رواية أحببته كما هو الفصل الأول 1 - بقلم رسل طالب

عندما نعشق فأن الكون يتوقف حولنا وكأن من نعشقهم هم المخلوقات الوحيدة على وجه هذه الارض ...
..................... .......................   .....   
ضوجه ياربي
شكو شبيج بس تبجين ؟
ولج مليت بس اقري وداومي ونامي واكلي ..
ولج احمدي الله تعالي شوفي حالي بيت ورجال وجهال ولج القرايه مشايفتها شنو😑

عابت شبيج فوك متواسيني😣

ولج هذا بطر يسمو مو ضوجه 😥

اووف اسكت احسن كل ما احجي هيج سوين بيه 😶

قلبي رنوشتي والله اعرف انتي ضوجتج مو من الدراسة بس حاولي تنسين هالموضوع لتظلين هيج.

اووووف يا اسوو والله صدكتي داحاول والله المستعان .

يله امشي نروح للنادي اعزمج على فنكر 😊

اييي فنكر حُبنا هههههه 😍( الفنكر جانت اكلتنه المفضلة اني وصديقتي اسوو بالكلية).

نسيت ما عرفتكم بيه 😎
(اني رنا مواليد 88 طالبة كلية مسائي شكلي عادي حنطية وعيون عسلي طولي 164 وزني 70 طبعا غير متزوجة ، اما صديقتي اسراء فهي 89 اصغر مني واضعف مني واقصر بشويه مني سمرة وعيونها كبار حلوات وضحكتها احلى بعد وطبعا مزوجه وام لطفلتين يخبلن😍)

بلا زحمه اريد فنكر اثنين

مو تدللون ...

شكد غثيث هذا ابو النادي

لج شون وياج امشي اكعدي هناك واني اجيبهن واجي ..

يسلمو يا احلى اسو بالدنيا 😍

كعدت على ميز يصير بوحده من زوايا النادي حتى ناكل براحتنه ونقلد ( بنات بعد لازم نحجي بلبس هاي وسوالف ذيج😂)
طلعت الموبايل وداكلب بي ..

بس بلا زحمه اريد هذا الكرسي ممكن؟

رفعت راسي داشوف منو 🤔عفوا هذا محجوز مو ممكن ..

على كيفج هو كرسي بلاستك قابل شطلبت كرسي البرلمان 😏

صدك ضحكني بداخلي بس كتمت ضحكتي وحاولت اوضحله انُ اني ضجت من اسلوبه : لا اخي لا برلمان ولا غيره بس صديقتي هسه تجي.

اوك شكرا.. راح بس ما جاوبته.

ها ولج هذا منو ؟؟ واحد سليط اللسان راد الكرسي وما قبلت اني ..

ايي وشكالج لعد؟؟
كالي كرسي البرلمان على كيفج 😑
اسو هنا وكعت من الضحك عليه : خرب ببليسج ادري غير تحجين وياه باسلوب شعندج عركه وين احنه باب الشرجي؟؟

يبو والله مو صوجج صوجي اني عود خايفه عليج وين تكعدين😔

لا ولج داشاقه يله خلي ناكل راح يبرد الفنكر ورانه محاضره ترى ..

الا تذكريني .. دخلي ناكل بالاول وبعدين نكدي عليه بسالفة المحاضرة..

بلشنه ناكل والهوسه بالنادي بدت تقل شكلها بدت المحاضرات..
طلعنه بسرعه من باب النادي ومشينه بالممرات مقابيل النادي وهم بيها مساطب فشفته كاعد على وحده من المساطب ويباوعلي بضوجه.. ما اهتميت اله وكملت مسيرتي للكليه وكالعاده دخلنه بالمحاضرة ما افتهمنه شي وطلعنه هي راحت لبيتها لان بيتها قريب عالجامعه فتروح مشي اما اني فصعدت نفرات للبيت.

وصلت للبيت ولكيت امي الله يحفظها بالمطبخ محضرة الغده وتنتظرني ارجع .

السلام عليكم .. هلا يمه شو تأخرتي برجعتج اليوم؟؟
يمه غير ازدحامات شسوي هاي بغداد وشوارعها مو تعرفين😔

يله بدلي ونزلي اختج اجتي من زمان من المدرسه بس ما خليتها تاكل كلتلها ننتظرج ..
فدوة لقلبج الطيب يا أحن أم بالدنيا .. بستها من راسها وصعدت ركض بدلت ملابسي ونزلت للمطبخ نتغده.

كملت تنظيف البيت والعصر خابرت اسو ضلينه ندردش شويه وقرينه شويه وسديته .

فتحت النت وظليت اتصفح تقريبا صار المغرب بعد ما كدرت افتح عيني من التعب والنعاس فنمت من ال8 ما كعدت غير على صوت امي ..

رنا ... يمه رنا اكعدي صارت ب7 الصبح شوكت تطلعين.
كعدت بسرعة ونزلت ركض غسلت وجهي وفرشت اسناني وصعدت ابدل كملت ونزلت ب7 ونص .. يمه متاكلين شي : لا يمه كوليلي روحي يادوب الحك على اول محاضرة .. زين يمه اسويلج لفه 😑 يمه شكالولج رايحه للمدرسة 🤔
موصوجج صوجي اني خايفه عليج .. نزلت بست راسها يمه الله يحفظج اليه بس متقبلين اصير مضحكه كدام البنات من اطلع لفتي مثل الجهال من الجنطة .. ضحكت ودعتلي الله يوفقني واوصل بالسلامة .

طبعا خلي اسولفلكم على اهلي ( احنه اثنين بنات وام والدي متوفي من 4 سنوات واختي اصغر مني بسنتين معلمه ومتعينه بمدرسه قريب على بيتنه اما اني فهم موظفه بس اخذت تفرغ دراسي وداكمل كلية صح مسائي بس سويت استضافه للدوام الصباحي  )
وصلت الكليه ب9 جان الطريق حيل مزعج وازدحامات فضيعه بسبب حادث سير فتأخرت بالوصول.

لكيت المحاضرة بادين بيها دكيت الباب : عفوا استاذ ممكن ادخل؟
وين جنتي؟
والله ازدحام وما تأخرت،،
ماكو دخول للقاعة ورايه ومرة ثانيه اذا اجيتي متأخرة لتفكرين ادكين الباب اصلا.

فشلني شكد عيب وكدام الطلاب والطالبات صدك طفرت الدمعة من عيني 😓

ياربي وين اروح هسه وشيخلص الساعتين لحد متطلع اسو من المحاضرة عاد لو اسو طاردها ويايه 😑

تعوذت من ابليس وكعدت على مسطبه بالحديقة مقابل النادي ..
طلعت الموبايل وبديت اتصفح بي وراها بشويه ضجت فكلت اطلع الملازم اقره بيهن .

ترى الي يقرة بالقاعات مو بالحديقة🤔

رفعت راسي هذا الصوت مو غريب 😑 هاي انته؟؟

اي اني ام كرسي البرلمان😏

اولا اقره بالحديقه بالقاعة بالشارع هذا الشي ميخصك وعيب تدخل 😤

اي وثانيا شنو ؟؟

اني صفنت وانحرجت ما اعرف شكول ثانيا .
ماكو شي سلامتك بعد ولفت وجهي عنه.

زين توقعت ماكو ثانيا انتي متعرفين بس تعصبين وتصيحين ..

انصدمت من كلماته ومن جرائته شون هيج يحجي!!
كمت وكفت كباله : انته صدك متستحي شون تحجي هيج ويايه وتضرب ميانه واني اصلا ما اعرفك .

ميحتاج تعرفيني يكفي اني عرفتج ..

ومنين عرفتني ؟

من موقف البارحه الكتاب مبين من عنوانه ..

هنا صدك طفرت الدمعه من عيني ما عرفت شنو ارد عليه حسيت كلماته مثل السجاجين بقلبي انغرزت.

استداريت على المسطبه واخذت ملازمي ومشيت بدون ما احجي ولا حرف .

حسيته ارتبك من سكوتي وتصرفي بس جانت نار مشتعله بيه ما انتظرت بعد يمه حتى ليحجي شي زايد ويغثني اكثر.

مشيت بسرعه ما اعرف وين اروح لكيت رجليه ماخذتني للحمامات مال القسم طبيت وانهاريت بالبجي ..

طبن بنات ظلن يباوعن عليه عبالهن مضروبه بوري فاضطريت ختلت بوحده من الغرف مال الحمامات .

دك التلفون عليه كوه اباوع كمت ما اشوف بعيني من البجي فتحت الخط.

الو رناوي وين انتي ؟

سمعت صوت اسو انوب زدت بالبجي..ولج شكو شبيج ليش تبجين؟ وين انتي؟؟

اني بالحمامات مال القسم تعالي.وسديت الخط

دقايق وسمعت اسو تسال عليه فتحت باب الحمام وباوعتلها ..

لج هاي شنو ليش هيج عيونج مورمه المكياج رايح شصاير ؟؟ كله لان طردج الاستاذ من المحاضرة؟؟

البنات واكفات يباوعن عليه.. كتلها اي .. ردت اصلح منظري كدامهم لان راح اصير بلسانهم ومحد يرحم بيه على مضروبه بوري وبالحمامات تبجي.

حبي رنوش من كل عقلج واذا طردج انتي مو تعرفين باستاذ عبد الكريم مخبل هو رجال جبير بالعمر وملتزم حيل ويتخبل من احد يجي وراه للقاعه .

ظليت ابجي واشهك ..

تعالي مسحت وجهي وغسلتلي على المغسلة .
طلعنه للنادي واني كوه امشي احس البجي هد حيلي .

كعدنه على كراسي بالحديقة وحدنه : رنا حبي احجيلي هسه بالصدك ترى حجيت هيج لان البنات واكفات وماردت تطلع عليج حجايه بالكليه ؛ هسه وحدنه احجيلي منو غثج؟
يا عمري اسو حظنتها ورجعت ابجي مدري اشكرها لان انقذتني كدام البنات مدري على مواساتها اليه .
اش كافي بجي فضحتينه تعالي احجيلي ولج الي يشوفج يكول مضروبه بوري شكو شنو صار؟؟

حبي اسو الولد ابو الكرسي البارحه ...
شبي ولج اعتدى عليج؟
ضربتها على جتفها : لا اسم الله وين كاعدين بملهى قابل .

لعد شكو داحجي مو فتيتي قلبي؟؟

اجه عليه ....... وبلشت احجيلها الي صار وياه واسو خلصتها يااا وعزه وهذا شون صلف شون هيج يحجي وياج..

وانتي ماجاوبتي يا فاهيه؟

شجاوبه مدكوليلي خفت ليسمعني حجي بعد اقوى عفته ورحت للحمامات .

اني اخذلج بحقج بس خلي اشوفه.
لا فدوة لتحاجي خلي يولي ما اريد بعد احجي وياه وما اريد الموضوع يكبر.

هو شنو يكبر رنا هذا واحد ما عنده اخلاق لازم نوكفه عند حده.

اسو انتي كلتيها ما عنده اخلاق فشون احنه نوكفه ؟؟ فدوة اسو اني ما عندي اب ولا أخ وما الي خلك مشاكل محد يوكفلي .

ولج لتحجين هيج اني موجوده ورجلي اخوج ومنقصر وياج.

حظنتها وبجيت : ربي يحفظج اليه يا عمري ولا يحرمني منج 😔😔

*******&&&&&&&&&&&******

مساء الخير ..

رجعتلكم بروايه جديده وباسلوب عراقي بحت ( استخدمت اللهجه العراقية ) اتمنى تفهموها خاصة متابعيني من غير بلدان واريد رأيكم بالرواية حتى اكمل او لا؟؟

تحياتي