رواية أحببتُ ذلك الغريب الفصل الخامس وخمسون 55 - بقلم عبير إدريس

أمس لما درت ظهرك
عفتني تراب لو ماخذني بجيوبك
أمس مثل الطفل جني
تذبني وارجع لثوبك
منو مثلي يحبك حتى بعيوبك..

أرود...
__________________

دك جرس الباب كام أسمر فتحه دخل أرقم وكال..

أرقم : سووا طريق المحامي....

وسكت من شافنا متجمعين ، بهت عكد حاجبه وكال...

أرقم : جمعة خير أن شاءالله..

إيساف : أن شاءالله، وينه المحامي خليه يفوت عيب ينتظر على عتبة الباب هواي..

هز راسه ودار وجهه طلع ورجع دخل هو والمحامي ، كعدوا على القنفة وبدأ أرقم يحجي ويشرح وضع أديم ، جنت اراقب حركات حبيبي شلون يتأثر بكل كلمة يسمعها تمنيت اروح اكعد بصفه الزم ايده واسانده واهون الكلام الجارح اللي يسمعه ، بس جان بعيد كبالي كاعد ، حركاته متوترة وبيها الف تنهيدة وتنهيدة ولوم وعتب للأخوة والأيام..

أرقم : استاذ باتفاق من الاخوة اجمع اني جبتك ، حتى استاذ أديم يتنازل عن وصايته للأملاك اللي بإسمه لأسمنا ويمك الاجراء بعد..

أرود : منو هذا اللي متفق وأديم شبيه ؟ شو اني كلشي ما ادري ، اخوان منو متفق وعلى شنو جان الاتفاق؟؟

يحجي وعيونه تفتر على اخوانه بتسائل ملح يريد يروي فضوله..

أسمر : ابو محمد يريد يجرد ابو تميم من كلشي حسب نظرته لحالة أديم يشوفها ميؤوس منها بعد ما يفيد يقدم للشركة شي لهذا يريده يكون جليس غرفته لحدما يوافيه الأجل بعد عمر الطويل ..

أرود : حلوو ومنو مأيده بهذا الشي ؟

إيساف : نفسه وغروره وتجبره محد مأيده سوى وسواس نفسه وشيطانه..

أسمر : طمعه وجحشه وسوء عاقبته اللي مأيدته..

أهاب : ربما حقده الدفين بدافع محبته لأمه والثأر الها اللي هو واحنا وكل الناس نعرف كلش زين أديم ماله إيد بمقتلها وراحت الله يرحمها نتيجة ثارات على بساتين واملاك خاصة بوالدي وأديم...

أنهد : عيوني استاذ كلام عائلي من نتفق نرجع ندر عليك خليني اوصلك للباب..

كام وكف يم المحامي منتظره يكوم ، نهره أرقم وكال..

أرقم : مو بكيفك اني متفق وياه وحتى اللائحة محظريها ما بقى غير بس توقيع من اخوك وهذا هو فضت راحت..

أسمر : اي بعدين يوقع من نتفق يلا أنهد وصل الاستاذ للباب وخلي ابو الحارث يوصله..

أرقم : ابو الحارث ما موجود دزيته بشغلة..

إيساف : وين ؟

أرقم : بشغلة بعدين تعرف..

التهوا يحجون كام أديم وصاح..

أديم : ام اياس وينج ؟

أسمار : هياتني..

كمت رحت يمه وكفت مشى كدامي للممر اللي يفصل الصالون عن بقية الغرف وكفت كباله ، رفع الضماد عن عيونه عصرها بإصبعه وهمس بصوت ناصي..

أديم : روحي للبيت جيبي تميم وخليه يمج..

أسمار : تركته نايم ليش اجيبه بوسط الهوسة خاف يتعقد ..

عكد حاجبه عصر راسه الألم عرفته من ملامحه..

أديم : جيبيه ياعيني وبسرعة..

حجاها بصيغة أمر وبإلحاح ،همست بكلمة تمام وطلعت من البيت مشيت سريع حتى اوصل لبيتنا ، استغربت الباب مفتوح اني سديته بيدي معقولة تميم كاعد وطالع وحده ، بس وين يروح اذا ما اجى علينا ، بدأت الشكوك تحاوطني دفعت الباب للأخير ودخلت اركض لغرفته باوعت فراشه فارغ وتك من نعاله بالكاع الثاني ماكو ، تميم ما يمشي حافي ، طلعت دورته بالبيت ماكو باوعت الايباد على الطبلة بالهول ، ياربي شنو السالفة رحت للحمام ماكو ، فزعت وطلعت اركض واصيح بصوت عالي..

أسمار : تميم حبيبي تميم وينك ماما تميم ..

على صوتي طلعوا أسمر وأديم وأهاب وإيساف ، عين الباردة عليهم رغم خوفي على تميم بس صفنت بجمال لمتهم وجمالهم وكمية الرجولة اللي عندهم ، تقربوا علية يركضون..

أديم : ها سمرة وينه تميم؟

أسمار : ما اعرف ما موجود بالبيت.

ركضوا بقية الولد قبلي للبيت رحت وراهم حجيت ودموعي نزلت خفت عليه وحسيت بتأنيب ضمير لأن تركته وحده بدون ما اخذه وياية..

أسمار : ماكو دورت البيت كله..

صاح أهاب بصوت عالي..

أهاب : أرود روح رجع الكاميرات بسرعة..

أسمر : اني رايح انت ابقى يمهم..

طلع واني طلعت وراه لكيت أديم محني ظهره وحاط ايده على خصره تعبان بشكل حسيته يريد يبجي من التعب والضغط اللي علية لوما عيب ..

أسمار : أديم ليش سألتني عن تميم شنو اللي توارد ببالك ؟

بلع ريكه وجاوبني بتعب..

أديم : أرقم ماخذه مستحيل يخطي خطوة بدون تخطيط مسبق يحفظ بيه حياته ..

أسمار : وشنو راح يستفاد ؟ معقولة توصل بيه يخطف طفل ومنو هذا الطفل ابن اخوه..

أديم : ليش هو هامه اخوه حتى يهمه ابنه ، وهذا ما يسلم لحيته بسهولة يعرف راح نحاصره لهذا تصرف قبلنا وكولي كال أديم..

أسمار: خلي نفوت ونسأله ليش ساكتين..

أديم : نسأله شنو نكوله وين ابني حتى يكعد ويضحك على تعبي ويساومني اوقع واتنازل حتى يرجعلي تميم..

أسمار : مستحيل مستحيل هذا بشر عادي لو مثلنا ماكاعد اصدك..

أديم : اسنديني سمرة ماظل بية حيل بعد..

اخذت ايده وخليتها حول كتفي وسندته مشينا اني وياه لحد البيت اول ما دخلنا لكيته كاعد رجل على رجل ، ومنتظر جيتنا ، كعد أديم واني بقيت واكفة ورجلي ترجف كارهته اريد اركض وانقض عليه ، لو بيدي افصل لحمه عن عظمه ، دخلوا بقية الولد وأسمر جايب تصوير بموبايله شوفه النا وكال..

أسمر : تميم اخذه ابو الحارث ..

أديم : عرفت..

حجاها وضرب ايد بإيد..

بعدها صارت هوسة كل واحد يحجي شي ، كام أديم وصل لأرقم ، لزمه من رقبته عصرها وحجى كاز على اسنانه..

أديم : أرقم يا اخبث انواع الحيايا شكد سويت بية مصايب وجنت اعديها واوهم نفسي اني غلطان ، عمليتي فشلت بسببك وترت اعصابي ارقت نومتي بدلت علاجي ، من قبل سنوات وانت غيرته من جنت توصلني للجامعة وبيومها تسممت تتذكر مو ؟ جانت الجرعة اللي ناطيها الية كبيرة ، وعبالك راح اموت ومن شفتني بسبع ارواح تخبلت هذا شلون اخليه يموت كمت تفكر تقتلني واني على قيد الحياة ،كمت تسحب كلشي من جوة رجلي بديتها بحركات خبيثة جبت علاجات جديدة تريد تخليني اهلوس وانسى وافقد جزء من عقلي حتى تحصل على أملاك زائلة ، منو مات واخذ شي وياه غير الذكر الطيب ، وصل بيك الحال تاخذ ابني مني ولك ليش شنو اللي سويته الك لو هامتك المادة جان اجيت وحجيتلي والله انطيك كلشي ولاخليتني افقد اعز ماعندي ...

يحجي ويهز بيه بقوة ، وأرقم ببرود يجاوبه بعدين صار عصبي نفض إيد أديم وكف كباله ضربه على صدره وكال..

أرقم : امي انت قتلتها وجنت المدلل عند الوالد واكثر الاملاك تسجلت بإسمك كل هاي مو اسباب تدفعني اكرهك؟ ها؟ جاوبني لا تبقى ساكت..

يحجي ويدفع بيه ، أسمر بالكوة لازم أهاب لأن يريد يهجم على أرقم..

اديم : ما قتلت امك والله شاهد علية ، المرة الوحيدة اللي اسأت الها وندمان عليها من جنت مراهق وفزت غيرتي على أمي وهي تنضرب وبعد ما مديت إيدي عليها ..

أرقم : اي واني اجى دوري اخذ حقي وحقها..

أديم : تاخذ حقك من تقتل زوجتي من توهمني بخيانتها هي واخوية من تدخل بيتي وتحير شنو تسوي من تصرفات حتى بس اكره أبسم واعاديه ونجحت يا ابو محمد ابشرك بكل افعالك نجحت..

أرقم : لو اموتك الف مرة ما ارتاح لأن قتلت أمي..

راد يحجي أديم سكت والتفتنا على صوت العربانة مال الحجية وهي تفوت للصالون ، توسطت الهول وبقت تباوع على أرقم بعصبية وعيونها مليانة دموع وعتب وهواي حجي اخر شي كالت..

عمرة : بيوم اجى ابو اعقل الله يرحمه و جابك للبيت خلاك بحضني وكال..

أشعب : عمرة هذا الولد ابن اخت عالية جابته وماتت بالولادة وماعندهم احد يربيه خطية جبته عبالي عالية تربيه وية أبسم بس تكول ما اكدر اتعب رجعه من وين ما جبته برأيج ارجعه واعرف يودوه للملجئ واخاف ما يداروه زين ليش ما انتِ تداريه ويكبر عندج ويصيرلج ابن واذا الله سهل ورزقنا بخلفة يصيرلهم اخ كبير ، ها شنو كلتي..

عمرة : ياعيني شلون حلو شو خليه بيدي..

وخلاك بين ايدي وحلفت اربيك مثل ابني مليت علية حياتي وخليتك بوسط قلبي ما بخلت عليك بشي وما قصرت ..

قاطعها بصوت عالي من كال.

أرقم : لا قصرتي من جبتي ابنج هملتيني وتركتيني وكمتي ما تهتمين بية بكد اهتمامج بهذا ومن رحت اشكيج لأمي عالية كالتلي اني مو ابنج الحقيقي وامي ميتة من زمان وهذا ابوية مو نفسه ولا ذولة اخواني وتريديني ما اكرهكم ولا احقد..

عمرة : كبرتك ودخلتك مدرسة واعتمدت على نفسك ، جنت بالابتدائية ، يلا التهيت بالتوأم جنت يادوب الحك الهم بس مع هذا ما هملتك وداريتك بس انت كرهتني وكرهت اولادي وكمت ما تصيحني يمه كله حجية ورحت لعالية صرتلها ابن وما سألت علية بعدها وعاديت ابني...

الوجوه انقلب الكل بقى صافن عدا إيساف اعتقد يعرف بالموضوع ، بإستغراب أرود سأل..

أرود : يعني هذا مو اخونا !!!

عمرة : للأسف اي وجنت ساكتة وما حبيت احجي واخلي ثغرة بينكم بس هو الله يسلمه مستمر بأذية ابني وبعد ما استحمل اسكت اكثر..

أديم : حجية تحجين صدك ؟؟

عمرة : اسفة لان كذبت عليك ، اسفة منكم كلكم بس هذه وصية الوالد وماحبيت اخالفها وصارلي فترة من اسمع اكو مشاكل وبسببه جنت اصارع نفسي في سبيل ما احجي الحقيقة بس ما كدرت..

أديم : شيخ جنت تدري ؟

هز راسه ب أي ودنك ، رجع استرسل بالكلام وكال..

أديم : ومنو من باقي الولد يدري؟

إيساف : اني وأبسل وأعقل فقط..

أديم : بيها الخير ، يعني هم نزل وهم يدبج على السطح ك**** كلب حرت شنو سويت زعزعت نظام حياتنا وتعرف بروحك ضيف ثقيل علينا ، لو محترم نفسك وكاعد منو يكدر يحاجيك وجان سرك اندفن وياك..

اشر عليه وكال..

أديم : بسرعة اخذوا وسلموه لأقرب مركز وانعل اليوم اللي اجى بيه للمزرعة..

ضحك ضحكة طويلة ورجع كعد رجل على رجل وكال..

أرقم : ابنك مقابل المزرعة ، وما يرجع اذا ما اطلع اني منا ..

بقوا صافنين علية تقرب أهاب راد يضربه قيدوه أرود وأسمر منعوه يوصل يمه..

أهاب : خلوني اكسره مو دمي فور يامحمد.

أسمر : اصبر شبيك انت خبلتنا.

أهاب : مو مابية اوكف لحيلي بعد اللي سمعته الله يعينك أديم على اللي صارلك واللي شفته ولك هاي مجازات الحجية وتعبها بيك صدك لو كال أديم انت اخبث انواع الحيات ...

أسمر : كوبرا..

إيساف : كافي ياولد عيب..

أرود : اليوم يوم الصدمات لو اعرف باقي بهذاك البيت ولا راجع..

باوعتله بحزن ، كلت لو تدري شنو منتظرك شنو راح تسوي ..

صار حجي هواي وأديم كام يصيح بقلب محروك على تميم وصلوا لطريق مسدود لو يتنازل عن المزرعة لو ابنه ما يرجع ، تنهد بصوت مليان غضب كال..

أديم : دزوا على المحامي..

أهاب : شنو والله ما اخليك تتنازل..

أديم : جيبوا المحامي كلت.

أسمر :تمام هسه راح اخابره..

أهاب : تعال وين رايح ولك مزرعتنا هاي شنو يتنازل عنها صدك تحجي؟

أسمر : ابنه اعز ..

حجاها وطلع حتى يتصل بالمحامي ورا نصف ساعة رجع جايبه وياه ، كعد المحامي يم أرقم وطلب من أديم يكعد يمهم ، بخطوات ضعيفة وثابتة راح كعد يمهم جان يتنفس بضيق وكل شوية يبلع ريكه ، رحت جبتله مي خليته بيده شربه كله مرة وحدة ونطاني الكلاص ، اخذته منه و خليته على الطبلة ، كتب المحامي كليشة تنص على تنازل أديم عن حصته كاملة بالمزرعة لأرقم ، وقعوا اثنينهم ، وسحب أديم الورقة..

أديم : تسلم ابني يلا تاخذ هاي الورقة..

أرقم : المحامي يكون بينا وسيط..

المحامي رفع ايديه وكال..

_ رجائا اني عبد مأمور اجيت حسب طلبكم ونفذت اللي تريدوه سواء جنت قابل عليه او لا غير هذا الشي تعذروني..

إيساف : حقك يابه ، ابو محمد اني راح اكون الوسيط بينكم سلم تميم نسلمك الورقة وراح تطلع منا تمشي على رجليك..

أرقم : ماشي بس اذا صار تلاعب تعرفون شنو اسوي احرك كلبكم والله..

أهاب : والله اللي حلفت بيه لوما الولد لازميني جان حولتك لقطع صغار واجعصك جوة رجلي اسويك مداس للمارة..

ضحك أرقم ضحكة خبيثة وكال..

أرقم : شوفني مرجلتك عود انتظرك.

أهاب : وعد علية ونذر وين ما اشوفك ادوسك بقندرتي.

إيساف : أهاب كافي..

حجاها بصوت عالي ونترة التفت عليه وكال..

أهاب : كافي كافي سكتت تمام..

اتفقوا اخر شي يطلع ويسلم تميم عن طريق ناس بعدما يستلم الورقة وبمكان معين كال ابلغكم وين واي تلاعب راح يختفي هو وتميم وماراح تشوفوه بحياتكم والوقت هو يحدده ،تركهم و صعد اخذ جوازه وكم شغلة عنده مهمة حسب ما كالت زوجته اللي تركها بدون ما يبررلها اي موقف بس قبل لا يطلع مهددها لان عرف الشغلات اللي تخص شهد طلعت من موبايله وشاكك بيها هي مساعدتهم للولد بل متأكد..

طلع وراه طلع المحامي خجلان من الولد ويتعذر ، طلع وياه إيساف وبقوا يحجون بيناتهم ، رحت يم أديم خليت إيدي على كتفه ميل راسه عليها غمض عيونه وكال..

أديم : اي شي يخفف ألم راسي اسعفيني بيه راح اموت..

أسمار : رجعلك الألم ؟

هز راسه ب أي..

أسمار : نفس الحدية يعني ؟

أديم : امممم..

رحت جبتله كبسول وجع راس ومي فرغتله حبايتين بكف ايده حسب طلبه وصبيتله مي بالكلاص، اخذ العلاج وشرب المي مدد جسمه ورفع رجليه ، باوعتله بقلق الولد كاعدين يحجون باللي صار ، بس اللي استغربته أسمر مسيطر ما حسيته مهتم بخسارة المزرعة تقربت منه حتى اسأله ، رجعت التفتت مذعورة على صوت أديم وهو يتقيء ، رحت يمه خليت ايدي على ظهره...

أسمار : اسم الله هاي ليش ؟ ..

اشرلي بيده مثل اللي يسحب كلينكس من الباكيت بطريقة عصبية ، عرفته يريد رحت جبته وخليته بيده مسح حلكه وأهاب غسل وجهه بالمي ، مجرد رجع راسه ليورا نزف خشمه دم تخبلت كمت اضرب على وجهي حسيت راح اخسره وجهه اصفر وعيونه انكلبت ليفوك ، تقرب أسمر فتح ازرار قميصه وفركله صدره ، أرود جاب جهاز الضغط ، اخذوا طلع صاعد ١٨ العالي على ما اعرف شكد ، سندوه واخذوا للمستشفى رغم رفضه واصراره ما يروح بس مانطوه مجال يحجي ، طلعوا واني ايدي على قلبي خايفة عليه وعلى تميم رحت توضيت وفرشت السجادة بغرفة الحجية ، وكمت اصلي وادعي ، أفنان فرشت سجادتها بصفي وكمنا ندعي ونتضرع لله سبحانه بعدها رحت لبيتي لحدما اجوي ، من سمعت سيارتهم ركضت لخارج البيت ، دخلوا ساندين أديم مثلما اخذوا بس الفرق شاديله سيروم ، دخلوه لغرفته ، تقرب مني أسمر وكال..

أسمر : هوني عليه ترى راد يموت ربج ستره اليوم...

أسمار : اسم الله دفع الله ما كان اعظم..

أسمر : اي والله الحمدلله..

دخلوه لغرفته القديمة التموا كلهم فوك راسه الولد والحجية وأفنان ، والاخيرات بس يبجون ، كام أسمر وفتح الباب طلب من الكل يطلع ، طلعوا ومن وصلت للباب كال..

أسمر : ابقي يمه لا تعوفيه الوحيدة اللي محتاجها هسه انتِ..

هزيت راسي ودموعي نزلت ، مسحتها سد الباب واني دخلت كعدت يمه على السرير اخذت كف ايديه بست باطنها وهمست..

أسمار : حمدلله على سلامتك حبيبي بية ولا بيك..

لسانه ثكيل من يحجي بتعب كال..

أديم : اسم الله غاليتي..

أسمار : بعده الوجع لو خف شوية ؟ نفس الآلام اللي تحس بيها قبل ؟

أديم : اي نفسها راح اموت..

حجاها وهز راسه متألم على المخدة..

جر نفس ومد ايديه يدور ايدي اللي تركت كفه ، همس..

أديم : وينج عني تعالي ..

تقربت ونطيته ايدي اخذ كفي طبع قبله عليه وخلاه فوك راسه وطلب مني افركله..

بديت امسد راسه وافرك صدغه ، جان عاكد حاجبه معبر عن الألم اللي اجتاح كل جسمه بدون رحمة..

بقيت افركله لمدة نصف ساعة اترخت ملامحه بعدها نفسه ثكل ، تصورته نام ، سحبت ايدي وردت اكوم ، سحبني بقوة وكعت على صدره ، هو ومغمض كال..

أديم : وين رايحة؟

أسمار : اتركك تنام وترتاح شوية..

أديم : ابقي يمي ما اسمحلج تتركيني مرة ثانية لو تبتعدين عني لو حتى تفصلين فراشج عني..

أسمار : ما مبتعدة باقية هنا..

ضغط على ايدي ابتسم بوهن وتمتم بكلمات بالكوة فهمتها لأن صوته نعسان ولسانه بيه ثكل بعده...

أديم : لا العلاج ولا السيروم يخفف عني ألمي ولا اكبر دكتور نفسي يروضني ، بس سمرتي تعرفلي ...

سحبت ايدي منه وهمست..

أسمار : نام حبيبي وبعدين نحجي..

أديم : واثق اذا نمتي بحضني راح يزول الألم كله ياسمرة..

أسمار : ما اكدر ...

أديم : ليش يا ثالث عيوني..

بلعت ريكي وهمست..

أسمار : أديم خليني اكمل الغداء وية أفنان واجي..

أديم : هئ ، ماتروحين اتعب اذا عفتيني..

أسمار : لعد خليني كاعدة ولا تطلب مني اكثر من هذا القرب..

اديم : ماشي يا بنت گلبي وروحي العليلة.

تنهد ارتفع صدره وهبط ورجع غمض عيونه بقى لازم كف ايدي بقوة، الى ان ثكلت نومته غطيته وبقيت كاعدة يمه لأن كفي سجين كفه..

رفعت ايدي الثانية وكمت امسد شعره ، ميلت راسي واني اتأمله ، شعره اسود سرح والعيون مسحوبة ماشاءالله عليها رموش كثيفة والخشم، تفاصيل اللحية لو تحديد الفك ، شكل الفم وتركيبة الاسنان ، لو سمار البشرة ، وين اباوع حتى اباوع كلشي بيه يخلي قلبي يدك بداخل صدري بقوة..

طلع منه نفس بزفرة كبيرة وهو يهمس من بين شفايفه بصوت هادئ عكس قبل شوية..

أديم : عيونج كفيها عني ما كاعد اكدر انام..

خليت ايدي على حلكي شهكت ، بعدها بصوت خافت همست...

أسمار : هاي شمدريك وانت نايم ؟؟

أديم : حسيت بعيونج تاكلني..

أسمار : جنت اباوع لبشرتك خاف يتغير لونها للأصفر..

قاطعني وكال.

أديم : وهسه شنو لونها ؟

أسمار : نفسه الحمدلله..

أديم : رجعت الروح بية من تقربتي وايدج لامست ايدي..

أسمار : حبيبي تتغدا ؟

أديم : ليش تغيرين الموضوع؟

أسمار : مو قصة اغير بس يرادلك اكل انت ما ماكل كلشي من الصبح لحد الان..

أديم : يرجع تميم وأأمن علية يلا اكدر اكل ..

أسمار : شوكت تروحون تجيبوه ؟ متأكد ما يكدر يأذيه؟

أديم : لا قلبي متطمن من هذه الناحية لأن كل همه الفلوس يرجع تميم وياخذ اللي يريده..

أسمار : مو حرامات المزرعة تروحله والله قهر ماتكدرون تشتكون عليه ؟

أديم : فدوة لسلامة ابني ..

جريت نفس وزفرته بقوة ، دار وجهه علية وكال..

أديم : الحمدلله على كل حال حبيبتي..

أسمار : الحمدلله دائماً وابداً..

مشى الوقت ثكيل واحنا ننتظر اتصال منه حتى نروح ونرجع تميم ، صارت ساعة سبعة المغرب رن موبايل إيساف جاوب ويهز براسه اي ويأكد كلامه بتمام وهذا هو ، سده التفت علينا وكال..

إيساف : رايح وحدي اجيبه واجي واي واحد لا يجازف ويطلع وراية سامعيني زين ؟

كالو اي بس بعد حديث طويل وترادد بالكلام...

إيساف : أهاب اياك تتهور أسمر لزمه وخليه يمك ماشي..

هز راسه ب اي وكال.

أسمر : يمي ما عليك..

أديم :حبيبي شيخ اول ما توصل وتستلم تميم خابرني.

إيساف : صار من عيوني الأثنين يلا اني رايح..

راح طول ٣ ساعات ، بعدها اتصل كال جاي وجبت وياية تميم ، انخبصنا والكل طلع بالباب حتى أديم جانوا واكفين بباب المزرعة يغلون من العصبية لو كدامهم أرقم الا يكسروه ، وصل أيساف وركضنا على السيارة تقرب أرود فتح بابها اخذه حضنه وصار يبوس بيه من كل مكان بوجهه.

أرود : حبيبي عمو المشتاقله شلونك..

تميم : زين عمو انت شلونك شوكت اجيت ؟

أرود : الصبح ، انت وين جنت

تميم : نزلني واحجيلك ..

أرود : خليني شايلك..

تميم : ما منتبه راح اصير بطولك

شكد ما جنا ضايجين ضحكنا على طريقة كلامه ، التفت على ابوه راحله باس ايده وحضنه ، نزلت دموع أديم ودنك لمستواه باسه من راسه لعب بشعره وكال...

أديم : غلطتي ما حافظت عليك زين وخليتك بهيج موقف..

تميم : ليش هو شنو اللي صار وليش واكفين كلكم منتظريني؟

أديم : انت وين جنت ؟

تميم : رحت وية عمو ابو الحارث لبيتهم وكال ابوك وصاني اخذك لبيتي وبعدها نروح نشتري ملابس مدرسة لان راح يبدي الدوام بس ما طلعنا ولا اشترينا شي..

أديم : ها هيج ومنو جان وياك من اجاك عمو إيساف؟

تميم : هو ابو الحارث وزوجته..

أديم :عاملوك زين ؟

تميم : ليش شنو صاير ؟ شو اسئلتكم غريبة ، بابا اني بدلت وطلعت وياه عادي يعني..

أديم : لا ماكو شي يا بطل هذا هو ..

كام أديم وربت على كتفه ، تقرب كلب بوليسي منه حضنه أديم وربت على راسه ، فزيت ورجعت ليورا اول مرة اشوف هذا الكلب بالمزرعة تقربت من أسمر وسألته..

أسمار : جايبين جلب بالجديد ؟

أسمر : لا قديم هذا ..

أسمار : شنو قديم صار شكد اني هنا ما شفته ولا مرة ولا أديم حاجيلي عنه..

أسمر : موجود بس بالبستان رابطيه ومن يطلع أديم بإماكن يحس بيها نفسه يحتاج احد نكدر نكول ينبهه على مخاطر الطريق ياخذه وياه..

أسمار : ليش يختار كلب اللي ادري بيه دائماً اكو واحد منكم يطلع ويرافقه..

أسمر : اي بس مرات يطلع وية موظفين يروحون لشركة ثانية او عقد مؤتمر يرافقه موظف عادي خوما يعتمد عليه بالكامل لهذا روكي يتولى المهمة..

أسمار : وبعد وبعد يا آل الغريب شنو ضامين علية..

بقى يباوعلي ونظراته تتفادى نظراتي من اخلي عيوني بعيونه ..

أسمار : ما اعرف ليش حاستك ضامم علية شي..

أسمر : اني ؟

أسمار : اي .

أسمر : مثل شنو ؟

أسمار : ما اعرف انت كولي.

أسمر : ماكو شي لا تخلين ببالج افكار سلبية..

أسمار : هذا هو ماشي..

أسمر : يلا خلونا نفوت جوه ونحجي ما تعبتوا؟

أديم : يلا ..

كام واخذ تميم من ايده والكلب بالإيد الثانية مشى كم خطوة رجع التفت وكال..

أديم : ام اياس وينج؟

أسمار : هنا عيني..

أديم : تعالي يابة فوتي كدامي للبيت.

أسمار : تمام اجيت..

دخلت قبلهم وبعدها فاتوا للحديقة كعدوا سوينا جلسة عربية ، جبنا الجاي والقهوة أسمر سواها على الفحم ، شوية حلويات وكعدنا ...

أسن : صار شكد ما كاعدين هيج كعدة حلوة ..

إيساف : اي والله وحلت بوجودج .

أهاب : لماذا نحن هنا...

أرود : سؤال صعب سؤال صعب سؤال يراودني...

أسمر جان يقلب بالدلة التفت عليهم مبتسم وكال..

أسمر : لماذا البيض بيضوي؟
سؤال صعب، سؤال صعب
سؤال يراودني....

ضحكوا تقرب أنهد وكال..

أنهد : لماذا تطير الغيوم والطيور؟
سؤال يراودني
لما السماء تعلو فوق الأرض والبحور؟
سؤال يراودني...

أرود : سؤال صعب سؤال صعب..

جانوا يغنون بصوت عالي ويضحكون بقهقهات عالية قفل الاغنية اخوهم الغايب من بعد مدة كبيرة يلا رجع من السفر كلنا التفتنا عليه وهو فاتحلهم اثنين ايده وبضحكة حلوة يكول..

إسلام : لماذا يعيش السمك في الماء؟
ولماذا الإثنين قبل الثلاثاء؟
لماذا نحن هنا؟ ممم
سؤال صعب، سؤال صعب
سؤال يراودني

وشلونهم اخوتي الاعزاء ان شاءالله بخير ان شاءالله بخير..

كاموا راحواله واخذوه بالاحضان ، اللي بجى مشتاقله واللي مختنك على فراكه ، جانت الانفاس محبوسة بحضرتهم ، من وصل لأديم ما سمعنا منهم غير تمتمه كلمات واكتاف تهتز بعدها ضرب بقوة على متون أديم وكال..

إسلام : حبيبي سبع واللي صارلك هذا اختبار وان شاءالله تكون اليوم نهايته وبعدها ترتاح..

أديم : ان شاءالله ، اعذرني اصريت على رجعتك بس جنت محتاجك بين اخوانك تساندني وتوكف وياية ..

سحب أديم من ايده وكعد ، البقية كعدوا يستمعون لكلامهم بإنصات..

إسلام : هسه شنو اخذها المزرعة من صدك يعني ؟..

أديم : لا يابه يحلم..

إسلام : شلون مو تنازلت عنها ؟

أديم : ابو سمرة احجيلهم..

ابتسم أسمر وكال..

أسمر : اللي صار يا اخوي وعضيدي ، من قبل لا نفوت للبيت ونجتمع بالإستقبال ونحجي على كلشي ، خابرت أديم حتى اسأله شنو محتاج ، كال..

أديم : اريد تتصل بالمحامي الخاص بية مو مال الشركة وتتصل على الضابط سيف صديق أهاب ، واسألهم شنو الحيل القانونية اللي اكدر من خلالها اضمن حقي وية شخص مبتز..

أسمر : منو مبتزك ؟

أديم : محد بس راح ابتز..

أسمر : غير يفهمني اول.

أديم : انت سوي اللي كلتلك وراح تفهم من وحدك ..

أسمر : ماشي اتصل وارجع ابلغك..

أديم : عاشت ايدك ..

أسمر : وايدك.

باي باي ، سديته ورحت للمحامي حجيتله وفهمني الطريقة شنو اسوي ، اول شي اروح للمركز اقدم بلاغ بإسم المبتز ، وبعدها ينطوني كتاب اروح اصدقه من المكان المعني حتى شنو اسجل يعتبر دليل حقيقي وينأخذ بيه..

رجعت اتصلت على أديم ، كلتله السالفة كالتالي ولازم تنطيني اسم اثبته يمهم ، نطاني اسم أرقم ، طبعاً جنت متأكد بس حبيت اسمع منه ورحت ثبتت كلشي يم المركز وياية المحامي مال أديم ..

رجعنا للبيت وفتحنا التسجيل من اول كلمة انحجت ، وهسه هو متهم بالخطف وياه ابو الحارث وتهمة الابتزاز ، وثبتت عليه تهمة مقتل شهد ، ومن اخذنا تميم ابو الحارث لزموه بتهمة الخطف والتستر على الجريمة لان شاركهم بالسكوت ودفن شهد...

إسلام : شنو هاي الاحداث الغريبة شوكت صار هيج احنا وين جنا عايشين ، من هذه اللحظة نرجع لهنا حتى لو نعرف نبني بالمزرعة كل واحد بيت ونحاوطك مستحيل اتركك بعد ، شتكولون يا ولد متفقين ؟

أسمر : اني ما اطلع منا..

أهاب : معكم معكم..

أرود : اني كذلك..

أنهد : تم .

أحمد : اني بعدني صغير يرادلي سنتين اتزوج واستقر وياكم ..

حجاها وضحك.

أزر : واني ابن البطة السودة محد يذكرني.

أديم : انت الخير والبركة حبيبي.

أزر : اخونا الضلع

ابتسم أديم على كلمته وخلى ايده على صدره كنوع من الأمتنان..

إيساف : هذا هو بس نخلص من سالفة أرقم وابو الحر نجيب مقاول يهدم البيت الخلفي اللي جان كاعد بيه ونبني كل واحد بيت حسب مقدرتكم المساحة موجودة واللي ماعنده فلوس اساعده..

رحبوا بالفكرة وحددوا كل واحد شكد يبني بس لأديم جان رأي مختلف..

أديم : ليش ما ابيع المزرعة واشتري بيها بستان جبير بيه كذا دونم ونبني بيوت بشكل دائري وتكون الحديقة تتوسط البناء وكل البيوت واجهتها شكل واحد شنو رأيكم ؟

إيساف : ليش ؟

أديم : قلبي محصور منا ما ارتاحيت ابد ولا عندي ذكرى حلوة بهذا المكان اريد اطلع منه واخلص...

إسلام : خلص نسوي اللي يريحك شتكولون يا ولد..

كالوا كلنا وياكم اللي تسووه قابلين بيه..

إسلام : خلص اني راح اتكفل بكلشي بس عليكم تختارولي المكان وتبيعون المزرعة ونبلش..

إيساف : ماشي من باجر امشي بالاجراءات وتبقى بس التواقيع اخذ أديم هي يوم واحد تكتل نفسها يومين..

إسلام : متفقين..

بقوا يحجون واحنا دخلنا نسوي عشا التفتت على أفنان وسألتها.

أسمار : وين سارة ؟

أفنان : راحت

أسمار : وين ؟

أفنان : اجى ابوها اخذها اول ما طلع أرقم منا وصارت هوسة برا ما سمعتي؟

أسمار : لا ابد شوكت اجى بالضبط ؟

أفنان : من اخذوا أديم للمستشفى..

أسمار : ها جنت بهذاك البيت لهذا ما سمعت..

أفنان : اي خطية كامت تبجي..

أسمار : الله يساعدها انكسرت وهي بهذا العمر.

أفنان : اي والله يعوضها ويعوضنا خير رب العالمين ..

أسمار : امين ..

كملنا العشا وطلعنا برا صحنا الولد دخلوا واخذوا الصحون ورجعت لمتنا الحلوة والمزاج الهادئ رغم النكد اللي صار واللي عشناه ،جنا كاعدين ولهناك اجى تميم جايب الايباد وكف يمي وكال..

تميم : ماما هذا اياس يريدج..

أسمار : ها عيون امك انطيني احجي وياه..

اخذته منه جان فاتح كام ..

أسمار : هلو حبيبي هاي وينك اتصل عليك ماتجاوبني..

اياس : بيبي ما تقبل احجي وياج.

أسمار : ليش ؟

اياس: تكول اذا ما ترجع بعد ما نريدها..

رفعت عيوني باوعت عليهم الكل يباوعلي وأديم عاكد حاجبه بإستغراب ماكدرت اغلق الصوت خاف ياخذون صورة ثانية ولا بية ابقيه مفتوح حرت ، حس بحيرتي أديم ورفع ايديه كال..

أديم : انطيني اسلم عليه

نطيته الايباد ورحت كعدت يمه ، اخذه بابتسامة كال..

أديم : شلونك بابا حبيبي ؟

اياس : زعلان عليك.

أديم : ليش يا بطل الابطال..

اياس : ما تسأل علية بس اني اسأل عليك..

أديم : حقك علية ، زين شنو رأيك اجيك ونطلع بسفرة نفتر اني وياك وماما وتميم..

اياس : يس ، صدك بابا؟

حجاها وكور ايده بقبضة وبقى يهتف بكلمة يس ، يس..

أديم : انطيني مهلة عشر ايام وعد مني راح اجيك ماشي..

اياس : بابا عشر ايام بس واذا صارت ١١ ازعل ..

أديم : لا عشرة لان اريدك تجي وتشتري ملابس وية اخوك حتى تداومون مدرسة ما بقى شي ويبدا الدوام.

اياس : اي بابا اني ضجت من هاي مدرستي..

لهناك واسمع صوت ترانيم وهي تكول.

ترانيم : اياس وينك اياس..

همس بصوت ناصي..

اياس : راح اروح اجتي خالة باي..

حجاها وسده ، التفت علية أديم بصوت ناصي كال...

أديم : ليش مانعين اياس يحجي وياج ؟

بصوت اقرب للهمس كلت..

أسمار : بسبب طلاقنا ماما ضايجة وماخذة من عندي موقف..

أديم : ماشي سهلة ان شاءالله لا تشيلين هم..

اخذت نفس قوي وزفرته..

أديم : سهلة حبيبتي سهلة لا تشيلين هم، نروح نرتاح شنو رأيج ؟

أسمار : انت حاسس بتعب؟

أديم : لا بس انتِ تعبتي اريدج ترتاحين..

أسمار : لا ما تعبت عادي..

إسلام : يلا يابة توزعوا اني تعبان واريد انام وأديم وزوجته يريدون يرتاحون وإيساف وأسن نفس الشي وانتوا يا صايعين ناموا ماعدكم شغل وعمل.

أديم : عاشت ايدك توني اريد اكول ..

إسلام : سمعتك يابه لا عبالك عندي احساس..

أديم : اي شكيت بهذا الشي..

حجاها وضحكوا، استأذنا منهم ورحنا للبيت تميم طلب يروح ينام يم الحجية ، وأديم اخذه بيده وصله يمها ورجعلي..

من دخلنا للبيت رحت لغرفتي المنشفة والروب ورحت للحمام سبحت ورجعت لكيته كاعد على السرير منتظرني..

تقربت منه وهمست..

أسمار : شنو ما جاييك نوم ؟

رفع راسه بإتجاهي وهمس...

أديم : تسمحيلي انام هنا اليوم ؟

أسمار : شلون واحنا!!!!

تقرب وخلى اصابعه على حلكي سكتني ، وكال..

أديم : يا معجزات الكون انتِ...

تقرب اكثر وصار يهمس بهدوء يطرب مسامعي..

أديم :ادمنت عطرج ارقني غيابج، عشقتج بلهفة وغرت عليج بمثلها ، يا طيفي اللي يمر علية بليلي كنسمات تبرد كاهلي ...

صافنة بيه وبكلماته وذايبة حب وعشق خدرت حواسي ، غمضت عيوني واتخيل نفسنا بمكان بيه بحر وتحيطنا الاشجار وما نسمع غير حفيفها وتمر على وجهنا نسمات الهواء الباردة...

سحب شريط الروب لزمت ايديه حتى امنعه ، وخر ايدي وهمس بأذني..

أديم : اتركيني احتسي وأنهي ...

أسمار : ما فهمت ..

حجيتها ورجعت شعري ورا أذني من الخجل..

سحبني من ايدي وكعدنا على السرير بصمت وهدوء بدا يداعب ملامحي بخفة اصابعه ، واني ساكنة استمع لأنفاسه المنتظمة عكس انفاسي الهوجاء...

أديم : لا تخافين قربي حبيبتي..

أسمار : أديم بس...

أديم : اش ماكو بس ، لا تتصورين مجرد تصور ألمسج بالحرام ...

أسمار : شنو مافهمت قصدك ؟

أديم : انتِ زوجتي وحبيبتي وام اولادي الثلاث تميم واياس والطفل الجديد ان شاءالله يجي بسلامة..

أسمار : اعرف بس احنا انفصلنا مو صحيح؟

أديم : صحيح بس رجعتج على ذمتي ولا تلوميني وتكولين شوكت وليش ما كلتلي احترمت رغبتج بس خفت ألمسج بالحرام والله يعاقبني بفقدانج وهذا الشي مستحيل اتحمله اني..

أسمار : يا الله يا أديم وصبرت علية كل هذا الوقت ما حجيت ولا تقربت ولا توددت..

أديم : لأن احترمت رغبتج وردت تكونين مستعدة ترجعيلي ما ارجعج غصب ، وهسه تكولين افعالك تناقض كلامك ، لا والله جنت ناوي اتركج شوكت ما تحبين ترجعين ارجعج بمهر جديد وبالشروط اللي تعجبج بس بيوم اللي تخربطتي بالحمام واضطريت اتقرب منج واحضنج بيني وبين نفسي رجعتج على ذمتي ...

أسمار : وهذا الشي صحيح يعني ؟

أديم : اي إيساف من طلع من البيت اتصل علية بضحكة كال..

إيساف : ابو تميم خاف تضعف كدامها وما تقاوم ردد هذه الصيغة بينك وبين نفسك حتى ما يصير بينكم حرام..

أنتِ عندي كما كُنتِ باستحضار النّية...

أديم : ماشي حبيبي لا يظل بالك..

إيساف : ما ينخاف عليك بس حبيت اخليها ببالك حتى اذا جانت معاندة مو ضروري تحجيلها ...

أديم : تمام..

ومن شفت نفسي ما سيطرت كدام دموعج والشهكات اللي جانت تفوت قلبي على شكل طعنات سجاجين ، تقربت حضنتج بقوة ضميتج لصدري من شفتج تجاوبتي وياية وبرضاتج حضنتيني وتقبلتيني استحضرت النية ورفعت راسي همست بيني وبين نفسي..

أديم : أنتِ عندي كما كنتِ ، زوجتي وحبيبتي وام اولادي وسكني ومسكني وهدوئي.

بعدها تداخلت ارواحنا وتقاسمنا الحب بلهفة وبدينا بداية جديدة متمنين الهدوء والراحة بباقي ايام حياتنا القادمة...

ثاني يوم كعدت لكيته حاضني وكأنما خايف يفقدني بعدت راسي عنه وهمست..

أسمار : أديم حبيبي خنكتني ..

فتح عيونه يباوعلي حسيته يشوفني نظراته تتوزع على وجهي من عيوني لحد شفايفي خفت اسأله انت تشوف لو لا خايفة اجرحه بسؤالي، دكات قلبي تضاعفت، تحمحم وكال..

أديم : تدرين ايدي خدرانه ، الليل كله نايمين على جهة وحدة..

أسمار : من غمضت عيوني هسه يلا حسيت..

أديم : شبسرعة مر الوقت عبالك نايم لحظة بس..

أسمار: ان شاءالله ايامنا القادمة كلها راحة وسعادة مثل الليلة اللي مضت وصباحنا هذا الحلو...

أديم : يا توالي العمر ياسمرتي، لوعة قلبي وحركتي...

أسمار : ليش حركتك؟

أديم : قلبي ملجوع من كثر ما جنت مشتاق..

أسمار : اسم الله ياعيني ، صدك أديم.

أديم : عيونه.

أسمار : أرود..

أديم : شبيه ؟

أسمار : شلون نكوله على ترانيم.

أديم : ليش شبيها ؟

أسمار : انخطبت..

عكد حاجبة وبصدمة كال..

أديم : لا بربج !! صدك تحجين؟

أسمار : اي والله..

أديم : هاي شنو ؟ شوكت والمن؟

أسمار : ما اعرف .

أديم : لا ياالله ، وين موبايلي..

أسمار : شنو راح تسوي ؟

أديم : اكوله غير خوما اخليها تروح منه واني ادري غير يزعل ويعاديني طول العمر..

أسمار : بس شلون راح توصله الفكرة بدون ما تأذيه.

أديم : هي طيحان حظ وأذية احجيها مثل ما سمعتها وهو يتصرف..

اخذت الموبايل فتحته واتصلت على ارود ، رد بصوت نعسان ويتثاوب..

أرود : ها أديم..

أديم : صباح الخير.

أرود : صباح النور شنو اللي مكعدك من الصبح..

أديم : عوفك مني واسمع اللي راح اكوله..

وحجاله السالفة كلها ، أرود سكت وسد الموبايل بعد ما استأذن من أديم ..

أسمار : لو ما حاجيله بهاي الطريقة ..

أديم : لازم يعرف حتى يتصرف..

أسمار : ما اعتقد ماما راح تقبل تنطيه ترنيم وماظل شي للجمعة...

بقينا نحجي شوية بعدها رحت للحمام سبحت وبدلت نشفت شعري واتصلت على ماما ماردت وبابا نفس الشي زعلان على زعلها اتصلت على اياس حجيت وياه شوية وراح يخاف منها ، سويت ريوك وانتظرت أديم يطلع من الحمام ، من فات للمطبخ يلا صبيت الجاي وكعدنا نتريك بهدوء ، بعدها سويت الغداء وبديت انظف وبالي يم أرود شعجب ما اجى لهنا ولا سألني ولا طلب مني المساعدة معقولة ما همه الموضوع شو استقبله بهدوء..

للعصر اندك باب البيت جنا اني وأديم كاعدين نشرب جاي ، فتحته وجان اشوف أرود حال الضيم حاله عيونه حمر وبيده الموبايل فاتح الخط وياها واسمعها شلون كاتمه تنهيداتها والبجي وتكابر من صوتها عرفتها مو طبيعية ، وهو ما يقل عنها واسوء حال يمكن ...

باوعلي وكاللها..

أرود : رحت احجز ماكو حجز قريب كله اسبوعين واكثر حاولي تفركشين كلشي لخاطري ..

ترنيم : ما اكدر..

أرود : ولج ليشش ليش ما تضحين شوية وتتعبين حتى ننجمع..

ترنيم : تأخرت هواي..

أرود : ولج شنو تأخرت قابل بيدي مو هسه شرحتلج سبب اختفائي.

ترنيم : تكذب علية..

أرود : اسألي اختج اسألي اي احد وراح يحجيلج اذا ما مصدكتني..

ترنيم : وليش ما حجيتلي من جنت اتوسلك واريد اعرف سبب غيابك غلقت موبايلك واني ما اعرف عنك شي.

أرود : ردت من احجيلج دليل برائتي بيدي حبيبتي عيوني انتِ بس انطيني فرصة وحدة وشوفي شنو راح اسوي ساعديني..

ترنيم : ماتت لحظات الانتظار بغيابك اللحظات اللي جنت اتلوى من اشتياقي ولهفتي عليك ، منا وجاي ما عندي حبيب بهذا الاسم ..

أرود : تحجين صدك انتِ ؟

ترنيم : اي قنعت نفسي بهذا الشي واكتفيت..

أرود : حرام عليج وما اريد ادعي ما تتهنين..

ترنيم : ادعي قابل الله سبحانه راح يسمعلك..

أرود : ولج ترنيم..

حجاها وعاط بصوت عالي على اثرها سدته ومن يتصل ما تجاوبه بعدها حظرته من كل المواقع...

يتبع....

مساء الخير والعافية
صح تأخرت بس جبت وياية بارتين سوية طبكتهن....