رواية احبك .... وانت الفصل الثامن والعشرون 28 - بقلم وردة عمري

البارت الخامس والعشرون
بقـلم وردة عمري ..

ـ شلون ..!?
سؤالها .. عجبني .. يعني هي سافرت قبل لا تتزوج غاليه ..

انتحيت علئ الكرسي من خلفي .. واني اباوع عليها ..

ـ ليش شلون ملاك ..

جانت بيدها الخاشوكه عافتها ..

ـ لي عرفته واخر اخباركم وصلتني غاليه متزوجه شخص ثاني .. وعدها بنيه منه ..

حاله من التلبد صابتني .. وهي تحجي تقرير الايام السابقه .. سنين مرت عليه مثل سنين يوسف عجاف .. ولا زالت مستمرة .. غاليه رغم مابيتي ويمي .. بس بعيدة عني .. بعيدة هوايه ماعرف شنو الي يقربنا .. ويطوي هاي المسافات بيناتنا ..

ـ طلكت منه ...واني تزوجتها ..

ـ احجيلي من الاول شلون .. وليش اطلكت .. وشنو الي صار

لكيت نفسي... احجي لها كولشي ...يمكن جنت مضغوط . .. محتاج شخص بعيد ...افرغ لها مابداخلي .. نساب الكلام من حلكي بدون اي قيد او شرط .. كولت لها كولشي .. بدون مااضم شي عنها ..

من خلصت ...رجعت انتجيت ..
ـ وهسه ...شنو يعني الحياه بيناتكم منقطعه. .. متحس نفسك مجبور عليها انت.   يعني لان اخوك خطبها لك حتئ بدون ماايكول لك

ـ شدا تحجين ملاك .. غاليه حلم عمري عشت عمري حتئ احققه

ـ بس هذا الحلم تغيير رافد.   انت بنفسك كولت غاليه مو غاليه قبل .. يعني حلمك مو حلم قبل .. يمكن لو اخوك ماخاطبها لك جان ماقبلت بيك .  مو صح

صفنت بحجيها ..

ـ يمكن حجيج صحيح .. بس اني مااشوف غيرها مرة بالدنيا .. ولا راح اشوف ..

باوعت عليه بنظرة غامضه ..

ـ اوكي .. ممكن نتنطيني رقمك

دارت اخذت جنطتها الي معكتها بالكرسي .. وطلعت منه موبايلهـا ..

ظليت بمكاني ...متحركت ..
صافن عليها ...
شالت راسها لي.   ضحكت
ـ هاي شبيك رافد اريد رقمك بس لا تكول متنطيه .. تخاف من المعجبات ..

ضحكت حيل ..

ـ اني منيلي معجبات ...اني رجال فقير ..

ـ انته فقير .. يلا ميخالف افوتها ...واعبرها لك واقتع نفسي انته فقير وماعندك شي .. ديلا انطيني رقمك ...اريد اروح تأخرت علئ شغلي ..

رديت لها رقمي ...سجلته .. وكامت

ـ شكرا جزيلا علئ الضيافه ...مطعمكم حلو ..

كمت وياها ..

ـ تسلمين زورينا ..

ـ اكيد ...مع سلامه .. اشوفك ...ويمكن اتصل بيك

راحت ...
رجعت دخلت ...للمطعم ...اول مادخلت .. رن موبايلي .. طلعته .. جان رقم غريب ..

ـ الو

ـ سلفن رقمي عندك ..
ضحكت ...

ـ يعني اخاف ادك عليك ومتجاوب عبالك وحدة من المعجبات ...

ـ هاي شلزكتي ...معجبات .. معجبات .. لازم اكو واحد مشوهه سمعتي يمج

رجعت ضحكت ..

ـ عود بعدين نسولف بهاي السالفه ...باي

......
سهـر ...ياسـر
ياسـر

"لك انته واحد عديم الرجوله .. مثلك واحد اذا غلبته شهوته ...صار بعيني عديم الرجوله خانتك شهوة جسمك قبل ماتخونني اني .. انته واحد ماعندة القوة حتئ يصير وفي .. ادري شبقئ من معاني الرجوله عندك فهمني .. انت واحد ضعيف ...ضعيف بلا  كرامه ..بلا كبرياء .. تتوسل بيه حتئ تبقئ بس اني نفسي عافتك .. ماريد رجال مثلك "

" اترجاج ...توسل بيج .. سامحيني .. اني اموت اذا عفتج .. ماتحمل اعيش بدونج .. شتريدين اطلكها والله بس .. لا تكولين طلكني .. لخاطر جهالنا ..  "

كعدت من النوم مرعوب .. اريد الهوا .. لكيت نفسي مخنوك .. امسح وجهي .. افرك صدري بيدي ..

لا مجان حلم .. جان مجرد حجي .. كلام مظلم .. اصوات المعالم الوجوة ماكو ...بس اعرفها
اعرف منو همه .. ماكو غيرهم ...سنين وهادي الاحلام ترافقني مثل خيالي .. ذكريات .. الماضي الي مايريد يعوفني بحالي ..

ماضي عاش بداخلي .. وصار يقين بالنسبه لي ..

ابويه ...وامي ..

هذا المشهد الي مااكدر انساه رغم مرور السنين عليه ...اكدر اتذكرة بمنتهئ السهوله ..
جنت اشوف ابويه ..القدوة مالتي .. بالنجاح ...بالشهامه ورجوله ...بس انكسر كل هذا ..

نكسر بعد ماتشفته شلون يترجه بأمي ويتوسل بيها بعد مااعرفت بزواجه .. شكد كرهت ذاك اليوم ..

نطبع بذاكرتي .. مثل كاسيت تسجيل كل يوم ينعاد عليه ..

كمت من الجربايه .. واحس بصدري مخنوك .. و النار مشتعله بداخلي ..

كمت من مكاني بدون حتئ ماباوع للي نايمه يمي .. وطوك الورد بعدة علئ راسها ...

سهـر ..
بعد اسبوع خلص .. جانت احلا ايام عمري .. لولا تصرفات ياسر الغريبه وتغييرة المفاجئ

كاعدين بالطيارة .. دايرة وجهي له .. عاقدة حواجبي .. صافنه علئ زوجي .. الي عبالك صندوك مغلق ..

صافنه ...عليه شلون مسترخي وانايم .. مغمض عيونه .. ومتجي راسه علئ الكرسي ...

بس لو اعرف شصار له بعد ليله الي بتناها بجزيرة الاميرات
ثاني يوم ماجان علئ بعضه .. جان بارد ... بعيد عني .. وضل هيج لحد مارجعنا .. اي ليش شنو الي صار ..

حاولت بكل جهدي اعرف منه شي .. بس ماكو .. كل محاولاتي فشلت .. احسه مثل واحد لابس درع من حديد حتئ محد يوصله ويخترقه ..

يلمسني .. يحضني .. يشمني .. بس سكته ...بدون اي كلام .. حتئ كلامه الدبش الي مثل السم يصير مرات اختفئ ..

مشتاقه .. مشتاقه .. لهوسه العاطفيه .. مالته ..

هذا مايعني مايقترب مني .. بشكل حميمي ...بالعكس مرات احسه متلهف يمته يجي الليل حتئ تبدي هجماته وغزواته .. يحجي باللغه الوحيدة الي يعرفها ويفهمها .. بس مو مثل قبل احسه متقيد .. عبالك يمنع نفسه عني بالكوة .. او يضم نفسه عني حتئ ماشوفه شلون اثر بيه وشلون يذوب بيه ..

مديت ايدي .. حضنت ايدة حيل.   اي وين تروح مدام يمي لازم اعرف سرك .. قابل اضل دوم حارم نفسك مني .. خليت راسي علئ كتفه وغمضت عيني .. واني افكر بحياتي الجايه شلون راح تمون وياه ...

مااحسيت الا بصوته الخشن يهمس بأذاني ...
ـ كعدي دا يوزعون الامل علئ الركاب وراح يوصلون لنا

فتحت عيني علئ كيف شفت وجهه بملامحه الصلبه كدامي .. رجعت غمضت عيني
وحجيت بنبرة وحدة منعسه
ـ امممم .. مااريد اريد انام نعسانه

غمضت عيوني متعمدة .. اريد عنادنه ..
رجع همس بأذاني من بين سنونه
ـ راح تجوعين .. ونوب تكوم نفسج تلعب .. بسج دلع وودلال

ضحكت واني بعدتي مغمضه عيوني .. حجيت واني اتماوع بكلامي
ـ انته وكلني واني نايمه هيج .. واوعدك افتح حلكي علئ لمسه اصابعك

حركت اصابعي لمن لزمت كف ايدة .. واصابعه .. ادري تصرفاتي تضوجه ..

ـ يعني بما انو تعرف للافعال اكثر من الاقوال .. بس غير انته ماعندك اي اقوال تذكر بس الافعال لا اني اشهد .. انطيك جيد جدا بيها

بعدني تلمس كف ايدة ...بس خوفني سكوته ..فتحت عيوني لكيته صافن عليه بنظرة غريبه
ـ هاي شبيك تباوع عليه هيج ...شدا يدور بعقلك المظلم .. مثل ضلام عيونك الي اخبهن واموت عليهن

ضحك .. ضحكه خشنه
ـ تعبيرج حلو الصراحه دا تحسسيني لعابتج مو رجلج

ـ صدكني مراح يعجبك اذا قارنتك بلعابتي .. تدري عندي وحدة احبها ضامتها لهسه عندي .. وعدت نفسي بس يصير عدنا بنيه انطيها لها

اشتعلت عيونه ...شال ايدة لزم بيها فكي .. ضغط عليه حيل .. بأصابعه ..
ـ تعرفين شلون تلعبين .. بس عبالج اني غافل مااعرف .. صدكيني كل سوالفج عرفها عبالج بسلوبج هذا راح تعرفين شكو بيه وشضام مو بالله

ـ ليش ماتسترخي يبو عيون السود ...علئ كيفك ترة الدنيا متستاهل منك كل هذا التحفز .. اني مااستاهل منك ترفع كل قوتك ضدي علئ كيفك ويايه

رخه اصابعه .. وكام يمس بفكي .. عبالك يمسح الالم الي حسيت بيه.   ضحك ... ودار وجهه عني .. حجه وي المضيفه باللغه التركيه الي اني مااعرفها ..

وشكد كرهت انو يحجي وي مرة ثانيه بلغه اني مااعرفها .. الغيرة شتعلت عندي اضعاف مضاعفه ..
وقررت اول ماارجع تعلم اللغه التركيه ..

...
غاليـه ...رافـد

رافـد ..
هاي ماجانت اخر مرة التقي بملاك .. تكررت لقائتنا .. اتصالاتنا ..
البنيه رتاحيت لها كولش .. بيها شي يجذب .. حلو .. تنكت .. تضحك ..

رجعت بعد مالتقيت بيها للبيت .. جان تقريبا نص الليل ..
جانت بعدها الضحكه علئ حلكي .. ماختفت واني اتذكر كلام ملاك .. وسوالفها ..

ـ فتحت الباب شويه .. شفت غاليه نايمه ..

"اي ليش ماتنتقل روح ملاك لجسم غاليه "
ليش ماغاليه تصير مثل ملاك .. "

دخلت للغرفه مالتي وسديت الباب .. ذبيت السترة مالتي علئ الكرسي وكعدت ..
رن موبايلي .. فتحته
ـ الو
جاني صوتها يضحك

ـ تذكرت شي .. تذكر من بكنه بدله سهر الوردي و شككنها .. شلون كامت تبجي وتلطم

ضحكت حيل
ـ بس مو اني البكتها انتي وياسر ..

ـ اوو .. انته جنت المحامي ...صاير لهم عنتر ابن شداد ...بس واحد يقرب عليهم تهد بيه
وشكد ضجنا اني وياسر .. ردنه نضوجك ونضوج ورديه بس تتدلع و تتنغوص علينا ..
كعدنا بالحديقه اني وياسر نخطط .. شلون ننتقم منكم انتم مسويها شله علينا ..
كال ياسر سهر عندها بدله تحبها .. تنزعها اذا رادت تلعب ويانه تخاف لا تتلف .. كوتله ماكو غيرها لعد ابوكها والباقي عليه .. وعينك لا تشوف سويتها وصله ما تلاكي وصله ..

ضحكت حيل ...تمددت علئ الجربايه
ـ بس اخذتي المقسوم بعدها

ـ ماكو جريمه من غير عقاب ...شفيت كلبي غير جان مورم منكم ..

ـ بس انتي بيومها ماكلتي ياسر وياج

ـ تريدني افتن علئ ياسر .. شلون حجي هذا .. غير جنا فريق اني وياه اذا فتنت عليه تخرب

ـ عجبتيني ...

ثاني يوم .. جانت التحضيرات علئ قدم وساق ...لا سهر و ياسر جايين .. رغم احس اكو توتر .. بيني وبين غاليه .. من يوم ماضربتها راشدي وهي ماخذة الصمت مكان وعلاج لها ..

حتئ هاجر وايهم بينهم شي غامض .. سكون علئ توتر ..

بس امي وخالتي تراسين البيت ضحك وسوالف .. وريحه الطبخ واصله ..لسابع جار ..

دخلت للمطبخ .. غاليه تسوي بالزلاطه وامي تكلب بالجدر .. وخالتي تحضر بالمواعين واني انقش منا ومنا ...شافتني امي ضربتني علئ ايدي

ـ ااخ .. هاي عود انتي نبع الحنان ...ماتحنين عليه بدولمايه .. سشالفه نبع الحنان

ـ هاي عادتك ماتبطلها مو صرت شايب ولك .. شفتيه رنا .. ترة من هو زغير هو هيجيكي ياكل قيل لا ينحط الاكل شكد علمت بيه ماكو نفس حطته ..

ـ دادة دخليه .. هسه هو شماكل .. اكل خاله بالعافيه

ـ تسلمين خاله .. والله لا مرتي ولا امي مثلج اثنينهن ميحبني ..

جنت متقصد بأخر كلمه رفعت راسي لغاليه لكيتها تباوع عليه ..
يمكن الكلمه الاخيرة ...صابتها ...واجت بمكانها ..

اي الئ متئ ابقئ صابر .. شوكت تنحل القعدة .. عمري خلص واني صابر وامنتظر وماادري النهايه شنو ..

جنت صافن ...وصحاني صوت الهوسه ...وهلاهل .. اها
كالت وهي بعدها بمكانها

ـوصلوا شنو مسمعت خالتي دا كولك وصلوا ..

هزيت راسي وطلعت وهي طلعت وراي ..

لكيت امي وخالتي مستلمات ياسر وسهر بوسات ومحاضن .. خالتي خطيه .. حاضنه سهر وتبجي .. اول مرة وحدة من بناتها تسافر وتفاركها ..

ـ ياجماعه شنو سالفه قابل جانوا مهاجرين ترة جانوا بشهر عسل ..
سحبت ياسر سلمت عليه ..
ـ شلونك ولك

ـ زين الحمد لله انتم شخباركم ..

ـ تشوفنا بخير
كعدنا كولنا متجمعين .. نسولف ونضحك والجمعه الحلوة ...شويه خف التوتر ...الفرحه بسهر وياسر ...سيطرت علينا ..

بهذا اليوم ماكدرت احجي وي ملاك .. وهي مابطلت دز رسائل و تتصل ..

..
ثاني يوم ...وصلت غاليه للمكتب ورجعت للمطعم ..
غاليه بعدها بعيدة عني .. مااعرف احس روحي دا تتعذب لهذا البعد الي دا احس بيه ..

سحبت نفس من جكارة ودخلت للمطعم وذبيت روحي علئ كرسي من الكراسي .. وسمعت صوت وراي ..

ـ شنو دا تطلع حركتك بالجكارة دا تنتقم منها

رفعت راسي شفت ملاك كدامي .. بأناقتها المعتدادة ..
ـ مساء الخير ملاك ..

ضحكت بوجههي سحبت الكرسي الي كدامي وكعدت .. خلت رجل علئ رجل .. بنيه مثلها تفيض انوثه وجاذبيه .. مو طبيعيه ..

حجت وهي تعصر برجلها
ـ مريت حتئ اتعشئ عدكم .. اليوم جان كولش متعب .. شغل بالكوة خلصته ..

شلت راسي عن رجليها .. وباوعت لعيونها
ـ لوجنت بمكانج جان رحت للبيت .. اخذ فد حمام .. وتعشئ للجربايه كبل انام وارتاح

ـ بصراحه اني تعبانه نفسيا اكثر من التعب الجسدي ..

ـ ليش مديرج رجع يضايقج .. مو حجيتلي عنه مرة كوتلتي دا يضايقج ماعرف شلون

ـاي نفسه ...بس هو مو مديري .. مديري ...هو مسؤول عن التنسيق وتنظيم القسم الي اشتغل وياه .. تعرف اني اشتغل بقناة .. بس هل ايام صاير فد مزعج ويتأمر حضرته بكيفه

بأبتسمت بوجهي
ـ هذا عقاب كل وحدة تقبل بعرض زواج من مديرها

رفعت جواجبي لها اسال

ـ هاي شنو خطبج! ?

ـ اي بس هو مايفهم .. اكوله ماكو اي توافق بيناتنا .. تعصب وهاي النتيجه

نزلت راسي .. واحس بديت افهمها .. دا تضرب علئ وتر حساس .. صح وضحت لي كم مرة من خلال شقاها ...اوكلامها .. بس ماتوقعت تحجي صدك .. البنيه بداخلها شي لي .. شكد ضجت من نفسي .. حسيت ...اكذب لو كلت مااحسيت بس غلست ...احس نفسي اني هم ضحكت عليها ...ليش مارفضتها من اول مرة ...اول اتصال ...اول لقاء ماجان وصلنا لهنا ..

بس اني رجال .. رجال احتاج احس انو اني مرغوب

احتاج احس اني انسان من لحم ودم ..

صار لي شكد واني غركان بمحنتي ..

لهذا الحوار .. بس اني نبهتتها اكثر من مرة ...مستحيل يصير شي .. اني كلبي ملك وحدة وحدة وبس ..

واني محنتي صارت اصعب .. وماكو لها اي دوة ..

صدوك الموضوع صار مينطاق واني عايش لوحدي خاصه هاي الايام ..

احس بديت اصير ممل .. باهت وبديت افقد روحي .. كل واحد من خواني بدا حياته.   بس اني واكف اراوح بمكاني ..

تنهدت بصوت مسموع ..
ـ شاركني ببكولشي يضايقك مثل مادا اشاركك بكولشي يضايقني .. مو احنا اصدقاء. ..

رفعت راسي لها ...لكيتها تراقبني ...عيونها .. ماادري ليش رف كلبي عليها ..

ـ بعدة ابوج مسافر ..

ـ الاصح كول اجه لو بعدة ...ليش هو يمته رجع من السفر حتئ بعدة .. اكولك سر ترة هو متزوج ومبين مرتاح وياها لذلك مايجي

ـ شلون .. لعد ليش ما ضليتي وياهم.. لو ماترتاحين وياها

ـ المرة عاديه .. بس اني مدا احس البيت بيتي احس نفسي ضيفه .. لازم اعرف يمته اروح وماثكل علئ اهل البيت

طفيت جكارتي بعد ماشعلت بيها وحدة ثانيه
ـ غربه بنص الاهل .. اكدر افهم مشاعرج لهذا فضلتي تبقين وحيدة هنا .. علئ الاقل تحسين نفسج ببيتج

ـ اني بعد مااكدر تحمل الوحدة رافد .. اريد واحد يشاركني بيها .. اريد انسان يملي عليه حياتي بضحكته بشقاه .. بسوالفه

تصاعد الدخان بيناتهم ووجهم واحد مقابيل الثاني ...بدون مايحسون ... بذيج الشفايف الي
رعشت لمن شافتهم

لحظات طال السكوت بيناتنا .. رديت عليها ..
ـ اسالي خبير! ? يكولك اسال مجرب ولا تسأل طبيب

نفس ناعم طلع من بين شفايفها .. شفايف مصبوغه باللون الاحمر .. اي رجال جوعان يطمع بيها .. نزلت عيوني عنها .. واني اشوف بعيونها مشاعر مفضوحه .. وجعني كلبي عليها وعليه وعلئ غاليه

ـ ديري بالج ادورين بيت او وطن بمكان مزتحم بسكانه راح تحسين بغربه اكبر .. دوري علئ مكان يليق بيج .. لكل واحد بينا وطن ومكان. يلتمني له غاليه

حسيت بيها تفاجئت .. فتحت عيونها علئ وسعهن ...عبالك نضرب راسها بحايط قوي
ـ غاليه! ?

انتبهت لنفسي
ـ العفو ملاك

ـ بس رافد

ـ العشا علئ حسابي الليله ..

ـ مراح تشاركني تتعشا ويايه

ـ عندي شريكتي  تنتظرني راح اجبيبها من الشغل وتعشا وياها بالعافيه
لوجنت ضاربها راشدي ماجنت صحت مثل هاي الصحوة .. احسيت نفسي كعدتها من احلامها الورديه ..

ـ يلا مع السلامه

ـ الله وياك ...الله وياك رافد ..

غاليـــه ..
"صفر من السنين ...صفر من الايام ...صفر من الاشهر ...صفر من الساعات .. حتئ اللحضات .. صفر ...صفر ...صفر "

"بعد الصفر يجي واحد "

كاعدة اعيد كلامه براسي ..
اعيد ...وعيد ..

دا ادور علئ واحدك هسه رافد "?

راح اخسرك انت هم "?

غمضت عيوني واني سارحه ...بأفكاري عن الي كاعدة يمي ..
دكتورة فريدة

من ايام واني ادور عليها .. كمت اتقرب منها خطوات خجوله .. ماردتها تحس بيه ..

بس اليوم عزمتها علئ مطعم رافد .. دكتورة فربدة ساكنه بالعمارة الي اشتغل بيها فوك .. اصادفها مرات بالطلعه والطبه وتعرفت عليها ..

خذتها ورحت للمطعم وياي .. تزلنا من السيارة اول ماادخلنا .. صدفت من شفت رافد كاعد وي بنيه .. بس مو كعدة طبيعيه ...لا جانوا متقاربين .. دا يسولفون بشي معين ... مفاصلين عن العالم من حولهم .. ماتحملت خذت فريدة وطلعت ..

ـ حبابه تعالي نشوف لنا مكان ثاني نكعد بيه ..

المرة مامانعت .. اخذتني بسيارتها .. وهي الي اختارت المكان هاي المرة .. كافتيريا زغيرة .. طلبت عصير لي وكهوة لها .. وشلعت جكارتها .. وكابلتني وكعدت واني جنت مااعرف بغير عالم صافنه بالي شفته ..

ـ اها شلونج .. مارتاحيتي هسه ..

فزيت علئ صوتها .. بعدني اريد ارد عليها واحاجيها دك موبايلي ..
صفنت علئ الاسم .. مو صفنت جمد كولشي بيه ...
كتبت له رساله ...واحس النار دا تطلع من عيوني .. اسهله ..

رسلت الرساله .. ودك مرة ثانيه ...رفضته .. وسديت موبايلي .. غلقته تماما

رجعت علئ الكرسي تنفس .. من دريت بفريدة دكتورة نفسيه ..واني افكر .. اني محتاجه دكتورة نفسيه لو لا .. كل مرة اشوفها تصعد وتنزل ...ينعاد السوال عليه ...عبالك وجودها كان لسبب معين ...كان لرادة معينه .. كانت اشارة لي ..

وصار الي صار عزمتها علئ عشا بمطعم رافد .. وجانت هاي خطوتي الاولئ بأتجاه فريدة

ـ هديتي هسه .. ممكن نحجي شويه

رمشت بعيوني ...واني منحرجه منها ..
ـ اني اسفه ...دكتورة اعتذر

ـ لا تتأسفين عادي مصار شي

بس ماكدرت الا انحرج منها اكثر واكثر
ـ دكتورة اني اسفه لان خليتج تفترين بسيارتج بينا من مكان لمكان ومفروض اني عازمتج

غمزتلي وهي ترد عليه ..
ـ اقبل اعتذارج بس بشرط

ـ ليش عزمتيني اليوم لمطعم زوجج ..

توترت اكثر .. احسها قرتني .. وقرأت حساسي
ـ اني ...اني كولت نصير صديقات

ـ شكد عمرج غاليه

ـ اني ببدايه الثلاثينات ..

ـ واني عمري بالخمسين ...

تعحبت عليها .. معقوله
ـ مممبين عليج .. عبالك بعدج زغيرة

ـ هذا الشي بفضل ... اذب همومي وره ضهري .. والاكل الصحي .. والمشي والركض .. و تركت التدخين ...يعني من فترة بسيطه ..

بدون وعي او ادراك رفعت عيني لجكارة مالتها .. طفتها هي بالمطافيه ..
ـ جانت جكارة وداعيه ...وداعتج

بدون وعي مني ضحكت ..
ـ هسه راح تكولين لي لو لا

ـ ليش اخذتني وياج .. لمطعم زوجج..  احسج تريدين ادخليني لدائرة حياتج وخاصه زوجج اخذتيني ومنتظرة مني .. تقرير مفصل عن الي راح اشوفه.   او الي راح انصدم بيه ..
لاتكولين صديقات او صدفه .. علئ الاقل هذا الي حسيت بيه .. وتعرفين اني حساسي ميخيب ابدا ..

مااكدرت اجاوبها او ارد عليها ..
ـ زين البنيه الي وياه تعرفيها ..

ـ لا .. مااعرف وجهها مو غريب عليه شايفتها قبل بس ماذكرها ..

ـ غاليه انتي محتاجتني كأخصائيه نفسيه ..

ـ مااعرف صدكيني مااعرف .. !? اني يمكن محتاجه شخص ينصحني .. احس نفسي تايهه انتي ششوفين اني محتاحه دكتور نفسي ..

ـ زين خلينا نحجي كصديقات .. اولا اني راح احجيلج عن نفسي .. وبعدين انتي احجي عن نفسج ..

سكتت واني اسمع لها وهي تحجي
ـ شغلي اخصائيه نفسيه مثل متعرفين تزوجت دكتور شاكر من. خمس عشرين سنه اختصاصه عظام وكسور ... عندي ولد اثنين منه .. واثنينهم يدرسون برة ...طب ..

بديت استرخي واني اسمع كلامها ...صوتها مميز يهدي الاعصاب ..
ـ امممم ...شنو بعد زوجي اكبر مني بست سنوات .. تزوجنا زواج تقليدي بظاهر .. بس بالحقيقه اني حبيته .. بالخفيه بيني وبين نفسي .. وسويت شغلات معينه خليته يخطبني

كان من اقارب والدي .. وعندة طموح .. انعجبت بيه كولش .. وهو يمكن انعجب بوكاحتي فأرضخ للامر الواقع وخطبني .. وتزوجنا خلال شهر واحد وبتلئ بيه ..

ضحكت واني اشاركها الكلام
ـ من جنت زغيرة هم جنت وكحه .. مانحمل ..

ـ هسه دورج شلون تعرفتي بزوجج

رجع التوتر سيطر عليه بعد ماغادرني ..
ـ ابن خالتي واكبر مني بـ 10 سنوات ..

ـ وعندج اطفال لو لا

رديت واني انزل راسي ...داهمتني كل المشاعر المتناقضه .. خوف علئ توتر .. علئ حزن .. وذكريات مؤلمه
ـ اثنين .. بنات ...

ـ حلو لعد يمته تزوجتوا ..

ـ يعني صارنا فترة .. بسيطه ..

ـ اها لعد البنات من رجال ثاني ..

ـ عندي بس وحـدة ...الثانيه ماتت ...قـ ...تلها ابوها ..

ساد الصمت بيناتنا .. عيونها توسعت .. وشفت نضرة الحزن بعيونها لي .. بس اني ماامدرت غير تنساب دمعه علئ خدي ..

عظم الله لكم الاجر بحلول محرم الحرام .. جعلنا الله واياكم مـع ركب الحسين عليه السلام ..

استمتعــوا ..
اقروا ..
البارت مابيه فقلات .. وخالي من ايهم وهاجــر .. اليوم غاليه ورافــد مسيطرين علئ الاجواء ..
تتوقعون قصه ملاك لهنا وانتهت ...لو بعد اكــو ..

بالنسبه للنشـر بايام عاشوراء هل تريدون يستمـر لو نوقف بهاي الا يام
علقوا هنـا ..

نوقف .. 

نستمــر.. 

احبـــــكم ..

اكيـد مااحتاج اوصي علئ التعليقات و التصويت ..