أحببتُ ذلك الغريب الفصل الثالث وسبعون 73 - بقلم وأهملها القارئ

شمسها الحانية
تشتهيها الأرصفة الباردة...

_______________

من سمعت جوابه بهتت، اخذت نفس وهمست بتعب..

بسيل : واضح ما متذكرني ولا مار عليك هيج اسم ، اسفة اتصلت بهيج وقت باي..

سديته منه وروحي تايهة ما اعرف شنو اسوي اخذت جنطتي وطلعت افتر بالشارع ، رغم داخلي محترك بس الهواء البارد انعش داخلي ، حسيت جسمي برد وماماخذة وياية سترة تدفيني ، مشيت سريع حتى اتدفى ، عيوني تتجول بين المارة وبين السيارات لعلي المح ظل أسمر ، وجه أسمر ضحكته، غريب هذا التعلق اللي يصير فجأة وما تعرف شنو سببه..

ما تمالكت نفسي نزلت دموعي وكعدت تحت عامود انارة ، طلعت موبايلي وكعدت اراجع بالرسائل اللي بيني وبينه، تارة اكول بسببي هيج جوابه ، وتارة اكول لا هو يضحك علية شنو جنت منتظرة..

رجعت احس بنفسي ضعيفة خفت ارتكب حماقة واتصل او ابعث رسالة واني ما اريد انزل نفسي اكثر من هيج .

سديت الموبايل وكمت حتى ارجع للبيت ، اختصرت الطريق وفتت من جهة ثانية ، جانت اهدأ والظلام يحيط الطريق عكس الشارع العام ، تملكني الخوف ترددت ، رجعت من نفس الطريق مشيت ، وصلت للبيت هلكانة ، تعجبت اني هالكد ماشية بدون وعي ، فتحت الباب نزعت حذائي ودخلت امشي على اطراف اصابعي ، الحمدلله هدوء ، بعدما جانت عاصفة ضاربة المكان، عفية جوزيف من يحل بموضع يقلبه..

دخلت للحمام سبحت ورجعت لغرفتي مددت ردت انام ماكدرت احس نفسي مخنوكة ، فتحت موبايلي طلعت اغنية كلش احبها ودائماً اسمعها احسها تلامس واقعي ...

امينة فاخر تغنيها ..

اسمها الليل بدموعه قاسي
الليل بدموعه قاسي .. ويا ويلي من ساعاته

والصبر لسه ساكت .. ويا ويلي من سكاته

توعدني بفرحتي .. واستنى بضحكتي
زي الوردة ما تبقى مستنيه الندى
وتغيب وتفتكر .. وتجيني وتعتذر
فين القلب اللي يقدر يستحمل كل ده؟
وارجع تاني واقولك ريحني الله يخليك
عشان المركب تقدر تمشي بيا وبيك
ما تفوتنيش انا وحدي .. افضل احايل فيك
ما تخليش الدنيا تلعب بيا وبيك
خلي شوية عليا .. وخلي شوية عليك

نزلت مقطع الاول منها على الانستا ستوري وكتبت ..

سأرحل ويرحل معي ازعاجي
في يوم لن يتوقعه احد..

نشرته ودموعي تتسابق على وجناتي ، الحزن مخيم على قلبي والحسرة اللي بية لو طلعتها تهد جبال...

نمت بعد معاناة ، كعدت الصبح غسلت وجهي وبدلت طلعت للشغل بدون ريوك ، بديت اشتغل بحيل مهدود ، بفترة الاستراحة طلعت موبايلي ودخلت على الانستا فتحت الستوري شفت المشاهدات أسمر شايفها الصبح ، دخلت على حسابه قلبت بالصور ، صورة احلى من الثانية ، سارحة بشكله وشخصيته ، وهندامه ، تنهدت واكول شنو يصير لو هذا الشاب يصيرلي ، شنو يعني لو تجمعنا قسمة ، لو ولو ولو بقيت بدوامة من الافكار الى ان اجتي مسؤولة القسم وطلبت مني اسوي شغلة وياها تركت موبايلي ورحت اشتغل ببال شارد كلما تحجي اطلب منها تعيد السؤال ، اخر شي كالت ارجعي للبيت ارتاحي وباجر تعالي ، تشكرت منها اخذت اغراضي وطلعت جنت محتاجة اطلع..

رجعت للبيت ولكيت بوجهي جوزيف ولؤي واخوية الكبير دانيال...

اول ما فتت طلبوا مني اكعد وياهم واتفاهم لان هنا مو مثل العراق عادي انضرب ، بس يفرضون رأيهم بالصياح، غيرها ما يكدرون يسوون شي..

دانيال: ها بسيل فكرتي زين ؟

بسيل : ما اريد ارجعله ما نتوالم ، هاي صارلنا سبعة شهور سوية حياتنا بالاتعس ما رهمنا ولا راح نرهم..

دانيال : اذا ما رجعتي وية لؤي ترجعين للعراق وية جوزيف.

بسيل : واذا الاثنين ماسويتهن ؟

جوزيف : وعيونج تتدمرين ارجعج بليلة سودة..

بسيل : ما ارجع يعني ما ارجع ، لا للعراق ولا وية لؤي ولا اريد غيره ، هذا اللي عندي لحد يلح علية..

حجيتها وتركتهم دخلت غرفتي اعصابي ترجف تعبت للحد اللي اتمنى الموت وما كاعد احصله..

بقوا يصيحون كالعادة والتهديد مستمر ، بس حسيت قلبي مات ما كمت اتأثر ، خليت راسي ونمت حتى بدون ما اغير ملابسي..

ماكعدت غير ثاني يوم ونفس المشاكل والاسطوانة تنعاد ، رحت للدوام ومر اليوم تعب بتعب وثكيل كلش..

بعد مرور اسبوع عشت بهذه الايام فصول السنة ، تمرمرت ، جنت كاعدة بالدوام وجان يجيني اتصال باوعت أسمر دولي ، هاي شنو !! فركت عيوني ما مصدكة معناها جاي لهنا ، بلهفة رديت..

بسيل : الو

أسمر : اطلعيلي اني برا

بسيل : وين انت أسمر ؟

أسمر : مقابيل البناية اللي تداومين بيها بسرعة رايدج بشغلة..

بسيل : تمام اجيت..

رحت استأذنت من مديرة الشغل ، كالت اذا تأخرتي اخصم من راتبج كلتلها اعتبريني اليوم ماداومت ، اخذت جنطتي وطلعت لكيته واكف يم سيارة ومنتجي عليها ،لابس بلوز بيج وبنطرون نفس لونه وقمصلة سودة ولفاف بيج ، نظارة شمسية وية لحيته الخفيفة وشعره طالع فد شي خيال.

شافني عبر الشارع وصل يمي ، سلم ببرود وعبرني الشارع ، صار من جهة السيارات ، مشيت بصفه وصلنا للسيارة همس بحدية..

أسمر : اصعدي.

هزيت راسي وصعدت ليكدام مشينا، وكل شوية التفت ناحيته اباوع مامصدكة اللي كدامي أسمر وليش اجى وطلب يشوفني ، وصلنا لمكان قريب البحر صف السيارة ونزلنا طلب مني اكعد بينما هو يجي ، رحت كعدت وهو راح تأخر ربع ساعة واجى كعد كبالي على المصطبة ، خلى بيني وبينه ماعون بلاستك بيه محار ، ابتسمت وباوعلته..

بسيل : شلون عرفت احبه ؟

مدنك يفتح بيه قدملي وحدة وكال..

أسمر : اعرف هواي اشياء عنج

بسيل : وهذا اجتهاد شخصي لو مراقبة.

أسمر : مو مهم ، اكلي واستمتعي بيه..

كمت اكل وعيوني على البحر ، كل شوية استرق نظرات منه وارجع اتنهد ، ما مصدكة هو يمي كاعد حسيت نفسي احلم لو بغير عالم بعيد عن عالمي.

كملت التفتت عليه طلع كلينكس من جيبه أشر على حلكي وكال..

أسمر : امسحي

اخذته منه خليته على حلكي مسحته ، باوعلي رافع حاجبه وسوة حركة بعيونه كلش حبيتها حسيتها غزل بدون كلام ، من شافني ركزت وياه أشاح بوجهه للجهة البعيدة عني..

بقينا ساكتين لفترة بسيطة بعدها سألته..

بسيل : عندك شغل هنا ؟

التفتلي بثكل وكال.

أسمر : منو ؟

بسيل : انت

أسمر : لا ماعندي.

بسيل : ها عبالي عندك شغل ، شعجب اجيت ..

أسمر : ضايج حبيت اغير جو..

بسيل : وهاي سيارتك اشتريتها ؟

أسمر : لا أجرتها ضجت من التكسيات ومن كثرت جياتي صرت اندل الاماكن وحفظت الطرق .

بسيل : اي صحيح.

أسمر : شلونج ؟

جريت نفس بحسرة تنهدت ودنكت راسي

أسمر : وين غبتي وليش طولت غيبتج خليتي بالي عليج ..

بسيل : انت مو ناسيني وما مار عليك اسمي ؟؟

باوعلي عاكد حاجبه خزرني ورجع باوع ليكدام ، جان كاعد رجل على رجل بعدها نزل رجله ودنك اخذ حصواية من الكاع وشمرها بالبحر ، رجع اخذ الثانية وكرر الفعل ، حسيته عصبي ويريد يفرغ عصبيته بهيج شي...

بسيل : اختفيت لأسباب تستحق مو لان اني ردت اغيب.

بدون ما يلتفت كال

أسمر : وهي ؟

بسيل : خيروني يا اما اتزوج كيان يا اما ارجع للؤي.

أسمر : وليش خيروج انتِ مو متزوجة؟ حسب علمي يعني .

بسيل : مو على اساس تعرف عني هواي اشياء ؟

أسمر : احجي بدون انقطاع جيتي هالمرة اساعدج واساعد اخوية ، الوضع جداً متأزم بالمزرعة ومحتاج تساعديني .

بسيل : اسألني واجاوبك قابل احجيلك قصة حياتي كلها..

أسمر: اهم سؤال اريد اعرفه .. صدك انتِ الي اخذتي لؤي من أسمار؟

ضحكت مستهزئة.

بسيل: كل عقلك تسألني هذا السؤال؟

أسمر: من كل عقلي واريدج تجاوبيني بدون استهزاء

تقربت منه تركت مسافة بسيطة بيننا وخليت عيوني بعيونه وهمست..

بسيل: انت شنو تشوف ؟ هايه العيون ممكن تغدر او تخون؟

باوعتلها وصفنت سبحان الخالقج كلت
شبحرت وشهلوست!
وكضيت ليالي هواي بيها ما نمت
وبنظرات عينها اني سكرّت
نزلت عيوني على الشفة ودگلها گلبي بلهفة
شتسودنت وشخربطت!
حجايتين بحضرتج احجيهن ما كدرت..
ظليت ساكت بس افزّ من ترمش وتلوي الرگبة ..

رفعت أيدي ولوحت كبال عيونه

بسيل: شبيك أسمر مو كاعد احجي وياك؟

نفض رأسه ورمش سريع وكال

أسمر: هاااااا

بسيل: شنو سألتك اني؟

مسح جبينه وحرك أنفه باصبعه التفت على الجهة البعيدة فرك إيد بإيد ورجع باوعلي

هزيت رأسي وكلتله

بسيل: شبيك؟

أسمر: جوعان..

بسيل: شنو ما ماكل ؟

خلى أيده على خده وكال كلمة وجرها

أسمر: من زمااااااااااان

ضحكت وكلتله

بسيل: يله نروح ناكل ..

أسمر: احنا وين جنا نحجي؟

بسيل: ارجع اسألني..

أسمر: لا.. اريدج انت تحجين حتى اشوفج مركزة وياية! بالج وياية!

بسيل: أسمر كلاواتك بطلهن

ضحك وكال

أسمر: هاي منيلج هذا الحجي ولج ؟

ضحكت ودنكت .. جان يعيط

أسمر: كافي تفاهة خلي نحجي جدّ..

بسيل: هو اني يا أسمر اني ؟

أسمر: قصدج اني تافه؟

بسيل: لا حشاك ما كلت هيج

خزرني وعكد حاجبه

أسمر: لا بسيل كلتي..

بسيل: اني رداً على كلامك كلتها بشقة مو قصدي شي وما راح اتأسف لان انت هم حجيتها ..

أسمر: ماشي بسيل ، احجيلي الي صار وياج

بديت أسردله من موقف الخيانة الى يوم زواجي وسفرنا من بعدها وضحتله المشاكل الي بيننا وعدم تقبلي للؤي

أسمر: شكد دامت فترة زواجكم؟

بسيل: من يوم طلاق أسمار لحدما انت راسلتني اول مرة، جنت توني منفصلة وبعدها صفى كلشي ورجع للعراق.

أسمر: ما اريد ادخل بتفاصيل حياتج بس صدمتيني بالي صار ليش ما وضحتي موقفج لأسمار؟

بسيل: حاولت، ما تصدكني..

أسمر: حسب كلامج حجيتيلها مرة وحدة وجانت بحالة عصبية ومنهارة عاطفياً المفروض منج ترجعين تحجين وياها من تهدأ ...

بسيل: أسمر انت شنو كاعد تحجي ؟ تعرف الي مريت بيه؟ اذا أسمار دخلت بصدمة واكو من اللي احتواها وطبطب عليها واساها وسمعها وبالنهاية خلصت من واحد عار
فأني انضربت وانهانيت انحرمت من دراستي انحبست بغرفة شفت الويل منهم ومن تعاملهم وقساوتهم وصل الحال بجوزيف جاب مشرط راد يشوه وجهي ، وشوف هذا الأثر..

وخرت الحجاب ورفعت شعري شوفته الأثر الي يم أذني

بسيل: ها شفته ؟ الأثر الي كاعد تشوفه ما صار هيج إلا سويتله عمليتين تجميلية وراد يكمل باقي وجهي لوما اغمى علية بعدما اخذني النزف، أخذوني للمستشفى وهناك اشتكيت عليهم وكلتلهم اخوية اللي سوى بية هيج حبسوه مدة اسبوع وبضغط من ماما وباقي اخواني خلوني اتنازل واطلعه بمقابل يكتب تعهد ما يأذنيني من رجعنا وكعدوا وياية ، جنت نفسياً وجسدياً تعبانة رجعوا عرضوا علية الزواج من لؤي ماعندي حيل وقوة حتى أرفض بعد، بقيت ساكتة من طلعوا اجتي ماما وحجت وياية كالت..

ماريا: اذا بقى هيج وجهج ما راح يتقرب منج اي رجُل..

بسيل: وعساهم لا تقربوا..

ماريا: غبية لشوكت اعلم بيج اقبلي بلؤي وخلينا نسافر اني وياج وهناك اعالجج ومنها تخلصين من أخوانج على الاقل هناك بس واحد يحاسبج

بسيل: وماكو طريقة ثانية للسفر إلا اتزوج لؤي؟

ماريا: هيج هيج راح يجبروج تتزوجين.. اقبلي بيه وخلينا نسافر ووعد مني زواجج يكون مؤقت..

بدون تفكير رفضت الموضوع بس بعدها تعرضت لحرمان من كل شي وبديت أذبل واتعب بإصرار من ماما واخوية الاصغر مني اقنعوني ، الزواج من لؤي هو وسيلة خلاصي من الظلم الي كاعد اتعرضله، فتحت الموضوع ويا ماما وطلبت منها تاخذني لبيت خالتي قبل السفر حتى اوضحلهم الي صار وابينلهم مظلوميتي ..

رفضت وكالت..

ماريا: أكبر غلط التبرير بهذا الوقت اتركيها للزمن وراح يتصلح كل شي من وحده روحتج وعدمها نفس الشي.

بسيل: أسمر جنت تعبانة لدرجة ما تتخيلها لهذا وافقتهم الرأي وتزوجته وسافرنا وكل مرة جنت اذكره بالي صار واوضحله كرهي وعدم تقبلي اله، حياتنا تأرجحت بين الجحيم والجحيم من اجينا هنا على الاساس نكعد ويا اخوية بنفس البيت تغير الحجي ، ما نكدر نكعد كلنا بنفس البيت لهذا لازم لؤي ومرته يطلعون طلعنا بشقة غير اللي شفتها انت ، اجيت هنا بعدما بديت اخذ كورسات لغة بعدها أشتغلت والمشاكل مستمرة بيني وبينه الى ان بيوم صارت مشكلة بيننا ضربته وضربني ترك بية أثر اخذته حجة حتى اشتكي عليه وفعلاً رحت اشتكيت سجنوه وبعدها اخذوا منه تعهد بأن ما يتعرضلي بعدما أجبرني اخوية اتنازل عنه
تنازلت بشرط وكلتلهم مستحيل أتقبل غير الي راح اكوله وهو اترك لؤي نهائياً، انفصلنا بهدوء ورجعت كعدت ويا والدتي وأخوية وبديت اكتشف اشياء ما انزل الله بها من سلطان، بس جنت بين اللي مصدكة واللي ما مصدكة الى ان بيوم من الايام اجاني أخوية الجبير دانيال وكال...

دانيال: اكو ولد صديقي عراقي حباب وابن ناس عائلته معروفة ويريد يتقدملج ..

جنت اصب بالغداء التفتت عليه مستغربة

بسيل: وين شافني حتى يخطبني؟

دانيال: شافج من جنتي رايحة للدوام..

وكعد يقنعني خوش ولد وحباب تعرفي عليه وبعدها اذا توالمتوا تتم الخطوبة

من بعدها طلعت وياه مرتين المرة الاولى رحنا لمطعم حجينا جان ولد مؤدب يحجي وياية بأخلاق بس المرة الثانية اللي اجاني واخذني بيها من الشغل احنا وبالسيارة طلب مني اروح وياه لشقته صار شُجار بيني وبينه وطلبت منه ينزلني رفض بالبداية بس من شاف إصراري وردت افتح الباب نزلني بالمكان الي انت شفتنا بيه هددته اكول لاخوية على الي صار تقرب وحضني وانت اجيت شهدت الباقي.

اما الفترة الي انقطعت بيها عنك عرفت اخوية لاعب قمار وخسران هواية ومتداين من كيان عرض علية بتوسل حتى اتزوجه مقابل يتنازل عن الدين رفضت واتصلت على اخوية الاصغر مني هذا متفهم احسن منهم عرض علية ارجع اتزوج لؤي من تنتهي سالفة دانيال بوقتها فقدت اعصابي وكمت اصيح وكلتله...

بسيل: يعني ماكو حل إلا لؤي؟ كل شي لؤي؟ عفية لؤي صار مثل الطماطة بكل جدر يرهم!

اقنعني من كالي بس هاي السنة واتخرج وأسافر اخذج نعيش سوى اتحملي بس هاي السنة ورجعتله ، بس يا أسمر هالمرة هو جان اذكى من عندنا سوى عقد الي يطلب الطلاق يدفع مهر للثاني بمبلغ معين بوقتها وافقت لأن اني اللي أصريت ارجع للؤي حتى اخلص من كيان وهاي اني صارلي شهور حياتي من سيء الى أسوء وبيوم اللي خابرتك جان جاي سكران وراد يجبرني نقيم علاقة حتى يصير عندنا طفل اخذت تلفوني ورحت لبيت اهلي واتصلت عليك ردت آخذ رأيك حتى تساعدني لان ما اعرف شنو اتصرف ثاني يوم صارت مشكلة لو ارجع للؤي لو للعراق ويا جوزيف وهسه اني اريد آخذ رأيك شلون اتخلص منه.

بقى صافن علية وكال...

أسمر: امج شايفة كيان ؟

هزيت راسي بلا وهمست

بسيل: ليش؟

أسمر: عجل شلون تطلعين وياه اذا ماكو خطوبة رسمية وعلى الاقل لو متعرفة عليه بالبيت..

بسيل: اللي صار حجيته الك واحنا بعائلتنا عندنا عادي اذا تعرفت على الشخص وحجيت وياه مرة او مرتين قبل الزواج بدون علاقة.

رجع سألني على جريمة القتل واكدتله جنت سكرانة بقى هواية يسألني ويستفسر آخرها كال..

أسمر: اللي اريده منج ترجعين للؤي

فتحت عيوني ردت احجي رفع إيده يسكتني

أسمر: اصبري خليني اكمل، تريدين تتطلكين بدون ما تخسرين شي؟ وترجعين علاقتج بأسمار ولؤي يتعاقب على اللي سواه بيكم وياخذ جزاته ؟

بسيل: شنو اسوي؟

أسمر: موافقة؟

هزيت رأسي بأي وهمست..

بسيل: ما باليد حيلة..

أسمر: امشي وراية ما راح تخسرين..

كمنا مشينا وحجالي شنو اسوي بالتفصيل وحتى شنو احجي ،بعدها رجعني لبيت اهلي قبل لا انزل التفتت عليه وهمست.

بسيل : بس شلون اقوي علاقتي بيه ، تدري بس انطيه وجه راح يسوي اللي يريده.

بقى ساكت ماحجى شي ، فتحت الباب ونزلت التفتت عليه لكيته يباوع ليكدام بعدها شغل السيارة
وراح، دخلت للبيت لكيتهم كاعدين سلمت ودخلت غيرت ملابسي بعدها كعدت وحجيت وياهم كلتلهم أريد ارجع للؤي انصدموا...

بقوا يسألون ويستفسرون شعجب اريد ارجع للؤي ؟وشنو الغاية ؟
فهمتهم اريد استقر لأن تعبت
هواي صار حجي ولغط حول الموضوع،نهيت الحديث اريد ارجعله وخلص.
ثاني يوم اتصلت عليه كلتله عندي موضوع وياك

سألني بخصوص شنو ؟

كلتله بس تجي تعرف ،حددت المكان اللي راح نلتقي بيه، وبعدها رحت للدوام.

كملت شغلي طلعت متوجهة للمطعم اللي اتفقنا نحجي بيه،دخلت لكيته كاعد ينتظرني، شافني ابتسم وعلامات الدهشة مرسومة على وجهه ،وصلت يمه سحب الكرسي وكعدت ..

من حجت جملتها الاخيرة ونزلت بقيت ساكت ما اعرف شنو ارد ،ردت انهزم منها ومن نظراتها ،حرگت والنار اشتعلت بداخلي ،ما اعرف ليش كلبي احترك ،وليش اغار مع العلم هي زوجته وما ألي حق اغار عليها ،وردت تساعدني وبس.

ثاني يوم دزتلي راح تلتقي بيه بالساعة الفلانية بالمكان الفلاني
قبل الموعد بساعة اني كاعد بالمطعم اجى هو كعد بعدي بنصف ساعة ،جان متأنق وحسيته فرحان ،عيوني طلعت من مكانها واني اترقب دخولها من الباب ،من دفعت باب المطعم ودخلت عيوني حضنتها وگلبي يدك وية مشيتها غرت احتريت وبردت،تعاقب الصيف والشتاء علية ،سحبلها الكرسي و كعدت ،اول ما كعد لزم ايدها ،ما تحملت تركت المطعم وطلعت وصلت لسيارتي وكمت اضرب بالتاير برجلي بقوة ،بعدها طلعت موبايلي اتصلت عليها ما ردت ،رجعت اتصل مرة واثنين وثلاثة وعشرة ،آخر شي كتبتلها

- اطلعي الاتفاق اللي اتفقناه انلغى...

صعدت السيارة وفتحت الجامة خليت عكسي على الباب وبكف ايدي غطيت حلكي وأصبر بنفسي أسمر لا تتهور ٠

بعدها طلعوا يتمشون سوا صعدوا تكسي وراحوا ،كمت أضرب بالستيرن وأسب بلؤي قررت اروح وراهم بس خفت يأذيها هو او اهلها اذا سمعوا بية..

بعدها قررت ارجع للعراق لأن ما تحملت بس قبلها لازم انهي هاي المهزلة ،رجعت للفندق غيرت ملابسي وطلعت افتر ،اريد اضيع وقت اريد اتعب حتى انام ،اريد راسي يفرغ من الافكار السامة ،اني وامشي اجتني رسالة على الموبايل سحبته من جيبي فتحتها لكيتها دازه ...

- ما سمعت إتصالاتك جان موبايلي صامت حاطته بالجنطة ،وبالنسبة للرسالة اللي دزيتها جوابي عالآتي ،

حياتي مو لعبة يا أسمر اللي صار صار خلينا مكملين ،عسى ولعلى نطلع بشي يفيدنا ويخلينا نتخلص منه للأبد.

ما جاوبتها اخذت بعضي ورجعت للفندق .

ثاني يوم اتصل صديقي معلم وياية على الوتساب ،وكال..

_ اسمر ارجع راح يكتبون مذكرة فصل بيك.

كلتله

-طز شنو يعني؟

-حرامات لا تضيع تعبك هيج ارجع ،انت وين اصلا ؟

بقينا نحجي ،بعدها اتصل علية المدير وكال ..

-اسمر ارجع جماعتك حرگوك بالتربية وبعد ما اكدر اتوسطلك ،الموضوع طلع من ايدي ..

اسمر : استاذ تعبتك وياية وراح ارجع احلها بأقرب وقت ..

ثاني يوم حجزت رجوع لبغداد وكتبت لبسيل ..

-راح ارجع للعراق صارتلي شغلة ضرورية يومين وارجعلج ...

-خوما صاير شي ؟

-لا عندي شغل ،ديري بالج على نفسج ...

بيوم السفر تركت اغراضي بالفندق ونطيتهم خبر يعوفون الغرفة محجوزة بينما ارجع .

رجعت وضعيتي كلها متدهورة حاس بنفسي مضيع شي ، طبيت للبيت سلمت عليهم نمت من التعب لان صارلي يومين ما نايم ..

ثاني يوم رحت للمدرسة قدمت استقالتي واخذت اوراقي ورحت للتربية ،كملت الاجراءات ورجعت للبيت ،مالي خلك احجي وية اي احد واللي زيدها رسالتها من كاتبتلي ...

-أسمر ما كاعد اطيق اللي صاير وياية ،راح اعوف كل شي ،شنو اسوي فهمني ؟

تركت الموبايل لزمت راسي يريد ينفجر من التفكير ..

شافني أرود سألني شبيك ما جاوبته
طلعت اتصلت على أنهد ،طلبت منه يدبرلنا سهرة بمكان ،عاجبني انسى كل شي

أنهد :اول تالي أسمر يدور سهرات .

أسمر : عاجبني اريد انسى كل شي ،و افصل عن الواقع..

أنهد : علاجك يمي ..

بعد ساعة وصفلي المكان اللي راح نسهر بيه ،صعدت سيارتي ورحت ،بيومها شربت حد الثمالة ،رجعت للبيت صارت مشكلة بيني وبين الولد تركتهم ودخلت غرفتي ..

ثاني يوم كعدت راسي يوجعني عيوني تطلع منها نار ،دخلت سبحت وكعدت ،اندك باب غرفتي صحت منو ؟

اجاني صوت إيساف ، صحت ادخل
فتح الباب وفات عاكد حاجبه قبل لايحجي همست ..

أسمر : اعرف بنفسي غلطان وعد ما راح تتكرر ..

حجيتها ودنكت راسي ،اجى كعد بصفي ربت على ظهري وكال..

إيساف : منو اللي وصلتك لهاي الحالة ؟؟ گولي عليها واخذ وعد مني ازوجها الك ..

فركت ايد بإيد وحجيت متفادي نظراته جنت خجلان منه ..

أسمر : منو گال اني احب وحدة ؟..

إيساف: وضعك ما عاجبني ،
سفرك كثران تكولي شغل وماعرف شنو هذا الشغل ،شربت اول مرة بحياتك ،وهذيت هواي بيها ،بس ما عرفت اسمها ..

أسمر : من تتهيأ الظروف اكولك عليها ،انطيني وعد تزوجنا مهما سمعت عنها ..

صفن بوجهي وبهت ..

إيساف : أسمر بس لا مو زينة ؟

أسمر : استغفر الله بس هي ظروفها عوجة وصعبة ..

إيساف : اعرفها ؟

أسمر : خليها بوقتها بس انطيني وعد رجال ما تعترض عليها ،اريدك انت تعقدلنا ،وادعيلها تخلص من اللي هي بيه لان واكعة بمشكلة وحياتها متعرقلة .

هز راسه وگال ..

إيساف: يصير خير يا أسمر وهاي اخر مرة تشرب بيها ،ترى والله اتبرأ منك كافي علية أنهد اللي عال قلبي ،تريد تكملها انت ؟

بقيت ساكت ما حجيت ،طلع إيساف ورحت لشغل أرود حتى أسأله شنو حجيت البارحة ،لان ما اتذكر شي ،
طبكت سيارتي بمكان شغله ونزلت ،دخلت كعدت يمه جان مستغرب وجودي بهذا الوكت وبدون مقدمات سألني ..

أرود : شنو اليوم ما مداوم ؟

بضيقة خلق جاوبته..

أسمر : ولا راح اداوم بعمري ،والفلوس اللي عندي راح اشاركك بيها ،شغلها عندك واللي يطلعلي ضمه ،عكد حاجبه باوعلي مخنزر ...

أرود : انت شنو اللي صاير وياك؟ ودوامك ليش ما تداوم ؟

أسمر : ذبيت استقالة ..

أرود : شنو شنو ؟عيد شنو كلت ؟

أسمر : ذبيت استقالة يعني دوام ماكو بشش بح ..

أرود : تخبلت ؟ دوامك عفته ،سكر وكمت تسكر ، ويومية مسافر ،شنو سالفتك ؟لايكون كل هالضياع بسببها ؟

بقيت اباوعله ساكت
رجع كال

أرود : عاد تسوى ؟

تجاهلت سؤاله وهمست
أسمر: شنو حجيت البارحة بس لا ذكرت اسمها .

أرود : هذيت بيها بس ما ذكرت هي منو ،حتى وانت سكران لوتي ونبه .

ضحكت وبقينا نحجي شوية ،بعدها رجعت للبيت ،حضرت كل شي حتى اسافر وبهاي السفرة قررت انهي كل شي بيها .

سافرت قسيت قلبي وبدينا ننفذ الخطة اني وياها .
اول شي خليتها تفتح موبايله بعدما خلتله منوم بالجاي اللي اني جبته الها ،اتصلت علية ..

بسيل : أسمر الموبايل بإيدي مفتوح شنو اسوي ؟

أسمر : خلي يمج أني جاي ،دقايق اتصل عليج وانزلي..

بسيل : ماشي ..

بعد دقايق اتصل اخذت الموبايلات ونزلت ،دورت عليه اباوع منا ومنا ماكو ،بعدها انحطت ايد على كتفي فزيت ،التفتت لكيته اسمر ظظ

بسيل : خرعتني عبالي لؤي

أسمر : لا تخافين راح يجرها نومة لباجر،شلونج ؟ زينة ؟

هزيت راسي ساكتة ..

أسمر : كاعد يأذيج احجيلي ..

بسيل :لا وهذا الموبايل كمل شغلك بيه قبل لا يطفى..

أسمر : بسيل لا تكذبين علية..

ما جاوبته وانطيته الموبايل اخذه مني وبقى يباوعلي..

أسمر : ليش تكذبين علية كلتلج ؟

بسيل : خلص شغلك بسرعة وخلصني منه ..

تنهد وطلع موبايله وبدا يصور اللي يريده ،وجان يفتح المحادثات وعاكد حاجبه ،مرة يسب بيه ومرة يصفن باهت ،بعدها كال متفاجئ ...

أسمر :أرقم أرقم !معقولة ؟لا مستحيل ..

انطاني الموبايل وتقيئ،تركت الموبايلات وركضت للشقة ،جبتله مي ونزلت وخليت بإيدي شوية غسلتله وجهه .

كعدت بمستواه خليت ايدي على كتفه وطلبت منه متوسلة يشرب المي ،هز راسه يعني ما اريد .

اصريت عليه أخذ الكلاص مني وداره على راسه بدون شعور منه وكع الكلاص وتكسر ...

كعد وارتاج بظهره على الشجرة ورجع راسه ليورا مغمض عيونه .

بسيل : منو أرقم ؟ وشنو مسوي ؟

لحيت عليه اكثر من مرة كام يصيح و يردد بكلمة كافي كافي اسكتي..

تركتها ورحت اتصلت على أرود كعدت تباوعلي من بعيد مكتفة ايديها ،تحاول تفهم شنو اللي كاعد يصير ..

أسمر : الو أرود وينك ؟

أرود : ها شبيك نايم

أسمر : كوم صحصح اريد احاجيك ..

أرود : صحصحت احجي ..

أسمر : لك أرقم بمساعدة لؤي دبروا الحادث لأسمار وأديم ،وعدا هذا اكو شغلات بيناتهم يريدون يسووها ..

أرود : مستحيل تتشاقى ..

أسمر :لا ما اتشاقى ،انت اشتغل من العراق واني اشتغل منا ،نجمع معلومات كافية حتى نكدر نثبت عليهم كل التهم

أرود : هو غير اعرف شكو حتى اثبت كل التهم..

أسمر : انت صدك تحجي ؟ لك بابا اخوك مجرم وحجي أسمار كله صحيح .

أرود : ولا اصدك ،ولا يفوت بعقلي اي شي من اللي حجيته ..

أسمر : هسه راح ادزلك واقرا ،وانصدم مثلي ..

أرود : يله دز دز ..

رجعت لبسيل واخذت منها الموبايل وجان بعده مفتوح بإيديها اخذت صور ودزيتهن لأرود ،رجعت گلبت بالموبايل لكيت بلاوي مهدد بنات بصورهن مقابل مبالغ مالية واللي عرفته خازنهن بفلاشات خاصة ،عدا اللي بالموبايل من دخلت على الصور لكيت صور البنات بس ،بعد ما صورت كل شي بتلفوني طلبت من بسيل تفرغلي الشقة وتتركلي غرفة نومهم مفتوحة ..

بعدها رجعتلها الموبايل ووصيتها تدير بالها على نفسها وباجر اخر يوم اخليها وياه،خفت عليها كلش..

ما انسى نظراتها الخايفة وهي تباوعلي قبل لا تدخل العمارة ،ليلتها ما كدرت ارجع للفندق بقيت افتر بالشوارع مرة اسوق ومرة امشي على رجلي ،ما مصدك اللي كاعد يصير ولا متوقعه..

ثاني يوم دزتلي رسالة ،كاتبه بيها

- تركتلك مفاتيح الشقة بالبوت الابيض على جزامة الاحذية ،وعندك ساعة وحدة بس حاول تستعجل بيها.

رحت للشقة اخذت المفتاح فتحت الباب ودخلت تفاجئت شلون الشقة نظيفة ومرتبة ،هزيت راسي وكلت شلون فرق البيت من بيه نسوان ومن يهجروه .

دخلت لغرفة النوم دورت بكل مكان بدون ما اخربط شي ،ما لكيت اللي اريده لا بالكنتور ولا بالكومديات ،اخر شي خطرت ببالي ارفع السرير وادور بالمخزن اللي جواه،رفعته لكيت جوه بطانيات ومفارش كلش هواية ،غيرها ما لكيت شي ،خطرت ببالي فكرة ثانية ادور بوسط اللحفان بالفعل بأحد الاغطية لكيت صندوك صغير بس مقفول اخذته حركته يم اذني وسحبت الموبايل دزيت رسالة لبسيل حاولي تتأخرون ساعتين ثانية..

_ كتبتلي ليش ؟

_كتبتلها بعدين تعرفين

اخذته وطلعت اشتريت اشياء تكسر القفل ،كسرته لكيت بيه فلاشات ورام .

الرام دخلته على الموبايل مالتي
لكيت بلاوي صور بنات فيديوهات هو وياهن وصوته من يبتزهن وهن يتوسلن بيه ،بس اللي استغربته البنات كلهن عراقيات من الارقام عرفت ،معناها يا اما جان بالعراق باقي يبتز بيهم ،يا اما هو هنا ويصادق يأمنون بيه وييتزهن

نسخت كل شي بموبايلي ،ورحت لأقرب مكان يبيع اجهزة الكترونية واشتريت لابتوب ،رجعت للفندق فتحت الفلاشات لكيت تسجيلات صوتية بينه وبين أرقم وأبو الحر وولد يشتغل وية أديم بالشركة ،مصدوم بس لازم اكمل بسرعة ،نقلت كل شي باللابتوب ،رجعت الفلاشات والرام بالصندوك ورجعت للشقة مالتهم ..

رجعت الصندوك بنفس المكان رتبت الغرفة ،قفلت الباب وخليت المفتاح بمكانه وطلعت دزيتلها رسالة ..

-بسيل عندج شي مهم بالشقة لو لا ؟

- ليش ؟

-بدون ليش جاوبيني ..

-ما عندي بس ملابس ..

-مستمسكاتج ،والجواز وين ؟

-بغرفتي ببيت اهلي ..

- حاولي تطلعيلج شغلة وتنسحبين من لؤي ،وتعالي بنفس المكان اللي كعدنا بيه يم البحر ..

- ماشي ،اشوف طريقة وانسحب منه ..

- انتظرج ..

بعدها رحت للبحر انتظرتها بعد نصف ساعة يله اجتي فهمتها بعد ما ترجع للشقة لان لؤي خطر ومجرم لا يروح يأذيها ..

هزت راسها ساكتة .

أخذت كل المعلومات اللي اريدها وبعدما تطمنت على بسيل رجعت لأهلها ونفذت الاتفاق اللي بيننا...

وهو تبين روحها مريضة وما تكدر تروح حتى للشغل ،وطلبت منها تبطل منه وامشيلها راتب شهري ،رفضت بس من كلتلها تخسريني ،وافقت مجبورة .

رجعت للعراق وبدينا نشتغل اني وأرود بسكتة بدون ما ابين لأي أحد اني عندي معلومات ،تخص هاي العصابة
بعد فترة من التحريات والروحة والجية انخطف أديم التهيت بشغلته وبقيت اساعد سمرة ،بعدها بفترة بسيطة صارت مشكلة لأرود وخفيناه عن الشرطة لحدما نتأكد منو اللي حاط المخدرات..

بقينا اني وأسمار نتعاون حتى نوصل لبقية الحقائق الي تدين أرقم و بنفس الوقت ما بينتلهم اني اعرف شي ، جنت ساكت على أعصابي أقل حجاية او موقف يصير بيني وبين ارقم اريد بس اتعارك.

بعدما رجع أديم وسمرة صارت زينة دزيت رسالة للؤي من حساب ما معروف بيها جزء من الاشياء الي هو مصورها بينه وبين البنات وكتبتله..

_ اذا تحب ادزلك باقي الاشياء تتفرج عليهن وأجي للدولة الي انت ساكن بيها بالعنوان الفلاني مكان شقتك وياية الأمن بعدما اعرضلهم كل مصايبك، واذا تكولي شنو المطلوب ؟ اول شي تطلك بسيل وثاني شي ترجع للعراق.

بعد ساعة كام يتصل ما جاوبته كتبلي..

_ انت منو وشنو رايد مني؟

كتبتله..

_ معليك بية منو ، قابل تريد تتعرف!
سوي الي كلتلك عليه وانت ساكت.

_شكد تريد فلوس انطيك بس ألغي ذني الطلبين..

_ شنو اني أكدي منك لو محتاجك؟
ألك اسبوع واحد تطلك بيه بسيل وترجع للعراق غيرها انشر كل شي واجيب الأمن فوك راسك وتخيس بالسجون اللي برا.

_ ليش تريدني اطلك بسيل شنو السبب؟

_ العليك تنفذ بدون ما تسأل، يومين وتدزلي ورقة الطلاك مُصورة وبعدها ترجع للعراق.

بعدها دزيتله صورتين مستفزات وغلقت الجهاز .

يومين وفتحته بالوقت الي كلتله يدزلي ورقة الطلاك، اول ما دخلت للحساب اجتني إشعارات..

دازلي ورقة الطلاك وكاتبلي ..

_بسيل طلكتها الطلب الثاني اعفيني من عنده، هنا أسست شغلي وحياتي مستقرة.

_ماشي ثلاثة أيام واني فوك راسك تغير مكان سكنك، اجيك للشغل..

_ ليش تريدني ارجع غير اعرف!

_ عندي ملفات وياك أريد اسدها وانطيني خبر بوقت رجعتك.

_ تريد فلوس مقابل تحذف كل شي وتعوفني بحالي؟

_ اي بس بشرط تسلمهن وجه لوجه.

_ ومنو يضمنلي ما راح تغدر بية؟

_ مجبور تصدك ، وشوف اول فضيحة راح تنزلك على اليوتيوب.

وذكرتله اسم القناة..

_ لا تسويها ، اني راح أجي واذا سويتها اقاضيكم انت والقناة..

_ تعرف كلش زين القنوات تشتري الفضايح شراية حتى تجيبلهم مشاهدات.. فليش يا عيني تخسر سمعتك وفلوسك ومركزك وتالي تنحبس، تعال هنا وخلينا نتفاهم.

_بس ما راح ألحك أجي بهذه الثلاثة ايام بعدني ما حاجز..

_ لا ، تلحك

وراها سديته من عنده وفتحته قبل يوم من الموعد كتبتله..

_باجر اي ساعة رحلتك؟

_ما لحكت على الحجز.. انتظرني خمسة أيام وأجي.. هاي اقرب رحلة

_ خليك بمكانك اني جاييك.

بقى يتصل وأفصله بوجهه، آخر شي كتب..

_ هذا هو باجر جاي..

_ اي عفية هيج اريدك حباب.

سديته من عنده وبعدها رحت لصديقي الضابط حجيت وياه وقدمتله الأدلة الي تدين لؤي بس ،عدا أرقم لان أرقم محتاجه بشغلة أرود اريد اتأكد من كل شي يله.

اتفقنا ننطي أسمه لشرطة المطار اول ما يوصل يلزموه..

رجع لؤي ولزمناه وبشرت سمرة بهذا الخبر ورتبت وضعي بالمزرعة وكدرت آخذ كم يوم اروح بيها لبسيل.

بعد مرور فترة من الزمن والتواصل الدائم بيني وبين بسيل وبعدما انتهت فترة العدة مالتها، قررت أخطو خطوة جريئة.. سافرت وألتقينا بعدما حجينا هواية وكررت علية نفس الأسئلة من ضمنها هذا السؤال..

بسيل: شلون كدرت تخليه يطلكني خلال يومين ويتنازل عن كل شي وفوكاها رجع للعراق واني كلت مستحيل يرجع بعد اللي خسره برجعته السابقة من جنا منفصلين وعلى الإساس يرجع لأسمار؟

أسمر: مثلما لعبنا عليه ذيج المرة هاي المرة اللعبة جانت حقيقية وما جان نحتاج نتحايل عليه بيها، هددناه وسوى الي نريده وهسه هو أخذ إستحقاقه عوفج منه واسمعيني اني اريدج على سُنة الله ورسوله راح نعقد وبعدما تتصافون انتِ وأسمار ويتوضح كل شي أسويلج عرس الكل يحجي بيه..

بقيت صافنة عليه مصدومة جان يطقطق بأصابعه متوتر يفرك بكفوف إيديه وبعدها ينفخ بيهن لان باردة نزلت عيني على رجله الي جانت تهتز بقوة بعدها كال..

أسمر: اذا طلبي غريب وما رايده هذا الشي اعتبري نفسج ما سمعتيه.

بسيل: بس انت تعرف حياتي والمشاكل اللي بيها وموقف أسمار إتجاهي ومستحيل راح تتقبلني بحياتكم ..

أسمر: اذا على أسمار اني راح احجيلها كل شي بالوقت المناسب ومتأكد راح تتفهم لان هي عقلها جبير وكلبها سمح ومستحيل تظلم أحد بعدما تعرف الحقيقة..

بسيل: صعب هذا الشي وما أعتقد راح يتم بسهولة وبعدين اني ما أريد اتزوجك بالسر..

أسمر: بسيل مو بالسر أخوية راح يعقدلنا وأثنين من إخواني يكونون شهود..

بسيل: وأهلي شلون راح نقنعهم؟ وامي ؟ واقدمك الهم بصفتك منو وشلون تعرفت عليك؟

أسمر: خليها علية بس انطيني الموافقة..

دنكت راسي وهمست..

بسيل: اكون أكبر غبية إذا رفضتك أساساً اكو شي بداخلي لحد الان ما اعرف شلون افسره بس الي اكدر اكوله هو شي حلو ومن اتذكرك تتقلص معدتي من الفرح..

أسمر: هذا حب يا بسيل.

بسيل: ما اعرف.. ما اعرف.

أسمر: بس الي اعرفه من اني وياج اتحدى كل شي وبدونج يهزمني اي شي ، تدرين طيلة الفترة اللي مضت جنت أفكر بيج وبوضعج أغار واحترك لدرجة الموضوع تجاوز البوح بس كل شي بية جان مشتعل وكل يوم أتسائل واني على السجادة شنو الي سويته بحياتي حتى أبتلي بيج.. وبسحر عيونج..

انتِ يا بسيل فتنة ، تصدكين آخر مرة اتذكر نزلت دموعي بصلاة الليل ودعيت يارب اني أحبها واذا صارت الية اخجل اطلب منك شي غيرها..

بقيت ساكتة ما اعرف شنو احجي بحرت بإبتسامته وملامحه..

بسيل: الي اطلبه منك تكونلي حب ما ينتهي.. بس برأيك راح يسمحون ننجمع ونظل سوية؟

أسمر: اتمنى ما تفكرين بيهم ،اني راح أحلها.

بسيل: تمام.. موافقة

إبتسم إبتسامة وصار وجه يشبه القمر..

بعدها حجيتله إختلاجات نفسي من جنت أفكر بيه من تقلص بعضلات جسمي وأهتزاز سريع وبطيء للعضلات وما اكدر أسيطر عليها لدرجة احس اكو اضطراب بعقلي اللي هو اسمه أسمر..

أسمر: يا غرابة قصتنا ، يا غرابة الصدفة الي جمعتنا.. هسه احنا بسنة ٢٠١٩ واني اعرفج من ٢٠١٤ .. مرات اصفن شلون صبرت كل هذه الفترة وما اعترفتلج بحبي وجنت أعرف انتِ تبادليني نفس الشعور ويمكن أكثر..

بقينا نحجي هواية مُبحرين بتفاصيل بعضنا ونهينا الحديث بتحديد موعد احجي ويا اهلها بيه.

أخذتها ورجعتها للبيت لوحتلي بإيديها فرحانة تضحك مثل الأطفال أبتسمتلها وراحت دخلت..اتصلت على أديم
حجيتله الي صار بتفاصيله انصدم وكال..

أديم: تتشاقى أسمر مو ؟

أسمر: لأول مرة بحياتي اطلب منكم شي واريد وكفتكم ..

أديم: يعني الموضوع حقيقي؟

أسمر: اي..

أديم: اذا انت حاسمه بعد ليش جاي تسألني؟

أسمر: اريد وكفتك وياية..

أديم: اطلب اي شي غير هذا ،اعذرني ما راح اكدر اساعدك بيه..

اسمر: ليش ؟

أديم: انت اكثر واحد من بعدي تعرف أسمار شنو عانت بسببها ، ما فكرت شلون راح تستقبل الخبر اذا عرفت؟

أسمر: ما راح اكدر احجيلك كل التفاصيل هسه بس الي أكدر اكوله، بسيل مظلومة وكل الي صارلها بسبب اهلها وأجى لؤي كمل عليها.

ظليت احجي وياه الى ان اقتنع..

أديم: ما راح اباركلك هاي الخطوة إلا برضى أسمار وتقبُلها..

أسمر: طبعا.. ما راح اتزوج اذا مو أسمار تقتنع وتوافق يله أجيبها..

أديم: عجل مو راح تخطب بدون علمها ؟

أسمر: الوضع ما يتحمل احجي شي هسه، كاعد تشوفها حامل وتعبانة ووضعنا بالمزرعة ابد مو طبيعي وبنفس الوقت ما اكدر اعوف بسيل هنا وحدها لان اهلها مو خوش آوادم راح ارجعها للعراق واشتريلها بيت هي وامها يسكنون بيه حتى أأمن عليها،
أديم اني بين نارين ،واتمنى تحجيله لإيساف بالي فهمتك عليه وتتصلون علية بالليل.

أديم: ماشي ، بس بشرط اول ما ترجع تحجي لأسمار.

أسمر: اي..

أديم: وعد؟

أسمر: وعد رجال.

بعدها راح وحجى ويا إيساف واتصلوا علية وانهالوا علية بالحجي والإنتقادات هو يرفع وأديم يكبس.

صحت بصوت..

أسمر: أديم اني مو فهمتك؟

أديم: الشغلة كلها غلط وما عاجبتني، ومنو يكول حجيها صحيح احتمال تكذب عليك؟

أسمر: اني مو غبي وتجي تضحك علية بكلمتين عرفت قصتها كلها وبالأدلة لا سنة ولا سنتين من اني اعرفها وبعدين يا إيساف انت وعدتني تعقدلي من يصير الوقت المناسب وتتهيأ الظروف.

إيساف: برأيك هذا وقت مناسب؟

أسمر: اعرف مو مناسب لهذا اريد بس تعقدلي حتى تكون عندي سلطة عليها، واتحكم بمصيرها بدون ما نلجأ لأخوانها والصراحة اني اريد احميها منهم..

من بعد حوار تجاوز الساعتين ونصف أخذت الاوك منهم.

صار الموعد اروح اتعرف على أهلها واطلبها منهم ورحت

بالبداية كالت نحجي ويا ماما نقنعها يله تحجي ويا اخوية، لكيت بس امها سلمت وكعدت عرفتها عن نفسي وتخصصي وشغلي وشنو عندنا أملاك ،ركزت كلش هواية على الفلوس وشلت الأخلاقيات خليتها على صفحة لان اعرف ما تستهويها الي رضت بلؤي ورحبت بكيان هذه ما تدور أخلاق من جنت احجيلها اشوف لمعة بعيونها منبهرة وهي تستمعلي ما سألتني عن تفاصيل عائلتي شعندك أخوان وخوات والخ…

واذا جنت متزوج سابقاً او لا لان اللي بعمري المفروض متزوجين وأولادهم بطولهم ، لهذا ما طرحت موضوع أسمار وعرفتها على ان هي زوجة أخوية كلت نعقد وأضمن بسيل يله احجيلها.

ماريا: اني ما عندي مانع بس لازم نشور أخوانها..

أسمر: ماعندي مشكلة انتظر منكم خبر..مع السلامة

ماريا: مع السلامة

وصلتني بسيل لباب الشارع دنكت لبست حذائي بتك إيد وكفت كرصت حنجها بأيدي الثانية وكلتلها..

أسمر: يولو شنو هالجمال؟
أجيت أخطبج وهيج أحلويتي، بالعرس شنو راح تطلعين؟

ضحكت ودنكت راسها بدلال

طلعت من بيتهم وبداخلي خليط من المشاعر والأفكار.. فرحة لان راح تصير الية وخوف من ردة فعل أسمار اذا سمعت خفت أخسرها ..وأشمئزاز من اهلها خصوصاً بالحديث الدار بيني وبين أمها.

صعدت سيارتي وتوجهت للفندق سهرنا نسولف اني وياها ..

قريب الفجر كلتلها ..

أسمر: روحي نامي ما اريد عيونج الحلوة تذبل
سدته وراحت
وره يومين أتصل علية اخوها من رقم غريب وطلب مني نلتقي برى البيت استغربت طلبه بس وافقت

التقينا وكعدنا بمكان بالبداية جان نافخ روحه وديننا ودينكم ووضعنا هنا شنو واحنا بالعراق ناس معروفة وما ننطي إلا لناس نعرفهم.

أسمر: خلص اسألوا علية وعلى اهلي احنا معروفين من ناحية الحسب والجاه واصغر واحد بينا عنده أملاك وسيارة وشغله الخاص خاف تريد تحجي وياية بالمادة كاعد اوضحلك..اما عن اخلاقنا الأخ الكبير على درجة عالية من العلم والوسط شيخ دين والأصغر طالب قانون والي بينهم كلهم قسم لغة عربية عدا واحد هندسة واذا تحب تسأل تفضل بأي يوم.
سألني..

دانيال: شعندك هنا وشلون تعرفت عليها؟

أسمر: اني تاجر بالعراق واجي هنا أشتري اجهزة الكترونية وارجع ابيعها شفتها بالصدفة طالعة من دوامها وتبعتها سألت عليها وعرفت بيها خوش بنية..

وفعلا هاي شغلتي اني وأرود جياتي لهنا كمت أستفاد منها اشوف بسيل وأتطمن عليها ونفس الوقت نشتغل..

دانيال: وشكد مهر تكتبلها؟

أسمر: الي تطلبه على لسانها أدفع

دانيال: ما نسمحلها تحجي، حاجيني الية

باوعتله بعين صغيرة وعرفت قصده شنو يريد بس طولت خلك كلتله

أسمر: شكد تطلب مقابل تنطيني أختك؟

دنك راسه وفر أصابع الإبهام باوعلي وكال..

دانيال: اللي راح أطلبه من حاضر وغايب يندفع قبل الزواج..

بضحكة مستهزء كلت..

أسمر: وهاي ضمن العادات والتقاليد لو بس علية تمشي! على العموم هذا هو متفقين ..بس تريد هذا الشي بعلم بسيل لو عدم علمها ؟

دانيال: مو ضروري تعرف..

أسمر: ماشي..شوكت راح تبلغ باقي أخوانها؟

دانيال: قصدك أخواني؟

أسمر: ما نختلف.. حددلي يوم حتى أجي اعقد عليها..

دانيال: أسبوع ويوصلك الرد.. بس مبدئياً موافقين

أبتسمت وتركته، رجعت للفندق والأفكار تتضارب براسي ليش طلب ياخذ المقدم والمؤخر مالتها!

اتصلت عليها وسألتها..

أسمر: بسيل دانيال بعده مطلوب وفك الدين مالته؟

بسيل: قصدك مال القمار؟

أسمر: اي..

بسيل: هو انحبس فترة وصديقه طلعه بكفالة وكتب تعهد ان يسدد المبلغ على شكل اقساط حسب راتبه..

اسمر : شلون يصير

بسيل: ما اعرف هذا الي سمعته صدك جذب ما ادري ،ليش صاير شي؟

أسمر: لا سلامتج

مرّ الأسبوع ردولي خبر الموافقة اتفقت ويا إيساف وأرود وأديم يحضرون العقد مالتي عن طريق التلفون حتى إيساف يعقدلي وأديم وأرود يشهدون بس ما جنت حاس بيهم فرحانين دخلت لبيتهم خليت باقة الورد على الميز وياها كارت مكتوب ييه..

"تسقط من الشفة العليا أشواق ملتهبة وعلى السفلى ينتحر جليد صبر وجمرات أنتظار ...

هذا أقتباس قاريه في كتاب وخليته ببالي اول ما اخطبها اكتبه الها بس ما حددت الطريقة...

حظروا العقد جوزيف ودانيال وامها ومرة أخوها وبعدين هي دخلت لابسة ثوب أبيض قصير وضايف لجمالها سحر ما ينوصف، سلمت وكعدت حجينا تفاصيل هواية ضمنها الحاضر والغايب جان مبلغ جبير انصدمت هي ورادت تحجي رفعت أيدي على حلكي وأشرتلها أش بدون ما ينتبهون علينا، اتصلت فديو على إيساف جانوا كاعدين بالقاعة الخلفية اللي بالمزرعة وجوههم ما تتفسر يتسابقون بالخزرات والتأفأف لزمتني الضحكة ونصيت الصوت حتى لا يسمعوهم خزرت أديم وأرود نسيت أديم ما يشوف اكول شبيه باقي يتأفأف، أرود هز أيده وغمني
أشر على عيونه أثنينهن بأصابعه والتفت ناحية أديم ...

الي فهمته من حركاته يعني أخوك ما يشوف ليش متعب نفسك وتخزر بيه، أشرت لأرود ..بسيطة وهمست ..اني اعلمك.

من بدأ إيساف يحجي بكليشة العقد المعهودة رفعت الصوت بعدها وجهلي سؤال وكال..

إيساف: شكد الحاضر والغايب؟

تحمحمت وذكرت المبلغ

بحركة لا ارادية ثلاثتهم صفكوا وغموني ..

واني ظليت بس اخزر خايف يخربوها حولت الموبايل على السماعة وكمت اسمع شنو يحجون بيناتهم لان جانوا أعصاب ويفورون..

اللي يكول يا ريتها تستاهل والثاني يكول طمعانة بيه وأديم كال اني ما راضي على الزواجة كلها كتبت لأرود..

أسمر: كول لأخوانك اذا ما عقدولي اكضيها سُكر وعربدة وبعمري ما راح اتزوج..

أديم جان يباوع على أرود بعدين التفت ناحية الكاميرة جان يكول

أديم : ابن ال…… ادري شبيك متوازي عليها؟لو بعد محد تقبل بيك!

كتبت لأرود..

أسمر: أحبببببهااااااا .. والفلوس اني اللي راح أدفعها ما ماخذ من جيب أحد

بعدما كاللهم أرود حجى أديم وكال..

أديم: عقدوله طبه مرض فلوسه وما تعبان بيها.

بعد معاناة وجر وعر عقدولنا.

بعد العقد كمت كل يوم اروحلها نطلع نتسوك للبيت وردت اخذها اشتريلها ملابس رفضت التفتت عليها وهمست..

أسمر: ليش يا عيني؟

بسيل: لحد الآن اني زعلانة منك..ليش قبلت هالكد تدفعلهم ؟

بقيت صافن بوجهها واتأمل ملامحها بعدها همست..

أسمر: شلون عرفتي؟

بسيل: عرفت.. ماكو شي ينضم

أسمر: لأجل خلاصج منهم مستعد ادفع كل شي أملكه..

بسيل: ما مجبور.. هذا تعبك تنطيه لناس ما تستاهل ونايمة للظهر

أسمر: تفداج الفلوس وصاحبها..

بسيل: لو سائلني قبل ما اتفاجىء جان رفضت وحتى لو نعقد بدون علمهم وصدكني تكفيني باقة الورد والعبارة الي كتبتها..

أسمر: ما أريد تخسرين اهلج بيوم، هاي دنيا ما معروف شنو ضامتلنا من أقدار، اليوم أسمر موجود باجر ما راح تلكيه.

سحبتني لحضنها وكالت..

بسيل: عمري يفدى عمرك، والله لا يعيشني يوم واحد بعدك يا حبيب روحي.

حضنتها بقوة وكمت اشتمها، الى ان وكفنا كبال محل ملابس طلبت منها تنزل حتى اشتريلها، رفضت وظلت تكول لا .. ولا.. آخر شي ختمتها..

بسيل: نص الملابس الي جنت تدزها وتجيبها من تجي لحد الآن ما لابستها

تجاهلت كلامها ونزلت اخذتلها كم قطعة ورجعتها للبيت ....

بعدها رجعت للعراق وبقيت فترة يلا سافرتلها لان اشتاقيتلها ، وبيوم عرفت أخوها مسافر هو وزوجته وبس هي وأمها بالبيت رحت تسوكتلهم وجانت الدنيا تمطر تبللت وبعدها بردت بشكل لان ملابسي جانت خفيفة رحت لبيتهم دخلت المسواك تقربت حضنتني

شهكت وكالت..

بسيل: أسمري ، ملابسك مبللة ..

أسمر: مو مهم هسه تنشف ...

بستها من خدها وكعدت يم التدفئة نزعت بلوزي شريته قريب منها ..

بعدها حسيت بألتصاقها بظهري التفتت وضميتها بحضني ،كطعت اللحظة امها من فاتت بدون ما تطرق الباب وخرت بسيل بس ظلت حاضنتني رفعت راسها طبعت قبلة بعنقي ، ابتسمت ومسدت شعرها همست بأذنها..

أسمر: امج دخلت علينا وخرتج ما وخرتي تالي طلعت وسدت الباب.

رجعت حضنتني بقوة وهمست بأذني

بسيل: أسمر اكدلي الي كاعد نعيشه حقيقة وقواية العقلية سليمة وانت بالفعل موجود كدامي..

رفعت وجهها قبلتها بقوة وشغف حسستها بضعفها وهمست بأذنها..

أسمر : هسه صدكتي...

كامت تهذي بعدها بعدتها عني وهمست.

أسمر: ملابسج تبللت روحي بدليها حتى ما نتمرض أثنينا رجعت كعدت يم التدفئة واتذكر اللحظات واني مبتسم
راحت غيرت ملابسها واجتي جايبتلي كاسة شوربة طلبت آكلها بينما يصير الغداء..

كعدت آكل وكل شوية أرفع عيني الكاها تباوعلي غمزتلها مبتسم..

أسمر: بسيل كعدي راحة لا آكلج قبل الغدا..

ابتسمت ورفعتلي حواجبها

اشرتلها تجي وأجتي..

كعدت بصفي وحضنتها بعدها طلعنا فيلم وتابعناه اشتد المطر برا وحتى عواصف صارت..

تغديت حسيت راسي ثكل نمت شوية اجتي غطتني ومسدت شعري وراحت، كعدت داخل علينا المغرب حسيت بنفسي تعبان وجسمي يوجعني اخذت بلوزي لبسته رغم بيه رطوبة قليلة واتصلت عليها اجتني..

أسمر: بسيلات، اني رايح

رحت كعدت يمه وهمست.

بسيل: وين رايح ؟ الجو كلش سيء ودرجة الحرارة حيل منخفضة

ابتسملي ولوى رقبته وهمس..

أسمر: والمطلوب يا ست؟

تحمحمت وهمست..

بسيل: بات الليلة يمنا..

أسمر: ما يصير ..

بسيل: هو شنو اللي ما يصير بهذه الأثناء دخلت ماما جايبة جاي النا ثلاثتنا اخذته منها وزعته وكعدت..

باوعت لماما وكلتلها..

بسيل: ماما هذا أسمر يريد يروح والجو كلش مو زين!

ماريا: ما ظل شي للصبح بات هنا واطلع باجر

أسمر: ما اكدر واريد اكعد من وقت حتى احجز و ارجع للعراق..

ماريا: اي مو مشكلة اطلع من عندنا روح أحجز واطلع..

من بعد ألحاح ماما وإصراري بقى..

حسيت راسي صدك ثكيل وحلكي بيه مرورة عرفت نفسي تمرضت مددت وتغطيت وطلبت من بسيل تجيبلي غطى إضافي بعدما طلعت أمها.

جابت الغطاء وطلبت مني اكوم حتى تفتح القنفة واخذ راحتي بالنوم بعدها نمت غطتني وتحسست جبيني وهمست..

بسيل: أسمر انت مصخن!

هزيت راسي مغمض عيني بمعنى ادري..

طلبت منها تطفي الضوء حتى أنام، طلعت واني نمت.

فزيت بالليل جنت مصخن حسيت بثكل على إيدي فتحت عيوني بتثاقل لكيت شي بحضني وحاضني جنت كل يوم أحلم المسه احتاريت وين اباوع لثيابها، لو للفاف الستان اللي يحاوط رقبتها لو أنفها الوردي اللي عاكس عليه ضوء المدفئة لو ذراعها شلون محاوطة بيها خصري حسيت بيها رادت ترفع راسها عرفتها كاعدة غمضت عيوني وكامت تتحسس عنقي بأنفها حضنتها وخليت راسي على صدرها سمعت دكات قلبها تنبض بقوة سحبت اللفاف من رقبتها نزعتها الروب وسحبت الآسقي مال الثوب بعدها اختلطت أنفاسنا ودمنا وصرنا واحد بس الصدمة اللي شلتني وخلت عقلي يوكف من عرفت بيها بعدها باكر..

يتبع...

متابعة ممتعة والبارت جدا طويل...
😘

https://www.youtube.com/watch?v=EE6-6dI1V8c