رواية احببتك انت الفصل التاسع والثلاثون 39 - بقلم ESRA'

#أحببتك_انت

.
.
تنن 🙋
شلونكم حبايب .. بارت سبرايز
عبالكم رح تخلصون مني هيج بسرعه 😅
نوو ، بعد اكو اشياء ما نحلت 😁
غلسوا عالسحگات لأن مطفيه 😅
يلا نكمل 💪😍
.
.
مدري ليش اتمايزك وردة قرنفل
اتيه روحي بريحتك
واحتار من ياصفحة اشمك 💛
عريان السيد خلف.
.
.
.
.
رنا :
فاجأنه قرار رزاق انه يسوون عرس بلسم هالسنه
ما يحتاج لحد ما تكمل الجامعه وهم مخطوبين
سبحان مغير الأحوال ، مدري شغير قرارة

سوينه كعدة و اتفقوا على المهر و سوالفه
عمتي مراضيه طبعا بس كرار و رزاق قنعوها
اني و فرح و هسه بلسم
رح تموت عمتي من غيضها والله
بس هي هاي القسمه محد اله اعتراض عليها

اتفقت وي خالتي مليكه توجه كلامها وي عمه
حت ما تكول انه هي وخالتها بكيفهن
و احسن خطوة جانت لأن عمه فرحت و بدت وياها تحجي تفاصيل و تتفق
بلسم بين خجلها و فرحتها
و بين خايفه من سبب قرار اخوها
بس اني مرتاحه مهما كان السبب
يستحيل يضرها بقرارة هذا
رزاق كبرها و داراها بعيونه

أسبوع قضوه بالتجهيز للمهر و النيشان
مرتين طلعت وياهم بس زهرة دمرتني
بعد ما رحت الباقي فرح وياهم راحت
استلمت البيت تنظيف وي بلسم
طلعناه يبرج برج من النظافه
بين شغل البيت العادي و بين تحضيرات المهر
نقضى اسبوع ثاني بشربه مي

سوينه المهر بين الأهليه بس ما عزمنه
بس احنه و هم و عالعرس يصير كبير
هم اجواء تجنن صارت رغم بسيط
بس فرح و مرام حيوه عدل
مرتجى هم ما قصر بشي

بالبداية دخل و ثنينهم عود خجلانين
لبسها النيشان و باس راسها
نصه عليها شاورها .«وفيت بوعدي لو لا»
ابتسمت و نادت براسها اي

التفت علينه يضحك
الموجودين بس نسوان عمي ثنين و خالاتي و بناتهن
شغلنه اغاني و كامو ركصوا عود
اله موتنه ضحك يريد يشيلها وهي تخجل

مرتجى .«اذا ما شيلج هسه اسويها بالعرس»
بلسم .«والله اوكع لا عبالك اني ضعيفه»
مرتجى .«هي عضمايتين بيج ولج»
بلسم .«عليك الله لا تشيلني»
رنا .«ولج قبلي هسه احسن مما كدام العالم»
بلسم .«وج اوكع»
مرتجى .«تركيها بس ما ازفج اذا ما اشيلج»

كف عنها شوي و البنات جابولها مثل الصايه بيضه لبستها على فستانها و خلت شال على راسها هم ، احنه هم كلنه لبسنه حجاباتنه
دخلوا اخوتها و عباس و وليد ابن عمي هم
الولد سووله حفله ويانه
ما قصروا بشي ، رزاق واكف بعيد عنهم
بس ضحكته مزينه وجهه
بيدة زهرة يركصها وي الاغنيه

شوي و كعدوا ياخذون استراحه و يتعشون
سوالف و ضحك و الكل فرحانلهم
مرتجى كل شوي يتناكر برزاق يغورة لان اخذها
و هذاك الأخير ساكت متجاهله 😂

انتهى هذا اليوم بسعادة و راحه حمدلله
كل واحد رجع بيته و مرتجى بقه وي بلسم عود نطيناهم مساحه وحدهم
ربع ساعه و تخبل عليهم كرار طلعه
بمهرة ما خلوه وي فريحه هواي
يكول اريد اردهه اله 😄

هم موتنه ضحك و راح لبيتهم
كل وحدة صعدت غرفتها بدلنه ملابس الحفله
رضعت زهرة انومها حت أنزل الملم
دخل رزاق للغرفه نظرلي .«الله يساعدهم»

رنا .«ويساعدك حبيبي»
رزاق .«مو كتلج كافي ترضعيها»
رنا .«مقللتلها بس هسه اريدها تنام بسرعه انزل الملم وي فرح و بلسم»
رزاق .«وخري عنها جيبيها و نزلي»
رنا .«لا فدوة تركها خل تنام ماريدها تتنحس»
رزاق .«رنا .. اريد طفل ثاني»

صديت عنه نظري ما جاوبت
يعرف و جان وياي من كالت الدكتورة
انه صعب يصير حمل بسبب اسقاطي الصار
اجه كعد كبالي و اخذ ايدي بيدة

رزاق. «يصير ، اعرف شدتفكرين بس واثق يصير ، و ما نخسر شي لو جربنه .. زهرة هم كبرت بعد»

رنا .«الله كريم ، هاك نومها اني انزل»

خليتها بحضنه و طلعت من الغرفه
شما اكول تهون بس تبقى تحز بگلبي و تاكل بيه
اخذت درسي عمري مراح انساه
و يمكن الله نطاني زهرة على عين رزاق

نزلت شفت فرح هستوها دتلملم

رنا .«ها حب وين بلسم»
فرح .«وج هاي كل عقلج تنزل»
رنا .«والله انزلها متنه غير»
فرح .«ههه لا عوفيها خطيه ، هسه نكفه البيت اني و انتي بسرعه بسرعه و نصعد لرجولتنه نكمل السهرة عدل»

رنا .«عزة وعبالج بيه حيل»
فرح .«حت لو ، خطيه اليوم كله عايفته»
رنا .«مخبله ولج خليه يشتاقلج»
فرح .«ولي اني هم اشتاقله غير»
رنا .«اندري شلگه بيج كرار»
فرح .«ااااه حب و حنان و امان كل شي عندي»
رنا. «خبال اروح عالمطبخ اشرفلي»
فرح .«تعاي نسوي مكان مكان اسرع»

طلعت جبت كيس كبير و لمينه الازبال
سفطنه الكراسي و رجعنه الطخم ليوان كامل
الصاله كذلك نظفناها و رحنه عالمطبخ
لمينه الكيك بعلبه وحدة و المشاريب
العشه جاهز هم خلينه البقه بالثلاجه
كفينه كل شي بسرعه
بقه الخفايف تركته على فرح تكمله
رحت سويت مي و منظف مسحت الارضيه
كلها صايرة دبگ اكيد چابين العصاير

كملنه بـ3 ساعات و صعدنه
دخلت غرفتي نايم و حاضن زوزة
رحت بدلت ملابسي و اجيت مددت يمهم
غطيتهم عدل و نمت
حسيت عليه جاي على جهتي حضني من ورة
فتحت عيوني بمكانه خال مخدة
عدلت غطه زهرة و التفتت عليه
حضنته و نمنه تعبانه ولا بيه حيل لحركاته

صبح الصبح علينه هو ماكو و زهرة كاعدة
اكيد رايح الدوام ، ما كعدني اشو !

كمت غسلت و صليت
بدلت الي و لزهرا و نزلنه
فرح و كرار و علي و عمتي كاعدين
صبحت عليهم ردولي
شوي و دخلت بلسم هم سلمت
كعدنه نتريك كل احنه سوة
كرار اخذ زهرا بحضنه ، رحت سويتلها اكل
من تزوج بعد ولا اخليها يمه هواي
زحمه بعد عندة مرة يجي يحتار بيها
و لو هو الولد ما يكول لا بس هم لازم اقدر
هي هم متعلقه بعمها كلش

كعدت وياهم اكلت لفه جبن و اخذتها منه اوكلها
شوي و نفتحت الباب اياد جاب مرته واجه
هم سوينالهم مكان كعدوا تريكوا ويانه
زهرا اندمجت وي بت عمها رحمه
هاي تصيح و ذيج تصيح شالن البيت

عمتي كل شوي تسمعنه حجي اني و فاطمه
لأن ثنينه بچرنه بنات
ادري هو بيدنه يعني !!
عجبتي عالعالم اللي تسوي هيج والله
هذا الشي مو بيدينه حت نختار على المزاج
تبقى البنيه تاج على راس اهلها ان قبلوا او لا
هاي الولد ذاك من ذاك يطلع بار بأهله
اشو من يكبرون يتعاجزون منهم
و هذا اللي يشمرهم دار رعايه و ذاك اللي يشمرة ابيت اخته او جدة حت يخلص من حمله
و نسى هو اللي سواه و كبرة و رباه
يوميه اشوف زهرة وأحمد ربي و اشكرة
اللي تكون چبيرتها بنيه
تنفتح الها أبواب الجنه كلهن
ابد لا تندمون على هالشي
او تسمعوهن من يكبرون انه هم غلط او جانوا مو برغبتكم و جنتو تردون ولد
البنات هن الانيسات ، والله يقوي ايمان الكل و برزقه قناعه و ادراك انه شما يجي هو نعمه من الله سبحانه .

طنشناها و التهينه حضرنه الغدة
رجع رزاق و نصبنه الغدة كل احنه كعدنه
نصبوا على بلسم اربعتهم عليها
ساعه اللي ترد وساعه تخجل
علي ما ارتاح لحد ما بجاها
بس اياد حجه عليه و سكتها

حلوة علاقتهم وياها كلش يحبوها و مدلليها
هي البنيه الوحيدة بعدهم الاربعه
بقوا عدنه بيت اياد الليله
و هم سوينه سهرى حلوة معدله

فريحه سوت كهوة بالحليب كلش تحفه
اني و فاطمه سوينه طبق حلاة وياه
علي هم جاب من برة نمنمات و كرزات
كرار نصب علينه عود يفسر فنجان
وهم موتنه ضحك شلون يصنف
عود يشوف اشكال و ينطي تفسير بكيفه

الجهال ناموا على روحهم تعبوا من اللعب
صارت الـ3 الفجر يلا كل واحد راح غرفته
كملنه سهرتنه اني و رزاق بغرفتنه
باجر كرار و فرح يرجعون بيتهم بعد
اريد اروح بغداد هم ازور و هم اشوف بيت خالي
بس ساكته يروح يعصب
اللي اعرفه هم مسافرين لندن
ما اعرف بعد اذا رجعوا او لا

طلع الفجر صلينه الصبح و نمنه
يمكن ساعه و حسيت على رزاق ديبدل

رنا .«تداوم اليوم»
رزاق. «اي طبعا»
رنا .«اكولك اليوم جمعه وين تروح»
رزاق .«شنو جمعه»
رنا. «اي والله ما شفت سهرنه براحتنه جان كتلك عندك دوام»

راح عالتلفون شافه ورجعه
بقعظه واكف بمكانه صافن

رنا .«ارجع بدل و تعال نام»
رزاق .«كومي نطلع لكربلا»
رنا. «لا حباب خل انام ترى منتهيه هسه شوي وهم تكعد بتك»
رزاق .«عاب حظي اي والله»

اجه يمي مدد بدون ما يبدل
كتله كوم ردلي ما بيه حيل
ديلا هسه حت البنطرون يندمر
اكو واحد ينام بملابس طلعه ، هففففف

درت عنه و نمت تعبانه حيل
مدري شكد نمت بس حسيت براحه
محد زعجني حت زهرة مالها صوت
فتحت عيني رزاق هم نايم
التفتت زهرا ماهيه بفراشها !!

طفرت اشوف وين راحت هاي
بسرعه لبست حجابي و طلعت من الغرفه
نزلت جوة ادور ماكو
بغرفه عمتي الصاله الاستقبال مالها أثر
تسنطت على غرفه اياد سنطه يعني مو وي رحمه حت اكول ديلعبن

صعدت اريد اكعد رزاق يشوفها
ختنكت وين راحت
دا ادخل للغرفه سمعت كرار .«شتعلوا اهلج عمو»

زهرا .«ااننننننوووو ووونوو»
كرار. «تحجين بنكلاديشي عمو ، وج روحي لبابه يلا»
زهرا ترد عليه بطفولتها وهذا يحجي وياها
ارتاح گلبي عليها و دكيت الباب
طلعلي بالفنيله خرب حظج زهرة
شايلها و مكفشه شعرة و ايدها بلحيته

كرار .«هاي الصخله مالتكم»
رنا. «ههه اعذرني داهمتك»
كرار. «عادي تمون حبيبة عمها بس هسه لا ارد انام»
رنا .«تدري دنيه ظهر»
كرار .«اي ادري بس هم نعسان»
رنا .«هههه ، روح نام»

اخذتها و رجعت الغرفه اشمشم بيها
يمه تخبليني من تختفين هيج ولج مامه
خليتها يم ابوها و طلعت ركبت غدة بسرعه
للعصر الكل نزل ..
قضت الأيام بهدوء هم أسبوعين و بدت تجهيزات العرس يريد قبل لا تداوم يتزوجون

هم على عجله بسرعه بسرعه
فرح و كرار طلعوا وياهم ياخذون الغرفه
عمتي و خالتي طلعن عالملابس
بلسم نحسه بالمشترى لهذا ما اخذوها وياهم
جهزوها بأربع طلعات من كل شي تحتاجه
اخذوله جهاز همات إله
هم قضى أسبوع و تحدد العرس عالخميس

رادت قاعه بس رزاق رفض
بس هاي البنيه و يريد تطلع من بيت ابوها
عمتي بدت تعزم ناسها و خالتي كذلك
فرح طول الاسبوع تروح و تجي بيتها و بيتنه
تالي كرار كال يبقون لحد ما يخلص العرس احسن لأن تعب الطريق عليهم

الأربعاء بالليل سوينالها حنه مرتبه
هالمرة حت صديقاتها من الاعداديه اجن
فرحت بيهن طارت و انطلقت وياهن
ركصن شوي و راحن

صبحنه الخميس الصبح حضرناها وراحت للصالون وي فاطمه و فرح
رحمه و زهرا خليتهم وي كرار حت اشتغل عدل
رزاق هم جهز الديوان حت من تجي الزلم جاهز
منا شغله و منا شغله هلكت طبعا
شهر و نص بس ركض بركض

صارت ساعه ثنتين واني اشتغل بصايتي
جهزت العشه و الكيك و المشاريب بقه الماي يحيبوه حت ابردة دخلي رزاق هم تعبان سودة عليه حاله من حالي قضاها ركض

سحبني من ايدي و صعدنه فوك غرفتنه
دخلنه سذ الباب و اندار فتحلي الحجاب

رزاق .«بعد ساعه تجي العالم ، ارتاحي شوي كافي حركه»
رنا .«خل اكمل و ارتاح حت بعد ما عندي شي»
رزاق .«ميخالف حبيبي ارتاحي و تحضري اني انزللهم»
رنا. «لا لا انت هم بدل وراك وكفه تستقبل العالم»
رزاق .«اجو اياد و علي تركتهم بمكاني»
رنا .«يي زين لعد .. خل اكويلك قميص بسرعه»
رزاق .«وج كعدي كافي حركه ، ماريد قميص البس مال بارحه»

رنا .«لا لا هسه اسويه بسرعه»
رزاق .«رنا لا تخبليني دا اكول كافي»

صاح بيه و شمر علاكه كبيرة عالسرير و دخل الحمام 😐
تنهدت بقله حيله ، شسوي يعني
اريد اكمل يلا اصعد
ما ريد تكول عافت الشغل وراحت تتجهز

استسلمت لكلمته فتحت صايتي ورحت عالكنتور
اني حت فستان ممجهزة شي
قضيت الايام وي الشغل و مكدر اطلع بسبب نحوسيه زهرا
نسيت نفسي بهاللحظه شنو ألبس
صدك اختنكت يعني مرت اخوها غير اكون مرتبه

طلعت فساتيني مال الحجاب
كلهن لابستهن ، ماحب اعيد بيهن شلون هسه
هفف ، سحبت واحد نيلي و بيه ورد وردي النهايه
نسقت وياه شال و رحت طلعت بنطرون و بدي حت جواه البسهن

دا ابدل طلع من الحمام نظر لي وراح عالكنتور طلع ألقاط ماله
مقانعني يعني قاط اسود وياه قميص سمائي !
احسه مرعبل
صح الاسود وي كلشي بس مو هيج

عفت ورحت طلعت الاوتي وكفت كويتله قميص ابيض ، حت لو ما يلبسه مهم اني كاويته ماله عليه حجه
كملته و خليته كدامه

رزاق .«مو كتلج ابقى على هذا»
رفعت اكتافي معليه ، خليته عالسرير و رحت اسوي مكياجي

رزاق .«لا تطوخين شي»
رنا .«عرس هذا عرس»
رزاق .«اعرف عرس مو إله تطلعيلهم مزوكه ، خلي شي بسيط و إنتهى»

مرديت ، خليته هادئ بس مبين يعني
حمرة هم وردي هادئ عالبشرة
رحت عالفستان البسه صاح بيه

رزاق .«شو هذا تلبسين»
رنا .«لا تصيح ، شلبس لعد نسيت اشتري شي»
رزاق .«خرب حظي»

راح عالعلاكه اللي شمرها عالسرير
طلع منها فستان اسود و ذهبي مال محجبات
إله يجنن ، عيوني صارت قلوب

رزاق .«اخذتلج هذا ، يمكن القياس كبير شوي بس اعرف ممجهزة شي كلت خل اخذلها وياي»

ابتسمت و رحت بسته 💏 شكرا
رزاق .«العفو ، يلا مسحي خربطه اللي بوجهج لان طوخ محبيته»

هو اصلا لازم اغيرة كله ما يرهم وي الفستان
رحت غسلته و خليت من جديد
حلو طلع شكلي اهدئ من مكياج قبل شوي
لبست الثوب صح بيه كبر شوي
بس تحفه ، شديت الحزام صار افضل
وياه جايب شال هم ماركه مبين
شال عالوجهين ينلبس جهه ذهبي و جهه اسود
بداعه صدك ، لفيته لفه مرتبه
حذاء كعب لبست حت يرفعه من الأرض
اسوارات زينت ايدي و حلقتي بأيد وحدهه خليتها ، لبست مال العرس مميزة
و ايد الثانيه هم زينتها ، اخر شي خطيت اللاينر
و رحت وكفت كدامه بقه ينظرلي بانبهار

رزاق . «نعيد عرسنه وياهم»
رنا .«ههه اكعد راحه يلا ننزل»
رزاق .«لا لحظه صبري»

راح عالميز سحب عطر من عطورة
اجه غركني بيه و هو هم غرك نفسه
بقيت اكح لان كلش قوي خنكني

رزاق .«هاي حت اللي تفكر تحط عينها عليج تتراجع من العطر»
رنا .«عزة رزاق عطري صار ما ينحمل ، بعدين بتك لاطشه بيه منو هاي اللي تفكر تخطبني»
رزاق .«عفيه بيها والله ناقذة ابوها حت محد يزحفلج»
رنا .«هههه يعني صدك هيج تفكرون انتو»
رزاق .«امشي حبابه ، وها المطبخ لا تقربيله بعد .. ماشي»
رنا .«اي و عمتي هي تضيفهم حت ليله وحدة ما ابقه بعد وياك»
رزاق .«نكوللها حامل و نسكتها»
رنا .«مو حامل ، افهم بعد ما يصير»

تركته و نزلت ، متاولني طول هالاسبوع عالطفل
يعرف بعد صعب ، يعرف تأذيني ملحته

نزلت تلكتني عمتي تدردم لان شافت متجهزة
اتعوذت الشيطان و سكتت ما رديتها
فرح ما ريد اخرب على نفسي و اكدرها
رحت لمطبخ شفت جايبين المي خاليه هيج على الارض و حار

فتحت باب المنور خالين جدورة مال طبخ الحسين هناك و بيهن مي و ثلج
سحبت صندوك فرغته بيه إله شاغت روحي
احس بطني كصتني وجع !
صار شكد أشتغل ليش هسه يعني هالالم

طلعت اخذ الثاني دخل وليد ابن عمو
شافني شدا اسوي اجه وياي عاوني
جابلي الصناديك كلهن و اني أفرغ
شوي و إجه رزاق شافني غزرني
ادري شسوي يعني ، ليش اتركهن و اسمع حجايه

كاله لوليد يروح هو يكمل وياي
بس وليد عاند هو يكمل لأن رزاق هم تعب
بقه واكف فوك راسنه لحد ما كملنه
خليناهن بجداري ثنين و 3 صناديك تركناهن

بدت العالم تجي كرابه و معارف عمتي
شوي شوي امتله الاستقبال عالم
ساعه و إجت بلسم و البنات وياها
رأسا صعدنها فوك
البنات هم جهزن روحن ، شوي و دز عليه كرار
رحت زهرة مدمرة روحها بالمي 😩

اخذتها بدلتلها بسرعه و لطشت بعد
بقت وياي واتحرك اقدم للعالم وهاي ثاولتني
على أعصابي متحمله لحد ما حست عمتي و اخذتها يمها
بالخمسه نزلوها و الحفله بدت
صديقاتها انجمعن كلهن هم
اجواء سوولها تجنن
لبست بدله بصلي بالبداية
ورة الاذان دكلها مرتجى يعني جاي
صعدت لبست البيضه
هم كلش بديعه مديلها نازك و لطيف
قريبه لبدله فرح بس الفرق هاي الظهر كله تور

صعدت جبتلها البرنص مال عرسي تطلع بيه
و سترة البيضه هم حت تطلع براحتها
بالسبعه إجت الزفه و اهلي كلهم اجو
شكد مشتاقه لخاله مها صار هواي مشايفتها

سارة و غيداء وياها جايين بس اسماء ماكو
هم كعدوا كلهم و مرام و رقيه و فرح لزمن الوسطه ذبن لحم ، غيداء خلت ابنها بحضن سارة و كامت وياهن هم ما قصرت
كلش حلو صار الجو
منا حجايه و منا حجايه ، زهرة مو يمي
رحت وياهن ركصنه كلنه .. البنات كلهن بالوسطه بنات عمي و خالي الكل مجتمع
رحت على سارة هم اخذت آدم خليته بحضن خاله مها و جريتها ويانه
بالبداية مقبلت بس آخر شي استسلمت و كامت وياي ، هم حلو ركصها مو همجي

شغلوا اغاني دكه كرديه و استلمن الوسط هي و غيداء بركصه بالورك وي الدكه تجنن
ضابطيها عدل ، شوي و كلبوا على ساجدة عبيد
الكل نزل
الاضويه مال حفلات (بارات)
بحيث مسويه واهس عدل
صوت الديجي و المزايق برة تحفه صارت

ساعه و اخذوا استراحه ، عشيناهم و كالو يلا نزفهم بعد صارت الـ9 هم يالله

الكل تستر و لبسن حجاباتهن
اخذتلها السترة لبلسم لبستها
دخلوا اخوتها و مرتجى
رزاق باسها من راسها و وصاه عليها
اياد و علي هم نفس الشي
كرار ما قبل يدخل 💔

طلعوا الولد بقه هو مرتجى بين ما تلبس البرنص
رتبناه و اجت عمتي حضنتها و وصتها برجلها و حياتها الجديدة لازم تصون سرها عدل
بجت هواي وكل شوي نصيح بيها المكياج

الكل سلم عليها و دتطلع
باغتها مرتجى و شالها
هي رأسا شهگت و لزمته حيل
خربنه ضحك عليها شون خافت

مرتجى .«كتلج بالعرس هيج اطلعج»
بلسم .«فدوة نزلني عيب من اخوتي»
رنا .«ههه معليك اطلع هيج»
بلسم .«لا تخبثين رنوو»
مرتجى .«مالج مهرب»

اخذها و طلع بالكليدور نزلها كامت تبجي
طلعتهم عمه و فوك راسهم قرآن
هاي عادات هيج
اخذ ايدها و طلعوا
كرار شافها حضنها و بوسها و راح وكف بالباب
الولد هم سلموا عليهم
صعدت السيارة و اني بيدي زهرة
رحت سيارتنه وي رزاق نروح وياهم زفه
كرار و مرته هم
و خالي جواد بالكوستر وي خاله ملكيه علمود ناسهم
حركت السيارة و خالي ضرب طلق بالجو

على طول الطريق صوت المزايق يدك
عباس يصور الحفله
بعرس سارة هم صوروا الزفه و مرتجى راد مثل محمد يسوي زفته كلها تتصور

انتهى اليوم بفرحه ، الله يكتبلهم السعادة
رجعنه بعد ما زفوهم و إنتهى الوقت

وصلنه فاطمه و فرح راجعين قبلنه
صعدت زهرا لغرفتي نومتها و بدلت
غسلت وجهي احس تنفس شوي
لبست حجابي و نزلت وي البنات
كفينه البيت و عدلناه
هاي هوسه ورة كل حفله لازم تكون

لمينه هاللي ينلم بهالليل و تركنه الباقي باجر
رحنه شفنه الولد كاعدين بالصاله
كل واحد يصنف شكل
هاي لازم لازم تصير الكعهدة و ينحجى هيج

ساعه و كلمن راح غرفته وسد الباب
حمدلله رجع الصفاء لحياتي
و بدت تتعدل و انشالله تبقى هيج
ماكو احلى من العيش براحه
صح الدنيا بيها مشاكل هواي
بس ! تبقى المشاكل هي ملح الحياة

_______ محمد يروي ________

بعد عرس كرار
تفرغت لاسامه قبل لا أسافر
ماريد اروح و مرته تفرفح هيج
علي تعارك وياه مرتين حت يكول منو هاي
بس لا أسامه مو خالي ولازم اعرف
لو جان اكرم اللي هيج مسوي
اكيد جان حجينه عليه
مو لأن اخويه لازم اسكت و اكول هو يحلها

اتفقت وي ابويه نروحله فجأة لمكتبه
المفروض يرجع لمحكمه اللي هنا عدنه
بس صار خمس اشهر بالحله على هالشهر يرجعوني و بعدة وهاي شهر يجر شهر

صبح الثلاثاء ابويه ماخذ إجازة
تحضرنه و رحناله لهناك ..
و طبعا ما كنالهم احنه منو
لا رأسا سالنه عليه عود نريد نوكله بقضيه

اكو محامي ظاهر عندة وياه مشكله
هواي ذم بيه و حجه على شغله
مستحمل اريد اشوف ليوين رح يوصل
حجه حجه و لغط براسنه لحد ما اذاني وجعتني
خربيومك ولك راديو بالع وما ندري

المحامي .«وآخرها تكفل بمرة عدها قضيه حضانه و صار الحامي مالها ، والله يا خويه ما انصحك هذا مو خوش محامي و يشتغل بالرشوة بايع انسانيته ، نعرف متزوج و يطلع وي ذيج المرة كل ما تجي عندة تراجع
ادري وين اكو هيج موكله تدي يوميه ، هسه هم شي ساعه و تلكاها على مكتبه و ضحك و سوالف تشيب الراس ، حت سمعه إجت على مكتبنه بس المدير معرت بيه ما يرضه يرجعه لمحافظته على شنو رجال نزيه ، هي حمار وين النزاهه وهو بايع كل شي وي الگح..ب»

هنا طفر ابويه بعد ما استحمل
نطاه بوكس 👊 معدل رتبله وجهه
رزله هم رزاله مرتبه و طلعنه
بقينه ننتظر تجي هالطركاعه بعد نشوف منو
هدئ شوي و شرب ماي

طبعا مندري ياهو هي لان هواي نسوان يطبن و يطلعن للمحكمه
مر شوي وقت و دخلت وحدي اتطقس الجو
إجه شاب بيدة جاي مدري كهوة
يدخلها غرفه اسامه
فتح الباب بقيت من بعيد اراقب
موجودة جوة وياه وحدهم بالغرفه

اتصلت بأبويه كتله تعال
شوي و إجه دخلنه ثنينه لغرفته
تفاجأ بينه كام على حيله

اسامه .«هلا ، خير خو ماكو شي»
محمد .«ماكو لا تخاف بس اسماء تعارضت جينه عليك»
اسامه .«شنو تعارضت ! شكو جيت لعد»
محمد .«قابل رجلها حت اخذها ، عوف البيدك و امشي»
اسامه .«محمد صدك كلامك ! يابه اذا أسماء تعبت شلون جيت انت و تركتها»

ابويه .«يردوك»
عينه عالمرة و حجه وياه
استلمت الرساله و كالتله .«ابو امير اروح اني هسه ، اهتم بالعائلة افضل .. من رخصتكم»

خلت و طلعت ، ابويه باغته بكف ضربه
ماردت هيج يعصب بس يستاهلها اسامه

ابويه .«اكعد كبالي»
كعد كدامه متفاجئ من ابويه
رحت سديت الباب و وكفت ساكت

ابويه .«احجي منو هاي الحلاويه المخبليني بيها وين ماروح»
اسامه .«عدها قضيه مستلمها»
ابويه .«ولك تكذب على ابوك 😠 احجيلك شنو يحجون عنك»
اسامه .«خل يحجون اللي يردوه ، مو اسامه اللي يترك قضاياه بالنص بعد ما ينطي امل للعالم»

أبويه .«هسه تحجيلي قصتها كلها لا وحق الحق لا انت ابني ولا اعرفك»
اسامه .«شنو قصتها فهموني شبيكم ! شنو هاي جيتكم من الاساس ! موكله عندي مثلها مثل غيرها ، شغلي يتطلب كل شي مثل ما انت دكتور و شغلك اشكال»

ضربه كف ثاني و هذا يستاهله فعلا
قلل ادب وي ابويه ، و طعن بأخلاق مهنته وهو إبنه
صح دكتور بس عمرة ما وصل امي مرحله الشك

ابويه .«ولك عندك لسان وتجاوب !
هسه تلم تطلع بسرعه و كبل للبيت ، ماريد اهينك هنا اكثر مما انت مهين نفسك»

تركه و طلع كدامنه
اسامه .«فهمني شنو الموضوع»
محمد .«امشي بالبيت تفهم و تفهمنه»

طلعت اني هم لحكت ابويه
منتظر بالسيارة يغلي بروحه
تجاوز اسامه كلش

حركت السيارة و رجعنه لبغداد قبله
بالطريق رسلتله (اذا تريد تلحك على بيتك ، اشرح كلشي اليوم)
وصلت ابويه و طلعت لشغلي
رجعت قريب المغرب بعدة ما جاي !

خابرت أسماء كالت رجع عصبي
كسر و صيح و تعارك وياها
فاتني اجيبها هنا لان هسه يعرف هي مبلغتنه

اخذت سارة و رحتلهم
فتحت الباب العيون مورمه بجي
دخلنه كالت فوك بالغرفه
صعدت صدك مسويها خرابه مو غرفه

شافني دخلت رجع على كعدته
عالسرير و راسه بين ايديه يضغط عليه
كعدت بصفه تنهد بتعب

محمد .«كوم غسل و تجهز نروح بيتنه»
اسامه. «ارجع مبيه حيل ابوك»
محمد .«كوم وياي ، وضح الموضوع و اخلص»
اسامه .«كله بسبب شكها الف مرة منبها يا بت العالم حبيتج الج شكو احب عليج ، هاك خلتها بحلك ابوك و شفت شصار»

محمد .«اسماء مدخلها ، اني كتله .. وحقها لو غارت و خافت على بيتها ، ماكو وحدة ترضاها»

اسامه .«اموتك هسه فهمني»
حجه بعصبيه و صياح
عرفت مرح يبقى بهدوءة
حاولت اكون ابرد ما عندي

محمد .«لو غيداء جانت بمكانها رح تسكت ! لا اصلا تساعدها تطلك»
اسامه .«لك انت شعليك ابيتي شكو تكول لابوك»
محمد .«هسه اني لو بمكانك و سارة اجت كالتلك هيج و هيج انت تسكت !»
اسامه .«لا ما اسكت جان جيت حجيت وياك بدون ما ادخل احد و اكبر الموضوع»

محمد .«ماشي وياك ، يلا فهمني هسه!»
اسامه .«ماكو شي تفهمه لا تدخل لا انت و لا ابوك»
محمد .«احجي عنه بأدب اسامه»
اسامه .«من تحترموني احترمكم»
محمد .«ماشي ، تذكر رح تخسر انت وبس»

تركته و نزلت صارت كدامي
محمد .«جيبي امير و لبسي حجابج عدل تجين ويانه»
اسماء .«ما يقبل اطلع ردت منه و رفض»
محمد .«دا اكول تجين امشي»

سارة اخذت أمير شالته اخذته منها
ماريد هذا هم اخسرة وهي اصلا متدري بيه بعدها
اجت اسماء بيدها جنطه ملابس لأمير
اخذتها و طلعنه لبيتنه
هسه بس يفتقدهم يجي غصب عنه

وصلنه للبيت لكينه أهل سارة جايين !
ولا كالولنه ! شعجب ؟
ابوها امها و اختها جايين
ابوها صحته بالنازل صايرة كلش تعبان
بس شو وجوهم ما تتفسر
راحت يمهم سارة و صعدت لغرفتي
ساعه و راحو صعدت يمي

محمد .«خير شو مفاجأه الزيارة»
سارة .«هيج اجو»
محمد. «شصاي سرو ! حت عمي مريض أزيد من اخر مرة شفناه»
سارة .«بابه تعبان و إجه يريد يشوفني»
محمد .«لا تخافين انشالله ما بيه شي ، جهزي الغراض بعد باجر نسافر انشالله»
سارة .«مجهزتهن بس ما نطول فدوة گلبي ممرتاح اشو»
محمد .«اهدئي و ادعيله بالشفاء حبيبي»

حاولت اهدئها و سمعت صوت اسامه جوة
تركتها و نزلت دخل للبيت عصبي فاير
شاف أمير كدامه يركض خايف منه
شلته دخلته لأمي يخاف من يصير صياح
طلعت صار بوجهي .«شكو تاخذهم بدون اذني»

محمد .«تريد اخذ خشمك بدالها ماعندي مانع»
اسامه .«محممد😠»
محمد .«ندري عندك صوت و تعرف تعيط بس فكر هسه ابنك يسويلك عزة و مرتك حملها متعبها لهذا بلا صياح و ادخل احجي مثل البشر»

احجي وياه و امشي للصاله متجاهله
دخل وراي يشب نار و يطفى
ابويه كاعد منتظرة شافه سكت بس عصبي
حجه بسرعه ينظر لأبويه

اسامه .«ام سولين موكله عندي ، تكفلت بحضانه بناتها ثنين لبين ما يجي الوصي عليهم لان زوجها سكير و راعي مشاكل و يريدهن عندة و البنات بعدهن صغار بدايه مراهقتهن لهذا كفلتهن رغم ممنوع لأني محامي المسؤول عن القضيه ، هالاسبوع يوصل الوصي مالهن و اخلص من السالفه كلها فهمتوا هسه»

ابويه .«اكعد و احجي عدل من تحجي وياي»

جاوبه و هو عينه باوراقه
طبعا ولا يبطل هالعادة
كل ما يعاركنه يحرك دمنه هيج
برود تام و بيجة شغله و يحجي 😂

اسامه. «شحجي بعد يابه هاي كل الموضوع شلغي اكثر تريد االف»

محمد .«هسه يجي علي و احجيله كل كلامك هذا»
اسامه .«و صخام شدخله بحياتي»
محمد .«يااا هاي شوكت غير إسمه»
اسامه .«لك انت تلعب باعصابي فهمني»
محمد .«اني ! لا عيب أصلا ، بس صديقي مغير اسمه و ما ادري غير اعتب عليه»

ابويه ضحك عليه لأن صدك دا احرك أعصابه
وصل علي بعد ما هدئ اسامه شوي
دخل سلم عليهم و كعد

علي .«خير محمد شنو رسالتك هاي»
محمد .«ولك بذات تغير اسمك بدون علمي هاي هيج صارت الصداقه»
علي .«انت هم غيرته بدوني ، اترك سخافتك و كولي وين اسماء شنو وكعت من الدرج و مخطرة»

ابويه .«صخام هو هيج كتلك»
محمد .«اني شكو ، انت كلت بلغه يجي بسرعه»
علي .«جيت فهمني وينها»
محمد .«لا ما تشوفها عقاب إلك»
علي .«تريد اخربط وجهك بحضور عمي يشوف بطولات ابنه عدل»
محمد .«هههه غلبتني رح اكف عنك هسه ، رجل اختك عندة كلمه راس وياك»

التفت على اسامه شافه ضاربله صفنه بعصبيه
علي .«هو رجل اختي غير يترك ابو صابر بحاله بالأول»
محمد .«ولك راح لذاك الصوب»
اسامه .«رح يجيكم ذاك الطياري تعرفون شنو»
محمد .«ههه يلا غرد هذا علي هنا»
علي .«اوكف فهمني شكو لا امرعدك هسه»

حجيتله السالفه و اسامه كمله و وضح كل شي
اسماء دخلت للصاله هم دمعتها بعينها
كام صالحها و حجه وياها ناعم شوي قنعها
تركناهم و طلعت وي علي للباب

علي .«شفتوها يعني»
محمد .«جنت واثق اسامه ماعندة هيج شي بس انت و اختك خبلتوني»
علي .«لا تلومني محمد ، اسماء مو بس أختي وحقي انه اطالب بحقها وقت اللي ينغبن .. صح هسه ما حجيت بس يبقى تصرف اخوك غلط ، هو كفلهم صح بس منو يكول ما رح تكربسهم براسه»

محمد .«ساعتها اجي اصيحك اكولك يلا علي شغل ايديك»
علي .«هههه روح تجهز انتظرك بالمطار بالسبعه»
محمد .«ماشي»

راح دخلت البيت كلمن بغرفته
صعدت  لسارة تلاغينه و بطلت ما اخذها
ارد اشوف شنو هلعناد هذا وياي صايرة
وحت تصدك كدامها لغيت حجزها

و اصلا ما اريد اخذها وياي
هناك عندي شغل هالفترة و اطول بالدوام اكثر من اول لحد ما نرتب الطلاب و نسويهم دفعات لان الوفود وصلت

و صدك صار الصبح و رحت للمطار وحدي
التقيت بعلي هناك واصل قبلي
تسالمنه و كعدنه ننتظر وقت الطيران لحد ما صار

طرنه اللندن بخمس ساعات وصلنه
رتبنه أغراضنه استقرينه و طلعنه
وصلنه سوة
علي وياي بعد بجامعه الملك بعد
هم صار أستاذ إنكليزي بقسمي
قل الحمل عني لان صرنه اربع أساتذة مسؤولين عن الوفود العربيه المشاركه بالجامعه

رتبنه امورنه ثنينه و تعب كلش هواي
المقرر جون حاول يشد وي علي من عرف صديقي
بس علي دبر روحه و كسبه لجانبه بلسانه و أسلوبه المرح
بسرعه كلش تاقلم وي الاساتذة الباقين
مروة ذابت بيه بس هو ما نفهلها
يصيحلها سلبوحه 😂
يقلد عليها بالعراقي وهاي ما تفهم
هو يحجي و هي تضحك مصخمه ما تدري شيكول عليها 😄

كملنه امورنه و رحنه لقسم إحسان
هم ملتهي يحجي بالتلفون و يرتب اوراقه اللي عالمكتب
مخبوص مدري شيدور يفتح و يسد ثابر نفسه

علي .«هيووو شبيك»
التفت علينه أبتسم اجه صافحنه

احسان .«بعدين نكمل روحي اقري غير مادة ماشي .... ديلا الله وياج»

كعدنه كدامه ننظرله بتفحص
محمد .«منو منهن»
علي .«هههه رح يطلع حجه و يطير السالفه»
إحسان .«لا ليش اطلع حجه ! احجي وي ميلاء»
محمد .«ميلاء !! نفسها بت المعماريه لو غيرها»
إحسان .«وانت منين تعرفها»
محمد .«غير شفتها مرة دازتلك رساله»

علي .«ولك شو ما ادري منو هاي»
محمد .«جديدة بعدها»
علي .«أعترف احسنلك منو هاي»
إحسان .«لا تلغي بكيفك ادرسها رياضيات و ميكانيك عالنت»

محمد .«إحسان ما تزوج عاد ، اعرف الك مدة تحجي وياها اذا مرتاحلها و خوش بنيه اخطبها»

علي .«انا اعترض 😠»
إحسان .«وانت شكو حت تعترض»
علي .«اني اخطب اول»
محمد .«انت بس بوخه تخاف تزوج»
علي .«صوج مرتك ما تدورلي عروس»
محمد .«كتلكم انت و عقيل سارة معليها»
إحسان .«المهم ... فاتحت امي عنها»
محمد .«عفيه عليك»

كعد كدامنه تنهد
اعرف متردد، أحواله متخربطه صار فترة
هو يعرفها عن طريق النت
و صعب واحد يثق هيج بسهوله

علي .«من كرمي عليك رح اقدملك عرض الأروع بهذا الكون»
رفع راسه نظرله
علي .«أحم ، حت تعرف اني افضل إنسان على هذا الكوكب ، انطيني معلومات اللي تعرفها خل نسأل عنهم حت اروح بجلاله قدري و عظمتي اخطبها الك»

ضحكنه عليه ، درجه الثقه العندة مفوله

إحسان .«بعد مو هسه وكتك»
علي .«هه العرض يجي مرة وحدة وانت خسرت»
محمد .«لا خله ينتظر و يتعرف عليها اكثر بعديم يجي دورنه»

نظرلي و أبتسم
كمنه كلنه رجعنه للبيت
شفنه عقيل جاي و عصبي مدري شيدور
كالب الصاله و غرفته
منزل الجنط كلهن يدور و يدردم

خليت السويج و رحت عليه
محمد .«هلو»
رفع راسه .«شوكت جيت ! ليش ما بلغتني ؟ شوكت تحترمون وجودي هنا»

محمد .«شبيك عصبي ! مو اول مرة اجي بدون ما انطي خبر»
عقيل .«ما يصرفلي اني هيج ، و اصلا رح انتقل منا هاليومين و ترتاحون بطبتكم و طلعتكم»

علي من وراي .«هاي شبيك تيزاب صاير»
عقيل .«لعبت نفسي منكم كافي هالاهمال العدكم»
محمد .«شو امشي وياي نطلع»
عقيل .«مو طفل كدامك حت نطلع وخر من كدامي خل اكمل»

تركته و رحت بدلت سبحت ذبيت تعبي مال اليوم ، صليت و رجعتله
كعدت كدامه و هو ينبش مدري شبيه
بقيت كاعد يمه ما تحركت
اعرفه من يعصب من شي
يهدئ و يجي يحجي من وحدة

مرت فترة شوي اخذ حسرة
ترك البيدة و اجه كعد بصفي

محمد .«فهمني شبيك ! ادري احنه مو اصدقاء حت نوكف وي بعضنا بالشدات»
عقيل .«المقرر رافض اقدم الدكتوراه هسه ! اعرف اذا ما اخذها هسه بعد ابرد من الدراسة و مالي واهسها»

محمد .«انت متأكد هسه تريد تدرس ! ما تاخذ استراحه ؟»
عقيل .«ما تشوفني رح اتخبل يعني شنو»
محمد .«ولا يهمك باجر نروح سوة للجامعة و نشوف شيصير»
عقيل .«ذولي ما عدهم واسطه»

محمد .«جامعتنه أعلى منهم ، أحاول ادبرها بالهويه مالتي»
عقيل .«انوب العقد ماكو اريد اطلعه الهم أنه اني من البدايه عندي وياهم عقد ماستر و دكتوراه»

دخل علي .«نحلها انشاءالله عندي هناك معارف اكثر منك لا تضوج هيج ما يستاهلون»

عقيل .«انت خوش تركتني وحدي هناك»
محمد .«انتقل ويانه»
علي .«صدك إنتقل ، حت نصير احنه الرباعي سوى»
عقيل .«لا احب جامعتي»
محمد .«دكوم رتب الهوسه هاي حت نطلع كلنه»

تركته و طلعت ، شفت شنو نحتاج مسواك
كتبت المشتريات تجهزوا و طلعنه
نزلنه سوبرماركت كل واحد اخذ جهه اشترى اللي عليه

و بدون تفكير طبعا و دوخه راس
علي تكفل بجهه الحلويات حت ياخذ الكيك
كون نزوجه وحدة تسويله بس كيك لحد ما يبزع
كملنه و طلعنه ، تعشينه برة و ردينه

ثاني يوم حلينه شغله عقيل
تواصلت وي بروفيسور براي و سهلها النه
نقبلت اوراقه رأسا
أول واحد من المجموعه العرب نقبل بالجامعه
جرگ حلكه و الضحكه من الطول للطول

كل واحد منهم متميز بشغله
ولا أندم بيوم انه عرفتهم و صادقتهم
الأصدقاء نعمه من يكونون سند لبعضهم
و حمدلله احنه الاربعه كلنه گلبنه واحد على الثاني

مرت الأيام و أبويه قدم لسارة رجعها للدوام🤦‍♀

تلث أشهر و رجعت للعراق وي علي
حددوا ولادة أسماء و نزلنه سوة
ثاني يوم رجعتي اخذت سارة حللتلها
جنت متأكد من الحمل قبل لا أروح
اعرف ايامها عدل رغم عدها الشهريه بس اعرف بهالاشياء من مجال أبويه و اعرف تصير هيج

فرحت !!
لا يمكن شي ابلغ من الفرح اللي حسيت بيه
شعور أتمنى كل رجل يشعر بيه و يعيشه
أنه ثمرة الحب بدت تزهر من شخص جان حلم حياتك و حققته
انشالله الله يكتبه النه و اشوفه

نظام غذائي لسارة و التزام بالفيتامينات لازم
صارت ولادة اسماء و جابت دانيه للدنيا
اخذها أسامه و عيونه دمعت
كلش جان بخاطرة بنيه
وهاي الله نطاه اللي تمناه
اذنلها و أبويه هم اذنلها
رجعوها للخدج يچيكوها
بقت امي عدها و احنه رحنه لأسماء
بعدها محاسه من البنج سارة يمها

طلعنه لبرة علي إجه يركض
علي .«وينهم هسه يلا كملت وجيت ركض»
محمد .«وين جنت»
علي. «جهزت هديه خالها تريد اخليك تغلبني قابل»
محمد .«هههه مسودن»
اسامه .«دانيه بغرفه الاطفال و اسماء جوة»

علي .«شنو دانيه ولك ! كتلك اريدها ودق»
اسامه .«بتي واسميها بكيفي»
علي .«اني خالها اهم منك»
محمد .«ادخل لأختك وسكت»

دخللها شوي و طلع .«اختي وجيت ملهوف عليها و تصيح اسااامه اسااامه شحبت منك ما تفهمني سحرتها و چفيتها على وجها 😂»

تجاهله و دخللها يشوفها
محمد .«كف عنه شوي ترة مطروك لأن تأخرت بالعمليات»
علي .«صدك تحجي»
محمد .«اي والله ضغطها جان معلگ»

راح يشوف دانيه بقينه احنه يمها
لليل رجعنه تركنه امي وي اسامه
ثاني يوم سارة سوت الها اكل و ملابس حضرت
لملمت وياها و رتبنه البيت حت مو وحدها
كملنه و رحنالها هم شوي و رجعنه

لليل طلعوهم اجو بيتنه
ابويه سأل اسامه عن ام سولين
كال إجه جدهم و اخذهم عندة
ربحت الحضانه لحد ما يوصلون سن الرشد و بعدها يختارون ابوهم لو امهم
شسوالف يعني !
جنه نشوف المسلسلات نكول ماكو عدنه هيج
عالم مخربط من راسه لرجله

رجعت اللندن انتهت الإجازة
أسبوع و اتصل مرتجى بلغني عرسه
تعذرت منه لان مكدر اروح ، سارة و امي راحو بعد ما وصيتها على نفسها زين

مرت الأيام بسلام و رجعت يومين و اخذتها وياي ضاجت لان اطول
رحنه للجامعه اخذتها لعلي ورحت محاضرتي
كملت و مريت عالمقرر اريد اشوف اسمها ما تقدم وي الطلاب اللي مقدمين
مفروض طلعن الاسماء بعد

دقق بالأسماء لكاه موجود .. حمدلله ثبتت
علي هم بلغني انه طلعلها وياي

يومين شتغلت بالمباشرة مالها حت تبلش
جهزتها من مستلزمات و ملابس
اخذها و ارجعها وياي تدخل محاضرات بعد
خلصنه اول أسبوع بتعب و هي نحوسيه صايرة

إحسان ياخذها رياضيات و اني إنكليزي
مسويه حزب وي علي و عقيل عليه
لو رفضت شي يجون يتعاركون و يخلوني اعصب لان محذرهم انه يتدخلون بينه

مضى 3 أسابيع و اني وياها توم و جيري
ساعه لبس و ساعه عناد و ساعه غيرة 😩
وصللنه خبر وفاة عمي وهاي نهارت بيدي
انوب انشدهت شنو اسوي يعني
شلون رح نرجع شلون نحضر الفاتحة !
إحسان حجزلنه و تنقل بأكثر من مطار يلا وصلنه لحكنه على يوم الثالث

دخلنه و هم صيحت و عيطت
حقها ما الومها ما فقدت شخص عادي
بس گلبي عالطفله شلون بيه هسه
هاي من تفقد تاذي نفسها بدون احساس

خلصت الفاتحه قررت اتركها عد أهلها ترتاح شوي
اخذت من خاطر عمتي و ابتهال بعد ما راحت الناس

عمها ليث ولا نزلت دمعته عبالك صدمه
عمها صالح هو اللي واكف وي جعفر و مصطفى
إنتهى آخر يوم و ترخصوا من جعفر يرحون
ليث وصاه اي شي يحتاج يتذكر عند عم مو وحدة
راحوا و دخلنه كلنه للاستقبال
تشكرنه جعفر و هم بجه
الله يصبرهم ، هاي هو هيج لعد سارة شلون

بتنه عدهم الليله اني و مصطفى ..
إجت تالي الليل دموعها بعينها ولا نشفت
اخذ من خاطرها و عزاها
دخلت ابتهال هم اخذت من خاطرها

جابو فراشات نمنه
ثاني يوم هم اجوهم عالم تعزيهم
بقيت بين بيتنه و بيتهم
اسبوعين و رحت أخذتها عدنه

وي البنات حاولت تتناسى و ترجع لطبيعتها
عرفت عمتي حجت وياها و قوتها
الله ينطيها الصبر و يقويها
رجعنه لندن احاول اغير لها جو دائما
اذا عندي شغل وي علي تطلع
ولا انسى وكفته وياي
دائما اول واحد يساندني
جان إحسان و هسه علي و عقيل هم ممقصر

دللوها عالاخر ، حت كمت اغار منهم بعد
وهي ساعه اللي وياهم و ساعه اللي عليهم
فاجانه سرعه إنتشار كورونا
شكد حاولنه نرجع العراق بس ما لحكنه
المطار هنا أجلت خطوطها الجويه
رغم العراق فاتحهن عادي

اسبوع يوميه اروح اچيك بلكي طيارة تزبك
بس ماكو كله مؤجل
فرضوا حضر و هيج كعدنه بالبيت
اول أسبوع قضيناه بتجديد الشقه
خمستنه ايدنه سوة و تربناها من جديد
عيني وياها لا تشيل ثگيل

ثاني أسبوع دورة تعليم الطبخ لعلي و عقيل 😂
علي شرط اذا يتزوج كون تعرف تطبخ هيج
عقيل لحد ما يخلص يلا يرتبط
و هو اكثرهم شابع دلال منها لأن بلش بدراسه الدكتوراه
إحسان ما يطلب شي
بس اذا تسوي ما تنساه لازم
يطبق علينه قانون المساواة حت لو ما يطلب

واني المسكين كل شي ممنوع عليه 😂💔
فوك ما همه اربعه و عشرين ساعه على راسنه
حت بالغرفه ما تقبل تخاف على بتها 😒
اتزوج أفضل مو 😂

.
.

احاول ما ابينلها غيرتي منهم
اريدها تطلع من حزنها و وياهم كلش تنطلق
مرات تنسى نفسها و مرات لا تراعي 😏
اكيد انبها بس بلين حت ما تنفر

صار لازم نسوي مراجعه و حاير شلون نحجز لان ممنوع اكو حضر و مشدد هنا كلش التزام
علي و عقيل دبروا خطه عود عقيل متعارض
علي وياه يوديه مرافق
السياقه براس إحسان
قسموا الادوار و انطلقوا
شنو الفلم ما شرحولنه شي

بقينه وحدنه قريب الاربع ساعات
مرتاحين و براحتنه شوي
اول ما طلعوا سحبت حجابها
اشتاقيت اشوفها هيج
كله من عنادها ما تقبل اخذ سكن وحد عنهم
على مصاريف زايدة مالها داعي

إتصل عقيل .«صلنه حجز لسارة جيبها و تعال»
محمد .«شنو حجزت ! انت وين»
عقيل .«لحظه ، واحد منكم يوصفله المكان»

علي .«تعال للمستشفى القريبه على الجامعه دبرنالك فلم لحد ما وصلنه و حجزنه يلا»
محمد .«كل عقلكم»
علي .«اذا ما تريد هسه ادخل عقيل ياخذوله سونر»

خربعرضك على هالدكه
موتنه ضحك فعلا
تجهزنه و رحنالهم
وصلنه سارة بس شافت عقيل طكتها ضحكه
فضحتنه عدل بتل بتل

إحسان .«نفضحنه عفيه»
علي .«تفضلي بويه شوفيلي چنتي المستقبلية شلونها»

محمد .«دزوج و خلف بعدين اخطبها»
سارة .«اصلا خطبوها قبل لا تجي»
محمد .«منو خطبها ، و بدون علمي»
عقيل .«الدكتورة تنتظر استاذ مدام ورانه تمثيليه ثانيه»

محمد .«تعاي»
اخذتها من ايدها دخلنه سلمنه و شرحت حالها انه نريد نطمن على وضع الطفله و نبضها
اخذت السونر وضعها متحسن بس ناعمه
هي مبين من بطنها ناعمه
اخذنه صورة لبتي و طلعنه بعد ما نطتها كورس فيتامينات جديد و توصيه على غذائها

علي لگف صورة السونار .«اسمعوا من هسه نتفق اني خالها ان رضيت او لا و اسمها عليه والله لو تسوي مثل اخوك و تسميها بدون علمي احسب بتك طلكتها من ابني و تعنس على گلبك»

محمد .«وانت شكو تسميها»
سارة .«احمد خطبها لبنتي»
إحسان .«يلا نمشي»
محمد .«يا أحمد ؟»
علي .«بالطريق يلا حمودي»

سكتت عنها بس ما رح انساها
شنو احمد يعني !! التقت بيه ؟
عقيل رجع ويانه حت ما اعاركها عود
خبال قابل كدامكم احجي
لليل حصرتها تحجيلي
عرفت انه ملتقين بالكورنيش قبل فترة

مكدر اتحمله و مو بأيدي
ابقه اكرها طالما حبها باذيه
و سبب هواي مشاكل بينه

بدت عدها سالفه فلان اكلها متحبها
و فلان تشتهيها و بدت سوالف العناد
الله يصبرني لحد ما تولد

و ذولي هم كلش منفذيلها طلباتها
بس يصير مجال ارجع للعراق لحد ما تولد
اذا ابقه وياهم هنا لو اجن لو اموت
رفع ضغطي لأعلى شي بسببهم

.
.

مع هذا تبقى فرحتي بيها ماليه حياتي
حبيتها و اخذتها و هسه انتظر ثمرة الحب و الصبر هذا
الله وفقني بحياتي و أحمد ربي على توفيقه
عائلتي سندتني و سندت اختياراتي
أصدقائي الجانو اكثر من أصدقاء الهم دور مهم بتحقيق هواي خطوات خطيتها
و حب حياتي اللي حصلته بعد تعب

هاي عائلتي الصغيرة ..
و انشالله تكبر مستقبلا 😁😉

ايامنه حاليا ماشيه وي خبالاتهم كلهم 😂
و الله كريم انشالله شدة و تزول عن العراق و العالم أجمع
.
.
.

ان شاءالله قريب تخلص كورونا
و نرجع لحياتنه الطبيعيه
جنه نشوف شكد ملل و مراضين
بس بعد كل محنه نمر بيها
نعرف شكثر نعمه جانت بين أيدينا
و ممقدريها و شاكرين ربنا عليها

.
.
.
.
_______
بارت تعويض عن السابق اللي جان المفروض الأخير
هواي نقوصات كملتها هنا
شكرا للي نبهوني طبعا على الثغرات الناسيتها
و سارة تشكر كل شخص علق على الروايه بحب
و ارسلت سلام للجميع 💜
واني اكتب هذي الكلمات هي وياي و تبلغني سلامها و شكرها
.
.
.
انشالله اذا صارت نرجع بجزء ثاني بعد فترة
و ان شاء الله ارجعلكم بقصه جديدة و حياة جديدة و جانب جديد نعيشه بتفاصيله وي بعضنه
.
.
.
ابطال القصه تقريبا كلهم تابعوها
رنا تكول ما متوقعه هيج جنت عايشه
غيداء تكول عبالك مو حياتها اصلا رغم ظهورها مو قوي كلش
و سارة مثلكم تنتظر بارت بارت ولا كأن تعرف بكل الاحداث لان حياتها
و الباقين كذلك مترقبين دائما

✨
عائله احببتك انت من الأبطال والقرّاء
شكرا لتشجيعي و دعمي لحد هالنقطه
✨
.
.
.
شكرا لزهرتي على مساعدتي دائما zozaity
ساعدتني بهواي هواي أحداث عالقه عدها
و ايام دوامي جانت شايله عني كتابه هواي أجزاء
و نونتي هم Nabaa_Alkhazraji دعمتني بكل بارت جان رأيها مهم و تشجيعها أهم
و طبعا تصميم الغلاف جان من تصميمها

شكرا الكم بعد على الحب القدمتوه 💙
وصلت القصه لهالنجاح بسببكم
اول روايه الي و الحمدلله حققت بيها شي كبير

رح اشتاقلكم كلش 💜😞
موفقين ✨
الكاتبه : إسراء الخزرجي
في أمان الله 🙏