رواية احببتك انت الفصل الثامن والثلاثون 38 - بقلم ESRA'

#أحببتك_انت

.
.
وشما يحَسبوني أعله غيرك
ياوطن روحِي أنتميلك .

.
.

سارة :
سافر محمد اللندن وحدة
و عمي هالمرة كاله اكمل هنا دراستي
حت السنه التجي ارةح وياه هناك أكمل
رغم مقبل بالبداية بس رضه بعدين

بلشت ادرس و شغل البيت عمتي وياي
ابد ما اثر عليه بشي
أسبوع و أسبوع بيت اسامه عدنه
دراستي مو صعبه و ولا سهله
ماشيه بيها بمعدل تمام

رحت لبيت اهلي بتت عدهم يومين لان بيت خالتي جايين و صار هواااي مشايفه ثريه بت خاله
العصريه اخذنه جعفر للكورنيش
اخذنه اكل و نمنمات و رحنه

غيرت جو وياها ، تشكيلي و اشكيلها
سوالف روتينيه

فاجأني وجود شخص !!
صار هواي مشايفته من يوم عرسي
اي هو ، شفت احمد هو ولد وياه كاعد
مهتميت و كملنه كعدتنه عادي
حت لثريه ما كتلها

راح جعفر يشتريلنه مي جان يجي
يعني هو هم منتبه علينه !

احمد. «السلام عليكم»
سارة .«و عليكم السلام»
احمد .«شهالصدفه التقينه بهيج مكان»
ثريه .«الدنيا صغيرة مثل ما يكولون»
احمد. «اي صح فعلا صغيرة ، تذكرج دائما باللي مقررة تنسيهم»
ثريه .«لو القرار قطعي ، رح تنسى حت لو تلتقي بيهم»

احمد .«شلونج سارة ، حياتج شلونها»
سارة .«حمدلله .. الله رزقني الهدوء من بعد معاناة»
احمد .«ادعي احصله مثلج»
سارة .«دعائي ما خله يوم من ذكرك ، على طول ادعي الله يوفقك و يرزقك بنت العالم اللي تصون بيتك»
احمد .«يعني اعرف اذيتج ، تبقين تدعيلي»
سارة .«تبقى احمد شما يصير ، ما لازم اشيل بگلبي على احد .. تعلمت اسامح حت أعيش»

احمد .«ما رح تتغيرين ، تبقين سارة نفسها»
سارة. «حت لو اتغير و احقد رح اضر نفسي بس»
احمد .«اييه ، محمد شلونه»
سارة .«بخير حمدلله»

ثريه .«جعفر ويانه جاي ، يريت لو تختصر لقائك تجنبا للإحراج يعني»
احمد .«اي اعرف بيه هنا هو ، حبيت اسلم بس»
سارة .«شلونها خاله و غفران »
احمد .«امي توفت ورة ابويه بفترة قصيرة ، و غفران هم تزوجت قبل فترة»
سارة .«الى رحمة الله ، ليش ما بلغتني»
احمد .«اعرف محمد رح يمنعج»
سارة .«تذكر شنو اكولك دائما»

احمد .«ههه اذكر طبعا "احمد انت قوي ، لازم تكون قوي لأنك رجال البيت هسه" مو هيج»

نظرتله ابتسمت .. اي هيج
هاي هي جملتي وياه ، ما نساها بعدة
يا رب لا تتخلى عن هالانسان أبد
انطيه على نيته لان واثقه اكو بداخله شخص نقي نفس اللي عرفته بالبداية

احمد .«تركت الشغل وي ابو حيدر ، رح اكمل دراستي و اعيش بهدوء .. افضل مو»
سارة .«لحد اللحظه افكر شلون اشتغلت وي خالي !! ليش خالي بالذات ؟؟ »

احمد .«ماريد اكذب عليج ، بس ردت قربج حت لو صرتي لغيري .. هاي سنتين مضت و اني متاذي كافي عليه لهنا»

سارة .«مهما كان ، تبقى احمد صديقي الصدوق
أتمنى شي يوم اتعرف على عائلتك و نكون اصدقاء مرة ثانيه»

احمد .«بهالحاله اريد اخذ بنيه منكم ، ما صرنه لبعضنه بس نصير عن طريق اطفالنه»

سارة .«ههه محمد يغار على بنته رح يعذبك يلا تاخذها»
احمد .«اخذها يكفي اخذ امها شني هالانسان ما يتوب عني»

ضحكت عليه ، بقى شوي يمنه
أجه جعفر تسالموا و راح لصاحبه
ضلمت الدنيا و رجعنا البيت
بقيت عد اهلي يومين ثانيه و رجعت
بين نزلات محمد و بين دراستي هدوء تام
ساعه اليجي وقتي كله إله
و من يروح اتفرغ للبيت و لكتبي

اربع أشهر و وصلنه خبر مرتجى و بلسم رح يتزوجون هالايام حتى قبل رمضان
صار وقت المحدد و هم اخذنه عمي و رحنه
هم جان عرس حلو و فخم
هي ناعمه و فستانها ناعم مثلها
و مرتجى سوة ما سوة بالعرس
مبقى شي بنفسه ، ركص و هوس و ضحكاته ملات الدنيا

رزاق ساعه اليضحك و يسايرة
و ساعه اللي يكوله كافي فضحتنه
عمه مليكه الفرحه هم ما سايعتها
الضحكه و الكلمه الطيبه ولا فاركتها
زفوهم العرسان و صعدت وياهم هي و رنا
وراها اخذوا شوط جوة الزلم
و زفوه لمرتجى و صعد

تعبت و هم تحركت و ركصت وي البنات
على كوله عمه صرتي بعد قديمه عوفي الخجل
مجموعين الكل بالصاله
و كل وحدة تصنف على فقرة صارت بالحفله

جدة .«مكان حمادة خالي ، بعد جدته وحشني»
عمتي .«راد اجازة حت ينزل ما نطوه»
عمه سميه. «مرته كفت ووفت ما قصرت بشي»
عمتي .«غير فرحانه وي البنات»
عمه سميه .«هه اي شكلت اني»

غثتني ، وهي شكو .. عليمن مضغوطه

فرح .«كومن بنات نصعد بعد»
سارة .«اي والله»
رقيه .«يمه باقين هنا»
عمه سميه .«اي باقين»
مرام .«يلا لعد ، غدو كومي انتي هم»
غيداء .«لا حب اكرم جاي رح اروح»
عمتي .«كومي يمه نيمي آدم بين ما يجي»

شالته و إجت ويانه و صعدنه
تركتهم و دخلت غرفه محمد
بدلت فستاني و طلعتلهم
كعدوا البنات و سوو كعدة كيك و مشاريب و اكل
شوي و صعدوا عباس و كرار هم ويانه
صدك محمد مكانه فارغ 😭

نص ساعه و إجه اكرم و عمي
راحت غيداء وياه
صارت الـ2 بالليل طفيت بعد ولا بيه بانزين
تركتهم و كمت صعدت
الغرفه فارغه عليه ولا إلي بيها
يعني هي تلت اسابيع من رايح
ليش احسها تلت اسنين عبالك

اريدة يجي بسرعه
اريد اروح احلل ضروري
واني افكر بيه غفيت على روحي

صبح الصبح تجهزنه و رجعنه لبغداد وي أسامه
هم رحنه اول لبيته شفنه غيداء و دانيه بتها
طبعا ولدت قبل 21 يوم
على ولادتها اجه محمد
دنو تشبه اسماء كلش
بس امير يشبه محمد و ابوه
بس ملامحها تجنن صدك ماخذة جمال أمها

بقيت عدها و عمتي رجعت للبيت
اسامه راح دوامه و اني يمها
حجيتلها عالعرس و السوالف الصارت
قضيت النهار عدها وي نعواصه دنو و سوالفنه
المغرب عمي إجه و رجعت وياه للبيت

بس تجي فرصه صايرة انام
و مزاجي عالسچين كاعد
هيج اتعارك وي الهوى
طباكات صاعدة كلش مدري شكو

كاعدة اطبخ الغدة عمي مشتهي باميه
روحي گلبت من الريحه ولا تحملتها
كمت شلتها و درتها بالسنك
اجت عمه شافتها و حجت عليه لان تلفتها

سارة .«ما تحملتها شسوي»
عمتي .«وج عمه صيحيلي اسويها»
سارة .«نسيت هيج روحي فايگه»
عمتي .«وج سارة هاي حامل»
سارة. «لا عمه ما يصير»
عمتي .«حامل اني اكولج شوفي شصاير بيج بس نوم و نفسج ما تتحمل و بس تتعاركين»

سارة .«ما اتعارك اني انتو تتعاركون وياي»
عمتي .«يجي عمج اوصيه على اختبار»
سارة. «هئئئ عزة عمه لا تفكرين تسويها اصلا ، يمه عيب»
عمتي. «هي بقت على هاي»
سارة. «لا عمه اريد يجي محمد واروح احلل وياه»
عمتي .«مطول يلا يجي»
سارة .«لا يجي هذا الأسبوع موعدة»

اخذت حسرة و دخلت جوة
عزة صاير وياه شي يعني !!

رحت عالتلفون دكيتله
يرن وماكو جواب من عندة
اكيد صاير شي طالما ما يجاوب عليه

طبعت شجر سويت بسرعه و صعدت
يمكن بالميت مرة اتصلت عليه و ماكو رد
دموعي بدت تزخ تسودنت
خليت و نزلت لعمتي ابجي
سالتها بقت تمتمت متكولي شبيه

كوة صبرت روحي لحد ما إجه عمي
منا حجايه و منا حجايه
عرفت انه رح يرجع اليوم
ساعات فرق و يجي مو مشكله أتحمل
حاولت الهي روحي بالشغل منا و منا
نظفت البيت كله و بعدة ماكو 😭

صعدت طلعت عصبيتي بالغرفة
هجولتها تهجول ارتاحيت شوي يلا نمت
مدري شكد نمت ، بس هاي ريحته يمي
هذا هو اكيد
فتحت عيني الغرفه ضلمه
نمت جان مفتوح الضوة !
دا انهض نفسي انتبهت على ايد ملتفه على بطني

انداريت عليه غافي يمي
قربت اخذت نفس منه نعشت روحي بيه

سبحان اللي جملك بعيني و زرع هذا الحب
سبحان اللي غير مشاعري كلها من الكره لهذا العمق من الحب كله
شكد كرهت امي بلحظه اللي اتصلت على اهلك و كالتلهم موافقين اتفضلوا وقت اللي تحبون
و شكد كرهت اللحظه اللي نطقت الموافقة و صرت على إسمك
شكد كرهت اليوم اللي قربتلي بيه و بستني
جنت أتمنى يصير شي و ارجع لأحمد
جنت اكول رح اتزوج الشخص اللي احبه

كرهتك لان بسببك دخلت غرفه الطبيب النفسي
حالي حال المجانين اللي يعانون من اضطرابات نفسيه

بحبك و احتوائك إلي و صبرك
حولت كل هالكره لحب ، و حب عظيم
شفتك زوج و حبيب و اخ و أب و صديق
كلهن صرتهن انت بوقت واحد
كلهن استحقيتهن بجدارة

محمد .«شدتفكرين هيج مندمجه»
سارة .«شوكت اجيت»
محمد .«بالليل وصلت انتي نايمه ، شنو تفكرين»
سارة .«افكر بيك ، عندي غيرك»
محمد. «اي غير صار وقته»
سارة. «ههه عمه خربتها عليه يعني»
محمد .«لا بس اعرف من زمان انه صار»

ضربته على صدرة خجلني
سارة. «ما صارله كم يوم و هاي اذا هو»
محمد .«صار تقريب الـ3 أشهر»
سارة. «هئئ عزة وين اكو»
محمد .«لا تعاندين باجر نحلل و تشوفين»
سارة .«ترة اغسل عادي وين يصير»
محمد .«اعرف ، هسه كومي سويلي أكل جوعان»
سارة .«تدلل ، كوم بدل بين ما انزل»
محمد .«لا صبري ننزل سوة»

كام بدل و غسل و اجه نزلنه
عمي كاعد بالمطبخ يسوي تقارير و يشرب جاي

سارة .«صباح الخير عمو»
عمي .«هلا بابه صباح النور»
محمد .«بعدك ممكمل»
عمي .«هذا آخر واحد ، ارد اكملهن حت انطيها للمستشفى»
محمد .«هاا ي زين»

سارة .«عمو اليوم عندك خفر»
محمد .«ها صح اليوم نجي للمستشفى»
عمي .«لا بابه ما عندي ، وانت شعندك»

اشرتله يسكت ما يكوله عيب
محمد .«سارة تريد تحلل ، كلتها مأذيتها»
عمي .«اي طبعا غير ما تشرب مي»
سارة .«ياا عمو كومه اشرب»
محمد .«ليش ولج»
عمي .«تنسى نفسها ولا تشرب شي»

سارة .«والله مو بيدي انساه شسوي»
محمد .«الله كريم ، باقي هنا بعد اراويج شلون»
سارة .«عزة شنو باقي»
عمي .«ها كملتها يعني»
محمد .«اي بس مو هواي ابقه يعني ، صارت هنا ست اشهر و هناك اسبوع كل شهرين»

سارة .«يعني باقي »
محمد .«اي 😉»

عزة رح يبقى هنا ، بعد ماكو محمد ماكو 😭
فدوة لعمرة يربييييي

سويت الريوك اكلوا ثنينهم
عمتي طلعت على صوتنه هم تريكت
صارت الـ9 عمي بعد يروح دوامه
تحضرنه و رحنه وياه
وصلنه مدري شنو اشر لمحمد و راح غرفته
رحنه لدكتورة عمي مال لمحمد عليها

دخلنه كتلها على اللي ديصير وياي
و سويت تحليل و طلعنه منها لحد ما يكمل
رحنه لغرفه عمي ننتظر
مموجود هو يمكن بلش وي مرضاه
ساعه و رجعلها محمد جاب النتيجه شنو
و رحنه للدكتورة مرة ثانيه
فتحته قرته و ابتسمت بوجهنه

الدكتورة. «مبروك طبعا ، مثل ما توقعت حامل و قريب تدخل الرابع هم .. الطفل بالاسبوع العاشر»
سارة. «دكتورة شهريتي ما تأخرت»
الدكتورة. «اي يصير هيج مرات عادي»
سارة .«بس شو ممبين يعني حامل»

محمد .«انتي بس نوم هذا اكبر دليل»
الدكتورة .«ههه لا هم مو مقياس النوم ، اكو هواي يحبون النوم بس هنه ماعدهم شي او حت ممتزوجات ، النوم هنا هرمونات »

سارة .«زين دكتورة شوكت يتحرك»
محمد .«خل يكبر بعد»
الدكتورة .«هالفترة رح تبدين تحسين بيه وي بدايه الرابع هيج ، هسه رح اكتبلج ابرة مثبته و فيتامينات لازم تلتزمين بيهن»

محمد .«دكتورة تحليل الدم عادي نظيف»
الدكتورة .«اللي تسأل عنه لا تخاف مو خطر ، بس لازم الحذر طبعا»
محمد. «اكيد انشالله خير»
الدكتورة .«انشالله ، مبروك مرة ثانية»

تشكرناها و طلعنه من عدها
فرحانه انه صار الحمد لله
من بعد ليالي قضيتهن بدموعي و تأنيب نفسي
حمدلله اللي حظيت بيه
الحمد و الشكر إلك يا رب

محمد اتصل على عمي يشوف وين
رحنه لغرفته شوي و إجه محمد بشرة
باركلنه و هم وصاني هواي على نفسي
و الباقي كال من يخلص دوامه 😂

رجعنه اخذنه ويانه علبه حلويات
بشرنه عمتي و هلهلت من فرحتها
حمدلله شفت هاي الفرحه بعيونهم
الكل فرحان و مرتاح
محمد كل ما يشوفني يبوسني و يكولي انتبهي عليه

كملت السنه و تخرجت حمدلله
محمد رأسا ارسل اوراقي و شهادتي وي علي
قدملي بلندن حت وياه من يرجع

طباكاتي و طباكات الحمل كعدت عدل
كل شوي مزاج شكل و محمد الواكع بيها
صح خطيه بس مو بيدي يعني

رحنه اخذنه سونر للطفل
طلع عندي بنيه ، بس النبض ضعيف
كلش خفت عليها ، اخاف لا افقدها

بسبب عادة غبيه .. رح تضيع امومتي 💔
دائما يصبر عليه و كل فترة يكعدلي تحقيق اطا رجعت اخذ مهدئات بسبب كثرة نومي
ما يصدك مرات هاي بسبب الحمل
و هم ادكها مناحه يلا يهدئ
يكعد يمي و يهدئني
كله عاذرته بيه لأن كله من أيدي
اتمنى من ربي أنه يساعدني بتخطي هالازمه

احمد :
وأخيرا حصلت فرصه إلي
رغم سارة رفضت اكون هنا بقصتها

ممكن يكون البعض كارهني
او كاره تصرفاتي وي سارة
كثير مواقف نظلمت بيها من طرف سارة
دائما اكو نظرة مختلفه من نشوف موضوع من الطرفين رح يتغير الحكم

كل تصرف بدر مني لسارة
ما ندمان عليه أبد
و لو صار و رجع الزمن
رح اعيدة و يمكن أكثر و أكثر

اني رجال و حبيت بنيه مو سهل الكي منها
سامعين بمثل ، يبوك السمچه من عين الصياد
يمكن هيج النص مالته
المهم ، المعنى هو المطلوب
هيج حسيت من اخذها محمد من ايدي

اسبوعين كانت ، لو تأخرها
جان عشت اسعد رجل بالعالم

عقدها كدامي صار ! حسيت نهاني
تغيرت هواي و قسيت هواي
تركت دراستي و اشتغلت وي الحشد
و شاء القدر و صرت بالفوج تحت قيادة خالها

فرحت و تقربت من الآمر جميل
و صرت قريب منه لدرجه وياه بكل مكان
استفزيتها هواي حت أذكرها منو اللي تحبه
اعرف جانت مشاعرها وأحاسيسها إلي
و محمد خرب كل شي بنيته

رغم صدتني من وقت ما صارت على إسمه
ما قطعت الأمل منها و استمريت
صرت اختلق لقائات بينه اني وهي
و اوصلها لمحمد و هو مسافر

غايتي هي يتركها حت ارجع اخذها
بس محمد فاجئني لدرجه الجنون
دائما يقابلني الصبر عليها و الهدوء
ينفعل وياي من اكوله
بس جنت انتظر انه صاير بينهم شي من يرجع
ابد ماكو ، يروح و يجي و علاقتهم تقوة و تقوة

حقدت عليهم و صار هدفي بس ادمرهم
هاي السعادة اللي هو بيها
جان المفروض اني أعيشها وياها

توفه ابويه و جانت مثل الصفعه إلي
من صدمتي .. اتصلت بيها
احتاجيت احجي وياها و اشكيلها
هي بس تفهمني. هي بس رح تعرف شلون ترشدني و شنو لازم اسوي

صبح الصبح و محمد إتصل
حجه عليه لان اتصلت على مرته !!
كرهته ! حت لو جان غيران مني
المفروض يقدر موقفي !!

صار بينه. كلام حاد
تركت الفاتحه 3 ايام ولا حضرتها
تجاهلت انه فاتحه ابويه
و تجاهلت وسام اخويه مموجود
بس ردت اختفي بنفسي و اعيدها لأحمد القديم

و رجعت و كملت مثل ما جنت
افتهمت سارة متأذيه بسبب غفران
و انوب مرتضى إجه هم تعاركنه
جان همي اعرف شلون تاذت يعني !

اعرف بخبالاتها من تطلع
و عرفت مكانها و رحت للمستشفى
اهلها كلهم وياها !
مالي مكان هنا على شنو جاي !

طلعت للدائرة مالنه و قدمت على تفرغ دراسي اكمل ادرس
ماله داعي بعد توكف حياتي

البنيه اللي حبيتها ماشيه حياتها
كافي بعد احمد التفت لحياتك
صدفه عرفت من غفران انه اكو قصه
تحجي عن احداث تشبه سارة
لحد ما عرفت الإسم و قريت الصار

استرجعت ذكريات مقرر اتخطاها بعد
و شفت اشياء من جهه سارة او محمد
مختلفه عن الواقع شوي
مستحيل تصرف او شي ينفهم بسرعه من شخص مقابل
اعترف اذيتها بس لو غيري ما يختلف عني شي !

تواصلت وي الكاتبه و وضحتلها اشياء كثيرة
عذبتني لحد ما صدكت اني احمد 😩
بس حمدلله اللي استجابت

(صعب اوثق بيك بالذات طلبك بدون علم سارة)

كملت دراسه و صادف سارة هم دتكمل
تحملت و تخطيت الموضوع عادي
حضرت عرسها و استحملت على أعصابي
وهي بالثوب الأبيض
رجعني للصفر 💔

بيوم العرس رجعت للبيت
امي كلش غاديه لأن عدها غسل كله
الها 7 سنوات تغسل
وفاة ابويه زادتها سوء
بيومها بقيت عدها ، گلبي ممرتاح

حجيتلها اللي بداخلي و بجيت
فقدت الحبيتها نهائيا و صارت لغيري
فقدت ابويه و نهد حيلي
و هاي هسه امي سلمتها بين أيدي
وهي تسمع المي
يمت كومي بعد شي ما حجيته
بعد ما كملتلج عن همومي
هيج بسرعه متحملتي !

اجيت اخابرها اكوللها امي ماتت
فقدتها بين ايدي شلون رح أتصرف
بس لا هسه هي عايشه لحظاتها بيد زوجها
عايشه اللحظات اللي تمنيت اعيشها وياها

استجمعت نفسي و قويتها
اتصلت على وسام إجه هو و مصطفى
اخذناها لأمي و شيعناها
مرت عليه فترة مثل الموت
فقدت كل شي ما بقه احد بعد

مضت أيام و انسحبت من شغلي
اشتغلت بدائرة اهليه حسب مجالي بالحاسبات
شهرين حاولت اوكف على رجلي و اسند نفسي
بس متابع احداث سارة من خلال الروايه
سطرتني من عرفت صار لها إسقاط
و من عرفت بالادمان !
اكيد هم الي نصيب من الذنب لان ضغطت هواي عليها اللي اتجهت لهذا الطريق

اكو بنيه وياي تشتغل ، مرتاحلها كلش
دا افكر شوي شوي و لازم ابني حياتي
سارة و راحت من ايدي بعد
لو انتظرها العمر كله ، مرح ترجعلي
لازم ااسس اني هم بيتي و استقر
يمكن القدر يلعب ، و نصير عائله من جديد
ولو رجلها ما طيقه بس يلا شسوي

بيوم صادفتها بالكورنيش
ما ستحملت و سلمت عليها
وجها بيه نشعه راحه وهدوء
حجينه شوي و سلمت على جعفر و رحت

مدري يمكن تشجعت بسبب هاللقاء
رحت لمريم اعترفتلها
و طبعا مريم تعرف اني احب بنيه و تزوجت
الها حريه الرفض و القبول
ما ضميت شي عنها
كرهت بعد الكذب و اللعب المخفي
اريد اعيش حياتي براحه و بس

(سارة ، اغلى انسانه كانت و رح تبقى بهالمكان
و رح تبقى بگلبي شما يصير .. تبقى اول حب
مريم مرح اظلمها طبعا بسبب هالحب بس مرح اكدر اتجاوزة ......
اعتذر لأن داهمت الروايه و اجبرت الكاتبه من بعد عناء تخلي كلماتي بدون علم صديقتها
اعتذر سرو بس ما ردت احد يكرهني 😅
اتمنى السعادة تصادفج بحياتج كلها ، و تجيبين هالصغيرة حت اخذها مثل ما وعدتج اما ابوها ما اعترف بيه اني 😒

أتمنى تعذروني على الإطالة ، شكرا لكل شخص حب سارة مثل ما حبيتها ، ادعولي اتوفق وي مريم ...... أحمد)

سارة:
سافرنه لندن ثنينه سوة
نعادت أيام عرسنه مرة ثانيه
اني و محمد و الولد رجعنه عشنه سوة
صايرين بالتفاهه محد يلحكهم
علي من عرف حامل و مرات اشتهي اشياء مموجودة هنا بلندن
يبجيني عدل يلا يقنع محمد يسووها
بس مدلليني حيل و عينهم عليه اذا احتاج شي

عقيل قرر يخطب رقيه بت عمه سميه حت يصير من العائله و محمد بعدما يغار منه
بس محمد كاله لا لان عمتي ما تتعاشر 😂
بقه يلح اريد مرة من عدكم لعبتوا نفسي

جمال الايام بالمشاركه وي ناس نرتاحلهم
وي اشخاص نكدر نتخذهم سند وقت الحاجه
علي و عقيل و إحسان جانوا مثل اخوتي
يمكن حت يهتمون بيه احسن من جعفر

بعدها توالت الأيام و بدت الاحداث تصير
صعب نرجع للعراق مثل اول
واني بلندن توفه بابه الله يرحمه 💔
تخبلت بس اريد ارجع
شلون ياخذوه واني ماكو
فقدت من البجي و الصياح و اللطم
نسيت نفسي حامل نسيت كل شي
يومين يلا كدرت اروح تنقل بأكثر من دوله
وصلت على اخر يوم الفاتحة
بجيت و فرفحت لمن فقدت وعيي
راح ابويه واني مشايفته
شلون راح هيج !!!

اسبوع واني دمعتي ما ناشفه
هملت كل شي ، الكل نسيته
محمد يجي يحاول وياي عالعلاج
وهم بعد عناء يلا اخذة و أنام
امي صعدتلي حجت عليه انه ميصير هيج ابقه
بابه جان مريض و الموت حق
حاولت تواسيني بدل ما احنه نواسيها

حاولت اقوي نفسي لأجلها
محمد سودة عليه ولا عافني يوميه يجي
اسبوعين و امي كالت عيب هيج لازم أرجع بيتي
صح حزن بس شذنبه الولد
و ابويه بعد راح شما اسوي ما يرجع

دخلت سبحت و عدلت نفسي
جنت مومياء عبالك
تجهزت و اتصلت بمحمد يجي عليه نرجع
فرح و اجه بسرعه أخذني
رحعت للبيت عمتي تلكتني بلهفه
غيداء هم جانت عدنه هم عزتني
كعدت وياهم شوي التهيت عن مصابي

صعدت رتبت غراضي و عدلت الغرفه
من قبل لا روح لندن هي متروكه
شلت ملابس محمد غسلتهن و نظفت الغرفه كلها
احس ظهري نكسر بعد مبيه طاقه
بطني برزت بعد و بدت تثگل عليه

مددت آخذ راحه شوي
دخل محمد شاف منظفه حجه عليه
كمت طلعتله ملابس بدل و نزلنه جوة

عرفت من غيداء انه راسلين احداث بارت
طبعا نسيت الروايه كلها
تواصلت وي اسراء من عزتني بوفاة بابه الله يرحمه
ولا جابت طاري القصه و احترمت حزني

انقضر اليوم وياهم بس وجعه بگلبي ما هدئت
اضحك و اسولف بس الغصه ما تروح
يومين و اخذني محمد للنجف زرت بابه
بجيت و قريتله قرآن ، شغلتله شموع و رجعنه

بدايه الاسبوع رجعنه اللندن
و انوب انحبسنه هناك بسبب كورونا
لا نكدر نرجع للعراق و لا نكدر نطلع هنا
محمد يكول احسن حت اكمل الحمل بالبيت
وهاي قاضين الوقت بالخبال
ساعه نريد نطلع و ساعه نسوي جو و نسهر

اللي موتني قهر اربعين بابه اني هنا
بس خابرت امي كالت ما تكدر تسوي اربعين 💔

هاي حياتي ، ايام و احداث عاديه
حضيت بسند و عائله رائعه
رغم جنت رافضتهم
جان ممكن اهدم حياتي بسبب عادة تعيسه
بس حمدلله اللي الله رزقني شخص
طلعني من هذا كله
.
.
.
.

و لهنا إنتهت قصتي وي ابطالي
عشت وياهم ايام طويله
حضيت بأصدقاء كثيرين
سواء من ابطال القصه او من المتابعين

شكرا لكل اللي دعمني حت اكمل
اول روايه إلي ، جان ممكن ما تنجح
بس بفضلكم حققت مستوى عالي
رح افتقدكم كل شخص عرفته بسبب القصه
سُكراتي اللطيفات 💙

أتمنى تكونون استمتعتوا وياي
اسفه طولت عليكم هواي هواي
بس خلصت بعد 😁
اختصرت هواي احداث لطلبكم

ارجعلكم انشالله بقصه جديدة قريبا
أتمنى تكونون بخير دائما
انتبهوا على صحتكم و عافيتكم

موفقين بكل خطوة الكم 💛

الكاتبه : إسراء الخزرجي 💙
شكرا الكم من القلب 😘