احبك ... وانت! ?
بقـــلم وردة عمري
البارت التاســع
بعدهن بلركن ضحكاتج البلبيت
نارج ما طفت مستعره هاا والله
صوتج ينسمع كل ما يمرنه اسكوت
وصوتج بي صدى ينسمع مو مره
ياريت الكبر لو يفتح البيبان
حتى افتح حضن للكبر والعشره
غيابج حيل ما يرحم وچبيره النارالبگلبي الج يمكن شبه جمره
انشم ابريحتچ كل ما يهزنه الريحلان الريح شايل روحج الخضره
بعدني اشتاك وحيل اشتاك من اسمع سوالف لليل
والليل العشته دونج هسه ما عبره
شكثر ايام راحت بيه انا مصدوم
وشكثر ضحكات صارن هسه الج ذكره
ردت انسه الجره واگدر اگولن عودبس انسه جذب البخت بي عثره
ادور صورتج والكاها يم اشموع
وكل مغرب خميس انذب الج حسره
.....
احس روحي دخت بسبب الضربه الي براسي ..
عيوني غوشت .. بس مااهتميت ...ردت اشوف بنتي ليش سكتت ..
مسحت عيني بيدي ...وكمت اكلب بيها ..
شبيها .. ليش سكتت .. احرك ايدها .. ماكو ..
رجلها .. ...
اريد صوتي يطلع حتى اصيح ..
ماادري شلون طلع صوتي .. شلون نجلت حنجرتي .. وطلع خرمش بلعومي
ـ يمممممممممه بنتي ..
سحلت دشداشه عمي يمي ..
ـ لحك عمي بنتي فدوة لحك ..
اكلب بيها يمنه يسرة ..
ـ لولو .. ولج ماما .. يروحي ..
خالتي لكفتها مني .. وشالتها .. وهي لا حس ولا نفس...
وعمي كدامها صيح
ـ جبيها نأخذها للمستشفى .. بويه لبسي هدومج ..
رجعت للغرفه ماادري شلبست .. وشلون لبست اصلا .. اريد بس اخلي دشداشه على الملابس لابستها .. شي يغطي المصخمه بيه ..
وطلعت اركض ورة عمي وخالتي ..
مريت براغب ...لكيته كاعد وايدة على راسه ..
ـ والله والخلق سبع سموات اذا صار بنتي شي دمك اشربه شراب ومايكفيني ..
طلعت ولكيتهم بعدهم واكفين بالباب .. ويدورون سيارة .. ماكو الدنيا ضلمه .. ومطر .. والشارع فارغ.
ـ اها خاله فدوة مااصحت ...
خالتي كانت ترجف .. لتفت لي تبجي ..
رجعت لورة ..
ـ خاله ...
ـ بنتج ترست اديه وهدومي دم يمه ..
ـ مااصحت خاله .. ماحجت فدوة اروح لج
رجعت خالتي صاحت بعمي
ـ حاكم روح لابو اثير يأخذنا بسيارته البنيه تصفى دمها خلينها لحك عليها ..
طول الطريق وهي بحضني .. اكلب بيها منا ومنا .. احط حلكها على حلكي .. بعدة دافي .. احط صدرها على صدري بيها نفس بس خفيف.راسها لفيته بحجابي وظليت بس بعبايه.
كل شويه اكول
ـ فدوة عمي بسرعه ...
همس بذنها ..
امي تكول الضنا غالي .. واغلى لو جانت بنيه .. بنيه .. حنينه .. دمعتها وي دمعه امها .. روحها معلكه بروح امها .. تتهادى بالبيت والطير مثل الفراشه .. تراعي هذا وداري هذا .. وتحب هذا .. وتنسى روحها مرات .. بس حتي ترضي اهلها ..
امي تكول البنيه رحمه .. تجي ويجي الخير كله وياها ..
اذكر مرة من مرات .. جنت العب اني البنات .. بالسطح ركيضان .. لحكتني هاجر ونزلت اركض على الدرج .. تلتفت وراي اخاف هاجر تلحك بيه وااضحك .. ماادري شلون فلتت رجلي وتزحلت على الدرج .. درجه .. درجه جان راسي ينضرب بالبايات .. الى ان وصلت للاخير .. مااتحركت من مكاني .. ضليت نايمه وصافنه على السكف .. الاصوات داير مدايري تعلى .. امي الشالتني وخلت راسي بحضنها .. واخواتي يتصارخن فوك راسي ..
هاجر الكامت تسحل بيه من ايدي ورجلي ..
واني صرخ
ـ غاليه .. ولج غاليه يمه ..
تحضن راسي وتصيح
ـ ولجن بنتي راحت .. يبوووووي
وفزعت علينا المنطقه والناس .. بذاك اليوم خيطوا راسي .. خمس خياطات ..
بذيج الليله بويه وامي نوموني بيناتهم .. ابويه حاضن راسي
ـ بابا غاليه الله نجاج من الموت .. شاله منج وحطه على واحد ثاني .. كل واحد ومنيته يروحي وهاي مو منيتج يابنيتي .. سبحان الله قسمها لواحد غيرج يابه
ضربت راسي بحايط المستشفى بعد مااوصلنا وتلاكفوها مني الاطباء ..
كل لحظه تمر عليه بسنه ..
بنتي بعمليات .. ماادري شنو وضعها .. خالتي كاعدة يمي وحالها اخس من حالي بالف مرة ..
ـ خاله تعيش والله تعيش ..
ضحكت ودمعتي تلالي بعيني
ـ اصلا اني وكعت من اول درجه لاخر تدرجه وهل تشوفين كدامج مابيه شي
ـ ان شاء الله يمه الله يسمع منج
رفعت راسي لفوك
ـ يارب اسمع مني .. يارب بجاة عندك محمد واهل بيته الا بنتي اخذني اني .. يارب رجعني ذيج الطفله ورجع ذيج اللحظه واخذ روحي بس هي لا
خالتي اخذت راسي وخلتهه على جتفها ..
كمت لوب .. مرت ساعه والساعتين .. وماكو ..
ولكم الله اكبر هو راسها شكبرة وياخذ ساعه وساعتين هي كلها طفله بعمر السنتين .. وين يتحمل مكص لو مشرط لو ابرة لو خيط ..
واهز راسي .. ميخالف بس خل تطلع ..
يارب حتى لو تتعوق .. حتى لو ماتشوف اني اصير عيونها .. ماتذكر .اني اصير عقلها وذاكرتها . لو ما تتحرك اني اشيلها واحطها ..بس كون عدله.
لو بس نفس يصعد وينزل بيها ..
فتح الدكتور الباب ... وكلهم ركضوا .. خالتي وعمي والرجال ابو اثير .. هم ركض وياهم.
اريد اشوف ...افسر وجهه الدكتور ... يضحك .. يبجي .. بس كان جامد ... مابيه اي لمحه لاي شي ممكن ينعرف ..
سال كال
ـ العفو وين ذوي الطفله ..
عمي كال ..
ـ يابه اني جدها ابو ابوها ...بشر دكتور ...شلونها البنيه ..
ـ شد حيلك حجي والله يعوضكم .. للاسف جانت الجمجمه بيها تهشم قوي سبب لها تلف بالدماغ مااكدرنا ننقذها ... الله يعوضكم
وشه صارت بأذني .. شنو مااسمعت .. مااسمعت .. نزلت بالكاع بعد مااجنت كاعدة على كرسي من الكراسي ...زحفت للدكتور .. مثل الطفل اول مايمشي...
فتت من بين رجليهم وجلبت بنلطونه
ـ مااسمعت شــ....شنو
رجعت جلبت بدشداشه عمي
ـ عمي شنو والله مااسمعته .. شكال ..
ابد مااستوعبت الي يكوله الدكتور ...عبالك عقلي توقف عند هل لحظه .. وقبل لحظات من جنت واكفه كدام المرايه .. هيج كمت ارجع المواقف بداخلي .. بدماغي ودخله راغب عليه .. دفعته لي ...وكمت واني بنتي وكلشي مابيه لا اني ولا هي ..
واني ازحف بين الرجلين .. نزلت عليه تحاول ترفعني من جوة الرجلين .. اصرخ وفاتحه حلكي وعيوني ...للسكف ..
يارررب ... يارررب ...بنتي .. اخذني اني ..
يارب اخذ الابطني مااريدة .. فديه بلولو اخذة .. مااريدة بس رجعلي بنيتي وخلي حضني متروس بىها .. شكد صعب من واحد بواحد وهم اثنينهم من لحمك ودمك اثنينهم من روحك
ـ خاله والله توها جانت نايمه بحضني.
درت وجههي لعمي
ـ عمي والله مابيها شي الدكتور يجذب هذا جذاب .. اريد بنتي اريد احضنها ..
احضنها خاله .. اريدها بنتي جيبوها ..
كمت اركض للغرفه العمليات ..
اريد ادفع الباب ...ولزموني ..
الممرضات .. اريد اخلص روحي منهم ..
ـ ولكم بنتي ...بنتي والله مساع نايمه بحضني .. تتنفس من روحي .. تأكل من كلبي .. والكم بنتي .. عوفونني ..
ماادري شكد الساعات لي مرت .. كاعدة وانود .. اون .. ابجي .. اصرخ .. اضرب راسي بالحايط .. وكلمه اريدها مااطاحت من حلكي.
ـ اشوفها .. اريدها ..
مااحسيت الا حضنه .. بضهري .. درت وجههي لكيتها امي .. امي ....امي
امي الي ماامتت قبلها لا دفنتي قبلها ولا جفنتي قبلها .. لعد ليش اني .. تذوقت الم ماله اي وصف .. امي .. الي يوم من الايام هم طحت هيج طيحه وطلعت منها ومامتت ..
ضحكت واني امسح دمعه من عيني الورمت
ـ يوم تذكرين من طحت من السطح وابويه كال الله شال المنيه منج وخلها بركبه واحد ثاني
هزت راسها وبجي
ـ خلها ببنتي يمه .. ليش مامتت بذاك اليوم يمه .. جان مااحسيت بالي اني حاسه بيه
حضنت راسي
ـ اريد بنتي يمه .. اريد بنتي فدوة كليلهم .. احضنها .. اشمها .. ابوسها يمه .. ابوسها .
هيج شفتي تنحط على شفتها واتنفس هواها يمه ..
روحي مفرفحه .. شسوي واطيب الالم .. شسوي والجرح الملتهب يطيب.
من اجت امي وشفتها وشفت وجهها .. عبالي من احط راسي بحضها يطيب .. يروح هذا الوجع .. مثل قبل من جنا ننجرح ونروح لها تنفخ على الجرح ويطيب يروح الالم ويختفي تماما ..
حضنتي بكل قوتها وتصرخ مثل صريخي ومااختفى الالم .. مااختفى لا قل منه ولا شي .. اخواتي داير مدايري ..
وهو واكف هناك ...بعيد .. يباوع من بعيد .. ويشوف حالي وين وصل ..
ماادري شلون كمت من مكاني ...والنار المشتعله بداخلي .. تريد تحرك كلشي يمي .. حتى لو كان كلب عشقكني من سنين ..
ركضت عليه بكل قوتي .. ودفعته
ـ كله من وراك .. ظل نفسك وراي .. ضليت وراي لمن صار هذا حالي .. .. مااشفت من حياتي شي .. من يوم الخطبتني ورفضك مااعشت .. متت من ذاك اليوم .. ليش ... لان نفسك وراي نفستني وخليني اعيش بحسرات وقهر لا تهنين بزواجه ولا بعيشه شوف حالي
اشرت على روحي
ـ شوف ...شوف بنتي راحت ..
درت وجههي للغرفه .. كل عقلي بعدها هناك.
ـ مااراحت هسه تطلع تركض .. تلعب .. تناغي ..
رجعت لامي ..
ـ يمه اريد بنتي .. مااراحت يمه ..
وصلت يمهن ...مسحت دموعهن وحدة وحدة ...امي الجانت تشهك بالنفس وكوة يطلع منها
ـ لا تبجين يمه ...لولو هسه تجي تحضنج وتبوسج
ورحت لسهر
ـ لا تبجين سهر لولو تحبج وتحب تتدلع مثلج ...لولو تشبهج تحب تلعب وياج
ـ لا تبجين هاجر .. فدوة لا تبجن بنتي مابيها شي .
حاولوا شكد يطلعوني من المستشفى .. بس اني مثل الثور الهايج ماكو احد كدر يسيطر عليه .. حاله من الهدوء جتاحت كياني .. المرهق .. سكون لف روحي لف من كل مكان ..
امي مخليه راسها على راسي
واني همس لها
ـ احضنها .. يمه ...شمها .. ابوسها
اذني يمكن قوه سمعها صار الف .. سمعت همسه هاجر .. لامي
ـ ماما رافد راح يستلمها ..
سهـر ...
بعد مااتصل بيه ياسر ... رجعت نمت ...بعدني ممفمضه عيني .. دك الموبايل مرة ثانيه
ـ اهووو شلون يربي ماانام بالله
رفعت التلفون .. وشفت رقم ابو راغب .. استغربت .. وعقدت حواجبي...
ـ شيريد هذا ..
فتحت الخط واجاني صوته
ـ الوو السلام عليكم ام غاليه
ـ وعليكم السلام عمي ابو راغب اني سهر امي مموجودة
ـ اها عمي
سكت شويه...يتنفس بقوة.. وصوت صريخ يمه ..
كال
ـ عمو سهر جيبي امج وتعالي للمستشفى ..
تنفست بصعوبه .. واحس كلبي كام يدك على كيف ..
صوتي كوة طلع
ـ ليش عمو اكو شي غاليه صاير بيها شي
ـ لا عمو غاليه مابيها .. هسه تعالوا لا تتأخرون
حاولت اعرف منه بس ابد ماانطاني جواب
ـ ادري عمو شكو فدوة كولي مو كلبي وكع
ـ ماكو شي عمو ان شاء الله ماكو شي ..
وسدة ..
كمت بسرعه ورجليه ترجف ..
وفكري يروح ويجي .. طلعت من الغرفه وشفت امي اجت من برة وعباتها بعدها على راسها ..
ركضت عليها .. هي من شافتني
ـ اها ولج سهيرة شلون صرتي ..
ـ زينه ...ماما اتصل علينا ابو راغب كال جيبي امج وتعالي للمستشفى
شهكت امي وضربت صدرها
ـ اسم الله الرحمن ليش ولج اختج بيها شي
ـ ماالحكت افهم منه ماما بس سد الخط بس سالته كال مابيها شي
ـ روحي ولج دروحي بدلي ملابسج وامشينا يلا ..
الطريق كله وامي تلوم بروحها..
ـ كله مني ولج سهر .. انه رجعتها له
ولج اخاف اختج بيها شي والله اموت بحسرتي عليها ..
حاولت اهدي بيها
ـ اذكري الله ماما .. عمي ابو راغب كال مابيها شي. .. ان شاء الله مابيها شي
مااعرف ليش عيوني اختفى منها اللون الحياه ..
صارت بعيني رماديه ...ماادري ليش كلبي انقبض ..
روحي فاحت منها ريحه الخوف والانتظار جان اصعب ..
دخلنا المستشفى نتراكض والخوف غاطينا اني وامي .. وبعيد شفنا عم غاليه كان منتظرنا جوة بالمستشفى بالباب .. امي ركضت كدامي واني وراها ..
وجهه مايفسر ... عيونه ادور مثل الي يريد يموت ووجه اصفر .. ركضت عليه امي
ـ الله يساعدك ابو راغب شصاير خويه ..
الرجال اول مااشاف امي .. اخذ طرف جفيته وكام ينحب ويبجي ..
خمشت امي وجهها
ـ سودة عليه بنتي راحت ..
اريد لحك عليها والزمها ماكو خرطت مني ..
ابو راغب صاح ..
ـ مو غاليه ياامها .. ملوكه ..
جبل من السما وطاح على روسنا .. وهدكها للكاع ..
ـ شنو ملوكه عمو ...ملوكه زغيرونه ...طفله عمو طفله
ـ الموت مو بعيد عن احد بنيتي
تلفتت لامي كاعدة بالكاع وصريخ
ـ يبووووووو ... يمه يغاليه ولج يمه منين اجتج هل المصيبه يمه
ـ كومي ام غاليه كومي عاوني بنتج راح تموت ..
كامت امي وخدها مزلغ ...والظهر مكسور .. دفعت عليه الموبايل
ـ هاج خابري خالتج خل تجينا ..
اتصلت بخالتي مااعرف شلون كلت لها .. ماادري شلون نطقت ولا اعرف شلون حجيت ..
عقلي ممستوعب الفكرة ..
ماتت شلون ..
امس اني لعب وياها واضحك عليها وعلى سوالفها ..
امس اني دغدغ بيها واركض كدامها حتى تلحك عليه ..
زغيرة شتعرف من الموت ..
اثاري صدوك الموت مايعرف لا زغير ولا جبير ..
كل الي صار بعدها مثل الحلم ...عبالك كابوس جاثم على صدري خانكني ..
غاليه منتهيه بكل معانى الكلمه ..
حجيها مامترابط .. افعالها ...تكول عليها هاي فقدت عقلها ..
امي حاضنتها وكاعدة ..
سمعتني واني اكول لامي رافد راح يستلمها ..
دارت وجهها عليه ...
ـ سهر ...اريدها بنيتي دادة .. اشمها ...ابوسها .. فدوة
ـ اذكري الله غاليه .. اتأسي بهل البيت .. تذكري رقيه بنت الامام الحسين شصار بيها ..
ـ ونعم بالله .. ونعم بالله .. بس هم اريدها .. احطها بحضني كلشي مااسوي والله
مسحت دموعها حيل .. وتشلع بخدها شلع
ـ شوفي حتى بجي ماابجي .. بس احطها بحضني ..
ودارت وجهها لامي
ـ ماما بنتي مدنفشه مايلوك لها التابوت .. يمه بنتي ماتنام بغير حضني كليلهم
حجي لهم .. سولفيهم شلون تضل تبجي الا تنام بحضني ..
مااكدرنا نسيطر على مشاعرنا ودموعنا .. تسيل ..
رافد كان غريب ...اغرب شخص شفته .. للحظه كلت اذا عرف راح يفرح .. يمكن راح يكون هذا فراك بين غاليه وراغب ويستغل الفرصه ويتزوجها .. بس بالعكس .. جان يبجي عبالك ابوها .. تحمل كلام غاليه وما رد ولا زعل ولا طلع .. بالعكس ظل ويانه .. رغم خالتي مااجت لان جانت مريضه ..
وايهم اجه وجايب وياه هاجر .. كلنا لتمينا مكسورين الخاطر .. مسكورين الظهر .. وغاليه تلوع كدامنا ومانكدر لا نخفف عنها ولا نشيل من همها ..
هاجر الوحيدة الي بنهتنا .. حتى كالت لامي
ـ وين ابوها .. راغب وين ممعقوله بنته تموت ومايحضر
ردت امي عليها
ـ خل يولي .. تلكينه سكران وطايح حضه ..
من بعيد شفنا رافد شايل جسم زغير ملفوف بقماش ابيض ..
الموت يخوف ... الموت صعب ..
الموت يخطف اروحنا واحبابنا من كدام عيوننا ...ولا ينكسر خاطرة علينا ..
بطريقه تلقائيه غاليه فتحت اديها وخلتهن على رجليها .. تنتظرة يحطها بحضه ..
وفعلا حطها بحضنه .. مااكدرت اتحمل المنظر ...درت وجهي عنها ..
وهي تحضن بيها .. وتشم بنفس مكطوع
ـ افيششش ياريحتج يمه .. افيشش ياريحتج ياكليبي
ليش نايمه يعمري ...ليش نايمه يروحي .. فتحي عينج الحلوة .. كعدي وضحكي بوجههي مثل كل مرة تسوينها .. شميني مثل مااجنتي تشمين بيه .. لولو .. ولج لولو
انتظر منو بعد يكبر .. لعب منو .. واضحكه .. ولج ياهو الي يمسح دموعي .. لج بمنو اكحل عيوني بشوفته ..
وتهز بيها ..
هلا وكل الهلا بالجايتلي
بكوارها مدري شجايبتلي
هلا يبعد امي واختها ..
وصاحت
ـولج يمه لا اجيتي ولا كوريتيلي يبعد روحي .. شلون غمضت عينج واني بعيدة عنج ملوكه ..
شالتها من حضنها ..
ـ هاج ماما هوسيلها هوساتج الحلوة شلون شتكولين بيهن اذكرهن
هاي البنية أشغاليه كبه وطرمه عاليه
لتفرحين يم الولد ناخذه وتظلين خاليه
وأنت أبزويه أتكعدين وأحنه على الجربايه
واحنا على الجربايه
وتكمز بيها ..
..
ـ ماكعدت .. ولكم ماكعدت حسبالي من تشم ريحتي تكعد .. مااشفت يوم لا شفت بينتي من كبرت ولا زفيت ولا تهنيت .. الله لا ينطيك راغب .. الله ياخذ عمرك مثل مااخذت عمر بنتي ..
كلنا سكتنا او غفلنا لا كلام غاليه .. يمكن تصورنا مجرد كلام من ام مفجوعه ..
ام رفضت رفض تام بنتها تنحط بتابوت ..
وكلمتها خلت كلبي ينزف ..
ـ ملوكه تنحتنك بالتابوت خلوها بحضني تشم الهوا .. بلكت ترد روحها ..
من وصلنا للمغيسل ..
رفضت تسلمها للمغسله ..
وتلفتت لامي وكالت
ـ اني اغسلها ماما ...مغسله اديها خشنه وهي ترفه تفز من طشه الماي ..
دخلت تغسلها وامي وياها ...وامي تكول وي كل طاسه مااي تنحط على جسمها .. جانت غاليه تندك وتبوس بيها ...وجهها ...عيونها .. شعرها .. ايديها .. رجليها .. كلشي بيها ..
خفنا عليها لا تموت .. جانت تشهك لمن تطلع روحها وترجع .. روحها لها ..
شحال ام تكفن امها بيدها ..
طول الطريق للنجف جانت غاليه مخليه لولو بحضنها .. السيارة الي اخذتنا جبيرة .. رحنا اني وامي و هاجر وحتى يمنى امي جابتها من بيت جوارينا واخذناها ويانه .. رافد وياسر راحوا ويانه
طول الطريق و غاليه يلولي .. يهدهد لها .. وتهز بيها عبالك نايمه وشويه وتكعد .. شكد حاولنا ناخذها منها وخليها بالتابوت .. مااقبلت ..
ـ بنتي تظل بحضني ماما .. بحضني
وصلنا للنجف ...وحالنا حال .. غاليه توسدت الكاع .. والكبر محفور كدامنا ..
امي يمها .. ولا احد كدر يتقرب لها او يأخذ الي بحضنها منها ..
امي هي بس كعدت يمها ..
ـ يلا ماما ...كرام الميت دفنه يبعد عمري
شالت راسها لامي
ـ كولوله يدفني وياها ...خل يوسع الكبر ويحطني يمها ماما .. اني هم ميته ..
ورجعت تبوس بيها ..
هناك لكينا مرة .. جايه تزور ابنها .. شهيد ..
شافت حالتنا .. وشلون واكفين .. ومتحيرين بأمرنا ..
اجت علينا ..
مرة جبيرة بالعمر .. لابسه لبس اهل الجنوب ..
كعدت كابلت غاليه ..
وكالت
ـ اجيت ازور ابني الشهيد .. راح وعمرة بعمر الورد .. عمرة 23 راح بالحشد .. بس ماادامج فاكدة مثلي .. اكابلج ..
صوتها الشجي هز كل واحد بينا
حفظتهن منها ..
ـ ربيتهم لمن دنا الخير
وفروا من ايدي فرة الطير
ـ اي والله خاله فرة الطير فروا .. شوفيها خاله جنها طير راحت من ايدي ..
اخذتها المرة من حضنها وسلمتها للدفان ..
والمرة تنعى ...
بعدها .. فرت غاليه من بيناتنا بس لزمناها .. كل قبضه تراب تنحط عليها تشهك رواحتنا ..
تندفت لولو .. وراحت روح الطفوله .. سحب من يبناتنا مثل خيط الحرير .. سكنت روحها وضلت ذكرها بكلوبنا ..
...
غاليه اعتكفت على نفسها .. لا دمع نشف منها ...لا صوت تالي الليل سكن ..
يكولون اصعب فراك فراك الام لطفلها .. تهز كاروكه وهو فارغ .. تشم ملابسه .. يدر صدرها وتفز تالي الليل على بواجيه .. يكولون صوت البجي يظل بأذنها شما طال الزمن ..
تكعد تباوع لكاروكه تلكاه فارغ .. وملابسه تفرشهن ...له ..
وهيج جان حالها ..
جنا كاعدين اني وهاجر ..
ـ سمعتي الي سمعته ..
ـ شنو ولج سولفي ..
ـ رافد سافر لسعد
ـ شنوو.
ـ اي سمعت خالتي كالت لامي من اجتنا امس .. راح لسعد هناك لتركيا
ـ اووف خطيه رافد ... غاليه هم حملته ذنب مو ذنبه ترة. ..
ـ اعرف ويمكن تأثر من سمع بيها حامل و ...راغب الحقير مختفي ...
ـ تصل عليه ياسر يريدني اداوم ...واني والله ماالي خلك دوام ابد
ـ واني مثلج الاخ باجر يجي من السفر .. تعرفين سافر بعد مااجابني للمستشفى وصار له اسبوع من يوم الراح وباجر جاي
ـ ليش مو سافر قبلها بيوم
ـ لا طلع ممسافر.
ـ باجر تنزل رواتبنا المفروض .. جنت افكر افرح امي بشي .. وغاليه اشتري لها لولو ملابس
خنكتني العبرة
ـ الله يرحمها سهر .. ابد مااتوقعت توصل بيه لهل مواصيل .. يقتل بنته ..
ـ تدرين مرات اكول امي اهم لها ذنب هي .. رجعتها له .. لو ما راجعه جان
ـ اسكتي هاجر هذا يومها .. اللهم لا اعتراض
..
رافد ...
دخلت وعفت حذائي الملطخ بالطين عند باب المطبخ .. دخلت على كيف مااريد اكعد امي ..
رجعت بعد اماجيت من النجف مااكدرت ارجع للبيت .. مااكدرت حس صدري مختنك .. روحي
ساكنه ..
تذكرت من اجت عليه وكامت تضرب بيه من اثنين اديها ..
عيونها الحلوة شلون تحولت الى دم .. وجهها المزلغ من كثر ماتخمش بيه ..
وبنتها شلون شلتها بيدي ..
عمري مااتخيلت بيوم من الايام تصير بهيج موقف .. شايل طفله بعمر الورد بين اديه ..
وبنت منو .. بنت حبيبتي ..
حطيتها على كلبي وشميت ريحتها .. شميت بيها ريحه غاليه .. عيونها مغمضتهن مثل ملاك ونايم ...ملاك واسمها عليها ..
جم ملاك راح جوة الكاع وطمه التراب ..
وجههي وملابسي كلها تراب .. التعب غاطيني .. ونفس مهمومه ..
نمت على الكرويته بالصاله .. ضليت صافن على السكف .. الصار حقيقه لو خيال .. الي صار كابوس ..
مرت ساعه وساعتين واني مغمض عيوني ..
وفوك كل هذا وحامل .. حامل غاليه ..
بعد كل هذا الي سواة بيج .. شايله له طفل بعد .. ليش كل هذا. كله هذا حب له ..
الخبر نزل مثل الصاعقه عليه من سمعته .. مثل واحد وضربني بجاكوك على راسي ويكلي اصحى كافي ..
جسمي وعقلي متخدر قوي شديد التأثير والفعاليه من سمعت الخبر من خالتي لهسه ..
المخدر اخذ ينسحب من عقلي وعايفني اطوطح مثل السكران والافكار تتزاحم بعقلي ..
الافكار تتلاطم ضجيج .. مايتحمله راسي واني غركان .. غركان
شسوي ماادري! ?
كلبي مثل طير يفرفح .. عليها ...يريدها .. يريد حضنها ويخفف عنها .. يطيب جروحها ..
اااه .. شلون! ?
حركات خفيفه من وراي .. درت وجهي ولكيت امي واكفه وراي ..
ـ يوم
ـ رافد
اجت امي وحضنتي مثل الطفل ..
ـ شلتها بين اديه يوم .. شلتها وعيونها مغمضه جنها نايمه .. لو تشوفينها ..
ـ الله يرحمها ..
ـ وغاليه ...تريد تموت .. الدفان يدفن وهي تحفر بيه .. تصيح بنتي مااتحمل الظلمه .. زغيرة مايلوك لها الكبر ..
بجيت بحضنها .. وهي تبوس براسي كل شويه ..
لمن هدأت وحسيت روحي ارتاحت ..
ـ رافد اريد منك تسوي شي لي .. اريدك تسافر لسعد
ـ شنووو
حطت ايدها على فخذي
ـ اني امك رافد .. امك ولي حق عليك تأخذ كلامي وتسمع مني اريدك تسافر هل كم يوم
ـ يوم واعوف خالتي والبنات بهل حال
ـ تقصدك تعوف غاليه بهل حال
ـ غاليه هسه محتاجه تترتاح .. امها واخواتها يمها ...انت لازم تبعد اعرف كلبك مراح ينطيك تشوفها بهل حال وتسكت .. اذا لي معزة عندك تسافـر ..
بست راسها
ـ تم يغاليه .. اسافر .. واني هم محتاج ارتاح وافكر عدل ..
......
عواصف الشتا هدأت .. كأنها اخذت ماتريدة. وغادرت .. المطر والرعد و البرق اختفى كله وظل بس الكمر مضوي السما .. وهي .. طلعت من غرفه .. رغم ظلام البيت .. اديها تتحسس الحيطان تريد توصل للمطبخ ..
تتحرك ببطى كأنها انسان الي .. عقلها غركان .. بالافكار .. وصوت بجي طفل بأذنها .. وهي تهمس
ـ هسه اجيج لا تبجين ...ادري الرمل حار يبعد روحي .. اجي ودفيج بحضني يعمري
السجينه لمعت بيدها .. والسوار الي بيدها لمع وياها وصوت راغب
يعلا بأذنها
ـ هاي السوار هديه لج حتى اربطج بيه لاخر العمر ..
...لفحه الهوا البارد صاب عمودها الفقري وخلاها تجمد بمكانها .. وصوت وراها وي لحظه حطه السجين على معصم ايدها ..
وقطرات الدم سالت وي كل حرف
ـ عوفي السجينه ..
يتبــــــع
اسمعوا الفيديوا الي فوك
الله يصبر كل فاقد ان شاء الله
طبعا اليوم البارت خالي من رومانسيه المتجمد الشمالي و ورديه ..
مو تنسون تصوتون وتعلقون
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!