رواية أحببتُ ذلك الغريب الفصل السادس والعشرون 26 - بقلم عبير إدريس

أديم يكول...

سأحضن وسادتي
ليوم ميعادي
ميلادي موتي هاجسي مبتغاي احلامي ...
كلها امالي..عدا موتي
فميلادي يوم القاك
وموتي بعدك
وهاجسي حبك
ومبتغاي احضانك
واحلامي صدرك

واذا لم تكوني سأحضن وسادتي الى يوم ميعادي...

بقلمي..

____________________

أسمار : شنو سبب القرب هذا ؟ وحركاتك مو بمحلها ..

دنك وهمس باذني

أديم : ابقي يمي قريبة اذا حابة يستمر العرس ويعدي على خير.

أسمار : شنو يعني مافهمت.

أديم : لا فاهمتني زين

أسمار : لا من صدك ما فهمت ؟ ليش يعني ابقى يمك شنو المناسبة ؟

أديم : اللهم طولج ياروح، أسمار لا تعانديني ترى روحي بخشمي وما مرتاح ابد...

أسمار : مو مشكلتي أديم مو مشكلتي ..

جر نفس وهز راسه بعدها تقرب أكثر وكال

أديم : مادام اني موجود ما تختلطين بأي واحد من الموجودين حتى لو جان اخوية..

أسمار : غير اعرف السبب!!

أديم : السبب لأن اعمى وكاعد اشوفج بعيون اخواني واتعرف عليج من خلال وصفهم .

أسمار :واني شكو؟ وين الغلط مني اذا انت هيج تتصور هذه مشكلتك مو مشكلتي.

اديم : الغلط مو منج من العيون اللي تاكلج واني موجود.

ضحكت مستهزئة..

أسمار : وانت شنو بالنسبة الية حتى تخاف العيون تاكلني..

ظل ساكت دقايق وكال..

أديم : اذا حابة اليوم يعدي على خير لا تفاركين خيالي واذا تريدين يخرب كلشي تحركي منا..

حجاها بعصبية واصرار ينفذ كلامه..

أسمار : خرب واحرگ كلشي مو شغلي ..

تركته ردت امشي صاحني بلهجة كئيبة...

التفتت ناحيته جانت نظراته محملة بالتعبيرات ، تساءلت ، شنو اللي يريد يحجيه ، حرت بين ارجع وبين اكمل طريقي...

أديم : سمرة تعاي احاجيج..

تقربت خطوتين وصرت مقابيله وجه بوجه همس عاقد حاجبه.

أديم : ماكو اكثر من هذا العذاب العايشه اني..

أسمار : انت جايبه لنفسك ، ليش هيج سويت بينا يعني لأن عرفتني منفصلة وعندي ولد  ، لو لأن ظميت عليك وما صارحتك !! اذا السبب الأول ف احب اكولك اني هم عرفت بحالتك الإجتماعية بالصدفة وانت ما حجيتلي ، اما اذا السبب الثاني ، ماجان بينا اي اعتراف ولا كشف اسرار جنا مجرد زملاء وبس لهذا ما الك اي حق تحاسبني او تدينني على شي انت ما سألتني عنه ، اما اذا عاجبك البعد ف اني بعدت وانتهينا ليش كل مرة تتقربلي بحجة شكل..

عقد حاجبه مستغرب جر نفس زفره ورجع همس.

أديم : ومنو كال السبب هذا ؟

أسمار : فهمني لعد..

أديم : كل عقلج اني ابتعدت لأن عرفتج بالصدفة منفصلة وعندج ولد ؟؟؟

أسمار : من يوم اللي اجى لؤي وحجالك كلشي انت تغيرت وما سمحتلي اوضحلك حتى..

أديم : اذا هذا تفكيرج بية احب اكولج شكد عقلج محدود..

أسمار : محدود صح فهمني وخليني اوسع تفكيري حتى اكدر اتأقلم وية ضخامة تفكير حضرتك.

أديم : العفو ست ما اريد استغل الرقة والكرامة النابعة من حضرتج.

أسمار : تستهزء !!!

أديم : الظاهر اني وياج مو على نفس موجة الإرسال..

أسمار : وياك صدكني على نفس الموجة ماشية بس انت وضحلي مقاصدك حتى اعذرك او انطيك الحق بالسويته..

أديم : تحبين اركزلج على مدى عجزي وحاجتي لمرافق مبصر مثلج اكثر من فلوس الدنيا اللي عندي بهيج حالة شنو راح يصير غير تعطفين علية وتقبلين تتزوجيني من باب الانسانية لاغير.

أسمار : اسمحلي اكولك انت بهذا تفكيرك ثبتتلي انت عقلك محدود مو اني ..

أديم : اني بحاجتج وما تتصورين شكد حابب تنورين ظلامي وتدخلين لعالمي تطلعيني من العجز والعوز والبؤس العايش بيه بس ما اكدر اظلمج وياية ، مستحيل اتزوج اذا ما ابصرت ، لا اورطج ولا اورط بنات الناس وياية..

أسمار : وين جنت من دخلنا بهاي العلاقة ليش من تعلقت بيك يلا فكرت ما تورط بنات الناس زين ما عرفت من البداية تتجنبني لأن مشاعري مو لعبة عندك.

أديم : من يوم العثرت بيج وشميتج اني جنت بحلم او يمكن عشت بوهم جبير وحلمت وتمنيت واخرها صحاني منه لؤي..

أسمار : لؤي لؤي الف لعنة عليه انت ليش تمشي ورا كلامه فهمني.

أديم : لأن كلامه صحيح سمرة اني ما اريدج تندمين وتكرهيني عوفيني اني ما ينعاش وياية خصوصاً بعد الحادث ، صرت نحس وعصبي وما انطاق. اني غير صالح للحب صدكيني ولا حتى للمعيشة...

أسمار : لعد شنو اللي رجعك ليش واكف يمي هسه وتهدد اذا تحركت تخرب العرس..

دمعت عيونه وتحول لونهم احمر بلع ريكه بصعوبة همس.

أديم : غيرة كلبي كسرت قراري بالبعد وجابتني يمج..

أسمار :صدكني اصيرلك الجيش والسند وعيونك الاثنين ، اني وياك واحد ماكو فرق واذا اني درت العلاقة شنو يعني اصلا راح اسوي كلشي بحب..

أديم : ما اريد ترتبطين بواحد اعمى وعاجز مايكدر يدافع عنج شفتي من اجى طليقج ماكدرت ادافعلج ولا حتى ادافع عن نفسي و بدفعة وحدة وكعت اني ما اصلح اكون زوج وصحيحة حجاية شهد اني ناقص رجولة ..

من بعد هذه الجملة بجيت ما تحملت كمية الألم اللي يحجي بيها ويعصر بعيونه حتى ما تنزل دمعته ويتلافى وجع قلبه بلزمة كفه للمكان..

أسمار : هاي كلبة وحجيها كله سم مثلها وتستاهل تموت هيج ، استغفر الله ياربي أول مرة اتشمت بإنسان...

أديم : بس حجيها صحيح ..

أسمار : وين الصح لا تخبلني انت الثاني وين جنت قبل هسه يلا تذكرت حجي شهد ومشيت بيه ، أديم انت اخذت هذا الموقف لسبب واحد وهو انفصالي غير اشياء تحجيها كلها اسباب تخليها لنفسك حتى تبرر موقفك بيها..

عكد حاجبه بعصبية كال..

أديم : اني اعرف بقصتج من اول ما دك كلبي وحسيت روحي انسحبت مني ، وكمت ادورج بين الكل وما احس بوجودهم من اسمع صوتج ومن يوم شميت عطرج وتعشعش بدماغي حسيتج انتِ صرتي الية وخاصة با ال الغريب ورحنا وسألنا عنج بالمنطقة وعرفت كلشي وحتى تصدكين بالأكثر ، أسمر من كعد اخذلج فنجان ونطاج مختصر عن حياتج اني طلبت منه هيج يسوي حتى بس تجين وتحجيلي واسمعج واشيل عنج المسؤولية واصيرلج سند ياسمرة مو اني اللي اتخلى عنج لهيج سبب.

أسمار : يمكن لأن ضميت عليك الموضوع ردة فعلك جانت قوية.

أديم :ومو لأن ضميتي علية اخذت موقف سمرة اني ابني ما ادري عنه ولا قايم بمسؤوليته ولا اكدر اقريه ولا اخذه للمدرسة لا ادافعله اذا احد تجرأ وضربه ، لج اني وابني عالة على اهلي هالمرة اجيبج انتِ وابنج واني اذا تبتعدون عني مترين ما اكدر احميكم لا اكدر اسفركم لا اكدر اسوي شي.

أسمار : انت شعليك اني اريدك تظل وياية اني حبيتك وانت بهذا الحال اني اريدك عاجز اني حبيتك هيج اختاريتك من دونهم ليش هيج تسوي بينا ..

فقدت كمت ما اعرف شنو احجي ، همس بقهر وكال..

أديم : حبيتيني أسمار..

صحتني كلمته وعرفت بنفسي اني اللي اعترفتله أول فركت وجهي وبقيت ساكتة ، اصر على السؤال اكثر من مرة عاد الكلام.

أديم : جاوبيني تحبيني هسه سمعت منج كلتي حبيتك..

أسمار : مشاعري نفس مشاعرك ..

أديم : حتى تبقى هذه المشاعر حلوة ونظيفة اني اريدج تبتعدين عني وابقى ذكرى حلوة مرت بحياتج..

أسمار : يعني ما راح تتأثر ولا راح تتعب اذا ابتعدت ؟؟

ظل ساكت تنهد نزلت دموعه تقربت منه مديت ايدي ومسحتهن ، حسيته رجف من لمستي همس بصوت ناصي وصوته بيه بحة يادوب سمعته..

أديم : راح اتعب صح و راح اتعب هواي ويمكن أضعف وارجعلج وهم انسحب بس كله يهون ، و عندي اهم شي تكونين انتِ سعيدة ما اريد ترتبطين بية للأبد اني ما افيدج..

أسمار : بكيفك يعني تحدد اذا تفيدني او لا واذا عشت بسعادة او تعاسة ليش انت تحكم على المقابل اريد افهم..

ظل ساكت رجف حلكه بعدها بثبات كال..

أديم : اذا تقدمت وخطبتج عندي شروط بيني وبينج تتنفذ محد يدري بيها غيرنا احنا الاثنين ..

أسمار : شروط ؟؟ تخلي أديم شروط حتى تخطبني انت صدك تحجي ليش شفتني شامرة نفسي عليك !!!

أديم : العفو اني ماكلت هيج ولافكرت مجرد تفكير بس اسمعيني للأخر خليني اكمل كلامي ..

أسمار : احجي اسمعك..

أديم : تعيشين وياية كمرافقة تجربين حياتي وتحتكين بية عن قرب وتشوفين نفسج تكدرين تكملين وياية كان بها ما تكدرين ننهي كلشي...

أسمار : وشنو نكول لأهلي وأهلك اعيش وياك مرافقة صدك تحجي؟؟

أديم : ما نبلغهم بهذا الشرط يبقى بيني وبينج ، اخطبج عادي ونسوي عرس و نعقد حتى مايصير حرام علينا التقارب وقبل الزواج بفترة الخطوبة تعالي هنا بوجود خالتج وشوفي حياتي شلونها اذا تكدرين تستمرين نكمل ما كدرتي صعب عليج تتحملين ٣ اشخاص بركبتج وفوكاهم امي ، انسحبي وانتِ اللي متفضلة علية متفقين هيج؟؟

ضحكت ...

همس ..

أديم : شبيج تضحكين وين الغلط بكلامي!!

أسمار : احنا مو اتراك أديم حتى نعيش هيج.

أديم : واني ما كلت تجين تعيشين وياية بالحرام كلت نعقد وتصيرين مرتي وعلى ذمتي..

أسمار : وشكد تطول فترة الخطوبة ؟

أديم : لحدما اشوف تحملتيني من صدك وتكدرين تتأقلمين بسهولة او باقية وياية مجاملة ومجرد عطف.

أسمار : وبدربك اختبرني اخاف طمعانه بمالك وحسبك ونسبك ، وبعدين طلكني واعتبر نفسي مطلقة للمرة الثانية ، مع الاسف على هذا تفكيرك يا استاذ من رخصتك.

أديم : اسمعيني احاجيج فدوة لربج لا تروحين..

حجاها متوسل ، رجعت وكفت يمه ، تقرب خطوة مني وهمس..

أديم :انتِ ليش زعلتي من كلامي ترى مابيه اي خطأ اني حجيت لمصلحتج كلت ننخطب فترة طويلة شوية نتأكد من مشاعرنا واني رايدها الج هاي الفترة لو علية هسه اعقد عليج وما اخليج تخطين خطوة خارج هاي المزرعة وانيمج بحضني اليوم ، ليش اني اطول احصلج يا أسمار.

ظليت ادردم مستهزءة ما اعرف ليش جنت بقمة العصبية وياه..بعدين همس يأشر بايديه يفهمني ...

أديم :سمرة هي شنو الخطوبة ؟

أسمار : انت احجي اني مالي خلك..

أديم : الخطوبة عبارة عن مرحلة يتم بيها اختيار كل من الطرفين للآخر حتى يكملون بعضهم ويبنون حياة جديدة كلها أمل وتفاؤل، والخطوبة هي خطوة تسبق الزواج بمعرفة الآخر واكتشاف مدى توافقه مع الشخص الثاني يعني مو عرض مصلحة لطرف معين.

أسمار : اي اعرف بس ماكو داعي تكولي اذا ما عجبج نترك لأن اني اعرف كلشي عنك واذا عن حالتك اني اشتغلت بمركز واعرف شلون اتعامل وياك ومدركة لكل كلمة حجيتها ، لا راح اتعب ولا امل ولا اتعاجز..

أديم : بس يبقى شرطي هذا ما اتمم الزواج اذا ما عشتي فترة يمي وتشوفين حياتي شلونها عن قرب ، يا ست اللي يشتغل بمركز غير عن اللي يعيش وية واحد اعمى طيلة حياته.

أسمار : شنو الفرق فهمني ؟

أديم : المركز هذا عملج مجبرة بيه وتعرفين بداخلج شغلج عبارة عن ساعات معينة وبعدها تتحررين وترجعين تمارسين حياتج بحرية عكس اذا ارتبطتي بواحد اعمى راح يبقى مرافقج طيلة اليوم راح تكونين عكازته يا سمرة وانتِ بعدج شابة وحلوة وصغيرة ليش هيج تسوين بنفسج ليش توهبين شبابج وتحركيه بشمعة واحد اعمى وعاجز..

أسمار : تدري ليش الناس تبتعد عنك ؟ وشهد شافتك ضعيف وتمادت وياك بالكلام ؟

عكد حاجبه وكال..

أديم : ليش

أسمار : لأن انت بكل بساطة تزرع بعقلهم فكرة العجز والضعف اللي بداخلك ، صدكني انت ما ناقصك شي ، هم الناقصين كلمن يفكر بيك بهيج طريقة..

أديم : هسه عوفج مني شنو رأيج بالعرض اللي عرضته عليج.

أسمار : مرفوض طبعاً ما اقبل افوت بعلاقة خطوبة او زواج لأجل الاختبار، اذا ردت نرتبط ننوي نكمل حياتنا سوى لا تتحسس مني ولا تحسب حساب اذا راح اتركك او اكمل ،،هذه الفكرة عبارة عن حرب نفسية الك والية..

أديم : واني ماعندي عرض ثاني غير هذا.

أسمار : تمام انت عند اهلك واني عند اهلي..

أديم : تمام وياج بس لخاطري اليوم ابقي قريبة مني لا تفاركيني.

أسمار : ما اكدر اهلي راح ينتبهون علية .

أديم : مو مشكلة اني راح احاوطج بس بلغيني وين راح تكعدين ؟

جريت نفس و وصفتله المكان اللي جنت كاعدة بيه ، هز راسه تركته ورجعت لمكاني مخنوكة وخلقتي مكلوبة ، ثواني واجى وكف فوك راسي وياه أسمر.

راقبته جان متشنج وعصبي طيلة الحفلة وقربه مني حتى بس يبين الهم انو اني مالته وخطر ممنوع الإقتراب مني هيج قريت بملامحه..

اللي غير مزاجي ورجعني اندمج بالحفلة ونسيت شوية،، الجوبي صفنت عليهم شلون حلوين وماشاءالله على اعدادهم كلش هواي ولد الغريب واولاد عمامهم ، وكلهم ناس مثقفة ومبين تعبانين على نفسهم ، واعتقد هذا السبب الرئيسي اللي خلى أديم يغار ويظل ملازم مكاني طيلة الحفلة...

بنهايتها حس بدوخة قوية وهمس لأسمر ولأن جنت قريبة منهم سمعته.

أديم : أسمر نفس الدوار رجعلي ، أخذني لغرفتي وعينك على أسمار ياعيون اخوك..

أسمر : هاي لأن ظليت واكف كلتلك اكعد ليش تعاند ..

أديم : اخذني بسرعة لا اوكع ..

أسمر : يلا يابه امشي..

اخذه من ايده ومشوا سريع ،بعدها اختفوا عن ناظري..

مرت نصف ساعة واجى أسمر يمي ، سألته عنه كال احسن شوية غير ملابسه ونام بس ملامحه من يحجي ابد مو مريحة حسيت اكو شي وما يقبل يحجيه..

خلصت الحفلة وطلعوا الناس كلهم ظلينا بس احنا ، حاوطنا خالتي بوسناها متمنين الهم السعادة وراحة البال ، وكذلك الشيخ هم سلمنا عليه وباركناله..

دخلوا للبيت الجبير وظلينا اني والبنات وخالاتي وماما ، اجتي افنان وطلبت منا ندخل نغير ملابسنا ، دخلنا لغرفتها جانت تجاور غرفة أديم القديمة واللي شاغلها هسه حسب ما عرفت منهم ..

غيرنا ملابسنا وطلعنا للحديقة ، صبوا عشا للي ما متعشي وكعدوا الولد أسمر وأهاب وأرود وانهد واحمد واللي متزوجين اخذوا عوائلهم وطلعوا اجتي افنان جايبة اكل كاموا وياها اخوتها اخذوا الصينية وقسم فرشوا السفرة وكاموا يجيبون باقي الصحون من المطبخ ، صارت سفرة معتبرة ، كعدنا ناكل باريحية كأنما نعرفهم من زمان ، اللي يكعد يمهم يحسون بهذا الشعور ، انو هو قريب منهم ومنهم وبيهم..

كعدنا ناكل ونسولف اني جنت استمع وبالي مشغول بأديم وبحالته ليش هيج يصير بيه غفل...

قطع تفكيري أسمر من شمرلي سجين وكعت يم رجلي عكدت حاجبي وباعتله مستغربة..

أسمر : هاج قطعي الركي احسن من صفنتج..

أسمار : وليش ما انت تقطعه ؟

أسمر : شعرفني.

أسمار : اني هم ما اعرف.

أسمر : شو اليوم ما ناكل الركي اذا ما جان من ايدج خوش ، شتكولون ياجماعة الخير.

حجاها ملتفت الهم ومبتسم..

أهاب : والله عاد اني ما ماكل ركي من ايد المسيح.

أرود : ولك اسمار اسلمت.

أهاب : اهاااا بشرفك .

أسمار : لا بالكنيسة..

حجيتها و ذولة تمددوا من الضحك..

أسمر : مال نشرب كهوة على هاي الكعدة الحلوة واقرالكم الفنجان.

أسمار : هاا الفنجان كلتلي.

أسمر : شو هااا وتلميح خيرج خالة..

أسمار : لا بس تتذكر من كلتلي عندج ولد و وراج سر راح ينكشف وتخسرين هواي بشرني السر انكشف لو بعده ؟

حك شعره وغمض تك عين باوعلي من جوة ليجوة وهمس.

أسمر : بعدين افهمج.

أسمار : لا تفهمني ولا افهمك وكهوتك وفنجانك انت اشرب واقرا لروحك.

أرود : شو هاي ماخذتك حاصل فاصل هاي شكو ؟

أسمر : لأن رجال فقير ومرح وبس اضحك هيج تسوي بية.

أسمار : ياعيني عليك قهرتني.

أسمر : تواضعاً مني وادباً ماراح اجاوب.

أسمار : اوك استاذ تواضع اكثر ..

أسمر : تسوين الركي وناكل لو اجيب الكهوة ونشرب واقرالج فنجان اختاري والاختيار اجباري يتنفذ..

أسمار : اسويلك ركي جيب بس لا تسطر راسي بحجي وبعدين يطلع جذب..

أسمر : سمرة بعدين افهمج.

أناهيد : شكو غير نفتهم شو تحجون بالألغاز..

أسمر : هاي شنو خالة طلعتي كاعدة ويانة وتسمعين.

أناهيد : انت شنو تشوف.

أسمر : اي كاعدة وتتعشين هم.

أناهيد : بعد شكو.

أسمر : لا بس مستغرب سكوتج.

ماما ضحكت ، حجينا شوية وبعدها رفعنا السفرة ودخلنا نمنا بغرفة أفنان ماشاءالله جانت كلش كبيرة..

كعدنا الصبح على صوت هلاهل ودبكات ، طلعنا واشوف خالتي لازمة ايد إيساف ومدنكة راسها مبتسمة ،لابسة كلابية بيضة ولافة شال خفيف على شعرها وجانت مجلبة بالشيخ مثل البنية اللي تلزم ايد ابوها ومحتمية بيه..

هو جان واكف مبتسم.

ذبحوا طليان والبنات جابوا الريوك ، باركنا للعرسان وكعدنا تريكنا بعدها بابا خابر حتى نرجع ،ماما فهمته لازم نكعد ساعات قليلة وية خالة أسن ونرجع بعد الظهر تفهم الموقف بابا وكال هذا هو...

اكلت قليل جان بالي كله يم أديم وما شفت أسمر حتى اسأله عنه واتطمن عليه ، بس شفت أفنان اخذت صينية لغرفته وسدت الباب ...

كعدنا شوية يم خالتي بغرفتها وحجت وية ماما جانت فرحانة والفرحة ما سايعتها..

بعدها نزلنا جوة صار الغدا تغدينا وطلعنا متوجهين لبغداد ..

مر اسبوع وخابرت خالتي جنت مخنوكة حيل..

أسمار : هلو حبيبتي شلونج مكانج خالي ، وراح افرغ البيت وارجع وية بابا و ماما اعيش.

أسن : ياعمري ربي لا يخلي مكان عزيز عندج ، بس الافضل ترجعين وياهم حتى ترتاحين وتأمنين وهم يساعدوج ب اياس ماتكدرين تشيلين مسؤوليته وحدج.

أسمار : اي صحيح بابا هم كال هيج.

أسن : شلونج زينة .

أسمار : ابد.

أسن : ليش ياعمري.

أسمار : خالة كاعد اشتاقله لدرجة ما أكدر انام والنعاس هاجر عيوني.

أسن : صدكيني هو هم وأكثر منج.

أسمار : شلون عرفتي ؟

أسن : عازل نفسه وعصبي واذا طلع خارج غرفته وعثر بالهوى يظل يصيح ويفقد اعصابه ويكولون هاي بعدما عرفج هيج صار ..

أسمار : والحل بيده لو نتعذب لو ننسعد.

أسن : صحيح تريدين احجي وياه اني.

أسمار : ديري بالج خالة ازعل عليج.

أسن : خطية البارحة جان كاعد وحده بالحديقة والدمعة تلالي بعيونه حزين لدرجة وجهه معصور ومتغير لونه.

أسمار : صارله كم يوم ما مداوم.

أسن : كلتلج حتى للمكتب وية إيساف ماراح ولا طلع خارج غرفته غير للشغلات الضرورية اللي يلبي بيها احتياجاته.

أسمار : اووف زين ما تكدرين تسألين أسمر او الشيخ اذا يداوم او لا؟

أسن: تمام راح اسألهم.

أسمار : خالة..

أسن  : عيونها.

أسمار : سعيدة ؟

أسن : فوك ما تتصورين.

أسمار : الشيخ شلونه وياج ؟

أسن : حنين بشكل.

أسمار : وبعد

أسن : ويحبني ومداريني ويخاف الله بية.

أسمار : وهذا اهم شي بالرجال.

أسن : بليلة العرس سجد لله يبجي فرحان وما تمم العرس الا واني مرتاحة وشبعانة نوم مجرد تقرب كلتله تعبانة من الطريق حضني ونام كعدنا الفجر بعد الصلاة تمت الليلة.

أسمار : ياعمري خالتي تستاهلين كل الخير ان شاءالله طول العمر تبقين هيج سعيدة..

أسن : امين ويوم الج حبيبتي.

أسمار : سعادتي تجي من سعادتج.

أسن : حبيبتي ..

حجينا شوية وسديته بعدها كمت الم اغراضي واخليهم بجنط من كملت اتصلت على بابا جاب سيارة كبيرة وشالوا اغراضي وسلمنا البيت لصاحبه بعدما بابا دفع مال نصف شهر اضافي..

رجعت لبيت اهلي بغرفتي القديمة رتبت ملابسي وية البنات ، وبالليل نمت من التعب ثاني يوم رحت للمركز من الصبح رجعت وياهن سجلت وكمت ادوام شفت بالمركز والظهر اروح للجامعة..

اريد اضيع وقت وانسى ما افكر هالمرة زاد تعلقي بيه بالاكثر وية كل حالة اشوفها يزيد حبي وحنيني واشوف اديم بيهم واعاملهم بكل حب..

مرت الأيام والاسابيع والشهور وخلصت السنة الدراسية واني وياه كلمة ما حاجين ، أسمر ماشفته بعد تواصلنا جان عن طريق الموبايل فقط واللي تكفل بروحة أديم ورجعته اخوه أبسل التوأم مال أعقل..

اجتي العطلة وخلصت واني كل يوم اموت من الشوق اله واخابر خالتي اسمع اخباره الصامته جان ساكت طوال الوقت واكله قليل وبس ينام.

اعتزل الدنيا كلها مثلي بس الفرق اني قتلت الوقت بين الشغل والدراسة..

خلصت العطلة وبدينا فصل دراسي جديد ، شفته ضعفان والبعد ماخذ منه مأخذ ، من جنت افوت من يمه يرفع راسه ويغمض عيونه بقوة ، ويتنهد يطلع نفس على شكل حسرات بايتة بصدره..

مرت الأيام وما بينا اي تقارب، حتى سلام ماكو ، وبيوم جنت كاعدة بالنادي وصاروا فوك راسي أديم وأهاب وأسمر عكدت حاجبي مستغربة ، أسمر كسر حاجز الصمت بضحكة وطلب غريب.

أسمر : تعزمينا على ريوك لو نعزمج.

أسمار : هاي شكو !!

حجيتها بتعجب.

أسمر : يابة عاجبنا نتريك ما يصير.

جاوبته وعيوني على أديم العاكد حاجبه ومعقج الملامح..

أسمار : طبعا تفضلوا

جروا الكراسي وكعدوا ، أديم سحب الكرسي وكعد ببطئ وحذر..

أهاب : خاف كاعد تقرين ونأثر عليج.

أسمار : ابدا ، شنو اطلبكم ؟

أهاب: انت اختاري شنو تحبين.

أسمار : اني شبعانة اكلت قبل لا اجي.

أهاب: عجل نشرب جاي جماعي ..

التفت لأسمر وكال.

أهاب : يلا ابو سمرة المهمة الك.

أسمر : الدفع يمي يمك ؟

حجاها وضحك ..

أهاب : امشي لك.

راح اسمر جاب جاي واجى كعد بهاي الأثناء أديم همس ..

أديم : شلونج ؟

ظليت صافنة عليه هيج صعبة يحجيها ويسأل عني همست.

أسمار : زينة ماشي حالي بفضل الله.

هز راسه ساكت.

أسمر مسد لحيته بصورة سريعة وكال.

أسمر : منو يبدي الكلام اني انتوا؟

أهاب : أديم .

أسمار : شكو صاير شي ؟

أسمر : كل الخير ياب لا تخافين.

أسمار : مو قصة خوف بس جيتكم مريبة وشكلكم والوضع الكاعد تحجون بيه غريب فزز الخوف بداخلي.

أهاب: لا الشغلة بسيطة بس نريد منج تساعدينا بحذر.

أسمار : بخصوص شنو؟

أسمر : طليقج السابق..

أسمار : شبيه.

أسمر : جمعت عنه معلومات هسه هو مسافر وية بنت خالتج اللي اسمها بسيل ومتزوجين بس العرفته اكو خلافات كبيرة بينهم وهو دايخ هسه لهذا نريد نستغل هذا الخلاف ونخليه لمصلحتنا.

أسمار : شلون مافهمت.

أسمر : افهمج ، شوفي احنا صارلنا فترة من اتحرينا على لؤي وعرفنا السالفة بزواغيلها ومن ضمن الاشياء العرفناها المحامي مالتج متعاون وياهم وبايعج مقابل فلوس ..

أسمار : لا مستحيل شلون !!

أهاب : ماكو شي مستحيل ستنا العزيزة اللي حجاه أسمر نقطة بالبحر من جلابة لؤي والسواه وياج.

أسمار: المطلوب مني شنو ؟

أهاب: تخلين عشيرته تتبرى منه ويظل طير طاير وحده .

أسمار: ليش ؟

أسمر : حتى تصير صيدته سهلة ودفنه مباح..

أسمار : وهاي شلون اسويها ؟؟

أديم : تطلعيه من دينه.

التفتت عليه عاكدة حاجبي ، همست.

أسمار : وشلون ؟

أديم : عشمي...

أسمار : بشنو اعشمه ؟؟

أديم :  ترجعيله .

أسمار : بيا طريقة يعني ؟

أديم : التواصل طبعاً..

التفتت على أسمر وأهاب واشرت الهم يعني اريد اخذ راحتي واحجي وياه تفهموني وتركونا وحدنا بحجة يجيبون أكل وييجون من راحوا التفتت عليه وحجيت بعصبية..

أسمار : لهاي الدرجة ما اهمك وعندك عادي احاجي طليقي.

كز على اسنانه بغضب مكتوم وفكه ينبض بعصبية ، تقرب من الميز خال كفوفه عليه بعكدة حاجب كال.

أديم : هذا التواصل يرجعلج حقج المسلوب هاي اولاً ، ثانياً حتى نسقط الدعوة اللي قايمها عليج والمحامي مالتج موافق عليها بما انو انتِ ناطيته حق التوكيل بكافة القضايا اللي تخص ابنج .

أسمار : وشنو هاي الدعوة ؟؟

أديم : من اجى وكالج اذا تزوجتي تنطيني ابني وحجاها مترهي مسويلج تنازل عنه مقابل زواجج ..

أسمار : يا كلب وهاي شلون عرفتوا ؟

أديم : النا فترة نتحرى عن الموضوع لهذا اريدج تتواصلين وياه وترجعيه للعراق لأن لو نطير ما نكدر نجيبه مسافر  وما يرجع الا عن طريقج انتِ..

أسمار : شنو اسوي ؟؟

أديم : اول شي تسويه تستميلين قلبه على ابنه وحسسيه انتِ واياس بحاجته وبعدها من تحسين بيه مجال خليه يشكيلج ويفتح كلبه واعرفي مشاكله ونقاط ضعفه الكاعد يمر بيها.

أسمار : زين .

أديم : من تشوفيه مال ناحيتكم وبدا يحجي مشاكله وينطي بزوجته عادي مثلما نطى بيج ، هنا راح تكونين معشمته لاخر مرحلة بهيج حالة كوليله اني رجعت لديني واذا تحبني وتحب ابنك جازف وادخل لديني ، غيرها ماعندي وخليه يدخل لدينكم واهله وعشيرته يتبرون منه لأن يعتبر مرتد وبهيج راح يتجرد من كلشي وتضربين عصفورين بحجر هم تعيدين السواه بيج وهم ماعنده ظهر يحتمي بيهم ويهددج من جديد وراح نكدر نرجع بيتج وحضانة ابنج تصير الج وكرامتج مردودة .

أسمار : وشوكت احجي وياه ؟

أديم : بوجودي تحجين وياه واذا اني ماموجود أسمر بمكاني او أهاب ومن نرجع كلشي منه ويصفالج حقج وترتاحين نبدي نشتغله وارجع حقي وحقج وندفعه حق الإهانة اللي تعرضنالها اني وياج بسببه واشوفه الويل اخليه يندم على كل كلمة حجاها سواء وياج او وياية.

أسمار : بس ما اريد يتأذى يعني لا تتلوث ايديكم بدمه..

عكد حاجبه مستغرب كلامي ، بهدوء كال..

أديم : بعدج تحبيه ؟

أسمار : لا هاي وين راح بالك بس يعني يظل ابو ابني ..

أديم : حتى اذا جان عار!!

أسمار : هسه انت ليش عصبي اني كاعد احجي بالمنطق.

أديم : وين المنطق وهو بايگج وين المنطق وناسي ابنج وما سائل عليه وين المنطق من اجى مرتين للكلية فضحج هسه صار ابو ابنج وتدوريلي حلول وتحجين بالمنطق.

أسمار : بهيج عصبية اني ما اكدر اكمل حواري وياك

أديم : انهيه افضل، وراح يكون أسمر الوسيط بيني وبينج وكل تفصيلة وتنهيدة تصدر منج أريد اعرفها ..

أسمار : هذا اعتبره أمر لو شنو؟

أديم : شنو تعتبريه اعتبريه..

دفع الكرسي واخذ عكازته وكام يتحسس طريقه ويمشي أهاب لمحه من بعيد واجى سريع حجى وياه بعدها اخفتوا عن ناظري..

مرت يومين وهدوء ماكو شي ومحد اجاني منهم جنت كاعدة بالقاعة ، واجى دكتور جديد مبين اول تعين اله ، بلش محاضرة شرحلنا الموضوع وبعدها كام يتعرف علينا بذكر اسمائنا واحد واحد ، من وصلني السرة وكلت اسمي هو ابتسم ونزل من الستيج ماشي ناحيتي وكف يمي وكال.

_ حضرتك الكاتبة صح ؟

أسمار : اي صحيح.

_ يا اهلا بكاتبتنا العزيزة طبعاً اني من اشد المعجبين الجدد بكتاباتج ومقهور لدرجة متألم لأن ما متعرف على حضرتج وما قاريلج سابقاً.

أسمار : الله يخليك دكتور هذا من ذوقك.

ظل يحجي وياية هواي وسولفنا على الكتابة وشلون الواحد يطور من نفسه وشنو المعايير الخاصة بهذا المجال..

سكتنا من سمعت أديم بصوت جوهري كال

أديم : دكتور اذا الحديث خاص ومطول وية حضرة الكاتبة ياريت تتفضل علينا وتخلينا نطلع نستريح وانتِ اخذ راحتك بالكلام.

_ وانت ليش متشنج اني اول محاضرة الية يمكم وضروري اتعرف عليكم واحد واحد ..

أديم : بس انت ما تعرفت علينا وماعرفت غير بس الاسم .

_ حبيبي انت ليش عصبي.

أديم : لأن حضرتك زودتها.

_ اذا ما عاجبك روح اشتكي وين ما يعجبك..

أديم : بدون ما اشتكي هيج محاضرات ما يشرفني ابقى كاعد بيها ، هنا جايين ندرس مو نضرب ركن وية الطلاب.

_ الزم حدودك واحجي عدل انت كاعد بقاعة دراسية مو بشارع هذا منطق تحجي وياية بيه.

أديم : لأجل هذا الجواب اني حجيت وياك بهذا المنطق حتى بس اذكرك انت بداخل قاعة دراسية محصورة بالدرس فقط مو اخذ وعطاء بالكلام ، وخلي شغلة ابالك وابال الكل هاي البنية الكاعد تحجي وياها خاصة بية وخط أحمر وممنوع أحد يتقرب منها ، وهي بحكم خطيبتي.

هو يحجي منفعل واني فاتحة عيوني وحلكي مصدومة من الكاعد اسمعه..

صار حجي قوي بينهم انتهى بتدخل رئيس القسم والعمادة ، راحوا ثنينهم وماعرفت شنو صار ، انتظرت بنفس اليوم اشوفه واحجي وياه ما لكيته طالع ، ثاني يوم رحتله جان كاعد سلمت ما جاوبني رجعت همست بإسمه صار ينفخ ، لحيت وياه ردت اعرف شنو بيه حجى من بين اسنانه..

أديم : روحي سولفي وية الدكاترة اني شنو جاية يمي.

أسمار : انت شبيك.

أديم : بية حسرة اذا طلعتها هسه جبال توكع على راسج.

أسمار : اي ليش غير اعرف.

وكف وسند نفسه على عكازته جان تعبان و وجهه اصفر ، بعصبية كال.

أديم : شنو تريدين مني اظل متفرج شلون يتغزلون الرجال بيج ، لو شلون تشاطريهم الكلام وتكيديني..

أسمار : هذا تفكيرك اني موهيج.

أديم : على العموم سوي اللي يعجبج وسالفة انتِ خاصة بية انسيها.

أسمار : اصلا ولا على بالي ، انت لحالك تحجي وتجاوب نفسك..

تركته وطلعت من الجامعة صعدت سيارتي واتصلت على خالتي ابجي بعدما سألتني شكو وشنو صاير وسلمت عليه بديت احجيلها..

أسمار : خالة راح اموت والله راح يموتني   صدكيني كل كلامه وتلميحاته مبين يحبني بل يعشقني بس ليش هيج كاعد يبعدني عنه ليش يأذيني وبارد مرات تحسيه بدون مشاعر مرات تحسيه محروك حرك.

أسن : الاصح هو محروك عليج بس ما يكدر يسوي شي حالياً بعدين افهمج كلشي من اجي.

أسمار : ماشي خالتي ماشي..

بعدها مشت الأيام والأشهر وخلصت السنة ، الدراسية وتخرجت منها على خير ، خلال هاي السنة ماصار حجي بيني وبين أديم نهائي بعد موقف الدكتور ولا تواصل وياية على شغلتي وية لؤي جان الحجي كله والتخطيط وية اسمر وجنت اسوي شنو يكول وبلش يميلي و يريد نتزوج وصلته حاله من العشق يريدني اليوم قبل باجر وسوى توكيل للمحامي تنازل عن حضانة اياس الية...

وبيوم جنت اتراسل اني وياه اجى بابا وجاب جوازات السفر وخلاهن كبالنا وكال..

عارف : هاي جوازاتكم اللي عاجبه يسافر وياية حتى اخذ الجواز وافيز اله واللي عاجبه يبقى بالعراق يسحب جوازه ويروح يسكن يم بيبته وكان الله يحب المحسنين.

أسمار : وين نسافر؟

عارف : يم خالج .

أسمار : شنو نسوي هناك؟

عارف : من زمان اريد اسافر وعاجبني بس انتوا حاير بيكم خاف ترفضون وصدكوني الحياة هناك اجمل بهواي والكم مستقبل أحسن.

أسمار  : اني وياك بابا شنو تفصل ألبس..

تولان وترانيم وباقي اخواني نفس قراري بس ماما عارضت.

بعدين قنعناها وصرنا رأي واحد من بلغنا خالتي كامت تبجي وتخبلت بعدين تقبلت الوضع كالت اني هم بعيدة عليكم وماكو فرق ونظل نحجي تليفون ونفتح كاميرا مثل هسه ، تهون علينا ما اعرف تهونها على نفسها..

كملت الاجراءات وبعد اسبوعين ضبط موعد السفر مالتنا ، مددت بالليل واجاني اتصال باوعت الغريب يتصل فزيت من مكاني وكلبي يدك سريع خليت ايدي على كلبي وسميت بسم الله هذا شجابه من بعد اشهر شنو رجعه بعدها جاوبت همست بضعف الو اجاني صوته مخنوك وبيه حسرة وندم مال سنين..

أديم : يراك قلبي وان غبتِ عن بصري
وناظر القلب لا يخلو من النظرِ ، الا تتعبين وانتِ بعيدةٌ عني وتحفرين داخلي بإبرة من جمر..

جريت حسرة بيها ونة مال سنين وهمست..

أسمار : اوووف يا أديم وكأنني اخبرتك بما يؤلمني لتعاقبني به ، اني رايحة وبعد ما راح تشوفني ولا تسمع صوتي وحتى الهوى اللي مشترك بينا راح يتغير ...

يتبع...

مساء الخير حبايبي
متابعة ممتعة...