رواية احبك .... وانت الفصل السادس عشر 16 - بقلم وردة عمري

البارت الخامس عشر
بقلـــم وردة عمري
قبل الخطوبه بأيام ...
هاجــر ـ ايهم ..
اتنفست حيل واني اطلع من بيت هيفاء .. شفت سيارة جوارينه الي اجرتها اامي لي واكفه شويه بعيد مشيت لها ..  الحمد لله اجه والا شلون ارجع .. تذكرت نظرات اخو هيفاء الي وشكد لح عليه حتى يوصلني واني رفضت ..
ركبت بالسيارة ..
جيرانه رجال جبير .. متعود علينا اي طلعه امي تأجرة لنا تكول احسن من الغريب سألني ..
ـ اها يابه شلونه العرس ..
ـ عمو مجان عرس خطـ
انقطعت الكلمات عبالك لساني واحد لزمه وسكته .. لمن شفت سيارة ايهم واكفه بعيد .. كلبي رجف .. من الخوف
...
جريت نفس مرتاح لمن شفتها تركب سيارة جيرانها .. وشفته بعيني صدك رجال جبير ..
يعني جانت صادقه وماجذبت عليه ..
بس عذا ماينفي خلصت يوم كامل وهي وهذا نمير مدري منير ..
مشيت بسيارتي بسرعه وحس راسي حيطك من التفكير ..
شريد منها اني .. لازم على الاقل الزم عصابي حتى مااخوفها مني
محتاج ابعد ... اي هاجر كامت تأثر عليه كثر من الازم
صار متلكها هوس مو هدف
ضغطت على البنزين و سرعت حيل ..  وانطلقت بين الشوراع بلكي تهدا ناري
....
هاجر ..
دخلت الصبح للمكتب .. صبحت عليه ورد عليه بهدوء .. وباوع عليه من جوة لجوة ..
امس شفته بالكافتيرا .. تخيلت راح تجاهلني .. وكأنه ماشايفني .. بس هذا مصار .. لا تقرتب وسلم علينا واني وباسل وشهد كاعدين .. وكام يباوع عليه من بعيد من الطاوله الي كاعد عليها بشكل ملفت .. لدرجه شهد ضاجت كولش كامت تهمس بأذني ..
ـ لج هذا شيريد منج ما تكوليلي .. هسه لو من هذوله لي يصاحبون البنات ويأخذون المقسوم منهن ويذبوهن اكول بيها مجال .. بس هو محترم وي المحترمات وبنات الناسـ... لعد شبيه وياج تسودن يحظي العوج
اني كتفيت بالصمت ....شحجي وشكول واني اصلا مافاهمه شي .. هذي السوالف ماكامت تلهيني ولا تسد خوفي ..
الي صار يوم الخميس بعدة مأثر عليه .. بعدها الرهبه والخوفه بيه .. كولشي بداخلي تشوش ... عقلي .. كلبي .. حبي له تشوش مو بذاك الوضوح الاولي
صوته طلعني من الي اني بيه
ـ هاجر
ـ نعم استاذ ايهم
احس نفسي ادور بحلقه مفرغه اولها هو واخرها هو ..

سكت شويه ..
ـ بيوم الخميس جنت بحاله خاصه ..
وجهي وحدة صار احمر بدون مااعرف ليش ..
ـ اي
ـ جنت اريد جنون من نوع معين حتئ يخلصني من جنون من نوع مدمر
ـ مفتهمت عليك
نزل راسه مبتسم ..
ـ يوم الخمس خوفج مو بالله? 
مارديت .. شلون ارد واني اكافع حتى اتنفس .. بعدة ميواجهني .. عينيه مااحطها بعيني ..

ـ هاجر اني صرتي جزء من عالمي ... وتلنتمين له .. وبذاك اليوم احتاجيت هذا الجزء حتى افرغ الانفجار بداخلي ..
واخيرا رفع راسه ابتسم ابتسامه ضميتها بكلبي من حلاوتها ..
ـ مجان يحق لي اسوي هيج وياج ...اني اعتذر عصفورة ..
رمشت بعيني ...مرة .. مرتين اريد استوعب ..
ـ عادي مصار شي
ـ يعني بعدنا اصدقاء ..
ـ اكيد بعدنا اصدقاء هو اني اكدر ارفض حتى تنفخني نفخه وحدة . اطلعني خارج الشركه مالتك

حواجبه رفعهن مستغرب ..
ـ انفخج ..
وبعدين افجر بالضحك عبالك عمرة كوله مضاحك .. عيونه يدمعهن .. مااكدر اسوي شي
شسويزعيوني تلاحك كل حركه منه ...وهسه يرجف كدامه مثل رجفه جسمه وهو يضحك
...
بعـــد ايـــام
جنت اشيل عيوني اباوع عليه ورجعهن للحاسبه ..واني كلشي ماشوف منها ..
افتح حلكي اريد احجي ...بس ارجع واسدة .. شجاعني تخوني و ضعفني يتملكني كدامه ..
هو السبب
تعامله الغريب ويايه هو السبب
بين ليله ويوم خله الف حاجز وحاجز بينها وبينه ...حواجز ضبابيه تايهه بيها وماكو اي طريق حتى اشوفه ..
احس .. شلون يركض بدون ماايحسسني او يخليني اشعر بهذا الشي .. يركض وراي اخاف اضيع او افلت منه ..
ورجعت افكر ....وافكر ..
باوعت عليه ..
ـاوووف امداج ومدا قسمتج المعطبه .. وين راحت شجاعتج ولسانج المبشط كلهن طارن يحظي
لملمت شفتي واشوفه مشغول .. وباله ابد مو يمي
مرة على الحاسبه مالته ...مرة بين الملفات والاوراق .. مرة الموبايل
هملني فد مرة. .. بس بطريقه تخلي الحزن يدب .. يدب بداخلي بس
حزن علمودة .. ليش احسه وحيد .. منعزل .. منطوي على نفسه .. شكول عليج سميه .. شسويتي بالولد وحاله ...احسه ماعندة غيري يلزم بيه وفجاة هدني ..
معقوله دا اخدع بنفسي ...لو هي هاي الحقيقه ...فعلا هو وحيد ومنعزل ..
ماادري شلون طلع الحجي من حلكي
ـ باجر عرس شهد وباسل ..
مااشال راسه من حاسبته وهو يجاوبني
ـ اعرف يستاهلون الله يسعدهم
ـ كالت نسوي عرس مختصر ..
ماكو اي ردة فعل .. عبالك ميسمعني اصلا ..
ـ افكر مااروح .. يعني اشوف وجودي ماله داعي ..
هم مااجاوب ولا كأن اكو بني ادم يسولف وياه والي زاد الطين بله لمن كال
ـ امممممم
شنو يعني .. ميسمعني اصلا ..
بضغط على الحاكيه وحجه وي ست وداد ..
ـ ست وداد لازم اطلع حالا عندي شغل مهم بالبلديه .. اريد منج تأجلين اجتماع مدراء الفروع لغير وقت ..
جاوبته ست وداد
ـ حاضر استاذ ايهم ..
مرت الايام بسرعه ..
ايهم
وست وداد .. خلصت ايامها ويانه .. ممصدكه اجه موعد الوادع بينا وبينها .. انسانه طيبه حنونه ويانه كولنا ومشفنا منها شي مو طيب .. صح نظراتها مرات لي اتضايقني بس بشكل عام هي زينه ..
جنت واكفه بيناتهم .. وهو يودعها .. مدت ايدها تسلم عليه .. صافحها خلت ايدها الثانيه فوك ايدة
ـ بني والله جنت محظوظه لان اشتغلت عندك الله يوفقك ان شاء الله
انبح صوته بجوابه .. حسيت عبالك يبجي من الداخل
ـ واني ممحظوظ لان انسانه طيبه مثلج قررت تفاركنا
وكمل
ـ خاصه بهل وكت ..
ـ انته انسان طيب استاذ ايهم .. كبرت نفسك بنفسك ...وسويت لك اسم ومركز .. حياتك مو سهله مثل ميتصورها بعض الناس بس انته كدرت تتعامل وياها ..
سحب ايدها من بين اديها ..
وباوع عليه .. اشر لي بأن اطلع ..
غامت روحي .. حسيت ست وداد اقرب من اي احد له حتى من امه واخوانه ..
ايهم ..
خليت ايدي بجيبي ..
ـ يمكن طريقتي خلتني افقد شي من انسانيتي ..
همست
ـ هاجر ..
ـ شبيها
ـ خوش بنيه
ـ اني خوش رجال وهي خوش بنيه تخططين لشي ست وداد ..
ـ اني مااعرف لي صار بينك وبين سميه بس
رفعت راسي لها سكتت
ـ اسفه اذا اطفلت على حياتك ..
ـ واذا عرفتي شراح يصير .. وشراح يتغير
ـ استاذ ايهم انته انسان شجاع .. قاوم .. لا تخلي الشر والظلام يملي روحك وعقلك .. اني اعرف انته تتوجع ولسبب معين .. لو ماانت كد هذا الالم مااصابك يابني لا يكلف الله نفسا الا وسعها
تشنج جل جسمي واني اسمع حجي ست وداد لهل درجه اني مبين عليه الالم .. والتغيير الي صار بيه بعد سميه ..
طلعت ست وداد .. وتركتني بحيرة ونار تستعر بداخلي ماادري شنو اليطفيها
....
هاجر ..
بعدني بحيرة من ودعتنا ست وداد لليوم .. اصرت نكعد اني وياها .. بمكان معين ونسولف ويكون خارج الشركه ..
شربت العصير مالتي واني اباوع عليها .. اختارينا كافتريا خارج الشركه بس قريبه منها ..
القلق اكل كلبي .. اكل شتريد مني .. كل ماتشيل كلاص العصير تشرب منه .. اسوي مثلها. 
حجيت وي روحي
" عساس انتي متنامين وتكعدين على هذا القلق! ? ولا عبالك حياتج انكلبت لسجه بين القلق والخوف "
رعب وقلق عايشه بيه صار لي اسابيع .. ايهم ماادري شبيه .. مبتعد عني .. وبعدة قالقني اكثر
شكد اتمنى لو اكدر اعوف الشغل وارجع الامنيتي الاولى اصير صحفيه او علاميه بس بكل مرة احسه مراح يكدر يحمل فراكي .. واتراجع
يمكن اني مخبله بس اني هيج احسه .. هيج احساسي يكول لي ..
من اليوم الي اعتذر الي هو تغيير بشكل مربك ويخوف ..
كام ميضوجني مثل قبل .. ماايحجي وياي ولا يدخل بيه .. ولا يذب كم كلمه حلوة يسقي بيها كلبي الذايب بحبه ..
حتى كام مايباوع عليه او يتصفن مثل قبل .. حتى عيونه اشتاكيت لها .. اشتاكيت لضحكته الي تطلع من كلبه
ورغم كل هذا البعد هو مصر يبقيني قريبه منه .. مايخليني اغيب عن عيونه ..
جفلت واني اسمع صوت ست وداد
ـ هاجر اني اريد احجي وياج بموضوع شخصني واتمنى ما تضوجين من تتدخلي ..
بلعت ريكي بلكوة
ـ احجي ست وداد انتي بعمر والدتي وانتي انسانه طيبه ماشفت منج شي مو زين
غلست مااكلت لها شكد كرهت السكرتيرة الي راح تجي بمكانها ...وحدة فد انفه وشايفه نفسها شوفه .. على شنو مااعرف .. ومغرورة .. بيوم الي عرفتني عليها ست وداد حتي ماارفعت راسها وباوعت عليه ..
ضحكت ست وداد ..
ـ هاي ثاني مرة يكلولي انتي طيبه .. ادري لهل درجه شايفني عجوز
ـ العفو .. انتي مو عجوز
ـ معليج بنيتي ...اني صدوك عجوز وبيبيه هم
ـ مو لهل درجه اصلا ايهم يتمنى اطولين بعد ويانه
طال الصمت بينا فترة ..
حجت هي
ـ استاذ ايهم مأثر بيج اكثر من اللازم هاجر
انصدمت بكلامها .. توترت
ـ لا عادي مجرد احترا...
ـ انتي تحبينه بنيتي ..
شهكت واني اخلي ايدي على حلكي .. واحساس بالفشله والعيب اكتسح عقلي وكلبي .. وحطم كل شجاعتي ..
كمت تلفت منا ومنا وماتكدر اخلي عيني بعينها
ـ يبنيه ماكو داعي لكل هذا وباوعي عليه
بلكوة كدرت اقنع نفسي وشلت راسي لها ..
ـ انتي عمله نادرة .. ويمكن مموجودة بهذا الوكت هاجر
كلامها ريحني شويه ...وخجلني بنفس الوقت ..
ـ وهذا الي يجذبه لج .. وبنفس الوقت يرفضه بطريقه معينه ..
عبالك ست وداد حطت الخلاصه بكلمتها الاخيرة ..
ردت احجي ...وي شخص يفهمني .. يعلمني وبنفس الوقت ... يريحني .. اريد احجي بلكي كلبي يرتاح ..
ـ مافتهمت شنو يعني
ـ واني هم مفاهمه شي صدكيني ..
ـ كل الي اعرفه هل ولد يمر بمرحله صعبه مرحله تفصله بين الخير والشر .. مرحله مصيريه بحياته ...وانتي اجيتي بالوقت الضايع ودخلتي بيها وصرتي منها
كلت بكلبي .. حظي وعرفه .. قابل طالبته طلبه ..
كملت وداد
ـ اني اعرفه من زمان .. ايهم خوش رجال طيب .. صدوك هم خبل شويه بس دوم يضحك و يسولف وانكوتي لدرجه مصدكينه .. بس اكو شي صار خلاها يتغير
كلت بكلبي
"سميه لهل درجه يحبها "
ـ زين شصار ماتعرفين ست وداد
ـ سميه ..
رغم مااجنت اعرف بس كلبي رجف
ـ سميه
ـ اي زوجته السابقه
ـ قصدج خطيبته
ـ زوجته سميه واكثر من زوجته حباها حب بس الله يعلم بيه .. بس هي الله يسامحها
ـ شسوت
ـ دري بالج منه هاجر .. اريدج تصيرين قويه .. ادري بيج مراح تعوفينه .. اذا كوتلج عوفيه بس علي الاقل احذري منه .. لان الي دا تشوفينه مو هو .. مو على طبيعته ...هذا انسان اظلم ماادري شنو قرارة
سألت بلهفه
ـ بس كوليلي جانت زوجته لو خطيبته
سكتت
زوجته! 
سميه زوجته .. هيج بدون عرس ولا حتى احد يدري شلون ...معقوله جان متزوجها بدون مندري ...
لعد شلون كانت خيانتها له! ?
صوت ست وداد بعدة يجيني ..
ـ محتاج مساعدة صح .. بس مو عبالج قوتج تكفي حتى تعينينه .. ويااخوفي اني مو كدة ياهاجر .. لان هو اقوى منج بهووووايه
صح جانت تحجي وياي .. بس اني جنت بحاله من الصدمه والسكون .. ايهم جان متزوج .. زواج فعلي ... اااه ينار كلبي ..
روحي احسها احتركت ...وشيشوفني ... منو اني بعينه .. حبيبته الصهبه الي اني اشبهها ياريت الله خالقني سودة مصخمه ولا احساس الي دا احسه
ـ اني بريت ذمتي كدام الله وخلقه .. وجنت عادله بينج وبينه .. كوتلج حقيقته وحذرتج منه
رجعت للشركه .. ارجر بروحي جر .. كلام ست وداد يرن بأذني مثل الجرس ..
يارب شكد بعد اشوف ضيم حتى ارتاح ..
جنت اريد ادخل للشركه .. وسمعت صوت وراي ..
ـ هاجر ...
غمضت عيني .. اوووف هاي الجانت ناقصه هسه لتمت .. جنت اعرف .. والله جنت اعرف من يوم خطوبه شهد واني جنت اعرف هذا راح يصير ..
منير اخو شهد ..
درت وجههي له .. وهو الولد جان مستحي ..
ـ هاجر اريد احجي وياج كلمتين .. مراح اأخرج عن شغلج بس اني مااكدر انتظر اكثر .. موضوع يخصنا اثنينا ..
"اويلي راح يخطبني بدون شك "
....
دخلت واني اشوف مكتب ست وداد فارغ كلبي كام يوجعني وبعدة كلامها مثل الجاكوج يضرب على راسي .. وزودها منير .. الي جنت خايفه منه صار .. خطبني ..
دكيت الباب على كيف سمعت صوته يكول لي ادخلي ..
دخلت لكيته واكف وداير وجهه لشباك... وظهرة عليه ..
جانت وكفه شامخه .. وكفه اسد .. اسد بس مجروح ..
يعني جنت متزوجها ايهم .. لعد ليش محد يعرف شنو سركم ..
بيش دخلت نفسي لمتاهه مااعرف نهايتها ..
ـ وين جنتي
ـ جنت طالعه برة الشركه وي
ـ منير مو
ارتبكت .. وكمت اجر بالحجايه كوة
ـ لا والله جنت وي ست وداد حبت تودعني خارج الشركه وطلعت وياها ومن اجيت شفت منير واكف بالباب منتظرن..  ي
دار وجهه عليه وسألني ...
ـ شيريد منج
كلبي انقبض للحظه انتقام .. غادرة بكلبي ..
ـ خطبني
اقترب مني كان اطول مني .. كان يباوع عليه من علو ..
ـ ورفضتي! ?
ـ لا
ـ معناتها رفضتيه
ـ هم .. لا
ضحك ضحكه مرة .. فعلا حسيت بيها مرة .. اسد يصيح .. يزئر
ـ حلو ...اسلوب حواء متلاعبه ..
سالت دمعه من عيني
ـ وليش تفكر بيه بهل طريقه حضرتك اني مو هيج
تقدم ناحيتي اكثر واني تلقائيا رجعت لورة .. الخوف تملكني .. حسيت بيه اذا لزمني هسه ممكن يأكلني بسنونه ويشرب من دمي ..
حصرني بين الحايط و جسمه .. ايدة ساندها علي الحايط الي وراي
ـ يمتئ راح تكولين له لا! ?
ـ ماادري الموضوع معقد شهد. .. و
ـ لا مو مقعد .. بس مثالي بالنسبه لج .. تريدين تجميعن عصفورين بيد وحدة .. قابل العصافير دوم باقيه على الشجرة لازم تصيدين كم واحد
شهكت واني اشوفه يتهمني بأبشع اتهام
ـ اني .. مو هيج .. انته فاهم مو هيج
كلامه .. كلمه ورة كلمه جانت سم ..
ـ كلجن النسوان صنف واحد .. بس تأخذن دوم تأخذن .. تريدن ..ماتكتفي . تحبن وطعنن  وتخونن وحتى تكتلن كلشي تسون المهم تأخذن الي تردنه وبس
ـ انته تتوجع .. تتالم
فتح عيونه على وسعهن ... ويباوع بعيوني .. مسحت دمعه سالت على خدي بدون حتى مااحس .. وكلبي يذوب .. الله ينتقم منج سميه .. وين ماانتي ..
ـ اني اصلا ممهتمه بموضوع منير ولا اريد افكر بيه من الاساس
غامت عيونه وظهرت الكأبه على وجهه .. بشكل شكك كلبي تشكك
ـ اصلا مو من حقي اسأل ولا احاسب .. منو واني وادخل بهيج موضوع يخصج
ابتعد عني
ـ بس مرات اضعف كدام خبالي اكثر واكثر ..
دار وجهه عني وكمل
ـ يمكن احساسي بالوحدة هيج دا يسوي بيه ..
ـ شنو رأيج عندج شي يسليني و يقتل الفراغ الي ادا احسه بداخلي
حاولت لازم لساني .. قبل لا يفلت مني بس ماتكدرت
ـ ليش طلكت زوجتك ...سميه جانت زوجتك مو بس خطيبتك صح! ?
جازفت .. وجانت نتيجه المجازفه .. نظرات حقد اسود ...اشمئزاز .. صوت جهوري
ـ ديري بالج ياجاهله ادخلين هيج مناطق خطرة .. اخطر بهوايه وعقلج الزغير مراح يستوعب خطورتها ..
صحت بوجهه
ـ هاي المنطقه حضرتك دخلتني لها بنفسك .. ايام واني احاول افهمك .. افسرك .. يمكن فعلا اني اصغر من الشي الي صار لك وماكدر افهمه ...ولا عندي الخبرة بهيج مواضيع حتي اتعامل وياك .. بس عندي كلب صافي .. عقل صافي ... وشجاعتي الي تخليني اوكف كدامك واواجههك وعيني بعينك .. واسالك .. شتريد مني .. اني مدا افهمك .. تشريد مني بالضبط
سكن كولشي داير مدايرنا .. حتى انفاسنا سكنت ..
ـ هاجر اطلعي .. اريد ابقى وحدي .. انتي ماعندج لا جرأة ولا شجاعه حتى تنطيني الي اريدة منج اطلعي
ـ بس
ـ دا اكولج اطلعي شنو متفتهمين .. ولا ترجعين الا بعد تفهمين شتريدين انتي .. واني شريد ...وتجين وتكولينه الي ذيج الساعه مكتبي كدامج

مر اسبوع واحنا على هل حال .. يجي يباوع عليه بنظرات التحدي ويروح .. شي بداخلي يكول ولج ديري بالج منه .. ا

ادري بيه ضايج .. ضايج مني
شسوي اكثر رفضت منير علمودة .. رغم كل الي سمعته والي اعرفته رفضت منيرة علمودة والحمدلله شهد مضاجت .. بالعكس حسيتها ارتاحت يمكن لان تعرف اني اميل لايهم بمشاعري ..
صح مصار شي حقيقي بيناتنا بس يبقى القلق سيد الموقف ..

اويلي من عيونه المعايفتني بحالي ..
احس نظراته تصيح عليه .. يحداني .. والنتيجه ادري بيها مرة مثل العلكم .. خيبه امل تنتظرني ..
شكد تمنيت اتحجج واسولف له عن منير ورفضي له ..
ياترى راح يهتم .. راح يسأل ويكول ليش شلون ..  !?
لو يهمه شي ثاني .. شي يريده مني اني ..
سوال اسأله لنفسي كل الليله .. شيريد مني! ? شنو بالضبط! 
انسحبت من جانب شهد وباسل وتركتهم ..
ورحت وراه ...صاحت وراي شهد
ـ هاجر ...لج وين رايحه ..
حجيت وياها واني امشي
ـ عندي موضوع اريد احجيه وي استاذ ايهم ..
ركضت تقريبا وراه واني اصيح
ـ استاذ ايهم ..
وكف حتى بدون ميدور وجهه لي
ـ ممكن احجي وياك
دار وجهه عليه
ـ انتي تعرفين شرط هاي المقابله هاجر
ـ اعرف
تمام تعالي بعد فد ساعين .. على ماااخلص شغلي
هزيت راسي .. ماادري ليش حسيته فخ .. فخ جبير وراح اوكع بيه.   رجعت امشي صاح وراي
ـ راح اكون بنتظارج
جنت احس هوسه بداخلي .. فوضئ .. فوضئ .. مشاعر .. افكار .. ريح قويه راح تجي تشلع كلشي من جذورة وتروح ..
ساعتين .. شطولهن صارن ..واني اشوف كل الي بالشركه يطلعون واحد ورة الثاني وماابقئ احد بيها  وشقصرن لمن وصل الموعد ..
...
رحت اني اجر شجاعتي جر .. دخلت له ...وخاتنتي كل القوة الجنت متشبثه بيها .. اتمنيت لو اكدر ارجع واشرد من وين امااجيت ..
جان كاعد منتجي على مكتبه ..
بأنتظاري
لحظه حسيت بخوف رهيب بداخلي .. اتمنيت لو سكرتيرته موجودة وماطالعه .. عيونه باردة .. لدرجه رجفت واني بمكاني ..
ـ تعالي ياحلوة شبيج ...ترة حتى حيطان المكتب مشتاقتلج .. ويوميه تسألني عنج
نزلت راسي واحسه حيطك من الخجل ..
مااخططت .. لا عرفت شكول
ـ اكيد ماجايه حتى تسكتين هاجر .. احجي مااشتاقيتي لي مثل مااني شتاقيت ? محتاج اسمعها منج عصفورتي الحلوة .. عطشان لها ..
جان صوته لي مثل المنوم المغناطيسي ..
كلامه جان مثل المخدر الفعال لعقلي ..
ـ ايهم اني ...اني
رجفت لمن شفته اقترب مني .. اقتراب اقرب من ذاك اليوم .. اقرب .. واقرب .. لدرجه حسيته نفسه يضرب بخدي ...يشم شعري .. يشم عطري .. مالمسني .. بس هاي الحركه مني جلتني اادوخ اذوب ..
ـ انتي شنو يا عصفورتي الحلوة ..
اهتز كلشي بداخلي وي الكلمه .. اني وكعت بالفخ .. وكعت بيه واني راضيه ومستسلمه ..
مااحسيت الا بشفايفه وهي تهمس يم اذني
ـ تحبيني! ?
حسيت روحي طايرة بجناحات العشك .. هزيت راسي ووكع كلشي .. راح .. اختفئ ..
اختفى الصوت الدافي وكساها البرود .. اختفت نبرة الخافته .. وصارت حادة
ـ مدام تحبيني ...اكيد ماعندج مانع اعلمج الحب على طريقتي يا زغيرونه
شفايفه اقتربت من شفايفي .. شهكت واني ارجع لورة مصدومه ...فاتحه عيوني على وسعهن ..
ماحيبني ...لا حتى معجب بيه ..
هو بس يريد يلوث البراءة الشافها كدامه ..
ـ شبيج ماتحسين بالرغبه شلون الرجال يشبع رغبه المرة ويعلمها شلون تحب
صرخت بيه ودموعي تجري
ـ ليش هيج ...تسوي ليش .. مو تعرف اني مو هيج
....
ـ سهر
دارت وجهها عليه .. احلى مرة اشوفها بيها اليوم .. سهر انيقه كلشي بيها انيق .. روحها .. لبسها .. سوالفها ..
ضحكت بوجههي احلى ضحكه ..
ـ شلوني
ـ تخبلين .. الله يساعد ياسر عليج شلون راح يتحمل هل جمال كوله
ـ مو بالله لعد متحجين وي هل خبله .. من بطلت من الشركه لليوم وهيه مسودنه علينا
باوعت لهاجر ..
فعلا هاجر متغيرة .. صح تضحك وتسولف .. وتنكت .. بس تريد تضيع شي بيها .. شي كاسرها .. من الداخل ..
مااكدرت احجي شي .. واحس ببلعومي عظم .. عظم لا اكدر ابلعه ولا اكدر واطلعه .. نظرة شملت كولشي بالغرفه ..
بنتي هي نايمه .. بكاروكها ..
هاجر الكاعدة وعيونها غاطيهن الحزن مغلفتهن بالتصنع .. وسهر الفرحتها ماسايعتها .. مانستاهل وحدة منه تفرح .. وحدة يدخل لكلبها الفرح ويسكن بيه .. شلت موبايلي اكتبت رساله مختصرة ..
ـ موافقه
بدون شرط او قيد .. بدون حتي تفكير موافقه وخلص ..
ـ كافي تصفن هاجر وتعالي كملي مكياجي .. وكومي انتي هم بدلي ولجن مظل عدنا وكت ..

ـ ماتكولين لهاي الغبرة ..
واشرت هاجر على سهر
ـ من الصبح لهسه واكفه على المرايه .. الله اكبر اكل شرب غير مرايه تشوفين وجهج بيها وتوخرين لا سهر لازكه فد مرة
ـ عروس اني حبيبتي .. عروس
ـ الله رحمنا وفكنا منج وداعتج .. الا اشمر سبع حجارات وشكو شي وردي بالغرفه خلي استاذ ياسر يبتلي بيه ..
صحت بيهن
ـ اوووف بسكم ديلا خلصن ولجن
كعدت هاجر تكمل مكياجي ..
ـ امي دزت على عمامي
كالت سهر ..
رديت عليها
ـ اي تكول الاصول اصول ولازم يعرفون
ـ لعد ماوكفوا ويانه بالي صار لج ولو هذا مامحسوب ومابيه اصول ..
ـ كلمن ضرفه سهر .. الناس ماملزومين بينا.  
ـ سوال ولج غاليه بس سوال مراح يأخذ منهم شي
ـ الله لا يعوزنا ..
سكتت واني كاتمه الحسرة بكلبي .. حسرة اخ ...يوكف لنا بالحلوة والمرة ..
دخلت علينا امي .. بعد ماتكملنا .. هم مرتبه نفسها .. واشوف الفرحه بعيونها .. حتى بعرسي مااشفتها
ـ صلاوات على محمد شطالعات .. كمر ..
ـ غاليه بيت خالتج دزو صينيه وترتيبات وتعالي رتبيها ماما .. يلا الناس على جيه
..
كليت دازين صينيه اسمها صينيه البخت .. حلوة مرتبه ومزينه .. وياها كلاصاتها وقران وكيك جاهز وعصاير وجكليت .. رتبت كولشي على الطاوله والتخم الي اشترته سهر بالقصاد.  
عمامي اجه كم واحد منهم دخلتهم امي للديوانيه ..
..
وياسر هم مامقصر جايب وياه هوايه ناس ..
دخلت علينا خالتي بالهلاهل و وراها مرت عماد البنيه فقيرة وحبابه ..
كولشي غاب عن بالي .. واني كاعدة يمهن حتي من دخلت سهر ولا انتبهت لها .. جان كل عقلي يم الناس الكاعدة .. صوت يجي مشوش بس نسمعه ..
ويمكن اني اسمع اكثر وحدة بيهن لان كل عقلي وفكري يمهم ..
بدأ الحجي بالصلوات .. والكلام الطيب ..
وبعدين طلبوا يد سهر لياسر ..
وقبل لا يقرون الفاتحه سمعت صوت ياسر
ـ عمي اسمحولنا وقبل لا تقرون الفاتحه .. احنا نطلب غاليه لرافد .. حتى تصير الفرحه فرحتين
غمضت عيوني .. وتحسرت على حظي ..
سهر كمزت من يمها
ـ شنو .. شدا يحجي ياسر خاله ..
امي كالت لها
ـ شبيج ولج اكعدي بمكانج ولا تتحركين .. خالتج كالتلي واحنا موافقين ..
باوعت على امي بنظرة مااخلت عينها بعيني ..
ـ بس محد كال لي ماما .. غاليه ماتحجين
ـ فعلا سهر امي كالت لي بس ردت يتأجل الموضوع شويه مصارت
سكتت سهر بس انكلب وجهها .. خطيه ماادري احس خربت فرحتها ..
اندك الباب علينا ..
فتحته امي .. وصاحت ..
ـ تفضل .. تفضل عيني ابو علي .. يبنات هذا عمجن سلمن عليه
سلمنا عليه من بعيد .. وهو واكف
كال
ـ غاليه عمي الناس طلبوج لخوهم شتكولين
جاوبت عليه
ـ قابله عمي
ـ بالخير يابه ...شايفين كل الخير
الوراها كل الي صار روتيني ...عبالك اني مو بيه فلم .. تابعه .. العقد .. وصوتي واني اكول قبلت .. وصوته وهو يهمس قبلت زواجها ..
لو ياسر الي رفض يعقد .. لو ما خالتي الي راسها والف سيف يعقدون وعقدوا وهم مكلبه ووجهوهم ..
وكل واحد منهم كاعد بطرف القنفه ..
حتى من ياسر لبسها الذهب وباسها براسها .. جانت سهر بحاله من الضيق الغريب ..
واني جنت لاهيه عنهم تماما ..
بس صوت خالتي فززني
ـ غاليه خاله شغلتج صارت بسرعه .. اعذريني لو جنت ادري والله اجيب لج احسن حلقه واحسن ذهب
ـ عادي خاله مصار شي
..
يتبــع
استمتعــــوا .. اكتبوا رايكم ..