رواية أحببته كما هو الفصل الثاني 2 - بقلم رسل طالب

ان كنت تخطط لاهدافك
ثق أن شيئا منها هو من دعاك....
*************&&&&&**********

سديت الورقة الي كنت كاتبه بيها هدفي وصفنت على السما : يارب شكد دعيت حتى تحقق اهدافي وتنسيني الماضي يا اللهي كل يوم اكول اليوم احسن بس يطلع اسوء واني لسه متمسكة بحسن ظني بيك ياربي لتخذلني ،،،،،

ها حبي ان شاء الله تخبلتي تحجين ويه نفسج ؟؟
خرب اسو كطعتي سلسلة افكاري 😑

هاي تاليتج مثل المخبلة تحجين ويه نفسج همزين محد سمعج .

استداريت لا ارادي داتأكد محد سمعني ، لمحته متقدم بأتجاهنه .. اني شفته وماتت رجلي ما اعرف شحجي : اسو ولج هذا هو فدوة وين اروح ؟

شبيج بابا شنو وين تروحين اكعدي بمكانج واذا اجه اني اعرف شغلي وياه😏

السلام عليكم ..

وعليكم السلام ( ردت بس اسو اني ما رديت)

مو كلنه السلام عليكم لو انتي مو مسلمه؟؟

رفعت راسي مصدومه اباوعله ردت احجي بس قاطعتني اسو: وانته منو حضرتك حتى تحجي هيج وياها؟

رجاءا لدخلين نفسج اني جاي على صديقتج واريد احجي وياها على انفراد.

انته صدك .... قاطعني وكالي اني شنو؟

خفت احجي ليروح يسمعني كلام يسم بدني .

اوك وعليكم السلام والرحمه تفضل داسمعك..

مو هنا اذا امكن ..

اعتذر منك ما اوكف ويه ولد .

لتخافين ما اكلج وما اطول بالحجي .

اضطريت نزلت من المدرجات الي كاعدين عليها واسو دكولي ولج وين؟ كتلها هنا مو بعيده هسه اجي لتروحين.

تمشينه مسافة كم متر عن المدرجات واني اباوع لاسو .

شبيج خايفه؟

ما خايفه وليش اخاف؟؟

تحبين هوايه تكابرين وتجذبين.

خزرته بعيني وردت احجي بس قاطعني: هذا مو موضوعي ردت اعتذر منج على الي صار قبل كم يوم وهاي هيه.

حسيت كبريائه الي ديخلي ميعرف يحجي ولا يصرف : مصار شي اصلا مو ابالي الموضوع .

تمام لعد اخذي راحتج .استدار وابتعد.

ضليت صافنه من اسلوبه يعني هذا بحياته محاجي ويه بنيه ؟؟ لو ميعرف الاتكيت لو حاقد على البنات ؟؟

رجعت اتمشى لاسو والاسئلة تضرب بعقلي .

ها ولج شكالج؟؟

كالي اني اعتذر منج على الي صار قبل كم يوم .
وانتي شنو جاوبتي؟
كتله مصار شي واصلا مو ابالي الموضوع .

عافني وراح ..

لج مخبله شنو مو ابالج والبجي الي بجيتي الي يشوفج يكول احد مات؟

اسو تعبت الولد احسه مو طبيعي وكل ما اعاند بي راح اسمع حجي ما احب اسمعه فخليني هيج انهي الموضوع وبعد لا احاجي ولا يحاجيني.

وفعلا مرت الايام وبعد ما شفته تقريبا 3 اسابيع وهو ماكو..

قربت امتحانات الفاينل كورس اول وجان الجو بارد بشهر ال12 فصار برنامجي بالكليه يوميه ما ادخل اول محاضرة ، اكعد بالنادي واحضر لامتحان المحاضرة الثانية لان خلو الطلاب الامتحانات الشهرية ثاني محاضرة فيوميا كان عدنه امتحان اجي الصبح واكعد بالنادي اشرب كهوتي وابلش اقره.

صفنت وشفت شخص دخل للنادي باوعلي بنظرة ودخل بس كان يمشي على عكازه ياربي هذا الشكل شايفته؟؟

كعد قريب من ميزي وطلع جداحه وباكيت الجكاير وبده يدخن،،،

يااا هذا نفسه ابو كرسي البرلمان بس ليش يمشي على عكازة ؟؟

شفته استدار كأنو يريد احد ينتبهله من الولد بالنادي حتى يجيبوله شاي او كهوة ، بس محد انتبه لان النادي هوسه صار..

كمت من مكاني ورحت للكاشير وطلبت واحد شاي واحد كهوة واخذتهن وتقدمت باتجاه طاولته ..

صباح الخير ..

صباح الخير.. تفضلي

اسفه على مقاطعتك بس طلبتلك شاي وكهوة ما اعرف شنو تحب تشرب فجبتهن اثنينهن.

ومنو كالج تجيبيلي شنو صايرة تشتغلين بالنادي جايجي ( صاحب مهنة الشاي نسمي بالعراق جايجي ) ؟

صدك انقهرت من حجايته وحسيت غصه صارت بصدري بس كتله : مو مشكلة جايجي او غيره المهم حبيت اساعدك لان شفت وضعك الصحي مو تمام .. ان شاء الله مشافاه وما بيك غير العافيه .. وضعت الصينية كدامه وتركته ورجعت لطاولتي واني الوم بروحي شجاني انضربت بعقلي وكمت واني شعليه بي..

كعدت على الطاولة ورجعت اقره بس اني بالي مو يم المحاضرة اصلا من كد ما انقهرت منه.

شويه واجه ولد عامل بالنادي شايل صينيه وبيها شاي وكهوه تفضلي : عفوا اني ما طلبت ..

اني طلبتلج عوفهن هنا بلا زحمه ..

ترخص الولد وراح وهو سحب كرسي مقابلي وكعد.

اني ارتبكت وتوترت حيل حس عليه وبده كالي :صباح الخير

جاوبته بتردد : صباح النور ..

اسمي حسام عمري 31 سنه طالب وياج ضابط بالدفاع وانتي ؟؟

اني اني ..

شبيج نسيتي اسمج؟

لا اني رنا وعمري او مواليدي 88 (هنا ضحك عليه )
شنو متعرفين شكد عمرج ؟
باوعتله بضوجه ، لا خلص كملي بعد شنو انتي؟

اني مختبرية بس عندي تفرغ وداكمل كليه.

اها جيد طموحه .. هذا الشي حلو

شكرا الك ،بس ممكن سؤال ؟

اي تفضلي؟

رجلك شبيها ؟

تصوبت .. طلعنه واجب للانبار وهاجمونه الدواعش وتصوبت هناك صار 3 اسابيع .

صدك حسيت نفسي قلقت عليه على الرغم هو هسه كبالي : يا سلامتك الحمد لله طلعت سلامات من هاي انته صار مده ماكو؟

ابتسم بخبث : هيج مركزة ويايه؟؟

صدك انحرجت منه : لا بس بعد الموقف الي صار اكيد راح الاحظ وجودك من عدمه.

شنو لهدرجه جنتي خايفه مني؟

صراحه اي😔

ما اعرف يمكن قسيت وياج ذاك اليوم..

قاطعته : يمكن !! يعني متدري بنفسك شكد اسلوبك جان قاسي؟؟

باوعلي وفتح عينه: بس لا دعيتي عليه؟؟

لا والله ما دعيت اني على عدوي ما ادعي ..
يعني هسه اني مو عدوج؟؟

سكتت وبعدين كملت :لا عدو ولا صديق

ضحك: شنو اني بالمنتصف خط الحياد ؟؟

تكدر هيج دكول.

اشربي كهوتج راح تبرد .

شكرا بس شمدريك احب الكهوه ؟؟

ميرادلها روحه للقاضي من كلاصات الكهوة المكومه كبالج ..

صدك ضحكني : هههههه بهاي حقك.

شرب هو الشاي مالته واني اخذت كم رشفه من كوبي.

حسام هسه انته ليش داومت وبعدها رجلك هيج؟

والله دزولي خبر راح يرسبوني لان ما عندي درجات شهرية حتى ادخل للامتحان الفاينل .

زين وهسه شون راح تمتحن؟ كومه مواد فاتتك..
احاول ارتبها هديه فلوس كولشي يترتب ( حجاها وهو طلع الجكارة الثانيه وبده يدخن)

بس اكو اساتذة ميقبلون بهاي السوالف ويرسبون اذا متشد حيلك ..
ابتسم وكالي عادي تحميل شنو المشكلة؟

لا اسم الله شنو تحميل ان شاء الله تنجح.

ضحك علي وتقدم على الميز: يعني تساعديني؟
انحرجت منه وابتعدت ورجعت على الكرسي مالتي: شون اساعدك؟؟

بالامتحان رديلي..

لا ما اكدر ( حسيته ضاج رجع على مسند الكرسي مالته ) بس اكدر اساعدك بغير طريقة ..

وهي ...

اني اقريك عادي واحفظك شنو المهم..شنو رأيك؟

امممممم اني مو مال قرايه رنا ما الي واهس بيها اصلا.

ميخالف اتحملها واني وياك هالفترة ان شاء الله.

ان شاء الله بس شون تقريني ؟

بكيفك نتواصل بالنت او بالتلفون مثل متحب ومن اقره تخابرني وافهمك شنو المهم.

صفن عليه وابتسم : طيب سجلي رقمي يمج وسويلي مسكول حتى احفظ رقمج يمي .
حفظ رقمي : لازم هسه اروح للقسم الامتحان راح يبلش.

اوك اني اجي وراج روحي قبلي.

ليش انته راح تروح للقسم؟

شبيج رنا لعد جاي هنا دالعب غير دزو عليه علمود وضعي الدراسي.

حسيته ضاج ما اعرف ليش : لعد امشي وياك نروح سوه للقسم.

لا اني راح اعطلج عن الامتحان امشي انتي قبلي.

لا ميهم ابقى وياك يله امشي .

مشيت وياه وهو كوه يمشي صدك انقهرت عليه وين جان وين صار المسكين .

فجأة وكف استداريت عليه: شبيك حسام ليش وكفت ؟
انصدمت وجهه صاير احمر لا ارادي لزمت ايده وكعدته على مسطبه قريبه من عدنه: شبيك تحس بشي ديأذيك شي؟

روحي رنا روحي ..

وين اروح بس فهمني شبيك؟

صاح بيه : انتي شبيج غبيه متفتهمين داكولج روحي.

ابتعدت عنه والدمعه بعيني: ياربي هذا شبي ويايه ليش هيج يصرف؟

اوك مثل متريد مع السلامه.

اخذت اوراقي ورحت للقسم امتحنت واني بالي مو يم الامتحان حتى ما اعرف شكتبت سلمت الورقة وطلعت بسرعة ورجعت للحديقة وين عفته ادور عليه بس مالكيته ظليت افتر بلكي الكاه صدك اختنكت احس مثل الطفل وضيع امه مدري انقهر عليه مدري على نفسي تعبت وطلعت من الكلية ورجعت للبيت ما الي نفس بشي.

هله يمه شو تأخرتي.
اي يمه امتحان ومحاضرات.

بدلي وتعالي تغدي ...
ما اريد انتوا اكلو ما الي نفس بالاكل.

صعدت وعفت امي صافنه قفلت الباب وظليت ابجي ما اعرف شبيه بس اتمنى اصيح من كد ما اختنكت......