رواية أحببتُ ذلك الغريب الفصل التاسع وخمسون 59 - بقلم عبير إدريس

كدامك بلا عقل اربط نجوم برسم بس الحجي مابي ربط
معسول لون وطعم وشعرك اشك ينوكل (عضته سنون المشط)
بحجايتك في اذن ..حجيك مبلل يصب (ماينسمع ينغرف)

وجهك ندافة ثلج ...مو (رصعة من تبتسم تطلع بخدك زرف)
___________________

باوعتلها بطنها جبيرة حامل بآواخر شهورها يعني شنو اسويلها هسه اضربها هاي مو اخلاقي اطردها هذا مو بيتي ، شنو اللي اسويه التفتت عليهم لكيتهم قسم مصدوم وقسم عادي وكأنما يدرون بجيتها ، تقرب أديم وحط إيده فوك ظهري وسندني حتى اكدر اوكف ، رفعت إيده وتقربت منها جريت نفس عميق وين اخذني ، اخذني لقبل سنوات بعدها ضاعت اجمل ايام من عمري..

عشت الألم وعاصرت الوهم وكرهت كل اثنين يحبون بعض احس اللي بينهم كذب ، شكيت بكل واحد يريد يتقرب مني ويساندني ، انهز كياني نفسيتي تحطمت ،فقدت الثقة بنفسي ، حب حياتي ضاع مني ، جازني بخذلان وغدر ، وية منو ؟ وية اقرب صديقة الية ، كل هاي الاحاسيس خيمت كبال عيوني واني اباوعلها ، كرهت روحي ورجعت كرهتها وقبل لا تحجي كرهت السبب اللي خلاني اشوفها كبالي من جديد..

باسلوب نتر حجيت موجهة الكلام للموجودين..

أسمار : هذه شنو جابها ؟ وليش لاحكتني..

همست بصوت ضعيف ..

بسيل : أسمار محتاجتج ، واريد تسمعيني..

التفتت عليها وعطت نسيت منو موجود وما شفت غيرها كدامي.

أسمار : ليش رجعتي ؟ ليش ؟ تريدين تخربين علية حياتي خاف ما كفاج اللي سويتيه تريدين تهجمين بيتي من جديد ..

اختنكت ماكدرت احجي بعد، التفتت عليهم عطت واشرت عليها..

أسمار : طلعوها منا ما اريدها ما اريد اشوفها ما اريدها ما اريدها..

اصرخ اصرخ بكل صوتي حسيت الاوتار الصوتية انضربت عندي ، اريد احجي ماكدرت اختفى صوتي ، طلعوا كلهم بقينا اني وأديم اجى يمي وحضني بقوة وظل يهمس بأذني كلام يهدأني بيه ، بعدها كعدت على القنفة وبقيت صافنة ،واردد بكلمة شجابها كل شوية اكررها..

بعدها اخذني لبيتي من الصدمة ما اكدر احجي شي مددت واخذوا ابني مني والولد وخلوني وحدي بالغرفة ، كل شوية يجي أديم يباوعلي ويروح اخر شي نمت ساعتين وكعدت لكيته يم راسي صافن بإتجاه نومتي، حس علية كعدت ، مد ايده مسد راسي وهمس..

أديم : شلون صرتي احسن ؟

أسمار : راحت ؟

أديم : منو ؟

أسمار : تعرفها ما اريد اذكر اسمها

تنهد جر نفسي حك وجهه بارتباك بعدها كال..

أديم : باقية ..

كمزت من فراشي وكعدت بصفه ..

أسمار : شنو ؟

أديم : بسيل باقية هنا.

أسمار : شنو يعني باقية هنا فهمني..

أديم : بس اهدأي و ريحي اعصابج حتى اكدر احاجيج.

أسمار : شفتني مخبلة واملخ بشعري حتى اريح اعصابي واهدأ ، هادئة احجي يلا..

أديم : أسمار انتِ ما جنتي هيج!!

أسمار : اي تشوفني دائماً تصرفاتي حكيمة وانطي الشي قيمته وما اتهور بس لكل حسام نبوة، ولكل جواد كبوة، ولكل حليم هفوة، ولكل كريم صبوة.لهنا وبعد ما اتحمل ولا اعذر ولا اسامح طاقتي خلصت كافي انطي على حساب نفسي واسامح ..

أديم : اللي تريديه شنو اني وياج ؟

أسمار : تطلع من المزرعة شعندها باقية والله جاية علمود خالة ماكو هيج حجي ما اقتنع..

أديم : منو كال علمود خالتج اجتي.

أسمار : لعد ؟

أديم : اريد احجيلج بس ما ضامن ردة فعلج يا أسمار شلون راح تكون .

أسمار : خايف عليها مني؟.

أديم : طبعاً لا خايف عليج اني..

أسمار : احجي لا تخاف ما راح يصيرلي شي..

أديم : ياحبيبتي يا ام اولادي يا اجمل هبات ربي ، ام عقل الكبير وام نفسية طيبة..

جان يحجي بهدوء وصوته بيه حنية مو طبيعية ، بس مع هذا ماكدر يسيطر على انفعالي ولا يمتص غضبي..

أسمار : اختصر ابو تميم..

أديم : مادام صار بيها ابو تميم الامور مو طيبة..

أسمار : احجي أديم شنو صاير ليش تلعبون بأعصابي..

أديم : شوفي يا بنت الناس ، انتِ تحبين أسمر وعنده مكانة بقلبج غير شكل عن الباقين صح لو اني غلطان؟

أسمار : وأسمر شعليه بيها ، اوكف لحظة ...

خليت ايدي على حلكي وشهكت...

أسمار : لا لتكولي متزوجها اخوك!!

هز راسه بأي، نزلت دموعي ،شلون صدمة ياربي أسمر وبسيل وبعد شنو اللي ما ادري بيه..

أسمار : من شوكت ؟

أديم : صارلهم سنة تقريباً..

أسمار : سنة متعارفين لو متزوجين ؟

أديم : متزوجين ، يعرفها من جنا نداوم بالجامعة ، من طلب منج رقمها وكلتيله ماعندي رجع سألج اذا عندها حساب او شي ثاني يتواصل وياها بيه انت بوقتها نطيتيه الفيس مالتها..

أسمار : كال اريد اوصل ، ل لؤي بس ما كال راح اتزوجها ، بعدين شلون اخذها وهي على ذمته ، شنو كاعد يصير فهموني.

أديم : اكعدي وياها وهي تحجيلج التفاصيل لأن اني ما اعرف كلشي اللي اعرفه تفاصيل طفيفة..

أسمار : وانت من شوكت تعرف؟

سكت ، رجعت عدت عليه السؤال وهم بقى ساكت ، رحت يمه ولزمته من ايده عصرت كفه وعدت السؤال للمرة الثالثة، جر نفس قوي وكال...

أديم : اعرف من زمان..

أسمار : من شوكت يعني ؟

أديم : قبل زواجهم بفترة بسيطة ...

أسمار : وتدري بيه متزوجها ؟

هز راسه بأي..

أسمار : حلوو وطول هذا الوقت مستغفليني ..

أديم : مو هيج انتِ لو بس تنطينا مجال نفهمج..

أسمار : شتفهمني ، شنو تريد تحجي اي عذر ما مقبول ..

أديم : مو عذر بس اذا سمعتي الحقيقة افكارج راح تتغير..

أسمار : منو بعد يدري ؟ خالة تدري ؟

هز راسه بلا.

أسمار : لعد منو ؟

أديم : إيساف وأرود.

أسمار : واووو كلها تدري وبس اني ياغافل الك الله ، يعني جنت تدري بيهم متزوجين ومع هذا ما كلتلي.

أديم : واذا كلتلج شنو راح يتغير ؟

أسمار : هواي امور

أديم : اولها ؟

أسمار : ما اثق بأخوك ولا اقوي علاقتي بيه ، اخوك خاين...

أديم : لا تحجين عليه مادامه غايب.

أسمار : لا احجي واحجي واحجي.

أديم : سمرة لا..

أسمار : انت ومنو تدري ؟

أديم : اني والشيخ وأرود ، قبل شوية سألتيني وكلتلج..

أسمار : اي اعتبر عقلي طار وجاوبني.

أديم : هي تريد تحجي وياج انطيها فرصة..

بقيت اباوعله المشكلة لو يشوفني جان حس شنو النار الي بية ، جريت نفس يحرك حرك ، كل نفس اجره تصاحبه حسرة على سنيني ونفسي وعلى الايام اللي ضيعتها ارضي هذا وذاك على حساب نفسي ..

أديم : احجي لا تبقين ساكتة اصرخي كسري طلعي اللي بداخلج لا تكتمين سوي اللي تريديه وبعدين نكعد ونتفاهم ..

أسمار : ما اسوي اي شي ، اريدها تطلع منا وبس ، المكان اللي اني بيه بسيل ما تبقى .

أديم : ما نكدر هاي امانة أسمر وابنه شايلته بأحشائها..

أسمار : مو مشكلتي اخوك مو مشكلتي امانته مو مشكلتي ابنه ..

أديم : هذا أسمر اللي وكفلج و وكفلي وحرك نفسه وضيعها في سبيل راحتي وراحتج هيج نجازيه، انتِ لو بس تدرين شكد يحبها واحترك يلا حصلها جان ما تصرفتي هيج..

أسمار : اني لو هي ؟

سكت رجعت عدت عليه السؤال مرة ثانية بنبرة اعلى..

أديم : مافهمت ..

أسمار : اني لو مرت اخوك ، تضحي بية وبولدك لو بيها ؟

أديم : أسمار أسمار ليش تخليني بخيارات صعبة وين اوديها ترضيها تضيع هاي عرضنا ، وجاية دخيلة هنا ، من عرفوا بيها راجعة للعراق ومندلين بيت أسمر مهدديها، لهذا لجئت النا ، أسمر كايللها اي شي يصيرلي او طولت عليج تروحين للمزرعة ، ومن تأخر أسمر هاي الفترة جانت تريد تجي بس خايفة منج وعلى مشاعرج...

أسمار : ياعمري الحنينة الطيبة ، اسمعني ابو تميم ، اذا بقت بسيل هنا اني اسافر لأهلي.

أديم : خلص نسافر سوية نرتاح ونغير جو ونرجع .

أسمار : اسافر وحدي اني والولد..

أديم : اي وغيرتي اشيلها مو ؟ ألغيها ؟ شنو رأيج؟

أسمار : ما كلت هيج.

أديم : خلص باجر نروح نطلع جواز لأسمر وبعدها اخذج وين ما تريدين..

سكتت بس بقيت اباوع عليه ، شكد حقدت وشكد كرهت نفسي وكرهت استغفالهم الية ، كلهم يدرون حتى زوجي واني اخر من يعلم ، اكره شي بالدنيا من واحد يستغفلوه ويخلوه موقع الغبي بإمتياز..

طلع من الغرفة وتركني وحدي انام ، ماكدرت اغفى ولا هدالي بال، كمت وطلعت ملابسي ورحت للمخزن جبت جنط سفر وخليت الملابس بيها بعدها رحت لغرفة الاولاد وحضرت ملابسهم وهيأت كلشي للسفر ، ما حسست تميم بسفرتنا ، من سألني كلتله اريد ارتبهم لأن الكنتور هوسة وحتى ملابسه رجعت سفطتهم من جديد رغم مابيهم شي.

بالليل فات أديم وصاحني سويت روحي نايمة ، ما دخل للغرفة توقعته ينام برا وفعلا ما زعجني ، بعد ساعات كمت للحمام ولكيته كاعد بالإستقبال وجانت الغرفة ظلمة وضوء خفيف بس عاكس ملامحه جان مرجع راسه ليورا ومغمض عيونه..

رحت للحمام فرشت اسناني ورجعت للغرفة صار الصبح ورحتله لكيته غافي ، تركته وطلعت للبيت الكبير ، دخلت لكيتهم ملتمين على الريوك وبوسطهم بسيل ، الكل عادي متقبل الموضوع وحسسوني هي ام البيت ، من دخلت شافوني كام أهاب اجى يمي وكال..

أهاب : سمرة تعالي بعدنا على أولها..

جنت اباوع عليها وجاوبته بدون وعي..

أسمار : أسمار بيش كيلو وتدزون عليها تتريك وياكم.

أرود : يابه لو ندري بيج كاعدة الا نجيب أكلنا ونجي يمج..

أسمار : انت بالذات تسكت ، نسيت وكفتي وياك حتى ضد امي صرت علمودك وتالي هيج تضربني بظهري..

قسيت وياه وقسيت وية الكل خصوصاً إيساف من كلتله..

أسمار : شلون شيخ وتكذب ، والمفروض تعلم الناس ما تكذب ولا تستغفل البقية وشلون ترضى تجيب وحدة الله بس يعلم شنو ماضيها.

بسيل : أسمار كافي تظلميني قبل خسرتيني هواي لا عبالج بس انتِ اللي خسرتي ، اني بسببج خسرت نفسي وجامعتي وهواي أمور اذا كعدنا عددنا اللي خسرتيه واللي اني خسرته صدكيني خسارتج لا شيء يم خسارتي اللي خسرتيه واحد كلب اجرب ناقص عديم غيرة الا اني خسرت هواي ما تتصورين شنو اللي خسرته وشلون عشت ومن شنو عانيت لهذا اكتفي باللي حجيتيه مصيبتي جبيرة وابد مو هينة وفراك أسمر بعده يدك بقلبنا ، لهذا ارحميني لا انتِ والزمن علية..

أسمار : والله عرفت هذا التمثيل اللي جنت منتظرة اشوف مشاهد منه ، وعفية عليج عندج قدرة كبيرة بالاقناع ، بس خلي ببالج اني أسمار لا أسمر اللي تعاطف وياج والله اعلم شلون وبيا طريقة ولا اني الشيخ اللي استر عليج احتمال غلطتي وية اخوية ولا اني زوج اللي مستغفليها ولمصلحة اخوه كذب عليها ، ويمكن راد يرد ولو شي بسيط من وكفاته ....

هذا كلامي موجه للكل ، لو اني لو هي بالمزرعة واذا كان الاختيار يقع علينا احنا الاثنين فراح يكون انسحابي هو الافضل للكل ، اني ما مجبورة اموت كل يوم بوجودها ، منا لحد ساعة عشرة تردولي الجواب لو اجي الكاها طالعة لو اني اروح احجز واسافر يم أهلي...

طلعت من البيت ، لحكوني أهاب وأرود وأزر وأحمد ، ورادوا يحجون وياية رفضت رفض قاطع ما تقبلت اي كلام منهم ...

رجعت للبيت سويت ريوك لأديم وللأولاد ، وصارت العشرة ومحد ردلي خبر بدون ما اوصل لهناك ، كعدت وية أديم وحاجيته ، حجينا كلش هواي واستفزيته بالكلام وهو هم ، اخر شي كال..

أديم : انتِ كاعدة بهذا بيتج وهي هناك لا راح تشوفيها ولا تشوفج واني ما اكدر اطردها منا وبعد انفرضت فرض علينا سواء عجبج ما عجبج حبيتي ما حبيتي رحتي بقيتي هي موجودة واللي يريحج وتطلبيه هسه يتنفذ.

أسمار : خلص روح طلع جواز لأبنك وسفري يكون بأقرب وقت..

أديم : هذا هو يجرالج.

عافني وطلع ، بعدها اجتي خالتي وأفنان وحجوا وياية حتى بس أسمعها جنت رافضة وكأنما شياطين الدنيا كلها عشعشت براسي...

ثاني يوم رحنا اني و أديم سوينا الجواز ، وجان ساكت بصمت رهيب لدرجة حسيته راح ينفجر بأي لحظة ، رجعنا ونطونا موعد للجواز ، قبل سفرنا الولد حجوا وياية والحجية ما قصرت كل شوية ومخابرتني لان صعب عليها تجي لبيتي مرات تجي ومرات تتصل ، وما اعرف شنو اللي صارلي كرهت المكان وكرهت الاشخاص اللي بيه لان كذبوا علية واستغفلوني واني ما استاهل هذا الشي ، يمكن لو صاير تمهيد للموضوع او حاجين بيه قبل لا يصدموني بهيج طريقة ممكن اتقبل او اسمع بس هسه ما اكدر اسمع لا الحقيقة ولا التبرير لان شي اتعس من شي..

اكو مثل يكول اجى يريد يكحلها عماها بالضبط هذا تفسيري للي صار..

بيوم اللي رحنا استلما الجواز مال أسمر ، طلبت منه ياخذني ونحجز بأقرب رحلة لأهلي ، طبعا اللي ماخذنا السايق مال الشركة مالتهم..

التفت أديم عليه وكال..

أديم: ابو اسعد بلا أمر عليك تكدر تاخذ راحتك تشرب جكارة ربع ساعة بس حتى احجي ويا ام اياس..

باوعله بالمراية وكال...

_اي عمي تتدلل

فتح باب السيارة ونزل

التفت علية اخذ ايدي بين ايديه جر حسرة جبيرة وكال...

أديم: اذا اني ماعندي خاطر يمج، لخاطر الاولاد لا تفرقيهم عني و اذا نزلت حجزت راح احجز حتى لتميم وخلي ببالج مستقبلهم الدراسي راح يتأخرون بيه وهواي راح نخسر..

حجيت بصوت بيه نبرة تعالي..

أسمار: والمطلوب مني شنو؟

أديم : تنسين السفر والفكرة كلها...

اسمار: مستحيل كلتلكم اللي عندي واذا تنفذ الشرط مالتي راح الغي فكرة السفر..

ظل يحجي ويتحايل علية حتى حجى بوضعه الصحي والجسدي والنفسي وراد بكل طريقة يقنعني ابقى آخر شي كال..

أديم: أسمار نطلع اني وياج ببيت مستقل عن المزرعة تماماً وبعيد عنهم حتى لو اعرف اخذلج بيت ببغداد بمنطقتكم القديمة اللي انتِ تحبيها ومتعلمة عليها شنو رأيج ؟ ..

ظليت اباوع على ايديه شلون محتضنة كفوفي وعلى نظرات عيونه الي تتوسل رغم ما تشوفني ، من بعد حيرة جبيرة حجيت بقساوة وياه لأول مرة...

أسمار: اذا كلتلك انت هم ما متقبلتك حالك حال بسيل والبقية شنو رأيك ؟ أديم اتركوني أرتاح فترة عسى ولعل أسامحكم على اللي صار ..

أديم: هذا آخر كلام عندج؟

أسمار: أي

أديم: سمرة كرهتيني ؟

أسمار: بمقدار حبي الك وبمقدار استغفالك الية وبكد كعداتنا وسوالفنا سوى وانت تضحك علية ...

أخذ نفس كلش قوي وزفره بطريقة غريبة طلع اصوات من حلكه ضرب رجله والتفت على الجامة وكال..

أديم: ياربي منك الصبر

بعدها فتح باب السيارة ونزل صاح على السايق وطلب منه يدخله للمكتب حتى يحجزلنا ، راحوا اثنينهم بعدها رجع السايق وكف يم السيارة شكيت هو دازه حتى يدير باله علينا، بعدها أجى حاجز تذاكر سفر النا كلنا..

رجعنا للمزرعة وأول ما وصلنا دخلت كبل لبيتي وبعد يومين موعد سفرنا، الي عرفته أديم مبلغهم احنا رايحين سفرة وبعدين نرجع سوية، و بيوم السفر اجوي كلهم سلموا علينا حتى الحجية وطلعنا بس ما حسب حساب هذه طلعتي ما منها رجعة..

طريق السفر كله ما احجي وياه تبهذلنا حيل لان بس اني وياه والاولاد صار عصبي لان رحت اسوي اجراءات السفر بالمطار وهو ظل كاعد يم الاولاد من رجعت يمه حسسني بكرهه للوضع وانزعاجه مني، صعدنا الطيارة وبقينا على نفس الوتيرة الي طلعنا بيها من البيت اذا جنا على كد الكلمة ورد غطاها هسه صامتين بشكل قاتل.

وصلنا هناك ، اهلي رحبوا بينا استقبلونا اجمل استقبال بعدها كالوا ارتاحوا بينما نسويلكم الغداء، رحت اريد انام وماما كل شوية تسأل ..

أناهيد : جيتكم اكيد علمود الونسة لو وراكم شي لان ملامحكم انتِ ورجلج مو مقنعة ابد يله احجيلي..

حجتها وكعدت ، فتحت الكنتور وبديت ارتب ملابسي التفتت عليها سألتها عن ترنيم جاوبتني بشي مختصر المهم هي زينة ومرتاحة ويا رجلها
كلتلها هو هذا الي نريده لعد شنو نريد ، اجتي تولان كعدت سولفت وياية شوية وراحت وراها نمت، كعدت على اصوات البنات يسولفون بالغرفة فتحت عيوني شفت ترنيم ضجت بالاكثر ، باوعتلي لمت شفتها لداخل حلكها وكالت.

ترنيم : اجيت اشوفج ، ماما خابرتني وكالت أسمار هنا ...

أسمار : شلونج ؟

ترنيم : هيج سلام بارد وية اختج وصارلج اشهر ما شايفتها ولا راضية تحجين وياها..

أسمار : تعرفين كلش زين ليش زعلانة عليج..

كامت وكعدت يمي تقربت باستني بخدي وحضنتني ، بادلتها الحضن ورجعت بستها..

أسمار : شلونج ؟ زينة ؟ مرتاحة وية الولد ، هو شلونه اهله ؟ حبابين..

هزت راسها بأي ودنكت.

أسمار : شنو شبيج ؟

رفعت عيونها باوعتلي وهمست ، بعيون مدمعة.

ترنيم : عوفج مني واحجيلي انتِ شلونج وليش جيتكم مفاجئة صاير شي ؟

أسمار : ما صاير بس بسيل اجتي للمزرعة..

شهكن اثنينهن وخلن ايديهن على حلكهن..

ترنيم : تتشاقين؟

أسمار : ياريت اتشاقى ياريت..

تولان : وشنو اجتي تشوفكم يعني ؟

ضحكت مستهزءة...

أسمار : تعيش ويانا

ترنيم : لا هاي شنو هذا الشقى احجي صدك الله عليج..

أسمار : احجي صدك ، قابل تذكرتها محبة بيها واجيب سيرتها ..

تولان : وشنو سبب جيتها..

أسمار : متزوجة واحد من الولد وحامل منه...

رجعن صفنن بوجهي ما مصدكات...

ترنيم : منو منهم ؟

أسمار : منو تتوقعين ؟

ترنيم : لا تكولين أرود عناد بية سواها؟

تولان : بس لا أهاب غير اموته اذا صدك ..

أسمار : لا هذا ولا هذا.

ترنيم : منو بس لا أديم مو هي متعلمة تركض ورا اللي تاخذيهم تحس بيهم حلاوة..

أسمار : لا وين تلكاه لأديم حتى تاخذه ..

تولان : منو منهم احجي عاد..

أسمار : أسمر..

ترنيم : لا تتشاقين.

تولان : مستحيل شلون مو جان يساعدج ؟

أسمار : اي للأسف هذا اللي جنت متصورته بالبداية..

تولان : اويلي يابة شلون غدرة ..

ترنيم : ولهذا السبب اجيتي ؟

أسمار : اي لان باقية هناك ما يقبلون تطلع..

ترنيم : اي مو حامل ، استغفر الله ربي واتوب اليه شلون قهر الله يعينج..

أسمار : ما اعرف شنو اسوي كارهتهم كلهم ، تخيلوا الكل يعرف بزواجهم وعلاقتهم قبل الزواج واني الوحيدة اللي مستغفليني ، باقية بموقع الغبي..

تولان : وأديم ؟ يدري ؟

أسمار : يدري وهذا اللي موتني وقضى على اخر شي بعلاقتنا..

ترنيم:حقج ابد مو سهلة ابقي هنا فترة ارتاحي ومن تستقر نفسيتج ارجعي..

اسمار:هذا اللي راح اسويه...

تولان:بس اديم حباب لا تعاديه...

لهناك انفتح الباب ودخلت ماما مثل الاعصار،حركت الاخضر واليابس

اناهيد: جيتج هنا سببها بسيل ؟وتكولين جاية اشوفكم ؟ليش تكذبين علية وتخليني اخر من يعلم ؟وينك عارف تعال ، تعال شوف واسمع اللي صار .

راحت للهول وهي تصيح طلعنا وراها واني ركضت بسرعة لان اديم كاعد بالهول ما ردت تتصادم وياه لان تريدلها حجة حتى تجرحه بيها..

وكف بابا وكال

عارف : هاي شكو شنو اللي صاير؟
شنو جاب بسيل على بالكم ؟

أشرت على اديم وكالت

أناهيد : اسأل هذا اللي يمك !!

ما حبيت طريقتها بالحجي وية اديم رغم ادري بيها تكرهه وما طايقته وتنتظر الزلة عليه حتى تنتقص من عنده وتفرغ اللي بداخلها ، وكف اديم وطلب من بابا يحجي وياه على انفراد
ماما رفضت وبهوستها شعللت الجو وحتى بابا توتر وصار عصبي وكام ما يعرف شنو يحجي وبعدها كال..

عارف : شنو اللي صاير لبنتي معقولة اللي سمعته ؟ خلي ببالك كل شي ممكن اسامح بيه الا اهانة اسمار ، هاي ما اقبل عليها وشوفها لأي مرحلة وصلتوها
بحيث عافت كل شي واجتي لهنا .

جاوبه اديم بصوت تعبان ..

أديم : عمي بسيل مو اي وحدة ،زوجة اخونا وامانته وكل احنا حلفنا وعاهدنا نفسنا نصون هاي الامانة لحين رجوع اسمر ومتأكد هالشي قريب،يا اما اذا رادت هي تغادر المزرعة بارادتها ، واتمنى منكم كلكم تسمعوها من البدايةوتفهمون اللي صار منها حتى لا تبقون تتهموها زور ،ما اعرف هواية تفاصيل بخصوص القضية بس شفت ادلة وسمعت بعدم خيانتها لاسمار بسيل مظلومة واللي جار على اسمار جار عليها ،اختيار اسمر الها جان صحيح وما عليه غبار ابدا ،ياريت نحكم عقلنا وما نأذي البنت اكثر ولا نهدم بيت واجه صعوبات لولا فضل الله وبراعة سمرة لكان البيت مهدود من زمان ،عمي اللي شفته مو قليل ولا اللي عاشته اسمار ،اتمنى تهدأوها بدل ما تزودون نارها ...

ماما هزت ايدها باوعتله وكالت ...

اناهيد:منو شعلل نار بداخلها غيرك ؟ منو دمرها غيرك؟ منو عدم شبابها غيرك ؟لو احجي مساوؤك اللي عانت منها بنتي ليوم الدين ما اخلص ..

بلع ريكه مقهور وكال

أديم :اسمار انا لهذه الدرجة جنت وياج سيئ ؟للحد اللي تشكيني لاهلج وبهيج بشاعة يوصفوني باوصاف قبيحة خلتني اكره حتى نفسي ،عالعموم اني حجيت الها صفاتي ووضعي من اول يوم تعرفت بيه عليها ولحد هذا يومنا ،وهي وافقت بأرادتها...

ماما قاطعت كلامه وكالت

أناهيد : بنتي غبرة وعلى اساس تحب تساعد ذوي الاحتياجات الخاصة وتالي عمت على نفسها وعلينا اكو اختيار خاطئ مو بس الشخص يدفع ثمنه حتى المحيطين بيه

بكسرة خاطر اديم صاح على تميم وكال

أديم : بابا تعال وياية اريدك ...

راح تميم لزمه من ايده وطلعوا للحديقة ،من صدمتي ما كدرت احجي ولا ارد ماما رغم كارهة الموقف كله وحاقدة عليها ،لان جرحته بهذا الشكل ،
طلعت برا لكيت اديم مكنبص ويحجي وياه وتميم يهز راسه ...
تقربت منهم حتى اسمع وتركت مساحة بسيطة حتى ما يحسون علية ...

تميم: بابا انت مو سيئ انت اجمل اب شفته بحياتي واحن واحد علينا ،سواء اني او ماما اسمار وباقي اخواني ،اني احبك هواي وجوابي على سؤالك اذا اريد ابقى او ارجع وياك ، ارجع ...

بصوت مخنوك اديم كال ليش ؟

تميم: لان ما ظل الك احد غيري

حجاها ولزم عيون ابوه ودنك باسهن .

تميم :انى رح اصير عيونك وادليك من راح تروح للفندق ،وبالمطار انت شنو تكولي انا اسويه ليش ننتظر عمو يجي يرجعنا..

المشهد كله دمرني تمنيت ميتة ولا اشوف هذا الشي هذا المشهد عشناه كلنا بسببي ،تقربت حتى احجي وية اديم بابا سحبني جان يسوي اش..

التفتت عليه وكلتله

أسمار : بابا خليني احجي وياه ..

سحبني ودخلني للبيت ،كعدني كباله هو يحجي واني نار بداخلي تغلي ،من ضمن الكلام كال..

عارف : صيري قوية قسي قلبج شوية لا تنسين اللي صارلج بسبب بنت خالتج واجوي هسة يبررون افعالها لان صارت زوجة ابنهم ،لا تضعفين ولا ترجعين الا هي تطلع من البيت ،لا تسمعيلها ولا تلعب بمشاعرج ، السنوات اللي عشناها اني وامج واخوانج واخواتج وانتِ بسببها مو قليلة ،عوفي عاطفتك وتحكمي بالعقل اديم احبه وإيساف كذلك لكن غلطتهم لا تغتفر اذا سامحتيهم على هاي رح تشوفين الاسوء والامر ، لأن وجودها وياج بالمزرعة اكبر غلط..

سحبت جنطتى واخذت ابني وتوجهت للفندق ،رجل اعمى وطفل وبلد غريبة كسرة نفس وخاطر وخذلان من اشخاص ما جنت بيوم اتصور راح اتعرض لهيج شي منهم،نطيت عنوان الفندق اللي كعدنا بيه اني وايساف بالمرة السابقة لابو التكسي وتوجهناله ، من وصلنا
نزلنا مستند على ابني دخلنا للفندق ،
دليت تميم على مستمسكات وعلمته يحسب الفلوس و العملة جانت بالدولار ،اخذنا غرفة وصعدنا فوك ،دخلنا مددت بملابسي من التعب نطيت الموبايل لتميم ،بعد ما سويته طيران ،دخلت بدوامة من التفكير وبديت اعيد حساباتي،وبديت اتسائل
معقولة اني سيئ لهذه الدرجة؟ وفعلا ظلمتها وياية حتى ملتني وكرهت الحياة اللي قدمتها الها والدليل طلعت اني وابني وهي تعرف بحالتي ووضعي بدون ما يرفلها جفن وتمنعني على الاقل بدون ما ترافقني ،بعدها استسلمت للنوم وكعدت بالليل وسألت تميم اذا جوعان او لا جاوبني ب اي .

اديم : عجل ليش يا بابا ما كعدتني ؟

تميم : ما كعدتك لأن شفتك تعبان وخفت بعد ما تكدر تنام اذا كعدت ..

كمت حضنته بقوة وبوسته همست بأذنه

أديم : ياحبيبي شوكت كبرت واني لحد اليوم الصبح اشوفك بعدك هذاك تميم الصغير ..

تميم : بابا حبيبي كبرت بس انت ما ملاحظ هذا الشي..

ربتت على كتفه ..

أديم : مو قصة ما منتبه بس احنا عندنا الابن مهما يكبر يبقى بعيوننا ذاك الطفل اللي هسه جاي للدنيا..

تميم : بابا شنو راح تسوي هسه ؟

أديم : نرجع لبيتنا ليش حبيبي تريد تبقى يم اخوانك ؟ عادي اذا تحب تظل ماعندي مانع ، اخليك فترة واسافر ارجعكم كلكم سوية ...

تميم : لا بابا ارجع وياك واسبوع الجاي نجي لهنا ونرجعهم كلهم ويانا..

أديم : الله كريم كون امك تقتنع وترجع وياية، عوفك من الحجي وكولي شنو تريد تاكل..

تميم : انت شنو تريد ؟

أديم : ما عليك بية كولي شنو تريد ؟

تميم : اذا ما تتعشى وياية اني هم ما اتعشى..

أديم : ممم شنو رأيك ندز على مشاوي ؟

تميم : ماشي هذا هو.

أديم : خليني اتصل على الرسبشن حتى يصعدولنا اكل..

مشيت اتلمس طريقي وصلت للتليفون الأرضي ، رفعت السماعة وحجيت وية تميم..

أديم : تعال حبيبي اطلب الرقم اللي راح ارده الك..

تميم : ماشي بابا..

رديتله الرقم وطلبنا الاكل ، صعدوه وتعشينا ، بديت اكل على واهسه بعدما وصفلي مكان الاكل وين ، وحط العصير كدامي وخلاني الزمه بإيدي ، اتذكرت أسمار وضحكت ، سألته..

أديم : حبيبي من وين تعلمت هيج تهتم بتفاصيل أكلي؟

تميم : اشوف ماما هيج تسوي وية كل وجبة لهذا حفظت طريقتها...

أديم : وشنو تعلمت منها ؟

تميم : توخر الشغلات اللي كدامك قبل لا تفوت ..

عكدت حاجبي مستغرب..

أديم : مثل شنو هذه الشغلات ؟

تميم : يعني مرات العاب اخوية الصغير اللي نلهيه بيها بينما ماما تشتغل ، لو العابي اني واياس من جنا صغار ، مرات كوشة القنفة توكع بالكاع تشيلها ، او اذا اكو نعالاتنا الطبلة متحركة ،هواي امور ماما تسويها وانت ما تدري بيها..

بقيت صافن فعلا هاي الامور ما منتبه عليها واني اكول صارلي فترة كلش طويلة ما مصطدم بشي ولا متأذي.

أديم : زين تميم سؤال.

تميم : نعم بابا..

أديم : تتذكر من زعلنا اني وماما وكلمن نام بغرفة وحد.

تميم : اي اتذكر شلون انسى اسوء فترة مرت بحياتنا.

أديم : ليش ؟ اسوء فترة ؟

تميم : لأن تعبت ماما وجانت بس تبجي وتراقبك بصمت بدون ما تحسسك بوجودها..

بلعت ريكي مقهور يعني الطفل كلشي يحس ويعرف معقولة لهذه الدرجة جنت مأذيهم واني ما حاسس على نفسي.

أديم : ردت اسألك ماما شنو جانت تسوي من اني موجود بالبيت واحنا زعلانين..

تميم : اذا جنت تصيح عليها وترفض تخليها تفوت يمك ، تدزني اراقب وضعيتك واذا محتاج شي او لا ومن جنت افوت يمك اخاف لان دائما تجاوبني بعصبية وتطلب مني اطلع من الغرفة..

أديم : ياحبيبي اني اعتذرلك لكل فعل سيء سويته اتجاهك وصدكني كل تصرف تصرفته ما جان مقصود ، اللي صارلنا كلنا بسبب حالتي النفسية السيئة واجباري على اخذ بعض العلاجات اللي تركتها بدون علمي واصلا جنت ماخذها بدون علمي ، سببتلي هواي اضطرابات نفسية وجنت اطلعها بيكم وبنفسي يعني كلنا متأذين.

تميم : صحيح والدليل انت هسه كلش تغيرت..

أديم : شلون يعني ممكن توضحلي.

تميم : موقف بيبي وجدو وماما ما خلاك تتعصب ولا تسمعهم كلام مو حلو ولا تنوي تترك ماما للأبد وكلتلي اسبوع ونجي اني وياك نرجعهم...

سكتت ماعرفت شنو اجاوبه ، بعدها طلبت منه ياكل ، اكلت شوية على واهسه ، من شافني بطلت اكل سألني

تميم : ليش بطلت تاكل بابا ؟

أديم : اكتفيت حبيبي..

تميم : قليل اللي اكلته..

أديم : لا حبيبي اكلت ،اكل انت بالعافية عليك ، خليني اتصل على عمك وارجع احجي وياك..

كمت اتصلت على إيساف وحجيت وياه سألني عن اللي صار جاوبته بشي مختصر ونطيت الحق لأسمار وأهلها ، مهما يكون حتى لو حجوا ما راح اخذ موقف من كلام صار بساعة عصبية واشوف حقهم ، اللي صار لأسمار مو قليل ...

سديت المكالمة منه ودك موبايلي ، مسوي خاصية من يدك الموبايل ينذكر اسم المتصل ، عرفتها أسمار..

أديم : الو ...

أسمار : انتوا وين اختفيتوا..

تحجي وتبجي منهارة ...

أديم : على كيفج مابينا شي ليش تبجين..

أسمار : ليش ابجي شنو ما خلينا مكان ما دورنا عليكم ، تركتكم بالحديقة ودخلت احجي وية بابا كلمتين على بعضها طلعت لا انت ولا تميم وحتى الجنطة مالتك ماخذها وين رحت ..

أديم : طلعت حتى ما يتضخم الموضوع ويكبر ونخسر بعضنا..

أسمار : انت تعرف اني ماخذة موقف منك بسبب شنو ، بس مو معناها تطنشني وتطلع تخلي بالي عليك ، انت تريد تعاقبني ادري بيك.

أديم : مو هيج ياعيني والله مو هيج.

أسمار : لا تحلف أديم انت دمرتني وحركت اعصابي ، اني منهارة وحتى اياس ضربته بسببك..

أديم : ليش ضربتيه ليش ؟

أسمار : بسببك فقدت اخر ذرة من اعصابي..

أديم : كل شوية ولوميني ياريت اموت وتخلصين مني ياريت..

أسمار : ابقى احجي حجي يكسر قلبي ويأذيني ، انت ما تحس بية ولا بيوم حبيتني ، أديم بديت اكرهك بسبب تصرفاتك وكلامك..

أديم : بس مع هذا اني احبج وما فد يوم افكر اكرهج ، الكره شي جبير يا سمرة وثكيل على النفس ، مستحيل انتِ تتحمليه...

أسمار : اني راح اعيش بمكان اني واولادي فقط لا اريدك ولا اريد اهلي ودير بالك تتصل علية مرة ثانية..

أديم : للعلم انتِ المتصلة مو اني ياحبيبتي ..

أسمار : لا تحجي وياية بهيج طريقة تستهزء بية مو ؟

أديم : مو هيج انتِ ليش ما كاعد تفهميني وين سمرتي العاقلة ليش فالتة اعصابج ليش..

أسمار : لان اتفقتوا على اذيتي ، وكلهم مو مهمين عندي ، انت اللي تعرف حجم جرحي ومعاناتي والوحيد اللي فتحتله قلبي وحجيتله بشنو حسيت وشلون تدمرت وية الكل جنت اكابر وابينلهم قوتي بس كدامك ضعفت وحجيت لدرجة بجيت وانهاريت ونمت بحضنك وطبطبت علية ، يعني تعرف اللي صارلي وتالي تضربني من نفس موقع الألم اللي شهدت عليه حتى لو جنت متأخر..

أديم : صرت بين نارين ، نارج ونار أسمر ، صيري بمكاني شنو تسوين ؟

أسمار : ما اعرف وما اريد اسمع..

أديم : من اوصل وياج نقطة تدك على الوتر وتحسين احنا صح او بينا نقطة صحيحة بتصرفنا تكومين تحجين ما اعرف وما اريد اسمع ، على العموم بعد باجر اني راجع وفكري زين وخلي مصلحة الأولاد قبلنا ورجعيلي خبر اذا احجزلكم ويانا لو نرجع وحدنا..

أسمار : تميم يرجع وياك؟

أديم : اي.

أسمار : تمام بالسلامة الك واله..

أديم : الله يسلمج معناها واضح جوابج ما يحتاج انتظر واتأمل ، ديري بالج على نفسج و الأولاد .

سديته منها وانتظرت تتصل ما اتصلت ولا بيت عمي اتصلوا ، اجى إيساف وطلب نروحلهم رفضت لأن اعرف بعدهم مصدومين انتظرت يهدأون يلا نرجع نحجي وياهم من جديد، حجزنا ورجعنا وهاي اني وأبني رجعنا وحيدين ومكسورين الخاطر، احنا بدون أسمار ما نسوى شي ايتام صدكيني..

بسيل : كل اللي صار بسببي ، بس لو سامعتني شوية جان فهمتها ، ابو تميم كلتلك خليني أروح ليش اصريت ابقى وهذه النتيجة..

أديم : بسيل بيوم اللي انخطفت وزوجتي جانت حامل ، أسمر اهتم بيها لدرجة شكيت بينهم شي وكمت اغار عليها وافتعل مشاكل ، بعدين من سولفلي كال سويت هيج حتى احفزك تهتم بزوجتك وترجع علاقتكم ، ردت اثير غيرتك عليها ، جان يودي ويجيب للدكتورة ، اي شي يصير بالبيت هو يهتم بيه ، شايل عني كومة مسؤوليات تعرفين شلون جنت مدلل بوجوده ، صح هسه اخواني وياية وياية بس ما يعوضون مكانه ابد ، وتريدين اتخلى عن زوجته وابنه واخليهم مشردين..

بسيل : ارجع يم اخوية مو مشكلة..

أديم : لو امج بعدها هنا ما مسافرة وتكدر ترجع من باجر ارجعج يمها بس هسه وين تروحين منو منهم يعاملج بما يرضي الله حتى اخليج يمهم ، ما اكدر..

بسيل : وفرطت بزوجتك واولادك وراحتك ؟

أديم : أسمار ذكية وراح تحسبها صح متأكد راح تفكر زين وتتقبل الموضوع بعدها اروح واجيبها..

بسيل : الله كريم اشكرك هواي ابو تميم وكفاتك وياية ما تنسي.

أديم : ما سويت شي اتمنى ارد جزء صغير من اللي سواه أسمر الية ولعائلتي..

بسيل : تعبانة بدونه ، ما اعرف شلون مشت الأيام وعدت الشهور وهو غايب ، أديم احس اكو نار تاكل بقلبي كل يوم ، تصدك لو كلتلك ما نايمة من يوم اللي انخطف بيه لهذا يومنا غير ساعات قليلة مجبرة عليها..

أديم : لا تفكرين اكو مدبر يدبر امورنا كلها وراح تنحل ونحتفل سوية ان شاءالله بلم شملكم ..

بسيل : وان شاءالله يلتم شملك بعائلتك والله يخليك الهم ويخليهم الك..

أديم : امين يارب العالمين..

بسيل : تدري شكد مشتاقة احجي وية أسمار ونكعد مثل كعدات قبل..

أديم : احجيلي شنو اللي صار من البداية ..

بسيل : اخ من هذاك اليوم من وين ابدأ..

يتبع...

متابعة ممتعة

البارت جدا طويل مو تكتبون قصير..