رواية أحببته كما هو الفصل الثالث عشر 13 - بقلم رسل طالب

الخلافات لا تقتل الحُب بل تُجدده ..,
فمن يّتخذه كحجَة للفُراق لم يعرف معنى الحُب أبدًا "

********&&&&&&&&*********

رجعني مهند للبيت وظلينه طول الطريق ساكتين ؛ من وصلت نزلت وكتله مع السلامة ، رد عليه وعينه على الشارع ؛ حسيت بلحظتها ان رغبته بيه راحت ،حيل انقهرت بس شسوي حبل الكذب قصير وما اكدر انكر علاقتي بحسام ؛ اذا ميسمع مني راح يسمع من غيري واصلا بعد الي صار مستحيل راح يكعد وميدور وره موضوع حسام ؛ فاني اختصرت هالشي وحجيت الصراحة من اول ما سألني وفضيتها.

صارت افكار بعقلي هوايه ، ما رحمتني بيومها ولا عقلي رحمني 😔 حسيت بالمرارة بداخلي ، حسيت نفسي خسرت شيء بس مدا اعرف شنو ؛ومتندمه على شيء وهم مدا اعرف شنو هو !!

الاتعس من اجاني شعور ان اني ما اسوه، من اذكرت مهند شون كالي مع السلامة حتى بلا ميباوع عليه ، نزلت دموعي وانقهرت على نفسي حيل ؛ ضليت ابجي لحد ما نمت وبلا شعور لثاني يوم.

كعدت الصبح لكيت الموبايل محترك ،كومه مكالمات من اسو ومن رقمين ما اعرفهن ومسجات .

نزلت امشي كوه عبالك ميته بدلت وطلعت للدوام ؛ جانت السيارة تمشي بيه وبداخلي اتمناها متوصل .

دخلت للكلية وبوجهي رحت للمدرجات هناك كعدت مخنوكه وما اريد اشوف احد ؛ طلعت ملازمي وسويت نفسي  داقره بيهن .

صباح الخير

ضليت صافنه اباوعله ؛ بس مجاوبته.

وينج البارحه؟

ظليت مدنكه بالملازم ما باوعتله.

اقترب مني وسحب الملازم مني.

مو داحجي وياج ليش هيج تسوين ؟

باوعتله ودموعي نزلت : لتأذيني اكثر والله ميته من دونك.

انصدم حسام من كلامي واقترب مني : اشش كافي حبيبي لتبجين دموعج غاليه عليه فدوة ؛ ولج لما الناس منا جان شبكتج هسه .. فدوة اسكتي ؛ ما اتحمل اشوفج هيج قلبي وعمري وروحي وكل دنيتي انتِ.

مسح دموعي ، وشويه احس روحي هدأت ،جنت احسه مغناطيس بس اشوفه يسحب كل الطاقة السلبية مني ، وارجع انسانه بس الفرحه بعيونها .

كومي ويايه ..

وين نروح؟

نروح لمطعم مرتب ،عازمج على الريوك .

ما اشتهي ..

لخاطري اقبلي .. عندي كومه حجي وياج.

وافقت .. وطلعنه سوه .

وره ما وصلنه وكعدنه ، حسيت بشعور غريب عكس شعور البارحة تماما ؛ البارحه من كعدت ويه مهند تندمت طلعت وياه وجنت خايفه احد يشوفنه وحتى رغبتي بالحديث معاه راحت لدرجة من سألني على حبي لحسام رأسا اعترفت ، كأنوا ردت ابعده عني وانهي هاي العلاقة قبل لتبدي .. بينما اليوم فرحانه بكعدتي ويه حسام عبالك واحد من اهلي وكاعده وياه وبداخلي رغبة اكول للموجودين حوالينا هذا حبيبي وزوجي المستقبلي ، اريد اتباهى بحبي اله وبوجودي وياه .

قطع سلسلة افكاري : حبيبتي وين صافنة؟

ابتسمت : صافنة بيك .

فديتها الصافنة بيه 😘 اعرف شنو ابالج ، بس خليني اشرحلج وبلا متقاطعيني.

طبعا بهذا تصرفه هو عكس مهند الي جان همه بطنه مو مشاعري ؛ اصلا لو تهمه مشاعري مجان سألني على حسام بطريقته المستفزة الي خلتني ارجعله الجواب بشكل صعقة اله.. بلش يسولفلي حسام على كل الي صار بالتفصيل ، بجيت وياه ادموعي كامت تصب صب عليه وعلى الي عاناه.

ولج عمري كافي فدوة مو عيونج راحت من البجي ؛ همزين اختاريت الطاولة بزاوية ومنعزلة توقعتج راح تصيرين فلم.

صفنت عليه بكل شيء مركز ويايه ومحسب حساب اله قبل ليصير ( هو هذا الحب ان يحس بيك ويخاف عليك ويضحي علمودك في سبيل يكسب قربك، الحب مو كلمة ونظرة اعجاب ؛ الحب هو استيعاب للطرف المقابل الإنسان ميحب بأسبوع ٱو شهر ٱو حتىٰ سنة
الحب يحتاج مشاكل.. ٱزمات.. تعب
ٱوقات سيئة.. و مواقف بشعة
ويلزمه عشرة طويلة ليصبح حب حقيقي
بأختصار.. الحب يبدأ عندما ينتهي الحماس

لا يمكنك ٱن تقول ٱنك تحب البحر وٱنت تقف علىٰ الشاطئ
يجب ٱن تخوض في ٱعماقه.. تضربك ٱمواجه
تشرب من مياهه المالحة.. تجرح قدمك بصخره.. ترىٰ قاعه المظلم
و عندما تعود الىٰ الشاطئ ستراه بشكل مختلف
لن تراه مثالي.. لقد لمست عيوبه
و رأيت ظلماته وعرفت غضبه
عندها فقط ٱما ٱن تكره البحر.. ٱو تحبه بكل ما فيه

لهفة البدايات ليست حب !) هذا مختصر لعلاقتي بحسام ، الازمات هي من اثبتت ان حبنا حقيقي .

حبيبي وهسه شون اذا ابوك منعك من الزواج؟

لديرين بال اشوفلي الف طريقة واقنعه بيها بس خلي وقت يمشي على موضوعي لان هو بعده زعلان مني.

ان شاء الله يرضى عليك ويجبر بخاطرك ياارب.

فدوة لهلحلك على هالدعوة😍

خجلت منه ..

يله حبي خلي اطلبلج شي وانتي كومي غسلي ما اريد احد يشوفج شابعه بجي .. دموعج غاليه عليه.

رحت للحمامات اعدل نفسي وهو صاح النادل حتى يطلبنه وجبه على ذوقه .

بعد ما خلصنة اكل .. كالي امشي اوصلج للبيت اريد اشوف خالتي مشتاقلها هواية .

بداخلي فرحت : تمام امشي.

وصلنه للبيت ، صعد السيارة على مقدمة البيت ونزلت اني وياه ( حسيت بشعور كأنوا نازله من سيارة رجلي وجايه زيارة لأهلي .. صدك هذا الشعور حيل فرحني وتمنيته يصير حقيقه بيوم).

تلكتنه امي من الباب باسها من راسها وسلم عليها .

شونج يمه شخبارج ؟

هله بوليدي ..وين هالغيبة ؟ على طول اسأل رنا عليك .. شونك انته؟

الحمد لله بخير .. والله دوام وقليل اتواجد بالكليه واليوم ما صدكت صارت فرصة جبت رنا واجيت اشوفج .

كل الهلا بيك تفضل يمه .

لا تسلمين بس حبيت اسلم عليج .

والله ميصير تبقى على الغده اليوم..

دايمه امي الغالية عالجايات وعد راح ابقى ( التفت عليه وغمزلي)

ان شاء الله وليدي كل الهلا بيك بأي وقت 😊

راح واخذ روحي وياه .. اووف شون رجعتلي روحي برجعته اليه، ولا عبالك متعاركين ومنفصلين صارلنه سنه عبالك البارحة جنه متواعدين... صدك من تحب تغفر وتنسى وتكون انسان متسامح وصعب تشيل حقد بقلبك تجاه حبيبك.

مرت الايام بينه ورجعنه احسن من قبل وعلاقتنه اقوى .

اكولك حسام

كول..

ابويه ديلح عليه حتى ازوج شون ؟

ليش ما نسى موضوعك؟

لا والله دمرني يوميه يحجي بي .. كمت ارجع للبيت متأخرة في سبيل الكاه نايم حتى ميحاجيني.

أخييك دبرني راح انجن وربك ..

ميخالف افكرلك بحل لتشيل هم.

ان شاء الله ممنون منك.

عيب هذا واجبي .

ثاني يوم رحت للكلية وشفت رنا كاعده ومخبوصة هي واسراء.

صباح الخير

صباح النور

شونكم ..؟

زينين انته شونك؟

بخير .. بس شبيجن شو مهوسات ؟

ست رنا ما قاريه .

صفنت عليها : ليش ما قاريه حبيبتي؟

من وره شهد افندي ..

ليش شبيها شهودة خما تمرضت؟

لا والله بس اجونه البارحه ناس وديخطبوها .

(اشو من يمي قلبي رجف وضاج ) : اي وشصار؟

ما ادري بعد ديسألون ونشوف .. المهم التهيت وياها وما قريت امتحان.

لتلهيني اتفرغلك بس نخلص امتحان .

اوك قلب راح اروح اكعد ويه جماعتي ومن تخلصين تعالي للنادي انتظرج.

اوك عمري.

رحت للقاعه وامتحنه وطلعنه ..

شفته كاعد ويه جماعته ما اجيت عليه لان ميقبل كعدت بمكان شويه بعيد عنه ودزيتله رسالة : حبيبي اني كاعدة جوة شجرة الرمان قرب العمادة .. انتظرك ❤.

ما جاوبني ( استغربت !!مو من عوايده ميجاوب على رسالتي )

وره ربع ساعة اجاني : ها حبي شونج بالامتحان؟

الحمد لله زينه.

زين.... ( سكت )

شو تأخرت يله اجيت ؟ ومجاوبة على رسالتي؟ شنو ما شفتها؟

لا شفتها بس كلت ماكو داعي اجاوب .

اوك ...

ظلينه كاعدين صافنين ، اباوع عليه بغير عالم وصافن وما ادري بشنو يفكر ؟

حسام .. شبيك ؟؟

شنو شبيه ؟

احسك مو على بعضك ؛ صاير شي؟

لا ماكو شي .. بس تعب دوام مو اكثر .

اممممم متأكد؟

شبيج رنا شنو متأكد داجذب عليج قابل؟ لو الا تسويها قصة يله ترتاحين؟؟

اعصابك ما حجيت شي ؛ غير شفتك مو على بعضك وظل بالي عبالي بيك شي.

الله يسلم بالج .. ماكو شي.

سكتت وهو هم سكت ظلينه عشر دقايق على وضعنه بلا منحجي كلمة وراها هو حجه : اكولج رنا .. ذولة الي تقدموا لشهد منين؟

غربة مو اقرباء ( جاوبته بضوجه)

وين شافوها لعد ؟

التفتت عليه بأستغراب : شنو وين شافوها ليش هي مو مدرسة انكليزي؟

يعني الولد وياها بالدوام؟

جاوبته بضوجه : لا .. اخته بالدوام وياها وعجبتها وتقدموا.

زين وشهد شنو رأيها ؟

صدك ضجت ، صح هي اختي بس ليش هيج ديسأل : مقتنعه دكول شفته خوش ولد .

ادري هي بس شوف ، غير تعرف وضعه اسلوبه خاف ميعجبها خاف ما عنده اسلوب ويأذيها؟

اممممم .. ما اعرف بعد هو الزواج مثل الركي انته وحظك .

هنا كمز من مكانه : شنو ركي شنو بطيخ من كل عقلج عود انتِ جبيرة ومثقفه وهيج تحجين !! لتصيرين انانيه وانصحي اختج.

شبيك حسام شنو انانيه ؟ وبشنو انصحه ؟؟ الناس خوش ناس وبقى بس خالي يروح يسأل عليهم.

انطيني عنوانهم ..

ليش يمه انطيك عنوانهم؟؟

اني اروح اسأل عليهم .

لا بله !! وبصفتك شنو تسأل ؟؟

صديق العائلة ويهمني أمر شهد ... وتستاهل كل خير ولازم ياخذها بس الي يستاهلها.

(حسيت بقهره بداخلي ، هذا شجاه معقولة حاط عينه على اختي واني ديضحك عليه ؟؟) : تسلم حسام بس اكو خالي وهو الي يسأل عليه ميحتاج اتعب نفسك.

لا تعب شهوده راحه انطيني العنوان .

ضجت حيل بس حاولت اتمالك اعصابي : العنوان عند امي ما اعرفه اني.

لج من كل عقلج هاي اختج المفروض تعرفين كل شي عن الي تقدملها .. هسه اخابر امج واخذ العنوان.

وفعلا خابر امي وسلم عليها وحجى وياها وطلب العنوان .. وامي كيفت لان كاللها عنده صديقه ضابط استخبارات بالمنطقة الي نازل بيها الولد وراح يجيب قراره الها.

سد التلفون واباوع على وجه الراحه وكعد يدك ارقام ويخابر ويكلف بجماعته حتى يرجعولة خبر بأقرب وقت على هذا الولد .. وره ما كمل وسد التلفون : يله اني اترخص عندي شغل لازم اطلع .. محتاجه شي؟

ظليت صافنه : سلامتك ما محتاجه شي.

يله لعد مع السلامة .

ابتعد وراح حتى ما انتظر اكوله مع السلامة.

رجعت للبيت والنار بصدري تاكل اكل بيه ..

يمه حسام خطيه خابرني ( قاطعت امي : اي يمه جنت يمه كاعدة من خابرج).

شون ولد ربي يحفظه .

نزلت شهد من فوك : ها رنوش صدك حسومي راح يسأل على هذا الولد؟

باوعت لشهد عين رافعتها وعين منزلتها ( معاجبني) : حسومي!! شو شايله التكلفة من شوكت صار حسومي؟

هاي شبيج رنا شكو ؟

سلامتج عيني ست الحسن ماكو شي . (طبعا اختي ابيض مني وعيونها عسلي على صفار بس بحياتي ما جنت اغار منها واكول هي احلى مني .. بس تصرف حسام اليوم جنني وكرهني بروحي وخلاني اشك بي وبأختي).

وره يومين احنه كاعدين العصر واندكت علينه الباب .. طلعت امي تشوف منو ونسمعها تفضل يمه هله بيك تعال فوت ..

انصدمت هذا حسام الي اجه .. وهو اصلا ما منطيني خبر وصارلة يوم لا حس ولا خبر.

سلم عليه وسلم على شهد وعينه مشالها من شهد ..

اني كاعدة وافور بمكاني ..

يمه رنا سويلنه جاي وكعك ..

اشرت امي لحسام تفضل خالة بالاستقبال .

ورة شويه اجتي امي وصاحت شهد كالتلها تعالي حسام يريد يحاجيج .

تمنيت اطب للاستقبال واخنك حسام .. هذا شديسوي ! شيحس ؟!

وره شويه وديت الجاي والكعك قدمته اله وكعدت ساكته .

امي وجهتلي الكلام : يمه رنا .. حسام خلف الله عليه راح وسأل على الولد وطلع مو خوش وعنده مشاكل هوايه وجاب معلومات خالج ما كدر يجيبها .

هنا صدك تيقنت حسام مخلي عينه على شهد لدرجة خرب قسمتها .

خير يمه الي بي خير الله يقدمه .

باوعلي ورجع باوع لشهد وابتسم : ان شاء الله تشوف كل الخير شهودة تستاهل الوردة.

صدك بعد ما اتحملت : اترخص منكم عندي امتحان .. طلعت وعفتهم .

************&&&&&&*********