رواية أهدتني عاراً الفصل السادس بقلم نورا ناصر

#أهدتني_عارا
6
بقلم نورا ناصر

كاعده بباب بيت اخوها وحاطه المخضر كدامها ويغوغي عليها الذبان ضمت الطماطه الخربانه جوه وخلت الزينه ليفوك.
اخذتلها تفاحه وتكرط بيها وبقهر...الله لايوفقك ياجهيدان يالكلب يالمجرم صرت سوده من الشمس اني تاليها ابيع مخضر حتى اطلع مصرفي.

وبهالاثناء اجه ابن عمار /...بيبي امي تريد طماطيتين تريد تسوي زلاطه لأبوي.

ردته بعصبيه /...انعل ابوك لابو حتئ الخلفك اوزع سبيل اني روح جيب الف من امك واني انطيك.

راح الولد...وكواكب تتذمر ..شلون ناس جحوفه يجدون الطماطه جنت عايشه ومرتاحه هسه بالضيم شكول عليك ياجهيد الخبيث حرمتني من بيت اخووي ان شاء الله سيارة بدون رقم تمردك مرد
كامت شالت صندوك الطماطه ودخلته جوه
وبعدين طلعت وانصدمت !!!!

شافت الطليان والصخول مالت الحجي هاجمه علئ المسواك
ظلت تصيح ...يمممه الحكولي ... ركضت علئ الطلي الي حاط باكة السلگ بحلكه ويعلس بيها !!!
طلع عمار/...ولج عمه عوفي السلك اركضي علئ التفاح اكلنه الطليان
ركضت علئ الطليان تنش بيهن والرجال ينش
شافت ماكوو فايده راح المسواك.
ركضت وراهم خمطتلهه صخله ودخلت بالبيت.
كعدت بالطرمه وبحظنها الصخله
دخل وراها عمار / عمه رجعي الصخله للرجال
كواكب... والله ولا ارجعه يخسر افلوس المسواك يالله
الرجال...هوو اني شعندي واخسر المسواك وبعدين انتي عايفه المسواك وداخله جوه.
‏كواكب حاضنه الصخله ..والله ماانطيها‏
عمار .. شنو ماخذه الصخله فصليه دجيبيها ابتلينه بيج بلوه.
شلعها شلع منها وراح سلمها للرجال.
ابن عمار ... هههاي بيبي هذا عمو جهاد شور بيج لان تغلطين عليه.
كواكب ... ولي من كدامي لااحركك واحرك جهاد ولك ملعون جهاد سيد امام حتى يشور.
عمار ... والله الي اسمعه يجيب سيرة هالكلب المجرم هنا اله احركه حرك ولك ولي منا يلا روح يم امك يلااااا وانت عمه لاسووينه مشاكل احذرج هاه تره اشمرج ابغداد واخلي جهيد ينفذ تهديده الج مفهوووم.

جهاد **
... مرت اشهر ماشفت بنتي بس مره وحده
رجع الوضع زين ورجعت لشغلي بالبصره
اشتاقيت لجنه موت ولبنتي
ماكو بينه لااتصالات ولاتواصل ابد
كل مره اروح اوكف يم بيتهم
احس قلبي يريد يطلع من قفصه ويحلق الها مثل الطير المجروح
من كثر شوقي الها ولهفتي على بنتي الي صار اشهر مشفتها
ولهفتي وشوقي لجنتي كل يوم يزيد اضعاف مضاعفة
افتقدها بكل لحظه مشتاق لضحكتها لزعلها لطول لسانها رومانسيتها عنادها كُل شي
بس كبريائي يمنعني
مرات افكر بيها
اكول هسه اكيد خايفه مني
بعد الي سمعته عني
احسن شي خليها براحتها ومااضغط عليها
اروح لسيارتي واعود ادراجي وارجع.

*جنه

گاعده بغرفة امي وورده بحضني ارضعها واباوعلها
رغم هي شكره وعيونها خضر بس بيهه هواي من ملامح جهاد ودمه وحتى عصبيته ومزاجيته
ماعرف هي هيج لو من شوقي لجهاد ولهفتي اله اشوفها تشبها ومرات اشمها حيل واحس ريحته بيها
اشتمها واكول الها اخخ يارويحة جهاد.
مرت ايام عليه صعبه حييل اسرح وافكر اكول شون طاوعه گلبه يقتل اثنين بدم بارد شي مايستوعبه عقلي اتذكر من جان يضربني اكول لو مره من المرات مخلص عليه جان هسه اني جوه التراب ومرات اتذكر حنيته ورومانسيته مااشوف بي قاتل.
فزيت من صفنتي على صوت امي
- جنه يمه بنتج نامت بحضنج كومي خليها بفراشها لاتروح نومتهاا على رجلج.
- اي يمه وياريت تبقين يمها بينما اروح اغسل ملابسنه خاف يجي يوسف يأذيها طفل ومايفتهم.
- روحي اني يمها.
طلعت من الغرفه ورحت للحمام جاي احضر الغساله
طبت عذراء
- ها جنه راح تغسلين ملابس
- اي ليش
- عود ردت اني اغسل قبلج
- غسلي
- لا لا خلي من تخلصين
- جيبيهم اني اغسلهم
- لالا خاف تكعد بنتج ومتلحكين.
- كيفج
- اكول جنه هم تتخابرين انت وجهاد
- لا هو كاطع ميخابر ولايسأل شسوي مخابرته
- اي ميخالف انت بادري وخابري سالي عنه تحمديله السلامه هم رجلج وابو بنتج والي مر بي مو شويه
- من رخصتج اروح اطل على ورده خاف كعدت.
عفتها بس اريدها توخر من يمي اذا هو مايجي ولايسأل ولايخابر شسويله
واني من فتره فتحت التليفون كلت بلكي،يحن ويسال ماكو مااجاني ولااتصال منه
وكل مايجي محمد من الدوام على لساني كلمات شلونه جهاد شخباره ماداوم بس اتردد واحس حجره ببلعومي ومايطلع الحجي.

*جهاد
طلعت من البصره ورحت لبغداد
وصلت للبيت العصر دخلت شفت امي سلمت عليها وبست راسها
كلما اجي من البصره تسألني سؤالها المعتاد
الام .. هاا يمه شونهه جنه شونهه ورده مارحت شفتهم.
جهاد .. يووم انت مو جاي تخابريها وتشوفيهن صوت وصوره بعد ليش ساليني الي انت تدرين بيه مااتواصل وياهم.
الام .. وجم دوب ياابني
جهاد .. ظلت يمها شوكت ماترجع خلي ترجع.
الام .. غير انت تروح تجيبها
جهاد ... يمه اروح اتوسل اني الله يخليج كتلج خليها اني رايح انام لان تعبان.
الام .. مااخليلك اكل
جهاد .. انام واكعد واكل.
الام /. ع راحتك ابو ورده
جهاد ..
ضجت من حجي امي مااريد اتوسل بيها لان ضوجتني عافتني بضرف جنت محتاجها بي وجانت حياتي بخطر هي هربت وتركتني.
دخلت للغرفه اتحسر اباوع لاركان الغرفه شصار لو هسه هي هنا وبنتي وياها اسمع لعبها ضحكها بجيها
سبحت ونمت
كعدت من النوم باوعت للساعه بـ9 بالليل
غسلت وجهي ونزلت.
سمعت صوت هوسة جهال وحجي
رحت للمطبخ شربت ماي
وطلعت
توجهت للاستقبال شفت اخواني كلهم وزوجاتهم
سلمت عليهم وكعدت
اباوع مكان جنه خالي كللش ألمني الاحساس بعدم وجودها.

امجد .. جهاد سمعت بعمتي كواكب
جهاد. .. لا ماسمعت شبيهه ؟؟
امجد .. هههه تبيع مخضر
جهاد .. صدك هههه ماحمدت ربها وشكرته ع النعمه هنا ووشت بيه وفضلت بيت اخوها ذولاك يمكن حتى لگمه ميطوها
فؤاد .. لا ولك مو هناك ماكو احد يعرفونه فما تنقل اخبار وتجيب وتودي شسوي هم لازم تلهي روحها بشي.
جهاد ... هههههه وانت منو وصلك اخبارهه امجد ؟؟
امجد .. محمد ابن عمي رايحلهم وشايفها كايللهه امشي لبيتنه ماقابله كايلتله اخاف من جهاد يرميني هههه
جهاد .. والله لاارميهه ولا شي كافي الاثنين الي دمهم برگبتي وكله مكتوب الي سوته وفضحت كل شي صح خسرت جنه بس والله هم وانزاح من انتهت السالفه لان جنت افكر بعواقب فعلتي وبعد بقت يم الله اذا يسامحني او لا.
الام .. الله يغفرلك ييمه.
ظلينه نضحك ونحشش على عمتي كواكب حتى الجهال خربوا ضحك
دقايق ودخل ابويه وويا اخو الي هو عمي ابو محمد
وكعد يمنه وظل يسولف باوعلي وجهلي سؤال يمته ترجع مرتك ياجهاد
جهاد .. والله ياعمي هذا السؤال مليت منه كتلكم هي براحتها يمته ماترجع خترجع براحتها مااضغط عليها.
ابو محمد .. انت خو ماناوي تطلكها وتروح تتزوج وبنتك تتربى عند غريب ؟!!
جهاد .... لا عمي ماطلك اسمها زوجتي وعلى ذمتي مكفي.
فؤاد ... ولك والله عندي فكره جهنميه تخلي جنه ترجع الك وهي خاضعه.
جهاد .. نورنا يابو الافكار.
فؤاد .. تذكر الشيخ مال اهل رؤى من گلك احنه ننطيك مره
امشيله خلي ناخذ منهم مره الك منهم شنو قلة نسوان وخلي جنه خاتون تشبع من اهلها هذا اذا مااجتك تتوسل.
جهاد .. شنو قصدك اتزوج ؟!!

امجد ... اي بشرفي خطه خنفشاريه هو بس خل يوصل الخبر الها تجيك ركض
جهاد ... احم ماميت عليها اني
فؤاد ... وبنتك ؟؟
الام ... لا ييمه شتحجون هي ترجع بس محتاجه وقت
امجد .. يمه صارلها شهرين وياريت طلعت منا زعلانه اشو كلشي ماسوالها وراحت اليكلك قاتلها مو قاتل ذيج.
فؤاد .. هاا جهاد شگلت والله اتزوج لاظل هيج.
جهاد .. ظلوا يلحون عليه كلهم عمي وابوي اللتزموا الصمت واني اكره الملحه ونسوان كاعده واكيد راح يوصل خبر لجنه كتلهم اي افكر ليش لا ..

*كواكب ..
كاعده بالليل وصافنه وتفكر بفلان وعلان صارلها هواي ماتعرف اخبار حبايبها ببغداد
واجت على بالها جنه
كواكب .. ايييه اخر مره سمعت جنه رايحه لاهلها وماراجعه وهسه شون اعرف رجعت لو بعدها
وين التليفون اخابر رونق
لا لا يولون شعليه بيهم عليمن اخسر رصيد ان ردوا وان لا نارهم تاكل حطبهم
بس شون راح اعرف رجعت لولا
ظلت تحوس
طلعت من الهول مكانها الي تنام بي
وظلت تباوع يمنه يسره تدور تليفون
سمعت صوت
اخذتها خطواتها للصوت الطالع الظاهر اكو احد بالمطبخ
طبت شافت مرت عمار بالمطبخ وتحوس بالمواعين وتاكل الاكل الزايد من العشا.
كواكب .. ولج بسج كافي شكد تاكلين راح تنفجرين من كد السمن .. تقربت منها وهي بصف الطباخ وخري سويلي مكان يمج خل اكل جوعانه.
مرت عمار .. اكلج عمه انت يمته توبين تحشرين روحج بكل شي ؟
كواكب .. عيب استحي طيح الله حظج مره بكبر امج احترميني. اي صدك زنوبه اكلج تليفونج بي رصيد اريد اخابر بي
مرت عمار .. والله ياعمه ماعندي.
كواكب .. ولي وشمرت الخاشوكه عليها شكد بخيله.
وطلعت تدردم من المطبخ
خذوا فلوس الفصل ومانطوني منه ربع
حتى غرفه مابنولي منه شون ناس جحوفه
اني باجر اكول لاخوي ابو عمار على هالموضوع خلي يبنيلي غرفه.
اظطرت تتصل من تليفونها دورته ولكته تليفونها الصرصور دورت بالاسماء متعرف تقره تريد تخابر وتعرف اخبار جنه لان ماتكدر ماتعرف اكو شي بداخلهه مايخليهه 🐛
صاحت علئ ابن عمار
كواكب .. ولك مدري شسمك انت
ابن عمار .. بيبي شبيج ماتحفظين اسمي اني رضا
كواكب ... اي انت تعال تعال دورلي رقم بيت اخوي ابو محمد اريد اخابر
الطفل /..اي بيبي ..دور الرقم واتصل
ابن عمار/...بيبي ماكوو رصيد
كواكب/...يااا كلهم يطونه عطوه بس اليوم يالله خابر مرة ثانيه.
ابن عمار //..بيبي شنوو ينطوج عطوه اهل الشبكه مايطون عطوه
كواكب/..جااا شلون مااخابر بيت اخوي...اداين منهم
ابن عمار /عبي رصيد بحبحيهن شويه المن تجمعين بيهن.
كواكب/ّ.ّخاب انجب ماعندي خرده
ابن عمار /بيبي اخابر الج علئ خدمه كولكت؟؟
كواكب/..دخابر بس المهم نلم اخبارهم
اتصل وطلعتله ام محمد
كواكب...هاااا الووووو الوووووو صوتها يجيب التايهه
ام محمد/...هااا خيه كواكب شلونج
كواكب/..هله هله بيت اخوي شلونكم شلون الصحه كلبي طاك عليكم كله من وره صخيم جهيد حرمني منكم
ام محمد/..هله بيج جهاد غير انتي رفستي نعمتج برجلج وتحجين علئ جهاد هسه عوفينه منهم شلونج يكولون تبيعين مخضر صدووك هالحجي ؟!!
كواكب بعصبيه/...يا فتان كلكم شلون ناس بس مال قال وقيل كواكب لو تروح للمريخ هم لازم يدورون وراها ويعرفون اخبارها
ام محمد/...ام عمار كالت
كواكب/..ان شاء الله موت اليكرفها شلون مرة فتانه هسه عوفينه منهم اخبار جهيد شنو؟؟
ام محمد/..علئ حطت ايدج مرته زعلانه ومشايف بنته
كواكب/...يطبه حريشي يستاهل وهسه شنو يرجعها لا ؟؟
ام محمد/...لا يكولون يريد يزوج
كواكب بصدمه/...ياااا عزاا بعينه راح يطك الثالثه واني كلشي ماكوو حظوظ...بس والله خوش خبر تازه
ام محمد/..ههههه خايبه يكول هي تاليها كواكب تبيع طماطه وجانت تتعيقل علينه
كواكب/...خايبه سم بكلبه ان شاء الله
قفلت الخط..وكالت...شماتي مو شمات شماتي كووه بالكبر ويكولون سبت الحكومه...انه الك جهيد تتشمت بيه ...خطيه اروح اخابر جنه وكللها شيريد يسوي جهيد النذل خاف ماتدري
رضيو رضيو
رضا .. هاا بيبي شنو اليوم ماالعب بلي
كواكب .. تعااال شويه حتى اطيك الف
رضا / اول ماانت تنطيني الف كولي شنو تردين خلصيني ؟؟
كواكب / طلع رقم جنه وخابر عليها
رضا / هااج جاي يدك
جنه .. جنت كاعده يم اهلي وبنتي بحظن احمد اخوي توها متعلمه تناغي وتلعب لازمها ويضحكها ويلاعبها
اسمع تلبفوني من الغرفه يرن قبل شويه جانن خواتي عدنا اكيد مو هنه يتصلن معقوله هذا جهاد يخابر
امشي واتامل كون يطلع هو واسمع صوته بلكي كسر غروره وكبريائه وتنازل شويه وخابرني وصلت للميز بالغرفه الي علي التليفون شفت كواكب يتصل
اووو هي شتريد شوراها ماكافي هي السبب الي خلاني ابتعد عن جهاد لو باقي كلشي مضموم احسن
رفعته وجاوبت ...
...الوو
... هاا جنينه شلونج
... هلا عمه خير
.. خايبه شبيج جايه ابشرج افرحج بخبر يفرحج
.. انت يجي من وراج خير احجي داسمعج ؟؟

.. اي جايه اكلج جهودي خطبوله مره يلا حيو حيو من غير حمره محمره يلا حيو حيو
.. شبيج كواكب تخبلتي جاي تغنين بالتليفون ؟؟
.. ولج جهيد خطب وراح يتزوج يگولون مرته حلوه تخبببل عيونها سااعه كباار وطويله وبيضه
.. خاب شنو هي ثلاجه بيضه وطويله ..
لحظه وفزييت شنووو ووووو
... ولج ثلاجه نتلتج ان شاءالله جاي اكلج جهاد خطب وراح يزوج دزولي صورة مرته بس شعرها بطولج.
.. منين يدزولج صورتها هو انت عندج صرصور الله لاوفقج ان شاءالله مخابرتني حتى تغثيني روحي الله لايسامحج على عملتج السوده.
سديته بوجها ... كعدت ع الجربايه فايره واتحلطم معقوله يتزوج كواكب منين تدري اي اي يسويهه الشايب ابو النسوان ...
سمعت صوت امي تصيحلي تعالي لبنتج تبجي
رحت اخذتها من احمد خمطتها خمط
احمد .. على كيفج شبيج جنج مخبله
جنه .. ماكو شي ..
طبيت للغرفه وطبگت الباب حييل. .خليت ورده بحضني واباوعلها واحجي
شفتي ابوج شسوه شفتي الشايب ابو النسوان مايشبع نسوان ادري بي مايشبع وين يصبر روحه بدون مره اله يتزوج ويملي فراشه بوحده غيري .
ورده تبجي وتمد لسانهه وتدور جوعانه
رضعتها واني فايره
بعد ماخلصت ذبت الحليب الشربته لان كلش عصبت خطيه اذاها
انقهرت عليها سويتلهه ممه انطيتها الها شربتها ونامت ظليت رايحه راده بالغرفه
اهلي كاعدين بالهول يتفرجون فلم ليلى والذئب ..
اصلا كلمن لازم موبايله وعايفين الفلم يشتغل وحده ماادري يمكن يتفرج على روحه حتى امي جاي تحاجي خواتي بس اسمها كعده عائليه ..
بقيت فكره تجيبني وفكره توديني شگول عليج كواكب شسويتي بيه بهالليل حطمتيني والله
خاف كواكب جذابه تريد تغثني
هي مال جذابه جذابه بس اكيد شامه خبر ماتعرف ماتشمشم اخبار ..
لزمت التليفون وظليت ادور بالارقام
فكرت اخابر جهاد
لا على شنو اخابر هالشايب يولي
لالالا اخابره واكوله طلگني گبل لاتزوج ..
دگيت الرقم واتصلت بي ..
* جهاد ...
جنت جاي من الدوام وصلت البغداد الظهر ..
دخلت للبيت ماكو كهرباء
الام .. هاا ابو ورده الله يساعدك
جهاد .. شكد حلوه بحلگج ابو ورده
انحنيت بوست راسها ويساعدج يمه .. شنو شو حر ماكو كهرباء؟ ؟
الام .. اي والله الوطني طافيه والسحب هستوه طفاهه يريحها يمكن فد شويه ويرجع يشغل ..
جهاد .. شون حظ وكت جيتي .. اني اصعد اسبح وانام الجهال لايصيحون تره روحي طالعه من الحر والطريق والبصره غاديه نار ..
الام .. جهاد يمه ..
جهاد... باوعتلها عرفتها من ملامحها شنو تريد تسأل
كتلها لايمه لا رحت ولاشفت جنه ولاورده من رخصتج
صعدت فوك .. سبحت بدلت ملابسي ونزلت جوه بالاستقبال .. شفت ابوي نايم
تمددت انتظر السحب يجي حتى انام بالاستقبال لان بي مبرده ..
اخذتلي مخده وتمددت وتذكرت مره جيت من الدوام
جنه .. هاا حبيبي حمدلله ع السلامه ..
جهاد .. الله يسلمج يابه شنو هالحر
جنه .. حضرتلك ماي بارد بالحمام تسبح
جهاد .. ماشي اسبح واروح انام بالاستقبال ..
سبحت ورحت للاستقبال شفت جنه محضرتلي فراش انام .. تمددت ونمت ..
حسيت بهوا يجي عليه فتحت عيوني شفت جنه كاعده يم راسي تهفي عليه ..
جهاد ... هاي شجاي سوين
جنه .. طفت السحب حاره وانت تعبان
جهاد .. اتلفتت يمنه يسره بس احنه بالاستقبال گتلها اكول كومي سدي الباب ..
جنه .. ليش ؟؟
جهاد .. كومي للج شكولج سوي
جنه .. وهي سديتها
جهاد .. سحبتها من ايدها ومددتها يمي
رفعت جسمي شويه انتجيت على عكسي واباوع لملامحها دنكت اريد اقبلها ..
جنه .. خاف احد يدخل علينه ..
جهاد .. اششش نزلت راسي وگبللل على شفتها حاوطت رقبتي بأيدها ووو......
فزيت من ذكرياتي ويا جنه وكلت الله لايوفقج كواكب .. سحبت مخده ثانيه وخليتها على راسي ونمت .. صحيت على صوت تليفوني يرن فتحت عيوني
الاستقبال اظلم والمبرده تشتغل .. والدنيا ليل
حييل هواييه نمت حتى جوعان ..
مديت ايدي اتلمس التليفون وين .. سحبته مقلوب
شفت رقم جنه تتصل بيه ابتسمت .. الخيّر بذكره ..
جاوبت ..
جهاد بحنيين وهيام ... جنننننه !!!!
جنه من كال اسمي فزز گلبي من مكانه حاجيته بعصبيه .. سمعت تريد تزوج ؟؟
جهاد .. هذا منو كلج
جنه .. كواكب كلتلي
جهاد .. حلو اول مره كواكب تسوي شغله تفيدني
جنه .. هااا
جهاد .. أأي من حقي وشكو بيهااا ..
جنه .. طلگني بالاول وروح شسوي سوي ..
جهاد .. اكلج عود من تغمضين وتغفين وبالحلم اذا شفتي روحج مطلگه تعاي عاتبيني يعني حتى بالحلم مااطلگج خووش ..
جنه ... لاايابو النسوان انت شنو ماتشبع ماتكلي ؟؟
جهاد .. لا مااشبع
جنه .. ومنو هي سعيدة الحظ الراح تعيش وياك
جهاد ..فد وحده حبيتها عشگتها غلطت وياها وهسه حامل شسويي غير اتزوجها خو ماخليها تنام بحضن غيري .. جنه ...جهاااد طلگنيييي وروح اتزوج براحتك
جهاد .. لا ماطلكج خليج هيج شكو عليج واكيد اتزوج ماافوتها لج تخبل واهم شي عيونها ماتجيب المغثه سوود يخبلن لدرجة اظل اباوع لعيونها بالساعات ..
جنه ...عيونها سودد مووو ؟؟ وشبي...
سديته بوجهه .جيت اكوله وشبيهن عيوني همزين ماحجيت خاف يكول ميته عليه ... حرگلي اعصابي دمرررني كعدت على السرير وايدي على جبيني واهزز رجلي بحييره ... جذااب لو صدك
هالشايب مايعيش بلا النسوان ...
لو جذاب يكابر ومايجي ولايتنازل ليش هيج جهاد ليييش فوگ قهررري هيج تسوي بيه مو بنتك كبرت وماراح تعرفك ليييييش تكابر عليه ليييش ..؟؟؟

*****
‏ترهقني فكرة اني هنا وانت هناك ، و أن الناس تمُرك وتتعداك وأنا اتمنى الجلوس لثوانٍ بجانبك والإمساك بيدك ،مراقبة تعابير وجهك وأنت تتحدث.**
‏انني اريدك وارفضك في ان واحد اتجاهلك وكل قلبي منتبه إليك وفي كل مره قررت بها ان اكرهك شعرت بأني احبك اكثر.

اه ياصوت جنه مثل اوكسجين وملأ رئاتي بعد ما فرغت منه ..عطشان ونطو ماي عذب يروي .... اي ليش تحرميني منج .. ليش اتركيني باصعب ضروفي .. ليش تاخذين بنتي بعيد عني .. ؟؟

قلبت روحي ع الجهه الثانيه .. والتليفون بيدي ..،
اتأمل .. هه ابتسمت يمكن احترگ گلبها من سمعت راح اتزوج .. خوش شغله سوت كواكب اول مره تفيدني ..

طلعت من الاستقبال .. ورحت للهول ..
اهلي متجمعين .. ..

رحت للحمام اغتسلت ورجعت مره ثانيه يم اهلي ..
امي .. هاا يمه جهاد اصبلك عشا . ؟
جهاد .. اي يمه صبي .. اخذت باكيت الجكاير وطلعت بره .. ورثت جكاره وكعدت ادخن .. وصوتها ميفارك مسامعي .. شصار لو هسه هي يمي ..

كبل لااخلص الجكاره صاحتني امي .. من شباك المطبخ ..
.. يمه وين تريد اخليلك العشاا ..
..فدوه الگلبج يمه يمكم اكعد ..
شمرت الجكاره بالكاع وسحكتها لوما الجكاير مصبرتني على ظيم الدنيا .. جان هسه گلبي واكف ..
اصبر ياگلبي ماادري شنو تاليتها ..
هذا عذاب الدنيا بس .. .. !!

دخلت جوه .. امي مخليه صينية الاكل مسويه حميس كبده .. مااحبها اله من ايدها طبخها لايعلى عليه .. كعدت اكل ..
فؤاد .. ادري انت شوكت تنام وتكعد وتاكل مثل الناس .. تنام بالنهار وتكعد بالليل ..
... هي بس من اجيلكم هيج هناك ماانام لاليل ولانهار.
... اييه اييه .. شخبار ام ورده ..
.. على حطة ايدك ماكو اخبار ..
امي.. يمه اكسر الشر ورجعها
.. يمه ياشر هذا قابل اني وديتها اني زعلتها اشو هي مثل الحرامي اخذت بنتي ونهزمت .. تريد هي خل ترجع مااروح عليهاا ..
فؤاد .. اي قابل ماكو نسوان تزوج واكسر خشمها .
رونق .. اذا زعلت اني هم تزوج عليه ابو حسوني؟
فؤاد .. ايبااه سويهه وزعلي بداعت حسوني ونظوري عندج اريد اتزوج ..
رونق .. هااا تزوج عليه ..
فؤاد .. اي ولج ملينه من الككو نريد حليب
رونق .. ها ها شتقصد تريد وحده بيضه .. يعني اني ككو وتريد حليب موو ؟؟ لعد شبيهه السمره مااشفتني من اول سمره ليش قبلت بيه ..
فؤاد .. ايي گومي من يمي حتى شقه ماتشاقيين ..
رونق ... اي كايمه اروح يم اولادي احسن ..
فؤاد .. جهاد اني متاكد راح تطك الثالثه وعيونها زرك
جهاد .. لا صدك اذا طكيت الثالثه يمه شوفيلي وحده عيونها سود ليل واذا وجها اسود هم بعد احسن الصاكات ماشفت منهن خير ..
امي .. يمه اني اثنينهن ماشفتهن الك انت الي اختاريت.
فؤاد .. خاب مبخت بالنسوان قابل مثلي ماخذلي ككو.
جهاد .. ككو وصاينتك ومقدرتك .. احسن مما حلوه وشابع ظيم من وراهااا ..
امي .. شبيهه جنه اشو تحطها ع جرح يبرا وبعدها زغيره حتى من اخذناهه للصالون بعد العرس تعجبوا شون زغيره
يكلولها ماعدهم خبز ينطوج على فطارتها تكوللهم عدنه خابزين اخلي عمتي تجيبلكم ..

فؤاد ، جهاد ... ههههههههههههههه
امي ... اي بيومها كواكب كلتلهه بنت ابو اللبلبي توزعين خبز ..
جهاد .. هو شعم علينه غير كواكب ..
فؤاد .. عمت علينه وعلى روحها هسه شون حالتها بدون مراسلات ونقل اخبار ..
جهاد .. جاي اكل اللگمه وصلتها لحلگي امي كالت
جنه وين ماتطلع وياي يخطبوها
نزلت اللكمه مااكلتها .. اووو شبببعت مااشتهي بعد.امي ... يمه وين رايح دكمل عشاك
جهاد .. مااشتهي انسدت نفسي ..

فؤاد .. حنى ظهره ونزل راسه قريب لأمه الي جانت كاعده بالكاع وهو ع القنفه .. اگول يووم اشو بس بجنه تمدحين وهي الزعلانه الجوه لو لان ككو وذيج حليب ..
امي .. اووو هو منو زعلهه غيرك مو انت .. روح صالحها هي ذهب رونق وعشرة عمر كوم راضيها واني كايمه اشوف اخوك هم زعل مني ..
فؤاد ... اليوم يوم صلح الزعلانين ..

* جهاد .. ... دخلت بغرفتي .. اجت ورايه امي .. يوم جهاد ليش مااكلت اجيب الك الاكل هنا تكمله

.. لا يووم شبعت حمدلله
.. يمه شاكلت وشبعت رايحه اجيبه
.. نضفت اسناني بعد مااكدر اكل ..
.. براحتك .. وطلعت ..

بقيت وحدي بالغرفه ملل كلش .. اخذت تليفوني حاجيت اصدقائي وكروب اولاد عمي .. كالوا محمد راح يخطب .. كتلهم بيها الخير .. كلام ممل تحشيش طلعت من الكروب .. شمرت التليفون ..

اخذت المسدس .. وكعدت انضف بي .. من الزمه تمر
عليه اسوء ذكريات حياتي ..
واني على هالحال .. سمعت هوسه وحجي بالممر الفوك بعدهه نزلوا جوه ..
طلعت من الغرفه دااشوف شكوو ..

نزلت جوه .. امي ورونق .. وفؤاد بالهول
ابنهم نظوري عمره عشر اشهر .. متخربط كلش ويتقيء مثل النافوره ..
جهاد .. ياب فؤاد شبيك خلي نودي للمستشفى
فؤاد .. يمعود يامستشفى بهالزلك من يقلدنا هناك لانظافه لااهتمام .. يصبح الصبح اودي اخصائي ..
جهاد .. ويبقى للصبح هيج صدك تحجي ..
رونق .. فدوه جهاد ابني راح يموت ..
جهاد .. روحي لبسي ولحكيني للسياره ..
اخذت الولد .. وطلعت للسياره .. لابس سروال وبدي ابيض بي خطين اسود رياضي ..
لحكتني امي ورونق .. ورانه هم اجه فؤاد ..
جهاد .. واحد منكم يبقى يم حسوني ..
ابو جهاد .. روحوا روحوا يبقى يمي ..
جهاد .. حركت السياره والطفل مابطل تقئ،..
واني اسوق افكر بورده اذا تمرضت من الها هناك وهي بعيده عني .. دعيتلهه تكون بخير وكملت طريقي ..
وصلنه للمستشفى .. هوسه وسوه والطفل صار فد نوب .. اخذته من امه واريد ادخل ع الطبيب،..
السكرتير الي يفوت الاطفال ع الطبيب .. كال ماتفوت اله بالسره ..
.. عطت بي هيه بكيفك صارلك ساعه تدخل بالواسطات واحنه مبقينه بالاخير .. عفته ودخلت ع الطبيب .. فحصه وحوله مبيت بالطوارئ،..
اخذته رونق وفاتت جوه بي ..
بقينه ننتظر الممرض يشدله مغذي .. بقينه اني وفؤاد وبيدنه نظوري مسنح كلش .. امي ورونق فاتو للحمامات .. يغسلون لان تلفهم فد مره ..
صاح علينه الممرض .. ودانه للسرير مالته .. فتحله وريد من رجله وعلگله مغذي .. كال من يجون النسوان طلعوا لان بس نسوان يباتون ويا اطفالهم ..

نومته ع السرير وفؤاد راح يجيب شغلات من بره ..
باوعت السرير الكدامنه .. مره عرفتها هي مرت عامر
اي عامر الي قتلته. . ابنه نايم على السرير ومنتهي كلش تعبان ومخليله اوكسجين ... انقهرت على الطفل أنبني ضميري .. اني الي يتمت هالطفل ..
اجه فؤاد .. اشرتله كتله هذا ابن عامر وهي مرته ابقى يم ابنك راح اروح اشوفهم شمحتاجين.
تقربت منهم .. ماعرف شنو احجي
الطفل يقهر وحالته يرثى الها ..
اريد اجمع الكلام الي تجمع بحنجرتي ماكدرت
اكتفيت بكلمة ها شلونكم ..
اللتفتت الي .. شكلها تعبانه كلش عيونها جواهن اسود ومليانات دموع ..
.بهدوء. هلا بيك خويه جهاد ..
.. شبي الزغير ؟؟؟
.. والله مريض صدره ملتهب فد نوب ومايكدر يتنفس وهو اصلا عنده فتحه بالقلب ويحتاج عمليه ..
... عمامه وين مايسالون عنه ..
.. والله من يوم الشالو بالتليفون يسالون
... اذا محتاجه شي گوولي ..
.. والله اخوتي مامقصرين وامي ويايه تسلم .. انت شلونك سمعت صارت عندك بنيه ..
.. الحمدلله بخير
.. جنه مارجعت بعد ..
.. لا والله مارجعت
.. ممكن رقمها
.. ليش شلج بي ؟؟
.. اذا ماتريد تنطيني لاتنطينيا عادي ..
.. سجلي يمج .. ... ...
اذا احتاجيتي شي كولي مايردج الا لسانج لاانت ولاابنج الكم ذنب بالصار ..
.. الله يساعدك ياجهاد علي شفته اني مره وماشفت شي ومن جان يحجيلي ينهدم حيلي مثل الجبل المنهار شحال انت ؟!!
.. ارجوج سدي هي السيره وحاولي تنسين
.. الله يخليك شنو انسى وابنه كبال عيني ..
.. الزمن كفيل بان ينسيج من رخصتج اودعناج ..
عفتها واحجي بقلبي وادردم كبور لفهم عارات بس بيهم اخذوا الفلوس .. وانهزموا مافكروا بابن ابنهم المكبور الماله ذنب مشمور هنا ومريض ...
رحت لفؤاد .. وبعدهه طلعت بره المستشفى ورثت جكاره .. شفتهم جايين
هااا شو طلعتوا .
فؤاد .. يمعود طلعنه على مسؤؤليتنا الوضع ماينحمل خلص المغذي وامشي اروح للبيت باجر اودي اخصائي
صعدت السياره ورجعنا للبيت ..

.......

رضاا ... بيبي انت وعدتيني تنطيني الف
كواكب .. هي من شوكت كتلك ياجذاب
رضا .. هاا بيبي نسيتي انت صدك جلفه من دكيتلج التليفون نسيتي ...
كواكب .. اي اي تذكرت .. صدك يارضيوي تستاهل والله فتحت جيسها لشادته بركبتها ودورت دورت وانطته الف
رضا .. بيبي شنو هذا جم عمليه مسوي ؟؟
كواكب .. ياهو ولك
رضا .. بيبي هذا الف لو مطكوك عليه عبوه
كواكب /..ماتريده جيبه ناس ترفس النعمه برجلها شبي يخبل
شمره عليهه وراح ..
اخذته وهي تكلب بي شبي والله مابي شئ صدك هو مكروض وملصق من الجهتين بس يمشي
الله علئ ذاك الزمن من يجي ابو العتاك ويصيح حتئ المششكوكه نمشيها حتئ المحروكه نمشيها
يالله مصار شئ حطه بنص الفلوس ورجعه للنسوان ليشترن مخضر بدون ميدرن وضاع ابتر بين البتران
احيييي ياجهيدان عسى حالك يشبه حال هذا الالف.

جنه .. لليل مانمت كلللش ضايجه ومطنكره
امي خذت ورده وشربتها ممه ونومتهه
امي .... نامي ياجنه نامي هسه بتج تكعد وتريدج تكعديلهه.
جنه .. خوش يمه خوش هسه بس اخابر
امي .. المن بعد تخابرين بهالليل ..
جنه .. اخابر ضمياء صار هواي مااعرف اخبارها
امي ... اخبارها لو اخبار ابوو هالحلوه هي
جنه .. اووو. يمه هه
امي .. بدل لاتخابريهه خابري
جنه .. هستوه خابرته ورزلته
امي ... شنوو
جنه ... ماكو شي يمه سلامتج ..
طلعت امي .. واتصلت على ضمياء ..
الوو هلو ضمياء شونج ؟؟
.. توج يلا عرفتي ضمياء هاا
.. يمعوده تدرين بلي مريت بي اني ..
.. مو مثل الي مرينه بي والي مروا بي اهلي وخاصة جهاد ولج من خوفي عليهم حتى طفلي وكع جم مره دكوهم بالرصاص شهر كامل وهم ماشافوا الراحه ..
.. سلامتج مادريت بطفلج وكع هي من شوكت ..
.. المهم ورده شلونها بنت اخوي مايصير نشوفها
لو محرومين منها حتى بصوره مانشوف
... لا منو كال محرومين دائما افتح كاميرا ويا عمتي ورونق ويشوفونهااا
... اي وجهاد
.. شبي جهاد مو راح يتزووج ..
... منو كااال يتزوج
.. كواكب كلتلي
... يااحيف والله جنه متفقه وي كواكب الي شعللتها وخبصت على جهاد رجلج وابو بنتج
... لا موهيج ضمياء
.. المهم اني زوجي يصيحني لازم اروح مع السلامه. .

جنه .. يعني سالفة زواج جهاد جذب !!!
اخخ ياكويكه اخخخ اني اعلمج
دكيت رقمها واتصلت جاوبتني
الووو منو
اني جنه
هلا جنينه شتردين
لج يالخباصه يالشباشه انت شنو دارسه وياابليس الله يوميه القيامه يحتار شون يعذبج من كد ماعذبتي ناس ..جذاابه .. وسديته بوجهه ..

بيدي التليفون وهم دك .. شفته رقم غريب جاوبت الوو
صوت انثوي .. الوو
منو انت ؟؟
اني شريكة جهاد بالعذاب والالم
... انت شنو تقصدين ؟؟
اريد اكولج شي جنه
غير اعرف انت منو ؟؟
اني ارملة عامر الي قتلـ
اي عرفتج
اريد اكولج اني من جان عامر يحجيلي على رؤى ومن عرفت بخيانته متت تعذبت حسيت جبل وانهدد
شحال جهاد شاف بعينه وهو رجل من دم ولحم وساعتها اكيد ماكدر يتحكم بنفسه ارجعي جنه خطيه اليوم شفته بالمستشفى حالته لاتسر صديق ولاتحزن عدو ..
يمه جهاد بالمستشفى شبي خو ماصاير عليه شي من كم ساعه خابرته مابي شي بس لا هدوا عليهم مره ثانيه ..
لا هو مابي شي ابن فؤاد متخربط بس جاي اكلج الحزن بعيونه يشع مبين ذاك هو حزين ومتعذب ..
خوفتيني يمعوده يصير خير ا
الله كريم ..

ادعي وياج لابني لان تعبان ومريض ..

الله يشفي ان شاءالله ..

سديته منها وبقيت مشوشة الافكار ..
نمت وبعد اسبوع اجتني امي للغرفه
جنه .. جنه هذا عمج ابو جهاد وويا اخو ابو محمد اجووو ودخلهم اخوج احمد بالاستقبال ......

جهاد ..
بفترة اجازتي واني في بغداد .. موزع وقتي بين النوم والنت ومرات اطلع وياا اصدقائي ..
ساعه 4 العصر خابرني حسن ابن عمي ابو محمد ..
.. الو هاا جهاد شونك ..
... هلا حسون هلا بالعريس.
.. اي والله عريس طك الثالثه يمعوووود وشعللهها
... ولك مرتين ازوجت انسمط جد جدي التوووبه بعد
.. حقك الشفته انت مو هين ومو سهل
.. تخلص وصير سوالف
.. اكلك ابن عمي محتاجك بشغله
..كول عيونك الك
.. كفو منك يالذيب .. اريدك تطلع وياي للسوگ اريد اشتري ناقصني شغلات لغرفتي.
.. بس هي تدلل ياب
.. كفو منك كول وفعل .. شوكت فارغ ماعندك شي.
..هسه اذا تريد
.. اي والله علواه
.. جايك بس ابدل
.. انتظرك ابو ورده ..

سبحت وبدلت وطلعت لبيت عمي ..
نزلنا للسوگ .. حسن اشتره ثريات وزينه وشغلات لغرفته ولبيتهم .. كملنا وطلعنا . بطريقنا مرينه على محل ملابس باوعتله واني امشي بي بدلات مال بنات اشكال والوان .. حسن طالع كبل كدامي
صحتله ابو عليووو تعال ولك
هاا خوش فاولتني بعليووو
ان شاءالله من اول ليله يجيك عليوو ههههه
.. امين واخطبله بتك
.. لا ولك اكبر منه ضربته على كتفه كتله خلي نفوت لهذا المحل شويه ..
فتنا وظليت اباوع للبدلات مااعرف قياسها ولاشايفها كبرت لا سمنت ضعيفه .. ؟؟
تحسرت .. باوعت عجبتني بدله لونها بصلي وابيض معلگه تقربت منها وياهه قبعه وحذاء وجنطه زغيره.
اشرت لابو المحل كتله انطيناهه .
خلاهه بعلاگه وانطانياهه وحاسبني وطلعنا
وصلنه للسياره وصعدنه .. حركتها ومشينه ..
حسن .. البدله هي لبنتك
جهاد .. بحزن ... اي
حسن .. ليش ماترجعها ؟؟لخاطر بنتك ع الاقل .
جهاد .. ماضربتها على ايدها وكتلها روحي ..
اعترف غلطت بحقها هواي بس اخر فتره حاولت وبذلت جهدي حتى اتغير بفتره قصيره والله الي مثلي لو بالخارج يظل سنين يعالج عند طبيب نفسي حتى يتعافى من الاثار الي انطبعت بي ..
حسن .. جهودي والله انت ماكو منك ولو عندي خوات جان زوجتك منهم بس خواتي كلهن متزوجات
جهاد .. وهم ماراح يكعد حظي واعرفه ..

وصلنه لبيت عمو نزلنا ونزلت الغراض ويا للطرمه ..
انفتحت باب الاستقبال وطلع عمي ..
سلمت عليه ..
ابو محمد .. ادخل جهاد
جهاد .. والله عمو مستعجل اريد اروح
ابو محمد .. ادخل عندي حجي وياك
جهاد. هاا عمو ان شاءالله
دخلت بالاستقبال ..
ابو محمد .. جهاد تره ماعاجبني وضعك
جهاد .. ليش عمي سامع عني شي ؟
ابو محمد .. مايصير ياابني مرتك هناك وانت هنا
جهاد .. والله ياعمو حجيتهه وهسه راح احجيها اني من سمعت هي خايفه مني حيل تاذيت وهالشي مسني وقررت اخليها هناك واذا رادت تجي هلا بيهاا.
بس اني مااروح اجيبها .. لان مو اني وديتها هي انهزمت مني مثل الحرامي..
ابو محمد .. اي ادري يااجهاد انت غسلت عارك ومايحتاج تبرر
جهاد .. بقلبي .. اووو شوكت اخلص من هالسالفه والله دمرتني .. سكتت ..
ابو محمد .. لعد اني اروح اجيبها واكول لابوك يروح وياي ..
جهاد .. بقلبهِ اوو خاف هي ترفض وتفشلهم وتنزل راسي .. گتله لاعمي ميحتاج.شيوديكم منا للبصره الطريق طويل وحاره ..
ابو محمد .. ميخالف انت تودينه وسيارتك مكيفه مانحس بالحر ..
جهاد .. عمو اعذرني اني اجازتي بعد ماخلصت وهم راح اخذلي اجازه اضافيه لعرس حسن مااكدر ارجع هسه ..
ابو محمد .. انت كول ماتريد تروح ميخالف ناخذ واحد من اخوتك ..
جهاد .. اي بكيفك عمو .. اني اترخص هسه ..
حسن .. وين ابقى يمنه ع العشا
... بقيت يمهم على العشا وبعدين رجعت ..
يوم ثاني اجه عمي لبيتنا واتفقوا يروحون لبيت اهل جنه ويجيبوها .. اثناء حديثهم اللتزمت الصمت
وكان كلامي قليل .. هذا قرارهم هم لوحدهم واني ما ملزم اناقشهم بي .. بس بقت عودة جنه تشكل الي هاجس مو عمود رجعتها لا وانما خاف تفشل هالشيبه المتعنيه علمودها من بغداد للبصره ..
اخر شي تبرع اخويه عماد يوديهم ..
قليل انام بالليل ... ولذلك نمت متأخر
كعدت ساعه 11 ونص الظهر .. نزلت جوه
تلاكيت ويا امي مبتسمه ..
.. هاا يمه صباح الخير
.. صباحك ورد وسعاده يانظر عيني
.. مبتسمه اليوم عساها دوم ان شاءالله بس شنو السبب.
.. ابوك وعمك راحو للبصره يجيبون جنه ..
.. جهاد مممم هااا خوش .. شوكت طلعوا
.. اوو من الفجر هسه وصلوا يمكن ..الغدا جاهز تريد اصب الك
.. لاا مااريد هسه.. مو تدرين مااكل اول مااكعد خلي اسبح وادخن واكل ..
.. ييمه موزين عليك التدخين
.. لا زين يوم زين انجلط بدونه اني ..
صعدت فوك. . وظليت اعيد خطواتي ..
خاف جنه تفشلني وتخليهم يرجعون بلاها
باوعت للتليفون .. خلي اخابرها ..

دكيت ماكو ... رجعت اتصلت مرتين وثلاثه واعصابي نار .. جاوبت .بصوتها الناعم الحسيت بي حنيه ..
الوو جهاد .
جاوبتها بحديه وتهديد
اسمعي جنه ابويه وعمي جايين الكم وع اساس يردون يرجعوج مااريد تنكسين راسي كدامهم ويكولون مرت جهاد ماتحترم هالشيبه الجايه من بعيد لوحده زعطوطه وماتعرف تتصرف ارجعي وياهم واحنه هنا نحلهاااا
.. شنو هذا كلامك بي تهديد ؟؟
.. شون ماتفهمي افهمي بس تره والله اشوفج وجهي الثاني ..
.. وجهك الثاني الشوفته الرؤى مووو ؟؟
.. احذري غضبي تره والله اخذ بنتج من حضنج ومحد يشفعلج تره كولشي اكدر اسوي.
.. المفروض مااسمع منك هذا الكلام وابوك وعمك بالاستقبال جايين يردون يرجعوني ؟؟
.. اني كتلج هسه لاترجعين وشوفي وحتى اخليج تطمئنين ماراح اتعرضلج اذا رجعتي وراح انزل غراضج جوه بغرفة امي وكلها كم يوم بعد عرس حسن راجع للبصره ويمكن ماارجع لبغداد بعد حتى لاتحسين حياتج بخطر وتطمئنين.
... ليش راح تتزوج بالبصره هالمره
.. اي اتزوج ليش منو يكدر يمنعني راح اتزوج وحده تقدرني راضيه بيه رغم تعرف عني كل شي
.. وليش ماكتلي ليش هي كتلها جهاد انت لو حاجيلي جان مو هذا وضعنه.
.. هي صارت بعد وانت خلي عقلج براسج وفكري زين وروحي كولي قرارج لابويه وعمو لاتخلينهم ينتظرون من رخصتج عندي مكالمه اريد اجاوب عليها چاوو ..

********&*&

بالطرمه ماخذتها ذهابا وايابا تحووم سمعت بعرس حسن وتريد تروح ..سمعت صوت بالمطبخ كترت المخضر على صفحه وطبت ..

كواكب .. صباح الخير ام عمار .

ام عمار .. يمه بسم الله الرحمن الرحيم كواكب انت شمكعدج من الفجريه ماتنامين ..

كواكب .. شكلت عبايتها وكعدت ع الكرسي .. شسوي نايمه ياام عمار باجر انام النومه الجبيره ونشبع نوم محد يكعدنا هسه خلي نشبع من الدنيا

ام عمار .. ياخيه يامحد يگعدج ومنكر ونكير شنو شغلهم ؟؟

كواكب .. ياقابل شمسوين ويجونه منكر ونكير اكلج ماعلينه اكلج عرس حسن يوم الخميس ماترحين

ام عمار .. شسوي رايحه من بعد عين وليدي عامر سوده عليه الي راح مغدور وعلى ايد منو ابن عمه جهيد ماروح اعراس ولااوصل بغداد بعد

كواكب .. اي من ايده شعنده يسخت ويا مرته

ام عمار. . هاا هسه تحجين هيج لعد وين شهادتج ضد جهيد ..

كواكب .. ما علينه اريد اروح للعرس ..

ام عمار .. شسوين رايحه بالله ..

كواكب وهي تصفك بيدها وتعدد اكيد هسه يذبحون الذبايح ويسوون العشيات والغديات للخطار شون ترديني افوت الباجه والمعلاك لالا اله اروح اظل هنا شسوي موتوني جوع ..

ام عمار .. هسه احنا موتناج الجوع تهي بهي ياالله مايجيب بعينج الطيب اكلج ماتخافين من جهيدان يصكج .

كواكب .. بتلعثم وتوتر. . أأ لا وين يجي جهيدان مرته زعلانه وحالته حاله ويريد يعرس .. مايجي،مايجي مايشوفني ..

ام عمار ... اي عساه ماتهنى المجرم كتل ابني سوده عليه يمه عامر سوده عليه الشباب الحلو يروح جوه التراب ... اخ يمه اخ شنسى منك ..

كواكب .. هسه لتظلين تبجين اريد اروح للعرس

ام عمار .. اووف اني وين وانت وين روحي ذاك الدرب شسويلج .. رايحه اصلي واكمل نومتي ..

كواكب .. اي روحي نامي روحي ..
اتلفتت شافت تليفون على الكاونتر .. اي والله شعجب ناسين تليفون ع كونتر صارلهم مده يضمضمون التليفونات عني يدرون بيه اخابر واسأل على حبايبي وانقل اخبارهم بس هسه اريد اخابر جنينه شون تغلط عليه كبل جم ليله ..
ظلت تدوس بالدكم ومتعرف تتصل الى ان فات من كدامها رضا وصاحته
رضا رضا تعال
شتردين بيبي اريد اروح للحمام وارجع انام ..
تعال حتى اخذك وياي للعرس
ياعرس
عرس حسن بس تعال .. اريدك تخلي رقم جنه بهذا التليفون وتخابرها اريد احجي وياها
بيبي من الصبح تخابرين وبعدين هذا تليفون بيبيتي خطيه .. تخابر بناتها ابغداد
انت ماعليك مو راح اخذك للعرس ..
اووو بيبي جيبي ......... هاج دگيت
اي روح روح ..
الو ها جنينه طينه
جنه .. هااي اشعندج متصله من الصبح ولج حتى بنتي كعدت على صوت الموبايل
ولج شون تغلطين عليه بكد امج اني يلماتستحين.
لعد ليش جذبين وتكولين جهاد يريد يتزوج ؟؟
اي راح يتزوج والخميس حفلة الخطوبه وانت ظلي ابيت اهلج بلكت يطلكج
ولييي ..
سدته بوجهي بت ابو اللبلبي ..
اروح اشوفلي واحد يوصلني لبغداد ..
راحت واتفقت ويا جيرانهم يوصلها لبغداد حتى تحضر عرس حسن وهي مطمئنه من ناحية جهاد
ماتشوفه وكل ظنها انه مااله خلك يحضر عرس وهو بهالوضع هذا .. قبل العرس بايام انطلقت لبغداد وراحت لبيت اخوها ابو محمد ..
*****&**

جهاد .. ترقب وتوتر .. وباكيت الجكاير قرب يخلص
مره اصعد فوك ومره جوه ..
اذا تحبني ترجع .. لالا لو تحبني جان خلقتلي الف عذر من الي سويته مو تتركني وتروح
خلص حتى واذا رجعت احسبها غريبه ومالي دخل بيهاا .. خليها تنام بغرفة امي ..
نزلت جوه وكعدت على اخر بايه من الدرج ..
اجت يمي امي .. هاا يمه جهاد خابرت ابوك ماسالته قبلت جنه ترجع لو لا
جهاد .. فركت ايديه وبقلبي اكول والله اذا مااجت اكلب الدنيا عليها كتلها يووم ماادري ماخابرته ..
امي .. خابره ياابني وتطمن عليهم ..
جهاد .. مااخابر يمه يجي ويصير خير
عفتها وصعدت فووك .. دخلت للغرفه .. متوتر ومحتار وبداخلي سؤال واحد ياترى راح تجي ؟؟!!
سمعت صوت سياره اقتربت من بابنه ..
طلعت بالبلكون .. شفت سيارتي الي راحوا بيها معناهه اجوا .. بقيت واكف ومترقب ومصوب نظراتي للاسفل حتى احس عيوني حتوكع من كثر ماباوعت
هل ياترى جنه راح تنزل من هالسياره لو مااجت وياهم .. ؟؟!!

جنه .. يا اا يمه شعدهم جايين ..

امي .. ولج خو ماا اسألهم شعدكم جايين دكومي بدلي وبدلي لبنتج وطلعي سلمي عليهم ..

جنه .. يييمممه !!
امي .. هاا شبيج تمتمين ؟!!
جنه .. جهاد مو وياهم .. ؟؟
امي .. لا بس اخو الزغير .. يلا بالعجل عيب منهم ينتظرون ..

جنه .. صار ماما ..
كمت من فراشي .. ورده ماتنام بالليل تبقى للفجر يلا تنام لهسه ماانعدلت نومتها .. فأبقى نايمه ل12الظهر
اخذتها ورحت للحمام .. غسلتها وغسلت ورجعنا للغرفه سمعت تليفوني يرن ..

خليت ورده على الجربايه ولفيتهه بالخاولي مالتهه
ورحت للتليفون بسرعه .. اخذته جهاد يتصل
خليت ايدي على قلبي .. توقعت يتوسل بيه ارجع بس ليش مااجه وياهم ..
رفعته وجاوبت .. قهرني كلامه كله تهديد ووعيد ..
ترددت حتى اطلع لعمي واخو وكعدت ع جربايه ..
ابجي ..
دخل احمد اخويه ..
- يلا جنه عيب ينتظرونج
- هسه جايه
. انطيني ورده اوديهه لجدها يشوفها مشايفها
- بس خلي ابدللها
- بسرعه عجلي ..
بدلت الها واني ضايجه واحس روحي ماصافيه على قرار اليوم محتاره بين ارجع وبين لا عقلي مشوش كلام جهاد خوفني ..
انطيت ورده لأحمد .. ورحت بدلت التراك الابسته ولبست كلابيه طويله لفيت شالي وطلعت .. وكلام جهاد يتردد باذني كل شويه .
وكفت يم باب الاستقبال ومتردده اطب ..
معقوله جهاد ياخذ ورده مني ويخليني بحسرتها
اي اكيد ياخذها هو اليقتل وينفذ من العقاب يكدر كل شي يسوي ...
مديت ايدي الترجف لباب الاستقبال ودخلت
- سلام عليكم ..
- وعليكم السلام ..
شفت ورده بحضن عمي ويباوعلها بلهفه وسعاده وكل شويه يبوس ايدهاا ..
كعدت ع التخم .. وروحي متزعزعه ومااعرف شراح احجي وشراح اكوول ..
امي بصفي واحمد اخويه .. ومقابيلنه عمي و ابو محمد
ابو محمد .. شلونج ام ورده عساج بخير ..
جنه .. الحمد لله عمو تسلم الخير بوجهك ان شاءالله.
ابو محمد .. احنه جايين ناخذج ويانه نرجعج لبيتج وبيت اهل بنتج شتكولين ترجعين ويانه ..
جنه .. دنگت وسكتت ماعندي اي قرار ..
ابو محمد .. تره جهاد مو قاتل جهاد غسل عاره والمفروض تفتخرين بهذا الشي انتِ ..
احمد .. اي اكيد هو رجال وحقه من سوه هيج لكن المفروض يگول يحجي اني هيج وهيج ليش ضم السالفه عنه ..
ابو جهاد .. هو ماأخفاها بس عليكم عن الكل حتى اني ابو ماگلي كم مره لزمته وحاجيته وجان عندي شك بالموضوع گتله انت قاتلها گال اذا قاتلها وسام شرف اعلگه بصدري وماانطاني نشده اني ابوو وهو هم عباله السالفه تنسي وراد يعيش حياته ومن حقه
وهسه يابنتي رجعي ويانه ميصير بنتنه بعيده عنه احنه هم اهلها وجهاد ابوها مايصير راح تكبر وتتفطن للدنيا وماتعرف ابوهااا ..
جنه .. بس ياعمو جهاد هسه معصب عليه خاف من ارجع يأذيني ..
ابو جهاد .. لا يابنتي ماايأذيج اني اتكفله مو تكفلته ذيج المره وبعد ماتجرأ يضربج ..
ابو محمد .. اي يابنتي مايضربج هسه انت صرتي العزيزه ام ورده ومكانتج كلما الها تعله ارجعي واحنه مانخلي احد يأذيج .. قدري ضروفه لجهاد وافتخري بي زووجج مارضى بالغلط وماقبل بالعار .. تدرين وجودج هنا وخوفج منا يخلي الناس تشك وتتسائل ليش انهزمت وهي مامسويه شي اكيد احنه مانهتم للناس وندري بيج بنت اصول ومربايه ونعم منج ومن اهلج وتربيتهم بس ليش انخلي الناس تحجي عليه ليش نجيب لنفسنه الحجي والناس حجوا هواي وبمافيه الكفايه
على جهاد بسبب زوجته الخاينه لاتنضمين الها وتظلمينه وتخلين الناس تحجي ..
ابو جهاد : جهاد جان شاك بيها وهواي بقى يدور وراها وماسوالها شي الى ان قطع الشك باليقين شافها بعينه وبوقتها منكدر نحكم على تصرفه لان ماكو رجال يشوف مرته على فراشه ويسكت الا اذا كان عديم غيره ورجوله ..
جنه .. كاعده وأسمع الهم واحس نفسي بدوامه ..
بين كلامهم وبين كلام جهاد الي گله الي قبل شويه
وشي بداخلي يكولي كلامه هذا مو من كل قلبـه ..

بهالاثناء بجت ورده وهي بحظن جدها ..
كال اخذيها يمكن جوعانه .. تقدمت بخطوات يائسه اخذتها وطلعت من الاستقبال .. رحت للغرفه وكعدت على السرير نزعت شالي ..
خليت ورد على صدري ..اللتهمته .. اباوعلها وافكر احس لااني بسما ولااني ببر .. اذا رجعت خايفه منه واذا بقيت هم خايفه منه

بين زحمة افكاري وتشتت فكري .. دخلت ماما .. كعدت يمي خلت ايدها على كتفي وتمررها على شعري ..
امي ... هاا جنه سمعتي كلامهم شگلتي ترجعين ؟
جاوبته .. يمه خايفه ....
- بنتي اني امج ولاتتوقعين مااخاف عليج او مااهتم لامرج واعرف اذا كنتي بخطر او لا .. تره كلامهم صحيح جهاد شايفهه بعينه ولو ماشايفها مايقتلها ليش تقارنين نفسج بيها اني ربيتج يتيمه تربية ام وماقصرت بتربيتج ...
- يعني ترديني ارجع ماما ..
- ارجعي وانه اشرط عليه كل شهر يجيبج النه ومايمد ايده عليج بعد ..
- ماادري ماما محتاره ...
بهاللحظه احمد جان يريد يدخل للغرفه ومبين سمع كلامي الاخير ..
.. جنه شنو محتاره صارلج اكثر من 3اشهر وانت هنا المفروض اتخذتي قرار ترجعين او لا ؟
جنه .. باوعتله وسكتتت وبقلبي حجيت جنت ناويه ارجع بس مكالمة جهاد دوهنتني،وخوفتني ..
كمل كلامه .. لاسكتين عندج منا لم يصلون ويتغدون ويرتاحون شويه وانت قرري ..
يمه يلا حضروا الغدا خطيه جوعانيين جايين من طريق طويل ووراهم طريق طويل هم بعد ..
امي .. اكللك احمد كللهم على جم شرط
احمد .. محمد اجه كليله يكللهم مو هو ورطنه بهالقسمه هذي واولا واخيرا القرار الج يجنه .. ..
امي .. رايحه اشوف مرت اخوج خلصت الغدا وانت كعدي فكري زين ماعندج وقت تره ..

طلعت امي وبقيت شارده احس نفسي غرگانه ببحر حيره وخوف ..
خليت ورده بمكان نومتها وغطيتها ..
ورحت وبالممر گبالي صار محمد ..
گال .. هاا شنو قررتي الجماعه جايين يرجعونج
.. ماادري خايفه
.. منين خايفه قابل هو وحش شسالفه فضيها تروحين لو لاا ؟؟
.. الله كريم
.. يلا تره ساعه. 2. يطلعون منا .. حسمي امرج من هسه ..
امي تباوعلي وبنظرتها تطمني .. تقربت منها
يلا يمه توكلي على الله
احمد .. توكلي على الله وماكو شي ان شاءالله واحنه وياج ماراح نعوفج ...
عفتهم ودخلت للغرفه
لملمت اغراضي اغراض،ورده وكلام الكل يدور براسي اولهه جهاد واخرهم كلام محمد وممتااكده من الي دااسوي ..
كملت كل شي ..
طلعت كتلهم راح اروح امي بجت واخواني يطمئنوني ساعه 2طلعنا من البصره وتوجهنا لبغداد ومااعرف شون راح اواجه جهاد وشنو راح اگله ..
وصلنه دنيا ليل .. دخلت صارت گبالي عمتي ورونق سلمت عليهم واخذوا ورده مني ..

دخلت من باب الاستقبال... صار گبالي جهاد
لابس كيمونه بيضه بارزه عضلات جسمه
وتراكسود اسود مخطط بابيض ..
يباوعلي والف حجايه بعيونه حجينه ..

* جهاد ..
باوعت للسياره شفتها نزلت منهااا
ركضت لجوه .. شفتها دخلت
ملامحها تعبانه ..
بعيوني احاجيها واعاتبها
.. ليش يااجنوو ليش تركتيني باصعب ضروفي ليش خليتيني بنص الموت وشردتي ؟

*جنه ..
حاجيته بعيوني .. ليش حبيبي ليش وسخت ايدك بدمهم وبقذارتهم ليشش ؟؟!!

سمعت صوته بكبرياء لايخلوا من الحزن
جهااد .. يووم جيبيلي بنتي،اشوفهاا ..

اخذ بنته واسمعه يحاجيهه ويلاعبها
دخلت بالاستقبال اسولف ويا رونق ..
بعدها جابتهه الي عمتي اخذتها منها
واشوفه يحوس يصعد وينزل ..
صاحت عليه عمتي كالت تعالي
رحت وراها لغرفتها
شفت سرير ورده اشتريته قبل لااولد وبقى بغرفتي فوك حتى مالحكت ورد تنام بي وصارت الطلايب
ورحت .. استغربت ليش نزلهم شنو مايريدنه يمه ..
يله بعد احسن اني هم اخاف منه ..

بس انقهرت بداخلي حييل .. مشتاقتله ومن شفت عضلاته تمنيت انام على ايده الليله ..

* جهاد ..
نزلت سرير ورده والمبرده وشكلتها بغرفة امي خاف يحترون ادري بيها خايفه من عندي
رتبتلها كل شي حتى تاخذ راحتها ..

* جنه ..

وره شويه صاحولنه ع العشا ..
كعدنه على السفره وهو مقابيلي .. ميزت عطره من بين كل الكاعدين .. منزل راسه ياكل وميباوعلي
ياترى منو الي ملت عينك ياجهاد ..

انتبه عليه اباوعله .. كتر الخبزه على صفحه وهو يكوم كال الحمدلله ..
رحت وراه شفته يم المغسله يغسل. .
گتله جهاد اللتفت عليه ويباوعلي بعيونه بخزر يريد يفترسني بنظراته ..
بتعجرف كال شتردين ؟!!
جرح كرامتي عباله جاي اتوسل بي لواريده يسامحني .. گتله جهاد ..
رجعت عمود بنتي اني .. جاوب بغرور اكثر
.. ميهمني اذا تردين بعد كم يوم ارجعي اهم شي ماافشلتي الشياب الي تعنولج منا لهناك ..
عفتها وصعدت ..
رحت لفراشي تمنيتها يمي بقيت اتقلب كل شويه اكول هسه انزل الهاا
الى ان نمت واني افكر بيهاا

*جنه
كل شوي يقهرني تاخر الوقت وورده نامت واني مانمت افكر بي يمكن هسه ديخابر صاحبته
اي ليش خلاني هنا يمكن تعلم على غيابي وتعود يخابرها كل يوم ..
نمت والدمعه تجويني ..
يوم ثاني الصبح كعدت متاخره شفتهم مخلصين الشغل.
استحيت كللش بس عمتي طمنتني كالت اكيد انت تعبانه ورونق كالت اعتبري نفسج عروسه اليوم ودللناج .. فرحت كللش .. شكد احبهم ويحبوني ..
غسلت لورده وخليتها بالكرسي مالتها .. ورحت وديتها بالاستقبال .. كعدت يم عمي وعمتي ..
كاعدين نسولف نزل جهاد باوعلي مقطب حاجبه
شبيك متكولي حاجيته بعيوني .. نزل يم ورده يحاجيهه وهي تضحك وتحرك ايديهه ورجليهاا
ثواني ورن تليفونه باوعله ورفع حاجبه مبتسم وباوعلي .. گال هلا حبيي ثواني بس اصعد فوك نحجي ..
اني هنا نار واشتعلت بيه سخنت
اكيد هي صاحبته الي يريد يخطبهاا ..
كمت على حيلي بخبال وصعدت وراه
وصلت لغرفتي وقربت اذني يم الباب اتسمع
طخ راسي بالباب اريد اوخر انفتحت الباب وصار گبالي جهاد واني لازمه راسي يباوعلي ومبتسم ورافع تك حاجب .. احتاريت شسوي بلحظه اجتني فكره
گتله بتلعثم اجيت اخذ كم غرض محتاجتهم
ممكن تطلع بره ..
- لاامااطلع اخذي غراضج وروحي مراح اكلج
- دخلت واني اعبث بالاغراض بدون فائده حسيته ورايه انداريت طخيت بي اباوعله بخوف وعيوني تترجاه مااعرف شنو الي خطر على بالي بهاللحظه
بس هو دنك عليه واللتهم شفايفي مثل الجوعان وكانه دياكل شي لذيذ لايقاوم ..
ذبت بحظني وكاني اتخليت عن شوقي اله بهاللحظه
تذكرت زعلانه عليه دفعته بايديه الاثنين من صدره ونزلت اركض ....
رحت للمطبخ .محد ماكو بي ظليت ادور شي اكله جوعانه ..
اجه ورايه گرصني هاا خفتي مني تره مااكل اني
.. ماخايفه بس حسيت نفسي ثگيله عليك وانت تريد تخابر الحب
.. اويلي ع الحب وعضيت شفتيي وطلعت ..
رحت للاستقبال
اتغدينه وخلصنه
من عادتنه بعد الاكل نكعد كلنا سوه نشرب جاي
ونسولف .. شفتها اجت كعدت تباوعلي بعيون زعلانه
واني كاعد بالكاع اريد اتمدد ..
تمددت وخليت راسي بحظنها بدون مااباوعلها واسولف ويا اهلي .. شفتها ذابت من الخجل اباوعلها ابتسم وارفع حاجبي وهي متوتره وخجلانه ومدنكه
بجت ورده وخرت عنها اخذتها وراحت ..

*جنه ..
كلش فرحت من جهاد قبل نروح للعرس رغم كبريائه وتعجرفه وتصرفاته التغث وبروده لبست فستان طوويل لونه وردي فااتح ومفتوح من جهه وحده وجوه مثل الثنورة سوده قصيرة يعني طويل ومن كدام قصير لبست جواه ستريج اسود الان اعرف جهاد ميقبل بس رفعته لنص الساق ولبست حجل ناعم كولش حلوو وحذاء سووده عاليه شويه ومقبطه من الامام حطيت ميك أب وخطيت عيوني من جوة بكحل اخضر برز لون عيوني وبياض بشرتي ولبست شال اوفايت وبي ورود صغيرة ورديه وبيجيه وكب بيجي ورشيت عطر وبدلت الورده لبستها بدله بيضه مال عرايس وفيونكه بيضه وهي حلوة تجنن بيضه ودبدوبه وعيونها ملونه وخدودها حمر ومتقرحه من البوس رشتلها عطر اطفال وبودرة اطفال ونزلت جوة واني لازمه العبايه والجنطه وبيه الممه والحليب وعطر وشغلات بسيطه ..
نزلت شفته واكف...

*جهاد

شفته نزلت من الدرج جانت اميرة تمشي علئ الارض اكلتها بنظراتي بناتي يجنن وخايف عليهن من الحسد اما الكبيرة حاله خاصه جمال فتنه رووعه تجذب الانضار ابحرت بوججه الجميل العيون المكروة بالنسبه الي والون المعقد حبيته وعشقته جان بنفسي اقبل عيونها والانف سبحان الخالق الابدع بتصميمه واما الشفايف اما الشفايف كرز فراوله مزينها الون الوردي بنفسي التهمن بس مثكل روحي والله مااصبر احبه انجن عليه...نزلت واخذت منها وردة وعطرها ترس انفاسي ااوف ياام ورده عذبتني ببعدج ضليت ابوس بورده وهي تباوعلي واني ممهتم بس بداخلي براكين ونيران ومعركه مال مشاعر بنفسي يكولون ابن عمي اجل عرسه او طلك حتئ اخذ جنتي واحتويها...طلعنه لبست عبايته ووصلتها البيت عمي دخلت جوة واني لزمت ايدها ووصيتها متكوم من مكانها ومتركص ولاتخلي وحده تصورها شفتها ضاجت بس هذا احسن الها والي اني اعرفه تربات ايدي متغلط وتخجل وتخاف بس الحذر واجب والتصوير دمر بيوت رحت يم الولد

*جنه ..
دخلت سلمن عليه البنات وبوسني وبوسن ورده وكوولش انعجبن بيه وكالن بعد مناسب بنات بغداد نريد من البصرة هيج عدهم بنات حلوات ابتسمت بخجل علئ كلامهن وجانن حيل حبابات كعدت وورده بحظني وعمتي ونسوان حمايه يمي وعمتي تعرف عليه وكل من يشوفني يسمي واحس عمتي تتباه بيه كدام العالم وتكولهم هاي ورده بنت جهاد الله عوضه باالماستين يجنن شفت كواكب اجت هجمت عليه وهي شايله الجفجير تفاجئت منها
هاااا ولج صخيمه رجعتي لا هله ولا مرحبا
جنه...يااعزاا خاله شبيج
كواكب بعصبيه..وشبت بيج ولج شلون تغلطين عليه ذاك اليوم
جنه بخجل...خاله عيب منا العالم بعدين نتفاهم
كواكب..ولج انتي تعرفين العيب يالعووبه ياناكرة المعروف نسيتي شلون جنت اطلعج من حلك السبع ودافعلج لج لو مخليته اجهيد طاكج طكه ودافينج بالفتحه السابعه وضايع ذكرج يا عووبه
جنه...انتي مدافعتلي؟؟
كواكب بصياح وكلها التمت/..هااا نسيتي شلون جنت اطلعج من ادين جهاد ورزله بس اصيح كلمه وحده جهااااد عمممه عوفهاا.. يعوفج احتراما الي اني كواكب الكلمتي مسموعه رجلج بكبرة مارفع عينه بعيني تجين انتي تغلطين عليه يالثوله يافتانه
حسيت انربط الساني اكلتني حاصل فاصل وجفجيرها بيدها كلت خلي اسكت لا تجينه ركعه من جفجيرها بس تمنيت جهاد هنا وشوفها شلون تحجي القيسي علئ كولته
اني كواكب انطرد من بيت اخووي اني ام هله انطرد وبسببج انتي ورجلج يمكن بيتكم بعد محد يطبه اي ام هله راحت وين جنت شايله الخطار شيل...هسه جيرانه شافني كالن من ندخل البيت اخوج ومانلكاج انضل نلطم ونكول...اندهوا الام هله جيناج خطار يم جاي المهيل والخبر حار ...

ام جهاد .. كافي كواكب عيب خزيتينه وهم الج عين تحجين ياناكرة الجمييل الي خنتي الخبز والعشره

كواكب .. والله ياام امجد ..
ام جهاد .. اسكتي عيب عليج امشي يمه جنونه امشي نكعد مناك ..

كواكب .. اخذت الجفجير ودخلت للمطبخ ..
سمعت صوت وراها حجيه حجيه ممكن تنطيني هذا السطل اليمج محتاجينه بره يم الولد دنخلي بي بطالة المي والثلج ..
يااهذا صوت جهيدان .. عزااا واني وحدي بالمطبخ
خلي اغطي وجهي وانطيهيا لايحس عليه ويعرفني ويقتلني هنا واني الوحدي .. غشيت وجهي وانطيته السطل واني نص منداره .. اخذه مني واني اكوله هاك لاهناك ..
جهاد .. هي منو كواكب القيسي حنان الفتلاوي ..
كواكب .. بخوف .. هلا جهاد شونك
جهاد ..يباوعلها وهي منداره وخايفه بخير ونعمه والفضل يعود الج
كواكب .. الي اي اي طبعا ..
جهاد .. خلصتيني من الهم الي جان على اكتافي ..بس،يگولون تبيعين مخضر بالله بيش كيلو الطماطه ؟
كواكب .. لاعيني هذا ياجذاب كلك اني ابيع تفاح
جهاد .. عود التفاح ارقى .. هههه لج عمتووو متعرفين تضمين السر
كواكب...يااا بالعباس محاجيه
جهاد. يسوي نفسه ميعرف...لعد منوو حجه غريبه اشوو بس اني وياج وعزرائيل والمرحومين ندري معقوله عزرائيل هو الفضحنه؟؟
كواكب..جاااا شمدريني كلشي يصير
جهاد باستهزاء...هههه ولج انتي مثل نشرة الاخبار...اخبارنا حصريه من قلب الحدث نتميز بالمصداقيه وسرعه نقل الحدث مذيعتكم كواكب القيسي
كواكب..خاب دروح ولاتتعدل واريد ارجع البيت اخوي مشتاقه البوفيتي
ضحكت بااستهزاء مشتاقه البوفيتها مدكول مشتاقه الاخوي مشتاقه الكم مشتاقه البوفيته.هههه والله فلك

شفت نسوان يردون يطبون للمطبخ طلعت وعفتها ..

نزل العريس من فوك وجهاد جان وياه ساعده لبسه القاط وصورة بالغرفه جهاد ضل يبدل ومنزل نزل العريس من الدرج ووكف علئ اول 3بايات وتلكته كواكب تهوس وتهلهل....اصبح يتكلب بين اعمامه وبين اعضاء... اصبح يتكلب كلوووووووش وحسوني ماكعد راحه اخذله خووش تفاحه وحسوني التين ومحلي البيساتين وحسوني وحلوه عيونه شايل بيكيسي علئ امتونه
والنسوان يركصن وياها وكلبت الجوو كلاب لابسه ثوب مشحر احمر والجفجير ماذبته مدري شتسوي اكيد تغرف تمن وتضم
صعدت علئ بايات الدرج وهي تلزم حسن من ركبته وشفطت خدوده شفط بالبوس وحسن يمسح بوجه
بهاللحظه نزل جهاد جان لابس بنطرون نيلي وقميص اوفوايت جماله المعتاد ولبسه الانيق شافته كواكب وهي انصدمت وضلت ترجف من الخووف عثرت من الدرج لزمت بحسن وجرته وياها وخرمشت ركبته تخرمش
وكعت هي وحسن
جهاد
نزلت اركض التمت النسوان والبنات كام حسن وهو يتذمر وينكت لملابسه دورت علئ كواكب بعيوني بس ماكوو فص ملح وذاب خررب يومها دكول جني الكل شئ،عندها حل
مدري وين انهزمت
طلعنه اني وحسن واني اضحك عليه جهاد..ههههههه بصراحه وجه العرس مو خير عليك واول موقف ويه عمتوو
حسن بتذمر...خرررب عمتك تكول عتوي وجلب بزوليه خرمشتني تخرمش هسه لا انوب العروس يروح بالها بعيد ماكوو خلطه اخلي
جهاد...ههههههههه ماكوو والعروس هسه هي تنطيها التفاصيل اول باول ماتدري بيها تنقل من قلب الحدث هسه عروستك دكول خطيه عمتك خرمشتك ههههاي
حسن...همزين تقوم هي بالواجب ولا اكعد ابرر

خلص العرس ورجعنا للبيت بعد كم يوم اروح للبصره
واني وعدت جنه بعد ماارجع ..
يوم ثاني كعدت من النوم ونزلت جوه .. سالت امي وين جنه كالت جاي تخبز بالترك ..
رحت اطل عليهه شفتها عرگانه وتعبانه وتخبز
بقيت صافن عليها شون راح اروح واني بعده الشوگ بيه الها وناره مامطفيه ..
باوعت اكو جلكان نفط قريب الها .. انتبهت عليه مايع شويه منه .. رحت الها اركض وعطت ولجججج جنه وخري دفعتها وهي ميته خوف
طفيت الغاز .. وهي واگعه بالارض
رحت كرفصت يمها تباوعلي وخايفه
وخر عني جهاد وخر عني لاتقتلني شبيك شسوييت هسه اني ..
مديت ايدي الها وهي مرعوبه وخايفه وتحاول تحمي نفسها بايديها .. حاولت اهديها ..
كتلها ليش اقتلج خايف عليج اني دشوفي النفط هذا اذا شب يحرك الدنيا
جنه .. باوعت للنفط وافتهمت ليش هيج اتصرف خايف عليه .. كتله وخر
اريد اكوم سحبني الحضنه راسي على صدره مخبي بايده وضاغط عليه ..
ويهمس بأذني
- جنه رايح اني باجر رايح للبصره وبعد ماارجع حتى ترتاحين مني شهر شهرين ثلاثه واكثر .
بس ديري بالج على نفسج خوش انتبهي فدوه احبج احبج ومااريدج تتأذين
جهاد ..
عفتها ودخلت جوه كلللبت الدنيا عليهم شون هيج مخلينها تخبز بالترك يم النفط ..
بالليل جانت النظرات بيناتنه حزينه نظرات وداع
كملنه العشا وصعدت فوك .. متمدد ع السرير
دقايق وانفتحت الباب رفعت راسي ودخلت عليه جنه .. ظلت ساكته وتباوعلي .. وتفتر بالغرفه
الى ان اجت يمي ..
گالت جهاد راح تروح للبصره باجر
رفعت جسمي وانتجيت على عكسي اي راح اروح ومارجع
راح تتزوج هناك ؟؟
ليش هذا السؤال
بجت وكالت وهي تبجي بحرگه اني احبك جهاد
اخذتها لحضني وامسح دموعهااا واهمس بأذنها امووت عليج انت حبي انت حياتي ..
شلتها وصعدتها على السرير واللتهمت شفايفها
دفعتني
كالت وصاحبتك ؟؟
ماعندي والله
يعني ماراح تتزوج
شون اتزوج وانت عندي
رجعت شفايفي على شفايفهااا
وووو
بقينه للصبح سهرانين ..
تتوسل بيه مااروح أأجلهااا
أجلت روحتي في سبيل ابقى يمهاا
وبهاليومين عشنا احلى يومين ورجعت تنام يمي فوك هي وورده ومرات نشمر ورده يم امي حتى لاتزعجنا
أنتهت ..