رواية أحببتُ ذلك الغريب الفصل الخامس وأربعون 45 - بقلم عبير إدريس

انه المتعوب من صار العمر رقمين...

أسمار ، أديم..

_______________

أسمار : شنو تعيرني لأن تركت ديني ودخلت للإسلام ؟

لزم راسه وكعد تقربت منه جريت ايده وعطت ...

أسمار :من احاجيك حاجيني ، تعيرني لأن تركت دين عيسى (عليه السلام) ودخلت دين محمد(ص) ؟ .

أديم : اسف مو هيج القصد..

أسمار : استاذ أديم بكبره يتأسف ولازم اسكت وارضى واعديله الإهانة مو ؟

أديم : كلتلج اذا ما سافرتي تتأذين وانتِ مصرة على هالشي ..

أسمار : بيتي هذا دخلته بثوب ابيض واطلع منه بكفن ابيض..

أديم : لا اله الا الله..

أسمار : الغداء جاهز اذا تحب تتغدا اصبلك وغرفتك موجودة ورايحة انام بغرفة الاولاد ، وبيتك لا تطلع منه ، اذا عندك اصرار ما تسمع مني مو مشكلة وتصدك كلشي ينحجي هم مو مشكلة بس مشكلة اذا تركت بيتك وقللت من قيمتي واحترامي كدامهم ، هنا راح تخسرني من صدك وتعرف كلش زين شنو قصدي ، وخلي ببالك مال اتركك واترك بيتي مستحيل باقية هنا بس راح ارجعك غريب..

حجيت العندي ورحت صعدت فوك بغرفة الأولاد ، هالمرة ما بجيت لأن اني ردت يوصله الكلام اللي وصل عن طريق أرقم حتى اعرف عدوي من صديقي وعرفت وعلى هذا الاساس راح اتحرك ، رن موبايلي باوعت أسمر فتحت الموبايل لكيت كذا مكالمة ومسج جاوبته..

أسمار : بعد وقت لو منتظر سنة يلا مجاوبني قصرت، تدري قبل اسبوع باعثة المسج.

أسمر : هاي وينج شكد اتصلت وماكو رد ظل بالي تالي اتصلت على أفنان وكالت انتِ بالبيت .

أسمار : اي هاي اليوم اتصلت و قبلها وين جنت مختفي ؟

أسمر : عندي شغل خارج العراق واليوم رجعت وهسه اني ببغداد عندي شغلة اخلصها واجي..

أسمار : وين وصلت بشغلة لؤي حجى شي لو بعده ؟

أسمر : تقرأين افكاري ياسمرة هو سبب روحتي لبغداد اشوف شنو صار وية لؤي..

أسمار : تمام عود احجيلي بالتفصيل اللي راح يصير وياك.

أسمر : ماشي بس احجيلي شنو سبب اصرارج حتى اجاوب صاير شي وياج ؟

أسمار: تعرف كلش زين اني بأمس الحاجة الك واحتاجك بكل شي يخص حياتنا ليش رحت وفوكاها سديت جهازك..

ضحك وكال..

أسمر : اخ ياسمرة اتمنى افتحلج كلبي واحجيلج اني وين بيا نعيم عايش..

أسمار : احجيلي بعدين وضروري اسمعك بس بالأول اسمعني انت..

أسمر : تمام احجي شنو صاير وياج رغم اني وصيت أهاب عليج يدير باله بغيابي.

أسمار : وينة أهاب سمعت صوتك وما شفته اصلاُ مختفي وما أدري وين..

أسمر : موجود بس يرجع تالي الليل تعبان وانتِ ملتهية بالبيت واحتمال ما سألتي عنه حتى يكولولج هو وين..

أسمار : الصراحة ما احتاجيته بكد ما احتاجيت احجي وياك ، المهم اسمعني،، أسمر اللي صار أجى أبسم للمزرعة وحجيت وياه وبعدها صار موقف طايح حظه وية أرقم..

أسمر : ياستار وهو ؟

سردتله تفاصيل الحادثة كلها، سكت بعدها كال..

أسمر : تعرفين بأديم عنده زوجته خط أحمر ويكره أبسم كره العمى وما يطيقه شلون توكفين وتحجين وياه وفوكاها تدافعين عنه كدامه هذا اول خطأ ، الخطأ الثاني ياسمرة اكيد أرقم مسجل كلامج بصوت ومسمعه لأديم ويعرف هو يعتمد على السمع ما يشوف ، استخدم هذه الحيثية وخلاه يكلب عليج وانتِ ذكية شلون تفوتج هيج سالفة وتحجين عن أديم هيج حجي قوي يهز رجولته..

أسمار : تقصدت احجي وياه هيج وردت اعرف يوصل الكلام لأديم لو لا ومنو له مصلحة يطلعني من المزرعة وعرفته وهذا المهم عندي.

أسمر : وأديم شلون راح تقنعيه بوجهة نظرج؟

أسمار : مو مهم عندي يقنع بكد ما مهم احميه واحمي ابنه واحمي نفسي وابني واكشف الحقائق اللي صارلكم سنين غافلين عنها.

أسمر : وانتِ حكمتي بأن احنا غافلين؟

أسمار : اللي شفته حجيته فهمني العكس اذا موجود..

أسمر : اسمعيني هسه نريد نوصل لحل ، علاقتكم متأزمة والسبب أديم سامع كلام عنج من أرقم ومصدك بيه صح ؟

أسمار : صحيح.

أسمر : وشنو اللي تريديه ؟

أسمار : اكشف اوراق أرقم واثبت براءة أبسم وبهيج كلنا نرتاح ونعيش بسعادة.

أسمر : وشلون راح نوصل لهاي الاوراق ونكشفها؟

أسمار : كاعد افكر بعدة طرق ومن ارسى على وحدة منهن ابلغك تساعدني.

أسمر : ماشي وياج بكل خطوة بس سمرة..

أسمار : نعم.

أسمر : ديري بالج على نفسج..

أسمار : ان شاءالله بس ارجع الله يخليك لأن ما كاعد اتحمل اللي يصير تعبت للحد اللي أريد انهزم منا..

أسمر : لا تخافين اني وياج وبظهرج وضروري اكون على علم بكل خطوة تخطيها حتى أكدر احميج..

أسمار : أكيد ابلغك بكل خطواتي وضروري نتحرك سوى لأن أديم خلص فقد عقله وصدك بيهم..

أسمر : هذا أديم من يوم ما شهد خانته هو تخبل تصدكين ما تغير من فقد عيونه وبقى ويانا زين ويضحك ويتشاقى بس اخ من لعبوا عليه اللعبة القذرة تدمر كام يشك بكل واحد مقرب منه وعصبي ويتنرفز بسرعة تدرين من جان يسوي العملية لوجهه يوكف كبالي من يفتحوله الشاش يكولي نصاً هذا كلامه ...

أديم : أسمر هسه اذا شافت وجهي هم تخترع مني وتكون عندها ردة فعل قوية اذا تقربت منها لو لمستها ، تشمئز مو اي هي تكرهني بس خايف تخوني اطلكها شتكول..

أسمار : وشنو جنت تجاوبه..

أسمر : ما جنت اكدر احجي شي لأن الموقف جبير علية وجبير على عقلي يتحمله بس ضربني بكلبي من التفت ناحيتي وكال..

أديم : عيونك مرآيتي تدري بية ما اشوف ، وجهي زين لو بيه أثار حروق بعد...

يحجي وينزف دموع مو بجي عادي ، صعب يا أسمار الرجال من تهتز ثقته بنفسه ، مرات من نمر بظروف صعبة ونتعب اذا ماكو ناس تسندنا وتقوينا ننكسر ونضعف فما بالج اذا اقرب الناس الج تكسرج وانتِ جنتي منتظرة منهم يوكفون وياج ويساندوج وترجع ثقتج بنفسج ، لو جنتي بدل شهد جان هذا حال أديم صدكيني جان تجاوز مرحلة فقدان البصر وحاله غير حال.

أسمار : حاسه بيه واعرف بشنو يحس وما ازعل من كلامه صح يقهرني ومرات احس كرامتي تنجرح بس حجالي وكال اني صعب وشكاك واناني ومزاجي ومتقلب معناها شنو لازم اتحمل ، من خليته يتعلق بية ويحس احساس الطفل بأمه اكيد راح يشاكسني ويعكس انفعالاته علية ويهين ويغلط ويمكن يضرب ، أسمر اني من اجيت وتزوجته توقعت كل هاي الاشياء قبل حدوثها ، واعرفه ندمان وياكل بروحه ويتمنى يصدكني بس اني ، لكن تبقى بذرة الشك تلعب بداخله وتتغلب عليه ، اخ من اخذت أديم اخذته بقايا إنسان محطم من أقرب الناس له ، لاثقة بنفسه ولا يكدر يعتمد عليها ويسوي شي بيده ، خليته يتعامل وية محيطه معاملة المبصر صار حاله حالي يجوع يروح يسوي أكل او يصب لنفسه صح يغلط بالأماكن ويوكع صحون مرات بس مو مشكلة انظف وراه ، وين جان قبل معتمد على أفنان بشكل كامل وعليكم..

أسمر : يابه لو شنو احجي وشنو اكول ما نجازيج ابد يا أسمار..

اندفرت الباب وكع الموبايل من ايدي فزيت من شفته كبالي عبارة عن كتلة من الغضب والنار تتطاير من عيونه تقرب علية وصاح.

أديم : وينج لج ؟

أسمار : هياتني شبيك عصبي؟

أديم : تعالي يمي وينج.

أسمار : هياتني..

أديم : تقربي...

حجاها وكز على اسنانه ، تقربت تلمسني اخذ ركبتي بثنين ايده وخنكني بقوة عصرها بكفه قطع النفس عني لزمت ايده اريد ابعده ماكدرت تمتمت بكلمات بالكوة سمعتها ويمكن ما سمعني هو..

أسمار: أديم راح أموت..

حجيتها بشكل متقطع ، بادلني بخزرة وحجى كاز على اسنانه..

أديم : كدام منو جنتي تتفاخرين وتعددين اللي سويتيه الية ، وصل بيج الحال تعيريني اذا كسرت ماعون ونظفتي وراية وتحجين ضعفي وعجزي كدام الغربة ومنو هذا الجان يحجي وياج كوا** جديد..

الا شوية وافقد بين ايديه وهذا اخر ما سمعته لأن بالي يم الهواء اريد استنشقه بعدها انجريت من ايده ، كحيت بقوة وانمد كبالي كلاص مي ، اخذته شربت منه والباقي وكع علية ، كحيت باستمرار الى أن رجعلي النفس بعدها رفعت راسي باوعت أهاب وأفنان واكفين وصافنين علينا وعلى الحال اللي وصلناله...

تعداهم أديم وترك المكان تقربت أفنان غسلت وجهي ونيمتني على رجليها وكامت تهفيلي حتى اتنفس زين ...

أهاب : لوما أسمر يخابرني واجيت جان ميتة لكيتها زركة شفتيها؟

أفنان : شفت أديم فقد وصار بقاء أسمار هنا خطر صدكني ، مو معقول اللي كاعد يصير..

أهاب : انقلب حالهم هسه لو يحجي شنو السبب صارله اسبوع قافل على نفسه بالبيت ورافض يحاجينا..

أفنان : حتى سمرة ما تعرف سبب زعلته شنو بس خوفي لا السبب وكفتج وية أبسم يا أسمار؟

جنت بس اباوع عليهم ومصدومة ما اكدر احجي شي بعدها طلبت منهم يفرغون البيت وانام ، صعدت على سرير اياس وغفيت من التعب والصدمة عقلي وكف عن التفكير ، نمت بس شلون نومة مليانة كوابيس واشياء تخنكني ، فزيت مرعوبة على أفنان وهي تكعدني ، كعدت بصفي لزمت وجهي وكامت تقرأ ايات..

أفنان : اسم الله حبيبتي شبيج فزيتي ؟

بتعب ودكات قلب مفزوعة كأنما صارلي سنة أركض بلعت ريكي وهمست..

أسمار : اريد مي..

أفنان : بعيوني تدللي هسه اجيب..

راحت جابت المي واجتي يمي اخذته بإيد ترجف ارتشفت شوية حسيت نفسي بعدني عطشانة اخذته منها وشربته مرة وحدة واحس بعدني اريد مي طلبت منها تجيبلي بعد ورجعت شربت وبعدني عطشانة...

أفنان : عطشج مو طبيعي نوديج طبيب ؟

حجتها بقلق هزيت راسي بلا..

أفنان : اكيد مابيج شي..

هزيت راسي ب اي بس حاسة العكس روحي طافية وكل مكان بجسمي يوجعني صابتني رجفة من راسي لاخمس قدمي..

أفنان : أسمر برا يريد يحاجيج تكدرين تنزلين جوة؟

أسمار : أديم وين ؟

أفنان : من تركناج صعد وية أنهد بالسيارة مانعرف وين راحوا نتصل عليهم محد يرد..

أسمار : وين راح حاولوا تتصلون بيه شوفوه وين..

أفنان : كل اللي سواه بيج وبعدج تحنين وينشغل بالج عليه..

أسمار : أديم روحي سبحان الله اللي زرعه بكلبي بهيج طريقة تخيلي لا اكدر ازعل منه ولا ابتعد ، صح يأذيني ويقهرني بس احسه ابني ماعندي اتجاهه شعور زوجة وحبيبة لا شعوري شعور امومة ناحيته ما اكدر اوصفلج شنو تخيلي مرات ازعل من نفسي واعاتبها ليش باقية وياه شنو شافت منه بس يا أفنان معجون بروحي وبكلبي هالأديم ، أسمار يعني أديم وهو كذلك ، لا اني اكدر بدونه ولا هو يكدر بدوني ، شوفيه شلون يتهرب من المزرعة وما يلفي حتى بالبيت كاعد تحسين بتخبطاته وقراراته الغير موزونة هاي اذا دلت تدل على الحب القوي اللي بينا وعلى خوفه من خسارتي وعدم ثقته واحساس الخذلان وهواي مشاعر كاعد يحسها الله يعينه على نفسه...

أفنان : أديم انتهى ما اعتقد يتعافى بعد وقررنا ناخذه نعالجه نفسياً لأن الكاعد يسويه مو طبيعي..

أسمار : منو ومنو قرر شو اني ما أدري وهو عنده علم؟

أفنان : على كيفج ليش عصبية صرتي ؟

أسمار : طبعاً اصير عصبية على اي اساس تقررون عنه شي احتمال يأذيه ويأزم نفسيته.

أفنان: والحل احنا تعبنا مانكدر نهدأه..

أسمار : أديم مسؤوليتي بوقت ما اتركه واكول خلص ما اريده تعبت منه هذاك الوكت ودوه وين ما يعجبكم..

أفنان : والله ياسمرة الجنة بعرضها تستاهليها..

أسمار : اللي كاعد اسوية حب ما منتظرة اجر ولا مقابل ، اعرفه داخله نظيف ويحبني بس ماعنده ثقة وهاي اكبر مشكلة الانسان من يفقد الثقة بحواليه يفقدها حتى بنفسه وكاعد اشتغل على هاي النقطة ارجع ثقته بنفسه وبينا وبعدها يختار يعيش حياته باللي يعجبه وياية او بدوني...

أفنان : يا سمرتنا الغالية الطيبة امي تموت عليج وشكد تدعيلج بصلاتها بكل فرض اسمج اول واحد ينذكر..

أسمار : اني هم احبها والله يهدي ابنها علينا ونعيش براحة هذا اهم دعاء خلي تدعيه هي ام ويستجاب الها بسرعة.

أفنان : اي صحيح هسه ابلغها ، أسمر تحجين وياه انتظرج هواي حتى تكعدين.

أسمار : وينه هو ؟

أفنان : كاعد برا بباب البيت منتظرج اكوله يفوت..

أسمار : خليه يفوت ليش برا ؟

أفنان : اووف غير نخاف من أديم .

أسمار : وليش قابل يشك بيه ؟

أفنان : قبل لا يطلع مصيح بنص البيت كايل اي واحد يوصل لهنا ويحاجي سمرة عداية اني يحرك البيت واللي بيه ..

أسمار : صدك تحجين ؟

أفنان: اكلها تخبل لدرجة ما تتخيليها..

أسمار : اوووف امشي كومي ننزل يم أسمر قبل جية أديم هاي اذا رجع للبيت..

أفنان : اي والله يلا ننزل..

نزلنا وطلبت منها تصيحه يفوت للبيت ، دخل باوعلي عكد حاجبه وبهت...

أسمر : هاي شصاير بيج ؟ لا ياالله..

أسمار : شكو ؟

أسمر : وجهج شاحب عبالك وحدة ميتة ..

أسمار : مابية شي يمكن لأن ما ماكلة شي من الصبح لحد الان..

التفت على أفنان بعصبية كال..

أسمر : ادري ليش ما متفكديها غير تشوفوها اكلت لا فوك اذية اخوج اهمالكم..

أفنان : نايمة جانت..

أسمر : واذا نايمة دشوفيها شصاير بيها ..

التفت علية وصاح..

أسمر : امشي اوديج طبيب يلا..

أسمار : ما اروح مابية شي..

أسمر : والله اعيد اللي سواه أبسم وية شهد واطلعج منا وانعل ابوه لابو اللي ينطيه مرة زين لو لا..

أسمار : أسمر فدوة اتركني براحتي لا تضغط علية هسه اكل واصير زينة..

أسمر : ما اتحرك منا الا تروحين وياي مادام بعدها دنيا عصر امشي اوديج نلحك على المختبر ، اللي صار وياج مو شي سهل هاي هبطة من فاتلج عصبي وانتِ اخترعتي هاي نتيجتها..

أسمار : أسمر مابية شي صدكني الله يخليك اتركني..

رفع حاجبه رافض يسمعني تقرب مني وكال...

أسمر : سمرة محتاجج هواي راح تجي أيام اريدج واكفة على حيلج بيها حتى تساعديني ما اريدج تنطفين ولا تضعفين مو بس أديم وتميم واياس بحاجتج اني اكثر واحد بيهم محتاج مساندتج ومساعدتج الية..

بوهن كلت..

أسمار : ليش شنو صاير وياك ؟

حجيتها ودخت الدنيا صارت ظلمة بعيوني فقدت توازني وكعت ، ماحسيت الا واني بالسيارة بحضن أفنان ويشمرون علية مي هي وزوجة أعقل ...

أفنان : اسم الله عليج عيوني بشنو تحسين ؟

أسمار : ما اعرف الدنيا ظلمة بعيوني ما اشوف شي ..

أفنان : حتى هسه ؟

أسمار : اول ما فتحت ماشفتكم بس هسه بدت تتوضح الرؤيا عندي..

أفنان : اي الحمدلله ..

أسمار : شلون وصلت للسيارة ؟

أفنان : أسمر شالج لأن خبلتينا..

أسمار : عزة بعيني وهسه أديم يسمع شيخلصني .

أسمر : نعوفج تموتين يعني.

حجاها بنترة وكام يسب بأديم وبشكه وغيرته وعدم ثقته بإخوانه، كمت عدلت كعدتي باوعتله بالمرايا الشر يتطاير من عيونه همست.

أسمار : رجعني ..

التفتلي عابس الوجه بإستهزاء كال..

أسمر : شنوو؟

أسمار : رجعني هسه اللي صار كبل ينقلوه لأديم وراح تصير اقاويل عني وعنك احنا بغنى عنها..

أسمر : يلا عود خلي يحبسج ويقتلني ...

أفنان : اسم الله ان شاءالله مايصير من اللي تحجوه..

أسمر : وربج احركهم بس يمسوها بسوء..

زوجة أعقل منفوخة بضوجة كالت..

_ عفية أديم الله يساعد كلبك شلون تتحمل الراح يصير ...

باوعلها أسمر بصوت حاد كال..

أسمر : ام عطاء ضايجة من شي ؟ كولي حتى انزلج هنا..

_ لا عيني ما ضايجة بس ضوجتي على اخوك..

أسمر : ها اخوية وشبيه ؟ شكى من عندنا ..

_ لا بس ضربتين على الراس توجع ..

أسمر : ما فهمتج وضحي أكثر حتى اذا صرت إبن كلب وياج ما اندم..

_ شحدك تسوي شي

أسمر : احجيها واشوفج حدي ليوين يوصل..

أسمار : كول ياالله أسمر اسكت كافي ..

باوعتلي صفح وكالت..

_ فدوة لله حجت الحية..

أسمر : والله ماكو حية غيرج..

_ يلا دافعلها هو أديم ماعنده حظ متعلم يوم شهد وأبسم وضربوه خوش ضربة وهسه أسمر وزوجته..

أسمر : طبعاً يشك وتنزرع براسه هيج افكار اذا اكو ناس مسمومة مثلج تحجي هيج حجي..

طبك السيارة بنص الشارع التفت عليها وكال..

أسمر : إنزلي لا احرك سلالتج كلها وخابري كوا...ج يجيج ياخذج.

_ هاي على أخوك؟

أسمر : دروحي بابه يلا نزلي لا انزل اشمرج وادزج دليفري لأخويه التحفة.

_ هيج صارت.

بعياط صاح...

أسمر : يلاااااا عاد فضيني راح يعزل المختبر..

نزلت تغلط وتتوعد فتح الجامة فات من يمها وكال..

أسمر : عود عضي جلبي ..

مشى سريع وهو يسب بيها أفنان حجت حجاية لو ابتلت على عمرها.

أفنان : هسه توصل الحجي لأديم..

أسمر : اني اريد يوصله اذا ما ربيتله گلب واتوبه من سالفة الشك تفلي بوجهي وكافي جبن بطلي كل شوية وخايفة وترجفين كافي عاد.

استلمها لأفنان ما سكت الا من وصلنا لعيادة الدكتور صف السيارة ونزلنا دخل للسكرتيرة نطاها فلوس زايدة خلت اسمي بموعد قريب ، كعدنا اني وأفنان وهو يروح ويرجع بالعيادة وجكارة بعد جكارة اخر شي راح يمها سألها بعصبية..

أسمر : ادري وين السرة وصل مو صبري خلص..

_ على كيفك ماصار ربع ساعة من حجزتوا..

أسمر : قربي موعدها وخليها تدخل ورا هاي الراح تطلع..

_ هاي شلون مايصير.

طلع فلوس بعد وضربهن بكفه على الميز.

_ وهاي هم يلا قربي موعدها..

باوعتله بابتسامة اخذت الفلوس ودخلتني كعدت كبال الدكتورة ساكتة وهو يشرحلها وضعي واني بس اباوع عليه..

أسمر : دكتورة البنية انهبطت صارت شغلة بالبيت على أثرها اغمى عليها بعدين نامت قريب الساعتين او اكثر بشوية وراها كعدت تشرب مي وما ترتوي يبقى حلكها يابس واضافة لهذا وجهها اصفر ...

رفعت عينها باوعتلي وبعدين باوعتله وكالت..

_ انت شنو تصير منها ؟

أسمر : اخوها.

_ ها الله يخليك الها اشوفك هواي خايف ومهتم تصورت زوجها بس بعد ماكو اعز واقرب من الاخ ، المهم عيني هاي مجموعة تحاليل اريدها تسويها ونشوف النتائج هي متزوجة البنية صح ؟

أسمر : اي متزوجة..

_ اي اريد هاي التحاليل سووها وجيبولي النتيجة..

أسمر : تمام شكراً دكتورة..

حجاها وسحب التحاليل منها من وصلنا للباب التفت عليها..

أسمر : دكتورة ما تحتاج سونار..

باوعتله ضحكت بعدين كالت..

_ من تجيب التحاليل نقرر..

أسمر : اي زين يلا بنات ..

طلعنا ورحنا للمختبر حللت دم وسكر وفقر دم واخذولي الضغط ، انتظرنا النتيجة من طلعت صاحتلي البنية..

_ اكو خبرين الواحد حلو والثاني ان شاءالله يطلع وقتي مو دائم..

أسمار : شنو ؟

_ مبروك حامل بس مشكل وية الحمل داء السكري ..

تقرب أسمر اخذ الاوراق منها وراح قبلنا للدكتورة ، بهتت من سمعت الخبر ، رحنا وراه اني وأفنان من دخلنا جان كاعد بمكاني على الكرسي ويستمع للدكتورة باهتمام..

_ اي صحيح داء السكري مشكل وياها ، راح انطيها نظام غذائي معين تتبعه ومجموعة تمارين رياضية واذا اضطر الأمر تضرب ابر انسولين لخفض مستوى سكر الدم عندها ولازم تراجعني بفترات متقاربة وبعد اسبوع بالضبط تجيني نعيد تحليل السكري واخذلها سونار ولا تخاف ان شاءالله خير.

أسمر : اكتبيلها العلاج وخلي اجيبه ..

_ تمام وهذا كتبته بس انتبهولي اهم شي راحة تامة جهد عصبي ماكو اضرابات نفسية والخ ما اوصيكم عليها وعلى الجنين لأن كل اللي ذكرته يأثر على حملها وصحتها..

أسمر : ان شاءالله دكتورة ، شكراً جزيلاً..

_ اهلاً..

اخذنا الراجيتة ورجعنا للسيارة طلب مني اصعد ليكدام والطلب جان أمر مو طلب ودي ، صعدت وسديت الباب أفنان صعدت ليورا وأسمر راح جاب العلاج من الصيدلية ورجع صعد السيارة مشينا وهو بادر بالكلام..

أسمر : ناوية تحجين بحملج لأديم او اي كان..

أسمار : لا ما راح احجي..

أسمر : شعجب بلكت يخف خباله.

أسمار : يا يخف هو يريدني اسقط مجرد سمع مجرد شك اكون حامل..

أسمر : يعني ما نحجي..

أسمار : ياريت تتكتمون على الخبر منا لحدما يثبت حملي وتكون حياتي هادئة واكدر احجي وياه ويسمعني..

أسمر : تمام هذا هو أفنان نسكت مو ؟

أفنان : طبعاً راحتها اهم شي عندي..

أسمر : هذا الخبر يكون بيناتنا احنا الثلاث غيرنا ممنوع يعرف واذا رجعنا للبيت تشوفوهم تحليل السكري و سيرة الحمل تنسوها..

أسمار : ياريت والله..

أفنان : سدكم أمين من يمي.

أسمر : هذا هو ..

التفت علية مبتسم..

أسمر : مشتهية شي ام اياس اجيبلج ؟

ابتسمت بتعب..

أسمار : الله يخليك ويديمك النا يارب لا ما مشتهية...

أسمر : كباب كص لحوم ثريد ما مشتهية شي..

أسمار : العسل نفسي ما رايدته..

أسمر : تهون تهون وتصير سوالف ..

هزيت راسي وبقيت ساكتة طول الطريق ، وصلنا قبل لا ننزل التفت علية وكال..

أسمر : بس يحجي حجاية خابريني.

أسمار : انت على عيني وراسي بس ما احب احد يتدخل بيناتنا مشاكلنا اني اعرف احلها..

أسمر : تمام هذا هو يلا انزلوا بس اذا وصلت للخنك دزي علية..

رفعت حاجبي و نزلنا اول ما دخلت اسمع هوسة والبيت مكلوب ، دخلت حتى أخذ اياس لكيتهم ملتمين وخوش زوجة أعقل حاجية براسهم هالمرة هاي طلعتلنا صفح كضت حياتها خانسة تطب وتطلع مانسمع منها صوت ، الوجوه كلها مكلوبة علية تذكرت كلام أبسم من كال كلها وكفت ضدي وية أديم وصاروا حزب علية نفس الشي انعاد وياية ومن دخل أسمر صارت عركة بينه وبينهم التفت علية وكال..

أسمر : روحي لبيتج تعبانة انتِ اني احلها..

لويت ركبتي بقهر جريت ابني وطلعت متوجهة للبيت والدنيا ظلمة بعيوني مقهورة بس ما اريد استسلم وانفذ رغباتهم اذا ردت اطلع من المزرعة اطلع برغبتي اكون اني رايدة هذا الشي مو احد يفرضه علية ، تحديت نفسي وتحديتهم لو اطلع منا منتصرة لو ميتة ما يهمني...

طبيت للبيت ورحت بوجهي للحمام سبحت وصليت ودخلت المطبخ سويت عشا للجهال دك موبايلي باوعت أسمر جاوبته بلهفة اريد اعرف شنو صار ..

أسمار : ها شنو صار ؟

أسمر : ما عليج بيهم سحابة سودة وتمر ، انتِ شلونج خبلتيني اليوم..

أسمار : زينة والله لا يظل بالك..

أسمر : اكلتي ؟

ضحكت..

أسمار : راح أكل يا أسمر اني مو طفلة...

أسمر : ياعيني سمرتنا هيج يصير بيج لو اعرف فلا اسافر واعوفج..

أسمار : حتى توب تغلق موبايلك وما تدري من تحترك الدنيا..

أسمر : ما اسويها بعد التوبة.

أسمار : انت هم اكل توك راجع من السفر وابتليت بية..

أسمر : يلا رايح اسبح واتعشا وانتِ هم اكلي لخاطري ورانا حرب شرسة..

ضحكت بقهر...

أسمار : فعلاً حرب شرسة الله ينصرنا عليهم..

أسمر : أمين ، سمرة ..

أسمار : نعم..

أسمر: عدوج عدوي..

أسمار : اعرف لهذا أمنت بيك..

أسمر : اخ وسند طول العمر..

أسمار : والنعم والله دايملي..

ضحك بصوت عالي وكال..

أسمر : حجايتنا هاي والحمزة..

أسمار : هو صرت منكم وبيكم بعد..

أسمر : يلا ديري بالج على نفسج.

أسمار : ان شاءالله وانت هم

أسمر : باي.

أسمار : باي..

سديته واخذت بيض من الثلاجة سلكت اربعة وطلعت فطائر مسويتها قبل فترة مجرد حميتهن ، التفتت حتى أخلي العصير على الميز وجان اشوف أديم كبالي واكف ومكتف ايده ونار جهنم كلها تطلع من عيونه...

يتبع..

متابعة ممتعة غوالي قلبي...