احفاد عمران الفصل الثامن وثلاثون 38 - بقلم ضحى اليوسف

الكاتبه ضحى اليوسف

احفاد عمران

بارت _37_

لا تنسون التصويت++التعليق بين الفقرات

•~•~•~•~•~•~•~•~•
‏لو كَسرة عَظم
چان العذُر مَقبول
بَس كاسرلي خاطِر
بيش تُرضيني ؟
•~•~•~•~•~•~•~•~•

حمزه يباوع عليه بعينه نظرة حادة
وجهه جامد كأنه قراره ما بي رجعة
صوته نازل لكنه مليان حزم وثكل

حمزه:: أنا راح ازوجها لفرح ماريدها
تضيع من بين ايديا

كل كلمة من حجيه طاحت على
صدري مثل الطلق راسي صار يدور
وكلبي كأنه طاح من مكانه حيل
ضاك نفسي وبلعت ريكي بصعوبة

ليان:: يعني شنو إلي افتهمه من حجيك
هاذا وهسه

حمزه:: أريد ازوج فرح ماكدر اضل اتاني

ضحكت بس ضحكتي مو طبيعية جانت
طالعة من قهر من وجع من صدمة من
شي جواي كأنه كلبي يصرخ وماواحد
يسمعني

ليان:: اخوك ماصار إله ست اشهر على
وفاته وأنتَ كاعد تقرر تريد تزوج
وتسوي عرسك

عينه ثبتت عليه بدون ملامح بدون
رحمة كأنه كل شي بالنسبة إله عادي

حمزه:: مو مثل ماانتِ مفكره أنا بعد
عمر مستحيل اسوي عرس

حسيت روحي تنخنك ودموعي تحاول
تطلع واني أقاوم

ليان:: لعد هاذا حجيك شنو معنى

حمزه:: أنا ماريدن اسوي عرس أنا بس
اريدها يمي

قلبي رجف مثل الطفل الخايف

ليان:: شنو حمزه شبيك تخبلت

صار صمت خانك الغرفه كلها تحولت
ثكل حتى الهواء صار ثكيل

حمزه:: أمشي ليان أريد اكلج على فد شغله

كلبي بلحظه حسيت راح يوكف حسيت
اني داخلة على طريق ما أعرف نهايته

ليان:: خير بس لا مسوي شي

حمزه:: دتعالي خلي احجيلج

صعد فوك وخطواته تضرب بالأرض
وأني باوع عليه وكلبي يدك مثل الطبل
كل خطوة يخطيها تفتح بكلبي باب
خوف جديد شلت جمانه بيدي وصعدت
وراه واني داخلي كله تردد

وصلت لباب غرفته لكيته مفتوح جنه
دا ينتظرني الهواء ثكيل الغرفة ساكته
كأنها تعرف شي مو زين راح يصير
حمزه واكف ينتظرني وجهه ساكت
بس عيونه مليانه شي غامض

حمزه:: اكعدي

ليان بستغراب:: ليش احجي عالواكف

حمزه:: اكعدي ليان أنا اريدن احجي
حجي واريدج تسمعينه بالحرف الواحد

نزلت جمانه حتى تلعب وأني كعدت على
جربايته جسمي متوتر وكلبي يدك بقوه
وجفي يرجف

ليان:: وهاي كعدت احجي

حمزه:: فرح تريد نتطلق

ليان بصدمه:: شنووو

حسيت شي انفجر براسي كل شي تجمد
حتى أنفاسي علكت بصدري عيني تحولت
لصدمه جبيرة ماجنت متوقعه هاي الكلمه
تطلع منه وهو كعد وحجالي كلشي
صار بينه وبينها وكأن السجين
تدخل بكل كلمه

ليان:: والله العظيم حيل بيك والي
سوته كلش قليل بحقك المفروض
تسوي الاكثر بيك

حمزه:: ليان أنا كاعد احجي الج حتى
تساعديني بهاذا الشي مو تزيديها عليه

ليان:: بشنو تريد اساعدك وأنتَ رايح
حاجي وياها مثل العجايز

حمزه:: ليان اريدج تحاجين فرح

دموعي جانت تغلي من جوه كلبي
كمت من مكاني وصوتي طلع مثل النار

ليان:: ولكك شنو احاجيها صخام الوجهه
شلوننن تروحح تكول الها هيججج
طلعتت أنتَ تصدك بهل خرافات

حمزه:: بحاله عصبيه طلعت مني

ليان:: تسوون السوالف وتصيحون
بحاله عصبيه

حمزه:: ليان حاجيها هسه أنتِ شخسرانه

ليان:: حمزههه شنووو شخسرانه قسم
بالله العظيم هسه إني استحي بعد احجي
وياها من بعد ماعرفت أخوي شنو مخرف
ورايح محاجيها

حمزه:: ليان

ليان:: شنووو ليان ها شنوو ليان وهسه
إني رايحه اكول لامي على سؤالف ابنها

التفتت حتى أمشي لاكن ايده لزمت
ايدي بقوه حسيت كأنه يريد يربطني
بالمكان

ليان:: عوف أيدي

حمزه:: وشسوين لو عفتها

ليان:: اروح احجي لامي على هاي السوالف الصايره من ورا ظهرها

حمزه:: اوكفي خل...

ماكمل صوته لأن فجأة صوت قوي كسر
الصمت كلشي تجمد كل شي توقف
التفتنا سوا على الصوت

جمانه واكفه وعينها على المزهريه
المكسرة وصايره الطشار متناثر على
الأرض الكاع ساكت بس الموقف يصيح

ليان:: يمه يمه لا تنجرحين

ركضت عليها حضنتها بشده كلبي
يتخبط من الخوف هيه بحضني
خلت ايدها على خدها والصدمة بعينها

باوعت على حمزه وجهه مصدوم عينه
تضرب بالمكان مثل واحد انكسر شي
من عمره المزهريه قديمه وهو محافظ
عليها من سنين

رجع باوع على جمانه وعصبيته
انفجرت بكلمه جارحه

حمزه:: نعله على بوج

ليان بصدمه:: حمزههه

حمزه:: امشي اخذيها وطلعي

ليان:: تطردني

حمزه:: أي يله برا

ليان:: خوش خوش حمزه هاي وحده وياك

مشيت ودموعي على طرف عيني بس
مسحتهم حتى لا يحس أني انكسرت
من كلمته

نزلت للمطبخ وأني حايره بين الزعل
والخذلان جسمي ثكيل وعيوني تعبت
حمزه بعده فوك وأني كل خطوه
أنزلها أحسها تكسر شي داخلي
دخلت المطبخ لكيت أمي كاعده
تغسل المواعين وجهها هادي ما
تدري شصار فوك

ليان:: يمه اساعدج بشي

أمي:: لا يمه بس صيحيلي حمزه

ليان:: يمه حمزه ضايج

رفعت راسها من المواعين ووجهها كله
تساؤل عقدت حواجبها وهي تباوع عليه

أمي:: وليش ضايج شبي

ليان:: جنه بغرفته وجمانه ويانه وكسرت
المزهريه مالته

أمي:: وفدوه الها هيه مزهريه صار الها
سنين شيسوي بيها... امشي صيحي يمه

هزيت راسي بمعنى أي وأني ابتسم
على أمي دا تاخذ الموضوع ببساطه
وياه هو صاير نار من جوه

طلعت للصاله وصوتي عالي وأنا
أصيح عليه نزل بس وجهه بعده
مكفهر يطلع من ملامحه القهر دخل
المطبخ وأني بقيت برا جنت حابه
أروح وياه بس قبل لا أمشي سمعت
صوت بجيه جود من الغرفه

ركضت للغرفه ودخلت لكيت جود يبجي
ووجهه محمر قربت عليه جمانه بحضني
حاولت أنزلها بس تشلبتت بيه بقوه
كأنها تخاف أحد ياخذني منها

ليان:: يمه شو نزلي خلي اشوف أخوج

تحاول تتخلص مني بس ما تقبل
عيونها توسعت وصوتها يتنفس خوف

ليان:: جمانه حبيبتي انزلي

بعد محاوله طويله هدت شويه ونزلته
من حضني رحت لجود رفعته وضميته
لصدري وهو بعده يبجي صوته يدخل
جوه كلبي مثل خنجر صغير

كعدت على الجربايه واني اهزه حتى
يرجع ينام صوت أنفاسه بدأ يهدأ
شوي شوي

باوعت على جمانه إلي كاعده يمه تلعب
وهيه تضحك بدون هم وكأنها ماعرفت
شصار قبل شوي كلبي رجف عليها
وعلى خوفتها الصغيرة

ليان:: جمانه

جمانه:: إء

ليان:: تعالي بوسي جود

جمانه:: اوس

صوتها طالع ناعم بريء ترف كلبي
رفّه تقربت وباست جود من راسه
جنها تريد تصالحه بطريقتها البريئه
ضحكت عليها دموعي رادت تنزل
من الحنية

رجعت خليت جود وغطيته وشلت
جمانه من يمه طلعت من الغرفه
وسديت الباب بهدوء حتى ما يعد

رجعت للمطبخ جمانه بحضني وأمي
بعده تغسل المواعين حمزه مو موجود

ليان:: اكلج يمه

أمي:: احجي يمه

ليان:: اشو أبويه لحد لأن ماجاي

أمي:: هسه ماتهجسينه الا ووصل

وبالفعل بعد نص ساعة سمعنا صوت
باب البيت فتح أبويه دخل وجهه
تعب من الشغل بس من شاف جمانه
ضحك فرح كأنه كل التعب نسى

حضنها وهي تحاول تلعب وياه
وهو يداعبها بأيده

حمزه دخل بعده شوية كلشي بالبيت
رجع شوي طبيعي صلينا وتعشينا
كاعدنه بالصالة الأكل بعده ماخلص

أبويه:: حمزه جان خابرت على اسمر هم يجي

أمي:: مو كتلها خابري على رجلج هيه مارضت

ليان:: يايمه والله مايجي البارحه تاخر
حيل بالعياده واليوم عساس ميروح
وادري وبي راح يروح

صوتهم كله عتاب وأني كاعده بالنص
جسمي موجود بس روحي بعدها معلكه
بالغرفة فوك وبالموقف إلي صار بيني وبينه وبنظرته إلي جانت نار

حمزه ماحجى طلع ساكت وجهه عابس
ورا ساعة رجع حمزه للصالة وأني
كاعده ألعب بجود حتى يسكت الزعل
عني قرب مني ومد يده بعلاكه صغيرة

ليان:: شنو هاي

حمزه:: اخذيها

ليان:: هيه شنو واخذها

حمزه:: اخذيها وفتحيها وتعرفينها

مديت ايدي وفتحتها واني متوترة كلبي
يدك مو طبيعي لما شفت شنو بداخلها
لحظة سكت الزمن موبايل جديد

ليان:: هاي شنو

حمزه:: ششوفين

ليان:: موبايل يعني شنو المن هاذا

حمزه:: بأيد منو هسه هو اله

باوعت على الموبايل كأنه شي غريب
جأن الموقف أكبر من مجرد جهاز باعني
بنظرة قصيرة وعافني وكعد يم أبويه

ليان:: بس إني ماريد موبايل

أبويه:: ليش بويه عندج موبايل

ليان:: لا

أبويه:: لعد اخذي بابا

أمي:: حمزه ليش يمه جايب موبايل لاختك

حمزه:: ليش يمه هيه ماعدها موبايل
وحتى حصره علينه نريد نسمع صوتها
لازم نتصل على اسمر

أمي:: يايمه يجوز اسمر مايقبل موبايل
شلون تصرف من كيفك

كلام أمي دخل براسي مثل السهم لأن
صدك اسمر ماراضي من قبل وأني جنت
أعرف شلون راح يعصب من هالشي

كمت من مكاني ودموعي قربت تنزل
من الزعل مديت ايدي ورجعت الموبايل
لحمزه

ليان:: شكرا على الموبايل بس إني
ماريد موبايل

حمزه:: خاب ليان امشي كعدي... ماتريد
موبايل وبيش نحجي وياج

ليان:: دكو على اسمر وهو ينطيني يا

أبويه:: اخذي بويه اخذي بعد هاذا
من اخوج لا تردي

ليان:: بس أن...

حمزه:: اخذي ليان

صوته جان حاد ما بيه حنية كأنه يأمر
مو يطلب سكّته بعيني وماكدرت ارد
الموبايل اخذته واني ما اريده حتى
المسه كعدت يم جود والموبايل
بايدي كأنه شي غريب مايمثل فرحه

الوقت مر ببطء كأنه يجر نفسه من
التعب كلشي ساكت والكل كاعد بمكانه
والجو مشحون بكلام

الجرس دگ فجأة قلب حمزه التفت
على الباب أمي سحبت الشال من
التخم وحطته على راسها
وركضت للباب

دخل أسمر عيونه تعبانة من الشغل
وجهه ساكت لاكن من شاف جمانه
ركضت عليه ضحك ةحضنها بقوة
وكأن حضنها هي راحته بعد يوم طويل

سلم على أبويه وكعد يمه وأني
بسرعة ضميت الموبايل داخل حضن
جود حتى لا يبين صوت كلبي يدك
من الخوف أكثر من صوت الجرس
قبل شوي

كمت ودخلت المطبخ جبت مي ورحت
انطيته يا كلبي مو مرتاح وراسي مشغول

ليان:: اسويلك عشه

أسمر:: لا الحمدلله متعشي

أبويه:: بويه ليان سوينه جاي

ليان:: ادلل بويه

دخلت المطبخ وأني حايرة بين خوف
وزعل ماعرف إذا راح يرضى على
الموبايل لو راح يثور مثل كل مره
سويت الجاي من غير نفس طلعت
الصينية وحطيتها بيدي وكلبي
يدك كأنه راح يطلع من صدري

وصلت للصالة والكل يتونس بس أني براسي عاصفة كلشي ساكت على لساني بس صدري يصرخ دخلت ووزعت الجاي ورجعت كعدت
بهدوء على طرف التخم وجود بحضني

أسمر باوع عليه نظرة سريعة نوب على
جود وصوت ضحكته الناعمة ملأ المكان
للحظة حسيت البيت رجع هادي بس
داخلي لا بعده مو هادي

مر الوقت ووجهي ساكت وهمه يحچون
وأني بس أسمع مو كادرة أحچي حتى كلمة

أسمر:: يله امشينه

أبويه:: بعد وكت وين هسه

ليان:: لا بويه مو علمود الجهال هم
حتى ينامون من وكت

أمي:: يمه لا تطولين علينه مثل هالمره

ليان:: إن شاء الله يمه

كمت من مكاني ورحت على غرفة أهلي
رتبت الجنطة بسرعة كلبي ضايج من
داخل كلشي حايرة بيه شلت الجنطة
وطلعت للصالة حمزه وأسمر وأبويه
كاعدين برا

أخذت الموبايل ودفنته بالجنطة كأني
دفنت سر ما أريد يطلع للضوء ضميت
جود بحضني وأمي تحاجيني

أمي:: يمه عود روحي لا تضلين

ليان:: يمه وين

أمي:: شنو وين لدكتوره

ليان بستغراب:: شعندي رايحه الدكتوره

أمي:: يمه سوي تحاليل شوفي نفسج
لا كون حبله

ليان:: يايمه والله ماعندي شي غير
كتلج ممتقربين البعض

أمي:: والله يمه منين ماجيبج حبله

ليان:: لا اطمني ماعندي شي

كلامها ضل يدور براسي واني لازمه
جود بيدي وكأنه طوق نجاة وسط
موج من الحچي

طلعنه بره حمزه ساكت أسمر أخذ
الجنطة من أمي عيونه تعبانه لكنه
ساكت كعادته كلشي جوه صدره
ما يطلعه ودعنه أمي وأبويه وطلعنه

بالطريق أسمر ينزل جمانه يريدها
تمشي على رجلها بس هي تبچي
وتصرخ وتتشلب بأيده كل خطوة
تصير معركة صغيرة بينه وبينها
بس بين صراخها وضحكته الخفيفة
حسيت كأن الدنيا رغم كل شي
بعدها تمشي

وصلنه للبيت البيت ساكت ماكو غير
صوت الجهال وأصوات النفس

أسمر:: أنا صاعد

ليان:: صعد وياك الجهال بين ماحمي
مي لجمانه

أخذ جود من حضني وگام يصعد جمانه
لازم ايدها واني بالمطبخ أحمي المي
صوت المي يطشر على الحيطان بس
داخلي صاير مثل النار

كلبت المي بالترمز وسديته وصعدت
بهدوء دخلت الغرفة ولكيتهم فوك راس
جود كاعدين أسمر وبحضنه وجمانه

ليان:: شبي جود ها شبي

أسمر:: يابه شبيج بس ديضحك
وجمانه مكيفه عليه

باوعت على وجهه الصغير وهو يبتسم
مع أني جنت تعبة بس ابتسامته دايمًا
تلين كلبي عفتهم ورحت طلعت تراك
خفيف ودخلت الحمام....

طلعت ولكيت جمانه نايمه على يمين
جود بهدوء كأنها جانت تنتظر الفرصه
حتى تنام

ليان:: شبسرعه نامت جمانه

أسمر:: ماعرف أنا هم تفاجئت من
نامت يجوز لاعبه هواي اهناكه

ليان:: أي هواي لعبت... لعد خلي اسوي
الها ممه لأن اليوم مامسويه الها بس
وكلتها

أسمر:: عود بأجر كعديني من وقت
حتى افول بانزين

ليان:: بس أنتَ نبه الساعه

أسمر:: خوش

رجع حط جمانه بجربايتها وأني سويت
الها الممه ونطيتها رضعت بهدوء وهي
نايمه نفس عميق منها كأنه دنياها
صغيرة ونظيفة

رجعت غيرت جود ونومته أسمر كاعد
عالسرير لازم جهازه ووجهه ساكت
نوره ينعكس على ملامحه الباردة

تمددت يمه ظهري إله حتى ما أشوف
وجهه وأني داخلي كله خوف من لحظة
يكشف بيها الموبايل حاولت أتنفس
ببطء حتى يهدى كلبي

بعد شويه سمعت صوته منخفض مثل الهمس

أسمر:: ليان هاي أنتِ لاعبه بالانستكرام؟

ماحجيت وبقيت على وضعيتي
لحد مانمت ومادري شسوه ماسوه
ولا اعرف إذا جان عرف أكو ناس
محظورين....... لحد الصبح

كعدت على صوت المنبه مالته كمت
مابدلت بقيت بالتراك بس غسلت
وجهي ونزلت سويت اله ريوك
وصعدت كعدته

ليان:: اسمر كوم راح تتأخر

اسمر:: كايمم

كام غسل ونزل جوه وإني باوعت
على الغرفه مكركبه كمت اعزل بيها
وهم عزلت الجنطه وطلعت البيها
اجت عيني على التلفون لزمته
وياريتني مالزمته

طلعته من العلاكه وفتحت الكارتون
جان موبايل اسمه A51
شغلته وجان مابي شحن
أصلا كلت خلي اخلي على
الشحن وبعدين اخلي بي
السيمكارت مالتي كمت داريد
اخلي على الشحن

دخل اسمر الغرفه وباوع عليهه بعدين
رجع باوع على الموبايل الي بيدي ظلت
نظراته ثابته عليه عكد حواجبه وصوته
جان بيه نبرة استغراب

اسمر:: شنو هاذا

بلعت ريگي بصعوبه وحسيت گلبي
يدگ بسرعه وگلت اله بصوت خفيف

ليان:: موبايل

اسمر:: ومنين جبتي هاذا

حسيت ايدي ترجف وگلت له

ليان:: البارحه حمزه اشتره الي

اسمر:: هااا من هاي رحتي البارحه
ومن سئلتج كلتي لا

ليان:: لا اصلااا

تقدم خطوه عليه واني كل جسمي تجمد
والخوف بدا يزحف بجسمي كأنما كل
الهوا انقطع حسيت روحي تضيك واني
ارجع ليورا باوعت بوجهه وعينه جانت
تخوف وگلت له

ليان:: اسمر عليك الله لا تصيح الجهال نايمين

جان كل همي الجهال اخاف يكعدون
ماجان بالي غيرهم بس هو ضحك
بخفه بس ضحكته بيهه شي يخوف
مو ضحكة فرح ضحكة واحد ناوي شي

تقدم بعد اكثر واني لطشت بالحايط
حسيت ظهري يتجمد وصار مقابلي
نزل نفس مستواي وهمس باذاني
وصوته جان ثكيل يخوف

اسمر:: صايره تروحين وتشتكين لأهلج عليه

احس نفسي انكتمت وگلت له بصوت
مكسور

ليان:: مامشتكيه لاااا

اسمر:: اششش صوتچج ماسمعه ابدا

اباوع عليه وشلون يباوع بعيوني
نظراته حاده تبرد الدم رفع ايده
واخذ الموبايل من ايدي واني
عرفت شراح يسوي غمضت عيوني
سمعت صوت قوي لما لطخ الجهاز
بالحايط فتحت عيوني وشفت الموبايل
مفلشه تفليش

ليان:: هاي ليش هيچ سويت

اسمر:: هالمره بالحايط كسرته المره
الجايه إذا إنجاب أي جهاز بدون علمي
يتكسر على راسج فهمتي

كلامه نزل عليه مثل السجين صوته
جامد ونظراته ما ترحم شمر الموبايل
بالكاع وطلع من الغرفه واني ظلّيت
أباوع عليه ودموعي محبوسه بعيوني
مقهوره من كلبي حمزه جابه بس حتى
احچي وياهم وارتاح شوي بس هو دايمًا
ياخذ الأمور بكيفه ويسيطر على كل شي

دنكت على الجهاز المكسور شلته بأيد ترجف واباوع عليه وحسيت شي انكسر بداخلي

ليان:: بعدني حتى ماتهنيت بي

خليته بسلة النفايات بصمت واني احس
بثكل جوه صدري رجعت اكمل ترتيب
الغرفه وكل حركه من حركاتي بيهه
وجع وانكسار كأنما مو بس الجهاز
انكسر… اني هم انكسرت

كعدت جمانه بدلت الها وإني هم بدلت
ولفيت شالي وخليت عبايه على راسي
شلت جود ونزلنه خلينه جود يم عمه
سناء ونطلقنه النجف.........

•~•~•~•~•~•~•~•

فرح.....

مرت أيام واسابيع واشهر وحمزه
يراسل بيه بس إني مامهتمه اله
اقره رسايله وماجاوب وكل سبوع
اكتب اله "" شوكت اطلك "" حجيت
الريم وريم تكلي ارجعي فكري وهو
جان بفاتحه اخو ويجوز طلع قهره
بيج بس إني مستحيل اهتم بعد الآن
ومستحيل انسه إلي كاله إلي

كاعده يم أمي بالاستقبال وهيه كاعده
تباوع مسلسل على التلفزيون وإني
اكلب بتيك توك بس فجأة وصلت
إلي رساله دخلت عليها جان مكتوب
"هلو شلونج"

استغربت منو هاي دخلت على حسابها
جان باسم ياسمين كلت معقوله
ياسمين بنت عمتي ماترددت وجاوبتها

_أهلا بس منو حضرتج

هيه بسرعه قرتها وجاوبت

_شبيج فروحه إني ياسمين بت....

وأهنا يله صدك عرفت هيه نفسها
ياسمين بس تفاجئت شعجب
مراسلتني اول تالي

فرح:: هلا شلونج اخبارج عمتي شلونها

ياسمين:: الحمدلله بخير إنتو شلونكم
اخباركم خالي شلونه عمتي

فرح:: زينين الحمدلله... شعجب اليوم ذاكرتنه

ياسمين:: ها مو باعي مسوين لمه بنات
ونريدج ويانه

ستغربت مسويات لمه بنات لا ونوب
يردني وياهن من شوكت نزلت عليهن
الحنيه كتبت الها

فرح:: شنو لمه بنات منو ومنو

ياسمين:: احنه كلنا رنا وبتول وريم
وليان وخلود وكالن خلي نكول الفرح
هم تجي ويانه وكتلهن إني اراسلها

ماصدكت وكلت خلي اسئلها

فرح:: لعد ليش ليان ماراسلتني
وكالت إلي هيه

ياسمين:: شبيج ماتدرين غير ماعدها
موبايل منين تراسلج وتكلج وبعدين
احنه كوه قنعنه اسمر على ليان وتجي

فرح:: ها

ياسمين:: أي يله فرح أنتِ هم كولي
الحمزه وتعالي

فرح:: ها أي اشوف اراسله واشوفه اذا قبل

ياسمين:: أي وعود رجعيلي خبر مو تنسين

فرح:: تمام

سديت الموبايل وبقيت افكر شعجب
لعد ريم ماكالت هيه إلي معقوله
انشغلت بشي وماكالتلي باوعت
لامي وكتلها

فرح:: يمه أريد اروح البيت عمتي أم ليث

باوعت عليه خزرتني

أمي:: وشسوين رايحه

فرح:: مو البنات مجموعات اهناك
وهم كالن إلي اروح وياهن

أمي:: مننه البنات بله

عددت الها البنات وهيه اخذتلها صفنه وكالت

أمي:: روحي ماطول البنات رايحات ب
س كولي الحمزه لا تطلعين بدون علمه

فرح:: أصلاً حجيتله وقبل وكلت
اشوفج انتِ هم

أمي:: هاي هيه روحي

فرحت لأن راح اروح وانجمع وي البنات
لأن صالي هواي ماشايفتهن لزمت
موبايلي وكتبت الياسمين

_اني هم راح اجي

وهيه كبل قرتها وكبل كالت إلي

ياسمين:: أي عفيه لا تجين انتِ اني
ادز الج ليث

فرح:: ليش ليث مو عساس مسافر

ياسمين:: ها لا اجه قبل سبوع

فرح:: خوش لعد اني راح احضر نفسي

ياسمين:: أي عفيه

سديته منها وعفت امي وصعدت
فوك اختاريت ملابس الطلعه وحضرت
كل شي ونسيت اسئل بيش الساعه
عاد راسلتها وكالت ب4 وهسه الساعه
ب3ونص يعني ابد ماضال وقت وكمت
على الاستعجال لحد ماخلصت ونزلت
جوه اتاني باليث يجي عليه وامي سئلت
وهم كتلها ليث يجي ياخذني

شويه وصدك اجه ليث طلعت أمي
سلمت عليه واني هم سلمت عليه
وصعدت ليورا بالسياره ونطلقنه

بس طول الطريق حسيت شي مو
طبيعي نظراته إلي مو راحه خلتني
أتجمد من الخوف شعور مو مريح
كلشي جواي جان يكلي إرجعي

بس جنت ساكته الوم بنفسي
شورطج وفرحتي الزايده خلتج
تثقين بيه رجعت باوعت للطريق
وضليت صافنه فجأة وعيت هاذا
مو طريق بيتهم رفعت راسي
وبصوت مبحوح كلت

فرح:: عيني ليث هاذا الطريق ميودي
على بيتكم

ليث ضحك ضحكه بارده وگال:: نسيت
منين الطريق

عرفت يقصدها مو عن نسيان حقيقي
بس سكتت سويت نفسي مامهتمه بس
كلبي جان يضرب بقوه طلعت الموبايل
من الجنطه فتت على الاتصالات حطيت
رقم حمزه كبست عليه المره والمرتين
بس الموبايل ساكت مابي رصيد
أيدي رجفت قلبي نزل مو بمكانه
نظرت للطريق مااعرف وين أحنا

فرح بخوف:: عفيه ليث رجعني البيت
هاي امي راسلتني ترديني ارجع

مارد علي سكته خلت خوفي يكبر
حسيت نفسي محاصره

فرح:: عفيه ليث رجعني

ليث:: اصبري ياعمري هسه نوصل

وفجأة وكفت السياره نظرت للمكان
كله مهجور نزل من السياره وجا
ناحيتي فتح الباب وبنبرة مو
مريحه گال

ليث:: انزلي

فرح:: ش..نسوي آه..نا

ليث:: لدوخيني انزلي وتعرفين شنسوي اهنا

بقيت كاعده ماردت بس هو مد ايده
وسحبني بقوه

فرح:: شبيككك تخبلتتت

ليث:: أي تخبلت يله امشي كدامي

بلعت ريگي بصعوبه كلبي جان يصرخ
داخل صدري المكان ميت ماكو لا صوت
لا ناس كلها عماير مهجوره أول فرصه
إجتني ركضت بكل قوتي

فرح:: ياخايسسس ياحقيررر

صوت خطواته قريب من وراي
وصوته يصيح

ليث:: فرحححح

ركضت أسرع بس هو لحقني مسكني
من بطني بقوه ماخلاني أتحرك

فرح:: هدنيييي نعاااا*

دارني عليه وضربني راشدي بقوه
حسيت الدنيا تلف وأذني تصفر
جرني من أيدي حسيتها تنكسر

فرح:: هدنيييي ويننن موديني

ليث:: هسه تعرفين وين موديج

جرني للعماره وصرخت بأعلى صوتي
بس محد سمعني شمرني على الارض
ألم بظهري نزلني للصفر

فرح:: الللههههه ياخذككككك

ليث:: ياخذني ياخذني

اباوع عليه بدأ يفتح قميصه نظرتله
برعب صرت أزحف لورا دموعي تنزل
من غير صوت

فرح:: شجاي تسوي ليثثثثث

هو ساكت ونظرته أبرد من الموت
خطواته تقترب واني أزحف ليورا
دموعي غركت وجهي أنفاسي تتسارع
كلبي يدك مثل الطبل صرخت من
جديد محد سمعني إيده انمدت
ناحيتي حسيت كلشي داخلي يتكسر

حسيت العجز بكل جسمي حسيت
روحي تنسحب مني صوتي اختفى
الظلام غطى عيوني وكلشي إنكسر
بلحظه وحده

كلشي بعدها صار ضبابي صرختي
الأخيرة ظلت ترن براسي مثل صدى
بمكان فاضي..........

يتبعععع..........

•~•~•~•~•~•~•~•~•~•

الكاتبه ضحى اليوسف

ادخلو على حسابي وصوتو
القصه الجديدة
"عوض من رماد الحرب"

حسابي الانستا ضيفو وانضمو القناة