رواية احفاد السيد : الثار ( بأجزائها الإثنين ) الفصل الثالث عشر 13 - بقلم ​رُقَـيَّـةُ الْأَكْـبَـرُ

. . أحفاد السيد
بقلم الكاتبة ﴿ رقَـيـَة الأكــبر ﴾
لاتنسون التصويت ومتابعة للحساب

.
البارت 28

- وأتَيتنِي في الحلمِ كيف أتَيتَني؟
‏من فرطِ شوقي حُزني لم أبديه
‏لكنّني وبصوت طيفك أكتفِي
‏علّ الطيُوف تواسِي ما أخفِيه ...

┬──┬┬──┬┬──┬┬──┬┬──┬

علــي الباقـر :: والله دنيا ميشمومة ..

علي الرضا :: اهاا وليش ؟

ـ شنوو ليش دنيا تخلي واحد نكرة مثل انمار يتزوج غيمة وهسه تخلي واحد مثل زُبير ياخذ رحمه ..

علي الهادي :: شبي زبير ؟

ـ ايي مابيه شي بس ميعجبني ..

علي السجاد :: روح ياخوية هو انت ميعجبك العجب ولا الصوم برجب الله يساعد التاخذك ..

علي الرضا :: يا تاخذه جا متشوفه صك الثلاثين ولهسه ممتزوج هههههه

ـ احجوو عليه احجوو بعد
عندي هواي اذنوب اخذوهن بالعافيه عليكم ..

علي الرضا :: شنوو تعررف عن زبير تعرفه انت ؟؟!

ـ اعرفه اكثر من معرفه اهله اله ..

علي السجاد ;; شنوو بي شيي ؟؟

ـ ابوووي سال عنه من وافق عليه ؟!

علي الهادي ;; اييي سالل وخوش ولد ويتيم ..

ـ منووو اليتيم زبير يتيم ؟؟؟

علي الهادي :: اييي زبير يتيم ..

ـ اهاا يا حبيبي ههههههههه

علي السجاد ;; شجاك علي الباقر اذا تعرف شي كول تره هوه اجه عن طريق حامد المتقين ..

ـ شلون اجة عن طريق حامد ؟؟

علي الرضا :: هوة صديق حامد وكاله اريد واحدة لزواج على عرفك ف حامد مفكر برحمة لان عمرها مقارب لعمر زبير وترا حامد قنع المعتز بهذا الزواج ..

ـ صدككك تحجووون ؟؟

علي السجاد :: ايي والله شنو شبيك !؟

ـ اني طاللع استودعكم الله ..

علي الهادي :: علي الباقر .

علي السجاد :: اووكف يا رجال !!! ..

طلعت من البراني مالتنا وعفت كل اخوتي وركبت سيارتي واتصلت على حامد ..
اتفقنا على مكان محدد ورحت وصلت قبله وبقيت
منتضرة من سمعت صوت سياره ورايي وكفت ..
بقيت واكف بمكاني نزل حامد الي وصار كدامي ..

ومن كد ما جنت متنرفزز رفعت ايدي وضربت حامد راجدي ... 🙂🙂🙂🙂💔.

حامد المتقين :: هاا ابا الحسن ؟؟

علي الباقر :: ٠٠٠٠٠٠٠٠٠٠٠٠٠٠٠٠

ـ هااي شبيك تضرربنـي علي الباقرر حاامد اني ؟؟

ـ اضربك واكسر راسسك 🙂💔

ـ غير افهم شنو مسووي ؟؟

ـ ولك شنيي ترووح وتقنع المعتز وابوي حتى يزوج رحمة من زُبير .. منين لوووين انت تعرررف زُبيرر
ولك انت شنوووو حت تخلييي اختييي رحمة الزهراء تاخذ واحدد نكرررة مثل هذااا زُبير ..

ـ الرجال يريدها بالحلال

ـ بالحلال ؟؟ كتلييي حلال هوة هذا يعررف حلال انت تعرف اهله تعرف امه شنووو تعررف ابوه شنووو
مسووي الرجال يتيم وضاحك على رحمة..

ـ مضاحك على احد اني..

ـ هيه شني مضحكت على احد وانت رايح مقنع رحمه وابوي والمعتز ان زبير صديقك ويتيم فوكاها..

ـ

ـ انت مستوعب الشي السويته؟؟
ولك الي تسمي يتيم امه وابوة نايمين بالسجن
الاب مخددراتت والام دعااره

ولك تشمررر رحمه على هيجج نمااذج ولك شنوو انت انت ميزرااا انت تسمي رووحك ميرزااا وبيك من دمنه؟؟؟

_ اعررررف باهله ترة..

_ تعرررف !!؟؟

_ اييي ادري عنه هيج سمعته وهيج اهله..

_ وشكوو خلييته راح يتزوج رحمة؟!

_ علي الباقر اني احب رحمه احبهاااا اشوفهاا بالدنيااا بس هيه متريدني هيه ترريده ولك رحمه هيه الجبرتني اكول زبير صديقي ويتيم..

رحمه تحب زبير وتعرف اهله وفوك هذا بعدهي تريده
رفضتني علمودددة..

_ رحمـة الزهررااء تريددد زبير وتحبه؟؟؟

_ اييي اييي اني هم نصدمت مثلك

_ شجااب رحمة على زبير شنوو عرفها بيي ومن يمته رحمه تفكر بالحب وخرابيطة؟؟!

_ ماعرف الي عرفته هوة دوريته على طريق دوامها ودوم جانت تشوفه ف انعجبت بي وصارت تتواصل وياه وهوه اعترف الها عن اهله..

_ دددامم زبيير اتعرف على رحمه يعني يعررف بيها بت عمي..

_ ماعرف بهاي النقطة بس اكيد يعرف اكيد رحمة مسولفه اله عننا..

_ اهاااا.. حلووو..

_ اسسف علي الباقر ادري السويته غلط بس والله لان احبها ومكدرت اشوفها مجروحه لان ماكدرت تاخذ حبيبه ...

_ لا تعتذر العتب مو عليك العتب على ذاك الي من عرف بيها هاي البنيه تخصنييي تخص علي الباقر وما بتعد عنهاا العتب عليه..

_ وين رايح ؟ ..

_ تعاالل ولك يانحرري اعتذلك لان مديت ايدي عليك..

اخذت حامد وحضنته وبسته بخده بمكان الراجدي وتركته ورحت لسيارتي..

_ لاتعتذر اخووي انت وتموون..

_ يلا حبيبي رايح اني

_ وينن؟؟

_ لارض الله الواسعه مع السلامه....

بقيت افر بتلفوني واني اسوق...
عصبت حييل من زبير مجنت اشوفه كفوو ياخذ وحده مثل اختي رحمة الزهراء...
فتحت التلفون وصرت ادور على رقم زبير ولكيت نفسي حاذفه اتصلت على قاسم ودزلي رقمه..

ورجعت سجلت رقمه واتصلت عليه وفتح الخط....

زبير:: ياهلا ب السيد علي الباقر

علي الباقر:: حافظ رقميي؟

_ ما حذفته اصلن بااقيي..

_ زبير وين انت؟؟؟

_ بالقسم وين يعني؟

_ جاايك لاتخلي احد يمك اريد احجي وياك لوحدنا..

_ خووش

سديت التلفون بوجه واتوجهت للقسم..
دخلت كبل وكف كدامي المنتسب طلعتله هويتي وخر عني
دخلت لزبير..
بقيت اباوع بي شلون هو جان كاعد على الكرسي ةيفر بروحه ومبتسم..
واني شياطين الارض جانت تطافر كدام وجهي..

ابتسم زبير واردف وياي..

زبير:: والله نور المكتب يا سيادة المحقق السيد علي الباقر

_ .....................

_ تعاال استرريح وامرني جااي كهووة شنو مشتهي؟

_ شنو هذا الفلم الي مسوي على اهلي!؟؟

_ ادري بيك متشرف بيه بس علي الباقر تره اني احب رحمة وحيل هم هي العوض الي سوي كلشي بس لاتخرب هذا العرس..

_ اهاااا....

_ قريت العصبيه البعيونك والله اني بعدتها عن كلشي ببالك هااي رحمة مو اي شخص والله شعره مراح تنمس منهاا

_ واذا صار عليها شي !!؟؟

_ حسابي يصير وياك التريده سوي..

_ زبير اني ماعرف انت شلون وصلت لرحمة وشلون خليتها تحبك بس الاعرفه اختي وبت عمي راح تصير مرتك وتريدك هيه..
بس خلي بالك ترة الوراها مو ارخمه مثل اهلك الوراها سادة كامله فهمتتت..

_ فاهم والله فاهم اني ماريد شي من الدنيا كلها غير رحمة

_ ماعرف الله شلون نطاك شخص ملاك مثل اختي بس اتمنى تكون كد هاي الهديه الف مبروك ...

_ رايح !!؟

_ راح اسكت اني هسه لخاطر رحمة بس لاتفكر اني وياك وفرحان بيك لاااا
وراح تشوفني بوجهك كلما اشوف الضحكه مختفيه من وجه رحمتي..

_ مراح تشوفها غير فرحانه ومرتاحه

_ اتمنى...

تركته وطلعت...
جنت على بالي شيي بس يوم شفته صارت بعيني رحمة
ماكدر هسه اكسر بخاطرها
وباجر عقدها لاا مستحيل ماكدر اسووي هيج لو شنو مصار
راح الحك العيار لباب ادار واشوف تالي زبير لوين !؟

< مـشهـد >

"" طيبة الزهراء ""

دخلت للغرفه على رحمة الزهراء لكيتها جاي تطلع ملابس الحفله
العقد باجر .....
رحت دفعت الملابس وكعدت كدامها ....
وهي واكفة كدامي تحط البدلات على جسمها وتشوفه بالمرايه ...
ولفظت وياها .....

طيبـة الزهراء :: شنوو هااي الهووسة ..

ـ اريد بدله حلووة !!!

ـ حبيبتي رحومة القالب غالب لو تلبسين خلاكين هم تطلعين صاكة ....

ـ صدددك والله !!؟

- والزهره ام الحسن ..

ـ بس هم راح اكلج اختاري منو الاحلا
هذا الاوف وآيت ولا هذا السمائي !!؟؟؟

- لا الاوف وايت يجننن ....

- اعتمدة يعني !!؟

- اعتمددي وثقي بيه

ـ حلووو

بهاي الأثناء ادركت هاي هيه رحمه راح تتزوج وبعد ماشوفه كل يوم مثل هسه لا راح تصير تجي النا ك ضيفه 💔💔
ورجعت حجيت وياها بحززن ......

ـ هاي هيه شيخة راح تتزوجين؟؟!

- ترى راح اتزوج م راح اهاجر.....

ـ حت لو راح احس بفراغج ....

ـ يمكن تضوجين يومين بس تتعودين وانت مو لوحدج هاي امي والعلويه واريج ولينا والكل هنا مرراح تحسي بغيابي ...

ـ لو الكل موجود يبقى مكانج فاررغ..

ـ على طاري الزواج ولج فصعونة ....

ـ هاا شنوو ؟؟!

- المعتز بالله رجع حجة وياي بموضوعج ...

ـ اسم الله موضوع شنوو !؟؟

- قبل يومين ادم رجع وخطبج من المعتز ...
ف المعتز بالله كالي حت احجي وياج لان كالي خاف ذاك اليوم من هوة حجه وياج انت خفتي ورفضتي ادم ....

ـ يعني آدم لهاي الدرجة متمسك بية !؟؟

ـ تردين الصراحة هوواي كبر بعيني هاذا الرجال طلع شاريج وانت ملاحظة من عرفنا بعلاقتكم لهسه هو جاي كل فترة يجي ويخطبج يريدج تصيرين حلالة معناها رجال وبريدج ....

ـ مااعررف

ـ شنوو الي ما تعرفي؟؟؟ طيباات مو جنتي تخونين ثقتنا وتحجين ويااه؟؟
وهذا هوة راح يثير رجلج وابو بيتج شنو تردين اكثر من هيج!؟

_شيخة اني ما اثق بمشاعري هاي الفترة ابد هواي جاي تتغير وهم مخربطة...

ـ يعني اكوول للمعتز باالله يأجل الموضوع !!؟

ـ ايي كليلة ...

ـ طيباات اكول للمعتز تكول طيباات تأجل الموضوع لو متريد تتزوج !؟؟
لان اكو فرق بين التاجيل والرفض...

ـ شنوو الفرق يعنيي؟؟!

- التاجيل يعني ادم ينتضر بس انتضار بطمئنينه ماأمن انت الة
والرفض هااي هيه يعني النهي انت بطريقج وهو بطريقه !؟؟

ـ مااعررف رحمةةة

ـ لا إله إلا الله .... هااي شجاج طيبات !؟؟؟

ـ شيخة هسه خلينا بحفلتج وفرحتج واني الله كريم الي بعدني طفلة ...

ـ يعني شنو هسه !؟؟

ـ اذا سالج المعتز بالله كليلة ماكلت الها او كليله تفكر بكيفج ..

ـ تمام عزيزة روحي ماريد اضغط عليج اكثر من هيج

ـ يروحي انت هسه انت اعتمدتي على هذا الاوف وايت ؟؟!

ـ ايي اعتمدت علية !؟

ـ يلا جا نامي حت تكعدين صاحيه

ـ وانت وين رايحه ؟؟

ـ اني نازلة شوي للحديقه

ـ طيبات

ـ عيوني !؟

ـ لا تفكرين هوواي ولا تشيلي هم ابد
خلي ابالج انت ما مجبورة على احد وهم ممجبورة بشي تكدرين تكولين لا لمن تشوفين نفسج ممرتاحه بشي ارفضي ولا تشلي هم ..

ـ ان شاء الله

ـ والاهم لا تتعبين عقلج بالتفكير خوووش

ـ خووش

ـ اروح فدووة لچعدة العلويات اني ...

حضنتني وباستني بشعري عفتها ونزلت للحديقه
لمن رحت للخلفيه لكيت علي الباقر كاعد يلعب بتلفونه
مصدر مني ولا صوت التفت علمود ارجع ادخل للبيت
سمعت صوت علي الباقر ....

ـ تعاي طيباتي تعاي اكعدي وين رايحه !!؟

انداريت اله وضليت اباوع اله شلون شافاني وهوة جان مدنك على التلفون شلون حس بوجودي مااعرف !!
ابتسمت الة ورحت وكعديت يمه
ورجع اردف وياي ....

ـ شني ولج لا تسلمين لا تسولفين وياي شني عدوچ انه !؟

رفعت عيني وصرت اباوع لشكله شلون مضيك عيونه ومبتسم ابتسامه طفيفه وساند ظهرة ومرجع راسه زايد لورة
فتحت حلكي اريد تطلع حجايه ماكو الساني اربط مدري شبي
لحد ما عصرت روحي حيل يالله طلعت بهايي الحجايه

ـ لا علي الباقر ماكو شي

ضل هوة مستغرب بوجهي
بعدها عدل روحه وفتح التلفون ودخل على معرض الصور
ووجه التلفون الي .....
طلعلي صورة الي اني وياه يوم جان عمري ست سنوات
اول يوم الي بالمدرسه هوة الي اخذاني
بقيت اباوع لصور واني اضحك على روحي
هوة رجال مشورب ومرتب واني توني رايحه للمدرسة
و لازمه ايده ...
طلع الصورة ووياها اردف ...

ـ تذكرين هاي الصورة لو متذكريها !؟

ـ لا مو كلش اتذكر ايام الاول ابتدائي ..

ـ اهااا

ـ بس حيين منيلك هاي الصور !؟؟

ـ ابوي ساحبهن بالالبوم واني صورتهن منه

ـ يااي حلوو وين هذا الالبووم ؟

ـ فوك بغرفه العلويه

ـ حابه اشوف الصور الي بي

ـ فضيحه الصور لا تشوفيهن

ـ ليش !؟

- ولج صورنا من احنا زعاطيط ومراهقين الصور فلم وعلي ..هههه

ـ جا انت شعدك مصور صوري !؟؟

ـ ممصور صورج اني

ـ جا هذني شنو ؟

ـ ترى هذني اني مصورهن لان اني بيهن
لان اني اخذت كل صوري واني بالعشرينات

ـ اهااا

ـ ايي والله جا شني قابل اني ميت عليج واخذ صورج ام خشم ..

ـ غرت من خشميي لان احلا منك

ـ لا واللهه

ـ اييي والله عيني

ـ هههههههههه

ـ صدك ابا الحسن

ـ هلا يانحري !؟

ـ ليش تخفف لحيتك ؟

ـ ليش شبيها هاي لحيتي !؟

ـ مابيه شي بس اللحيه الطويلة حلوة عليك ..

ـ لا يابة ادري شني ارهاابي اطول اللحيه

ـ لا حلوة عليك والله اتخبل لحيتك ثخينه وطويلة ...

ـ خوش راح اسويها وانشر صورتين الي قبل اللحيه وبعد
واكتب عليها هاكذا تم التحويل من علي الباقر الى ابو بكر البغدادي ...

ـ ما اسولف ويااكك عاابت ..

ـ اي والله عمي رجال اني بوقت من الاوقات صرت بالحشد الشعبي تردين هسه اصير ارهابي ...

ـ مووو ارهاابي شبيك !؟؟

ـ مااحب ميطول لحيته بس الارهابي واصلن اصلن
السيد محمد الصدر →قدس سرة الشريف←
يكول لازم على الرجال يخفف اشواربه ويكص لحيته
يعني متنزل حد الصدر ...

ـ بس انت مراح تنزلها لحد صدررك يعني بس شوي طويلة

ـ لاا ماريد

ـ وعوود هسه انت ملتزم بوصيه السيد الشهيد ومسوي شكلك هيج ؟؟!

ـ لا اني مملتزم حيل بس اخوج ماخذ الوصيه بحذافيرها ما الومه صدري قافل ههههههه

ـ المعتز باالله صدك صدري ؟

ـ جا متدرين باخوج يتببع منو ؟؟

ـ لا معليه بي بس مرات اسمعه يحجي بالصدر ويكول لامي هذا محرمه السيد الشهيد هذا ميصير مجنت ادري بي صدري ..

ـ لا عمي اخووج قافل اني امشي وياه ما احجي حجايه واحده وياه لازم يرد عليه بكلمه من شي خطبة من خطب السيد محمد

ـ جا شنو انت مو صدري ؟؟

ـ لا مو صدري نحن الشباب متفرعين مدري شلون ننجمع هههه

ـ شنو انت ؟

ـ وي المرجعيه سستاني اني

ـ اهاا يعني بس المعتز بالله صدري بيكم !؟

ـ لا يابه ليش كتلج متفرعين نحن

ـ منو بعد وياه اذا انت سستاني ؟

ـ البشير والفاروق والمعتز وحامد وعلي الهادي واصفاد
ذول صدررين قحيين لا تتناقشين وياهم

اما نحن البقيه علي السجاد والمصطفى واني وعلي الرضا وصيوان وابوي وعمامي كلنا سستانيين

ـ جا شعجب صرتو هيج متفرعين ؟!

ـ ماكو كل شخص كبر وشاف الطريق وراح ورة قناعاته
بس متراهمين سوة لان محد يداحج بالثاني
ولا ندخل بسوالف السياسه غالقين عليها حت لتتصير مشاكل بيناتنا ..

ـ ايي زين ما تسوون

ـ وانت تشرينيه موو !؟

ـ شلون عرفت بيه ؟؟

ـ شفتج حاطة صورة الشهيد صفاء السراي خلفيه لتلفونج

ـ ها وهيج رهمتها وحددت اني تشرينيه ؟!

ـ ايي لان بس التشارنه يحبونه ويدافعون عنه

ـ حلوو

ـ تحديدي صح مو !؟

ـ كلش صحيح ..

ـ تشرفت بيج عيني يعني صار بالبيت تشريني وصدري وسستاني نحن هسه سوينه المستحيل ..

ـ هههههه ايي جمعنا الي ما ينجمع وكعدنا بيت واحد ..

ـ ايي والزهرة ..

ـ شعجب كاعد لهسه هنا ؟

ـ ماكو عجب الساعه هسه ١١م ...

ـ يعني بعد وقت ؟

ـ ايي بعده الليل باوله

ـ اهاا خووش ..

ـ اكول طيباتي

ـ كول عيني ؟؟

ـ عندج انستكرام موو ؟

ـ ايي عندي

ـ انطيني حسابج ..

ـ حاليا حذفت حسابي هذا واريد اسوي جديد وانطيك اياه

ـ ليش حذفتي هذا اكو شي ؟؟!

ـ صار الكل يعرفه وضافني اريد اسوي جديد واضيف بس الي اريدهم

ـ جا من تسوي خلي خاص اريح لراسج هسه اني حسابي وحسابات خواتي كلهن مسويهن خاصات ويضيفن بس حسابات البنات ..

ـ اي هوة هيج راح اسوي خاص

ـ يلا اصعدي نامي هم يالله على ما تضلين تتكلبين صايرة الساعه ب ١٢ كومي نامي ..

ـ مو جايني نووم ولا اريد الصبح يطلع

ـ ليش خيرج !؟

ـ عقد رحمة باجر وضايجه حيلل ..

ـ لا تخلين بالج هاي اريج ضاجت يومين على غيمه وبعدين صارت عادي ..

ـ ماعرف ممجربة روحي بالفراك رحمة اول مره راح تبتعد هلكد

ـ هاي انتن البنات هيجي مو لهلجن ..

ـ شلون يعني ؟؟

ـ يعني البنيه مو لهله ماتبقى عدهم كل عمرها تاليتها بيت رجلها وبيتها ...

ـ ايي عمي انتم المحضوضين بس انتم لهلكم ..

ـ ههههه جا ولج شتردينه نتزوج ونروح نعيش ببيوت نسوانه ؟ غير نبقى ابيتنا ..

ـ هوة اني كمت امسلت بالحجي وكلام الله ..

ـ كوومي نامي احسن كوومي ..

ـ وانت مطول هنا ؟؟

ـ لا وراج صاعد

ـ تمام تصبح على خير

ـ انت الخير يا نحري وصمام كلبي ❤️..

تركت علي الباقر وصعدت دخلت لغرفتي ضفيت الضوة ونزلت البردة السوده على الشباك حتى اذا صبح الصبح ميضايقني الضوة الي يدخل من الشباك ..

حطيت راسي وسرحت باحلامي المفعمة بامل الايام ....

←→←→←→←→←→←→←→

"" البشير قيصر ""

رفضت جميلة ترجع الي وبهاذا الوقت الفات جنت مقدم طلب رجوع للتجنيد واجتني الموافقه
ورجعت جندي من جنود سرايا سلام
اني اصلن جنت بيها من ايام دخوليه الارهاب بس ب٢٠١٧ بعد التحرير تركتها ...
وهسه رجعت.. وصرت التحق بسامراء
١٠ ايام صعود و ١٠ ايام استراحه ...

وصرت بايام التحاقي اولادي يبقون عند امهم
وصادف ليله التحاقي قبل حفلة رحمة 💔 يعني م راح احضر فرحت اخيتي ..

رحت اودي شبر وشبير لجميلة حتى اطلع للكراج وانتضر جماعتي يجيون ياخذوني ..

البشير :: ما اوصيكم زلم انتم بالكم على نفسكم وعلى امهم اول شي خووش بويه

شبير :: لا توصينا بوية امي قبل لاتحجي بعيوننا ..

شبر :: انت انتبه لنفسك وارجع النا بسلامه ..

ـ اني ان شاء الله راجع بسلامه وحت اذا مرجعت امكم مالها غيركم لا تتركوها ..

شبير :: اسم الله عليك بوية ..

حضنت زلمي ودخلو جوة ..
ووراهم مباشرتا طلعت جميلة
حتى تسد الباب وراي
صرت اباوع الها
واردفت ...

ـ ما اوصيج على نفسج وعلى الولد .

ـ لا توصيني

ـ يلة اني اتوكل ..

ـ البشير قيصر !!!

ـ آمريني ..

ـ ميامر عليك عدو ردت اكلك

ـ شنو تردين تكلليلي ؟؟

ـ تروح هسه توصل بسلامه وترجع بسلامه

ـ من كلبج هاي ؟

ـ شلون يعني من كلبي

ـ يعني ترديني ارجع بسلامه ؟

ـ يا اسم الله وليش حت ماريدك ترجع بسلامه

ـ مادي هيج طرة على بالي ..

ـ ولا تخلي هيج يطري اصلن

ـ تمام

ـ تروح توصل بالف سلامه وترجع النا بالف سلامه وتكحل عيون الشبر وشبير بشوفتك ...

ـ يلا رايح اني ..

ـ بسم احسين واتوكل والدرب اخضر ان شاء الله 💔🥺 ...

طلعت من البيت واني امشي هيه مجرد دقايق ..
وحسيت بماي انرش وراي
انداريت لكيت جميلة ذبت ماي وراي ..
ابتسمتت حيلل من شفت هيج سووت

وحجيت وي روحي واني اكمل طريقي ...

﴿ مابيها مجال بشيرر هاي هيه اول مترجع ان شاء الله لهنا تاخذ عمك
والشيخ وتجي ترجع جميلة على ذمتك
كافي هيج شالع كلبها المرة هوواي تعذبت من وراي وبعدهي تحبني وتريدني ما بطلت ..
واني هم بعدني احبه وهم ماكدر اخسرها بعظ مرة متحمل كلشي بس فراكها لا ..
هسه صار وقت الاجتماااع
اصبري عليه يا جمايل بس هاي ال عشر ايام ارجع وارجعج على ذمتي ونكمل الباقي سوة و وي احلا اولاد اجوي منج .😄 ﴾

وصلت للكراج وصرت انتضر الجماعه يجوني حتى نطلع لنقطه مالتنا ....

------------------------------------

"" جميلـة ""

اول ما طلع البشير قيصر جان كلبي حيل قابضني رحت للمطبخ جبت دولكه ماي
وطلعت راسي وشمرت الماي وراه

لا سامح الله وصار على البشير شي
بعمرري ما اسامح روحي اني الي بعدت شبر وشبير عن ابوهم
بعدهم مشبعانين من ابوهم ...والسبب اني توهم جاي يسوون كلشي وياه ...

دخلت وسديت الباب وصرت اتجاهل شعور الخوف الي راودني وي طلعه البشير وشوفتي الة بملابسه العسكريه 💔 ..
صعدت لفوك لكيت شبر وشبير يردون ينامون صحتهم ورحنا لغرفتي ونمت وخليت شبر ينام على ايدي اليسرة
وشبير على ايدي اليمنى ..

وصرت ابوس بشعرهم ومدري ليش جانو كلهم عبارة عن عطر البشير وريحته ....
يمكن لان حضنوو هوواي على الباب ؟؟ ماعرف والله

بقيت مبقيتهم هيج بحضني لحد ما غفو واني مرتاحه ...

صح شبر وشبير كملو عمرهم ال١٦ سنه وكبرو على سالفه ينامون بحضني او على ايدي بس بنضري اطفالي بعدهم كتاكيت بعدهم هاذوكي الرضع الي مجنت اعرف اتصرف وياها ..
على الرغم من البشير يعاملوهم عكس معاملتي
يتعامل وياهم وكان هم زلم اكبار ..

اني جنت مبعده اولادي عن رس السادة
بس لكيت ماكو مته مهرب تاليتي رجعت
والناس كلها عرفت اولادي ...

السيد شبر ابن السيد البشير قيصر

السيد شبير ابن السيد البشير قيصر

اخذو اسم السيد الي اني جنت خايفه منه حيل
يمكن لان اعداء عائله السيد احمد ال صادق هوواي كلش هوواي اعدائهم
ف حيل شلت هم لا ثار واحد من هاي الثارات الاعداء يطلع باولادي لان حاليا هم ﴿ بزر گعدة الساده ﴾

شلفايدة هسه مني لا خوفي ولا شي يفيد ويحمي اولادي لان الناس كلها عرفتهم هاي هيه

غفيت واني بعمق افكاري هاي ..
وبنص نومتي حلمت بحلم جان كلش محلو وجان كابوس مو حلم ..

ومن الخووف فززيت اصصيح وخرعت الولد وياي خطية فززتهم من وراي وصارو يسالوني ....

جميلة :: لاااااااااااا

شبر :: بسسم الله ...

ـ اسم الله يروح كلبي انتم ..

شبير :: اسم الله عليج انتي يمة

شبر :: هااج اشربي مااي ورتاحي..

ـ مشكوور ياروحي انت ااااههه ....

شبر :: كابوس ؟؟!

ـ عابر يمة عابر

شبير :: ماكو شي عابر اذا حلم مو زين وشايفه واحد بينه بي باجر ادفعي صدقه وسولفي الحلم حت ميصير ...

شبر :: ايي يمه لان شوفي الدنيا هسه وجه فجر واحلام الفجر تتحقق ..

ـ اسم الله الزهراء اذا اتحقق ..لااا يمه ماكوو شي ودامم هسه فجر كومو يله نصلي وننسئ الصار ..

شبير :: اووف يااعلي الساعه ٤:٤٣ص

ـ ماذن مو

شبر :: ايي اذن من زماان ..

ـ جا خلينا نصلي الفجر ...

شبير :: اني نازل اغسل و اتوضئ ...

شبر :: واني جاي وياك ..

ـ بعد قلبي اولاددي الملتزميين 🥹❤️..

نزلو شبر وشبير حتى يتوضون واني كعدت امسح وجهي بديه حتى اتناسى الي شفته ويا ويلي اذا طلع الولد صح واحلام الفجر تتحقق
والحسن نروح بيها على هاي الرؤيه الي شفتها ...

نزلت غسلت وصليت وي اولادي ومن طلع الصبح وخلصنا الريوك مر عليه الفاروق الاعظم واخذ الولد حتى يعلمهم الشغل ويبقيهم وياه بالكراج ..

واني اتصلت على رحمة الزهراء ورغم ادري بيها خطية بهوسة التحضير لعقدها بس المكروده ما ردتني وقبلت تشوفني ...

طلعت دفعت صدقه ورحت للمكان الي اتفقنا عليه ولكيتها منتضرتني ..

بعد ما بستها وسلمت عليها وباركت الها راح تصير عرووس

لاحضت على وجهي التعب والقلق لزمت ايدي وضلت تسالني ...

رحمـة ::: شكو جميلات قلقتيني سولفي شبيج ؟

ـ شسولف رحمة شسولف .

ـ يا الزهرة احضرينا شصاييرر ؟؟؟

بقيت ساكته وبقت رحمة تسالني وهيه حيل اتوتررت .... من وضعي ...

ـ ولج احجييي مو جمرتيي لكلبي !!!

ـ بااوعي رحمة البارحه حلمت حلم

ـ ايي

ـ وكعدت مخترعه ..

ـ هسه هاي خرعتج علمود حلم دافعي صدقه وانسي ماكو شي

ـ رحمةة

ـ الله يخليج جملية جمر كلبي كلت صايرة مصيبة باوعي ولج نشف دمييي
ولج خيه احنا من ننام نشوف مليون حلم وتاليت الحلم بس سبع ثواني ومنهن الصالح ومنهن الطالح لا تفكرين بي انسيي ..

ـ ولج رحمة هذا مجان حللم جانت رؤيية ..

ـ رؤية شنو ؟

ـ متتسولف

ـ احجييي رؤؤيةة شنوو شنوو شفتي جميلة ..

ـ اسمعي اتعوذي من الشيطان اول

ـ اعووذ منك يا شيطان احجي عاد

ـ غمضت عيوني وشفت نااس كلها مجتمعه على بيت عبد الحسن وهم وجهم جاان كله حقد ماعرف شلون صاير ملامحهم
وجانو يصيحون
﴿ اكتلهااا لا تطلع الناا اذا متكتلهاا ﴾

ـ اسم الله ايي كملي ؟

ـ ايي والبيت جنا كلنا بي دخل عبد الحسن ورفع اسلاحه وضرب ومطلع عندي من الماات بس فجاة صار الدم منرش علينه ..
وطلع عبد الحسن الهم وصاح كتلتلها ارتااحو ورش عليهم الدم
وهذول الناس صارو مثل الحيوانات وجهم كله دم وصارو ينزلون للكاع ويمصون الدم من الكااع

وعبد الحسن واكف ميتحرك ولا مسوي تعبير
وحتى اولاد عبد الحسن كلحنا صرنا نفرك بادينه المتروسه دم ونضحك ونكول
﴿ تستاهل الصار بيها راح نرفع راسنا هسه ﴾

ـ ٠٠٠٠٠٠٠٠٠٠٠٠٠٠٠٠٠٠٠

ـ وفجااه هاي الناسس رفعت روسهم من الارض وطلعو اسلاح وكالو لعبد الحسن
دامك خلصت عليها اجه دورك ضربت عبد الحسن وكتلته وكع بالكاع ميت
وكامت وشعلت النار علينه ونحن بالبيت
وهي تكول هاي تالي الي ياخذ نسب السيد وميحترمه 😢

اني هنا فزيت اصييح .... لااا ...

ـ انعگد السسانييي ...

ـ رحمة اقسملج بحياه شبر وشبير الي شفته رؤيه موو حلم اقسملج بحبي للبشير ما اتيه اني بين الحلم والرؤيه والي اجاني البارحه رؤيه ...

ـ جميلة لا تفكرين كافي ادفعي صدقه وسولفي الحلم بالحمام وينتهي الموضوع ..
مجرد شي مر عليج يمكن لان تفكرين بعمي لان ضلمج شفتي هذا الحلم ..

ـ لا رحمة انا محاقدة على عبد الحسن بلعكس والله مرات اكول
الي سواه وياي حقة لان ابوي سوود وجهي بفعلته
صدكيني رحمة اول مرة هيج تجيينيي رؤية ...

ـ ويبقى حلم كافي ننطي اكبر من حجمه والله بعضمته موجود ..

ـ اعرف واني جنت اريد اسولف حت ارتاح وهاي سولفت ..

ـ بلة بعد ساعات بس لعقدي وفرحتي لا تضلين هيج عاكدة النونه اضحكيي ..

ـ ياا اكييد اضحك واركص اصلن والغاليه انتي

ـ ياررووحيي انت جميلاتي تجين وياي هسه !؟؟

ـ لا حبيبي راجعه للبيت اسوي غدة للولد نتغدة ونجيكم ..

ـ جا خووش انتضرج ونحن ابيت عمي عبد الحسن ترى

ـ ايي ايي اعرف يروحي ..

ـ اي كلت خااف ماعندج علم ..

ـ لا شسالفه عايشه بعطارط غير وياكم نفس الارض وولدي يمكم ..

ـ خووش اذا هيج اني رايحه هسه وانتضرج لا تتاخرين علينه

ـ اكيد يروحي ..

"" رحمـة الزهراء ""

تركت جميلة واني احاول ما احسسها بشي
بس الرؤية الي شافته خمشت كلبي ونشفت دمي وعلي
والمصيبه رؤيية موو حلم ..

دخلت للبيت وسمعت صوت علي الباقر بالبراني يخابر رحت ودخلت عليه اول ما خلص اتصاله
سلمت علية وسولفتله الي صار وياي والشي الي شافته جميلة ونحن عندنا بعائلتنا كلها
اكثر شخص علي الباقر اكثر واحد صاحب بصيرة بينا لان علاقته م شاء الله كلش قوية باالله واهل البيت كلش يعني مو شلون مجان ومن بعده يجي علي السجاد ..

بعد ما خلصت كلامي وياه بخصوص الحلم .. بقة صافن على الارض واني انتهى كلامي ...
طلع سبحته من جيبة بقة يفر بيها ابين ادية وبعدها ذبها على الارض وسحب منها كم حباية خرزة يعني اخذ محددات
وصار يسبح ...
لمن وصل لاخر حباية مختارها هوة ...

طخت عندي علي الباقر يسوي استخاره بالسبحه للشي الي شافته جميلات زين لو مو زين ..
لمن وصل لاخر خرزة ضغط عليها بطل قوية ....

اني ضيكت شوف عيوني وحطيت اديه على حلكي وزفرت النفس
واردفت بصصووت يرجف حيل وخايف ..

ـ شنو طلع وياك علي الباقر !؟؟

رفع عينه وطبك السبحه باثنين اديه ورجع ضماها بالجيب مال دشداشته
وسولف وياي بارتيااح تامم
واردف الي ...

ـ طلعت مو زين يعني راح يصير شي لازم نهيئ انفسنا ونكول الله يجيرنا من الاعظم ...

بقيت صافنه عليه واني افكر وعقلي صاار يسوي فلاش باك للأحداث الي صارت ويانه بس بهاي الاشهر الاخيره شني التغير بحياتنا وهيج صارت توكع على راسنه مصيبه ورة مصيبه
الدمعه انرسمت ابعيني وصرت اشهك بالكلام وكلبي احس الجمر اشتعل بي ..
وبالف ياعلي طلع صووتي
واردفت وي علي الباقر ....

ـ شنهيئ من انفسسنا دورة سنه مال مؤمل وتحرير وابوي لهسه مطالعه والجرح بالكلب يحرك وهاي ملحكنا نرتااح من مصيبه الا وتنزل علينه الثانيه ....
هيه شضللت بالنفسس حتى نهيئها شضللت متكليي !!!؟؟

رفع عينه ووياها انرفع اصبع ايده مشاها على جفن عيني لجوة
واردف ....

ـ امسحي ادموعج عييب على شيخة العلويات تضعف هيجي وهي اخوتها ترس ميدان كلنا هنا ايد وحدة وراح نصبر ونتحمل كلشي يصير وما نكول شي بسس نصبر ..
و لازم نتذكرر دووم ...
الله ما يبتلي عبد الا من حبه
وهم ما يبتلي احد الا ليختبر صبرره وطاقه تحمله رحمة الله رحيم اتخيلي منطينه على البلاء اجر وعلى الصبر اجر وعلى المرض اجر ف خليي يختبرنا براحته مايأذي عبد خلقه وتعب عليه لاتخافين الله عز وجل يكول
""يااعبدي اعاملك وكاني لا املك غيرك ""
وبعدين مو بس نحن معرضين للختبار
انبياء ومعصومين الله ابتلاهم واختبرهم
ف ما بالج نحن البشر الخطائين المذنبين
اصلن ارتاح اني من يصير وياي شي واصبر عليه لان اكول عندي ذنوب خلي تنغفر الي بهذا الصبر مالتي شفتتييي شلوون ... ف لا تخافين ولا تفكرين نتوجع يومين وبعدين نصبر ونكول ياعلي ..

ـ يعني انت مرتاح لهاي الدرجة !!؟

ـ جا شترديني اسووي رحمة ترديني اعاتب رب العالمين واكله ليش تسوي هيج بينه ؟؟

ـ لااا اكيد لاا

ـ جا شنو ؟

ـ تعبببتت ...

ـ لااا بعد وقت لهااي الكلمة بالبدايه احناا تدرين شيخه

ـ شنو

ـ خايف اني من شي واحد بس وجاي افكر اذا صار شلون اني واخواني نتحمل ..

ـ من شنو خايف ؟

ـ لا اختبار الله يوكع بوحده بيجن انتن العلويات ..

ـ لا ان شاء الله خير

ـ كافي لتفكرين بشي الييومم باقي شكد ترحين لصالون ؟

ـ مسويه حجز كامل ب٤ اروح

ـ الله يتمم على خير ..

ـ امييين .. وان شاء الله يوم الالكم كلكم

ـ هههههه امين .....

تركت علي الباقر ودخلت جوة وهوة طلع لجماعته ....
ارتاحيت لكلامه نوعا مااا ماعرف حسيت اكو مصيبه بس مدام موجودين ناس مثل اخواني راح نكدر نتخطاها ان شاء الله..

"" غدير الله ""

وين ماجنت اجهز روحي
حتى اروح لهلي واحضر حفلة رحمة الزهراء كعد انمار كدامي صار يباوعلي غلست عنه ..

كملت تغير ملابسي وكعدت على الكرسي كدام المراية احط مكياجي ..

كام ووكف وراي وبايديه اخذ بشعري واخذ المشط وصار يمشط الي
واني ممرتاحه لوضعه لان مجان طبيعي ابد ...
واردفت بكلمات حتى اطمنه لان جنت مفكرة خايف عليه هوة من الحفلة ...

ـ انماار حبيبي لا تخااف ترى ماكو شي يخووف م راح اتعب روحي صدكك ..

ـ لا مخاييف ادري بيج حريصه على نفسج اكثر مني ..

ـ جا شبيك بعد ياعيني

ـ مابيه شي شبية ؟؟

ـ انمار من الصبح وانت كالب خلقتك واصلن هاي الايام انت كلش مو تمام وضعك بيهن تتصفن هوواي وتضوج بسرعه وصاير تصيح عليه هم شنو يروحي شبيك سولفلي ..؟

ـ غديررةة

ـ عيووني

ـ مو جنتي تردينه نسافر ؟؟

ـ ايي جنت

ـ خلينا هسه نساافر كاافي

ـ شنو الكافي انمار ؟

ـ خلينا نسافر ونعيش برة
منها احنا نرتاح ومنها نامن جنسيه اميريكيا لطفلنا ومستقبل هم
وبعدين الخارج وي وضعج الصحي هاذا راح يهتمون بيج اكثر من هنا بالعراق راح يراعونج بالمستشفى .. ويبقون وياج لين الولاده يعني اذا اهنا احنا خايفين لا اخسرج او اخسر ابني
بالخارج اني ضامنج وضامن الطفل لان الطب برة متطوور حيل ..
وصدكيينيي كلشي راح يصير تمام شغلي هناك مامن والسكن هيج اني عندي بيت هناك نروح ونسكن بي ونكمل الباقي من ايامنا ....

لزمت ايده وايدي الثانيه حطيتها على صدرة وصرت احس بنبضات كلبة شلون جاي تدك دمام مو دكه عاديه ...

اردفت وياه ...

ـ على كيفك انت يروحي اتنفسس اتنفس ..

ـ شراايج غديرتي ؟؟؟

ـ رئي بششنو ؟

ـ شبيج ضلي ساعه احجي !!

ـ باع الحجيته انت هسه اني م راح اسمع منه ولا كلمه لان بالي يم شيخه خليني اروح هسه وصلني لهلي ومن ارجع نسولف ..

ـ تمام بس ما اسمع منج بس القبول

ـ وعد اوافق على كل حرف يطلع منك بس مشينه هسه حيل اتاخرت الساعه صارت ب٤ ...

ـ تمام البسي حجابج وعبايتج وانزلي اني سابقج لجوة ..

ـ ١٠ دقايق متاخر عليك ..

ـ على راحتج ..

اجاهلت كلام انمار ورجعت اباوع للمرايه لبست الربطه مالتي وحطيت العبايه على راسي وسحبت تلفوني وجنطتي ونزلت لكيت انماار صاعد بسيارة ومنتضرني صعدت وياه وحرك السيارة وعلى طول الطريق هو جان يهز برجله وما لفظ بشي طلعت قصيدة لباسم الكربلائي مولد يعني فرايحي بالسيارة ..

ولمن وكف السيارة طفاه وباوعت لكيت روحي كدام باب اهلي ..

نزلت وقبل لا اسد الباب

اردف انمار ...

ـ بالج على نفسج على نفسج واول متردين ترجعين اتصلي بيه حت اجيج
وارجع واكلج بالج ثم بالج على نفسج

ـ لا توصيني يعمري انت الي انتبه لنفسك لان خايفه عليك اني من وضعك هاذا ف انت انتبهلي على نفسك ...

ـ ان شاء الله لاتفكرين بيه ..

ـ راح اشتاق لعيونك يلمكحل ..

ـ احبج غديراتي ...

ـ استودعتك الله

ـ حافضج ربييي ...

سديت الباب ودخلت لبيت اهلي ولكيتهم
مسوين كوشه العقد بالهول ونص البيت بصالون وي رحمة ..
صعدت لغرفتي حت انزع حجابي وعبايتي واحط غراضي واخذ راحتي دخلت لكيت طيبات كاعده تلعب بتلفونها
رحت وضربتها على راسها بس على الخفه
ضربة شقة يعني ...

ـ اخخخ

ـ تلعبين بتلفونج كوومي جهززي روحج

ـ غييمةة هلاا يرووحي

ـ هههه هلا بيج على كيفج بطنيي

ـ زين اجيتي تعااي اريدنج ..

ـ كومي جهزي روحج وغيري ملابسج وحطي ميكاج متلحكين بعد راح توصل رحمة من الصالون ...

ـ ولج اريد اخلص من هذا حت اكوم مرتاحه ..

ـ شنو تخلصين شنو ؟

ـ جاي اسوي حساب انستكرام جديد

ـ ايي

ـ ومدري شبي البرنامج جععص ويايي مجااي يصير ضلي ساعه ادفر بي مااكو

ـ تعالي اسووي بتلفوني وافتحي بتلفونج ..

ـ ايي متشوفي كتلج اريدنج ادري بيج خبرة بهاذ السوالف

ـ عندج ايميل ؟

ـ ايي بالكوكل ..

ـ الرمز مالته حافضته ؟؟

ـ ايي اييي

ـ خوش هسه اسويلج وتدلل عليه العلويه

ـ بعد رووحييي اخيتيي الكفوو ...

فتحت تلفوني وسويت الحساب جديد لطيبة على الانستكرام
ولمن اكتمل كلشي صار لازم اضيف اليوزر حت يكمل الحساب ويبقئ بس الاسم والصورة وهذني خفيفاتت ...

ـ هاا صاار لو هم جعص وياج ؟

ـ لا يروحي هااي كملت كلشي بس يريد يوزر شنو اكتب يوزرج ؟

ـ اكتبي مال حسابي القديم بس ضيفي حرف زيادة عليه وشوفي يقبل بي لو لا ..

ـ شكتب يعني ؟؟

ـ اءءءء حطيي "" ti3tii5 ""

ـ تمام

ـ هاا قبلووه ؟

ـ ايي انقبل هسه نحفض يوزرج شنو اكتب الاسم ؟

ـ ممممم اكتبي طيبات السيد ...

ـ طيبات السيد صصاار

ـ هاا بشرري ؟؟

ـ هايي كمل باقي عليج بس انت تحطي صورة وتحطي بايو وتضيفين الناس وتنشرين بكيفج بعد .

اسمج "" طيبات السيد ""
يوزرج "" ti3tii5 ""

ـ سويلياه خااص

ـ تمام

ـ وهاا دزي متابعه لحسابج

ـ اكييد بدوون متكليلي راح اتابع نفسي هههه

ـ ههههه انطيني ارتبه ...

ـ سويته خاص طيباتي احسن الج لاتضيفين بس التعرفيهم ..

ـ علمود هيج اني سويته خاص شكو واحد يدزل طلب اوافق عليه ..

ـ قصدج ما توافقين ..

ـ لا اوافق ههههه

ـ جا شكو مسويته خااص ؟؟

ـ بس علمود شخص واحد ميشوف حسابي تخيلي

ـ هناااا الحجي

ـ اييي علمود هيج سويت جديد

ـ يلا طيبات يلا يروحي كملي ترتيب الحساب وكوومي رتبي روحج

ـ تمامم عمرراتييي ... ...

"" انمار ""

بعد ما وصلت غدير لهلها طلعت اخذت اخوي بندر ورحت لابوي قصطير ..
ولمن دخلنا وكعدنا وياه جان يردد كلمه وحده لحد ما صحت بيه ....

قصطير :: مابقى شي ما بقى شي ايي هوة مابقى شي تهوون تهوون هااي الايام رااح تهوون ما ضل شي خلصصت ..

انمار :: شنو الخلص وشنو الماضل شي

ـ باقيي بس اربع اشهوور اربعع اشهوور بسس وترجعلي حقي من ال عبد الحسن ..

ـ شتريد تسووي هسه !؟؟

ـ عدهم عرس موو ؟

ـ اليوم عقد رحمة الزهراء بنت الحسن المجتبى وبعد اسبوع عرسها وعرس علي الهادي ابن عبد الحسن ..

ـ علي الهادي راح يعرس على منو ؟

ـ هوة متزوج بس يريد يسوي زفه لان بس عاقد عقد على بنت عمته ام البنين ..

ـ هههه ابن عبد الحسن راح يتزوج بنت فاطمة الزهراء

ـ ايي بوية بت عمته تصير هيه

ـ والله حلووو هههههه

ـ ايي بوية ودام ما بقى النا بس اربع شهور شتريد تسوي ؟

ـ راح ادمررة والله الا ادمرة مو هووة الي شاف روحه عليه وحسب روحه مخلوق من طيين ذهب واني نخلقت من طين عادي خلييي هسه يفيده هذا التعالي لعبد الحسن ...

ـ بوية

ـ رااح تشووفون شلون راح ادمر عبد الحسن واطلع منها اني وياكم مثل الشعره من العجين ..

ـ يعني ؟؟!

ـ يعني بعد زواج هذولي تمشوون بموضوع اريج اريده ينتهييي باقي ثلاث شغلات ونخلص سالفه اريج ووياها شغلتين بعد ..

بندر :: اذا على سالفه بنت عبد الحسن خليها عليه اني اسويلك كلشي

ـ اني مخليها عليك لان مبين اخووك انمار تغابى ومكدر يوصل لاريج ..

انمار :: هسه اني المتزوج اختها ومكدرت اوصل الها تريد انت توصللها ؟؟

ـ يووصل هيه عبااره عن خطووة وبندر راح يمشي عليها لاتسوون السالفه كارثة

انمار :: براحتكم مالي غرض بيكم ..

ـ بس احذركم بالكمم هااا علمي يوصلكم ويتعداكم اختكم لينا تعرف شي بلي راح نسوي باريج او تعرف نحن ورة الي راح يصير ..

بندر :: ليش لينا مو وياكم بهاي اللعبه ؟

انمار :: وليش متريد ليانه تعرف ؟؟

ـ اولا اختكم بشهرها الثامن وبلكوة شايله روحها
ثانيا ملاحض عليها سم علي السجاد هوواي ماثر عليها وبعد مابيه اثق بيها ..
وثالثا والاهم اريد رد فعلها على الراح يصير تكوون واقعيه نفس رد فعلهم ماريدها تكون مختلفه عنهم ...

بندر:: هاي هيه اعتبره صاار ..... هااا انماار ليناا مراح تعررف شي موو ؟؟

انمار :: هااا اي ايي اكييد م راح تعرف شي الي تردونه ..

ـ وضعك ممريحني انمار شمالك ؟ بيك شي تهجس بشي ؟

ـ لا ما بيه شي بس قله نوم احس جسمي خرج عن السيطرة اني هسه صاعد انام ..

ـ تنام عندي ؟؟

ـ ايي علما تتصل عليه غديرة واريد اريح جسمي شوي

ـ عجل نام بغرفتي بس هاي نضيفه

ـ تمامم ....

صعدت لغرفه ابوي ومددت روحي وجنت اسمع بطكطه صوت اعضامي هاي الفتره حيل جاي اضغط على روحي بالخصوص من سمعت غدير حامل صار الهم بهمين ..
ماكدر اعووف غديرة بعد الي سوته الي هذا كله واني بالمقابل شسوييت بيه وباهلها ؟؟؟

غمضت عيوني على امل اناام كم ساعه وارتاح من الدنيا كلها
قبل لا تتصل غديرة بيه واروح الها

"" اصفاد الحق ""

بساعه جنت كاعد بالغرفه العب بالايباد مالتي واكلب بالسجل النطانياه علي الباقر واشوف الشغل الي سلمه الي
جنت اقرة الاسم وابحث عنه على امل الكي حساباتهم واشوفهم
دخلت عليه امي وحاطه العبايه على راسهة رفعت عيني عليها
واردفت وياها ...

ـ جا شني انتي عبايتج متوكع من راسج من شفتج وشفتيني مكبعه ؟

ـ انجب ولك مو ضحكت وياك اخذتك الهيشه لاتنسى امك اني ..

ـ صددك جنت اضنك خالتي ؟

ـ اني لو شامرتك على عبد الحسن يربيك مو احسن الي على الاقل انحسد عندي زلمه كلف مثل علي السجاد مثل علي الباقر ..

ـ وشنيي عيينيي تربية ساميي متعجبج ؟

ـ هااي كدامي تربية سامي ياخبر الاكلته منها ؟

ـ هااا شوشو هسه صرتي مماكله مني خبز صدك لو كالو سوي خير وذب بشط ...

ـ ما تثكل شوشو شنو تحجي وي اختك الصغيره ؟

ـ ززين هسه انت شعددج صااعده لهنااا ؟

ـ سمعت حركة بغرفتك اجيت اشوف عبالي جريذي لان ممتعوده عليك مستجن عنا كل ما اشوفك شايل التفكة مالتك ورايح تهيت بالاراضي ...

ـ اييي

ـ ايي واجيت اشووف شنو هنا وطلعلي صددك اكوو جريذي بس جريذي جبير ..

ـ هسه اتنرمتي عليه ارتاحيتي اطلعي يلا خليني اكمل شغلي ..

ـ اشو ولك اني متحترمني ؟

ـ اني اعامل بالمثل احترميني احترمج

ـ تنجب وتاكل تبن امك انه لو احط الشحاطة بحلكك تنجب وتسكت اصلن تطلعها من حلكك وتحطها على راسك

ـ يمةةة الشغل لراسي بروح ابووج اطلعي عني دوختيني واخربط ترى هسه وهنا الغلطة بهاذا الشغل مثل الكفره ..

ـ محتاج شي راح اطلع

ـ ضلج ساعه تغلطين عليه هسه صار يهمج امري وتساليني شمحتاج ؟

امي هنا اتقربت مني لعبت بشعري ونزلت باستني بخدي وهمست باذاني ....

ـ يا دادة اروحلك فدوة اني غير انت ثمر عمري جا ولك اني شحصلت من هاي الدنيا كلها هااا والله ما حصلت منها شي غيرك انت الله رزقني بيك واحبنك واموتن عليك غير اوليدي وحيدي اعاين لله واعينلك بس انت هاها تجبرني اتعامل وياك هيجي اسلوبك ينرفز يمه حيلل

ـ اي هاي هيه

ـ يابعد رويحتي زعلان مني ؟

ـ لا م زعلان

ـ العباس عليك يمه زعلت مني ؟
ولك همه مو يكولون من حبك لاشاك وهاي اني جاي الاشيك يا يا يمة شمالك وياي ؟

ـ هاي هيه يمةة مو زعلان روحي لطلعتج لاتتاخرين هيه اهم مني ..

ـ يااادادة هااي صدك سويته واخذت بخاطرك من اميمتك ؟ جا ولك صايرة عندك مشاعر وتحس وتزعل ؟

ـ حيوان كدامج ماحس بشي ؟

ـ لا يمة حشه الحيوان منك ..

ـ يماااااااه اطللعييي عنييي

ـ ههههههههه اووي يمةة هاي شبيك جاي اباغتك ..

ـ وين تردين ؟

ـ متعرف اليوم عقد رحمة الزهراء اتصلت العلويه وعزمتني ورايحه الهم ...

ـ يعني راح تتجمعن كلجن ؟

ـ منو تقصد بكلنا ؟

ـ يعني بنات عمي الحسن المجتبى وصفاء الحسن وعبد الحسن ..

ـ هاا اييي يمة كلنا هيه حفله بعد

ـ بزودج يمه انتبهيلي على وهج الطف ..

ـ منو هاي

ـ بنت عمي صفاء الحسن

ـ شبيك ولك متعاطي شي ؟

ـ ليش ؟؟

ـ عمك صفاء الحسن منيلة بنت مخلف كلها زلم ؟

ـ لصراحه اني هم حالي حالج تصركعت من شفتها كالولي بنت صفاء الحسن انتي شوفيها وعرفي قصتها ...

ـ وين شفتها انت ؟

ـ رحت للبشير فتحتلي الباب من دخلت سالت حامد المتقين وكالي هاي وهج الطف بنت خالي صفاء الحسن

ـ دوهنتني ولك ..

ـ روحييي انتي التقي بيها واسالي العلويه ..

ـ خووش دير بالك على روحك ولا تكرب للمطبخ وتحرك البيت وعود اذا كرصك الجوع يا تطلب دلفري يا تطلع تاكل برة

ـ لا توصيني خبل اكوم اطبخ لو اعرف انكتل جووع ولا اشغل الطباخ .

ـ اي هم زين واذا طلعت قفل الباب زين وتاكد مطفي كلشي

ـ وانتي

ـ اني ماخذه نسخه وياي وهاي النسخه الك

ـ خووش يمة

ـ يالله ثيمالله

ـ الله وياج ....

طلعت امي وردت باب وراهة ورجعت لشغلي واني
بعدها طخ براسي ابحث عن وهج الطف بعد متذكرت شلون فتحتلي الباب وشلون اجت عيني بعينها البرائه الي بوجهة ياعلييي استررنا ما الوم اخووانها لون جانو ضاميها عن النااس ..

بحثت بس ما لكيت لها حساب ضجت شوية بس كلت عاادي اروح الهم واشوفهه باي وقت يعجبني

امي تكلي من شوكت عندك مشاعر واهي متعرف المشاعر ماحسيت بوجودهن الا بنضرة عيونها ..

جنت افكر الحب سهل وسهل تحب وتنحب بس طلع كلش صعب ..

صعب لمن تحب وتشوف اخوك الي كل عمره يسندك ويوكف بظهرك ..
بهاذا القرار قرار الحب واكف ضدك

بختصار لان هوة يحب البنيه الكلبي دك الها ......

¢¢¢¢¢¢¢¢¢¢¢¢¢¢¢¢¢¢¢¢¢¢

- وهَلْ تَظُنّ أنَ البُعْدَ يَقْتُلُنِي؟
وأنَ قَلْبِيَ لا يَقْواكِ مُنَْفرِداً ؟
أنا التّلاشِي واللا شيْءَ فانْتَبِه
انا الوُجوُدُ وكُلَُ النَاسِ لا أحَدَ

يـــتـــبـــع .......

6153 كلمة