رواية أحببتُ ذلك الغريب الفصل الثاني وخمسون 52 - بقلم عبير إدريس

كيف اكف عنك وانا كفيف من غير كفك...

أديم
_________________

أسمار : خالة حبيبتي اجيتي !!!

خليت ايدي على حلكي وصافنة عليها التفتت على أديم ..

أسمار : أديم خالة رجعت..

ابتسم وخلى ايديه بجيب البنطرون وهز راسه ب اي يعني يدري..

أسمار: تدري !!!

أديم : ادري

التفتت على أسمر وأهاب وسألتهم.

أسمار : وانتوا هم تدرون ياخونة..

أسمر رفع ايده مستسلم وأهاب دار وجهه مغلس عن الجواب..

ملتهية اعاتب بيهم التفتت لكيت خالتي واكفة كبالي ومتخصرة..

أسن : ها كملتي عتب شوكت تسلمين علية ؟

أسمار : هاي شنو البارحة حجيت وياج ليش ما كلتي ؟

أسن : لأن جنا مسافرين واليوم رجعنا وحبينا نسويلكم مفاجئة..

أسمار : مسافرين انتِ ومنو ؟

حجيتها وحضنتني ، بوستني واني باهتة شنو اللي كاعد يصير ليش آخر من يعلم، بادلتها الحضن وباركتلها ، تركتها ورحت لإيساف جانوا الولد محاوطيه باركتله ميل راسه وكال ..

إيساف : المفروض انتِ اول وحدة تدرين بس جنتي تعبانة وملتهية عذرينا ام اياس..

أسمار : لا عادي المهم انجمع شملكم.

إيساف : يوم الكم ..

أسمار : الله يخليك.

تركته ورحت لخالتي دخلنا على الحجية كيفت عبالك دخلت العافية عليها مو أسن ، هواي حجوا لدرجة راسي انتفخ ردت انسحب انتبهت علية خالتي استأذنت منهم وصعدنا فوك بغرفتها بحجة اعدل الملابس وياها وننظف غرفتها اول ما دخلنا سحبتني من ايدي وكعدنا على السرير، باوعتلي تضحك

أسمار : زعلانة عليج تدرين مو ؟

أسن : حبيت اسويها الج مفاجئة..

أسمار : شلون نطاج قلبج هيج تسوين بية واني كل يوم اخابرج اريدج ترجعين لان جنت تعبانة..

أسن : تدرين انتِ هم سبب من الاسباب اللي رجعت علمودها من غير محاولات إيساف والحجية..

أسمار : احجيلي مختصر شلون صارت الرجعة..

أسن : هيج مابيج حيل تسمعيني وتريدين مني اختصر؟

أسمار : اريد اروح بشغلة اخلصها وارجع ونحجي بالتفصيل..

أسن : يصير اسأل وين هاي الشغلة ؟

أسمار : ما اكدر احجي شي الا تخلص.

أسن : تمام يارب تتسهل..

أسمار : امين ، وين جانت سفرتكم ؟

أسن : يم اهلج..

أسمار : صدك شو محد كال يومية اتصل عليهم.

أسن : ما رحنا يمهم هواي ظلينا بفندق وآخر يوم رحنالهم اللي هو البارحة ..

أسمار : حتى اياس يضم علية والله عمي..

أسن : اني كلتله لا تحجي لماما اريد اسويلها مفاجئة..

أسمار : ماحبيت ، المهم رجعتي ، بس شلون صارت الرجعة ؟

أسن : هواي اتصل وهواي اجى لبيت اهلي واصراره مميت ،و للمدرسة هم وحجى وية المديرة حتى تحاجيني ، وقدم دعم الهم ، فلوس و وجبات قرطاسية تخبلوا عليه وبقوا يحجون براسي هواي ، هنا اني رافعة خشمي وشايلته بس بيوم اجى للمدرسة جان لابس قميص كاف ردانه وبنطرون كابوي ، مخفف شعره ولحيته شوية بيها ثخن ، طالع يجنن ، اكو كم مُدرسة بعدهن ممتزوجات هنه شافنه لو تخبلن ، اللي توديله مي واللي تتودد واللي تسأله اسأله فقهية من عرفوا بيه شيخ ، هو جان يباوعلي ويحجي وياهن ، ما نطاهم اي اهتمام بس جان يجاوب على كل سؤال بأدب..

بالليل كمت احوص اريد اتصل وامنعه يوصل للمدرسة ، دخلت على الواتساب والكاه متصل ، ساعة اني اراقب وهو متصل تخبلت ويامن عقلي وكف آخر شي دست على نفسي اتصلت ، اول ما رفعه همس..

إيساف : واخيراً متت نعس واني منتظرج تتصلين..

أسن : ويامن جنت تحجي ؟

بصوت نعسان همس..

إيساف : وروح ابوية منتظرج الج.

أسن : إيساف لا تخبلني صارلك ساعة متصل وتكولي منتظرج؟

إيساف : لان جنتي داخلة على المحادثة مالتي واني داخل عليها جنت اقرأ المسجات القديمة وجان اشوف حبيبتي جاري الكتابة ضحكت كلت ياالله راح تتنازل ام خشم يابس وتكتب ، وتالي كلشي ماوصلني بعدين كلت ابقى منتظر لو اعرف للصبح باقي شعندي ...

أسن : خابرت حتى اكولك لا توصل للمدرسة بعد.

إيساف : اصلا ناوي اداوم بيها عجبني الوضع وحبيت الكادر ونفسيتي تغيرت منها اساعد ومنها مكابلج.

أسن : ماكو هيج متوصل بعد..

إيساف : اذا وصلت شنو تسوين ؟

أسن : ما اعرف بس خلي ببالك انت كاعد تدمرني..

إيساف : عجل والسويتيه ما يدمر يا ست أسن ، ترى تعبان وروحي مريضة..

أسن : اللي صار ما يغتفر يا شيخ..

إيساف : كلتيها شيخ يعني عادي يغلط حاله حال اي بشر قابل اني نبي يا عيني اغلط واعتذر وابرر خطأي ارجعيلي فراشي بارد وعمري فاهي بدونج..

أسن : ارجع بشرط ..

إيساف : كله تحت امرج أأمريني يابة..

أسن : لا العفو بس اريد تاخذلي حقي من أرقم ..

إيساف : وعيونج من يوم اللي عرفت بالسالفة واحنا مشتغليه ..

أسن : منو انتوا ؟

ضحك وكال..

إيساف : عصابة آل الغريب..

أسن : منو منهم ؟

إيساف : أديم أسمر أهاب والمستشارة أسمار رئيسة العصابة واني المرجع اللي ياخذون رأيه بالحلال والحرام وشوية اخطط وياهم والتنفيذ عايفه على الثنائي المرح..

ضحكت وكلتله..

أسن : صدك وأسمار وياكم ؟

إيساف: الله يستر عليها شنو من عقل شايلة والله تحملت أديم بوقت جان ما ينجرع واكبر امرأة تتركه وما تلتفت ، حجتلي مواقف كلت لو غيرها وحدة تعوفه..

أسن : يكفي سفره وما حجالها ولا قبل تخابره وتحجي وياه شكد قاسي وقلبه جلد..

إيساف : لهذا السبب جان رافض يتزوج وتتذكرين من جان يحجيلج يكولج ما أريد اظلمها وياية لأن هي حلوة ورقيقة وبعدها صغيرة واني مشوه فكرياً وداخلي مليان حقد وشك واضافة لهذا الشي عجزي ...

أسن : اتذكر بس اللي خلاني اشجعه شفتهم اثنينهم متدمرين نفسياً واعرف أسمار اذا حبت شخص تبني تخيلات وتتعب نفسيتها لدرجة تمرضت ..

إيساف : ارجعيلي مو بس اني محتاجج ، أسمار وأديم والحجية كلنا نريدج ترجعين..

أسن : تمام نرجع.

إيساف : تحجين صدك ياروحي؟

أسن : احجي صدك ..

إيساف : يابة باجر احجزلج وين تريدين شهر العسل ؟

أسن : يم أناهيد نفس الدولة العايشين بيها عجبني المكان من يصورولي.

إيساف : بس ما نكعد يمهم اريدج وحدج اريد انفرد بيج..

أسن : تمام هذا هو نبقى وحدنا بس نمرلهم ..

إيساف : اخر يوم .

أسن : تمام يلا نام وباجر تعالي ونحجي..

إيساف : اسون لحظة..

أسن : نعم ..

إيساف : اتممت عليج حبي ، واتمم الله علية نعمتي بوجود حسنائي ، احبج بكل ما عرفته من معنى للحب ، انتِ في اعلى قلبي ، اكمل النساء في عيني اني ممتلئ بيج وفيج..

أسن : هاي كلها اني ..

إيساف : اوووف شحبج ...

ضحكت حجينا شوية وتركنا الموبايل مفتوح مثل المخطوبين ، كعدت الصبح لكيته مغلق شحنته مجرد فتحته اتصل اول ما جاوبته كال..

إيساف : ليش ولج سديتيه ؟

أسن : ما سديته خلص شحن.

إيساف : عبالي انتِ سديتيه ..

أسن : لا ، شنو مانايم ؟

إيساف : لا ماكدرت .

أسن : ليش ؟

إيساف : ظليت اسمع انفاسج ..

أسن : مو كلت نعسان.

إيساف : طار النوم وين اكدر انام ، طلعيلي عيني اني بالباب..

وطلعتله اخذني لحضنه اول ما فتحت الباب كلما احجي سد حلكي حاضني ويكول..

إيساف : اش اش اتركي الحجي واسمعي دكات قلبي..

خلى راسي على جهة قلبه ، جان يدك سريع عبالك طفل خايف يفقد لعبته ، بعدها دخلنا للبيت وتصالحنا ...
حجتها وضحكت..

أسمار : اي شلون تصالحتوا بلة ؟

أسن : وبعدها كعدت امي وحجى وياها كلتله اخذها علواه خلصني منها ..

أسمار : غلسي على سؤالي..

أسن : وبعدين تركني وراح حجز ورجع لهنا ومن صار موعد السفر اجاني وطرنا وهناك عشت اجمل ايام حياتي عوضني عوض ما صاير وكل شوية يعتذر عن الصار وشلون شك بية ..

أسمار : والله عمي بهذلتيه للرجال وينه أديم خلي يجي يشوف ، لو هيج اسوي بيه بوجهي ما يباوع..

أسن : هاي العائلة الغريبة كلشي بيها غريب ، بس تعرفين متحمسة اشوف شنو راح يسوون بأرقم..

أسمار : خليني اروح قبل لا يعوفوني ومن ارجع احجيلج وبنفس الوقت نتساعد ونرتب ملابسج سوية..

أسن : ماعندي شي خطية أفنان منظفتها قبل لا نرجع ،،هناك خابرها إيساف واني ماقبلت بس كال معليج ..

أسمار : جان جبتولها مناك شغلات الها ولبنتها والله هاي مظلومة بعدها شابة شنو شافت من حياتها..

أسن : طبعاً اشتريت اكثر شي الها ولميمونة وللحجية وطبعاً ما نسيتج..

أسمار : خلف الله عليج ، ومشكورة ، يلا خليني اروح حتى ارجع من وقت.

أسن : يلا الله يسهل .

أسمار : مع السلامة ..

أسن : الله وياج...

نزلت للصالون لكيتهم كاعدين اشرت لأسمر وطلعت برا اجى وكف يمي وكال..

أسمر : ها سمرة ..

أسمار : نروح هسه شتكول؟

أسمر : مو خالتج توها فاتت وعيب نعوفهم ونطلع..

أسمار : من اهل هذا البيت قابل غربة وبعدين راح ينامون تعبانين خلينا نستغل الوقت يا أسمر التأخير ابد مو من صالحنا خاف أرقم يعرف الولد مخطوف وياخذ حذر ..

أسمر : محسب حساب لهذا الشي ، خليني اشوف أديم وارجعلج..

أسمار : ماشي..

دخل للبيت بعد دقائق طلعوا اثنينهم وصلوا يمي ابتسم أديم وكال.

أديم : مستعدة ..

أسمار: طبعاً..

أديم : يابة ما رايد ادخلها بهاي السوالف وتدوخ أسمر ماكو طريقة بدون ما توصل أسمار.

أسمر : لا ماكو هي ما تأمن النا لهذا روحة سمرة بيها فائدة هيج حاسس.

أديم : يلا عجل نتوكل..

أسمر : يلا..

توجهنا للسيارة صعدنا منطلقين لبيت طليقة أرقم والطريق كله افكر شنو راح احجي وبأي طريقة اقنعها..

وصلنا وقبل لا انزل اخذت جملة من توصيات من أديم وأسمر يكوله..

أسمر : تعلم سمرة يمعود كول غيرها..

أديم : اخاف عليها ولك..

أسمر : اعرف تخاف عليها بس هي سباعية ما يحتاج..

أديم : اعرف ..

حجاها والتفتلي مبتسم..

أديم : ديري بالج .

أسمار : ماشي..

نزلت توجهت للباب دكيت الجرس ثواني وصوت امرأة صاحت منو ؟ تحمحمت وكلتلها اني، فتحت الباب ضحكت بوجهي وكالت..

_ تفضلي حبيبة ألمن رايدة ؟

أسمار : السلام عليكم خالة.

_ وعليكم السلام هلا بنيتي..

أسمار : بلا زحمة هذا مو بيت ام محمد ؟

_ اي بنتي هاي شرايدة منها ؟

أسمار : اني قريبة صديقة الها اكدر اشوفها ؟

عكدت حاجبها صافنة بوجهي ، رجعت حجيت..

أسمار : انتِ بس كوليلها وهسه تعرف..

_ منو من صديقاتها ؟ هي ماعندها صديقات .

أسمار : صديقة قديمة كلش..

_ خير ان شاءالله انتظريني دقائق فوتي هنا لا تبقين بالباب..

أسمار : اي رحمة الله والديج واذا ماتصير زحمة وياج مي.

ضحكت وكالت..

_ اي من عيوني..

اني ما عطشانة بس حتى اكو سبب تخليني ابقى اكثر يمهم، بحالة اذا بنتها رفضت تحاجيني، طلعت جايبتلي سراحية وكلاص مي صبتلي شربت شوية وتشكرتها ، بعدها طلعت بنية ناعمة وحلوة بس الحزن والتعب طاغي على ملامحها ، وصلت يمي كالت ..

_ السلام عليكم..

بإبتسامة جاوبتها..

أسمار : وعليكم السلام شلونج ام محمد.

بإستغراب جاوبتني..

_ الحمدلله منو حضرتج ؟

أسمار : يصير اكعد شوفي حامل وموزين علية الوكفة..

_ اي طبعاً تفضلي..

فاتت كدامي دخلنا للإستقبال وجان اشوف بنية شابة تطلع بالاعدادي من شافتني كامت من مكانها..

_ حبيبتي اخذي اخوانج وفوتي جوة..

_ تمام ماما.

حجتها واخذتهم ودخلت جوة استغربت شنو هذه الشابة تكوللها ماما واللي اعرفه ولدهم ابتدائي..

أسمار : بنتج هاي ؟

التفتت علية وكالت..

_ اي بنتي .

أسمار : الله يخليها.

_ الله يسلمج ، اي احجي منو حضرتج او بالاصح منو دازج علية..

حجتها بنبرة حادة..

أسمار : محد دازني عليج اني جايتج.

_ ومن وين تعرفيني؟

أسمار : اذا كلتلج اني منو راح تتقبلين تحجين وياية بدون هوسة؟

_ عرفت من وين جاية ، اللي دزج ارجعيله وكوليله لا اني ولا بنتك اللي ما معترف بيها نريدك بعد وحتى جهالك الصغار هم ما رايديك.

أسمار : مو هو دزني اني اجيتج..

_ شنو رايدة ؟

أسمار : بس على كيفج حتى اكدر احجي وياج واعرف اتفاهم ..

_ احجي اسمعج

أسمار : ساعديني اني جايتج وحياتي على المحك..

_ وشلون اكدر اساعدج؟

أسمار : بالحقيقة ...

_ اي حقيقة ؟

أسمار : كلشي صار وياج وسبب الانفصال.

_ وهذا الشي بشنو يفيدج ؟ شنو خص حياتي الخاصة بحياتج؟

أسمار : اني كنت زوجة أديم عم اولادج ، وانفصلت السبب جان طليقج..

صفنت علية عاكدة حاجبها بعدين كالت..

_ اني ما افيدج وكلشي ما اعرف..

أسمار : لحظة اسمعيني ، اني وابني وتميم ابن أديم وهذا الطفل الجديد وحتى حياة زوجي كلهم مرتبطين سوية يعني تكدرين تنقذين هاي العائلة كلها اذا ساعدتيني..

_ شلون اساعدج كلتلج اني كلشي ما اعرف..

من بعد الصد والرد والحجي اللي تعبني لدرجة كبيرة كدرت ابدي اسحب منها الكلام شوية شوية الى ان انفتح الحديث من اوسع ابوابه وتطلب الأمر لتدخل أديم.

_ اذا هيج صارت خلي زوجج ييجي يلا احجي باقي التفاصيل وتضمنون حياتي وحياة اولادي وتتكفلون بينا لأن هو كاعد يستخدمهم ورقة ضغط علية حتى ارجعله واني مستحيل بعد اللي صار وشفناه نرجع ..

أسمار : هسه اتصل عليهم لأن قريبين والله يخليج كلشي احجي اي معلومة حتى لو كانت صغيرة راح تفيدنا..

_ تمام ان شاءالله اكدر افيدكم واكون سبب برجعتكم..

أسمار : ياربي آمين مشكورة قبل كلشي.

حجيتها بفرح هزت راسها مبتسمة ، اتصلت على أديم وبلغته باللي صار سكت كأنه ما مصدك اللي سمعه بعدها كال..

أديم : تمام حبيبة الروح جاييج احنا..

دقائق واندك جرس الباب وفاتوا للمكان الجنا كاعدين بيه البنية اصلا جانت لابسة حجاب كامل لهذا بقت كاعدة بمكانها من دخلوا ، شافتهم عيونها دمعت خلت ايديها فوك وجهها وبجت بحسرة ، تقرب أسمر وبعده أديم وكفوا يمها سلموا عليها وحجوا وياها هواي كلام من ضمنه وضحوا سبب تقصيرهم وياها وعدم سؤالهم المتكرر عليها..

أسمر : تعرفين اللي صارلنا وشلون من مصيبة لمصيبة ثانية وما ارتاحينا ابد ورغم هذا جنت اسأل والشيخ يدزني اجيب اللي قاسمه الله وانطيه بيد الوالد بدون ما يسمحلي اسلم وانتِ تعرفين الاعراف والتقاليد ما تسمح للحمى يلتقي بطليقة اخوه مهما يكون..

_ صحيح ما قصرتوا..

أديم : واني وضعي معروف يعني يحتاج احجيلج يا ام محمد ، بس ..

قاطعته وكالت..

_ ما انسى افضالك وكل يوم ادعيلك بالخير والعافية والله يعوضك والحياة الكريمة اللي عايشتها اني وابنائي بفضل الله وثم بفضلك انت والشيخ وأسمر..

أديم : ماكو افضال بيننا واتمنى يصير شي ويخليكم تعيشون ويانا بالمزرعة انتِ والولد والبنات..

_ صعب بوجود أرقم ما نكدر نعيش هناك ....

أديم : بيتكم القديم موجود ومعزول وحتى نسويلكم باب وحدكم وتكعدون وغصب عنه يشيل حملكم واذا ما قبل احنا موجودين ، ام محمد صعبة علينا نروح ونجي لهنا الافضل ترجعون كدام عيوننا..

_ خليها للوكت الله كريم عود ، تفضلوا التهينا بالسوالف وانتوا واكفين..

أسمر : صاحبة واجب ام محمد من يومج.

_ الله يخليك ويعزك

أديم : اي يابة نسمع شنو اللي عندج وتحبين تحجيه .

_ اخ اخ اللي عندي يهجم بيوت يا ابو تميم ، مثل الصخر نايم على صدري..

أديم : لا اله الا الله ، احجي يابة احجي.

_ اي شي احجيه الله شاهد..

قاطعها وكال..

أديم : بدون حلفان احجي.

_ تمام ، من وين ابدي من يا مصيبة من رشا بنتي بدت تنتبه على ابوها لو من اني بديت اكشف سوالفهم..

باوعت لأديم عكد حاجبه بلع ريكه ارتبك وهمس بصوت اجش..

أديم : منو ؟؟؟

_ أرقم وشهد ...

هز راسه ساكت ودنك ، أسمر كال..

أسمر : شبيهم احجيلنا من البداية وهذا الموبايل خليه يمج حتى يسمع الشيخ بلا امر عليج.

_ الشيخ إيساف ؟

أسمر : اي ويسلم عليج هواي.

_ الله يسلمه اكدر اسلم عليه ؟

أسمر : هسه صعب لأن بالبيت واعتقد موجودين يمه من نطلع اخليه يحجي وياج.

_ ماشي ، قبل كم سنة جنت منهمكة بالشغل وبجهالي والحجية وإيدي بإيد أفنان وعايشين على حب الله ورسوله ومافد يوم طلبت من شهد تجي تساعدني ولا حسسناها بتقصيرها جانت الحجية دائماً تكول خلوها تسعد ابني والباقي مو مهم ، واهم شي عينها على ابنها وزوجها والبيت ، واحنا سمعاً وطاعة ، الى ان بدت بنتي تنبهني على لبسها رغم رشا جانت صغيرة كلش بس فطنة..

رشا : ماما شنو هاي لبسها شو قصير شلون عمو أديم يقبل هيج تلبس..

كمت انتبه الدشاديش ابد مو مال وحدة تلبسهن بيت العيال ، مرة حجيت وية أفنان تحاجيها ومن حجت وياها كلتلها..

شهد : اني بالبيت مالتي هيج لبسي ومن اجي لهنا اجي بوقت محد موجود بيه وية جيتهم ارجع.

أفنان : بس أرقم دوامه صباحي واغلب اوقاته نايم بالبيت يعني هيج وقت بأي لحظة ينزل ..

جانت تسكت وما ترد وبعد دقائق ترجع لبيتها..

ومرت الأيام نفس الحال بديت انتبه على سوالفهم سوية واكو نظرات وحتى ضحك من جوة ليجوة..

وبيوم تعاركت وياه ونبهته الكاعد يصير يضوجني واتضايق منه ، سكت من تدخلت رشا وحجت على لبسها ضربها ورزلها بعدج صغيرة واسكتي لا اكسر راسج ، منا بدا يريد يعزلنا من هذا البيت ببيت مفصول ، جان البيت طابق واحد بنى فوكاه طابق كامل وشبه انحبسنا بيه حتى بس اكون بعيدة عنهم وما انتبه..

أسمر : اتذكر هاي الحرب اللي صارت بينكم ومتعجب شنو السبب كملي..

_ وبيوم صار الحادث كلنا انفجعنا وتأثرنا ونسيت اللي صار والتهينا بحالة ابو تميم وبعدها وفاة عمي اشعب رحمة الله عليه ، انكسرت نفسيتنا منو بحال غيرة بعد ، بس بديت انتبه على التغيير اللي صار لشهد واسمع بمشاكلكم انت وياها وبيوم من الايام اسمعه يحجي بالموبايل جان كاعد على الدرج الخارجي فتحت شوية من الشباك واسمعه يحجي وية وحدة..

أرقم : وين انتِ بغرفتج ؟ وهو وين ؟ ارجعي للمكان اللي كلتلج عليه ، محد راح يحس بينا ريحي نفسج واتركي ملابسج والبسي شي من اللي جبته الج ، لا لاتخافين ما راح اسوي شي انتِ رايدة تخلصين منه واني رايد اخلص من شخص مقرب مضايقني بشغلي ، لا يتغلب عليج اليأس صدكيني حسبة اسبوع وانتِ طالعة منا ولاحكج أبسم ، لا شلون أأذيج اسمعيني راح انزل واحاجيج هنا ما ماخذ راحتي افتحيلي الباب..

وجان يتركنا ويروح يرجع ساعة ٢ مرات وجه الفجر اشوفه يطلع من بيتك ، من طب للبيت تعاركت وياه وحاسبته من سألته وين جنت وكذب علية كال كاعد بالحديقة ردت اشرب من دمه سكتت ، ثاني يوم كلت اروح احاجيها ورحت دكيت الباب وفتت ، جنت افرك بإيدي بتوتر وحايرة شلون افتح وياها موضوع حسيت نفسي اني اللي سويت المكسورة مو هي ، ظلت تباوعلي صافنة علية منتظرتني احجي بس حسيتها صعبة لذلك انسحبت وطلعت من البيت ، وتكررت افعالهم وطلعاتهم وجنت اكتم بقلبي من واجهته وحجيت كلشي شفته هددني ياخذ اطفالي مني ، الى ان طكت روحي ولعبت نفسي منه ، طلبت اروح زيارة لأهلي اخذت اطفالي وطلعت بطرك ملابسنا ورحت بعد ما رجعت ، اجى هنا وحجيت لأبوية كلشي كدامه واجهته وضربني بالكوة خلصوني منه، وبعدها تبرأ من اولاده خصوصاً رشا لأن جانت تحجي لجدها على سوالفهم عباله الطفل ما ينتبه لهذا تبرأ منها وكال لو يصير اشيل اسمي وما اخليها تشيله ..

أديم : وين جنتي كل هاي الفترة ليش ما حجيتي عتبي عليج والله

_ حاولت اكثر من مرة بس جنت اخاف ما تصدكوني وابوية الله يرحمه منعني احجي وية احد او اتواصل وياكم تجنباً للمشاكل بس اني حاولت مرة وفشلت ..

أديم : شوكت ؟ وليش فشلتي؟

_ تتذكر مرة اجاك اتصال وطلبوا منك تجي لبيت من طين وكلولك تعال هناك اكو شي يخص شهد ...

أديم : اي اتذكر ومن اجينا ما لكينا شي بعدين امرأة نهزمت من كوخ الطين..

_ اني هذه المرأة من شفت وياك اكثر من واحد خفت لا أرقم وياكم جاي وطلعت اركض رجعت للبيت..

أديم : يا الله ولا اجيتي ببالي وكل مرة اسأل نفسي منو هاي البنية وليش دزت علية شنو يريدون مني..

_ اني هذا اللي اعرفه واللي سمعته واذا تريد باقي الحقيقة راح تلكاها عند أبسم صدكني راح يفيدك هواي..

أديم : ماشي مشكورة يا بنت العم ما قصرتي.

_ ها لحظة اكو معلومة يمكن تفيدكم..

أديم : وهي ؟

_ العطر مال أبسم جان بالليل يستعمل نفسه ومن يرجع يغسل ويخلي عطر جديد ..

أسمر : وشوكت هيج يسوي كل يوم يعني ؟

_ لا بس من يريد يدخل بيت ابو تميم..

أسمر : ها هيج صارت شكراً يابة..

_ العفو ما سويت شي اني..

طلعنا منهم بعدما تشكرناهم وبالطريق اتفقنا نتوجه لبيت أبسم ، رغم معارضة أديم بالبداية بعدين كدرنا نقنعه ، وصلنا لمنطقته واتصلنا عليه جان رقمه عندي وحجيتلهم شوكت نطاه الية ، اتصلت من موبايلي اخذه أسمر مني وحجى وياه لأن كال اذا اتصلنا من موبايلاتنا ماراح يجاوب، من اول رنة جاوب حجى وياه أسمر وبلغه نريد نشوفه ، الظاهر خايف لأن تردد يلا قبل وسألهم هواي اسئلة...

وصلنا كبال البيت ، أسمر صف السيارة والتفت علية كال..

أسمر : ابقوا هنا من اصيحكم انزلوا.

أديم هز راسه ب اي بس ضايج حيل واني كلتله ماشي ، نزل وراح دك الجرس ثواني وانفتح الباب حسيته واكفلهم وراه ، طلع ونظراته كلها عتب لأسمر ، تحاضنوا لأول مرة بعد سنوات الانقطاع ، أبسم كام يبجي مثل الطفل خصوصاً من شاف أديم بالسيارة ، تقرب وفتح الباب ومد جسمه لداخلها حضن أديم على كعدته ويحجي بصوت مبحوح ما فهمت الكلام ، دموعي نزلت التفتت على أسمر واكف متخصر ويمسح دموعه..

أبسم : لك انت ابني ابني شلون تتصور بيوم من الأيام أأذيك..

أديم رجع راسه ليورا تنهد وكال..

أديم : تعبان بكد تعبك واكثر واللي صارلي مو قليل حاير بمنو اصدك ومنو اكذبه ، ياهو أأمن بيه وياهو اتجنبه ضعت بطريق اسود ، لولا ام اياس الله دزها لطريقي جان بعدني بنفس المكان الأظلم واكف وأكل بنفسي..

أبسم : انزل خليني احضنك اشبع منك اروي اشتياقي انزل يا حبيبي انزل وبعدين نحجي..

نزل واخذه بالاحضان ، أديم جان اطول منه بهواي رغم هو هم طويل القامة بس يم أديم ضايع ، حضنه غرك بحضن أديم ، انتبهلي أسمر اضحك رفع إيده سألني شبيج..

اشرتله على فرق الطول ضحك..

بعد جولة الاشتياق دخلنا للبيت ، طلعوا زوجته واولاده سلموا علينا كعدوا شوية بعدها قدموا الضيافة وانفتح الموضوع ، كل كلام طليقة أرقم انطرح والشكوك كلها وشنو جان يحس أديم وشلون يشتم عطره بداخل البيت والخ ....من باقي التفاصيل..

أبسم : يعني ناخذها بالعقل اذا ردت اخون اخونك بداخل البيت هيج ماعندي عقل وغبي لهذه الدرجة اني بايع ضميري وماعندي مبادئ ، اترك العتب وماراح افوت بتفاصيله بس خلي ببالكم اني هاي السنوات اللي فاتت اكو آفة بصدري تاكل بية ما خلتني ارتاح وهاي آفة الشك مالتكم بية وبأخلاقي ومع هذا ما أذيتكم ..

أسمر : قبل كلشي وقبل لا تدخل بتفاصيل شهد وأرقم ،عندي عتب وياك شلون تساعد ولد رحمن يخطفون أديم وخليته طعم سهل الهم ولولا رحمة الله جان ميت اخوك..

أبسم : اول شي احنا ماندري بشهد وين كلشي ما لزمنا لا جثة لا بقايا جثة نريد دم البنية يعني اني جنت السبب بمقتلها مادام اخذتها من البيت ثبتت عليها التهم والشكوك المنسوبة الها ، واتفقنا نحجي وياه بمكان خارج المزرعة بس غدروني ودافعت عنه بقوة بس بعدوني عن البيت ورحت لأرقم بلغته حتى يساعدني وما دزلي دعم كال ادزلك اخوتك وكم واحد من جماعتي كمت اتصل كله مغلق يطلعلي وبالي يم أديم وصوته من يعذبوه وتالي من وحده خابرني كال وينه أديم كلتله بعد وقت ، عاد دز دورية شرطة وشهد ضدي جابوني وياهم وانحبست..

أسمر : شفت أديم ، ابد لا يأنبك ضميرك على اللي سويناه بولد رحمن..

أبسم : يعني اللي صارلهم انتوا جنتوا السبب بيه ؟

أسمر : اي طبعاً.

أبسم : واني متعجب شلون أديم تنازل عنهم بهاي السهولة بس جنت خايف طول الوقت افكر اكو شي ورا طلعتنا من السجن وفعلاً جنتوا محسبين لأمور ثانية..

أسمر : يستاهلون كلاب..

تقربت من أديم وهمست..

أسمار : عصابة آل الغريب شنو مسوين لبيت عمكم..

قرب فمه من أذني وكال..

أديم : كرصة بسيطة ما خسروا غير محاصيل زراعية وكم بناية وتكسرت إيد على رجل على اصبع وهذا هو..

أسمار : هاي شوكت شو ما ادري.

أديم : مو ضروري أميرتي تعرف بكل شي ينكد عليها حياتها خارج المزرعة اكو افاعي هواي وكاعد نصارعها وشوية شوية تصفى ونخلص..

أسمار : آمين يارب العالمين ..

يتبع...

متابعة ممتعة....

لتكولون قصير لان والله متعب كلش
والاحداث هيج لازم اوضح كلشي مو تكولون ما حدث جديد ...