رواية أحببتُ ذلك الغريب الفصل الثاني وأربعون 42 - بقلم عبير إدريس

ما تلكى مثلي وياك سهران
يبقى يحبك حتى لو خسران
شعل عشرة اصابع وما ترك واحد يعضه لو طلع غلطان
بعت حيلي على طولك وماكلت ندمان .
وجنت اكيف بيك
چن لعبة واشتريتها بيومية العيد
حيل شكد خسرنا
ايام وسنين وانا على هجرك مزاعل العيد..

بقلم
عبير إدريس

___________________

خالتي ظلت تباوع ما مفتهمة القصد من سؤاله كرر عليها السؤال بصيغة اتهام..

إيساف : أسن للمرة الثانية اسألج هذا شنو ؟ شيسوي بغرفتنا!!

بتعب كالت..

أسن : شنو بيدك ؟ غير اعرف أول حتى اجاوبك ..

إيساف : اللي بيدي حبوب اجهاض يا ست..

ضحكت بتعب وكالت..

أسن : بمعنى ؟

إيساف : بمعنى حركتي كلبي وسقطتي ابني متقصدة..

أسن : يعني تحجيها بوجهي عادي ؟

إيساف : عجل شلون تريديني احجي وياج اجي اضحك ؟ لو اصفكلج ؟

أسن : يعني هسه انت مقتنع اني ماخذة شي حتى اسقط الطفل ؟

إيساف : اذا اكو تفسير ثاني ياريت يتوضح ...

وخرت الغطا منها حاولت تكوم ماكدرت حست بألم منعها ،مدت ايدها وهمست..

أسن : أسمار انطيني ايدج ساعديني..

تقربت منها دنكت وهمست..

أسمار : وين رايحة تعبانة انتِ..

أسن : كعديني واصعدي شكو عندي ملابس تنزليهن ادري راح اتعبج بس تدرين بية امون عليج..

إيساف : جاوبيني أسن لا تتجاهليني راح انجن ..

أسن : بالنسبة الية ما افسر شي مادام الثقة بينا انعدمت معناها ماكو حياة تجمعنا والايام راح تفسرلك كلشي مو اني اكعد ابررلك فعل اني بريئة منه وتريدني استمر بعدها وياك عادي..

إيساف : الكلام اخذ وعطاء واني من حقي اسأل.

أسن : انت ما سألت بل اتهمتني مباشرة..

إيساف : تعالي فهميني وين رايحة؟

مشت لازمة بطنها واني ساندتها وصلتها للصالون كعدت على القنفة ردت اصعد اجيب ملابسها منعني إيساف اروح.

إيساف : اصبري لا تسايريها بالتريده بعدها تعبانة وين رايحة ؟ وخلي ابالج أسن شنو تسوين ما اخليج تعتبين عتبة الباب..

أسن : هسه شنو تريد ؟

إيساف : هذا شجابه بغرفتنا ؟

حجاها ورفع علب الادوية بيده...

أسن : برأيك انت اذا اني ردت اسقط الطفل بدون علمك راح اترك العلب بالغرفة لو اخفيهن ؟

بقى يباوعلها بشك بين اللي مصدك كلامها وشايفه واقعي وبين رافض الفكرة وحابب يصدك اللي شافته عيونه.

أسن : يلا جاوبني..

إيساف : طيب اجي وياج عجل شنو تفسير وجودهن بغرفتنا..

أسن : اي اني حبيت اسقط نفسي هيج جنت كاعدة ضايجة وكلت روتين ممل ليش ما اغير بنفسي واسقط ابني وسقطت، ضايعلك شي يمي لا ..

جانت تحجي بطريقة تستهزء بيه ، هو ما تحمل صار عصبي ولأول مرة اشوفه يتنرفز بهذا الشكل، دائما رزن وهادئ ويعرف شلون يوزن الامور بس اللي صار خبله ، فقدانه لأبنه وشكه بخالتي وطريقة كلامها وياه ، ضرب الجام مال باب الهول وكام يصيح بعلو صوته..

إيساف : طلعوها من البيت ما اريدها بعد ولو شنو يصير ما تصيرلي مرة ، ما اريدها ما اريدها ..

لزموه الولد واخذوه برة يهدأوه رافض يسمعلهم ومستمر يصيح...

أسن : أسمار بسرعة نزلي هدومي واذا ماقبلوا يوصلوني خابريلي خالج يجي..

أسمار : خالة اثنينكم اعصابكم تعبانة ابقي اليوم هسه يرتاح وتحجون وتفهميه باللي صار وتنحل الأمور على ايديكم..

أسن : أسمار مادام شك بية بدون دليل قاطع يثبت اني هيج سويت ما اصيرله مرة بعد ، اليوم شك بية سقطت الطفل باجر عكبة يصدك كلشي يسمعه عني ..

أسمار : ليش تعتبريه اتهام اعتبري اللي حجاه عتب ..

أسن : العتب يكون بيني وبينه على انفراد او ييجي يستفسر اول بدون هجوم ويفهم مني يلا عود اذا ما عجبه يحاجيني بنرفزة وقلة ذوق وهم ما اسمحله..

سكتت شفت وياها الحق وانتظرت يهدأون ونرجع نحجي وياهم ، أديم جان ساكت ويستمع و الحجية جانت تهدأ بالوضع بس ماكو فائدة ثنينهم نار صايرين..

صعدت لميت ملابس اللي تحتاجها والاشياء الضرورية خليتها بالجنطة ، وتركتها فوك من نزلت ،سألتني كلتلها بعدني ما صاعدة ، بلكت تهون عن قرارها وتترك الطلعة من البيت..

رجع إيساف للصالون وكعد يحاجيها ،حجاية منها حجاية منه كبرت المشكلة ، ما انتهت الا وخالتي صاعدة بالسيارة وية أهاب ، من عتبت الباب حلف إيساف يمين اذا طلعت ما ترجع ، التفتت عليه همست ...

أسن : مع الأسف عليك والله..

حجتها ودارت وجها ومشت..

رحت للبيت على السريع لبست ملابس طلعة ورحت لأديم استأذنت منه حتى اروح وية خالتي نوصلها وارجع تقربت منه جان مكتف ايده وعاقج حواجبه..

أسمار : أديم اريد اروح وية خالتي وضعها تعبان نوصلها وارجع..

التفت علية وبقى ساكت..

أسمار : أديم سمعتني ؟

أديم : تمام.

أسمار : اروح يعني ؟

أديم : كلت تمام..

حجاها وتركني متوجه لبيتنا..

رحت صعدت ليورا يم خالتي ، بعدها اجى أهاب وصعد باوعلنا بالمرايا وسوة حركة بحلكه مستحسف الصار ، الطريق كله ساكتين لان اعرف اذا حجيت ما راح اغير شي طبع خالتي معروف صعب ترضى وتتجاوز المشكلة اذا ما اخذت مساحة تامة وكافية تفكر بيها وتقرر بعدها ، هي من النوع اللي لا تنطي وعد بلحظة سعادة ولا تقرر بحالة غضب..

وصلنا لبيت جدو نزلت وياها دخلنا ويانا أهاب سلمنا على بيبي وفهمناها سبب جية خالتي لأن طرحت وتريد ترتاح يمهم ما جبنا طاري المشكلة حتى خوالي ما يتدخلون بيناتهم وتكبر..

ردة فعل بيبي حالها حال اي أم اتجاه بنتها من تسمع صايرلها هيج شي..

بعدها استأذن أهاب حتى نرجع لأن ورانا طريق طويل ، سلمت صعدنا السيارة وانطلقنا ، ماحجينا الا قليل جنت تعبانة وهو حس علية لهذا ما لح وياية من اول سؤال حس بتعبي وقدر هالشي.

وصلنا من بعد تعب كبل رحت لبيتي ، اول ما فتت لكيته كاعد بالاستقبال وحاط المخدة والغطا معناها اليوم هم راح ينام خارج غرفتنا تركته براحته ، سلمت ودخلت غرفتي غيرت ملابسي ورحت للحمام سبحت وطلعت رحت يمه سألته.

أسمار : متعشي ؟

أديم : الحمدلله.

أسمار : تحتاج شي لو انام؟

بقى ساكت ، همست.

أسمار : تصبح على خير..

جاوبني بضجر.

أديم : تلاكيه..

تركته ودخلت الغرفة مددت على السرير وسارحة بافكاري واللي صارلنا اني وخالتي بيوم وليلة انقلبت حياتنا من سعادة للجحيم شلون هيج وليش ما نعرف.

غطيت راسي وحاولت انام من بعد صراع مستمر من التفكير تغلب علية النعاس ونمت...

ثاني يوم كعدت ما لكيته رحت للمطبخ سويت ريوك وريكت الاولاد دخلتهم واحد بعد الثاني سبحوا وطلعوا درستهم طولت وياهم ساعتين بعدها طلعوا للبيت الجبير..

مر اسبوع نفس روتيني الممل واني وأديم على نفس الحال هو بجهة واني بجهة ينام خارج الغرفة وما نتلاكى لا بأكل ولا بسالفة ، اخلي الصينية كدامه واروح مرات الكاه ماكل ومرات يروح يم أفنان يتغدا وماعرفت سبب هذا التغيير لأن رافض يحجي ، جنت اخابر خالتي واهلي كل يوم واتطمن على حالتهم ، إيساف ما شفته غير مرتين بالصدفة وما حجينا لأن جان ضايج وتعبان بشكل ، بس سمعت منتظر نتائج التحاليل تطلع ويعرف سبب الاسقاط وعلى اساسها يقرر شلون يتصرف وهذا اللي خبل خالتي وخلاها تقفل عليه بالزايد..

بيوم جنت كاعدة ومن الملل اللي اني بيه دخلت للمطبخ بديت اعزل صارلي فترة ممعزلته مجرد تنظيف بسيط كلت التهي احسن من التفكير رغم هو نظيف بس طلعت اغراض الكاونتر وبديت اجلف بيهن ، الهدوء اللي بالبيت قاتل ويسبب ملل وضجر للواحد خصوصاً اذا جان بداخل دوامة من التفكير المستمر، رحت شغلت الراديون طلعت اغنية لأحلام حسيتها تمثل حالتي صعدت الصوت وبديت اغني وياها من خلصت شغلتها بموبايلي الى ان حفظتها ...

حبني أو حب غيري
صرت في عمري خيال
قانعه و اعرف مصيري مالي بقلبك مجال
كاذبٍ انت أو صريح
ما يصح إلا الصحيح
لا تغش روحك و روحي
لا تخون الصدق لا
انا بتحمل جروحي هذي ماهي مشكلة
القوي ما تهزه ريح و ما يصح إلا الصحيح
ادري حبيتك و حبي من طرف واحد فقط
كنت أعاند فيك قلبي و أجبره و هذا غلط
يوم انا شفته جريح
ما يصح إلا الصحيح
أنا ما أعلن عنادي لا ولا ابدي غرور
بس صار الامر عادي غيبتك مثل الحضور
قلت أبعد و استريح و ما يصح إلا الصحيح .

اشتغل واعيد بيها واغني التفتت لكيته واكف بباب المطبخ ويباوع على الجهة اللي اني بيها حسب مصدر الصوت اللي يصدر مني ، وجنت اغني بمقطع. .

(أنا ما أعلن عنادي لا ولا ابدي غرور
بس صار الامر عادي غيبتك مثل الحضور
قلت أبعد و استريح و ما يصح إلا الصحيح )

بقيت اباوع عليه وكملت الاغنية وعدت المقطع نفسه واتفرج على تعابير وجهه شلون تتغير ويبلع ريكه بصورة عصبية متوتر ، لزم مقبض الباب وهمس..

أديم : اكلتي

رديت باستغراب لان صارله فترة ما يسألني عن احوالي وحتى السلام انعدم بينا..

أسمار : وياية ؟

أديم : ليش اكو احد غيرج هنا واني ما شايفه ؟

أسمار : لا ما اكلت.

أديم : ليش؟

حجاها عاكد حاجبه..

أسمار : ما مشتهية..

أديم : شنو السبب ؟

أسمار : روحي كارهة الاكل مثل ما كرهت كلشي بهذا المكان وملته.

أديم : كارهة كلشي ؟

أسمار : اي ..

أديم : حتى اني؟

حجاها وغمض عيونه منتظر جوابي على نار ، سكتت ما رديت وبردت كلبه.

أديم : أسمار سمعتيني شنو حجيت؟

أسمار : ها بعدك واكف عبالي رحت اسفة رجعت السماعة باذني وكاعد اسمع اغاني..

أديم : من شوكت تتجاهليني ؟

أسمار: ما تجاهلت بس سألتني وجاوبتك ورجعت اكمل شغلي..

أديم : اي بس كاعد احجي وياج ما كملت كلامي حتى ترجعين تشتغلين.

أسمار : تمام تركته يلا احجي اسمعك..

حجيتها وكمت رحت يمه وكفت قريبة عليه، تحمحم وكال..

أديم : يوجعج شي؟

أسمار : شنو ؟

أديم : متوجعة من شي؟

أسمار : لا ليش؟

أديم : اليوم الصبح بدون قصد مني اتسمع عليج بس لفت مسامعي كلمة وخلتني اركز وياج بالاتصال جنتي تحجين ما اعرف وية منو وشكيتي من وجع قلبج..

أسمار : اي يوجعني وحيل مأذيني.

بلع ريكه بخوف وقلق ، اخذ نفس عميق بعدها كال..

أديم : اوديج دكتور ؟

أسمار : علتي محد يعرفها لا دكتور ولا غيره..

أديم :عجل منو يعرفها ؟؟

أسمار : انت..

حجيتها وتقربت منه اكثر، رجع خطوة ليورا وتحمحم...

أديم : اصبري افهم شنو بيج لا تخوفيني.

أسمار : يوجعني كلبي ومتأذية منك

أديم : تكذبين علية حتى اقلق واخاف عليج صح ؟ لأن تدرين.....

وسكت ماكمل كلامه ، تقربت منه حاوطت رقبته بايدي وهمست بأذنه..

أسمار : المفروض مني اقنعك صح ؟

أديم : أسمار !!

اخذت كف ايده خليته على جهة قلبي بصوت عذب همست، حسيت بيه يرجف بس يحاول يتماسك ويبين ثابت كدامي..

أسمار : تحسس بنفسك وشوف متأذية لو لا ؟؟

مررت ايدي على كتفه وصدره بدافع الحب والاشتياق اخذتني مشاعري وسافرت بيها واني متعلقة برقبته واباوعله بنظرات حب وتودد ، رفعت نفسي على اطراف اصابعي و حضنته بقوة ، تأوه بصوت اقرب للهمس ، تنهد وتحركت ايده بلهفة وحب وامتلاك ، ظهرلي حبه واشواقه ولهفته بشكل جنوني بادلني الحضن لدرجة راد يكسرني بين ايديه ، من بعد عناق عاصف ما حسيت الا واني باحضانه بداخل غرفتنا ..

مرر ايديه على شعري همس..

أديم : غرستي سكين بكلبي بيوم طلبتي حبي ورفضتج ، وبعدها بعصبية جاهلة وتصرف متهور حجيت كلام لو ميت يا سمرة لو ميت وما حاجيه اسف اعذريني بس اللي سمعته منج مو قليل..

رفعت نفسي غطيت وجهه بايدي وكمت ابوس عيونه دفنت وجهي بشعره ، رجع همس..

أديم : المفروض اني اطلب منج الحب مو انتِ ، اني بحاجتج أكثر وبحاجة الاهتمام لأخر يوم بعمري وصدكي اني ابقى مقصر وياج واذا اذيتج مو بقصد..

أسمار : غير افهم شنو اللي سمعته وخلاك تتغير علية ؟

أديم : اتركي الموضوع هسه و خلينا مرتاحين بعدين احجيلج ونتعاتب ، خليني اتلمس هذه البشرة اللي تشبه الحرير ، اخ ذيج الايام نايم خارج غرفتج واتخيلج بحضني اسمع صوت تنهيداتج والبجي وادوس على نفسي اوصل للباب الزم المقبض حتى ادخل وارجع اتذكر اللي صار واروح انام ، من اغمض صورة وجهج كبال عيوني تنرسم اتخيل خفقان قلبج وانفاسج من جنتي بين ايدي يلا اكدر انام ساعة او ثنين بالاكثر ، تصدكين هالكد ما بالي يمج مجرد تتحركين او تنكلبين بالليل اني افز واخلي بالي وياج الى ان اوصل مرحلة اتعب بيها وبعدها انام..

أسمار : ياعمري يا اديم زين شنو اللي خلاك تحاجيني اليوم ؟ غير وجع قلبي احجي الصدك..

أديم : اول شي بالي يمج من سمعتج تحجين وتشكين من وجع قلبج تخيلي حسيت بندم لأن اذيتج و ضربت روحي الف مرة ولمتها ، وثاني شي قهرتيني من سمعتج تغنين بحرقة تكولين القوي ما تهزه ريح وما يصح الا الصحيح ، ودمرتيني بالأكثر من كلتي صار الامر عادي غيبتك مثل الحضور هنا متت كلت هذا هو راح تلحك خالتها وهنه ينطن دروس بالعناد والزعل وتعال يا أديم صلح وراضي ويمكن ما ترضى بعد...

أسمار : انت تعرف كلش زين قلبي ما ينطيني اتركك بس يا أديم احتمال توصلني لحالة اليأس وتخليني اترك كلشي وراية واروح..

خله ايده على حلكي وهمس..

أديم : اش الله لا يجيب الفراك اسكتي

أسمار : دير بالك علية مثلما اني دايرة بالي عليك ومن يصير شي عاتبني يلا تبدي تعاقبني مو العكس افهم مني وخليني اوضح الصورة احتمال اكو سوء فهم ونحله مو صحيح ؟

أديم : صحيح ياعيون أديم .

بعدها حضني وغطيت بنوم عميق ، من بعد تعب وقلة نوم وتفكير وقهر ، اخذتني النومة ما حسيت الا والنهار فايت وداخل الليل كعدت الغرفة ظلمة شغلت ضوء التيبلام مطيت جسمي التفتت على مكانه ما لكيته ، اخذت ملابسي وطلعت من الغرفة اول ما فتحت الباب لكيت بوجهي لوحة تشبهني بس بيها خربطة شوية تقربت اخذتها بيدي وتفرجت تفاصيلها...

الشعر لونه احمر مخربط والعيون نعسانة تشبه عيوني اول ما اكعد من النوم ، الكحل سايح من العين وبدايه الثوب لونه احمر ، ضحكت ، رحت للإستقبال لكيته كاعد مصعد رجليه على الطبلة ومرجع راسه ليورا مغمض عيونه و عاكد حاجبه..

أسمار : حبيبي..

فتح عيونه وهمس..

أديم : نعم حبيبتي كعدتي صح النوم..

بلهفة سألت وتجاهلت سؤاله...

أسمار : هاي اللوحة منو راسمها ؟

ابتسم بحب وبفخر همس..

أديم : اني..

فتحت عيوني وشهكت.

أسمار : كول والله انت رسمتها ؟

أديم : وعيونج اني..

أسمار : بس هاي مو نفسها اللوحة اللي رسمناها اني وياك تختلف..

أديم : صحيح هذه وحدة ثانية .

أسمار : شوكت بديت ترسم بيها ؟

أديم : من يوم اللي شفتج بديت ارسم ردت اسويها الج مفاجأة لهذا ما حجيتلج عنها..

كمت اسأل بلهفة...

أسمار : وين رسمتها هنا بالبيت ما اعتقد لأن ماشفت بيدك لا فرش ولا غيرها ومنو ساعدك متلهفة اعرف ، حبيبي كمت تشوف صحيح الله عليك فهمني احس قلبي راح يتوقف عن النبض..

فتح ايديه واشرلي يهمس..

أديم : تعالي بحضن حبيبج واحجيلج..

رحت كعدت على رجليه حضني اخذ خصله من شعري بعدها عن وجهي وكال..

أديم : اول شي رسمتها بالشركة مو هنا ، ومو وحدي ساعدتني صديقة قديمة تعرفت عليها باحدى المشاركات من جنا بالاعدادية وبقينا على تواصل ، خابرتني قبل فترة احتاجت شغل لأخوها وشغلته وياية بالشركة ، ومن قررت ارسمج طلبت منها تجي وياه حسب فراغها ونرسم لوحتج ، شرحتلها تفاصيل الملامح والالوان وطلبت منها تساعدني وايدي بيدها خلصنا اللوحة بس جنت ضايج منج وما جبتها للبيت ، واليوم قبل لا تكعدين اتصلت على ولد يداوم وياية بالشركة كلتله اكو لوحة يم مكتبي مغلفة جيبها ، جابها واستلمها أحمد ، و طلبت من أفنان تفتح التغليف وتخليها كبال غرفتج من تكعدين تشوفيها..

أسمار : يا حبيبي شكد احبك.

أديم : يحتاج اعتذر بعد لأن بعدني خجلان منج.

أسمار : لا ما اريد تعتذر بس اريد تحبني وتحترمني وتحترم علاقتنا ..

أديم : صار يابه ، هسه جوعان ناكل لا ؟

أسمار : تريد الصدك ؟

أديم : اي..

أسمار : مابية اسوي شي.

أديم : ممم زين شنو رأيج تسبحين وتبدلين ونطلع نتعشا خارج البيت.

أسمار : ياريت كلش محتاجة اغير جو برفقتك.

أديم :يلا نصلي ونطلع.

أسمار : ماشي.

كمت مشيت خطوتين وهمس.

أديم : حبيبتي بعدج تصلين لو قطعتيها ؟

أسمار : لا بعدني..

ابتسم وهز راسه برضا بعدها كال..

أديم : اخذي راحتج عيني..

دخلت للحمام سبحت بعدها رحت لغرفتي بدلت وحضرت ملابسه وملابسي بعدها صليت وبديت اتجهز للطلعة من كملت ، دخل للغرفة غير ملابسه وطلعنا ، اللي اخذنا السايق كعدنا ثنينا ليوره..

حضنت كفه بكفي وهمست بأذنه..

أسمار : فرحانة كلش..

التفت علية ببطئ وميل راسه على راسي وكال..

أديم : الله لا يطفي هاي الفرحة وابقى دوم اسمع هاي النبرة الحلوة بصوتج..

أسمار : امين ويديمك الية..

أديم : يارب وانتِ هم..

وصلنا يم مطعم طبك السايق ونزلنا ، دخلنا لكيته حاجز طاولة قبل لا نوصل متصل عليهم ، كعدنا وطلبنا اكل ، العشا جان هادئ ورومانسي كله غزل واشعار وخواطر نتبادلها بيني وبينه جنت ابدي بأبوذية يكملها ببيت شعري وخاطرة والخ ، خلصت الامسية رجعنا ، لكيت الاولاد متعشين وية أفنان اخذتهم وراحوا ناموا ،دخلت لغرفتي نمنا كل شوية افتح عيوني اشوفه موجود يمي وابتسم اغمص عيوني وانام حس علية اكثر من مرة فزيت سحبني وقفل علية بحضنه و كام يربت على ظهري حسسني بأمان غفيت بعد ما حسيت غير الصبح..

سويت ريوك تريك وطلع للشركة وياه إيساف لأن شاركه الشغل بدل ابو الحر ، كامو يروحون ويرجعون سوية للبيت ، كلش ارتاح أديم وأمن من اخوه صار وياه وبالأخص إيساف كلش يرتاحله ، و بيوم رجعوا للبيت وخلقهم متكدرة سألت شكو أديم كال بعدين صعد إيساف لغرفته واحنا رحنا لبيتنا من كعدنا وتغدينا سألته..

أسمار : شنو صاير وياكم اليوم ؟

أديم : أسن متصلة على إيساف رايدة تعرف نتيجة التحاليل اللي اخذوها الها قبل لا تطلع من المستشفى ومن عرفت طلبت منه الطلاك.

أسمار : ياستار هاي شنو قبل شوية جنت احجي وياها ماكالت هيج شي.

أديم : هسه قبل لا نطلع من الشركة اتصلت عليه ..

أسمار : زين انت عرفت شنو سبب الاجهاض ؟

أديم : اي عرفت.

أسمار : شنو احجي يا أديم شكد خلكك طويل..

أديم : شبيج أسمار ما تشوفيني كاعد اكل..

أسمار : اعرف ما متعود تحجي بس والله مابقى عندي صبر ..

أديم : طلع عندها داء القطط وبسببه صار الاسقاط..

أسمار : وهذا العلاج بغرفتهم شنو ؟

رفع اكتافه وكال..

أديم :ما اعرف و هذا اللي خبل إيساف بالزايد.

هنا لعب الشيطان براسي وتأكدت من شكوكي بس زوجة ارقم شنو مصلحتها تخلي العلاج بغرفتهم اذا السبب داء القطط يعني طرحت منا خلوا العلاج عبالهم ماراح نعرف السبب لو فعلاً خالين علاج الها ومسقطه الطفل ومتفقين وية واحد بالمستشفى حتى تطلع التحاليل غير عن الحقيقة وبهيج يبعدون الشبهات عنهم ، زين اذا بعدوا الشبهات معناها خالتي بريئة بهيج حالة هي هم راح ترجع للمزرعة يعني مو مصلحتهم هذا الشي ، يووو راسي راح ينفجر اني وين وصلت بالتحليل خليها لوقتها احسن..

أديم : اهدأي شبيج متوترة باجر راح نروح لخالتج وان شاءالله ما نرجع الا وهي ويانا..

أسمار : صدك ؟

أديم : طبعاً..

أسمار : يارب ينجمع شملهم من جديد..

اول ما خلصنا الغداء وأديم شرب الجاي و مدد رحت اتصلت على خالتي ، حجيت وياها جانت قافلة على سالفة الطلاك وتدري بيهم راح يروحون ثاني يوم الها وكالت اذا اجوي ابلغ اهلي بالمشكلة واسافر ومناك انهي كلشي بيني وبينا لا يجي احسن ، ومن رحت العصر لذاك البيت وأفنان اتصلت على خالتي حتى الحجية تحجي وياها ، نفس الكلام عادته عليهم ، جان إيساف كاعد ومن سمع الحجي كال..

إيساف : خلص اتركوها براحتها..

عمرة : شلون يايمة مو كلنا نروح ونحلها بعد شنو ..

إيساف : ابد ممنوع احد يوصلها بعد واساسا اني حلفت اذا طلعت ما ترجع..

حجاها وصعد فوك تأزم الوضع بالاكثر، واختنكت رجعت للبيت خابرت خالتي واحجي وياها واقنع ماكو فائدة مليت وسديته، كمت اقلب بالموبايل طلع فيديو كدامي اخذت منه فكرة ، ونفذتها ، رحت طلعت قوط أديم كلهن خليتهن على السرير وجبت خيوط وابرة وكمت اطرز داخل السترة من جوة احرف بارزة ، واللي اكملها اعلكها بمكانها ، وخليت جهة الحرف اول ما يفتح الكنتور من يتحسس ملابسه يعرف هذا يالون ويلبسه بدون مساعدتي من كملت رحت صحته ودخلته للغرفته لازمته من ايده توجهنا للكنتور جان مفتوح وبديت اشرحله الفكرة..

أسمار : حبيبي هذه الستر مال القوط مالتك نبدي من اللون البيجي طرزت من جهة اليمين اسفل السترة حرف A ..

مرر ايده تحسسه وهمس..

أديم : ليش هيج سويتي ؟

أسمار : حتى تعرف ألوان القوط وتلبس بدون مساعدتي..

ابتسم وهمس..

أديم : تمام هذا البيجي وبعد ؟

أسمار : واللي بصفه قاط نيلي طرزت عليه حرف B واللي بعده قاطك البني حرف C والبعده اسود حرف D..

وبقيت اعدد الى ان خلصت سرة القوط ، اخذته للقمصان وعددت ترتيب الالوان من اليمين لليسار ..

أديم : وهذا الترتيب راح يبقى ثابت هيج ؟

أسمار : اي بعد ما اغيرهن ..

ابتسم وحضني دفن وجهه برقبتي وكال.

أديم : بشنو اجازيج اني فهميني.

أسمار : دير بالك على نفسك وعلية كلشي ما اريد بعد..

أديم : ان شاءالله..

حجاها وتنهد، وخرته بخفة باوعتله ضايج ..

أسمار : شبيك ؟

أديم : مابية.

أسمار : لا صدك شنو بيك ؟

أديم :كلتلج مابية ياعيني..

أسمار : ازعل اذا ما عرفت...

أديم : باجر راح يطلعون ولد رحمن وأبسم.

أسمار : شنو وشلون وليش ؟

أديم : اني تنازلت عنهم.

أسمار : شو السبب شعجب هيج سويت ؟

أديم : رايد اخذ حقي بايدي واريد احسسهم بنفس الاحاسيس اللي حسيتها ، اعيشهم شعور الفقد لزوجاتهم للحظات اشوف يتحملون اللي تحملته اني ، تصدكين يا سمرة اعصابي تعبانة لدرجة ممكن انهار بأي وقت واخسر كلشي وشفتي شلون صرت وياج بالايام الفاتت..

أسمار : حبيبي اني وياك بأي شي يريحك.

أديم : عبالي راح تمانعين اذا تنازلت عنهم..

أسمار : وليش امانع اذا ولد الغريب راح ياخذون حق حبيبي مربع منهم..

ابتسم وسوى حركة بشعري خلاه يتهوس ضحكت ، بعدها مر اليوم عادي وطبيعي..

ثاني يوم راح وية أهاب وأسمر وإيساف وتنازل عنهم ، رجعوا للبيت ومقررين ينتقمون منهم اشر انتقام على اللي صار باخوهم بس يريدون يأمنوهم اول حتى لا يسافرون او يحسون بالخطر ، ومن الضابط سأل أديم ليش يريد يتنازل كايله الاظفر ما يتبرى من اللحم وعمر الدم ما صار مي ويبقون ولد عمي واللي وياهم اخوية واخذوا جزاتهم بهاي المدة وقررت اتنازل عنهم خاطر من خاطر حجى هيج حتى يبعد عنه وعن اخوانه الشبهات اذا صارلهم شي مستقبلاً...

وبعدها مرت الايام طبيعية ، واني مشغولة وية أديم والاولاد وعلى طول اتصالاتي باهلي وخالتي ما انقطعت منهم ابد ، وحاجيت إيساف اكثر من مرة حتى يصالح خالتي ويرجعها ويرفض بكل مرة احجي بيها وياه وصل مرحلة ما يريد يسمع اي شي عنها ولا يقبل يبادر، وهي نفس الشي ، ثنينهم راسهم يابس ورافضين فكرة التنازل والصلح بس اعرفهم يكابرون وميتين شوق على اللقاء وحابين يكونون سوة ..

مرات الكبرياء يقتل علاقات اقل ما يقال عنها رائعة وتندفن المشاعر والاحاسيس بالبعد وكلمن يلتهي بحياته بس تبقى نار الاشواق مشتعلة بقلبهم حتى لو رافضين الاعتراف بهذا الشي كدام الناس..

وبيوم من الايام طلع أديم للشركة وياه إيساف وباقي الولد كلمن راح لشغله واسمر كالعادة مسافر ومايكول وين من يسألوه شغل ومن يرجع ياخذ وضع السكوت وما يختلط بينا ولا يحجي مثل قبل صار انطوائي وحزين ، بهذا اليوم جانت بس أفنان بالبيت وأرقم وزوجته والحجية ، جنت كاعدة بالحديقة والأولاد يلعبون سوية سمعت صوت هوسة رفعت راسي باوعت الحارس يتعارك وية أبسم يمنعه يدخل ، كمت رحت يمهم من وصلت باوعلي أبسم وكال..

أبسم : بس احاجيج بداعة اعزاز كلبج..

أسمار : روح منا اخوك ما يريدك تدخل على شنو جاي؟وفوكاها تحجي وياية بيا عين صلفة..

أبسم : من يوم يومهم ظالميني لا تصيرين انتِ وياهم ضدي خليني بس احاجيج اللي صارلي ظلم بظلم واعرف طلعني من السجن حتى ينتقم مني بطريقته واني ما خايف على نفسي بكد خوفي على زوجتي واطفالي..

ضحكت باستهزاء..

أسمار : ومن خطفت اخوك وخليتهم يضربوه بابشع انواع الضرب ماحسبت حساب لأمه لزوجته لأبنه لأخته لأخوانه تحرك كلبنا عليه ليش متخاف الله وشلون تحركون كلبه بزوجته مو حرام عليكم ، تستاهل اللي راح يسويه بيك وعاشت ايده من هسه..

أبسم : بشنو احلفلج وتصدكيني من اخذناه منا ماجنت ادري راح يعذبوه عبالي يخلوه يعترف بس..

أسمار : على شنو يعترف؟ليش هو شنو عنده..

باوعلي ورجع باوع للحارس واشرلي عليه يعني ما اكدر احجي كدامه ، التفتت عليه وطلبت منه يتركنا وحدنا واحجي وياه من خلف الباب الحديد...

_ ستنا اعذريني ما اكدر اتركج وياه وحدج واساساً ممنوع يدخل لهنا..

أسمار : ما راح يدخل لا تخاف..

_ ما اكدر اني اتحاسب اذا عرف سيد أديم تاركج تحجين وياه بدون ما ابعده عن المزرعة..

أسمار : اني احجي وياه لا تشيل هم..

_ ستي كاعد تلعبين بالنار سيد أديم اذا عرف راح يبليني وما اعتقد يقبل تحجين وياه اني اعرفه وعايش هنا من جان عمره ١٥ سنة لهذا اعرف طبعه صعب وما يقبل بهيج شي الله يخليج خليني ابعده واتركيه لا تحجين وياه ارجعي للبيت.

التفتت حتى ارجع وتركت المكان ، اللي رجعني حجايته من كال...

أبسم : ما تريدين تعرفين الحقائق ، مقتل شهد واحتمال جبير تكون عايشة وهذا السبب اللي من وراه اخذنا أديم عبالنا نخليه يعترف بمكانها ونرجعه ، وثاني شي الخيانة هاي كذبة شهد ما خانته شهد مظلومة وانتِ مصيرج مثلها اذا ما ساعدتيني وساعدتي نفسج...

يتبع.

صباحكم سعادة وعافية وراحة بال...