احفاد السيد : الثار ( بأجزائها الإثنين ) الفصل السادس وأربعون 46 - بقلم ​رُقَيَّةُ الْأَكْبَرُ

الكـــاتبــة ⊂ رُقــيّــة الأكـــبــر ⊃
بقــلمهــا روايـــة ↲ أحــفــاد السيد : الـثـأر ↳

لا تنسون التصويت قبل القراءة و متابعـة لحسابي oo_ll13
اذا جنت ممتابعـة
واترك اثرك في التعليق ابين الفقرات

__ ثقل ميزانــك بذكــر الله

_ سبحان الله
_ الحــمد لله
_ لا اله الا الله
_ الله وأكـــبر
_ لا حول ولا قوة الا باالله
_ سُبحان الله العضيم
_ سُبحان الله وبحمدة
_ أستغفر الله واتوب اليه
_ اللهم صل على محمد وال محمد

━━━━━━━━━━━━━━━━━━━━━

__ ‏بَعضُ العُيُونِ إذا نَاظَرتَهَا سَلَبتْ
‏مِنكَ الفُؤَادَ فَكَيفَ الوَجهُ إن بَانا

━━━━━━━━━━━━━━━━━━━━━

↲ مَــشهِــد مِن بقـــاع الأرض ↳

"" أخــيــل ""

لمـن شفـت منظر منسـة اتأذيـت ما متعود عليها هيج تضل ساكتـة ولا متعود اشوفها محبوسة لو مضروبـة صالــنا خمس سنين تقريباً هنا

كل يـوم جنت اشوف منسة اقوة من القبلـة بالنضرات والتصرفات وحتـى اللسان محد گـدر عليها بس داسِم !!

ضليـت واكف يـم الشباك على امل تكوم ولو لثانية حتى افوت الها الماي بس مجانت تستجيب وياي
من قـوة الضرب جانت تكـعد ويغمـى عليها بعد ثوانـي بس من كعدتها

مكدرت اتحمل الموقف الي صار تركتها وهي مغمـى عليها وتوجهت لبيت داسِم فتحت الباب ودخلت عليـة ولكيتـة كاعد يشتغـل

هـاي اكو نـاس بدون ضميـر من المحافضـات جانـو يجون الـى داسِم ويطلبون يسويلهـم سحر لان هو جان خبير بيهم وانواع السحر يسوي !!

لهذا لكـيتـة كاعد وعندة شغل بيدة جاي يسوي كعدت كدامـة على صفحـة واردفت وياه :

أخــيل :: داسِم انطينـي مفاتيح البيت منسة راح تموت لازم نخلـي حكيــمة تفوت تشوفها

مسمعت ولا جواب جاي من داسِم اغتاضيت حيل جان مثل الـي مو سامعـنـي

والـي عصبنـي اكثر كلام النااس الي هناا جانـو مخلين داسِم هو الملاك المنقذ الهم لذالك جانـو يشوفون سيئاتـة حسنات

ولـمن شافوه هيج مسوي بِ أخـتـة الي من لحمة ودمـة صارو يشجعونـة لان مجاي يفضل اهلـة عليهم وجاي يتعامل مع الكل سواسـية الغلط لازم يتحمل المسؤلية

وصارو يحجون على منسة و يغلطون عليـها
ورجعت وي داسِم وكررت كلامي

أخــيـل :: داسِــم جااي تسمعنــي انطيـنـي المفاتيح أبوي شبيك ؟؟

ولا رفـع عيـنــة ولا اهتزت ايدة من الجان يسوي ضليت احجي وياه

أخــيـل :: ترى الشمرتها هناك اختــك لحمـك ودمـك يا ابن الناس افهم ماعندك غيرهن هل أثنين ( ممـاس و منسـة ) لا تخسرهن مو كافيك رحت وقدمت اخوك شاسع ؟؟
مو كافيك سلبت الرحمة من كلب امك وخليتـهَ تصير مثلك بالضبط ولا هتزت من منضر بنتها هيج ولا راحت تشوفها ترى ذنب كل هاي الناس الي انت ساحرهم وجاي تلعب بعقولهم ذنبهم برگــبتـك ليــوم الدين
{ يـوم لا ينفع مالاً و لا بنون }
محد من بينـا راح يتخلد ويعيش الاف السنين و ولا واحد بيـنة يكدر يشرد من الموت وساعتـة
و ولا شخص يكدر يخلص روحـة من عذاب الموت ونزلـة الكبر
والأهـــم ولا شيطان من شياطين الأرض يكدرون يخلصون شخص من منـكــر و نكيــر أو يخلصونـة من ملائــكــة العذاب
داسِم تعرف بيوم القيــامـة باجر هاذا ابليس الي انت جاي تمشي وراه ومخليك محبس بيدة تعرف شراح يصير بيوم الحساب ؟؟
ابليس راح يتحاسب فقطط على حگــم معصيـة أمر الله لما رب العالمين قال لهَ اسجد لأدم وهو ابليس أبى واستكبر
بس على هاي يتحاسب اما انتتت ؟؟؟ شراح يسوي بيك الله ؟ مراح اكلك داسِم حصيحك حيرام لان حيرام اخوي وصاحبــي انا ماعرف عن داسم هذا ولا شييي
حيــرام الله يغفر كل الذنوب ولو كان ثقلها ثقل الأرض و السماوات بسسس الذنب الوحيد الما ينغفر هوو الـشرك وانت مَ شاء الله عليـك انت والشرك باالله روح بروح
الله لا يديم صحبتـكم والله يهديـك ان شاءالله.
اذا انـت سويت بِ منسـة فقط لان شفت عندها قرآن فَ انا منهم انا هـم عندي كلشـي
متكدر تجبرنا ياخي و اسمع هاي السورة

اعوذ بالله من الشيطان الرجيم
بسـم الله الرحمـن الرحـيم
{ قـل يا أيها الكافرون ✺ لا اعبد ما تعبدون ✺ ولا انتم عابدون ما اعبد ✺ ولا انا عابد ما عبدتم ✺ ولا انتـم عابدون ما اعبد ✺ لكـم دينـكم ولي ديــنـي }
صـدق الله العلـي العظيـم

فَ خلـص الكم دينـكم والنـا ديـنّـا خليـنا نعيش بسلام هنا ولا تجبرنا نهچ والله ترى اسويها اخذ منسـة و ساتر و مماس ونهچ ونعوفلـكم الديرة والي بيها
وأنــتَ ابقـى هيج سوي روحك مو سامعنـي بس انا متأكد مليار % أنـك سمعـتـي كلش زين وانطبع كلامي بمخك عدل
الله عز وجل انطى لكل واحد بيـنا عقل يوزن بلدان استخدم عقلك حيررام استخدم عقلك ولو لمدة 6 ثوان أو استخدم على الاقل 5 % منة هم مايصيـر هيج رب العالمين تعبان بحلقـك وتجي انتَ على الحاضر توكف عقلك كللش متستعمل منـة مو ذرة هاذا أجرام فوك الكفر تعبت من الحچي وياك عود فـكـر بكل حرف حجيتة الك واذا قررت ان انا مذنب وغلطت نفس منسـة فَ اخذ حكمـك عليـة وتعال وحاسبنـي

عــن أذنــك يا صاحبــي ლ

تــركت حيــرام ( داسِــم ) وطلعــت من البيـت
وانـي جاي امشي صادفنـي أخـوي ساتـر استوقفنـي بلزمـة ايدي واردف وياي :

ساتـر :: ويــن جنت ؟

أخـيـل :: بالبيت عند داسِم ليش ؟

_ بس لا جفصت بالحجي وياه

_ وشنو يعني ميصير الواحد يحجي الي بكلبة هناا بهاي الديرة ؟؟

سحبنـي من ايدي ححيل وطبكنـي نصي على صدرة وصار يهمس بأذنـي

ساتــر :: كصصرر حسسك أخـيـل مالنا خلك انت اكثر واحد تعرف القانون هنا لا تروح تورط روحك وي هاذا مسودن ومابراسة عقل والشيطان يحرگـة انت فاهمنـي أخيـل انا اخوك واخاف عليك اكثر من هاي البشريـة كلها خليـك مخدب الله يرضى عليك

بعدت نفـسي عنة واردفت وياه بنتر :

أخــيـل :: اذا انت خايف علية ف خاف على منسة لان لو صار بيها شـي والله احرك الديرة والي بيها وما يهمني لا جبير ولا صغير علية وعلى اعدائي
انا بدون ذيج البنت جسد بدون روح فـَ سوي التكدر علية خاطر متخلي اخوك بدون روحة لان بذاك الوقت بسس ماعندي شي اخاف اخسرة

تــركت ساتـر واتوجهت للبيت كعدت يم الشباك وصرت احجي وي منسة الجانت على حطة ايدي فاقدة وعيهاا والدم ترس الگــاع

صرت اضرب على حديد الشباك وأصيح عليها
بكـل حيلي

أخيــل :: منسـة ولج أبوي منسـة شديلي حلج شوي ابوي انت شوي صيري قويـة لا تروحين وتعوفين اخيل لوحدة ؟؟ شسوي بدونج انا كوومي يلا ومراح اتعارك وياج بعد يلا منسة. وين السانج الطويل علية كوومييي

انا هنا سمعت الباب ينفتح انداريت على الباب لكيتة داسِم جاي يفتح بابها فتحة وراح عنة

ركضت الها دفعت مماس و امهم وفتت رركض لجوة شلتها من الگــاع حطيتها على الفراش وصرت اصيح لــَ حكيــمة

لمن دخلت علينة ابتعدت عن منسة وطلعت انتضرهم برة وهي صارت تعالجها ..

رحـت اتمشى للبحيرة لكيت داسِم رابط الفرس مالتة بالجذع الشجرة الجبيرة وكاعد ينطي أگــل وكفت وراه واردفت بسؤال :

أخــيـل :: ما توقعت راح يشتغــل ضميرك ..

جان داسـم ساكـت وميجاوبنــي بأي شكل من الاشكال واكتفـة بس ينطي الأكل للفرس مالتـة
بس انا متركتـة رحت لكدامـة واردفت وياه

أخيــل :: جاي احجي وياك جااوبنيي مو ردت تكتلهاا ليش صحى ضميرك هسسـة ؟؟ لوو هاا حقك خااف ابليس كالك روح طلعها نسسيت انت ما تكسرلـة كلمـة

هنا داسِم رفـع عيـــنـة واردف ويـاي

داسِم :; لو جنت انا شيطان مثل ما انتم تزعمون جا هاا شرد الفرس من بين ايدي ما واكف يمي هيج هادئ أخيـل انا هسة حيرام ما مطلع شخصيـة داسم والفتح الباب لمنسـة هوو حيررام لو تبقى بيد داسم جان كتلكم انتم الاثنين
ف لخاطـر الاخوة البيناتنا اخذ منـسة وروح منا لمن منا لمن تطلـع شخصـية داسِم ما اضمن الك شنو يصيـر ..

ضحكت ححيل وجانت ضحكتي من كل حيلي يحجي من عقلـة لا اله الا الله اردفت وياة :

أخيــل :: لخاطر الأخووة ؟؟؟؟ انتت بعت روحك لشيطاان اخوك نحرتـة ابين ايديك وتكلـي اخووة ؟؟ ليش تعرف الاخوة انت الشيطان يعرف الاخوة ؟

داسِم :: انا حذرتك وبعد بكيفك متريد لا تروح وخلي بعد الشوي الديرة تنترس بدمكم ..

_ انا راح اطلع مو لان خايف منك لااا راح اطلع حتى أسس لمنـسة حياة تلوك الها بعيد عن حياتك هاي .. وعود اذا اجة ببالك تجي وتكلني بعد انت خبرة بسوالف السحر وتسخير الجن خلهم يجيبولك مكاني وعنواني وتعال واكتلني .

_ انتبـه الها وأعتذر الها نيابـة عني لان موضوعي مو بيدي خلها تعذرني ..

تركــني داسم وراح وجانت هاي اخر كلماتـة وياي رجعت للديرة ودخلت لكيت منسـة نايـمة كعدت يم راسها لمن كعدت اجت مماس سلمت عليها وجانت محضرة كل اغراضنا
اخذتهن واخذت بأيد منسـة وطلعنا من الديرة

اتخلــصنـا من هااي الحياة الما منها حيلـة ..

"" داسِـــم ""
رجعت للبيت بعد ما أتأكدت ان أخيل و منسـة خلص طلعو لان مجنت اريد اشوفهم اعرف راح يصير شي وراح أذيهم
اول مدخلت للبيت باوعت للمراية وجانت الدنيا لليل شفت انعكاس ابليس بالمرايــة

بقيـت اباوع عليـة واضحك تركت المرايـة وشمرت نفســي على الفراش ونمت على ظهري

وغمضت عيوني لاروح عن عالم الدنيا الى عالم ما لا نهاية له .....

⇦بَـــــ غ ــــداد ⇨

"" رحـمــة الزهـــراء ""

جنت انضف بالمطبخ وحسيت بدوخـة كلش قويــة وكعت ارتكزت على الكرسي وكعدت لزمت راسي لمن حسيت بيها راحت

كمت حتـى اكمل التنضيف ولمن فتحت الثلاجـة حتـى اسوي العشاء لــزُبيـر على وقت حتي اروح لبيت عمي احضر الحجة ليلة الوحشة

طلعـت اسوي الـة كبسة بس لمن طلعـت اللحم من الفريزر اجتني ريحة السمك الحتطي بالفريز حسيت معدتي انكلبت كلب ومتحملت واستفرغت بسرعـة مجرد شميت الزفرة

غلسسـت عن كل هاي الاعراض باوعت لساعة لكيتها الساعـة 5 ما الحك بعد كمت طبخت وكملت صعدت للغرفـة غيرت ملابسي

وسمعت الباب انفتح عرفت ان زبير اجة طلعـت الربطـة الي راح البسها دخل زُبير والتعب مصبوب عليه

عفت الربطة من ايدي على المراية ورحت حضنتـة واردفت ويــاه :

رحمـة الزهـراء :: كواك الله يبعد حيلي

زبير :: كوة الله حيلج علويتـي

كعد على الجربايـة ينزع قميصـة و يفلت حذائـة انا طلعـت نزلت جبت مااي و معجنـة وشوي ملح ومنشفـة وصعدت لفوت

خليت رجليـن زبير بالمعجنـة و صبيت عليهن ماي بارد و شوي ملح وكعدت اغسل بيهم

لان ادري بي 24ساعـة بالواجب واكف ويركض ويفتر ما يرتاح غسلت رجليـة وكملت اخذت المنشفـة نشفتهم الـة ورجعت للمرايـة اكمل

واردف ويـــاي ::

زُبيـــر :: لعــد وين رايــحة ؟؟

_ لبيت عمي

_ شنو ادري انت مزوجتني لو مزوجة عمج يوم ويوم ترحين لعمج

_ زبير تعرف هلايام عزاء اليوم اخر يوم ليلـة الوحشة وهاي هي تنتهي المجالس بالبيت

_ وهم تبقيـن لصبح اليـوم ؟

_ جا شلون يروحي غير حجـة الوحشة واكو اعمال لازم نسويهن ف نبقـى لصبح

_ أمري لله اذا بس اليوم

_ توصلـني لو اروح بسيارتي

_ سيارتج بيعيها واتونسي بفلوسها

_ ليش بلــة ؟؟

_ لان لو تموتين ما ترحين لوحدج تروح بسيارتها هاي الناقصة

_ وشنو سيارتي شفتها تركص بالملهة لو طالـعة مفرعـة وسمعتها مو زينـة علمود متقبل اروح بيها ؟

_ صايرة تراددين ؟

_ جا تريدني اضل ساكتـة ايي حبيبك حلوو بس لا تاكلة كلـة

_ هااا ولج ؟؟

_ ااييي ولك

_ رحمــة

_ زبيـــر

ضـل صافـن عليـة شيحجـي وياي بعد ابتســم واردف وياي

_ نازل اشغل السيارة البسي بسرعـة وتعاي وراي

_ جايـة

كملت لبس ونزلت وراه على طول ركبت و وصلني زُبـيـر مثل الورد لبيت عمي

نزلت دكيت الباب راح زبير بعد ما فتحت العلويـة الي الباب سلمت عليـها بوستها وحضنتها ودخلنـا لجوة

كعدت بالصالـة واجت كعدت كدامي نزعت عباتي من راسي وذبيتها على متوني واني اباوع للعلويـة

ولاحضت عليها وجهة جان يذب اللوان كأن صاير الها شي بالاول خفت على غدير الله ليكون صاير لها شي بس كلت لا جا سمعنا

ولمن شفتها توترت حيل وهي تتلفت للباب وصارت تفرك باجفوف ايدها

اردفــت وياها :

رحمــة الزهراء :: خـييرج يمــة اكو شي ؟ صاير شي ؟

ما انتضرت اخلص كلامي اردفت بخوف ورهبـة وكالــت :

العلويــة :: شيخــة مااعرف أريجـة وين من الأربعـة العصر طالعـة ولهسة المغرب خلص وراح ياخذنه الليل وهي ما راجعـة صاللها ثلاث ساعات برة

_ عادي يمة مو مشكلة صاللها بس ثلاث ساعات شبيج خايفـة قابل اول مرة تتأخر ؟

_ لا شيخــة هي كالتلي سالفــة ساعة واجي
أريجة وانا اعرفها وانتِ تعرفيها ضابطة نفسها بالدقيقة اذا كالت ساعـة هاي ههي ساعـة انطتنـي موعد ..

رحت وكعدت يمها وحطيت ايدي علي اجفوفها لان جانت ححيل ترجف و متوترة
ورحت اردف وياها بكُل هدوئ

_ صلي على النبي يمة اندعيلها الله يجفيها شر ابن ادم وشر الطريق وترجع وبعدين يمكن طلعتلها شغلة ممحسبتلها مو لازم بكل مرة تضبط مواعيدنا بالملي ..
زين أهي راحت للمعمل موو ؟؟

_ ايييي راحتلة طركاعة المعمل طركااعة مردتها تروح واللت كتلها لا ترحين لوحدج كتلهااا اخذي واحد من اخوانج نفسسس الشعور نفسة شيخـة نفس شعوري يوم حادث غدير الله هسة اجاني وي طلعـة اريج الله

_ الله يستر هسة اتصل عليها وتسمعين صوتها ويرتاح كلبــج

_ لا تحاولين حاولت قبلج اوصل الها تلفونها مغلق

_ مغلق !!!!!

انــا هنا مسمعت كلام العلوية واخذت اتصلت على أريج الله وصدك طلعلي مغلق

مو من طبع اريج الله هيج تخليـنة بقلق عليها
ولا من طبعها تخلف بالموعد التنطي
ولا من طبعها تلفونها يكون مغلق وهي طالعـة لان تعرف بأي لحضة يتصلون اهلها عليها

شنو جاي يصـير ؟؟ ليش جاي احس جاي يصير ويانـة شي مثل الحلم نحن الان عايشين وسط دائرة وجاي احس هاي الدائرة كل فترة تطيح واحد بينة !!!

أجــة براسـي فجأة حلـم جميلــة الي سولفتـة الي
الرؤيـــة الي شافتها انقبض كلبـي حيل

جنت احاول اهدء بالعلويـة هسة انا محتاجة الي يهديني وين راحت اختتي ؟؟؟؟

طفيت التلفون وكمت علي حيلي حطيت العباية على راسي وأردفــت وي العلويــة

_ يمــة السـادة وين ؟؟

_ رجعو بعد الظهر تعبانين من التشابيه وكلهم نايمين فوك حتـى الميرزايين

عفـت العلويـة واتوجهت للـدرج رفعت عباتي من جوة ولزمتها بأيـدي

صعدت وانا اصعد على الدرج نزل علي الرضا و اتلكاني انصدمت بي لان جنت اصعد بسرعة وانا مدنـكة

اردف وياي وهو مستوقفنـي :

علـي الرضـا :: بهدااي الدرج مو مال صعدة بأخبال لا تزلك رجلج ومتلحكين كبل سفرة لله

انا هنــا حطيـت ايدي على كتفــة واردفت وياه :

_ رضــا عندك رخــصة سيارة ؟؟

_ اي عندي ليش ؟

_ بسرعــة رووحح اصعد جيب سويج سيارة أي سيد وتعال اخذنـي ..

_ صار يا شيخـة العلـويـات

راح ليصــعد صحت وراه بصوت واضــح :

_ علي الرضا لا تتاخر منتضــرتـك برة بسرعة تعال الييي

نزلت من الدرج ولزمتنـي العلويـة واردفـت وياي وشوغات أدموعها وحرارتهن جون كلبـي

العلويـة ;: بنتــي أريج الله بيها شي مووو ؟

مسحت ادموعها بيدي وقبلتها بجبتها واردفت وياها بكل هدوء وحاولت اسوي صوتي دافي خاطر احسسها بالامان وأن ماكو شي

_ لا يمــة لا سامـح الله رايحين نجيبها من المعمل ونجي هسة تلكيها غاركة بالخياطة وناسيـة روحها ولا تنسين المعمل مغلق ميدخلة ضوء ف متعرف الدنيا صارت بدايـة لليل

_ تمام راح انتضرج هنا شيخـة تفوتين علية وي اريج الله قبل لا يجي ابوها ويهججنا من البيت بنص الليل وعلي

_ لا تخافين نص ساعة طريق ونحن يمج كلنا وداعتج ومراح ارجع الا واهي وياي ويبرد كلبج بشوفتها ..

طلعـت لطارمـة وطلع وراي علي الرضا جايب مفاتيح سيارة الميرزا المرتضى الامير

رحنا للكراج تبــع البيت طلعها وركبنــا بيها
ورحنا ونحن بالطريق سألنــي

علـي الرضا :: ويــن تردين اخذج هسة ؟

_ روح للمعمل ..

_ يا معمل هاذا ؟

_ مال اريج الله

باوعلـي بطرف عيــنة واردف ويـاي :

علي الرضـا :: شنسوي بالمعمل بهاذا الوقـت ؟؟

_ نجيب العلــويــة أريج الله يعني شنسوي نروح لهناك ؟؟

_ وشنيي ارريج لهسة هنااك الدنيا راح تصير ليل بعمرها ممسويتها

_ لا ترفع صوتك ما جاي تحجي وي واحد من عمرك ومو وقت هاذا الكلام يمكن طلعلها شغل وبقت مكفرت ترى بشيء انا مو حتـى نوم جنت انام بالمستشفى

_ أريج بعمرها ما باقيــة لهيج وقت خارج البيت شيخة الســاعة سبعة وربــع

_ كل غاايب عذرة وياة يتاج راسي انتَ
وهسة سيد امشي وانت ساكت خليــنا نوصل بسرعة

هز براسـة وعرفتـة خطيــة ححيل عصب اعرف شعورة أريـج الله بِ عمرها ممسوية هيج

شنو التغيـر هسة ؟؟

قريــت معاني الخوف النرسمت بوجه علي الرضا وهي مخلوطـة وي مشاعر الغضب

اذا صغيرهم هيج صار وجهة جا شلون بِ علي السجاد لو علي الباقر ؟؟

يارب يطلـع ماكو شي واكلها هناك

جان عندي احساس 30% يكول راح تلكيها
واحساس 70% يكــول ما راح تلكيها ولا تشوفيها بعد

وصلــنا المعمـل اردفـت وي علي الرضـا وانا نازلـة

رحمـة الزهراء :: خليــك هنا رايحـة افوت ونجيـك بسرعـة ما اتاخـر

علي الرضا :: خوش كليلها تعوف كلشي من ايدها وتجي

_ شي اكيدد اسحبها سحب يلا ححبيبـي انتضـرنـي هنانــة ツ

نزلـت وسديت باب السيـارة وفتحت باب المعمل و دخلت جوة

ولان جنت دائــم اتردد وي أريج الله و وي غدير الله بوقت فراغي واشتغل وياهـم نص الي بالمعمل يعرفوني حق المعرفــة

اول ما شافتنــي العاملـة الأساسيـة اجتنـي على طول واردفت وياي :

_ وانا اكول شهل النور الصار بالمكان طلعت العلويـة رحمة الزهراء موجودة ؟

_ حبيبــة روحي هذا من نورج

_ شنو حبيبتي جايـة بهل وقت صاير شي اكو شي ؟

_ ءءءء أريـج الله وين الكيها شنو كاعدة بالغرفـة فوك ؟

_ العلويـة اريج الله ؟؟؟

_ ايي شبيج نصدمتـي ؟

_ ههه لا منصدمــت بس ليش تسألين عن اريج الله ؟

_ شنو. ليش اسال عليها هي اجت لهنا واختفت

_ اختفت ؟ بس ست رحمـة الست اريج لا اجت لهنا ولا واحد من الناس الي بالمعمل شافها اليوم

_ شلون هيج ؟ لااا مستحيل هي اجت لهنا من الساعة الاربعـة طالعة

_ بِ شنو تردين احلفلج خاطر تصدكين

_ حبيبتـي يمكن انت متوهمة جنت ملتهية وما شفتيها وهي تجي اصعدي اتأكدي منها تلكيها فوك انا متأكدة

_ اصعدي شوفيها واذا لكيتها تعاي واعتبـي علية الست أريج ماكو داعِ لجيتها لان انا لازمـة الشغل بمكانها واذا تريد تجي فَ راح تجي من نكمل الطلبيـة وهاي نضر عينــج جاي نشتغل فوك وقتنا خاطر نكدر نخلص طلبيـة الرايات

_ بس أهي كالـت راح تجي لهنا وطلعت ولهسـة ممبينـة

_ تعاي وياي

اخذتنـي من ايدي وصعدنا فوك لغرفــة المراقبــة مال الشارع وصارت اشوف التسجيلات من الساعة بِ 3 على حكـم هي طلعت بالــ 4

ولكــيت كلام الموضفـة صحيح أريج الله ما واصلـة ابد وحتـى كامرة الشارع البعيدة ما ملتقـطة ولا صورة الها

واذا هاذا دل على شي فَ راح يدل على ان
اريج الله اصلاً ما لحگـت توصل للمعمــل

عفـت العاملـة بعد ما وصيتها تنتبه علـى المعمل والشغــل وطلعـت واني الحيرة ماخذتني گلــي

صعدت بالسيارة يم علي الرضا وهو عيونـة جانت تدور على اختـة واردف وياي

علي الرضا :: جا أريج وين ليش ما اجت وياج ؟؟

طرتنــي الصفنـة كسرتها وباوعت لعلي الرضا وبوجـه جاف اردفت وياه :

_ ما اجت وياي لان من الاساس اريج مموجودة اهنا ..

علي الرضا :: اهاا خافنها رجعت ونحن بالطريقـة جا نلكاها واصلـة قبلنا

_ لااا هي اصلا ما جايــة للمعمل

_ شلون يعــني مجايــة للمعمل ؟؟؟

_ هاي بعد ماادري حالي من حالك فتت لجوة وعرفت وشفت الكامرات اريج الله اصلا ما واصلـة ولا كامرة ماخذة الها صورة وحدة

_ جاا وين راحتت ؟ ما اتصلتو عليها

_ مغلق تلفونها

_ حلوووو كمللـــت استلللمم ياا الله

_ وين رايــح ؟

_ خليـنا نرجع للبيت ونكعد الزلم تتطلع تشوفها وين راحتت تردين نضل هيج !؟

_ بس اني كلت للعلوية ما اجي الا واهي وياي

_ شيخــة لا تخبلييينيي لاتخليني هسة اتسودن خلي الله هادي علية

_ خللص امشي وانت ساكت

قررت اسكت وما اناقشـة لان شفتة شلون عصب
لمن وصلنا البيت ودخلنا اتلكتنـى العلويـة وضنها أريج الله ويانـة ولمن دخلنا وسدينة الباب صارت تباوع لورانـة واردفت ويانـة ..

العلويـة :: ليش سديتو الباب أريج الله وينهااا ليش ما جت وياكم ؟

علي الرضا :: ما لكيناها هناك واصلا بنتج من الاساس ما رايحة للمعمل

رحمة الزهراء :: علي الرضاا شسالفة

اتهستر علي الرضا ححيل ودخل لجوة يصيح ويسولف وي روحة ..

علي الرضا :: هااي السالفـة هي شني شنو السالفـة السالفـة والبيها اختي مدري وينهاااا كايلة لوالدتها رايحة المكان وتطلع حضرة العلويـة اصلا ما واصلـة لهناك وهسة تكليلي شنو السالفة ؟؟؟

العلويـة ;; يعني ما لكيتو بنتـي جنت اعرف جنت حاسة والله كتلج احساسي ميخيب ياربي وين بنتي ؟

_ تعاي نفوت جوة. .

اخذت العلويـة ودخلنا الجوة وطلع نازلين لصالـة ليــنا و علي السجاد و علي الباقر و طيبات و امي و المعتز باالله و علي الهادي و البشير قيصر و حامِد المتقين كلهم بالصالـة واردف علي السجاد وياه

علي السجاد :: شمالك ولك تصيح فززت البيت كلة شكرصك ؟؟

علي الرضا :: اختك كرصتنـي

علي الباقر :: انجعم واحتررم نفسك وارتـقي الفاضك لا اجي اصگك على حلگك

_ والله هاذا الحقيقـة الست اختكم مدري وينها طالعة من البيت تكول لامي رايحة للمعمل وتالي لا واصلة لهناك ولا واحد شايفها هناك و الست تلفونها مغلق ..

علـي الباقر :: أريـج الله ولويش حتى تروح لوحدها ما كعدتني انا اخذها ؟

العلويـة :: كتلها روحي كعدي واحد من اخوانج بس كالت ميحتاج لان رايحـة سالفة ساعة وراح اخذ تكسي ..

علي السجاد :: هممم تكسسي ورانــة

انتبهت على صفنة علي الباقر وشلون اجتـة مثل لحضة ادراك لواقعة حادث غدير الله وانها هم راحت بتكسي اردف ويانه وهو صافن

علي الباقر :: طلعـت لوحدهاا وراحت بتكسـي وابو الخنجر لحد اللان احنا ما لازمي .
لااا يااا اللله اختيييي

عافنــة وصعد يركض لفوك وصعدو السادة وراه واجت لينا اخذت العلوية وكعدها تشربها ماي لان صارت تلطم وجهة على اريج الله ..

ودقايق نزل علي الباقر وهو يسد القميص مالتة على الدرج من كد ما مستعجل وبيدة مفاتيحة تبـع السيارة و طلـع وياه المرتضى الامير

ونزلو حامد المتقين و المعتز باالله و البشير قيصر كذالك راحو يدورون كل واحد بمكان وحذرونا اكثر من مرة وهم طالعين بكلمة ( ديربالكم وحدة تفتح الباب لاي مخلوق لو تطلع من البيت قبل رجعتنا )

بالمخُتصر ما ضل زلمـة بالبــيت بقيـنا بس نحن النسوان وعمي عبد الحسن بالمستشفى لان اجانى خبر ان غدير الله صحت وصارت تسولف شوي ف راح وضل يمها

رحـت انـا للكراج ولكيت سيارة علي الباقر الثانية
صعدت لغرفتة وصرت ادور على المفاتيح اول ما لكيتهم نزلت اركض وطلعت وراي امي ..

_ رحمة اوكفي رحمة

_ هاا يمة ؟؟

_ وين رايحة مشفتي اخوانج شلون طلعو وكالو لحد يطلع

_ بس انا مكدر اكعد واحط ايدي على خدي وكل ثانية من وقتنا محسوبة من عمر اخيتي

_ رحمةة اووكفي كتلج مترحين

_ تدرين بية ماحب اكسر الج كلمة بس يمة لا تجبريني ابقى هناا وخري عني

فلتت ايد امي وطلعت صعدت بالسيارة ورحت للمستشفى وفريت المستشفيات اسئل عليها او اسال عن اي شخص اجاهم قبل شوي وما لكيت شيء

بقيـت كاعدة بالسيارة وصارت الساعـه 8 اتصلت على المعتز بالله بس ماجاوبنـي يرن وما يشيل التلفون.

رجعت اتصلت علـى البشير قيصـر ورد عليـة بعذ متصلت مرتين واردف وياي

البشير قيصـر :: هاا شيــخة

صوتـة جان حيل مخنوك والعبرة البي ما ينوصف
غمضت عينـي وحطيت اجفوفي على عيوني امسح بدموعي واردفت وياه

رحمـة الزهراء :: ما لكيتوها صح ؟

البشير قيصر :: فص ملح وذاب ولا يكلك بنت عمرها 26 سنة طول بعرض ماكو الها أي أثـر

_ يا ربااااه اختـيي وينهااا

_ دورت انا والشباب بارضنا كلها وماكو هسة رايحين لعلي الباقر ونشوف شصار وياه

_ طمنـي اذا طلع وياكم شي

_ شيخـة

_ هلا خويـة

_ اتصلي على زُبيـر خلي عندة علم

_ بشير لا تكولهااا الله يخليك اختي مابيها شي وهسة ترجع

_ سوي الكتلج علية

سدة التلفون بوجهي هنا نهاريت حيل صرت اضرب على الستيرن واني اصيح وابجي
انهيتـة حطيت كصتـي عليه وصرت ابجي

بعد دقائــق شلت تلفوني واتصــلت على زبيــر يلي اول ما فتحت اردف وياي

زُبيــر :: ما حلالج تشتاقيلي علويتي

رحمــة الزهراء _بصوت شجي_ :: زُبيـر

_ خيييرر شبيج علويتي شبي صوتج ؟

_ تكدر تجي لبيت عمي

_ دقيقـة يمج

سديت التلفون وحركت السيارة رجعت لبيتنا اول ما دخلت السيارة للكراج وطلعت اريد ادخل للبيت وكفت سيارة زُبيـر واردف وياي

_ علويتــي ؟؟

التفت الـة ورحت صعدت يمـة بالصدر وهو ما لفظ بشي وياي واني اول مصعدت حضنتـه وصرت ابجي على كتــفة

حط ايدة ورة ظهري واردف ويـاي :

زبيــر :: وكفتـي كلبـي شبيج تبجين احجي شنو صاير وياج رحمتــي ؟؟ احجي والله احرك الدنيا عليهم ياهو يتجرء ينزل دمعة علويتي احجي

وخرت عن حضنة مسح ادموعي بأثنين ايديه وباسني بعيني اليمنى ورجع باسني باليسرى

وبعد ما هدئت اردفت وياه

_ زبير اختي أريج الله طلعت العصر ولهسة مراجعة و مختفية طلعو اخواني يدورون عليها يكولون فص ملح وذاب ..

_ شوكت صار الحجي هاذا كلة ؟

_ قبل ساعتين طلعو يدورون واني هم طلعت افتريت بالمستشفيات وملكيت شي

_ دام انت ملكيتي بالمستشفيات وهم مجاي يلكون يمكن تريد تكعد لوحدها وأريج الله لا مراهقة ولا طفلة

_ لشنو تكعد لوحدهاا زبير هاي أريج الله تخاف من ضلها الباب ما تعتبة الا للمعمل وترجع ولهاذا خايفين عليها بعمرها كلة اول مرة هيج يصير ويانة

_ خلـص ادخلـي وسويلي طريق افوت جوة

_ تمام ثواني

نزلــت ودخلــت للبيـت كلتلهم زبير يريد يفوت طيبات صعدت لفوك وامي لبست بس حجاب و لينا كذالك حطت حجاب على راسها

لان هي اصلا لابسة صاية بالبيت لان وياها السادة ف تلبس صاية وراحت للمطبخ والعلوية لبست عبايتها

طلعـت وصحت لــزبير دخل وكعد بالصالـة وطلب مني ورقـة وقلم

وصعدت جبت له من غرفة طيبات ونزلت كعدت يمـة وانطيتة الورقة والقلـم

وطلعت لينا من المطبخ شايلـة صينية بيها كلاص ماي و چاي

لمـن اجـة ياخذ منها رفع عينـة وحطها بعين ليـنا وضل صافن بيها

اخذت الصينـية ليـنا وحطتها على الطبلة وراحت كعدت وي العلويـة

وضليـت اباوع لعيون زبير واشوفـة شلون نضر لــ لينـا نضرات الي ما ناضرهن ولا رمش اصلا كدامها

هسسـة نحن بييا حال ندستـة على رجلـة واردفت وياه

رحمـة الزهـراء :: زُبيــري المن طلبـت الورقـة والقلـم ..؟

هنا هو استعاد وعيــة صار يباوعلي و مارد عليـة باوع للعلوية واردف وياها وجانت عين على العلويـة وعين على ليـنا

زبيـر :: علويـة هي بنتج شوكت طلعت بالضبط ؟

العلويـة :: طلعت بالاربعـة الا عشرة

_ زين هي مسويتها قبل ؟ هيج تتاخر وهيج يصير

أم المعتز باالله :: لاا ابد ممسويتها اريج الله واصلا البنات ميطلعون ويتاخرون حدهم لساعـة 5العصر مكملـة شغل ممكملة ترجعين

_ اهاا مشكلـة هااي ..

ليــنـا :: ليش مشكلـة حضرتك ضابط تكدر تحرك وتروح تدور عليها نرفع قضيـة فقد

زُبيـر :: شنو عيني ؟

ليـنا :: اكلك ماكو مشكــلة انت نقيب وتكدر تاخذ قوة خاصـة وتدور عليها واصلاً انت اسرع راح تكـون

انـا هنا غرت هوواي واردفت وي ليـنا قبل ما يجاوبها زبير

رحمـة الزهراء :: هو يعرف كلش زين شنو يسوي متكعدين تعلمينة شغلـة

لينا :: مدا اعلمة بس دا اكله ان هو يكدر يسوي أشياء ويتخطى الحدود الي السادة ميكدرون يتخطوها ..

زبير :: كلامج صحيح ماعلية غبار بس يخوية اني هم حتى هاي الحدود ماكدر اتعداهن الا بأمر قانوني وحتى اذا هسة رفعتو قضيـة فقد البنت بالغـة منمشي بهل بلاغ الا بعد وقت طويل من الاختفاء واذا كلش جانت قاصر الا بعد 24ساعـة

العلويـة :: وتردوني انتضر هلوقت واني كلبي مفجوع على بنتـي ومدري بيها وين ما وين ؟؟؟

زبيـر :: انا ما راح اخليكم تنتضرون بس على الاقل انتضرو بس لصبح هسة رايح انا راح اخالف شوي

رحمة الزهراء :: شلون ؟

_ مراح ننتضر القانون الا من يصدر النا حكم ندور عليها رايح البس بدلتي واجيب شوي من جماعتي واني لهنا اخذ الكامرات واسوي الهن مسح خاطر نشوف تحركات أريج الله بالمضبوط والاريدة منج علويتي هنا بالورقة تكتبين الي الطريق الي تروح بي للشغلها يعني الطريق المشت بي لمن طلعت واختفت اجي اخذ الورقة خاطر عليها نسحب الكامرات ..

رحمة الزهراء ;: تمام ححبيبي

تركنا زبير وطلع واني كعدت اسوي الكلي علية حافضة طريق المعمل على كلبي وصار النا سنين نمشي بي لذالك ما اخذ مني وقت واني اكتب اسماء الشوارع بالورقــة ..

""" علـــي البـــاقــر """

عقــلي طار يوم عرفـت اختي مموجودة

هي كل حياتي اريج الله و غدير الله هن السيد علي الباقر

بعد الصار وي غيـمة ومكدرت انا اكون يمها بذاك الوقت او اساعدها

هسة وصل الموضوع لأريجـة متحملت الموقف عار عليـة اسمي اخوة اذا مكدرت احمي اخواتي

علـى شنو كاتل نفسي بالاخوة وشاد حيلي وياهن
ولمن جانن بأمس الحاجـة الي ما لكني يمهن ولا كدرت اضمهن جوة جناحـي ..

اخذت افتر بكل القطع المهجورة الصحراويـة
انا والمرتضى الامير و المعتز باالله

وما لكينـة شي وكأن بغداد انشكت ارضها و بلعت اختي الا هيج لان مو طبيعي الجاي يصير

وكفـت يم السيارة عند اخر قطعـة باوعت لساعه لكيتها تناهز الــ 1بليل

أجو لعـندي الولد واردفــت وياهم

علـي الباقر :: هاي ههي راحـت اريج الله ؟؟

المعتز باالله :: لازم نرجع هسة وعمي يعرف خلص الوقت داهمنا

المرتضى الامير :: وهم اشوف هم صار الوقت نروح ونقدم بلاغ لازم الشرطة تعرف ويصير الها دور ويانة نحن لوحدنا منكدر

بقيت افتر بمكاني واني ساكت واردد
⇦يا مظهر العجائب⇨
وادموعـي بعيوني

اجا المعتز باالله لين يمي واردف وياي

المعتز باالله :: خويـة تعال نسوي شي وكفتنا هنا مراح تفيدنا بشي

_ مراح اكدر انا ارجع روح انت و المرتضى الامير و اني اروح لوحدي اشوف اختي وين

_ أبا الحسن هلشي ماراح يرجع اريج ابوس ايدك خلينا نروح ونصير اقوة وايد وحدة خاطر نعرف شلون نلكاها وترجع ويانــة ..

عـصبت حيل وما حسيت على روحي الا وانا زمخت على وجه المعتز باالله ونتـــرت

علـي الباقر :: وين تريدني ارجع متكلي ولك اريج الله بعدهي عذراء تعرف شنييي بعدهي عذراء
يعني اذا بلتت بس هاي ليلة خارج البيت هاي ههي سمعتها و مستقبلها يضيعون وحتـى نحن نضيع وياها
وحتـى لو هي مابيها شي النااس مراح ترحمهاا وراح تطلع افلام من راسها وتصدكهن ومراح ينسون ..

المعتز باالله :: زين ليش محسسني بس انت خايف عليها أبا الحسن اريج اختي مثل ما هي اختك وانا خايف عليها حتى اكثر منك بس خليتها نتصرف بعقلانيـة ابروح اهلك تعال وخلينة نرجع وندور بهدوء

_ معتز كتلك مراح ارجع اخذ المرتضى الامير وأمشو انا ما ادوس عتبتـة البيت اذا ما لكيت اختي

_ راكب راسك يعني ؟

_ اييي روحح مناا

_ هاي هية انا راح اختصر هذا وقتنا الجاي يضيع هيج وادور على اختي زين احسن من هاي وكفتنا وندور بنفس الدائرة
هاي مفاتيح سيارتك انا والمرتضى الامير راح نروح بسيارتي ..

تركنـي المعتز باالله وراح بقيت اباوع لسماء و رادفت

علي الباقر :: أمرتنا بالصبر على البلاء بس مو هيج بلاء بعد بلاء يارب العباد بحق جدي المسلوب هدمة
أرف بحالنـة ما نتحمل اكثر من هيج

رحـت لسيارة صعدت وصرت افتر بالشوارع مـثل المتيـه الميدري ويـن ينطـي وجـه

أجـة الليل و بغداد صارت ضلمـة سماها
وينج يا اخيتي وينج يا صمام كلبــي

شكفنا الليل وانتِ تخافين من الضلمة ادريج انا
تعاي يا تاج راس السيد تعاي

اضمج جوة القفص الصدري واسد اضلوعي عليج محد يمسج بكلمة واخواني محاوطينج

بس ارجعي ارجعي يا عرضـي و سمعتـي تعاي ..

فتحت تلفوني ولكيتة متفجر بالاتصالات من الوالدة ومن اخواني وهم من البنات

رجعت طفيـتة وشمرتـة على مقعد كرسي السدر

ورحت احوم حول المعمل وطريقـة
على أمل الگي شي وتطفي بية جمرة الحيرة المشتعلة براسي

وكذالك ما لكينـة شي ولااا شييي ولا أثر اصلاً
زادت حيرتي حيرة !!!

وين اختــفت البنت ؟؟؟

"" البـشيـر قيــصر ""

صارت الساعـة بحدود الــ 3 الفجر رجعـنا للبيت كلنـا ما عدة علي الباقر مجان ويانـة

كعدنا بالاستقبال واحد يباوع لثاني و كل واحد بينا جانت حيرتـة اكبر من الـثاني

والعلوية جانت كاعدة يمنا وتلطم ودمعها ما نشف ولا دقيقـة خلصت حيلتنـا ضل الموضوع يم زبير

راح يسوي مسح لكل الكامرات ومنتضرين نشوف الكامرات ونشوف شنتصرف و المن ننطي وجهنا

ونحن كاعدين فات عليـنة عمي عبد الحسن وهو ماعندة خبر بأي شي لحد الان ...

جان توة راجع فرحان ومرتاح من المستشفى لان غدير الله كعدت وكدرت تحجي وياهم واطمن عليها وهو ميدري بهل وقت نفسة كعدت الة بنت واختفت الة بنت الثانيـة مامنها خبر !!!

ضل يباوع لحالتنا المثيرة وعيونة راحت لمنضر العلوية المكطعـة روحها
واردف ويانـة وهو يباوع النا واحد واحد

عبد الحسن :: شبيــكم ؟؟ شنو صاير وياكم ؟؟
ابني السيد علي الباقر وينة ؟ صاير وياه شيي لا سامح الله ؟ ليش هيج وجوهكم جنكم عدكم عزاء ؟

صار واحد ينضر للثاني ومكدر ولا واحد بينا يبادر بالجواب على سؤال عمي

بعدهي عمي انتبه كلنا موجودين ما عدة اريج الله و علي الباقر مموجودين

ورجع واردف ويانــة

عبد الحسن :: ابنـــي السيد علي الباقر وينــة شنو ما سمعتوني ؟؟ زين انتم هسة كلكم هنا سادة وعلويات ابنـي السيد علي الباقر وينــة ؟؟
زين بنتـي العلويــة أريج الله وينهاا ؟؟؟
ليش ما كاعدين وياكم وينهم ؟؟

هنا عمــي رفع صوتــة وبدة يصيــح :

عبد الحسـن :: بويــة أريجــة !! أريجاتي
ريحــانـة الســادة وينج بويــة ؟؟؟
ليش بنتـي ما ترد عليـة وينهاا ؟! شنيي نايــمة ؟

ردت انطـق وارد على عمي بس سبقتنـي زوجـة السيد علي السجاد ليــا مدري شسمها

واردفت وي عمي عبد الحسن

ليـــنا :: أريج الله ما راح ترد عليك عمي لان هي من الاساس ما موجودة هنا ..

طيبـة الزهراء :: ممكن تكرميــنة بسكوتج ست لينا اذا ممكن ؟

ليــنا :: وانـا ما كلـت شي غلط الكل بالع السانـة وساكت كلت انا اجاوب عمي احسن من ما يضل يسال ويسال بدون ميسمع جواب منكم ..

طيبـة الزهراء :: محد عتب عليج وكالج احجي اسكتيي ولا تدخلين

هنا عمي صاح ب طيبـة الزهراء وسكتها ورجع يباوع لــ ليــنـا واردف وياها

عبد الحسن :: شنـي معنـى أريج الله ما موجودة هنااا الساعـة 3 الفجر !!!!!؟؟

بدت ليــنا تحجي لعمي كلـشي وبدت ملامح الغضب تشتاح عبد الحسن

نضر النا بعد ما انتهت من كلامها واردف ويانة بكل هدوء

عبد الحسن :: السيد البشير قيصر و السيد الفاروق الاعظم و السيد علي السجاد و السيد علي الهادي و السيد علي الرضا و السيد المعتز باالله و السيد شبر و السيد شبير
و الميرزا حامد المتقين و الميرزا المصطفى القاسم و الميرزا المرتضى الامير

عددنــا كلـنا بالاسماء نحن هنا كلنا بحركـة وحدة دنگنـا روسنا وهو ضل يباوع النا وسكت شوي وبعدها رجع و اردف بحدة و نتر و عصبيـة

عبد الحسن :: كاعدين هيج واليشوفكم يكول بالهم مرتاح و ماعليهم هم
شنو هاي الطاقـة العدكم كاعدين واختكم
ما تدرون وين كاعها
ولكم اريج الله بعدهي بنت بعدهي بنتتت اذا كضت هاي الليلة بس وأهي مو هنا هاي هي تنتهي أقرو على حياة اختكــم الســلام
كــومـو اتحركو من مكانكم تكلبولي المحافضة كلب امششوو

طيبـة الزهراء :: شبيدهم توهم ياالله رجعوا ومنتضرين زوج شيخـة يجيب الكامرات حتـى نشوفهن

علي الهادي :: بويـة وعلي كلبنـة المحافضة كلها بس فص ملح وذاب وعلي عبالك جاي ندور أبرة بنص القش

عبد الحسن :: دام الحجي هيج أحرگــو القش كلة و طلعولي الابرة
كومو واطشرو بالشوارع لا تغمض عينكم ألا واريج الله تحت اجناحكم بسرعــة اتحركو

طلـع عمي و گام أبني شبير طلع وراه ليروح وياه بعد ما انا ربتت على كتفـة واردفت وياه

البشير قيصر :: كوم روح ورة جدك لا تفارگـة وتعوفـة لوحدة

شبيـر :: ان شاء الله بويـة

بعدها نفذنا كلام عمي ورجعنا كعدنا نفتر بالمناطق والشوارع لحد ما صاح الأذان بِ 5 الفجر اتوجهنا للصلاة

وكذالك ما ضلت صديقـة و قريبـة ما دكينة بابهم وسألناهم وجان الجواب نفسـة من كل بيت نتوجه اله وهو { ما اجت و ما شايفيها من زمان }

شحالنـا هسسـة نحن بأشد حال !!!

""" شــبــيــر """

طلعــت ورة جدي و صرت امشي وياه و هو يمشي و يتمتم ويتلفت منا و منا و مكدرت افهم ولا حرف من الشيء الجان يحجي

جان يسبح وايدة ترجف جان متوتر حيل

وكفنـا كدام الجامع دخل وكعدنا بي
واستغربت حيل جدي جان يتصرف تصرفات غريبة ححيل

يعني المثلـة لازم يركض من شارع لــشارع حتى يدور عن بنتـة مو يجي ويكعد بالجامع و يفتح يقرأ القرأن

كعدت يمـة و فتحت تلفوني اتواصل وي عمي المعتز باالله جنت اريد اشوف وين وصل موضوع عمتي العلويـة

صارت الدقائق تمشي و تمشي ودخل علينا للجامع رجال صاحب شيبـة وجبير

بس الله شاهد ومريد احط بذمتي وجه جان مو مريح ابد من شفتـة كلبي انقبظ ححيل ابد ما رتاحيت لوجودة

اجـة وكعد يم جدي و عرفت هذا الرجال يصيحولـة الشيخ محمد

وحسيت جدي عبد الحسن هواي يحبـة ويثق بي و يسمعلـة و يحجي الة كلشي

لان بمجرد كعد الرجال اخذ جدي عبد الحسن فتح كلبـة وسولف كلشي لــشيخ محمد بموضوع عمتـي العلويـة اريج الله

وما اتفاجئت صاحب يشكــي لصاحـبة وصار يحجي جدي والشيخ مستمع فقط الى أن انتهى جدي والتزم السكوت

وهنا صارت عندي المفاجئـة الكبرى الخلتني ما اندل دربي ولا ارمش اصلاً من الصدمــة

وهي لمن فتح حلگـة الشيخ محمد و جاوب على جدي وعود ينصحـة وهو لو منجعم وساكت أشرف النـا

نحن نريد نكحلها أجـة الشيخ محمد وعماها من الاساس... ..

الشيــخ مُحمــد :: باع سيد انت صاحبي و اخوي واعزك كلش هواي الله شاهد علية ومن واجبي ك اخ واكبر منك ان انصحك و لمصلحتك و مصلحـة السادة اولادك
باع انت سيد والك سمعتك وهيبتك ابين الناس وهاي التصرف الطلع من الكريمة بنتك كلش غلط كلش هواي
اذا ما رجعت الناس راح تحجي اشكال الوان واذا رجعت بعد ما اخذت كم يوم برة البيت وانت استقبلتها بالاحضان فهاي كارثــة
ماراح تسلـم من السان الناس وسمعتكم تصير بالطين الله وكيلك العباس كفيلك

عبد الحسن :: والحل شنو انس محتار مابين عقلي و كلبي شيخ بنتي هااي ..

الشيخ محمد :: انسى سالفـة بنتك عبد الحسن هاي جانت بنتك من جانت تحترمك وابيتك هسة هي طلعت وعافتكم زين هي ليش ما فكرت بيكم لمن طلعت ؟ هي لو نيتها زينة جانت بطلعتها هاي اخذت واحد من اخوتها كعادتها كضينـة عمرنا نشوف بنات السيد عبد الحسن ما يطلعن الا بكفالـة واحد من السادة اخوتهن
ليش بهاذا اليوم بالتحديد رفضت يروح واحد وياها ؟؟
باع لا تزعل مني بس القصة واضحة مثل عين الشمس واسمعها مني اني اخوك وصاحبك احسن ما تسمعها من الغريب والشامت
اكيد بنتك جان عدها علاقـة بِ واحد وضحك عليها وخلاها تشرد وياه

عبد الحسن :: لاا مستحييل بنتي ما تسويها شيخ هاي تربيتي وبعدين حتـى لو نكول لا سامح الله وصدك جانت عدها علاقة بواحد مابيها غلط لو جايبـتة وخطبها جان اني انطيتـة وهي تعرف كلش زين طبعي هاي اخوتها زوجتهن قبلها ليش حتى تشرد وياه
واريج الله جبيرة مو مراهقة حتى ينضحك عليها بسوالف الحب ..

الشيخ محمد ;: انت ما تعرف تصرفات هاي الاجيال اسالني انا اشكال والوان جاي تصير توكف شعر الراس بسس ندعي الله يستر علينه وعلى بناتنا ويبعدنا عنهم
وتعال اكلك سيد يمكن بنتك حبت واحد سمعتة مو زينة وجانت تعرف انت ماراح تقبل وماراح تقبل بي لذالك اختصرت الوقت عليكم و عليها وشردت وياه
انا كتلك اذا رجعت واذا ما رجعت هاي هي بنتك صارت علچ بحلك القاصي والداني ..

عبد الحسن :: شنو اسوي انا هسة ؟ الحل شنو عقلي راح يوكف ..

الشيخ محمد :: لا يوكف عقلك ولا تحتار كلشي بيدك انت وحدك تكدر تسكت عشيرتك والناس وحتى القانون ميحجي وياك

عبد الحسن :: و شلون هاايي تصيــر ؟

الشيخ محمد :: اذا البنت ما رجعت فأنت كدام الكل اتبرئ منها و أهدر دمها واذا رجعت فَ هاي اجت برجليها واجاك الموت يتارك الصلاة الزمها واغسل العار الجابتـة الك وانتَ سيد و متقبل العيبـة تطلــع من بيتك و الناس تكوم متشيل الك اعتبار وحتى كلمتك تصير ما مسموعـة

بقيــت انا اسمع وانا مصدوم هاذا شلون اسمة شيخ ؟ هاي ابدال ما يهدي النفوس جاي يصب الزيت على النار !!!

وقريـت بوجه جدي ان هوة اجة وي الحجي مال الشيخ واقتنع بي وهاذا الي زاد الخوف بداخلي وصابنـي الرعـب الحقيقـي

يمكـن لو اعيش مليون سنـة بس مستحيل اتخطئ مناضرهم لعمامي وهمـة شايلين اسلاحهم ويحاولون يحامون عن عرضهـم

صدك زلم قليل منهم نلگـة بهل وقت حمدت الله ان انا انخلقت من صلبهم وطلعت ابنهم

طلعنا انا وجدي من الجامع والوقت صار يكشف عن نفسة صارت الساعـة 6 الصبح رجعنا للبيت ..

واول ما دخلـنا اتلگتنا جدتي العلوية وكذالك لكيت امي هناك وهم ماجان موجود ولا سيد من عمامي

العلــويــة :: هااا بشرونـي ما وصلتـــوا لشيي ؟؟

ما رد عليها جدي وتركها وصعد لفوك لغرفتـة لزمتني جدتي واردفت وياي

العلويــة :: يمــة حسين گلـي انت احجيلي احجي وياي شنو صار وياكم ؟؟

شبيـر :: ما صار شي ويانة وداعت عيونج واصلاً جدي ما جان يدور على عمتي من طلعنا منكم لهسة رجعتنا جان كاعد بالجامع ويسولف وي هاذا صاحبـة الشيخ محمد

بقـت العلويـة صافـنة بوجهي لثواني تستوعب الكلام الي اردفت بي عافتني وراحت

وكعت على القنفـة تلطم راسها وتنوح وركضن الها عماتي رحمـة الزهراء و أم البنين
وكعدن يمها يهدون بيها

كعدت انا كدامهم مكدرت اعوفهم واطلع وانا مادري بِ جدي عبد الحسن شوكت ينفجر و يطلع بركان اعصابة وعلى منو يطلعـة علمود هيج ضليت يمهم ..

واجت علية امي ربتت على ظهري واردفت وياي ::

جمـيلـة :: تريد شي تاكلة خاطر لا يصير بيك هبوط ؟

ما نسيت الي سوتـة بأبوي وفوگها ضربت اخوي شبر وجنت ضايج على عمتي
اجتمعن كلهن علية اردفت وياها بحدة

شبيـر :: شجابج لهنا ؟؟

جميلـة :: اتصلت على أم البنين خاطر اطمن انتم عدهم لو لا وكالتلي بالي صاير هنا مكدرت امنع روحي من الجية لهنا اجيت اركض

_ دام الحجي هيچ چا روحي واكعدي يم النسوان لا تگربين صوبي

_ ليش كاعد تحجي وياي هيج هسة احنا بمصيبة مو وقت الزعل يمـة

_ ولان نحن بمصيبة رديت عليج بهدوء و كتلج روحي و لا تتگربين صوبي لا تخليني اعصب اكثر واغلط وياج وانت امي واخذ ذنب روحي عني وعووود اذااا احتاجيت شي راح اندهلج

ولان امي حافضتنـي و تعرفنـي اكثر من روحها لمن حجيت هيج وياها تركتني وراحت عني

وهيـة ساعة او اقل الساعـة نزل جدي عبد الحسن وهو مغير ملابسة ويريد يطلع

كامت العلويـة واردفت وياه بكل قوة وحركـة كلب ..

العلويــة :: ويين رراييح ؟؟؟ عندك موعد ثاني تريد تكضي ياالله تفرغ راسك لبنتك ؟
سيــد بنتــي من امس مادري وينهاا مادري عدلة ميتة شلون نامت شلون كعدت اكلت لو ضناي بعدهي على لحم بطنها اني كلبي راح يشتعل نار وانت كاعد تتفرفر من صديق لصديق !! سوالف وضحك هيج عاادي ؟

هنا التفت جدي عبد الحسن و رد على العلويـة

وجان الرد كفيل يحطم كل الجان موجود !!!!

عبد الحسن :: ادعي لربــج نلكاها ميـتة لان اذا لكيتها عدلـة راح اجيبلج راسها مكطوع بيدي واخذ اعدام بيها عادي ماعندي مانع بس الاهم عندي غسلت العار الجابتة بنتج وما قبلت على الغلط ولا غمضت عيني علية

كال هاذا الكلام وطلع وهنا العلويــة اغمى عليها !!

ركضت الها وشلتها انا وامي وصعدناها لفوك و كعدت عمتي رحمة الزهراء يمها

طلعت انا من الغرفـة وانا احاول اتصل على ابوي حتـى أكلـة بالجاي يصير بس مجان يشيل التلفون و ما يرد !!

خليـت وطلعت اجيب علاج الضغط من الصيدليـة ..

""" علـــي البــاقــر """

لمن عجزت وخلص قلت حيلتي وما عندي شي اسوي

خلصت هاي الليلة ومكدرت الگـي اختي او ارجعها انتهتت

اخذت تلفوني ولكيت الساعـة بِ 8 الصبح اتصلت علـى علي الرضا ولمن رد علية

علي الرضا :: ها ابا الحسن صار شي ؟

علي الباقر :: انا اريد اسالك صار وياكم شي ؟

_ لاا بس ابوي عرف وطار عقلة وطلعنا ندور عليها

_ زين وين انتم هسـة ؟

_ حالياً نحن يم زبير

_ شنو تسوون يمة ؟

_ خويـة زبير سوة مسح لكل الكامرات الموجودة على الطريق من بيتنا للمعمل علمود نشوف اريج الله وين اختفت بالضبط

_ حلوو وشطلع وياكم ؟

_ بعدنا منتضرين صاحبـة بالطريق راح يجيبهم النا ..

_ منو وياك ؟

_ انا و علي السجاد و البشير قيصر و حامد المتقين و زبير هنا بس

_ وين انتم اريد اجيكم

_ نحن ابيت زبير خوية

_ تمام جايكم

_ منتضريك ..

سديت الخط و شغلت السيارة وانطلقت بيها
نزلت كدام بيت زبير ودكيت الباب فتحة الي علي الرضا

كعدنا بالاستقبال وطلعت الكامرات واصلات بس هم منتضريني لمن اجي خاطر يشوفوها

واول ما كعدت كام زبير و حط الشريط الاول بالتلفزيون وشغلـة

ورجع كعد يمنا و حط الورقة على الطبلة و لزم القلم وبدينا نشوف

مقطــع فيديو واضح لأريج الله واهي تطلع من البيت بحدود الساعـه 55 : 3 م

ومقطـع ثاني الها واضح وهي واكفـة على الشارع العام لشارعنا و وكفت تكسي وصعدت بي وجان وضعها و منضرها طبيعي حيل مابيها شي

ولمن حولنـا للشريط الثانـي لاحظت زبير سجل كل التوقيتات و المواقع الوكفت عدهن اريج الله على الورقـة وبدة بتشغيل الشريط الثاني

طلع مقـطع لأريج الله وهي فجأة تنزل من التكسي وهي على بعد كلش هوواي من المعمل ولمن نزلت انتبهت للغـة الجسد عدها

ما جانت متوترة لو عصبية لو خايفة اخذت تخطي خطوات ثابتـة وقويـة وعبرت الشارع طبيعي هاذا يعني ان السائق ما غلط وياها رلا ضوجها وان اريج الله هنا نزلت برضاتها من التكسي وعبرت الشارع وكفت على رصيف الطريق الثاني ..

هنا نحن حولنا لشريط الرابع وصرنا نشوف اريج الله واكفـة بمكانها وتباوع لشارع وكأن جانت منتضرة شي او منتضرة احد

وبعد وكفتها بحلول 20 دقيقـة
وكفت كدامها سيارة ضخمة حيل لون اسود

مضللة والمشكلة اريج الله فتحت باب السدر وصعدت بيها بالسدر بدون تردد وكان صاحب السيارة واحد من عدنا نحن السادة

ومشت السيارة واختفت من عين الكامرات ما نعرف بيا طريق سلكت و وين راحت

حولنـا لشريط الخامس طلع مماخذ الهم ولا شي ما مارين علية طفينا التسجيل واردف زبير

زبيــر :: معناها العلويـة اختفت على حدود الساعـة 51 : 4 م لان تلفونها انغلق على الساعـة 48 : 4 م يعني بعد ثلاث دقائــق بس من صعدتها بهاي السيارة

علي الباقر :: بس منوو صاحب السيارة هاااي؟ واذا انتم لاحضتم شلون اريج الله صعدت وياه بدون تردد يعني اكيد شخص نعرفة و يعرفنا و اختي تثق بي

زبير :: صحيح لان لو مجان هيج جان ما صعدت وياه بالسدر اولاً ثانياً ما انتضرتة يجي

علي الرضا :: رقــم السيارة واضح بالصورة اخذة زبير متكدر تجيب النا عنوانها ؟

_ ماكو شي صعب اكتب الي رقمها هنا على ما اجيب تلفوني من فوك خاطر اتصل على صاحبي يشوف النا صاحب هاي السيارة

كام زبيـر وصعد فوك وانا بقيت اباوع للمقطع الي سجلتة بتلفوني شلون صعدت اريج الله بهاي السيارة منو هاذا ؟

اختي ما تغلط اكيد اكو شي اكو شي غللط اكو شي ما واضح بهاذا الموضوع ..

وهنـا اردف البشير قيصر من بعد ما شاف الفيديو مرة ثانية وياي بالتلفون

البشير قيصر :: اكو حلقـة مفقودة ..

علي الباقر :: شلون يعني ؟

_ سيد الجاي يصير مو طبيعي شلون اريج الله تصعد هيج بكل اريحيه بهاي السيارة ونحن كلنا نعرف اريج تخاف من ضلها وشلون بعد صعدتها تلفونها انغلق ونكطعت اخباارها وحتى الكامرات ما اخذتها ..

_ احس راسي كام يوجعني ححيل شنو جاي يصير ويانة شنو مسوين علمود هيج نتجازة بهاي المصايب ..

البشير قيصر :: صدكني اكو شي انا ممقتنع اريج متسوي هيج شي يمكن الما يعرفها ويشوف هلفيديو يكول هاذا حبيبها وشردت وياه بس نحن اخوتها النعرفها اكثر من ارواحتنا مستحيل نصدك هاذا الشي

_ خلي يجي زبيــر ويشوف صاحبة يطلع عنوان الــسيارة ونشوف ..

علي السجاد :: ابوي او اي شخص شاف هذن التسجيلات راح ياخذها قضية غسل عار والله وحتى اذا كدرنا نرجع اريج الله محد راح يصدكها ولا يسمعها

البشير قيصر :: يخسسوون وعلي على كطع روسنا يمسون منها أشعرة وحدة ..

نــزل زبيــر واخذ الورقـة العليـها رقم السيارة. واتصل على صاحبة وردد له الرقم
وبقيـنا كاعدين على اعصابنـة بعد ساعـة كاملـة كام حامد المتقين واردف وياي بعد ما وصلتـة للباب ..

علي الباقر :: انت وين راح تروح هسة ؟

حامد المتقين :: اليوم هو الــ 11 من محرم نسيت اليوم محكمة امرين وباقي بس ساعة وحدة لموعدها لنطق بالحكم ما تجي وياي ؟

_ لا روح انت واحضر واخذ اصفاد الحق وياك
ولمن تنتهي اتصلو عليـة بشروني

_ ان شاء الله بالكم لنفسكم من اطلع من المحكمة اتصل عليك تلفونك بيدك

_ انتضر برة اصيح لعلي الرضا يروح وياك

_ ليش ؟

_ احسن انتضرني اصيحلـة ..

_ تمام منتضر يم السيارة

دخلت لجوة وصحت لعلي الرضا واجاني حطيت ايدي على كتفـة واردفت وياه :

علي الباقر :: ابو كرم منتضرك برة اطلع وروح وياه

علي الرضا :: بس ليش اريد ابقى يمكم !!

_ لااا روحح انت وي ابو كرم ولا تكسر كلمتـي

_ خويـة اريد اعرف مصير اختي روحي جاي تلولي عليها والله

_ كلنا هيج مو بس انت بس هسسة انتة سوي الكتلك علية

_ لا خويـة ماكدر اعوفكم و أروح واني بعدني ما اعرف مصير اختـي لوين ؟

_ علي الرضا خويـة لا تتعبنـي فوك ما انا تعبان العباس عليك روح وي ابو كرم كافي تشلع كلبي الي هو مشلوع

صفن بوجهـي واردف وهو ما راضي

_ تمام راح اروح مثل متريد ..

_ اروح فدوة لمداس رجلك امشي

باسنـي براسي وراح طلع رجعت كعدت يم البشير قيصر و زبيــر و علي السجاد
واتصـل صديق زبير وانطانـى المعلومات عن السيارة

علي السجاد :: هااا زبير شنو ؟

زبير :: الولد كال ان السيارة من السيارات الي تتاجر

البشير قيصر :: شلون يعني من السيارات التتأجر ؟

_ يعـنـي مو ملك لأحد تجي للمحل مال السيارات تاجرها لايام بمقابل وترجعها

علي الباقر :: شنو هاذا اللعب

علي السجاد :: صحيح اكو هيج محل الي يجيب سياراتة من الكويت يسوي هاي الحركات ..

_ انطاني العنوان الترجع الها السيارة نروح الة ؟؟

علي الباقر :: بدون تفكيير كومو نرووح ..

⇦ مَــشــهِــد ⇨

"" زبــــيـر ""

طلعو السادة كدامي و انا اخذت تلفوني واتصلت على واحد من جماعتي الي بَ المركز واردفت وياه اول ما فتح الخط

زبيـــر :: اسمعني وقبل لا تحجي اي شي اكو شخص جان مسجون عندنا أسـمة سائد جبران

_ اي سيدي شبي ؟

زبيــر :: اريدك تجيب الي كلشي عنة وتجيب كل صورة لكل شخص من عائلـتة واسماءهم الكاملة

_ تمام سيدي .. بس راح احتاج وقت

_ شكد راح تحتاج ؟

_ شيي يومين لو ثلاثــة

_ حاول تستعجل

_ تمام

سديت الخط وي دخلة علي الباقر علية. وهو يردف الي

علي الباقر :: مو وقت صفـنة ياالله خلينـا نتحرك

زبير :: ايي جاييي وياكم بس خلي اقفل البيت

طلع علي الباقر واني قفلت البيبان وطلعت
صعدنا بالسيارة وتحركنا نحن بس أربعة فَ صعدنا بسيارة وحدة
واتوجهنا لوجهتنا .. ولمن وكفنا كدام المحل دخلنا الـة وجان معرض سيارات

رحنا للمالك وكفنا اربعـتنا كدامـة واردفت وياه

زبيــر :: الســلام عليكــم ..

_ هلا وعليكم السلام نور المكان المحل كدامكم شتحبون تشوفون جديد لو قديم ؟ شراء لو ايجار ؟

علي الباقر :: عدنا سيارات خير من الله مضالين على مهزلتك هذن العارضهن

_ عفواً لعد المن داخلين المعرض اذا هيج ؟

البشير قيصـر ;: جايين نسألك ونريد جواب صريح منك واتمنى تساعدنا

زبيـر :: تتمنى شنوو سيد غصباً عليه راح يساعدنا

طلعت الـة هويتي العسكرية و كذالك علي الباقر طلع هويتـة وهو هنا استفرغ العافية مالتة من شافنة منو الواكف كدامة ضحك بخوف واردف ويانــة

_ كل الهلا بيكم اتشرفت واكيد الي الشرف اساعدكم بس بِ شنو تردون مساعدتي ؟

طلعت الورقـة البيها رقم السيارة وانطيتها الة واردف علي الباقر وياه

علي الباقر :: هاي السيارة الك ؟

_ ايي هاي سيارة معرضي شبيها ؟

زبيـــر :: أجرتها شي لواحد ؟

_ ايي امس الصبح اجة رجال وأجرها منـي وهـاي قبـل ساعتين اول ما فتحت المحل بساعـة السبعة دخل وسلمنـي المفاتيح ورجعها الي مثل ما اخذاها ..

علي السجاد :: منوو هاذا ؟؟ وشلون انت تأمن وتنطي السيارات هييج متخاف لا مترجع ؟

_ انا اكيد ماراح انطيها بِ سواد عيونة راح اخذ منة بالمُقابل هويتة وكل مستمسكاتة + سعر الايجار دفع مسبق وهاي من يرجعها الي مثل ما اخذها انطي اغراضة ..

زبيــر :: زين وين هاي السيارة وين حطيتها ؟

_ ذيج هية ..

أشر النا على السيارة عارضها بالزاوية اردف وياه علي الباقر

علي الباقر :: وين مفاتيحـها ؟

_ هذني هنا ليش ؟

اخذ المفاتيح من ايدين الرجال و انطاهن للبشير قيصر و علي السجاد يلي بدورهم راحو لسيارة فتحوها وكعدو يفتشون بيها على أمل يلكون شي

وانـا اخذت صاحب المعرض من ايدة ورحنـا كعدنا على الكرسي انا وعلي الباقر وهو كعد كدامنــا واردفـت ويــاه :

زبيــر :: انت تكول انك تاخذ هويات اليأجرون زين الي اخذ ذيج السيارة شنو اسمة شلون شكلة ؟؟

_ بس عادي اعرف ليش هيج جاي تتصرفون علمود اعرف شلون اساعدكم

علي الباقر :: السيارة الي اتاجرت منك انخطفت بيها اختي الي نريدة منك اتعاون ويانة وساعدنة بكل الطرق حتى نحن نساعدك ومنخليك تسد هاذا محلك وباب رزقك ..

_ والله انا باليـوم يجون عندي هوواي وما احفظ اسماء بس الي اتذكرة ان جان اسمة بندر جبران بندر سامح هيج والله بس متأكد اسمة بندر

زبير :: شكلة شلون صاير ؟؟

_ طويلل حيل وضعيف وعندة لحية خفيفة واكو شامة جوة عينة اليسرى واضحة

علي الباقر :: متذكر شي عنة ترى توة اجاك !!

_ والله ذاكرتي ما تسعفني

زبير :: زين انت ليش ممخلي كامرات شنو متخاف على محلك ؟؟

_ ميكدرون يدخلون له كلشي هنا من زجاج ضد الكسر والرصاص مأمن

علي الباقر :: زين عمي ححاول تذكر بعد اكثر اعصر مخك ذاكرتك اي شي

_ والله يا ابني الي اعرفة كلتة الك وها اتذكر شي لان ركزت علية طبع براسي

زبير ;; الي هو

_ الولد جان محل ولادتة انبار

علي الباقر :: اهااا

بهاذا الوقت اجونا البشير قيصر و علي السجاد كام علي الباقر واردف وياهم :

علي الباقر :: هااا شلكيتو ؟؟

البشير قيصر :: السيارة انضف من حياتة

علي السجاد :: بس جوة مقعد كرسي السدر لكينة هاذا المحبس حاشر

جان المحبس فضة وشذرتة زرقــة اخذة علي الباقر من ايد علي السجاد واردف

علي الباقر :: هاذا محبس امي جان ميفارك ايد اريج الله !!!

زبيــر :: معناها اريج اتعرضت لشي قوي بعد ما صعدت مثل ضرب او هيج بحيث من القوة وكع المحبس من ايدها وراح لجوة الكرسي ..

علي السجاد :: يارب راضين بكل حكم حطيتة علينا بس لا تخلينا نلكي اختي جثة !!!!!!

زبيـر :: امشونا خلي نطلع ..

تركــنا ياحب المعرض وطلعنـة لان بتالي هو ميدري بشي

وكفـنا خارج المعرض بالشارع بعد ما جان علي الباقر صافن بالارض رفع عينـة واردف ويانـة

علي الباقر :: الي أجر السيارة اسمة بندر معناها هو نفسة نفس الرجال صاحب الخناجر الي لكينة واحد منهن بصدر الرجال بأرضنا والثاني بِ بطن غيـــمة

زبير :: شلون استنتجت هو نفسـة ؟

_ لان الخناجر عليهن وسم واحد بأسم B.A.N وبالغـة الانكليزية الحركات تصير احرف معناها هووو بَندر ماخدين اول حرفين من اسمة ومسوي الخنجر الخاص بي

البشير قيصر :: بيها وجهة نضر ويطلع غريمـنا واحد

بقيت انا صافن واتأمل بكلامهم و تذكرت لمن كال الرجال اسم الولد بندر جبران او بندر سامح
رفعت عيني لعلي السجاد واردفت وياه :

زبيــر :: اكول سيد !!

علي السجاد :: كول

_ زوج اختكم شنو اسمة الكامل ..

علي السجاد :: قصدك انمار ؟؟؟

_ ايي

علي الباقر :: أسمة انمار محمد حيدر

_ اهاا

علي السجاد :: لييش تسأل ؟؟

_ هو زوج اختة نفسة يصير اخوة زوجتك موو ؟

علي ااسجاد :: شنو الفايدة من هاي السئلة لوين راح توصلنااا ؟؟؟؟

_ اعصابك مجرد استفسارات ..

البشير قيصر :: براسـك شي ؟؟

سكتت ومشيت خطوات عنهم فتحت تلفوني ودزيت رسالة لصاحبي وكتبت
( استعجلل بموضوعع سائد )

━━━━━━━━━━━━━━━━━━

__ يا بوية ...
جنت احسبنك ظلّي وسندي،
ما ظنيت تصير سكيني بيدي.

يـَــــتـــبِـــع ☜☞

8،195 كلمـــة