أحببتُ ذلك الغريب الفصل التاسع وستون 69 - بقلم وأهملها القارئ

بالوقت اللي جانت بيه اجمل ايام عمري و كل منافذ اللي يتسلل منها الحب مفتوحة امامي ،ادمنت شكلي لدرجة من اباوع بالمرايا صورتي تبادلني نظرات الاعجاب ، يتراقص قلبي فرح وكل يوم اكعد على امل ألتقي بيك ياشريك حياتي واحجيلك عن وحدتي وعن مدى احتياجي لحنانك واسولفلك شلون كل الحياة اجتمعت ضدي بوقت ما تركني والدي وبقيت فريسة للظنون السيئة اللي تجتاح عقول اخواني الستة ، احتاجيتك بنفس الموعد اللي كنت استيقظ بيه وادورك بين طيات اشتياقي ، تأسرني الاشواق تفرحني الاحلام بيك يا اسمري ، اللي جنت تأخذني بخيالي ل قمة الخيال يا صاحب الوجه اللي يبتسم له قلبي قبل شوفته وتأنس له روحي ،
يامن خطفت قلبي بعالم الخيال وتركتني اترنح ما بين البقاء واللقاء،
وما بين حضنة وقبلة وحفنة عتاب ،
الم يهزك ندائي؟
الم تضعفك اوجاعي؟
هل ارتكبت جريمة كبرى بسبب جمالي؟
لكي يخرجني من بحر احلامي الى بحر اوجاعي لأصطدم بواقع خالي من سمار وجهك..

اسئمت الانتظار ؟
انقطعت بيننا الاحلام!!
اين انت في صباحي الضائع؟
في قصصي وكلامي وخيالي ؟

اخذت نفس عميق لابدأ بسرد معاناتي وانا انظر الى عينيه لأرى تعابيره التي صورت لي حياتي يا من جعلت كل البدايات اسمر كيف اخبرك بحجم الحب الذي اكنه لك في قلبي ما ظنك بمن يطلبك من الله؟
يامستقبلي الذي تمنيت ان اعيشه بالماضي ،عن ماذا احدثك؟
عن رغبات قتلت في عراء الأحلام الحائلة بيننا ؟
ام عن تلك المشاعر التي قتلها سارق الحب بإسم فصلية القدر
نعم انا اصبحت فصلية لكن من نوع آخر..
كان يامكان في قديم الزمان انا وعائلتي المتكونة من بنت وستة اولاد ووالدتي ..

بسبب وحدتي القاتلة وعدم وجود اخت لي اخترت خير رفيقة ،وهي بنت خالتي أسمار ...

بيوم من الأيام جنت عايشة بضغط نفسي كلش كبير بسبب معاناة السادس ومنتظرة القبولات على أحر من الجمر ،دخل جوزيف اخوية الثاني بالتسلسل لان الكبير مسافر هو وعائلته ومستقر خارج البلد ...

جوزيف : ها طلعت القبولات او بعد؟

رفعت عيوني باوعتله

بسيل :لا بعدها

جوزيف :يلا خير ان شاء الله خلي نشوف تطلعين طبيبة قابل ؟

ما جاوبته لان اعرف يريد يساويلي مشكلة، تركني ودخل غرفته، بعد مرور ساعة اجاني اتصال من صديقتي جاوبتها ..

_ بسيل مبروك طلعتلج هندسة الجامعة التكنولوجية...

من فرحتي كمت اعيط واكمز، على صوتي اجتي ماما وجوزيف واخواني الاثنين الاصغر مني ...

جوزيف :ها خير شو طلعتي ؟

جاوبته فرحانة .

بسيل :هندسة
جوزيف: شنو شنو

بسيل :هندسة

جوزيف :اعرف هندسة منو كالج اطرش؟

بسيل: شبيك ليش صرت عصبي ؟

جوزيف : ماكو دوام

بسيل : شنو ؟

جوزيف : دوام ماكو حجيت بغير لغة ؟

بسيل : هسه شنو ؟

جوزيف : عبالي تطلعين طبية جان خليتج تداومين ، بس يلا ماكو نصيب اقبلي بالولد اللي كلتلج عليه واكعدي واسكتي .

بسيل : لو يبقى اخر واحد بالدنيا ما اتزوجه وكلتلك هذا الشي .

جوزيف : غصباً ما عليج وعلى اللي خلفوج تتزوجيه

بسيل : كلتلك ما اتزوجه .

جوزيف : السبب ؟

حجاها تقرب مني يباوعلي بتحدي ومخصر ايديه ..

بسيل : لان نفس شاكلتك ،سكير ، من رواد النوادي الليلة ، قمرجي ، ضايع بدون هدف ، شلون تريدني ارتبط بمثل هيج واحد ؟

لزمته من تشيرته تحديدا من يم كتفه ،همست بغصة وعيوني مدمعة .

بسيل :شلون تقبلها غيرتك يا ابو الغيرة ؟تنطي اختك الوحيدة لهيج واحد ؟

جوزيف : وشبيه هذا الواحد ؟

بسيل : سلامتك مابيه شي الحجي وياك ضايع..

تركته ومشيت خطوتين سحبني من بلوزتي ، التفتت علية واني اتأوه..

بسيل : شبيك رقبتي اذتني وخر ايدك..

جوزيف : اوخر ايدي شي حلو ، شوفي لج دوام ماكو كلية تحلمين تشوفيها وزواج تتزوجين..

بسيل : ما اتزوج لو اعرف تموتني.

ماما ايدته وكذلك اخواني الاصغر مني اللي اصلا ما هامني رأيهم..

بعدها ماحسيت بشي من الضرب اللي انضربته ، كعدت متعرقة بشكل مو طبيعي حسيت بحرارة سرت بجسمي ، بديت استدرك اللي صارلي واحس باللي حولي من اهلي ، دنكت شميت عطري اشمئزيت ، هاي شنو ريحة غريبة ، صحت بصوت على ماما اجتي كعدت يمي همست..

بسيل :ماما ليش ريحتي مو طيبة ؟

ماريا : هذه ريحة الدم ماكدرت اغيرلج ملابسج وحدي..

عكدت حاجبي مستغربة لان ناسية اللي صار..

بسيل : من وين اجى الدم ؟

ماريا : العصر تعاركتوا انتِ واخوج وهواي صارت بينكم مشادات كلامية وانتهت بضربه الج ما خلصناج الا واخوانج البقية اجوي من خابرتهم ، ليش هيج ياماما تسوين بنفسج وبينا..

بسيل : ساعديني اغسل واغير ملابسي واريد اروح يم بيت خالة أناهيد فترة ارتاح وارجعلكم..

ماريا : ليش هو بكيفي اخليج تطلعين ؟

بسيل : ومنو راح يمانع ؟

ماريا : اخوانج كلهم يمانعون..

بسيل : ماما انتِ شغلتج هنا شنو ؟ اذا محد يسمع كلامج ولا يهتم للشي اللي تسويه او تريديه.

ماريا : اتجنب المشاكل بالسكوت مرات الحجي يزيد المشكلة ما يحلها..

بسيل : بس هذا الشي غلط اللي كاعد تسويه غلط بغلط..

ماريا : هذا اللي انكتب علينا من يوم ما ابوج غمض عيونه اني وياج ضعنا من بعده.

بسيل : تربيتج الغلط الهم ودلالج الزايد هيج سوة بينا ، وديني لبيت خالتي راح انفجر..

ماريا : شلون نعرفهم اذا بالبيت او لا؟

بسيل : اتصلي من يوسف شوفيهم هناك لو لا..

ماريا : ما يقبل ينطيني موبايله .

بسيل : ماما مو مرات اشوفج تتصلين على بيبي وعادي ينطيه الج ..

ماريا : رايحة انام تعبت واني فوك راسج كومي اسبحي اذا شفتي نفسج زينة وغيري ملابسج وارتاحي..

بسيل : وجامعتي ؟

ماريا : شبيها ؟

بسيل : شنو صار منها؟

ماريا : لوقتها يحلها الف حلال..

بسيل : هو شنو يحلها الف حلال لازم اروح اسجل ماظل شي ونبلش..

ماريا : هاي انتِ واخوانج ما علية اني.

بسيل : كلشي وكلتي انتِ واخوانج وتعرفين كلش زين شلون علاقتنا سيئة ومحد طايق الثاني واي لغة تفاهم ماكو بيناتنا.

ماريا : هذا الموجود واللي لازم يصير اخوانج حقهم عليج وكلمتهم سيف بركبتج..

باوعتلها بهتت مصدومة باللي كاعد تحجيه تخيلي يا أسمار مسايرتهم ماما تخاف منهم ، التفتت على عمو عارف اللي جان يستمعلي وعيونه مدمعة..

بسيل : عمو لولا جيتك اللي صارت غفل وجبتني وياك اني باقية هناك اتعارك واعاني واحارب لأجل مستقبلي..

عارف : تبقين يمي هنا وتكملين جامعتج حالج حال أسمار ما عليج بيهم واللي يحجي منهم ييجي يحجي بوجهي اذا غلطتي اني اتحاسب..

بسيل : شلون عرفت اني بشدة واجيتني وشلون اقنعتهم..

عارف : أسمار رادت تحجي وياج بموضوع القبولات وحبت تعرف اذا طلعتوا نفس القبول لو لا ، نتصل على الولد محد يرد واستغربناج ما اتصلتي ولا اجيتي لهذا صعدت سيارتي واجيتج ، ومن شفت وضعيتج والكدمات اللي تارسة وجهج حجيت وية ام جوزيف وحجتلي اللي صار مختصر ، ورحتله لمحله حجيت وياه جان محتقن ومتنرفز بس كدرت امتص غضبه واخذ الشي اللي اريده.

بسيل : عمو تعبت منهم واني ما اريد اتزوج عاجبني اكمل دراستي واشتغل..

عارف : بس صدكيني اخوانج ما منهم فائدة ولا راح يخلوج ترتاحين اذا اجاج ابن حلال وطيب وافقي وتزوجي وعنده كملي اللي تريديه..

بسيل : بس ياعمو ما كاعد اشوف اكو شخص يستحقني ..

عارف : بعد وراج جامعة وهناك راح تتعرفين على هواي ناس ومتأكد تلكين اللي يشبهج..

كعدنا اني وأسمار نحلم بدراستنا وشلون نطور من نفسنا ومرينا مرور الكرام على الشخصية اللي راح نرتبط بيها ، جابولي ملابسي واغراضي من بيت اهلي وسكنت ببيت خالتي اني وأسمار تشاركنا غرفة وحدة وسرير واحد ابو نفرين ، رغم اعتراض اخواني وتزمتهم برأيهم بس كدر عمو عارف بمساعدة خالو والضغط عليهم في سبيل ابقى يمهم وفعلا كدر يحصل هذا الشي....

بلشنا مرحلة مهمة بحياتنا ، أسمار جانت فرحانة كلش بقبولها بس دائما تكول فرحتي مكسورة لأن انتِ ما طلعتي بنفس جامعتي ، وجنت اضحك واكوللها اني عاجبتني جامعتي وحلوة الهندسة..

بسرعة بدت المصارحات النا اثنينا ، أسمار جانت كلشي تحجيلي واني جنت كتومة بشكل فظيع ما جنت احجي اي شي واحب احتفظ باسراري لنفسي ، بس جنت اشاركها بأشياء بسيطة عكسها هي ، ومرات جانت تشك بمصداقيتي وتتهمني بالكذب عليها وفعلا جنت اكذب بس من باب ما اريد احجي شي ما صاير او مو وقته ، ولا احب احجي بشخص تقدملي ورفضته..

تقربلها لؤي وبدا يلاحكها من مكان لمكان ، وهواي جان ذاب نفسه عليها لدرجة مستصغر روحه يمها ، ودائما يشوفها هي احسن واعلى منه ، عنده هيج هاجس قوي اتجاه أسمار ..

جانت تحجيلي واني الصراحة من شفت اصراره حسيته مناسب من تحجي بيه جانت عيوني تلمع واني استمعلها واشوف فرحتها حتى هي تكول بسيل حسيتج حابته اكثر مني ، واني جنت اضحك على سوالفها ، وبيومها شجعتها ترتبط بيه لان حسيته يحبها من قلبه، وهي مقتنعة بيه..

واني يا ابو تميم ما امدحلك بنفسي بس احب اهتم بمظهري ولازم اكون احلى وحدة بأي مكان اتواجد بيه ، تكدر تكول هاجس او غرور ما اعرف اوصفه شنو..

المهم بوقتها بيوم المهر بالتحديد صار حجي هواي من بعد انتهاء الحفلة وعرفت بعدين أسمار متعاركة وياه ورايدة تنهي الخطوبة ، صار تحسس بيني وبينها على الرغم اني ما جنت متقصدة بهذا الشي والكل يعرفني بكل حفلة نفس تصرفاتي ونفس لبسي..

ثاني يوم داومت وهي شبه ماخذة على خاطرها مني ، بستها ورحت للدوام..

اول ما دخلت للجامعة جان اكو شاب يلاحكني هواي ومن مكان لمكان وراية ، ماجان وياية بنفس القسم ، بس ينتظرني اخلص محاضراتي والكاه كبالي بدون ما يحجي كلمة لو اروح للمكتبة اكعد الكاه كبالي كاعد يشرب قهوة او شي ثاني ويقتني كتاب وعلى اساس يكعد يقرأ بيه بس هو يراقبني من خلف الكتاب اللي بيده..

أديم : يسترق نظرات بين الحين والأخر..

بسيل : بالضبط ، بيومها جانت المكتبة فارغة بس اني وياه ، كمت اخذت جنطتي حتى اطلع ، وصلت للباب وكف كبالي خفت ونظرات الهلع صابتني ، جان يتحايل بنظراته عكدت حاجبي احاول افهم اللي يريده ، ما امهلني الوقت حتى افهم شدني من ايدي ومشيت وراه عبرنا المكتبة والممر الأول نزلنا الدرج وهو يجرني وراه جنت احاول اسحب ايدي منه بدون فائدة وصلنا لمكان خالي من الطلاب ، وكفت كباله حاولت استوعب اللي كاعد يصير ، بدون مقدمات كال..

_ بسيل اني متيم بيج مو بس معجب ولا بس احبج ، هذه الكلمة بسيطة جدا للمشاعر اللي احملها بداخلي اتجاهج ، بقيت اتأمل ملامحه الحادة ونظرات عيونه الحارة ، جسده المتصلب من شدة الضغط العصبي اللي هو بيه ، صوته الضعيف وهو ينشد بأسمي وكأنه يهذي ويغني بالاسم ، حسيت نفسي وكعت ، هذا تفسير الحب من اول نظرة من اول لمسة من اول محاولة..

بعدها سحبت ايدي وتركته وبقت النظرات بينا مستمرة ، والحب الصامت ، لا اني اعترف ولا هو رجع حاول ، تركني براحتي ، حبيته بجنون خصوصاً المرحلة الثانية زاد التعلق والحب وكلشي صار احلى بعيوني وكمت اهتم بنفسي هواي..

وبيوم جنت كاعدة وانحطت كتب على الميز كدامي رفعت راسي انصدمت بلؤي ، باوعتله كاعدة حاجبي..

بسيل : هاي شجابك هنا ؟

بابتسامة جاوبني.

لؤي : مريت من يمكم وكلت اسلم..

بسيل : اسمار وين؟

حجيتها واني اتلفت منا ومنا ادورها..

كعد بدون استئذان وكال..

لؤي : لا تدورين وحدي اجيت..

بهذه الاثناء اجى اللي على اساس حبيبي وكف كبالنا يأشرلي بعيونه بأتجاه لؤي مستفسر سبب وجوده..

كمت واخذت كتبي مستأذنة منه ..

بسيل : استأذن عندي محاضرة وسلامي لأسمار .

لؤي : هاي وين ؟

بسيل : للأسف خلص الريست..

مشيت خطوات واجى الولد اللي حجيتلك عنه عتني من ايدي وكال..

_ منو هذا وليش كعد يمج ؟

بسيل : خطيب بنت خالتي عنده شغلة هنا واجى يسلم علية..

ارتخت ملامحه وابتسم وراح..

من رجعت للبيت كعدت وية أسمار وحجيتلها عن جية لؤي وشفت صدمتها من استقبلت الموضوع ضاجت اخذت موبايلها وطلعت من الغرفة بدون اي كلام وياية..

خليت راسي على المخدة حتى انام ، دخلت تبجي كمت رحت كعدت يمها..

بسيل : شبيج ليش تبجين ؟

أسمار : اني مو حلوة ؟

بسيل : بالعكس ليش هيج تحجين منو بجمالج انتِ ؟

أسمار : ليش ما مالية عيونه؟

بسيل : لؤي ؟

أسمار : اي .

بسيل : معقولة؟

أسمار : ما محسسني اني حلوة ودائماً يحاول ينتقص مني وكلت لماما اريد افسخ وانهي ما راضية تكولي صارت حروب بسبب هاي الزواجة وابوج هواي تأذى تالي تبطلين هذا اختيارج تحملي..

بسيل : بس انتِ اللي راح تعيشين وياه وتخلصين حياتج مو خالتي.

أسمار : بسيل اليوم ليش اجاج للجامعة شنو عنده ؟

بسيل : ما اعرف كال مريت واجيت اسلم..

كامت تصيح وتضرب على رجليها وهي تكول..

أسمار : كذاب كذاب جاي حتى يشوفج بس ، بسيل هذا كل يوم يسألني عنج كل يوم يستفسر عن شي يخصج كرهته ومليت منه اريد افسخ...

بقيت صافنة عليها ماكدرت اسوي شي او احجي انصدمت، وقررت احاجيه ، مرة جانت أسمار نايمة اخذت موبايلها اتصلت عليه وطلبت منه يمرلي للجامعة ، وثاني يوم اجاني حجيت وياه وصيته عليها هواي وكلتله نص هذا الكلام..

بسيل : اذا ما عاجبتك ليش خطبتها واتركها تكمل حياتها بسلام بدون ما تأذيها حرام عليك..

حجى هواي وبرر تبريرات يمكن هسه احسها سخيفة بس قبل حسيتها منطقية وكافية لحتى أسمار تكمل حياتها وياه..

حسيت ضميري ارتاح من هيج سويت ، بس طلع النذل حاجيلها كلشي رغم وصيته ما يحجي ، اخذت مني موقف وبقينا فترة زعلانين من شفت الامور ساءت بيني وبينها استأذنت من عمو وخالتي وطلبت منهم ارجع للبيت ، لحوا علية بالسؤال ليش ما ليش كلتلهم السبب اريد اقرأ وهنا كاعد التهي وخايفة ارسب دراستي صعبة وجوزيف حذرني اي خطأ او علامات سيئة راح يبطلني وخايفة من هذا الشي ، شافوا تبريري نوعاً ما منطقي ، اخذت اغراضي ورجعت لاهلي رغم جنت كارهة هذا الشي واعرف راح اتعب ، بس أسمار جرحتني هواي بنظرات الشك تجاهي رغم هي ماحجت بوضوح بس اني موغبية حتى ما افهم ...

العلاقة بيني وبينها خربت نوعا ما ، صار العرس عزمتني خالتي مو أسمار ، ولا طلعنا سوية جهزنا جهاز العرس اختارت بدلاتها بدوني عكس المهر حتى الحذاء ما قبلت تاخذه الا اني وياها اشتريناه ، حزت بقلبي هواي ، بقيت نصف ساعة وطلعت رجعت لبيتنا،
من تزوجت ما رحتلها للبيت دزيت هديتها بيد ماما ، مرت الأيام والاشهر واني اسمع اخبارها من بعيد لبعيد ، وبالمقابل قوت علاقتي بالولد اللي حجيتلك عنه وصلت بينا تعارف وطلب يتقدملي ، بهاي الفترة ماعندي احد مقرب احجيله وافرحه وياية غير أسمار ، سمعت بيها ولدت ، لهذا طلبت من ماما نروحلها وناخذلها بيدنا شي ..

ماريا : شوفيها بالبيت لو لا لأن اللي ادري بيه أسمار ببيت خالتج جابت..

بسيل : ماما صارلها شهر ما معقولة تبقى هالكد خلينا نروحلها ونسويلها مفاجئة...

ماريا : واذا ما لكيناها بالبيت مالتها شلون ؟

بسيل : نرجع لبيت خالتي، فرعين بيناتهم قابل بغير منطقة..

أديم : تريد تصير بعد.

بسيل : اي بالضبط مصيبة وتريد تصير ، اخ اخ ، المهم رحنا اني وماما ، اخذتلها باقة ورد من يمنا ورحنا قبل لا انزل من التكسي التفتت علية وكالت..

ماريا : بسيل عيب افوت ايدي فارغة شوفيها اذا موجودة اكعدي يمها بينما اجي واذا ماكو روحي لبيت خالتج زين يوم.

بسيل : تمام اجي وياج ؟

ماريا : لا اخوانج ما يقبلون تفوتين للسوك..

بسيل :و شلون راح يدرون خليني اجي وياج.

ماريا : يسويها الحظ ويشوفوج هالمرة حتى من جامعتج تنحرمين اسمعي كلامهم حتى تخلصين دوامج مرتاحة.

هزيت راسي مبتسمة بتصنع كارهة حياتي وكارهة تحكمهم بية ، بس من يمر طيف الشخص اللي حبيته كدام عيوني اضحك واكول راح يجي الفرج بالنهاية ما يبقى شي على حاله اصبر والصبر مفتاح لحياتي..

أديم : عذراً على المقاطعة ، ليش ما اتصلتوا قبل لا تروحون منج او من والدتج ؟جان عرفتوا مكان أسمار وين وتروحولها..

بسيل : تخيل اني سنة وشوية ما شايفتها ولا حاجين ولا ملتقين ، وحبيت اسويلها مفاجئة ، الشي الثاني اني ماعندي موبايل ولا ماما ما يقبلون يشترولنا ..

أديم : انتِ ماعندج بسبب الغيرة والشك ، امج ليش ما عندها.

بسيل : لأن اغلب الوقت اني وياها وحدنا بالبيت يخافون لا استغفلهم واستعمله بدون علمهم ، عقولهم محدودة..

أديم : وضحلة لا تزعلين مني.

بسيل : لا ما ازعل هذا الصحيح.

جر حسرة وكال..

أديم : كملي بوية اسمعج ..

بسيل : تعبتك وراك دوام وانت تعبان من السفر.

أديم : وين اكدر انام وسمرة بعيدة عني وزعلانة ، كملي كملي..

بسيل : اي ورحت ياريتني ما رحت ، صعدنا تكسي ، نزلت براس فرعهم وماما راحت للسوك مشيتلها وبيدي الورد واتخيل شلون راح نلتقي وشلون راح احضنها ...

اختنكت غصيت بحسرتي ، كام أديم دخل للبيت جابلي مي وقدملي رفعت راسي باتجاهه ابتسمت تخيلته يشوف لان متزن وحركاته ثابتة ، اخذته منه وهمست..

بسيل : تعبتك ؟

أديم : بالعكس ، ماكو اي تعب ...

شربت المي واسترسلت..

بسيل : وبعدها وصلت للبيت دكيت الباب اكثر من مرة ما فتحولي كلت ماموجودة التفتت حتى ارجع مشيت مسافة انفتح الباب بقيت اباوع واللي اشوفه لؤي بملابس داخلية ، وضعه غريب وما مرتب ، راد يسد الباب ركضت ودخلت للبيت، سمعت صوت بنية وراه تصيح..

_ ها هي لو منو ؟ البس لو لا وين رحت ؟ حبيبي وينك..

دفعته وفتت للبيت واشوف وضعية الهول تعبانة ومزرية ، فتاة عارية باقية بشبه ملابس ، كدامها تتوسط طبلة وعليها شراب واشياء قذرة ما تحملت المنظر شمرت باقة الورد بالكاع وانهاليت عليه بالسب والشتم وجنت اصيح بعلو صوتي ما اهتميت للبنية وما شفتها شوكت طلعت ما حسيت بيها بكدما جنت منفعلة واصيح..

بسيل : انت واحد كلب ومجرم وحرامات التعب بيك لك شلون هيج تسوي بيها ؟ أسمار تسواك وتسوى اكبر راس بعشيرتك ، ولك حفيت وبست ايادي يلا حصلتها وتالي ما تالي هيج تسوي بيها وتخونها وية اقذر البنات وفوكاها بالحرام ؟ ..

لؤي : بسيل اسمعيني الله يخليج خليني ابررلج..

بسيل : ولك شتبرر صخام وجهك طيحان حظك شتبرر وخر من وجهي الا كلشي احجيه لأسمار واخليها تتلاحك نفسها ...

لؤي : باعي هاي نزوة وراحت واذا سكتي ما راح اعيدها بس من تحجين ينهجم بيتي ..

بسيل : وانت ما هجمته يعني ؟

لؤي : غلطت اعتبريني اخوج تنطين بيه ؟

بسيل : ولك شلون عين صلفة عندك فوكاها بالبيت مالتها اللي هي اثثته وتعبت عليه ، وجايب بنات حرام تف عليك شكد قذر وتريد اتستر عليك لو مو اخوية لو ابوية هم احجي وما راح اسكت..

هنا لزم ايدي قوي جريتها منه ما كدرت بقى لازمها ويتوسل بية ..

لؤي : مو بنت حرام متزوجها الله يخليج لا تسويها بية اتدمر انتهي حسافة ينتهي كلشي ..

لهناك واسمع صوتها وهي تكول..

أسمار : ياحسافة عليكم ياحسافة بيكم اني ياحسافة ثقتي ولكم ليش هيج تسوون بية ليش ليشش..

كامت تصيح بصوت عالي وحالتها يرثى لها ، خالتي أسن واكفة وارها اني بين الوعي للموقف وعدم ادراكه رحت يمها كعدت بمستواها خليت ايدي عليها نترتها بقوة باوعتلي وكالت..

أسمار : هجمتي بيتي ! ولج ليش هذه جزاتي جزات حبي الج وتعبي وياج وخوفي عليج ، اني جنت شاكة عندج شي ناحيته لهذا بعدتج عن حياتي ومرات جنت اتندم واشتاقلج بس هسه لا اني طول ذيج الفترة جنت على حق.

تحجي وتجر بشعري...

بسيل : كل عقلج تحجين تشكين بية أسمار ؟

أسمار : اي كل عقلي احجي ، شعندج جاية لبيتي واني مو بيه وشنو وضعكم هذا ؟ هو بهذا القرف ولازم ايدج وخوش مسوين سهرة بس مو بعد وقت للسهر الدنيا عصر..

بسيل : لا تخربطين بكيفج وتحجين حجي بعدين تتندمين عليه .

أسمار : اندم ، ها كلتي اندم ، اندم لان وثقت بيكم اندم لان قربتج من حياتي بيوم من الايام اندم لان اني أسمار الطيبة الساذجة اللي تصدك بيكم وبتبريراتكم ، من شوكت على علاقة انتو من شوكت ؟

حجتها وكامت تضرب بية وبيه ، تخيل احجي واشرح صوتي وكلامي هباء يروح جانب صوتها وصريخها العالي وعدم سماعها النا ، انهيارها وعدم اتزان التصرفات والغضب اللي جانت بيه ما سمعتني شنو حجيت ورفضت شكو تبرير حقيقي حجيته ، لدرجة ضربتها راشدي حتى تصحى على نفسها وتشوف الحقيقة وتميز ، وللأسف بدل ما تسمعني طلبت من خالتي تتصل على اهلها وحجتلهم ، من اجوي جايبين اخواني الكبار وياهم ، وكفت بموقف المصدوم المتفرج على فضيحته وخراب حياته ومحد يقبل يسمعله واللي زاد هذا الشي من انضربت كدامهم من اخوية ، رغم تدخل عمو عارف ومنعه بس انضربت ، حجى لؤي وهنا جانت الصدمة النا كلنا..

لؤي : اني احبها من زمان قبل أسمار حتى ، ومستعد اتزوجها واستر عليها لا اول وحدة سوت علاقة ولا اخر وحدة..

كل الانظار صارت علية ، نظراتهم تعرف شنو ، حقد ، استحقار ، خجل مني ، صدمة ، استفسار وتساؤولات عتب ندم ، كلشي شفت بعيونهم ، بس رغم هذا الشي حجيت وصرخت بصوت عالي حتى يسمعوني..

بسيل : جبتلها ورد حتى اباركلها وروح بابا والعذرا ، حبيت اصالحها ومن فتح الباب انصدمت بيه لهذا فتت وشفت وحدة هنا وتعاركت وصرخت وتوعدت افضحه لهذا الكلب..

لؤي : شوف شوف شلون كامت تتبلى علية لوما انتِ اجيتي تصالحيني بالورد من كلتلج اني اريد انهي كلشي وارجع زوجتي ، وجنتي تكولين اتركها ما تفيدك واني احبك واحلى منها ها نسيتي.

بسيل : انطيني دليل واحد على صحة كلامك يانذل..

لؤي : ماعندي ادلة بالموبايل لان ماعندج ، بس جنت اجيج للجامعة ومن تريديني تتصلين علية من أسمار واجي اشوفج..

أسمار : كلامه صحيح مو جنتي تتصلين من موبايلي عليه..

بسيل : ولج هذا خنزير لا تصدكيه خنزير بائس هذا شلون جنتي متحملته وتحبيه وتغارين عليه ، كلب اجرب ولو يبقى اخر واحد بالدنيا ما اباوعله..

لؤي : رغم كلامج هذا اني مستعد استر عليج..

جوزيف : ليش شنو صاير بينكم كلب..

حجاها وانهال عليه بالضرب هو وباقي اخواني بعدها كال ..

لؤي : كلشي يخطر ببالكم سويناه هنا وبالجامعة وجنت اخذها وياية لفنادق وشقق من جانت اسمار هنا..

دكيت ولطمت بجيت وبررت ، اخذوني سحل للبيت انضربت انهانيت من دوامي بطلت، حياتي تحولت لمأساة ، توسلت بماما تخابرلي خالتي واحجيلها الصحيح بلكت تقتنع وتكولي مو وقتها خلي نارهم تبرد وبعدها اروحلهم واذا بيها مجال تحاجيهم ..

أديم : الكلب ضرب عصفورين بحجر هم ينتقم منج لان كشفتيه وهددتيه تكشفيه وهم ينتقم من أسمار لان حجت عليكم وتهمتكم..

بسيل : مو بس هذا جان طمعان بية بشكل ما تتصوره.

أديم : وشلون عرفتي ؟

بسيل : من تزوجته عرفت..

أديم : شلون صار موضوع الزواج وليش وافقتي على زواجه..

بسيل : هنا القهر اللي ما كدرت اتجاوزه ودخلت بحالة نفسية حادة ما طلعت منها الا من تعرفت على أسمر..

أديم : شلون ممكن تحجيلي لو بيها احراج ؟ حاب اعرف حتى من ابرر موقفج كدام أسمار واهلها يكون عندي إلمام بكلشي يخص حياتج لأن للأسف متأكد ماراح تسمعج..

بسيل : عادي احجيلك ، ماعندي شي اخفيه واستحي منه ، وافقت مجبرة ، من تغيبت عن جامعتي فترة طويلة ، وماكو اي اتصال بيني وبين صديقاتي وبين الولد اللي جان يحبني ، ظل بالهم يمي وهو مختصرها جاب امه واجى لبيتنا ، عباله مسيح ونتقبل اذا حجى لأهلي هو يحبني ويريدني وينطوني بسرعة..

كعد وية اخواني خطبني وبدوا وياه تحقيق من وين تعرفها وشوكت وليش الا هي وشلون اندليت البيت ..

_ هي وياية زميلة بنفس الجامعة وشفت اخلاقها وضعها مناسب الية حبيت اتقدم.

جوزيف : وشلون اندليت البيت ؟

_ اللي يسأل ما يتوه.

جوزيف : كلتلي جاي علمود اخلاقها ؟

_ والنعم من اخلاقها.

جوزيف : خلينا نسأل عليك ويصير خير..

_ متمني هالشي وانتظر منكم خبر..

جان فرحان بشكل ، طلع وكله أمل راح يوافقون عليه ، بعدما راحوا دخلولي تحقيق وضرب من وين عرفتيه وشلون اندل البيت واكيد جان يوصلج بسيارته حالج حال البنات اللي مثلج ، وحجي هواي من ضمنه ، تلعبين على الحبلين وية هذا و وية هذاك .

أديم : يقصدون لؤي !

بسيل : بالضبط..

ثاني يوم راحوا وسألوا عن الولد ، ما اعرف ياحقير او حقيرة كايلين عندهم علاقة صارلهم سنتين ويحبون بعضهم ، اكثر من شخص كايللهم ، رجعوا ما اوصفلك وضعي واللي صارلي ، مر اسبوع شوفوني الويل كمت اطلب الرحمة منهم اتمنى ابوس ايديهم بس يكفون عني وصلوني مرحلة شنو يكولون اكول تم بس خلصوني..

من شافوني بوضع مثل هذا ، جابوا لؤي وعقدولنا بنفس اليوم اللي جابوه بيه بدون مقدمات بدون ما ياخذون رأيي بشي ..

أديم : امج وينها من كل هذا ؟

بسيل : ماما اخ منها جانت تسكت اهم شي راحة بالها ، بس شرطت عليهم اسافر وياها يم اخوية اذا تزوجت..

أديم : على منو شرطت ؟

بسيل : على لؤي واهله ..

أديم : وهيج اهله موخوش اوادم بحيث يطلكون بنية عادي عندهم وياخذون بنت خالتها بنفس الفترة.

بسيل : اي انتقام من سمرة سووا هالشي.

أديم : زين ليش ؟

بسيل : لان مسيحية واخذها غصب عنهم وماجانوا رايديها.

أديم : وانتِ هم مسيحية شنو الفرق.

بسيل : الفرق اخواني هددوه بالقتل اذا تراجع لو غير رأيه..

أديم : ليش ما زوجج لصديقه شعجب قبل ينطيج للؤي الكلب بسهولة.

بسيل : لان خاف اكون ..

وسكتت..

أديم : اوك فهمت كملي بعدما امج شرطت عليهم تسافرون شنو صار ؟

بسيل : وافق وكال وياكم باللي تريدوه ، كتبوا عليه غايب يكسر الظهر وافق وهو الممنون، التذاكر والطيران وسفرنا ماطول اسبوع واحد.

أديم : ما حاولتي تتواصلين وية أسمار بهاي الفترة تحاجيها.

بسيل : بلي حاولت بس وينها أسمار ؟ سافرت وغيرت ارقامها وحساباتها كلها ، سنتين اني ماعندي تواصل وياها، واللي صارلي بالخارج خلاني اكرهها وابتعد عن فكرة التبرير كلت مثلما دمرت حياتي وخربتها باستعجالها ما تستحق مني تبرير وخليها بنارها نار الظنون والشك ، ولابد بيوم من الايام راح يتوضح كلشي وتندم بس بعد فوات الأوان بعدما اكون شايلة فكرة اعتذارها وتبريرها وما ارجعها لحياتي مرة ثانية..

أديم : عجل ليش تبررين هسه وتتمنين تسمعج؟

بسيل : أسمر يا أديم أسمر خلاني ارجع احبها من سمعت عذابها واللي صارلها ، كلت يمكن القدر اخذلي حقي منها بهذه الطريقة وما كاعد ترتاح ، سامحتها حتى ترتاح وتعيش حياتها وبطلت اتحسب عليها..

أديم : تتحسبين عليها ينطيج قلبج تتحسبين على سمرة ؟.

بسيل : اي تعرف ليش؟

أديم : اعرف بس مو لهذه الدرجة..

بسيل : واكثر بعد، انحرمت من جامعتي وجنت شاطرة كلش ، انحرمت من اللي احبه وانجن من عرف تزوجت وتركته وحاول يتزوجني من تواصلت وياه وعرف سبب زواجي من لؤي وهذا الزواج ما مطول ، بس امي واخواني جانوا حاجز جبير بينا.

أديم : من جنتي بالخارج ما حاولتي تتخلصين منه؟ والحكومة كلها وياج..

بسيل : بلي حاولت بس ماكدرت لان جنا كاعدين وية اخوية بنفس البيت وكلشي يصير بأمره واني ما جنت اكدر اخالفهم ..

أديم : وبعدها شلون عشتي وشنو صار وياج ؟

بسيل : عشت بصدمة وقهر وحالة نفسية مدتها اربع سنوات ضبط ، بعدها ارسلي القدر هدية عملاقة طيبت جروحي وهونت علية المصايب اللي صارتلي بهيئة بشر ..

أديم : أسمرنا الله يرجعه بالسلامة.

جرينا حسرة سوية حركتنا حرك..

بسيل : أسمري حبيبي ، جان بمثابة طوق نجاة الية...

ضحكت واني اتذكر طريقة دخوله الية وشلون بدأها.

جنت كاعدة اتصفح بالفيس وجان يجيني إشعار ، رسالة اشخاص قد تعرفهم ، دخلت واشوف واحد كاتبلي..

_ بسيل ؟

فتت على البروفايل شاب حلو مرتب وكاعد بالكاع يمه جلب ، كلت اهوو هذا جاي يتفيك علية ، خليني احظره واخلص ، طلعت حتى احظره كتبلي..

_ بسيل عدنان ، عندي موضوع كلش مهم وياج اذا تكدرين تتصلين علية..

عكدت حاجبي من وين عرف اسم بابا وهذا اكيد يعرفني حق المعرفة ، بس استغربت الجرأة اللي هو بيها شنو من اول مرة تعاي اتصلي، دخلت وخليت علامات استفام..

؟؟؟؟؟؟؟

كتب..

!!!!!!

رجعت كتبت..

؟؟؟؟؟

رجع كتب.

!!!!!!

رجعت كتبت..

منو انت ؟

_ انتِ شتكولين منو اني ؟

_ ما اعرف لو اعرف جان حجيت..

_ فد واحد .

_ واضح فد واحد مو وحدة..

دزلي ضحكة ، رجع كتب..

_ اريدج بموضوع مهم.

_ بخصوص.

_ شبيج متشنجة ؟

_ طبيعي ما اعرفك شلون تريدني احجي وياك؟

_ وياج أسمر الغريب، مواليد ١٩٨٤ سكنة سامراء موظف مدرس لغة عربية.

_ واني شعلية !!!

_ غريب ؟

_ شنو الغريب ؟

_ بهتانج..

_ انت شبيك منو دازك علية ترة قلبي خلصان وما عايزتك..

_ جايج بشي مفيد وممكن نتساعد بيه ويعود بمنفعته الج والي..

_ شنو نوع هاي المنفعة وليش مني بالذات..

_ ما اكدر اكتب شي ضروري نتصل..

_ اعذرني اني امرأة متزوجة وما اكدر احجي وية شخص غريب..

حجيت هيج مو محبة بلؤي بس خفت هو دازه حتى يختبرني ويشوفها لأخواني ويرجعوني للعراق..

_ متزوجة ؟ وفرحانة بيه يعني فوكاها ماخذته من بنت خالتج ، صدك مرات الشكل والمظهر يغرك على الفاضي..

_ انت ليش تريد تستفزني ؟ ومن وين عرفت عني هاي المعلومات؟ منو كال عندي بنت خالة اصلا.

_ شوفي من الأخير اكولج شغلة ، ما راح افك منج ياخة اذا ما ساعدتيني ورجعتي حق بنت خالتج .

_ وهي شنو عندها يمي حقوق متروح بله..

سديته منه وحظرته ، مرت فترة طويلة، تصورته نسى وخلصت منه بس رجع فاتلي على الانستكرام وكتبلي..

_ الدولة اللي انتِ بيها ، والبيت وكلشي عنج اعرفه ، مدي يد العون افضلج واللي عرفته زوجج ما ساكن وياج يعني ما راح يمانع اذا حجينا.

_ انت شكد غثيث ولزكة من وين طلعتلي كلتلك ما اساعدك وشنو تسوي سوي يلا ولي من وجهي

_ هاي الية الكلام ؟ لأسمر الغريب ؟

_ اي الك ولعشيرتك هم..

_ لج انتِ شكد وكحة وتس..

_ اي وراح تشوف الوكاحة على اصولها اذا قللت وياية الأدب...

_ شوفي حبابة اللي راح اكتبه وفكري بيه كلش زين..
آل الغريب اذا سامعة عنهم خير على خير واذا ما سامعة اسمعي منا وجاي بالافعال اللي راح اسويها وعلى بسيل وال بسيل السلام..

_ واذا سامع عني اني ما اتهدد.

_ سامع عنج وحافظ سوالفج كلها ،وربج اللي تعبديه اذا ما طلعت كل دمعة ذبتها أسمار من عيونها دم من عيونج ما اكون ابن ابوية ..

_ انت شبيك وليش بس تهدد كاعد اكولك ما عندي شي يفيدك..

_ زوجج الكلب وينه تدرين عنه ؟

_ لا ما ادري لا بيه ولا بغيره وبعد لا تراسلني.

_ وحق مكة واللي بناها وحق كتاب الله يا بسيل اذا حظرتيني تلكيني باجر فوك راسج اصيرلج كابوس واطين عيشتج وعيشة اهلج وياج..

_ شنو المطلوب مني كولي وخلصني.

_ اريد افوت لشقتكم..

_ شنو شنو ؟ وليش بله..

_ بدون ليش عندي غاية.

_ وعلى اي اساس أأمن بيك ومنو انت اصلاً..

_ راح انطيج معلومات عني حتى تأمنين شوية ، شوفي حبابة اني اخو زوج بنت خالتج يعني حماها ، واخوية تعرض لضرب من قبل زوجج الكلب وهسه فاقد الوعي بالمستشفى واي شي يصيرله مو بس زوجج مسؤول انتِ هم .

_ شنو؟ شكاعد تحجي انت روح حباب اني ما اتهدد..

_ يصير خير ...

وراح بعدها بيومين ثلاث ، اجاني مسج على الانستكرام مكتوب بيه..

_ اطلعي واكف بالباب واذا ما طلعتي ادك الباب عادي وافوت احجي اللي اريده واخذ اللي اريده من عيونج.

ايدي رجفت وحسيت الموضوع صار بشكل جد ، اخذت الكنزة مالتي لبستها لان الجو جان بارد حيل لونها وردي فاتح لفيتها على كتفي وجواها بجامة لونها سمائي ، باوعت على نفسي بالمرايا عيوني محاوطها سواد الهالات وشعري مهووس وجهي تعبان ، كلت لا بأس شنو يعني اطلع واحجي وياه اصلا اني كارهته، فتحت الباب وطلعت...

جنت واكف منتظرها رغم اني شايفلها صورة بالفيس بس ما توقعتها بهذا الجمال ، طلعت لابسة تراك سمائي ولافة نفسها بشي وردي كلش حلو ، عيونها ذبلانة والتعب واضح على ملامحها ، كلت بيني وبين نفسي ...

ولك أسمر شلون ينطيك قلبك تقسى على هيج جمال يرادلك قلب حديد حتى تكدر تتخطى هذا الجمال وتحجي وياها..

يتبع...

مساء الخير والعافية...
متابعة ممتعة...

https://www.youtube.com/watch?v=4yKJuBSuBV8