدت يمها احاجيها واحاول اقنعها وهي بــــس ساكته كل شوية ترفع السوار الابسته تبوسه ودموعها تغرگ خدها

غـــــدير ::- عــــمة متنا من الجوع صارت بـ 12 واحنا لا مي ولا اكل

- هزت راسها موافقة لبست واخذت غيث طلعت تشتري شفت جــــمرة طبيعيه بــــس ساكته تمددت يمها دك تليفوني صوت رسالة وهي فزت.خايفة.

بــــسام::- جريت اخر نفس من الجكاره اباوع على خساراتي واحد واحد ابهري أخـــوي وروحي
درة ضي عيني اختي الوحيده عـــــلي صاحب روحـــــي الما عندي غيره امي الربتني وحاولت تعوض فقداني واخيرا سلاحي وضيفتي الحاولت اوصلها بتعب ما بقالي منهن شي.

مسحت وجهي شمرت القميص ورجعت ادخن مكابلهن شيصير لو امي ما انتحرت وضيعتنا شيصير لو باقيه لامتنا جوه عبايتها ومحاربة الدنيا علمودنا ليش عافتنا واحن اطفال ما نعرف نتصرف كل همنا نحمي اختنا وهم ضيعناها

رجعت حيييل لبعيد الوكت المخزن للحرك الوكت اخر حضن لمانه بيه الأبـــــهر الاخر دمعه مسحها بايده الخشنه من شغل الشارع الاخر شهكة بصوت درة نرسمن كدام عيني ينعادن مشاهد بروحي وبعقلي

من اخر نظرة بعيون الأبـــــهر من جرونه من حضنه وهو يبجي واحن نبجي نباوعلهم يضربونه وهو عينه علينا حضنت دره الگلبي صح خايف بــــس خوفي الاكبر على اختي مثل ما وصاني الأبـــــهر

اجوع بــــس اشبعها ابرد بــــس ادفيها
انضرب بــــس احميها.

بقينا انا وياها سوه بغير مكان ويانا اطفال هواي
جانت دائماً خاتله بظهري ومن يجي وكت الاكل
يشمروه النا مثل الحيوانات القوي ياكل والضعيف يبقى اعارك بــــس حتى اوكل دره وما تبجي من الجوع انومها واهمس باذنها هسه يجي الأبـــــهر
ياخذنه لاتخافين وهي تخلص الليــــل بجي من وجع الحرك بأيدها

اسبوع بقينا بهذا البيت الحد ما سمعتهم باعوا دره وثنين بنات بعمرها ماجنت اكدر اشرد ولا اقبل اعوفها سحبتها من ايدها ختلنا جوه الدرج لامها بحضني حيل وكاطع حتى النفس وخرتها من حضني اباوع بعينها درة سوي هيج سحبت اصابعي بستهن وخليتهن على گـــــلبي عيوني من الدموع احسهن يحتركن سوت مثلي كتلها
هيج كل شوية سوي هيج الأبـــــهر يسمعج وماما وبابا يسمعونا من نسوي هيج خوش هزت راسها موافقة رجعتها الحضني وهي كل دقيقة تبوس اصابعها وترجعهن الگلبها.

اختفى صوتهم جريت نفس براحه بست شعرها وشميته ايدي على ضفايرها مغمض عيني وفزينا مخروعين من حسيتها نهبتت من ايدي جلبت بيها بقوه ابجي وهي تصرخ وتصيح باسمي حيل لازم كصيبتها الحلوة جروها مني وفلتت قراصتها بأيدي بيومها ماكدرت افتح عيني من الكتل.

وراحت دره هاي اخر مره شفتها بيها بعدها باسبوع سحلوني شمروني كدام رجلين واحد رفعت عيني اله خايف وهو وكف على حيله انطه فلوس وسحلني وراه شمرني بالسيارة وكعد يمي خانگني بأيده ويحجي

::- راح تصير عندك عائلة انا ابوك وهسه تشوف امك اليسألك شنو اسمك تكول بــــسام عمرك 10 جنت عايش بالخارج من اول ما ولدت فهمت؟

- وقتها هزيت راسي اي خايف شيگلولي اسوي المهم ما انضرب ما اتجوه قبل لا نوصل عصر وجهي بأيده گـــــال

::- اذا سألتك المره تگول جنت بالميتم خوش؟

- هم هزيت راسي اي سحلني للبيت وكفت مره
تباوعلي بعيون مدمعه دخل هو وراي كالها

::- ارتاحيتي هسه تبنيت

- سحبتني المره الها تسأل وتستفسر ويفهموني على جذبتهم العرفته من قبل عشر سنوات هم مسافرين واول ما سافروا كايلين صار عدنا ولد وقطعوا علاقتهم بالعراق من قرروا يرجعون المره كالتله اتبنى ولد عمره عشرة بالميتم ماينطون الطفل بسهوله الا اكو شي بأسمه وتحقيق وسين وجيم الاسهل اله يشتري بدون مايخسر هواي بــــس كم فلس وهو هيج سوه اشتراني وذلاني 17 سنة ماكدرت امشي وياهم بخطتهم جنت دائما اشرد منهم وبكل مره يلزمني يگطع الحزام على ظهري الحد ماحجيت للمره كلشي وكتلها ماجابني من الميتم وحجيتلها على اهلي واخواني قنعتني اكمل دراسة وهي تحاول تدور عليهم

وهيج مرت السنين الحد ماعرفت عـــــلي بالكلية جان صاحبي الوحيد ورغم هذا كله ماحجيت شي يخصني اكتم بگلبي دائماً ادور عليهم وماكو اي اثر اروح للمناطق الجنا بيها الكاها مهجورة وفارغة ومن تعينت بديت ادور بالاسم سجل درة مفقود والابهر خارج العراق ضيعت اخواني وما وصلتهم ولا بأي طريقة.

سحبت القراصة ابوسها واشمها وين الكاج هاي الوضيفة التقربني منج راحت وين الكاج يا روح اخوج وين الكاج يا وصية الأبـــــهر .

غـــــدير ::- فتحت الرسالة وهي عينها وياي من رقم كاتب
::- خلي هذا الكرت وفعلي نت راح ادزلج صور مهم

- عكدت حاجبي ما فاهمه عندي رصيد بسرعة فعلت نت راسا وصلن صور على فايبر كعدت عدل فاتحه عيني على وسعها ودرت اباوع الجمره

جــــمرة ::- شكو؟

- كعدت عدل اخذت التليفون من ايدها اگلب بالصور وكلبي يدك حيل صورتي بالمرجوحه
صورة ثانية متمددين وهو نايم على صدري كالبه عيوني ليفوك اعيب صورة واني نايمه وصور زعلانه وخازرته. فزيت من دك التليفون بلعت ريك اباوع الغدير وهي تهز راسها لا تجاوبين

جريت نفس بقوة جاوبت بخوف قربت التليفون على اذني ماكو اي صوت همست خايفة

::- الو

::- سناااايبر

- فتحت عيني على وسعهن اشهك من سمعت صوته ايدي رجفت حيل وهو ضحك

::- كسرتيني

- نزلن دموعي ساكته مصدومة وما مستوعبة

::- مو كتلج انا ما انسجن ليش جبرتيني التجئ القسام.

- اختنكت ارجف  ::- شلون طلعت ؟

::- هههه مثل ما دخلت

::- شيطان انـــتَ

::- وانتِ مرتي شيطانة اكثر مني

- سكتت دموعي احسها تحرك عيوني وغدير كدامي تتحركن گـــــال

::- بعد ما اجبرج عليه انا رايح بــــس قبلها أريـــــد  اكلج شي

::- وين رايح؟

::- جــــمرة انا احبج

- شهكت ارجف امسح دموعي ويرجعن ينزلن همست ::- ادري

::- خسرت هواي واخر خسارة انتِ حاربت هواي حت اعيش بــــس بعد هذا حدي

::- أبــــــهر

::- ما اكدر اعيش اكثر ضيعت اخواني وضيعتج
جــــمرة النفس صار يچوي گـــــلبي أريـــــد ارتاح

- كمت على حيلي مفزوعه ::- وين انـــتَ؟

::- قريب عليج

- ركضت للغرفة الثانية  والتليفون على اذني اجر بحجابي واحجي
::- أبــــــهر حاجيني اني لكيت اخوك عرفته واللـــه عرفته وين انـــتَ وين

::- جــــمرة ادفني جثتي وخليلي قبر اذا لكيتي اخواني خلي يزوروني بلعت سم ههه وبدأ ياكل جسمي

- وكفت اجر نفس بــــس أريـــــد افهم وغدير تبجي وتسحب بأيدي تريد ارجع للغرفة

::- وووين انـــتَ وين أبــــــهر حــباب واللـــه اموت والقرآن لكيت اخوك واللـــه لكيته هسه اجيبه واجي لا تسوي شي عفيه عفيه

::- ما تلحكين انتهيت.

دفعت غـــــدير وطلعت بالشارع مثل المخبلة التليفون على اذني واركض منا ومنا وهو يشهك گـــــال

::-  اكو عماره مال مجمع متروكه وره دربونة الحجية بشارعين هناك عفتلج اغراض وهويات اخذيهن .

- ركضت بكل قوتي ابجي واحجي وياه
::- وانتَ وين انـــتَ وين أبــــــهر الولد السجنك اخوك هذا اخوك لا تموت عفيه لا تموت

::- هههه متت من زمان بــــس ابقي احجي وياي الاخر نفس.

- ركضت حيل بــــس أريـــــد اوصل جسمي كله يرجف صوته اختفه واسمع صوت الاغنيه يشغلها ويطفيها في حزن وسع المدى نفـــــسي نگطع واني اركض ظلام يخنك وهدوء ماكو اي صوت
التليفون يرجف بأيدي

::- أبــــــهر حاجيني عفيه حاجيني لاتموت عفيه لا تموت

::- هممم

::- وينك وينك؟

::- تحبيني؟

::- اي احبك واللـــه احبك هواي اسفة لان غشيتك ما اعيدها بــــس لا تسوي شي واللـــه ما اعيدها

::- سويت جــــمرة سويت .اااخ يابة

::- أبــــــهر أبــــــهر

- ركضت حيل بعد بــــس شارعين اركض وما ادري اذا هو موجود بهاي العمارة لو لا ارجف وخايفه.

غـــــدير ::- لطمت على وجهي متخبله بالشارع طلعت أريـــــد عــــمة ترجع ماكو رجعت اركض جريت تليفون عــــمة من ايد غفران اتصلت على عـــــمو ادريــــــس مغلق تخبلت رجعت اتصلت على بسام ابجي بسرعة جاوبني

::- الو بــــسام الحك عفيه الحك

::- شكو شبيج

::- جــــمرة خابرها زوجها وطلعت تركض ما ادري شصار

::- شنو شنو فهميني شتليصين انتِ

- شهكت ارجف اسولف وابجي صيح يسب ويغلط على الدولة والحكومة گـــــال

::- تليفونج عدهااا ؟

::- اااي اخذته هو على رقمي اتصل

::- خرررب ما يخلوني ارجع للمركز شلون احدد موقعها شلون تروحله هي شكد غبيه شبيها هاي

- كعد يغلط ويسب سد التليفون رجعت للغرفة يم هبه وغفران مخروعات سمعت عــــمة رجعت شهكت ايدي على گـــــلبي من كالت الغيث

::- ماما غيث خلي طبقة بسكت الصوفي

- طلعت كاعده بالمطبخ تريد تسوي اكل وغيث صافن عليها البسكت بأيده وهي تحجي مستمرة

::- اخليلك وياه بالچاي تريد؟

::- عــــمة

- حجيت ابجي التفتتلي فازة بــــس حجيتلها تخربطت لمن اجه بــــسام وهي تدك وتلطم نتصل على عـــــمو ادريــــــس مانحصله وبسام معاقب تخبلنا لمن واحد اتصل على بــــسام كاله راح احددلك الموقع وطلع  يركض.

جــــمرة ::- دخلت بالشارع البيه البنايه نهد حيلي واني اركض ::- أبــــــهر حاجيني لا تسكت

::- هممم

::- اجيتك وصلت راح الحك عليك

::- اممم

- بجيت كوه اجر النفس كمت اسمع صوت الاغنيه مو من التليفون ::- والله بسام اخوك عفيه لا تسوي شي

::- ههه احبج حيل احبج

- دخلت للعماره الهث وتعبانه صوت الاغنيه واضح كمت اسمعه بالعماره وبالتليفون افر بعيوني ادور ظلام وكوه اشوف

::- وينك أبــــــهر ظلمه

::- اجيتي؟

::- اي اي واللـــه اجيت

::- ليش بعتيني؟

::- بــــس كلي وينك

- فتريت ادور شغلت ضوه التليفون ماكو شي عباره عن مكان متروك رجعت التليفون على اذني
ارجف

::- أبــــــهر وينك؟

::- ليش بعتيني؟ ثاق بيج ليش كسرتيني ؟

::- وين انـــتَ؟

::- يمج!

- التفتت ادوره رجليه احسهن تكطعن مشيت للجهه الثانية الهث بتعب النفس ضاك بصدري

::- احبج

- شهك حيل يون بوجع تخبلت ابجي واصيح
::- وينك اني بالعماره وينك

- اختفى صوته واني اصيح حسيت حركه وره ظهري هستوني أريـــــد التفت گـــــال

::- وراج سنايبر!

- التفتت فازه صرخت مفزوعه سحلني عليه بسرعه ساد حلكي بقوة

::- تغدريني؟

- ادفر بايده مفرفحه وهو بكل قوة خانكني ورافعني من الگاع كعد على حيله حابسني بحضنه حجه بأذني

::- اشش راح ارفع ايدي من حلكج صرخي اذا تحبين

- بــــس وخــــر أيــــدة شهكت اجر نفس وارجف لزم فكي بقوة يحجي

::- كل عقلج اموت قبل ما اعاقبج

- جريت نفس أريـــــد احجي بسرعه خله أيــــدة بيها منديل على وجهي قاومت ما أريـــــد اتنفس
گـــــلبي وكف رجعتله برجليه استحق انحبس عنده عمر خدعني مثل ما غدرته.

بــــسام ::- لو مصيري ارجع الوضيفتي من خلال جــــمرة لو اخسره للأبد على ايدها مدري تورطت وياها مدري تورطت وياي كاعد بالسيارة احرك بروحي منتظر يدزلي الموقع شوية ودزاه وراها رسالة

::- اعذرني بسام جان طلعت وياك جنود بــــس سمعت كلام ادريــــــس

- ما جاوبت رحت بسرعه صفيت السيارة بعيد ونزلت بــــس السلاح بأيدي هسه اروح بيها استخدم سلاح الدولة وانا مفصول طبهم مرض غير ياخذونه مني المن عافوه.

دخلت اترصد لكيت بــــس تليفون غـــــدير بالگاع رجعت خابرت على الولد

::- بــــس أريـــــد اعرف شلون طلع؟

::- يا شلون طلع أمر اجه ما عليه ولا تهمه رجال جان بالخارج وسجله انضف من وجهك
بــــسام رحمه الاهلك لا تسحب الساني منعونه ننطيك اي معلومة.

::- بركبتك انا مــــحد يعرف ساعدني من بعيد لبعيد

::- مقابل

::- تدلل شكد ما تريد

::- صايرين.

جــــمرة ::-فزيت على مي بوجهي اسحب ايدي ماتنسحب.مشدوده  وره ظهري راسي يأذيني حيل وهو واكف بباب الغرفة يدخن غمضت عيني ورجعت فتحت

::- وين جبتني؟

::- الجهنم

::- أبــــــهر افتح ايدي خلي اسولفلك بــــس افتح ايدي

- ضحك حيل شمر الجكاره ومد أيــــدة بجيبة طلع حباية فتحت عيني على وسعها

::- لااا باوع اسفة واللـــه اسفة

::- ههه مو الج مو الج

- خلاها بحلكه بلعها عصر راسة ابين ايديه يرجف صيح

::- ليش فهميني ليش من لمسة ايدي اخاف عليج وانتِ تغشيني بحضني تهمسين بالحب
ناصبتلي خطه ليش سلمتيني نفسج ليش خليتيني اتقربلج ذبحتيني كسرتي روحـــــي

- غمضت عيني ساكته وهو بــــس الكرسي گدامه شاله يصيح ويضرب بالحايط غمضت عيني وسحبت رجليه الصدري ساكته فقد الحد ما انهد حيله كعد يجر نفس بتعب

::- تــــدرين منو الطلعني ؟ قسام ولج رجعتله رجعتله من وراااااج.

تغشيني بلمساتج البارده مو؟ تضحكين علي
تأكدتي ما اكدر على اذيتج استغليتي ضعفي يمج انشعل وانطفي وما اتقربلج بلمسة قاسية هسه اعلمج الاذيه شلون تصير جمرتي تدللين.

- فتحت عيني كلها اهز براسي لا والم برجلية الصدري اجه يمي

::- وخــــر أبــــــهر جاي اكلك اسفه

- بسرعه تقرب يمي بجيت احاول افتح ايدي وابعده عني ابتعد جريت نفس اشهك كل ما احاول احجي يرجع يبوسني سد حلكي بأيده يجر بملابسي خنكني حيل وتقرب الاذني ينتر من بين اسنانة

::- فعلاً ما اكدر على اذيتج استاهل تستغليني
أريـــــد أذيج أريـــــد ابجيج دم بــــس ما اكدر

" توجعين روحـــــي وانا بلمسة ما اوجعج"

- دك تليفونه ابتعد مني لميت رجليه ابجي جسمي كله يهتز صاكه سن على سن

ضحك ضحكة طويله وگال

::- هلا بيه اطلبة كم ضربة.

- سد التليفون واجه عليه حجيت بسرعه

::- ليش ما تصدكني واللـــه

- جر شالي بسرعه شداه على حلكي يسويلي
::- اششش

- بلعت ريك ساكته من شفته سحب سلاحه اباوع الضحكتة سحب اقسام واجه يمي غمضت عيني مستسلمة راح يكتلني وخــــر شعري من وجهي

::- أنفصل وما بطل بعده يركض وراي

- فتحت عيني بعينه ما فاهمه قرب شفتة الراسي باسني وابتعد

::- اكسر أيــــدة السلمتيني اله بيها

- فتحت عيني كلها اصرخ أريـــــد يفتح حلكي واحجي بــــس سمع صوت كام طلع من الغرفة تخبلت اصرخ بــــس أريـــــد افتح حلكي واصيح هو اخوك متت اجر بايدي حسيت الجلد نسلخ ويا الحبل بكل قوتي اسحب بيها اشهك وكلبي يريد يطلع من مكانة.

بــــسام ::- دخلت البيت فارغ واحجي بداخلي استحق انفصل اكو غبي يجي الهيج منطقة وحـــدة ركزت زين جاي اسمع صوت رفعت سلاحي اعد الخطوة الامشيها التفتت بسرعة رافع السلاح على صوته

الأبـــــهر ::- شموازيك تجي الي برجليك

::- هههه اجيتك بعد استعجلت بــــس  مو وحدي لا تخاف كلت اوصل قبلهم نزل سلاحك

::- ليش قابل رافعة على رجل دولة المفروض انـــتَ الما تستخدم سلاحك مو مفصول؟

::- ننفصل ونرجع هذا شغلنا بــــس انـــتَ تنحبس ما تطلع لو مو واسطة

- نزل اسلاحة يضحك اذا استخدم رصاصة وحدة ينهوني رافع سلاحي كشخه حديدة لايكش ولا ينش والظاهر هو فاهم زين لذلك ماخايف مني.

::- وين البنيه

::- قطعتها ما لحكت عليها

- رجع رفع سلاحه عليه عــــــيونة تفتر سحبت اقسام مابيها مجال بعد لو انسجن لو اموت فزيت كل ذرة بجسمي فزت وانا اسمعها تصرخ بكل صوتها

::- الأبـــــهر اباذر الأبـــــهر

بــــسام ::- نزلت سلاحي بسرعة التفتت الباب الغرفة رجلي رجفت اريد ادخل أريـــــد اتاكد سمعتها صح صاح عليه وكفت بــــس ارمش بعيني وهي تصرخ بكل صوتها وتصيح

::- اباذر هذا اباذر .

- ثگل جفني اباوعله وهو فتح عينه بصدمة أيــــدة والسلاح شوية شوية ينزلن عاكد حاجبة يسأل دفعت باب الغرفة اباوعلها تبجي وهو اجه يركض كعد كدامها يحجي

الأبـــــهر ::- جــــمرة جــــمرة ماتجذبين جــــمرة حاجيني؟ شكلتي شكلتي

بــــسام ::- منين تعرف اباذر؟

جــــمرة::- بجيت غاصة اهز براسي اي والزم بوجهه ايديه يصبن دم كتله

::- هو اباذر واللـــه هو اباذر شوف أيــــدة

- باوعت الاباذر باقي واكف بــــس يرمش كام الأبـــــهر يمسح بدموعه ما مصدكني مختنك گاله

::- شنو اسمك انـــتَ ؟

بــــسام ::- منين تعرف اباذر والابهر منين؟

جــــمرة ::- بجو ثنينهم دك الأبـــــهر بأيده على گلبه بحركه يبجي گاله

الأبـــــهر ::- انا الأبـــــهر واخوي اباذر اختي دره

- ضحك بــــسام يمسح دموعه ويگله

::- اشش لا تجذب كدرت تعرف معلومات عني وجاي تخدعني؟

الأبـــــهر ::- بــــس كلي اسمك برد نار گـــــلبي

بــــسام ::- اباذر وأخـــوي الأبـــــهر اختي دره

جــــمرة ::- حط أيــــدة على راسة يرجف دموعه ينزلن والابهر متخبل من يـــــمة بــــسام رافض يصدك وهو بــــس يريد يلمه بحضنه كاله

الأبـــــهر ::- باوع باوع شنو علمتك باوع

- حجاها وبوس اصابعه خلاهن على كلبه وبسرعة سحب أيــــدة طلع الندبات يبجي واباذر حاله اتعس يرجفون ركض. اباذر للابهر حضنه يصيح وهو بكل قوته يحضن ويصيح

الأبـــــهر ::- ولك متتت ولك متت وانا ادور روحـــــي راااحت وينك وينك عني وينك

جــــمرة ::- گـــــلبي نعصر وجع بروحي على منظرهم واحد يبوس بالثاني بايده بوجهه ويرجع يحضنه يبجي ويحجي كعدوا على حيلهم يشهكون مثل الاطفال الحد ما الأبـــــهر مسح دموع اباذر يحجي بلهفه

الأبـــــهر ::- دره وين دره شلونها دره تعرف وين دره تعرف؟

::- لا لا اخذوها مني اخذوها وره اسبوع ما كدرت احميها اخذوها

::- ضابط انـــتَ ههه انا مجرم أخـــوي انـــتَ اخوي

::- هههه افديك بروحي برتبتي  اصير التريده بــــس لا تعوفني بعد لا تعوفني اروح فجوه الروحلك

::- ااخ اباذر انـــتَ اباذر

اباذر ::- ضميت روحـــــي الحضنه مثل من جنا اطفال اااخ يا روحـــــي يا أخـــوي يا عمري لكيتك واللـــه شفتك حضنتك ولك متت واللـــه ماساكت دورت عليكم الحد ما نهد حيلي

الأبـــــهر ::- عرفت عيونك بالمركز عرفتهن گـــــلبي حسني  بــــس ماعقلتها أخـــوي ضابط اااخ يا نظر عيني شلعتوا گـــــلبي وحك الله الخلقكم تبهذلت بدونكم لا اني عايش مثل الاوادم ولا اني الميت ومرتاح تلوعت عليكم تلوع گـــــلبي بفراگكم

جــــمرة ::- غمضت عيني جفني ثگل وهم عتبهم يهد الحيل انتبهلي الأبـــــهر اجه يركض يلزم وجهي يبوسني ويحجي ما مستوعب

::- لكيتي اخوي لكيتي أخـــوي جــــمرة لكيتي اباذر لكيتيه

- يحجي بسرعه وجمد بمكانه فاتح عينه على وسعها باوع بعيوني عاكد حواجبه

::- عرفتيه أخـــوي وخليتيه يسجني؟

يتبــــــع⋆𓍯

الكــــاتبة أيـــــــلول⋆𓄼𓂁

💚🌿