رواية أحببتُ ذلك الغريب الفصل السادس وثلاثون 36 - بقلم عبير إدريس

جرعت كؤوس الغدر ألوانا
ماحفظوا لنا عهداً وايمانا
والليل بات حصن شكوانا
جعل من اوجاعنا الحانا

أديم

____________

فتحت عيوني باوعت للفضاء الاسود اللي يحيطني ، من غير الرائحة القذرة اللي خنكتني جانت تارسة بالمكان ، تحركت سندت نفسي متكئة على صندوك خشبي ردت اوكف ماكدرت حسيت رجلي ميتة اتسحبت مرتاجة على الصناديك ، سمعت اصوات تتفاوت النبرة تعلى وتنصى ماكدرت اميز منو بس من ركزت هذا صوت أسمر سمعته يكول..

أسمر : اي اني اقفل البيت لا يظل بالك ، شوية وانزل وراك ...

ذاك البعيد ماسمعت جوابه بوضوح وماكدرت اميز صوته ، كلبي هدأ شوية ، جريت نفس ، انفتح الباب وضوء الموبايل بعيوني صار درت وجهي مغمضة وهمست بحدة..

أسمار : وخره عن عيني انعميت.

تقرب كعد كبالي مكنبص رجله ، همس.

أسمر : شجابج هنا بنص الليل ماخفتي ؟
أهاب شنو وصاج ما كالج لا تتهورين ليش هيج تسوين ياسمرة.

التفتت عليه حجيت بعصبية..

أسمار : منو سد حلكي وسحبني وطفى الكهرباء انت مو ؟

أسمر : اني سحبتج وسديت حلكج حتى محد يعرف انت داخلة هنا.

أسمار : وليش هيج سويت ؟ وشلون عرفت اني هنا واجيت وراية ؟

أسمر : اصلا ما تركت المزرعة ..

أسمار: ليش ؟

أسمر : من سمعت أهاب يوصيج بالموبايل ما تتهورين وسمعت شكوكج تجاه أعقل وأرقم، كلت ابقى  بالمزرعة وما ابين نفسي  موجود بلكت نوصل لخيط يوصلنا لأديم وبنفس الوقت عيني عليج لأن كلبي ما مرتاحلج رغم توصيات أهاب بس اعرفج ما راح تسمعين كلامه..

أسمار : وهيج تخوفني غير تتحمحم تحجي تطلع صوت تدري رجلي ماتت ما اكدر احركها بعد..

أسمر : هسه احجيلج ليش هيج سويت..

أسمار : احجي اسمعك..

أسمر :  اول ما اشتغلت اضوية البيت اني انتبهت اكو احد دخل لهنا بس جنت مستبعدج كلت لو الفلاح لو أرقم بس الاخير جان نايم بغرفته والفلاح مو عادته يفوت للبيت لأن مفاتيح ماعنده لهذا استبعدته وانتِ كذلك جنت مستبعدج لأن كلت من وين جبتي المفاتيح وشنو تسوين هنا وحدج بهيج وقت ، اجيت مشيت على كيفي وصعدت الدرج جان البيت اظلم بس الغرفة اللي انتِ بيها مشتغل ضواها، من دخلت وكفت بالباب جنت اباوع عليج شلون تتفحصين المكان وتنبشين بيه توني أريد احاجيج نزل قاطع الكهرباء ، خفت يكون أحد من المشكوك بأمرهم او شخص ثاني يريد يأذيج من عرف بيج انتِ هنا،، بحركة سريعة دخلت و سديت حلكج سحبتج وهمست بأذنج اني أسمر لا تخافين شو ذبتي وماحسيت الا واكعة بيدي ، خليتج بالكاع وطلعت أركض لكيت أرقم ..

أرقم : ها شو هنا شعندك ؟

أسمر : انت شعندك جاي ؟

أرقم : يكولون هذا بيتي ...

أسمر : اي اعرف بس احتاجيت نفط واجيت اخذ ردت اشوي لحم جوعان وبنفس الوقت اشغل حطب وادفي المكان ..

أرقم : والمزرعة كلها مابيها نفط الا بيتي.

أسمر : هاي شبيك من شوكت انت تمنعنا نفوت هنا؟

أرقم : اخذت مني أذن ؟

أسمر : انت ليش عصبي فهمني ؟

أرقم : عصبي لأن فتت بيتي بدون علمي ولا مستأذن مني.

أسمر : بس اللي اعرفه بيتي بيتك والعكس صحيح..

أرقم : هذا عندك مو عندي.

أسمر  : يلا اسفين هسه اخذ نفط وانزل وبعد ما اعيدها.

أرقم : ورا ما تطلع وتقفل ،جيب نسخة المفتاح يمي صار فترة أدور عليها تالي طلعت يمك ؟

أسمر : تتدلل بس اخذ نفط واطلع اقفل البيت والمفتاح يصير يمك.

أرقم : لا تتأخر الصبح عندي دوام..

أسمر : عندك دوام وأديم بعده مخطوف صدك تحجي ؟

أرقم : دوامي واجب بس المشاوي بهيج وقت واخوك مخطوف ما اتصور واجب ولا لائق..

أسمر : جوعان شسوي ..

أرقم : على العموم تصبح على خير.

أسمر : لحظة شلون عرفت اني هنا واجيت ؟

أرقم : الفلاح شاف الاضوية مشتغلة وخابرني عباله اني هنا وكال اذا محتاج شي او لا كلتله لا.

أسمر : ها اي زين يلا روح نام وراك دوام.

أرقم : قفل ..

أسمر : اي  اقفل البيت لا يظل بالك شوية وانزل وراك ..

أرقم : المفتاح لا تنساه.

أسمر : اي اي ما انسى تلكاه يم راسك .

نزل واجيتج..

أسمار : زين ماشكيت بشي من كلامه ؟

أسمر : بشنو اشك مثلا ؟

أسمار : اول نطلع من هذا المكان ونحجي ما اتحمل ابقى اكثر والريحة خنكتني.

أسمر : يلا تكدرين تكومين ؟

أسمار : لا ساعدني ..

أسمر : راح اضطر الزمج لأن ما اكدر اصيح اي احد يساعدج ما اريد يعرفون انتِ هنا.

أسمار : تمام بس طلعني منا..

مديت كف ايدي سحبني لزمت كتفه استندت عليه ما عندي حل ثاني رجلي ماكدرت امشي عليها ، مشيت خطوتين وكعدت بالكاع..

أسمر : شنو السالفة ؟

أسمار : ما اعرف ما اكدر امشي احس الهبطة صارت برجلي، كلها التمت  خطف أديم ودخلتك علية..

أسمر : اني اسف بس والله خفت عليج ماردته يعرف بيج فايته لبيته وباجر عكبة يكول أسمار تعدت على خصوصياتي او لا سامح الله يفكر تبوكيه..

أسمار : ليش هو عنده شي ينباك شوفه للبيت مهجور.

أسمر : عوفج من الحجي هسه وساعديني خلينا نطلع لا يرجع باي وقت تطبك بعقله وييجي؟

أسمار : ومنو يكول ما واكف يراقبنا ؟ ويشوف منو وياك.؟

أسمر : افه عليج غير اقنعته وخليته ينزل متطمن وبقيت اباوع لحدما اختفى معناها فات للبيت.

أسمار : اي زين لعد ساعدني خلينا ننزل..

أسمر : يلا جيبي ايدج..

اخذ ايدي ساعدني ونزلت

نزلنا الدرج بصعوبة نفسي سريع وضربات قلبي تهجر، بس اللي هداني شوية الجو جان الهوى بارد يكفخ بالوجه ، همس..

أسمر : اكعدي على الدرج خليني اقفل الباب..

أسمار : يلا..

كعدت وهو قفل الباب واخذ المفتاح خلاه بجيب البنطرون ورجع ساعدني حتى نكمل الدرج ، احناوننزل همس بصوت ناصي..

أسمر : عليج الله بعد لا تعيديها ، كلشي يصير تدرين لوما اني موجود احتمال تموتين هنا ومحد يدري بيج..

سحبت كف ايدي والتفتت عليه عاكدة حاجبي..

أسمار : ليش هيج كلت ؟

أسمر : شبيج توترتي؟

أسمار : شنو قصدك اموت يعني مصيري مثل شهد ؟

أسمر : عليج نور احتركت واحنا ماعندنا علم بيها شوكت عرفنا من طلعت ريحة الحرك وصلنا جانت مستوية باقية فحم

أسمار : انت شفت الجثة بعينك ؟

أسمر : اكولها صايرة فحم تكولي جثة..

أسمار : اخذني على كد عقلي وجاوبني الله يخليك..

أسمر : يلا احجي اعتبريني اخذتج على كد عقلج..

أسمار : من دخلتوا لكيتوا جثة محتركة واخذتوها دفنتوها لو شنو ؟

أسمر : هاي شبيج أسمار لكينا البيت رماد صاير فد يوم من ترتاحين اجيبج شوفيه ماكو أثر لأي شي جان.

أسمار : حتى لو لازم يبقى أثر عظام شي منها مستحيل تصير رماد ..

أسمر : لج يابة شلون يبقى منها أثر والنار اكلت كلشي.

أسمار : زين على اي اساس اخذتوا الرماد ودفنتوا على شنو استندتوا هذا رماد جثتها ؟ غير لكيتوا شي خاص بيها او يعود الها ..

أسمر : لا بس شكو شي بالكاع لميناه وخلينا بصندوك صغير وسوينا نعش ودفناه..

أسمار : عقلي راح يوكف تدري ؟

أسمار : شنو اللي يوكف عقلج غير افهم ؟

أسمار : شهد ما ميتة منتحرة ..

وكفنا بوسط المزرعة وجان الهوى يحيط بينا وصوت الصراصير وحفيف الأشجار ، شعري يتطاير بالهوى وكل شوية اوخره عن عيني...

صفن بوجهي عاكد حاجبه..

أسمر : شلون يعني ما ميتة؟ مافهمت

أسمار : قاتليها..

أسمر : شنو قصدج؟ منو يتجرأ يقتلها ؟

فركت وجهي ونفخت الهوى من حلكي..

أسمار : ما اعرف تصدك حتى باديم صرت اشك ..

ضحك وهز راسه..

أسمار :شبيك تضحك ماعندي ثقة باحد ..

أسمر : اكعدي خلينا نتفاهم كتفي راح وانتِ مسنودة عليه..

أسمار : ساعدني ..

أسمر : لا تسوين روحج فد مرة كلشي مابيج.

أسمار : وداعة بابا رجلي ماتت ما اكدر امشي عليها وحدي احس بيها خدر مو طبيعي..

أسمر : بس لا انجلطتي .

أسمار : بسببك تكون جلطتي..

أسمر : لوما جاييج جان لحد هسه مبتلشة وية أرقم وتعال جيبي اللي يخلصج منه.

تقربت عليه وهمست..

أسمار : قصدك اللي ينقذني منه ..

عكد حاجبه ردة فعل لكلامي وكال.

أسمر : انتِ ليش مصرة تسويه مجرم اريد افتهم.

أسمار : لأن هو مجرم..

أسمر : لا اله الا الله ، شلون بيج اني.

أسمار : شوف هذا المفتاح لا تنطيه الا تسوي منه نسخة ، أديم مو غبي من ماخذ النسخ ومحتفظ بيهن لابد يريد يرجع للمكان ويلكى دليل..

أسمر : وينه عجل صارله كم سنة ليش ما رجع وبحث؟

أسمار : ظل شكك بكلامي ولا تصدك.

أسمر : كلامج مو مقنع غير تحجين شي يكون واقعي حتى نفهم ومن صدك افكر اساعدج.

أسمار : أديم ملتهي بالمخدرات اللي مبدليهة بالعلاج مالته متشوفه ينام هواي وراسه دائماً يوجعه وتركيزه قليل يتنرفز بسرعة عصبي وخلكه ضيق ، هاي الصفات منو يتمتع بيها غير المدمنين ، صح اكو ناس عندهم هيج صفات بس مو مثل اخوك مستحيل ، اني جنت احس اكو شي مو طبيعي خصوصاً وجع راسه ، ليش يريد ينام واي مسكن ما يخفف الوجع وليش من يكعد مسطور ودايخ وعيونه حمر ، وليش وليش وليش عند أرقم الاجابة..

أسمر : هم رجعت على أرقم ، وتعالي من وين جبتي سالفة أدمان أديم معقولة صدكتي كلام الضابط هيج عقلج صغير..

أسمار : شوف اني شكيت بهذا الضابط لسببين ، الأول وين اكو ضابط ييجي للبيت وبنفس يوم الحادث اللي اعرفه ينتظرون اقل شي ٤٨ ساعة على اختفاء الشخص هاي وحدة ، ٢ جايب تقارير ويريد يثبتها على أديم وثاني يوم جايب  امر تفتيش بيتنا وهجمه هجم ، معناها اكو علاقة بين هذا الضابط وبين قاتل شهد وبين المستشفى وبين الخاطف ، اكو ايد خفية كاعد ترسم مشهد مرعب ومؤلم خلف ستار هذه المزرعة..

أسمر : اني لحد قبل شوية ماخذ كلامج باستهزاء بس هسه لا حسيت اكو ترابط بالاحداث ، زين برأيج شلون نوصل للحقيقة؟

أسمار : اذا خليت ايدك بايدي وأهاب ساعدنا راح نتحد ونكدر نكشفهم بس ضروري تساعدوني ما اكدر وحدي.

بنبرة تحذيرية كال...

أسمر : باوعي ممنوع تتحركين وحدج بدون علمنا وديري بالج تجازفين بنفسج مرة ثانية ، هالمرة جنت موجود المرة الجاية ما تعرفين شنو يصيرلج..

أسمار : المكتوب كلنا نشوفه ، اني ما انتظر لحد ما تدفنوني رماد وتقرأون فاتحتي بصمت ، والناس ماتدري بية متت لو بعدني على ذمة اخوكم ، الصارلي من تعرفت على أديم لليوم اللي تزوجته بيه ابد مو قليل من جريمة لجريمة ثانية. وبعدين سالفة حادث سيارتنا شو لا حس ولا خبر لحد الان محد حقق بالموضوع وعرفتوا حادث مفتعل او مجرد عطل فني بالسيارة ؟

أسمر : منو كال ما بحثنا ؟ اول ما صار الحادث رحنا لنفس المكان وعرفنا جنتِ راكنة سيارتج بالكراج اللي صاير مقابيل المطعم رجعنا الكاميرات بوحدة منهن بين شخص يقفز من خلف حايط الكراج ونزل يم سيارتج ، جان لابس شفقة ومنزلها على وجهه ما مبين منه شي ، لهذا ماكدرنا نتوصل لمعلومة تدلينا عليه..

أسمار : شاك بشخص انت ؟

أسمر : الصراحة اي ..

أسمار : منو ؟

أسمر : لؤي ..

أسمار : لؤي جبان ما يكدر يخطط وينفذ وحده وهو اصلاً هوسة ياخذ حقه بالصياح ما يتكتك ويخطط وينتقم اكو ايادي خفية تساعده.

أسمر : ونفس هاي الايادي اللي ترسم المشهد المؤلم بالمزرعة ؟؟

أسمار : عفية عليك هسه بديت تفهمني .

أسمر : ماخذج على كد عقلج..

أسمار : ماشي اخذني على كد عقلي بس المهم احجيلك مخاوفي ويكون عندك علم بيها ...

سكتت من سمعت صوت ورانا كال.

أرقم : وين المشاوي اجيت اتريك وياك ؟

رفع راسه أسمر وحجى وياه.

أسمر : سديت نفسي من ذكرتني بأديم كلت اني ويني وين الاكل هسه لهذا رحت لسمرة اسأل عليها لكيتها تبجي ومخنوكة اقترحت عليها نطلع نكعد هنا واهون عليها بلكت يطلع الصبح وجاي أديم..

أرقم : اني ادري بيه وين .

من حجى هيج لا ارادياً وكفنا على حيلنا ، لزمت كتف أسمر سندت روحي عليه...

أسمار : وينه ؟

أسمر : احجي يمعود ..

أرقم : أبسم و ولد عمك رحمن هم ماخذيه..

أسمر : صدك تحجي ؟ شوكت عرفت وليش ما حجيت وهو وين هسه ؟

أرقم : عرفت عن طريق ناس وصيتهم يدوروه ولكوه وهسه بلغوني ، وين باقي الولد ؟ خلي نطلع دورية ونروح نجيبه..

هنا ما تحملت البرود اللي يحجي بيه وكأنما شخص غريب مخطوف ويحجي عليه.

تركت أسمر ومشيتله ، خطوتين تعثرت وكعت على وجهي ، رفعت راسي باوعتله دموعي نزلت ، أسمر تقرب راد يرفعني رفضت ...

أسمار : حسبي الله عليك ، متأكدة الك ايد بالخطف واذا لا فانت تدري منو الخاطفه وشفتهم بعينك وساكت ، حسبي الله عليك من بشر اصلا انت واحد حيوان ونكس وحرامات بيك هاي الخوة اللي محاوطتك ولك بس اني عرفتك عدل..

أسمر سد حلكي وصاح ..

أسمر : اش كافي.

وخرت ايده دفعتها عني وعطت..
أسمار : وخر شبيك كل شوية ساد حلكي تعودت شنو ؟

رجع سد حلكي وضغط عليه ، تركنا أرقم وهو دنك يم راسي كال.

أسمر : شبيج فضحتينا وخرطتي الأول والتالي مو كلنا هاي المخاوف نحجيها احنا بيناتنا وما نبينها لأحد.

وخرت ايده ونمت على ظهري فوك الحشيش جان بارد ثلج بالبداية  ماحسيت بشي بس من كمت اشهك وابجي لزمتني الباردة ، خليت ايدي فوك عيني وكمت احجي بحركة..

أسمار : حركوا كلبي على أديم بعدني ما تهنيت بية،، وبعدين شنو تريدني اسوي او ردة فعلي شلون تكون من عرفت باخوك يعرف منو خاطف اخوه وساكت...

أسمر : هسه اني ابقى يمج وحاير اهدأ بيج لو اروح الم اخواني ونجيبلج أديم ؟

أسمار : لا روح مابية شي اني.

أسمر : كومي دخلي للبيت حتى أكدر اروح وبالي مرتاح اتوجه لشي واحد ما اتشتت بينج وبين أديم.

أسمار : صيح خالتي خلي تجي تساعدني افوت جوة وانت روح.

نفخ الهوى من حلكه ، كنبص يم راسي تك رجل مستند عليها بالكاع والثانية ثانيها وحاط عكس ايده عليها..

أسمر : شلون بيج اني.

أسمار : شنو ؟

أسمر : راح تجيبين اجلج ..

أسمار: ما فهمت..

عض شفته ، عاكد حاجبه تسحب من يمي بدون ما يوضح مقصده الأخير ، زاد الشك بكلبي وصرت اتسائل معقولة أسمر يعرف شي عن أرقم والشكوك اللي بداخلي كلها يدري بيها بس كاعد يبحث بطريقته عن الأدلة ولهذا خايف علية لو شنو؟ خليت ايدي فوك راسي ورجعت شعري ليورا باوعت للسما عصرت عيوني وهمست.

أسمار : هف تعبت تعبت تعبت تعبت عقلي راح يوكف ، وين اخذك يا أديم وين انهزم بيك..

فركت وجهي قوي وصارت خالتي فوك راسي مدت ايدها وكالت..

أسن : جيبي ايدج اكو وحدة مخبلة تنام على الحشيش بهذا البرد..

أسمار : حبيبي مخطوف ياناس وين تريدوني اروح فهميني كلبي نار ما كاعد احس بهاي البرودة اللي تحجين عنها.

أسن : كومي نامي ولو ساعة راح يجيبوه على الأقل تكدرين تداريه بيج حيل ..

أسمار : وينه حيلي انهد شوفي رجلي ميتة ما اكدر اوكف عليها ولا تسندني حتى امشي ، ذبيت كل حيلي على أسمر يلا مشيتلي خطوتين..

أسن : شلون تالي وياج وبعدين؟

أسمار :خالة أرقم الخاطف وكولي كالت أسمار.

أسن : يابه خليتيه ابالج بعد، مادام كلنا ببيت واحد وما عندج دليل عليه لا تخلقين عداوات تتعبين واحنا هم نتعب.

أسمار : خالة اكو مكيدة وجبيرة صدكيني مو شي هين ولا سهل الكاعد يصير..

حجيتها وبجيت...

أسن : ياعيني كومي نامي وارتاحي ..

هزيت راسي بلا..

أسن : زين اتركي النوم ما لازم بس غيري ملابسج بلوزتج خفيفة تستبردين وابنج يرادله متابعة زوجج محتاج عناية شلون يعني نظل هيج.

أسمار : مابية اكوم ما اكدر..

أسن : استندي علية وكومي.

أسمار : خاف حملج يتأذى ؟

أسن : لا لتشيلين هم كومي وساعديني..

مديت ايدي سحبتني اول ما وكفت رجعت وكعت بالكاع.

أسمار : خالة رجلي ماتن خاف قبل شوية جنت احس بخدر هسه كلشي ماكو..

أسن : ياربي صدك تحجين؟

أسمار :  ما احس بيها ما اكدر امشي عليها ما اكدر..

أسن : يا ستار ياربي خلي اشوف واحد من الولد يساعدني ولو كلهم طلعوا بس بلكت احمد باقي...

راحت ورا شوية اجتي هي وأفنان وصلوا يمي..

أفنان : شنو شبيها ؟

أسن : رجليها متكدر توكف عليها

أفنان : ياستار ياربي عين وصابتكم انثبرنا ثبر لو تاركين الحفلة ما مسويها جنتوا مثل الورد.

أسن : اني وإيساف نفس الحجاية حجيناها بس بعد صارت..

حاولوا يكوموني ماكدروا ثكلي ذبيته عليهم..

أفنان : اجيب الكرسي مال امي نخليها بيه منا لباجر ونشوفلها دكتور نوديها عليه لو دكتور امي نفسه ياخذوها.

أسن : ان شاءالله ما تحتاج تنام تكعد مابيها شي.

أفنان : امين..

راحت جابت الكرسي واني البجي البجيته بعمري ما باجيته على احد ، مقهورة على حال أديم وكل شوية اتخيله بصورة شكل ، تساعدوا بينهم وبصعوبة يلا كدروا يكعدوني ، اخذوني للبيت دفع بالعربانة دخلنا سدوا الباب وشغلوا الضوء ، بعدها دخلوني للحمام ، طلعت أفنان ودخلت خالتي ، غيرت ملابسي وغسلت ، لبست ملابس نظيفة ورجعوني للفراش ، شالتني أفنان من جهة اكتافي وخالتي من رجلي ، وشمروني على السرير عطت حسيت كتفي انخلع..

تقربت خالتي عدلتني نمت على ظهري ولازمه كتفي واتأوه من الألم...

أسن : اذيناج مو ؟.

أسمار : مو مشكلة، بس جيبيلي موبايلي.

أسن : شتسوين بيه ؟

أسمار : اريده جيبيه.

أسن : تمام ، بس وين خالته ؟

أسمار : بجيب بنطروني اللي نزعته هسه.

أسن : اوك..

راحت ورجعت جايبته اخذته منها واتصلت على أسمر يرن ومايرد ، رجعت اتصلت على أهاب نفس الشي هم مايرد ، اخر شي اتصلت على أنهد من بعد معاناة جاوبني.

أنهد : الو ها..

من سمعت صوته انرعبت وعطت..

أسمار : شبيه أديم أنهد احجي اخوك بيه شي كولي ..

أنهد :شنو اكلج؟ لكيناه شبه ميت روحي هسه وبعدين خابري كلنا مثبورين..

كمت ابجي واتوسل بيه يحاجيني، بعدها أرود اخذ الموبايل منه ورزله.

أرود : اكو غبي هيج يحجي وياهم شبيك انت ؟

أنهد : اول وتالي يعرفون قابل جذب.

أرود : ولي منا ، الو ها أسمار .

أسمار : لك عيني فهمني لكيتوا أديم مو كلبي مات..

أرود : اي لكيناه وهسه احنا بالمستشفى..

أسمار : عفية الله عليك شنو مسويله خوما مأذيه

أرود : اذا تبقين جبانة وبس تبجين ماراح احجي شي كوني قوية أديم محتاجج.

أسمار : ولك أرود ياقوة ظلت عكب اخوك ، حيلي راح وكفة ما اكدر اوكف وينه اريد اسمع صوته والله حتى ما احاجيه فدوة ..

أرود : لج يابة مردتي كلبي يعني شنو اسوي فهميني اذا هو نايم جوى لا ايد ولا رجل.

حجاها واختنك اني سمعته يبجي لو انهاريت وجهي ملخته وشعري كطعته عرفت مأذيه للحد اللي فاقد الوعي بيه..

لزمتني خالتي ورجعت لزمت أفنان اثنينا انتهينا اخر شي اتصلت على الولد ظلت تحجي وياهم سدته والتفتت علينا.

أسن : اذا بقيتوا هيج محد يرد علينا ولا ياخذونا للمستشفى شوية صيرن قويات حتى نكدر نساعد الولد ونوكفله اذا جابوه .

كمت اضرب جف بجف وانعي..

أسمار : ولج عيني أديم لا ايد ولا رجل مخلصين عليه ، ولو ما الجلب يحجي باخر لحظات يمكن نلكاه ميت ، اويلي عليك عيوني خابريهم هسه ييجون ياخذوني..

أسن : وين ياخذوج يظلون يشيلون بيج اسكتي وكافي بجي خلينا نفتهم شنو نسوي ..

كل ما انهار بسبب موقف بحياتي خالتي هيج تحاجيني تهون الموقف وتسخفة في سبيل تقويني واكدر اواجه مخاوفي بنفسي ،  نصف القوة اللي اني بيها اكتسبتها من خالتي والباقي جينات وراثية على كولة المثل ...

انتظرت وطال الانتظار ، شعوري ما ينوصف ولا يكتب ، بس امثله الكم كأنما جمر مشتعل بنار ويطفوه بكبدي ، واستنشق نار مو هوى عادي ، نهائيا ماكمت اتنفس هوى طبيعي احس شي يحرك ببلاعيمي تعبت من اللطم والصراخ استسلمت من رخيت ايدي ورجعت راسي على المخدة وبس دموعي تنزل....

مر الوقت وحتى صوت ماعندي اسأل بيه عليه ولا عندي حيل اروحله واشوفه..

استسلمت رغم بعدي ببداية المعركة ، ومنتظرة اشوفه حتى يرجع حيلي وترجعلي قوتي واشهر سلاحي واحارب من جديد..

صار الظهر اصرت خالتي اروح للدكتور رفضت رفض قاطع اروح،  وبعدها صار العصر ودخل المغرب وبعده العشاء واحنا نفس ما احنا منتظرين جية الولد ما رجع غير بس احمد اخذ ملابس لأديم وللولد ورجع للمستشفى كلمتين ما فهمنا منه..

بالليل كلش اتصلت خالتي على إيساف حجت وياه وشرحلها وضع أديم ، كال معذبيه مدة يومين كاملة ، واللي خاطفيه ولد عمهم رحمن بمساعدة أبسم بس شلون وليش لحد الان ماعرفوا لأن نايم بعده او بالاصح فاقد الوعي...

واللي خطفوه بالسجن وقيد التحقيق..

مشى الوقت مثل السم علية دخلنا بثاني يوم والثالث واني نفس وضعي لا مشيت ولا كدرت اتحرك من فراشي خطف اديم نهاني وخبر نومته بالمستشفى وتخيلاتي بوضعه واني ما شايفته قضى على اخر حيل بية...

أسن : شلون تريدين يصير بيج حيل وانتِ بس نايمة بدون اكل ؟

هزيت راسي بمعنى ما اريد.

أسن : امج وابوج كل شوية يتصلون يريدون يحجون وياج خطية كل شوية ومكذبة عليهم كذبة شكل وتالي شلون ؟

أسمار : بعدين احاجيهم لأن اذا سمعت صوتهم راح انهار ويظل بالهم وبالتالي يعرفون اللي صار ويضطر بابا يرجع للعراق ابقي طلعي اعذار كولي سافرت وتركت موبايلي اي شي احجيلهم..

أسن : اووف منج.

بقينا على هذا الحال لمدة ثلاث ايام ، اني بدون اكل وبس ابجي وما اقبل اروح دكتور، وصلت بية مرحلة عيوني ما اشوف بيها ، شدولي مغذي وبقيت نايمة وادعي يرجعلي واشوفه يمشي مابية شي...

يوم الرابع كالوا صحى أديم وحالته متحسنة وباجر راح يطلعوه هنا شوية ارتاحيت وتقبلت الاكل اكلت شوية وذبيته من راسي..

من ارتاحيت سألت اذا أسمر او أهاب رجع واحد منهم او لا واذا رجعوا ضروري احجي وياهم ، كالوا ماشي ...

لليل اجى أسمر دك الباب خالتي كالتله فوت ، دخل وجهه تعبان وصاير أسمر طوخ والشرار يتطاير من عيونه باوعلي مخنزر ، كال.

أسمر : دزيتي علية ؟

أسمار : اي اريد احاجيك.

أسمر : يلا احجي..

حجاها وفات للغرفة ، خالتي كامت وكالت..

أسن : اشوف اياس وتميم يريدون عشا لو لا بينما تخلصون حجي.

هزيت راسي الها ساكتة ، تقرب أسمر ، مجرد باوعتله عيوني دمعت ، باوعت لعيونه هو هم دمع..

أسمار : شلونه ؟

ببحة صوت همس.

أسمر : سألني عليج هواي..

أسمار : عمري..

حجيتها ومسحت دموعي اللي تتطاير منا ومنا..

أسمار : مأذيه ؟

أسمر : هواي ..

حجاها واختنك..

أسمار : شنو أكثر شي مأذيه؟

أسمر : مروعيه بيج ..

أسمار : شلون ما فهمت؟

أسمر : موهميه على اساس انتِ هم خاطفيج و...

سكت دنك راسه ..

أسمار : و شنو أسمر كمل..

أسمر : مشغلين صوت وحدة تصيح على اساس كاعد يغتصبوها وتستنجد بيه وبينا ومتخبل عليج يريدج...

يتبع.

صباح الخيرات🥰