رواية أحببتُ ذلك الغريب الفصل الحادي والعشرون 21 - بقلم عبير إدريس

صرت حتى على النوم تختلف
وبكل حزب فايت حلف
وبمنبر الحب تعترف
ما ضايعلك يمهم ولف
وسنين حبنا بعتها كل سنتين بألف
واستبدلت بنت الاصول بوحدة وية الكل تجول
هذا تحبه وذاك تلعب عليه
وهي جربت بيك كل الفصول.

بقلمي عبير إدريس.

_____________

أسمار : اي تغيرت شنو المطلوب هسه ؟ ممكن أعرف!!

لؤي : بربج بسبب الاعمى لو انت كارهتني من صدك.

أسمار : منو هذا الاعمى الكاعد تحجي عليه ؟

لؤي : هذا الضربته وفلشت راسه.

أسمار : فرحان يعني ؟ تعتبر نفسك مسوي انجاز ؟ رجولتك اكتملت من ضربته ؟

لؤي : اف شدعوة هيج محروك دمج وتدافعيله ولج مو المسلم ايع وما تناسبوهم شعجب هسه نطيتوا خالتج بسهولة وهسه انتِ على الطريق ..

أسمار : لو معتبرين المسلم ايع مثلما تكول جان ما ارتبطت بيك واذا تكول تغيرت فكرتنا عنهم بعدما ناسبناكم ،احب اكولك مو كل اصابعك سوى يطلع من نفس البيت عالم دين ، وثاني فاسد مو قياس يا ابو ابني ..

لؤي : هسه ما علينا اجي وياج من الاخير زواجج مقابل ابني ..

أسمار : ومنو تربيه بسيل ؟ اللي حايرة بالموضة والفاشن راح تعوف تربية اظافرها وتربي ابني.

لؤي : وانتِ منو كالج اني متزوج ؟

أسمار : لازم تركتك مثل الجلب ، اي عرفت شخصيتك وفهمت الشكل مو كلشي..

لؤي : منو هذا الجلب ؟

أسمار : انت ..

تقرب مني لزم ايدي لواها ورا ظهري ، لكيتها فرصة ادافع عن نفسي بيها وبنفس الوقت اطلع حرارة كلبي مال سنين ، ضربته راشدي بيدي الثانية ، هد ايدي وظليت ادفع بيه سبيته وحجيت اشكال والوان فقدت وطلعت عن اخلاقي لان زودها ودمرلي حياتي وماكدرت اميز الصح من الخطأ بهذا الموقف بالذات..

ما اعرف من وين التموا الطلاب وشفت واحد من أمن الجامعة اخذوه ، اسمع رند من بين الهوسة تكول.

رند : أسمار شبيج أسمار باوعيلي راح اخذوه لا تخافين حبيبتي.

التفتت عليها باوعتلها وحضنتها بقوة ، بجيت على كتفها وهي تربت على ظهري تهدأ بية..

رند : اش كافي حبيبتي يروحلج فدوة هذا الجلب شجابه ما تكوليلي..

وخرت منها مسحت وجهي ، عكدت حاجبي وركزت بوجهها.

أسمار : من وين تعرفيه ؟

رند: منو ؟

أسمار : لؤي !!

رند : كومي غسلي ونكعد بالنادي واحجيلج.

أسمار : احجيلي هسه ما اتحرك منا..

رند : لا ما احجي اذا ما ترتاحين و تاكلين شي..

أسمار : ويني وين الاكل احجي بربج.

رند : عصير ولو ؟

أسمار : رند يا رند مو وقتها احجي ترى املخ روحي هسه ..

رفعت ايدها تهدأني..

رند: تمام ما لازم مانريد لا عصير ولا اكل وراح احجي..

أسمار : بسرعة لان اريد اسوي اتصال ضروري قبل لا يطلع من الجامعة.

رند : شوفي انتِ جنتي غايبة يومين مو صحيح ..

أسمار : اي صحيح.

رند : بهاي اليومين هو نفسه ييجي كبال القاعة مالتج يظل واكف ينتظر لحدما يخلص الدوام ، أول يوم ما سأل عنج ثاني يوم أجى جنا واكفين جان عندنا ريست كال وين أسمار عارف شنو ما تداوم ، كلناله هذه قاعتها احنا مرحلة رابعة كال ها اعتذر ودخل لقاعتج سأل عليج وطلع ،،،
ظل بمكانه ينتظر لحدما خلص الدوام ، باليوم الثالث اللي داومتي بيه هم الصبح جان واكف بعدين من خلصت محاضرتنا طلعت ما شفته ، وبعد ما شفناه غير اليوم من جنتي تضربين بيه لهذا عرفته هو لؤي..

أسمار : يا كلب يعني مراقبني !!!

رند : احتمال زين ليش.

اخذت جنطتي ردت اكوم بعدين سألتها..

أسمار : زين انتِ وين جنتي الايام الفاتت ليش ما كلتي أكو شخص سأل عنج هواي وظل منتظر.

رند : ردت اكولج بس ما شفتج بعد وتدرين وراها صار عندي تطبيق واختفيت عن الجامعة واليوم اجيت حتى اختم ورقة طلبوها مني المدرسة وارجع ..

أسمار : تمام اشوفج بعدين.

رند : وين رايحة اصبري ، أسمار مو احجي وياج.

تركتها مشيت بخطوات سريعة وبيدي الموبايل اتصلت على أسمر ، رن بعدها اجاني صوت مو صوته ، كلت الو أسمر ؟

جاوبني بحدة..

أهاب : مو أسمر أهاب عيني.

أسمار : مستحيل اتصلت على أسمر اني.

أهاب : شنو الفرق كلنا العراق كولي.

أسمار : أريد أسمر محتاجة أحجي وياه ضروري..

أهاب : ومن وين أجيبلج أسمر أني ببغداد عندي شغل وأسمر بسامرا ..

أسمار : ليش مو هذا رقمه ؟

أهاب : هذا رقمي ست غلطانة ، محتاجة شي ؟

أسمار : لا لا ما محتاجة.

أهاب : صوتج يرجف احجي منو وياج ؟

أسمار : الله يخليك عوفني أريد اشوف أسمر

أهاب : روحيله يابه أسمر أسمر احنا بيش كيلو..

سده بوجهي ، باوعت للرقم كاتبة عليه أسمر ، زين شلون معقولة لهدرجة عقلي مغيب بالمستشفى وكتبت على رقم أهاب أسمر.

عدلت الاسم واتصلت على أسمر جاوبني.

أسمر : هلا بسمرتنا هلا بشمس البارودي كولي يابه.

أسمار : أسمر طلع مراقبني النذل وجيته ابد مو صدفة يعني شكي بمحله جان.

أسمر : ياهو هذا اصبري اني كاعد على صينية ثريد مكانج خالي وياها بصل وفجل وطرشي وشوية زيتون وخضورات والحجية عصرت ليمونات ثنين وف..

قاطعته..

أسمار : أسمر مو وكتك هسه كاعد اكولك لؤي مراقبني جان واليوم اجى للكلية وتعدى علية الكلب.

أسمر : عود ردت اكولج فلفل لا احرك ابوه اليوم ، اصبريلي خلي اسوي اتصال وارجعلج..

أسمار : وين رايح اصبر احاجيك.

أسمر : اوكفي لعد خلي اضيفة للمكالمة لا تسديه.

أسمار : المن تضيف غير أفهم.

أسمر : ياربي شكد عجولة لج انتِ برج الشنو اريد أفهم.

اسمار : معليك بالبرج مالتي هسه كولي شنو راح تسوي.

أسمر : والملوية لا الوي ركبته صبريلي يتحرش بمرت اخونا عينك عينك شنو يابة ما سامع بينا هذا ، خاليه طعم مسكين قهرني...

احنا و نحجي انضاف صوت خشن للمكالمة..

أهاب : ها شكو أختصر بدون ما تقرالي كف.

أسمر : لا أريدك هالمرة تسمطلي واحد كف تطيرلي جبهة من جبهات وجهه بدون ترك بصمات آل أشعب..

أهاب : واترك آثار عادي يعني؟؟

أسمر : عادي بس مو مال نزيف بالمعدة مثل ذاك اليوم ما نريده يموت ولا يتكسر حتى من يستلمه ابو التميم يوصفوه اله صاغ سليم.

أهاب : ها لؤي قصدك؟

أسمر : اي الظاهر ما فاد بيه الدرس الفات يراد تراجعله قبل الإمتحان..

أهاب : نراجلعه ليش لا بس هالمرة شنو مسوي ؟

أسمر : متحارش بسمرتنا.

أهاب : ياهو هاي ؟

أسمر : شبيك حبيبة أديم.

أهاب : هاا هاي هسه خابرتني عبالها انت وتتنعوص ، ام اه ان تالي طبكته بوجها.

أسمر : ترى تسمعنا ويانة على الخط.

أهاب : اي ادري بيها سامع نفسها سريع ادري شبيج خايفة منو راكض وراج؟؟

أسمر : عوفك منها وروح علمه الاصول والأدب وخليه يحلف يمين ما يوصل للكلية مرة ثانية وما يباوعلها من بعيد حتى.

أهاب : تتدلل هاي يمي بعد رايد شي عيني أستاذ أسمر.

أسمر : سلامتك حبيبي وعود جيب الشغلات اللي وصيتك عليهن.

أهاب : بس اخبزه واطلع بوجهي للكرخ أجيبهن وأجي.

أسمر : يروحلك فدوة لؤي.

أهاب : والك هم يله چاو.

أسمر : چاو تو ..

سد المكالمة وراح بقينا اني وأسمر على الخط..

أسمر : هسه راح ارجع اكمل غداية بنفس مفتوحة واحجلي شلون عرفتي هذا الكلب جاي للكلية ومراقبج ؟

أسمار : صديقتي شايفته واكف كبال قاعتي ويومين منتظرني وباليوم الثالث هم جاي بس جانت عندي محاضرة من طلعنا اني وأديم اجى ورانا وسوى هذه المشكلة..

أسمر : زين انتِ بشنو شاكة ؟

أسمار : انت بس ركز وياية خمس سنوات تاركنا اني وابني ومو بحالنا ولا يعرف عنا اي شي ، وطشت سالفة انو هو مسافر خارج البلد ، وييجي غفل بين يوم وليلة وبالضبط بعد مهر خالتي ومن صار تقارب بيني وبين أديم ، برأيك كل هذا صدفة !!! اني ما اصدك .

أسمر : كلامج مقنع بس وين تريدين توصلين أسمار ؟

أسمار : يعني مافهمت علية ؟

أسمر : مافهمت وروح أشعب ..

أسمار : شكوكي بمحلها لو لا شنو رأيك ؟

أسمر : أسمار ذبحيها على قبلة وذبحي اللي شاكة بيه جوة رجليج حتى أفهم واساعدج لا تحجين وياية بالالغاز واكعد افتح فناجين واعرف ست أسمار شنو تقصد..

أسمار : الصراحة وبدون زعل اني شاكة بواحد من اخوانك خصوصاً الية مواقف وياهم موحلوة سابقاً.

أسمر : لحظة لحظة مواقف وية اخواني وشاكة بيهم ؟

أسمار : مثلما سمعت.

أسمر : ما نختلف شنو الدليل ؟

أسمار : هواي أدلة وتدري بيهن اغلبهن .

أسمر : وين أدري بوقتها على اساس تحجيلي وما حجيتي ورحتي حجيتي لأديم وبس.

أسمار : اذا حجيتلك تساعدني ؟

أسمر : لحد الان عندج شك يعني؟

أسمار : لا بس اريدك تساعدني.

أسمر : هسه كايل لا يا الهي دخيلك انطيني طولة خلك اساير هاي البنية.

أسمار : اسمع راح ابدي بالرسائل اللي دزهن أرقم..

وسردتله السالفة كلها ، ...

أسمر : اخواني هيج يسوون كل عقلج مستحيل

أسمار : وشنو عندي وياهم حتى اتهمهم هيج اتهامات؟

أسمر : لا وفوكاها مختارة عينة اخواني أبو عطاء وأرقم وأبسم صدك تحجين ؟

أسمار : توقعت ما راح تصدكني واصلا اني ليش توقعت مساعدتك، شكرا على كلشي سويته و راح اقلع اشواكي بيدي ، مشكور أسمر.

أسمر : بعد لا تعيديها مرة ثانية !!!

أسمار : صار بس أمانة عينك على أخوك أكيد كاعد يمر بحالة صعبة وراح يظل رافضني ورافض احجي وياه.

أسمر : بين اخوانه لا تشيلين هم سلامي لخالة أسن .

أسمار : الله يسلمك باي.

أسمر : باي.

سديته منه واني بقمة العصبية ، مشيت واسب بلؤي اللي خلاني بهيج موقف..

رجعت للقاعة اخذت باقي محاضراتي ببال شارد ، طلعت من الجامعة توجهت لسيارتي واشوف واحد كاعد على البنيد ناطيني ظهره ، عصبت شنو ماكو مكان يكعد بيه الا على سيارتي ، حلفت ارزله وابرد كلبي..

وصلت توني اريد احجي التفت على صوت خطواتي باوعت مصدومة ..

أسمار : أهاب شجابك ؟

أهاب : رجلي جابتني وذيج سيارتي شوفيها..

حجاها وأشرلي عليها.

أسمار : اي أعرف رجليك جابتك وسيارتك بس يمي شجابك؟

أهاب : توصيات من الجهات العليا.

أسمار : من أديم مستحيل ومن أسمر ما اتوقع.

أهاب : هسه المهم نضمن سلامتج الباقي سهل يابه توصيات من أديم من أسمر مو مشكلتنا هاي.

أسمار : وليش تضمن سلامتي شكو ؟

صفك كفوف ايديه سوى بحركة سريعة وكام بخطوات ثقيلة وصل يمي وكال..

أهاب : أدبت لؤي وعرف اني من طرف أديم ، تحلفلج واعرفه بوخة ما راح يسوي شي بس للأمان أجيت اوصلج للبيت .

جريت نفس ما أعرف شنو أحجي لا اكدر اكوله ليش تتدخل بحياتي واني دخلتهم بيها ، ولا اكدر اتقبل كلشي يسووه واسايرهم بدون رأي لهذا هزيت راسي ساكتة ورحت صعدت سيارتي ، حجى بصوت مسمعني ..

أهاب : راح امشي وراج لحد البيت خوما عندج مسواك وسوالف نسوان ترى ما متغدي.

فتحت الجامة وحجيت.

أسمار : زوجة اخوك مسوية غدة خابرها تصبلك بعد انت مو غريب منا وبينا.

أهاب : اي صدك اني حماكم شلون نسيت وجنت مستحي عود.

أسمار : حمى خالتي تصحيح للمعلومة..

حجيتها وفريت الستيرن حتى ألوف السيارة، وصلت قريب منه وكال.

أهاب : خبصتونا انتِ وأسمر بالمستشفى خطيبته ما خطيبته حتى اني الا شوية واتعارك ليش ما عازميني على خطوبة اخوية وصرت شاهد على عقدكم.

أسمار : لا اتطمن اني وأديم ما بينا طريق يجمعنا اخوك صعب وما راح يتنازل عن كبريائه ولا راح يؤمن اكو بنية تحبه بدون مقابل ولو يطلب عينها وعمرها تنطيه اله ، معشعش اباله عهد شهد وسوالفها ...

أهاب : يلا اللي يريد الحلو يصبر على مره مو ينسحب من اولها.

أسمار : اشوف وين توصل وياه هو شوكت يداوم ؟

أهاب : ماخذيله اجازة شهر وظل منها أسبوع ، بعدها يداوم.

أسمار : ان شاءالله خير ، يلا رايحة اني.

أهاب : انتبهي زين

أسمار : ماشي باي مؤقتاً.

أهاب : وراج اني راح أمشي ست.

ابتسمت هزيت راسي وكلت..

أسمار : ادري.

فريت سيارتي وشخطتها سمعته يصوفر ، باوعت بالمرايا لكيته يهز بيده بعدها صعد سيارته، مثله لايكتله مبينة مال واحد شقاوة.

سقت على كيفي لان تعبانة بشكل مو طبيعي ، ومابية حيل اركز ، رن موبايلي باوعت هو جاوبته.

أسمار : نسيت تكولي شي؟

أهاب : لا والله بس حبيت اشوفج نمتي بعدج كاعدة؟

أسمار : لا كاعدة لعد شلون اسوق اذا نايمة ؟

أهاب : هاي ساعة بيش تطلعين للجامعة وية العسكر لو قبلهم.

أسمار : تقلد حضرتك ؟

أهاب : يادوب توصلين اصلا

أسمار : زين يابه هسه اشوفك الكاعد تقلد عليها شلون تسوق.

واذبها على المية وعشرين خبلته ، كام يصيح علية واني اضحك.

أهاب : لج على كيفج خرب مخبلة سويج مو وياج!!! أسمار.

اول مرة يكولي أسمار ، ضحكت وسديت الموبايل وظليت اسوق بنفس السرعة ، هو يتصل ويدك هورنات ، من وصلت طبكت هو طبكها كدامي ونزل وكف بجهة الباب مالتي فتحها عصبي.

أهاب : شنو سالفتج انتِ ؟ تخبلتي ليش ماتجاوبين مو كاعد اتصل ؟

أسمار : هو اني مخبلة اساساً منو كالك اني صاحية وجان باقيلي خيط واخوك قطعه..

أهاب : لا ربحنا، خالتج هم هيج؟

أسمار : بعدين اتعرف عليها بالمواقف افضل.

أهاب : اي شنو وراية اظل اتعرف على ما الله يفرجها.

ضحكت وتوجهت للباب طلعت المفتاح من جنطتي فتحت الباب والتفتت عليه.

أسمار : بس انطي خبر لخالتي .

أهاب : طبعا شفتيني طبيت حتى توصيني؟

أسمار : من باب الادب حجيتها لان راح اخليك واكف برى وحدك مو لان راح تفوت.

أهاب : ام لسانين يلا سويلي طريق واذا الغدا بارد حميه.

أسمار : ماشي يا حمى خالتي الخيط بدلة العرس.

ضحك ولأول مرة اشوفه يضحك.

أسمار : والله حلو من تضحك.

أهاب : ضامهن بس بالاعياد والمناسبات ..

أسمار : زين تسوي.

أهاب : الناس ما تنطي عين.

أسمار : ابد

أهاب : تكوم تسوق سريع..

أسمار :وبعدلك كلمة وحدة تخليك بدون غدا.

أهاب : بكيفج ما تغديني ومرت الشيخ جوه

أسمار : يلا خلي مرت الشيخ تغديك اني فايتة انام.

أهاب : اهووو زعلت يمعودة صبيلي مو ذليتيني هسه اخابر أديم واشوفه يقبل على هالوضع .

أسمار : يلا خابره اريد اشوف.

أهاب : انتِ شبيج ماتحبين شقى ولج جوعان توني كاتل واحد من وراج.

أسمار : وعلى اساس اني ضربتك على ايدك وكلتلك روح اضربه.

أهاب : بردت كلبج ولج كسرت ايده من العكس .

أسمار : وعود وصاك أسمر ما تترك أثر.

أهاب : لا كال اترك أثر بس بدون بصمات.

أسمار : هاا هيج.

أهاب : اي هسه ما استاهل الغدا؟

أسمار : يلا تفضل راح اصبلك.

أهاب : هاي وحدة وياج.

أسمار : صارن ثنين وحدة سالفة السيارة نسيتها !!!

اهاب : صدك ذكرتيني ..

ضحكت بس ضحكتي طالعة من حلكي و داخلي بركان من نار وقهر ...

رحت للحمام غسلت ايدي و وجهي ورحت لغرفة خالتي كعدتها تفاجأت بوجود أهاب وظلت تسأل فهمتها بالمختصر ، طلعت كعدت يمه واني رحت صبيت غدا اله ، خليته كباله تشكرني مبتسم ورحت لغرفتي بدلت وكعدت اياس جان نايم وطلعنا يمهم التفت علينا شاف اياس لازمته بيدي وشعره اصفر مكعكل مال نوم ويفرك بعيونه خدوده حمر ودافية ، أهاب كزكز عليه كام اخذه مني شاله وخلاه بحضنه.

أهاب : عمو حبيبي شلونك !! شنو اسمك ؟

اياس : اياث..

أهاب : فدوة لاياس شلون اسم حلو وين ماما ؟

اشر على خالتي وعلية.

أهاب : ثنينهم امك؟

هز راسه اياس ب اي وكال.

اياس : بعد ماما اهاديد..

ضحك أهاب باسه وكال..

أهاب : الله يخليهم الك ويخليك الهم..

طلع فلوس من محفظته خلاها بيد اياس رفض ياخذها منه ..

أهاب : هاي ليش ؟

أسمار : معلميه ما ياخذ اي شي من احد غيرنا.

أهاب : بس اني مو غريب.

أسمار: اعتبرها وصلت ورجع فلوسك واذا تحب تجيبله شي جيب لعبة من تجي لان الطفل ما يفتهم شنو الفلوس ولا راح يفرح بيها ويتذكرك و اذا اشتريتله اني بيهن راح يفكر هاي مني.

أهاب : مو مشكلة ماكو فرق .

أسمار : رجع فلوسك واعتبرها وصلت.

حجيتها مبتسمة.

جاوب ممتن ...

أهاب : ماشي امرج ، مشكورين على الغدا واني اترخص ، اي شي يصير اتصال واحد اني يمكم وحاولوا اليوم تباتون ابيت الاهل افضل..

أسن : هذا من وين طلع النا جنا خلصانين منه ..

أهاب : ولا يهز شعرة منكم عبارة عن زوبعة فارغة ، بس احنا ناخذ احتياطنا لان الجبان يكدر على النسوان بس لهذا نتحذر شوية..

أسن : لا يظل بالك بس سؤال فدوة، الشيخ يدري يعني اذا اتصل احجيله.

أهاب : طبعا يدري ما تحركت قبل لا انطيه تلفون.

أسن : اي حتى اذا سألني احجي ليش اكذب..

أهاب : لا ما نريد خالتنا تكذب.

أسن : الله يخليكم ويحفظكم ..

أهاب : ويخليج يلا يابه اني رايح ، اي شي تحتاجون بس اتصلوا دقايق واني بالباب اليوم ابات ابغداد ما ارجع .

أسن : تمام هذا هو متفقين.

أهاب : في أمان الله.

أسن : الله وياك.

راح ،،اني وخالتي رجعنا كعدنا بالهول وظلينا نحجي ..

أسن : راح اتخبل شنو جابه هذا ؟؟

أسمار : حتى يخربلي حياتي يعني ليش رجع برأيج !!

أسن :تدرين اتوقع جيته مو اعتباطاً اكو شي وراه.

أسمار : طبعاً صاير شي وجبير هم وضروري اعرفه بس شلون وعن طريق منو ما اعرف ..

أسن : العذرا تفضحه وينكشف.

أسمار : امين..

ظلينا نحجي بعدها دخلت ادرس..

ومرت الايام خلص الاسبوع واليوم المفروض يداوم أديم ، داومت وشايلة جبال من الهموم على قلبي ،حرت بين افرض نفسي واحجي وياه لو انسحب واقطع كلشي واعرف بهاي الخطوة اذا خطيتها اذيتي واذيته بيها لا محال...

وصلت للكلية ورجل ورا ورجل كدام اخطي الخطوة وكأنما لابسة برجلي حذاء من حديد ، شفته واكف كبال القاعات مالتنا وياه أسمر ، ظليت اباوعله بعيون مشتاقة بقلب ملهوف بنفس رايدته وتتمناه ، جريت اه بحسرة..

لا بية افوت للقاعات راح يشوفني أسمر واكيد يكوله ولا اكدر اظل واكفه بنفس مكاني ، منظري مو حلو يصير وبنفس الوقت خايفة ابتعد عنه ، شلون حيرة..

جريت نفس ردت التفت حتى اروح للنادي ، رفع راسه اتجاهي شافني رجع دنك يحجي وية أديم ، عبالك هو شايفيني مو أسمر ، دكات كلبي تخربطت تبهذلت احوالي ، مشيت سريع وصلت للنادي نفسي مقطوع وكفت اشتري مي ريكي نشف ، فتحت الجنطة رن موبايلي باوعت أسمر جريت نفس عميق وزفرته ، اخذته وجاوبت.

أسمار : اهلا ...

أسمر : :النساء هن الدواهي والدوا هُنَّ ، لا طيب للعيش بلا هُنَّ والبلا هُنَّ...

أسمار : والرجال هم المرهَم والمُرُّ هم ،لا طيب للعيش بِلاهم والبلا هُم..

ضحك ضحكة طويلة بعدها كال.

أسمر : شلونج يابه ؟

أسمار : بشنو يهمك يعني!!

أسمر : شلون ما يهمني ؟

أسمار : شنو رايد أسمر ؟

أسمر : هيج صارت يعني ؟

أسمار : أديم وين ؟

أسمر : فات محاضرة وانتِ ما ناوية تفوتين ؟

أسمار : ماعندي واهس.

أسمر : نمشي على الواهس يعني إمتحان عندكم ترى.

أسمار : أعرف..

أسمر : انتِ وين اريد احجي وياج بس بالاول فوتي للإمتحان .

أسمار : ثاني محاضرة إمتحاني وين انت بعدك بنفس المكان ؟

أسمر : اني اجيج كولي مكانج.

أسمار : بالنادي.

أسمر : يلا جاي.

أسمار : ماشي بالبداية كاعدة .

اسمر : هذا هو .

كعدت انتظره دقايق وصار فوك راسي سلم مبتسم جاوبته بضيق خلك..

أسمر : شبيج ؟

أسمار : شنو تشوف !!

أسمر : شوفي اللي صار وتعرضله أديم مو بسيط صح ؟

أسمار : متفقين على هالشي ما نختلف بس يا أسمر اريد احجي وياه وافهمه ليش ما ينطيني حق التبرير.

أسمر : شمدريج جربتي تحاجيه ؟

أسمار : اعرفه ما راح يجاوبني ليش افشل نفسي.

أسمر : بس علاقتكم تسوى المجازفة والتبرير وتوضيح كل الامور الغامضة..

أسمار : احنا ما معترفين لبعضنا ولا حاجين عن مشاعرنا فلا اني الية حق احاسبه من عرفت بيه متزوج وعنده طفل ولا هو اله حق يحاسبني او يزعل مني ، وهو اصلا ما سألني عن حياتي الخاصة ولا يوم تطرق الها.

أسمر : كلش حلو متفقين وين المشكلة اذا كعدتي وياه وحجيتوا هذا الحجي ؟

أسمار : المشكلة راح يفشلني ويمكن يجرحني واني تعبانة حتى من نفسي..

أسمر : وتبقون هيج هو يلوب على اخبارج وانتِ تتمنين تحجين وياه تصدكين اذا كلتلج خايف عليج وباله مشغول ..

أسمار : ادري بيه ادري بس يكابر..

حجيتها وجريت حسرة..

أسمر : يابه هاي شنو ؟؟؟

أسمار : تعرف شنو اسوء شي بعلاقتنا !!

أسمر : شنو ؟

أسمار : احنا بمرحلة ما اعرف اصنف علاقتنا شنو؟ هل هي صداقة بس او تطورت الى حب عميق ، مرحلة لا الها اسم ولا اكدر اوصفها ، فقط تسيطر علية مشاعر الاشتياق لشوفته سماع صوته للحد اللي اختنك..

أسمر : يابه نياله على هيج حب ، شلون توصفه بحسرات ولهفة ولمعة عين ، اجزم اذا جان مبصر ويباوع بعيونج جان تأكد من شكوكه ناحية حبج ، المشكلة هو ما متأكد منج اذا جنتي تحبيه او لا ، يحس هذا عطف منج او كاعد تحنين عليه من باب شغلج بهذا المجال لهذا حابة تساعديه.

أسمار : كذاب أكثر من مرة بينت اله اني احبه واخر مرة كلتله اشتاقيتلك شنو جان جوابه غير السكوت والقساوة بالملامح..

أسمر : وبعدين وياكم اني تعبت.

أسمار : اني اكثر .

أسمر : هسه انتِ وأديم تفتصلون بينكم ، احجيلي كل التفاصيل الخاصة بلؤي حتى اعرف اللي صار بالضبط ومنو وراه وليش رجع بهذا الوقت

أسمار : تمام راح احجيلك.

أسمر : أسمع.

أسمار : زواجنا جان على حب وبالكوة يلا أهلي قبلوا بعدما تبروا عمامي مني ومن ابوية بسببي ، لانه تزوجت مسلم وجان شرطه اغير ديني...

أسمر : فوكاها يعني !!

أسمار : تخيل .

أسمر : اي كملي .

أسمار : تزوجت بعدها صرت حامل ب اياس وحامي جان صعب رسبت ، جنت سنة ثالثة طب اسنان.

أسمر : حرامات

أسمار : المهم كلت أأجل السنة من اجيب وارتاح ارجع ، ولادتي صارت ابيت اهلي لان بيتي وحدي جان ، جبت يمهم وبهاي الفترة كلش قصر وياية جياته قليلة ومصرف ما يدزلي ، وحتى ما يتصل غير كل يومين مرة ، اني تخبلت ليش هيج يسوي ..
وبيوم قررت ارجع لبيتي ورجعت صح جنت ضايجة منه ومقهورة بس ما بينت كلت ارتاح واصير زينة يلا اعاتبه ، رجع يهتم وكأنما ماصاير شي ولا مقصر ويانه ، بس بهاي الفترة جان يتحجج ما ينام يمنا بالغرفة لان عنده دوام وابني كاعد طول الليل..

اسبوع وتعبت لان وحدي رجعت لبيت أهلي وما اعترض بالعكس حسيته فرح ورحب بالفكرة ، اني جنت متصورة العكس يعني ماراح يسمحلي بسهولة اروح واني توني راجعة، ما اطولها عليك ، من رجعت كلبي كام يلعب...

عندي جارتي مقربة مني صارت صديقتي زوجها منتسب وجانت تجيني مرات و تكعد ساعة وتطلع ،

اخذت موبايلي وخابرتها سلمت عليها بعدها سألتها متوسلة بيها حتى تحجيلي اذا شافت شي غريب ولفت انتباهها رفضت تحجي كلبي لعب بالزايد ، خصوصاً من كالت ما اهجم بيتج اعذريني ، زعلت منها ونهيت علاقتي بيها وكلتلها بعد ممنوع تتصلين بية او تجيني ، مرت ساعة شفت رقمها بموبايلي جاوبتها ..

جانت تبجي كالت الراح احجيه صعب علية بس ما اريد اخسرج ، وحجتلي انصدمت صدمة عمري ، كالت صارله اكثر من اسبوع يجيب وحدة كل يوم للبيت بالليل وتطلع الصبح ، هو يجيبها ويرجعها تكول عبالي انتِ بعدين من خابرتج وكلتي اني ابيت اهلي كثفت المراقبة والبنية لا حامل ولا ابد ويختلف شكلها عنج ، سألتها شلونها كالت حلوة تخبل.

وصيتها اول ما تجي تخابرني ، وفعلاً مرت يومين خابرتني كالت أسمار تعالي جابها ، اخذت خالة أسن ورحنا الطريق كله ابجي وارجف وخالتي تصبر بية وصلنا لهناك جان الباب مفتوح استغربت فتت للهول واشوفه لازم ايد بسيل ويتوسلها وهي تبجي وتصيح عليه ، شافتني انصدمت بدون شعور كمت اضرب بيها واملخ بشعرها ، وهو يسحبني منها واني فاقدة ما حسيت بنفسي خالتي اتصلت على بابا وعلى خالو اجوي ..

كالتلهم اني اجيت حتى اباركلها ماعندي شي وية زوجها..

أسمر : لحظة هي اجتج باركتلج من ولدتي لو لا ؟

أسمار : لا ما اجتي..

أسمر : وهذا الشي زاد الشك عندك لو شنو ؟

أسمار : شوف احنا عندنا عادات ما يزورون اللي تولد جديد الا بعد فترة يعني اسبوعين او اكثر لهذا خالاتي جانوا بس يتصلون يباركولي

وخالاتي اجوي يمنا بقت بس خالتي ام بسيل ما اجت ومن سألت خالاتي عنها عرفت بيها مسافرة صارلها فترة يم خالو حتى ترتب وضعهم هناك ويستقرون.

أسمر : وكلتي مادام بسيل ظلت وحدها اذن اللي سمعتيه وشفتيه صحيح؟

أسمار : مافكرت بهيج شي ..

أسمر : زين كملي شنو صار بعدها..

أسمار : ما اتذكر تفاصيل هواي لان جنت مصدومة، غير خالو سحب بسيل من شعرها وما سمحلها تحجي بعد ، و ما شفتها ولا خلوني التقي بيها رغم جانت النار تسعر بكلبي وردت بس اعاتبها اريد اعرف ليش هيج سوت خلصوا الرياجيل تاخذ رجلي...

دخلت بحالة نفسية وتأزمت حالتي ، وكمت ما احجي ابد ، قررت اسافر بدون تفكير مسبق ردت اترك كلشي يذكرني بيهم وبابا وافقني الرأي راد بس اطلع من الاني بيه دزيناله خبر للكلب رفض كال ما اطلكها ولا اخليها تسافر ، كمت اني خلعته من اخلعه لازم اتنازل عن كلشي حاضر وغايب والخ ، ردت بس اخلص منه ومن اسمه اللي لوث اسمي ، من شفته بالمحكمة فتحت وياه موضوع السفر وكلتله اتنازل عن ابني وخليني اسفره وياية رفض وعاند رجعنا للبيت وهو قافل ، ثاني يوم خابرته نفس الشي مايقبل بعدها هو خابرني وكال اتنازل عنه بشرط تتنازلين عن البيت.

أسمر : وتنازلتي.

أسمار : تنازلت ردت بس اخلص منه واخذ ابني اخليه تحت رعايتي ما جنت ناوية الرجعة ابد بس تغيرت الظروف من سمعت بيهم مخطوبين نار وشبت بكلبي..

أسمر : خطبها؟؟؟

أسمار : اي..

أسمر : مستحيل.

أسمار : صدكني بس شنو محد قبل يحجي وحاولوا يطمطموها بس اخر شي عرفت ماخذها ومسافر وية امها.

أسمر : زين كملي.

أسمار : اي خليت محامي وسويتله توكيل وتدري شغلة المحاكم جرة وعرة وتتأخر واني منا نفسيتي تعبانة لهذا ردت بس اسافر واخلص، اجى وياية وسمحلي اسفر ابني وطمني كال روحي وراج اكمل كلشي وارتبه ويجيج الصافي ..

سكتت ما جاوبته وهاي جانت اخر مرة اشوفه بيها..

أسمر : ما بررلج ما اعتذر ؟

أسمار : ابد ولا كأنما مسوي شي..

هز راسه متحلف وكال.

أسمر : كملي بله اريد اشوف..

أسمار : سافرت وهناك دخلت بحالة نفسية شديدة تعالجت واعتبرتها فترة نقاهة الية ..

أسمر : شلون دبرتيها وحدج بالغربة على الاقل جان سافر وياج احد ابوج امج شلون يأمنون يدزوج وحدج وانتِ بهيج حالة..

أسمار : طبعا اني جنت يم عمتي ساكنة وبعلم بابا هو اتفق وياها بس ماحجينا لاحد لان علاقتها ويه بيت جدو زينة وماجانوا يدرون بيها تحجي ويانا لهذا ما ردنا تجيها حجاية ، كعدت يمها اهتموا بية كلش هواي وداروني وجانوا كل يوم يطلعوني بمكان.

أسمر : ورجعتي علمود خطوبته مو انتِ تدرين بخيانتهم بعد شنو رجعتي عسما يحتركون شعليج بيهم..

أسمار : اللي خلاني ارجع غير خطوبة لؤي حب ابن عمتي الجان مفضوح ومبين للكل من حيث الاهتمام وغيره
وصار عندي بدل السبب سببين حتى ارجع ورجعت وعثرت باخوك بنفس السنة وهذا حالي هسه.

أسمر : هاي انتِ شصاير بيج!!

أسمار: شفت ؟

أسمر : شفت شفت.

أسمار : هسه راح تساعدني؟

أسمر : تعرفين شبجتيها علية بعد ما اعرف منو ويانا منو ضدنا زين اذا حبها لبنت خالتج وهي هيج حلوة مثلما وصفتيها ليش رجعلج ؟ وهي وين هسه ؟ ، وليش شكيتي بواحد من اخواني ؟ ووووو هواي اسئلة بس وعد مني اجيبلج طرف الخيط ومنه نحل كلشي ايد بايد ولا اعوفج وحدج تعانين بس انطيني ارقامهم او حساباتهم..

أسمار : ماشي انطيك بس أديم شلون ؟

أسمر : خليه يستوعب الموضوع واحجي وياه ماشي.

أسمار : ماشي.

أسمر : صار وقت امتحانج تروحين ؟

أسمار : اي.

اسمر : نحجي بعدين..

أسمار : ماشي.

كمنا ومشينا للقاعات وحجينا شوية بعدها راح واني دخلت للقاعة ماجان موجود لأن هو يمتحن بمكان ثاني مو ويانا ، خلص الامتحان جاوبت نص ونص طلعت لكيته واكف بالممر ينتظر أسمر ، رحت يمه سلمت ما جاوبني.

أسمار:على شنو زعلان مني سويتلك شي؟ واذا على الماضي مالتي ما الك كل حق تحاسبني عليه لأن انت ما سألتني واني كذبت عليك صح لو اني غلطانة؟

ماجاوبني عكد حاجبه ودار وجهه للجهة البعيدة، جريت نفس ورجعت حجيت.

أسمار : وبعدين نظل هيج ! كل يوم تزعل مني وما تسمحلي ابرر موقفي.

التفت علية بحدة بصوت ناصي كال...

أديم : لا تبررين ولا ابرر وانتِ بطريق واني بطريق واعتبري نفسج ما شفتيني بيوم من الايام وانسي أديم وتفاصيل أديم ماشي..

أسمار : وتكدر تنساني انت اذا تكدر انسحب ؟

ارتبك وملامحه بهتت بعدها تحمحم وكال .

أديم : ماظل كم شهر نخلص السنة وتبقى سنة وحدة نخلصها شلون ماجان وكلمن يروح لحال سبيله ، بس ما انكر جنتي صدفة حلوة بحياتي ومرت.

أسمار : هاي اني صدفة بحياتك ومرت مو؟

أديم : مثلما سمعتي.

أسمار : ماشي أديم اللي تشوفه يريحك وبيه عذابي سويه.

حجيتها واختنكت بعبرتي تركته ومشيت سمعته بصوت مخنوك صاح.

أديم : سمرة لحظة..

يتبع ...

صباح الخير متابعة ممتعة حبايب...

والبارت كلش طويل اربعة الف كلمة..مو تكولون قصير..