رواية أحببتُ ذلك الغريب الفصل الثامن وخمسون 58 - بقلم عبير إدريس

flash bak

فلاش باك
المزرعة الساعة الثالثة ظهراً.....

جنا كاعدين على الغداء ملتمين والكل ساكت بعدما كملنا ورفعنا السفرة صبينا الجاي وأرود كال...

أرود : بيت أديم وإيساف وينهم ؟

باوعنا واحد على الثاني شنو نكوله ، بلعت ريكي وهمست لميمونة..

أفنان : ماما حبيبتي اخذي مي لبيبي وانطيها علاجها وابقي يمها بالغرفة ..

ميمونة : صار ماما..

أهاب : شوكت ناوية ترجعيها للمدرسة مو خطية صارت مرة وبعدها ابتدائي..

أفنان : ليش هي بيدي شوفها ماتقبل ترجع..

أهاب : مو بكيفها هاي السنة ترجعيها ..

أفنان : تستحي اللي بعمرها السنة اعدادي..

أهاب : حتى لو رجعيها تتحمل حجي ويصير براسها خير احسن من ما تبقى طول العمر فاشلة وماعندها مستقبل ..

أفنان : حاجيها انت بلكت تسمع منك..

أهاب : ماشي أحجي وياها..

أرود : ما تشوفون نفسكم شلون تغيرون موضوع كلما اسأل على أديم وإيساف؟

أسمر : شتريد منهم مو كلنالك مسافرين للشمال ونسة ويرجعون..

أرود : إيساف يروح للشمال ؟

أسمر : اي ليش لا وحد..

أرود : كول الحجي لواحد غيري ممكن يقتنع بيه..

أسمر : شبيك أرود ؟

أرود : وينهم ؟

أسمر : انت شنو ببالك ؟

أرود : تعرفه كلش زين.

أسمر : اي وشنو ؟

أرود : رايحين لبيت عارف ..

أسمر : اي وبعد

أرود : يحضرون عرس ترنيم !!

أسمر : واذا تفكيرك صحيح شنو راح تسوي ؟

أرود : الله لا يشوفك اللي راح اسويه.

حجاها عاكد حاجبه..

أسمر : أرود اللي الك الك واللي مو الك ما يصيرلك مو هيج والدي الله يرحمه علمنا.

أرود : صح آمنت بالله ، بس شلون اتحمل فهمني..

أسمر : تتحمل وتتجاوز واحنا وياك...

أرود : هسه همه مسافرين علمود هذا الموضوع مو ؟

حجاها بصوت يرجف ، باوعله أسمر بأسى وهز راسه بأي..

طلع من الصالون للحديقة ، تبعه أسمر وجنت اراقبهم بخوف ، خفت من ردة فعله انقهرت على كسرة النفس اللي راح يعيشها ، الفراق صعب حيل صعب خصوصاً اذا جان اجباري ، مثل سحب الروح من الجسد بس بطريقة بشعة مستحيل البشر يتحملها ، أحجي شعوري عن نفسي واكيد هو هيج شعوره هسه ...

جانوا كاعدين ولهناك اسمعه يصيح اتقربت يحجي بالموبايل عصبي وبعدها بدأ يتوسل..

أرود : أديم حبيبي امنع هالشي لخاطري، انت جربت الحب قبلي تتذكر شكد عانيت ، الله عليك ساعدني حتى لو تسويلك مشكلة وياهم ، شكد ما بيك أخرها..

ما اعرف شنو حجى وياه أديم ، بعدها سده والتفت على أسمر حاير ، همس بتعب...

أرود : إحجي وية أسمار شنو رأيك يمكن تكدر تأثر عليها!!!

حجاها وفتح ازرار قميصه ، تنفس بضيق منتظر جواب أسمر..

أسمر : ما اعرف بس ممكن تنطيك ترنيم وانت تحاجيها أفضل شنو رأيك ؟

أرود : معقولة راح تقبل !!

أسمر : انت شنو متوقع ؟

أرود : ما اعرف..

أسمر : خابرها واني فايت اصلي العصر وبعدها عندي مشوار كلش مهم ونحجي بعدين بالتفاصيل ..

أرود : شوكت ترجع ؟

أسمر : بالليل ..

أرود : تتأخر بعد ال ١٢ ؟

أسمر : لا لا قبلها ان شاءالله..

أرود : يلا بالسلامة وتقبل الله..

ضرب على كتفه وكال..

أسمر: الله يسلمك وتقبل الله اعمالك ، عود وافيني بالجديد شنو يصير وياك..

أرود : تمام ...

دخل أسمر للبيت وأرود اخذ موبايلاته وطلع من المزرعة صعد سيارته وماعرفت شنو صار وياه ، رجعت دخلت للبيت رحت لأمي غيرت ملابسها وشفت شنو محتاجة سويته الها بعدها كعدت يمها وبالي كله يم أرود مقهورة عليه ، اصعب شي بالدنيا من تفارق غصب ، من ياخذون منك شي انت حابه ورايده ما حابب يروح منك ، وهذا اللي صار بية من فرقوني عن بلال واني جنت روحي بيه...

انفتح الباب دخل أسمر باس راس الحجية وحجى وياها بعدين دنك باسني بخدي وطلع ، رجع مد راسه واشرلي اروحله رحت ، وكفت كباله باوعلي وكال..

أسمر : حبيبة اخوها الغالية الحنينة ، اني رايح بشغلة اليوم واذا الله عداها الحمدلله والشكر، ماعدت اريدج تاخذين بالج من نفسج ومن امج ومن ميمونة واي شي تحتاجيه هاي مفاتيح غرفتي سويتلج نسخة منها ومن القاصة بيها فلوس شكد ما تحتاجين الج لبنتج ولأمي الحجية تاخذين ماشي ابد لا تترددين ، وهاج هذا مبلغ بسيط خليه جوة ايدج..

باوعت للفلوس شدة ، رفعت عيوني باوعتله بقلق عكدت حاجبي وهمست..

أفنان : هاي قليلة ؟

أسمر : ليش ياعيني ؟

أفنان : فهمني وين رايح وليش كاعد توصيني ؟

أسمر : عندي شغل وادعيلي ان شاءالله يفض على خير وارجع..

أفنان : وين ؟

أسمر : شغل ياحبيبتي.

أفنان : تمام فلوسك ما اخذهن حتى لو كلتلي لأن اكو غصة بقلبي من كلامك اللي هسه حجيته خوفتني هواي ..

أسمر : ما اكدر اكولج ياعيني وبعدين تاخذين الفلوس يعني تاخذيهن.

أفنان : ادري انت من وينلك هالكد تنطيني، جمع فلوسك وراك زواج ومسؤولية ينرادلك هواي حتى تفتح بيت..

أسمر : اني رايح حتى ارجع من وقت وعيونج راح ارجع لا تباوعيلي هيج..

أفنان : بالسلامة حبيبي.

اخذت منه الفلوس وحضني ، باس راسي وخدي واخذ الجنطة خلاها على كتفه وطلع ، بقيت ادعيله وحتى الحجية وصيتها تدعيله وياية ، وراها التهيت بالبيت لا أرود رجع ولا أسمر ، فات أهاب جان جوعان سويتله أكل وسألته عنهم كال أرود طالع وأسمر عنده شغلة واني جنت وياه وهسه رجعت ، وأسمر جاي وراية..

من كال هيج تطمنت ، انتظرته اجى صبيتلهم عشاء واتصلوا على أرود كاللهم راجع بالطريق انتوا تعشوا اني شبعان ، كعدت يمهم وهمه يحجون ألغاز بينهم ما افتهمت منها ولا حرف ، رجع أرود كعد يمهم شوية واني نعست ورحت نمت بقوا همه كاعدين ....

وهذا أهاب اسأله عن الباقي شنو التفاصيل لأن اكيد هو اعرف مني باللي صار...

التفت إيساف عليه وسأله بملامح اختلط بيها الخوف والحقد والرهبة من المصير المجهول ، ما انسى ابد بوقت ما سمعنا الخبر من جنا مسافرين شلون الشيخ وكع على وجهه وكام بدون ما ينتظر احد يعينه ، ولا انسى وكفة أديم وهو محني الظهر ودمعته بعيونه رافضة تنزل يمكن كبرياء ويمكن من الخوف على اخوه ، رحت وكفت كباله ردت أهوّن عليه ماكدرت بس رفع راسه بأتجاهي وكال..

أديم : كسر ظهري أسمر ، هدي حيلي ..

وبعد ما حجى شي ، اجى إيساف وطلب من بابا يرجعنا للبيت وهمه يروحون يحجزون تذكرة حتى نرجع ، رجعنا للفندق اني وخالة وبابا جمعنا ملابسنا بسرعة وطلعنا متوجهين للبيت ، اول ما دخلنا ماما جانت ضايجة وماخذة من خاطرها لان طلعنا وتركناها بهيج يوم ، كعدنا وظلت تسمع بالحجي وتعاتب اني بقيت ساكتة وخالة شاردة الذهن ، بالها مو وية ماما ابد ، بعدها بابا اخذها وطلعوا من الهول يمكن راد يحجيلها اللي صار ، بالليل رجعوا الولد ما قبلوا يدخلون جوة كالوا مخنوكين ، طلعنا يمهم كعدنا ، إيساف بس يفتر ما كعد لحظة وحدة وأديم واكف بمكانه وحسبة تجيبه وحسبة توديه ، بعدها سألهم بابا اذا حصلوا تذاكر او لا ، جاوبه الشيخ بأي وبعد باجر سفرتنا ، صمت خوف ترقب لحظات الانتظار حيل صعبة أكل ماكو توتر، اعصاب فالتة هذا اللي عشناه بهاي اليومين على ما رجعنا للعراق ، حصيلة السفرة هاي رجوع اياس وفرحة تميم بلمتهم، صعدنا الطيارة وكعدوا واحد بصف الثاني بالمقاعد اللي امامنا ، جانوا يسولفون مندمجين ، أديم قرب راسه مني وكال..

أديم : سكتيهم اعصابي فلتت بعدما اتحمل هوستهم...

أسمار : صار ..

تقربت منهم وهمست بأذنهم ..

أسمار : حبايب نصوا صوتكم بابا تعبان..

هزوا راسهم بالايجاب وسكتوا، الطريق كله اراقب بأديم ، ملامحه عصبية وتعبان بشكل ، وإيساف وضعه ما ينوصف ..

وصلنا المطار نزلنا ورحنا ننتظر الجنط ، أديم صار عصبي كام يصيح كل شوية يتعثر بشي رغم اني جنت لازمه إيده التفت إيساف عليه وكال..

إيساف : شنو سالفتك كل شوية مصيح ؟

سكت أديم ما جاوبه ، كعدنا ننتظر وهمه راحوا كملوا الاجراءات وطلعنا راجعين للبيت اول ما وصلنا للمزرعة دخلوا على الحجية سلموا عليها خالة والشيخ وأديم راح حضنها بجت بحضنه وندبت حظ أسمر ، باس راسها وكال..

أديم : الليلة يبات بحضنج ان شاءالله..

عمرة : اخذوه غدر عمت عيني عليه

أديم : خير ان شاءالله..

بعدها كام وحضن أفنان هم بجت وفرغت اللي بداخلها ، واني وية كل كلمة يحجوها تنزل دموعي وما اسيطر عليها ، التفت أديم وكال..

أديم : راح اغير ملابسي الحكيني اذا تكدرين..

أسمار : تمام هسه اجيت..

طلع واني وصيت الأولاد يديرون بالهم وما يسوون وكاحة لأن كل اللي بالبيت متوترين ، توني ردت اطلع من الغرفة اجى إيساف لابس تيشيرت وبنطرون ابو الجعب تارس الجيوب اسلحة وشواجير ، استغربت هذا وين رايح شافته الحجية فتحت اديها وراحلها حضنته بقوة وكالت..

عمرة : أريد ابو سمرة من الله ومنكم ما ترجعون إلا وهو وياكم.

إيساف : ما يغمضلي جفن ولا يرتاحلي بال اذا ما يبات بوسطنا اليوم..

عمرة : عينك على اخوانك البقية اريدكم تطلعون ١١ ترجعون ١٢ فدوة رحتلك.

إيساف : اسم الله عليج عمرج طويل حجية، اذا صار شي علينا والله لا يكولها سارة زوجته توصلها حقوقها كاملة ، وطليقته ام محمد ترجع لهنا وتعيش وياكم بالبيت اني جنت ناوي اسوي هذا الشي بس ما لحكت..

عمرة : ماسوي اي شي من اللي حجيته انت ترجع وتسوي كلشي اني ما اتحمل يصيرلكم شي..

دنك باس راسها بعدها طلع واني واكفة صافنة باللي كاعد يصير من وين طلعت هاي الاسلحة ، مرخصة لا ، شنو هاي الاشياء الغريبة اللي كاعد اشوفها ، لو ردة فعل الحجية اللي جانت اقل من العادية من شافت تارس جسمه السلاح.

طلعت من الغرفة حتى أروح لأديم اللي نسيت شنو طلب مني بسبب المشهد اللي صار واشوف خالة بحضن إيساف تبجي وهو يسكت بيها ، اخذت بعضي وطلعت مشيت بأتجاه بيتي وجان اشوف أديم يمشي من بعيد لابس اسود بأسود ، عكدت حاجبي مستغربة الترهيم، التيشيرتات والبناطير اني اساعده بيهن ما حاطه بيهن اشارة ، بعدني اتسائل وجان تطلع ميمونة من البيت عرفتها هي مساعدته وصل يمي ، صحت أديم ما جاوبني باله مو هنا حسيته بعالم ثاني حتى ما عاتبني على تأخيري ، وصل يم البيت الكبير وصاح بعلو صوته..

أديم : شيخ يلا استعجل..

طلع باوعلي وكال..

إيساف : عيونج على الولد الصغار ما يحتاج اوصيج ..

هزيت راسي ساكتة ، صعدوا سيارتهم ، تقرب الحارس الجديد فتح باب المزرعة وطلعوا منها ، وكفت خالة كبالي باهتة وتأشر بإتجاه الباب وتهمس بصوت مبحوح..

أسن : شفتي اللي شفته ؟

أسمار : شنو ؟

أسن : يعني ما شفتي الاسلحة اللي ترسوا بيها نفسهم وطلعوا..

أسمار : اي شفت بس غير علمود اخوهم حتى يجيبوه.

أسن : وعادي عندج رجلج يروح .

أسمار : لعد شسوي غير اخوه وهذا مو اي اخ ، ابو سمرة وما ادراك ما ابو سمرة والنعم منه ومن وكفاته ، انتِ يمكن سمعتي باللي سواه اللي ولأخوه بس ما شفتي بعيونج ، أسمر جان الشمعة اللي احتركت علمود يضوي مزرعتنا ، أسمر جان عامود هذا البيت والسند لكل أخوانه وصديق الية وعم لأبني والنعم منه شنو احجيلج عنه قليل..

أسن : وياج اني ويستاهل بس هذا شغل الشرطة مو شغلهم همه وين وشغل العصابات وين الله يخليج..

أسمار : اخوهم وقلبهم محروك عليه الله يساعدهم ويساعدنا شفتي من دخلنا المزرعة فارغة من الولد بس الحجية وأفنان وبنتها والحارس ، معناها داخلين بأنذار..

تربعت بالكاع واني كعدت كبالها، ضربت على رجليها وكالت..

أسن : ما اتحمل يصير شي لإيساف اموت ما اكدر اصبر..

أسمار : اسم الله ليش تتفاولين هيج ؟

أسن : قابل كذب هذا الواقع هسه انتِ تتحملين يصير لأديم شي ؟

أسمار : لا طبعاً اسم الله عليه عمره طويل ان شاءالله.

ظلت تحجي وتندب حظها اخر شي كمت ورحت للولد حضرتلهم عشا وخليتها تجي وياية حتى تلتهي ، من كملوا جبرتهم ينامون ، تأخر الوقت واحنا ننتظر جيتهم نتصل موبايلاتهم مغلقة تخبلنا بالزايد ...

طلعنا كلنا بالباب ويانا الحجية طلعناها بالكرسي المتحرك ، كعدت يم الباب ارتاجيت على الحايط واباوع للبساتين اللي كدامي ماكو بيوت ولا بناية وحدة بس احنا بوسط هيمة، يعني اذا احد هجم علينا نروح بيها ومحد يسمعلنا صوت ، احسن قرار اخذه أديم يبيع المزرعة ويبني بيوت بالبستان اللي قريب على الشارع العام ، ندعي وننتظر ومرت الساعات مثل السم علينا ، ساعة ساعة واني احسب وخالتي تحسب آخر شي التفتت علية وكالت..

أسن : لو ادري باقية حاضنته ليش وخرته مني ودفعته ، بقيت ألوم بيه ..

أسمار : لعد اني شنو اكول راح بدون ما احجي وياه كلمة ولا حضنته ولا شميت ريحته..

أسن : ليش متعاركين ؟

أسمار : لا بس وضعيته والعصبية اللي جان بيها خفت اتقرب منه تركته براحته يتصرف .

نحجي ونصبر بعضنا ، اجتي أفنان كعدت كبالنا والقلق والخوف نقراه بعيون بعضنا..

بدت خيوط الفجر تنرسم بالسماء ، والجو بدا يكشف شوية شوية ، زقزقة العصافير وصوت بركة المي يتحرك بفعل الهواء ، اصوات الديج من بعيد ، وشوية صوت سيارات بعيدة على الخط السريع شوية شوية بدت تتقرب اصواتها ، وجان نشوف سرب من السيارات لونهم أسود ، تقرب الحارس وكال .

_ ست اجوي الزلم وبلغوني تحظرون أسرّة اثنين بالصالون..

أفنان لطمت صدرها وكالت.

أفنان : منو بيهم مضروب ؟

صفن بوجها بعدين كال ما ادري ، دخلت كدامه وهو راح وراها وخالتي هم ، الحجية سحبتني من ايدي وكالت..

عمرة : ابقي يمي انتِ حامل لا تشيلين ثكل ..

هزيت راسي ساكتة ورجعت اباوع على السيارات اللي صفت بسرة واحد ، وحدة وحدة وكفن ، آخر سيارة طبكت ، انفتحن الابواب نزلوا الولد منها ، بالضبط الصورة اللي كدامي تشبه مشهد من فيلم سينمائي اكشن وعصابات..

نزلوا والتموا على سيارتين وحدة نزلوا منها إيساف ملفوفة ايده من فوك ليجوة ، سندوه أعقل وأبسم ، والسيارة الثانية نزلوا منها أهاب رجليه مجبسة وسندوه أحمد وأرود..

عيوني على أديم ادوره من بينهم ، لمحته يمشي تعبان وخلكه ضيق بشكل بالكوة يجاوبهم ، وصل يمنا الحجية حجت وياه بعدها همست..

أسمار : الحمد لله على سلامتك ابو تميم.

التفت علية اخذني لحضنه بعدما دخلوا الولد وبقينا بس احنا ، باس راسي وكال بأسى..

أديم : ما لكيناه سمرة ما لكيناه..

بقيت اباوع بوجهه وما اكدر احجي شي ، الغصة تارسة رأتي ، اخذت الحجية دفعتها وهو ساعدني دخلناها جوة ، اول ما دخلنا التفت علية وكال..

أديم : اريد ملابس اسبح على السريع واصلي لان ريحتي كلها دم..

أسمار : تمام فوت اسبح وهسه رايحة اجيبلك ، تريد مال بيت لو تطلع بيهن ؟

أديم : لا يابيت جيبي ملابس بعد شوية ونطلع..

أسمار : وين ؟

أديم : شنو وين أسمار ؟

أسمار : اسفة بس خفت عليك هواي.

أديم : الله موجود لا تخافين.

أسمار : بالسلامة..

أديم : الله يسلمج..

رحت للبيت دخلت لغرفة الاولاد قللت درجة السبلت وغطيتهم زين ، جبت ملابس ومنشفة، اخذت علاجي وطلعت راجعة لهذاك البيت ، من وصلت كعدت شوية يمهم وجوههم من العصبية حسيتها تختلف ملامح قاسية والعيون حزينة بشكل ، وكل شوية واحد بيهم يجر حسرة واه..

إسلام : ما تصورته هيج نذل..

أرود : شفت شلون ؟

أبسل : طلع الاخ عنده عصابة وتهريب مخدرات ، ادري شلون هيج كاعد بوسطكم ياكل ويشرب ويتعامل وية هيج شكولات ومحد حس بيه..

إيساف : ليش مو هو اللي غير علاج أديم بالبداية ودخل مستشفى الجرعة جانت كبيرة وبعدين وخلاه يدمن ومن تعالج بفضل الله ومن بعده أسمر وأسمار تكاتفوا غيروا علاجه وودوه فحص مختبر وبعدين طلعت النتائج اخوكم يتعاطى مخدرات لا كدرنا نبلغ ولا نحجي اي شي لان ما نعرف أديم هو مدمن فعلاً لو مغيريله العلاج ، تصور حتى بأديم خلاني اشك..

إسلام : ماكو هيج قابلية.

إيساف : ولوما هذه بنت الناس تحملته ودارته لحدما صار زين جان هسه اخوك منتهي ميت..

كلهم كالوا الله يبارك بيها ، اصيلة أسمار ..

استغربت من حجالهم اللي ادري بيه هذه الشغلة بس اني وأسمر ندري بيها مال العلاج من بدلناه قبل سالفة علاج الهلوسة بس طلع ابو سمرة اول بأول يحجي للشيخ ،وفرحت لهذا الشي على الاقل اكو واحد ثاني غير أسمر مطلع على الامور ...

صاح أديم على ملابسه رحت دكيت الباب اخذهن مني وانتظرته يلبس ويطلع ، من طلع اخذته من ايده وهو ينشف بشعره توسلت بيه حتى ياكل

أسمار : بس شوية اصبلك لخاطري.

أديم : نفسي مسدودة..

أسمار: من البارحة انت ما ماكل شي تصير عندك مضاعفات وتتعب فدوة.

أديم : اروحلج فدوة لا تلحين علية ما اريد.

أسمار : زين بس عصير، أفنان سوت للولد وكلهم شربوا عادي انت هم اشرب ..

حجيتها وميلت راسي متوسلته بعيوني..

أديم : لخاطرج راح اشربه يلا جيبيه.

حضنته ربت على شعري سمعت واحد يتحمحم بعدني بهدوء، أبسم تقرب وكال.

أبسم: اسف بس مضطر استخدم الحمام..

أديم : اي اي تفضل ابو طه تفضل ..

حجاها اخذ ايدي و سحبني للمطبخ ، وصاني على نفسي وعلى الولد ، صبيتله العصير شربه ورجع للصالون كعد يمهم ، رحت كعدت استمع الهم ، صاحوا على أفنان وطلب منها إيساف تحجيله كلشي صار وية أسمر باليوم اللي انخطف بيه واليوم اللي قبله..

حجتلهم الحجي اللي سمعناه كلنا بعدها وجه نفس السؤال لأهاب ، وبدا يحجي..

أهاب : قبلها بيوم سهرنا نحجي وية الضابط على تفاصيل الوكر مالتهم بعدما حددنا المكان وكتبنا كل تفصيلة خاصة بيهم قدمنا التقرير للشرطة وبعدها رجعنا للبيت ونمنا ، ثاني يوم طلعنا اني وأسمر والضابط صديقنا ورحنا للمركز طلعوا ويانا قوة بأمر من المحكمة بعدما عرضوا اوراق القضية على القاضي ، بالمداهمة ما سمحولنا نقترب ، جنا بالسيارة واكفين بُعد امتار عن الوكر مالتهم ، لزموهم وبعد فترة من الوقت الضابط اتصل علينا وكال لزمنا ابن عمكم بس اخوكم جايته اخبارية وطالع قبل جيتنا بدقائق واكو كم واحد وياه مهزومين البقية ما ملحكين على اساس يطلعون البضاعة ويلحكوهم بس الوقت ما مكفيهم...

رجعنا للبيت اخذنا كم شغلة ملابس على اشياء خاصة حتى خاف نطول ببغداد وصينا الولد على الحجية وأفنان وبعدها طلعنا ..

إيساف : شنو سبب روحتكم لبغداد بهذا اليوم بالتحديد ؟

أهاب : الضابط طلب نروح لبغداد ما اعرف شنو السبب

أديم : ما شكيتوا ممكن يكون الضابط اله ايد بسالفة الخطف ؟

أهاب : طبعاً لا..

أديم : وليش لا كلشي توقع..

إيساف : ما استبعد هالشي

أهاب : يابه صديقنا من زمان ما معقولة يغدر بينا ..

أديم : فكر بيها شوية شنو سبب اصراره تروحون لبغداد بهيج وقت وبهذا اليوم بالتحديد.

إيساف : تندلون بيته ؟

أهاب : اي ..

إيساف : يلا ياولد خلونا نروح..

أعقل : وين انت رايح وبعدها اصابتك حارة.

إيساف : مو مشكلة ما اكدر اصبر هنا نار تاكل بية.

أهاب : اني هم جاي وياكم.

أديم : وين انت رايح يحيرون بيك يكفي اني متكل على واحد بيهم هالمرة انت..

أهاب : امشي على عكاز مو مشكلة..

إيساف : انت واحمد ابقوا بالبيت وخلونا نروح لبيت الضابط ونشوف شنو يصير ويانا..

أرود : يعني اذا رحتوا وسألتوه راح يكول اني اللي مشترك بعملية الخطف والله سوالفكم تضحك.

إيساف : شنو المضحك بالموضوع ؟ برأيك نسكت أحسن.

أرود : لا نسكت ولا نبين الهم احنا شكينا بشي نراقب ونشتغل على البارد واكيد اذا هو متواطىء وياهم راح يزل بشغلة ومنها نوصل من خيط لخيط ونلكى أسمر..

إيساف : ومن وين اجيب الصبر وانتظر واراقب اني اذا اليوم ما رجعته للبيت اعتبروني ميت.

إسلام : كول يا الله وان شاءالله كلكم سالمين ..

أبسل : هسه وين نروح اكو مكان محدد برأيكم ؟

إيساف : مقر الاجتماع مالتهم رحناله بقن بيوتهم بيت بيت نروحله..

إسلام : وهم يصير اشتباك وقسم جرحى وقسم ينهزمون ما اعتقد اختيار موفق..

إيساف : عجل شنو اسوي انطوني حل..

أبسم : ننتظر ونتأنى لابد نشوف حل ثاني يدلنا على مكان أسمر ..

وطلعوا واستمر البحث ومرت الايام ونفس الشي ما بقوا مكان ما راحوله ما خلوا شيخ عشيرة ما نشدوه ، ما بقوا جهة حكومية ما لجئوا الها ، وماكو لا خبر ولا اي شي يوصلنا لأسمر..

تعبنا نفسيتنا تدمرت ، والايام تشبه بعضها كلها ترقب وخوف وكآبة ، المزرعة انهجرت من اهلها ، كلهم برا يدورون ، انهمل الشغل والبيت ، وما شفنا الراحة ابد..

مرت الاشهر سريعة وبيوم جنت كاعدة بالمطبخ اسوي اكل للولد لان اقترب موعد جيتهم من المدرسة ، وجان يصير عندي ألم كلش قوي بأسفل البطن ، لزمتها ومشيت على كيفي حتى اكعد وارتاح وصلت لباب المطبخ ونزل مي علية ، من الخوف كمت اعيط ، على صوتي اجتي خالة وياها أفنان ، شافوني التفتت أفنان على خالة وكالت..

أفنان : هذا مي الطفل ، عندها ولادة .

أسن : وين أديم بعده طالع لو بالبيت..

بألم حجيت..

أسمار : ماكو طالع، خابروه خلي يجي..

خابرته خالة ، وبعدها سندوني حتى اوصل للقنفة مددت عليها والألم يعصر بية عصر ، غيروا ملابسي وحضروا جنطة الطفل ، لبسوني الحجاب وخابروا الولد كالوا وصلنا يلا تحضروا منو يجي وياها ، خالة كالت اني اروح وأفنان تبقى يم الاولاد ، وصلوا الولد أديم وأهاب واخذوني للمستشفى ، اي تفصيل بالطريق ما اتذكره من الألم سواء ردة فعل أديم لو شنو حجى وياية ، لو شنو شعوره ، اول ما وصلت للمستشفى دخلوني لصالة الولادة ، ولدت خلال ساعة ، وبعدها من التعب نمت ما ادري بالدنيا شكو ، كعدت لكيت طفل بصفي بفراشه نايم مثل الملاك ، ملامح ابوه ويشبه تدويرة وجهي تقرب أديم ، باوعت نازلة دموعه ، طبع قبلة على جبيني ، وخلى راسه فوك راسي وهمس..

أديم : الحمدلله على سلامتج ويتربى بعزنا أسمرنا الصغير..

ضحكت وبنفس الوقت غصة صارت بقلبي ، من سمعت اسم أسمر..

أسمار : سميته أسمر ؟

هز راسه بأي ،وكال..

أديم : بعد أذنج طبعاً اذا تقبلين..

أسمار : طبعاً اقبل ومنتظرة اليوم اللي يرجع بيه أسمرنا الكبير ويشوف أسمرنا الصغير ونشهد ردة فعله من يعرف سمينا أبننا على اسمه.

بعدها خالتي تقربت باركتلي و دخل أهاب بارك وطلع ،

اخذت الطفل رضعته بينما سووا تفاصيل الخروج وطلعنا..

رجعنا للبيت نمت بغرفة الحجية حتى يداروني، فرحت كلش هواي ،الطفل غير الجو الحزين اللي بالبيت ولو شوية وضاف تفاصيل بسيطة من الفرح ..

مرت الايام تشبه بعضها واليوم ابني عمره شهرين ، واضطرينا نكمل حياتنا لكن حياة تخلو من الفرح والتفاصيل اللي جنا عايشيها قبل ، اكذب اذا كلت آخر ضحكة ضحكناها قبل السفر ، بعدها ما عرفنا للفرح طعم ولا لون..

وبيوم كعدت خالتي لعبانة نفسها وتعبانة حيل ، راحت العصر للدكتورة حللت وطلعت حامل ، باركنالها بسكتة..

اليوم عمر ابني ثلاث شهور ، وصار ثمانية اشهر على غياب أسمر ، رغم استمرارنا بالبحث ولحد الان ما صابنا اليأس وندعي ونتضرع لله سبحانه حتى يرجعلنا..

وبيوم جنا كاعدين بالصالون ، واندك الباب الداخلي مال البيت فتحه أهاب ورجع كال..

أهاب : هذا الحارس يكول اكو بنية تريد تحجي وياك..

حجى موجه كلامه لإيساف.

إيساف : بنية وتحجي وياية ؟

أهاب : اي..

إيساف : خير ان شاءالله..

طلع واني وخالة وحدة تباوع للثانية نريد نعرف منو هاي وليش جاية على الشيخ ، لهناك وينفتح الباب وتفوت وحدة ما تخيلت بيوم من الايام اجتمع بيها من جديد وخصوصاً بهذا المكان ، جنت واكفة وبيدي كلاص مي جبته حتى اشرب أبني ، من الصدمة وكع من ايدي وتكسر ، خالتي تقربت منها ، همست بضيق وكره وحقد..

أسمار : بسيل !!!!

يتبع...

ردت اكمل بعد بس تأخرت عليكم ، اقروا هذا بينما اكمل البارت البعده ...

متابعة ممتعة...

💛💛💗💗