رواية أهدتني عاراً الفصل الأول 1 - بقلم نورا ناصر

جنت  بغرفتي متمدد على السرير واني مسلوبه مني الحياه وتارك كل شي شغلي وحياتي وكانه مدفون بالدنيا والجكاره متفارك اصابعي انفث الدخان واشوف الي صار واغمض عيوني اريد مااشوف ولااسمع واني على هالحال  اجاني ابن اخويه وكلي جدو يريدك 
هزيت اله راسي ببرود ويأس بدون ماانطق وطفيت الجكاره بنفاضه مليانه بالسكاير موضوعه  بجانب السرير وكمت من  نزلت جوه.
صارت گبالي عمتي كواكب اخت ابويه وهي تباوعلي بنظرات غريبه ضوجتني عطت بيها بعصبيه
- خير شبيج راح تاكليني بعيونج ؟
كواكب :عزا العزاك انت منو يمك
جهاد :هاي نضراتج وحركاتج ومامسويه شئ؟؟
كواكب : ولك استحي اني عمتك احترمني
جهاد :هو اني روحي مامحترمها ترديني احترمج؟؟
كواكب :لاتنسى هاا تره ...
جهاد :ماخليتها تكمل كلامها كتلهاا .هيييه وانت هم  لاتنسين اني حذرتج وتعرفيني بايع الدنيا وخاسرهاا
خليتها دارت ظهرها وراحت وهي تهف بيدها.
لزمت راسي وغمضت عيوني واني احس ميت و ضايع وتوجهت للاستقبال اشوف ابويه.
دخلت عليه شفته يباوعلي نظرات وكانه متفاجئ بشكلي صارلي هواي بالبيت بس حابس نفسي بالغرفه ومحد يشوفني.
جهاد :خير يابه طلبتني ؟؟
ابو جهاد : جهاد لشوكت راح تبقى حابس نفسك  وتارك شغلك مو انته الملازم الموكف البصرة على تك رجل هيج تضعف من اول موقف؟؟
جهاد : ليش الي صار شويه يعني اني انهدالي عار وتريدني انسى بسهوله شنسى يايابه شنسى ؟
الاب :انت قاتلها موو ؟؟
جهاد :واذا قاتلها هذا وسام شرف واعلكه بصدري
الاب : ليش مادور على عرضك لعد ؟
جهاد : عرضي لما حفضني مااريده للجير
الاب :لك انت صاير مو رجال
جهاد : وين اكوو رجوله واني اسمع لكل يتهامس مرت جهاد انهزمت ويه ابن عمه
الاب بغضب  : لك انته رجال وغصبا علئ الكل تعبت وكبرتك ووصلتك صرت ملازم بجهودي اني افتخر بيك هيج تصير ضعيف وتنزل راسك مره ؟؟
جهاد بقهر : لا مانزل راسي وراح اثبت للكل مو مرة لتنزل راسي راح اكولهم اني انهدالي عار بس رفضته
الاب : اي عفيه هذا ابني السبع هذا لما تغلبه الضروف ويوكف علئ حيله وهذا جهاد البطل
جهاد :يابه اني تعبان واريد ارتاح تريد شي بعد ؟؟
الاب :روح ارتاح ابني وغير وقت نكمل حجي.
جهاد :صار يابه من رخصتك
طلعت من الاستقبال وفتت بالممر اسمع اصوات اهلي اصوات تبث الحياة احس الكل عايش بس اني ميت
قبل فتره جنت  ملتحق بوحدتي   بالبصره اتصلوا عليه اهلي.
اخويه فؤاد گلي تعال زوجتك ماكو بالبيت اختفت وحتى اهلها ميعرفون عنها شي.
وبعدها حجوا ويايه امي وابويه سألوني اذا اعرف عنها شي اني همين كتلهم مااعرف  من وين اعرف واني بالبصره وصار الي يومين ملتحق  وهي بالبيت يمكم  ابغداد؟؟
اكدوا عليه ارجع ورجعت للبيت جان مخبوص خبص وهوسه.
اني جهاد عمري 33سنه ملازم اول بالداخليه واداوم بالبصره متزوج من سنتين وماعندي اطفال.
صار يومين على اختفائها واكتشفنا بنفس الوقت ابن عمي هم مختفي هنا الكل صار يشك بالموضوع
خاصة جانت اكو علامات عليها انه عدها علاقه ويا والكل صار مقتنع انهم  انهزموا سوه.

بس وصلت للبيت تلكتني امي وهي تبجي مثل المفجوعه
الام : يمه جهاد ماعندك حظ ييمه مرتك نهبت ونكست راسك وراسنه كلنه والمصيبه نهبت وي ابن عمك شحجي شكول العالم شتكول علينا.
بوست راسها وحضنتها بقوه ضاعت بين ايدي هي قصيره وناعمه واني ضخم بس ماحجيت كلمه مبين عليه البرود بس بداخلي براكين نيران متوجره وهذا الوصف قليل بحق الي داحس بي.
طلع ابويه وظل يحجي بعصبيه على امي
الاب :على كيفج يامره هسه منو يكول نهبت وي ابن عمه مو يمكن عنده ضرف طالع مسافر صارله شي ليش تضلمين بختها وبخته  تعال ابني تعال ابو زوجتك ينتظرك.
جهاد :تنفست بالم ورحت وره ابويه للاستقبال
جانوا كاعدين ابو زوجتي رؤى واخوها

دخلت قبل لااسلم وكف ابوها من كعدته وتلگاني بلهفه وحزن ومبين عليه الانكسار

- :بويه جهاد كول مرتك خطفوها كول عندك عداوه وي احد كول بحكم شغلك بالدوله صار هالشي.

نفس الحسره جريتها بوجع جاوبته واني كوه اطلع الكلمه ومالي نفس حتى لاستنشاق الهوا

-  ياعمي اني ماعندي عداوه وي احد طول عمري امشي بصف الحايط وبعدين فرضا احد يريد يستهدفني اني شغلي بالبصره يستهدفني هناك مو هنا.

بعد طول كلام لايودي ولايجيب ولابي فايده
تقرر الانتظار 3ايام اذا بقت مختفيه وابن عمي همات نلجأ للنسوان ونشوف حجيهن اذا شاكات بالموضوع او لا.

خلص النقاش وراحوا اهل رؤى لبيتهم طلعت من الاستقبال وكل العيون عليه خواتي ومرة اخويه وعمتي ونظراتها الاستفزازايه طكيتها خزره خافت ودخلت جوه بعد ماشفتها.

امي جانت كاعده وتبجي وتضرب على رجلها تلطم
كعدت كبالها على ركبي وبوست راسها كتلها
يمه كافي كافي لايروح يصير بيج شي يعني شترديني اسوي اضرب روحي طلقه واخلص من العار

الا ييمه لاتكولها الف اسم الله عليك من غديت فدوات الگلبك ماعندك حظ ييمه يجهاد ماعندك حظ

اني ماعندي حظ شسوي ماتگليلي كافي تبجين كااافي.

عفتها وصعدت فوك لغرفتي كرهت الغرفه كلها وكل شي بيها طلعت باكيت الجكاير وبديت احرك اما داخلي حاله من حال الجكاره مشتعل شعل.

طلعت بره الغرفه صحت على اختي ضمياء
كتلهه باعي اني رايح انام بغرفة عماد من اكعد ماالكه اي شي يخصها بالغرفه مفهووم ملابسها مكياجها كله تطلعي

ضمياء :وين اوديهم ؟؟

:ظليت اصيح بعالي صوتي ماادري وين تودينهم للزبل شمريهم مااريييد اشوفهم گباالي.

:بتلعثم صاار خويه.

:حتى فراش الجربايه هم شمري مفهووم.

عفتها مصدومه ورحت لغرفة اخوي الصغير عماد ممتزوج مجان موجود بساعتها قفلت الباب من جوه وتمددت ع السرير  وخليت المخده على راسي وبقيت بالساعات كاعد احس نفسي عاجز حتى عن النفس.

مرت الثلاث ايام بسرعه واي خبر عن رؤى وابن عمي عامر ماكو !!!

الايام المرت اني كضيتها بالبيت وكعت بالمرض اي شي يدخل معدتي ميبقى بيها لدرجة بقيت بلا اكل غذائي التدخين وبس.

ماكو شي يخفف عني سوى مواسات امي الي ودعواتها وكلام ابوي الي يصبر عليه متعجبين من هدوئي وبرودي ميدرون الي بداخلي شنوو.

تحدد موعد الجلسه العصر ابيتنا واجوا ولد عمي اخوته لعامر وامه وزوجته
واهل رؤى

امها وابوها واخوتها صارت جلسة نسوان وزلم
بعد ماسألوهن امي كالت

اني ياما حذرتها لبنتكم وكتلها تصير ادميه بس هي متاخذ الحجي شكيتها لجهاد بصوره غير مباشره كتله ييمه مرتك مامحتشمه وميانتها زايده وي ابن عمك تشاقه وتضحك هواي هيج ميصير 
هو صار عصبي وصارت مشكلة جبيره
يجي تعبان من البصره كلت مااريد اتعبه لذلك شكيتها لامها وهاي كدامكم ام رؤى ماجيت كتلج اني ع التسوي بنتج.

ام رؤى :اي والله جيتي واني حاجيتها كتلهه نكرت ودكت القرأن
ابو رؤى كام يريد يهد على مرته لو ماا اولاده سكتوا ظل يصيح
ولج هسه تحجين بعد ماطاح الفاس بالراس ليش ماكلتي من الاول.

زوجة عامر :كالت اني جنت شاكه بالموضوع وياما حاجيته بس هو ولا يمه كتله فكر بابنك ليش هيج تسوي وكم مره اكول العمتي عليه  اصعد  فوك السطح اشوفها تسولف ويا حتى زعلت منه ومافاد اخر ليله طلع نص الليل وبعد مارجع للبيت.

خلصت النقاشات وتصدقت اقوال النسوان
ابو رؤى بالم وانكسار ويأس نزع عكاله وكال ماللبسه اله ترجع واغسل عاري منها.

اخوها كال دمها ودمه مهدور
اما اخوة عامر رفضوا هذا الشي وكالوا انتوا عليكم ابنتكم واحنه نعاقب ابنا.

:اني جنت صافن على كل الي يصير بعد ماخلصت النقاشات وكلمن راح لبيته اخذني اخويه فؤاد على صفحه .

كال شنو هالبرود العندك صدك جذب جهاد  دمشي ندور عليها ونسلمها لاهلها خلي يغسلون عارها

جاوبت:لاادور ولاتعب روحي وين ماتولي ختولي لللجييير.

:انت صدك تحجي جهاد شبيك انت مو جهاد الي اعرفك

:جهااد ماات خلصوني تعبت سدوااا هالسيره هاي سدوهاااا.

:لك عيب من اهلها هم جاي يدورون عليها ماخلوو مستشفئ ولا منتزهات ولااطراف بغداد كلها دوروها وانت نايم حالك حالك حال النسوان.

:عفته وصعدت فوك الغرفتي.
الكل متعجب من برودي واني نار تاكل بيه.
مرت أشهر على اختفائهم وماكو خبر عنهم ابد
بهالفتره جنت متذبذب بدوامي وهواي ماداومت
لحد ماابويه قنعني ارجع للدوام واللتزم بي
كعدت من الفجر  ولسه اليأس مسيطر عليه ومالي نفس بالحياة احس كل شي وكف من الحادث لهسه
بدلت ملابسي وحضرت عدتي ونزلت جوه شفت امي جاي تصلي بالهول كعدت انتظرها تخلص حتى اودعها واروح.
خلصت واجتني
هاا يمه رايح خلي اسويلك ريوك كبل لاتروح

:مااريد يمه لاتعبين نفسج

: ييمه شصاير بيك شعرك طولان ولحيتك لو محلق قبل لتروح

:هسه بس اوصل البصره احلق هم مايصير اداوم هيج.

: دير بالك على نفسك ابني وانتبه للطريق ييمه فكر عندك ام تخاف عليك

:ان شاءالله يمه لاتخافين ماعليه شي.
:خلي احطلك كليچه للطريق خاف تجوع الطريق طويل
:لاتعبين نفسج يوم اني اشتري  واكل
:لا حتى يرتاح قلبي خليني احطلك
:يلا لعد اني اشوف ابويه  بينما تحضرينهه
رحت ادور على ابويه شفته ديتوضأ وكفت يمه خلص وضوئه
الاب :اي هذا ابني البطل جهاد الي اعرفه جبل جبل ومايهزه ريح.

: تحسرت وبقلبي گلت ايييه جبل مصدع ومفطور القلب والروح مهشمه ومسلوبه.
بوسته على راسه واخذت الكليچه من امي ودعتهم وطلعت بسيارتي
الطريق طوووويل وممل حتى لو ناسي السالفه تجي على بالي شغلات تذكرني وتضوجني
موصلت اله بشق الانفس المرهقه والمنهكه
قبل لا اروح للمركز نزلت يم واحد من اصدقائي حلاق حلقت وطلعت للمركز.

رحت للضابط وحجيتله ع الظروف الي مريت بيها بس مكتله زوجتي اختفت كتله ماتت.
تفهم ورحت لمكتبي.
كعدت ع الكرسي وبديت اقلب باوراق المجرمين
ثواني ودخل عليه شرطي يشتغل جوه ايدي اسمه محمد.

كال :شلونك سيدي مشتاقيلك وين هالغيبه ؟
:هلا بيك محمد والله ظروف صارت وزوجتي توفت.

:البقيه بحياتك سيدي والله ظل بالي عليك وشكد اتصلت بيك جهازك مغلق

:اي والله مالي خلك لشي.

:اني اترخص سيدي محتاج شي 

:اخذ راحتك محمد.

وره ساعه من الشغل دخل محمد وبيده صينية بيها مشاوي.

يلا سيدي تنقصتلك الغدا تفضل ناكل سوه.

:ليش كلفت على نفسك يمعود عندي كليچات الوالده عود نطكطك بيهن

:لاسيدي ماترهم انت جاي من طريق طويل ورأسا للشغل اكيد جوعان.

:مايرد الكريم الا البخيل يلا بس اغسل ايدي.
غسلت ايدي وكعدنا ناكل اني ومحمد.

محمد :سيدي اني جبرتك وزواجك عليه.

من حجه هيجي اني غصيت بالاكل يازواج بهالزلك
كتله واني اخذ منه كلاص الماي
لايمعود توبنه يازواج بعد ماافكر بهذا الموضوع.

:سيدي مويكولون اخطب لبنتك قبل لتخطب لابنك اني عندي اخت وهي يتيمه مثل متعرف حتى ابويه مشافته ومالكه احسن منك انت تصير الها اب وكل شي گبع واخذ !!!

حاولت اتهرب من محمد ومن الموضوع كله كتله لا يمعود اعفيني اني ماامفكر هسه بالزواج والله يستر على اختك ان شاءالله وعاشت ايدك على الغدا

:سيدي مااكلت

:اكلت نعمه الحمدلله شبعت.

رحت غسلت وكعدت اكمل شغلي.
واستمرت الايام ومحمد يلمح ويكول ننتظركم تجون ومن هالحجي واني كل مره اغلس عنه واتهرب منه.

بعدها رجعت لبغداد صرت اكره ارجع لبيتنا لو ما امي كاسره ظهري دوم تخابر تكلي تعال مشتاگه اشم رويحتك لا تجفي لاتطول عليه غيابك لاتحرك گلبي فوك ماهو محترك عليك وعلى الي صار بيك.

صرت من امشي بالمنطقه احس الكل يحجي بسالفتي لذلك ظليت من اروح كله بالبيت حتى خواتي المتزوجات من يجن ماانزل اسلم عليهم اقفل الباب وماشوفهم انعزلت عن العالم كله صرت اتحسس من كل شي ودوم متوتر وعصبي.
بس بالشغل ارتاح لان محد يعرف بسالفتي.

تذكرت رؤى
جانت جميلة جدا عيونها خضر كبار وشعرها اسود ماي سرح وعدهه خدود وجسمها كلش حلو
كل شي بيها مثالي وكامل والكمال لله وحده
اول ماشفتها بالمنطقه جانت جايه زياره لاقاربها عجبتني كلش وظليت امشي وراها هي ووياهه وحده شفتها دخلت للاسواق دهلت وراها ظلت تباوعلي وابتسمت جمالهه فد شي وعيونها عالم ثاني من الجمال بلون الزمرد الصافي.
حسيتها خفيفه تباوعلي وتضحك بس مااهتميت جذبني جمالها ومافكرت بالاخلاق ابد.
تبعتها لبيت اقاربها ودزيت امي تخطبها وصارت الي.
غمضت عيوني ردت ابعد هي الذكريات عني.
كمت ادخن وافكر راح بالي لمحمد وتخيلت شكل اخته يمكن تشبهه وهم عدهه شوارب مثله.
محمد خلوق وملتزم فكرت باخته هو الي مربيها لان يتيمه ابوها ميت من هواي.
بعدها طردت الفكرة من بالي، مااريد ازوج اني مامستقر ومتشتت وكاره النسوان كلها
احسهم كلهم خاينات.
اخذت باكيت الجكاير ونزلت جوه يم اهلي.
لگيتهم كلهم متجمعين بس كواكب تشعوط مدري وين ارتاحيت لعدم وجودها وكعدت بيناتهم
امي ابتسمت بوجهي ابتسامه حزينه بادلتها الابتسامه تقربت مني وحضنتني كالت يمه عمتك وخالتك انطونه نسوان الك اختار منو تريد تناسبك حتى نخطبها الك ؟
وخرت ايدها ووكفت  مصدووم من كلامهاا كتلها شنوو شدكولين انتي اني مااريد اتزوج.
جاوبتني بحنيه وهي تحط ايدها على كتفي وبصوتها الحزين..يمه جهاد ازوج ازوج والله اذا ازوجت راح تبين للناس انت مو ضعيف وماهمتك مره.
صرخت بعصبيه واني احس بمرارة بجوفي...ترخ والله خبلتوني مو ضعيف مو ضعيف...وعبالك كل شويه تذكروني بضعفي
امي بحنيه..جهاد..ماخليتها تكمل كلامها ورفعت اصبعي بتهديد يمه مامسموح الج تدخلين بخصوصياتي مفهووم
شفت ابويه عاط بيه بغضب لك جهاد لا ترفع صوتك على امك واحترمها تره زودتها والله والله لا اشوفك وجهي الثاني
سكتت وغصيت بالكلام.. لعفوو يابه ورجعت بست امي واعتذرتلها شفتها نزلن دموعها ارتبكت من شفت دموعها هي مو ذنبها بس،اني من قهري اذب حركتي باي شخص يصير كدامي
مااعرف ليش حسيت بضيق من كلام امي وانقهرت عليها خطيه شايله همي وهي متعرف بنار المتوجرة بداخلي وبهاي الاثناء اذكرت طلب محمد كلت بكلبي اناسب الغرب ولا اناسب عمامي وكرايبي
رجعت حضنتني بحنان وكالت يمه جهاد اريد ارتاح ريحني يمه ريح قلبي والله تعبت فكري وبالي كوله يمك..احس همك سرطان ينهش،بعضمي
رجعت كلت الها يمه اني مااريد من كرايبي تعرفين خيانة  ابن عمي بعدها تسري بدمي والله كرهت اهلي وناسي وعشيرتي وكرهت دمي لان من نفس صنفهم

بست ايدها كتلها يمه هذا هو ان شاءالله هذا الشهر جنتج بالبيت بعد شتردين تامرين امر.
كالت بفرح اخطب الك بنت عمتك لو بنت خالك انت اختار.
كتله لا عمتي ولا خالي صديقي انطاني مرة والنه كلام ثاني والي شروط لان مااريد اهل صديقي يعرفون مرتي انهزمت
بقلبي كلت محمد مامتحكم باللسانه واخاف يفضحني،بالمركز وبين الضباط.
الام :لعد يمته نروح نشوفها
جهاد :صبرج عليه يمه خلي ارد خبر للولد.
خليت امي تدعيلي وخواتي وابوي فرحانين
وطلعت من الاستقبال واتجهت صوب المطبخ اريد اشرب مي.
قبل لاافوت للمطبخ سمعت مرت اخويه تكول لاختي زين رؤى شلون راح تتزوج عامر وهي على ذمة جهاد ؟
ضمياء :اكيد تطلك غيابي.
جهاد:قبل لايكملون حديثهم اتسحبت من مكاني وغلست على شرب المي ونسيت اني اصلا عطشان
وصلت لباب الاستقبال شفت عمتي كواكب عبايتها على راسها وفاتت للبيت
رحت يمها تريد تتجنبني صرت گبالها خزرتها كتلها وين جنتي تشعوطين هاا جنتي بالبيوت تفتنين مو لزمي كاعج لااحركج حرك افتهمتي.
كواكب :يا شبيك انت متخبل هاا شبيك اله اكول لابوك عليك يخليلك حد اني مااتحملك بعد.
جهاد :شتكوليله هاا شتكولين والله ادفنج دفن لاتنسين تحذيري الج تره اني جاد بكلامي وياج
كواكب :ايييه والله مصختها خايب روووح.
جهاد :تنفست ومسحت على شعري وصعدت فوك
ورجعت الي ذكرياتي وي رؤى.
من تزوجنا وبعد الزواج جنت احبها ومدللهه حييل
ومن صار ابطنها طفل ومات كلش انقهرت.
بس مجان مقسوم يجي للدنيا حتى لايتعذب
مره اشتكت امي منها واني اعرفها لامي مراه حقانيه وماتكذب ابد مو لان هي امي لا بس اني مشفت مثلها مره تعرف الحق وماتظلم احد.
كلتلي ييمه مرتك مامحتشمه وميانتها زايده وي ابن عمك.
من حاجيت رؤى نكرت وظلت تعيط وحلفت مية يمين هالحجي جذب وكالت اصلا الكل يغارون مني ومن جمالي اني معندي شي ابد.
اريد انسى اريد ابعد كل هالذكريات التعيسه عني مداكدر.
قررت اتواصل وي محمد وافتح ويا موضوع اخته اذا بعده يريد ينطيها  او لا.
يتبع.