رواية أحببته كما هو الفصل الثالث 3 - بقلم رسل طالب

الغرق ليس السقوط بالماء، ﻻ أحد  يصف السمكة بالغارقة لكنها تغرق في الهواء ....الغرق معنى ، وصف قاتل ،الغرق ان تسقط في مكان ليس لك ..,🤸🏻‍♀️🎣
********&&&&&&&&&&*******

ظليت ابجي لحد ما نمت وما ادري بروحي ..
كعدت على صوت التلفون يدك كوه شفت اسم المتصل : الو ..

الو ولج وينج لا كليه ولا تلفون وين اختفيتي اليوم؟الو رنا ليش مجاوبين ؟؟؟

حسيت نفسي بغيبوبه بغير عالم بس عيوني الي تتحرك بيه اما باقي جسمي مديساعدني بأي شي.

انكطع الخط واني رجعت نمت ما اعرف او يمكن اغمى عليه ..

امي صاحتني هوايه بس ما كعدت على صوتها ومن شافتني نايمه ما حبت تكعدني عبالها تعبانه من الدراسة ( هذا الي فهمته منها من كعدت ثاني يوم الصبح )

يمه رناوي يا بعد قلبي اكعدي ولج يمه لا اكل ولا شرب سودة عليه من البارحة..

اي يمه هسه اكعد بس شويه عوفيني انام بعد.

يمه كافي نوووم صارت ب7 شوكت تروحين لكليتج؟

اني من كالت كليتج اذكرت حسام احتمال اشوفه اليوم وافتهم شبي.. كمزت من الفراش فجأة احس كل حيلي رجعلي .

يا يمه شبيج اسم الله شو كمزتي والله راح تخبليني وياج.

كعدت غسلت وجهي جان كولش تعبان من البجي بدلت ملابسي لبست كيلود اسود وبي ورد احمر وقميص ابيض وخليت مكياج خفيف حاولت اخفي بي تعب قبل بيوم طلعت حلوة بيهن..

نزلت اريد امشي مداكدر يمكن هبوط صار عندي يمه ..

طبعا هبوط يصير عندج اذا ما ماكله شي من البارحه ، تعالي اكعدي خلي اصبلج شاي واكليلج لكمه .

صدك كعدت تريكت وطلعت للدوام..

ظليت اكلب بالتلفون ليش ما راسلني او دزلي شي !!
شفت رقمه ما بي فايبر ولا واتساب 😔

معقولة انطاني رقم خطأ؟؟ لان من خابرته ما سمعت صوت تلفون دك!!

بس ليش يسوي هيج ما مجبور وهو اختار سالفة الرقم مو اني ؟؟ ( ظلت الافكار تاكل بدماغي اكل احس الصداع زاد ما نقص )

دخلت للكلية واني اباوع بلكي اشوف طيفه ياربي بس اسمع حسه .
ما موجود لا حديقة ولا بالممرات رحت للنادي دورت هم ماكو كعدت شويه بنفس مكاني الي كعدنه بي قبل بيوم وطلعت ملازمي ع اساس اقره..

ظليت صافنه على الكرسي مقابيلي واتخيله ما كدرت اقره احس المكان ضاق عليه .. اخذت ملازمي ومحفظتي وطلعت بره النادي محتاجه هوه اريد اتنفس .

رجعت كعدت على المدرجات جان مكاني المفضل قبل لا اغير خلال فترة الامتحانات واخلي كعدتي كلها بالنادي.

هاي انتي هنا ..
فزيت واستداريت ورايه : اسو هلو شونج؟

ولج يا هلو شجاج لج متت خوف عليج البارحه وخابرت امج من شفتج متردين عليه كالتلي تعبانه وذابه نفسها مثل الميته بالفراش،، شكو شبيج؟

اكعدي وخلي اسولفلج الي صار ..... ( بلشت احجي وهي مصدومه من كلامي وحجيتلها من اجه لحد ما عفته)

لتزعلين مني بس اكولج انتي غبية واكبر غبية هم ..
ليش اسو ؟؟😔
شنو ليش هو هذا هم بشر الواحد يحجي وياه وشون امنتي اله وانطيتي رقمج؟

ما اعرف انقهرت عليه وردت اساعده والله😢
بابا هذا مو وجه نعمه وانسان غريب متعرفي شون وثقتي بي لا وفوكاها مسوي بيج دكات دكه اتعس من دكه !!!🤔

ما ادري عبالي اساعده مو قصدي شي ثاني ( قاطعتني)
رنا انتي تعرفي للولد قبل؟؟

انصدمت من كلامها: اسراء شبيج اني ما اضم عليج شي لو اعرفه جان كلتلج تشكين بيه؟؟

لتزعلين مني بس تصرفاتج تجاه هالشخص وسكوتج عن سوالفه توحي للمقابل انتوا تعرفون بعض .

لا والله اسو ما اعرفه وبحياتي مشايفته بس ثقي بالله ما اعرف شبيه وياه ما ادري من اشوفه اخاف منه وما اكدر ارد ومن احس بضعفه انقهر عليه احسه حيل مسيطر عليه.

هسه لو تعرفي من زمان جان كلت هذا حب ؛ بس انتي مصارلج 3 مرات من شفتي ما اعرف حبي شبيج والله احس هالولد خربط احوالج ..

ما ادري والله صدك ضايعه احس 😔

كومي رناوي خلي نروح عدنه امتحان ..

صفنت عليها : بس اني ما قاريه شي شون؟؟
عزه العزاج شون ما قاريه؟؟
مو سولفتلج بسببه خلصتها بجي ونمت..

والله هذا راح يرسبج امشي كدامي اني احاول اردلج الي اعرفه..

مشيت واني اكل بروحي شجاني وشسويت بنفسي وليش هيج وصلت لهاي المرحلة جنت دروسي احضرها ودرجاتي زينه ولا اريد اساعده اني!!! دخلي اساعد نفسي بالاول ( ظليت احجي بداخلي خفت اشارك افكاري ويه اسو لان راح تلومني واحس نفسي تعبت من الملامه)

المهم دخلت للامتحان وكعدت قريب من اسراء حتى تساعدني من احتاجها ولو اني المادة مشايفتها فأكيد احتاجها ..

وزع الاستاذ الاسئلة وكلها بدت تحل بس اني صافنه ما اعرف شكتب اشرت لاسو وخطيه ما قصرت بدت تردلي الي تعرفه واني بداخلي ادعي ( يارب سامحني بس هالمرة لخاطر امي المسكينه التعبت علينه بس عدي هالامتحان ونجحني واوعدك امتحان الجاي اقره واعتمد على نفسي)

صدك خلصت الحل بأعجوبة وحسبت درجتي تطلع نجاح الحمد لله كمت سلمت ورقتي للاستاذ وطلعت ورايه طلعت اسراء.

حضنتها وبستها: ما اعرف شون اجازيج حبي اسو وكفتج ما انساها

باوعتلي بعتب : اذا تحبيني صدك وتريدين اجازيني خلي بالج على دراستج ترى اليوم الف موته متت من رديتلج بس لان صديقتي ما اكدر اعوفج بهاي الشده واتفرج فأقري زين فدوة.. يله اني اروح لان احمد خابرني ويكول البنات خبلنه راح ارجع للبيت وعود اخذ المحاضرة منج.

اوك حبي تسلمين ان شاء الله ادزها الج اول ما اوصل للبيت.
صفنت كلام اسراء جان جارح اليه حتى فرحتي راحت انُ جاوبت بالامتحان ، بس ما الومها لان فعلا لو لازمنه الاستاذ كان طردنه من الامتحان واثنينه صفرنه وهي ما الها ذنب بهذا الشي.

بلشت المحاضرة الثالثه ورحت حضرتها ساعتين كانت متعبه تمنيتها بس تخلص حتى ارجع انام ..

خلصت المحاضرة وطلعت للبيت وقبل لا اعبر البوابة الرئيسيه للكليه باوعت للحديقة نظرة اخيره عسى ولعل اشوفه ، بس ماكو 💔
دنكت راسي وكملت مسير واني افكر بلي صار وفعلا عاهدت نفسي انساه وما افكر بي ولا اخلي يسيطر على حياتي واول شي سويته مسحت الرقم الي انطاه اليه .

حسيت مثل الجبل وانزاح من على اكتافي بمجرد ما فكرة هيج وقررت مع العلم كان القرار مع نفسي فقط.
رجعت للبيت يمه وينج؟؟

هله يمه اصبلج غده؟؟

اي يمه ميته جوع فدوة اروحلج 😘

صعدت ذبيت الجنطه والموبايل وغيرت ملابسي ونزلت .. جنت حيل جوعانه اكلت بشراهه على الغده .

يمه بشريني جاوبتي بامتحان اليوم؟

اي يمه الحمد لله جاوبت..

يمه اكيد ؟؟لان انتي ما قريتي شي اصلا البارحه.

والله يمه لو ما مجاوبه جان كلتلج بس اسو خلف الله عليها كعدت قرتني قبل الامتحان وحفظنه ( بداخلي استغفرك ربي على هالجذبه بس هي صدك ساعدتني بس بغير طريقه) المهم يمه انتي اطمئني اني جاوبت اجيب نجاح ليظل بالج.

اي يمه يوم المنى واشوفج متخرجه وافرح بيج عاد تتزوجين .

يمه قابل كاعده على قلبج اني ؟؟

لا يمه شون انتي بقلبي انتي واختج بس انتي الي ديجوج ترفضيهم بسبب دراستج وانتي دتكبرين متصغرين وأب ما عندج يعني الرجال ستر وغطى الج يمه من بعدي .

يمه الله يخليج عمرج طويل لتحجين هيج فدوة وان شاء الله تشوفين جهالي واحفادي😘 كمت بستها من راسها وبلشت اشيل بمواعين الغده ..

يمه اني اغسلهن واصعد حتى ابلش اقره..

زين يمه الله يرضى عليج ، اني اروح انام شويه ..

نوم العافيه حجيتنه 😘😍

وكفت يم المغسلة وبلشت انظف بالمواعين واني بداخلي صرت اكثر اصرار اركز على دراستي وبس وهو ما بقالي بس سنه وكورس واتخرج ان شاء الله .

كملت شغل المطبخ وصعدت فوك اريد اقره .. لكيت مكالمات من اسو ومن رقم!!

استغربت منو يتصل عليه ؟؟
دكيت الرقم برنامج التروكولر ماطلعلي اسم ، تركته واتصلت على اسو ضلينه نقره ونسولف ونضحك خطيه حاولت جاهده اطلعني من الي اني بي ،، خلص اليوم والرقم  ما اتصل بعد بيه واني هم مسحته وما اهتميت اله ..نمت من وكت حتى اكعد من وكت للدوام .