رواية أحببتُ ذلك الغريب الفصل الثالث وأربعون 43 - بقلم عبير إدريس

أسمار تكول...

اريد وياك ايد بإيد
اطش سنين عمري وياك
لمني على كد حضنك
وبين الضلوع انساني...

بقلمي ...

__________

أسمار : شنو قصدك ؟ هاي ثاني مرة تعيدها وتكولي مصيرج مثل مصير شهد ...

أبسم : انتِ لو تنطيني مجال وتسمعيني راح تتوضح هواي اشياء واكدر اساعدج واساعد أديم ونكشف الخاين الحقيقي اللي عايش بوسطكم وانتوا ما حاسين بيه..

أسمار : نفترض خليت ايدي بيدك وسمعت ومشينا بنفس الطريق شلون تثبتلي كلامك وتخليني أأمن بيك ؟

أبسم : ما اكدر اثبت شي اذا ما تسمعيني وتساعديني..

أسمار : وليش اختاريتني من دون الكل اساعدك ؟

أبسم : لان انتِ زوجة أديم الوحيدة اللي تكدر تأثر عليه ويسمعها..

أسمار : حسب معرفتي القليلة باخوك ، ما يسمع بس نفسه ..

أبسم : صحيح بس تكدرين تأثرين عليه..

أسمار : وبهيج تخرب حياتي وانت ترجعلك حياتك..

أبسم : صدكيني اللي عايشته مو حياة كاعد يحضرولج شي على نار هادئة وراح تطلعين منا بمصيبة اذا ما اندفنتي حالج حال شهد..

أسمار : اكولك انت حيرتني ساعة تكولي عايشة ساعة ميتة وبعدين؟

أبسم : مشكوك بكلشي يخص موضوعها ، كلشي يخص أديم خليه داخل دائرة الشك والسوء ...

أسمار : اعذرني ما اكدر اقدملك اي مساعدة اذا اخوك ما نطاني الاوك..

أبسم : زين اسمعيني بس..

أسمار : كلتلك ما اسمع..

أبسم : اخذي رقمي احتمال تحتاجيه بيوم ، تكتشفين شي تحسين باشياء تصير مو صحيحة وتريدين تستفسرين مني ماراح تلكيني لأن غيرت مكان سكني وكلشي ..

أسمار : حتى رقمك غيرته ؟

أبسم : اي.

أسمار : وليش تنطينياه على اي أساس تثق بية واني زوجة اكبر عدو الك بهاي المزرعة..

أبسم : اعرف اوادمي زين مو غبي وأأمن بيج..

أسمار : على شنو استندت ؟

أبسم : مادام وثق بيج أديم معناها انتِ كد هاي الثقة..

أسمار : وليش ما يوثق بية يعني ؟

أبسم : أديم بعد اللي صارله مستحيل يثق ببشر وخصوصا اذا جانت امرأة واساساً صدمة جبيرة النا من عرفنا بيه خطب وتزوج ، انتِ غيرتيه هواي...

أسمار : الله يخليك اتركني بحالي ما اريد لا اعرف شي عنكم ولا عن ماضي أديم اريد اعيش بسلام وية عائلتي..

أبسم : صدكيني ماراح تشوفين هذا السلام لمدة كبيرة ، بقائج هنا حسبة وقت وراح يمر بلمح البصر..

أسمار : احجيلي شي مختصر وبسرعة..

أبسم : شوفي اني ما خنت ابد جنت صديق شهد المقرب وحاسبها مثل بنتي بيني وبينها سنوات مو مال اخون اخوية وياها ، وجانت تلتجئ الية من الضغط اللي تمر بيه خصوصاً بعد حادث أديم ، ما اكلج هي ما غلطت بل غلطانة من ساسها لراسها من جانت ترفضه وتحجي عليه بس مو معناها خانت، البنية رادت تنفصل اكثر من مرة واهلها منعوها واكو من استغل هذا الموضوع لصالحه..

أسمار : والحادث ؟ فقدان عيونه ؟ كله هذا صدفة مستحيل..

أبسم : هو شي يمهد لشي اكبر منه ، بس والله اني ما خنت وشهد ما خانت..

أسمار : ويامن جانت بالسيارة من طلعت وراقبوها جان وياها احد  وعلى اساس رايحة صالون وكايلة اني بالسوك هواي كذب وخرابيط صارت..

أبسم : شوفي اني ما خنت اللي متأكد منه هذا الشي وشهد ما خانت أديم بعلمي ، احتمال بدون علمي صار هذا الشي يعني اشهد على شغلة عيوني ما شافتها بس جنت اساعدها اي صحيح..

أسمار : شلون ثبتت التهمة عليك اذا انت ما مسوي شي يثير الشك ؟

حجيتها وكتفت ايدي..

أبسم : شوفي اني جنت مسافر بشغل يخصنا بعدين من رجعت لكيتهم حابسيها استفسرت كالو شي خاص بينها وبين أديم ، رحت حاجيته لرجلج ما يردلي وما يسمع مني وما طايق صوتي ، بيوم جانوا كلهم طالعين بالدوام اجيت اني للبيت حاجيتها من ورا الشباك وحجتلي بأن أديم شاكك بينا اني وياها وكاعد يحقق وياها بهذا الشي يريد يتأكد حتى يخلص عليها وعلية وما يدخل بذمتنا ، واللي صار استغليت عدم وجودهم وجبت حداد للبيت فك القفال وهربتها اللي شافنا الحارس نفسه اللي منعني افوت لهنا وهو بلغهم بهروبنا سوية ، امنتها بمكان ورجعت للمزرعة وكفت وياه صدر بصدر وكلتله اني هزمتها واللي عنده شي يحجيه بوجهي ، كامت الدنيا ما كعدت اذا جان بس أديم ضدي صاروا كلهم ، وكف أبسل بوسطهم وكال اذا ما رجعت شهد اليوم نتبرأ منك وتطلع من المزرعة ما تفوتها بعد..

أبسم : شلون اطلع بيتي هذا وبيت ابوية.

أبسل : اللي خان أديم خان الاخوان كلهم..

أبسم : شلون اخون وزوجتي هنا واولادي انتو صدك تحجون ؟

أديم : اذا ماعندك شي وياها ليش خفت عليها ؟

أبسم : لك حبيبي اني اقرب انسان لقلبك ولحياتك شلون اغدرك واخونك أديم انت فقدت بصرك بس ما فقدت البصيرة ولا العقل وازن الامور زين ولا تلوث ايدك بالدم ، فالنفرض كلامك صحيح اني خاين وهزمت شهد معقولة ارجع برجلي لهنا لو اكون خايف..

أديم : هواي عندي امور تثبت الخيانة مو بس هذا السبب..

أبسم : منها ؟

أديم : مو شغلك

أبسم : هو شنو مو شغلي غير اني الخاين واللي مشكوك بأمري غير اعرف على اي اساس اني متهم بهيج شي بشع..

أديم : اذا ما رجعت شهد اعرف شلون اجيبها ونهايتها تكون بسببك..

أبسم : توصل بيك تقتل أديم ؟

أديم : اي اقتلها وبعدها اقتلك.

أبسم : هاي كدام الكل هو اعترف بنفسه اذا صارلي شي او صار لشهد هو المسؤول..

أديم : اي اني مسؤول يلا رجعها وصير حباب..

أسمار : ورجعتها ؟

أبسم : لا راقبوني جنت اوديلها اكل ومسواك ولكفوها اخذوها من البيت اللي جنت مأجره الها..

أسمار : ورا شكد يلا لزموها ..

أبسم : مدة شهر جنت ادز ولد بدالي لأن شكيت بيهم مراقبيني بس بيوم هي تعبت كلش وجانت منهارة وتبجي تريد تشوف تميم ورحتلها وهذا خطأي الاكبر اول ما دست عتبة الباب طبولي كتفوني واخذوها واني انضربت للحد اللي دخلت بيه مستشفى وبين النايم والكاعد سمعت أسمر يتصل بواحد بيهم يكوللهم لكيناها وراح نرجعها للبيت.

أسمار : وبعدين شنو صار ؟

أبسم : من تعافيت وكدرت اوكف على رجلي اجيت سألت عنها اهلها وكالوا مابيها شي وتخابرنا عادي استغربت كلت احتمال صدكنا أديم وانحلت المشكلة حمدت الله ورجعت لبيتي حرت بزوجتي شلون ازيح الشك عنها والحمدلله بفترة بسيطة رجعت الثقة بيننا وعشنا طبيعي ومرتاحين ، ولهناك اجاني خبر انصدمت بيه كالو شهد ميتة وتدرين انتِ بالباقي لأن من اجيت للمزرعة جنتي موجودة.

أسمار : ما راح اوعدك بشي بس راح ابحث بالموضوع واحجي وية أديم ولازم نوصل لحل .

أبسم : صدكيني اني ما جنت ادري بيهم راح يضربوه من اخذناه ولا ادري هيج راح يسوون بيه ويسمعوه صوت على اساس انتِ جايبيج واني اللي بلغت أرقم على مكانه لأن سمعتهم يتهامسون على قتله ، والله اخوية احبه بس بنفس الوقت ضميري يأنبني على الشابة اللي راحت غدر ما اعرف وين وشلون التقي بأديم واحاجيه مثل العالم والناس ويسمعني بهدوء ونحل الاشكالات ونندل مكان البنية وين..

اجى صوت من وراية يصيح التفتت أرقم..

أرقم : ماتت شهد ماتت ودفنتها بإيدي الف مرة حجيتلك وفهمتك يعني ما تفهم الكلام وبعدين أديم مو طلب منك ما توصل لهنا.

أبسم : لك انت توأمي المفروض تحس بالوجع اللي حاسه وتساعدني مو تنبذني حالك حالهم..

أرقم : واذا توأمي موخوش آدمي ومأذي اخواني اصير زين وياه ، يلا روح منا والتهي بعائلتك لا يوصل أديم وتصير كوارث ونقرأ عليك فاتحة الكتاب.

أبسم : زين أرقم زين

أرقم : ابو حارث وينك يابة

اجى الحارس يركض

_ نعم عمي..

أرقم : هذا ممنوع يوصل هنا لو يعتب عتبة هذا الباب اليوم اني موجود وعرفت بيه هنا وتصرفت باجر احتمال محد من عندنا هنا وبعدين شلون تسمح لأسمار تحجي وياه..

راح ابو حارث فتح الباب وبعده عن المزرعة ، التفت أرقم حتى يروح صحته..

أسمار : لحظة لحظة.

التفت علية عاكد حاجبه من شاف تعابيري العصبية ابتسم وتقرب مني كال..

أرقم : نعم يا ست الستات كولي..

أسمار : انت على اي اساس تكوله لابو حارث يمنعني احجي وية أبسم.

أرقم : على اساس زوجج متخارب وياه لدرجة ناوي يقتله خلاص.

أسمار : حتى لو ما مسموحلك تمنعني او تقرر عني

أرقم : اني حماج اخو زوجج الكبير واكبر منج فوك ال ١٥ سنة عيب هيج تتصرفين وياية تصرفات اطفال..

أسمار : وانت ممنوع تحجي وياية بهذا الاسلوب.

تقرب مني وخلى ايديه بجيوب التراك باوعلي بنظرات تحدي وكال

أرقم : اي

أسمار : شنو اي

أرقم : منتظر تكملين تهديدج اذا حجيت بهذا الأسلوب شنو ممكن تسوين؟

أسمار : ما يخطر على بالك الراح اسويه..

رفع ايديه ليفوك مستسلم وكال..

أرقم : الصراحة خفت..

أسمار : مرة ثانية ممنوع تتدخل بحياتي وتملي علية الاسويه والما اسويه...

أرقم : نصيحة لا تخلين راسج براسي وابتعدي عني..

أسمار : ليش طردت أبسم وخفت منه..

ضحك وهز راسه مستهزء..

أرقم : اخاف؟ أرقم يخاف ! ومن منو ؟ أبسم!!!!!

رجع راسه ليورا وضحك بقهقة مستهزء..

أرقم : اني ما اخاف ولا راح اخاف..

أسمار : ولا اني اخاف..

سكت بنظرات حقد باوعلي وبعدها سألني..

أرقم : معقولة قبلتي بأديم لأن تحبيه ؟

أسمار : مو مجبورة اجاوبك.

أرقم : اي اني كلت وتوقعت زواجج جان عبارة عن صفقة تاخذيه علمود فلوسه وتعيشين انتِ وابنج براسه.

أسمار : مو غلط واحد يدور مصلحته وهذا الشي راجع الية ما يخصك.

أرقم : ماتحبيه صح ؟

أسمار : ما الك شغل اذا حبيته او كرهته شعليك

أرقم : تصورتج اذكى من هيج بهواي

أسمار : ذكائي يم مكرك لا شيء.

أرقم : بهاي صح..

أسمار : من رخصتك..

التفتت حتى اروح كال..

أرقم : شهد..

انداريت عليه عكدت حاجبي وهمست

أسمار : نعم ؟ شهد شنو اسمي أسمار.

أرقم : اعرف بس اشوفج شهد نسختها..

أسمار : شنو قصدك مافهمت؟

أرقم : هم جانت داخلة على طمع وكونت علاقة عميقة وية أبسم رغم منع أديم وتحذيره الها أكثر من مرة بس ما سمعت الى أن وقع المحظور  بينهم.

أسمار : القصد ؟

حجيتها بعصبية..

أرقم : يعني هم اخذتيه على طمع وراح تخونيه مجرد تسمح الفرصة ..

تقربت منه رفعت ايدي ردت اضربه لزمها وكال..

أرقم : اكسرها والله اذا انعادت..

أسمار : يا اقذر ما خلق ربي ، لعلمك ما راح اترك أديم واخليك تخوض وياه معارك وحروب ويخسر بيها ، وانت الخاين والمجرم بهاي المزرعة بس تتلون مثل الحرباية تغير جلدها حسب الظروف

أرقم : وشنو فرقج عني انتِ هم زواجج عن مصلحة ..

أسمار : شجاب هاي على هاي ليش عندك اصرار تخليني احجي اني متزوجته على مصلحة ومو حباً بيه؟

ضحك وكال..

أرقم : هذا هو اخذت جوابي..

أسمار : دروح بابه

عفته ومشيت دخلت للبيت جنت عصبية وارجف لو بيدي اروح احفرله حفرة كبيرة خارج المزرعة واطمه بيها بنص البزل ..

اخذت موبايلي حتى اتصل على أديم اخاف يوصله الخبر بشكل سيء على الاقل اكون سابقتهم ، فتحت الشاشة لكيت مسج منه دازه قبل ساعات يعني قبل جية أبسم كاتب بيه..

( قد يمنحك القدر شخصاً يعيد لك اتزان قلبك، قالوا من في قلبك ، قلت جميلة من الجميلات كنت يوماً اسير بجانبها اخاف أن ادوس على ظلها ف تتألم )

قريتها نزلت دموعي ، شلون كتبها معقولة وحده لو احد ساعده ما اعرف المهم فرحت بالمسج كلش وحسيته كتبه بروحه ، اتصلت واني مبتسمة يدك ويفصله اخر شي انغلق ، ظل بالي ، كلت احتمال عنده اجتماع تركت الموبايل وكمت اشتغل ، خلصت كم شغلة ونظفت البيت سويت غداء غديت الاولاد وأديم بعده ماجاي وما وصلي منه خبر ، رجعت اتصلت هم مغلق اتصلت على إيساف يرن يمه وما يجاوب ، بعد عدة محاولات جاوبني..

إيساف : ام اياس هلا..

أسمار : شلونك شيخ انت وين ؟

إيساف : كبال مدرسة خالتج..

أسمار : رايح ترجعها؟

إيساف : لا بس ردت اشوفها وارجع اشتاقيتلها..

أسمار : حاجيها وجيبها وتعال ليش هذا العذاب .

إيساف : رافضة ترجع ومصممة على موضوع الطلاق ولو شنو تسوي ما راح اطلك..

أسمار : وهسه ماراح تحجي وياها يعني ؟

إيساف : ابد بس منتظر كبال مدرستها تطلع اشوفها وارجع.

أسمار : راح تخبلوني ال الغريب ، المهم وين أديم اتصل مغلق ظل بالي.

إيساف : ما اعرف وصلته للشركة وطلعت لبغداد

أسمار : زين تكدر تتصل على احد بالشركة يشوفه وين شوكت يرجع ظل بالي عليه..

إيساف : تمام هسه اشوف واردلج خبر.

أسمار : اي والله ياريت ..

إيساف : يلا شوية واتصل...

من سديته وياج طلعت كبالي كأنما نسمة وتمشي بالكاع ، صوت الكعب كأنما يدك بكلبي ، منعني الكبرياء انزل التفتت شافت سيارتي اتسعت عيونها وشهكت بس رفعت راسها ومشت صعدت بالخط مالتها مشيت وراها بالسيارة لحدما نزلت للبيت وسدت الباب واني جاي هسه بالطريق ..

أسمار : يعني ما نزلت ولا سلمت جان نهيت كلشي وجبتها اني محتاجة خالتي هوواي ..

إيساف : راسها يابس وما اظن راح تسمعني اريدها ترتاح وتراجع نفسها وبعدها اروحلها ...

أسمار : الله يهدي النفوس وهسه انت بالطريق ؟

إيساف : اي.

أسمار : اتصلت على أديم ؟

إيساف : لا هسه اتصل واردلج خبر.

أسمار : ماشي ، سده وراح..

أسن : والمطلوب مني شنو اسوي ؟

أسمار : تنطيه مساحة تخليه يجي ويحجي وياج ، إيساف خوش رجال ويحبج..

أسن : ما اكدر اذا ما يثق بية مثل ثقة الاعمى بعكازته ما ارجع.

أسمار : راح تخسرين حياتج الحلوة وياه ، خالة هو يحبج ومدللج ويموت على انفاسج ليش تنكرين كلشي بلحظة غضب جنتوا اثنينكم تعبانين بيها.

أسن : ما ارجعله اذا ما اتوبه توبة نصوحة..

أسمار : الله يهدي سركم خلي اجاوبه كاعد يتصل بية وصيته يشوفلي أديم وين.

أسن : تمام الله وياج بوسيلي اياس وتميم وسلامي للحجية وأفنان وباقي الولد..

أسمار : تمام ياعمري يوصل.

سديته منها وجاوبته..

أسمار : نعم شيخ.

إيساف : عيوني أديم اليوم مسافر لأربيل بعد باجر يلا يرجع

أسمار : ويامن راح يروح وشو ماعندي علم غير يكولي الصبح حجينا ما كال وملابس ماماخذ وياه..

إيساف : الظاهر فجأة مقررين.

أسمار : سياحة لو شغل ؟

إيساف : لا شغل وينه وين السياحة أديم.

أسمار : هو جاوبك وحجى وياك ؟

إيساف : لا موظف بالشركة خابرته وحجالي.

أسمار : منو راح يروح وياه من اخوانه ؟

إيساف : اعتقد أرقم.

فزيت من ذكر اسمه

أسمار : ارقم شنو شجابه عليه ؟

إيساف : ما اعرف هذا اللي فهمته ارجع للشركة واتصل عليهم وافتهم أكثر.

أسمار : تمام شكرا تعبتك وياية.

إيساف : ماكو اي تعب مع السلامة..

أسمار : الله وياك..

سديته منه والهم اكلني والتفكير صار ياخذني ويوديني، أرقم راح وياه ليش مو باقي اخوانه ، اكيد عنده شي وراح يدبرلي مكيدة فكرت أتصل بأسمر واحجيله كلشي صار بس من اتصلت جهازه مغلق راسلته كتبت ، محتاجة احجي وياك ضروري من تشوف المسج إتصل علية ، دزيته وكعدت اكل بروحي واظافري خلصتهن ، خلص الليل واجى ثاني يوم والموبايل مغلق وماكو اي اتصال من أديم ، رحت لأفنان طلبت منها تتصل بأرقم حتى احجي وية أديم واشوفه وينه خابرته طمنها ورفض ينطيني أديم احاجيه...

مرت ٣ أيام على اعصابي عشت بتوتر مو طبيعي ، رجعوا واجتي ميمونة كالت خالة أجى عمو أديم يم بيبي كاعد ، لبست ورحت سلمت ردلي السلام بطريقة باردة ومستفزة ، سكتت عرفت السبب أرقم او احتمال لان حجيت وية أبسم كلت بعدين افهمه بيني وبينه ، رحت وية البنات حضرنا الغداء صبيناه تغدينا واني كعدت اكلت بدون نفس مجرد سد جوع ، احجي وياه اساعده بالاكل يسوي العكس كأنما ماكو شخص يمه كاعد سحبت نفسي ورحت للبيت انتظرته على نار يرجع واحجي وياه وما اجى ولا وصل بقى يم الحجية ، بالليل اجتي أفنان دكت الباب ودخلت ..

أفنان : صاير شي بينكم سمرة.

أسمار : بيني وبين منو ؟

أفنان : بينج وبين أديم ..

أسمار : لا ليش؟

أفنان : طلت اخذله ملابس ويريد يبات يم الحجية بغرفتها والصراحة اني وامي استغربنا الوضع شلون يبات يمنا وهو جاي من السفر المفروض يكون مشتاقلج وحتى للبيت ما وصل..

أسمار : خليه براحته احتمال مضغوط..

أفنان : هسه شنو اسوي اخذ ملابس لو تحجين انتِ وياه .

أسمار : لا اخذيله وخليه براحته ..

أفنان : تمام انطيني عيني لبس لباجر واذا بقى يمنا ارجع اخذ منج .

أسمار : تمام.

طلعت قاط وباقي التفاصيل الخاصة بملابسه وخليتهم بكيس كبير مال ملابس ونطيته الها اخذته وراحت ، بالليل اختنكت اتصلت عليه يرن وما يرد ، للصبح  مانمت ولا غمضلي جفن ، ثاني يوم نفس الشي والثالث واسبوع مر واني على نفس النار والحركة وهو لا اجى ولا بين ولا عاتب ولا نطق بحرف وياية ، اتصلت على إيساف وطلبت منه يخليه الموبايل يمه ويفتح سبيكر ضروري احجي وياه نفذ طلبي وبلغني ثواني ويطلع من مكتب أديم حتى يحجي براحته وياية..

أسمار : الو أديم تسمعني؟ أديم احجي وياك ، أكثر من مرة طلبت احاجيك وانت رافض شنو السبب ممكن اعرف ، بيتك ليش ما تبات بيه شكلي مو حلو كدام اهلك وانت تارك البيت بدون سبب ، أديم احجي وياك الو حبيبي سويت شي خطأ ؟ لو لأن حجيت وية أبسم اخذت موقف مني ، بس اكو اشياء حجاها لازم يكون عندك علم بيها صدكني انت مفتهم خطأ....

انسد الخط بوجهي ، استغفرت ربي وسكتت ، الظهر جنت كاعدة انفتح الباب وفات كلبي صار شكبره كمت رحت سلمت عليه رفع ايده محذرني اقترب منه ، توجه للإستقبال كعد رجل على رجل تقربت منه لثمت قبلة على عنقه ، دار وجهه للجهة البعيدة بعد سكوت دام اكثر من دقيقة تنهد وكال..

أديم : حجزتلج طيارة يوم الخميس تسافرين لأهلج.

حاولت اسيطر على دكات كلبي والتوتر اللي عشته بسبب سماعي كلماته اللي نزلت مثل السيف على رقبتي..

رجع راسه ليورا وغمص عيونه ، وجهه شاحب لونه ابيض، عيونه تعبانة نفسه ياخذه بصعوبة ، الرجل اللي يغلي شوق وحب بين اذرعي هياته كدامي بارد ابرد من الثلج واحر من الجمر مايشبه حبيبي ولا كد قطرة الندى ، هذه النظرة اللي باوعني بيها حسيتها اعلان للنهاية بيني وبينه نظرة ألم وقهر واحساس بالغدر والخيانة اللي اني بعيدة كل البعد عنها ، باوعلي بنظرة خذلان ، بلع ريكه وما همته شهكاتي وتوسلي واني اريد افهم سبب سفري اللي بدون مقدمات وبدون سبب..

أسمار : أديم وين موديني ليش حجزتلي اني ما طلبت منك تحجزلي حتى اسافر ..

عدت الجملة للمرة الخامسة يلا جاوبني...

أديم : من أمن العقوبة أساء الأدب..

أسمار : هاي وياية ؟

أديم : اكو احد غيرج هنا ؟

أسمار : شنو سويت ؟

أديم : سويتي اللي ما يغتفر بدون اخذ وعطاء تروحين تنفذين اللي امرتج بيه.

أسمار : واذا رفضت شنو راح تسوي ؟

أديم : تعيشي بجحيم ..

أسمار : أرقم حجى وياك صح وخلاك تقلب علية ، لأن شافني احجي وية أبسم..

تقرب للأمام عدل كعدته وشبك كف بكف بطريقة عصبية وكال بغضب..

أديم : اللي سويتيه خارج نطاق حدودج اللي رسمتها الج ومادام تصرفتي من راسج اني راح اتصرف باللي يعجبني وادزج من وين ما اجيتي..

غضبه وطريقة كلامه خلاني افقد توازني فقدت القدرة على النطق تقربت منه جريت نفس وبعد سكوت طويل تجرأت همست..

أسمار : أبسم بريئ وشهد انقتلت على ايد واحد من اخوانك ونفسهم يريدون يأذوني بيك والعكس يأذوك بية ليش تنطيهم هاي الفرصة..

التفت علية وعاط.

أديم : انت نطيتيهم السيف وعلمتيهم على الطريقة اللي يذبحوني بيها..

أسمار : الثعبان وياك بالمزرعة ساكن صدكني ويريدون ابعد حتى ياخذون راحتهم ويأذوك..

أديم : ابيعها وطز بالمزرعة واللي بيها حشا الحجية اخذلي شقة او بيت صغير قريب على شغلي واصلا اني ما اشوف على شنو مبقيها..

أسمار : تبيع المزرعة وهي ورث ابوك وتخالف وصيته شلون ينطيك قلبك تتخلى عن اجمل ذكرياتك بيها حبيبي هسه انت تعبان وصحتك مو زينة واخذت القرارات بلحظة غضب اروح  وانت ارتاح وبعدين نحجي..

عاط بصوت خرسني بمكاني..

أديم : صحتي مو شغلج وراحتي هي بالبعد عنج ..

أسمار : أديم لا تحجي شي بعدين تندم عليه..

أديم : اندم اصلا نادم لأن رجعت وثقت من جديد وسلمت روحي لوحدة شبه شهد بهواي صفات..

أسمار : نادم لان وثقت بية ؟

أديم : اي واعتبري زواجنا انتهى واساسا جان غلط من البداية واعتبريه ما صار..

أسمار : شنو اللي اعتبره ما صار والحب واللهفة والاشواق والايام الحلوة اللي عشناها وباقي التفاصيل كلها هيج تروح ؟ كل عقلك تحجي وياية أديم اصحى من الكابوس اللي انت بيه.

أديم : كافي تضحيات وعيشي شبابج وية رجال يشوف تفاصيلج ويتغزل بيها واني كاعد انطيج حريتج قبل لا تغدريني وتضربيني بظهري..

اسمار : اني اغدرك واضربك بظهرك اني سمرتك شلون تحجي وياية هيج راح تخبلني ، منو ما ينام اذا مو بحضني منو يكول انتِ عوضي..

أديم : جذاب لأجل مصلحتي جذبت شنو يعني اول واحد اخر واحد يجذب ..

أسمار : ما اصدك بكلامك افعالك تحجي شي ثاني..

أديم : عاشت ايدج على التنازلات اللي قدمتيها لرجل اعمى وعاجز وكافي تدعين الحب بدافع الشفقة وهاا اذا طلعتي منا راح توصلج حقوقج كاملة وأأمن مستقبلج ومستقبل اياس من توصلين راح تلكين فلوس بحسابج بالبنك واي شي تعبتي وياية بيه سواء بتعليمي او خدمتي او متعتي وصلتلج ارباحه...

أسمار : انت شلون تحجي وياية هيج تخبلت ، تعتبر خدمة زوجتك ومعاشرتها تنازل ؟ انت مو صاحي وأحلف عليك شارب شي لو متعاطي لان مو معقولة كلامك هذا بحقي اني ما سويت جريمة اذا وكفت دقايق حجيت بيها وية اخوك حتى افهم واحمي نفسي واحميك واحمي اولادنا من شر ما معروف شوكت يظهر..

ابتسم ابتسامة خبيثة وكال..

أديم : حلو زوجتي تحميني وتحمي ابني والمفروض يكون العكس ، انتِ ملاحظة لغيتي وجودي كرجل بحياتج ترى اني مو اياس ولا تميم اني أديم زوجج للتذكير يعني..

أسمار : رجال وستين رجال منو كال العكس تحميني وتحمي المزرعة كلها ، حبيبي اني اقصد على المكائد اللي كاعد تنحاك من وراك.

أديم : وانتِ من ضمن هذه المكائد..

أسمار : شلون يعني ما فهمت ؟

أديم : ما تفرقين عنهم بشي ..

أسمار : ما راح اخذ كلامك بعين الاعتبار لأن اعرف تعبان وضايج مني لأن حجيت وية اخوك بدون علمك ورضاتك من ترتاح نحجي.

أديم : راحتي بطلعتج من المزرعة ..

أسمار: ما راح اطلع واحتمال اكون حامل بطفلك اروح وبركبتي ثنين اطفال مستحيل..

أديم : ماخذ احتياطي مستحيل يصير حمل.

أسمار : واني شاكة بهذا الشي.

أديم : اذا شاكة قبل السفر نروح وتنزليه..

أسمار : لا انزل الطفل ولا اسافر وشنو تسوي سوي..

أديم : ينزل وغصب عنج.

أسمار : انت شنو تريديني اقتل ابنا ليش مستخسر على نفسك تكون اب مرة ثانية وتحضن طفلنا وتحسسه بحبك ليش انزله يعني .

أديم : كاعد نحجي عن فرضيات واحتمالات لا وجود الها ، اني عرضت املاكي للبيع وحجزتلج تذكرة وأودعت ما يكفيج ويكفي ابنج بالبنك لهذا اتمنى ما تطيلين الحديث والبقاء..

أسمار : اولاً اني مو سلعة رخيصة شبعت منها وشمرتها ومن تقرر تنهي لازم اكون اني على علم وقبول بهذا الشي ، ثانياً أتأكد من عدم حملي وماكو خطر على حياة طفلي يلا اسافر اذا اقتنعت بهذا الشي..

أديم : ادمرج والله ..

أسمار : واني مرحبة بهذا الدمار..

أديم : لا تتحديني

أسمار: ما اتحدى بس حياتي حابتها ومستحيل اتنازل عنها بسبب لحظة غضب وتحريك من ناس قذرة.

أديم : وشجابج على هاي الناس القذرة وتحجين وياها واني مانعج منهم.

أسمار : اقصد أرقم بكلامي.

أديم : وعارف قصدج كلش زين..

أسمار : اني زوجتك مو موظفة عندك بالشركة وتطردها بهيج طريقة رخيصة..

أديم : اذا بقيتي هنا حتى الهواء احسبه عليج لا راح تشوفين حنية ولا معشر حلو ولا اسلوب واي شي تطلبيه يصير العكس حرب تصير بيني وبينج..

أسمار: واني كد هاي الحرب.

أديم : لا تتحديني أسمار..

أسمار : يرجعلك عقلك يلا اترك المزرعة..

أديم : تعانديني.

أسمار: اذا اتطلب الأمر اي اعاندك في سبيل احافظ على حياتك وحياتي وحياة الأولاد ، وادافع عن بيتي لآخر نفس بية..

أديم : لا تتحديني اسمار تخسرين هواي..

أسمار : ليش تغيرت وليش تسمع من غيري وما تسمعني.

وكف وتقرب مني كاز على اسنانه بغضب كال.

أديم : كل الناس تتغير ومن ضمنهم انتِ

أسمار : اني ما تغيرت وانت وعدتني باخر ليلة ماراح تتغير وتسمعني.

أديم : سمعتج اكثر من مرة وهذا القرار اخذته من سماعي لكلماتج و بصوتج..

ظليت اباوعله بحيرة وشكي زاد حاولت اقرأ افكاره لأن يحجي بالغاز ورافض يحجي بصريح العبارة ويبرد كلبي.

أسمار : أديم..

قاطعني وكال..

أديم : ودينج التركتيه علمود واحد تافه ومنحط إلا اعيشج المر واخليج تتمنين ما شفتيني بيوم من الأيام..

يتبع..
مساء الخير حبايبي
ومتابعة ممتعة...