رواية أحببتُ ذلك الغريب الفصل الثالث وخمسون 53 - بقلم عبير إدريس

انه العايش على عيونج
انه المايدري وين يروح من دونج..

______________
بعدها التفت ناحية أبسم وكال..

أديم : يلا ابو طه نبدي من اول يوم بديت تشك اكو شي مو صحيح او هي شنو جانت تحجيلك من شنو تشكي ؟ وليش تصرفاتها وياية عوجة وكلها تدل على الخيانة الفعلية..

أبسم : قبل لا احجي خلي ببالك ما راح ابرر لفعل أحد ولا ابرئهم بس بنفس الوقت اكو تصرفات ماجنت راضي عليها لا منك ولا منها وجنت احجي وياك واروح احجي وياها حتى احل مشاكلكم، وصارت تراكمات كلش هواي نتيجتها النفور بالعلاقة...

أديم : بس السبب منين ؟ مني ؟

أبسم : شهد جانت طفلة بذاك الوقت مو شابة ناضجة للحد اللي تلزم بيه بيت وتكون مسؤولة عن رجل وطفل وعائلة واهل زوج ويرادلها توجيه سواء منك او من الحجية ، ما يصير اخذ موقف منها واعاقبها..

أديم : ما جنت اعاقبها نهائياً منو بدلالها أبو طه شو ما ادري شلون تحجي..

أبسم : القصد من كلامي يا حبيبي من بعد الحادث مو قبله ،جنت تتفشش بيها ليش ننكر هذا الشي..

أديم : اتفشش بيها بدون سبب مو جانت تحير شنو تحجي وشلون تتجنبني ليش ما تحجي الحق..

أبسم : اعرف وياك اني بس افهمني..

أسمار : ولو تدخل مني واقطع سالفتكم ، مهما يكون سبب الخلاف ما الها حق تتنمر عليه وعلى وضعيته وتسمعه كلام المفروض تروح لأهلها ولا تحمله عناء وتعب علاقة نهايتها مأساوية..

التفت علية مبتسم وكال..

أبسم : ياهلا ام اياس شلونج يابه.

أسمار : الحمدلله الله يخليك..

أبسم : التهيت بأبني ونسيت اسلم عليج..

أسمار : عادي اعتبره وصل.

أبسم : بالنسبة لرأيج صحيح وصائب بس نرجع نحجي من البداية افضل ونخلي النقاط على الحروف..

أسمار : ياريت لأن كلش تعبنا وأرقنا هذا الموضوع..

فلاش باك للماضي...

شهد : عمو اريد احجي وياك بشغلة كلش حساسة وضرورية..

اجتني ترجف وعيونها لونهم احمر وخايفة اخذتها ورحنا كعدنا بالحديقة الخلفية مال البيت طلبت منها تاخذ نفس وترتاح وتبدأ تحجي وهيج سوت ...

أبسم : ارتاحيتي؟

هزت راسها ب اي ..

أبسم : عجل احجيلي شنو اللي وصلج لهذا الحال؟

شهد : عمو بيني وبين أديم هواي خلافات من يوم اللي تزوجنا ولحد هذه اللحظة ..

رفعت ايدي قاطعتها..

أبسم : لحظة لحظة ، مو أديم جنتي تحبيه وتموتين عليه وما صدكتي على الله تتزوجيه شو كمتي تحجين بالخلافات اللي ما شايف الها داعي حتى تسبب هاي المشاكل كلها..

شهد : اسمعني ، من تزوجته برغبتي صحيح بس اللي جنت راسمته غير عن الحقيقة أديم يحب امه هواي لدرجة الجنون ومفضلها علية اني ما اتحمل اصير بخانة أليك..

أبسم : يعني تعرفين الحجية ما عندها غير هذا الولد وعيونها عليه وضعها صعب وتحتاج رعاية نفسية قبل الرعاية الجسدية وفوك هذا تقارنين نفسج بيها..

شهد : من تزوجته لهذا اليوم سفر ما مسفرني طلعات قوية بالسنة حسنة يلا اروح مرة اريد اطلع اشتري يكولي اللي تريديه يجيج للبيت اني عندي شغل ما اكدر اخذج وغيرها وغيرها هواي سوالف وهسه اني ما اريده بعد يعني مو عبالك بسبب تشوهاته اني اريد انفصل لا من البداية اني وياه ما متراهمين..

أبسم : اكسر راسج اذا حجيتي بهيج موضوع شنو تنفصلين لعبة هي وتميم وين يروح طفل بعده ومحتاج حنانج ورعاية ابوه وبعدين شلون تعوفين رجلج بهيج وضع..

شهد : ما اتحمل اشوف التشوهات ما اكدر يعني اني اكل ما اكدر اكل تلعب نفسي من اتذكر تشوهات ايده وصدره من تعالجوه اريد اروح لأهلي واليوم حجيت وياه كلشي وتعاركنا يكولي اتركي تميم وروحي لأهلج واني ابني ما اتنازل عنه لو يموتوني..

أبسم : واني شنو جايتني اذا مقررة وحاجية، لهنا واشيل ايدي أديم خط احمر لا اقبل تحجين عنه هيج كلام ولا افعالج عاجبتني واني اذا حبيت فد يوم حبيت شهد الصغيرة العاقلة المؤدبة اللي تحترم الصغير وتهاب الجبير لهذا جنت ساندج و واكف وياج مثل اخ كبير صديق عم شنو تعتبريني بكيفج بس هسه لا ، اعتبريني غريب وما عرفتيه ولا تلتجأين الية بيوم من الأيام..

كامت من يمي وهاي جانت غلطتي الجبيرة من تخليت عنها وبيدي دفعتها تروح لأرقم يساعدها ظناً منها أرقم توأم أبسم بكلشي ، ومنا بدت الاجتماعات بينهم جانت زوجته تجيني تشكي تصرفاتهم وتكول.

_ ابو طه والله حاسه اكو شي غلط بعلاقتهم شو فجأة تقربوا من بعض وضحك وسوالف وكعدات طويلة خايفة يسمع أديم شلون بهيج حالة مو راح تنكلب الدنيا فوك راسنا..

أبسم : شنو اللي بيدي يا ام محمد هي تريد تنفصل واني ما راضي على هذا الشي ومقهور على أديم وقلبي نار صاير وهاي بعدها طفلة حجاية تجيبها وحجاية توديها ما تعرف مصلحتها وين..

_ كل يوم تروح زعلانة وجايبيها اتركوها هناك تتربى ليش اخوانها يتعاشرون يعاملوها مثل الجلاب.

أبسم : خليها ورة أرقم اريد اشوف وين توصل.

_ بس تدري اكو تصرفات غلط وحرام كاعد تصير..

أبسم : مثل شنو ؟

_ يعني يتصل عليها ويتفق يفوت للبيت ويروح بأوقات ما يصير يفوت بيها لبيت احد حتى لو جان اخوه وخايفة يحس بيه أديم شلون بهيج حالة كلنا نتخزى واحد ينقتل والثاني ينحبس..

افتهمت منها كل محاور الكلام وتركتها ورحت لشهد كعدت وياها وحجينا..

أبسم : شنو سالفتج وية أرقم ؟

شهد : ياسالفة ؟

أبسم : التقارب الجديد اللي ماشايفله داعي..

شهد : ماكو شي طلبت منه يساعدني حتى أخلص من هذا الزواج ووعدني بالخير..

أبسم : لج غبية هذا بيتج مملكتج وابنج بحضنج وفلوس وكلشي جوة ايدج ليش تتركين كلشي وترجعين لرحمن اللي هداج لأديم وخرب خطوبته مو ما اريد اذكرج وتنقهرين ، جنتي بنية ما حامليج ويريدون بس يخلصون منج اذا رجعتي منفصلة وبركبتج طفل شلون بهيج حالة؟

شهد : عمو كارهته وكارهة المكان اللي يتواجد بيه صدكني ما طايقة نفسي ما اتحمل يعني هي كوة جبر تجبروني ابقى عجيب.

ظليت فترة لا بأس بيها احجي وياها الى أن اجى اليوم اللي انت شكيت بينا وكمت اسمع حجي وتراطيش كلام جنت ما ادير بال وشبه ما مصدك اللي كاعد يصير ، بس بيوم انحبست بيه شهد اجيت اعرف السالفة منكم محد ينطيني وجه ومحد معبرني باوعت حابسيها بالبيت الخلفي لا بيه اجهزة كهربائية لابيه مكان كعدة مال اوادم غير سرير واحد تنام عليه اجيت وحاجيتها بوقت ماجنتوا موجودين بيه وهذا نص الحديث بيناتنا .

أبسم : شنو اللي صار ؟ منو طلع علينا هيج اشاعات احجيلي كلشي بسرعة بلكت اكدر اساعدج.

شهد : اتهمني عندي علاقة بيك وضربني هواي وتجاوز بالكلام وكل يوم يجيني لهنا يحير شنو يسوي بية تعبت وهددني بالقتل اذا ماحجيتله عندي علاقة بيك يعني احجي شي عن نفسي اني ما مسويته هاك شوف ايدي شوف وجهي من الضرب..

وشوفتني ايديها وصفحة من وجهه جان عليهن اثر كدمات ، درت وجهي عنها ..

أبسم : استغفر الله ، اكتفي بكلامج ليش تشوفيني..

شهد : حتى تخلصني الله يخليك اذا ما طلعتني اليوم بعد ما نكدر نطلع.

أبسم : اطلعج بس وين اوديج فهميني ؟

شهد : اي مكان بعيد عن هنا..

أبسم : لأهلج ؟

شهد : ابد كم مرة رحت ويرجعوني.

أبسم : عجل شلون تريدين تتطلكين وترجعيلهم.

شهد : مو وقت الحجي اللي اريده اطلع منا وبس..

أبسم : وابنج راح تنحرمين منه والتهمة راح تثبت علينا.

شهد : الله يخليك ابوس ايديك عمو خلصني .

جبت حداد فتح الاقفال واخذتها بسيارتي وافترينا بمكان بعيد عن المزرعة حتى احصل على بيت صغير اكعدها بيه وبالطريق جنت اسألها وتجاوبني..

أبسم: شنو بينج وبين أرقم ؟احجي الصدك..

شهد : ماعندي شي وياه بس كال اكدر اساعدج تتخلصين من أديم واني اتخلص من أبسم.

أبسم : مني !!

شهد : اي منك.

أبسم : ليش شنو مسويله اني

شهد : ما اعرف عداوته وية أديم

أبسم : وهسه ليش ما ساعدج ؟ ليش تركج وحدج.

شهد : ما اعرف والله بس فدوة خلصني تعبت من الضرب والاهاين أديم صاير وحش لا يطاق وكل يوم يكعد يوصفلي وحدة شلون يحبها..

أديم : تهتم بية رغم عماي وتشوهاتي حبتني وتخبل صغيرة وناعمة ورقيقة وتتمنى بس احجي وياها ربج يعوض يا ام تميم ما تعرفين ربما صار هذا الشي حتى اطلعج من قلبي والتفت لهذه الإنسانة اللي تعرف شلون تخليني احبها واتعلق بيها، وانت عبالج راح اطلكج واحررج لا ، يا اما تموتين من حسرتج هنا وهي اجيبها بهذاك البيت واشوفج الدلال اللي جنت ادللج وماعاجبج يروح الها واخليج خدامة جوة رجليها ، وتدرين صوتها كأنما موسيقى يخدر الحواس البشرية ، من تحجي كلامها يتركز بالقلب والروح ، شنو احجيلج عنها يا اسوء شي صار بحياتي..

وكل هذا جنت اتحمل واسكت ويبقى مصر على خيانتي له..

أبسم : شلون شك بينا فهميني.

شهد : ما اعرف كل اللي اعرفه يكولي انتِ خاينة وأبسم خاين ومنها بدا يضربني ويعنفني رحت لأهلي رجعني اجباري وحبسني بهذاك البيت تعبت ومليت

استغفرت ربي ورحت اجرت بيت صغير بسعر كلش غالي بالنسبة للمنطقة استغلوا وضعي لأن ردت بيت زين وبوقت قصير مو مال انتظر يومين واكثر..

بعدها كمت ادز ولد يروح ويرجع عليها وانتوا تخبلتوا لأن هزمتها وصارت مشاكل كلش هواي وانطردت من المزرعة بس تحملت وردت اثبتلكم برائتنا يلا نرجع اني وياها بس بيوم هذا الولد صارتله شغلة ماكدر يروحلها وهي خابرتني رادت كم شغلة وصتني عليها كلتلها غير يوم اصرت اروح الظاهر منيتها قربت ، كلت صار شهر اكيد ملوا من المراقبة ، رحت اول ما خليت رجلي بالبيت جفتوا اخوانك وجتفوني وصار اللي صار بعد تدري بالباقي..

أديم : من احتركت هم تهموك انت مهزمها من البيت.

أبسم : اي وبقت المشاكل تركض وراية بوقتها تعاركت وياكم وحتى هددت اللي يوصلني تصير قاتل ومقتول.

أديم : طلعوا حاركيها بس جثتها وين راح اتخبل ، وليش بس أرقم وأعقل دفنوها ليش ما اخذوا أسمر أهاب أبسل.

أبسم : هنا اللغز اللي لازم نحله الأفضل نسأل ابو عطاء ونشوف شنو رده..

أديم : لا ما انصح بهيج شي خلونا نشتغل وحدنا لحدما نوصل للجواب الحقيقي..

أبسم : المطلوب مني شنو عيوني الكم..

أديم : سالمة عيونك يخليهن ويحفظهن الهي ، خلونا نتأكد من كم شغلة واذا احتاجيتك راح اخابرك.

أبسم : خلوني بالصورة بدون ما اوصل للمزرعة وتخرب خططكم..

أديم : اكيد هذا اللي راح يصير..

كملوا كلام وكمنا اصروا علينا نبقى للغداء هو وزوجته بس أديم وأسمر رفضوا بسبب رجوع إيساف وأسن من السفر ومنتظرينا على الغداء.

رجعنا للبيت مجرد غيرنا ملابسنا ورحنا للبيت الجبير ، جانوا توهم صابين الغداء لأن بالطريق خابرناهم ، كعدنا كالعادة وبدأنا ناكل..

همست..

أسمار : خليني اساعدك..

اخذت صحن التمن وخليته مقابيله..

صاح بصوت فززني..

أديم : ما اريد تساعديني ولا اريد منج شي كلتلج الف مرة كارهج وكاره هذا القرب والاهتمام المبالغ بيه شوكت تفهمين..

إيساف : شنو هالحجي أديم استهدي بالرحمن..

أديم : ما طايقها ولا رايدها تكون وياية هسه غير تحس..

أسمار : ما حسستك بوجودي ولا خنكتك بإهتمامي خليني يمك ليش تعاملني بجفاء شنو سويت حرام عليك.

أديم : اطلعي منا يلا وما اريد اسمع صوتج والغداء تتهنون بيه ما اريد.

كام متحسس طريقه لغرفته دخل واني انسحبت لبيتنا ، اول ما دخلت رن موبايلي جاوبت..

أسمار : الو

أديم : اسف

أسمار : ماكو داعي تتأسف.

أديم : ماحبيت الموقف ابد واكيد ضجتي حتى لو ..

قاطعته وهمست..

أسمار : ليش اضوج وهذا الشي صار بإرادتي ما جبرتوني يعني كلشي متفق عليه ، اني وانت وأسمر والشيخ نعرف هذه لعبة نوهم بيها أرقم..

أديم : صعب علية ياروحي هيج اعاملج..

أسمار : تهون وتخلص صدكني..

أديم : احبج اني .

أسمار : اعرف .

أديم : عفية عيون ما تنمل لو اشبع سفر بيها، عفية عيون تعرفلي ما يحتاج احاجيها...

أسمار : بعض الاشخاص حياة للقلب يا أديم وانت حياتي وحياة قلبي لا تأذيني بعد تعبت كلشي ممكن اتحمل بس تغيرك علية ينهيني.

أديم : وعد ما راح احسسج بألم غير بس من احضنج هنا ماراح اكدر الزم نفسي مشتاق احضنج للحد اللي اكسر عظامج بيه اشتاقيتلج مو كافي عاد..

أسمار : ما ظل شي ونرجع نعيش براحة خلينا هذا الاسبوع نشتغل صح ونخلص من كلشي.

أديم : تمام راح اسوي اللي اتفقنا عليه..

أسمار : بس مثل العصبية مو تعصب من صدك واي علاج غير اللي خليناه الك لا تاخذه حتى من أفنان لا تاخذ.

أديم : تمام..

أسمار : احتمال هو يدز بيدها علاج يكوللها هذا أديم ناسيه او وصاني عليه وهي تصدك خطية..

أديم : اي اعرف لا تخافين ..

أسمار : سوي روحك تاخذه بس لا تاخذ يعني وهمهم بس..

أديم : ماشي ياروحي بعد شنو عندج توصيات ؟

أسمار : دير بالك على نفسك.

أديم : صار .

أسمار : باي .

أديم : باي.

سديته منه واتصلت على أسمر..

أسمار : هلو ابو سمرة.

أسمر : هلا بسمرة كولي..

أسمار : شديتوا الكاميرات بغرفة أديم؟

أسمر : اي أهاب كمل كلشي.

أسمار : والجهاز وين راح تخلوه ؟

أسمر : ياجهاز ؟

أسمار : غير تربطون الكاميرات على شاشة؟

أسمر : لا على موبايلي ربطتها واي مكان اروح اشوفه.

أسمار : زين انطيني البرنامج انزله عندي واراقب خاف انت تنشغل اني موجودة.

أسمر : بس مو تشوفيه وتركضين للغرفة خليه شنو يسوي يسوي واذا صار شي قوي نتدخل..

أسمار : اسم الله يعني شنو يسوي يقتله مثلاً..

أسمر : لا ما يسويها بس لازم نحسب حساب لكلشي..

أسمار : تمام هذا هو.

أسمر : وعد سمرة ما تتهورين؟

أسمار : وعد.

أسمر : عفية بالسباعية ..

أسمار: يلا اروح اني.

أسمر : الله وياج..

بعدها راسلت زوجة أرقم بالوقت اللي طلع من المزرعة اول ما كتبت الها جاوبتني.

_ سارة أسمر يكول اليوم راح يجيبلج منوم تخليه بالجاي لأرقم ومن ينام وتثكل نومته تاخذين الموبايل تفتحين البصمة وتجيبيه ماشي ...

كتبتلي..

_ خايفة شلون اذا لزمني..

_ كلنا موجودين اي شي يصير تلكينا فوك راسج وبهذا الوقت إيساف راح يكون كبال غرفتكم يراقب الوضع.

_ تمام ادعيلي..

_ الله يسهل..

_ اليوم كلش انقهرت عليج.

_ ليش ؟

_ أديم شلون يعاملج هيج كدامنا..

_ يمون علية ميخالف ديري بالج وانتظرج بالليل.

_ ماشي اليوم الموبايل يمكم.

_ أسمر نصف ساعة ويجي لا تصعدين فوك حتى ينطيج الكبسول.

_ تمام هذا هو..

_ يلا باي حبيبتي.

_ باي..

حذفت المحادثة وهي اكيد تحذف اول بأول لان تخاف من عنده ، بس رجعت كتبتلها للتأكيد..

اجى أسمر ونطاها المنوم، وإيساف خليناه بالصورة ، البرنامج نزل بموبايلي مال الكاميرات وكلشي صار جاهز حاوطناه من كل النواحي..

بالليل ما رجع أرقم بات خارج البيت وثاني يوم هم ما اجى كالوا على اساس عنده شغل خارج العراق وطالع ، من رجع جايب لكل واحد هدية من ضمن الهدايا علاج لأديم على اساس شي احسن من علاجه القديم وحتى كشفية دكتور معروف ، شكينا بيه فعلا مسافر بس من سألت أسمر كال مو بعيدة يوصي احد هناك ويجيبوه توصيل ، اخذ العلاج أديم وتشكره هواي لأن خايف عليه وعلى حالته وطبعاً هالشي تمثيل بتمثيل..

بالليل قبل لا ينام نزلت سارة للمطبخ سوتله عشا وعصير طبيعي ، ودزتلي مسج اكدتلي راح تخلي المنوم بالعصير ، مرت ساعتين واندك باب البيت جنا اني وأسمر وأهاب كاعدين منتظريها..

اول ما فاتت وجهه مخطوف وترجف ماتكدر توكف على رجليها..

سارة : عفية بسرعة قبل لا يكعد

أهاب : هاي شبيج بابه ما يكدر يسويلج شي اكعدي ارتاحي.

أسمر : سمرة جيبيلها مي.

أسمار : تمام..

جبت مي اخذته مني شربت وكعدنا ، بلش أسمر يفتش بالموبايل كل شوية مصدومين بشي..

علامات الدهشة والتعجب جانت تنرسم على وجوههم ، وحتى الغضب لدرجة أهاب كام يرجف وكام يريد يروحله ويكسره بس أسمر سحبه من ايده وكال..

أسمر : اكعد لا تخرب علينا الشغل..

أهاب : لك هذا مجرم شلون هيج يسوي.

أسمر : اصبر خليني اشوف لا تخبلني..

أهاب : ماشي اصبر واشوف تاليتها شلون هيج يسوي بأخوه شلون..

أسمر : تسكت لو شلون.

أهاب : سكتت يلا ..

أسمار : شنو اللي صاير خبلتوني .

أسمر : اصبري سمرة..

حجاها وطلع موبايله وبلش يصور المحادثات...

دخل للأستوديو طلب بصمة تأفأف والتفت على سارة كال..

أسمر : نريد بطولتج سارة ..

سارة : شنو اسوي ؟

أسمر : طلب بصمة اصبعه شلون ؟

سارة : ما اكدر اعذروني اني متت خوف يلا كدرت افتح موبايله اول مرة..

أسمر : اجي وياج ماشي.

سارة : اذا هيج عادي

طلعوا اثنينهم ورة عشر دقائق رجعوا كعدوا وأسمر كال..

أسمر : جربت كل اصابعه يلا رهم اصبع من كف ايده اليسار.

أهاب : وشنو شفت.

أسمر : بلاوي زركة تعال خلي اصور..

وبلش يفتح الفيديوهات والصور ويصورهن هنا بديت اسمع بجي وتوسلات بنية سألتهم منو هاي كالوا شهد ،جانت تبجي بتوسل وتكول..

شهد : الله يخليك اني ردتك تساعدني بس مو هيج تسوي بية حرام عليك

أرقم : شوفي اني مسؤول عنج بغياب زوجج واللي اريده اسويه احسن الج اسمعي كلامي وطبقيه بحذافيره صدكيني راح ترتاحين وتستفادين هواي.

شهد : ما اريد اعوفه تراجعت خليني عايشة لأبني..

أرقم : انجبي واحجي يلا اللي علمته الج احجيه..

شهد : شنو احجي مو كافي من طلبت مني بصمات صوت على اساس اتألم وطلعت تسمعها لأديم حتى تشككه اني اخونه وية أبسم ليش هيج سويت انت واحد كلب ونذل..

أرقم : انتِ طلبتي اساعدج واني ساعدتج

شهد : مو بهيج طريقة قذرة انت قشمرتني.

أرقم : وين اكو وحدة غبية تصدك بواحد يكوللها دزيلي صوت تتألمين بيه واني اطلكج.

شهد : لا مو غبية كلتلي دزي صوت حتى اوديه للشرطة على اساس زوجج يعنفج وانت استغليته بغير شي عقل شيطان عندك ..

أرقم : اي وهسه كلتلج لو ما كايلج تدرين ؟

شهد: شوف اذا ما تركتني وطلعتني منا كلشي احجي لأديم لو اعرف موتي يصير على ايديه..

أرقم : وشنو تحجين ؟

شهد : اكول انت اللي طلبت مني صوت على اساس توديه للشرطة وهسه اجيت تكولي خليته يسمع صوتج حتى يتوهم تخونيه وية أبسم وهيج راح تطلعون اثنينكم من المزرعة ، لك انت واحد مريض مو صاحي مجرم..

أرقم : زين يابة اذا هيج اسمعي اللي راح اكوله الج، اكو فوك مشنقة صغيرونة سويتها اذا ما سمعتي كلامي ودينج ياشهد اموتج ومحد يعرف.

شهد: يعرفون انت القاتل واليوم راح احجي لأديم كلشي صدكني احجيله.

أرقم : مو من مصلحتج ياعيني.

شهد : وخر الجهاز عن وجهي شكو تصورني.

من كالت هيج رحت كعدت يمهم وباوعت عليها لأول مرة تكسر خاطري وجهه اصفر وضعيف وباجية كلش هواي لدرجة عيونها ما مبينة شبه مسدودة وهذا يهدد بيها وتبجي بصوت بدون دموع..

شهد : شنو تسوي سوي ما خايفة منك واللي طلبته مني ما اسويه لو على كص ركبتي.

أرقم : غبية هي حجايتين وراح يطلكج صدكيني .

شهد : قصدك يكتلني هو ليش كاعد يعذبني يريد يعرف شنو اللي صار بيني وبين أبسم ومن شوكت متفقين ننهزم ، وتريد اثبتها علية هسه لو تموت.

أرقم : اسمعي كلامي واحجي راح اموتج.

شهد : ما اعترف على شي اني ماسويته.

ضربها راشدي شدها من شعرها وعاطت بتعب ..

شهد : شنو احجي خلصني .

أرقم : كولي اني احب أبسم والحب مو حرام واني اريد انفصل احسن ما ابقى واعيش وية اخوان اثنين بنفس البيت واحبهم..

شهد : اي ميخالف واحجي الموقف اللي صار بيني وبينك..

رجع شدها من شعرها وعاط بيها.

أرقم : لج تمثيل هذا جان.

شهد : تمثيل من طلبت مني البس ملابس اللي جبتهم الية ، حتى توهم أديم بالخيانة ليش هو يشوف اذا تبدلت الملابس لو انت جان عاجبك تشوفني بهيج وضع بحجة أديم ، والشي الثاني من وكفت يمي على الدرج وعاتبتني ليش ما لبست الملابس اللي جبتهم الية مو بستني من شفايفي وطلع أديم يتحسس طريقه صاح منو هنا انت بقيت تضحك عليه ، واني دفعتك وصعدت ، لو من جنت تجي وتشغل الصوت اللي اني دزيته الك وراها تشغل صوت رجال هم تحسسه اني اخونه والعطر مال عمو أبسم هذا نسيته ، من جنت تخليه واسألك شعجب حولت على العطر مالته تكولي عجبني وشنو اللي يمنع ..

هواي سوالف لو احجيلهم يثرموك ثرم.

أرقم : زين هسه اريدج تحجين مثل الحبابة اللي راح اكوله الج وبعدها انطيج وعد تطلعين منا وانتِ خلصانة منهم..

شهد : ما احجي شي .

أرقم : راح اكولج شغلة ، تدرين سمعت أديم راح يقتلج هاي اليومين.

شهد : كذاب.

أرقم : بكيفج انتظري وشوفي.

شهد : مستحيل يضربني اي يهدد اي بس ما يسويها ام ابنه اني.

أرقم : ننتظر ونشوف.

بقى يحجي وياها كلش هواي لدرجة قنعها بفكرته وخلاها تحجي.

شهد : اني شهد وهذا موبايلي عندي وسجلت بيه صوت حتى اضمن حقي اذا متت تاخذوه من اللي قتلني ، اني محبوسة بالبيت الخلفي بالمزرعة وكاعد اتعرض للضرب بشكل يومي وهسه مهددني بالقتل، اللي هددني زوجي أديم أشعب ابراهيم..

أرقم : عفية عليج هذا هو ..

أسمار : شنو راح يستفاد من هذا التسجيل ؟

أهاب : حتى يتهم أديم بيه ..

أسمار : بالعكس هذا يدينه اذا وكع بيد واحد غيره.

أسمر : ما تشوفين كلشي حاط بصمة اصابعه يعني اذا ضاع او احد فتحه مايكدر يكلب بيهن الا بالبصمة وبعدين منو يشك بيه هيج يسوي صارلنا سنوات محد شك بيه لو حس بالشغلات اللي جان مسويها.

أهاب : هسه اني دايخ بسالفة القتل معقولة هو شانقها مثلما هدد..

أسمار : شفته للحبل بالبيت شنو يسوي بيه اذا ما ناوي يقتلها..

أسمر : النية موجودة والتهديد موجود بعد نتأكد وخلوا ببالكم شغلة مهمة لؤي والولد اللي لزمناه اكدولي هو ورا الحادث مالتكم قبل الزواج ، وجان منتظر لؤي بالسيارة واكفله بعد مسافة عن المطعم اللي جنتوا بيه يعني هاي هم تحريض وتخطيط على الجريمة..

أهاب : راح يخبلني ليش سوة كل هذا ..

حجاها وخلى راسه بين كفوفه..

أسمر : بسبب مقتل امك واعتقد ضربة أديم الها ما ناسيها ..

رفع راسه باوعله وكال..

أهاب : امنا كلنا بس ما سوينا اللي سواه ، وبعدين أديم جان صغير وشاف امه تنضرب ومحروك قلبه عليها يعني بوقتها بكدما ضجنا منه بكدما عذرناه لأن امه انجلطت بسبب امنا وشافت الويل حتى بأبوية ما تهنت بسببها، ما اكول غير الله يرحمها..

أسمر : اعرف ليش منو ربتنا غير الحجية منو جان يدري شنو عندنا وشنو ماعندنا محتاجين ما محتاجين مرضى او لا ..

أهاب : المصيبة اللي شفته وسمعته ما يتصدك ..

بعدها طلعنا تسجيل صوت لشهد شوكت مسجليه ما نعرف بس صوتها مرتاح تحجي بيه..

شهد : حبيبي أديم اني احبك ليش تاركني ليش هيج تعاملني ..

التسجيل الثاني تعاتبه والثالث تتوعد تنتقم منه.

أسمار : نفس التسجيلات اللي يسمعهم لأديم! هاي شلون مخطط لهذا الشي ؟

أسمر : احتمال صدك بصمات حقيقية بموبايل شهد وماخذهن مو شرط متفقين عليها واستعملهن حتى يأثر على عملية أديم ويفشلها..

أسمار : يا الله على النذالة اللي عنده صدك يحجي ؟

أسمر : اي ماكو تفسير ثاني اسمعي صوتها عتب طبيعي وية زوجها واكو تسجيلات تتوسل بيه عدا صوتها وهي تهدد احتمال جان تاركلها الموبايل حتى يتأكد منها تخونه او لا ..

أهاب : نتصل على أديم ونسأله..

أسمر : اخاف نايم ؟سارة اخذي الموبايل وروحي قبل لا يكعد ومشكورة على كلشي سويتيه ..

سارة : راح اروح ادعولي بعده نايم..

أسمر : مفعوله اربع ساعات لا تخافين تلكيه مثل ما هو..

سارة : ان شاءالله.

أسمار : دزيلي مسج طمنيني حتى نعرف انتِ بخير..

سارة : تمام..

راحت وبعد دقائق دزتلي الوضع كله تمام وبعده نايم بلغت الولد.. وكملنا كلام..

أسمار : لا شفته بالكاميرا كاعد بعده..

أهاب : ها زين يلا نحجي وياه ..

اتصلنا على أديم باوعتله شلون يدور على موبايله يتلمس الفراش والمخدات حيل انقهرت على وضعه و وعدت نفسي بس احل هاي السالفة ارجعله ونعيش حياتنا طبيعي..

أديم : الو

أسمر : عيوني ابو تميم خوما كعدتك ؟

أديم : لا كاعد احجي خوما اكو شي ؟ سمرة بيها شي ؟

أسمر : لا يمعود بس سؤال اجى ببالي اني وادردش وية أهاب وحبيت اسألك ..

أديم : كول شنو ؟

أسمر : شهد من جانت بالبيت اللي احترك عندها موبايل ؟

أديم : ليش ؟

أسمر : احجيلي وافهمك.

أديم : اول مرة ما اخذته منها اول يومين تقريباً بس بعدها سحبته.

أسمر : شنو جانت تدزلك عليه.

أديم : جانت تتوسلني مرات تهدد..

أسمر : زين الحجي تتذكره بالضبط؟

أديم : ما جنت اسمعه كله لأن ماطايقها بس بعدين اخذته منها لأن ما تستاهل.

أسمر : زين والحجي هذا نفسه اللي سمعته من سويت عملية لعيونك..

سكت بعدها كال..

أديم : تقريباً هيج شي تعال ولك شنو اللي تعرفه واني ما اعرفه؟

أسمر : بس اسمعني من جنت تسمع التسجيل منو يمك ؟ و وين جنت ؟

أديم : تحقيق هو هسه غير افهم سبب هاي الاسئلة التعبانة شنو ؟

أسمر : احجيلك كلشي واخليك بالصورة بس فهمني..

أديم : ممم ، حسب مرات وياية أعقل ومرات أرقم وجانت تدز بالفترة اللي اكون مداوم بيها بالجامعة..

أسمر : اريدك تنتبه على كل كلمة تسمعها بالأيام الجاية لأن هذه البصمات اللي جانت تدزهم شهد لموبايلك نفسهن استخدمهم أرقم من جان يفوتلك ويسمعك صوت شهد..

أديم : يعني هذا هو هيج جان يسوي؟

أسمر : بعدنا ما متأكدين بس الأيام الجاية راح تبين كلشي..

كملوا كلامهم سد الموبايل والتفت على أهاب ...

أسمر :اجتي ببالي فكرة هسه ومتأكد منها ..

أهاب : وهي ؟

أسمر : اللي شارك بدفن شهد أعقل اكيد يعرف بيها شلون ماتت.

أهاب : وشلون نخليه يحجي ؟

أسمر : ندزله إيساف.

أهاب : واذا ما حجى؟

أسمر : يحجي معليك خليها علية.

بقوا يحجون ويخططون ساعات وبعدها طلعوا لذاك البيت ، ثاني يوم اجاني أسمر وكال..

أسمر : سمرة هذا أرقم حاجي وية المحامي مال الشركة على اساس أديم عقله مو تمام واحنا متفقين نسحب الوصاية منه من كل الممتلكات الي بإسمه ، الشركة والمزرعة والعمارات ، بهيج حالة شنو نسوي المحامي هسه اتصل علية وبلغني متخبل على حالة أديم..

صفنت بوجهه ويباوعلي صافن بوجهي بعدها كال..

أسمر : شبيج يمعودة وين صفنتي..

أسمار : هذا الشي من صالحنا.

عكد حاجبه وكال.

أسمر : شلون ؟

أسمار : نبلغ أديم يسوي روحه ناسي كلشي ويسوي حركات تدل على عقله مو تمام والعلاج كل يوم ناخذ كبسولة منه ونذبه بالمي على اساس هو ماخذها حتى من يفوت يشوف العلاج ناقص منه وبهيج راح نسرع بالخطة مالته ونكشفه بسرعة ..

أسمر : عليج عقل ياسمرة هذا هو متفقين سويلنا ريوك خلي ناكل شوية ميت جوع وبعدها نبلش..

أسمار : بعيوني بس قبلها روح لأديم وفهمه باللي صار حتى يكون على بينة..

أسمر : تمام بس داريني بالريوك ماشي.

أسمار : شلون اداريك ؟

أسمر : يعني زيتون على كرز على شوية جبن قشطة ..

أسمار : تمام تدلل جيب صمون حار وياك مخلصين..

أسمر : راح أهاب جاب لهذاك البيت هسه اجيبلج.

راح واني دخلت سويت ريوك وايدي ترجف اريد الموضوع يخلص بسرعة لأن طول ومليت ، مرت ربع ساعة واجى دك الباب وفات للمطبخ خلى الصمون وكعد ياكل رفع عيونه شافني واكفه ، عكد حاجبه وكال

أسمر : ما تاكلين ؟

أسمار : ما اشتهي

أسمر : وليش ؟

أسمار : ما مشتهية صدكني اكل انت الف عافية..

ترك الاكل وبعد الماعون وكال.

أسمر : اني هم ما اريد بعد..

أسمار : هاي شنو ؟

أسمر : اي والله اذا ما تاكلين اني ما اكل..

أسمار : يلا راح اكعد بس لا تسويها سالفة..

رحت صبيت جاي وكعدت اتريك وياه ، خلص اكل شرب الباقي من الجاي وكال..

أسمر : سمرة اليوم مضطر اسافر يومين وارجع.

أسمار : يعني حاجز تكت لو شنو ؟

أسمر : اي قبل كم يوم حجزت واليوم طيارتي..

أسمار : مو وقتها أسمر ابد مو وقتها.

أسمر : وعيونج لازم اروح ضروري

أسمار : صدك تحجي ؟ واذا طرأ شي جديد ظرف صار حدث شلون بهيج حالة؟

أسمر : تاركلج أديم وأهاب وإيساف وخالتج هنا بعد شنو ياعيني وباعي سفرتي ضرورية لو مو ضرورية ما اروح صدكيني.

أسمار : تمام الله يسهلك..

أسمر : الله يخليج.

أسمار : فهمت أديم ؟

أسمر : كلشي فهمته وراح يسوي مثلما اتفقنا وانتِ ابد لا توصلين لهناك ماشي..

أسمار : ماشي ..

شرب مي من الثلاجة وطلع مرت اليومين واني اراقب بالكاميرا ، خابرني أسمر مناك وكال..

أسمر : سمرة البيت راح يفرغ من الولد راح تبقون انتِ وأديم والحجية وأفنان واليوم متأكد أرقم راح يسوي شي انتبهي على الكاميرا لو تعرفين تفرغين نفسج وتكابيلها ماشي ..

أسمار : ماشي وأديم شنو صار وياه ؟

أسمر : من اي ناحية ؟

أسمار : يعني بدأ يمثل هو ينسى و يهلوس ..

أسمر : لا بعد مو هسه ينراد ايام حتى لا تبين اتفاقية ..

أسمار : هم صدك بس اني اريد بسرعة تعبت ومليت.

أسمر : واشتاقيتي لأديم كوليها.

أسمار : مثل اشتياقك للحب اللي خلاك تعوف كلشي وتنفض ايدك وتسافر..

أسمر : لا ما نفضت ايدي منا واشتغل لا تخافين علية..

أسمار : تمام نشوف يا روميو منو سعيدة الحظ..

أسمر : ولج وكعت بيها وماكدرت انهض بعد..

أسمار : تتهنون بس غير تعرفنا عليها..

أسمر : هي سبب سفرتي حتى ارتب الوضع واجيبها.

أسمار : يا يعني خارج العراق هي ؟

أسمر : عجل شعندي مسافر اذا بالعراق جان كابلتها وكعدت على شنو كاعد اخطط واضيع وقت غير حتى التهي ويمشي الوقت واجيبها للحب اصفيلها الوضع خوما ترجع تدوخ بالدوامة مال أرقم وربعه..

أسمار : ولك طلع التعب علمودها مو لخاطرنا اني واخوك؟

أسمر : عيني مو كلشي احجيه تاخذيه علية رأس مال اكيد علمودكم حتى ترتاحون ويلا تدعبلي اريد اروح ..

أسمار : يلا الله وياك سلملي عليها..

أسمر : متأكدة تريدين اسلملج عليها..

ضحكت وكلتله..

أسمار : طبعاً قابل ضرتي واكرهها..

ضحك وسده ، كابلت الموبايل واراقب بالكاميرا مال غرفة أديم ، مر اليوم عادي لليل وجان اشوفه يفوت للغرفة دخل يتلفت طلعت من الكاميرا وشغلت برنامج تسجيل الشاشة ورجعت فتحتها باوعت وكف يم راسه وفتح الموبايل الحقير جان يضحك شكله مرعب انتبهت بيده شيشة عطر رش منها وتقرب من أديم ، الكاميرا جانت حيل قريبة من السرير بحيث كلشي اشوفه واضح ، بعدها بثواني طلع ، حفظت التسجيل ودزيته لأسمر ثواني وخابرني..

أسمر : ها فات ؟

أسمار : اي شلون نذل جسمي كله صار يرجف..

أسمر : اهدأي هاي اول شغلة تأكدنا منها والباقي سهل هسه اني بالمطار ساعة اقل واطير لبغداد واجيكم ونكمل اللي بدأنا بيه..

أسمار : ياريت يا أسمر لأن تعبت حيل..

أسمر : هانت ما ظل شي صدكيني..

أسمار : ان شاءالله..

بقيت كاعدة للصبح بهاي الفترة اتصلت على أديم ٣ مرات وما طولنا بالكلام ولا بين هو يحجي وياية مجرد تطمنت عليه هو بخير واسده لان خفنا يكون يتصنت عليه من خلف الباب..

بالليل رجع أسمر واجتمع بالولد ، إيساف يروح لأعقل يحجي وياه وهو وأهاب يرجعون لهذا الولد اللي لزموه ويحققون وياه بخصوص شغلة أرود احتمال يعرف شي عنها ، وراحوا ثاني يوم ، واني افتر بالبيت بحالة ترقب وخايفة وافكر باللي صار لهناك واسمع هوسة طلعت اباوع إيساف وأعقل كاعد يتعاركون تقربت اسمع لان مافهمت من بعيد بس صياح..

أعقل : هذا اللي صار و جيبه واجهني بيه.

إيساف : شنو اواجهك بيه تضحكون علينا صار سنين دافنين السر وعبالنا هي انتحرت لكم انتوا شنو من بشر ؟

أعقل : ما الي شغل اخوك هو اللي شنقها ومن اجاني كال عندها علاقة بأبسم وقتلها بمسمى جريمة شرف وهذا شرف اخونا ومن هالحجي واني وابو حارث الحارس طلعناها من البيت ودفناها بالبستان مال جدي ابراهيم وابوك الله يرحمه..

إيساف : وبعدها حركتوا البيت على اساس هي محتركة ورحتوا دفنتوها وحدكم.

أعقل : اني ما علية هذاك اخوك وروح حاسبه..

إيساف : هو وينه الكلب وينه.

بهذه الأثناء رجعوا أهاب وأسمر صايرين نار ويسبون بأبو الحر..

أيساف : شنو صار وياكم ؟

أسمر : هذا الولد مو بس يشتغل لصالح أرقم ..

إيساف : عجل؟

حجاها وتخصر..

أسمر : جندي من جنود ابو الحر ..

إيساف : وهذا الجلب وين لكوه ؟

أسمر : شمدريني يشتغل وياهم بالشركة وصاير خلاف بينه وبين أديم واخوك طارده وابو الحر محتويه مشغله وياه متعرف عليه أرقم وبادين شغل الشياطين سوية.

إيساف : شنو عرفت بخصوص شغلة أرود ؟

أسمر : ابو الحر دازه وهو حاط المخدرات بالدراجة.

إيساف : سجلتوله صوت؟

أسمر : اي طبعاً وهددناه اذا ما يعترف نعرف شنو نسويله...

إيساف : يعني نسلم أرود هاي اليومين ؟

أسمر : اي بس اتأكد اول معترف بكلشي يلا حتى نسلمه ويطلع بكفالة هيج فهمني الضابط..

إيساف : هذا هو متفقين واللي صار وانحجى ممنوع يوصل لأرقم.

أسمر : ابو عطاء سمعت ؟

أعقل : ما بقى بس انت تنطيني نصائح.

أسمر : هي هاي سواية تسويها انت واخوك

أعقل : حاسبوه اله اني شكو..

أسمر : الساكت عن الحق شيطان اخرس واللي يتستر على جريمة يكون مشارك بيها..

أعقل : سد حلكك يله..

حجاها وعافنا فات للبيت ، تقربت من أسمر واسأله بدهشة على اللي صار وفهمني بكلشي .

أسمار : شوكت عرفت بأعقل مشارك أرقم باللي صار لشهد ؟

أسمر : من خابرني إيساف راد يعرف باللي صار حجالي..

أسمار : ها تمام..

جريت نفس وحسيت المشكلة كبرت اكثر ، رحت اتصلت على اهلي حتى ارتاح شوية وانصدم باللي سمعته ..

أسمار : شنو شنو ترنيم انخطبت هاي شوكت ؟ شو ما ادري ؟

أناهيد : وانتِ وينج تايهة بمزرعة آل الغريب اسمع اخبارج من أسن خلف الله عليها..

أسمار : اي غير عندي شغلة مهمة وما كدرت اتصل لأن بموبايلي اراقب بيه غرفة أديم..

أناهيد : اي وبهاي الايام اللي جنتي تراقبين بيها اجوي خطابة لأختج .

أسمار : وهي وافقت ؟

أناهيد : اي والمهر الجمعة اذا تكدرين تعالي .

أسمار : ماما شبيج هيج تحجين وياية.

أناهيد : مابية شي بس راجعي نفسج وشوفي تقصيرج ويانا راح تعرفين شنو بية.

أسمار : مستحيل بس هذا الشي اكو سالفة مغيرتج.

أناهيد : ليش تضمين علية سالفة طلاكج وشلون عايشة وياه ببيت واحد ما تستحين انتِ ماعندج أهل هيج مسترخصتنا .

أسمار : ماما مو هيج افتهميني..

أناهيد : اذا ما اجيتي بعد لا توصلين .

أسمار : ماما اصبري افهمج..

أناهيد : لا تفهميني ولا افهمج وخواتج ديري بالج تخابرين وحدة منهن وتأثرين على قرارهن تكون النهاية وياج..

أسمار : ماما خاف تولان هم راح تنطيها ..

أناهيد : ليش تريديها لحماج المهتلف كل عقلج انطي بناتي لبيت الغريب مو كافي علية قهرج اللي اسمعه روحي يمه روحي..

أسمار : ماما الله عليج لا تسويها بيهم خطية..

أناهيد : هو شنو خطية بناتي اوزعهم سبيل والله شنو خطية أرود وخطية أهاب لو يتعلكون من عيونهم ما انطيهن ..

أسمار : تمام ماما هذا هو ..

سلمت عليها ما جاوبتني سدته ، ورة ساعة اتصلت على ترنيم ما ردت علية الظاهر متفقين اتصلت على خالة عاتبتها ولمتها لأن حاجيه لماما جنت عصبية بشكل بس من كالت اهدأي خليني افهمج سكتت اخذت مي من على الطبلة شربت ورجعت الكلاص..

أسمار : اسمعج..

أسن : اول شي اني كلمة ما طلعت مني لأناهيد ..

أسمار : لعد شلون عرفت ؟

أسن : لا تقاطعيني وراح تعرفين.

أسمار : يلا سكتت احجي..

أسن : إيساف من شاف اياس بوسه وحجى وياه هواي من ضمن الحجي كال.

إيساف : حبيبي بس تصفى الوضعية ارجعك بيدي لهناك لا تبجي زين انت بطل ..

هز راسه اياس ب اي ، ماما سألته.

أناهيد : ليش شنو اللي صار جديد.

هنا عباله امج تدري لهذا حجى وماحسب حساب..

إيساف : ماكو شوية مشاكل وتنحل ان شاءالله بس بنتج هالمرة معاندة ما تقبل اعقدلهم رغم أديم يتوسل بيها.

امج هنا انهارت وظلت تسأل بصوت عالي وتبجي ، إيساف صار بوضع حرج طلع من البيت ولزمتني تعالي احجي كلشي ومنا عرفت سبب زعلتي قفلت علية وعليج وعلى بيت الغريب كلهم..

أسمار : شلون بلوة هاي والمن نطت ترنيم ؟

أسن : شمدريني لواحد يشتغل وياها بنفس المختبر.

أسمار : وهي قابلة ؟

أسن : بالبداية خابرتني تبجي بس من عرفت بيها أناهيد عندها علاقة بأرود حجت لأبوج ولعبوا بيها طوبة لهذا وافقت حتى تسكتهم.

أسمار : يعني موافقة على العريس ؟

أسن : اي اتصور مو برضاتها..

أسمار : تمام راح اشوف شلون احلها.

سديته منها وكعدت افكر شنو اسوي وشلون احلها ، بهذا الوقت أديم بدأ يمثل سالفة النسيان والتعب وبيوم الصبح جمع اخوانه وكال..

أرقم : أديم صاير ينسى هواي وعقله تحسوه مو طبيعي.

إيساف : اي فعلاً ينراد اراجع بيه لدكتور زين..

أرقم : اي بس قبلها اكو فكرة ببالي اريد اخذ رأيكم بيها...

إيساف : يلا نسمع ..

أرقم : بس لا تفهموني خطأ ماشي ..

إيساف : ماشي يابة احجي .

أرقم : أديم تعبان وصحته مو تمام ونظره ما معروف شوكت يرجع والشركة ينرادلها وكفة وتدقيق وهواي امور شنو رأيكم نسحب الوصاية منه ونسجل كلشي بإسمنا..

أسمر : اي خوش فكرة يلا نسويها بس شوكت وشلون ؟

أرقم : المحامي جاهز والوقت بكيفكم تريدون هسه ؟

أسمر : اي يلا جاهزين احنا..

حجاها مستهزء ...

ارقم : شبيك أسمر اني علمودكم لا تفهمني خطأ..

أسمر : لا لتخاف فاهمك صح وعارف اللي كاعد تحجيه ..

اتفق وياهم وطلع من البيت حتى يجيب المحامي من عرفته طلع اني رحت للبيت كعدت وحجولي اللي صار دمي احترك بس اللي غير مزاجي من فتح الباب أرود شنو الفرحة اللي سكنت قلبي والصدمة، سلمت عليه وما اعرف شنو احجي مبروك لو حمدلله على السلامة لو اواسيه على حبيبته اللي راح تروح من ايده شنو اسوي بقيت صافنة ودموعي تنزل ، تقرب باس راسي وكال..

أرود : دموعج غالية ام اياس عيوني انتِ لا تبجين تقهريني.

أسمار : حمدلله على سلامتك مكانك فارغ وافتقدانك هواي..

أرود : الحمدلله على كل حال هذا اللي مكتوب شفناه وترة جنت كاعد بالبيت وكلشي يوصلني وعندي انترنيت بس ما اكدر اتواصل وياكم بس وية أهاب وموبايل خاص بيناتنا..

أسمار : يلا الحمدلله..

كعدنا نحجي شوية وبعدها الحديث تغير لموضوع المحامي وأرقم واللي راح يصير اجى أديم كعد يمنا وكلنا جنا منتظريه نريد نشوف شكله شلون راح يصير من يشوفنا كلنا متجمعين...

يتبع...

متابعة ممتعة حبايبي
صباح الخير ...