رواية أهدتني عاراً الفصل الخامس 5 - بقلم نورا ناصر

#أهدتني_عارا
بارت 20
نورا ناصر

جنه *
خوفتني كواكب تمشي وتحجي بالدم
خلتني ارجف
واتسائل ؟؟
لشنو تلمح صارلها فتره
شمسويي جهاد ؟؟
معقوله مسوي شي لمرته وابن عمه
زين كواكب شمدريهاا ؟
شفتهه لابسه عبايتها طايره بيها وطلعت
سالتها رونق وين رايحه ؟
نترتها رايحه لبيت اخوي ابو عمار
شفتها طلعت كلت
خلي اصعد اله بلكي الگه جواب لتساؤلاتي

صعدت كوه بطني لحد حلگي وثگل بكل جسمي
اخخ اصعد الدرج وانهد شوكت اولد وارتاح.

بشق الانفس اله كملت الدرج
وصلت للغرفه فتحت الباب شفت جهاد يدخن
ومتوتر كللش
شافني طفى الجكاره وفتح الشبابيك
وظل يطرد الدخان بيده
تقدم باتجاهي كم خطوه لزمني
لسه معصب خوفني كلش
حضني من اكتافي
تعالي حبيبي تعبانه تعالي مددي
كعدني على السرير شال رجليه وحده وره الخ
ومددني واني اباوع اله بخوف وتوتر ومية سؤال ابالي.
اباوع لايده شسوت ايدك جهاد بس لا الي ابالي ؟!!
صخمتي يجنه وجماله بنتي مبقى شي وتجي للدنيا
تجي بيا حال وشلون. ؟؟

بعد ما مددني اجه بصفي كاعد ومقرب جسمه عليه
يباوع بوجهي
كال شبيج وجهج مخطوف ؟؟
.. شبيها كواكب جهاد شنو الي صاير ؟؟
.. معليج بيها هي تحب الكركه ومتعرف تصم حلكها
المهم شونها وردتي
وخله ايده على بطني يتحسس حركة الطفله
وهي برعه وحركه من هي ابطني وظلت ترفس جوه ايده ظل يضحك
احس ضحكته وليدة الم وهم حمل جبال وشايله على اكتافه
مهموم ويضحك كسرلي قلبي.
اخذ ايدي يبوس بيهه
كال
... جنه ربيها عدل فدوه
.. شتقصد جهاد شنو هالحجي،اني وانت نربيها ؟؟
.. اني ماضامن نفسي
.. ليش ؟
.. مدشوفين المشاكل الدصير
اني اسف ورطتج وياي مفروض انتهي من موضوع رؤى يلا ارتبط بس هي قسمه بعد.

خلاني بقلق عليه باوعتله بقهر وتحسست بطني هو شيقصد يعني يأذوو ؟؟
خفت عليه هوايه ماريد بنتي تطلع يتيمه اني اعرف شعور اليتم لان مجربته.
كتله عمرك طويل ان شاءالله
ضحك كال
.. جنه لطلعيهه عيونها خضر فدوه تره تعقدت
ضحكت كتله
.. قابل هو بكيفي الله يخلقهاااا
حضني قربني كلي اله
كال تعالي اشبع منج قبل لااروح
ضحكت وحضنته كتله اني هم مدااشبع منك
جهاد .. شنو رايج اسويلج تسهيل للولاده
.جنه .. هههه لا اني ماجيب طبيعي الدكتوره اكدتلي عندي ضيق.
جهاد .. لتخافين حبيبي اني اوديج احسن مستشفى واحسن دكتوره تسوين العمليه وصدكي اني خايف عليج بكدج.
جنه .. جانت لمساته توترني مااعرف حسيت بشي مسوي جهاد
ممعقوله جهاد ساكت وميدور على زوجته اني صرت اعرفه كلش زين
صرت خابزته وعاجنته مثل ميكولون
مو هو الي يعوف مرته وهي خاينه.
كلما يتقرب مني الخوف يزيد
طول مدة المعاشره اني خايفه منه ومو اول مره
بس الغموض والبرود العنده صار يخوفني اكثر.
وصرت اتذكر كلام كواكب مرارا وتكرار واردده بداخلي.
بعدها نمت على صدره واباوعله بقهر وهو غافي
دقايق واندكت االباب.
ووياهه صوت عمي يصيح جهاد جهاد
كمت من صدره خليت ايدي على كتفه وضغطتها اصحي
...جهاد جهادد
كوم عمو يصيحلك
كام مفزوع شكو صاير شي ؟؟
...ماكو شي شبيك فزعت بس عمو يريدك.
مسح راسه بتوتر
نزل من السرير لبس ملابس وفتح الباب وطلع.

ابو جهاد ..
ابني شبيك ويا عمتك خير ليش طلعت من البيت انت شدعواك هيج عصبي والله هي عصبيتك راح ادمرك ودمرنه.
جهاد. يابه شسالفه هي وين رايحه اشو لبيت اخوها الباب ه الباب مو بعيد وبعدين بزعت روحي منها بس تجفص.
ابوجهاد .. انت شنو الي ضامه علينه وهي شبيها هيج وياك كول جهاد احجي الموضوع يخص مرتك ؟؟
جهاد .. شبيهه مرتي جنها العافيه مابيهه شي.
ابو جهاد .. ولك اقصد على رؤى
جهاد بصياااح .. ماعندي مره بهذا الاسم يابه كااافي
ابو جهاد .. ولك اشك انت كاتلهه
جهاد .. واذا اني كاتلهه وكايلهه الك قبل وهسه هم اكررها كتلهه وسام شرف واعلگه بصدري.
وهسه من رخصتك يابه ماعندي وكت اضيعه بهالكلام.
* جنه
سمعت كلامهم متت خووف دخلت جوه البطانيه ابجي بحركه وبخوف وبصوت ممسموع
دخل وطبك الباب حيل وينافخ ويدفر بالغراض
فززني ظل يبحوش عرفت دياخذ ملابس
سمعت صوت بابا الحمام انسدت قوي
دخل للحمام.
طلعت من البطانيه اختنكت والهوا قل بريتي ومنا اني اصلا بهي الاشهر اختنك
خليت ايدي على حلكي وابجي
خوف ينتاب كل جسمي.
خايفه من جهاد
خايفه من كلام عمو ونوب هو ماينكر كاتلهم
يربي شلون يربي اوكف ويايه.
احس نفسي عايشه ابيت مهجور وبي قاتل واني خاتله وهو يدور عليه
هي الخوف الي بداخلي
حسيت باب الحمام راح ينفتح
تغطيت مره ثانيه بالبطانيه وكتمت انفاسي
واسأل بروحي اني من شنو خايفه ؟؟
خايفه ليشوف الخوف على ملامحي وهو معصب اخاف منه.
اختنكت جوه البطانيه وهو طلع من الغرفه
طلعت من السرير ركض للحمام.

كواكب غاديه نار هي وبطريقها لبيت ابو عمار
كانت معصبه من الي سواه جهاد بيها تمشي وتدردم وناويه على سوء طفح الكيل بيها ومااتكدر تخبي السر اكثر
وصلت لبيت ابو عمار ودكت الباب
طلعت الها ام عمار
ام عمار ... كواكب ؟؟!! خير شبيج
كواكب .. وينه عمار وينه ابو روحي صيحيلي واحد منهم روحي.
ام عمار .. شصاير بس كولي
كواكب .. وخري شبة فكر شطولج اني فايره وانت جاي تحققين وياي
دخلت للبيت وهي تعيط وتصيح باسم عمار
طلع الها مفزوع
عمار ... خيرج عمه شكووو
كواكب .. انبط چبدي اله اكولك علي الصار
عمار .. هسه غير تحجين
كواكب .. باع بليلة الي اختفى بيهاا عامر ورؤى شفت جهاد يگود عامر ورؤى وبيده السلاح.
عمار .. شنو انت متاكده عمه ؟؟
كواكب .. وداعة هي عيوني الي بعد جم يوم ياكلهن الدود بالكبر هذا الشفته.
عمار ..بصياح وصوت مبحوح .. وليش سكتي كل هالمده ليش ؟؟
كواكب .. ولك جهيد هددني وكل هالمده ذالني ويغلط عليه طب لغرفتي هددني بالسلاح وخفت وهسه بعد مااسكت شنو هالعيشه شيريد يصير يعني وانتوا اكيد تحموني منه
عمار .. اليوم اليوم ادفنه والله.
كواكب .. وهي تمسك بملابس عمار
لايمعود مو هيج بهداي بهداي اني ليش كتلك لان خاف اهل المفلوكه رؤى يسوولكم مصيبه اني مشفته قتلهم بس شفته كايدهم
عمار .. جهاد اليوم يطلع اخوي حي ميت يطلعه
لا والله ادفنه ابيتهم.
صعد عمار لفوك وبقت كواكب تلطم خدها ووعت على نفسها والي سوته
وعرفت بلحظتها انو اعترافها راح يشعل النار بين العائلتين.
نزل عمار وبيده السلاح وهو يخابر رياض ويصيح ويبلغه باعتراف عمته الجديد والخطير.

*جهاد

طلعت من الغرفه معصب من كلام ابويه
للزم يتعكر مزاجي لازم ماارتاح كلما اجي هنا عركه مليت من روحي شوكت تفرج.
بمراره والم اجه على بالي ذاك اليوم الي تاكدت بي من كل شي.
بعد ماهمست رؤى باسم عامر سويت نفسي مااسمع ولاسمعت ويمكن متوهم
كسرت التليفون واني عاندت مااجيب الهه واحد
راحت لاهلهه وجابت واحد جديد
لانها اكيد ماتستغنى عنه .
دخلت للغرفه بينما هي ماكو .
سمعت صوت تليفونها دليل وصول اشعارات الهااا
فتحته بي رمز
بس طلعت عندي الاشعارات بالشاشه
وقرأت الرسائل
"حبيبتي انت وعدتيني بس يروح جهاد للبصره نلتقي وتعوضيني "
بلحظتها احس انتهيت فعلا
لحظة دمار دمرتني كاني جبل وانهد
حاولت افتح تليفونهااا مكدرت
تركته واني احاول اهدي نفسي
واريد اعرف منين هي الرساله
كنت شاك بعامر بس اريد اتاكد
لحظات ودخلت رؤى للغرفه
واجت يمي من شفتها تمنيت افترسها بس اريد اطبخها على نار هادئه
لازم احافظ،على برودي واتزاني وماافقد
تقربت مني وقبلتني
هاا حبيبي،اليوم تلتحق مو
باوعتلهااا اي حبي راح اللتحق اليوم
اوكي تمام
كعدت اني على السرير وهي بقت واكفه سحبت الفون واني وكفت وراها وبما انه اني طويل ركزت على التليفون شفتهه شلون فتحت الرمز
ورجعت كعدت بهدوء بس بداخلي امواج عذاب متلاطمه.
شفتهه كتبت شويه وسدت التليفون قفلته وخلته وطلعت بره االغرفه
وهي مطمأنه
كمت من مكاني وتمنيت مااشوف الي اشوفه ولا شكي بمكانه
فتحت التليفون ورحت ع المسجات
الرقم مكتوب عليه زهور بس لم جيكته بالارقام الي عندي طلع عااامر
مجانت الي صدمه كبرى لان جنت متوقع هالشي.
جان ردها على الرساله
"اي حبيبي جهاد اليوم راح يلتحق حتى نلتقي هنا بغرفتي مدام البيت شبه فارغ بس عمي وعمتي وكواكب وينامون على وكت لذلك ابشر اليوم اني بحضنك "
لحظات مرت عليه اختنكت والهوا الي بريتي تلاشى
احس بركان انفجر بداخلي
دخلت للحمام ضربت ايدي بالحايط
اريد اهدأ ماكو غصيت بالهوا الي اتنفسه
كعدت ع الكاع والحيره متملكتني.
احس مشتعله نيران داير مدايري
خليتي ايدي على كصتي احاول اجر النفس
اسحب نفسي احس ينجر ويا ناارر
حاولت اهدي روحي اقنع نفسي اني قوي اني مراح اقبل بالعاار لا اابد ابد
طلعت حضرت جنطتي لازم ابتعد
دخلت رؤى شافتني حاولت مااباوعلها يمكن اذا اباوعلها اضعف وانهار واقتلها هنا بالمكان
لكن قويت نفسي ونجحت
.. هاا حبيبي حتروح هسه ؟؟
.. اي هم يله الحك اوصل وارتاح
.. ماشي حبيبي توصل بالسلامه
شمرت نفسهه عليه حضنتني بعد لحظات يله بادلتهه الحظن.
شميتها بس ماشميت ريحة عطر هالمره
لا شميت ريحة غدر خيانه ازكمت انفاسي.
عصرتها حييل
بعدتها عني واني متعمد ابحر بعيونها كلت الها...مرتاحه وياي:؟؟
جاوبت بااستغراب..اي مرتاحه ليش؟؟
ضحكت بااستهزاء..حتئ اذا ممرتاحه اطلكج...
جاوبت بصدمه..لا ليش تطلكني اني احبك وانت تحبني
جاوبتها...هذا الحب بنضرج؟؟
جاوبت باارتباك..تشك بمحبتي الك؟:
جهاد بهدوء...لا مااشك
رؤئ بخوف باوع بعيوني وانت تلكه النتيجه
ركزت بعيونها وهي بكل صلافه مركزة بعيوني
جاوبت ...حبي شنوو ملكيت الاجابه؟؟
جهاد ابتسمت..لا لكيتها بس صدكيني مو هسه اعلن عنها بس ارجع من دوامي راح تعرفين الاجابه
دنكت اخذت جنطتي بينما هي واكفه وتباوعلي باستغراب
نزلت شفت امي جوه
الام ... هاا يمه وين رايح مو كلت بعد الغدا تروح
جهاد ... لا يمه هسه راح اروح
الام .. ماتاكوللك لكمه قبل لتروح
جهاد .. اكل بالطريق
الام .. مودع بالله يمه الله وياك
جهاد... بستها من راسها ودرت ظهري اريد اطلع اللتفتت الهه كتلهه ادعيلي يمه
خليتهه تدعيلي وطلعت.
استفاقيت من ذاكرتي واني احس بمراره والم
وكانه الي صار هسه صار من هالفتره الطويله.

دخنت اخر جكاره جانت بالباكيت ودخلت
جوه وصعدت فوك
ودخلت للغرفه
شفت جنه واكفه ع المرايه دتمشط
من شافتني فزعت
.. شبيج شايفه جني ؟؟
اكتفت بالابتسامه بس نظراتهه متتفسر
اقتربت منهااا وكفت وراها وقربتها االي بعدت شعرها المبلل وشميت رقبتها وبستها
حسيتها ترجف
.. شبيج ترجفين بردانه
... جنه بتلعثم اي حبيبي شويه برد.
.. تعالي امشط الج شعرج
.. لا حبيبي اني امشط
.. بعصبيه كتلها تعاااي
اختفت ابتسامتها وانطتني المشط بهدوء والخوف بعيونهااا.
سحبت الستول وكعدتهه عليه وظليت امشط الهاا
وهي كاعده بهدوء ومالهه اي صوت.
سرحت شعرها ووكفتها احسها مثل اللعابه واحرك بيهااا
حضنتهه كتلهه شبيها جنتي اليوم مو على بعضهاا
.. ماكو شي حبيبي ليظل بالك
.. الله ريحتج ترد الروح اذا تبقين هسه يمي اسبحج مره ثانيه.
جنه
.. لا فدوه اريد انزل اساعدهم بالعشا
بسته بخده ونزلت جوه
للمطبخ
رونق دسوي عشا
.. اساعدج رونق
.. خلصت حبيبتي مبقى شي
.. ماكو خبر من كواكب
.. لا ماكو بس شبيج وجهج مخطوف خاف عندج ولاده ولج
. .. لا مابيه شي
راح احضر الخبز
.. ماشي.
حضرنا العشا وصبينه وفرشنا السفره
مابيه اصعد الفوك دزيت حسوني يصيحله
نزل واجه كعد يمي
والكل صار كاعد ع السفره بس الكل ساكت ومتوتر
عدا جهاد الي جان بارد ثلج
الكل متوتر لان كلام كواكب وتهديداتها قبل لتطلع من البيت صار الكل عنده علم بي.
الخوفه مدتروح مني وارجف واحس الكل منتبه الي.
ثواني وصار رمي قوي.
جهاد .... لا اله الا الله هم رياض هد على بيت عمي!!؟
فؤاد .. لك يابيت عمك هذا الرمي قريب لك هذا اببابنه
جهاد بااستغراب...شنوو::؟؟
الكل ركض للشبابيك يباوعون
فؤاد ..لك هذا صوت عمار
هذا يهدد بيك يكول دمك مهدور
جهاد بعصبيه...انعل ابوو لابو لخلفه حجتها كواكب والله اله انعل والديهم
وركض يريد يجيب المسدس
ابو جهاد .. لك جهاد شمسوي وشتريد تسوي بس تطلع يترسوك رصااص
جهاد .. عوفوني لحد يلزمني الزلمه وابن ابو خلي يرمي عليه طلقه اليوم امحيهم من على وجه الدنيااا.

جنه
رمي وصياح وتهديدات
الخوف تملكني كلي
جهاد واخوته صعدوا للسطح وبيدهم اسلحتهم
بقيت اني كاعده بمكاني ارجف واحس اختنگت ثواني وصار عندي الم بطني ظليت اتلوه واصيح
اللتموا عليه عمتي و رونق
مددوني ونمت صفح واني اتألم واهذي من االوجع
الام .. شلون بهالليله ياربي تفوت على خير يمه اولادي راح يتكتلون شلون بيه اني
رونق .. خاله جنه فد نوب خاف عدهه ولاده روحي صيحي لجهاد.
جنه ..
جنت بين الخايفه عليه ومنه بين الاحساس بالغربه احتاجيت امي يمي وظليت اناشغ ولازمه بطني وابجي وارجف
راحت عمتي صاحت اله
جهاد.
شفت امي صعدت علئ الدرج وتريد تجي النه وبين اطلاق النار
ركضت عليها لزمتها واني ارجعها يممه وين جايه لاتجيج طلقه ماشوفين الجو شلون كاب بعصبيه
جاوبتني بدموع...لك جهاد مرتك راح تموت مرتك صارت عدها ولاده
ضليت بحيره بين اخواني الي بين الحياة والموت وبين زوجتي البريئه
مسحت وجهي بتوتر ونزلت اركض درجتين درجتين شفتها من بعيد وهي تتلوئ وتصرخ بوجع قاتل
اكيد كل هذا الي بيهه من الهبطه والخوف.
من شافتني شايل المسدس زحفت وهي تبكي تقدمت منها حضنتها واني اطمنها
جهاد بتوتر...لا تخافين هسه اخذج لااحسن مستشفئ
بهالاثناء نزل فؤاد يركض وبعصبيه.كال.لك جهاد حتخبلنه بس كول انت قتلتهم ؟؟
جهاد بصياااح ...واذا قتلتهم يعني شنوو:؟
جنه صرخت بخوف لالا جهاد لا تكول هيج لا لاااا لا تقتلني اني مو مثلهم
درت وجهي عليها بصدمه وحجيت بكلبي هي شتكول وليش اكتلها هي مو مثلهم اني اعرف ومستحيل تصير مثلهم
من قهري زنكت فؤاد من قميصه...انت ماتعرف تحجيلك حجايه بيها خير متشوفها شلون راح تموت عايزه هي خوف حتئ تجملها
تدخلت امي وفاككتنا
*جنه
شفته متت خوف تخيلته ديقتلني مثل ماقتل رؤى تخربطت بالزايد
فقدت الامان وصار جهاد الي مصدر خووووف
كعد يمي مااكدر اللهج غير بالاهات
لزم ايدي عصرها قوي
.. جهاد راح امووت خلصوني
.. اني راح اشوف حل انت ارتاحي اخذي نفس ماشي.
رحت على ابويه
كتله يابه اريدك تخابر واحد منهم خلي يطونه هدنه
جنه متخربطه فد نوب محتاجه مستشفى ضروري هسه.
نزل ابو جهاد واخذ التليفون وخابر على اخو وطلب منه يوكفون الرمي ديطلع يحاجيهم.
طلع ابو جهاد
جانو اخوة عامر واهل رؤى مقابيل بيتهم
بقى يتفاهم وياهم
وتوسل بيهم ينطون هدنه زوجته عدهه ولاده وهي ماالهه ذنب
وافقوا على طلب ابو جهاد
رجع وبلغهم وكال الهم تحضروا حتى تاخذوها للمستشفى.
*جنه
بعد رجعت عمي من بره وكال يلا حتى تروحون المستشفى ماكو شي عليكم
لزمني جهاد من ايدي
.. يلا حبيبي كومي ولتخافين اني وياج ..
ابو جهاد .. انت وين وياهه ولك يترسونك رصاص اذا عتبة الباب خلي واحد من اخوتك يوديهم
.جهاد بصياح . يابه شتكول انت قابل اني اخاف واخلي زوجتي تطلع من بينهم.
ابو جهاد .. انت بس لو تكول شمسوي اني كلبي يرتاح
بعد جدال بقي جهاد معاند ميقبل اله يروح ويايه وموهامه شي وهو يعرف اذا طلع يكتلو بس ميريد يعوفني
اني كاعده بين الالم والخوف ممده رجليه ومخليه ايدي ع الكاع سانده جسمي عليهه
جهاد .. يابه كتللك مخايف منهم اني واطلع ومسدسي وياي والزلمه بيهم خلي يشيل سلاحه عليه اخفر الكاع وادفنه بمكانه.

ام جهاد ..
صرخت وشمرت نفسها على جهاد وظلت تدك على صدره ولللك يمه فكر ابنتك ولك فكر بيه يمه حرام عليك لاتعذبنه خلي واحد من اخوتك يودينه وانت ابقى هنااا.
واخيرا استسلم جهاد ووافق يودينه عماد للمستشفى
راحت. رونق جابتلي عبايه وجنطة الملابس الي حضرتها اني من كم يوم لان الدكتوره حددت الي موعد العمليه بعد يومين بس مجنت اعرف هيج راح يصير بحالي.
حالتي يرثى لها عبالك موتي حيصير بهاللحظه

لبسني جهاد العبايه وباسني من راسي حضني وكال اطمئني مراح يصير شي لتخافين
باوعتله والدموع بعيني ماادري شنو احجي
احس صرت خرسه بس مية شعور بيه خوف وقلق والم حتى علي هم خايفه هزيت راسي اي
اخذتني عمتي من ايدي
وطلعنه بره البيت
ظليت اباوعلهم شون متجمعين وناوين ع الشر رفعت راسي للسما ياربي احقن هالدم ولاتخلي يسيل.
صعدت بالسياره
وگلبي احسه بقه بالبيت.

*جهاد
باوعتلها وهي رايحه وي امي
رفعت راسي للسما ودعيت بكلبي ربي احميهاا ورجعها الي سالمه هي وبنتي
اعرف دعوتي متستجاب لاني انسان أثم وكلي ذنب ويمكن حتى مطرود من رحمتك بس هي يتيمه ومحتاجه تشملها بحفظك ورعايتك.

رجعت لاخوتي للسطح حتى ادافع عن بيتنا منهم
ابو جهاد .. خابرولي على امجد خلي يشوف الشيخ مال العشيره ويشوفلنه حل.

اتصل بي فؤاد وتدخلوا الشيوخ وانطونا عطوه

نزلنه جوه بعد ماراحوا كلهم من يم الباب
دخلت الغرفتي مالي خلك احد سمعت كلام بما فيه الكفايه.
شمرت المسدس تمددت ع السرير واباوع للسكف
وافكر بجنه احس روحي مربط تمنيت اني يمهه هسه واوكف بجانبها ظليت اهمس سامحيني جنه سامحيني.
غفيت شويه واندكت باب الغرفه رفعت راسي انفتح االباب
دخل فؤاد ... كوم اجه امجد ويريدك هو وابوي !!

جنه
طول الطريق ودموعي مانشفت دموعي
احتاجيت احد من اهلي يمي
بس بيني وبينهم مسافه طووويله
احتاجيت اخابرهم واكولهم يدعولي
بس احس مربطه ومابيدي على روحي شي
وصلنا للمستشفى
الي من المقرر ان اسوي العمليه بيهااا
وكفنه اني وعمتي ننتظر نفوت ع الطبيبه
الالم موتني حضنت عمتي وابجي وهي تبجي ويايه وتدعي الله يسهل ولادتي والله يحمي الولد بالبيت
ام جهاد .. ببكاء .. يمه جنونه ادعي ادعي انت تردين تولدين الله يستجابلج الدعاء ادعي الله يحفظ الولد ويحميهم.
... الله يحفظهم عمه راااح امووت والله
.. لا بنتي لتكولين هيج اسم الله عليج.
بعد طول انتظار والم شديد ببطني
وصل الدور النه ودخلت للطبيبه وفحصتني
كالت ماعندج اسم الولاده
لعد هذا الالم كله شنو ؟؟
كالت انتظري الدكتوره مالتج تجي تشوف حالتج.
بقينه بالمستشفى ننتظر الدكتوره تجي.
اتصل جهاد انطيته لعمتي تحاجي
عمه حاجي ماابيه احجي والله موجوعه.
حاجته عمتي كالت يريدج مصمم يحاجيج احجي ويا بردي گلبه تدرين بي هسه گلبه نار.
اخذت التليفون منها وحاجيته ...الو جهاد
.. هاا ياروح جهاد شونج يالحبيبه
.. جنه .. ببكاء .. مكدرت احجي شي
.. لاتبجين لاتخوفيني عليج لاتمردين گلبي لاتخليني هسه اطلع من البيت واجيج وطزز بيهم مخايف اني من احد.
جنه ..
خفت عليه اعرف مخبل وكل شي يسوي كتله لا لاتجي مابيه شي هي اعراض ولاده بعد لازم يصير بيه هيج.
.. حبيبتي تعاي وخلي ورده تنورنا والله منتظرها بفارغ الصبر اريد اشوفها احس شايفها من قبل وعطشان على شوفتهه مشتاق الها هيج داحس.

جنه .. مكدرت اكمل والله غصيت بالحجي كتله ان شاءالله تعبانه جهاد هاك هي عمتي وياك وانطيتها التليفون العمتي وطكيت بجي
انقهرت على بنتي هم مراح تعيش حياة طبيعيه وابوها متهم بالقتل
شنو ذنبها تجي للدنيا بهيج ضروف.
بقينه للصبح بالمستشفى لحد مااجتي الدكتوره وشافت حالتي
وقررت تقرب موعد العمليه.

* جهاد

نزلت جوه واني متجهم اعرف حجيهم راح يعصبني
بس شافني امجد كام واجه صوبي.

كال .. لك جهاد كول احجي انت قتلتهم لو لااااا ؟؟
.بصيااح وعصبيه كتله.. اووو تره مليت من هالسؤال كلمن يجي يسألنيااا مالي خلككم كلكم دروووحوو بالي يم مرتي هسه عدهه ولاده وماادري بحالهاا واني كاعد هنا اني رايح الهاا.

امجد .. لك وين تطلع ماتكولي والله مترصديلك ويقتلووك والله.
جهاد .. مو مره اني حتى اخاف وماراح ابقى هنانه مثل النسوان اخذ سلاحي واروح وخوش زلمه اليدنالي.
ابو امجد ..بصياح والم وهو لازم قلبه ويكح . لك جهاد لاتخبلني لك اني اولي امك تولي احنه رجلينه بالكبر بس فكر بمرتك ببنتك هسه هم بمكان امن ماعليهم شي وبايادي امينه اكعد هنا لاتأذيني.

جهاد .. شفت ابويه يريد يتخربط رحت يمه كعدته اني وفؤاد وامجد وظليت افرك اله صدره

امجد .. لاتخاف يابه مانخلي يطلع
فؤاد .. جهاد دحجيهه لخاطر محمد كووول انت قاتلهم حتى نكدر نتصرف
جهاد .. ببرود .. قاتلهم وله لا مساله تخصني الي وحدي اني انغدرت واني انخنت وسدوووو هذا الموضوع مااريد اسمعه.
عفتهم وصعدت فوك خابرت جنه وحاجيتها كوه تحجي .. انقهرت حييل حسيت بألم يعصر روحي عليهه صوتها الي بي بحة وجع والم جسدهه وحتى روحها يمكن اني السبب بي تقلبت واحس
بداخلي ألم ما يحتمله قلبي المكون من نبض ودم،

جنه *
وعيييت الم ابطني واحس مو بهالعالم اني
اشوف مغوش.
اله بعد وقت عمتي يم راسي ودموعها على خدها .
.. حمدلله على سلامتج جنه.
.. احس ثكل بلساني الله يسلمج عمه شونه جهاد ؟
.. زين يمه زين ماعليهم شر ان شاءالله ادعيلهم توج جايبه انت.
.. وينها بنتي عمه اريد اشوفهااا
..يمه بنتج تعبانه شويه خلوها بالخدج
.. ليش اشبيهاا ؟؟
..الحبل السري ملتف على رقبتها وصار عدهه ضيق تنفس
انصدمت اريد اكعد توجعت رجعت نومتني عمتي ظليت ابجي
عمه يعني تعيش كليلي ؟؟
اي عمه لتخافين انت ادعيلها
زين راح ابقى ويااهه
اي راح نبقى لتخافين.
خاابر جهاد وبصوته الحزين والمبين عليه متوتر وحجيت ويا وظل يطمئني ع الوضع
بس الخوف جان منه هو مو من الي ديصير اكثر.

بعد ماتحسنت حالة بنتي وجابولياهه
باوعت الها نايمه بهدوء وسكينه
انكسر گلبي عليها شلون راح اتعيش بهالهوسه هذه.
بعد ايام
اجتي عمتي وزوجة اخوها كالت
يله يمه جنه خلي اروح لبيت اخويه
.. ليش مو بيتنه شبي البيت
.. يمه الوضع مو زين وانت ينخاف عليج
.. ماشي
حضرنا اغراضنه وطلعنه لبيت خال جهاد.

بس خايفه كلش ومية سؤال ابالي على الي ديصير بالبيت.

جهاد * جنه ولدت بس ماكدرت حتى اشوف بنتي
لان بقت بالمستشفى كم يوم
وحضرنا كعدة العشيره
اني واخوتي وابويه.
طلبوا مني اعترف وعرضوا عليه اعتراف عمتي
كتلهم هي هذه مخرفه واني شمدريني بيهم.

بعد جدال طوييل خلصت الكعده ورجعنه للبيت

شكد موحش البيت بدون جنه وبدون امي
دخلت غيرت ملابسي وقررت اروح لجنه اشوفها واشوف ورده.
نزلت من الدرج وهم نسمع صوت رمي يم باب البيت مالنه.
فؤاد .. لك جهاااد هي شنو هم رجعوا ذولي
عماد .. يمعود ذولي مراح يفكون منه ياخه دعترف وفضهاا الي تسويهه حمام دم.
جهاد ... تنهدت بحسره كتلهم ببرود خلص خلص خابروا ع الشيخ خلي نكعد مره ثانيه عندي حجي ثاني.

جنه *
جنت بالغرفه الي خصصوها النا ابيت خال جهاد
رضعت ورده ونومتها خليتها بمكانها وطلعت من الغرفه
اريد اروح للحمام
اجه باذني صوت حجي
خال جهاد وامه
يكول الهاا جهاد اعترف هو قاتلهم اثنينهم.
اني انهاريت لزمت بطني وكعدت بالكاع ابجي بخوف واصيح ودوني لاهلي مااريد ابقى هنا
اريد اكوم اروح لبنتي حسيت بخوف عليها
اجو يمي يهدون بيه
كتلهم هسه تودوني لاهلي ماابقه هناا ماابقه.
بعد طول مناقشات وحجي وافقوا يودون لان شافوا حالتي متتحمل ابقى هناا.
اجتي عمتي تبجي كالت راح يودونج اخويه ومرته للبصره.
كتلهه عمه سامحيني مااكدر ابقى وي شخص قاتل اخاف على بنتي وعلى نفسي.
اخذت ورده وجنطتي الي بيهه ملابس قليله الي والهاا ودعت عمتي بدموعي ودموعهااا وصعدت وياهم بالسياره وانطلقنا للبصره.
*جهاد
يوم ثاني تقررت الكعده مال العشيره
تصدر صدر الديوان كبير العشيرة وبعض الشيوخ واهل عامر واهل رؤئ
جنت كاعد بينهم واني اشوف الوجوة عبالك تريد تفترسني واني بكل برود اخلي عيني بعيونهم ومخايف لا من جبير ولا من زغيير
الكل جان يصيح
لك جهاد انت قاتلهم اعترف وين وديتهم متعترف.

الا ان صدح واحد من الشيوخ
واحد و كال...عمي اعترف اعترف انت قاتلهم حتئ نطلع الجثث اما خاطفهم حتئ احنه نقتص منهم

جاوب ابويه قبل لا اجاوب...نريد الامان قبل اعترافه
نترت بعصبيه..ياا أمان لحياه والموت بيد الله ماارايد أمان اني
حجه كبير العشيرة...لك عمي العشيرة بسببك انقسمت نصين نص معارض ونص مؤيد انت احجي شنو الصار حتئ نلكه الحل
جاوبت بهدوء..شنوو لتردوو؟؟
احد الشيوخ...نريد نعرف ابن عمك وحرمتك وين؟؟
جاوبت بغصه وهدوء وتوتر..قتلتهم
كام عمار بعصبيه وهو يتهدد ولازمين بي خمس زلم...لك جهاد ليوم اشرب من دمك تقتل اخوي اله اهتك عمرك.

اخوو رؤئ كام يتهدد وهم لازمينه كومه مال زلم...اختي بريئه انت واحد عندك مشاكل ويه ابن عمك وتهمتها باطل وين جثة اختي وين
وكفت على. حيلي بعصبيه.صيحت..اي شرفاء مالهم ذنب اني المجرم لك اكلوو تبن شفتهم بعيني جاي تفروها عليه لك اني الملازم جهاد متفوت عليه هاي السوالف

تهدد عمار بعصبيه...وين دليلك
هدئت مصدوم من العاصفه لاجتاحت روحي وسألت نفسي وين دليلي؟؟ ماعندي دليل وذول جاي يكذبون الكذبه ويصدكوها يردون يبرون شرفهم ويغطون عارهم بيه...لازم الكه دليل لازم

الاعتراف :-
بعد ماطلعت من البيت واوهمت الكل اني ملتحق للبصره.
بقيت ابغداد لحد الساعه 11ونص بالليل افتر بالشوارع اريد اهدأ مجاي اگدر ،الوقت يمشي وكل دقيقه تمر احسها تقتل جزء بيه كضيتها ادخن فكرت اشرب لا مااريد اشرب خاف افقد اريد انفذ الخطه الي رسمتها من ايام مااريدها تتفشكل.
كل الي بالبيت عبالهم اني اللتحقت من البارحه
كلشي رسمته بيني وبين نفسي.
احس نار براكين متوجره بداخلي
احس دمي تخطى درجة الغليان
مااعرف شون لهسه صامد وما انهاريت
رجعت للبيت والساعه دكت ب12نص الليل والجو بارد جحيل شهر الواحد.
طفرت من وره البيت م̷ـــِْن السياج الخلفي ونزلت درت نص دوره حول البيت
اكدر كل شي اسوي بس مالكيت غير هي الطريقه اشفي بيها غليلي واخلص من حجي الناس فد مره.
هدووء قاتل والكل نايمين.
دخلت للبيت واعرف الليله متواعدين.
جنت اجهز نفسي للمشهد الي راح اشوفه احس انهاريت بقيت بمكاني اكثر من ربع ساعه مااكدر اتنفس كوه ظليت اضرب على صدري كوه جريت النفس وتهيأت للدخول.
حضرت السلاح ودخلت للبيت بهدوء وصعدت فوك
كل خطوه على الدرج جنت اشوف بيها موت جزء بداخلي كل خطوه جانت تسائل سابقتها ليش هيج ديصير ويايه ، كل خطوه جانت تموتني وجع وألم

وصلت الباب غرفتي جانت مقفوله من جوه بس اني عندي نسخه من المفتاح فتحته ودخلت
شفت ابن عمي على فراشي وبين احضان زوجتي.
شفتها عاريه وجواه وهي مستمتعه
وهو عاري !!
صعب اشوف الغدر والخيانه بليلة وحده
الغدر المتمثل بابن عمي الي حسبته مثل اخوي
وزوجتي الحسناء الي فضلتها على هوايه بنات
اشوفها خاينه وبعيني
دخلت عليهم
انصدموا كاموا يغطون بروحهم
تقدمت باتجاهم وسديت الباب

جنت اتنفس سريع وكل شي بداخلي يصرخ وعيوني بخلت بالدمع رفعت مسدسي صوبهم.
شفت الخوف بعيونهم
عيونها الخضر وكانها شافت الموت كبالها مو اني
ابن عمي احسه شاف عزرائيل جاي دياخذ روحه مو جنه شايفني ابن عمه وعضيده
احس اذاني مسدودات ولا جاي اسمع توسلاتهم
هنا قلبي مات هنا احساسي انتحر وتحولت من انسان لانسان ثاني بلا قلب بلا احساس بلا رأفه.

كتلهم بلا صوت والا راح انهي حياتكم هنانه نفذوا الي اريده منكم وبدون تردد واذا سويتوا شي بدون مااحجي راح انقلكم لغير عالم بطلقه وحده.
لبسوا ملابسهم شلون مجان وهم يتوسلون ويبجون وكدتهم لجوه.
هم يمشون قبلي واني وراهم وبيدي المسدس.
بينما دنمشي صارت گبالنه كواكب
من شافتنه لطمت وجهه وصرخت صرخه وحده خليت المسدس براسها رأسا
اششش اسكتي ولا حرف لو تردين تجين وياهم
هي خافت كلش وظلت تهز براسها بمعنى لا
كتلها لعد روحي من كدامي واذا سمعت حاجيه بالموضوع نهايتج على ايدي.
دارت وجهه وراحت تركض باتجاه غرفتها وبعد ماشفت ولاسمعت الها حس.
استمريت كايدهم
وصلنه للسياره اشرت لعامر يكعد بمكان السايق
وبيدي رؤى وهي تتوسل
صعدنه وره وخليت المسدس براسه
وهي بس تنوح وتتوسل شتتني ضربتهه على راسها بالبندقيه فقدت الوعي.
بقيت ممطمأن من ناحية كواكب لان اعرفها شنو من مله.
خليت كلبجات بيد عامر ه ويه الستيرن نزلت من السياره وقفلتها ورحت لكواكب لغرفتها فتحت الباب عليها كاعده مرعوبه من شافتني كامت وكعدت ع الكاع واني بيدي السلاح تقربت منها
شوفي ترة اني بايع الدنيا وخاسرها والله والله طلقه وحده انهي حياتج اني ذابحج ذابحج والله وثقي بكلامي ادفنج بدم بارد جهاد ماات تسكتين وجنج ماشفتي شي
هي مرعوبه وتتوسل
سألتها شفتي شي ؟
لا لا والله لا شفت ولا سمعت ابد ابد
زين.
عفتهه ورجعت للسياره فتحت الكلبجات و كعدت وره خليت المسدس على راسه ورصيته عليه
واشرت اله يسوق كتله
شوف غلطه وحده اطشر دماغك هنا بالسياره يلا شغل وحركها ومثل ما اكلك تسوي مفهووم؟
- فدوه لا تقتلني والله هي اغرتني هي كلتلي تعال يمي وهي اول مره اصعد يمها
- ولك جذاب تجذب عليه صارلي شهرين مراقبكم كلما اجذب روحي واجذب امي الكه عليكم دلائل
لك اعترف لك كول اني مو رجال وخليت عيني على مرتك لك كول اني بلا غيره بلا شرف
يلا سوق وانت ساكت لا اخلص عليك هنا يلا
وصلنه المكان منطقة نصها مهجوره وتعبانه ومظلمه بس ضوه السياره وضوه بيدي واصوات نباح جلاب من بعيد ماكو بشر.
أمرته ان ينزل من السياره نزل ونزلت ويايه كرك وكتله احفر كعد بالگاع ظل يبجي ويتوسل
- يمعود الله يسامح انت ماتسامح اكتلهه هي واخلص من عارها لو مامصاحبتني جان هم صاحبت غيري الله يخليك الخاطر ابني لاتكتلني.
- احففر وانت ساكت ويله مافكرت بابنك من اول هسه تفكر بي.

ظل يحفر وضوه السياره عليه وكل شوي يوكف ويتوسل ويبجي واني واكف فوك راسه وكل شويه اهدده وارمي طلقه من مسدس كاتم ارميها قريب منه هو يخاف ويحفر.
لحد ما وصل بحفر القبر للحد المطلوب
كتله اوكف وكف عن الحركه اني واكف بعد عنه مترين وشايل السلاح صوبت المسدس باتجاهه وضربته طلقه بنص كصته جانت كفيله بانهاء حياته. متجاهل توسلاته وبكائه وصريخه مثل النسوان بقيت ادفر بي واباوع للدم الي ظل يتنافر منه لحد ماوگع بالحفره او قبره الي حفره بيده لنفسه ليضم جسده الملوث بفعل الرذيله
اما الخاينه رحت الها للسياره ولزمتها من شعرها وسحلتها سحله خلتها تستعيد وعيها. سحبتها حد موصلتها لاطراف القبر. وقربت وجهه داخله وضويتلها على جثة عشيقها المجطول بدمه بي باوعت وظلت تصرخ وهي متمدده على كومة التراب الي طلعت من الحفره غمست وجهه بالتراب كتمت صرخاتها.
صكيت اسناني لزمت شعرها بقوه ورفعت وجهه من التراب ظل يطلع من حلگها واني كاعد على ركبه ونص واباوع لعيونها الخضره شكد جنت احبهم وينزاح تعبي من المحهم.
شفت اثار على رقبتها اثار جديده شعلتني اكثر مما اني مشتعل.
كتلهه ولج لييييييش وبشنووو قصرت وياج اني رايح لاخر الدنيا حتى اعيشج احسن عيشه متحمل الحر وبعد الطريق والظيم والاذيه وانت هيج تجازيني هااا هيييج تسوين بغيابي. كالت والتراب يطلع من حلگها والدم سايل من وجهه وراسهه.
- فدوه ساعة شيطان سامحني اصيرلك خدامه جوه رجليك ادري بيك تحبني لاتقتلني فددوه ** جهاد
- ساعة شيطان مو شفتي هذا الفضلتي عليه شنو هدالج هدالج قبر.حفر قبرج بيده ..وانتي هديتيلي العار.
قربت المسدس وخليته على قلبها اختاريت هذا المكان يمكن حتى ارتاح بس هيهات ارتاح .
ضغطت ع زناد المسدس كتلتها ودفرتها بالحفره ورجعت رميتها براسها وكعدت على اكوام التراب للحضات ومر شريط حياتي وياهه كدام عيني من اول مااجت عيني عليها لحد ماخطبتها وتزوجنا
هليت التراب بيدي عليهم واني مصوب الضوه اباوع الجثثهم المغطايه بالدم والتراب.
ماادري اضحك لو ابجي احس راح افقد عقلي.
دفنتهم وكملت ماتوا وهم متلوثيين بنجاسة الخيانه والرذيله ماتوا وهم وصخيين.
اما اني فتحولت من انسان الى قاتل مجرم قاتل لشخصين وبدم بارد هنا انتهت حياتي هنا دفنت احلامي بتكوين اسرة واطفال وبيت هنا هليت التراب على مستقبلي ،املي ،فرحي،سعادتي واضحيت انسان اخر.
كملت دفنهم ورحت السيارتي وسقت للبصره.
فزيت من ذاكرتي على صوت الشيخ
التفتت على صوت الشيخ الي فززني...هااا جهاد وين دليلك؟؟
جاوب ابويه قبل لا اجاوب.اني .كال .ام امجد هي الدليل
اي ام فؤاد حذرتها وراحت لامها وحاجتها
واحد من الشيوخ..لا مانريد ام امجد اكيد ابنها وتنحاز اله
نريد دليل ملموس
جاوب اخويه فؤاد...اذا اكوو دليل ملموس فهو زوجة عامر هي حتشهد بالحق وتعرف شنوو سوه زوجها

جاوب عمار...لا زوجة عامر حتشهد باطل اصلا هي علاقتها مو زينه ويانه واخذت ابنها وراحت واكيد تشهد زور
جهاد . سكتت وبعدها جاوبت...حسين ابن اخويه شاف موقف احتمال تستفادون منه؟؟
واحد من الشيوخ كال شكد عمره
جاوبه امجد...سبع سنيين
جاوبه الشيخ ...لا متفيد شهادته نريد عذر ملموس وشاهد مضبوط
جهاد بحيرة وصوت خافت...خرب يومكم سدوها سد.
ابو جهاد...عمة جهاد لازم تجي هي شافت الحادث الي صار.
جهاد .. باوعلي عمار كال
وهو يرفع تك حاجب لنشوف شهادة عمتي شون حتكون ؟؟
جنت متاكد بداخلي وحاس ان شهادة كواكب مراح تفيدني.
وحتى فؤاد جان بصفي وهمسلنه اني وابويه وكال ..
فؤاد ..اهوو هي كواكب شنوو شو هي وجهاد واحد ياكل لثاني اكيد متشهد لصالحه
هنا قطعت الشك باليقين وأيست من كواكب وكعدت افكر بشي دليل.
بعد مرور وقت جتي كواكب
دخلت للديوان باوعتلها شفت بعيونها نظرات انتصار ممزوجه بخوف
اي خوف مني
حسيت الخوف واضح بعيونها اكثر من انتصارها عليه الشيخ طلب شهادتها.
كواكب .. عامر دائما يطب و يطلع علينه حتئ لو بالليل ودائما يجيني ويكعد يمي بجوز جاي يشوفني وهذا المخبل لزمه لان من نزلهم ماجان مبين عليهم مسوين شي كلش عاديين وهو جان بايت عدنه ذيج الليله.

جهاد .. ضحكت وباعتلهه كتله ماغزر بيج الزاد والملح ظلت تباوعلي بكل صلافه.
كواكب بتبرير...جااا شني عادي بيت عمه وبكيفه يطب ويطلع قابل همه غربه.
جهاد بكره...وشعنده فوك بغرفتي انتي شفتيني نزلته من فوك
كواكب بخبث...يجوز انت مصعده
جهاد بااستهزاء...اي جنت عازمه علئ العشه فوك وبغرفتي.شبيج بابا تخبلتي ولو انتي مخبله بس اشوو انتي نفسهم تجذبين الجذبه وتصدكينها
كواكب..خاب دروح هو انت قتلتهم وشفتك كايدهم جااا الولد بيت عمه يطب يطلع يصعد فوك محد يمنعه واني مشفتهم مسوي شي.
جهاد بهدوء..اوك اوك هو انتي مال ادله والله عرفتج تكومين تسربتين لا اريدج ولا اريد شهادتج ..درت وجهي للشيخ شهادتها متناقضه اكيد محتاخذون بيها.
الشيخ باانزعاج...هو شفتهمنه منكم اثنينكم مافتهمناكم.

صاح اخو رؤى .. هذا الجنت متوقعه اختي بريئه
وهذا تهمته الهاا باطل يريد ينتقم من ابن عمه براس اختنه.

جاوبته .. لك اكل تبن خسيس بيكم خير جان ربيتوها عدل مفروض تبوسون ايدكم وجه وكفى اني غسلت عاركم النكس عنكم.

ابوجهاد .. بهمس لك جهاد عيب هالحجي احنه وين كاعدين احترم الشيبات مو وكته هالحجي هذا هسه

بكل ثقه كتله يابه انت تدري بيه اني مااهتم لالزغير ولالكبير والعار الي انهدى الي رفضته وذووووول كولهم مالهم حق يكاوموني.

الكل ظل يباوع عليه ويردون مني دليل تذكرت المسجات الي بالمسنجر جنت افتح حسابها واشوف الي بيناتهم الى خططت الهم خطة القتل وصدتهم ونفذتها بهذاك اليوم.
الشيخ .. هاا جهاد عندك بعد دليل ؟؟

تجاهلت كلام الشيخ وطلبت من ابويه يكوللهم على عطوه لان مو كادر افكر بشي هسه.
انطونه عطوه وطلعنه من الديوان
واحنه بالباب
اجوا رياض وعمار يهدون عليه

عمار .. متحجي يااقاتل وين دفنت اخويه ولك والله دمك مهدور وعلى ايدي روحك اخذهاا.
جهاد .. بكل ثقه .. على ايدك على ايد غيرك هي الروح امانة الله وشوكت ميريدها خل ياخُذهه. وبعدين شلك بالقبر مالتهم اثنين نكسين ليش تريد توصخ ايدك بيهم خليهم ينشوون بنار جهنم ليش تكطع عليهم العذاب.
رياض .. انت جذااب لك اختي بريئه احنه شون صدكناك كل هالمده شون كدرت تخدعنا كولنا.

جهاد .. بحديه وبلغه تهديديه .. لك رياض تراهن اختك شريفه ؟؟؟

رياض .. لك اختي شريفه بس انت غدرت بيهه لك خسيس.
جهاد .. باع اني عندي رسائل بالماسنجر تخصهم اثنينهم بس راح اقدم الدليل الاقوى ونعتمد على تحليل الطب الشرعي واشوفك شون اختك جانت شريفه ياخسيس وموجهاد الي تكدرون عليه ياجبناء كلكم بلا شرف عاري وغسلته بيدي وبعد الاثبات لحد يفك حلكه بعد.

تره تشوفون الي مشفتو من عندي.
انطيتهم المكان الي دفنته بيهم وراح وياهم امجد ورجعت اني وابويه وفؤاد للبيت.

طول الطريق هم يحجون واني ساكت
فكري كله يم جنه وبنتي ومجاي اكدر اروح الهم المنطقه الي بيهاا بيت خالي بعيده عنه.

وصلنا للبيت اريد اصعد فوك
كال فؤاد تعال وين صاعد خلي نحجي.

كتله .. اسمع فؤاد تعبان وطايح حظي عدكم حجي كولوا بيناتكم او احتفظوا بي لنفسكم اني رايح اريح.

عفته ببرود ودااصعد واسمعه يصيح
يااخي شون وياك انت شدعوه لهالدرجه بارد شهالغمووض انت عليمن طللع
تجاهلت كلماته وصعدت
بزع مني كال بصياح طيح الله حظك.

بعد شكد يريد يطيح حظي.
دخلت للغرفه تناوشت تليفوني
من الصبح اتصل على جنه ماكو خفت لاصاير شي يمهه.
اتصلت مره ثانيه ماكو تليفونها مغلق
تمددت ع السرير ونمت
غفييت
كعدت بعد وقت
فتحت دكم القميص طبيت للحمام رحت خليت راسي جوه الحنفيه احس كاب ناااار.
نشفت راسي ونزلت جوه
شفت اخوتي كاعدين
رحت اخذتلي مكان وكعدت بي.
امجد ..بهدوء ..متريد تعرف شصار ؟؟
جهاد ..ببرود وقلة اهتمام .. اي وشصار يعني ؟؟
امجد ... طلعنه الجثث يااخي شمسوي بيهم شون كدرت تكتل بشر.
جهاد ..
بقلة اهتمام وبرود وثقه تامه.
شمسوي يعني هنه طلقتين بالراس والنكسه طلقه بالراس وبالكلب وبعدين اثنين نكسين ملازم يعيشون ولو عايشين جان اني انجلطت احسن شي سويته هو قتلتهم وريحت حالي اني رجال ادور راحتي.
فؤاد .. اي هم حقك .. اللتفتت لامجد كمل اخويه
امجد .. اي وديناهم للطب العدلي عمود تحليل البصمه بس تره يطول.
جهاد .. شيريد يصير خلي يصير
فؤاد .. يابرودك يااخي.
جهاد .. اني صاعد اتصل بخالو لان جنه تليفونها مغلق اريد اعرف شكووو
صعدت للغرفه
دكيت رقم خالو واتصلت بي
جاوب
كتله.. الو شونك خالو
.. هلا جهاد شلونك شنو الاخبار يمكم ؟؟
.. والله ياخالي بعدهه السالفه مافضت وينهه امي اريد احاجيهه
.. اي هاهيه امك يمي.
... حاجيت امي شلونج يوم جنه شلونهاا
.. هلا بعد عمري انت شلونك والله كلبي راح يتكطع عليكم
اريد اجي يمكم.
لايمه لاتجيين ابقي يمج احسن جنه وينهه انطينياهه احاجيهه
...هاا يمه جنه مو هنا
... شنوووو وينهاااا جنه يمه ووووين
.. يمه وديناهه لأهلهه يايمه.
... شنوووووو منو سمحلكم وشون تروح بدووون علمي انتوا ليششش تصرفون بكيفكم لييييش بصيااااح.
قفلت الخط واني اغلي من العصبيه جنه عافتني وراحت وبدون متاخذ اذني حتئ صورة بنتي مرسلتها الي
ضال بحسرة شوفتها قبضت ايدي بعصبيه ونزلت اركض من الدرج جاي اروح لبيت خالي شلون سمحولها تروح او يمكن يجذبون عليه موجوده عدهم بس خافينه
وبأثناء نزولي شفت ابويه وفؤاد كاعدين بالصاله تسمعت لاطراف حديثهم.
اسمع فؤاد يحاجي ابويه يكوله...يابه شكوو متوتر هسه يطلع التحليل الصالحنه
شفت ابويه مسح وجهه بتوتر...مااظن يطلع لصالحنه
صدمني ابويه حتي ابويه ممصدك بيه عضيت شفتي بقهر وجزع جاوبه فؤاد...ليش تعتقد رؤئ وعامر بريئين وجهاد يتبلي عليهم وهسه يطلع التحليل لصالحهم
ويطلع جهاد جذاب بتساؤل ؟؟
جاوب ابويه بحديه لا جهاد مو جذاب بس خايف من عمار ينطي رشوه للمستشفئ ويغيرون نتيجة التحليل
فؤاد...لا يابه الموضوع بي سريه تامه
ابو فؤاد..مااضن يطلع لتحليل لصالحنه عمار كلب كولشي يسووي
فتت من يمهم بسرعه وغضب
صاح عليه ابويه...جهاد وين لايقتلوك
جهاد بعصبيه...خررررب جهاد خرب ساعه السوده النولدت بيها المن خلفتني المن للقهر للفكر منين اتلكاها كلي منين طلعت وركعت الباب ورايه بقووه

..

*أهدتني_عارا
الاخيررررررر
نورا ناصر
القصه الحقيقيه والنهايه حقيقيه وبدون اضافات مثل ماوصلتني راح انزلهاا.

* جنه
طلعنا للبصره بسيارة خال جهاد
طول الطريق ممستوعبه الي اني بي ابد
سنه كامله اني نايمه يمه ومااعرف بي قاتل !!!؟؟
احس انخدعت احس انخنت
خدعني ومكالي على حقيقته.
ليش اني يصير بيه هيج ليشش؟؟
ابودي اصرخ ابجي بصوت عالي اطلع قهر روحي.
لزمت بطني عمليتي توجعني حتى بعدهه مطايبه
مرت خال جهاد اخذت ورده مني واني اللتهيت اتلوه بألمي الم جسد بصفحه
والم الروح اقسى باضعاف مضاعفه
وصلت ويا جهاد لطريق مسدود والرجعه صعبه
اباوع لورده وتذكرت حلم سامر
يمكن الي بالحلم جهاد بهيأة سامر انطاني الورده وراح هي مو ورده هي فراك بجيتهه تفارگنه.
انكسر گلبي عليهااا حظها مثل حظي
هم ملحكت على ابويه ومشفته
وهي هم ابوها قاتل.
ورده بنت القاتل ليش يحظي لييش.

وصلنه لبيت اهلي بعد طول طرييق متعب كوه حملت روحي كاعده بالسياره احس،بطني تريد تنفجر من الوجع.
نزلت واخذت بنتي خفت انساهه وترجع وياهم هيج فكرت لان احس راح انجن.
فتحت الباب امي شمرت نفسي بحظنها حسيت رجعتلي روحي وحسيت بالامان بحظنها بس مااكدرت اسيطر على دموعي.
ظلت متفاجاه عافتني وراحت لمرت خال جهاد سلمت عليهه
جان وكت الظهر كالتلهم ادخلوا مقبلوا اترخصوا وراحوا
دخلت جوه وبيدي بنتي سلمت عليه عذراء كوه رديت عليهه ودخلت لغرفة امي
تمددت ع السرير واني اعاني من الالم.
اجت يمي امي وعذراء
امي اخذت ورده وظلت تشم بيهه
يمه جنه هي تشبهج كلش
سكتت وتمددت ع السرير واني ابجي
امي كالت اي ماتكليلي شصارلكم
تليفونج صارله شكد نتصل وماكو ؟؟
محمد يكول جهاد صارله هواي مامداوم اتصل بي كله جنه ولدت وهي زينه وسداه يحجيله حجايتين ويسده ماتكليلي شصاير.
خليت راسي بحظنهاا وظليت ابجي كتلهه يمه خدعني جذب عليه.
عذراء .. انتوا شسالفتكم مره انت مجذبه عليه ومره هو ماتكلولي شسالفه ؟؟
جنه .. انت مااعليج وطلعي يلا خليني بس ويا امي
عذراء .. اعصابج يابه طالعين اشو جايه حاميه علينه احنه شعلينه
ظلت تفر بيدهه وطلعت.
الام .. اعصابج يمه مايصير هيج
جنه .. يمه اريد انام تعبانه ديري بالج على جنه موتنطينهه لاحد.
الام . المن انطيهه يعني نامي ارتاحي حتى تكعدين مرتاحه نفتهم منج شي.
كتلهه طلعي ادويتي خل اخذهن راح يكتلني الوجع.
خلت ورده على صفحه وراحت للجنطه دورتهن وطلعت العلاج اخذته ونمت.
بعد شكد وعيت على صوت امي كومي ييمه بنتج طكت من البجي كومي رضعيهه.
كمت كوه عليه كتلهه واني ابجي يمه مابيه اكعد.
جيبيهه ارضعها واني نايمه
.. شون يصير ياامي مو تتأذى يصير عدهه بلاعيم
.. يمه مابيه جاي اكلج جيبيهه شون ماجان.
جابتهه الي ورضعتهه واني نايمه صفح بس كوه عليه.
الام .. العصر اطلع اجيبلهه ممه.
جنه ... لا يمه مااريد انطيهه ممه خليهه على صدري احسن اخاف عليهه تتمرض.
.. يابنتي علما صير زينه وتالي انطيهه بس صدرج.
.. اخخ يمه كتلج ماانطيهه ممه.
.. بكيفج بعد
ماتردين لكمه تاكليهه
.. ماريد
.. ماجوعانه مو انت ترضعين ومسويه عمليه وجايه من طريق طويل خلي اخليلج اكل تاكلين.
.. بكيفج خلي.
خلتلي امي اكل خطيه واني ع الجربايه توكلني
تذكرت جهاد هسه اذا عرف اني طلعت بدون علمه شراح يسوي اكيد يگلب الدنيا بس،موبيدي انصدمت صدمة عمري اكثر من الصدمه الي انصدمتها من اجاني خبر حادث سامر.
تذكرت كلامه من مره گلي اخليج تلحكيهه
ومره خنكني وجيت اموت بيده
وتذكرت كل الضرب والاذيه متت خووف والرجف اخذني تخربطت.
امي خابرت احمد واجه بدون مااسلم عليه
اخذني للمستشفى.
صحيت بالمستشفى وبيدي الكانيوله
اول ماكعدت شفت مها وامي يم راسي
بوستني مها وهي تبجي.. شبيج شصاير بيج
خليت راسي ع صدرها واهمسلهه وابجي ولج خدعني جذب عليه طلع موخوش.
.. ولج شنو موخوش هاا شبيج احجي
.. مابيه احجي ماابيه ماابيه وين بنتي وين
.. لتخافين بقت يم علا وعذراء
كمت اريد انزل من السرير كتلهه ولج اريد اطلع ليجي ياخذهه ولج.
الام .. يمه اهدي اهدي شبيج
.. اريد اروح للبيت
... خلي تشوفج الدكتوره
.. ما ما اريد اطلع
ظليت الح عليهم وطلعنه على مسؤؤليتنه رجعت للبيت مفرفحه على بنتي تفرفح ممهتمه لاي احد اخذتهه شفتهم ناطينهه ممه كلبت الدنيا عليهم.
اخذتهه وخليتهه على صدري رغم الالم البيه
اطوني العلاج ونمت واسمع صوتها تبجي ومااكدر اكوم الهاا وبس انزز كل شويه احلم جاي جهاد وماخذ بنتي.
واكعد مخروعه واروح اركض لبنتي لحد ماتأذت عمليتي احس فاقده كلش وماكو براسي عقل
مرت فتره واني على هالحال واهلي ميعرفون شسالفه بس امي كالت جهاد متصل على محمد بس مكايله شنو الموضوع.
بس مجرد سؤال سائل عليه
جنت كاعده بالغرفه وحالتي شويه صارت احسن
دخلوا اخواني وامي
محمد .. جنه شنو السالفه هالمره جهاد هم ضربج ؟
جنه .. نزلت من الجربايه خليت ورد بمكانها ورحت كعدت يمهم
كتله محمد اني مااريد الومك هي قسمه وصارت بس جان المفروض تتاكد منه يلا تزوجنيا
محمد .. غير نفتهم شصاير شداير متحجين.
جنه .. بجيت كتله طلع قاتل خدعني جذب عليه
محمد .. جهاد قاتل ؟؟!!!
امي لطمت وجهه انصدمت احمد ظل فاتح حلكه ينتظر اكمل كلامي.
استمريت ابجي كتلهم اي قاتل مرته وابن عمه
محمد .. معقوله ولا جاي اصدك زين ليش كتلهم لازم اكو سبب.
جنه .. مرته خاينته وي ابن عمه وكاتلهم وضم علينه وكال ميته وكشفته
احمد ... لج هذا مو قتل هذا غسل عار
جنه .. قتل قتل ولك قاتل جم مره يضربني جم مره يكولي اخليج تلحكيهه مو صاحي والله ولاارجعله سنه واني ابيتهم وماادري بي قاتل هم زين ما هم قتلني من عرف بسامر.
محمد .. ميخالف ابقي هنا لنشوف شنو تاليهه
جنه .. ابقى هنا اي طبعا ماارجع اله ارجع المجرم مخايفه بس على نفسي خايفه على بنتي هم.
الام .. وبنتج شبيهه خو مايأذيهه هو ابوها
جنه .. يمه شبيج جاي اكلج كاتل اثنين وبدم بارد نوب يكتلني انه وبنتي يمه مصدومه اني مصدومه منه ليش ضم علينه هو ليش ؟؟
محمد .. لتخافين اهدي اني الي حجي ويا.
جنه
هزيت راسي ومسحت دموعي ومااعرف شراح يسوي جهاد من يعرف بموقفي.

*جهاد
طلعت من بيتنا واني مشدود الاعصاب وناوي اللعب بيهم فلك شون يغدرون بيه
طلعوا ورايه ابويه وفؤاد للكراج وهم يتوسلون مااطلع
تجاهلت كلامهم وشخطت السياره وطلعت
مهتميت للتهديدات ومهميت لحياتي
من زمان خسران الدنيا والاخره اني
وشيريد يصير خلي يصير
شفت الي محد شافه
انغدرت وانخنت وانطعنت بظهري وقتلت وصرت اثم ومجرم وقاتل وبليله وحده حتى اشفي غليلي
طول الطريق واني اعصابي فوول
احس الغضب يطلع من عيوني
احس قلبي،يضخ شرار لاوردتي وشراييني
وحده خانتني ويا اقرب الناس الي ووحده تخلت عني واخذت بنتي وراحت.
حتى امي ماسوتلي شي وماوكفت بجانبي خلتهه تروح بدون متكولي.
الستيرن لو عنده احساس جان حس بالالم من وره ضرباتي اله واني اسووق السياره.
وصلت لبيت خالي
نزلت من السياره برعونه وركعت الباب حييل
اريد افتح الباب الخارجي مالهم مينفتح مسركينه
ركعته برجلي ودكيت الجرس
طلعلي ابن خالي عمره 16سنه
لزمته من ياخته كتله ولك وينه ابوك ؟؟
كال شبيك جهاد ابويه جوه
دفعته ودخلت
جانوا كلهم كاعدين بالهول
صحت عليه خاااالي
هي هذه الامانه الي خليتهه يمك انت منو سمح الك تصرف بكيفك وتوديها
كمزت امي واجت يمي
.. اهدا يايمه اهدا مو هيج الحجي
الخال .. ياابني انت مشفت حالتهه المرتك اجت تمووت وانت بحاله ماتسمح الك تطلع على حالتها وديناهه ترتاح خاصة هي انصدمت من سمعت خفنا عليها ووديناهه
مسحت على شعري بتوتر وعصبيه
امي جانت بصفي مخليه ايدهه على كتفي وتمسح علي وتبجي

باوعتلهه
بقهر كتلهه ...يمه ليش خليتيهه تروح ليش حجيتي كدامهاا ليش.
... ييمه انت ماشفت حالتها وتوها طالعه من عمليه وهي هنا غريبه كلت تروح لاهلهه ترتاح ومردهه الك مدام صارت عدكم طفله.
.. يمه ليش اني مغدور من الكل ليش محد كادر يرحمني لييييش الكل ياذيني
اريد اطلع لزمتني كالت تعال اروح وياك
كتلها لاابقي هنا احسن.
طلعت من البيت فاير جنت اتمنى الكاهه ابينهم والسمعته كذب
طلعت صدك عايفتني
ندبت حظي العاثر
باوعت للسما كلت يربي الك بيهااا اراده.
صعدت بالسياره
ورجعت للبيت
شفت اخوي ومرته بالهول كاعدين
باوعتلهم احس نظرات الشفقه بعيونهم
كرهت نفسي وصعدت فوك
لزمت التليفون اتصلت على جنه مغلق تليفونهه
عفت المكالمات
طلعت الرسائل وكتبت الهااا
بديت افكر شنو اكتب
لازم اتخلص من العصبيه اريدهه تطمئن من ناحيتي.
بديت اضغط ع الحروف واكتب الهااا
جنه اني مقدر وضعج بس مو حلوه منج اتركيني بالضروف اني زوجج وابو بنتج ليش حرمتيني منج ومن بنتي ورحتي اذا تردين اهلج جان بلغتيني واني من تفرج الامور اوديج.
لازم تعرفين اني لايمكن ويجي يوم واذيج انت جنتي ومشفت منج شي موزين لازم تعرفين شي رؤى جنت احبها حيييل احبهاا ومن شفتها على فراشي ووي غيري تغيرت تحولت لشخص اخر لازم تعذريني اني ماارضى بالعار وانت اكيد مسوين مثلهه حتى اذيج.
دست ارسال وكلت من تفتح تليفونها تشوفهاا
حضرت نفسي يوم ثاني اروح للبصره واروح اشوفها

قضيت الليل بين الحسره والتفكير
ليش اني محكوم عليه بالعذاب بهالحياة

نمت وقبل الفجر بشويه كعدت وحضرت نفسي وخليت مسدسي على اهبة الاستعداد تسللت من البيت وطلعت
صعدت سيارتي واتجهت للبصره
كلي امل اشوف بنتي وارجع مرتي
بعد كم ساعه واني بالطريق اتصل بيه اخويه
فؤاد .. يااخي وينك انت ماتكولي وينك ؟؟
جهاد .. فؤاد لادوخني رايح للبصره اني
فؤاد .. يابصره بهالزلك ماشوف الوضع شونه
جهاد .. شنو انتوا شبيكم منو كالكم اني مره واخاف.
فؤاد.. يااخي خاف على ابوك خاف على امك فكر ابنتك شبيك انت
جهاد .. هو اني رايح اشوف بنتي وارجع احلها ان شاءالله متبقى هيج واني مو جاهل واعرف اصرف وهسه جاي اسوق لااسوي حادث.
فؤاد .. خوووش الله يعينه عليك دير بالك على نفسك
جهاد .. امين الله يعينكم الله وياك ابو حسون.

سديته منه وضحكت باستهزااء عبالهم اني اخاف من شي.
وصلت للبصره وتحديدا لبيت اهل جنه
دكيت الباب
طلع محمد نظراته ماتتفسر عرفت جنه حاجيتله وبعد ماتكدر تضمضملي.
سلمت عليه ودخلني جوه بالاستقبال
وينها جنه وين بنتي
محمد .. انت ليش ضميت عليه مو من المفروض تكوللنه كلشي.
جهاد .. تره انتوا مطوخينها زياده عن اللزوم عاري وغسلته واي واحد بمكاني يمكن يسوي مثلي واكثر المهم مااطول حجي وياك اريد اشوف جنه وورده صيحلهم جاي علمودهم اني.
محمد .. بس الي سويته مايتسوه وجنه مااتريد ترجعلك بعد جنه حالتهه تعبانه كلش وبس تسمع بيك تتأذى وتتخبل كللش عوفها فتره خليه تستعيد نفسيتهه.
جهاد .. يعني شنو ماراح اشوفهاا
محمد .. والله تتخبل مااكدر اضغط عليهاا اكثر اني هواي جبرتها عليك خليهه للوكت.
جهاد ..
طلعت منهم بيأس ماردت اضغط عليهه ومااريد اجبرها بعد.
جنه *
من سمعت اجه جهاد انهاريت كلش اخذت بنتي ودخلت للغرفه وقفلت الباب تخيلتلي اشياء وكانه جاي يقتلني اني وبنتي حضنتهه وظليت ابجي
احس روحي فعلا مو صاحيه بقيت بالغرفه الا ان عرفت راااح.
*جهاد
رجعت البغداد حسب طلب ابوي كال خاف يلحكوك الجماعه ويصكوك وانت بغربه
واحنه ماراح نتحمل اكيد ارجع امن الك ابيناتنه
رجعت بس مقهور من موقف جنه كلش،المتني
مرت كم يوم وامي رجعت للبيت.
جنه كاعدين ودخل امجد كال طلعت نتيجة التحليل الكل كام يريد يعرف شنو النتيجه بس اني بقيت كاعد وممهتم

أمجد .. التحليل ثبت بانه رؤى امارسه وي شخص ثاني وهذا دليل كافي لاثبات خيانتها التحليل بصالحك جهاد
كتله اي وشنو يعني،وشوكت راح نخلص
امجد .. بقت العشيره خنشوف شتقرر.
*جهاد
بعد ماطلع التحليل لصالحي وثبتت التهمه عليهم قررت اروح للبصرة مره ثانيه عسى ولعل جنه يلين قلبهه عليه حاس بااحساس مؤلم مشتاق لزوجتي وبنتي تمدد على السرير لحد الان انفاس جنه بي شوكت ترجع تنور غرفتها فزيت مرعوب من صوت الرصاص نزلت اركض لزمني ابويه كال لاتطلع بيت عمك دكونه

جهاد بعصبيه...اهوووو هسه مو طلع التحليل وطلع ابنهم عار

الاب...لك جهاد تخبلت لك قتلت ابنهم اكيد يسون هيج

جهاد..يعني قتلته بدون سبب داس عليه وعلئ عرضي طعني بضهري وكسر ضهري شتريد اسويله اصفك اله..

الاب...خلي اخابر كبير العشيرة يشوفلنه حل شنوو ضالين كولنه بخطر..

صدوك خابر ابويه كبير العشيرة وتحددت كعده عشائريه لحل النزاعات وتترتب عليها هواي امور ومن بين اهم الامور هي استجوابي مرت يومين وتحددت الكعده واحنه دفعنه الفرشه..«وليمه كبيرة لشيوخ العشائر» تصدروا الديوان الشيوخ والعشائر عشيرة اهل رؤئ وعشيرتي...

كبير العشيرة...غلطت ياجهاد يوم لقتلتهم كان لازم تسلم عامر لاخوانه وتسلم حرمتك لاهلها وهمه يقتصون منها..

جهاد بهدوء..مراح يقتصون اني متأكد

عمار بعصبيه...دمك مهدور جهاد حتئ لو ثبت التحليل لازم جان تسلمه النه واحنه نعاقبه..

احد الشيوخ..ليش ماقتلتهم بغرفتك وكدام العالم ليش كلت مهزومين ليش مكلت اني غسلت عاري

جهاد بهدوء...اولا مستحيل اهل عامر يحاسبون عامر ويقتصون منه هو اخوهم ومستحيل لدم يصير مي وثانيا اخت رياض حتنكر ويمكن توجهلي تهمه كاذبه وتحلف كذب وتبري نفسها وهي سبق وان حلفت ماردت اسلمهم للعشيرة ردت اخذ حقي بيدي ومثل مانهدالي عار رفضته رفضته ومستحيل ارضئ بذل وانزل راسي بسبب عارهم

كبير العشيرة...بس القتل مو حل كان لازم تسلمهم وعسئ ان ربك يجعل الهم مخرج او يمكن يتوبون.

مسحت وجهي بتوتر وجابته بهدوء..حقك ماشفت الشفته انت وبكل جبروتك لو صايرلك مثل لصارلي احتمال تنجلط قبل لا تقتلهم وتتصرف اكثر من تصرفي تشريد اسوي واني..... تنهدت الكلمه تجرحني اكثر ماتجرح غير صعب وكلش صعب اشوف زوجتي وملك يميني بااحضان غيري وعلئ فراشي وبكل حقارة مدخلته لغرفتي وابن عمي مو غريب كملت كلامي اني ماقصرت بشئ محد يتحمل حر البصرة والواجبات والشكاوي رايح لاخر الدنيا حتئ اسعدها ومن اجي ينزاح تعبي بكلمه حلوة مو الكه عرضي خايني مع اقرب الناس الي

الشيخ...والله مااعرف شكول مشكله صعبه وجرائتك قويه لكن نشوف اهاليهم شيكولون...

رياض نزل راسه بين عشيرته وبعدها رفع راسه ولدمعه لمعت بعينه...جهاد اذا ما جنت انت غاسل لعار اني اغسله ماعندي شئ ويه جهاد هذا هو هو غسل عارنه...وطلع من الديوان وانتهت قضيتي وياه ونسدت سيرة اهل رؤئ...

الشيخ وجه كلامه لاهل عامر...وانتوا شنو طلباتكم؟؟

عامر بخبث...لو اريد اشتكي عليه اخلي يعفن بالسجن واخسرة وظيفته بس اني طالب الدم بالدم.

جهاد..والله خبصتنه الدم بالدم والدم بدم بابا الموت واحد والاسباب تعددت والروح ماياخذها اله لخلقها.

ضل الحجي مده ساعاتين ونحلت بعد تهديدات ومناوشات وكلام قاسي واهدروا دمه واحنه كرونه اذا مااخذنه ثارنه هو قتل اخونه ومن هذا الحجي بعدها طلبوا فصل 100مليون ودخلت ساده وشيوخ ونزل لعمك ونزل لشيخ فلان ونزل السيد وصل 30مليون ترتب الفصل نص على العشيرة ونص علينه اني قررت ماادفع ولا ربع مو بخل بس تحدي

بعد مرور اشهر فصلنه اهل عامر وهمه شالو بغير محافضه وكواكب راحت وياهم بس اعرفها ماتستقر اله يمنه سمعت حجي تريد ترجع النه تعصبت بوقتها وكتلهم اكسرها..وبعد فترة بردت كتلهم خلي ترجع هي لازم بيوم من الايام تنكشف الحقيقه ويطلع المستور لكن ابوي رفض بااعتبارها مقدرت لزاد والملح...دائما ابويه يكون خايف عليه ويحذرني من ابن عمي يكول حتئ لو اخذ الفصل اخاف يغدرك ودائما اذكرة لروح ماياخذها اله باريها
*جهاد
بعد مافضت الشغله كولها قررت اروح للبصره
وناوي اشوف بنتي كلش متلهف الهه اتفقت ويا محمد وبلغته باليوم الي راح اجي
وصلت لبيتهم دكيت الباب طلعتلي امها
دخلتني وبعدهه اجه محمد سلم عليه
وجابولي بنتي وشفتهه شلون حلوه كلهه تشبه جنه وعيونهه ملونه ظليت ابوس بيهه واتحسر عليها بعيده عني وهي ترفه وبشرتها بيضه كلش ناعمه
بكل بلحظه اكول هسه راح تدخل عليه جنه وتروح ويايه بس مادخلت وأيست
حاجيت امها كتلهه جنه مناويه ترجع كالت اصبر عليهه بعدهه مصدومه.
تنهدت بحسره كتلهه على راحتهه وطلعت
*جنه
اخذ محمد ورد مني كال ابوها يريد يشوفها ببدايه الامر رفضت بشده وحضنته حييل لكن بعد الحاح من محمد انطيتها اله بخوف وعبالك اخذ روحي خفت جهاد ياخذها ويتمني من صدك
ضليت افتر بالغرفه بتوتر بعدها طلعت واني أسرق النضر اله ودموعي مافارقتني شفته شلون يلعبها ويحضنها ويبوسها ويعضها حطيت نفسي مكانها جنت مثلها بادين جهاد
عفته ورحت كعدت بالصاله واني ارجف خايفه ياخذ الطفله دخل محمد وهو شايل ورود بيده ركضت عليه حضنتها وبستها كتله محمد جهاد راح كال اي راح ضليت اتنحب بصوت عالي واشم بيه امي حضنتني وضلت تبكي وتهدي بيه كالت شبيج كتلها يممه ورده بيه ريحه جهاد ريحه عطرة لممزوجه بالدخان بملابس بنتي.
الام .. مدام تريدي ارجعي يايمه
جنه ... يمه اخاف منه اخاف على ورود مااكدر مااكدر ممستعده
اخذت بنتي ودخلت بالغرفه.
*جهاد
رجعت لدوامي
خلصت الاجازه ورجعت لاهلي
دخلت وسلمت عليهم
صعدت فوك بدلت ملابسي ونزلت اتغدى وياهم لان كلش جوعان
كعدت وياهم على السفره
تدرين يمه رحت شفت ورده
.. يبعد روحي شكد مشتاقتلهه
فؤاد .. شوكت ناويه ترجع
جهاد .. براحتها ماراح اجبرها على شي اني
فؤاد .. وبنتك تبقى بعيده عنك اي اخذهه منها البنت
جهاد .. لا مااخذهه منها ولااحرمها ولو ارجعها هي وامها لو مااحرمها من امها.
اني شبعت اترخص.
صعدت فوك للغرفه سحبت باكيت الجكاير طلعت الجكاره تذكرت من جانت تمنعني من التدخين
دعيت الله يهديهه الي وترجع.
كانت دائما تمنعني من التدخين ولكنها رحلت لابأس سادخن مجددا ربما تعود لتمنعني مرة اخرئ.
انتهت.

الى الخائنة رؤى ؛ يكفيني كل ما أهديتيهِ لي ..

لقد اكتفيت من غدرك وخيانتك ...

من ألمكِ وأوجاعكِ ..

كم كان صعباً رؤيتي لكِ بذالك المنظر البشع وبكل صلافةً تعتذرين ...

كم وددتُ الشرب من دمائكِ لكي اشفي غليلي
لم يكن ما أرتكبتهُ جريمةً ولا ذنباً..

كل ما فعلتهُ هو غسلاً لعاركِ الذي اهديتني إياه ..

فوداعاً والى الجحيم ملقاكِ يامن وثقت بها واعطيتها قلبي ..

#A

نورا ناصر