رواية أحببته كما هو الفصل الرابع 4 - بقلم رسل طالب

  اقتنعت أن الراحة لا تعني أنني أعيش حياة جميله
بل تعني ان ابتعد عن كل شيء يزعجني
*********&&&&&&&&*********

صباح الخير

يا هلا بهالصباح قلبي ( بستها وكعدت يم اسو)

اليوم وضعج يخبل شنو هالتغيير؟

فكرة بكلامج مال البارحه .. ( قاطعتني : يا كلام؟؟)

من طلبتي مني اقره وانتبه لامتحاناتي.😔

ضحكت اسو : فديتني ما ادري بنفسي هيج مؤثرة 😂

ضحكنه سوه وبلشنه نقره الامتحان ونراجعه لحد ما ضبطناه وصار وقت الامتحان دخلت للقاعه بكل ثقه عكس امتحان البارحه ، ( بداخلي حجيت : يوم الله ليعوده).

طلعنه اثنيناتنه بنفس الوقت من القاعه وحيل فرحنه لان جاوبنه بالامتحان، قررت اسو نتغده بالنادي على حسابها .

راحت دتطلب اكل النه وتجي ؛ اما اني فكعدت لان لازم وحده من عدنه تحجز ميز خاصة وقت الظهر يصير النادي ازدحام وماكو مكان حتى تكعد تاكل.

يله ست الحسن جبتلج بيتزا باللحم وفنكر وببسي ؛كولي صديقتي مو زينه 👌👌👌

لا والله زينه ونص بس خليهن ؛خلي ناكل وبعدين ذلي بيه 😁

عابتلج ليش اذل بيج اول وتالي اخسرج فلوس الغده 😂😆

من عيوني كم اسو عندي اني 😍😘

كملنه غده وطلعنه من الكليه للبيت ، استمر الوضع على ما هو عليه لحد ما خلصت امتحانات الكورس الاول بداية شهر الثاني طبعا .

تقريبا نسيت هذا الجندي المجهول الي ظهر بحياتي مثل الاعصار ودمر الي دمره وراح.😔

مرات جانت تجيني لحظات اضعف بيه واتمنى لو ما حاذفه رقمه ،؛ بس ارجع واحاجي نفسي : لو هو رقمه صدك كان اصلا خابرني منه مو ما اتصل واختفى فص ملح وذاب.

بلشت العطلة والحمد لله خلصتها سفرات يومية نطلع بمكان اخر اسبوع قررنه نروح سفره لاربيل 5 ايام حجزنه بشركة مال سفر وطلعنه .

جان الطريق متعب بالسيارة ولان عوائل هوسه .

من  وصلنه لهناك نزلونه واخذونه لفندق كالو: شويه ترتاحون وبعدها نبلش البرنامج .

صدك ما طولنه ساعة وطلبوا منه نتحضر ونطلع بين مولات وبين مصايف ماكو طبعا راحه واني مناك تعبانه احس نفسي تكسرت بأول يوم .

رجعنه متأخرين من التعب كولشي ما اكلنة بوجهنه كبل للفراش.

ثاني يوم الصبح اندكت الباب ( طبعا اني وامي واختي بغرفة وحدنه حاجزين)  امي فتحت الباب : حجيه تحضروا حتى تتريكون ونطلع .

تسلم ابني بس اليوم ما اطلع اني والبنات لان تعبانين نريد نرتاح .

براحتكم بس هي السفره هيج اعرف البارحه اخرناكم .

لا ما قصرتوا تسلمون ( سدت الباب والولد راح).

كعدنه نزلنه نتريك لان وجبة الافطار جانت على الشركة بالاتفاق مع ابو الفندق بوفيه مفتوح.

بعد ما كملنه اكل ورجعنه لغرفتنه : ماما شفت شغلات حلوة بالمول الي رحنه اله البارحه ، ممكن اروح اله هسه استغل الفرصة مدام اهل الشركة ماكو؟؟

يمه بس انتي وين تندلين ؟؟

لا والله حفظت الطريق للمول مو تدرين بيه بسرعة احفظ الاماكن 😊

زين بس لتتأخرين واختي متجي ويايه؟؟؟

لا يمه بقيها يمي خاف اتخربط يصير بيه شي منو يمي؟؟

تمام احاول ما اتأخر اني حفظت اسماء المحلات الي عدهم شغلاتي الي اريدها.

زين يمه الله يحفظج بنيتي.

والله طلعت اتمشى ما صعدت سيارة شويه خفت لان مكان ما اعرفه كلت امشي هو مسافة 20 دقيقه عن الفندق.
وصلت للمول صدك فرحت عبالك محققه انجاز لان تقريبا احتاريت بين كم شارع واضطريت سألت الماره يله اندليته.

دخلت وبلشت افتر بي واتبضع منه جان حلو بس اسعارهم غاليه بس تسوه اكو شغلات ماركة .
واحد من الطوابق كان اكو كوفي بي كلت خلي اكعد شويه متت من الفر واشرب كهوتي واكمل وراها.

كعدت اجه النادل سجل طلبي وراح ، ما طول 5 دقايق وجاب الكهوة والمي وقطعة شوكلاته.

عجبني شكلهم وترتيبهم طلعت الموبايل داخذ صورة الهن واسوي check in بالانستا والفيس.

شجابج هنا وحدج؟

فزيت من الصوت رفعت راسي اباوع ( واجتني صدمت عمري)

هاي انته؟؟!!

اي اني 😑 شبيج عبالك شفتي شبح!!🤔

جر الكرسي وكبالي كعد؛ ظل يباوعلي واني الصدمة خرستني.

شونج ؟

صفنت عليه ( بقلبي كلت : تسألني و شلونك, و شلوني من دونك
أنا اللي عمري ضاع في نظرة عيونك)

قاطع افكاري : شبيج هالدرجه سؤالي صعب؟ لو كارهتني ومتريدين تحجين ويايه؟

اول مرة احس نفسي شجاعة استجمعت قواي وكتله: بلا زحمه كوم من يمي لا اعرفك ولا تعرفني ومو من حقك تكعد وتفرض نفسك.

انصدم من اجابتي ، بس اني بداخلي نار وتسعر بيه.

اوك الي تريدي يجرالج بس اني صوجي وثقت بيج.

باوعت عليه وعلامات التعجب بوجهي على شنو ديحجي؟

ما فهمت ليش بشنو خنت ثقتك؟؟

ماكو داعي نحجي .. سلام

ابتعد وراح واني صافنه هذا شديحجي ؟؟ واني وين شفته بعد حتى اخون ثقته؟؟

طبعا كلب كل موازيني حتى فرحتي بالطلعه راحت : استغفر الله يا اللهي شمسوية من سلطة عليه هالمصيبة كل ما اشوفه اشبع مغثه.

عفت الكهوه وكمت حتى ما كملت شرايه نزلت للطابق الارضي كلت ارجع للفندق احسن ؛ بعدين اذكرت امي وصتني شغلات غذائية فدخلت للسوبر ماركت جان بالطابق الارضي؛ ظليت ادور على المواد الغذائية الي امي كتبتهن اليه ، افتر بين الممرات واحس اكو شباب اثنين ورايه يفترون متت بدمي ياربي شون ورطه وين انطي وجهي ..

كملت وطلعت وهمه ورايه انوب اخاف اطلع من المول ليلحكوني لان الطريق فارغ يعني المول أأمن اليه ؛ وين اروح وشسوي؟؟

فكرة ارجع لطابق الملابس حتى اضيعهم هناك وارجع اطلع بلا ميعرفون بيه .

صدك صعدت والمواد هوايه هدن حيلي .

افتر واني بالي مو يم الملابس كل شويه التفت اباوع وين صاروا

وطبعا ما فارقوني لحظه ؛ يا اللهي ساعدني واستر عليه ما عندي غيرك فدواتك ربي ( احس الدمعة طفرت من عيني من الخوف).

لكيت رجلي مو ديتني كدام محل ملابس رجالية فجأة طلع منه واني شفته كبالي عبالك شفت ابوية ركضت عليه : حسام همزين لكيتك .
صفن عليه وشاف الخوف بعيوني : شبيج مو هسه طردتيني انتي مخبله؟

لا ارادي دموعي كامت تصب عشرة عشرة على وجناتي،،

هو تخبل من شافني هيج ملامح وجه القاسية رأسا تغيرت وصارت خوف وقلق : على كيفج شبيج بس فهميني ليش تبجين ؟

اني استداريت ورايه داباوع عليهم موجودين لو بعدهم شفتهم واكفين مسافة بس شافوا حسام باوع عليهم راسا انهزموا .

جانوا لاحكيج مو ؟؟

دنكت راسي ..

ولج احجي سولج شي؟

عافني وركض وراهم

اني استدارت : حسام ارجع فدوة عوفهم

ما اهتم لندائي عليه صدك ما طول نص ساعة ورجعلي هو واثنين من الامن الي بالمول وجايبيهم وياهم : سالوني اذا فعلا ضايقوني ؟

كتلهم اي وسولفتلهم الي صار ، ما قصروا اخذوهم وراحوا.

حسام باوع عليه صايرة فلم من البجي : تعالي خاتون امشي ويايه.

مشيت وياه بلا ما اسأله وين نروح ؛ وكفت يم باب كالي : ادخلي عدلي نفسج وغسلي حتى ارجعج للفندق ما اكدر امشي وياج بهالشكل شيكولون كاتلها ومرجعها.

صدك ضحكني : اي هسه ؛ هاي الغراض بقيهن يمك .

اوك منتظرج.

دخلت واني احس براحه نفسيه مو طبيعيه ؛ يارب شنو هالامان الي احس بي شنو هالتناقض الي بيه ؛ اكثر انسان يجرحني هو اكثر انسان احس براحتي واماني وياه!!

عدلت نفسي وخليت مكياج خفيف ما طولت لان اعرفه يعصب من كل شيء فخفت ليعوفني ويروح.

طلعت لكيته متكأ على وحده من الحيطان القريبه على الحمام وصافن فدوة لطوله شون حلو اول مره انتبه على شكله بهاي الطريقة ، طبعا هو شعره اسود وبشرته بيضه بحنطي والعيون خضر والجسم مفتول العضلات ، طويل وضخم ..

تقدمت عليه : حسام خلصت .

باوع وابتسم : اي زين ؛ امشي اوصلج .

ما ناقشته مشيت وياه وطبعا ما خلاني اشيل شي كل الغراض هو شالهن : ادري مشايفه مسواك مشتريه المول كله؟؟ شنو بغداد عزلت محلاتها ؟؟🤔

اني كال هيج لو متت ضحك : لا بس شغلاتهم هنا حلوة مو كل شي الكاه بغداد.

انطيني اساعدك بيهن، باوعلي وخزرني: دتمشين ويه رجال خاتون مو نثيه ؛ شون تشيلين انتي واني وياج عيبه بحقي.

بداخلي كلت من فدوة للعيبه حتى سوالف تجنن .😍

صدك مشينه طلعنه من المول للبارك الخاص بالمول جان موكف سيارته هناك ( طبعا سيارته لاندكروز موديل حديث يمكن موديل سنتها لان نظيفه وحلوه حيل ) صعدني بالصدر وفتح الباب الخلفي للسيارة وخله الغراض بيها.

صعد هو بمكان السايق ( ظليت اباوعله حسيت بشعور مينوصف).

قاطع خلوتي وصفنتي بي : وين نازلين هسه بأي فندق؟؟

انطيته اسم الفندق ، حرك السيارة بس الطريق لكيناه ازدحام بسبب حادث سير صاير.

اثنينه ساكتين منحجي فقررت اكطع هذا الصمت : حسام ممكن سؤال؟

كولي؟

وين اختفيت كل هالفترة؟؟

اممممممم خوش سؤال ...

******** &&&&&&&&& ********

تفاعلكم وارائكم حتى اكمل البارت الي بعده 😍😘