رواية أحببتُ ذلك الغريب الفصل السادس 6 - بقلم عبير إدريس

🦋قيل في النساء🦋
💙صديقات السهر 💙
💙سيدات الحب 💙
💙حاملات الوجع 💙
💙وتاج للصبر💙

__________________

من انتهت الأغنية همس.

أديم : سدي الموبايل أسمار.

أسمار : تمام ..

حسيته ضاج ،عكد حاجبه رجع راسه  على الكرسي ووجهه تجاهي...

أسمار : ضجت ؟

أديم : تقريباً

أسمار : تذكرت شي ؟

رفع اكتافه وسوه حركة بحلكه بعدم مبالاة كال ...

أديم : مزاج ..

أسمار : اووو انت مزاجي ؟

هز راسه وكال.

أديم : بشكل ..

ضحكت ، ورا شوية كال..

أديم : سمعت مقولة تكول  بأن المزاجيين لا يصلحون للحياة ، أو المعاشرة ولا حتى للحب شنو رأيج بهذا الكلام صح أو لا ؟

جريت نفس وكلت..

أسمار : اني سامعة المزاجي يكدر يحب بجنون بس يظهر العكس..

هز راسه بحركة يأكد كلامي بيها بعدها كال..

أديم :صح ومرات تلكيه يدور عن شيء معين بشكل جنوني ويحبه و يتعب يله  يوصله وفجأة يصير باهت بعينه وعادي ما يسوه ذيج اللهفة اللي تلهف الها..

أسمار :يتجمد الدم بعروقه كأنما ماموجود ويتعامل ويه هذا الشي بكل برودة قلب ..

اديم : رغم هالشغلة السيئة بيه بس عنده مزايا هواي منها، ينطلق بالحديث ويبدأ بالضحك ويه المقابل والضحكة تطلع من أعماق قلبه وهذه الدنيا كلها ما تسع صوت ضحكته ، بس للأسف  بلحظة وحدة ينقلب الى حزن ..

أسمار : مو بس هيج عنده قابلية ينصح المقابل للحد اللي يخليه يتجاوز محنته وهو بس رب العالمين يدري بمعاناته وشكد حزن كاتم بداخله..

أديم : زين عندج معلومات هواي عنهم..

بضحكة كلت..

أسمار : لأن اني منهم .

رد ضحكتي بإبتسامة تخبل جننتني .

أديم : يعني هوائية ؟

أسمار : متقلبة المزاج مثلك.

أديم : ومثلي مغرورة؟

أسمار : هذه سمعة هم طلعوها علينا احنا مو هيج..

أديم : يغارون مو بله؟

أسمار : اي والله.

أديم : مو هاي اني وانتِ شو نتعامل وية بعض بكل سلاسة ليش يكولون صعب التعامل ويانه ؟

أسمار : لأن نفس التفكير ونفس الشعور نحس بيه وعندنا نفس الصفات المزاجية لهذا اكو بينا لغة تفاهم أو نكدر نسميها لغة حوار سلسة..

أديم : صحيح وتعرفين شنو أحلى ما بيهم؟

أسمار : شنو ؟

أديم :  واضحين وصريحين ويمتلكون وجه واحد تتعاملين وياهم بيه، يعني الكذب عندهم ممنوع..

أسمار : مو بس هيج ،بعيدين كل البعد عن النفاق والمجاملة

أديم : صحيح حتى تحسيهم مختلفين بتعاملهم ويه الناس..

أسمار : لأن عندهم كل البشر سواسية ماكو تكبر وناس تشوف نفسها على ناس ما يؤمنون بالفوارق الإجتماعية او المادية بين البشر.

أديم : صحيح هذه الصفة بية اني ومتأكد بيج..

ضحكت وأكدت كلامه بعدها كلت..

أسمار : يكولون عنا ما نكره ولا نحقد انت شنو رأيك ؟

أديم : صحيح بس لكل قاعدة شواذ .

أسمار  : بمعنى ؟

أديم : يعني أكو ناس نستثنيهم من هذا الشي و ضروري نحقد عليهم وما نسامحهم ونكرههم هم..

أسمار : بهذه كلش اتفق..

ابتسم وسكتنا ، ورا شوية همست.

أسمار : عندهم ميزة الأحساس بالشي قبل لا يصير .

أديم : ويقرأون الشخصيات بكل سهولة وعندهم تحليل للأحداث بشكل مسبق ودائماً يطلع احساسهم بمحله.

أسمار : والملاحظة القوية للأشياء وسرعة الإنتباه العالية.

أديم : اوووو هذه فد شي عندنا لان المزاجيين بشكل عام وخاص، ينتبهون على أدق التفاصيل وذاكرتهم تكون قوية وحادة.

أسمار :بالضبط..

سكت بعدها كال..

أديم : مصابون بداء التفاصيل..

ضحكت ..

أديم : شو ضحكتي؟

أسمار : على الوصف..

أديم : تدوم ضحكتج كون..

أسمار : شكرا ..

سكتنا وكل واحد صفن بمكان وأسترجع ذكريات من الألم وتنهيداتنا جانت تشرح تفاصيلنا...

بعد سكوت دام لدقائق كال..

أديم : أكثر ما يميزهم شخصيتهم القوية الما تنهز..

صفنت عليه بعدين كلت .

أسمار : رغم هذا الشي بس ممكن موقف بسيط يبجيهم دم وينهي مستقبلهم...

أديم : بس مع ذلك يتعايشون ويه ألمهم وتشوفيهم يضحكون ويكملون حياتهم جدا عادي..

أسمار : صحيح ، بس لو يبطلون هذا الحس المرهف ومشاعرهم الهشة اللي بسرعة تتأثر من أقل موقف يصير جان عاشوا بخير..

أديم : أحلى ما بينا احساسنا المرهف ومشاعرنا ، وعشقنا لليل وسواده وهدوءه ، بالمختصر هذا أكثر ما يميزنا عن غيرنا..

أسمار  : أديم هم صاير بيك ، انت كاعد  تضحك عادي والدنيا حلوة وراها بدقايق تضوج بعدين تبجي بدون سبب بحيث تعتزل الناس حتى الي تحبهم..

ضحك وخلى عكوس ايديه على الميز ، كال..

أديم : المزاجيون فقط من تحل عليهم لعنة السعادة ومن بعدها الكاَبة ..

أسمار : والإنفصام ..

بصوت دافي كال.

أديم : والغيرة القوية..

جريت نفس وكلت..

أسمار : والأمل

تقصدت أكول هيج أريد ابث روح التفائل بداخله..

أديم : تعرفين محد يفهمنا فقط اللي مثلنا ..

أسمار : لأن هم بس يعيشون بطقوس محد يعرفها غيرنا..

أديم : هسه انتِ مزاجية ؟

أسمار : مثلك ..

حجيتها وضحكت..

كتف ايديه وكال..

أديم : لا ربحنا..

ضحكت وظلينا كاعدين والصمت خيم على المكان ، تقريبا نصف ساعة بعدها حسيته تعب وما مرتاح، جر نفس وكال..

أديم : بلا أمر عليج إتصلي على اعقل ، رقمه أول شي بالقائمة ، وأنطيني الموبايل..

أسمار : تمام..

أخذت الموبايل واتصلت على الرقم وخليته بكف ايده أخذه وحجى ويه أخوه طلب منه ييجي ويستعجل..

بعدها سد الموبايل وغمض عينه قوي ، رجع راسه ليورا بعدها خلى ايده على الميز ونام عليها واسمعه يون .

أسمار : تتألم ؟

أديم : مممم.

جان يتألم لدرجة تغيرت ملامحه ، وفجأة طلب مني أسنده ، كمت لزمته من عكس ايديه وساعدته يكوم ،بس وكف ، تقيء مادة صفرة تخبلت ، أخوه تأخر ، حرت شنو أسوي ما أعرف ، لا أكدر أتركه وحده وأروح أصيح أحد وياية ولا اظل واشوفه هيج يتألم ، كعدت وياه بالكاع على الثيل ، صحت بصوت عالي أطلب المساعدة ثواني والتموا الطلاب علينا ، التهيت بيه تربعت وخليت راسه بحضني ، أخذ كف ايدي لزمها ويعصرها بقوة ويصيح بضعف ..

أديم : أسمار كاعد أموت أني.

بجيت دموعي بللت وجهه ، حاجيته بصوت يرجف قهر..

أسمار : اسم الله عليك تحمل شوية ،هسه توصل سيارة الإسعاف .

كام يهز براسه يمين ويسار ، رفعت راسي طلبت يجيبوله مي وكلينكس ، نسيت موجود بجنطتي ، ثواني وصارن بيدي ، فتحت البطل غسلت وجهه ، بعدها مسحته بالكلينكس ،تخبلت من شفته كام يرجف لزمت وجهه فتحت عينه  وأحجي وياه ما أريده يموت ..

أسمار : أديم بردان ، افتح عينك فدوة أديم انت بطل تتحمل أعرف ..

بعدها دنكت على راسه صارت شفتي على شعره ، بست راسه ماعرف ليش هيج سويت بس حسيته صار جزء مني ومافكرت بشي بعد غير اريده يكوم ويرجع ذاك القوي الجان يحجيلي قبل شوية عن مزاجيته..

أسمار : فدوة أديم فدوة ، افتح عينك حباب لاتسوي بية هيج الله عليك ، مو هسه جنت تكول عندنا شخصية قوية ونتحمل ونتعايش ويه الألم شو حجيك كله تبخر ، أديم ولك أديم..

صرت أصرخ بدون وعي وأضرب على وجهه لأن صار أصفر وقطع النفس ، شالوه مني ، وكمت مثل الطفلة أركض وراه صعدوه بالإسعاف ركضت صعدت ، صاح الممرض ابتعدي عطت بيه..

أسمار : ما أبتعد .

_ مو زين عليه ماتشوفيه بأخر نفس.

بدون وعي ضربته على كتفه..

أسمار : فال الله ولا فالك ليش تتفاول عليه ليش ،،هسه جان كلشي مابيه.

عاط على الولد الوياه.

_ اذا ماتنزلوها اني انزل..

أسمار : ما أنزل والله ، وأعتذر منك أسفة بس ساعدوه الله يخليك أبوس ايدك..

_ لا اله الا الله ، كافي كعدي وخليني أشتغل لا تونين فوك راسي.

أسمار : اي اي اي سكتت بس شوفه رجعله النفس عفية شوفه حباب ..

أحجي وأشهك وأرجف خوف ، اخ ياخوف الفقد شكد صعب بالاخص اذا جنت مخذول من عزيز كلبك ، تتولد بداخلك خوفة تعيش وياك للأبد ، والثانية تصير أصعب واقسى خاف أول وحدة گمنا منها بتحدي حتى نعيش حياة ثانية ، هاي تموتنا وترجعنا للألم الأول بخذلان مضاعف ومميت..

ايدي ترجف جسمي يرجف وصلنا للمستشفى ، نزلوه بالسدية ويركضون بيه شايلين بطل الاوكسجين والمغذي والغريب نايم لا حول ولا قوة مسلم امره للواحد الأحد ، هو أبصر بيه وبحاله..

مشيت وراهم ، دخلوه طوارئ تخبلت بالأكثر بعدها حولوه غرفة ثانية ، وكفت كبال الباب اريد أسأل واحد بيهم محد طلع المستشفى أنگلبت كلها تصيح حالة تسمم ويمكن جايبيه ميت واني أصرخ بعلو صوتي

_ لااااا مابيه شي..

كمت أحجي ويه نفسي وأرجف حاضنه جسمي وأفرك متوني أدفيها رغم الجو مو بارد..

أسمار : لا أكيد ما يقصدوه مو أديم اي اي مو هو ، لان مابيه شي مابيه.

اجه ولد وكف كبالي ، كال .

_ اذكري الله ان شاءالله مابيه شي وادعيله انتِ زوجته؟

هزيت راسي بدون وعي همست..

أسمار : اي زوجته.

_ هذه جنطتج ؟ وهذا موبايلج؟

أسمار : اي هذه جنطتي شكرا ..

أخذتهم منه جنطتي وموبايل أديم ،، سألته شلون وصلن يمه كال اني طالب وياكم وخابرت الإسعاف ولأن شافني وحدي جاي بسيارته الخاصة ورانا..

أسمار : كثر خيرك تسلم.

_ ماسويت غير الواجب..

تركته من دك موبايل اديم باوعت اعقل ، فتحته صاح..

اعقل : وينك يمعود صدك جذب بيك شي خبلتني أديم، الو وينك يمعود بيا مستشفى هسه؟

أسمار : الو أديم دخلوه لغرفة وسدوا الباب ما اعرف طوارئ عمليات ما اعرف كمت لا أشوف ولا أركز..

بصوت حاد جاوبني.

اعقل : ليش انتِ منو؟

أسمار : اني زميلته وتخربط بيدي ونقلوه بالإسعاف للمستشفى..

اعقل : انطيني إسمها يرحم والديج..

أسمار : ما انتبهت هسه اسأل .

رحت سألت الطالب وطلبت منه يحجي ويه اعقل ، اخذه مني وحجى وياه بعدها سده ، اخذته منه وخليته بالجنطة ، كمت أروح وأرجع بالممرات أدعي ، يارب يكوم على حيله يارب يصير زين ، ياربي لا تشوف أحبابه بيه مكروه..

لحدما اجه اخوه وكف يمي بعدها راح سأل على وضعيته واجاني وجهه مخطوف..

أسمار  : شنو كالوا عنه طمني فدوه.

عكد حاجبه مستغرب كال..

أعقل : شدعواج هيج ترجفين عليه؟

أسمار : اولاً حالة إنسانية ثانياً مو شي سهل إنسان كبالك يتقيء وتقريباً تطلع روحه ..

أعقل : بس بالغتي حسيتج..

أسمار : بالغت او ما بالغت هذا الشي راجعلي المهم طمني على أديم شنو صار وياه ؟

باوعلي رافع حاجبه، التفت راد يروح صحت ..

أسمار : وين مو كاعد أحجي وياك؟

التفت باوعلي بنظرة غريبة وكال.

اعقل : ذاك الدكتور وروحيله سأليه..

حجاها ونطاني ظهره ، تركته ورحت سألت الممرض ، حجى وياية بنبرة هدأني بيها بس كلبي نار مكدرت اسيطر على انفعالي،،

الي شفته شي غريب أول مرة اشوف إنسان ينازع الحياة كدامي ومو اي إنسان ، واحد عاجز وحسيته ضايع ، كلما أتذكر كلبي ينمرد عليه واتأذة أكثر ،

بالصدفة باوعت على ساعتي انصدمت من شفتها عابرة ال ٨ ، ضربت كصتي وخصرت ايدي ، جريت نفس لاعنة نفسي وغبائي شلون ما اتصلت على خالتي هسه متخبلة علية ، طلعت موبايلي من الجنطة لكيت كذا مكالمة وكذا مسج منها  ، ومن ماما وبابا ، ضميت موبايلي بالجنطة ومشيت اتلفت عين على باب الغرفة اللي دخلوه بيها وعين على طريقي اريد أرجع للبيت بسرعة ،

طلعت من باب المستشفى مستعجلة ، طلعت السويج ، أدور على سيارتي وين ، ما خليت مكان ما دورته رحت سألت بالكراج ماكو، كعدت على الرصيف عصرت راسي بيدي ، بعدين يله تذكرت..

اووف عايفتها بالكراج القريب من جامعتي ، اوف ياغبائج يا أسمار اوف ، وين عقلج وين أمشي وأحجي على نفسي ، وصلت الشارع العام وكفت تكسي وصعدت ، الطريق احسه كلش بعيد صار ، وصلت للبيت ، فتحت الباب ودخلت أول ما فتت سمعت صوت خالتي بخوف وقلق كالت..

أسن : أسمار انتِ أجيتي ..

جاوبت بتعب..

أسمار : اي خالتي جيت ..

طلعتلي من المطبخ شافتني شهكت وضربت صدرها فتحت ايدها تأشر..

أسن : لج هاي شنو هدومج ليش هيج وضعيتج ؟ ولج أسمار خطفوج مو ؟ خاطفيج...

اريد أفهمها ماخلتني ، خبصتني بالصياح واني منا تعبانه ، كعدت بالكاع وانهاريت بالبجي كعدت بمستواية ، وخرت الشعر عن وجهي ومسحت عيوني بيدها باوعت كف ايدها كله طين من وجهي..

أسن : شبيج منو وياج بس لا ؟؟؟

أسمار : لا لا مو اللي أبالج ، ماصارلي شي ، خالة فدوة ما أريد بابا يعرف شي اذا سألج كوليله رجعت ودخلت سبحت وسبب تأخيري سيارتي عطلت وماكدرت أعوفها بينما وديتها مصلح وانتظرت عبالي تخلص وأرجع بيها بس ما خلصت ، وبالنسبة لموبايلي بداخل السيارة ناسيته وبعدين يله تذكرته عفيه انتِ رهميها كلش تعبانة ما اريده يشوفني بهيج حال ، هسه أسبح وأطلع أحجيلج وعد..

أسن : هسه أخابره لان كاعد يدور عليج بالشوارع هو وأخوج وأمج تخبلت..

أسمار : من أحجيلج راح تقدرين الوضع الأني بيه وتعذريني.

أسن : ماشي فوتي اسبحي واني أطلعلج ملابس.

أسمار : ماشي خالتي ..

تركتها ودخلت للحمام أنزع ملابسي وأتذكر تفاصيل ملامحه من تعبت شلون صار بيه ، تفاصيله ناعمة وحادة ، دمارات رقبته من نبضت بقوة وهو يتألم ، نبض صدغه شلون ينفض ، لو من لزم ايدي يتلوى ، لو صوته الضعيف من يصيح أسمار راح أموت اني ، كاعد اتألم أسمار ..

يشكيلي ياربي يشكيلي واني مابيدي شي اسويله ، سبحت على السريع وطلعت ، دنكت لفيت شعري على السريع بالمنشفة رفعت راسي واشوف بابا كبالي متخصر وخالة واكفة يمه تفهمه ، باوعلي بنظرات بيها علامات استفهام ، تقربت بسته بخده وهمست..

أسمار : أسفة بابا ما تنعاد..

عارف : انت ما تفهمين أبوج مايكدر على فراكج ساعة وعلى عماي كاعدة وحدج صح خالتج وياج بس كاعد اتأذى ليش تأذيني هيج؟

أسمار : مو متقصدة حجتلك خالة شنو صار ؟

عارف : حجتلي بس ما قنعت إرتاحي وباجر أجيج ونحجي.

أسمار : أروح أبدل حبيبي من رخصتك ..

عارف : أخذي راحتج اني شوية وأروح..

هزيت راسي ودخلت للغرفة بعدها باوعت من الباب شافتني خالة أشرتلها تجي ، هزت راسها اي وباوعت على بابا عرفتها تريد وقت مناسب تجي بيه ، سديت الباب لبست ملابسي ورحت نشفت شعري بالسشوار على السريع ، دخلت خالتي همستلي ..

أسن : ها أسمار ؟

أسمار : خالة دزي اياس ويه بابا ياخذه وياه يبات عندهم..

أسن : شكو خوفتيني ولج شنو صاير؟

أسمار : خالة فدوة كلشي أحجيلج بس دزي اياس..

أسن : تمام راح أدزه و أشوف شنو اكول لأبوج هو منا ماصدكني وهسه ادز اياس يتأكد صاير شي وياج..

أسمار : اني احاجيه باجر لا تشيلين هم..

أسن : تمام.

طلعت سدت الباب واني كملت شعري ولفيته ليفوك ، كعدت انتظر بابا يطلع ، طول تقريبا ربع ساعة أسمعه يكول لخالتي .

عارف : خليها نايمة خاف تعبانه عينج عليها واني راح اخذ اياس وياية واي شي يصير بلغيني..

أسن : ان شاءالله..

سمعت باب البيت انسدت عرفت بابا طلع ، ثواني ودخلت خالتي كعدت كبالي ، ...

أسن : احجي يله شنو صاير وياج ؟ لدرجة تدزين ابنج يبات برا بعيد عنج.

أسمار : دزيت اياس لأن اريدج تجين وياية للمستشفى.

أسن : يا يمه كلتلج صاير وياج شي تكولين لا..

حجتها وكامت تلطم على وجهها..

أسمار : خالة لا اصبري أحجيلج مو وياية الشغلة مو وياية .

أسن : لعد ليش ترديني أجي وياج للمستشفى ؟

أسمار : شوفي خالة راح أحجيلج كلشي بس بداعة كل عزيز وغالي على كلبج ياحبيبتي ما أريدج تاخذين عني فكرة سيئة ولا يروح بالج بعيد والأهم من هذا كله السر يندفن بيني وبينج..

اسن : من اكول صاير وياها شي تكولي لا ماكو شوفي حجيج شنو تفسريه بله..

أسمار : اصبري علية مو كاعد احجيلج ليش ما تنطيني مجال..

أسن : سكتت احجي..

حجيتلها من يوم العرفت بيه أديم للموقف المرينا بيه اليوم ، هي ساكتة وتسمع بأنصات ، من أني سكتت كالت..

أسن : حبيتيه أسمار ؟

سكتت ودنكت راسي، رفعت ذقني باصابعها ، باوعت بعينها نزلت دمعتي، مسحتها بطرف اصبعها وكالت...

أسن : أسمار انتِ ماعرفتي عنه شي غير ، فاقد للبصر ، منو هو ومن وين وشنو اصله اهله منو ؟ عشيرته ؟ مسلم ؟ مسيحي مثلنا ؟ ..

أسمار :على الأغلب مسلم .

أسن : هو يدري بيج مسيحية؟

أسمار : شي أكيد لأن الطلاب كلها تعرف ديانتي..

أسن : وتالي ويه حبج الغلط ذاك ضيع عليج حلمج طب الأسنان ، وخوفي هذا راح يضيعلج حياتج..

أسمار : خالة كل هذه الأمور النقاش وارد بيها وراح اسمعج وتسمعيني هواي بس المهم هسه تكومين تبدلين وتجين وياية ، لان اذا ظليت بعد دقايق افقد عقلي من التفكير وأصير مخبلة من صدك..

أسن : حلوو أسمار وحبت بعد شيخلصنا ، هذا هو راح تنطي حبها وحياتها وبصرها وبصيرتها وتصير عكاز ، وخوفي هالمرة لا يبصر ويكسرج ؟..

أسمار : أديم مو هيج صدكيني.

أسن : شنو عرفتي عنه حتى تجزمين هو مو هيج..

أسمار : إحساس ..

أسن : واحنا نمشي ورا إحساسج؟

أسمار : خالة حبيبتي يله نروح فدوة إستعجلي..

أسن : تمام تمام صبري علية أبدل..

طلعت من غرفتي تدردم ، طلعت وطفيت الاضوية مال البيت حتى بسرعة نطلع ، خبصتها كل شوية اصيح عليها يله ويله ، طلعت تتعثر وتحجي علية ..

طلعنا جانت الساعة عشرة ، أخذنا تكسي ورحنا للمستشفى ،أول ماوصلنا رحت للمكان العفته بيه ، باوعت اخوه ماكو كلبي لعب ، رحت سألت بالرسبشن ..

أسمار : بلا زحمة اليوم العصر  اجتكم حالة تسمم ، شنو صار وياه الله يخليك..

_ ها هذا الولد الجابوه منتهي؟

أسمار : اي هو شنو صار وياه وينه هسه؟

_ حضرتج شنو تصيرين منه ؟

تأفأفت وضربت فخذي بكف ايدي..

أسمار : هسه بس طمني عليه ما أريد شي منك..

_ما أكدر أنطيج معلومة عنه الا اعرف شنو قرابتج منه .

أسمار : زوجته هيج زين..

اني كلت هيج  وخالتي هي عيطة وهي وكعة بالكاع تخربطت ، باوعت على الولد كلتله .

أسمار : يمعود هاي امه تخربطت تعال ساعدني بيها ودليني على زوجي..

_ اسف والله بس اجوي اخوته شددوا علينا لان الدنيا احتركت قبل ساعة..

أسمار : المهم هو بخير؟

احجي وياه وحطيت راس خالتي بحضني ، اجه ممرض ثاني رش مثل العطر على وجهها كعدت ، باوعتلي وضربتني حيل ، كازه على اسنانها وتهمس.

أسن : صبريلي اني اعلمج..

أسمار : صبري خالة صبري ترى غير الحجيته بالبيت ما صار خلي ابالج

اسن : تريدين تخبليني انتِ؟

أسمار : خالة تعبت كلبي راح يوگف ياربي رحمتك..

سندتها ، وكمنا من الكاع ، كعدتها على كرسي قريب ورجعت لهذا الولد توسلته بملامحي..

أسمار : حباب اني زوجته وكلهم يضوجون مني محد يجاوبني من اتصل فدوة شنو الصار ؟.

_ بس مو تحجين ترى اروح بيها عفية

أسمار : صدكني ما احجي شي ..

_ أول شي زوجج عدى مرحلة الخطر ، ثنين المستشفى فتحوا تحقيق بعد ما شخصوا حالة التسمم مالته عن طريق العلاج مو عن طريق الاكل..

همست بيني وبين نفسي.

أسمار : بس العلاج اني نطيته بيدي.

_ نعم ويايه؟

أسمار : لا مو وياك احجي ويه نفسي..

_اذا تحبين تشوفيه بالطابق الثالث غرفة رقم خمسة.

أسمار : منو يمه؟

_ اخوانه ثنين وماشفت احد غيرهم..

أسمار : هو يبات لو يطلع اليوم ؟

_ ما اعتقد يطلعوه لأن حالته سيئة وتتطلب يبات ليلة هنا واحتمال أكثر.

أسمار : ماشي شكرا

_ عفوا

طلعت فلوس من جنطتي وخليتها على الميز، اخذها متشكرني..

مشينا اني وخالتي بممرات المستشفى ..

أسن : راح نصعد ٣ طوابق ؟

أسمار : لا مصعد موجود..

أسن : أخاف منه أصعد درج اني.

أسمار : ماشي براحتج..

صعدنا اني اركض وهي بايه بايه وتوكف شوية ، خالتي تعبانه رغم بعدها صغيرة..

وصلنا للطابق البيه غرفة اديم ، دورت غرفته قريت رقم خمسة وكفت كبالها كلبي دك ، ردت ادك الباب وافوت خالتي جرتني ومشت بية وكفنا على صفحة نهرتني كالت..

أسن : بصفتج شنو فايتة بهذا الليل على الناس ، مافكرتي عنده زوجة تشوفج ؟ مافكرتي شنو موقفج من أهله وانتِ مجرد زميلة ، ماخفتي يتهموج انتِ اللي سممتي إبنهم لأن اخذ العلاج منج ؟ شوكت تفصلين هذا عن هذا وتفكرين بعقل..

حجتها وأشرت على قلبي وعقلي.

أسمار : ما أكدر أخطي خطوة خارج المستشفى اذا ما اتأكد هو زين وعدى مرحلة الخطر..

أسن : نبات يعني ؟

أسمار : اذا اقتضت الضرورة اي.

اسن : زين باتي واني راجعة بوجهي لأبوج هو يتفاهم وياج..

عافتني ومشت ركضت وراها..

أسمار : خالة بس أتاكد عفية الله يخليج..

أسن : بصفتج منو أمي بصفتج منو ؟ هسه دكينا الباب اني وياج امنت بالله فتحوها النا ما يكولون انتوا منو وشنو عدكم جايين وشنو تسوالنا اذا ما خلونا نفوت او ما طمنونا عنه

أسمار : لهذه الدرجة ماعندهم أصول ما أعتقد.

أسن : كلشي بهذه الدنيا موجود ..

أسمار : ما أعرف حرت اني..

سكتنا من فات الدكتور ويمشي وياه ارقم، الدكتور سأله..

_ هو اسمه الكامل أديم أشعب إبراهيم السامرائي صح لو اني غلطان ؟

أرقم : صحيح دكتور.

_ اي يعني الدعوة بخصوصه ولحد الان ما أنسدت شلون تطلب مني أطلع أخوك مو هذه بمسؤوليتي..

ارقم : هذا طلبه هو دكتور مو طلبنا احنا..

_ ما أكدر أعذرني ، حالة أخوك صعبة ومبينه بفعل فاعل والشغلة طلعت من ايدي ...

أرقم : دكتور شلون مو بيدك وانت يمك الحالة كلها .

_ اي اخي انت تفهم لو لا؟

أرقم : كاعد اكولك هو مختنك واحنا نخاف على وضعه يتأزم وخبصنا يريد يطلع.

_ اخوية الكريم احنا ما نمشي بكيف المريض اختنك ويريد يطلع احنا نريده يصير زين ونتأكد من حالته الصحية يلة..

أرقم : هذا هو دكتور ماشي ..

تركه الدكتور وراح وهو دخل للغرفة البيها أديم..

خالتي جبرتني أرجع ، ومن رجعت للبيت ظلت تحجي وياية كلش هواي بحيث خلتني أندم على الساعة اللي فكرت احجيلها بيها ، دخلت لغرفتي اخذت موبايلي واتصلت على موبايل أديم لكيته مغلق تأفأفت بضجر ، شنو أسوي وشلون اخلص الليل حتى الصبح اروحله ،

بين التفكير والقلق والدعاء والتضرع لله خلص الليل واجه الصبح كمت بدلت وطلعت من البيت أخذت تكسي لجامعتي ، نزلت يم الكراج أخذت سيارتي وانطلقت للمستشفى البيها اديم ، وصلت صفيت السيارة بكراج المستشفى ودخلت توجهت لغرفته وكلت أفوت اسلم واسأل عليه ، زميلته وجاية شنو يعني ،  دكيت الباب مرتين بعدها فتحتها ، باوعت السرير فارغ والغرفة مابيها أحد.

طلعت أركض خفت صاير بيه شي بعدين من تذكرت كلام أخوه وإصراره حتى يطلعه من المستشفى شوية خفف من توتري..

نزلت سألت عليه بالرسبشن كالوا طلع من ساعة ستة الصبح..

خابت أمالي وماظل عندي شي يطمني عليه غير الموبايل ، ومغلق أكيد بس كلت أحاول بلكت أحصل..

رجعت للبيت لكيت خالة ماكو ، خابرتها وبلغتها رحت أجيب سيارتي ماحجت شي بس مبينة ضايجة من صوتها، وراها اتصلت عليه هم مغلق ، اني وأحاول أتصل وكع الموبايل من ايدي ونمت.

كعدت على صوت خالتي واياس ، رحت يمهم تغدينا سوى ، وبعدها رجعت اتصلت نفس الحال يأست ، مشت الأيام ، ومدة أسبوع ما أعرف اي خبر عنه ، ومن أتصل مغلق ، حتى دوام ما داومت ، بداية الأسبوع الجديد داومت ، سلمت على زملائي ودخلت كعدت ما أعرف أحد بيهم بس أديم دفعتي صاروا مرحلة ثالثة..

خلصت اول محاضرتين بعدها صعدت سألت رئيس القسم عليه ، كال ماخذ إجازة أسبوعين وأخوه اجه اخذها اله..

بملل وجزع انتظرت هذا الأسبوع بالموت يله خلص..

بداية الأسبوع اللي هو راح يداوم بيه ، للصبح اني منايمة ، بدلت ورحت من وقت للكلية ، انتظرته ، ما دخلت محاضرات ، شفته واخيرا يمشي من بعيد هو وأخوه اعقل ،  ياويل حالي شكد تعبان ومتأذي ضعفان والوجه أصفر ، دخلوا للممر مال القاعات الدراسية دخله أخوه للقاعة وطلع شافني عكد حاجبه وراح ، دخلت بلهفة للقاعة لكيته مرجع راسه ليورا ومغمض رحت كعدت يمه ، تقربت منه وهمست قريب اذنه..

أسمار : حمد لله على السلامة شسويت بينا..

عدل راسه بإستقامة التفت علية مبتسم بتعب كال.

أديم : يسلمج الله عبالي نسيتيني ؟

أسمار : شلون نسيتك واني وياك بالمستشفى لحد الليل وثاني يوم أجيت كالوا طلعوه من الصبح، ومن أتصل مغلق موبايلك..

أديم : مستحيل شلون مغلق بيدي جان ومنتظر منج أتصال ، عفوا اقصد يعني منتظرج تخابريني حتى أعرف شنو أخذتوا محاضرات ..

عرفت هاي اخوانه هيج مسوين بس ما حبيت أصر على السالفة..

أسمار : لعلمك ما داومت ذاك الأسبوع ولا القبله غير يوم واحد..

عكد حاجبه وانرسمت ابتسامة خفيفة على حلكه.

أديم : صاير وياج شي؟

أسمار: لا بس تعبانة جنت..

أديم : صحة وعافية عليج.

اسمار : للجميع يارب.

أديم : أسمار .

اسمار : ها

سألني بشك..

أديم : يكولون اني متسمم بالعلاج ، تتذكرين بوقتها شنو أخذت علاجات.

اسمار : ثنين عرفتهن مقويات بس البقية ماعرفت لشنو ، موجودات عندك اصورهن وندزهن لبابا صيدلاني يعرف بالأدوية..

أديم : لا ما جايب غير نوعيتين بس

أسمار : هسه أعلمك كل يوم شلون تقرأ علاجك ولا تاخذ من أيد أحد شنو يوصفلك الدكتور انت امشي عليه.

أديم : تلمحين لشي أسمار؟

حجاها ورفع وجهه ناحيتي منتظر الرد..

بتلكؤ كلت..

أسمار : لا طبعاً بس الك أفضل..

عكد حاجبه وكال..

أديم : من رخصتج أريد أحجي وياج برا..

أسمار : شنو الموضوع؟

أديم : لا تخافين مجرد إستفسار بسيط وهذا هو.

أسمار : ماشي.

طلعنا ورحنا كعدنا بمكان بالحديقة ، ظلينا ساكتين محد بينا فتح الموضوع ، قطع الصمت رنين الموبايل مالته ..

صوت رسالة عقد حاجبه ملامحه تغيرت ، بصوت هادئ كال..

أديم : بلا أمر عليج شوفيلي شنو بيها الرسالة؟

أسمار : تمام.

أخذته منه فتحته وأنصدم بالمكتوب ، أرتعبت وصابني اشمئزاز من القريته ،..

مكتوب..

(  اعقل صدمة ، صدمة ، يمكن شهد ماتت محروكة ، بس دير بالك تبلغ أديم دزيت مسج أقراه وانت اتصرف من يمك هذا مخبل شيخلصنه منه اذا عرف..

بعدها دز..

( اعقل راح أتصل على أديم وأحجي وياه طبيعي وأقنعه ييجي يمنا بالبيت شنو رأيك أكتبلي بينما نتأكد من صحة الخبر )

أديم : أسمار مكتوب شي سيء ؟

حجاها ورجفة بإيده ، حرت أحجيله لو أظل ساكتة..

أديم : أسمار شنو الصار أمي بيها شي ؟

حاولت أسيطر على نفسي ، بصوت مرتبك كلت ..

أسمار : رسالة من الشركة هذه .

عكد حاجبه مستغرب لوى فمه وكال..

أديم : شلون من الشركة هذا أرقم..

أنصدمت شلون عرف ، أصريت من الشركة خرسني من كال مأكد كلامه..

أديم : أسمار اني مخصصله نغمة شلون تكولين من الشركة؟

يتبع....

صباح الخير والعافية حبايب🦋💙