رواية احبك .... وانت الفصل السابع عشر 17 - بقلم وردة عمري

اتمنى هذا البارت يوضح لكم اي غموض تحسون بيه اتجاة القصه ..
ويفتح لكم ابواب لفهم الشخصيات بشكل ادق ..
البارت السادس عشر ..
بقــلم وردة عمري ..
ثم يلتقيان بعد كسر دون جبر .. وصمت دون كلام .. لقاء حاسم ... اما يموتان .. او يموتان لا خيار ثالث لهما ... !?
احداث ماقبل الخطؤبه ..
ايهــم ..
طلعت من المكتب هايم على وجهي .. شسويت اني ... شسويت ...دمرت انسانه مالها اي ذنب.   مالها ذنب غير ان هي صهباء مثل سميه .. مالها ذنب غير انو حست بمشاعر اتجاهي واني استغليتها شر استغلال .. شلون سويت هيج بيها ماادري ..
افتر بسيارتي .. وين اروح ماادري ..
اعترف ايهم سميه كدرت تزرع الشر بداخلك بأبشع طريقه .. الخيانه ..
وهي على اسمي ...زوجتي قولا وفعلا ... لوثت شكو شي ابيض بيك ..
اخذني عقلي لبيتها ...لبيت سميه .. حان موعد الحساب ..
نزلت واني عازم على فضحها كدام اهلها ..
دكيت الباب بكل قوتي .. ماكو ...
دكيت لمن فلشت الباب .. طلع واحد من جيرانهم ..
كال
ـ عمي لا ادك الجماعه سافروا ..
حسيت روحي دخت ..
ـ سافروا
ـ اي عمي صار لهم شهرين ..
ـ مااتعرف عمي وين سافروا
ـ والله ياابني ماعندي خبر بس حسب مااسمعت لاربيل هناك استقروا
رجعت ويدي علئ خاصرتي ...
احس كل المواجع هاجت من جديد .. سميه سافرت ..
يعني انتهى كلشي
لا ماانتهئ ...
...
ايام تمر من حولي واني ادور على سميه واهلها .. نسيت حتى هاجر او تناسيتها ..
جنت كاعد بمكتبي
ودك موبايلي
ـ اها بشرني لكيتها ..
اجاني صوت واحد من معارفي طلبت منه يسأل بأربيل ويجيب خبرها
ـ والله شكولك ماكو شي اكيد بس اكو ناس يكولون غيروا مكانهم من فترة ومنتقلين لمكان جديد ..
ـ تمام اريدك تسال بعد وتوصل لها لا تقصر بهذا الموضوع ابد
ـ صدوك جذب استاذ ايهم انريد بس نخدمك احنا
ـ تسلم حامد خادم ربك
سديته منه ..
هاي ... الخاينه ..
كل ساع بمكان ويوميه ببلد واني حالي .. حال
ريحه الانتقام ملت ريتي ..
اي .. الريحه ترست خشمي لقوتها .. ريحه دم
الدم اني عطشان حتى اريقه ...
اااه .. والعصفورة ..
بهت كلشي داير مدايري من يوم الي طلعت من مكتبي .. اليوم الي طلعت مني شاردة خايفه على نفسها لا تفقد اخر ذرة لكرامتها و عفتها .. ماادري شلون بذاك اليوم استقوت ودفعتني بكل قوتها .. وذبتني على الكاع وطلعت شاردة .. ودموعها على خدها تهمل ..
شراح يصير لو بعدها تحبني رغم كولشي صار! ? ورغم صدمتها بيه ..
وشنو يعني اذا عاقبت نفسي ومااشفتها لمدة اسبوعين ..
عقاب لوحشيتي لي اتفلتت مني بالتوقيت الخاطئ ..
عقاب لمحه ضعف صابتني بعد مااعترفت لي العصفورة بحبها لي .. ردت اطلع وراها .. لطلب منها الغفران اللي سويتها بيها .. بس سؤال اكو مرة بالدنيا تستاهل تعاملها مثل البشر ..
سؤال طرق بعقلي .. اكو مرة تستحق اتسامح منها .. كل مااشعر بيه .. تأنيب ضمير لا غير ..
ولذلك عاقبت نفسي لوقت طويل .. طويل كولش .. وشغلت نفسي بسميه متناسي هاجر تماما ..
رجعت الوع نفسي بالخاينه .. لوع نفسي واوعدها بالثار لكلبي ولاسمي و لروحي ..
الثار منها هو راح يريح كلبي وعقلي لا عصفورة ولا غيرها ..
ماكو احد بالدنيا يكدر .. يشلع هذا الوجع الي بداخلي ولو حتى يخدره ..
تحركت مااحسيت الا .. اوراق هاجر تناثرت جوة رجليه .. ابتسمت لا اراديا .. اعترف ايهم هاجر مأثرة بيك بطريقتها ..
اعترافها ممتع لك .. و ...و باغلب الاحيان جنت اتمادى وياها .. وتركت الحريه لروحي تمادئ واتواصل ..يمته ماحسيت اني محتاج لهذا الشي.. 
والطريقه الي اني اريدها لنفسي الثائرة ..
مثل مااسويت ذاك اليوم واني لمس ايدها بطريقه عفويه متعمدة .. حسيت روحي انتشي .. بردة فعلها العفويه .. مااجاي الكي اي سبب يخليها تبقى بالشركه .. بعد ذاك اليوم وبعدها
باقيه ملتزمه باللي طلبتها منها ...رجعت لقسم المحاسبه ..
جزء مني اشتاق حتى يحس شنو ملمس بشرتها ..
وشلون مااشتاق وهي ملكي ..
كلشي بيها لي ..
اغير عليها لان هي لي ..
هي كلها ...بروحها .. بشخصها العصفوري الحلو ..
اضحك وياها .. اقسي عليها .. اهاجمها .. افترسها .. امتص اعترافات العشك منها .. اتعصب عليها .. اهجرها لاسابيع .. كل هذا اسويه لان احس بيها لي .. ملكي ..
ورغم كل هذا هي راضيه .. راضيه مثل مااني مااكدر اخليها تفلت مني .. وتروح
هاجر راح تبقى ماكو شي بالعقل او منطق يمنع هذا الشي ..
عيوني جانت تقرا الاوراق الي كدامي .. الاولى و الثانيه .. والثالثه .. فتحت عيوني على وسعهن ..
شمرتهن بقوتي ...واطشرن .. واني اصيح على السكرتيرة الجديدة
ـ هنادي دزي على مدير قسم الحاسبات اريدة حالا
ـ حاضر استاذ ..
هاجر مقدمه استقالتها .. هذا اخر شي توقعته .. توقعتها تتحمل كلشي ومراح تترك الشغل ..

هاجر ...
جنت كاعدة كدام المرايه .. اجر قلم الكحله بعيني ..
نزلته ..
ورجع عقلي بعث باللي صار ذاك اليوم ..
ورة مااصار الي صار بمكتب ايهم ...نمت يومها ...ودموعي ماانشفن ..
حتى ثاني يوم من داومت عيوني مانشفن دمعهن .. جنت اريد اقدم استقالتي ...بس باسل لكيته بباب الشركه وخبرني انو ايهم .. سافر لمدة اسبوعين .. و طلب من مدراء الاقسام يستلمون الشغل لمن يجي ..
شنو يعني ...خسرت كولشي .. حتي الاستقاله صارت مالها معنى مالها قيمه ..
رجعت للشغل ...اشتغل بكل جهدي .. كمت اكل الشغل اكل في سبيل انسى .. ارجع للبيت مثل الميته اكل وانام ...والبنات خطيه شكد يسألن بس اني مانطي جواب الف راسي وانام ..
وتمر الايام يوم يشبه يوم ابتعدت عن الكل حتى عن شهد الي كمت مااشوفها لان اانتقلت لقسم جديد .. وحتى اني نقلوني لقسم ثاني ... صح مدير قسمي مااعاجبني بس راضيه قانعه .. راضيه بوحدتي .. ومقتنعه بقسمتي ..
الا بذاك اليوم بعد مااتأخرت ..
شويه ..
اول مادخلت انهد بيه رئيس القسم مالتي
ـ هاجر شغلج زين امنت بالله .. بس مو معناتها تستغلين غياب المدير الشركه وتكومين تغيبين عن الشغل بكيفج
ـ استاذ هو منو المستغل غياب المدير اني اشتغل اكثر وحدة بالقسم حتى مااطلع اتغدا اتعبرها استراحه تعويض
ـ ماكو اي تعويض
سحبت ورقه منه ..
وكمت اكتب وبيها واحجي
ـ هاي اجازة لمدة شهرين بدون راتب ..
ـ مامسموح لج اي اجازة لان انتي موظفه جديدة ..
ـ لعد ااعتبرها استقاله
....
ايهـم ..
ايدي ترعش .. اسبوع كامل وهي مستقيله واني ماادري .. شلون لتهيت عنها ...شلون عفتها وغابت عن عيني ..
شلون ماادورت عن السبب الحقيقي ورة اختفاءها من كدام عيوني ..
واني الي كمت مااهتم حتى بالرسائل و الاوراق الي تجيني من شؤون الموضفين ..
كل هذا غرور مني ..
عدم تفكيري وانو هي مستحيل تعوف الشركه لا ماتكدر تفاركني ..
تصورت ماتكدر على فراكي ابدا ..
شلون سوت هذا الشي واني موجود ..
مااكدرت تسويها واني غايب .. سوتها واني موجود شلون! ?
قررت تشرد بجلدها مني .. !?
تنقذ نفسها من ضيم عشكها لي! ?
يارب ... يارب .. راحت ...راحت بدون رجعه ..
راحت ببساطه .. واني الي جنت افكر بس افرغ من الضيم الي بيه ارجعها لي ..
حتى افكرت انقل هنادي .. لقسم ثاني واجيبها اسويها سكرتيرة بدالها ..
جنت احضر الموضوع حتي تصير كدام عيوني مباشرا ..
ولك غبي ...غبي انته ...ايهم وانت عبالك عصفورتك مراح اطير من القفص حتى لو جان باب القفص مفتوح كدامها ..
صدفه سألت ..
لا مو صدفه اني سويتها صدفه وكمت اسأل عن الموظفين واحوالهم ..
لمن وصل موظف الشؤون وكال .. وحدة من الموضفات غايبه .. وقدمت استقاله بخط يدها ..
وهاي هيه الورقه بيدي .. بخط ايدها ..
شلون سوت هيج وراحت ..
شلت موبايلي واني اباوع على رقمها .. رقمها الي حفظته على كلبي .. يمكن حتى هي ماتعرف هو عندي ..
دكيت عليها ..
جنت منتظر اسمع صوتها ..
بس ااي اجاني صوت ثاني ..
ـ الووو. منو ياي
ـ العفو مو هذا رقم هاجر
ـ اي تفضل منو وياي
ـ اني ايهم
ـ ايهم هلا بيك شلونك اني غاليه
ـ الحمد لله غاليه انتي شلونج اخبارج
ـ الحمد لله .. شكو ايهم هاجر تاركه الشغل و حالها مايسر لا عدو لا صديق صاير شي وياها لان دا حاول متكول اي شي
احس كلبي عصرني ..
ـ ماكو شي غاليه خلاف بسيط وان شاء الله ينحل اكدر احجي وياها
ـ والله اعذرني هسه نايمه هيه من تكعد اكلها ..
...
سديت الخط وياها ..
هاجر مراح تروح من ايدي .. لي ..
..
يوم الخطوبه ..
رافد .. ياسر ..
ـ اطلع لك مو سويلك عمله وضميت راسك مثل المخانيث ..
جان التلفون على اذني .. وصوت ياسر يجيني ..
ـ وين انته رافد ..
ضحكت ضحكه طويله كلها مرارة ..
ـ هنا جوة المسبح ..
ـ جايك ..
سديت موبايل منه وذيته بالمسبح .. يمكن جان لازم يكون هذا اسعد يوم بعمري .. يوم احلم بيه .. اتخيله .. ارسمه .. حددة بكل جوارحي ...بكلبي وعقلي ..
بس ماتخيلته بهاي الطريقه ..
من جنا كاعدين بكعدة ياسر ...فاجئني قبل لا نقرا الفاتحه ...لمن خطب غاليه الي .. عقلي مااستوعب واني اسمع صوته الجهوري هوو يصيح بأعلئ صوته ..
ـ انريد غاليه لخويه رافد ..
اتعالت الاصوات .. شلون يصير .. ولازم انفاق .. ولازم راي البنيه ...بس قاطع الحجي الشيخ الي ويانه ..
ـ عمي صلوا على محمد وواحد من عمام البنيه يشورها ويأخذ رايها ان جان رضت كان بها .. مارضت الزواج قسمه ونصيب ..
كام واحد من عمامها ... حتى يأخذ رايها .. وكلبي يدك مثل الطبل ..
معقوله ترفض .. ترفض حبي وكلبي للمرة الثانيه .. معقوله ترضئ بيه وهي بهذا حالها ..
رجع عمها ..
وكال ...
ـ يابه توكلوا البنيه راضيه ...الله يسهلكم يابه
روحي فرفحت مثل طير صار سنين ساكن قرر اليوم يطير .. قرر يهاجر لارضه المقسومه له ..
اول مرة عقد الشيخ لياسر و سهر رغم رفض ياسر بالبدايه .. الي محد كدر يفسرة غيري ..
سهر شرطها ماتعقد شيخ الا بعد شهر .. وكبرياء ياسر رفض يطلب منها انو يعقدون اخاف تحس شكد هو ولهان عليها .. 

لمن ابدا يعقد لنا الشيخ .. ماادري اذني لو اني غلطان ...سمعت صوت نشيج .. صوت بجي ناعم ... رغم مااجانت متلفلفه بالحرام بس سمعته ..
شنو يعني .. اريد افسر واني اطلع من يمهم حتى بدون مااباوع لورة .. شنو يعني .. مراضيه مغصوبه ..
طلعت كبل لسيارتي واني فاير .. ليش رضت .. وليش تبجي .. منو الي غصبها ..
ساعات واني افتر ..
لمن دك موبايلي .. رقمها ..
ـ الووو
صوت بجي مخلوط بصوتها الغاضب ..
ـ عبالك انته واخوك كدرتوا تغصبوني .. تحلم اصير لك مرة لو تضل اخر واحد بالدنيا ..
ـ غاليه خلينا نحجي نتفاهم منو غصبج .. ياسر شسوة لج
ـ لا تسوي روحك البرئي الي مايعرف شي .. اخوك اهددني بأختي .. يخرب الخطوبه اذا مااوافق عليك كل هذا ماتدري بيه شلون ياسر يسوي هيج اذا ماماخذ منك الاوكي
ـ غاليه ... غاليه ...
ـ خليت بيها غاليه انته واخوك .. طول عمري اشوفك اخو لنا الي ماجابته امنا بس .. شوف الظروف شسوت بينا .. فرقتنا .. حرمتنا من لمتنا الحلوة .. ليش هيج ...واجه اخوك كملها يريد يكسر كلب سهر .. تريد تأخذ ثارك رافد .. اخوك يريد يأخذ ثارك لان كسرت كلبك
ـ غاليه اني ماادري بكل هذا صدكيني ..
ـ انته صدكيني رافد انه وحدة مكسورة .. ماكو شي بيه عامر .. انه ماصلح لك رافد انتي منتهيه ..
ـ اريدج بكل حالاتج ..
وسديت الخط منها ...
وطرت لياسر ...
ظليت جوة منتظرة ... نزل يمشي على كيف واني النار بيه مشتعله .. بس وصل يمي ..
لزكته بوكس طيرت عينه
ـ حقير ..
وكع بالكاع
ـ تريد تكسر كلب البنيه الوحيدة الحبتك من كلبها .. والله ماتستاهل
صحت بيه
ـ ولك ياسر تهدد بيهن وهنه نسوان شخليت للغرب
كام وصاح بيه ...
ـ شسوي واني اشوفك تلوب .. كاضي عمرك منتظر وحضرة جنابها سنين نايمه بحضن واحد غيرك ..
هجمت عليه ماادري بروحي .. كمت اضرب بيه بدون وعي ..
مااحسيت الا ايهم يدفعني ووكعت .. بالمسبح ...
سهــر
مر شهر كامل على خطوبتنا اني و ياسر .. شهر بارد .. شهر مر لمن ياسر سافر تارك كلشي وراه ورافد حاله مايسر لا عدو لا صديق ..
هاجر الي تاركه شغلها بدون حتى سبب مقنع .. واتصالات ايهم المستمرة لها وهي يا ما ترفضها او تنطيه لنا احنا نحاجيه ..

ومرات تجي وتكابلني مثل هسه
ـ لج صار شهر من سافر ماكلف نفسه واتصل بيه .. شنو جاريه عندة اني
ـ مو تكولين سألت رافد كالج عندة شغل وراح ...اي بعد شنو .. بعدين مو لهل درجه مو قبل كم يوم اتصل بيج
هزيت راسي لها
ـ وشفتهمت منه ...تالله بالله مافتهمت شي غير سعد مريض ورايح يشوفه .. اي هسه سعد صار عزيز
ضحكت هاجر
ـ ايااا شبيج سهر غير اخوة ...
قربت راسي من هاجر واني اشار لها لرافد
ـ كل مرة يروح هو شمعنى هسه .. لج احس اكو شي منعرفه ..
ـ شنو لي مضايقج سهر مااعتقد بس الاشتياق دا تعانين منه حبي
ـ قبل لا يسافر تعاركنا .. بصراحه من خطوبتنا لليوم واحنا واحد بعيد عن الثاني ..
ـ ولج افتهمنا بس ليش غير نفهم ...ترة انتي وياه دخلتوا تسولفون وطلعتوا ووجوهكم مكلبه
ـ وانتي هم مسألتيني مااعرف بشنو ملتهيه عني .. هاجر شبيج لج احجي شوفي عيونج شلون ذابله وحالج شلون متبهذل
ـ عوفي حالي وسولفي بحالج .. يلا غردي ليله الي اجونه يخطوبنج شكولتي للولد غيرتي احواله ..
ـ لج عبالي راح اكدر اسيطر على الوضع بعد مااجو بذيج الليله وخطبوني .. جنت مصدومه بردة فعله لمن شرطت عليه مانعقد الا بعد شهر و الزواج بعد ست اشهر مو تعرفين .. بس عندة مرض اسمه الكبرياء
ـ عبالي تشاقين صدوك سويتها وشرطتي عليه
ـ اي غير تعزيت وتصخمت وتشرطت .. بعدين الموضوع صار من سيى الئ اسوء ..
يتعامل وياي ببرود مو عبالك خطيبته .. ابتعد بكل مشاعرة عني وصار عبالك واحد خاطبني عن طريق الدايه ام زكي
ضحكت هاجر
ـ مااصدك ياسر هيج صاير مؤدب .. مو جان فاصحج بين العربان
وتباوع على رافد الي جان يفتر بين الطاولات والزباين
ـ شفتي انتي نفسج تستغربين الموضوع .. اني ماصدكت من اتصل بأمي ثاني يوم وكال هو قابل يصير الزواج بعد ست اشهر ولج عبالي يتعرض يصخم بس كولشي ماكو
ونوب ورة عقد المحكمه يسافر بدون حتى مايكولي .. لوما خالتي الله ينطيها العافيه فلا عرفت
ـ اهدي سهر .. عمري اني لازم اروح .. اريد ادور على شغل
ـ وشركه ايهم
ـ شالت جنطتها وكامت ..
ـ موضوعه انسد وصفحه وطويتها ..
طلعت هاجر واني صافنه على حالنا .. حتى رافد .. احسن مني كم مرة اجه للبيت يسأل عن غاليه ...صح ماكو بينهم كلام خاص بس على الاقل يسأل عليها ويطمئن على امورها ..
حسيت روحي تورطت .. ياسر .. لغز .. لغز جبير وبير اظلم خايفه منه ..
كلهم كل واحد بيهم يختلف عن الثاني ولاكأنهم اخوان ..
معقوله غياب والدهم اثر عليهم هل درجه ..
امي تكول جان يدرس بمصر .. يدز فلوس لخالتي ..  وهو هناك .. سنه .. سنتين وهو يترجاها حتى تجي يمه ماكو ...لمن طك كلبه وتزوج ..
كمت امشي واني روحي طالعه .. اول ماادخلت الممر مالت الادارة سمعت صوت اعرفه دخل للمطعم
ـ تعالي ادخلي خوش مطعم راح يعجبج
تجمدت اديه واني بسرعه ضميت نفسي وره الزرع الموجود داخل المطعم .. اريد اسبتوعب الصوت الرجولي الي سمعته ..
واميز هويه صاحبه ..
اسامه ...شجابه
كتمت انفاسي وهو يمر من يمي غافل عني واني ضامه نفسي ورة الزرع عن لا يشوفني ..
كان منشغل تماما بيها .. لازم ايدها .. وهي لابسه ثوب مرة حامل ..
زوجته حامل للمرة الثالثه! ?
اختنكت بعبرتي
ـ مرته حامل ثالث مرة ..
اختار اسامه طاوله معزوله يم الشباك ..
خله العامل كدامهم استكانين جاي .. مثل وماطلبوا .. وبعدين طلبوا ريوك ..
عيونه مافاركت .. وجهها .. هيج الي يحب يسهر .. جانت كدامه هو يباوع عليها ويضحك ..
خله ايده على ايدها
ـ شبيج لهل درجه ضايجه لان راح يجونه بنات حلوات مثلج
ـ بنات اثنين اسامه اثنين وين اروح من امك واهلك وهمه يريدون ولد عبالك مجبت ولد لهم
باوع داير مدايرة يمكن يتأكد اذا اكو احد قريب عليه او ماكو .. ميدري بيه اني جاي اراقبهم
ـ كولي رحمه هاي شبيج .. معليه لا بأم شتريد ولا اخت شتتمنى اني طلبتهم من ربي مثل ماطلبتج كبلهم والحمدلله عندنه ولد كافي
ـ جان اختصرت الموضوع وطلبت بس وحدة سويتهن ثلاثه ليش
ـ والله لو بيدي اطلب ثلاثه واربعه وخمسه وكلهن يشبهنج ..
وكام يأشر على نفسه ..
ـ انتي .. هنا ..
وهنا على كلبه
وهنا على عقله
ـ هاي شبيك تخبلت كافي
ـ والله ممصدك لليوم صرتي مرتي الحمدلله
جنت اذوب واني اسمع حجيهم .. عمري مااشفت اسامه بهل عاطفه هاي حتى وياي .. يمكن لان عمرة ماحبتي مثل ماحب اول انسانه بحياته وماكدر ينساها ..
مااصدك الكلام السمعته منه لها يسترضيها رغم مراح اتجيب له توم بنات ..
ياترئ يجي يوم واسمع من ياسر هيج كلام يذوب كلبي وعقلي ..
حسيت بأصابع قاسيه تنحط على زندي ..
وقبل مااشهك اجاني صوته .. القاسي
ـ يالله شلون مشهد لخنوع رجولي لدرجه لعبت نفسي .. ويستاهل تتنفسين بهل طريقه له
وقبل ماارد بشي .. سحبني ياسر من المكان الي جنت لابدة بيه ..
يتبـــع

رايكم مهم. ....اكتبوا
استمتعوا قبل كتابه اي تعليق .. لان هذا الاهم ..
احبـــكم.💖💖💖