رواية احببتك انت الفصل الأول 1 - بقلم ESRA'

#احببتك_انت .
#جيانا .
.
.
.
.

مرحبا ، اني سارة .. سارة عمار عمري 21 سنه
اني الثانيه من اهلي ، اختي الجبيرة ابتهال و اخويه الصغير جعفر

ابتهال متزوجه و عدها طفل علاوي واني بحساب الجبيرة هسه 💃

طبعا اني حاليا اول معهد ، صارلي اداوم شهرين تقريبا
اكو ولد وياي اسمه احمد كلش معجبه بيه
بس ماريد اعترف و اتسرع حت لا اندم

حياتي هادئه كلش ، اروح للدوام وارجع اشتغل شغل البيت اخلص انام
امي من نوع المو صديقه ، تحب ابتهال وعدها هي البنيه وبس

معندي وقت ادرس ابد
جنت ابلش ادرس بالخط و من اوصل راسا اروح للمكتبه اقرة لحد وقت محاضرتي

جنت مميزة شويه
محجبه وحجابي حلو ، لا هو كلش ملتزم يعني عبايه و ولا هو مستهتر مثل ما اشوف بالمعهد

جان حجابي مانتو و بنطرون او جبه طويله
لا عريض و ولا لزگ .. مكياج اكثر من فونديشن و كحله ما احط

اني شوي سمرة ، قصيره 😥 ، متروسه
يعني لو بيه طول حلو يكون شكلي

جنت اشوفهم طناطل ، احمد كلش طويل بالنسبه لطولي 😄
بس احب من امشي وياه و يكولي انتي بنتي

جان من يعرفني ع احد من جماعته يكوللهم بنتي سارة ، جنت اموت ضحك

مرة كاعدة بالمكتبه اقرى ، عندي امتحان ماليه
دك التلفون احمد «الو ، وج هاي وين مختفيه صار ساعه ادور» سأل بعصبيه بدون ما ينطيني مجال لحد ما سكت رديت عليه

«تعرف المكان حميدان ، بالمكتبه كدام العمادة تعال»
يموت من اكوله حميدان ، يكولي تذكريني ابيبيتي 😄

احمد .«شوف البطرانه ، كومي ولج تعاي بساع يول ، جوعان مومال افرفر»

سارة .«هاي شبيك ، عليك الله روح جيب الك كوب جاي وتعالي ، والله ممكمله الامتحان»

تافف وسداه
مرت عشر دقايق واجاني موجر
خطيه صاير احمر منورة الشمس ، اف احبه شون بيه

كعد كدامي واني صافنه بيه
احمد .«وج هيج حلو اليوم متكدرين تشيلين عينج» حجه بضحكه ساحرة اخذت كلبي

سارة .« وين اكو ، روح شوف نفسك شون صاير
انت وين و الحلا وين ، صفنت دا شوف شرح تغرد اليوم»

احمد .«سارة شوكت تعترفين؟»
بقيت صافنه بوجهه «شعترف ولك ، حميدان عوفني ادرس لا ارسب و اجننك والله»

خربتها عليه لان اعرف قصدة ، يمه يريد اعترف اني ، هاهيه عايزة والتمت 😒

كمنه من صار الوقت وبالطريق نراجع المحاضرات ونضبط الامتحان

احلى شي هو وجود احمد بحياتي ، يمه احبه

انتهى اليوم ابساطه واحمد وصلني للخط وراح لخطه لان سيارتهم توكف يم سيارتنه

حركنه وهم هم
رجعت للبيت منتهيه تعب وراسي طبل من هوسه الخط
لو مدمنه جاي جان شربت حت ارتاح بس ما اطيقه ابد ولا حت ريحته

بدلت ونزلت سويت عشه لان خواتي عدهن دراسه ، خلصت العشه صعدت عدلت الهدوم ورتبت الفوك لحد ما يخلصون واغسل الماعين

اخلص شغلي ب11 اروح انام لثاني يوم ب6 احمد يكعدني

هو عندة شغل ، قبل الدوام يشتغل بمدرسه و ورة الدوام عندة محل ملابس

يريد يلم ايدة حت يتزوج ، يكول اكو بنيه يحبها
رغم هذا الشي قاهرني بس اني احبه
صعب اوكف مشاعري ناحيته وعندي امل انه اني هي اللي يقصدها

صار وقت الدوام وطلعت ، وهم اجاني للمكتبه جنت ادرس
كاعدين ، خابرة مرتضى صديقه كاله استاذ الحاسوب مموجود
كيفت يعني ساعه ونص ماعندي شي وهيج اكدر اقرة امتحان باجر مال انكليزي

احمد كال نطلع نتريك ونرجع بس اجى مرتضى و تمارة خربوا الطلعه ، تالي طلبنه من الكافتريه عادي وتريكنه داخل المعهد

مرت ايام واجت وعلاقتي وي احمد تقوة وتعمق
تمارة تكولي خففي كلش مبين تحبينه
اضحك شنو بيدي يعني ، احبه ابساطه

هو الوحيد اللي شفت منه معامله مثل ابويه اخويه و حبيبي ، حنين عليه كلش واعرف هو يدري احبه

كاعدة بالمكتبه اجه مرتضى وياه صديقه علي
مرتضى .«هلا سوس ، وج هنا وحدج وين احمد»
سارة .«هلا بيك ، هسه يجي راح يجيب اله جاي»
علي .«سارة ممكن احجي وياج؟؟ اذا ممكن»
سارة .«تفضل كول»
علي اندار على مرتضى .«مرتضى تنطيني دقيقه واجيك ، عندي شغله ارد اكولها لسارة»

باوعلي مرتضى بمعنى ميخالف ، صراحه خفت بس ابتسمت بهدوء كالي اني هنا قريب وراح

كعد علي مقابيلي ، جنت فارشه كتبي ع الطاوله وكأنه كاعدة بجربايتي ، خجلت كمت ارتبهم وانتظر يحجي

علي .«سارة اثبتي خل اعرف احجي»
سارة .«كول اسمعك باذني قابل بأيدي» جان مبين متوترة لان محد كاعد وياي وحدنه غير احمد

اف احمد منين اجيبك هسه و تنقذني
علي .«سارة ، اني مراقبج صار فترة ، واعرف اخلاقج وسائل عنج البنات و الاساتذة والكل حمد بيج ، حتى لمنطقتكم وصلت وسئلت عنج وعن اهلج وسمعت كل خير .. وكلت اخر شي اجي احجي وياج ، ارد اعرف اذا ماكو احد بحياتج ارد اتقدم واخطبج»

صدمني 😨😨
شون واصل لمنطقتي ، اني اروح واجي بالخط
معقول لاحكني يعني ، شون اذا وصل الموضوع لأهلي

كمت ارجف مدري شنو ارد
رفعت راسي داريد احجي جان اشوف احمد فوك راسي

احمد .«علاوي بله زحمه ، اريدك بسالفه»
علي .«ما تتاجل ؟ عندي شغله وي سارة »
احمد .«كوم ولك ، سارة كملي دراسه بين ما اجي»

هزيت راسي اي وراح بعيد شوي عني
شي 5 دقايق واجاني شبه عصبي ، و علي من بعيد واكف يباوع
احمد جمع غراضي وجرني من ايدي ومشى من كدامه

اني خجلانه مدري من تصرف احمد لو من كلام علي ، دخت وين افكر بالضبط

بقيت امشي وي احمد و طلع من المكتبه رحنه للحديقه يم القسم وحجه وياي بعصبيه

احمد .« اي ست سارة ، مستمتعه كعد يعترفلج و يحجيلج مدى اعجابه بيج مو»

سارة .«هاي شبيك احمد ، يا اعتراف»

احمد .«لا تنكرين ، لج لا تنكرين .. القسم كله يعرف سارة الي ، شهالعين اللي اجه اعترفلج بيها؟»

سارة .« شنو سارة الي ، احمد شدتخربط ، ما اسمحلك تحجي وياي بهالاسلوب ابد »

عصرني من ايدي عاط «سارة» الكل التفت علينه ، غوركت عيني بالدموع رفعت ايدي على ايدة «اتركني احمد دتاذيني» بقه صافن بوجهي وتركني حيل

رحت كعدت يم غراضي ودموعي تجري
ادري قابل اني اللي صحت علي وكتله تعال اعترفلي ، وهم هو ما اعترف

بقيت ادردم لحد ما كعد احمد كبالي واخذ ايدي بين اديه وحط راسه عليهن لحد ما هدئ

غمضت عيوني ماريد اشوفه ، اعرف احبه ورح اسامحه ، لازم اخذ موقف ع الاحراج السببه اللي

شوي كالي «سارة» مرديت عليه
رجع كال «سارتي» وكعت دموعي متحملت

باوعتله يباوعلي بنظرة كانه طفل
سارة .«وخر ارد اروح ، بدة وقت المحاضرة»

محجه شي شلنه الكتب وطبينه للقسم
خلصت المحاضرات واني اتحاشى النظر وياه
ماريد احجي شي لان هو لازم يبرر مو اني اللي اروح اسئل ليش هيج سويت

انتهى اليوم ومصار شي و ولا حجه حرف
رجعت كبل نمت ، حت للشغل و لتحضير العشه ما اهتميت رغم اعرف رح احصل عركه بس مو مهم ، هسه ارد ارتاح بس

كعدت ب4 الصبح جوعانه ، النهار كله مماكاه شي عدا الصبح اخذت تفاحه وطلعت بالطريق اكلتها

نزلت المطبخ هوسه و البيت كتب اخوتي هوسه
والله تعبت شون بيه يعني

نزلت تنظيف و ترتيب لل6 خلصت كلشي عود وكفت سويتلي بيضه

دا اكل جان يدكلي احمد ، ترددت ارد لو لا
اخر شي فتحته «الو» وسكتت
احمد .«ها حب ، كاعدة»

حب؟؟ و احمد ؟؟ وين العصبيه!!😨

سارة .«انت تعرف اني منو؟ لو مخربط بالرقم»
احمد .«سارتي ، منو غيرج يعني 😄😄»

ضحك ضحكته اللي تذوبني بقيت ساكته
احمد .«يول ، كومي صحصحي وتحضري ، اليوم اريدج بشي مهم وعندي موضوع واكف عليه حت ندرس سوة»

سارة .«كول عندك مصلحه ، حب و سارتي 😏»

احمد .«شوف سوء النيه ، دروحي هي ساعتين تلاثه ونلتقي»
سارة .«ديالله روح دا اتريك»

احمد .«عافيات ، يلا مع السلامة»

طبكه ، شكد سخيف ، يعرف شون يحرگني ويروح ، مكروه

كملت و كمت دا اطلع من المطبخ تلكتني امي وبدت تعدد لان بارحه مسويت اكل ونمت

عفتها ورحت غرفتي حضرت الجدول و راجعت المحاضرات مدام عندي وقت
مشتاقه اكعد وي الكروب ، كله بالمكتبه مدا اشوفهم

صارت ساعه 11 طلعت للخط
اليوم لبست مانتو جديد نيلي وياه بنطرون كابوي ع ابيض و شال نفس اللون

جان لطيف عليه و طوخت كحلتي شوي
حبيت شكلي كلش كلش

وصلت احمد واصل قبلي بقه يباوعلي و ابتسامه على وجهه مرسومه ، اف شكد احبه بس لو ما عصبيته شوي نصير احلى ثنائي

احجي بگلبي واني دا امشي متوجهه الهم جان يصير كدامي علي فاجئني

علي .«سارة ، اريد احاجيج»

سارة .«يمه بسم الله ، علي ما حب هاي التصرفات ، فجأة تطلع بوجهي تخرعني ، بالله فهمونه غلط شرح يأثر عليك كثر ما يأثر عليه»

علي .«يعني احمد ما يأثر عليج من انتي قريبه منه ، سارة اني مقاصد ااذيج تعرفين هالشي»

احمد بعيد عنه شوي ديباوع و اكيد ديسمع

سارة .«علي ، خلينه اصدقاء ، اني اريد اكمل دراستي وممفكرة بالارتباط ابد .. اذا كتلك اي واجيت تقدمت وخطبت اهلي هم رح يرفضون لان حلمهم وحلمي اكمل»

علي .«لعد شون انتي واحمد قارين فاتحه؟؟»

سارة .« يا احمد هذا ؟؟ ليش تحجي بكيفك»
فاجأني ، عزة معقول الناس ماخذة عنه نظرة 😱

علي .«والله عرفت ، المهم .. اني رح انسحب طالما انتي تحبيه»

سارة .«شحب ، ما اسمحلك علي»

علي .«احمد كال سارة تحبني واحبها ونيتنه زواج ، لهذا اني بارحه ما فتحت وياج الموضوع مرة ثانيه»

باوعت لاحمد بعصبيه وكتله لعلي .«عود من تقررون شوكت العرس كولولي ، والله يالله»

عفته و وخرت غيرت طريقي للمكتبه
احمد بيا حق يحجي هيج ، شنو هالتصرف الزايد

شوي ودخل وراي اني عصبيه كلش وخايفه افقد هنا كدام العالم ، حجيت بصوت ناصي مسموع اله .«احمد ، وخر من وجهي لا اسويلك مصيبه واحيلك اللجنه الآداب»

احمد .«وين الغلط فهميني ؟ صار 4 اشهر نعرف بعضنه ومبينه علاقتنه شنو مضمونها ، هسه غلطت؟»

سارة .«اي هسه ، اذا مملاحظ هذا المضمون اللي تحجي عنه المفروض تكوله الي قبل لا تحجي بيه يم العالم وتخرب سمعتي »

احمد .«وين خربت ، شسويت هاي شبيج»

سارة .«احمد ، اطلع خليني افهم شي»

احمد .«ماكو شي وكلش بسيطه السالفه ، احبج و تحبيني و مشاعرنه واضحه .. سمعت الولد يريد يخطبج وكتله البنيه حاجي بيها وحاجزها من اهلها ، وين الشي الممفهوم»

سارة .«هه ، ولو ما هالموقف ولا تحجي وتبقى ساكت عن مشاعرك لانك ضامن مشاعري مو ؟»

حجيت بعصبيه بدون ما احسب حساب المكان والهدوء المفروض يكون بيه

احمد .«اي ، اعرف تحبيني .. وخفت افقدج البارحه وتصرفت هيج
اعرف مو من حقي بدون اذنج بس حت ما افقدج»

سارة .«كافي انانيه احمد ، ليش مستكثر عليه يعني تكولي احبج .. ليش جنت كافي روحك بحبي و تبخل عليه»

احجي وارجف ، بهاللحظه اكثر شي احتاجه هو فراشي ، اريد انام حتى انسى الدنيه كلها وانسى احمد

احمد صفك بايدة وجذب انتباه الطلاب والاساتذة الكاعدين اخاف هو جان مقصر بصياحه يعني ، هسه انتبهو

احمد .« يا جماعه ، بس انتباهكم شويه» اندار عليه وكمل « سارة تكولي مستكثر عليها انه اعترفلها ، وهسه اريد اكوللها كدامكم كلكم

سارة اني احبج اكثر من العالم كله» صاح «احبج سارتي»

بقيت صافنه هذا شديسوي !!!!
الطلاب صفكوا وبدة الضحك والولد يصوفرون

حسيت معت من الخجل كتله «انت مجنون لو مجنون» باوع بعيوني وضحك

اندار عليهم كاللهم ديالله بالله ، هذا رد اعتراف 😄 ضحك عليه وراح يم دكتور امير كاله «دكتور اموري ، هسه رح اموت كدامك واكتب ع شاهد القبر مالتي مات بسبب جواب سارة المجنونه»

ضحكهم عليه الحقير 😭 طلعت من المكتبه و من المعهد كله ، خابرت ابو الخط كتله ما ارجع وياه

رجعت فورت و ضربت الدوام
صوجي كشخت وبدلت ، خرب عليه كلشي

ليش يعترف كدام الكل ويحرمني انه اكوله اني هم احبك ، شمتوقع يعني اكدر اكوله كدامهم مثلا

بقت الدمعه بعيني واني افكر ، احمد يتصل واني حاطته صامت ماريد اردله هسه لحد ما ارتب افكاري عدل .
.
.
.
.

هلووووو 🙋
والبارت انتهى وي خبالات سارة واحمد
شونه البارت!؟ رأيكم بالبدايه ؟!

لا تنسون فوت ⭐ و تعليق 💬 حتى اكمل 😀

..
.
Geaanaa❤