رواية احبك .... وانت الفصل الرابع عشر 14 - بقلم وردة عمري

السلام عليكم شلونكم بنات شخباركم ..
زعلانين ادري والله ...بس شسوي ضرفي جان ضدي .. والله جنت بحال بس الله يعلم بيه ولليوم بعدني بس اهون من الايام السابقه .. اذا كوتلكم مااصاركم يوم من استقرينا تصدكون .. والله العظيم جنت مااكدر احك راسي مو اكتب .. بس الحمد لله عدت ان شاء الله ..
اجيتكم بحداث حلوة وبارت طوويل وحلو
وقبل القراءة
ننعئ فقيدة الواتباد ست الاء احمد "ام غايب " فقدنا كاتبه راقيه .. وانسانه واعيه .. احسن الله مثواها ورحمها الله .. و اصبر ذويها ..
وكل عيـــد وانتـــم العيـــد ... يا احلئ عيـــــد
اسمتعوا ....

لبارت الثالث عشر
بقـــلم وردة عمري
ماهذة الحياة العقيمه التي كلما اردت منها خيرا .. اخذتك  بالشر .. رغما عنك ..
....
غاليـــ..  ة
جنت كاعدة ... مخليه ايدي على بطني ... ومغمضه عيوني ... احس بحركات بنتي ..
اي بنتي .. مراح اقبل الا ببنيه ..
يكولون الولد سند ..
بس مااريد سند .. اريد بنيه ترمم كلبي المعطب .. روحي المجروحه .. وتخيلها .. اخيل شكلها ...عيونها ...نعومه بشرتها ..
لولو ...اكيد راح تكون نسخه منها ..
يمكن هذا ظلم .. للطفل الجاي ...ارسم له شكل وتخيله لولو بس مااكدر .. غير اتخيلها لولو ..
دخلت عليه امي .. جانت عند خالتي رضاب لان كالوا مريضه خطيه وراحت لها هي و هاجر و سهر ..
شفتها مترددة ...كعدت يمي .. واديها يفركن وحدة بوحدة
ـ شبيج ماما ...خالتي رضاب شلونها
ـ والله خالتج زينه الحمد لله زينه
ـ لعد شبيج ماما اشوف بوجهج حجي و لسانج معكود ليش
سكتت ... عيونها ادور على الغرفه الا عيوني ماتصد بيهن .. استغربت ..
خليت ايدي على ايدها
ـ شبيج يوم احجي ..
حاولت اقلل من ...توترها ...
ـ يوم
ـ خالتج رضاب خطبت سهر لياسر
جنت اعرف سهر معجبه بياسر ...صح مااكالت لي بس سمعتها هي و هاجر يحجون ..
دعيت من ربي الله يفرح كلبها .. ويخلي قسمتها احسن من قسمتي ..
ـ صدوك ماما .. اي وانتي شنو كولتي لها
ـ اني اتمنى غاليه ليش سهر تلكه احسن من ياسر بس
ـ بس شنو ماما
لزمت ايدي حيل
ـ غاليه هاي الدنيا تريد لي يلزم ضهرنا عليها .. ويمكن هذا الي راح يصير سبب لج قبل لا يكون سبب لسهر
ـ شنو قصدج ماما مفتهمت
ـ رنا تريدج لرافد .. هذا شرط زواج سهر من ياسر ..
صفنت عليها ...اريد استوعب الي حجتته امي ... اريد افهم كلامها ..
اسحبت منها ايدي على كيف .. ورجعتها على بطني
صوتي طلع مبحوح ..
ـ وانتي شنو رأيج
ردت اسمع منها ... اسمعها وهي تضحي بيه للمرة الي مااعرف شكد ..
مثل مااتضحت بيه بكل مرة اجيت اشكي من راغب لها .. ورجعتني على عيني .. ضد رغبتي ودوس على كرامتي وتكسر خاطري .. واخر شي بنتي راحت نتيجه خضوعي وصمتي
رفعت راسها لي
ـ اقبلي بيه غاليه ولج هذا رافد لو دورين الدنيا كلها مراح تكلين احسن منه .. وتردين الصدك اني فرحانه بيج اكثر من سهر .. لان انتي تعرفين وضعج منو يخطبج وانتي بهل وضع خايبه .. وداعتج هاي فرصتج الوحيدة واحسن فرصه .. شكلتي ..
كلمه من امي .. احس تكتل بيه جزء ...جزء ورة جزء .. يموت بيه وكدام عيني .. ارمش ..
وطاحت دمعتي على خدي ..
ـ الوضع الي بيه اني انتي السبب بيه ماما ...
فتحت امي عيونها على وسعهن
ـ شنو ...ليش اني الضربتج على ايدج وكتلج روحي تزوجي المصخم الملطم راغب .. منو انتي كلتي لو هل مركب لو ماركب .. ولج مو انتي الي خطبج رافد ورفضتيه واخذتي هل زباله
صحت بيها
ـ اي انتي ...ماما ... بس انتي مادكتي رجلج وكفتي كدامي وكلتي مايناسبج يغاليه .. مو زين يغاليه ... ومشيها كولي اني الرضيت بيه .. وكولي اخذته غصبا عنج ...كم مرة اجيت وشكيت .. كم مرة بجيت وصحت .. كم مرة دكيت رجل وكلت مارجع وتالي ترجعيني واني مكسورة ... واني مذلوله بدون حتى مينزل من روحه شويه ويجي ياخذني .. وتالي شصار يمه شصار .. خسرت بنتي ...لولو .. انسيتيها .. لولو لطولها شبر شلون تندفن بكبر وينسد عليها بابه .. بنتي ماتت بين اديه .. شردين اخسر بعد .. حتى بعد ماتضحين بيه ..
ـ عمري ماضحيت بيجن لا انتي ولا خواتج طول عمري اركض لجن ...واكد عليجن .. واخذ لكمه من حلكي وخليها بحلوكجن هاي تاليتي يغاليه هيج تحجين وياي.. لان ماردت اخرب بيتج ...مادرت بنتج تعيش بين ابو وام متفاركين وكل واحد بيت
ـ  ... ياريت لو متفاركين وكلمن بمكان ولا بنتي راحت مني .. اسمعي يوم اني مراح اضيع عمري ولولو مرة ثانيه .. وسهر عساها لا تزوجت ياسر .. قابل بس هل ياسر بالدنيا .. ومال اتزوج رافد كطنه وشلعيها من اذانج
لزمت ايدي من ردت اكوم
ـ غاليه .. لخاطر اختج .. ولج يمه تحبه .. ويحبها
ـ تحبه ...يحبها اني معليه .. تعرفين يعني شنو معليه بعيد عني وعن بنتي.. مامضطره ابدا حياتي من جديد بهيج طريقه بالغصب .. خالتي لو صدك تريد سهر لياسر ماطلبت هيج طلب يوم .. بعدين تعالي اكولج تتوقعين سهر راح تقبل اذا عرفت بهذا الشرط ..
دخلت علينا سهر واحنا نحجي ..
جان وجهها يضحك بس شويه ...اختفت الضحكه من شافتنا او يمكن سمعتنا
جنطتها بمدتنها ...تهدلت ..
ـ اي شرط ..
سكتنا .. امي كامت تباوع عليه وتفرك بيديها يمكن خايفه لا اكول .. للحظه اجيت انطق .. واكول لها ..
بس فتحت حلكي امي حجت
ـ خالتج رضاب خطبتج لياسر .. سهورة
ضحكت ...وحسيت بفرحتها .. وماسايعتها الدنيا ..
حضنت امي ..
ـ ادري .. ماما .. ياسر كال لي ..
امي كانت تتصنع الفرحه او يمكن فعلا فرحانه ...او تشوفني فرحه سهر حتى ارضخ وارضئ ..
ردت عليها امي
ـ صدك هذا ياسر طلع مو هين ..
ـ فرحانه ماما ...فرحانه كولش ..
ـ الله يسعدج ويهنيج ياماما ...
خليهن وطلعت ...بس داخلي يغلي .. يغلي ..
احس نفسي بدوامه ماجاي تخلص .. العله مو برافد ...العله بيه .. انه مو مال زواج بهاي حالتي ...اني حتى العدة بعدني مااطالعه منها ...بنتي بعدها بطني .. ماادري شمنتظرني .. شلون ادخل حياة زوجيه واني هستوني طالعه علاقه فاشله .. خسرانه بيها خسارة جبيرة ..
خسرانه بنتي الي بعدها وردة مغمضه ماشمت من الهوا الدنيا شي.   وردة جنت منتظرة يمته تكبر ... بس مااشفت منها شي ...راحت وهي بعدها تعد عمرها واحد
كعدت بنص الطارمه وانه محتارة ..
عيون سهر من دخلت علينا جانت تضحك .. عيونها عيون عاشكه ..
شلون خالتي تشرط هيج شرط ... وليش ..
معقوله تقبل بوحدة مثلي لرافد ..
وحدة مطلكه .. رجلها كتل بنتها .. وحامل وعلى ابواب طفل جديد ..
شسوي ...شسوي ...اوكف بوجهه اختي .. الي روحها طايرة بين السما والكاع ... وارفض وخلي نارهم تاكل حطبهم لو اقبل .. وارجع ابلع الموس من جدة وجديد ..
لا ...
ماكدر ..
ماتحمل اصير تحت رحمه رجل ثاني .. حتى لو كان هذا الرجل هو رافدد..  اخاف .. اخاف اني اظلمه ... مو هو يضلمني ..
بعدني كاعدة ...و صفنه تأخذني والثانيه توديني ..
حسيت بسهر كعدت يمي ...
ـ شبيج غاليه ...حتى كلمه مبروك ماسمعتها منج ...اخاف زعلانه لان راح انخطب ترة والله ناويه اشرط على ياسر ست اشهر الا تنزوج مجرد خطبه
بلعت ريكي ... ورديت عليها
ـ شدا تحجين سهر ... عمري الف مبروك ...وشايفه الخير ان شاء الله وصدكيني مازعلانه بس تعرفين روحي مو مثل قبل
ـ داوي روحج غاليه .. ابنج الي جاي يريد ام قويه .. مايريد ام ضعيفه ... يريد وحدة ادافع عنه حتى مايخسرها ولا تخسرة مثل ....وسكتت
غصه صارت بكلبي .. وكلام سهر مثل الي صحاني ...
ـ مثل لولو ...كمليها .. جنت ضعيفه وماكدرت ادافع منها ...وخسرتها .. اطمئني هل مرة اكله بسنوني الي يكرب صوب بنتي مراح اخسر مرة ثانيه لو على موتي .. كلام سهر مثل ضربه على راسي خلاني اراجع القرار الي اخذته واصر .. عليه ..
مراح ابدي حياه جديدة بهاي الطريقه ..
مراح اكون صيد سهل لا خالتي لا لامي ولا لرافد ..
اني حرة ....
حرة ....
خليت ايدي علۑ ايد سهر ..
ـ تحبيه ..
وجهه سهر تغير .. كل مشاعر الحب والعشك ضهرت علۑ وجهها .. عمري مااشفتها هيج .. رغم كانت مخطوبه وعايشه قصه حب قبل .. بس مااشفت العشك والحب ظاهر عليها بهاي الطريقه
ـ اموت عليه لج غاليه .. ماادري شلون وليش حبيته رغم ماهو شكد قاسي ويايه .. مااسمعني كلمه حب وحدة.   بس احس بيه .. بغيرته .. احس عيونه شلون متلهفه عليه من يشوفني يوميه الصبح ..
نخلطت مشاعري .. بين الخوف و الاصرار .. شلون .. اذا خالتي مااقبلت الا اني ل رافد ..
شنو الحل ..
اااخ .. يغاليه
معقوله ارفض .. سهر .. جانت عيوني عليها .. ابتسم وجهها يضحك عيونها يلمعن ..
ضلت فكرة تجيبني والثانيه توديني مااعرف الحل شنو ...
ايهــم
"كل هاي الفرحه لان رضت شهد بباسل "
يشوفها كدامي شلون فرحانه وتضحك وماتكدر تضم فرحتها عليه ..
رغم ادري بيها حست دا استهزء بيها وبفرحتها بس ماهمها الموضوع ابدا ..
ظاهر حالها .. حال اي بنيه مراهقه .. تحب سوالف الرومانسيه والحب .. و ماتقاوم شعورها بالاثارة كل ماتشوف اثنين يحبون بعض ..
ضيقت عيوني .. مااعرف ليش ضجت .. اي ضجت من فرحتها .. حجيت بنبرة حادة ..
ـ ترة انتي تسجين خيالات رومانسيه بكيفج .. يجوز صديقتج هيفاء سعت بجمالها حتۑ تأخذ باسل رغم تعرف بيه رجال مزواج ..
لوجنت طعنت واحد بخنجر بكلبه .. ماجنت حصلت علۑ تعابير مثل تعابير وجهها
حجت واحس روحها الطفوليه مجروحه ..
ـ هيفا۽ بنيه محترمه وحبابه وحدة مثلها مدور صيدات مثل باسل .. شكد حاولوا يوكعوها كدام عيني وماقبلت
ـ شبيج زعلتي من الحقيقه .. ترة الحقيقه ماتزعل ..
هاجر
احس بالوجع بداخلي اعرف سببه .. وتجاهل السبب ..
رجعت حجيت احاول شكد اكون قويه وماهتز ..
ـ اما باسل .. يجوز فعلا مزواج .. اني مااعرف تاريخه .. بس الي دا اشوفه هو معجب بيها صدوك .. اكدر اشوفه شلون يباوع عليها بنظرة حب
كتل فرحتي ...شوهه احساسي البريئ ..
اشوفه كدام عيني فرحان لان كدر يكتل الابتسامه علۑ وجهي .. رغم الانزعاج البادي علئ وجهه ويحاول يخفيه .. بكل قوته
تحرك من ورة المكتب مالته .. واني نزلت راسي علۑ الحاسبه اكمل شغلي .. احس اريد اطمس راسي بالحاسبه وبعد مااشيله ..
احاول اخفي دمعتين ثكلن علۑ اجفوني واخاف ينزلن ويشوفهن ..
حسيت بيه اقترب مني .. واني كلبي كام يضرب مثل الطبول ..
سمعت همسته وهو يحجي بنبرة خطفت روحي
ـ يجوز .. يمكن اني مااكدر اشوف واحكم علۑ الامور مثل ماتشوفينها .. يمكن اني غلطان .. وانتي تشوفينها احسن مني واصفئ مني ..

نزلت دمعه مني مسحتها بسرعه واني ادور وجههي له ..
اويلي شكد شفته حلو بعيني بهاي اللحظه ..
عيونه يلمعن .. عبالك يدزن لي رسايل غرام لكليبي المتعلعل
ولحيته يمه .. شكد حلوة عليه اللحيه الطويله .. مو كولش طويله بس حلوة ونازكه .. احس اضافت رجوله اكثر .. عبالك هو الرجال الوحيد بالعالم
واني اشوفه ..
هيج .. الرجال الوحيد بالعالم
ماكدرت انطق واني احجي بكلبي
"اااه يكلبي شكد ولهان بيه "
ضحك لسبب غامض مااعرفه شنو ...ورجع يكول بجديه كذابه
ـ ديلا عوفي سوالف الحب والغرام وكملي شغلج ..
مشئ مسافه قليله ودار وجهه عليه .. غمز لي
ـ منريد براءتج تتلوث من هسه بعد وكت للحب عيني
احس وجههي صار احمر دم .. الحرارة صعدت لراسي من الحجل ..
وكلبي وي كل دكه
يصيح
احبك ..  احبك ... احبك ..
ايهم ..
جنت اعرف الي جاي يصير بيها .. اعرف النسوان. وادارسهن دراسه .. خبازهن وعاجنهن علئ ايدي
راح يجي يوم وتجي بنفسها وتعترف ..
بس بعد وكت .. والوكت كدامي وهي هم كدامي ..
احساس بالرضا غارك بيه .. طغۑ علۑ كل احساس ثاني ..
ورجعت لشغلي بطاقه غريبه عجيبه ..

ثانــي يوم .. جنت اباوع عليها ..
كمت اعرفها مثل خط ايدي ..
اعرف يمته تسوي روحها تشتغل حتۑ تشرد من تلميحاتي لها .. ويمته تشتغل فعلا مثل هسه.
كل شويه وراجعه للحاسبه .. اصابعها رفيعه .. حلوة عبالك ماتضغط علۑ دكمه لا .. عبالك تعزف علۑ بيانو ..
عبالك تركص باليه ..
بالله شلون راح يكون مظهرها اذا ركصت باليه ..
اي هاي الركصه الحزينه ..
بهذا جسمها الرشيق ..
اول مرة عيوني تستكشف جسمها وباوع عليه بنظرة رجوليه ..
ا
لبسها كوله محتشم .. تنورة طويله .. وقمصان ردن ..
وشعرها ترفعه ذيل حصان .. و بيه كم خصله نازله .. وجهها مابيه قطرة مكياج
هـه شبيك ايهم ليش هي تحتاج مكياج .. ماتشوفها تضوي كدامك جنها كمر ..
ماادري شلون كمت افكر .. بالله شلون اذا اني اختاريت فستان علۑ مزاجي ولبسته ..
الي وحدي ..
رجعت عيوني علۑ جسمها ..
فستان .. احمر .. اي احمر يخبل يطلع عليها .. بخيوط رفيعه من فوك ..
والكصير كولش بحيث تبين سيقانها ...
اممممم .. احمر لون ناري .. حار ..
شديد الحرورة ..
ـ يعني باجر الا ترحين
تحرك راسها العصفوري .. اي والله عبالك راس عصفورة .. مو شابه عمرها 26 سنه ..
عبالك تحاول تجمع افكارها حتى تعرف شنو اقصد
ـ وين
ـ عقد شهد وباسل مو كولتي يوم الخميس يعني باجر ..
رمشت اكثر من مرة بحيرة
ـ طبعا لازم اروح تعرف عي ماعزمت غيري من صديقاتها
هاجر
توترت واني اشوف تعابير وجهه ضايج ..
ايااا شبيه هذا ... شنو ان شاء الله مايريدني اروح ..
شبيه ..
نزل راسه
ـ تعرفين السكرتيرة راح تترك الشغل بعد كم يوم وراح تجي وحدة تصير بمكانها
ـ اي .. اي كالت لي ست وداد ...
مارفع راسه ولا باوع عليه
اعرف ست وداد شكد علاقته قويه بيها .. وشكد تهتم بادق الامور الخاصه بيه
كال بنبرة حزن وجعت كلبي ..
ـ راح افتقدتها
ـ اكيد حتزورك وتطمئن علئ امورك
مجرد مااحجيت هيج .. رفع راسه لي .. الحزن كان طاغي عليه .. اشوفه شلون صافن عليه .. ويفكر .. عيونه يتحركن .. على وجههي .. ماكدرت ماحس بالوجع علمودة .. راح يفقد رفيقه دربه من يوم اسس هاي الشركه لليوم وهي وياه ..
جنت اتمنى لو اكدر اعوضه حتى لو بروحي
بس كون يطلب ..
انتظر ..
انتظرة يعبر عن حاجته لي ..
اعرف كولش زين محتاجني ..
احسس بيه مبقيني لسبب معين .. سبب هو يعرفه ويتقصد مخليني يمه ..
مااعرف شنو هو ..
وماامرات اكول ماريد اعرف .. كافي اختارني حتى ابقى بجانبه ..
مااتخيل نفسي بعيدة عنه ابدا ..
.....
يوم الخميس
جنت كاعدة بسيارة واحد من الجوارين اجرته امي حتى يوصلني لبيت شهد ..
اويلي امدا حضي .. يشغل بيها وماكو
ياربي كون تشتغل .. وين الله .. وين اهل البيت ماكو اسمع بس صوت الجريخ بيها ومدا تشتغل ..
اووف يعني لازم انزل .. واروح اجر سيارة من راس الشارع .. اويلي شيسوصلني .. وعود اني معدله نفسي ومخليه مكياج .. بس الحمرة شويه طوخ .. لبست قميصي ااي اشتريته من استلمت راتب.  وخليت شويه كحل ..
بلكوة طلعت من امي .. ماارضت اطلع هيج .. شلون مخليه كحل .. شلون مخليه حمرة .. اي بس اني هيج .. هاي امه محمد كولها تخلي ..
نوب هاي السيارة وكفت وماتحركت من مكانها ..
نزلت احس روحي حطك ..
اووف شبيه حظي .. نايم دكعد شويه .. على الاقل وي السكراب ..
مشيت لمن وصلت للراس الشارع ..
رجعت شعري لورة واني امشي ..
امي وغاليه وسهر مااعرف شبيهم او بالاحرى غاليه وامي .. سهر فرحانه لان ياسر راح يجي يخطبها .. بس غاليه وجهها يخطف الوان .. ويتساسرن هي وامي .. واحس غاليه ضايجه من امي ..
رجعت افكر بوضعي .. شكد اتمنى لو اكدر لكول لوحدة من اخواتي على مشاعري اتجاة ايهم .. بس مااكدر .. لان مااعرف مصير هاي المشاعر شنو .. المشاعر الي دا تتمكن ني بوم وره يوم ..
بعدني امشي .. مااحسيت الا سيارة لونها فضي خففت سرعتها وكامت تمشي يمي
ـ يحلوة ماتريدين واحد يوصلج
دهر صابج هاجر ...من وين طلع هذا هو وسيارته .. كمت امشي بسرعه هو وراي بسيارته
ـ هاي شبيج .. ترة راح يسيح المكياج من الحر دصعدي يا عيني
صحت بيه
ـ امشي لا اخرط وجهك واسويك خريطه ..
ضحك حيل وهو بعدة وراي
ـ اويلي يابه اموت على العصبي
مااحسيت الا سيارة رياضيه حمرة مرت من يمي خطفت .. خطف. 
شفت الولد شلون كام يصفن على السيارة و الظاهر انعجب ببيها .. استغليت الفرصه وركضت ركض ووكفت على الرصيف ...اريد سيارة توكف ماكو ..
باوعت لساعتي .. اذا مالكيت سيارة راح تأخر هوايه
والله واشوفلك سيارة .. واشرت لها .. السايق اشر الي ااسبقه كم خطوة لكدام .. مشيت وهو وراي .. فعلا ماكو مكان يوكف بيه حتى اركب وياه .. السيارات تشخط شخط من يمنا .. راد يوكف .. وهاي السيارة الحمرة شخطت يمنا .. بحيث حفت ورجعت لورة مرعوبه ..
عبست وجهي واني اباوع على هاي السيارة
شبيه هذا خبل بالله دعمني .. وغسل حتى غسل .. شلون حظ اليوم يربي
اشو المغسول بسيارته المغسوله وكف يمي
استغربت نوب الجامه السيارة مظلله خفت .. اجيت اشرد .. كلت اكيد هذولي عصابه ويريدون يخطفوني ..
اول ماادت اخطي خطوة واشرد بالعزيزة .. نفتح بابها .. وصوت اعلا الي حافظه نبراته عن ظهر قلب .. الي حتى انفاسها حاسبتهم .. وكل نبرة منهن اعشكها وكل نفس ولهانه بيه ..
ـ اصعدي هاجر ..
نصدمت بوجودة .. ادري شجابه ..
نزلت راسي واني احجي وياه
ـ ايهم هاي شجابك لهنا
اشوف عيونه تحوم داير مدايري ..
عيوني .. شعري .. لبسي
صاح بيه بعصبيه .. والعروك ركبته تتنافر
ـ دا اكولج اصعدي اني اوصلج للبيت الغضب شهد ..
لكيت نفسي .. اصعد بدون حتى مااعترض او كول ليش .. لكيت نفسي كعد يمه .. وطار بينا طيور .. ساق بسرعه جنونيه مثل صاحبها ..
مااعرف شكد مر من وقت وهو يمشي بهاي السرعه .. يفتر بينا بالشوارع من شارع لشارع .. ويميل اذا شاف سيارة ويتعداها عبالك يستفز الناس هيج عينك .. عينك ومتقصد ومتعمد
واني جنت كاعدة لازمه باب السيارة بيد والثانيه حاطته على مقدمتها .. وكلبي يطبل .. طبل
ادري شورطني وصعدت وي هذا الخبل ..
اريد اجر النفس ماكدر من الخوف
ـ مو خوش متحبين السرعه .. سترخي هاي شبيج خايفه
رجف جسمي واني لازمه الباب خاف اوكع لو ننعدم
ـ الله يخليك ايهم خفف السرعه .. والله العظيم كلبي حيوكف
باوع عليه بنظرة جانبيه .. يمكن من شاف وجهي شلون اصفر ونفسي كوة يطلع .. انكسر خاطرة عليه .. خفف السرعه
ـ هاا هسه هيج احسن مو ..
ماباوعت عليه ..  ولا اكدر .. اني هسه تحت رحمته .. تحت جبروته .. اني وياه ولحدنه .. بالسيارة .. سيارة تشبه باكيت الشخاط بس تشخطها تنفجر ..
حاولت اخذ نفس .. شهيق .. زفير .. بلكي اكدر اوجهه هذا الموقف الي لا جان لا على خاطر ولا على البال ..
ياللهي شصار ..
نزلت اخذ سيارة حتى اروح لشهد .. ونوب هذا الي مدري من وين طلع الي وكام يتحرش بيه وتالي ..
درت وجههي له
ـ فدوة الله يخليك اوكف هنا ونزلني .. اني اخذلي اجرة واروح
ـ ماانزلج ..
بلعت ريقي بالكوة ..  احاول اشجع نفسي حتى ادور وجهي له ..
جان قريب كولش مني .. كمت اشن عطرة المميز الي يسرق مني افكاري بكل الليالي الي مضت من فوك جلدة مباشرا..  احستها تطلع من مساماته تتدخل مسامات جلدي ..
حسيت بخرارة جسمه لاول مرة .. اول مرة بحياتي يصير رجال مني بهل قرب ..
ملابسبه باللون الاسود .. اضافت لهيبته .. هيبه ثانيه ..
عايف كم دكمه مفتوحات من فوك بحيث مبين جزء العلوي من صدرة ..ومبين من بين حافات القميص .. سلسله تلمع .. بركبته
ونهايتها جمجمه .. مااعرف ليش خفت من منظر الكلادة بركبته ..

رعب صابني منه ..
ماادري ليش خفت منه كوله .. هيئته .. ملامحه .. كلادته كلهن خوفني خلني ارجف واترجاه
ـ فدوة استاذ ايهم .. نزلني هنا ... وعليك بيه اني اروح لوحدي
ـ ماانزلتج
كل شويه يدور وجهه عليه و يباوع من فوك لجوة
ـ اترجاك
ـ تعالي تعشي وياي ..
ابتسم لي ابتسامه حطمتني .. يتدلل عبالك مراهق
بلعت ريقي بالكوة ..
ـ شـ شنووو
ـ شهد كولها وياها الليله وباسل اكيد مراح يعوفها لوحدها ويمكن اصلا يريدها لوحدها حتى يستفرد بيها ...بس ..  اني .. وووحيد
ـ تعرف كولش زين مااكدر حتى لو ماجانت خطوبه شهد مستحيل اقبل واني وياك لوحدنا
مايصير ...الله يخليك كافي وصلني
ـ ليش يابه ميصير شنو نسيتي احنا اصدقاء وولد خاله .. اممم ولو جبير عليج اني صدوك هاجر تشوفني جبير مو شايب عمري بـ 35 وانتي بعدج بالعشرين .. بس هذا الشايب وحيد ويريدله صحبه ومحتاج ...
الج
ـ ايهم كافي شنو هل للعب نزلني هنا
صفن عليه بنظرة غريبه مااعرفت اافسرها ولاكدر من كد الخوف والرعب الي اني بيه
ـ اظاهر مستعجله على الروحه بهل للبس والمكياج ..  تمام راح اوصلج
ردت انطيه العنوان كلت اكيد ميعرفه
ـ العنوان
ـ اعرفه
ـ شلون ..
ـ شي ميخصج ست هاجر ..
ـ شجابك لمنطقتنا ..
ـ فضول اجيت اشوفج شلون حطلعين الليله .. بس مالت الله مريت بيج وماعرفتج .. اقصد لمن جان الولد يحاجيج وانتي ضايجه .. بس درت السيارة ورجعت عرفتج .. صدوك ليش جنتي ضايجه
شكوله ...انعكد لساني .. احس روحي دا تنسحب مني واني كاعدة يمه
ـ هيج .. يذب حجي
عصب ورجع مثل ماجان اول مااصعدت وياه
ـ مدام تعرفين نفطج راح اطلعين لشارع ليش .. تحطين مكياج وتلبسين هيج لبس.   ليش تنتطين سبب لواحد يتحرش بيج لو انتي تردينها
لا هذا زوتها .. واني ساكته مااكدر افتح حلكي بكلمه خاف يتهور .. بس من عصبيتي الزايدة
ـ ترة جوارينه جان راح يوصلني بس سيارته عطلت واطريت انزل
مااحست الا السيارة مالت بيه ..
ـ لج انتي تردين تخبليني منو هذا جوارينج بعد ..
مااصدك الي دا يصير بيه ..
عيوني كامن وحدهن يجرن دمع .. دمعه .. ورة دمعه .. انتهيت فقدت اخر ذرات شجاعتي .. اريد افتح حلكي مااكدر .. وهو لازم استيرن يضرب ويسب ويشتم.  
اادي ليش كل هل العصبيه .. !?
يغار يعني! ?
لعد ليش مدا يفرحني الموضوع! ?
ليش دا احس الموضوع مو موضوع غيرة .. لا الموضوع اكبر اكثر سوداويه ..
بعدين بأي حق يحاسبني .. شنو اني بالنسبه له ..
ليش ميصارحني يشريد مني .. وشدا يحس اتجاهي ..
احسه يريد يتملكني بطريقه همجيه ..
تصرفاته تخوف .. ترعب .. وحبي له ومشاعري اتجاهه تقيدني .. مااتخلنيني اوكف بوجهه واعنادة
شويه وشغل السيارة بس هل مرة ساكتين .. هو ساكت .. واني مثله .. وكف السيارة بعد شارعين عن بيت شهد
..عبالي هاي هيه .. هنا ينزلني .. فتحت الباب اريد انزل بسكته اريد اشرد
بس اتفاجئت بيه من سد باب السيارة ..
ـ اوكفي حوصلج لباب البيت .. بس اول مرة رتبي نفسج ومسحي وجههج لان صار خريطه
مد ايدة نزل المرايه كدام وجههي .. وتفاجئت هاي شصاير بيه .. الكحل ملطخ وجههي ولايصه لوص .. والحمرة رايحه .. فتحت جنطتني طلعت اكلينس .. وهو صافن عليه ماارحمني ولا نزل عينه عبالك كدامه مشهد حزين عاجبه .. رتبت نفسي بالكوة ..
وكفني كدام بيت شهد ونزلت ...كلمه شكر كوة طلعت مني ..
ـ منو راح يرجعج على البيت لا تكولين اخو شهد مدري شسمه
ـ لا جوارينه كال يصلح السيارة ويرجع يوصلني واني انطيته العنوان
وقبل لا يعصب مرة ثانيه
ـ ترة الرجال جبير وبناته بكدي
سديت الباب حيل .. عبالك اريد اطلع حيف السواه بيه كوله .. ماادرت له بال ..
......
ياســر
بعد مااعافهمرافد وطلع .. اخذها سحب لمكبته .. مثل اول مرة حجزها هنا .. اول مرة من فقد نفسه بيها وكانت بيناتهم اول قبله .. اول حبل للنجاة
بس هل مرة تختلف ..
كولشي يختلف .. احساسه يختلف ..
جان يلاعبها .. ساعه لازم خصرتها تضرب ايدة .. ساعه يحسب خصله من شعرها ادفعه .. مرة حرك وجهها باصبعه تبعدة
ـ اووف هاي شبيك ياسر ...عوف شعري .. راح تكطعه ..
صرت حافظها .. وحافظ تصرفاتها .. ادري بيها تتدلل وتحب الدلال .. لزمتها من كتفها حيل
ـ ايااااا ياسر هاي صدوك تحجي مو خلعته لكتفي .. ادري ليش هيج تعاملني بهل قسوة شمسويتلك اني .. عوفني
ـ وين تريدين عوفنج .. وين ترحين ...مكانج هنا يم زوجج
ـ عيني بعدنا على البر لا زوجي ولا خطيبي مو بكيفك هي هيج تفضحنا وتكول للناس خطيبتي
ـ مواهبج بالرياضيات تخرب البيوت العامرة ...لعلمج هو بس رافد كوتله يعني فرد واحد مو سويتها ناس ..
كامت تتلوى بين اديه
ـ ادري شسويت لامي وقبلت بيك حتى مااسألت اذا اني قابله او لا
ـ طبعا خالتي حبيبتي كلبها على كلبي .. وشتردين سوي .. روحي ابجي واشكي عدها ودللي عليها ترة يمي .. بححححح ماكو دلال ماشي
ـ اها هيج صارت ماشي استاذ ياسر الا اعلمك الدلال على اصوله وهذا وعد متي ..
وعافتني وراحت
ضليت صافن وراها .. ياترى اذا عرفت شراح تسوي .. ماادري ..  الله يعلم الي بكلبي لها بس مستحيل اخلي. رافد يظل هيج بهاي الحسرة و الحزن طول عمرة ..
اول مااطلعت من الممر لاكيته ..
ـ اها رجعت .. همزين .. تعال اريد احجي وياك بموضوع
ـ ياسر بعدين هسه ضايج ومالي خلك لروحي
ـ ليش شبيك صاير شي ..
ـ لك هذا الغبي سعد منطي رقمي لوحدة تركيه هناك شفتها كم مرة .. وهسه ثابرتني ثبر بس تتصل عليه
ـ سعد دومه غبي .. رافد تعرف بعد كم يوم الخطوبه اريدك تحضر نفسك
ـ انته تخطب اني شكو يابه
سحبته من ايدة ودخلته للمكتب ..
ذب نفسه على الكرسي
ـ غير اخو العريس يابه لو اني مو بعينك
ـ بنص عيني .. مبروك حبيبي تستاهل تفرح لك
حجيت وي نفسي ..
ـ وانته هم تستاهل ...
عافني وكام ..
صحت وراه
ـ وين ..
ـ معليك لك صرت مرتبط بعد متفيدك هل سوالف ..
ضحكت حيل واني متجي على الكرسي ..
وتذكرت اتفاقنا اني وامي .. بعد مااغلست خالتي علينا بكم يوم وماردت خبر .. عرفت غاليه رافضه الموضوع .. بس مو وكته .. بس ماكو قبول ..
ـ يوم اريدج تتصلين بخالتي وتكولين لها ياسر يريد سهر ونريد نجي نخطب
ـ شنو .. وموضوع رافد .. نتركه
ـ لا عوفيه عليه اني احله ..
وفعلا صار هل شي خبرت امي خالتي بالموضوع راح تصير الخطوبه
رجعت للبيت والف فكرة براسي.  ..
عقلي يدور .. فريت الشوراع .. واني احاول ارسم .. واخطط .. ممصدك معقوله .. راح اسويها .. اي ليش لا .. اضرب عصفورين بحجر واحد .. اريد اساعد رافد .. رافد ياما وكف لنا ...تعب علينا .. ربانا .. كان لنا اب .. بعد ماعافنا ابونا وتخلئ عنا .. وكفت السيارة عند باب البيت .. وخليت راسي على الستيرن .. احس راسي يوجعني .. نزلت .. وسديت الباب حيل ..
ماكو غير هل طريقه ..
سهر تحبني اذا عرفت بيوم راح تسامحني ..
دخلت للبيت واني اخطي .. لكيت امي كاعدة بالصاله .. لاكتني ..
ـ هلا يوم ياسر .. الله يساعدك
ـ الله يساعدج يمه شلونج اليوم
ـ زينه الحمد لله ..
جانت تشرب جاي .. خلت ستكانها على الطبله ..
ـ تعال اكعد اريد احجي وياك بفد موضوع
تنهدت اجر حسرة
وكعدت يمها
ـ اليوم خابرت خالتك كلت لها باجر جاينج. اني والولد ..
ـ ماكو تداعي اني وسهر متفقين
ـ لا ياسر لازم يصير كولشي حسب الاصول .. اي .. تنتفق على الغايب والحاضر ونأخذ موافقه رسميه من سهر وتسولف وياها وتشوف اذا لها شروط
ـ تمام يوم نروح
ـ شسويت بموضوع اخوك
ـ كتلج عوفيه عليه يامي .. انسيه اصلا اني اتصرف بيه ..
عفتها ودخلت لغرفتي ارتاح ..
......
سهر
ـ طول عمرج انانيه مااتفكرين الا بنفسج
صوت غاليه اخترق اذني
ـ اني ماما .. اني انانيه
عفت الجنطه ودخلت عليهن
ـ شبيجن ماما ...
سكتن من شافني ..
ـ شدا يصير غاليه شبيها ماما وياج
سالت دمعتها على خدها ..
سمحتها حيل .. وكالت
ـ اسالي امج هي تكولج
وعافتنا وطلعت ..
درت وجهي على امي
ـ ماما شبيج وي غاليه
اارتبكت امي ..
ـ ماكو شي ماما ... دا اقنع اختج حتى تطلع تسلم على خالتج اذا اجت بس مااتقبل
استغربت ...شجاب الانانيه على هل حجي
ـ وخالتي جايه اليوم
ضحك وجهها
ـ لا باجر  هي والولد حتى يخطبوج وكلشي يصير رسمي ...
ـ ماما اني مااريد استعجل بالزواج
شفت وجهه امي تغير .. واستغربت مني ..
ـ تريدين تفكرين حقج حبيبتي .. بس ترة مراح تلكين احسن من ياسر سهر لا تغلطين غلطه غاليه ...
ـ اني موافقه ماما .. واعرف مراح اكله مثل ياسر .. بس اريد مااستعجل بالزواج بس
ـ هذا الي ناقصنا خطوبه هم سهر .. خطوبه طويله اخاف تصير تالي مثل سالفه اسامه
لزمت ايد امي .. وتلكت بيها ..
ـ الله يخليج ماما مااريد استعجل
ـ ولج مو اني المستعجله .. خالتج حسيتها تريد العرس يصير بأسبوع واحد
ـ ترة ابن اختج ميستحي
ـ بس يحبج وانتي هم
ـ احبه ...احبه .. بس مااريد ازوج قبل ست اشهر .. هذا شرطي ماما .. نسوي خطوبه .. ونعقد وكولشي بس مانزوج قبل ست اشهر
...
كعدت الصبح واني اتمغط بفراشي .. وتلفوني اذاني
ـ صباح الخير ياسر
اجاني صوته مبحوح .. وهي يرد عليه ..
ـ مثل متوقعت اولها استغلال .. بس كوني على ثقه .. تأخري ساعه بعد اكطع من راتبج وقد احذر من انذر
ضحكت واني مرتاحه
ـ اريد اجازة ...من اليوم للخميس .. يعني ثلث ايام تعرف تحسب استاذ ياسر .. واحد ...اثنين ...ثلاثه
سمعت صوته تغير صار حاد
ـ ليش يابه
ـليش متعرف حضرتك  يحوز اتزوج
ـ كافي تتماوعين ست سهر وحجي عدل
نكلبت على فراشي ...
ـ مو امك تصلت بامي وكالت تجون اليوم
ـ انكلبتي بفراشج توج
هزيت راسي واحس نار الخجل طلعت من اذاني ...عبالك يشوفني
ـ زين ليش ماتجين ونحجي وجها لوجهه
ـ نو ... نو ... امي الي هي خالتك متقبل منعت اي زيارة بيني وبينك لمن تصير الخطوبه رسميه
ـ امج ...خالتي ...  اهاا
وقبل ماارد عليه
ـ راح نجيكم الساعه بالتسعه ..
وسد الخط بدون حتى ماا يختم وياي
ضليت صافنه على الموبايل واني ضايجه .. بس لحظه وتغيرت الضوجه للفرح .. نكلبت واني احس روحي تريد اطير من السعادة ..
سمعت صوت هاجر وراي
ـ سد الخط بوجههج
ـ اي
ـ لج شلون متحملته هو هيج يسوي بيج .. معقوله تغيرتي لهل درجه لان تحبيه لج وين سهر العنيدة الي اعرفها
عدلت كعدتي .. وكابلت هاجر ..
ـ ماتغيرت اني هاجر ...بس هو يحبني ويكابر .. يعشكني ولج والله مايتحمل بعدي عنه
وكملت ...
ـ ولج هو عصبي .. مخبل .. لان ميكدر يمتلكني .. مثل مايريد ... ماايرضي هذا الشي غرور كل مرة بالدنيا ..
هاجر جانت صافنه عليه .. حسيت عبالك بعينها دمعه ماتكدر تنزل ..
ـ شبيج! 
نزلت راسها ..
ـ مابيه شي .. وصدوك مناويه تتزوجين الا بعد ست شهر ..
حركت جتافي واني اغمز لها
ـ احاول تفاوض وياه
ـ يعني تعرفين مراح يقبل
ـ راح يتخبل اذا عرف
ـ لعد ليش تسوين هيج تريدين تغذبينه يعني
ـ لا حتى اعلمه شلون يعانلني زوجته .. يشاركني كولشي بحياته .. وشعورة وادق تفاصيله
مااريد ادخل بيته مثل اي عروس .. لا اريد ادخل زوجته وحبيبه وانسانه تشارك حياته
اريد اعلمه شلون يحجي عشك .. بعد ماايمل من السكته
ـ والله تطلعتي مو هينه يدلوعه
هاجر
مااردي ليش حسيت دا احسد اختي .. اختي بنت امي وابوي .. جاي احسدها على شخصيتها .. على حبها ...على حب ياسر لها .. لعد شبيه اني ...ليش هيج حظي اغبر .. وروحي شايطه علمود واحد مااعرف اذا جان يتذكر حبيبته القديمه بيه لو عندة نيه بس بالله يعلم بيها .. دمعتي خانتي ونزلت بدون مااحس وهي تسولف ..
وادعي يارب .. لا تخرب سعادتها .. وهنيها ..
صوت سهر صحاني ..
ـ وانتي شعندج ماعندج هاجر ..
سوالها كان مباشر لي
ـ معندي شي
ـ عيني بعينج بالله ..
نزلت وجههي مااكدرت اخاف احط عيني بعينها .. وتنزل دمعتي
ـ هاجر ...اني اختج .. تعرفين شنو اختج .. احجي
ـ ماكو شي والله
ـ ايهم شلونه وياج
تنهدت
ـ زين ..
غاليــــة
كاعدة بغرفتي .. انود .. وعقلي يجيب .. ويودي ..
احاول امنع نفسي حتى من التفكير .. مااريد افكر اصلا ..
ملت بنفسي لكدام ...
كمت حتى مااطلع من غرفتي .. وامي مقاطعتني ..
واني هم ساكته .. صافنه .. مااشوف بس الفراغ كدامي ...
شعله الماضي .. مرت بيه .. ماايكدر الا مايجلب بركبتي .. ويخنكني .. لازم روحي .. يحركني ..
عبالك عاجبه الي دا يصير بيه .. عبالك عجبته روحي وكام يحرك بيها شويه ... شويه
ذاكرتي صارت اقوئ .. اوضح ..
كمت اللتقط كل صورة من الماضي ..
وبدون وعي كمت اخذ طريقي واني اتذكر ذاكرتي تنتهكني وهو تضرب وجهي بالتفاصيل ..
الي دائما ماجنت اتجاهلها .. خلال السنوات الي عشت بيها كزوجه لراغب
مثل الشعرة الطويله المصبوغه باللون الاحمر .. الي لكيتها على قميصه
وقبلها ...عطرة الي يتغير وي كل طلعه تصير بالليل .. واساله وين رايح .. يجاوب وي اصدقائي واني بالبدايه مثل الهبله مصدكه ..
احس روحي اختنكت والتفس كوة يطلع مني ..
اتذكر اكثر من هذا ...اثر شفته على متنه .. اثر عضه .. عضه ماتجرت يوم اسويها ..
ـ شنو هاي راغب ..
مديت ايدي لها وقبل لا توصل نزلتها
ـ دار وجهه على متنه
ـ شنو
ضحك ضحكه صفره
ـ اي هذا جرو ازغير شفته بالشارع خطيه الجهال يركضون وراه و يضربونه بالحجار واني طردتهم وشلته عضني بمتني ..
شكد حقدت عليه بذاك اليوم ..
شكد روحي شاطت ..
وجنت اتمنى لو هو نايم اخنكته مثل مااخنكني و وقطع نفسي
ورجعت للحاضر
الحاضر ...الي يمر يوم ورة يوم واني مو بيه
الحاضر ... الي يسبقه ماضي جاثم على صدري
حاضر الي امي تريد مني ارسمه وي زوج جديد ومنو ...رافد
صفنت واني احاول انطق ...
ـ اني .. ارجع تزوج ...ومنو ... را... ف ... اااه
صرخت من حسيت وجع قسمني نصين ...
...
ـــ اااااه يووووووووم لحكيني ...