رواية أحببته كما هو الفصل السابع عشر 17 - بقلم رسل طالب

*********&&&&&&&&*********

نهاية الاسبوع كان الكل مخبوص بتحضيرات العرس طبعا حنه ما سوينه لان العرس كان بقاعه وكالوا نعزم الكل بالقاعه افضل مما هوسه والبيت ميكفي لان بيتنه صغير.

جنت كاعدة ومبدله واباوع عليهم وهمه بالكوشه يخبلون هم عصام وهم شهد تمنيتلهم الفرحه والحياة السعيدة من كل قلبي وبنفس الوقت عيني على باب القاعه اكول هسه بأي لحظه يدخل حسام ويسويها مفاجئة النه ونفرح بجيته بس ماكو خلصت الساعتين وزفينه العروسين للفندق ورجعنه وهو لا حس ولا نفس صعدت لغرفتي واني الغصة الي بداخلي موتتني احس روحي ميته ودتمشي..

طلعت جهازي واباوعله ظليت صافنه على تاريخ اخر مكالمة وياه وشكد طولنه بالحديث بوقتها ؛ اووووف يا حسام لو ادري بيك تلتحق وهيج تحرمني منك جان ما سديت التلفون بوقتها جان ظليت متصلة وياك لحد ما التحقت اوووف خليت وجهي بالمخده وظليت اصرخ بس المخده كتمت الصوت .. صرخت لحد ما انهد حيلي ومن البجي والعياط.. نمت واني بملابس الحفلة وكاعده بالكاع بس مستنده على الجربايه.

ثاني يوم جان جمعه وامي التهت تحظر بالريوك مال العرسان من عاداتنا اهل البنية يودون ريوك الصبح لبنتهم.. كملت امي تحضيرات وطلعنه ..وصلنه لبيت اهل حسام خطيه تلكونه بس العرسان طلعوا بعدهم مجايين وامي استحت تبقى مع العلم اصروا علينه نبقى على الغدة بس امي تحججت بالف حجه ورجعنه للبيت.

تسريع للاحداث..

رجعت لدوام الكليه وبقالي بس شهر ونص على التخرج ..

شوفي رناوي حبي ما اريدج تبقين هيج وحسام الله يحفظه ان شاء الله يرجع بالسلامه فأنتي شدي حيلج وانتبهي لدراستج ومدام ابو قبل يخطبله بس ينزل معناها الامور تبشر بخير ومعناها لازم تشدين حيلج وتنجحين من الدور الاول حتى من تزوجين متتبهذلين .

كلامج صح والله اسو بس مو بيدي ولج ميته داقنع بروحي كوه .. ولج كل ما افتر بالكلية اذكر كعداتنه وسوالفنه وحجينه والله قلبي ينقبض .

ميخالف حبي انتي اقوى من هالشي شدي حيلج وخلي حمولج يم ربج هو كفيل بيج .

التهيت خلال هالشهر بامتحاناتي ما قبل النهائي ومجان اكو مجال اسوي اي شي بس قرايه ونوم ..لان الاكل لغيته والنت هم ما عندي بي شي.

وره 3 اسابيع التحق رائد واول ما سمعت بي وصل للمعسكر رحت عليه اركض سلمت عليه وسألته على اهلي : هله بيك رائد الحمد لله على السلامه بشرني شونهم اهلي؟

هله بيك سيدي الورد المفروض اني اكولك حمد لله على السلامه على هالمعارك.

الحمد لله هاي واجبنه تجاهه بلدنا شنسوي.

اهلك بخير وقبل اسبوعين ازوج عصام وحضرت عرسه وهاي الصور اخذتهن الي واله كالي شوفهن لحسام ويسلم عليك هوايه هو والحجيه وابوك .. وهاي العلاكه الحجيه دزتلك اكل بيها واصرت اوصلها الك .. وهاي وصلت الامانه .

تشكرت منه واخذت العلاكه من الولد ورجعت لغرفتي كعدت وفتحتها لكيت بداخلها كليجه وياها ظرف مكتوب عليه الى الغالي حسام ،،

فتحت الظرف واني مستغرب اول مرة يدزولي رساله اهلي ، قريت المكتوب : بعد التحية والسلام الى اخي العزيز حسام حبيت افرحك بخبر زواجي  الي تمنيتك تحضره بس ربك ما قسملنه جمعه بهذا اليوم 😔 الحمد لله عايش مرتاح ويه شهوده.. صدك عسل واشكرك يا اخويه على هالاختيار راح اظل ادعيلك العمر كله .. طبعا امي وابويه طايرين بيها وحيل حبوها ويتمنون بس رضاها . اما الخبر المهم فهو يخصك 😉 ابشرك ابويه كالي بس يرجع حسام راح اخطبله واخطبله البنيه الي يريد يعني امورك عدله عيني 😎 ناقصها رنا بس جيتك وهلهولة امي وتصير مرتك .. دير بالك على نفسك واهتم بنفسك وارجعلنه سالم غانم ولطول بالغيبة حيل اشتاقينالك .. اخوك عصام

سديت الورقه واني دموعي تصب تمنيت طير يطير بيه ويوديني لهلي ؛ شكد اشتاقيتلهم وشكد اشتاقيت لرنا اكيد هسه فرحت من سمعت بخبر ابويه وموافقته على زواجي.

مر الشهر الاول من زواج اختي بشكل سهل وما حسينه بي جانت الايام تركض واني هم التهيت بامتحاناتي وبلشت امتحانات الفاينل وجانت الايام تتشابه بنفس المرارة والالم والاشتياق مرات جنت احس نفسي رجل آلي اشتغل بلا وعي بس انفذ المهمه وخلص.

وره شهرين من المعارك المستمرة اجه امر بالدخول بالعمق حتى نفرض سيطرتنه بشكل اوسع وعلى اساس طيران التحالف هو الي راح يدعمنا جوياً ..دخلنه معارك اقوى واشرس وتوغلنه بأراضي عميقه جانت مسيطرة بيها تنظيمات داعش بشكل عميق حتى انفاق حافرين جوه الكاع .. انحصرنه بوقتها بمنطقه وظلينه نقاتل لحد ما حررناها بس المشكلة المناطق الي حوالينه جانت بعدها تحت سيطرة التنظيم ومنكدر نتقدم وناخذها بسبب قلة العتاد وكثرة الجرحى فظلينه انادي ونطلب امدادات ..
طبعا جنه ما مطمئنين عدنه جرحى هوايه وحتى الامدادات اذا اجتي راح تلتهي بالمعارك لان اكيد ميخلوهم يسعفونه وهمه مسيطرين على الاراضي القريبه منه ؛ جانت مهمة انقاذنه شبه مستحيله ظلينه تقريبا هنا 5 ايام واحنه نحاول نحافظ على نفسنا ، استشهد كم شخص من الجرحى الي عدنه بينما القوات جانت تقاتل بمناطق قريبه من يمنه بس محد يكدر يوصل النه وحتى الطيران جانوا كل ميقتربون ينضربون فكاموا ميقتربون من عدنه بس ينزلونه امدادات بالمظلات اسعافات اوليه واكل..  ظليت احسب ايام شوكت الله ينجيني من هالشده ويطلعني بعدلي اسبوع وانزل لاهلي اذا رجعت سالم من هالعمليه .

خلصت امتحانات ظلت اسبوعين وبلشت العطله وجنت متلهفه حتى استلم نتيجة التخرج ، جانت النتيجه هالمره الشوق الها غير شكل لان كل مرة اعرف بنفسي راح انجح واعبر للمرحلة البعدها بس هالمرة راح انجح واتخرج من الكلية من المكان الي عشت بي 4 سنوات بهذا اليوم راح تبين ثمرة جهدي وتعبي وسهر الليالي   ..

بعد كم يوم رحت للكلية واستلمتها والحمد لله نجحت وبتقدير امتياز جانت فرحه لا توصف واسو هم نجحت وتخرجنه سوه وصارت الكلية سوالف واخيرا .. بوقتها طلعت من الكلية ورحت للدائرة الي اداوم بيها سويت مباشرة لان كنت مجازة دراسيا فكلت احسن مما ابقى كاعده بالبيت ارجع للوظيفه افضل عاد التهي وانسى الايام الي بيها حسام ماكو .

من رجعت للبيت امي باركتلي وخابرني عصام وشهودة باركولي وعزمونه على الغده يمهم ثاني يوم لان جان يصادف جمعة حتى نحتفل بنجاحي سوه .

رحنه لبيت الشيخ وكعدنه هناك سوالف وضحك وجنه فرحانين والاخبر الاحلى طلعت شهد حامل بشهرها الاول ما احجيلكم مشاعري متوصف جانت والشيخ طار من الفرحه كال الفرحه بفرحتين هم تخرج رنا وهم حمل شهد هديتكم ثكيله ومني مخصوص تجيكم ..

جان طيب حيل ويانه الله يحفظه ويطول بعمره .. كعدنه سوه على الغده خطيه ما مبقين شي ما مسوي ما لذ وطاب وبلشنه ناكل .. وره شويه اندكت الباب بقوة علينه .

صفن الشيخ كال : يا ستار هاي منو هيج كسرها للباب ؟ ( راد يكوم حتى يشوف منو اجه)

ما قبل عصام : يابه اكعد اني اطلع وهسه ارجع الكم .

طلع عصام وتأخر بالربع ساعه منشوف غير جاهل طب علينه يركض ويبجي جابوا عمو حسام مستشهد ..

اني متت احس الكاع كامت تفتر بيه ورجليه متشيلني اريد اكوم ما اكدر ..

كام الشيخ يركض ويصيح لا اله الا اله .. لا اله الا الله والحجيه كامت تصيح يبو ما يبوو .

كوه شالتني شهد وامي وهنه يبجن وطلعنه بالطرمه مالت بيتهم وشفت تابوته وملفوف بالعلم العراقي ودخلوا للمضيف وامه تركض حافيه مثل المخبله ودكوللهم نزلوا وليدي اريد اشبكه اريد احظنه وطلطم على وجهه .

دخلوا للمضيف واني دخلت اركض ماكدرت ابقى واكفه بعيد عنه ما تحملت كل هالبعد ومن يجي ما اقترب منه نزلت على تابوته وحظنته بكل قوتي واصيح من حركت قلبي ولك ليش هيج ليش عفتني ورحت ليش مو وعدتني ترجعلي ( فقدت مثل المخبله الطم وملخ بشعري وامه ويايه كابلتني ) حاول عصام يوخر امه واني امي وشهد رادن بس يسحبني من على التابوت بس ما كدرن ظليت اعيط : عوفوني ولكم شتريدون مني بعد راح  وهنا ( وأأشر على التابوت )وتريدون تحرموني منه .

امي وخرت شهد مني خافت عليها لان حامل وطببت شهد جوة واني وامه خلصنه روحنه لحد ما فقدت اخر شي اذكر الدنيا سودة صارت واخر صورة شفتها هي العلم العراقي ؛ العلم الي اخذ مني اعز شي بحياتي .

كعدت واني الدنيا تفتر ودوخه مو طبيعيه عندي وكوه اباوع بسبب البجي عيوني ما اشوف بيهن زين : اني وين؟

امي جاوبتني : يمه بالمستشفى انتي صار عندج انهيار عصبي ونقلناج نركض وحسام وينه اذكرت حسام فجأة وكمت اعيط حسام جيبولي حسام واريد اكوم من الفراش .. امي تبجي ودكولي كافي ولج فضحتيني ولج هسه الناس شدكول ؟

انعل ابو الناس ولج اريد روحي جيبولي روحي وين وديتوا ولكم حرمتوني منه ..

اجه عصام على صوت العياط وطب وياه طبيب كاله بس الزمها خلي نضربها ابره واني مستمرة اصيح حسام وينك تعال اخذني وياك ولك لتعوفني يمهم لحد ما دخت ونمت من جديد وما كعدت غير ثاني يوم .

وره ما رنا تخربطت وديتها للمستشفى انطوها ابر وكالو منا لليل اذا صحت زين لان عدها انهيار صار فتركت امها يمها ورجعت للبيت لكيت الحجي مكمل امور الدفنه ومخابر على الدفانين مالتنه بالنجف يحضرون الكاع للشهيد وما قبل نبيت حسام بالبيت لان امي تخبلت والنسوان كابلنها وكلها ملخت روحه ، فكالي يابه اخوك راح لدار حقه واكرام الميت دفنه وذني راح يعذبنه بجيهن ونوحهن عليه خلي نشيله ونتوكل .

صدك طلعنه وجانت جنازته هيبه الله يرحمه ما بقى احد ما اجه بيها ويانه ورموا طلقات لان شهيد راح للوطن وصلنه ويه الليل للنجف رحنه زورناه الامير علي سلام الله عليه وراها طلعنه للمجنه ودفناه لكينه الكاع محفورة وحاضره .. حتى بدفنتك يخوي جنت سهل عبالك شايل ريشه مو تابوت .. الله يرحمك ومبارك عليك الشهادة.

رجعنه للبيت واباوع على ابوي هذا الشيخ الي جان الظهر يضاحك الهوى كبر عبالك الف سنه خلال كم ساعة وامي ما احجيلكم أخ يا امي ذبحتني بواجيها ونوحه والكلمات الي جانت دكولها برثاء اخويه الشهيد .

ثاني يوم بلشت الفاتحه والتهيت بيها وما كدرت اروح لرنا واشوفها  لان وحدي واركض، صح ولد عمي ولد خالي ويايه بس ما اكدر اعوفهم واروح.. بس ظليت اسال شهد عليها وعن وضعها دكولي منهارة مثل الميت حتى شكلها صاير يخوف .

ياربي صبرها على فراك اخويه وارحم بحالها  هي جان كل املها يرجع الها وتصير من نصيبه وهسه راح من بين اديها راح وهي ما مودعته .. يمكن الله حبها خلاه يبتعد عنها كل هالفترة حتى تتقبل غيابه ولو هي هسه ما قصرت مثل المخبلة ولا عبالك هاي رنا المؤمنة بقضاء الله وقدرة.

مرت الايام وبيوم السبعه ملتهي ويه الناس وما اشوف من الباب غير فاتت ام رنا ورنا وياها تكودها كوه تمشي رحت اركض عليهن : شونج خاله شونج رنا شون صرتي ؟ ليش جبتيها وهذا حالها؟؟

والله يمه ما كدرت عاندت وظلت تبجي وديني اريد احضر فاتحته وما قبلت هذا الاسبوع كله بس تزن عليه بعد ما تحملت جبتها واجيت ..

تعالي دخليها جوة بغرفة شهد ما اريدها ويه النسوان ..

لا عصام اريد اكعد ويه النسوان مو اليوم تجي الملة اريد افضفض .

ولج شتفضفضين كافي هو انتي خلصانه وثانيا عندي شغلة وياج وهمزين اجيتي .

ما اهتميت للشغلة او شنو عنده بعد ما استشهد حسام كولشي مو بعيني وماكو شي يجذب اهتمامي صار.

دخلنه جوة لغرفة شهد اختي وكعدنه ..

رنا راح انطيج شي هسه واني والله لما وصيت ميت فلا انطي ( فزيت من مكاني ما اعرف منين اجاني الحيل وكتله : من حسام؟)

اي من حسام بس توعديني متسوين شي وبلا بجي ولا لطم زين؟

انطيني شنو عندك ؟

اوعديني بالاول ،،

اوعدك بس انطيني ..

رحت لباب الكنتور فتحته وطلعت موبايل اخويه وجان بعده بي اثار دم من حسام وفتحته الها .. لزمته وهي صافنه تكلب بي وتباوع على الدم اليابس على الغلاف مال الموبايل وعلى الشاشه ولو مبين ممسوح الي على الشاشه ( لزمته وتبوس بي : هذا دم من روحي هذا دم حبيبي هذا الي بقالي منه بس دم يابس !! )

شكت قلبي بكلماتها: اووف ولج شكتلج اني مو وعدتيني ولو النسوان ما عدهن كلمة.

قاطعتني افتحه اليه ..

اخذته منها جان يفتح على بصمة الوجه ولان الشبه قوي بيني وبين حسام ففتح على بصمة وجهي .

فتحتلها الفيس وعلى الماسنجر رحت كتلها هاي محادثه كاتبها الج الشهيد اقريها ..

اخذت الجهاز وباوعت على اسمي كاتب ام بيتي وهو قبل جان كاتب عليه حبيبتي معناها مغيرها بفترة التحاقه ..

باوعت على الرسائل دازلي رساله قبل شهرين : هلو حبيبتي شونج وشخبارج اعرف بيج ضايجه مني ومقهورة لان التحقت وما كتلج بس والله علمودج ما ردت اكسر فرحتج بمشية اختج وادري بيج راح تنصببن مناحه بس اكولج راح التحق .. هسه الوقت متأخر وكتبتلج حاليا كاعد بواجب ويه الجنود والجو حلو والجماعة بس يسولفون ويحششون واحد من عدهم كال شعر عجبني وهسه راح اكتبه الج ، حسيته يمثلني اني وياج يا عمري :

بيه حسرة شايب مضيعله حيل
وصرت اشوف الموت من امشي وراي
اخ يادنيا البچت بگماطي ويل
كل هموم الدنيا مزروعه بگفاي
من عيني ما يطلع دمع بس التراب
وسنين مره الماعشت بيها بصباي
امنيتي ضحكه بليل كاسر بيه ليل
وغنوة معرسين ما تبجي اعلى ناي

اوف يا غنوة حياتي يا رناووي ، كتبتها واعرف ما راح توصل بس كلت بلكي تجي الشبكة وتوصلج .. مع السلامه حبيبتي .

وراها بتاريخ قبل شهر من وفاته لكيته كاتبلي :

حبيبتي ونظر عيني اليوم اجاني صديقي رائد وانطاني علاكه وبيها اكل وظرف ومن قريت الظرف حيل فرحت اول فرحه زواج اخويه من اختج وثاني فرحه قبول ابويه ان ازوج وعلى ذوقي اختار وبهذا اليوم سميتج بالماسنجر أم بيتي .. احبج 😘

وراها راجع كاتبلي بتاريخ قبل وفاته ب3 ايام:

حبيبتي دخلت معركة وانحصرنه بمنطقه صح كدرنه نحررها بس المناطق المحيطه بينه كلها ساقطه بيد الدواعش وظليت مقاوم اني والجنود صارلنه اكثر من اسبوع هنا الامدادات تقريبا خلصت بس دننتظر احد يجينه والاتعس من هذا طلعنه قبل كم يوم وطكت عبوة علينه وتصوبت لتخافين صح نزفت بس كدرت اوقف النزف وصوابي ديأذيني بس الي مصبرني وجهج الحلو الي كل ما افكر بي من ارجع واشوفه ارتاح .. احبج يروحي .

وراها اخر رساله كاتب والظاهر قبل ليموت بيوم كاتبها حتى الحروف غلط اكو بيها مكتوبه :

حب ي ( حبي)  حاولت اقاوم وابق الح ( وابقى الج ) بس ما كدرت الباري رايدني .. دير رررؤ    ي بال ع نفس ج ( ديري بالج على نفسج ) احبج.

اقره ودموعي ما وكفت من البجي جانت هاي اخر كلماته ، كعدت على حيلي بالكاع وحضنت الموبايل على صدري بقوة وابجي واشهك بقوة واصيح ليش ما اخذتني وياك ..

كوة لزمني عصام وسحب الموبايل مني وصاح شهد وامي ضربوني ابره ونيموني بغرفة شهد .

مرت الايام والكل رجع لحياته الطبيعية بس جان الحزن بعيونه لان الي راح مو شويه وبعز شبابه ذاك الشاب المعدل راح وهو بعده عريس ما شايف شي من الدنيا غير بس الهم والقهر والاذيه .. مرت اشهر الحمل بسرعه وجابت اختي شهودة ولد يجنن نسخه من حسام وقرروا يسموا حسام على اسم عمه الشهيد ،، جان هذا الجني روحي من الدنيا اضحك واكوللهم اني احبه اكثر من امه وابوا والكل تضحك عليه من يشوفون لهفتي وخوفي عليه .. اما الحجي فبعد شهر من الفاتحه حاجاني واعتذر مني لان وكف بطريقي اني وحسام الله يرحمه لان سأل عصام عليه وليش هيج احترك قلبي على موتت حسام وجان خايف عباله حسام غلطان ويايه بس عصام فهمه بالسالفه وكاله بالقصة وانوب انقهر بالزايد وجان بأي فرصه يحاول يرضيني ويجيبلي حالي من حال اختي شهد بكل شي يحسبلي حساب خطيه .. الله يحفظه ويطول بعمره ..

وهاي قصتي وخلصت ويمكن الالاف مثلي مروا بهيج ظروف ، الحرب لادين لها بالعراق .

وتستمر الحياة // أحببتهُ كما هو

************&&&&&&*********
اتمنى عجبتكم  القصة وخلصت وهاي نهايتها واعتذر على تأخيري عليكم بالفترات السابقة .. دمتم بحب