#احببتك_انت
#جيانا
.
.
.
العين بالعين والقبلة قبلتين والبادي أحِن💙
.
.
.
محمد:
صبحت الصبح على وجه حبيبه روحي
مشتاق اكعد هالگعدة المفتقدها صار اشهر
شما اقرر اكون قاسي تضعفني
شما اكول خلص محمد إنتهت
بس تهزم كل كبريائي بنظرة لو دمعه منها
و هسه لا ، يستحيل اتخلى عنها
كمت على كيف غسلت و توضيت صليت الصبح
كفيت نص المصلايه و رحت يمها
بقيت اتحارش بيها اضوجها حت تكوم
و هي معاندة ولا وياها ابد 😒
عبالك جثه و نايمه !!!
شو هاي اول مرة هيج
كل مرة تحس رأسا
كمت بللت ايدي و اجيت مسحت وجها
حست شوي شوي .. بقيت منتظر
لو راجعه لمهدئاتها لو منوم هسه انهيها وعلي
سارة .«صباح الخير حبيبي»
محمد .«هلا صباح العافيه»
سارة .«هاي صليت!»
محمد .«اي و صار شكد اكعدج و انتي ولا وياج»
سارة .«هااا اي مو تعبانه»
محمد .«سارة ، احجي شنو السبب»
سارة .«ماكو شي ، يلا اكوم اغسل حت اصلي»
محمد .«تحجين يلا تروحين»
سارة .«ماكو والله ، لا تلح فدوة»
محمد. «تصلين و تحجين كلشي»
سارة .«ماشي»
محمد .«بدون كذب»
سارة .«اي والله ، فهمت»
محمد. «ديالله»
راحت للحمام و طفرت على جنطتها
دورت لكيت شريط حبوب !!!!
معرفت الاسم لأن تالفته وكأنه تعرف رح اشوفه
خليته بجيبي و رجعت بمكاني
فكري بدة يصنع مسلسلات خربانه
طلعت نشفت وجهه و لبست الحرام صلت
كملت كعدت تسبح ، كملت فتحت القرآن قرت
فهمت ما تريد تحجي شي
تركتها و نزلت لأهلي
محمد .«صباح الورد»
ابويه ، امي .«هلا صباح العافيه»
محمد .«الله يعافيكم ، اسامه نايم»
ابويه .«لا طلع للمحكمه عندة اليوم قضيه»
محمد .«الف مرة كتله اسامه غير شغلك»
امي. «هذا طموحه و لا تخاف عليه اسامه يدبر نفسه»
محمد .«شيدبر يمه ، نسيتي من نشل ابنج شهر»
ابويه .«لا تحجي هيج هسه مرت اخوك تسمع و تنقهر»
محمد .«بويه آنه ما راضي على شغله»
امي .«قابل اكو شغل بيه حظ و عايفه»
محمد .«يمه هواي اكو اشغال بيها حظ»
ابويه .«شو مرتك ماكو»
محمد .«تصلي و تنزل»
امي .«من هسه اكولك ، عدنه جهاز عرس ترة ... جهز فلوسك لو اجله ورة ما تكمل دراسه»
ابويه .«شكد بعد يحتاج»
محمد .«لا بويه اكو حاسب حساب»
امي .«بس فلوس النيشان عندي»
محمد .«و البدلات يمه»
ابويه .«و غرفتك بابه»
محمد .«اليوم اروح الأكرم اوصي من معرضهم»
امي .«خاف ما ياخذ فلوسهن»
ابويه .«لا ياخذ غرفهم فوك المليون مو فلس و فلسين حت ما ياخذ حقهن»
محمد. «اي صح»
امي .«وبعد فلوس الجهاز»
محمد .«شكد تردين»
ابويه .«ولك غير مهرها تنطيه»
محمد .«المهر 15 كون ادبر منين اجيبه هسه خلوها شوي شوي اناوشكم»
امي .«هذا حقها تاخذة مامه»
محمد .«اعرف يمه بس هسه صعب»
ابويه .«شكد جوة ايدك اني اكملك الباقي»
محمد .«لا بويه تسلم اني ادبرها»
ابويه. «لا تخليني احجي من الصبح »
محمد .«باقي 7 مليون .. من اروح اجيب وياي 3 عندي عايفهن بلندن تبقى 4 بس»
ابويه .«عوفها هاي ال7 عليه»
محمد .«لا يابه تسلم»
امي .«اخذهن على الاقل ما نروح متخزين»
محمد .«افف منكم ، مها لا تطبگين وي قويسم عليه»
ابويه .«وللك احجي عدل كول امي مو مها»
محمد .«انت شكو اصيح بكيفي»
ابويه .«ولك»
امي .«هههه عوفه عوفه»
نزلت سارة لافه حجابها
محمد .«اسامه طالع افتحي الشال»
سارة .«صباح الخير»
ابويه و امي .«هلا صباح النور»
راحت وي امي تحضر السفرة
شوي و طلعت اسماء بيدها أمير
اخذته من ايدها و راحت تسويله حليب
محمد .«سومه عمرة عبر السنتين كافي حليب»
امي .«معليك»
اسماء .«لا مناعته ضعيفه خليه على الحليب»
سارة .«شبيه بارحه اسامه اخذله دوة»
اسماء .«گحه و شوي صخونه»
محمد .«سهله ولك عمو كم يوم و تصير مثل الحصان»
بقيت العب وياه ، كملو الريوگ و گعدنه كلنه
اشرب جاي و اشرب امير وياي
يحبه زين عفيه عليه
كون يطلع على عمه حت اخبله لاسامه 😂
اسماء .«سارة تجين وياي اليوم»
سارة .«وين»
محمد .«وين»
اسماء .«اروح عندي سونار اليوم و اسامه يطول اليوم يطلع للحله»
محمد .«اني اخذكم عود»
ابويه .«مو دنروح لبيت عمك»
محمد .«يا ساعه دكتورتج»
اسماء .«بـ4 و نص»
محمد .«اي اوديكم و عود من هناك نروح لبيت عمي»
امي .«لعد من تطلعون دك لابوك حت احنه نطلع»
محمد .«ماشي .. سارة صبيلي جاي»
اسماء .«جيبه لأمير»
محمد .«لا خل اغسله دمر وجهه»
كمت غسلتله و هذا السرسري يحب يلعب بالمي
محمد .«ولك مو مريض هسه ابوك يشعل سلفى سلفايه»
ابويه .«باجر انت طيارتك مو»
محمد .«اي يابه»
سارة .«تطول»
محمد .«لا ارجع ، بسرعه صعدي بدلي حت اخذج للدوام»
امي .«وين تروح خل اليوم تغيب»
سارة .«لا عمه امتحن و اطلع»
ابويه .«سهله دراستج عمو»
سارة .«والله عمو هيج و هيج .. مدبرتها»
محمد .«لو طلع اسمج وياي ترة تتركين»
سارة .«اي عمتي كالتلي»
محمد .«ديلا صعدي بسرعه»
اسماء .«محمد شوكت قررت العرس»
محمد .«25 بالشهر لان 23 عندي شغل بالكليه مالتي لهذا حت فد نزله»
اسماء .«خو على السنه الجديدة»
محمد .«لا وين هم بعيد و هم ما اكدر اجي»
ابويه .«إحسان نزل لو بعدة»
محمد .«بعدة هناك ، على طاريه يريد نزوجه»
امي .«صديقه مرتك جمال كوللها»
محمد .«منو منهن!!»
امي .«ما اعرف أسألها»
شوي و نزلت سارة مبدله
سارة .«يلا كملت»
محمد .«نروح بيتكم حت تاخذين كتب»
سارة .«لا ما احتاج»
محمد. «ماشي ، سومه اخذي اموري .... يلا اودعناكم»
طلعنه للسيارة
سارة .«تبقى وياي»
محمد .«اي بس تخلصين طلعيلي»
سارة .«ماشي»
محمد .«سارة منيه صديقتج امي كالت عليها»
سارة .«شعليك بصديقاتي»
محمد .«مو إحسان يريد يتزوج ، كتلها لأمي كالت صديقه سارة»
سارة .«هااا هي مو صديقتي صديقتي ، بس صديقتها لصديقتي تعرف احسان و تحبه»
محمد .«و شعجب مو صديقتج»
سارة .«لان هي تريد تكمل دراستها اول»
محمد .«تداوم اليوم»
سارة .«لا عرفتها عن طريق النت»
محمد .«خوش صايرة تصادقين»
سارة .«لا محمد بنيه أخلاق و تربيه»
محمد .«شسمها»
سارة .«مو شرط تعرف»
محمد. «شون عرفتيها»
سارة. «دخلت بقناة و هي موجودة و تصادقنه ، طلع عدها صفحه بالواتباد وقوت علاقتنه هيج»
محمد .«شنو واتباد!!»
سارة .«برنامج بيه قصص واقعيه او خياليه»
محمد. «ييي وانتي شسوين بيه»
سارة. «اقرة بيه طبعا»
محمد .«اها ... من نرجع تنزليه عندي»
سارة .«واضيف عندك قصتنه 😃»
محمد .«شنو قصتنه !!! سارة شمخربطه»
سارة .«ممخربطه بس هي صديقتي دتكتب قصتنه»
محمد .«سارة تنمسح»
سارة .«لا حباب والله اكو عالم تنتظر ، تدري اني وحدة منهن انتظر شون ينزل و اقراه عبالك مو حياتي»
محمد .«واكيد مطلعتني اني الموزين»
سارة .«اصلا اكو وحدة عاشقتك 😒»
محمد .«وينها»
سارة .«شوف صار عشق كيفت»
محمد .«المهم اريد اقراها»
سارة .«اي عادي»
محمد .«و اسمج !!»
سارة .«غيرته لا تخاف بس اسمك نفسه 😂»
محمد .«اي مو ربي وحد حت تبقيه نفسه»
سارة .«لا بس حبيت تبقى مشاعري لنفس الاسم»
محمد .«دتخربطين و ما تدرين بروحج»
سارة .«اصلا من تقراها رح تتفاجئ»
محمد .«الله كريم»
بقيت افكر بالسالفه
شون نشرت القصه يعني !!!!
محمد .«سارة القصه بس انتي بيها»
سارة .«لا اني و انت و رنا النحجي»
محمد. «واني شلون»
سارة .«حبكه كاتب هنا تطلع ، اني انطي رؤوس اقلام هاللي اعرفه منك و الباقي قلم صديقتي»
محمد .«الله كريم .. تنزلين لو اول نروح للكراج»
سارة .«لا وياك »
حولت للكراج صفيت السيارة
سارة .«ندخل ايدي بيدك حباب»
محمد .«شعجب!»
سارة. «هيبتي وياي غير»
محمد .«ههه مجنونه ، يلا ننزل»
دخلنه الجامعه ورحنه لقسمها
احمد كاعد بالحديقه و وياه بنيه و ولد
تعمدت اخذ ايد سارة بيدي و مشينه
دخلنه وياهم للحديقه
إجه ولد باتجاهنا .«انت اكيد زوجها»
محمد .«اي نعم تفضل»
الولد .«جنت متحمس اعرف منو زوجها»
محمد .«ههه يي اني»
الولد .«اني كاظم زميلها بالقسم»
محمد .«اهلا و سهلا ، محمد»
كاظم .«سارة جبتي الملازم»
سارة .«لا جيت من بيت عيالي ولا كتاب جبت»
كاظم .«هاااا يلا على باجر»
سارة .«احمد عندة اخذها منه»
محمد .«يا محاضرة امتحانج»
سارة .«الأولى»
محمد .«اي زين حت نطلع»
كاظم .«انتبه عليها ترة ما تاكل طول الدوام»
محمد .«هههه الله كريم»
سارة .«غير بسببه لان افكر بيه»
كاظم .«ههه يلا اتركم وحدكم ، تشرفنه بيك محمد»
محمد .«الي الشرف حبيب»
تصافحنه و راح ، التفتت احمد مركز ويانه
ههه ما يئيس هذا يعني !!
سارة .«نبقى هنا لو ندخل»
محمد .«لا نبقى مرتاح هيج»
سارة .«افف محمد امشي ندخل حت اقرى»
محمد .«ادخلي اني هنا»
سارة .«تمام اخذ ملزمه من هاجر و اجيك»
محمد .«ماشي»
دخلت جوة للقسم ورحت كعدت يم أحمد
محمد .«اي ابو علي شخبارك ، دراستك»
احمد .«ههه بشوفتك تخربطن»
محمد .«لااا لو كايل جان اجيت من اول»
احمد .«لا تخربط محمد ، اطلع منا افضل»
محمد .«ما سويت شي ، جاي وي مرتي»
احمد .«ماشي ، اخذها و اطلع ماريد اشوفكم»
محمد .«فشله اطلع و ما اسلم على الاساتذة ، تعرف كلهم يعرفوني»
احمد .«هههه لا تهدد بابه ، هويتي تقرة ضابط اقوى من تهديدك »
محمد .«وين هددت ! أصلا دنحجي عادي»
احمد .«كول شنو تريد»
محمد .«اريد افهم انت شتريد ؟ احمد سارة صار قريب السنتين على إسمي كافيك لعب ما أتنازل عنها»
احمد .«ههههه تعرف شنو يعني سارة بالنسبه إلي»
محمد .«انساها ، شوف ترة غيري هسه يكومك على كلامك هذا ، بس رح احجي وياك بالطيب .. اتركها بحالها وذاتا شهر اليجي عرسنه وكتلك من قبل انه انت معزوم»
دار وجهه عني ورد .«متهنين انشالله ، يلا من رخصتك»
خله و طلع من الجامعه
التفتت شفت سارة واكفه بعيد و تنظرله يطلع
كلامكم و شقاكم كله ما انساه
اكثر من ست أشهر اني بس اراقب و أسكت
اذا احمد هسه اخذ نص عقابه
ف انتي هم جاييج السرة ، صبري
تقدمت و كعدت يمي تقرة بدون اي تعليق
أفضل هيج ، تركتها تقرى لحد ما إجه وقت الإمتحان دخلت تمتحن
طلعت برة اخذت السيارة و صفيتها كدام الجامعه
بقيت افكر بكل الصار من رجعت لحد اللحظه
رنا و تصرفها ، سارة و احمد
القصه اللي دتنشرها سارة
و دراستي و دوامي
أهلي و احسان
ذولي كلهم واحد واحد اجه براسي
عبرت الساعه و دگت سارة
سارة .«ها حبيبي وينك»
محمد .«برة انتظر»
سارة .«ماشي هسه طالعه»
محمد .«تمام»
سوي و إجت ، فتحت إتصال وي اسماء
نطيتها خبر تتحضر
الساعه هسه ب12 رجعنه لبيت اهلي
دخلت سارة و طلعت نزلت للمتنبي
اكو مصادر احتاجهن هالفترة
_____________ سارة تروي ____________
صار العصر و طلعنه للدكتورة وي أسماء
دخلنه و لازم ننتظر سرة لان اسمها الـ9
بقينه ننتظر لحد ما إجه سراها دخلنه
مددت على السرير و الدكتورة اخذتلها السونار
الطفل صغيرون حلو
سمعنه نبضاته تجنن شعور حلو
اني مو امه و تحمست عاد اسماء شلون
اباوع على الشاشه و اردد بداخلي
(يارب ارزق كل محروم)
اتمنى انه يجي يوم و هم اصير أم
شعور حلو و مميز
اسماء .«دكتورة شنو عندي»
الدكتورة. «بنوته حليوة»
سارة .«فدوة مبروك سومه»
اسماء .«يبارك بيج حياتي ، حمدلله و الشكر»
الدكتورة .«مبروك ام امير ، بس لازمج عنايه شويه و تجنبي الشغل المتعب لحد ما تدخلين الخامس»
اسماء .«انشالله»
فرحت وكأني اني اللي حصلت الطفل
الله يگومها بالسلامه و تكحل عيونها بشوفتها
طلعنه من المجمع و محمد منتظرنه بالسيارة
صعدنه فرحانين و نضحك
محمد .«ها شنو»
اسماء .«لا اول اكول لأسامه»
محمد .«اخوه اني يعني عادي»
اسماء .«لا يعني لا»
محمد .«صبري نفتح وياه اتصال»
شال التلفون و دك على اسامه
طول يلا رد .«ها محمد بسرعه»
محمد .«اصبر خل نفهم»
اسامه .«بالطريق احجي»
محمد .«كول لمرتك خل تحجي»
اسامه .«ها سومه شكو»
اسماء .«اميرتك إجت حبيبي»
محمد .«عيب ثگلي»
اسامه .«اييي مبروك حبيبتي ، نرجع و نحتفل»
محمد .«انت الثاني ، استحو اخوك موجود»
اسامه .«ما تولي ولك ، يلا انقلع»
محمد .«ساقط هي كوة»
اسماء .«ما اسمحلك ترة»
محمد .«اني و اخوي انتي شكو»
اسامه .«يلا اغلق عاد خل اكمل طريقي»
محمد .«على الخير خويه ، يلا روح هسه»
سارة .«يلا محمد جيبلنه زنود الست»
محمد .«وانتي شكو تطلبين»
سارة .«مو اني أشتهي ابدال اسماء 😂»
اسماء .«اي والله مال زنود الست ، بس لا خل نطلعها من اسامه غير هو ابوها»
محمد .«ومنو كالج عمها گحفي ولج»
سارة .«مو هستوك عاندت تجيب»
محمد .«لا عاندت لأن انتي ردتي»
اسماء .«يلا اطلع ، هسه عمي و عمتي ينتظرون نروح بيت أهل سارة»
محمد .«شوف نسيت»
حركنه و الطريق ما خلص من تصنيف محمد
اخذلنه ونود الست و علبه مشكله لأهلي 💃
إلي يعني بين قوسين 😂
وصلنه و شفنه سيارة عمي موجودة
يعني واصل قبلنه 😅
دخلنه و سلمت على أبويه و ابتهال موجودة هم
كعدوا و دخلت حضرت ضيافه
و أمي هم كاعدة وياهم و تسولف وي عمتي
حضرت الصينيه و دخلتها قدمتلهم
عمي .«وج بابه قابل احنه غربه»
سارة .«ميخالف عمو هو عصير»
عمتي .«يلا خليه و كعدي عمه»
سارة .«اي»
خليت الصينيه على الطبله و كعدت يمهم
محمد و جعفر دخلو محادثه مدري شنو
و أمي و عمتي هم محادثه
ابتهال و اسماء هم
عمي و أبويه !!!
شو عافوني وحدي شسالفه
انتبه محمد و اشرتله يلا
تنحنح نطه اشارة لعمي حت يبلش يحجي
عمي .«اي ابو جعفر ، ندخل بالموضوع بعد»
أبويه .«تفضل كول ، ندخل ليش لا»
الكل سكت و بالهم وي عمي و ابويه
حت محمد احسه متوتر !
عمي .«انشاءالله نريد عرس محمد الشهر اليجي»
أبويه .«والله هاي عدها هي ، غير عندها دوام بعد»
عمي .«اي حت من تجي عدنه تكمل دراسه»
محمد .«عمو اني حت بلندن قدمتلها حت وياي»
أبويه .«ها حنان شنو رايج»
امي .«اي شكو بيها»
عمتي .«زين لعد انشالله نبدي اني وياج و سارة نطلع و نجهز بهالشهر لحد ما يرجع محمد»
امي .«اي هلا بيكم»
محمد .«عمي العرس يكون يوم جمعه من الشهر الجاي»
أبويه .«انشالله ، الله يتمم على خير»
فرحت انه ما حصلنه رفض
جنت حاسه انه احد يعارض
كاعدين شوي و إجه مصطفى
تفاجئ بينه جايين ابتهال ما كالتله
سلم على عمي و محمد
اخذت علوش بحضني و دخلت ابتهال تلم أغراضها
مصطفى .«ايي الف مبروووك انشالله يتم كلشي على خير»
محمد .«الله يبارك بيك ما وصيك ام علي وي سارة يعني اني مموجود»
مصطفى .«ههه تدلل ، هي بعد اختها حت لو إريد امنعها ما اكدر»
محمد .«ههه يي زين»
كعدوا نص ساعة و طلعوا كلهم
صعدت فوك بدلت و جمعت ملابس الدوام غسلتهن
نزلت حضرت اكل و نظفت المطبخ
دخل أبويه يمي سوة الزلاطه و يتابع اخبار
كملت العشه و اجت امي يمي هم
هدرت الجاي و نزل جعفر
كلنه كعدنه تعشينه
أبويه من ترك شغل سامرة واحنه مرتاحين
حسينه بوجودة من بعد غترة سنين هو ماكو
جان بالأسبوع نشوفه يومين بس
و الباقي مبيت هناك
كملنه و كفيت السفرة و غسلتهن
صعدت اقرى شفت جايه اشعارات على التلي
رسلت جزئيات من القصة لصديقتي حت ما تتوقف بالكتابه
صار عندي تقريبا احداث بارت كامل
لحد الآن ما ترضه تنشرها إله تعبر 10 أجزاء
طلعت من محادثتها و شفت احمد داز رساله
.«رجاءا سارة من يجي محمد بعد لا تخليه يجي يمي لأن المرة الجايه يختلف ردي وياه»
صفنت شنو اللي صار بينهم ؟؟؟
تجاهلته و كعدت قريت امتحان باجر
كملت و نمت
باجر محمد يسافر
شهر و عرسنه
مضى اسبوع و أمي يوميه وي عمتي تطلع
الضروريات تاخذ رأيي بيهن
و الباقي على معرفتها تجهزة
جهزوا غراض الغرفه و ملابس و حوايج هواي
اثق بذوق امي لهذا ما طلبت اكون وياهم
الأيام كمت احسها تركض
مرتين رحت وي امي لبيت عمي
محمد ناقش و بقه بس الإمتحان النهائي
إحسان اجلوه شهر لأن استاذ اساسي عدهم
محمد طلب تفرغ لوقت المناقشه بس إحسان لا
المهم .. بقه اسبوع واحد
بلغت صديقاتي يحضرون
اهليتنه كلهم امي بلغتهم
ثريه ولا تركتني كله وياي تركض
اروح الدوام تساعد امي
ارجع نكمل اني و هي
ابتهال هم إجت عدنه و الاجواء تجنن
بنت عمي نرجس هم إجت عدنه
لأول مرة عمي صالح يسويها
عمو ليث عادي سبورتي بس عمو صالح ولا يقبل بناته يباتن برة البيت
فرحت بوجودهن
ابتهال ، ثريه ، نرجس و إيلاف هم
كلهم نجمعوا وياي
اسبوع ولا نفصلنه أبد
ايلاف يوميه تجيني بس على كد النومه ترجع بيتهم لان مرتضى ما يقبل
من بدينه نحضر ليوم العرس اللي هو الاسبوع الاخير واني ما عندي اي خبر عن احمد
ممكن يكون مقهور ، بس هاي بعد الدنيا
كله قسمه و نصيب و نصيبي هو محمد
آخر يومين رجع محمد واخيرا
بهاليومين لازم ناخذ البدله و الغرفه
هنا يلا حسيت بعد السالفه جديه
من بعد سنتين و 3اسابيع
رح ننجمع ابمكان واحد
ماكو بعد احد يكدر يدخل بينه
لا رنا و ولا احمد و ولا اي واحد
خابرت اسماء نطتني خبر جايين
بلغت امي و صعدت بدلت تحضرت حت نطلع ما نطول
لبست فستان زيتوني و مكياجي خفيف
البارز بس الكحله و الباقي كله هادئ
طلعت شال بيجي وياه احب هاللونين
وكفت الفه جان تنفتح الباب
التفتت جان اشوفه دخل
يمه شكد مشتاقتله
رحت عليه حضنته حييل
سارة .«حمدلله على السلامة حبيبي»
محمد .«الله يسلمج غاليتي 😘»
سارة .«شو صعدت شعجب عود دا ابدل حت نطلع بسرعه»
محمد .«كتله لجعفر اريد اشوفها وصعدتلج»
سارة .«مشتاقتلك»
محمد .«يلا كملي حت نطلع»
سارة .«يي ماشي»
رحت كدام المرايه و لفيت شالي
سارة .«اليوم شنو ناخذ»
محمد .«الغرفه و بدله الحنه»
سارة .«انت رح تتعب هيج»
محمد .«مهم نكمل يومين كون بعد نشد الغراض»
سارة .«همم هم صح ، يلا كملت»
نزلنه و سلمت على عمتي و عمي
سارة .«اسماء ما تجي»
محمد .«لا أسامه مقبل لأن تعبت بارحه كلش»
سارة.«خطيه»
عمتي .«يلا ام جعفر بعد عدكم شي»
امي .«لا عيوني يلا نتوكل»
طلعنه كل احنه سوة و جعفر ساق السيارة
محمد تعبان مبيه حيل و عمي أصلا مجاي بسيارته
وصلنه المعارض و هنا الكارثه
هي الحيرة من اختار الغرفه
كلهم حلوات .. اكو تركيات و اكو صاج خشب
اله الموديلات تجنن كل واحد يكول الحلا عندي
عمي .«ها بابه ما عجبكم شي»
سارة .«والله عمو اني احتاريت»
محمد .«اني هم دخت 😂»
جعفر .«سارة هاي البيجيه حلوة انتي تحبين هاللون»
امي .«لا ما تحمل تعب سنين»
سارة .«لا يمه عادي هي تتنظف خوب»
محمد .«لا صدك مو هلكد»
سارة .«😏اختار لعد انت»
جعفر .«ولا يهمج اخذها الج»
محمد .«هههه من اموت عود»
سارة .«شهالحجي هسه»
عمي .«لا تتعاركون ، يلا خل نختار»
سارة .«تعبت عمو والله هواي فرينه و ماكو شي حلو»
عمتي .«شو دكعدوا هنا ، تعاي ام جعفر احنه ندور»
امي .«افضل والله»
بقينه بمكانه و هنه راحن يسفن وحدهن
عمي هم راح وي جعفر يدور بالطخم مال كعدات
بقينه وحدنه اني و هو
محمد .«واخير حسوا و راحو»
سارة .«ههه اي»
محمد .«اخذتي بدلات لو كلهن اليوم»
سارة .«اللي عندي ما البسهن كدامك هم تشكها عليه و انوب تخربلي عرسي»
محمد .«يعني إله تاخذين مشلح»
سارة .«حت اغريك عدل 😂»
محمد .«ههه ومن ازيدلج جرعه شسوين»
سارة .«ءء امشي ندور وياهم»
محمد .«ماكو خلينه وحدنه وهم يدورون»
سارة .«شوكت ترجع»
محمد .«عشر ايام»
سارة .«اي زين ماعندي امتحانات اجي وياك»
محمد .«أصلا اخذج وياي تتركين دوامج»
سارة .«لا مبقه شي واخلص»
محمد .«اففففف»
اجت عمتي .«تعال محمد شوف هاي»
محمد .«يلا امشي»
سارة .«عمه يا لون»
عمتي .«سكري ، ابيض هيج لون الإضاءة صفرة مواضح زين بس حلوة و تكمه»
محمد .«شكد طلع سعرها»
عمتي .«يمكن ثنين»
سارة .«مو هوايه هيج اكو ارخص و احله»
محمد .«لا معليج انتي»
رحنه للطابق الثالث و شفناها
صدك حلوة و قطعها جميله
محمد .«ها ، اني عجبتني »
سارة .«اني هم والله»
امي .«هذا هو لعد»
عمتي .«محمد دك لابوك خل يصعد»
بقيت اتمعن بيها و بجمالها
من 9 قطع و السرير كلش فخم
ميز التواليت و المرايه احلى شي
جمال و نزاكه
محمد .«ها حبيبي هسه هذي نرسي عليها»
سارة .«اي حبيتها»
محمد .«اي تمام لعد خل ننزل نشتريها»
صعد عمي يشوفها هم عجبته
عمي .«اخذتلك طخم نصفي يفيدك بالغرفة»
محمد، «لا يابه الغرفه تكفي»
عمي .«اني عجبني معليك انت»
سارة. «وين خل اشوفه»
جعفر .«تعاي وياي»
محمد .«اصبر نجي سوة»
نطه فلوس العمي حت يرحون يشتروها
نزلنه احنه جعفر راوالنه الطخم
حلو قنفه كبيرة و ثنين صغار
سارة .«هاي تفيدنه بظهر الباب»
محمد. «هو دا فكر هنا نحطها»
سارة .«اي زين»
المهم .. كملنه الحجز و كالو باجر يوصلوها
محمد و عمي طلبوا اليوم يدزوها
الوقت تأخر شوي صارت الثنتين الظهر عاد كالو نتغدة يلا نروح على البدلات
دخلنه مطعم و طلبنه أكل
التفتت على محمد .«اكولك مو اخذتلي فساتين من لندن خل البسهن بدل البدلات»
محمد. «لا بدللت أحسن تميزج عروس»
سارة. «لعد خليهن على ذوقك»
محمد .«الله كريم»
اكلنه و خلصنه ، جان المطعم راقي
اكلهم مميز و نفسهم طيبه
حاسب عمي و طلع
محمد .«بويه انتو ارجعوا الباقي اني وسارة ناخذة»
امي .«لا عمه غير احنه ناخذ البدلات»
محمد .«لا عمه اريد على ذوقي»
عمتي .«تتعب هيج امي وانت اليوم رجعت»
محمد .«ميخالف هو يوم واحد»
عمي .«على راحتك بويه»
حمدلله راحو و بقينه وحدنه
افترينه هواي و ماكو شي عجبه ابد
ياهو اكوله عليها يكول لا
شون لعد جان يجيبلي
مثلا يفتر على الكل و يختارلي الاحلى !
(بعد 3 ساعات)
سارة .«محمد غربت الدنيا رح نبقى نفتر»
محمد .«لا لكيته صبري»
سارة. «منو لكيت»
محمد .«فستان عروستي غير»
سارة .«هه يي فدوة بسرعه»
بقه ينظر ينظر ينظر لحد ما راح طلع فستان
حرفيا يجنن الموديل و غريب
كلللش حلو و هادئ
مو نفش كلش و مو خبصه كلشى
اخذته و دخلت اقيسه فت طلع عليه
سارة .«محمد شوف اكو كاميرات لو اكدر اطلع اراويك»
محمد .«صبري»
.
.
.
محمد .«طلعي طلعي»
فتحت البردة و طلعت كدامه
نظرته الي ذوبت روحي
يا ربي معقول رح البس الثوب الأبيض للشخص اللي حبيته و اللي ملك حياتي كلها
انتبهت عليه ولا تحرك من مكانه
محمد .«دخلي بدلي بسرعه»
سارة .«مو حلو !!»
محمد .«هه فوتي لا هسه اخذج و نفلت»
سارة .«هبطت گلبي والله»
محمد .«هذا هو ناخذ هاي!!»
سارة .«اي حبيتها و حلوة»
محمد .«ديلا بدلي بين ما حاسب»
دخلت غرفه التبديل واني واكفه على ردة فعله
حرفيا ما متوقعتها هيج 😂
المهم بسرعه بدلت و طلعتله
شفته ماخذ كفوف و تاج و مغير الطرحه
سارة .«ها حبيبي بعد شنو بقه»
محمد .«تردين مسكه!»
سارة .«يمكن امي اخذتلي»
محمد. «ماشي يلا لعد»
نطيناهم البدله خلوها بالثوب مالتها
دفعهن و طلعنه ايدي بيدة
حلم كل بنيه هو تطلع تختار ثوب فرحها وي شريكها ... و اذا جان حبيبها يكون الإحساس بعد أحلى
افضل شي سواه محمد هو اخر عرسنه
نطاني فرصه احبه و اتعلق بيه
يا رب ، وفقني بحياتي الجديدة و دليني طريق الصح
ابعدني عن كل شي خطأ
ساعدني انه اصون الشخص اللي ما قصر وياي
رغم اغلاطي اللا تعد او تحصى
بس هو باقي على كلمته وياي و ما تركني
يا الله ، استودعك حبيبي .. يامن لا تضيع عنده الودائع .
محمد .«وين صافنه»
سارة .«افكر بيك»
محمد .«صدوك ، وشنو تفكرين»
سارة .«اشكر الله لأن حبيتك و خلاك بطريقي»
محمد .«احبج يولو»
سارة .«احبك»
________ نرجع لشهر «رنا تروي»_________
هنا طبعا شكرا لزهرتي zozaity
عاشت ايدج حياتي على كتابه الجزئيه هاي 💙
نكمل :
.
.
رنا :
رحنة لبيت خالي و دخلنة سلمنة و كعدنة دخل محمد وتسالم وية رزاق ووياية واخذ زهراء مني من شالها بيدة وخلاها بحضنة يلعبها و هي نتاغي وياه ... صفنت واخذتني افكاري وذكرياتي ....
ليش ما تكون هاي الطفلة بنتي اني ومحمد !!
ليش ما اكون اني وحدة من هالبيت !!
نظرت لوجهة تمعنت بملامحة صار هواية مشايفتة ....
ليش صار كل الصار بينا ؟
ليش ماتقبلني وحبني مثل ما حبيتة ؟
مو اني اولى بي من الغريبة ؟
بس فجأة صحيت من صفنتي وتساؤلاتي الداخلية على صوت صياح وطفر محمد والكل وياه وصعدنة للصوت واذا سارة بغرفة محمد منهارة يمها اسماء بس مدتسيطر عليها
كلنه استغربنه الموقف شنو السبب !!
ركض عليها محمد واخذها لاحضانة يهدئها
وكفت اراقب من الباب من شفت الموقف حزت بنفسي ماكدرت ابقى نزلت بحجة يم زهراء بس بداخلي تاذيت و نار تشعل بروحي
تمنيت اني بمكان سارة
تمنيت هاي الغرفة تصير الي ولمحمد
هاجت كل ذكرياتي ومواجعي
حنيت .....! اي حنيت وتشمتت هم
تشمتت بمحمد لان هذا حالة
اما اني وين صرت ، مستقرة حياتي و عال العال
هذا جزاءة لان رفضني ، هذا جزاءة لان كسر خاطري ، هذا جزاءة لان ماتقبل حبي وكل الي قدمتة الة وركض عالغريبة و عشگها
عيش وشوف يا محمد ومااسامحك وتبقى حوبتي ولعنتي وراك
حرمتني من هواي و هسه الله ديجازيك
شوية و كلهم نزلو ، كعدنة نحضر للغدة
نزلو محمد وسارة وتغدينة وكمملنة
خالة مها طلبت نكوم نحضر ميز الميلاد
بلشنة و اني ساعدت سارة بالترايفل كملناه كله
احتفلنة وكل هالوقت اني عيوني وكل حواسي تراقب محمد وسارة
اريد ارضي غروري واقنع نفسي انه محمد خسرني
لا لا مو اقنع لان هو صدك هيج ديصير
خالو جمعنة بالليل وفتح موضوع الوصية و الورث والحصص لان صار عمري ٢٥ بعد
بس ابراهيم رفض حصتة ويريد يتبرع بيها ورزاق ساندة ورفض حصتي بهالاثناء دخلنا اني وخالة مها و اعترضت اريد كلشي و لان هالشي رح يكون ضد محمد ، رح يجبرة ينطينه حت دراساته تفشل لان الممول الرئيسي لدراسته هو وارد البستان و المعمل مال أبويه
بس رزاق رفض !! نترت بي كدامهم
صار نقاش حاد كدام الكل بيني وبين محمد و بين رزاق .. فقدت و محسبت انه الكل موجود
طلع محمد ، ابراهيم رزلني و رزاق صار عصبي يريدون يعرفون شنو معنى الكلام الصار ..... بهاللحظة حسيت على نفسي وعالسويتة اكبر خطا بس بعديش !
رزاق كال اتحضر نروح ، طلعنة والطريق كلة ساكتة وافكر بردة فعل رزاق وبحجم المصيبة الحطيت نفسي بيها
داخلي يرجف لان رزاق عصبيته كارثيه
وصلنة بـ١٢ ونص بالليل دخلنة البيت الكل نايمين تقريبا ، رزاق اخذ زهرة وجنطتها وداها لغرفة لعمتها .. عرفت انه رح يتعارك
خليت رحت لغرفتنة
رزاق اجة وراية و قفل الباب اني انعصر كلبي
خفت منة اخذت ملابسي ورحت للحمام سبحت
طلعت لكيتة كاعد عالسرير وصافن جففت شعري واراقبة بخفية وميتة خوف وقلق
رزاق : يلة احجي
رنا : وياية ؟
نظرلي نظرة مرعبة
رنا : شتريد احجي !
رزاق : تعاي هنا ؛ واخر مرة اكلج احجي !! شنو الكلام السمعتة شصاير شبيج ؟؟
بقيت صافنة مااعرف شجاوبة
خوف خوف يرعد بگلبي و ياكل روحي
اتمنى تصير معجزة و اختفي من الغرفه
اتمنى تصير معجزة و هذا اليوم كله ينمحي من راسه
صاح بيه جفلني 😭
رزاق : احجييي دااكلج ....بعدج تريدي ؟؟ بعد كل هالوقت ؟ اني شنو بحياتج ؟ احجي لا ومحمد ابتلي بيج اليوم
رزاق ؛(احجي واني لازمها من ايدها واعصر بكل قوتي لان اريد اسيطر على نفسي وما اذيها)؛
رنا : من جنت صغيرة محد فهمني ولا احد اهتم الي و من كبرت نفس الحال اخوية تخلى عني لو ما خالو الله يعلم بحالي ربيت وية محمد وعشت حياتي وية محمد هو كلشي بالنسبة الي جان اشوف الدنيا بعيونة بس من وعيت وفهمت خليت هدف ثاني بحياتي وهو لازم احصل على محمد بااااي طريقة حتى احصل املاكنة منة بديت اتقرب واتقرب وانصدمت بمحمد يحب غيري تخبلت خليت غيداء تصير بجانبي وخالة مها في سبيل يأثرون علية و ماكدرولة حلفت ادمر حياتة وفعلا سويت ثغرات بس ماكدرت اكمل انت خربت كلشي بخطوبتك إلي
انهاريت لان راح اخسر كلشي واهمهم املاكنة رحتلة لغرفتة واعترفتلة بحبي ومافاد
حاولت اضعفة واغري وطلبت منة يكون الي ليلة وحدة ، بس رفضني وتعاركت وياه وكتلة احبك ومااخليك تتهنى ، انت الي انت حق من حقوقي طفولتي بكل تفاصيلها انت موجود ومراهقتي ونضجي ومافاد وياه شي
وانت اخذتني عاقبتني و شغلة لندن جان انتقام لان جبرني عليك ، بعدين ليلة زواجنة اعتذرت من سارة لان اريد ابدي حياة جديدة و تزوجنة وقربتني منك وحبيتك تعرف شنو حبيتك وتعلقت بيك ، ماكو بعيني غيرك لان انت عوضتني على كلشي وغيرتني بهواي عن أول
بس من رحت لبغداد ودخلت بيت خالو الذكريات رجعتني لقبل ، شفت محمد ولا مرتاح بحياتة تدري ليش ؟
لان اذاني وجبرني على شي جنت مااريدة وخلاني اعاني ايااام واني انام ودمعتي بعيني
رزااااق محمد كسرني ومن اشوفة ماادري شيصير بية اتخبل اريد احرق اعصابة ، اريد ااذي ، اريد اخلي يحس بالسواه بية
زراق ؛(رنا بدت تحجي الي بداخلها واني قررت اكون مستمع حتى اعرف شنو الي تحسة وشنو الي تفكر بي رغم سكوتي الا اني جمرة ناار من كلامها وحبها لمحمد وتحجي وتبجي ودموعها تحرك الكلب ، المفروض ينتهي كلشي لان تزوجت وعدها طفلة بس ضغطت على نفسي كد مااكدر ؛ سكتت بقت تبجي قاطعتها
((ليش من سالج كتيلة اي ؟ ليش اصريتي على كلامج ؟ مو على اساس تحبيني وماكو بعينج غيري ؟ لج احجي رنا 😠))
رنا : .......
رزاق : عوفي البجي وعوفي الصفنات
رنا اني تعبت منج ومن تصرفاتج حيرتيني وياج تدرين اليوم شسويتي بية من سمعت ردج الة ؟؟؟؟؟ جاوبي لااااا تسكتين
صحت بيه واني ابجي 😭
رنا : شجاوبك ! مراح تصدكني ادري ، بس والله بلا وعي حجيت الحجيتة يجوز جانت غايتي ارجع اسوي ثغرة بينة وبين سارة ، يجوز استفزة ، رزاق والله ماادري شصارلي من دخلت بيتهم 😭 تصدكني او لا ماجنت قاصدة جد
والله انت عندي بالدنيا كلها
بقيت ابجي و ابجي بس اريد ارتاح
اعرف غلطت .. اعرف زين غلطت بس مو بيدي
تركني وراح للحمام سبح وسمعت صوت منة كانه يبجي و مجري شكسر ... تاخر هواية اكثر من ساعة وطلع من الحمام لف راسة ونام
كاني ماموجودة ردت اروح على زهراء لكيت الغرفة مقفولة رجعت مددت يمة ونمت و دمعتي بعيني .. عرفت بدة يعاقبني
حسيت الصبح طالع وقافل الباب علية
للظهر اجة فتحها اني كاعدة عالسرير كعد كدامي
مسح وجهه بيدة و بقه ينظرلي
دار وجهه و استغفر الله .. حاولت قدر الامكان اكون هادئه ، ماريدة يعصب حت لا يكول انوب بعد مالي علاقه بزهرا
حرفيا اتخبل لو حرمني منها ، ما أتحمل والله
رزاق : شوفي يابت الناس
السويتي بحقي كبير وماانساه بسهولة ولا اسامحج عليه واني ماراضي عليج ، سبق و فهمتج اللي ما يرضى عليها زوجها شنو !!!
بس مااريد تنزلين راسي اكثر وخصوصا هنا كدام اهلي حرف مااسمع منج مفهوم تنزلين على اساس جنتي تعبانة من السفر وبسسسسس
اخوتي تقللين وياهم وبلسم ماتدخلين غرفتها ولا تجي يمج مفهوووم واذا شفت غير الكلتة تشوفين شي عمرج ماشايفتة كومي نزلي بسرعة ولي من خلقتي يلا
رزاق ؛ ((رنا لازم تتعاقب بس مااريد ينفضح الموضوع لان اكيد الكل ياخذ نظرة عليها وعلية شيريدون يكولون ماعندي غيرة ، بعيني رنا اني اربيج من جديد ))
شلت حجابي و طلعت و اني دموعي عشرة عشرة
مو هيج رزاق والله مو هيج
رحت لغرفه بلسم اخذت زهرتي
بلسم .«يمه هاي شبيج رنو ليش هيج وجهج»
رنا .«ماكو حياتي بس وكعت وظهري مأذيني»
بلسم .«لعد عوفيها لزهرة اذا ظهرج مئذيج»
رنا .«لا لا لا اكدرلها»
جمعت غراضها و اخذتها و طلعت
رجعت للغرفة هو امدد و صافن على السگف
حاولت اتجاهل وجودة و أبدل لزهرا ملابسها
رضعتها و نومتها يمه
تدنه حت و خلاها يمه بقه ينظرلها
بدلت و نزلت جوة عفتهم فوك
نزلت حضرت عشه و صعدت
شفته كاعد و بيدة تلفوني
مهتميت رحت طلعت ملابس زهرة و اخذتها للغساله و رجعتله
مددت يم زهرة دا انام بين ما يجون الولد حت احط العشه جان يحجي
رزاق .«كومي رنا»
رنا .«كول»
رزاق .«كومي بدلي و شيلي ملابس لزهرة وياج»
رنا .«ليش !! وين رايحين»
رزاق .«اوديج لاهلج»
رنا .«رزاق ، شوف اعرف حقك و غلطت اني .. بس لا تعاقبني ابعدي عنك .. زين فكر بزهرة شذنبها تبعد عن أبوها ها!»
رزاق .«اي صح زهرا مالها دخل ، اوديج وحدج و بتي تبقى عندي»
لا لا أكيد سمعت غلط ، متأكدة
هذا مو رجلي ، هذا مو رزاق
اعرف رح يقسى عليه بس مو بزهرة
رنا .«ررزاق شوف زهرة معليها لا تسوي هيج ، قابله بكلشي بس مو هيج ، صح غلطت بس انت اللي ساكن داخلي ، رزاق احبك إلك والله مو كذب ، بروح عمي لا تخطي هالخطوة و تبعدني عن بنتي»
رزاق .«فهميني شون رح أتحمل!!! شون رح أرجع اثق بيج؟؟ رنا غلطج مو سهل ولج عقل مبقه براسي .. حت بالجامعه ما اعرف دربي عدل من التفكير .. رنا سنه وياي انتي مرتي ، عشتيها وياي لو وي خياله و ذكراه !! الأحاسيس اللي عشناها جنتي وياي لو متخيلته هو !! لهذا أريدج تبعدين عني اريد اعرف افكر عدل لا اجرم بيج»
رحت كعدت يمه واني خايفه من ردة فعله
اخذت ايده بيدي و ارجف
رنا .«وروحه لابويه و اول مرة احلف بيه من وفاته .. هاي السنه اللي عشتها وياك مجان غيرك براسي ، و روحه لابويه انت الوحيد اللي حبيتك ، محمد مجان حب .. الحب ما بيه غايه
و تفكيري بمحمد جان علمود ورث أبويه
رزاق اروح لأهلي قابله بس لا تشك بلحظاتنه
لا تقتلني أكثر ، لا تخليني ارجع اغلط»
رزاق ؛(اسمعها و ودي اصدك ودي اثق بيها .. صعب واحد يتقبلها ، اخ يا رنا محيتي كلشي بطيشج ... فلتت ايدي و كمت من يمها طلعت ، ما اعرف شنو اسوي ، اتصلت على مرتجى و اتفقنه نطلع للنجف .. افضل شي اروح ازور الإمام و اروح لابويه ، احس مخنوك)
عافني و طلع .. ما رد و ولا كال ابقى
حضنت زهرة و دكيتها بجي
هاي اليومين كثر ما بجيتها احس عيوني بيها تيزاب صاير كثر ما تحرگ
مضى اسبوع و رزاق ما عندي عنه خبر
عمتي متخبله و بدت تسمعني كلام انه بسببي
اعرف ما تدري بالسالفه بس اسكت لان فعلا
اياد و علي و كرار يتصلون و يدورون و مموجود
اني بس دموع و نار شاعله بصدري
لا تاركلي التلفون اخابرة و لا هو جاي و مطمنه
يوم يجر يوم و الوضع مثل ما هو
رحت لأهلي عمتي سميه اتصلت عاتبتني لأن ما روح
أخذني كرار و رحنه .. وصى انه ما اذكر رزاق ماكو
دخلنه سلمنه عليهم و خالي جواد هم شفته
فرح اخذت زهرا من ايد كرار و سلمت عليه
نزل مرتجى .«يا هلا شلونج ولج»
رنا .«حمدلله انت شلونك»
مرتجى .«بخير ، تعاي للاستقبال اريدج بشغله .. كرار انت هم تعال»
فرح .«واني هم 😁»
مرتجى .«ذبانه حت بكل شي تجين»
فرح .«تشوف نفسك ذبانه عبالك مثلك اني»
مرتجى .«شوفي ترة ابجيج و رجلج واكف»
كرار .«دا شوف شون محترميني»
فرح .«انت غير تدافعلي»
كرار .«شكو ادافع و هو ما طلبج»
مرتجى .«كخخخخخ فشلج»
كرار .«انت هم ما اقبل بهذا كلامك وياها»
مرتجى .«ههه دفوت هسه»
دخلنه احنه التلاثه للصاله
رنا .«صاير شي وي خالتي!!»
مرتجى .«لا لتخافين ، رنا شبيه رزاق»
رنا .«ششبيه يعني»
مرتجى .«ليش ما يرضى يرجع»
كرار .«انت تعرف هو وين»
مرتجى .«طبعا يوميه اروحله»
رنا .«مرتجى اخذني إله»
كرار .«وين رزاق احجي»
مرتجى .«ما احجي اذا ما اعرف ، رنا رزاق تعبان فهموني شبيه»
رنا .«خلاف بينه ، هو وينه فدوة»
كرار .«امشي نروحله هسه»
مرتجى .«بس هو ما يريد احد يروحله»
رنا .«مرتجى فدوة اروحلك اخذني إله ، الله يخليك خل اشوفه😭»
كرار .«اهدئي رنا ، هسه نروح احنه التلاثه»
رنا .«اوعدني كرار ، فدوة لا تكذب عليه»
كرار .«وغلاة زهرة اخذج بس اهدئي لا تخلين اهلج يشكون .. مرتجى تعال وياي ساعه و نرجع على رنا»
مرتجى .«ماشي»
حاولت اهدئ و طلعتلهم اخذت زهرة رضعتها و كعدت وياهم و فكري وياه .. وين هو !
شون قضى هذا الشهر بعيد عنه !!
معقول تحمل البعد !!
مو يكولي انتي أنفاسي !؟
يا رزاق بغيابك انفاسي اللي اختفت
رحت لغرفه جدتي دخلت يمها
جدتي .«يا هلا بالغاليه ، تعاي حبوبه دخلي»
دخلت يمها كعدت و خليت راسي بحضنها
رنا .«جدة .. رفعي ايدج و ادعيلي ، ادعي الله ينور دربي 😭»
جدتي .«الله يوفقج و ينور طريقج بنور محمد ، احجيلي بعد جدتج شبلاج ! ليش هذا وضعج»
رنا .«جدة خلاف بينه اني و رزاق و رزاق اختفى من شهر»
جدتي .«يااا ، ويا يمه منو الغلطان»
رنا .«اني جدة ، اني الغلطانه 😭»
جدتي. «شوفي يمه .. كل ثنين يصير بينهم سوء فهم و مشاكل لان هي هاي ملح الحياة بس شما يصير لا تخلوه يتعدى حدود الثقه»
جدة تحجي و اني دموعي زخ
راحت الثقه يا جدة و رزاق عاقبني
عمري كله مرح انسى عقابه هذا
دك التلفون كرار .«الو ها كرار»
كرار. «يلا رنا طريقنه طويل»
رنا .«ماشي هسه نجهز»
رنا .«يلا جدة بعد اروح احضر روحي و زهرتي كرار جاي حت نرجع البيت»
جدتي .«موفقه يمه ، الله يفتحلج سابع سمه من ابواب رحمته»
رنا .«آمين»
طلعت بسرعه لبست حجابي و رتبت زهرة
ربع ساعه و وصلوا اخذ زهرا مني
سلمت و طلعت وياهم
الطريق مو طريق بيتنه !! «كرار وين رايحين»
كرار .«لرزاق غير»
رنا .«وين هو !»
مرتجى .«بعدة بالنجف»
وكع كلبي و غصه اكلت روحي
شنو بالنجف !!! معقول رزاق سوة بروحه شي؟
لا لا مو هيج ، مستعدة اسوي اللي يريدة
بس مو يعوفني و يروح
يمه وينج !!
لا انتي و لا ابويه و هسه سندي هم!!
روحي تطلع و الطريق طويل
الافكار السودة كلها براسي عاشت
لحد ما وصلنه النجف لو متأخرين شوي جان متت
دخلنه الولايه و رحنه للأمير
فدوة لاسمك سيدي و مولاي
اني بحضرتك و اتمنى ما تردني
يا علي يا ابو الحسن ، ردلي رجلي
يا رب بحق علي 😭
يا رب بحق هذا المكان المقدس
يا رب اريد رزاق والله تعلمت من غلطي
بقيت ابجي و احجي و دموعي تنزلر
إجت مرة خلت ايدها على كتفي
مسحت دموعي و كالت
.«مرادج وصل ، لا تبجين اكثر .. صلي ركعتين شكر و اطلعي منا ، نور اللي صار بوجهج رح يجذب الكل الج»
رنا .«خاله يا نور ، خاله رجلي مراضي عني شون يصيرلي نور 😭»
المرة .«كومي يمه كومي ، رجلج موجود برة»
رنا .«صدك خاله يعني رزاق إجه»
المرة .«اي رزقج إجه كومي تلكيه»
ما اعرف شون وكفت صليت ركعتين و طلعت
شفت بس كرار ينتظر و زهرة بيدة
رنا .«كرار وين مرتجى»
كرار. «راح لرزاق هسه يجون»
رنا .«يعني رجع مو!»
كرار .«رنا شنو بينكم صار فهميني»
رنا .«صعب احجيه بس ثق مقصدته»
كرار .«اوف منجن ، اخذي زهرة خل ادخل ازور»
كعدت و اخذتها لحظني و راح
فتحت كتاب الزيارة اقرة بين ما يجي
شفت ثنين كعدوا يمي
رفعت راسي و اشوف مرتجى
و
رزاق وياه !!!
هايز 🙋
شلونكم حبايب 😁
صار هواي مكاتبه جديا مشتاقه للروايه و الكم
بس خلصت دراسه رأسا جيت ركض اكملىحت انزللكم ، صار اسبوع اعرف انه طولت 😅
المهم ، شون شفتوه البارت !!!! 😀
هذا الأسبوع تبلش امتحاناتي لهذا رح اوقف الروايه شوي .. او أتأخر اكثر بالمعنى الادق 😅
لأني جامعه هسه يلا رح نبدي فصليات وراها كورس .. اللي مثلي رح يعرفون النظام 💔
و اللي خلصوا بارحه امتحانات
نيالكم + موفقين ، يارب ما يضيعلكم تعب أبد
بارت بدون تدقيق .. غلسوا اذا اكو سحگات 😅😂
لا تنسون الفوت ⭐
الكاتبه : اسراء الخزرجي 💙
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!