رواية أحببته كما هو الفصل السادس عشر 16 - بقلم رسل طالب

لآ ﻳُﻘَﺎﺱ ﺣُﺐ ﺍﻷﺷَﺨﺎﺹ ﺑَﻜﺜَﺮﺓ ﺭُﺅﻳﺘَِﻬُﻢ ؛ ﻓَﻬُﻨﺎﻙَ ﺃﺷَﺨﺎﺹ ﻳَﺴﺘُﻮﻃﻨُﻮﻥ القَلب رَغُم قَلهْ اللقَاء
▪️أحمد شوقي

********&&&&&*****&&&&****

بعد ما رجعنه للبيت واني الطريق كله افكر برنا وشون طالعه ، شكلها جان يجنن وبيومها تمنيت المشيه اليه والها بس قسمة الله بعد ولازم اصبر ؛ صعدت لغرفتي وخابرتها وطبعا ظليت ادك ساعة ، فوك الساعة يله جاوبتني ما ردت اعصب منها ولا اضوجها بهذا اليوم .. المهم ضلينه نسولف بيومها الليل كله لحد ال3 ونص واني جان المفروض اطلع ب 4 الفجر التحق بس ما كلتلها لان اعرف بيها راح تنصب مناحه وتظل تبجي وما ردت انزع فرحتها بهذا اليوم .

يله حبيبي اني نعست روحي نامي وراج كلية الصبح واني هم انام .

تمام عمري .. احلام سعيدة وتصبح على خير.

انتي احلامي وكل امنياتي واصبح وامسي كون بوجهج ياارب ..كولي أمين.

( ضحكت بخجل ) : اميين .

سديت التلفون منها ورحت كعدت عصام : يله عريسنه كوم ورانه طريق .

اي حاظر بس لو تخلي طلعتك وجه الصبح مو احسن؟

ولك يا طلعه الي يسمعك رايح للمدرسة لما التحاقي اني من البارحه بس علمودك اجلته يله كووم.

اني الجنط جنت محضرهن والملابس مخليهن بصفي على الجرباية فبسرعة بدلت ونزلت .

جان الطريق طويل ويخوف لان ظلمه وماكو انارة اضافة ان الوضع بالانبار مو تمام بعده والدواعش مسيطرين منعرف يا منطقة تصحى وتلكه نفسها ساقطة بأيدهم : عصام من ترجع انتبه للطريق وخاف احد يوكفك ابد لتوكف اخويه دوسلها حتى لو تزحكهم لتهتم ذولة اذا لزموك ميرحمون.

كول يا الله يخوي ماكو غير الخير ان شاء الله بس انته الي اريدك ادير بالك على نفسك .

ربك الحافظ يخوي هو ربك الحافظ اذا كاتبلنه عيشه نرجع واذا لا ( قاطعني عصام : كول يا الله ، اذكر ربك ).

صدك حسام هالمرة شكد وتنزل ؟؟

والله ما اعرف بس شكلي راح اطول لان عمليات التحرير راح تبدي .

باوعلي عصام اذا ابوية راد يزوجك عادي ازوج لان البارحة وره ما رجعنه كالي ما اريد اطول الخطوبة اقل الشهر والبنية اريدها بيتنه .

(صفن عصام عليه ): شو اني مكالي هالشي ليش ؟؟ زين انته ترجع بأقل الشهر مو؟

ما اتصور والله انزل لان عمليات مو لعب واذا بلشت اقل شي شهرين يله ننزل.

عادي ننتظرك شهرين مو مشكلة.

عصام داكولك ازوج ولتلح ما صدكت ابوية اقتنع فضني حتى من ارجع يكونون اهلي تعودوا على شهد واكدر افاتحهم بموضوع رنا.

هاي هيه عيني كول ما ميت عليك علمود الحب 😉 تريدني ازوج ..

طلعت الابتسامة كوه : طبعا انته شنو ، هي الروح والريه .. وراها سكتنا لحد ما وصلت للمكان المطلوب لان عصام ميكدر ياخذني للقاعدة فلكيت جماعتي واكفين ينتظروني  بسياراتهم العسكرية ودعت عصام وركبت من جديد بالهمرات واني بالي يمه وظليت ادعي الله يحفظه ويرجعه سالم للبيت .

وصلت تقريبا ويه 9 صبح للمعسكر كوة حصلت شبكة وخابرت على عصام داطمئن عليه : ها خويه وصلت؟؟ بشرني

والله بعدني بالطريق التاير طك عندي وكوه لكيت فيتر يسوي اليه .. لتخاف هسه اني بمنطقه أمان ماكو شي .

عاد اطمئنيت من سمعت هيج .. ودعته وسديته .

بلشت اجتماعات وتوجيهات على معارك التحرير وشوكت تبدي والخطط الي راسميها والي فهمته ماكو نزول منا ل3 اشهر تقريبا .

ظليت بنص الهوسة والاستعدادات تقريبا 4 ايام لا ليلي ليل ولا نهاري نهار حتى نسيت شي اسمه اهل ؛ بس رنا على بالي اتمنى اسمع صوتها ولو اعرف بيها هسه مقهورة مني لان التحقت بلا ما اكوللها بس شسوي .

وره اسبوع تقريبا من التحاقي جنت لازم واجب بليل وكاعدين الجنود يمي واحنه متعودين من نلزم واجب نحاول نخلصها بضحكه او سالفه لان الليل طويل وحيل صعب على الكاعد ومنتظر الموت باي لحظه فنحاول نتناسه هالشي بالتحشيش والضحك او يسولفون قصص او يلقون شعر فواحد منهم كال :

بيه حسرة شايب  مضيعله حيل
وصرت اشوف الموت من امشي وراي
اخ يادنيا البچت بگماطي ويل
كل هموم الدنيا مزروعه بگفاي
من عيني ما يطلع دمع بس التراب
وسنين مره الماعشت بيها بصباي
امنيتي ضحكه بليل كاسر بيه ليل
وغنوة معرسين ما تبجي اعلى ناي

بداخلي صدك تنهدت وجريت حسرة :اووف يا غنوة حياتي ويا كل امنياتي يا رنا ؛ حسيت الابيات توصف حالي وحالها ؛ لزمت جهازي وكتبتهن برسالة ودزيتهن الها وكلت شوكت متجي شبكة راح توصلها رسالتي اكيد ، حتى لو زعلانه بس تقره ابياتي راح تنسى كولشي وتسامحني اعرف بقلبها طيب ومتكدر على فراكي ودومها تقدر وضعي وشكد اعصب وافقد واسلوب ما عندي بس اليعجبني بيها تعرف شون تمتص غضبي مو من النوع الي تزيد الطين بله او ترادد او تحب تأجج بالمشكلة اذا صارت وهو هذا اكثر شي خلاني احبها اكثر ،؛رزانة عقلها ، ربي يحفظها اليه ويجمعنه سوه .

******************************
مرت الايام ويوم يجر يوم وحسام لا حس ولا خبر واني احس بداخلي الموت عايش ، جنت اسأل عليه عصام من يجي علينه حتى يشوف شهد ،يكولي والله ماكو خبر عنه بس بيوم الي وصلته خابرني ب9 الصبح ديطمئن عليه اذا وصلت او لا وراها انكطعت اخباره واحنه هم قلقين عليه .

المهم خلصوا هاي الفترة يطلعون يجهزون للعرس لان والد حسام راد يزوجون خلال شهر ، همه من النوع ميحبون الولد يظل طاب وطالع على البنية واهلها ، مرة رحنه عليهم للبيت بعد ما عقد عصام وشهد عزمونه على الغدة فبوقتها من كاعدين حجه ابو حسام ويه امي : شوفي حجيه البنية من تنخطب ما الها كعده بعد بيت اهلها ومو حلوة اطول فترة الخطوة لان تكثر المشاكل بيها ، فأني اشوف لو يخلصون كل تجهيزاتهم خلال شهر كولش كافي حتى نزوجهم ونفضها ، هذا رأيي بعد انتي شنو رايج حجيه؟

امي بوقتها استحت وما كدرت تكسر كلامه لان رجال جبير وشيخ صعبه ينردله طلب : هاي هي شيخنه الي تشوفه مناسب سوي وماكو كلمة النه بعد كلمتك .

لا العفو ما عليكم زود وانتوا اخلاقكم سابقة كلمتنا .

مشت الاسابيع ركض وقرب موعد العرس بس الكل جان ما مرتاح بسبب غياب حسام وانقطاع اخباره واولهم اني الي كطعت الاكل من قهري عليه تمنيته بس يرجع واشوفه وحلفت حتى زعل ما ازعل بعد منه لو يخلصني كتل (ولو هو بحياته ما مسويها وما مد ايده عليه حتى بالشقه ؛ بس منكد ما روحي لابت على شوفته واحس الدنيا سودت بعيني بغيابه ) .

وطبعا كل متصير فرصه احاجي عصام واكوله شخباره ما سألتوا عليه ما سمعتوا شي عنه ؟ بحيث مرة من المرات كالي ولج امي الي جابته متسأل عليه بكدج عمي هنياله لحسام عليج وابتسم وغمزلي .

حسيته راد يخفف عني لان يعرف بوضعي وشون صرت حتى ضعفت من القهر ومن كد التفكير .

من قرب اسبوع العرس وتقريبا كولشي جهز  ما تحملت دزيت على عصام بيتنه وحاجيته : فدوة عصام شون تظلون هيج محد يروح عليه ولا يسأل ؟؟ منعرف شصار بي ولا وين هسه هو !!

ولج وين اروح قابل هو بجامعه كاعد واروح اسأل؟؟ بس لتخافين اكو ولد اعرفه راح اروح عليه مصارلة يومين من نزل وهو بنفس وحدة حسام يداوم .

عفيه عصام ضروري روح اله واسأل .

تدللين مرة اخويه😉 من عيوني اروح واسأل وميكون خاطرج الا طيب .

جان دائما يحاول يشاقيني من يشوفني ، جان يحس بحركت قلبي على اخو وشون تبهذلت من بعده ، حسيته صدك رجلي مو بس حبيب وخاصة بعد ما علاقتنه قوة بأهل حسام.

جانت رنا تأذيني حيل من تسأل واشوف الحزن بعيونها وبصوتها جنت كل ما اشوفها اذكر حسام عبالك من ريحته ؛ كل مجانت تسألني اكلب الموضوع تقليد حتى اخفف عنها وابد مجنت ابين الها خوفي وقلقي على غياب حسام ، ما ردت اضعف كدامها لان كبل تنهار ..اخذت السيارة وطلعت بوجهي للمنطقة الفلانيه الي بيها الولد ساكن من وصلت يم بيتهم احس روحي مقبوضه مو مثل كل مرة ، خليت ايدي على قلبي ونزلت  دكيت الباب : السلام عليكم

وعليكم السلام تفضل ابني ( طلعتلي عجوز جبيرة بالعمر )

يمه بلا امر عليج ممكن تصيحيلي ملازم اول رائد اذا موجود؟

اي يمه موجود بس منو اكوله؟

كوليله عصام اخو رائد حسام .

هله بيكم هسه اصيحه.

شويه والولد طلعلي: هله عصام شونك شخبارك؟

الحمد لله بخير انته شونك؟

بخير .. تفضل ليش واكف بالباب؟؟

لا تسلم يخوي اجيتك اسأل على حسام منعرف باخباره وصار فترة نتصل ومنحصله.

اي مو الشبكه ماكو هناك والوضع تعبان صراحه ،بس حسام بخير ما بي شي جنت وياه قبل يومين من نزولي.

زين هو ليش ما نزل؟؟

مو اني بسبب امي لان وضعها حيل تعب وبالتواسيل نزلوني.

لعد وحسام شوكت ينزل؟

والله عصام مو اقل من شهرين بعد.

شون قهر زين شون نوصله ؟ اريد اخابرة.

لحظه اكو ولد اعرفه راح اخابره الك لان هو بالابراج واكيد عنده شبكه .

طلع جهازه ودك رقم وحاول اكثر من مرة يله حصله : الو السلام عليكم شونك رياض شخبارك؟ اكولك تكدر توصلني لرائد حسام اهله يريدوا ؟؟

تمام هسه انادي عليه بالجهاز ابقى على الخط .. ضلينه تقريبا ربع ساعه ننتظر بين ما نادوا على حسام وهو اجه يركض لان صوت انفاسه جان سريع من كالي الو منو ؟؟

ولك حسام اني عصام اخوك شونك اخبارك ظل بالنه يمك يمعود وينك؟

هله بأخويه الزود هله باليسأل عليه .. شنو ويني غير بالمعسكر قابل مثلكم دوامكم مال روضه هههههه ( ردت الطف الجو لان حسيت بقلق عصام من نبرة صوته) .

يول بس انزل واني اشوفك الروضه شجابت .. ولك حيل مشتاقيلك شوكت تنزل؟؟

والله بعد شهرين ما اكدر انزل هسه.

اكولك ابويه حدد العرس هذا الاسبوع بس متردد واني هم ما الي نفس ازوج وانته ماكو ف راح أأجله.

لا عصام اخيك دير بالك تأجله اذا تعزني كمل وكول لابويه اني بخير وخلي يكمل شغلتك فدوة .

بس حسام اني ..

قاطعته : داكلك ازوج لتظل تعاند ، سلملي على كل اهلي وان شاء الله شهرين وانزللكم .. شد حيلك ودير بالك على مريتك وبوسلي امي من راسها .. ورنا شخبارها ؟؟

حال الضيم حالها لا اكل ولا شرب تلوب بس تسأل عليك ظلت تتوسل بيه حتى اجي للمعسكر واسال عليك .

ضحكت : هاي مخبله مجوز من سوالفها ، سلملي عليها هوايه وكوللها حسام بعده على وعده واصبري ما بقى شي واعوضج عن كل هالقهر .. ان شاء الله .

ان شاء الله ترجعلنه سالم ونفرح بيك وبيها يارب.

خنكتني العبرة بس حاولت ما ابينها كدامه فكتله : لازم اروح هسه سامي للكل وعينك على اهلي مع السلامة ..

سديت الخط ونزلت بسرعه من البرج دموعي ما كدرت احبسهن اكثر من هيج .. ما اعرف ليش جنت مقهور لهدرجه .

رجعت لوحدتي واني كارهه اليوم الي طبيت بي عسكرية جان الالم والاشتياق الي بداخلي مينوصف ولا ينحمل ..

سديت الخط من عنده وتشكرت من رائد على وكفته ويايه وتوسلت بي حتى اشتريله رصيد لان رصيده طار خطيه بس ما قبل وكلب الدنيا وكالي عيب عليك انتوا اخوتي وما بيناتنه هالسوالف.

رجعت لبيت اهل رنا صح الوقت جان متأخر بس ردت اطمنها اعرفها حتى الليل مدتنامه لان شهد تسولفلي عليها دكول تظل مخليه المصلاية والقرأن تقريبا الليل كله متنام الا وجهه الصبح.

دكيت الباب وطلعتلي ام رنا : شونج خاله اخبارج ؟ اسف على ازعاجكم هيج وقت

تفضل خاله ..

زاد فضلج بس صيحيلي رنا اريد احاجيها .

طبيت بسرعه وعصام ظل بالمطبخ واكف : يمه رنا عصام بالمطبخ يريدج .

بس كلت هيج ما اشوف رنا غير خلت الشال على راسها ونزلت تركض ..

ها عصام بشر عرفت عنه شي؟

ابتسمت : اي وحاجيته هم ( هي شهكت هنا ) .

صدك تحجي صدك حاجيته ؟ شونه شخباره؟؟

الحمد لله زين ويسلم عليكم هوايه وحلفني اكمل زواجي لان منا لشهرين يله ينزل .

دموعي نزلت لا ارادي : شهرين مو هوايه ليش هالكد؟

يا رناوي يا عيني هو هذا عسكري بعد وهذا دوامه خما تظلين تنصبين مناحه كل مرة ؟

مو حقك انته ما حاس الي بقلبي وكمت ابجي .

على بختج لو ما حاس مجان رحت بهالليل لبيت الولد وخابرته ومن رجعت ولو الوقت متأخر بس والله ما انطاني قلبي اعوفج لباجر الصبح بلا ما ارجعلج خبر واطمنج.

رحم الله والديك ما قصرت ممنونه منك .. ترخصت منه وصعدت لغرفتي.

يمه عصام اشكرك وتعبناك واعذرها بس تعرف برنا شكد حساسه .

لا خاله على بختج رنا اختي واعزها واقدرها بنفس معزة حسام واكثر .. وحسام وصاني عليها وان شاء الله بس ينزل نحاجي الحجي حتى نجي نتقدم الكم ونخطبها.

ان شاء الله يبني الي بي خير ربك يقدمه الهم.

يله ارفع الزحمه وتصبحون على خير .

وانته من اهل الخير خاله.

طبعا من دوختي طلعت وحتى شهد ما سألت عليها ولو هي دجاجه هيج وكت نايمه ..

رجعت للبيت لكيت الحجي كاعد وينتظرني : ها وليدي وين جنت ليش كل هالتأخير ؟

والله يابه رحت على ولد صديق اخويه حسام وياه بالمعسكر يداوم سمعت بي نازل ورحت سألته على حسام.

اي وشكالك طمني يابه؟؟

لا اطمن حجيت وياه خابرته من تلفون الولد على واحد يشتغل بالابراج وكدروا يوصلوني لحسام ويسلم عليكم كلكم وكالي اكولك تكمل العرس لان هو منا لشهرين يله ينزل.

بيها الخير الله يطمنك يوليدي مثل ما طمنتني على اخوك .. وان شاء الله يكمل عرسك وافرح بحسام بس ينزل .

صدك يابه يعني تخطب لحسام؟

اي يابه لعد ليش ما اخطبله مو هذا ابني العود واريد افرح بي .

منو تخطبله؟ ( كلتها واني ميت من الخوف خاف هم من بنات عمي او كرايب).

الي يريدها هو اني اخطبها اله ما افرض عليه شي بعد .. اخوك هم شاف الويل بحياته وبالعسكرية ما ارتاح ابد .. عاد خلي يرتاح بزواجه.

بداخلي فرحت حيل : وينك حسام وتسمع كلام ابويه جان هسه طرت من الفرحه والكاع ما شالتك.

**********&&&&&&&**********

ان شاء الله عجبكم البارت هاي اول بارت اكتب بي اكثر من 2000 كلمة لخاطركم 😉😍 لتنسون التصويت ودعمكم اليه هو الي يسعدني ويحفزني بالاستمرار وشكرا على صبركم عليه ..