رواية أحببتُ ذلك الغريب الفصل الثاني والعشرون 22 - بقلم عبير إدريس

اديم يگول

بين اشتاگلك بين ارد اراضيك
بين ارد افتهم روحي شوجعها !!
عثر بيه الحنين واشتهي انساك ...!!
افزن والگه لچماتي شوسعها ...

____________

وكفت بمكاني والتفتت ناحيه لكيته يمسد بلحيته ، مشيت ورجعت وكفت يمه ، جر نفس عميق ، انتظرته يحجي ظل ساكت ، همست.

أسمار : اسمعك ، شنو عندك حجي تجرحني بيه أكثر ونسيت تكوله ؟

دنك راسه بعدين رفعه اتجاهي جان لابس نظارته الشمسية...

أديم : اني وعدتج بشي ؟

بغصة همست.

أسمار : لا

أديم : طلبت تتقربين مني ؟

أسمار : هم لا

أديم : احتاجيت مساعدتج صحيح بس ما جبرتج عليها و السويتيه جان بطيب خاطر منج صح؟

أسمار : صح ..

أديم : علقتج بية بقصد ؟

أسمار : اي

أديم : شلون ؟

أسمار : من سمحتلي احجيلك عن تفاصيل يومي وانت تسمعني برحابة صدر ومتعة هذا تعلق ، من احجيلك عن ألمي وانت مهتم وتحاول تسعدني بكل الطرق هذا تعلق ، من وصلتني لمرحلة ما احب اشكي لإنسان ثاني غيرك هذا تعلق من وعدتني تكون صادق وعادل بكل مرة اجيك اني بيها هذا تعلق من جنا نشرح ألمنا واحزاننا امام بعض هذا تعلق من صرنا كتاب مفتوح بمشاعرنا هذا شنو تسميه ؟ ...

بجيت ورجفت بلعت ريكي وكملت..

من نكون اني وياك مخنوگين من شي معين ونجي نفضفض لبعض وبعدها نضحك و نطلق قهقهات لان تغير مزاجنا بنفس اللحظة هذا شنو تسميه مو تعلق لو اني غلطانة ، انت علقتني بيك وانتهى الكلام بعد ما الك حق تتراجع او تلومني على شي وتنسحب بسببه ، انت حبيتني ..

بلع ريكه هز راسه ب لا وهمس بصوت مخنوك.

أديم : لا.

أسمار : تنكر حبيتني  ؟

جر نفس ورفع راسه ليفوك عكد حاجبه بحدة كال.

أديم : لا ما حبيتج .

أسمار : جذاب.

أديم : اشكرج.

جريت نفس وكلت..

أسمار : تعرف شنو اصعب شي بالحياة؟

تحمحم وهمس بصوت مبحوح كال.

أديم : شنو؟

أسمار : يكون اخر الحلول عندك هو جرح حبيبك  بعمق وتضربه بوسط كلبه .

بتوسل كلت...

أسمار : لك أديم اني ما استاهل السويته بية والراح تسويه.

حجيتها وبجيت ما تحملت اكتم أكثر بالأخص من كاعد اشوف تعابير الحب والندم على وجهه  وشلون متلهف يريد يحضني ويصرخ بصوت يهز الدنيا هز بكلمة احبج..واريدج لا تعوفيني.

أديم : شنو الراح اسويه بيج أسمار؟ اني أأذي نفسي وما أأذيج.

أسمار : انت اذيتني وخلص.

أديم : انت حلوة وبعدج صغيرة وتستاهلين واحد احسن مني بهواي.

تقربت منه وحجيت بحدية.

أسمار : انت خاف عبالك رايدة اتزوجك  او فارضة نفسي عليك بالقوة ترى كل اللي رايدته نظل قريبين من بعض وما نفترق حتى لو نظل اصدقاء طول العمر.

أديم : ماكو صداقة بين الرجل والمرأة.

أسمار : صحيح ماكو لأنه لابد بيوم من الأيام هذه الصداقة تتحول الى حب و انت رافض تعترف بيه.

أديم : ما حبيتج للمرة المليون اكررها.

أسمار : والمطلوب مني اصدكك؟

أديم : طبعاً..

أسمار : ليش صوتك يرجف وليش ايدك حاير وين توديها دمرات وجهك بارزة من العصبية و قطرات العرق خططت جبينك ، اني مو طفلة كدامك حتى يصعب علية اميز اذا جنت تحبني او العكس.

أديم : وهاي هيج مركزة بية ؟

أسمار : كاعد اباوع بوجهك واحاجيك شنو اسوي يعني ؟

أديم : ست أسمار فرصة سعيدة..

أسمار : لا تغادر علاقتنا بدون سبب مقنع وتخليني بنار التخيلات والتفكير المميت لا تعيد السواه بية لؤي لأن راح تدمرني ، هو عافني اتصور واعيش تخبطاتي وألمي وحدي ، لا تهجر علاقتنا وتنهيها بهيج صورة قبيحة ، صدكني الهجران بالضبط مثل الموعد وية الموت..

أديم : لا تصعبيها علينا الله يخليج عوفيني بهمي وروحي..

اخر كلمة حجاها بصوت عالي..

أسمار : ما جنت بيوم اتصورك جبان ، ولو جنت أعرف الغدر من صفاتك جان انسحبت من حياتك قبل لا يبدي كلشي وقبل لا توصلني لمرحلة اتعلق بيك وبعدين تعذب قلبي ، اغريتني بكلامك المعسول والاشعار والاهتمام الكاذب ..

أديم : اي اني واحد كذاب والعب على بنات الناس شنو رأيج ؟

أسمار :  تمام مثل ما تريد راح انسحب بس يا أديم هذا اخر لقاء بيننا واخر حديث وصدكني صدكني لو اشوفك ميت كدامي ماراح اقترب ولا اسامحك وكل كلمة حجيناها اليوم راح اظل اتذكرها حتى اكدر اكرهك واطلعك من قلبي و حياتي..

نزلت دمعة منه مسحها بعصبية ، عفته ومشيت سريع تلاكيت وية أسمر صاحني ما جاوبته ، طلعت من الجامعة جنت ابجي بحركة قلب وادعي على لؤي ، وعلى الساعة اللي شفته بيها..

رجعت للبيت واكثر من مرة ردت انضرب وحتى مخالفة مرور حصلت بسبب السهو والتفكير اللي اكل راسي وكلبي..

نمت بعمق قبلها دزيت رسالة لخالتي وطلبت محد يفوت لغرفتي ولا يكعدوني حتى لو طولت يوم كامل ، كعدت على اصوات بالاستقبال ركزت ماما واخواتي يحجون وية خالة أسن..

رفعت راسي ثكيل اريد افتح عيني ما اكدر رجعت شمرت روحي ردت انام ماكدرت رجعت استذكر موقف اليوم دموعي نزلت ، مسحتهن وكمت طلعت يمهم حتى انسى وما اظل افكر ، سلمت عليهم ورحت للمطبخ اجوي وراية سألتني ماما..

أناهيد : بعدج بدون غدا ليش امي؟

بدون ما التفت عليها همست.

أسمار : اكلت خوش اكل بالدوام وشبعت.

أناهيد : صاير شي وياج ؟

أسمار : لا ابد

أناهيد : شبيج باجية ؟

أسمار : لا نمت هواي لهذا السبب تشوفين عيوني مورمة.

أناهيد : اني ما سألت عن عيونج مورمة او لا بس مبين عليج باجية..

أسمار : برأيج اكو شي بحياتي يسوى ابجي عليه ؟

أناهيد : شبيج صاير وياج شي احجيلي ترى اني امج  مو غريبة.

أسمار : حبيبتي مابية شي هسه راح اكل واصير زينة.

أناهيد : زين ننتظرج تكملين و تجين ويانا ؟

أسمار : وين ؟

أناهيد : نروح لبيت جدج يم بيبي صار هواي ما رايحيلها..

أسمار : عندي امتحان سلميلي عليها.

أناهيد : الله يسهلج ماما حبيبتي.

همست بشكراً ، صبيت أكل وكعدت على الميز كدامهم اتغصب الأكل ، أكل لكمة وابلع غصة ، الى ان كملت ماعوني حتى بس ابين الهم اني مابية شي..

بدلوا واخذوا اياس وياهم وراحوا ظليت وحدي كاعدة نار بكلبي تسعر ما اعرف اوصف هذا التعلق الصار ، ليش هيج حبيته وبالمقابل هو ما قدملي شي يمكن اني جنت اهتم واسأل اكثر منه بس ليش هيج حبيته بهذا العمق ليش وحتى ما معترفلي ولا مواعدني بشي ، ليش صدكت فكرة اصير زوجته او حتى حبيبته وتخيلتها وعشتها بمخيلتي وكل يوم احلم بيها ، جريت نفس وكلت محد يسمعني ولا يفهمني ويحل مشكلتي غير ربي الخلقني ...

كمت طلعت بالكوكل كيفية الوضوء والصلاة واركانها ، توضيت واخذت موبايلي خاف انسى شي وصعدت للسطح فرشت جودلية وتذكرت اتجاه القبلة من اجوي صلوا يمنا جماعة ، تذكرتهم وبجيت بحركة قلب ، لدرجة كمت اهتز بمكاني ، يكولي انسيني شلون انسى وانت راح تصير اقاربي وراح اشوفك وتشوفني ونحجي ونتحسر على بعض ، ليش هو بس نتخرج وكافي يا أديم احنا صرنا اهل غصب عني وعنك..

وكفت بين ايادي الرحمن الرحيم ولأول مرة بحياتي اصلي صلاة المسلمين ، كبرت وتكتفت مثله ، صورته ابالي جانت كأنما واكف كبالي يصلي دموعي تسابق كلامي اللي احجيه اثناء الصلاة سهيت ونسيت شنو اكول استغفرت ربي ورجعت باوعت بالموبايل وكمت وكفت  كبرت ورفعت ايدي نويت للصلاة وصليت بكل كلمة وبكل ركوع وسجود اني ابجي ما سيطرت على دموعي ، خلصت صلاة المغرب ارتاحيت وكمت صليت العشا ...

بعدها رفعت راسي للسما ودعيت بقلب مكسور بيه لهفة طفل يتيم لشوفه امه بالعيد..

احببت ذاك الغريب
وكل شيء فيه مريب
وقلبي ذاب من حبه
وتبرأ مني كما تبرأ الذئب من دم يوسف وزادت الشكوك بكل اخ قريب ..
ودعوت يا الله يا مجيب هل لدعائي تستجيب
اما ان تفرغ قلبي من حبه
واما ان تأتيني بنبأ قريب..
باشارة بجواب بجبر عجيب
تجبر به خاطري عن كل كسر من انسان قريب..

بقلمي عبير إدريس..

ظليت ابجي وادعي كملت ونزلت جوا بعدني ما كاعدة اشتغل ضوى موبايلي باوعت رسالة من أسمر كاتب بيها..

( سمرة شنو الصار بينكم هذا أديم منتهي متدمر وضعه فد مرة شنو حجيتوا لخاطر الله ، احجيلي برسالة لا تتصلين )

قريتها وحيلي انهد كعدت بالكاع على اركباتي وقريت المسج مرة وثنين وثلاثة وبقلبي اكول انت تحبني لك ليش تكابر ليش ...

كتبتله ( كلشي انتهى بيناتنا واخوك رافضني بحياته وما قابل استمر وياه واني كرامتي وين فهمني ، وهذا العذاب هو رايده اله وألي )

رجع دزلي ..( راح اتصل واسوي كتم من يمي واسمعيه شلون ينحب عليج والله احس روحه راح تفاركه )

جاوبته

( من ايده الكاعد يصير هو عاجبه يتعذب ما اريد اسمع شي لان اني تعبت ومليت أسمر عوفوني بحالي) ..

قراها واتصل بين القبول والرفض فتحت خط واسمعه يحجي لأسمر بصوت تعبان ومنهك..

أديم : كلتلي شنو شعورك اتجاهها ، تعرف ما أدري حاير ..

أسمر : شلون حاير غير تعرف بنفسك تحبها او لا...

أديم : حيرتي مثل حيرة هيثم يوسف من يگول مرات اشوفك حلم مرات اشوفك طيف يل بيك برد الشتا يل بيك حر الصيف..
اتأملك بس تمر وانطيك كل العمر
وانطيك ما بالقلب ترتاح واني ارتاح..

جر حسرة جبيرة وكال..

امنيتي اشوفها الزم وجهها لون عيونها شعرها ، تبقى أمنية ما تتحقق ، الله يسهل الها وتعيش بسعادة..

أسمر : هو شنو الله يسهللها أسمار الك وانتهى.

أديم : مستحيل بعد الصار ننجمع.

أسمر : ليش غير أفتهم؟

أديم : سد الموضوع هذا الشي منتهين منه انت ليش كل شوية تفتحه وياية ؟وتأرقني.

سد الموبايل بعدها دزيت رسالة كتبله..

(راح اتصل افتح خط اريد اسمعه)

دزلي

( اخابرج بس اوصله للبيت )

دزيت

( ازعل وبكيفك بعد )

رجع اتصل وسمعت باقي التفاصيل...

أسمر : لأن اعرف بيك شكد تحبها وتتمنى تصير بحضنك.

أديم : ماكو هيج شي لا احبها ولا اتمناها..

أسمر : لا تخبلني مو هسه كاعد تكول اريدها واريد اشوفها والزم وجهها وحاير بحبها ؟

أديم : اي يعجبني اشوفها هالكد ما حجيتوا بجمالها كدامي بس مو يعني احبها وميت عليها.

أسمر : ليش تكابر فهمني ؟

أديم : مو مكابرة اريدك تفهم اني تعبان وما اريد افكر بأي شي حالياً.

أسمر: لك والله دواك سمرة وراح ترجعك للحياة صدكني انطي فرصة لنفسكم شبيك انت.

أديم : خلص كلشي بينا انتهى ولا تحجي شي بعد.

أسمر : راح تتندم.

أديم : خسرت هواي ظلت على أسمار.

أسمر : بس أسمار غير.

أديم : شلون يعني ؟

أسمر : مو كلهن مثل أسمار ، اذا ضيعتها راح تعيش طول عمرك وتموت بعد عمر طويل وماراح تحصل مثلها ولك مستعدة تسجد على ذيالك ما تكلي شبيك شايف روحك وخابصنا ..

ظل ساكت أديم ،  سديته ودزيتله رسالة كتبت.

( اتصور الحجي جان واضح بالنسبة الية وحتى الك ماكو داعي تحاول بعد)

بعد ربع ساعة اتصل ، ماجاوبت رجع يتصل اكثر من مرة يلا رديت بضيقة خلك همست..

أسمار : ها أسمر شنو ؟

أسمر : مرت أخوية والملوية وداعة كلشي عزيز على كلبي يحبج بس يكابر

أسمار : لا زين يسوي من حجى هيج وفرلي هواي وقت ومعاناة..

أسمر : سمرة لا تزعلين يحبج بس هو ما اعرف شبيه صاير عصبي وخلكه ضيق..

أسمار : ماعندي شي وياه الله يوفقه..

أسمر : سمرة لا تزوديها علية.

أسمار : أسمر روح الله يخليك اختنكت..

حجيتها وبجيت ، بهدوء كال..

أسمر : ديري بالج على نفسج ..

أسمار : ماشي باي..

أسمر : الله وياج..

سديته منه واني الوب بالبيت اريد اصرخ وأطلع كل الكبت اللي بداخلي ، ظليت اخذ نفس وازفره وحاطة ايدي فوك صدري لأن ضاق النفس عندي..

بعدها دخلت للحمام سبحت بمي بارد هدأت وارتخت اعصابي ، لفيت المنشفة وطلعت مددت بغرفتي ، سرعان ما اخذتني النومة ودخلت بنوم عميق ..

ثاني يوم كعدتني خالتي جانت تتصل على موبايلي باوعت الساعة عشرة ونصف ، جاوبت..

أسمار : صباح الخير.

أسن : صباح الورد شلون صرتي ؟

أسمار : احسن وين اياس ؟

أسن : يم امج تركته يبات لأن عندي دوام وانتِ تعبانة خليته يمهم ..

أسمار : هسه اروح اجيبه.

أسن : اتركيه عندج دوام .

أسمار : ما راح اداوم..

أسن : شلون مو عندج امتحان

أسمار : ماقارية شي بالحالتين راح اخذ صفر

أسن : وضعج ابد ما مريحني مشاكل انتِ وأديم مو ؟

أسمار : نهينا كلشي قبل لا يبتدي لهذا ماكو مشاكل بعد

أسن : هاي شنو ؟

أسمار : اي

أسن : من ارجع نحجي هسه عندي حصة ولازم افوت للدرس.

أسمار : ماشي.

أسن : اياس اتركيه وارتاحي نامي شوية ومن ارجع اجيبه وياية..

أسمار : شبعت نوم واني اريد اجيبه التهي وياه اضوج وحدي.

أسن : تمام سوي اللي يريحج باي..

أسمار : الله وياج..

سديته منها وكمت من فراشي مطيت نفسي حسيت بوجع بكامل جسمي ، فتحت الستائر فاتت الشمس وتبدل ظلام الغرفة بضوء النهار حسيت براحة ، وكفت كبال الكنتور طلعت ملابس لبست بنطرون جينز وتيشيرت ابيض ، توجهت لميز التواليت اخذت المشط مشطت شعري ورفعته ليفوك ثبته بمشبك خاص للشعر ، رشيت عطر، اخذت جنطتي تأكدت من مفاتيح البيت والسويج بيها يلا طلعت توجهت لبيت اهلي ، كعدت يمهم ساعة تقريباً جانت بس ماما وبعدين اجى بابا  من السوك تريگنا سوية غيرت جو وياهم،، اخذت اياس وطلعت اشتري كم شغلة نواقص للبيت..

اني وبالطريق اتصل علية أسمر جاوبته.

أسمار : هلو أسمر.

أسمر : صباح الخير سمرة .

أسمار : صباح النور .

أسمر : شلونج اليوم ؟

أسمار : زينة احسن.

أسمر : وينج تجين للكلية لو لا ؟

أسمار : لا ما اجي..

أسمر : امتحانات عندج انتِ ليش هالكد ضعيفة واني اليوم تركت دوامي واجيت وصلت أديم حتى احجي وياج بموضوع لؤي عرفت شغلات كارثية..

أسمار : مثل شنو ؟

أسمر : تجين وتمتحنين يلا احجيلج.

أسمار : ما اكدر اجي لأن اياس وياية هاي اولاً ، ثنين ما لابسة ملابس دوام وابتعدت هواي عن منطقتنا..

أسمر : سهلة اياس يمي والقلم مني واليوم تعاي مبهذلة مو مشكلة.

أسمار : لا ما اجي اذا ما تحب تحجي مو بالضرورة اسمع.

أسمر : تعالي لخاطر العشرة .

أسمار : لا

أسمر : زين لخاطر فنجان القهوة الشربناه أول لقاء

أسمار : أسمر لا تلح ما اجي.

أسمر : لخاطر الحجية عمرة والله تحبج وابنها كلبه مشلوع واليوم ما تريك ولا اخذ علاجه واجى للدوام ماقاري شي وهسه كعدت حجيتله كم نقطة وباله شارد مو يمي..

أسمار : مايهمني ولا اريد اعرف عنه شي واخباره خليها اله.

أسمر : يلا يابه ما يهمج ماشي بس تعالي وكافي جبن.

أسمار : مو جبانة اني

أسمر : لا جبانة وشخصيتج ضعيفة ومهزوزة.

أسمار : لاتحاول تستفزني وحتى لو اني هيج هم ما راح اجي.

أسمر : لؤي يكسرج تعوفيله العراق وتسافرين وأديم يبتعد تعوفين مستقبلج ومستقبل ابنج علموده ، وتكوليلي شخصيتج مو ضعيفة..

أسمار : ابتعدت ردت ارتاح مريت بضغط لا انت ولا غيرك راح يفهم شعوري الا اللي مار بيه.

أسمر : صدكيني حاسس بيج وعارف الكاعد تمرين بيه مو قليل وهذا السبب اللي خلاني اترك دوامي واجي مناك لهنا بس يا أسمار بداعة كل غالي عندج تعالي وكملي السنة وذبي حملج على الرحمن الرحيم هو راح يجبر بخاطرج صدكيني ، الهروب مو حل والهزيمة للجبناء وانتِ امرأة قوية.

أسمار : اكسر واجبر وقشمرني يلا راح اجي.

أسمر : عفية هاي سمرتنا النعرفها..

أسمار : مسافة الطريق اني يمك.

أسمر : بالسلامة .

أسمار : الله يسلمك باي.

أسمر : باي.

سديته وحجيت وية اياس تلاطفت وياه وظل يدردم ويأشر ماما سوفي ماما سوفي واني وياه اندمجت الى ان وصلت للجامعة ما حسيت بالطريق ، صفيت سيارتي بالكراج ونزلت اني واياس نمشي والعيون محاوطتنا ، اول شي لبسي مو مال جامعة وابني شكله ماشاءالله على جماله يعني بين قوسين اثنينا نلفت نظر..

وصلت كبال القاعات مالتنا لكيت أسمر واكف رحت سلمت وشاف اياس دنك باسه وشاله..

أسمر : حبيبي عمو ما قصر أهاب من وصفك جان طاير عقله بيك ، ماشاءالله تبارك الرحمن الرحيم ، ولج سمرة وين جان هذا ليش ضامته ؟

أسمار: هواي اسباب .

أسمر : من ضمنها ؟

أسمار : بعدين نحجي مو وقتها هسه.

ابتسم وكال ..

أسمر : براحتج ، باعي هسه عندكم محاضرة البعدها امتحان هسه الدكتور اجى يم أديم وهو ويسولف ركز على المهمات،، ليش ما تكعدين هسه تقريهن وتفوتين تمتحنين حرامات هذا سعي هواي يفيدج.

أسمار : شنو وشنو أشر الكم..

ردلي المواضيع ، ونطاني الملزمة مال أديم اللي جان يقريه بيها ، كعدت قريت قسم حفظتهن وقسم مجرد مراجعة سريعة، صار وقت الامتحان دخلت امتحنت وتركت اياس يم أسمر ، طولت مدة امتحاننا محاضرة ونصف لأن الاسئلة جانت مطولة ، بعدها طلعنا كلنا برا القاعات رحت للمكان اللي تركت بيه أسمر واياس ، واشوف أديم كاعد على المصطبة ولازم ايد اياس ويحجي وياه مبتسم ، المنظر كأنما سكين وانغرست بقلبي..

أسمر جان واكف يصورهم ، اتصلت عليه جاوبني.

أسمر : ها سمرة وينج؟

أديم ارتبك من سمع اسمي ،رفع راسه باتجاه أسمر عاكد حاجبه ، كلتله على يسارك اني التفت شافني ابتسم وسد الموبايل ،اجاني من وصل يمي همس.

أسمر : تعالي واحجوا سوية وحلوا الخلاف هو اصلا ماكو خلاف ادري قبل لا تحجين بس نحاول وياه.

أسمار : ما اكدر اعذرني اريد اياس عفية.

أسمر : لو شايفته شلون يشم بيه عبالك ابنه حتى صورته الج علمود تشوفيه.

أسمار : شفتك تصورهم ما اريد اشوف اي شي وخليني اروح ..

أسمر : ماشي ما اضغط عليج شلونج بالامتحان ؟

أسمار : الحمدلله زينة.

أسمر : نفسها اجتي مو ؟

أسمار : اي بس سؤال واحد يختلف.

أسمر : يلا بالتوفيق.

اسمار : الله يسلمك.

أسمر : اجيبلج اياس واجي.

أسمار : تمام انتظر.

أسمر : يلا ثواني.

راح حجى وية أديم ، الثاني جاوبه بنرفزة ، بعدها عكد حاجبه وملامحه رجفت كلت مادام ضاج وتوتر الا اضوجه بالزايد تقربت منهم وحجيت بضحكة.

أسمار : يلا ماما اياس نروح لو نبقى يم عمو أسمر؟؟

أسمر صفن بوجهي عاكد حاجبه ويأشرلي بيده يعني شنو الموضوع .

أسمار : تعبتك أسمر وصدكني لولا اتصالك وملحتك علية جان ما اجيت وامتحنت .

عض اصبعه وسوى حركة يسبني بيها ويأشر على أديم يعني اسكتي ، تماديت بالأكثر ضحكت وكلت..

أسمار : هسه يتعود عليك ، اياس اذا حب شخص وتعلق بيه يظل وفي وياه ويتذكره ابد ما ينسى الاشخاص الزينين وحنين عليه.

أسمر : والنعم منه والنعم .

كتبلي رسالة  واشرلي براسه وعيونه يعني اقريها.

فتحتها كاتب .

( لا تلعبين بالنار وية أديم ، كلشي سوي الا هيج حركات ابتعدي عنها لأن راح يكرهج ويخليج وية شهد بنفس الكفة)

همست ( طز ) واخذت ابني ومشيت كم خطوة والطلاب وكفوني يسألون هذا منو الحلو ومن وين ، عرفتهم عليه وبكل فخر كلت هذا ابني ، اللي شاله بوسه واللي تصور وياه والراح اشتراله ، صارت هوسة يمي بعدين رن موبايلي باوعت أسمر جاوبت.

أسمار : ها أسمر

أسمر : راح تفوتين بخطيته ولج يغار عليج راح يموت ..

أسمار : شنو مسوية اني؟ حتى يموت !!

أسمر : لا ما مسوية بس صوتج وصوت ضحكتج يزرفن براسه ، كل شوية يدزني حتى ابعدج عنهم بعد شوية يوازيني اتعارك سمرة بعدي عن الشر وغنيله.

أسمار : عاجبني العب بعداد عمري ماعندي شي اخسره.

أسمر : لخاطري يتعب صدكيني واخر وكعة على راسه اثرت حيل بيه.

أسمار : ماشي لخاطرك راح انسحب لا عبالك لخاطره هو.

أسمر : اي اعرف واني ممنون الج.

أسمار : يلا ماشي باي .

أسمر : الله وياج بالسلامة.

سديته واخذت ابني بعدما اخذ حضن وبوسة من كل الطلاب توجهت بيه للحمامات غسلت وجهه ونشفته بالمناديل وطلعت من الكلية للبيت ، حسيت براحة من شفت غيرته وحركة قلبه علية وبالاخص لزمت ايده لايد ابني كلش حسيت بيها..

رجعت سويت غدا واجتي خالتي سولفنه شافتني احسن من البارحة وضعي متحسن لهذا ما لحت علية وكامت من اتصل عليها إيساف ، نستني ونست حتى عشيرتها تبدل وجهه من وجه عبوس يستمعلي الى وجه فرح ناسي السالفة كلها ...

ومرت الايام داومت كل يوم ما انقطعت ابد ، وكل موقف يصير يجمعنا ياخذ مني ومنه عمر ...

انتشر خبر انفصالي بالجامعة ، وتوالت عروض الصداقة والخطوبة وغيرها ما اعرف منو الصادق بيهم ومنو حابب يلعب..

الى ان بيوم من الايام اجاني عرض ما يتفوت من استاذ جامعي يداوم بغير قسم بس شايفني ومعجب بية وباقي فترة يسأل علية هواي يلا دزلي طالبة وطلب نحجي على انفراد أكثر من مرة

بالمرة الأخيرة رحت كعدت وياه بالنادي وحجينا ، ما ادري شلون الخبر طش بسرعة بالقاعات الدراسية لأن احنا اي فعل او تصرف بين دكتور او استاذ وطالبته ينتشر بسهولة وحتى اذا ماعندهم شي ، ينشرون عنهم اشاعات عندهم اشياء مو شي واحد ، وبالصدفة طلع هو هم مسيحي بس ارمل...

تكررت الكعدة مرتين ، اني جنت بين نارين نار اقبل اكعد وياه ونلتقي وبهذا الشي احرق أديم بنار الغيرة و احرك غيرته علية لو اوافق من صدك وانهي حياتي وحياة أديم لأن اعرفه يحبني وما يتحمل بس الاستاذ شنو ذنبه..

ثالث مرة كعدنا بيها اجاني اتصال من اسمر فصلته دزلي مسج كتبلي بيه..

( كومي من يمه وانسحبي بهدوء وتعالي برا احاجيج لا اجي واغير تفاصيل وجهه كدامج واخلي الكل يحجي بيكم )

كتبتله.

( ما الك حق تسوي هيج وبعدين اني مامسوية شي خطأ اريد اتعرف عليه  شلون اوافق واني كلشي ما اعرف عنه)

دزيتها وسديت الموبايل دقايق وما احس بيه الا فوك راسي وكف متكتف باوعتله والتفتت ناحية الاستاذ ، رفع راسه باتجاه أسمر وكال.

_ تفضل رايد شي؟

أسمر : اي

_ شنو ؟

أسمر : اختي هاي شعندك كاعد وياها ؟

_ العفو اهلا وسهلا تفضل..

كام مد ايده حتى يصافحه ، ترك ايده والتفتلي، باوعلي بخزرة وكال.

أسمر : كومي اريد احجي وياج.

كمت لأن نبرة صوته علت وبلشوا الطلاب ينتبهون خفت من ردة فعله اذا عاندت ، الاستاذ ظل يمشي ورانا ويتعذر من أسمر ويوضح موقفه وشلون هو معجب باخلاقي ويريد يتقدم ، أسمر متجاهلة  يمشي سريع وجبرني امشي كدامه  ، الاستاذ يأس منه ، تركنا وراح ، التفتت على أسمر بعصبية حجيت.

أسمار : انتوا شنو بكيفكم تحددون حياتي ويامن اكعد ويامن احجي ومنو اختار والمن ارفض.

أسمر : وهذا شنو ذنبه ياكل بروحه صارله ٣ ايام.

أسمار : للمرة المليون اكولها من ايده شعلية بيه وبعدين تصرفك هذا ابد مو لائق ولا مال انسان تدريسي .

أسمر : شنو تحجين احجي اهم شي عندي سعادتكم ثنينكم وما تحسون بيها اذا ما انجمعتوا بغرفة وحدة..

أسمار : هااا يعني هسه اخوك يريديني وهو دزك ؟

أسمر : اي

أسمار: متأكد ؟

أسمر : اي

أسمار : تمام وينه هو ؟

أسمر : بالحديقة الخلفية مال الجامعة.

أسمار : تمام رايحتله

تركته ومشيت بسرعة حتى نتواجه واخلي النقاط على الحروف...

متابعة ممتعة غوالي..

عبير إدريس...