رواية أحببتُ ذلك الغريب الفصل السابع والعشرون 27 - بقلم عبير إدريس

flash back(فلاش باك)
Back to the recent past
العودة الى الماضي القريب..

أسن

مرحباً
اسمي أسن عيسى
مواليد سبعينات خريجة كلية التربية جامعة بغداد..
اختصاصي تدريس اللغة الانكليزية.

المعروف عني أسن نحسة وخشم يابس وما احب الاختلاط ، ولا يعجبني العجب ، وبسبب هالشي صارتلي مشاكل كلش هواي وية اخواني مما اضطرني الوضع اكعد وية بنت اختي ببيت وحدنا ..

عشنا سوى على الحلوة والمرة ، وحدة تداري الثانية ونشيل عن بعض الحزن والهم ونتشارك الفرح..

بهاي الفترة بالأخص من تعينت اجتني عروض زواج وجنت اسمع منهم واكعد وياهم بوجود اهلي ، بس ما يتم الأمر لازم يطلع خلل بالموضوع ، يا اما يجيني مسلم ويريدني اغير ديني ، او مسيحي ويتشرط علية بهواي امور ما تسرني.

عزفت عن فكرة الزواج بعد تفكير عميق بيني وبين نفسي وشلتها من راسي..

بس من يوم اللي دخلوا لحياتنا آل الغريب غيرت رأيي وشفت عندهم زلم ينشد بيهم الظهر ومرة جنا نحجي اني وأسمار وشاقتني بخصوص موضوع الشيخ و اصير جنة الهم ، حبيت الفكرة وفرحت بس داخلياً جنت خايفة وشايلة هم ، شلون مسلم ياخذ مسيحية اكيد راح يطلب مني اغير ديني حاله حال اللي قبله...

بس من تقدم وحجيت وياه تغيرت فكرتي والتصور الجنت ماخذته عنه انمحى بكعدة دقائق...

ومنا بلشت رحلة سعادتي وية ال الغريب بالتحديد وية الشيخ إيساف..

عشت اجمل ايام عمري بوقت الخطوبة جنت مثل الفراشة وطايرة بالهوى ، واللي كمل هذه السعادة من تكللت الخطوبة بالزواج وصرت زوجته شرعاً وقانوناً...

من خلصت الحفلة وصعدنا لغرفتنا ، اول ما وصلنا الباب وكفني كال انتظري اني افوت اول ، استغربت الصراحة ليش يعني ما افوت اني الأول او نفوت سوى بس ماعلقت انتظرته هو يوضحلي..

فتح الباب ودخل بهدوء شغل الاضوية جانت خافتة ، التفت علية وفتح ايديه وهمسلي تعالي ...

ضحكت دخلت برجلي اليمين ورحتله اخذني لحضنه رفعني من الأرض وافتر بية ، تصاعدت ضحكاتي مثل الأطفال ولا كأنما بنت الثلاثين عام حسيت نفسي بنت ال ١٦ او العشرين..

قبلني وهمس بأذني..

إيساف: فرحانة حبيبتي..

بضحكة ودلال همست..

أسن : هوووواي فوك ما تتصور.

إيساف : يعني بكدي ؟؟

أسن : أكثر منك بشوية.

إيساف: عجبج ؟

أسن : شنو !!

إيساف : الشيخ..

ضحكت وطبعت قبله على خده وطلبت منه ينزلني ، من لامست اقدامي الأرض رفعت ايدي ولفيتها حول عنقه وهمست.

أسن : طبعاً يعجبني ..

ضحك وكال.

إيساف : نية السؤال جانت على تفاصيل العرس بس شفت محبة بعيونج غير شكل لهذا ردت اسألج عني.

أسن : حبيت العرس بتفاصيله واحلى شي من اجيتوني كلش فرحت.

إيساف : حسيت بيج وعشت شعورج يا حبيبتي..

أسن : انت احلى واجمل تعويض عن عمري الفات ..

إيساف : لو امي عايشة جان رحت وسألتها شكد راضية عني وهيج ربي عوضني بيج.

أسن : تعرف جنت دائماً احلم بيك.

عكد حاجبه ملامحه كلها دلت على علامات التعجب بدهشة كال.

إيساف : هاي شنو ! معقولة ؟

أسن : اي والعذرا..

ابتسم ودار راسه للجهة البعيدة بعدها دنك راسه ورجع التفتلي ميل راسه وهمس..

إيساف : فدوة للعذرا اللي بسببها صار عندنا هيج نسل ...

ضحكت بدلال وهمست ..

أسن : ما تريد تعرف شلون جنت أحلم بيك وليش.

إيساف : نسيت يلا احجيلي..

أسن : كل مرة جنت اروح بيها للكنيسة وادعي بالنصيب الزين ارجع وانام احلم بهيئة شيخ ياخذ ايدي وبعد ما اتذكر التفاصيل وجنت احجي لأسمار تستغرب بس من انتوا دخلتوا حياتنا وعرفت عندهم شيخ جانت دائماً بالضحك تكول راح يتحقق حلمج وية ابن الغريب ..

إيساف : شو اول مرة تحجيها ليش ما ما حجيتي قبل!!

أسن : ماحبيت احجي الا ننجمع بغرفة وحدة ونصير واحد للثاني هذا هو ..

إيساف : ليش جان عندج شك ناحيتي؟

أسن : لا بس كلت هاي دنيا كلشي يصير ما احجي الحلم الا يصير العرس..

إيساف : زين ياستي العزيزة شنو رأيج اصلي ونرجع نكمل من وين ما توقفنا.

أسن : تمام انتظرك.

ضحك وغير ملابسه وراح توضى ودخل صلى ورفع ايديه يدعي مغمض عيونه جر نفس عميق ورجع سجد اكتافه كامت تهتز ، دمعت عيوني وبعدها بجيت ما سيطرت.

كمل صلاته رفع السجادة من الأرض واجى يمي ساعدني بتغيير ملابسي ، وبين الهمسة والحضنة والقبلة ، نمنا بطلب مني ، ثاني يوم الفجر تم الزواج الفعلي.. وصرت زوجته شرعاً وقانوناً...

ومنا بلشت رحلتي وية ال الغريب ، جنت بشغف اتمنى اعرف عنهم كل تفصيلة يمكن جنت فضولية زيادة او بسبب أسمار وحجيها عنهم ردت اتعرف عليهم عن قرب..

وبلشت يومياتنا كل يوم نتريك سوى وكلمن يروح لشغله ، واني بس خلصت اجازتي رجعت اداوم إيساف يوديني ويرجعني طلبت منه يسويلي خط رفض ماناقشت...

الغدا نتغدى حسب منو موجود نكعد سوى لأن كل واحد رجعته شكل واكو بيهم يتأخرون..

اما العشا ضروري نكعد بالحديقة ناكل سوى ونختم الكعدة بفنجان قهوة من أسمرنا وياها قراءة مفصلة للفنجان الشغلات اللي يحجيها مرات تخيب ومرات تصيب يعني مو كلشي يحجيه صحيح إيساف يضحك عليه يكوله انت تعرف المعلومات وتضيف بكيفك لغوة طلع صح انت المستفاد طلع غلط تكول محد يعلم الغيب واحنا بس نضحك..

اما أهاب جان ما ياكل ويانا من نفس الأكل لأن رياضي واكله خاص اما فقرة العشا عنده يا اما ملغية يا اما ياكل من وقت ...
ومن نتعشى هو يستغل اللمة مالتنا ويكعد يسوي تمارين يمنا..

اما ارقم جان هادئ يسلم ويفوت لغرفته اللي عرفته منفصل وبعد اولاده مأثر عليه لهذا صاير انعزالي ، يكولون يشوفهم مرة بالشهر وهذا الشي هواي مأثر عليه..

الولد كلهم عايشين ويانا بالمزرعة ، عدا أعقل وأبسل ، وأبسم وإسلام ، طالعين وحدهم وية زوجاتهم ببيوت قريبة من المزرعة..

اما الغريب ابن الغريب أديم هذا حالته حاله ، شكد ما احب أسمار وجنت اتعاطف وياها ، حبيت أديم وحبه الغريب الها ، وضعه غريب تصرفاته طريقة خوفه عليها كلشي بيه غريب ويلفت..

بيوم جنا نتعشى وكالعادة بعد العشا نشرب الكهوة ويقرا اسمر الفنجان ، اغلبهم يرفضون لأن بازعة نفسهم من سوالفه جنت اني اخليه يقرالي للضحك..

أسمر : شوفي شوفي أسونتنا..

إيساف : اسونتك شنو ، شو رحت زايد!!

أسمر : هاي شنو شيخ خاف تغار مني عليها.

إيساف: اغار من الهوى مو بس منك.

أسمر : دشوفني اجلح املح اظلم واسمي أسمر شتشوف مني حتى تغار عليها..

أهاب : تكفي ابتسامتك المشرقة جنها لايت بنص غرفة ظلمة.

أسمر : طيح الله حظك عود انت سويت زين هسة ، كحلتها .

أهاب : اعرف عميتها وحركت ابوها.

أسمر : هسه ما علينا عوفونا اني واسونة نحجي براحتنا.

إيساف : وبدربك طردني فد مرة.

أسمر : لا حشى شيخنا الغالي والعزيز انت منو يكدر يكولك على عينك حاجب يابعد حواجبي انت.

بهذه الاثناء طلع أديم من البيت متحسس طريقه بالعكاز بس جانت أفنان وراه ترشده اذا اكو شي كدامه او طريقه فارغ..

تقرب من الكعدة وضرب العكاز بالكاع وخلى كفوف ايديه عليها رفع راسه متبع صوت أسمر ، من عرف وين مكانه اتجه براسه ناحيته وبصوت بيه نوع من الغضب كال..

أديم : بدل الضحك هذا جان اجيتني مو متفق وياك بعد العشا تجي لغرفتي.

أسمر ضرب كصته وهمس بصوت ناصي.

أسمر : خرب شلون نسيت شراح يخلصني ..

حجاها ورجع التفت ناحية أديم باعتذار كال..

أسمر : ومعركة احد من تعشيت ثكلت وشربت كهوة خلتني اصحصح شوية وتوني نويت اجيك بس انت سبقتني بخطوة ..

أديم : يلا تعال احاجيك.

إيساف : تعال ابو تميم حبيبي اكعدوا هنا واحنا فايتين ننام ، تعشيت لو بعدك.

أديم : ما اشتهي شبعان.

حجاها ضايج وعاكد حاجبه..

إيساف : تمام براحتك ، اخذت علاجك؟

هز راسه ب اي بدون ما يحجي..

إيساف : على جوع تاخذه مو راح تخرب معدتك يا يابه ليش هيج تسوي بنفسك وبينا.

أديم : حبيبي لا تخاف ماراح يصير بية شي..

إيساف : أسن يلا عيني خليهم ياخذون راحتهم..

أديم : خليها الخالة ماعندنا شي اذا حابه تبقى.

إيساف : ماشي تريد تبقى يمكم تريد تنضم الية براحتها..

كام نفض بجامة التراك والتفت علية رفع ايده اشرلي عشر دقايق واصعد هزيت راسي ب اي تركنا ودخل جوى ، باقي الولد توزعوا قبل لا يطلع أديم اما أهاب جان يركض بالمزرعة ولابس سماعات يسمع اغاني بيها..

تقرب أديم ،،كامله أسمر اخذه من ايده ورشده على مكان الجلوس كعدوا وطلب منه طلب غريب خلاني صافنة..

أديم : اتصل ب أسمار وشوف اتصلت بيه لو بعدها.

أسمر : قبل شوية حجيت وياها جانت طالعة كالت من ارجع اخابرك وبعد ما خابرت..

بعكدة حاجب وضيق خلك كال..

أديم : صار هواي من خابرتها؟

أسمر : تقريباً ساعة سبعة ..

أديم : وهسه تسعة خابرها معقولة ما رجعت ادري وين رايحة بهذا الليل.

أسمر : شمدريني اكعد احاسبها وين رايحة وين جاية شنو سلطتي عليها حتى اسأل.

أديم : ما كلت اسأل ولا حاسبها .

أسمر : مو طريقة حجيك عبالك تحقق وياية وصاير عصبي.

أديم : خابرها عيني وشوفها وينها..

أسن : اني ادري بيها وين راحت وبعد مو هسه ترجع.

أديم : شوكت ترجع ؟

أسن : وية ابوها طلعوا يتسوكون للبيت.

أديم : وبالعادة يتأخرون ساعتين ؟

أسن : اي مرات اكثر تعرف احتياجات بيت كامل يراد وقت.

أديم : اي صحيح ، أسمر اكو كهوة ؟

أسمر : اي اصبلك..

أديم : ياريت بلكت يتعدل راسي.

أسمر : اعدله واعدل ابوه هم.

أديم : بدربك نسيه همومه بلكت اكو هيج نوعية من الكهوة.

أسمر : اذا تحب نخلي حشيش تنسى ابوك..

أديم : انجب وصبلي يلا.

أسمر : شنو هاي اخر العنقود اني وهيج تعاملني ترى كل البيني وبينك سنة.

أديم : روسية متشوفنا ما نتوالم.

أسمر : بس بالخباثة منو يفهمك بكدي.

أديم : محد غيرك يفهمني من الاشارة تجيني.

أسمر : شفت ياعيني لهذا دللني ودير بالك علية حتى ادوملك.

أديم : صحيح من سقى وردته جازته بجنبدة..

أسمر : الله حسستني بايام قبل بالابيض والاسود ايام فريد الاطرش ومريم فخر الدين ، الله لو الله يرزقني بوحدة شبها..

بضحكة عفوية كلت..

أسن : تعرف بنت اختي بسيل هواي تنطي شبه لهذه الممثلة وبعد احلى يعني تخيل هالكد ما حلوة يشبهوها باحلى الممثلات ، مرة طلعنا واحد ذبلها حجي كال شنو هاي شجاب مي عز الدين بالعراق ..

أسمر : لا بربج هيج حلوة!!

أسن : اي وتخبل اخلاقها ونزاكتها بس اخ شلون كدر هذا الحقير يغيرها هيج ما ادري.

أسمر : يا كلب لايف على احلى اثنين بالعشيرة ولو الخالة ما قاصرة..

أسن : الله يخليك..

بهذه الاثناء رن موبايل أسمر باوعت جان يلتفت لأديم كال.

أسمر : سمرة هاي.

أديم : جاوبها يلا ومن اريد احجي وياك سوي كتم ومثلما اتفقنا تحجي لا تزيد ولا تنقص.

أسمر : ماشي تتدلل.

أديم : يلا جاوبها لا تخليها تنتظر هواي

أسمر : ماشي عيني جاوبت، الو اهلا بستنا شلونج اخبارج تأخرتي علية..

فتح مايك ، وسمعت ضحكة أسمار ودلالها ، خلت أديم يشيل نفسه ويركعها بالكاع.

أسمار : يا هلا باسمرنا شلونك عيني ، اصبر ماما وينك تعال جيبها ولك لا تاكل هواي حلا موزين عليك اسنانك تتسوس.

أسمر : لك اسمع كلام ماما.

أسمار : اسفة هذا اياس خبلني اخذ علاكة الحلويات وانهزم بيها واعرفه يكعد عليهن يخلصن يلا يكوم.

أسمر : الف عافية خليه ياكل شعنده..

أسمار : موزين عليه اني مو على الحلا بس هو يتأذى..

أديم اشرله بيده وهمس ، بكلمة اختصر ، حجاها بعصبية مكتومة.

أسمر : يلا يابة هسه المهم شوكت تبدين تحجين وية لؤي..

اني هنا شهكت ولطمت صدري متعجبة حجيت بصوت ما تحملت.

أسن : لؤي شنو شجابها عليه هذا الجلب شنو الكاعد يصير من وراية؟؟

أسمار : هاي خالتي يمك؟

أسمر : اي بلحمها وشحمها

أسمار : ها سلملي عليها وكوللها أسمار تحجيلج تفاصيل من تخابريها.

أسمر : سمعتي خالة تسمحيلنا نكمل كلام

أسن : كمل اريد اشوف المهزلة شنو تاليتها.

باوعت لأديم حك لحيته ومسدها مدنك راسه..

أسمر : اليوم حاجيه واطلبي منه يشوف ابنه وحاولي تسجلين صوت اياس وهو يسأل عن ابوه ويتمنى يشوفه وبعدها بلغينا شنو صار.

أسمار : ماشي..

اشرله أديم بمعنى اكتم الصوت ومد ايديه لزم ايد أسمر حتى يتأكد منه منتبهله،

أسمر : سمرة ظلي وياية لحظة..

أسمار : ماشي..

كتم الصوت والتفت لأديم كال ها ..

أديم : كوللها تحجي وياه هسه وما تطول هواي واذا اتصل بالليل خلي تتحجج بابوها او احد نايم يمها وما تكدر تحجي.

انتفضت اني بعصبية كلت..

أسن : وشنو مجبوريتها تتحمل هذا الوصخ وتحجي وياه وتخلون ابال اياس عنده اب غير جده عارف..

التفتلي أديم بهدوء كال.

أديم : نخلص المكالمة واشرحلج وحدة اثنين تفصيلة تفصيلة لحدما تملين بس انطينا صبر.

أسمر : هسه افتح الكتم لو شنو البنية صارت طرشي

أديم : افتح وكرر عليها اللي حجيته الك ..

أسمر : ماشي..

حجى كلشي الها وفهمها وهي جانت مطيعة بشكل وكله اي واي، انتهت المكالمة والتفت علينا أسمر كال.

أسمر : هذا هو راضين علية ان شاءالله.

أسن : اني شكو خلي اخوك يرضى عليك مو هو اللي كاعد يخطط.

أديم : خالة اسمحيلي اوضحلج الاسباب اللي دفعتنا نتصرف بهذا التصرف الشفتيه هسه ..

أسن : يلا اسمع لأن السما وكعت على صدري وكتمت نفسي هسه.

أديم : اني شنو اكول عبالج سهلة علية هيج اسوي ما تعرفين النار اللي بكلبي هسه ، بس مضطر.

أسن : مضطر لشنو فهموني لخاطر دينكم.

أديم : أسمار وكلت محامي قبل لا تسافر وهو تكفل باجراءات الطلاق وعلى اساس من تتنازل عن كلشي تحقه بيه ومن ضمنه بيتها باسمها مقابل هو يتنازل عن ابنها وتصيرلها الحضانة الها وما يحقله يتدخل بيهم ليوم يبعثون.

أسن : اعرف بهذا الحجي وين الجديد يعني ؟؟

أديم : الجديد ياست كالآتي ، لؤي متواصل وية المحامي ومتفق وياه مقابل مبلغ مالي ضخم حتى يوكف وياه ويلعبون لعبتهم على أسمار وبورقة مزورة على اساس بيها ختم قاضي والخ من تفاصيل المحاكم ، مفادها لؤي تنازل عن ابنه بس الحقيقة تختلف ، الكتاب بيه كلام يدين أسمار ويخليها تتنازل عن ابنها اذا فكرت تسافر او تتزوج ، وبعدها ما يحقلها تاخذه ومن ياخذه ابوه يحقلها تشوفه بالشهر مرة وحدة داخل المحكمة بدون اصطحاب، لهذا اني وأسمر تحرينا بهذا الموضوع وفكرنا هواي وما لكينا حل انسب الا تتواصل أسمار وياه لأن كلشي مسويه قانوني ومصدق ما نكدر نتلاعب بيه...

أسن : يا كلب هذا شنو من بشر معقولة يطلع إنسان مثلنا من دم ولحم.

أديم : مو بس هيج محاول يتهمها بسمعتها وجايب ادلة مزورة بس القاضي كاشفه ورافض الدعوة بأكملها.

أسن : لا لا مو معقولة ماكاعد اصدك.

أديم : صدكيني هذا اللي صار حجيته الج بحذافيره واكو شغلة مدوختني وبنفس الوقت أسمار هم دايخة بيها حسب ما حجالي أسمر ، وهي ليش كل يوم يجي للجامعة حتى يحاجي أسمار وليش بوجودي،، معناها يريد يفرقنا بس ليش بهذا الوقت بالذات بعد خطوبتكم مباشرة..

أسن : صحيح هم فكرت بيها اني

أديم : خالتي احلفج بالله والمسيح وبكل معتقد تعتقدين بيه الحجي هذا بيني وبينج ما اريد سمرة تعرف بيه.

أسن : زين ليش انت مو تحبها ليش تبعدها عنك تعرف بهذا الفعل كاعد تعذب روحك وتعذبها وياك.

أديم : أعرف بس الكاعد اسويه لخاطرها اريدها تتأكد من قرارها يلا لأن راح ترتبط بية طول العمر اذا الله كتبلنا عمر نعيشه ، لاسنة ولا سنتين ، لازم تستغنى عن تعينها وتتكفل بابني وامي وفوكاهم اني يعني مسؤولية صعبة كلش اصير اناني اذا فضلت سعادتي على راحتها

أسن : اني وياها نتساعد وكول ياالله هي سعادتها وياك صدكني أسمار تعبت وتمرضت بدونك واعرف بيها ما تقبل احجيلك بس جنت اتمنى فد يوم ننجمع ونفتح الموضوع ونحجي بيه واشوف تفكيرك شنو واوصلك تفكيرها واحساسها اصير واسطة بينكم لحدما تنجمعون

أديم : سالمة وما تقصرين بس لو تشوفين أفنان شلون واهبة عمرها وراحتها الية ولوالدتي وابني وبنتها ، اذا اني تزوجت أسمار راح تتولى هذه المهام واني اختي اللي هي توأمي واجعني كلبي عليها وكل يوم انام و دمعتي على خدي لأن كاعد اتعبها وادعي من الله يرجعلي بصري حتى بس اريحها ، هالمرة اجيب بنية شابة وحلوة والف من يتمناها انهي مستقبلها بهاي المزرعة ويمكن تصير حياتها تعيسة وتتندم على قرارها اللي اخذته بدون حسبان.

أسن : بالعكس راح يتعاونون سوى ونصير بدل الوحدة ثلاث ، اني وأفنان وأسمار ، ونصفك كلنا سوى قابل راح نترككم وحدكم ، اني وإيساف ما راح نترك المزرعة بيوم ولا راح نعوفكم لهذا لاتشيل هم ..

انرسمت ابتسامة مريحة على وجهه وتنفس الصعداء وهمس.

أديم : ربي يريح كلبك مثلما اثلجتي كلبي ، بس خلي نخلص من لؤي بعدين اتفرغ لسالفتي وياها ما اريد اشتتها وتلتهي وبالتالي تتعب.

أسن : تخاف عليها ؟؟

أديم : واحبها اكثر شي بهاي الدنيا لدرجة حياتي السودة تلونت وياها ..

أسن : ياربي يسعدكم ويجمعكم على خير.

أديم : يارب امين..

أسن : راح اصيح لأسمر يجي يمك لأن نعست وعندي باجر دوام

أديم : غالية خالتنا.

ابتسمت وهمست بتصبح على خير جاوبني ودخلت مريت على امه كعدت يمها شوية وطفيت الاضوية وصعدت نمت..

ثاني يوم خابرتني أسمار وحجتلي شنو صار وياها ، لؤي جان طاير وما مصدك هي تتصل بيه وندمان ندم العمر لأن خانها راد يحجي بالموضوع ويشرحه الها ، كايلتله اذا تفتح اي شي قديم انهي الاتصال وبعد ما اتصل مرة ثانية ظل ساكت ..

مرت الايام وتواصلهم صار مستمر ويومي واكثر من مرة طلب يشوف ابنه جانت تتحجج بوضعها ابيت اهلها وابوها نحس بطلعتها ونطته وعد من يبدي الدوام تخليه يشوفه بالمدرسة وطبعا حجيها وتصرفها وياه كله مدروس ومخططله ، وجانت مرات تعتذر منه بحجة احد فات للغرفة وتخابر على أسمر وتبلغه بالطلب مال لؤي ويروح يحجي لأديم ويتفقون على صيغة معينة تجاوبه بيها وترجع تتصل وتحاجيه ..

وصلت مرحلة يتمنى رضاها لأسمار ، بنفس الوقت أديم اعصابه تعبت وجان عصبي طيلة الوقت واحسه شايل هموم الدنيا على راسه ..

تنازل عن حضانة ابنه الها والولد بلشوا يشتغلوه ، بيوم انجمعوا إيساف وأديم وأسمر وارود وأنهد وازر وراحوله لمكان شغله ، اللي عرفته من إيساف ، باقين هو وأديم بالسيارة وباقي الولد نازلين مكسريه وسادين المحل اللي فتحه جديد من رجع من السفر عباله راح يرجعوله أسمار وابنها لهذا اسس شغل وفتح بيته اثثه من جديد بعدما باع كلشي وسافر..

غلقوا المحل باقفال جديدة وكتبوا عليها مطلوب عشائرياً وخلو اسم عشيرة الغريب وجواها رقم حتى هو او واحد من اهله يتصلون بيهم..

رجعوا للبيت يوم يومين واتصل ابوه حجى وية أديم وطلب منه يلتقون بمكان ويحجون ، أديم جاوبه مستهزء.

أديم : اعرفك تعرفني نلتقي اعزمني على عشا كون مكان على البحر ونتسامر اني وياك ، شوف عزيزي ابنك مطلوب النا واذا ما سامع با ال الغريب ياريت تسويلك فرة بسامراء وتسأل علينا وتشوف شنو نكدر نسوي ، هاا المطلوب اي هيج الحجي ، الجمعة راح ننصب جادر تجيبون ابنكم وتجون واذا عندكم شيخ عشيرة وجهاء جيبهم وياك لأن حسابكم ثكيل ويانة .

باقي يتوسل با اديم والاخير ما سمعله سد الموبايل بوجهه ثاني يوم نصبوا جادر والتموا العشيرة وكلمن بيده سلاح مرخص من الدولة...

صارت ساعة ١٢ اجوي بيهم ٢٥ شخص ضاعوا بين ولدنا ، صارت الكعدة حجاية منا حجاية منا على اساس فصلوهم بسبب ضربة اديم وشوفوهم التقارير مال مستشفى وشلون متأذى وعنده اصابات احتمال ما يشوف طول عمره بسبب لؤي..

الفصل جان بكد سعر البيت اللي اخذه من أسمار.

من اخذوا الفلوس جابهن عندي بمساعدة إيساف وكال ..

أديم : هذا حق بنت اختج وصل وياريت ما تخبريها باللي صار وكولي لؤي بايع البيت ومن هددوه جاب فلوسه تم..

أسن : تم هذا هو مشكورين على تعبكم.

أديم : ماسوينا شي حق ورجع لأصحابه يلا اني استأذن.

أسن : الله وياك...

طلعوا هو وإيساف واني خابرتج وهذا كل اللي صار لهذا يا أسمار اطلب منج تعوفين سالفة السفر وتلغيها للفكرة.

أسمار : خالتي ما أكدر بعد نويت وبلغت بابا اني هنا اتعذب وبس .

أسن : لخاطري اني ماردت احجيلج السواه أديم بس من سمعت راح تسافرين وهو عنده امل ينجمع بيج وركض هالركض كله وصبر صبر الجمل وتالي ينصدم بسفرج يموت والله انتِ كاعد تهدمين عالمه على راسه..

أسمار : افكر عود الله كريم بس خالتي اياج تحجيله عن سفري ازعل عليج.

أسن : انتِ اعرف اني رايحة انام تصبحين على خير.

أسمار : وانتِ من اهله.

سديته منها وطلعت بوجهي لغرفة أديم دكيت الباب من سمعت صوته كال ادخل فتحت الباب وحجيت.

أسن : ابو تميم ممكن احجي وياك بموضوع ضروري جداً.

التفت علية جان واكف عكد حاجبه وكال.

أديم : خير ان شاءالله.

أسن : صدكني خير بس استعجل..

أديم : بلا زحمة عليج انتظريني بالصالون هسه جاي..

أسن : تمام ..

طلعت بعد دقايق اجى متحسس طريقه بالعكاز و مغير ملابسه بتراك جان محطوط على الكرسي اللي هو واكف يمه..وصل يمي وكعد على القنفة بعدما طلعت صوت نبهته بمكان وجودي..

أديم : الله بالخير خالتي العزيزة.

أسن : الله بالخير ابو تميم.

أديم : اي شنو المهم صار شي جديد من وقت اللي تركتج بيه

أسن : أسمار

أديم : شبيها !!

أسن : راح تسافر.

انصدم وجهه صار أصفر بلع ريكه بهدوء وصوت خايف كال

أديم : ونسة لو استقرار؟

أسن : لو ونسة ليش اجيك واكولك أكيد استقرار.

أديم : واني متأكد من هالشي بس حبيت اجذب احساسي، وين راح تسافر ؟؟

أسن : اهلها كلهم راح يسافرون يستقرون برا وبعد ما يرجعون..

حجيتله كل التفاصيل مع ذكر اسم الدولة ، ضاج بشكل وبينت على ملامحه الخنكة ، استأذن مني وطلب اجيب موبايله وأتصل بأسمار ، رحت لغرفته جبت الموبايل واتصلت عليها ونطيته اله تركته وحده وسديت الباب ورحت بلغت أفنان بمكان وجوده حتى تنتبه اذا يحتاج شي وبلغتها عنده اتصال مهم ، تصادفنا اني وأرقم على الدرج شافني ابتسم وسلم رديت السلام وكمل طريقه واني كملت طريقي نسيت شغلة ونزلت اجيبها وجان اشوفه يتسنط على غرفة الصالون سويت صوت شافني ابتسم وكال.

أرقم : منو هنا عندنا خطار ؟

أسن : لا ابو تميم عنده اتصال مهم وطلب مني اسد الباب.

أرقم : ها زين يلا اني رايح باي.

اسن : باي.

ما اعرف ليش من دونهم كلبي يلعب منه وما مرتاحتله وتمنيت بداخلي يكون احساسي يكون غلط ومو بمحله.

اخذت الشغلة اللي نزلت علمودها ورجعت صعدت مرت ساعة ونصف وجان يرن موبايلي باوعت أسمار ، اول ما جاوبتها جانت معصبة علية ولامتني هواي وحجت فرغت الكبت اللي بكلبها انتظرتها تخلص وحجيت.

أسن : انتِ لو تروحين لنهاية العالم ماراح تنسين أديم .

أسمر : انساه وما اريد اتزوج بعد.

أسن : زين ليش فهميني.

أسمار : ما اريده يجيني بطلب منج لو لأن سمعني راح اسافر اريده ييجي لأن يحبني.

أسن : يحبج كل اللي سواه هذا ما يعنيلج.

أسمار : وينه ليش ما يحجي خلصها وياية عتب بعتب.

أسن : يا الله يا أسمار انتِ صدك تحجين؟

أسمار : اي صدك احجي شنو صعبة عليه يحجيها راح يخبلني.

أسن : ارتاحي هسه وباجر نحجي ان شاءالله .

أسمار : ان شاءالله باي.

أسن : باي..

سديته منها اجتني أفنان ، مدت راسها من الباب جانت مفتوحة شوية ، همست اشرتلي.

أفنان : أديم يريدج صاير بركان تعالي.

أسن : اجيت اجيت.

نزلت وراها وجنا نتسابق على الدرج ، دخلت للصالون لكيته واكف ورافع راسه ليفوك ويعصر بعيونه..

أسن : كول ابو تميم دزيت علية..

أديم : باجر اروح اعقد عليها شاءت ام ابت.

أسن : شلون تعقد غير تخطبها بالأول تدز ناس تاخذ رأيها يلا ..

أديم : تحبني ادري بيها واذا على الناس اخذلها سامرا كلها واذا تحب نروح مشي بس باجر اعقد عليها ما اطلع من البيت الا واحنا عاقدين.

أسن : اذا حسمت القرار بعد ليش داز علية..

أديم : اريدج تطلبين منها تلبس شي حلو ويعجبها حتى يظل ذكرى حلوة وبعد العقد اسويلها حفلة تليق بيها بداخل المزرعة بس خلي اضمنها أول..

أسن : ماشي ياغريب ابن الغريب..

هز راسه ساكت وبنفس الوقت مخبوص

ثاني يوم خابرتها وطلبت منها تلبس شي حلو على اساس امر عليها وناخذها نتعشى اني وإيساف وابوها وامها ، استغربت الوضع بعدين اقنعتها..

بالبيت أديم تولى المهمة وحجى وياهم محد اعترض غير أعقل وأرقم وتركوا المكان ، محد حجى وياهم ولا ناقشهم البقية وية عمامهم وكم وحدة من النسوان اخذناهم ورحنا..

صفت السيارات كبال بيت اختي اناهيد.

الفرحة الجنت بيها ما تنوصف واني اتخيل أسمار شلون راح تستقبل الخبر وشنو ردة فعلها..

دخلنا بهوستنا شافنا ابو أسمار ظل واكف مصدوم ، ملامحه تحجي وتكول هاي شنو كاعد يصير ، شبيهم جفتوا علينا جفتة وحدة..

اخذه إيساف وحجى وياه على صفحة فوك الربع ساعة بعدها تحاضنوا ودخلوا جوى حجوا بموضوع الخطوبة واني اباوع على أسمار وأناهيد اللي وحدة صافنة بوجه الثانية وشايلات جنطهم اليدوية متحضرات على اساس يطلعون ويانا..

لهناك ودخل ابوها وكف كبالها سألها..

عارف : بابا أسمار جايين عليج عيال خالتج ، يريدوج لابو تميم اني ما اوكف بطريقج ولا اعارض اذا انتِ جنتي متقبلة الموضوع وسالفة العمى هذا قضاء وقدر كلنا متعرضين لهذا الشي يعني مو فد عائق يخليني ارفض وعلى حسب كلام خالتج تكول ناس ينوزنون بذهب شنو رأيج.

أسمار تستمع وصافنة ما نطقت بكلمة وحدة رجع ابوها سأل مرة وثنين وهي على نفس صفنتها..

أسن : موافقة بس تستحي .

عارف : شلون عرفتي اني اريد اسمع الجواب منها.

أسن : مبين نفس ردة فعلي اني هم ما حجيت والجواب اجاكم عن طريق اناهيد.

عارف : نتوكل على الله هذا هو..

أناهيد : وين تتوكل اصبر خلي ينطونا كم يوم نفكر والبنية تشوف نفسها تتقبل هيج موضوع او لا ليش متسرع قابل هو سمج وبالشط.

عارف : الناس خوش ناس والولد ذهب انتِ استريحي ياعيني ويجيج الصافي.

أناهيد : هاي صدك تحجي.

بهذه الاثناء دخلت الحجية وية افنان وحاجوا اناهيد ، وظل يمدحون باديم بعد خجلت تحجي وتناقش وهي اصلا تحبهم وتدور خاطرهم..

لهناك وسمعت أسمر يكول .

أسمر : وينها سمرتنا يريدها الشيخ إيساف يريد يعقدلهم..

رحت جريتها من ايدها وكعدتها على الكرسي يم الباب هي بس تباوع وساكته ..

حجى ايساف تفاصل العقد بعدها لازم هي تكول موافقة ، هزيتها وكرصتها كلتلها كولي اي ترى تتندمين وهذه اخر فرصة تجمعكم..

بجت وهي تكول.

أسمار : نعم قبلت ..

اشتغلت الهلاهل وطشينا عليهم جكليت وكعدت بالهول طببوا أديم عليها كعد يمها وتنفس الصعداء مبتسم اول مرة اشوفه بهيج راحة و وجه حلو ضاحك..

جان يحجي وية أسمار وهي مدنكة ساكتة..

بعدين طلبت منهم نعوفهم ونطلع ظلوا وحدهم...

من طلعوا وبقينا وحدنا اني وياه مد ايديه واخذ وجهي متلمس تفاصيله ، من وصل لشفايفي باسني بشغف الى ان دفعته ، خل كصته على كصتي وتسارعت انفاسنا ، بنفس مقطوع كال..

أديم : في شَفتيك معصرة عِنب و بائعة كَرز وَ ثلاثة أطفال يقتسمون الحَلوى ، احبج

يتبع...

مساء الخير حبايبي عذروني على التأخير ومتابعة ممتعة...