رواية احبك .... وانت الفصل الثالث عشر 13 - بقلم وردة عمري

السَلآْم عَلْيُكّمٌ وٍرٍحَمُةّ الله وٍبُرٍكآتُهْ
شلونكم بنات .. شخباركم .. طبعا مشتاقتلكم هوايه .. الله شاهد عليه ..
مريضنا الحمد لله ...اليوم فتح عيونه .. اليوم كدر يأكل ...اليوم الا رجع شويه زين
الحمدلله وشكر ماقصروا عنه الله وبنيه وال بيته .. الحمدلله الف مرة ...
لان حالته كانت شويه صعبه وللاسف الصحه عندنا صفر ...يعني تخيلوا تأخذة للمستشفى يكولون ماكو اوكسجين ... تشوفه يختنك كدام عينك وماتكدر تسوي شي .. شيصير بيك .. الحمدلله مرت المرحله الصعبه ..
بعد ماظاهرة نتائج النهائيه .. وان شاء الله تطلع سلبي .. الله يشفي كل مريض بحق مريض كربلاء
شكر كل شخص سأل عني ...كل متابعه تحملت وماتذمرت .. كل كلمه طيبه طلعت منكم .. كل دعاء طلع من كلوبكم الطيبه .. اشكركم جزيل الشكر ...
انتظروني باجر بنفس موعدنا ببارت جديد ...
ولكم هذا الغش من بارت باجـــــر

.............
جنت كاعدة ... مخليه ايدي على بطني ... ومغمضه عيوني ... احس بحركات بنتي ..
اي بنتي .. مراح اقبل الا ببنيه ..
يكولون الولد سند ..
بس مااريد سند .. اريد بنيه ترمم كلبي المعطب .. روحي المجروحه .. وتخيلها .. اخيل شكلها ...عيونها ...نعومه بشرتها ..
لولو ...اكيد راح تكون نسخه منها ..
يمكن هذا ظلم .. للطفل الجاي ...ارسم له شكل وتخيله لولو بس مااكدر .. غير اتخيلها لولو ..
دخلت عليه امي .. جانت عند خالتي رضاب لان كالوا مريضه خطيه وراحت لها هي و هاجر و سهر ..
شفتها مترددة ...كعدت يمي .. واديها يفركن وحدة بوحدة
ـ شبيج ماما ...خالتي رضاب شلونها
ـ والله خالتج زينه الحمد لله زينه
ـ لعد شبيج ماما اشوف بوجهج حجي و لسانج معكود ليش
سكتت ... عيونها ادور على الغرفه الا عيوني ماتصد بيهن .. استغربت ..
خليت ايدي على ايدها
ـ شبيج يوم احجي ..
حاولت اقلل من ...توترها ...
ـ ماما
ـ خالتج رضاب خطبت سهر لياسر
جنت اعرف سهر معجبه بياسر ...صح مااكالت لي بس سمعتها هي و هاجر يحجون ..
دعيت من ربي الله يفرح كلبها .. ويخلي قسمتها احسن من قسمتي ..
ـ صدوك ماما .. اي وانتي شنو كولتي لها
ـ اني اتمنى غاليه ليش سهر تلكه احسن من ياسر وين بس
ـ بس شنو ماما
لزمت ايدي حيل
ـ غاليه هاي الدنيا تريد لي يلزم ضهرنا عليها .. ويمكن هذا الي راح يصير سبب لج قبل لا يكون سبب لسهر
ـ شنو قصدج ماما مفتهمت
ـ رنا تريدج لرافد .. هذا شرط زواج سهر من ياسر ..