رواية احبك .... وانت الفصل السابع 7 - بقلم وردة عمري

احبـــك ... وانت! ?
بقـــلم وردة عمري ..
رافـــــــــــــــــــد
اذا رجل ابحث عن مفاتيح النسيان منذ ولادتي ..
اقتات الم الهجر منذ سنين على رفاتي ..
انا رجل تذوقت مرارة العلقم ..
حتى اصبح في فمي بحلاوة الشهد ...
.......
ـ غاليه ..
يكولون سر الحب بالمه .. مايحلى الحب الا لمن تجرب وجعه وتعيش فراكه .. وتحس بالشوك لحبيبك .. يكولون الحب .. مو اذا مابيه وجع .. اذا مابيه دموع تالي الليل وسهر وتنتظر حبيبك يمته يتصل عليك .. يذكرك .. وشكد تفرح من يتصل بيك .. شكد تفرح اذا كنت متخاصم وياه ويراضيك .. تتذوق والحب وتعيش لحظاته بين الفرح والحزن والالم والسعادة ويتكون هذا المزيج الغريب .. تعيشه بكل تفاصيله وتحبه ..
...
بس محد كال الم الحب ماينحمل .. ماينجرع .. ولا يجزع منك ويبقى يتغلغل بيك ويتغذى على روحك .. تتمنى الموت وماتحصله ..
محد كال الحب يوجع .. يوجع .. وجعه مثل اظفر طويل ينسد عليه باب حديد قوي .. وينطبك ويبقى مجلب باللحم لا هو مشلوع ولا هو باقي .. معلك .. ووجعه اشد ..
محد كال الحب لوعته لوعه ام فاكدة ولد وحيد عدها .. واصبحت عاقر بعدة ..
انا لا انصح بالحب .. ابقوا ارواحكم بعيدا عن الوجع .. ...
مرت سنين .. واني امنع نفسي حتى من نطق اسمها ..
غاليه .. مرات اكول نسيت .. واحلف لروحي ..
والله نسيت .. افرح .. اوكف كدام المرايه البس وتكشخ وتعدل .. وتعطر ..
واردد وي روحي .. نسيت .. نسيت يرافد .. وراح تعيش احسن عيشه .. اخذ مفتاح سيارتي .. اطلع بيها .. اخلي بدل الاغاني حزينه .. اغاني فرح .. وسعادة .. محتفل .. بنسياني ..
ماادري شلون يأخذني الدرب لبيتهم .. هيج شارع بعد .. شارع .. اشوف نفسي واصل عند باب بيتهم .. تأمل البيت من بعيد .. اطفي الاغاني .. وامسح الملامح الكاذبه عن وجهي... وصفن ..
وهمس لنفسي .. هنا غاليه .. بهذا البيت عايشه تنتفس هوا ماتنفسه .. نام بفراش اني ماانام بيه .. وتحضن واحد غيري ..
هنا غاليه ..
اغمض عيني .. واشم الهوا بلكت يحمل من نسماتها التتطفي ناري .. وتهدئ روحي .. بس ماكو ارجع مثل مااجيت خايب الرجا ..
عطشان ... حسيت بلعومي يبس .. مثل واحد محروم من الماي .. عفتهم وكمت .. رحت للمطبخ اخذت كلاص .. وضغطت على البراد .. صفنت على الماي شلون يجري الى ان امتلئ الكلاص ... ماادري شلون رفعت ايدي وسديته ... شربت الماي مرة دفعه وحدة .. تخيلت الماي البارد تذفي لهيب ناري .. يحفت جمر روحي .. بس ماكو كل فايدة .. عصرته بيدي .. وتحول الى قطع مداخله مع لحمي .. نبتت شظايا الزجاج بيدي مثل ماينبت الورد بالارض ..
قطرات الدم نثرت على الكاع ..
اريد اشوفها ...
قبضت على ايدي المصابه .. ورحت .. لغرفتي الهاجرها من اسبوع لاجلها ..
ـ غاليه ..
اول مانطقت اسمها ...غمضت عيني .. شلون لك كلب تخليها تروح .. لا تخليها تروح وطلع منا .. هذا عطرها مالي المكان .. هذا نفسها تسمعه بأذنك ..
اكلم نفسي مثل المجنون ..
دارت وجهها عليه او ماشافتني .. شهكت بصوت عالي
ـ هاي شنو ..
ـ راح ترحين راح ترجعيله ..
ـ تعال رافد ...الله يخليك تعال اشوف جرحك
ـ ياجرح منهن جرح ايدي اني سويته ... بس جرح كلبي انتي السبب بيه .. كتلتيني من سنين تذكرين .. وهسه رجعتي تجرحيني نفس الجرح .. كتلتيني بنفس العله ..
ـرافد اني اسفه
ضحكت بألم ..
ـ اسفه وين اصرفها هاي .. غاليه كولي مااحبك هيج باوعي بعيوني كولي مااريدك .. حتى هذا يقتنع ويبطل .. وينسى ويعيش مثل مااعشتي وخلفتي ..
خلت عينها بعيني .. عينها التجري دمع

اخذت بتها كدام عيوني وطلعت .. لكن ماكدرت الا انطق بيها ...
ـ غاليه اذا حتاجيتي شي يوم من الايام ...اي شي .. بابي لج مفتوح بأي وقت
كلمتها صدمتني
ـ صدكني مراح ادك غير بابك .. انساني رافد .. عيش حياتك .. اتزوج .. وسوي عائله وبيت ونساني .. انسه شي اسمه غاليــه ..
رجعنا للبيت بعد مااطلعت غاليه وراحت وي عمها و خالتها .. احساس الانكسار رجع لنا اكبر اكثر .. حتى خالتي رضاب بعد مااطلعت غاليه دخلت الغرفه وسدت بابها .. و الولد ولا واحد منهم وصلنا .. لمينا ملابسنا وطلعنا .. اجرت امي لنا سيارة ورجعنا لبيتنا .. كل وجدة بيها وجعه وصرخه تكعد كبور النجف لو طلعت .. صمت حل مثل ماحل الظلام على كلوبنا المتلوعه ..
دخلنا البيت نجر بأرواحنا جر .. حل الانفجار اول ماادخلنا .. هاجر
بعدها امي مااداخله باب الاستقبال .. صاحت بيها
ـ ليش رجعتيها ليش .. كل هذا حتى ماتصرفين عليها حتى ماتتحملين مسؤوليتها .. ذبيتها عليهم عبالك حيوانه مالها قيمه ..
امي دارت وجهها لهاجر .. مااجاوبت .. نزعت نعالها "تكرمون " ودخلت .. حتى يمنى كل مرة مجلبه بدشداشه امي .. هل مرة عافتها وجلبت بيه ..
عافت الجنطه الشايلتها بالباب .. واخذت طشت العجين .. وفات جوة الدرج .. مستخدمينا مثل مخزن للطحين وبعض الاغراض .. دخلت جوة الدرج تنخل بالطحين وتحضرة للعجن ..
ماسكتت هاجر .. لحكت امي وهي تصيح بقهر
ـ اذا ماتكدرون تعيشونا .. ليش جبتونا .. ليش بورطتونا بهذي الحياه والعيشه الكشرة ..
ليش اها .. حجي لا تسكين ..
ماادري شلون هاجر نزلت اخذت الحذاء من رجلها .. وشمرته على امي .. بحيث اجه بظهرها ..
ركضت عليها .. سحبتها وهي بعدها تصرخ بنفس الوجع والالم
ـ ليش سويتي بينا هيج .. انتي .. انتي كله من وراج خلفتينا بنات مالنا لا حول ولا قوة الناس تسقوي علينا و تسحكنا بنعولها وتمشي ومالتفت لنا .. شسويتي لنا كولي .. هي عيشه هاي .. حتي من دخلتينا ندرس جنا ندرس بالحسرة .. نحسر واحنا نشوف البنات يلبسن اشكال للوان وانتي تروحين تشترينلنا ملابس من البالات .. كم مرة سهر رادت تموت لان جسمها يتحسس من الملابس الملبوسه وانتي ابدا ولا جنج .. كم مرة غاليه اجت بجت عندج وهي تشكي لج همها .. تكولج ماما مليت .. تعبت .. مت من القهر والظيم وانتي ترجعينها ..
ركضت هاجر لبرة .. واني وراها .. بلكوة لحكتها .. رادت تطلع خارج البيت .. عيونها تبجي .. وعيوني مثلها ..
ـ عوفيني سهر .. ولج عوفيني .. اريد اشوف هاي الناس شبيها ويانه .. تدرين ابن خالتي الهيبه .. شرط عليه محد يعرف اني ابنت خالته .. لعد شكد مستعار منه .. شكد رخاص احنا ..
لزمت وجهها خليت كصتي على كصتها ..
ـ فدوة هاجر كافي .. ولج راح تموتين والله ..
ـ هو اني اريد اموت .. اريد روحي تطلع من جسمي حتى ارتاح... بلكت يخف الوجع وينتهي هذا الالم ..
وتضرب على صدرها ..
ـ شفتيها سهر من طلعت .. شفتيها شلون صفنت علينا... عبالك تودعنا .. تحاجينا .. شلون خليناها تطلع من بيناتنا واحنا ندري شكد قاهرها .. مشوفها الظيم ..
ـ هاجر غاليه قويه .. اقوانا كولنا وهي تعرف ادبر نفسها صدكيني .. رحمي حال امي سهر
ـ امج خل ترحم احالنا اول شي وبعدين نرحم حالها .. امج مو ام سهر ماتحبنه .. عمرها ماحبتنا ولا رادتنا ..
اخذتها من ايدها ..
ـ تعالي هاجر .. ارتاحي وريحي عقلج
دخلنا للبيت .. وامي كاعدة بالاستقبال .. تعجن .. ماادري اذا شفت جسمها يهتز .. او اني اتوهم .. مااعرف اذا عيوني شفت دموعها تجمعت من عيونها وتسقط على العجين ..
مرينا من يمها بدون ان حجي .. اول مرة نجافي امي بهذي الطريقه ..
جروحنا صعبه .. كل وحدة خلت راسها على مخدتها .. والف حسرة وحسرة بكلبها ..
نكلب للصبح وجافانا النوم العيون كفت دمعها .. ماعاد عندنا دمع نبجيه ..
انتبهت من كعدت هاجر ..
خفت تروح لامي وتقهرها اكثر ..
بس لكيتها تفتح بالجنط وطلعت قميصين بيض ..
ـ هاي شنو هاجر شدا تسوين
ـ ابن خالتج العرفه .. قرر يقطع راتبي الي اصلا بعدني ممستلمته ..لان خربت قمصانه البيض
ـ اياااا صدوك تحجين ..
ـ لعد اجذب هل كدام عينج .. كوتله انطينياهن واني اغسلهن لك واطلعهن لك مثل الزبدة
ضحكت ..
ـ كولج وانتي يمته خربتيهن له هو  اسبوع داومتي وياه
دارت وجهها عليه وهي تحجي
ـ لج غير اول مرة شفته بالعرس ..
ـ شنو
ـ اي ولج من امي دزتني حتى اجيب كيك وعصير ليمنى .. انصدم بيه والعصير كوله تنجب عليه .. وتلف القميص ..
ـ عليج الله
ـ وداعتج .. صار حليب بالبرتقال ..
ضحكت حيل
ـ لج كولي كاكاو بالبرتقال .. لان هو اسمر
ـ اي والله بالله هو اسمر يخبل
غمرت لها
ـ شنو نكول مبروك.
ـ على شنو يحضي ليش اني جهرتي جهرة حب لو سوالف تعبانه .... المهم والمرة الثانيه دخل عليه اني اكل باجه
فتحت عيوني على وسعهن .. باجه هاجر تخبلتي ..
تربعت بالكاع وتسولف
ـ شهد وياي بالشغل جابت باجه بالريوك .. وعينج لا تشوف دخل عليه ايهم واني امص بالعظم و واكط بصل
ضربت خدي
ـ ولج صدوك تحجين باجه بالدوام و على الريوك .. ولج وين الاناقه .. وين الانوثه ..
ـ دولي ياانوثه .. شنو قابل التأكل باجه ماعدها انوثه ..
ـ مو بالدوام هاجر ..
ـ المهم دادة .. صاحني .. وحجه ذاك الحجي المعدل .. وتالي انجبت الكهوة على الملابسه .. وهل تشوف عينج .. جبتهن وياي حتى اغسلهن ..
اخذتهن من كدامها ..
ـ كومي لعد نغسلهن .. ونجرب عليهن كل انواع منظفات .. حتى العملاق نحطلهن .. خل تكتله ريحه الديتول ..
ـ اي ولج بس مااتوقعه يضوج من ريحه الديتول .. ماادري ليش اتخليله كل ما يسلم على احد يعقم اديه اخاف تنقله جراثيم .. احسه معقد نظافه ..
اخذنا القمصان اني وياها وكعدنا بالحمام .. وكمنا نفرك بيهن .. خلينا التايت والقاصر والزاهي و العملاق خبطناهن سوة وخليناهن فوك القمصان .. واستلامناهن فرك .. هي من جهه واني من الثانيه ..
بعد فترة من وقت مرت علينا .. وكفنا اني وياه كدام الحبل .. اباوع للقمصان .. سألتني
ـ شتكولين راح منهن التكع ..
ـ ماادري هاجر بس اتوقع راح ماامبين منه شي هسه دا تشوفين
ـ بس بعدهن مبللات ..
سكتنا .. بلعت ريقي .. واني احاول اعيد ترتيب الكلمات .. هاجر من الاشخاص ااي ماتعرف ردة فعلها شلون تصير .. مرات تفاجئك وتعصب على اتفهه الاشياء ومرات تشوفها باردة رغم حرارة الموقف ..

ـ هاجر تعرفين البارحه ضربتي امي .. امي هاجر مقصرت ويانه طول عمرها وهي تكد علينا تحاول تجيب لنا كل شي نحتاجه .. تلبي احتياجاتنا وتحاول تعيشنا بكرامه ومانمد ايدينا لحد .. معقوله نجازيها على صبرها وتعبها .. بهذا التصرف
بعدها صافنه علي القميص رغم عتمه لليل لولا ضوء القمر مااشفنا شي ..
حجت بعد فترة بصوت مبحوح
ـ جنت اتمنى ماترجع غاليه لراغب.  غاليه تعبانه سهر واني خايفه تنهار اخر شي ومانكدر ننقذها من هذا الانهيار .. ااااخ لو شايفه شلون باوعت عليه قبل لا تطلع .. وابتسامتها الشكت قلبي شك .. عبالك جمرة وخلتها بكلبي مو ابتسامه .. جنها تكول ماكدرتي تخلصيني مااكدرتي اطلعيني من دائرة راغب .. رغم هي مااطلبت مني شي
ـ اني متأكدة غاليه تكدر ادبر نفسها .. وصدكيني هسه هي زينه وكلشي مابيها ويمكن نايمه بحضن راغب واني وياج شايلين همها
ـ ياريت سهر .. ياريت يطلع تخمينج صحيح ..
ـ هاجر باجر اعتذري لامي .. لج الله لا يوفقنا ولا يرضى علينا اذا نغضبها ..
ـ ماادري شلون سويت هيج .. اعصابي فلتت مني ..
حضنتها وهي شهكت بحضني وكامت تبجي .. نمنا .. وحدة حاضنه الثانيه .. نمنا وارواحنا تايهه بين السما والكاع .. وما لنا قرار بيهن ..

هاجـــر ..
كعدت الصبح ركض للحبل .. ضليت واكفه مقابيله .. تلمس اقماشه ..
معقوله حتى بهاي الحظ ماكعد .. القميص... الابيض تحول ليموني .. بقدرة قادر ..
والثاني مطكع بالخطوط بنيه .. يعني يسهر لا بينا ولا بغسلنا ..
يمكن هاي القشه القسمت ضهر البعير .. كعدت بالكاع .. حضنت نفسي صافنه على القمصان  وابجي ..
سحبتهن من الحبل ودخلت .. لكيت امي تشنك "تقطع " بالعجين .. وجهها وعيونها مورمات .. يمكنها مانايمه الليل ..
تكعدت يمها ..بس ماادارت لي بال .. اعرف حقها .. اني اجاوزت حدودي وياه .. بس شسوي كلبي جان مثل نار ومشتعل ماكدرت اتحكم بعصابي ..
مااكدرت احجي شي .. ولا ابرر فعلتي .. بكلمه .. وحدة
كمت من مكاني .. وبست راسها
ـ سامحيني ماما الله يأخذنا ويخلصج منا وترتاحين
غطت وجهها بحجابها وبجت
ـ هاي تاليتي يهاجر تضربيني بنعالج .. اني امج التعبت والربيت وسهرت الليالي هاي جزاتي
ـ والله ماما مو بيدي ماادري شلون صارت .. نكسر كلبي يوم .. تعرفين شنو نكسر كلبي.   احسه تفطر على غاليه ورجعتها بهاي الطريقه حتى مااكلف نفسه واجه .. لعد شكد مسترخصها
ـ وانه ماما هم مكسور كلبي عليها .. عبالج انه مرتاحه لا والله لا ضكت طعم الراحه ولا النوم .. بس الطلاك مو سهل واختج مو بوحدها بحضنها بنيه كولشي يصير باجر وتكول مانصحتوني مااكولتولي مثل مااهسه تلوم بيه وتكول مانصحيني واني ياما نصحت وحجيت وكلت لها مايفيدج مافاد الحجي
بستها براسها مرة ثانيه
ـ الله كريم ماما ...اروح لابن اختج لا ااتأخر وتصير سالفه لو اليوم مااتوقع ابقى بهاي الوظيفه ..
ـ ليش ولج
ـ بعدين اكولج .. اروح ابدل .. راح الوكت عليه ..
صاحت امي وراي
ـ بلا ريوك ولج ..
ـ ماااااريد ماما .. شنو سهر طلعت
ـ اي عمت عيني هم طلعت بلا ريوك ..
....
بعد ساعه من الطريق وصلت .. ظليت واكفه بباب المكتب مالته ..
شفته من بعيد .. اول مااشافني يمكن تعمد يمشي على كيفه ..
حجيت وي نفسي شدعوة هل اناقه.   وعطر وين واصل ..
ابتسم .. ابتسامه خطرة عليه .. مااادري ليش قلقت من ابتسامته .. بي شي مو طبيعي
لابس قميص عنابي و بنطلون رصاصي .. عمري مااشفت احد انيق مثله .. اسلوبه ملفت للنظر باللوان الي يختارها .. مناسبه جدا له ..
معقوله لهل درجه يحب ملابسه ويهتم بيها .. !?
يعني هذا الاهتمام صحيح ...!?
وكف كدامي .. صافنه على ابتسامته الرجوليه ..
صوته طلع مبحوح لو اني اتخيل مااعرف
ـ صباح الخير
مو المفروض يخفي عيونه بنظارة شمسيه سودة
يارب دخيلك هذا الرجال خطر عليه ..
بلعت ريكي واني اباوع لعيونه بأنجذاب ..
ـ ايهم ..
عيونه انفتحت على وسعها
ـ استاذ ايهم .. اسفه
قاطعني
ـ تعالي وراي
ماااعرف اذا كانت ملامحه راضيه او لا ..
شيريد هذا وين يريد يوصل بالضبظ .. مشيت وراها والف حسبه وحسبه بالي ..
مرت بالسكرتيرة مالته الي وكفت له بأحترام وهي ترد عليه السلام ... ومن شافتني رفعت حواجبها متعجبه ..
اوووف هو اني عايزة .. احس نفسي متخومه من كولشي ..
قبل ماادخل كالت لي
ـ لج خمس دقايق بس
ايااا وهاي شعليها .. صدوك لو كالو فوك الحمل تعلاوة ..
دخلت واني اتمنى اشرد من هذا الموقف .. دخلت ورجل تأخذني ورجل ترجعني ..
اسمعه يدندن بأغنيه  معين ماعرفتها  شنو
كعد على الكرسي مالته .. وبعد مااستقر ..
ـ اي ست هاجر كلي اذن صاغيه
تنحنحت احاول اطلع صوتي واجليه... مااريد ابين ضعفي .. مااريدة يتشمت بيه .. ويكول شوفي مو كوتلج القمصان خربت ماكو منها فايدة ..
ماادري ليش حسيت هاي لعبه يلعبها وياي بكل اسلاحته المتاحه ..
شلت العلاكه الي بيدي وخليها على السطح المكتب ..
ـ تفضل استاذ ايهم هاي ملابسك للاسف مافاد بيها شي .. وبصراحه افضل اتقدم استقالتي ..
احاولت جاهدة اكون طبيعيه ...شجاعه .. طال الصمت بيناتنا كملت كلامي واني احس الغصه بداخلي .. شلون كلبي يتكدر يتحمل كل هذة الخسارات بيوم واحد
ـ واضح ماتريدني استمر هنا بالشركه مالتك المفروض افهم الرساله اول ماكلت لي  لا تكولين لاحد انتي بنت خالتي
عيونه ضحكت ..
ـ انتي جذابه ..
ـ شنو
رفعت حواجبي .. عجبني .. لاعبها مثل طفله زغيرة .. وشكد بينت زغيرة بعيني .. طفله وهي تحاول تبين شجاعه ومو هامتها الوظيفه
ـ عبالج مااعرفج .. تدرين انتي مكشوفه .. عيونج تحجي شكل ولسانج شكل .. وعيونج تكول مراح تعوفين هذا المكان
كنت اجاهد كدامه حتى ابين جديتي .. حتى ابين له اني مو جذابه ولا عندي نيه بالبقاء ..
احاول ابين صدقي .. صدمني بكشفه بما يجول بداخلي من خاطر ..
ـ هذا الحجي مو صحيح ..اني جايه من البيت ومقررة لو ما القمصان جان مااجيت اصلا
الاستهزاء بين على تعابير وجهه
ـ لو جان حجيج صدوك ست هاجر لعد ليش مااقصري الموضوع وانطيتي القمصان للسكرتيرة ورحتي مثل اجيتي لو عبالج اني عندي وقت لمثل هل تفاهات .. شال القمصان وشمرهن حيل بمكانهن ..
حسيت عبالك واحد وخنكني .. اريد هوا ..
حاولت ابرر موقفي كدامه
ـ اجيت ابرر لك موقفي واعتذر لك
ـ هم جذابه ..
ضحك هو يدور بكرسيه ..
ـ اهم جذابه .. اجيتي تلعبين عليه بعيونج وشعرج الاحمر.. بلكي اعطف عليج واخليج بمكانج ومااخسرج راتبج .. انتي تعرفين شتملكين من مقومات ممكن تغريني بيها .. ويمكن ماتعرفين بس هذا هدفج من ورة هاي المسرحيه .. جنتي تعرفين كولش زين القمصان مراح يرجعن مثل قبل .. ليش اخذتيهن اذا انتي مو كدها هاا.. 
يتهمني بشي اني مااعرفه .. كأنه يكول انتي تغريني بس بطريقه غير مباشرة ..
كأنه يكول انتي دخلتي لعبه اكبر منج .. واني قبلت لعب وياج ..
كل مااعرفه احس رجليه عبالك بحوض من رمل وينزلن بيهن .. مااكدر انقذ نفسي واطلعهن منه
ـ يعني معقوله بعد مااامج ترجت امي حتى تشتغلين عندي .. تبطلين بهل سهوله .. انتن هاي طبيعجن النسوان التردنه تأخذنه مهما كان الثمن ..
الاهانات جانت تنزل عليه مثل المطر ...واكفه كدامه عاجزة .. اريد انطق .. اردة بكلمه .. بحرف المهم اردة .. بس ماكو عبالك فجأة تحولت خرسه .. اريد كلمه ترد عليه وتحسسه بنفس الاهانه الانه حاسه بيها ...اريد انتقم منه ...
بس يحجي بطريقه خلتني ادخن .. مثل الجكارة
ـ لا تضوجين
ـ مااضوج .. بعد كل هذا الحجي الي حجيته وياي مااضوج .. شنو انته الناس عبيد عندك .. كل الفترة المرت واني احاول مااعصب من تصرفاتك الغريبه .. المهينه لي .. تمر على القسم تراقبني اخاف سوي فد مكسورة خايف على سمعتك رغم محد يعرف بيه بنت خالتك وهسه ذالني علمود قميص على كيفك ابن خالتي خلي رجليك بالكاع خاف تنكلب بيك

ملامحه ماكانت تعبر عن شي ابدا .. جامد .. عافني ودار نفسه على الحاسوب يفتحه ..
ـ خلصت الخمس دقايق روحي لشغلج
ـ والقميص
ـ اخذيه وياج ذبيه بالحاويه
رمشت بعيوني يعني بعد كل هل حجي الحجيته رجعني للشغل والله اني كلت يطلع ويفرج عليه امه لا اله الا الله ..
شنو يعني شريد هذا ..
وصلت للباب المكتب اريد اطلع
ـ وراتبج تستلميه كامل ... اعتقد هيج تمام
لتفتت له
ـ ترة مدا افهمك استاذ ايهم
ـ مو مهم تفهمين ... المهم تهتمين بشغلج ...وديري بالج هااا ترة كولشي هنا يمشي بمزاجي فبالج من مزاجيتي يحلوة
طلعت من المكتب واني مشدوهه .. اراجع كل الاحداث الجمعتني بيه من العرس لليوم .. بلكي افهمه .. بس ماكو .. كولشي ماكو ..
بس طلعت من مكتبي ضربت ايدي بقوة على المكتب ..
ـ شتريد منها ايهم .. شتريد .. ليش ماخليتها تروح بطريقها ...
كولشي كان يدفعني لغير .. طريق .. طريق اني مااريد اسلكه .. ولا اريد امشي بيه .. حتى واني اكوم من الكرسي مالتي ولحك بيها .. بعد مااوصلت للمكتب مالتهم .. وكفت كدام الباب .. اشوف الموظفين منشغلين .. وهي وياهم ..
دخلت لهم ...
ـ السلام عليكم شباب شلونكم
كام منتظر .. وارتفعت العيون لي .. القلم وكع من ايدها .. وعيونها نفتحن على وسعهن
وكع القلم من ايدي اول ماسمعت صوته ... عيوني انفتحن على وسعهن واني اشؤفه يغمز علي... "يااخبل " 
ـ وعليكم السلام هلا استاذ تفضل ..
كعدت على الكرسي مقابل
ـ تسلم استاذ منتظر .. اها شلونه الشغل خو مامحتاجين شي
ـ لا استاذ سلامتك ..كولشي تمام
نزلت راسي
ـ تمام لعد .. استاذ منتظر اني محتاج موظف وياي هيج حسبه كم يوم ويرجع يشتغل وياكم.  اريدة يكمل لي بعض الملفات الموجودة يمي.. وهم مااحتاجه كل الاسبوع يومين بالاسبوع كافي
ـ امرك استاذ ايهم .. تريدني وياك اكيد مااتأخر
ـ لا .. لا انته ابقى القسم من غيرك ميشتغل ..
ـ لعد شهد هي هم قديمه وشغلها مايقل عن شغلي ..
ـ استاذ ايهم شهد اكيد تحتاجها اكثر مني .. هو شغل بسيط مو هوايه.  
يمكن منتظر فهم مغزى كلامي ..
ـ لعد هاجر .. هي بنيه مجتهدة وخوش تشتغل
رفعت عيوني لها ..
ـ اكيد ليش تعلمني بيها ... يلا لعد نبدي من اليوم
كمت مريت من يمها ..
اريد اخفي مشاعري مااكدر .. شلون راح اكابله واكعد يومين بالاسبوع .. ظليت صافنه على اكتافه العريضه من مرت كدامي .. خليط من الغضب و الحقد القهر .. رعشه صابت كلبي .. حطمتني من الداخل.   اول مامر بيه
همس عند وجههي
ـ يلا تعالي ..
وتجاهلني تماما وهو يمر من يمي...
كمت لاحك خطواته .. واتعثر .. ادري شبيه نسطرت على راسي وخليت امي تحجي وي خالتي حتى يوظفوني .. لو باقيه بالبيت لا هل الوظيفه الكشرة ..
مو يمشي يركض ركض ...واني وراها مثل وحدة ثوله وتفتر بالسوك .. اوووف ...اوووف شلون اكدر اتحمل ماادري ..
واسأل نفسي .. ادري وين الساني الطويل .. اشو اشوفه واكوم لبلعم اريد اطلع جمله مفيدة ماكو ..
اعترفي هاجر اعترفي هذا الرجال ايأثر بيج بشكل مو طبيعي .. يأثر بيج كرجل بطريقه فجه ماتكدرين تتعاملين وياه .. بيه شي يجذبني له .. شي مربطني ماايخليني ابتعد .. ليش بعد الكلام السمعتيه منه مو المفروض تشمرين القمصان على وجهه وطلعين بعد ماتلفين لهنا ..
ليش مااسويتها لعد .. اكو شي بداخلي يرفض اي فكرة ان اترك ...
ايهم يحسسني مثل واحد مصعدني مرجوحه ويمرجح بيه ..  احس بسعادة عمري مااحسيت بيها واني اتمرجح بس بنفس الوقت هاي المرجوحه خيوطه بيدة هو وحدة ..
وشكد ايدة تقلقني .. ياربي
الشغل كان بيدة وهو تركني اشتغل بيه
راتبي كان بيدة وكان ممكن يخصمه بكل سهوله بعد مااخربن قمصانه بس رجعه لي ..
شكد تقلقني رعشات كلبي بكل مرة اشوفه .. اسمع صوته .. شصار بيه من سمعت صوته وهو يدخل المكتب .. لو غمزته .. الطيرت كلبي ..
رعشات كلبي كامت تخنكني .. عمري لا جربت هذا الشعور لا حسيته .. همست بخوف
ـ دهر دهرج هاجر ولج يومين بالاسبوع مكابله هذا الضيم شلون بيج .. اي هاي الرادها وهاي تمناها اكليها ..
بعدني امشي وراه وشفت شهد جايه علينا من بعيد .. من شافتني وي الضيم الكدامي ...عمزت لي وتسألتني بحركه معينه شنو ...شكو
خمشت جدي قبل لا توصل لي .. من وصلت لي تركته يمشي واني وكفت وياها
ـ اها ولج وين رايحه.. 
ـ غير الافندي طلع عندة شغل ماادري شنو .. وراد موظف وياه واخذني ...
سمعت صوت من ورة شهد
ـ شلونج هاجر ..
شاب يجي عمرة بالنهايه العشرينات .. صفنت عليه شويه .. مااعرفه ولا شايفته
رجعت حاجيت شهد
ـ منو هذا
ـ شبيج هاجر هذا اخويه منير
ـ منير منو! ?
ـ ولج هاجر اضاهر استاذ ايهم ماكل عقلج .. ولج اخويه منير او قبل كم يوم وصلنا اني وياج
انمسح من ذاكرتي نهائيا .. اريـد اذكرة ماكو ..
ـ مو مهم شيسوي جاي
ـ راح اطلع اخذت جازة
ـ ليش اكو شي ...
ـ ماكو شي بس عندي شي خاص عائلي يعني
عرفتها ماتريد تكول ..
ـ تمام ... الله وياج عمري
وهذا منير قبل لا يطلع ..
ـ مع السلامه هاجر ..
لمن رجعت .. لتفتت لكيت ايهم لتفت فقط بوجهه يباوع من فوك كتفه لي .. بس عيونه ظاهرة .. مااعرف اذا كان يخزرني او اني توهمت .. رجف كلبي لمن شفته هيج ..
كانت نظرته تكول شي معين! ?
شي حسيته قاسي .. بدائي .. او حتى وحشي ..
ضاق نفسي وكلبي يطرب مثل طبوله مثل المجنون
اول مااتحركت خطوتين لكدام ...دار وجهه وكمل مشي .. ولا كأن احد خلفه .. بدون ان يظهر اهتمام كمل واني خلفه ...بعد ماادخلت خلفه المكتب ..
كانت السكرتيرة كاعدة ... حتى السكرتيرة مالته هم غامضه مثله .. سألت نفسي غير هو ابن خالتي .. لعد ليش احسه غريب .. يكولون الام تورث اكثر من الاب لاولادها .. واحنا ولد خاله .. معقوله ماكو اي صفه مشتركه بينا .. لو هي الحياه تصقل الانسان وتنطيه شخصيه مغايرة ..
من شدة اتضطرابي مااسمعت شكال للسكرتيرة لمن دخلنا ..
اول ماادخلنا .. كال
ـ يلا لا تأخريني اكثر
شنو هذا الدا اعيشه بالضبط .. بشنو ورطت نفسي .. ماادري ..
الموضوع صار ماينطاق .. ماعندي قدرة حتۑ افكر كل افكاري تتقاطع .. شي مداخل بشي .. تششتت فضيع .. من القميص الي وكع عليه البرتقال .. للباجه .. للقميص الكهوة .. لتهديدة بقطع الراتب وغسل القمصان لي ضليت ليله كامله اشم عطرها رغم هي بالجنطه نتيجه عطرها القوي ...لهسه واني بمكتبه .. ماادري يمته دخلت .. وشلون دار من خلفي وسد الباب وظليت اني وهو بس ..
كعد خلف المكتب واني واكفه .. كان كدامي مواجهي بكل .. الــ ... شي مااكدر حتۑ اسميه او انطيه صفه ..
قاطع افكاري مثل سكين حاد ..
ـ منو هاذي
عن شنو يسأل مااعرف .. بلعت ريكي ..
ـ منو تقصد ماافتهمت ..
باوعت عليه ومااريتي ماارفعت راسي .. كلبي انخلع من مكانه واني اجاوب
ـ شـ... هد شنو ماتعرفها
امال براسه كأنه يعريني عن القشرة التماسك الي حاول ارسمها لنفسي
ـ اعرف شهد الي نهار الطويل كاعدة وياها وتهذن وتأكلن باجه علۑ الريوك
فجأة حسيت النار بعيونه شتعلت ...نار مااعرفت سببها .. نار موجهه لي ومو لي بنفس الوقت
سالني بقسوة مببينه بنبرة صوته
ـ بس مو الكان وياها
ـ هذا نميــر اخوها
ـ شوفي لج مكان كعدي بيه .. مااريد بالطلعه والدخله انصدم بيج.   منو يدري يجوز تعود علۑ وجودج واخصص لج مكان عندي
"مكان عندة " شنو يقصد بس مااتأخر صحح الكاله
ـ اقصد بمكتبي
جنت واكفه متبسمرة بمكاني .. مثل الصبه كونكريتيه .. صافنه عليه .. وهو يحجي .. وهو مثلي صافن عليه بنفس الطريقه .. ماادري حسيت بورطتي الكبيرة
عمري ماكنت ضعيفه ولا ارجف كدام احد .. بس هذا صار كدام شخص مايقبل التراجع ..
....
سهـــر
جنت افرك بديه .. اريدهن يدفن ..
لتفت لرافد ..
ـ اليوم البرد .. يكشط كشط ...برد مو طبيعي مااجنت اعرف راح صير هيج باردة
ـ بس كون لابسه قمصه ..
ـ لا والله نسيتها بالبيت .. علۑ حضي غير يوميه زينه.  
ضحك رافد .. وكام ينزع بسترته
ـ شدا تسوي
ـ ششوفين انزع سترتي لبسيها .. ادري لا اطلعين بيها جنج رأفت الهجان بس يلا احسن من البرد
ـ يااا لا رافد تسلم شلون اخذ سترتك وانت تبقئ هيج .. بعدين راح اروح اشرب فد كلاص جاي حار وادفئ
بس رافد اصر عليه
ـ دخذيها يابه لا تتمرضين وتروح علينا ريوكاتج علينا .. اصلا بالكوة لبستها امي اصرت الا لبستها
ـ صدوك رافد شلونها خالتي كولش اشتاقيت لها
ـ زينه خالتج هل ايام تلح تريدني اتزوج
ماادري ليش حسيت مثل واحد وضربني علۑ كلبي ..
اويلي عليج غاليه .. رغم ااعرف غاليه ماتحب رافد .. بس كلبي وجعني مااعرف ليش .. من حقه رافد يعيش .. يتزوج ويكون حياة ... من حقه كولشي وغاليه اخذت فرصتها .. باوعت لايدة الملفوفه بالفاف .. اعرف سبب هذا الجرح .. وادري بيه .. مرات اكول هنيال غاليه علي هيج حب .. هم يجي يوم ويحبني احد هيج ..
اجاه اتصال واني بعدني احجي وي نفسي وصافنه .. من بين صفنتي شي انبهني .. وشفت .. شفت ذاك الظل الاسود واكف بالزويه ..
هاي شنو ... الاخ جاي من وكت اليوم ...
معقوله شافني اضحك واسولف وي رافد ..
حتۑ لو شافني شيريد يعني ..
قابل السوالف و الضحك حرام ..
مااعرف شلون رافد طلع يركض من يمي .. حتۑ من صحت عليه حتۑ يأخذ السترة مالتفت لي .. اول مااطلع رافد من مطعم رحت بأتجاة المطبخ .. ردت لي فد كلاص جاي يدفيني ..
وطلع كدامي هو ..
ابتسمت بوجهه
ـ صباح الخير ياسر جاي من وكت اليوم ..
شكت ضجت منه لان كل مرة يسويها .. اسلم عليه ومايرد السلام ..
ـ مو جان رافد واكف لعد وين راح
ـ والله مااعرف اشو اجاه اتصال وطلع بسرعه ..
انحنيت واني احاول كل جهدي حتۑ مااشكك السترة عليها .. هيج عينك .. عينك لابسه سترة رافد وتفتر بيها .. والله لو بيدي اشكك كل ملابسها عليها .. شنو هاي ملابس لابستها ونوب تفتر بيهن كدامي وكدام الزباين ..
ـ شبيك ياسر .. اشو ساكت وصافن عليه ..
ـ لا افكر برافد .. يجوز راح للمستشفۑ
شهكت ..
ـ مستشفئ دخيلك ربي ليش
ـ مو سميه واكعه مريضه كولش ودخلوها مستشفئ
ـ سلامتها شبيها
ـ هيج شويه تعبانه
ـ اها لعد لازم اروح لها للمستشفئ خطيه مهما كان سميه بنت خالتي هم . . يجوز يحتاجون مني شي
ضحك
ـ يحتاجون منج انتي .. وانتي شكو وسميه من يمته هل محنه هاي بعدين شيحتاجون مثلا .. متشوفينها مبالغه شويه
عقدت حواجبي ..
شبيه هذا ...اشو شاد حيله عليه
ـ شبيك علۑ كيفك .. صحيح ماعدنه علاقه وقويه وي سميه وخالتي بس تبقئ بنت خالتي  بعدين مجنت راح افرض نفسي عليها ... بعد شبيك هديت عليه

ـ والله خوش انتي ورافد لايقين علۑ بعض كولش .. هو يتبرع لج سترته .. وانتي تتبرعين بوقتج حتي تروحين لابنت خالتج الي يمكن مااشايفتها بس مرتين .. بصراحه دغدغتو مشاعري المتجمدة
شكد ضوجني ...ردت اني هم لكي الرد المناسب له ...
ـ مو بس مشاعرك متجمدة حتۑ روحك متجمدة الله يساعدك عليها .. 
وشكد ضجت من شفته ابد لا تأثر بكلامي .. لعد شبيه اني بس يحجي كلمه اكوم ارجف من داخلي .. يباوع عليه وفرحان بنفسه .. ويستفزني بكلامه
ـ يابه بكيفج .. متلبد .. متجمد .. متجلد اي كلمه علۑ نفس القافيه كوليها .. وبطريقج .. شوفيلج فد طريقه معينه تجدين بيها استعطاف رافد ومشاعرة بلكي يلتفت لج
لا تخبل هذا فد مرة ... البرد الجنت احس بيه طار .. يا برد ولكم صرت نار .. هذا مسودن .. نزعت السترة ..
نزعت السترة كدام عيني وشعرها اطاير كدام عيوني .. وكامت ادردم
ـ لا تخاف عندي هوايه لقاب لك .. متجلد .. متلبد الاحساس .. وترة مااجدي من احد شي ..اسمها رجوله .. رافد شافني بردانه ونطاني سترته.  
كانت اصابعها الضعيفه لازمه السترة حيل ..  واتمنيت لو لزم اصابعها واعضهن واحد ورة الثاني علي كيف...
ـ همزين نزعتي السترة .. طالعه بيها قرقوز ..  ..  شنو خلصتي ولو بعد عندج لقب تردين تكولينه
قبل مااترد عليه سحبت السترة من اصابعها الناعمه .. وشكد جانت ناعمه ..
العصبيه عمت عيونها وهي .. تصيح
ـ ياسر .. جيب السترة جبيبها
ممعقوله .. تخبل بعصبيتها .. مثل كلاص عصير بالصيف ..
معقوله راح تكون لاحلئ .. احلئ من هيج ..
صافن عليها بدون ماارمش .. وعقلي وكلبي يحجي
ـ انتطني .. انتي! ?
عضت شفتها .. حتۑ شفتها ورديه .. وايدها ممدودة لي .. وطلبها واحد
ـ السترة ..
حسي بيه .. يمخبله ..
لو اني المخبل الوحيد هنا ..
مااكدرت اقاوم وانتي اختصر طلبي مثل مااختصرت طلبها هي بالكلمه "السترة "
ـ انت "
ارتبكت بنظرتها وهي تحاول ترجع لورة
ـ انتي شنو ..
ردت احجي .. بس مر بينا زبون .. وغير كل ايام الله .. حجه وي سهر .. وهو يشكر بيها علۑ الريوك القدمته له ..
رادت تسحب نفسها ووتبتعد .. بس كان الحايط وراها ماكدرت .. كنت كدامها والحايط وراها ودايرة وجهها للزبون وتضحك له .. ضحكه خلتني اريد اكسر راسها
ماادري حسيت برتباكها .. لمن شافنا الزبون شلون قريبين علۑ بعض
اول مااطلع من المطعم
ـ لج انتي متبطلين هاي سوالفج .. تضحكين لهذا وذاك .. رحمه لاهلج .. هاي السوالف بطليها زين مو لعبت نفسي منها ...
ـ ولشعليك انته اضحك .. اسولف .. ابجي لا تدخل .. ترة اني هنا موظفه وي رافد مو وياك ـ واني الف مرة كتلج شغلي هنا اقلل الخساير راح تسببينها انتي ورافد .. ورديه
اوووف ...ترة كمت اختنك منه .. شبيه هذا نوب عيونه وكحه مااعرف شلون يباوع عليه ..
تقربت منه
ـ مراح. تكدر تكسر ثقتي بنفسي ياسر صدكني ..
درت وجهي عنه واني كلبي يخفك .. يخفك حيل ..اهمس لنفسي ..
ـ مراح تتإثر بواحد مثله ولج هذا مخبل صدوك تحجين ...

ـ وهسه صار عندي هدفين .. فظاظته و كلبه .. مشيت كدامه ..
مشت كدامي ومجانت تعرف عيوني تلاحك .. كل خطوة تخطيها .. وتشتاق روحي لها اكثر واكثر .. شميت سترة رافد لكيت عطرها لازك بالسترة .. نار شتعلت من الغيرة .. و قررت ماارجع السترة لرافد الا بعد مااغسلها
يتبــــــع

البارحه .. تضافرت الجهود وتكاتفت حتئ ماينشر البارت وصدوك .. مانشر ..
لذلك اعتذر منكم وان شاء الله ماتتكرر استمتعوا بالبارت ..
اريد تصوتون .. تعلقون .. وتنطوني رايكم .. حبايب كلبي ..
احبـــكم