رواية أحببتُ ذلك الغريب الفصل السادس وخمسون 56 - بقلم عبير إدريس

الادري بي من تبتعد
مدري شأحس ابحيرتي
صدري حفر بي خنجر
مگطوع شريان ابهر
يندفع شباچ الجفه
وبالروح شي يتكسر

_______________

بقى صافن علية وبيده الموبايل ، بعيونه شفت شعور بعث بداخلي رعشة خوف ويتلوها حزن ، بصوته وعود مستحيل بيوم تنتهي بشرط اذا ترنيم صارتله...

يحجي ويأشر بيده بحركة قلب ممزوجة برجفة عصبية ، كعد على عتبة الباب واني وأديم كاعدين بالكاع يمه ما نعرف شنو نسوي وشلون نواسيه بقينا نستمعله وبس..

أرود : يعني هذا هو ماراح اسمع ضحكتها العفوية ولا عتابها واستياءها مني اذا تأخرت عنها ما جاوبتها بنفس اللحظة ، ماراح نكمل حلمنا سوية ، زين مو هي كالت مستحيل اصير لغيرك ، و اللهفة اللي جنت اشوفها بعيونها من اروحلها للجامعة معقولة طفت ، ولكم ترنيم طفت النور بداخلي من سدتها بوجهي وكالت ابتعد احس زرعت نار بگلبي ما اتصور بيوم تبرد ..

يحجي ويضرب بقبضة ايده بقوة على صدره ، كمت جبتله مي دفع ايدي تكسر الكلاص ، أديم همس..

أديم : مو بوعيه اعذريه..

أسمار : حقه عاذرته..

أرود : ولكم خاينة هاي خانت العشرة وخانت الحب خانت كلشي حلو بيني وبينها جذابة طلعت جذابة..

التفت علينا وجهه حسيته ملتهب من اللون الاحمر ، خشونة صوته ودموعه اللي رافضة بكبرياء تنزل كلشي بأرود يدل على الفقد ما تصورته لهذه الدرجة ممكن يضعف ...

أرود : هالكد ما احبها من جنت التقي بيها تموت الكلمات بحضرتها وجنت خايف من هذا اليوم وكل مرة اسألها نفس السؤال ، ترنيمة هم راح ييجي يوم تتخلين بيه عنا ، تجاوبني وتكول..

ترنيم : لا تخاف مستحيل اخذلك بيوم وهذا وعد مقدس بينا ، حبيبي صدكني كل ما املك من مشاعر وحب وجمال داخلي وخارجي هو ملك الك وحدك بس انت..

جانت تحسسني اني ملك بحبها مكتفي بيها ولكم ماجنت اباوع لغيرها كل البنات كمت اشوفهم عبارة عن سحاب من الدخان الباهت بعيوني ، كم مرة طلعنا طلعات شبابية واشوف اشكال البنات بس جنت اغض البصر لأجلها اروح اخابرها مفتخر بهذا الانجاز ، حسيته انجاز من اقاوم نفسي القديمة وما اشوف غيرها..

كام من مكانه وكعد على ركباته كبال أديم وكام يسأله مثل الطفل ..

أرود : أديم اللي صارلي استاهله ،اني استاهل تخليني انهار بهيج طريقة وبدون ما تبررلي وانت تعرف كلش زين اصعب شي بالدنيا من يغادرك اللي تحبه بدون ما يبرر ويخلي النار مشتعلة بكلبك وما تطفى ابد..

أسمار : والله صح..

بغصه جاوبه..

أديم : تنساها يراد وقت وتنسى..

أرود : وعيونها !!!

أديم : شبيها ؟

أرود : شلون بية ..

أديم : اصبر ياحبيبي اصبر شتسوي اذا من نصيبك تصيرلك صدكني..

أرود : اصير جبان يعني واتخلى عنها ارفع ايدي هيج وانفضها واكول والله القدر اخذها مني تحجي صدك أديم..

كام يضرب إيد بإيد وينفضها كأنما بيها غبار ويريد يتخلص منه..

أديم : شتسوي يعني ..

أرود : كلبها فرغ مني ؟ كدرت تخلي بيه بديل بمكاني ؟ هيج سهلة عندها!!

أديم : هي قسمة وهذا المكتوب لازم تشوفه..

أرود : ها واكوم اغني هي قسمة وانت ما مقسوملي ذيج دامت حتى هاي تدوملي أديم ادعيلي برويحة حلال ، مو جبان اني واكعد اغني وانوح أديم ترنيم ماتصير لغيري واني ما اريد غيرها ما اريد رويحة حلال غيرها..

متت قهر عليه حسيته فقد عقله ، كمت ورحت للغرفة ما اتحمل اسمعه اكثر ، اخذت موبايلي واتصلت عليها ما ترد رجعت اتصلت على ماما هم ماترد تخبلت بالاكثر اتصلت على اياس ماعنده نت فاصليه ، انتظرت أرود يروح ورحت لأديم لكيته كاعد بمكانه كعدت يمه وهمست بصوت مبحوح..

أسمار : أديم خابر بابا ..

جاوبني عاكد حاجبه.

أديم : وليش اخابره ؟

أسمار : اطلب منه يأجل المهر لوقت ثاني..

أديم : وشنو سلطتي عليه حتى يسمع كلامي.

أسمار : كوله نريد نجيب البنات ونجي نحضر المهر.

أديم : يابنات ؟

يحجي وياية بدون نفس..

أسمار : يا بنات يعني اني وخالة أسن ..

أديم : ما اعرف حتى عقلي وكف صار ما يفكر..

أسمار : لخاطري فدوة لعيونك خابر بابا ..

أديم : هي شوكت الحفلة ؟

سأل بملل وكاره اهلي هيج حسيته..

أسمار : يوم الجمعة..

أديم : ما ظل شي..

أسمار : اي بلكت نكدر نسوي شي ..

أديم : اذا رحنا ما اريد أرود يعرف احنا رايحين ..

أسمار : ليش اني اصلا اريده يجي ويانا حتى يحجي وية بابا علمود هذا الشي اريدها تتأجل..

أديم : لا

أسمار : ليش

أديم : انتِ تعرفين شي واني اعرف شي..

أسمار : لا أديم لا تحرك گلبي، فهمني على الأقل.

أديم : أرود اذا راح يسوي مشكلة وهناك القوانين مو مثلنا يعني اذا اهلج قدموا شكوى ينسجن وتعال صير سبع وطلعه مناك، شلون بهيج حالة ؟

أسمار : لا ما يسووها..

أديم : اذا شافوا فعل أرود راح يسووها اني اكلج..

أسمار : والحل؟

أديم : ما اعرف..

أسمار : خابر بابا وخلينا نجرب حظنا حباب أديم ..

رفع راسه بإتجاهي مبتسم ..

أسمار : ليش ضحكت ؟

أديم : متمني اشوف نظرات التوسل وملامحج شلون تكون من تطلبين مني شي...

كعدت بصفه اخذت كف إيده وهمست...

أسمار : بقوة مشاعرنا وإلحاحنا بالدعاء راح يرجع نظرك وتشوفني بكل احوالي من مرتبة وحلوة ومن كفشتي شكبرها اول ما اكعد ومن وجهي مكلوب بس ابينلك مابية شي ، بس ينراد ترتاح ونصبر شوية.

ضمني لصدره وكال..

أديم : الصبر كلفنا هواي.

أسمار : المهم احنا سوى الباقي يجي شوية شوية..

ابتسملي وكال..

أديم : امج بشنو تنست بيج ؟

أسمار : مممم يمكن بالعسل..

قبل راسي وكال..

أديم : كلشي بحياتي اجى عابر الا انتِ استوطنتي القلب وسرقتي دكاته..

أسمار : وبنيت بيه بساتين وعمارات..

أديم : وبحبج تمت دولتي..

أسمار : أديم ، شلون رب العالمين سبحانه جمع بيك كل الاشياء اللي اني احبها واتمناها من زمان..

عكد حاجبه مستغرب ..

أسمار : هاي شبيك ؟ حجيت شي غلط !!

أديم : حبيبتي طبعاً استغرب ..

أسمار : ليش ؟

أديم : هو لو الخطأ بيج لو بية ..

أسمار : ليش بله ؟

أديم : شنو حبيتي بية ما تكوليلي اذا اني نفسي ما حاببها ، وبعدين شنو اللي بية حلو...

أسمار : شنو البيك مو حلو ؟

أديم : كلشي ..

أسمار : اذا نجي من ناحية الشكل ما ناقصك شي تجنن ، واذا من الشخصية فد شي مابيك عيوب ..

أديم : نحس.

أسمار : مو دائماً..

أديم : عصبي..

حجاها ورفع حاجبه..

أسمار : احياناً..

برطم وكال..

أديم : كئيب..

أسمار : حسب المواقف وحقك..

سوى حركة بخشمة وكال..

أديم : انطوائي..

أسمار : افضل شي بهذا وقتنا نكون انطوائيين وننفتح بس وية الناس اللي نحبهم..

أديم : قاسي..

أسمار : على نفسك تقسوا احياناً بس قسوتك وياية الها مبرراتها..

أديم : مزاجي..

أسمار : هذا اكثر شي احبه بيك..

أديم : هاي شنو !!

أسمار : لا تنسى اني هم مزاجية لهذا افهم مزاجيتك واغلب الاحيان تكون وقتية ..

أديم : مممم ، سمرتي شلون خليتي قلبي ناصع بعدما ما جان مليان بالصدئ ..

خليت ايدي على قلبه وهمست قريب أذنه..

أسمار : من وصلت لأعماق قلبك ودخلت بيه وشفت ماكو وحدة غيري متربعة اجيت تربعت و بديت انظف شكو غبار شكو شي يحتاج تنظيف شكو جدار مايل يراد تعديل عدلته ، اللي يحتاجله ترميم رممته وبعدني مازلت اشتغل..

ضحك من قلبه وكال.

أديم : خرب بضميرج اذا عندج ضمير.

ضحكت وسألته ليش..

أديم : شنو ماخذلي مقاول اني ..

أسمار : اجمل مقاول اخذت قلبك كبالة ودفعت ثمنك مقدماً ...

أديم : شنو الثمن اللي دفعتيه واشتريتيني..

أسمار : كاعد اتشاقى ليش طريقة كلامك ونبرة صوتك تحولت لشي جدي..

أديم : لا صدك جاوبيني ارتباطج بية شنو خسرج او شنو دفعتي ثمن مقابيله..

أسمار : اذا كلتلك ماكو شي تصدكني ؟.

اديم : طبعاً لا..

أسمار : ليش؟

أديم : لأن تكونين بالغتي..

أسمار : عوف الموضوع حبيبي..

أديم : لخاطري احجي.

أسمار : مو كاعدين ونحجي حلو ليش تحولها جلسة نكد هذا اللي ما احبه بيك ، وانت نسيت تذكره ..

أديم : شنو هو ؟.

أسمار : انت إنسان نكدي.

أديم : عجل ليش حبيتيني..

أسمار : بله هذا هم سؤال ينسأل؟

أديم : اي اخذيني على كد عقلي وجاوبيني..

أسمار : من التقيت بيك جانت صدفة ومن اجمل صدف حياتي ، لقاءنا جان بدون موعد ومن يومها يا أديم قلبي دك بنبرة غريبة ما اعرف شنو تفسيرها بحيث من جنت اشوفك لو احجي وياك وارجع واكون وحدي بالبيت من اشتغل واطبخ احضن نفسي واركص وياها وبس اضحك ، انت بكل مساوءك اللي ذكرتها بالنسبة الية جانت مميزات بيها رجعتلي الحياة ، حبيت اهتمامي بيك حبيت اكون مسؤولة عنك ومنك ، من التقيت بيك بالضبط مثل هاي الاية فضحكت فبشرناها..

بعبرة كال.

أديم : هذا اللقاء رجعني للحياة ، جانت تصير احتفالات بداخل قلبي جنت من اشوفج لو اسمع صوتج اذوب اخدر ، جنتي مرات تحجين بعفوية وسوالف عادية بس اني اكتب بيها قصص وروايات وانطيها مساحة واسعة من تفكيري ..

أسمار : تعرف ليش هيج احساسنا جان .

أديم : ليش ؟

أسمار : لأن من التقينا جانت قلوبنا مكسورة ، واثنينا رممنا بعضنا بدون ما نحس لهذا من انت تصير بشدة وتعصب وتنهرني ما جنت اضوج منك ولا ازعل ولا افكر ابتعد لأن بكل بساطة حياتي كلها ارتبطت بيك تتوقف لغيابك وترجع اذا رجعت..

أديم : واني اكول شنو اللي جابرها تتحملني، تصدكين قبل لا تجين اللي يحبني واللي يكرهني بزع مني ..

أسمار : تتحسس يا أديم وين بزعوا منك هسه بس اشرلهم وشوف شلون كلها تلتم فوك راسك يريدون بس يقدمولك اي خدمة ترضيك وتفرحك...

أديم : عوفج من هذا الحجي وخلينا نفوت جوة..

أسمار : ليش ؟

أديم : اريدج بشغلة صغيرة.

أسمار : تمام يلا..

كمنا اخذني من ايدي ودخل قبلي دخلت وراه توجه بيه لغرفتنا...

أسمار : ها وين ؟

أديم : تعالي مشتاقلج..

أسمار : اي بس خلي نتصل على بابا اول احجي وياه وبعدين.

أديم : يابابا انتِ الثانية عوفيهم وتعالي..

أسمار : أديم ولك أديم.

احجي واعت بإيدي اللي جانت بقبضة ايده الكبيرة قابض عليها بكامل كفه..

دخلنا للغرفة كعد وسحبني كعدت بصفه ، التفت علية صفن بية تنهد وكال..

أديم : بدون ما اشوفج وقلبي هايم بيج ، شلون اذا تلاكت العيون وغرقنا بتفاصيل بعضنا ، وعبرنا على حبنا بالنظرات ، وبعدها احتضنج ونذوب بتفاصيل اللحظة لحدما نوصل لقمة الشوق ، تعرفين النظرات توصل الاحساس من القلب للقلب بدون استأذان..

أسمار : مو صحيح..

أديم : ليش ؟

أسمار : لأن اني كاعد احس بكلشي وياك ومتأكدة تشوفني بقلبك..

أديم : تعرفين اللي احبه بيج شنو ..

أسمار : شنو ؟

أديم : ولا يوم عبرتي عن عماي بمصطلح معين حتى اذا حجيت عن نفسي ما تأيديني ، مثل هسه شلون اختاريتي جملة خليتيني اسكت ما اعرف شنو ارد وما اعرف اعبر عن كمية الحب اللي بكل مرة تحجين بيها وياية بطريقة تجتاح قلبي بدون رحمة..

أسمار : شكراً على جمال الكلام ما اعرف شنو ارد..

أديم : لا تردين اليوم بس اني احجي وانتِ اسمعي..

وبدا بالغزل العذري نهاية بالغزل الفاحش...

بصوت اقرب للهمس كال...

أديم : وحبيب اخفوه مني نهاراً
فتخفى وزارني في اكتِئام
زارني في الظلام يطلب ستراً
فافتضحنا بنورهِ في الظلام..

يتغزل ومشاعري اختلطت بين القبول وبين الرفض لأن خجلت منه، بعدها همست..

أسمار : تعرف اجمل شي يسويه الرجل لحبيبته شنو ؟

أديم : شنو ؟

أسمار : من يوصف اشياء بيها هي نفسها ما تعرفها..

أديم : عجيب..

أسمار : ليش؟

اديم : اني هيج حاس نفسي اشوف بيج اشياء جميلة انتِ بنفسج ما تعرفيها.

أسمار : معقولة ؟

أديم :تدرين بنفسج جنتي توصليني مرحلة واني بالمكتب بوسط ناس وعندي اجتماع تمرين بلحظة على بالي ، اختم الاجتماع وانهي الدوام مثل المجنون حتى بس اوصل واستقر بين احضانج خصوصاً بالليالي اللي جنتي تخليها مميزة وجنت اطمح اخليها مثالية
وبنهاية كل ليلة نأكد لقلوبنا بأن حرارتها ما راحت سدى وانما تعلم الرجل شلون يعشق بكل ما في قلبه وعقله من حب وينطيه لحبيبته وزوجته بشكل مجنون...

بين غزله وتفاصيل حبه العميقة ، ابحرت ورسمت بمخيلتي مستقبل كله أديم وما يخصه ، يتفاصيله بحكاياته بصوته بتنهيدات حبه ، بعدها نام على السرير وسحبني على صدره وكال..

أديم : انتِ كاملة والكمال لله ماكو هيج شي ..

أسمار : يعني ؟

أديم : كاملة بعيوني وبحبي ومالية علية حياتي ، سمرة صرتي تمشين بدمي ..

أسمار : انت هم..

حجيتها واجتاحني النعاس ونمت بعد ما اعرف شنو صار وراية منو سواله عشاء ومنو رتب اشياء تميم ما كعدت غير الساعة اربعة الفجر ، مديت ايدي لمكانه جان فارغ استغربت وين راح ، كمت لبست الروب وطلعت مشيت للإستقبال سمعت صوته وهو يكول..

أديم : سمع الله لمن حمده..

ابتسمت عرفت كاعد يصلي ، رحت للحمام ،بعدها بدلت ورحت للمطبخ سويت قهوة صبيتها بالفناجين ، اخذت الصينية ورجعت للهول تحمحمت حتى يعرف بوجودي ، كمل صلاتة رفع السجادة من الارض طبكها وخلاها على الطبلة ، ابتسم وكال..

أديم : صباح الخير للي جمعني بيها القدر وانكتبت روايتنا بإكثر من سطر..

أسمار : صباح الخير والعافية حبيبي ، وتقبل الله..

حجيتها وكعدت على القنفة خليت الصينية كدامي، كعد بصفي وكال..

أديم : تقبل الله اعمالج ..

أسمار : سويتلك كهوة تشرب وياية ؟

أديم : يلا ياريت..

أسمار : تفضل عيوني..

أديم : دايمتلي انتِ وعيونج الغالية..

أسمار : فدوة لقلبك ، اديمي..

أديم : بس قبل ما تحجين ، صليتي ؟

أسمار : لا هسه بس شوية ارتاح واكوم اصلي ابنك ما اعرف بنتك بس يدفر بية الظاهر ماعاجبه الوضع تعب مني يريد يطلع..

حجيتها وضحكت هو هم ضحك وكال.

أديم : صار هواي ما رايحين للدكتورة خلينا نروح ونشوف الوضع شنو..

أسمار : الاحداث الاخيرة نستني حتى نفسي.

أديم : حقج ، اي شنو ردتي تحجين..

أسمار : عاجبني اكتب قصتنا..

عكد حاجبه مستغرب بعدين كال..

أديم : ليش ؟

أسمار : ما اعرف حابة اخلدها بكتاب..

أديم : وهذا الكتاب تحتفظين بيه هنا غير ..

أسمار : لا انشرها.

أديم : وين تنشريها ؟

أسمار : انشرها بكتاب والناس تقرأها..

أديم : لا حبيبتي ما اقبل..

أسمار : لخاطري كلش عاجبني..

أديم : وانتِ وين وقتج حتى تكتبين يادوب تلحكين على البيت وعلينا..

أسمار : حبيبي يعني اترك الكتابة نهائي..

أديم : لا ياعمري بس انتِ كلتي اني تعبت وما اكدر اكتب بعد وهسه وراج طفل ويرادله عناية وتجين تكتبين القصة وكل موقف صار وياج يحتاج منج اعصاب ثانية حتى تكتبيه احنا نريد نخلص من المشاكل اللي صارلتنا نجي نخلدها بكتاب ليش..

أسمار : لا اريد اكتب قصة حبنا وغرابتها والتعويض الرباني الي والك واكتب شلون صبرنا وتخطينا كل الصعوبات سوية إيد بإيد وما تركنا بعضنا ولا هدينا كفوف بعضنا من دخلنا بمطبات..

أديم : اطلبي اي شي الا هذا..

أسمار : عاجبني يا أديم.

أديم : خلص اكتبيها على شكل ملاحظات وبعدين اطبعها الج بالمكان اللي يعجبج بس نشر لا..

أسمار : ما اكتبها اني..

أديم : عجل منو يكتبها ؟

حجاها وبدا يصير عصبي..

أسمار : انطيها لكاتبة ..

أديم : ومنو هاي الكاتبة ؟

أسمار : ما اعرف اشوف بوقتها وحدة من زميلاتي كون تشبهني مثل احساسي مثل نوع قلمي ، شخصيتها تلامس شخصيتي بهذاك الوقت اسلمها قصتنا واني مطمأنة.

أديم : ومنو يكول هذه الكاتبة ثقة وتحفظ السر وبعدين يا أسمار ننفضح هاي اسرار شلون تطلع للناس؟

أسمار : نغير بيها مو مثل قصتنا نصاً ..

أديم : اذا تغير بيها شي تعتبر خيال مو حقيقة واذا انحجت نفسها هاي فضيحه وعيب..

أسمار: لا تغيير من نواحي معينة واضافات من الكاتب اني وياها عود نرتبها انت اللي عليك بس تنطيني الاوك حتى ابدأ اختار فدوة..

أديم : يا سمرة صعبة علية.

أسمار : حبيبي قصتنا فخر اذا انكتبت ماكو شي نستحي منه..

أديم : خليني افكر واذا كلتلج لا معناها لا.

أسمار : تمام هذا هو..

أديم : تقريلي اول بأول.

أسمار : طبعا بارت بارت اقرالك.

أديم : بارت بارت شنو ؟

أسمار : يعني جزء جزء..

أديم : ليش راح تسوين الكتاب اجزاء؟

أسمار : مو اخاف اكولك الفكرة وتقلب علية..

أديم : ليش اقلب عليج فهميني ..

أسمار : حبيبي اكو برنامج كلش حلو مال روايات وبيه كاتبات كبار يكتبون قصص مثل قصتنا والناس تتفاعل وياها ومرات يبجون ويضحكون وياهم ويحبون البطل ومرات يكرهوه اذا ضوج البطلة..

أديم : اكيد راح يكرهوني لا عيني ما تكتبيها بهيج طريقة ، اذا وافقت تكتبيها بكتاب..

أسمار : من توافق نسولف عوفها لوقتها ماشي..

أديم : ماشي بس اذا كلت لا معناها لا يا ست أسمار.

أسمار : اي اسكت بعد.

أديم : انتِ تسكتين !!

أسمار : اي شبيك متعجب..

أديم : ما اظن ياسمرتي..

أسمار : هسه خليني اصلي وارجع انام نعست وانت شنو راح تسوي ؟

أديم :ابدل و اروح للدوام ماظل وقت..

أسمار : بعد وقت ..

أديم : اذا نمت راسي يكوم يأذيني ..

أسمار : تمام هذا هو براحتك يلا اروح اصلي اني.

أديم : ادعيلنا سمرمر..

أسمار : ماشي.

حجيتها وضحكت على اسمي الجديد ، فتت للغرفة صليت ومددت كلت شوية واكوم اسويله ريوك وجان اغفى ، فزيت على صوت بالمطبخ ، كمت ومشيت على كيفي صايرة ثكيلة كلش وبعدني بالبداية لو اوصل السابع والثامن شنو اصير ، وصلت لكيته مبدل ويصب بالجاي ، ياربي كل يوم شكي يزداد هو يشوف بالاخص من رفع عينه اتجاهي مبتسم وهو يكول..

أديم : اصبلج جاي تتريكين وياية ؟

أسمار : ليش ما صحتني اني اسويلك..

أديم : شفتج نايمة انقهرت عليج ما نطاني قلبي اكعدج..

أسمار : شفتني نايمة ؟

أديم : اي..

أسمار : تمام صبلي جاي اريد اتريك على واهسك..

الشك دخل لقلبي خصوصاً من اشوفه يسوي كلشي بدون ولا غلطة ، قبل جان يدخل المطبخ يسوي فوضى رهيبة ،احتاريت بين اسأله وينجرح لو يفكر بغير شي ،كعدنا ناكل بهدوء كمل مد ايده بإتجاه باكيت الكلينكس مسح حلكه رجع الكرسي ليورا وكام...

أديم : الحمدلله ، اني رايح حبيبتي..

أسمار : عاشت ايدك على الريوك والف عافية..

أديم : شنو سويت قابل هو كله بالثلاجة بس الجاي اي ..

أسمار : حتى لو بس جاي هم عاشت ايديك عليه.

تقرب مني دنك قبل راسي وكال..

أديم : البركة بيج حبيبتي اعتمدت على نفسي بشكل كامل..

ربتت على كف إيده اللي جان حاطه فوك كتفي وهمست..

أسمار : ماسويت شي هذا جهدك انت..

أديم : لا سويتي وسويتي ، يلا اني رايح لأن تأخرت وراح تجيج أفنان بعد شوية وترجع ملابسي بغرفتنا وباقي اغراضي على كيفكم لا تعبون نفسكم ماشي.

أسمار : اللي يطلع من غرفتي بمزاجه ما يرجعلها الا بمزاجي..

أديم : ومزاج حبيبتي اللي يريده اسويه.

ضحكت بادلني بإبتسامة وطلع ملوح بيده باي..

أسمار: بالسلامة..

طلع واني صافنة بوضعه نفسيته متعدلة تحركاته كلها صحيحة مشيته رزنة ما ينطخ بشي ولا يتعثر ، معقولة يشوف وما يحجي لو تعلم وتعود على البيت ، حرت وبقيت افكر وفكرة تردم بفكرة الى ان رن جرس الباب رحت فتحته خالتي وأفنان دخلوا مبتسمين ...

أسن : صباح الخير..

أسمار : صباح الورد.

أفنان : صباح الخير.

أسمار : صباح العافية..

أسن : تريكتي ؟

أسمار : اي..

أسن : مو كلتلج خلينا نتريك هاي خاينة..

أفنان : ما تريكتي لأن الشيخ ما عاجبه يفك ريكه لو يريد جان اكلتي.

أسمار : شلج بالقصف ياخالتي جان سكتي..

أسن : ها أفنان هيج صارت؟

أفنان : البنية حامل اكيد تاكل تبقى تنتظرنا يعني..

أسن : بعد بعد احجي ست أفنان..

أفنان : لايابه ما احجي امشي ساعديني نكمل غرفته قبل لا يرجع وتصير على مرتين.

أسمار : يلا هسه نتعاون عليها تخلص بسرعة..

أفنان : ما تلزمين شي انتِ..

أسمار : وليش بله ؟

أفنان : ما يقبل ابو تميم حذرنا قبل لا يطلع..

أسمار : مممممم يابه ماشي.

بعدها دخلنا لغرفته وبلشوا يفرغون ملابسه من الكنتور واني اضحك على المواقف اللي صارتلنا ومرات تدمع عيوني لقساوتها ، قساوة اللي مرينا بيه ، مقهورة على الصار وفترة البعد حتى لو جانت قليلة من عمرنا انحسبت ، اجى إتصال لأفنان من ميمونة تكول الحجية تريدها..

أسمار : روحي عيوني احنا نكمل..

أفنان : هسه بس اشوفهم واجي .

أسمار : براحتج ماعندنا شي حتى لو بقينا ٣ ايام نسوي بيهن شكو ورانا.

أفنان : لا لا هذا نحس يمعودة مادام كال اليوم يعني يريدها اليوم ، انتِ ما تعرفيه شلون يريد كلشي مثلما يحب ومخططله..

أسمار : اديم ابسط من هيج بس ينراد واحد يسايسه..

أفنان : من وين نجيب خلك أسمار وصبرها..

ضحكت على جملتها ، وخالتي أيدتها من كالت اي والله صدك..

طلعت بقينا وحدنا التفتت عليها ..

أسمار : شنو سالفة ماما ليش هيج سوت بترانيم وأرود

أسن : اووف اسكتي وخليها..

حجتها وذبت السترة على السرير ، جريتها من ايدها وهمست..

أسمار : تعالي اكعدي واحجيلي شلون شنو نكدري نسوي ونجمعهم..

أسن : ما تقبل متخبلة وبس واحد يحجي وياها تبجي ..

أسمار : منو ترنيم ؟

أسن : لا أناهيد

أسمار : ليش تبجي؟

أسن : تكول ليش هيج حظ بناتي يوكعن بهيج قسم اني اريدهن ينسعدهن ، هي بس أسمار اخذت حيلي بزواجاتها الأثنين.

أسمار : اي وشنو يعني واحد نعال ونزعناه والثاني اني اختاريت عذابه وطريقه الصعب ، أديم مابيه شي يتعيب حياته صعبه بسبب اخوه وغدر ابن عمه الا هو منو مثله ومثل شخصيته ومنصبه اضافة لحالته المادية ، شوفي وضعي وكعدتي وبيتي كل بنية تحلم باللي اني بيه ليش دائماً نشوف الامور من زاوية وحدة ؟ ليش ما نشوف الزوايا كلها..

أسن : والله ما ادري هذا تفكير امج وهاي عقليتها تكول ترنيم وتولان ما ازوجهن بالعراق ولآل الغريب بالتحديد..

أسمار : أهاب عرف بأرود ؟

أسن : اي .

أسمار : شنو رأيه؟

أسن : ضاج كلش واكيد خاف على علاقته بتولان

أسمار : شنو نسوي؟ اكو حل معين براسج ؟

أسن : لا البارحة اني وإيساف الليل كله نفكر وما وصلنا لحل الا اذا رحنالهم اني وياج وازواجنا..

أسمار : برأيج نكدر نأثر على ماما ؟

أسن : اي نكدر ان شاءالله ، هي طيبة تتقشمر بحجايتين..

أسمار :وترنيم ليش هيج جرحته معقولة اللي حجته من قلبها طلع؟

أسن : البارحة بالليل من شفت وضع أرود وسكوته خفت ، رحت خابرتها طيحت حظها ومابرد قلبي..

أسمار : زين جاوبتج؟ اني حتى خط ما ترفعه علية ، وشنو جان ردها على كلامج..

أسن : ساكتة ما تحجي.

أسمار : هذا اللي خبلني ليش تسكت ليش..

أسن : ما اعرف، ما اعرف..

بقينا نحجي ونشتغل ، للمغرب كملنا كلشي واجوي إيساف وأديم جابوا اكل من برا وكعدنا كلنا بالحديقة تعشينا ، لهناك وانفتح باب المزرعة فاتت سيارة أهاب قبل لا توكف انفتح الباب ونزل أرود..

راد يفوت جوة صاحه أسمر.

أسمر : ارود تعال حبيبي شاركنا الاكل.

رفع ايده يعني ما اريد.

إيساف : واذا كلتلك لخاطري؟

تقرب يمشي ويجر بنفسه ، كعد بدون نفس يباوعلنا أهاب بقى بالسيارة ما اعرف ليش ما نزل ، صافن ويباوعلنا من بعيد ، اشرله أسمر وكاله تعال ، جاوبه بعدين ..

كعدوا يحجون بعدين إيساف وأديم استأذنوا لأن تعبانين وكاعدين من الصبح ، همست لأديم ابقى يمهم ، كال ماعنده مشكلة ، بقينا احنا كاعدين وأسمر كام جاب الكهوة وبدا يسويلنا ...

أهاب من بعيد شغل أغاني جانت حلوة بس من طلعت اغنية لصلاح حسن لا تسأل المجروح عن جرحه وينه ، غيرها صاح أرود.

أرود : رجعها..

أنهد : يابه كئيبة شتسوي بيها ..

أرود : عجل فايت أنام اني.

أسمر : اصبر اشرب كهوتك وروح ، أهاب صعد الصوت خلينا نسمع..

واشتغلت الأغنية جانت كلماتها توجع حيل بالاخص من تقرب أهاب وكعد كبال أرود وكاموا يغنون بيها..

أهاب : تسألني عن هم روحي الحزينة

جاوبه أسمر ...

أسمر : تسألني عن حبي والمضى عنه..

أهاب : لا تسأل المجروح عن جرحه وينة
يتذكر الاه ودمعته بعينه...

تنهد أرود وهمس بصوت تعبان بيه بحه..

أرود : صحيت بية جروح مو جنت ناسي

أسمر : گلبي كدر ينساك ينسى المآسي

أرود : ليش انت صدفة جيت تحرك احساسي ذكرت گلبي الجان ناسي حنينه..

أهاب : لا يا گلب لتعود وترجع لوهمي

أرود : يرجع يخون النوب ويزيد همي
افرض جرحني النوب شيفيد وني؟

أهاب :اليون وحده دوم يبقى بونينه..

أسمر : قررت انساك وانسى عشگنا

أهاب : مهما تمر ايام تبعدني عنك

أرود : اهجرني اترجاك وانسى امرنا

أسمر : وما اريد بيوم يرجع حنينه..

أرود : ولك صحيت بية جروح مو جنت ناسي گلبي كدر ينساك وينسى المآسي...

حجاها وضرب على جهة قلبه بتعب ..

أنهد : كوم طفيها راح يموت.

أهاب : ما يموت عوفها

أسمر : عوفوه خلونا نغني ونفرغ الكبت كلنا مكبوتين بطرق معينة كل واحد همه شكل ليش تريدون كلشي يمشي مثلما تحبون انتوا؟

أنهد : ليش عصبي ترة ما كلت شي ، غير اخوية و خايف عليه..

أسمر : يفرغ بوسطنا ولا يكتم بداخله ويكون وحده..

أهاب : لا تسأل المجروح عن جرحه وينه يتذكر الأه دمعته بعينه..

أرود : صحيت بية جروح مو جنت ناسي گلبي كدر ينساك ينسى المآسي ليش انت صدفة جيت تحرك احساسي ذكرت گلبي الجان ...

يتبع..
متابعة ممتعة

اكو بعد بارت 😍