رواية احبك .... وانت الفصل السادس 6 - بقلم وردة عمري

البارت الخامـــس
احبــك ... وانت
بقلــم وردة عمري
ماذا ان توقف بنا الزمن ...ماذا ان منحتنا الحياه فرصه اخرى لنقول .. لا
لنعيد ترتيب الماضي بعد ان عرفنا الحاضر والمستقبل ..
هل يمكن ان نصحح اخطائنا ... ان نغير اختيارتنا ... ان نستعد ... ونتعلم من الدرس ...
........
كنت كاعدة .. وبحضني لولو ... اوكل بيها .. بسكت بالحليب .. كل شويه واخذ صفنه ولولو تخوط بالصحن لعبت لعب بنفسها .. بس بالي ابد مو يمها ... شوف وين وصلت نفسي .. امي وخواتي مشردات وكاعدين بيت انسان اني رفضتة بيوم من الايام ..
سمعت صوت حجي وسوالف ... يمكن اجه خطار ... مااريد اشوف احد .. شلت بنتي على متني وناويه اهرب للغرفه ..
مااريد اواجهه ولا اجامل احد .. لكن صوت خلفي وكفني
ـ تعالي هاجر خاله وين رايحه
غمضت عيني بقوة .. وعصرت لولو بحضني اكثر .. كانت خالتي ام سميه .. وسميه هم وياه ..
درت وجهي عليهن بعدهن واكفات ..
ـ شنو السالفه خاله ماتردين تسلمين علينه ..
ابتسمت ابتسامه باردة .. بلكي يحسن ببرودتها ويعوفني بحالي
ـ لا خاله شلون حجي هذا صدوك جذب ..
تقدمت عليها وشفطت خدي شفط .. عبالك شافطه مو بوسه ..
وراها سميه .. سميه تختلف .. انيقه .. وكولشي بيها حلو ماعدا انها ضعيفه كولشـ..  وهذا الشي مضيع هوايه تفاصيل بيها .. بوستها رقيقه مانسمع ..
بعد السلام كعدنا كولنا ... امي بصفي وخالتي ام رافد بالجانب الثاني يعني بالنص وسميه وامها مقابيلنا ..
خالتي ام رافد كالت لي
ـ فدوة اروح لج خاله غاليه انطيني لولو روحي يسوي شي لخالتج وابنت خالتج
ردت خالتي ام سميه
ـ دعوفيها كاعدة دادة قابل احنا غرب اشو احنا   اهل البيت ..
كأنها تضرب بسمار .. "عود احنا اهل البيت وانتم خطار "
ماهتميت لها
وانطيت لولو لخالتي ورديت
ـ تدللين خاله ..
دخلت للمطبخ .. اشوف شسوي لهن .. بصراحه بيتنا اي واحد يجينا نسوي جاي .. واصلا ماعدنا غيرة .. للضيافه. 
وهذا السويته خليت القوري على النار .. وطلعت استكاين على عددنا .. حضرت الجاي وجبته ..
واسمع صوت خالتي
ـ صدوك تحجين رنا يعني رجل غاليه هد عليجن للبيت بالسلاح وانتن وحدجن بالبيت
ـ اي والله خيه ونعم الله على رضاب والولد لحكوا علينا وخلصونا جان مكتلنا كولنا هسه
ـ وليش ما خابرتوني شنو اني مو اختكم لو رضاب بس هي اختج رنا
ـ لا والله خيه بس بعد اجت رضاب ولكت ليش اقلق الناس كولها وياي
ـ وهسه شناويه تسوين
ردت عليها امي بحسرة مبينه
ـ منتظرة بلكي اهله يتصلون عليه ونحل السالفه
شهكت خالتي ام رافد
ـ شتكولين رنا شتحلين ولج الرجال هد عليجن للبيت ياحل تسولفين بيه فدوة اروح لج
امي كالت
ـ لعد شتردين اسوي اطلك بنتي من اول مشكله ونوب حضنها متروس مااكدر خيه
خالتي رضاب كانت تحجي عن لساني
ـ متأكدة اول مشكله رنا ترة بنتج مبينه متعذبه وشايفه الويل وياه ..
خالتي ام سميه ردتها
ـ والله اني وي خجي رنا بنتها لازم ترجع لرجلها .. وتتحمل مثل ماتحملنا احنا .. هاي انتي رضاب نستي ابو رافد شسوة بيج وشكد صبرتي عليه .. واني هم حالي من حالجن .. صبرت وتحملت ضيم من ابو سميه لمن الله هداها وعدله... الطلاك مو حل

ليش ...ليش المفروض المرة تتحمل كولشي واي اشي في سبيل تعيش .. في سبيل مايكولون عنها مطلقه .. حتى اطفالها مايتشتتون .. ليش المجتمع يحملها اكثر واكبر من طاقتها ...ليش تكسر ظهرها وتقهر كلبها و تألم روحها ..
ليش تصير شماعه منو يجي يعلق عليها مشاكله وهمه وضيمه ومفروض هي تسكت ماتحجي .. ماتتنفس ولا تشكي
امي تريد ترجعني ..
مرات اكول حقها تفكر هيج .. تخاف على خواتي لا تجيب لهم سالفه .. ويمكن ماتريد تتحمل مصاريفي ومصاريف بنتي وهي تعرف راغب عطال بطال .. يعني مراح تحصل منه لا حق ولا باطل ..
كنت متجيه على الحايط واسمع كلامهم ..
روحي مثل طير فرفح بين كلامهن وحجيهن ..
وحدة تشيل والثانيه تهدني للكاع ...
خالتي ام سميه ماسسكتت لا كملت وكالت
ـ رنا اني اشوف لو تجيبين البنات وتجين وياي لو تروحين لبيتج
هنا خالتي مااسكتت
ـ ليش بالله شبيه بيتي خيه
ـ خيه بيتج كل الخير بيه .. بس ولدج الله يستر عليهم كولهم شباب ومايصير تبقى رنا هي بناتها و ولد موجودين .. مايصير خيه .. الناس اذا ماحجت اليوم تحجي باجر .. اذا سالفها اطول تجي هي والبنات وياي احسن ..
ردتها امي
ـ ماكو داعي لهذة الحجي .. بنتي مردها لرجلها وبيتها واني هم اخذ بناتي ورجع لبيتي ..
خليتهن يحجن .. ورجعت بصينيه الجاي .. . كانت اديه ترجف والجاي يطلع خارج الستكاين ويسقط بالصينيه .. دفعت الصينيه على الكاونتر ...
ورجعت للغرفه .. احتنضن نفسي مثل الجنين داخل بطن امه .. تكومت على الجربايه واتمنى ارجع جنين بداخل رحم امي ..
شكد ننكسر بعد حتى يظهر الالمنا .. ويرتفع صوتنا .. وتبدي اهاتنا تريحنا ..
همس لروحي التايهه
ارجع "
ارجع "
جنت مثل واحد مخلي جمرة بيدة .. المها وحرقها فاق حدة ويريد يذبها .. بس اذا ذبها يحترك بيته واهله ..
وهو بين مر و شي امر منه
واختاريت مر .. اجرعه واسكت ..
...
بعد فترة من زمن دخلت امي شايله لولو
ـ وينج مو كالتلج خالتج سوي ضيافه لخالتج ام سميه وبنتها ..
ساكته .. ساكنه ..
ردت حجت
ـ غاليه. 
شلت عيني لها
ـ ترجعيني يوم .. ترجعيني له وانتي شفتيه بعينج شلون اجه نص الليالي يطوطح حتى مايكدر يصلب طوله
هدلت لولو منها .. وكعدت على الجربايه قريب من رجليه .. 
لولو تسللت من حضنها واجت تلعب عليه .. وهي تضحك .. وتكركر ..
وامي اصابع ايدها كامت تفرك برجلي .. 
ـ تدرين غاليه اول مااصرتي شكد ابوج فرح بيج .. طار طيور بيج والدنيا كلها ماوسعته ..
سماج غاليه .. وجان يكول هاي غاليه كلبي كولشي يهون ويصير لاجل عيونها... اشوفه شلون فرحان بيج وافرح وياه .. عكب ماا الله اخذ امانته .. رخصنا كلنا بهاي الدنيا مو بس انتي يا غاليه ابوج .. انه وانتي واخواتج .. سمعتي حجي خالتج .. اذا خالتج هيج تحجي لعد الغريب شيكول .. لا تبهذلينا يوم واحنا ماعايزين بهذله .. فكري بلولو .. بفكري بيه .. فكري بخواتج اذا ههنا عليج .. مااحسبتي حسابنا سوي التردينه ..
بهل الاثناء دخلت علينا سميه ..
ـ هاي شنو محتلين غرفه رافد .. خطيه عاد هو. مايعرف ينام بغير مكانه
كمت عدلت نفسي ..
امي كالت لها
ـ اي والله خطيه الولد مااقصر واصر غاليه نام هنا بغرفته
ـ ايووو تعلميني بيه خاله رافد شهم اكيد مااكدر يشوفكم بهيج موقف ويعوفكم. الا صدوك البنات وين.
طلعت امي وتركيني وي المعصعصه .. جنها صوندة يابسه ..
ضحكت بداخلي دهر دهرج هاجر .. كمنا كولنا نسميها المعصعصه ...
ـ البنات قبل كم يوم اسلمتوا شغلهم وكاموا يداومون ..
اسغربت وعلت ملامح التعجب عليها
ـ شغل .. شغليش هذا غاليه
ـ يا عزيزة العين والسلامه سهر اشتغلت وي رافد وياسر بالمطعم مالتهم .. جانوا محتاجين واحد يوكف لهم بفترة الريوك وعرضوا عليها الموضوع وقبلت .. اما هاجر .. اشتغلت وي ايهم
اشو هاي طلعت روحها من كلت هيج
ـ شنو .. شنوووو ... شنووووو هاجر وي ايهم
ـ اي شبيج شاغت روحج اسم الله
كام وجهها ينطي اللوان من العصبيه وتعضعض بشفتها من القهر
"صخام هاي شبيها "
ـ شبيج سميه .. صاير شي كلت شي غلط
حاولت تلملم نفسها وتكون طبيعيه
ـ لا ماكو شي .. من يمته يعني شغلت وي ايهم هاجر
ـ كم يوم مو هوايه
ـ واني ماادري
ـ ليش تدرين دادة انتي شركه بالشغل شنو! ?
ـ لا لا مااقصد .. هيج لا تهتمين .. .
ماكان لي خلك المناهد والحجي .. خلت وطلعت .. شويه دك موبايلي .. اصلا ناسيه عندي موبايل .. وقليل جدا استخدمه .. ضحكت على روحي .. قبل وين الموبايل ماينزل من اذني 24 ساعه سوالف وي راغب .. وبعد الخطوبه كمت حتى الليل مااانامه .. ليش هيج تغير .. معقوله الشي الكان بينا مو حب .. شنو لعد ..
يمكن هي هاي الفورة يكولون ويحجون عنها .. هو هذا البرود الي يصيب العلاقات الزوجيه والاجتماعين اختلفوا على حله وعلاجه ..
لو جنت قبلت برافد هم يصيبنا هذا الشي .. البرود ...
بس منو البارد بينا اني لو هو ..
ام راغب جانت المتصله ..
ام راغب وحتي ابو اناس طيبين .. عمرهم ماقصروا وياي ولا حتى على لولو وعدهم لولو اعز من الهوا لو مر عليهم ..
يشوفون ابنهم ومصايبه .. ويصبروني .. بس مليت والله مليت ... حتى الصبر مل مني وجزع ..
فتحت الخط واني انتهد
ـ الووو
واجاني صوتها منكسر
ـ الووو هلا خاله غاليه شلونج يمه
ـ الحمد لله خاله انتي شلونج عمي شلونه
ـ شلونه عمج بعد .. ليش هيج خاله قصرنا وياج احنا تأخذين بنيتنا وترحين وتدرين كلوبنا شلون ملهوفه عليها
وكامت تعتب عليه وتحجي واني ساكته ..
قاطعت حجيها
ـ خاله ابنج هد عليه اني وامي واخواتي بالمسدس .. وحجه حجي كدام الناس مايلبس عليه وثوب وفضحني .. وصخم وجهي وانه الصابرة عليه وعلى مصايبه يكول عليه ام الزلم
ـ اكطع لسانه خل يولي هذا واحد طايح حظه امسحيها بوجهي يمه
ـ واني شلي بواحد طايح حظه خاله اني اريد واحد يشيلني ويسندي اني وبنتي مو واحد اووف
ـ خاله غاليه اروح فدوة لهل وجهه هو حجه لنا كلشي واني وابوة وداعتج وداعه لولو غسلنا لج غسل و هو متندم ..وحتى اني وابوة وهو ويانه اجينا لبيتكم مالكيناكم يريد يتعذر ويطيح على راس امج
احس روحي من هسه اختنكت .. مثل جيثوم وركب علي صدري .. لعد شلون اذا رجعت له
ـ احنا بيت خالتي خاله ..
ـ  اها لعد دزي العنوان برساله حتى نجيكم والله يصلح الحال ..
سديته منها واني اتمنى اكلها .. لا .. ماكو شي يصلح الحال ..
ماكو شي ممكن يشفي الكلب ويطيب العله ..
ويلم الجرح .. ونرجع مثل اول واحسن ..
بس حجي امي رن بذاني ..
كلنا رخصنا بعد ابونا ..
وغاليه رخصت .. هوايه ..
مابينا لحجي الناس القرب قبل الغرب .. وجودنا هنا مو مصلحتنا ابد ..
دزيت العنوان برساله وبداخلي رافضه .. مامقتنعه ..
.....

ايهم
"تعرفين احبج مو "
ضحكه مايعه تخلت كلبي يرف مثل الطير عليها
"ادري تموت عليه مو بس تحبني "
ايدها تلعب بدكمه القميص سلبت لب عقله ..
"لعد شكو سميه خليني اخطبج .. مو طولت سالفتنا كولش .. وانتي تعرفين سوالف التعارف ونعيش قصه حب وعشق ماتفيد وياي .. شنو قابل احنا غربه ولج انتي بنت خالتي وربيتي وياي اكو شي ماتعرفينه "
عافت ايدها دكمه القميص .. وخلت ايدها على خدي
ـ شكد احب لحيتك .. تدري
هذا الحبيته بسميه جرئتها وهي تعبر عن مشاعرها تجاهي .. اعتبرتها صراحه ..
مرات ابررها لصغر عمرها ..
ـ سميه باجر جايب امي واخواني واجي اخطبج .. كافي عاد
لمسه شفايفها على خدي .. شدهتني
ـ كيفك .. انتظرك
وطلعت من الباب الدخلت منه ..
ماادري ليش الذكرى طرقت بابي ... ضحكت على نفسي ..
"ليش انته نسيت ايهم .. نسيت سميه شسوت بيك "
غمضت عيوني واني افتر بكرسي .. وصور تجي ببالي ..
مرة سميه, ,,
مرة هاجر ..
هاجر  تشبه سميه .. صهباء .. الصدف غريبه عجيبه .. لبش كل الصدف الي تصير وياي .. يكون بيها الشعر الاحمر والبشرة البيضاء المحمرة لهن دور ..
هل هو الحظ مااعرف ...
شكد جنت غبي خليت وحدة مثل سميه تلعب عليه ..
توهمني بالحب .. تستغل اعجابي بيها .. وخلتني اخطبها وهي على علاقه بواحد غيري ..
شلون كدرت تتلون وتتغير وتضحك عليه وتقنعني ان هي تحبني... وبتصرفاتها ملكت كلبي
ولا مرة شكيت بيها لو لا الصدفه .. الخلتني اكتشف هذا الشي .. 
كتشفت هي عمرها ماحبتني .. وانما كان هوس الامتلاك يمشيها ... تريد تمتلك كلشي تشوفه حتى لو كان الشي بشر بدم ولحم ..
.........
شنو الي يخلي الانسان يقبل بكولشي رغم احساسه بالذل ..
هاجر قبلت بالوظيفه رغم كل شروطي
كمت من مكاني قاصد المكتب التشتغل بيه .. اختاريت لها قسم الارشيف .. ابعد قسم عن مكتبي .. مااريد .. اشوفها او اصادف وياها بالطالعه والنازله .. اردت اخليها بعيدة عني .. اريد ابعد الخصلات الحمراء عني .. لان الافكار تتزاحم بداخلي تخليني اخاف عليها مني ..
وكفت شويه حتى اتأكد ..

تضحك ... وصوت ضحكتها رن بأذني .. اسبوع وهي مشي على قوانيني .. وشروطي ..
ماكو لبس ضيك ..
ماكو لبس قصير
وتهتم بشغلها وبس ..
وتسنه ايهم تماما بالشغل .. ويكون التعامل رسمي بيناتنا ..
ماكو تسولف وتعارف وروح وتعال .. وعليها بنفسها وبس
واهم مااريد احد يعرف هي بنت خالتي .. كلهن قبلت بيهن .. وادري بيها على اعصابها قبلت بالاخير وحست بالاهانه .. يمكن فكرت اني استعر من عدها ..

لكن اني لي اسبابي ..
اولها اخاف احد يستغلها ويستغل قرابتها مني ..
مريت على المكتب مالتهم كالعادة .. اختاريت لها قسم الارشيف ..
لان اعرف اسهل قسم ممكن تبدي بيه ..
مابيه موظفين هوايه ..
رئيس القسم وواثنين موظفين
اول واحد منتظر .. كبير بالعمر ومتزوج.  
والثاني .. شهد بنيه حبابه ومؤدبه وماعليها شي ..
صوت ضحكتها بعدة يرن بأذني .. وصلت للباب المكتب .. شفتهم متجمعين على مكتب شهد وكاعدين يأكلون ..
ـ كون يدري مديرنا دا نأكل باجه وبصل بالمكتب .. اويلي .. اويلي غير يعلكنا بقسم الارشيف وخلينا عبرة لمن اعتبر ..
تحجي وتضحك .. سكنت الاصوات الا صوتها .. عضت البصله .. وبيدها الثانيه لازمه عضم تمص بيه ..
شهد اول ماشافتني .. وكفت كامت تبلعم ..
وراها منتظر بس مااوكف .. ضل يباوع عليها ويحرك بعيونه بكلي تنتبه له ..
رفعت راسها
ـ شبيكم بطلتوا تأكلون ..
منتظر اشر لها بعيونها .. لورة ..
دارت وجهها عليه شويه .. شويه ..
درت وجهي عليه واني ادعي ربي مااريد اشوفه .. لا يارب الا هذا الموقف .. البصله بيدي وايدي الثانيه بيها عض امص بيه وحالتي حاله يرثى لها ..
اول مااشفته وكفت .. واني على حالي ..
ـ تغسلين ايدج وتجين لمكتبي .. وحاولي تخلين عطر او شي يضيع الريحه لان مراح اكدر اشمها واني احجي وياي ..
وطلع ..
درت وجهي عليهم واني ممصدكه
ـ الي صار هسه صدوك لو كابوس .. استاذ ايهم جان هنا وشافني واني اكل باجه
شهد هزت راسها وصدمه بعدها بيها
ـ وازيدج من الشعر بيت .. يريدج بمكتبه ..
كعدت منهارة على الكرسي ..
شنو يعني راح يطردني .. علمود الباجه ..
الله ياخذج يهاجر على هل مصيبه .. ولج باجه! ?
ادري وين راح ضمير الانثى داخلي .. شلون عفته يأنبني الى ان وكعت بين ادين الاسد ..
واني دايسه بالباجه ..
شهد ندستني بيدها بكتفي
ـ ولج هاجر كومي .. لا يرجع علينا والله تصير فضيحتنا مايلبس عليها ثوب
استاذ منتظر كام
ـ هاجر شبيج خايفه .. اني اروح وياج قابل شيريد يسوي ..
كمت من مكاني ورحت اغسل اديه .. ووجهي .. عدلت هندامي .. طلعت من الحمام ..
طلعت عطر من جنطتي ورشيت على ملابسي واديه .. وردت اطلع وكفني منتظر
ـ وكفي هاجر اني اجي وياج
ـ ميحتاج استاذ منتظر اني اعرف شلون ادبر نفسي
ـ لج بنتي خليني اروح وياج على اقل اني اعرفه وعندي سابق تعامل وياه ومعرفه .. انتي بعدج جديدة ماتعرفيه
رحت ناحيه الباب واني احجي
ـ تسلم استاذ ميحتاج والله انته كولتها قبل .. قابل شيريد يسوي .. يالله باي
امشي وكل قسم اعبرة .. احس كلبي تزيد دكاته ..
وصلت للباب مكتبه وكانت كاعدة السكرتيرة ..
ـ هاجر مو
هزيت راسي بصمت ..
ـ تفضلي الاستاذ منتظرج
هلا .. هلا .. منتظرني .. اجاك الموت ياتارك الصلاه .. هسه اني شلي بالباجه الله يسامحج يا شهد اكو واحد يجيب باجه على الريوك ووين للداوم.   ونوب وكعت براسي...
دكيت الباب علي كيف .. بلكي ميسمعني .. بس وين الظاهر مخلي اذنه للباب ..
ـ تفضلي.  
دخلت الاوراق مطشرة كدامه .. وقلمه بيدة يطرق بيه على سطح المكتب ..
واني واكفه كدامه مثل طالبه ابتدائيه مذنبه ..
ـ شنو هذا الشفته هاجر
بلعت ريقي بلكوة ..
ـ شنو استاذ
ـ باجه .. !? بصل .. وتمصين بالعظم خبله انتي .. لا ونوب صوتج يرن رن بالقسم شنو هل ضحكه التافهه
ـ شهد جابت واني شاركتهم مكدرت ارفض .. اما ضحكتي .. مااعتقد شرطت عليه اغير ضحكتي هم .. هذا شي خاص بيه
ـ شرطت عليج منتضحكين اصلا .. شنو بهل سرعه نسيتي ..
ضرب على مكتبه بقوة وهو يحجي
رديت عليه ارجف
ـ ترة اني مو صنم حتي مااضحك بشر اني حالي من حال الناس ..
ضرب سطح المكتب مرة ثانيه بيدة وصاح
ـ لعد ليش قبلتي بالشروط اذا مااكدرين الا تضحكين.  
فنجان قهوة موجودة وي ضربه ايدة وصياحه .. انسكبت على قميصه .. الابيض .. مااعرف سر لبسه للابيض من القمصان
وتحول الابيض الى قهوائي .. شال راسه لي وعيونه بكصته ..
ايااا .. اني شعليه .. هو ذبه على نفسه
ـ هاي ثاني مرة تسويها
صحت بنفس نبرة صوته ..
ـ شمسويه انته ذبيته على نفسك ..
كام ينكث بالقميص ..
ـ اسمعي هاجر اذا تردين تكملين بهاي الوظيفه .. تحترمين الشروط البينا .. ماشي ..
ويكون بعلمج راتب هذا الشهر ماكو

شنو تخبل هذا .. كله علمود شافني اكل باجه واضحك .. لعد شكد مغرور وشايف نفسه على الناس
ـ ليش ان شاء كله هذا لان شفتني اضحك واكل ترة كم دقيقه مراح تخسر شركتك استاذ ايهم
شال وجهه لي واصابع ايدة بعدها تحاول تبعد قطرات الكهوة .. ويحجي ببرود
ـ منو كال هذا السبب
علئ صوتي غصبا عني
ـ لعد شنو السبب مممكن اعرف اذا مااصير زحمه
اخذ القلم مرة ثانيه وكام يضرب بيه على المكتب ..  بعدين اشر على قميصه
ـ هذا السبب لو ماتشوفينه
رفعت حواجبي مممصدكه ..
ـ قطعت راتبي الي ممستلمته لحد لان و راح اشتغل شهر كامل بدون راتب علمود قميص
استرخى على الكرسي مالته .. ويدور بيه منا .. منا
ـ اي قمصاني الحرير الخربتيهن واحد ورة الثاني عبالك متقصدتهن .. اول واحد بالعرس تذكرينه .. ترة خرب وبعد ميلبس وهذا الثاني وهم خرب بسسبج... وانتي اصلا راتبج مايكفي اشتري واحد منهن مو اثنينهن ...
ـ متكدر تسوي هيج
عيونه قست وكأنه مايشوفني كأنه يشوف وحدة ثانيه مو اني

ـ واكدر اسوي اكثر من هيج .. شعبالج انتي تخربين وتمشين .. لا هنا لكولشي حساب.  
ـ مااصدك تكطع راتب شهر كامل لانسان يشتغل شهر كامل علمود قميص
ـ هذا العندي
عاندت .. وتحديته
ـ ماشي لعد انطينياهن واني اغسلهن .. ارجعهن احسن من قبل ..
الابتسامه البوجهه اختفت نزل راسه وهو يحجي
ـ مراح يفيد بيهن هاجر استسلمي ورضي بالامر والواقع .. مااعتقد راتب شهر يأثر عليج ..
ـ مراح اخلي راتبي ينقطع بعد شهر من تعب بسبب قميص
ـ تمام لعد من ارجع انيجياهن ..
...

رجعت للمكتب واني متخبله ..
راسي احسه ثكل من العصبيه ..
ليش مااعرفت تعامل وياه .. احسيت نفسي ضايعه واني احجي وياه ..
طول عمري واني اعرف تعامل وي هيج مواقف ..
شبيه كنت صافنه بيه .. صافنه علي تفاصيله .. اصابعه وهي تنكث القميص .. ايدة وهي تنقر علي سطح المكتب بالقلم .. معقوله ..
رجعت كعدت بمكاني .. وبعدني رجف .. مااعرف من شنو ..
جت عليه شهد .. واسناذ منتظر وراها
ـ اها هاجر شسوة لج شحجه وياج طردج
انتبهت لصوت شهد القلقان عليه
ـ ماكو شي شهد الحمد لله مشت الامور تمام ..
ـ صدوك والله طيب الحمدلله لعد ليش ضايجه ..
...
بالليل مااصدك .. سواها ..
دك عليه الباب بعد ماارجعت من الشغل وانطاني القميص .. تلمست .. قماشه الحرير الناعم .. يعني فعلا سواها ..
يريدني اغسل قميصه وارجعه مثل قبل ماكو يأخذ راتب شهر حتى يشتري بيه قميص .. باوعت للغرفه داير مدايري .. ليش هو محتاج راتبي حتى يشتري بيه قميص .. لعد شكد حظج عاثر يهاجر .. كل هاي الفلوس النعمه .. وهو عينه على راتبج .. لعد شكد عينه ضيكه ..
دخلت عليه سهر والقميص بعدة بيدي .. بس بالها مو يمي ..
ـ كومي ولج مااشفتي خالتج بنتها هنا .. وتذب سم مو حجي علينا ..
ذبيت القميص يمي .. وتمددت علي الجربايه
ـ شفتها .. اووف شكد اكرهها لج غثيثه هي وابن خالتج يتشابهون نفس الصفات اعوذ بالله

تكمله البارت الخامــس
تمددت هي يمي ..
ـ اي والله غثيث فلا ينجرع ..
كملت
ـ ولج هيج بشر مااشايفه الناس تضحك وتنصنف .. وهو عبالك صنم .. لا والله الصنم احسن منه هم من تهزة ينهز الا هذا جبل صامد ماتهزة ريح
ـ ولج ونوب حصرة عليج تضحكين .. غير تصير مو ضحكه زقوم
شلت راسي لها مستغربه ..
ـ انتي عن منو تحجين ..
رجعت السؤال عليه
ـ انتي لي عن منو تحجين! ?
ـ عن الغثه ايهم ..
ـ اياااا واني عبالي ياسر ..
ضحكنا
ـ يلا همه نفس الصنف ..
سحبتني سهر من ايدي
ـ دكومي ولج .. الناس كولها ملتمه ..
كمت وطلعت وي سهر .. الظاهر خالتي اليوم داكه ثبات بالبيت .. جايه من الصبح من شايفه امي وغاليه وعارفه السالفه .. ظلت هنا .. وعيونها مبككات علينا .. حتى لا تغدينا ولا تهنينا بلكمه ..
شافتني
ـ شنو السالفه خاله هاجر .. اشو لا شفانج لا كعدتي ويانه ..
كانت تسفت بالجاي سفت وتطلع صوت .. مثل صوت شفطه العصير لمن يخلص ..
كعدت بجانب امي
ـ والله خاله تعبانه كولش تعرفين بعد شغل وتعب
شفطت لها شفطه وكالت ..
ـ اي صدوك الشغل تعب وانتن متعودات تأكلن ومشن اديجن بالحايط وامجن محتارة بيجن
فتحت عيوني متعجبه .. شبيها هاي .. صدوك تحجي ..
امي كالت
ـ شنو هل حجي ام سميه ترة البنات مامقصرات .. يدورن شغل مااخلن دائرة مادكن بابها
ـ ديلا عيني قابل شكلت .. كلج رنا ادري همه يمته كالولج يجون
ـ فد شويه
ضليت مثل الاطرش بالزفه .. درت وجههي لسهر ..
وشاورتها
ـ منو اليجي سهر ..
سهر بطبيعتها .. اذا صار شي يضوج .. او شي يخص وحدة منه .. ينكسر خاطرها بسرعه ويبين على وجهها
رد ت عليه بنفس الهمسه .. بس مكسورة مقهورة
ـ اهل راغب ماما تريد ترجع غاليه
شهكت بصوت عالي واني ادور وجهي لامي
ـ شنوووو
سألت امي
ـ ماما صدوك ... اهل راغب راح يجون وترجعين غاليه وياهم
ردت خالتي عليه بعد مااخلت استكان الجاي علي طاوله كدامها
ـ لعد شتردن يومه .. تتطلك وترجعن عليها خمسه تعلف عليجن مو كافي عليها اختجن الخبله .. يمنى كانت لازمه دشداشه امي وكاعدة يمها
لا .. كافي عاد .. بدت تتعدى حدودها ..
كمت علي حيلي ..
ـ وانتي شعليج ماكلينج من جيسج .. هاا شكو هاده علينا وعايفه بيتج وكاعدة هنا ..
دخلت علينا خالتي رضاب ..
ـ شكو شبيجن
خالتي ام سميه مافوتتها
ـ تعالي اسمعي بنت اختج شتحجي وشلون تطرد بيه
باوعت على امي الساكته .. وخالتي رضاب الي تريد تفهم مني
ـ خاله امي تريد ترجع غاليه لهذا الذل هد علينا للبيت وراد يكتلنا هاي وهي عدنا لعد اذا وحدها شسوي بيها
ـ والله يااخاله هاي كدامج امج شكد حجيت وياها ماافاد ..
امي كعدت ومخليه اديها علي راسها
كعدت بالكاع كدامها .. وخليت اديه على رجليها
ـ ماما فدوة اترجاج لا ترجعينها له .. غاليه منهارة وممكن رجعتها له تكتلها خلاص
ردت عليه امي
ـ اختج عدها بنيه راح تتبهذل هاجر .. ولج ماما اني ماادايمه لجن والناس ماترحم
شاغت روحي .. من سمعت حجي امي .. اريد اموت ..
صحت
ـ ماما احنا لها .. اني وسهر شتغلنا .. ونكدر نساعدها ..
بس خالتي كسرت بكلامي
ـ باجر تزوجن وكل وحدة يصير لها بيتها و رجلها هي وين تروح .. لا تكسرين اختج وخليها ترجع لرجلها
طلعت شايطه للحديقه اريد اشم الهوا .. ايدي على خاصرتي .. واشهك مثل واحد مكطوع نفسه ..
وصوت ثاني خلاني اقطع النفس تماما .. صوته
ـ شسوين هنا
للحظه حسيته يحجي وياي لولا صوت ثاني رد عليه
ـ اجيت اشوفك ..
كان صوت سميه .. كانوا بالجانب الثاني من الحديقه .. ظلام لليل خلاني اشوف .. لان كانوا واكفين بجانب الضوة .. تقربت واني اسمع حجيهم .. يمكن فضول .. يمكن شي ثاني مااعرفه يدفعني بقوة لهم حتي اسمع كلامهم ومااضيع ولا كلمه
تقربت اكثر وشفتهم واحد واكف كدام الثاني ..
ـ ششوفين ماكفاج السويته سميه
ترجته وعيونها تبجي دمع
ـ انسه فدوة ايهم .. انسه والله مااجنت واعيه .. جنت وحدة طايشه ماخذة الدنيا بحيلها .. ماكنت اعرف قيمتك لا قيمه حبك
ضحك ضحه استهزاء
ـ انسه ...انسه شلون خنتيني وي موظف وياي .. وانتي خطيبتي على ذمتي ..
شهكت ...مصدومه ...وخليت ايدي علي حلكي اخاف يطلع صوتي
ـ والله هو غواني .. كام يمشي وراي .. ويذب حجي الغزل و مااعرف شلون حصل علي رقمي وكام يرسل لي ويتصل عليه .. نصب عليه اخذ فلوسي وفلوس اخذتها من بابا وشرد.   فدوة ايهم والله اني احبك
دفعها عنه ..
ـ لا انتي ماتحبيني سميه .. لا ماكو وحدة تحب تخون وتتمعشك وتالي ترجع وتكول سامحني ..سمعيني زين مااريد اشوفج مرة ثانيه .. لان والله العظيم تشوفين شي مااشفتيه بحياتج .. انتي بالنسبه لي صفحه ونطوت بحياتي
وعافها وراح ..
..
سميه كانت خطيبه ايهم .. وخاينته ..
يارب دخيلك ..
....
غــاليـــه ..
جنت كاعدة الم بملابس لولو وملابسي .. وخليهن بالجنطه ..
ولولو تلعب يمي ..
اسبوع .. ورافد يتهرب من البيت .. ماايجي الا قليل بعد اخر شي صار بيناتنا .. اسبوع واني مااشايفته .. ولا اعرف اخبارة .. اشوف اثارة بالبيت .. حذائه .. صوته وهو يحجي ..
ضحكته .. بس ابدا مااشفته ..
واني هم ماافكر بيه .. بالي مو يمه .. مااشوفه الا فرصه حلوة ضاعت مني .. اندكت الباب ودخلت سهر .. اعرفهن مكسورات عليه .. ادري بيهن مقهورات ..
كعدت يمي ..
وايدها اخذت ايدي اطبطب عليها
سألتها
ـ اجو ..
هزت راسها
ـ اجو بس هو مو ياهم ..
تاهت عيوني لبعيد .. يعني عمي وخالتي جايين غصبا عليه .. اعرفهم .. وراح يلكون حجه له وسبب غيابه .. مو جديدة
ـ غاليه لا ترجعين .. الله يخليج انتي مو مجبورة ترة واذا قبل خايفه علي حالتنا الماديه .. صدكيني راح تختلف اني شغلت و هاجر وهم .. وانتي اكيد اذا دورتي راح تلكين انتي خريجه ...
ـ امي تريدني ارجع .. اكسر بيها .. مو كافي من كسرت بيها ورفضت ابن اختها
اخذت لولو .. وطلعت .. لعمي وخالتي .. لكيتهم كاعدين... خالتي وامي وخالتي رضاب كاعدات ووياهم ايهم ورافد .. اول مااشفته اجت عيني بعينه .. نزل راسه ويهز برجله بعصبيه ..
شسوي اذا مااكنت اشوفك غير اخ ستند عليه .. اظهر احتمي بيه ..
ـ السلام عليكم ..
خالتي اول مااشافتني
كامت وعمي ضحك
ـ هلا يابه هلا بغاليتنا .. تعالي يابه تعالي ..
اجيت عليه .. باسني براسي .. واخذ مني لولو الي كامت تشمر بيدها اثنينهن على جدها
وخالتي حضنتني وباستني بخدي ..
وكعدتني يمها ..
ـ شلونج ام ملاك ..
اسألني حالي ويمكن تعمد يسميني بأسم بنتي ..
جاوبته
ـ زينه عمي الحمد لله ..
حجه عمي ..
ـ ياجماعه احنا اليوم جايين نتعذر منكم ومن ام غاليه وحقها على راسنا ابنا غلطان من راسه لساسه ...وهو جان ناوي يجي بس مريض وماعلى المريض حرج يا ام غاليه شتكولين
ـ ونعم منك ابو راغب .. بس ابنك سوة عمله ماتنحجي هد عليه اني والبنات ولو ما ولد اختي جان اني والبنات الله اعلم بحالنا
خالتي كالت
ـ خيه ام غاليه راغب مثل وليدج وهو غلطان .. ومنج السماح وان شاء الله ماتتكرر .. وغاليه بنيتنا و ام ابنيتنا .. ونريدها ترجع لبيتنا ..
كام رافد ..
ـ عمي من رخصتكم .. مالكم مرة يمنا .. شنو انتم مااخذين فصليه .. هاد عليها بالمسدس ويسب ويغلط و يصيح عليمن وشنو السبب .. عمي ابنكم يطلك بتنا وكلمن بطريقه ..
جنت ساكته بيناتهم ... موقف رافد .. رفع راسي .. خلاني احس عندي احد ارجع له .. وسند عليه روحي .. بس خالتي طبعا مااعجبها الحجي
ـ على كيفك خاله رافد مو هيج الحجي .. وماادام الحجي اجه واستسمح من غاليه وامها مانردها خايب ان شاء الله . 
دار وجهه عليه .. يمكن رادني اسنده .. اكول .. اي .. مااريدة .. خليه يطلكني .. مااكدر اعيش وياه ..
كلها كلمات وكفت بزردومي .. مثل العظم .. لا اكدر ابلعها ولا اكدر .. اطلعها ..
امي تريدني ارجع .. مااهاويه اطلك .. ورجع لها ببنيه ..
خالتي رادت تخلص الموضوع بسرعه
ـ يلا غاليه يلا بنيتي كومي ارجعي وي خالتج وعمج ..
كمت مثل الميته ..
واني امني نفسي .. فرصه ثانيه مراح تخسر احد. لا راغب ولا اني ..
فرصه ثانيه لحياتنا وبنتنا .. لعل وعسى ينصلح الحال .. يمكن اصرار امي اشارة من القدر
انطي فرصه ثانيه لنفسي وياه ..
كنت اقنع روحي ولملم بالملابس الما كملت لمها ..
ـ غاليــه ..
يتبـــــع
..