احفاد السيد : الثار ( بأجزائها الإثنين ) الفصل التاسع وخمسون 59 - بقلم ​رُقَيَّةُ الْأَكْبَرُ

بسم الله الرحمٰن الرحيم
اللهم صّلِ على محمد وعلى ال بيت محمد

﴿الباقيات الصالحيات ﴾
الحمدالله
سُبحان الله
الله اكبر
لا اله الا الله
لا حول ولا قوة الا بالله
حسبي الله ونعم الوكيل

الکَـــاتـبة ﴿ رُقــَـيّــة الأكـــبـَــر ﴾

➖ بقلمي روايــة ﴿ ضـحـايـا الـثـأر ﴾

➖ المعروفة والمنشورة باأسم ﴿ احـفـاد السـيد : الـثـار ﴾

✨ التَـــعـِب عَليــنـا والتـَـفاعـِـل عَليـــكـُم ✨

✨ قبل القراءة اترك تصويت تقدير للتعب لطفاً ✨

______________________★______________________

- لمُتابعة حساب الكاتبة -

انستكرام || o.oll13

تيك توك || oo_ll13

قناتُنا تلكرام || oo_ii13

واتباد || oo_ll13

______________________★______________________

- اني مَا احب انتظر بس انتظّرتك !
واني مَا اسمع عِذر لكن سمَعتك
واني ذاك الصَعب كلش
ليش هيچ استسِهلتلك ؟

______________________★______________________

- وحگ الـ بينِك وبيني انا بشمس
الظهر حطيت عَين بعين
بس عينك عمَت عيني .
______________________★______________________

﴿ محافظـــة العمـــارة ﴾

""" عَــــزيــــزة """

جنت مخلية راسي على المخدة وماريد اكوم فوك ما الغرفة مالتي انترست ضوء من الشباج اتاخر الوقت لازم انزل اغسل وجهي وانضف،
لمن ردت انزل همزين فتحت تلفوني أشوف حامِد المتقين ما مراسل شيء

لكيت صَيوان دازلي رسالة يكلي بيها

:- فات علينة دغار و حَبيبة البسي حجابچ وانزلي لا تنزليلي مفرعة .

طفيت التلفون ومسحت اعيوني باصابعي وسحبت الحجاب مالتي نضرت لروحي شفت الدراعة مالتي مابيها شيء عادي انزل بيها حيل عريضة

فتحت الباب ونزلت لكيتهم كاعدين كلهم بصدر الإستقبال بدون ما ارد عليهم بكلمة رحت بوجهي للحمام

غسلت وجهي و فرچت أسناني ومسحت وجهي و أدية بالخاولي ورجعت كعدت يمهم لكيت على الطبلة ترمزين هنا هتفت وياي حَبيبة :-

حَبيبة :- تردين اصبلچ كهوة تصحصحين بيهااا عزيزة أمبين نعسانة بعدچ ؟

- شبعانة نوم الحمدالله

حَبيبة :- دام شبعانة نوم ماتعرفي تكولين السلام عليكم لو صباح الخير

- مااعرف عادي تعلميني ؟

صَيوان :- بلشنة ان شاءالله ؟

- ماادري عن حَبيبة مدرعمة هيچ منو إلا مزااج من الصبح يحجي

حَبيبة :- مزاجي يريد هيج

- ادعيلي الله ينطيني شوي من مزاجج علمود اتحملج هففف يكرهــچ

عفتهم وكمت رحت للمطبخ طلعت الخبز من الثلاجة جنت اريد اسويلي لكمة أكسر ريچي بيها واني جي اسوي اجت عيني على الشباچ مالتنة الي هو يعكس البرة كلها

شفت تكتم تجي النا من طرف بستانــة من ناحية گيعانهم
عفت الخبز من ايدي على الكاونتر وطلعت من المطبخ رحت باتجاه الباب وكفني صَيوان ولفظ :-

:- وين رايحة ؟

- تكتم أجتي طالعة اشوفها شتريد

ام دهام :- ليش ما تخلينها تفوت فوتيها

:- لاااا اطلعي شوفيها شتريد وخلها تروح مالي خلك

ام دهام :- بنت عمك وصلت للباب تريد تردها ؟

:- اردها وارد ابوها كتلچ عـَزيزة شوفيها شتريد وخلها تروح

عدلت حجابي وفتحت الباب وطلعت لكيتها تتلفت بمشيتها وتوها واصلة للدرج مال الباب اخذتها من ايدها وسحبتها شوي عن الباب أردفت وياي وهي تأشر بيدها للباب

:- خلينة نفوت ليش وكفيتني هنا ؟

- صَيوان جوة

:- بعد أحسن من زمان مو شايفتة خليني افوت

- هو بلسانة طلب ما اخليج تدخلين تعي وياي

:- عزيزة اريد اشوفة مشتاقتلة

- تكتم استري علينة وتعيي وياي الله يخليج خليني احجي وياج كلمتين

:- وين تردين ؟

- تعَي للمضيف امشييي

اخذتها من ايدها ودخلت للبيها للمضيف كعدتها وكعدت مكابلتها وأردفت وياها

- شبيج ؟

:- انا الشبية لو أنتِ شجاج عزيزة بيت عمي متخليني افوت علية

- لأن أبن عمج معصب ومايريدج تفوتين شني السالفة غغغصب ؟

:- وليش معصب مني أشو حتى الحية مالتة صالي مدري شكثر ما شايفتها ؟

- علمود هيچ ميريدج ما يريد تصير مشاكل يعرف أنتِ و درية ما تتكابلن وبنفس الوقت حَبيبة و طرگاعتها عندنا جوة

:- چا لازم اشوف صَيوان اجيت علمودة وابو همام مايدري بية اريد احجي وياه عزيزة

- شنو اسوي هسة هو بالسانة كال لا تخليها تفوت

:- زين فوتي وكليلة هي اجت عليك خلي يطلعلي كلمتين واروح منااا لان تعبت حيل

- انتضريني

طلعت ودخلت للبيت أشرت لــصَيوان الجان كاعد بالاستقبال الصغير ويلعب گيم وي دغار أول ما انتبه علية ترك أبن عمة واجاني

مشيت للمطبخ لمن وكفت هو أردف وياي

:- خيرج

- تكتم بالمضيف كاعدة تريدك

:- شكلت انااا

- صَيوان بداعتي صوتك نصييي و روح شوف البنت شنو تريد ولك تكتم مو نفسها النعرفها البنت متزورك وجهَ وماقبلت تحجي شيء وتريد تحجي وياك

:- شمالها ؟

- مااعرف والله روح شوفها

:- واذا طلعت هي السالفة لعبة منها لو من امج شسوي بيكم ؟

- وراس ابنك الي ما نخلق لا انا ولا امي نعرف بالسالفة وتكتم من آخر مرة أنتَ شفتها نحن شفناها ما التقينا بعدها ولا اجت لهنا

:- كتيلي وين هي هسة ؟

- كاعدة بالمضيف

:- خووش

عافني صَيوان وراح طلع فاتت امي وهتفت وياي

- شنو حجيتي وي اخوچ و تكتم راحت ؟

:- لاا ما راحت يمكن صَيوان راح يشوفها

- الله يبشرج يعني تتوقعين راح تصفى نفس صَيوان اتجاهَ ؟

:- مدري يمة مدرري وبعدين كاافي ترى خلي نتقبل فكرة ان درية حامل هم هي البنت خطية مالها أحد بس صَيوان .

كملت حچايتي ويا أمي بس چانت عيوني تلاحگ صَيوان وهوَ يطلع باتجاه المضيف أدري بيَ شگد شايل بگلبه من ورا تكتم وتصرفاتها بس چان لازم يحچي وياهَ مهما تكون تبقى بنت عمه وواضح إنّو بيها شي چبير.

أم دهام: إنتي شبيچ ويا درية؟ مدري شلون گاعدة تدافعيلها؟ شالچعة بگلبچ هالبنية؟

- يمه مو دفاع بس حرام شوفيها خطية إبن أبنج بطنها ومالها أحد هنا غيرنا صح ما نرتاحيلها بس هذا واقع حال

أم دهام: واقع حال يمه؟ واقع حال مر ومصايب ما ناسيّة اللي سوّته بيني وبين دهام وشلون حچت علية وخلت ابني يبتعد عني ومات وهو ما يحجي وياي وهسة افترت تريد تاخذ صَيوان وتاخذج هااا

- يمه دخيلچ هسة مو وكت هذا الكلام شوفي هسة صَيوان وتكتم بس لا يتعاركون ويصير دم تدرين صَيوان شكد مخبل ويكره تكتم

تركت أمي وطلعت اريد اشوف شنو صار بس جانوا سادين الباب مااكدر اشوفهم لهذا اختاريت ابقى منتضرة لمن يخلصون كلام ويطلع صَيوان وانا افوت على تكتم واحجي وياها .

______________________★______________________

""" صَــــيـــوان """

رحت ودخلت للمضيف ولكيت تكتم كاعدة شافتني وعيونها دمعت وكلعادة مثل ما اعرفها بلشت سوالفها عصّبت حيل جنت اعرف السوالف بس لخاطر عزيزة اجيت

ما كملت حچايتي وياها صيحت حيل ولفظت وياها وقت ماهي
گاعدة وعيونها بالگاع

جانت الكلمات طالعة مني بصوت يرجف من العصبية لان ماجنت تفهم وتريحني

:- شتريدين مني؟ خلص كلشي أنتي مو شفتي شفتيني وأنا أتزوّجت غيرچ شفتيني وأنا دا أحاول أبدأ حياة جديدة شنوو تردين هسة

هتفت وياي بصوتها الناصي و مختنك بالبچي

تكتم :- بس أنتَ ما مرتاح عيونك تحچي ليش هيچ تسوّي بينا صَيوان ليش تخليني أظل أحس بالذنب؟

:- أنتِ أصلاً ما حسّيتي بالذنب من قبل لو چان ضميرچ نايم وهسة صار صاحي

تكتم :- انا اسفة والله انچرفت حيل واعترف بس ما تنعاد بعد صدكني

:- لچ انا من ورة فعلتچ بية اتزوجت درية وما رفضت الزواج لون ما سويتي السويتي جان ابني منج أنتِ موش من مرة أخوي

تكتم :- أنتَ كلتها مرة اخوك شووف صَيوان أنتَ لو تحب درية ما تكول عنها مرة اخوك وهي مرتك يعني أنتَ بعدك تحبني وتدري بية شكد احبك
بس هي الحية الدخلت ابيناتنا صَيوان طلگ درية وخلينة نتزوج نفس ما ردنة نسوي قبل اترك هي الحية ما جي يجيك منها بس وجع الراس

:- لا تحچين على مرتي لو چان طلعتي بنت أصول چان ما خليتي رجال يحبج ومقدرج يروح لغيرج

- كافي صَيوان! إحترم نفسك عيب هيچ تحچي وي بنت عمك انا

:- مو گتلچ ما أريد أحد يتدخل بحياتي منا وغاد روحي يلا مناا وما تسمعين هيج حچّي يغثج بعد وهم مابية تسويلي مشاكل روحيي

تكتم هنا إجت لزمت إيدي أقوى رفعت راسها وعيونها حمرة من البچي.

تكتم :- صَيوان أنا ما إجيت علمود أسوي مشاكل أنا إجيت علمود أگولك ...

سكتت شوية أخذت نفس عميق وكملت كلامها

تكتم :- انا تعبانة حيل وحالتي كلش صعبة أبيت عمي ابو همام واريد اطلع منة شوف هذا وجهي شوف هذا زراك ايدي هذني كلهن ندبات منة انا عايشة بتعذيب هناااك

ارتفعت نبرة صوتها حيل بس ما كدرت تصير قوية بسبب شهگاتها اللي غصّت بيها صيوان عيونه جانت مثبتة على الزروگ اللي بإيدها ووجهها

وشعور غريب ضربه بمنتصف صدره مو خوف ولا حب بس شعور بالخجل من ابوها المتوفي ومن ابوه التركها أمانة عندة .

صيوان ببطء سحب إيده من إيدها اللي چانت لازمتها بقوة

:- شني هاي السوالف؟ شتريدين تچذبين عليّ بيها هسة؟ هاي شنو الندبات؟ صِدُگ تحچين؟ لو بس تريدين تساوميني على رجعتنا؟

تكتم:- ما أچذب عليك وروح العزيزة عليّ ما أساومك شوف وجهي زين صَيوان چّنك ما تعرف عمك أبو همام شگد حقير بس صار سنة كاملة هوَّ مسوّي عيشتي جحيم خليتني أظل هنا أنا من طلعت من بيتكم وخليتني ارجع اروح لبيت عمي ابو همام وأنا اناا ....

دموعها نزلت كالشلال على وجهها التعبان وحچيها چان كله رجفة

صيوان :- لا تحچين هيچ حچّي تردين تخليني أحس بالذنب انا عفتچ ترجعين للبيت الي ابوج عافج هناك اللي هم سندچ ما رجعتج للشارع
وهم أنتِ اللي جبرتيني اخليج تطلعين منااا نسيتي خربتي كلشي خربتي بيتنا خربتي اللي چان بيناتنا لو بس چان عندچ ذرة خوف علية جان ماسويتي السويتي

بدى يتمشى بالمضيف يروح ويرجع وعيونه تشتعل نار بس لمن نضر الى إيدها اللي لزمتها قبل شوي حسّ ببرود غريب

تكتم :- أدري أدري وربي الشاهد أدري. ولهذا السبب أنا دا أتعاقب هسة. بس مو هيچ يكون عقاب تقبلها يضربني رجال ويخليني أعيش بذلة
صَيوان بس أنتَ الـ چنت سندي وصرت أماني وهسة أنا أرجف وحدي
صَيوان لخاطر الأيام اللي چانت حلوة لخاطر عشرتنا طلّعني من هذا البيت ما أريد أي شي ثاني ما أريد أرجعلك بس أريد الأمان بس طلّعني من ايدين أبو هما. باچر يموّتني وما يحس بيه أحد

:- ما أريد أحد يشوفچ بهالنكسار أنا ما أكدر أشوف بنت عمي هيچ حالتها حتى لو چانت هي اللي أذتني

صيوان سحبها من إيده بلطف عيونه مركزة على الزروگ مرة ثانية أخذ نفس عميق حتى يسيطر على نفسه وكمل كلامة مع تكتم

:- تمام باچر الصبح أنا أروح و أحچي وي عمي وأشوف شيريد بس أريدچ تعرفين شغلة أنا مو صيوان القديم اللي چان يحبچ أنا صيوان رجل درية وابو اطفالها وإذا بيوم جبتي طاري مرتي بطريقة مو زينة وحق ربچ ما أساعدچ لو يذبحوچ إفهمي!

تكتم هزت راسها وهي تشوف إصراره على زوجته حسّت بغصة ثانية

تكتم :- وعد صَيوان؟ ما تخليني بعد؟ حتى ولو بس طلعني من العذاب اللي أنا بي هسة و تبعد عني بعدين

:- راح اساعدچ واخلصج من هذا العذاب تبقين بنت عمي وعرضي الما اقبلة على حبيبة و عزيزة چيف اقبلة عليچ ؟

تكتم :- ما أنسى هذهِ وكفتك وياي

:- انتبهي لنفسچ وحاولي لا تداحچين وي ابو همام

تكتم :- ما مداحجة وياه الله شاهد بس هو مدري ليش يعاملني هيج

:- خلص راح ينتهي كلهذا بس الليلة هي روحي

تكتم :- أشوفك بخير

:- الله وياج

طلعت تكتم وانا طلعت وراها دخلت للبيت وصاحتلي درية رحت الها وهتفت وياي

درية :- طلعت تشوف تكتم مووو ؟

:- مو وقتها فدوة

- جا شوكت وقتها هاا شوكت

:- شنو تردين ياروح صَيوان

- شنو جانت تريد منك ليش طلعت الهااا مو قبل شوي كلت لــ عَزيزة خلها ترروح ليش كلمتك بالثانية تتبدل

:- لأن بنت عمي محتاجتني

- جذذابة كلشي جي تسوي جذب هي همها و اهتمامها ترجع صَيوان تسوي روحك ما تعرف تكتم ترى أنتَ المعاشرها اكثر مني

:- دريــــة

- صَيوان لا تتصرف هيج وياي تدري بية شكثر احبك ومابية اخسرك مثل ما خسرت دهام

:- شبيج بابة ماراح تخسريني انا وياج ويمج و وين ماترديني اصير وياج نضر عيني

- شنو جانت تريد منك تكتم أنتَ ما رجعت الها صح

:- أكيد لاا شرجع الها نلعب احنا بس بوية ابو همام حيل اتمادة بسوالفة هسة اريد اخذ دغار و مكرم ونروح نأدبة لان كافي جي يجبر بنت عمي رويدة تجي التفتت لــ تكتم هسة

- شنوو شبي وي تكتم ؟

:- جي يمد ايدة عليها

- صدك تحجي ؟ تكتم تخلي احد يضربهاا

:- اتخيلي تكتم الي موكفة الكل باللسانها جي تعيش كلهذا العذاب ولا بيها تحجي ولا اكو اليسمع

- صَيوان

:- روحة لـ صَيوان

- اذا أدبت عمك جيب تكتم وخلها ترجع تسكن ويانه لا تخليها هناك يمهم هذولي الحيوانات

:- شنو التغير هسة ؟

- لا تنسى صَيوان انا شفت الضيم والضلايم من ابوي وهسة حاسة بيها حاسة بشعور الذلة والمهانة اليجي من أقرب الناس وما بيك تسوي شيء لهذا جيبها اتحمل غثتها بس ماريدها تعيش ذاك الشعور

:- ويعتبون علية لأن حبيتج

- هههه انتبه لنفسك ترى ابو همام داهية

:- مو ادهة مني لا تخافين على زلمتج يابعد بيتي

- راح تروح ؟

:- أييي بالج لنفسج

- احبنك

بست درية بكصتها وعفتها ورحت للصالة الثانية صحت لدغار وطلعت انا وياه مرينة على مكرم اخذناه ويانة

وطلعنة لبيت عمي ابو همام ضربنة الباب حيل طلع النا همام سحلة دغار ووكعة بالكاع كضوه هو و مكرم

هتفت وياه :-

:- أبوك وين ؟

- هناااك هنناااك ابوي هنااك ببيت الشعر مو هنااا

:- يولد مو هذا نفسة اليريد ياخذ اختكم رويدة غصب عنكم ؟؟ شوفولي شغلكم بي حلال زلال عليكم رايح اشوف أبوه الشفية

مكرم :- والله واجت على رجليها والله

- لاااا لاا انا مالي غرض والله اذا تردون هسة اطلگ اختكم وحتى من العمارة اطلع والله وما تشوفون وجهي والله مالي غرض

دغار :- راح تسوي هذني كلهنن بس قبلهن لازم نضوكك شيء كلش طيب ..

راح صيوان باتجاه الكاع مالتهم ما جان يعرف شعور الضربة اللي راح ياخذها على راسه من عمّه بس جان الغضب مسيطر عليه لدرجة ناسي كل شي

دفع باب بيت الشعر اللي جان مفتوح شوية وبلشت عيونه تدور على عمّه شافه كاعد ورا المَسند مالتهم يدخن جگارة ويمّة گلاص الچاي

صاح صيوان بصوت قوي هزّ البيت كلة

:- أبو همام يالله كوم

أبو همام فزّ من مكانه ووكعت الجگارة من إيده عيونه تحولت لعيون صيوان اللي بيها الشرار

أبو همام :- شني هالصياح صيوان؟ شكو جاي هسة وشني هالحركات التكسير بالباب؟

صيوان تقدم خطوتين ووصل يم عمّه راد يهجم بس سيطر على غضبه

:- انا ماا أسألك على وقت جيتي اجي بالوقت اليعجبني
أنا جاي أسألك شني سوالفك وي بت عمي

أبو همام ضحك ضحكة باردة وحاول يرجع لوضعة الطبيعي بعد ما فز خايف من صوت صَيوان

أبو همام :- ومن شوكت صرت وكيلها ووكيل بيت عمك؟ مو أنته اللي ذبيتها ورا ظهرك ورحت تزوّجت أرملة أخوك

:- إي ذبيته بس ما ذبيت الأمانة تكتم بت عمي وأمانة المرحوم برگبتي شلون تمد إيدك عليها؟ إيدك اللي تنمد عليها أكسرها إلك شني هالمراجل على بنية وحيدة

أبو همام كام ووكف بكل طوله حاول يهدد صيوان بعيونه الحادة.

أبو همام :- وانتَ شعليك بيها تكتم بنت اخوي أنا اربّيها وأدبها بكيفي شني تدخل بخصوصياتنا

:- لا بنت اخوك ولا بنتك تكتم ما تنضرب أمانة هي بعينك إذا ما تحترمها وماتحفظها احترم اخوك اليمت اسممع ولك
تكتم تطلع من بيتكم باچر الصبح خلصت كعدتها هنا

أبو همام :- تحلم ما تطلع من بيتي لو على كص ركبتي!

:- شوف بويه أبو همام وحتى ما تستاهل اصيحك بوية
أنا مو جاي أتشاور وياك أنا جاي أبلغك قرار إذا ما طلعت باچر الصبح أقسم باالله و أبوها المرحوم لأطلعها غصب عنك ولأخليك تندم على اليوم اللي مديت إيدك بيها عليها ولا تنسى ابنك برّه شراح يسوّون بـي اولاد عمي

أبو همام :- تهددني يصيوان مو عيب عليك؟ تهدد عمك

:- من تتهجم على عرضي وتضرب بنت عمي ما تبقى عمّي تصير غريب وخصم كافي ظلم وقهر لو تكتم تطلع من بيتك بسلام لو تطيح كرامتك من عيني و عين العشيرة كلها وكل العذاب اللي عذبتها بيه يطلع من خشمك أضعاف

صيوان سكت شوية وشاف الضعف بعيون عمّه اللي بلش يتراجع مد إيده بسرعة على كلاص الچاي وطشه بالكاع وهتف

:- جاي تبيع سوالف الرجولية على بنية ضعيفة؟ يا ذيب زمانك إذا ما رجعت العافية لوجه تكتم وما نسّيتها العذاب وحق دُرة الزلمة ما أرتاح ولا اخليك ترتاح

ابو همام :- زين بس مو بهالطريقة وين تروح البنية؟ وين تاليها

:- هاي بعد شغلي أنا أنتَ ما يهمك المهم تطلع من بيتك عندي ناس يدارونها أحسن منك ويحفظونها ببيتهم أكثر منك باچر تجيك عَزيزة وتاخذهااا وهسة يلاا شوو اعتذرر منها على سوالفك هي

أبو همام :- ما اعتذر من واحدة قليلة ادب مثلها

:- العتب مو عليك، العتب على اللي تركها أمانة عندك ياالله كلامي خلص
جهز البنية واللّي سويته وي همّام برّه موش نقطة بالبحر من اللي راح يصير بيك لو بس حاولت تفتح حلكك على تكتم بعد

صيوان دفع عمّة للكاع وكعة و طلع من البيت وخلّى عمّه بصدمة و غضب مكتوم طلع برّه وشاف دغار ومكرم كامشين همام اللي وجهه صاير كدمات

بصوت عالي :- ياالله ولد كافي شبعوه كتل

دغار :- ما يرتدع هذا اللوتي إلا هيج هذا يريد ياخذ رويدة غصب عنها بس علمود يكسر خشمنااا مو هيچي ولككك

مكرم :- هسه صار حباب وراقب صَيوان شوف شلون بهذا وچه يريد يطلگها

:- ههههههه خلصوا شغلكم وياه وانا راجع

راحوا ولد عمّه وبقوا يضحكون على همام الممدد بالكاع
رجع صيوان لبيته دخل للبيت وشاف درية واكفة تنتظره. بس شافته حضنته بكل قوتها

دريـــة :- يا روحي صيوان خو ما صار بيك شي؟ عمك ما سوالكم شيء

:- ما يگدر أنا صيوان موش واحد غشيم كلشي خلص تكتم باچر تطلع من بيتهم بعد لا تخافين

درية رفعت راسها وعيونها بيها دمعة فرح

- ما جنت ادري صيوان بداخلك كل هالحنان والغيره صدُك إنّك زلمة مو بس لمرتك حتى لبنت عمك ولعرضك الله يخليك إلي

:- أنتِ اللي خليتيني هيچ هسة يالله روحي حضريلي أكل جاي وراي شغل جبير

- فدوة لك من عيوني

______________________★______________________

"" بَــــــغـــداد ""

"""" غَـــــدير الله """"

استغليت طلعة أنمار وأخذت جهزت البيت كلة وصعدت زينت الغرفة ومِن شفت صارت الساعة 9بليل

راح يجي أنمار رحت طلعت الفستان الأحمر داگن لبستة وكعدت على الگرسي رتبت مگياجي وسمعت طگطگة جوة

عرفت ان الأسمر المگحل حلالي وصل طفرت سديت باب الغرفة وقفلتة وبقيت اباوع حوليني ماكو شيء ناقص بس أشغل الشموع الكيكة

ايي اليوم عيد ميلاد أنماري المگحل

بدة يصيح بصوتة العندليب علية وبأسمي جوة بالهول لان متعود انا اتلكاه من الباب من يچي

صعد وضرب على الباب حسيت كلبي يدك سريع اتوترت حيل هههه وسمعت صوتة من خلف الباب

:- شنو غديرات گلبي وينج نايمة ؟ صاير الج شيء واكعة ولج ؟

- لا لا ما نايمة ما بية شيء

:- عَچل افتحي الباب عليش قافلتة ؟

- انتضرني ثواني

:- غديرات

- طرگاعة لفتك أصبر

:- راح اكسر الباب افتحيي عادد يلا

- ولك اصبر

:- شجاي تسوين ميت تعب ولج

- جي احفر گبري انمار تسكت وتصبر لوو ما افتح الباب لو تطگ وتنام اليوم جووة بالصالة

:- غير اعرف شنو جي تسوين

- بس اصبر ثواني هي علگت وياييي

:- أشنو العلگ وياچ

- حضضيي المصخم

:- افتحي الباب اساعدج أشنو السالفة

- خلصتة بس اسكتتت وارحمني

شغلت الشموع بعد ما الچداحة لطشت وياي وعدلت شعري وفُستاني ورحت فتحت الباب صرت وراه وهو دخل سديت الباب وصرت بظهرة

ورة ما شاف المسويتة علمودة اندار الي وصار يباوعلي من جوة لفوك خلى ايديه على خصري وهتف بهدوء

وهو عيونه تفتر بالغرفة المزينة :-

:- غديراي يالچنچ حلم شنو كل هذا

قرب وجهه يمي حيل حسيت أنفاسه الحارة تلامس ركبتي وأنا مدنگةما أعرف شصار بيه من الخجل همست وياه بصوت خافت

- عيــد ميـلادك أنماري المگحل كُـل عام وأنت عافيتي

رفع راسي بأصابعه بهدوء وهو عيونه ما فارگت عيوني اللي صارت مليانة نظرات حُب إله

:- لچ أنتِ عيد لكل أيامي مو بس اليوم شسويتي بيه؟

بعدين ابتسم ابتسامة ثكيلة تچوي الگلب وهو يرفع حاجبه :

:- ولچ يا فستان أحمر يا شموع كل هذا لأجلي؟

- كلشي لعيونك المگحلة الي كبرت سنة

ضحك ضحكة رجولية هزت كياني سحبني من خصري حيل وصارت ضلوعي لازگة بضلوعه صارت ماكو مسافة بيناتنا

:- لچ روحي يا غديرتي تعرفين شنو راح يصير بعد ما شفت هذا الچمال كلة ؟

هزيت راسي بالنفي وبقيت أباوع بعيونه اللي بيها بحر من العِشگ أحس نفسي ما أستوعب شجاي يحچي جنت بعالم عيونة ضايعة

:- ليلة ما تنامين بيها أبد ولا تغمض عينچ كُـل عام وأنتي عيدي يا مُدللتي بعد تربيتي

ابتعدت عنة لان خجلت حيل و غيرت الموضوع وهتفت وياه

- شلون شفتت الزينة أن شاء الله عجبتك ؟

:- ليش مسوية كلهذا والله سنة سعيدة جانت كلش كافي وما انساها منج ابد ليش متعبة روحج

- اهاا صددك

:- صگعتج اي الله مالة داعي كلهذا

- خووش ارجع اخذلك ساعة ورد لية

:- ليش يبعد تربييتي

- علمود أشيل هي الزينة كلها واذب هي الكيكة وامسح مكياجي واكفش شعري واغير ملابسي اشوفلك دشداشة عريضة البسها وانزل اطبخ اسوي ريحتي كلها دهن و بصل واجي اكعد هنا ومن تدخل علية اكلك كل سنة وأنتَ بخير سنة سعيدة

:- عليش تردين تخربين الي سويتي وتعبتي بية ؟

- لأن أنتَ موش وجه نعمة هسة انا مسوية كلهذا وتكلي ما يحتاج لو باقي على كلامك و رومانسيتك بالبداية اشرف الك والله

:- هساع لان خايف عليچ من التعب صرت مو وجه نعمة

- اييي لان كاعد وتتبطر شكيتلك كتلك تعبت كتلك انشلع كلببي يلا كملت كتلك حيلي راااح واني اسوي هذا كلة ؟؟؟

:- لااا ما كلتي

- جا احترم نفسك وفوت اسبح وغير ملابسك واطلعلي خلي نحتفل وأنتَ ساكتت ماريد أسمع حسك

:- صار وتدللين أم أذياب

- ذيب اليجيك بعز اليالي ويعضك .

:- عمي أنتِ الزلمة البيت مو انا

- انمااررييييي

:- يااايمةة فدوووة ذذبت يااروح انماررج بعد تربيتي

- لا تتاخر اطلع بسرعة

:- اذا اتاخرت شسوين تطلگيني ؟

- وأنتَ شدكول ؟

:- والعباس تسوينها الله يعرفچن هل خلى العصمة بيدنا

- وعساس كلش انتم مشرمينها خايب رووح رووح اسبح واطلعلي

:- هههههه رايح يا ست البنات وست كلبي

طلَع أنمار وراه ما شمرت عليه الكلام الحار ظليت واگفة بنص الغرفة أعدل فستاني الـ ما عجب سيّده

بذيج اللحظة رحت يم الكيكة الـ محطوطة على ميز صغير ومزين بـ ورد أحمر وشموع بيضة شفت الشمعة الـ لطشت بيدي لمن چنت أحاول أشعلهة تذكرت التعب واللغوة الـ صارت بيناتنا

ابتسمت وگلت بكلبي :

- يا روحي و عمري شمسوية بيك انا كل ما أحاول أسوي شيء مثالي الك أخرب الدنيا بكلامي وياك بسس مع ذلك أنتَ دنيتي وتتحملني ولهذا احبك

مرّت تقريباً ربع ساعة سمعت صوت الباب مال الحمام انفتح صرت اباوع للباب
ما حسيت بي إلا و هو فاتح الباب ومطلع راسه و عيونه المگحلة تضحك كمت ووكفت همس وياي بصوت فروحي

:- ولچ مثل ما كلتيلي هي خلصت سبحتي بسرعة ليش هيچ واگفة شنو منتضرتني ؟

- أي طبعاً أنتظرك رغم ما أنتَ قاسي وگلت ما يحتاج كل هذا

:- ولچ يمة فدوه أروح للـ زعلانة أدري بيچ تعبتي وما قصرتي وربي هذا أحلى عيد ميلاد مر عليه

صعدت عيوني بعيونه المگحلة مدّ إيده وصار يلعب بخصل شعري النازلة على متني همس بصوت

:- بس ألبس ملابسي وهسة أجي ما أخليچ تنتظرين أكثر يا روحي

- لا تتأخر أنماري الكيكة راح تذوب وأنتَ بعدك ما طلعت

ضحك ضحكة رجولية هزت كياني گال وهو يتقرب منّي حيل :

:- من شفتچ بالـ فُستان الأحمر الكيكة ذابت من زمان يالچنچ الحلم

باسني على گصتي بـ حرارة و راح بسرعة و هو يعدل قميصه الأبيض الـ لابسَة رحت گعدت على الگرسي أنتظره و أنا أباوع على الشموع

شويه وطلع لابس گلبية النوم وريحته ترس الغرفة قرب منّي وهمس بأُذني :

:- يلّا غديرتي خلي نبدي الاحتفال

لزمت إيده بحنية وأنا كاعدة كدامة عيوني بعيونه المگحلة اللي بيها لمعة حُب ما تنوصف

- يلا حبيبي أنمار أطفي الشموع وتمنى أمنية

تقرّب من الكيكة ونفخ الشموع بهدوء الظلمة صارت أكثر بس ضوة الشموع الصغيرة المعاندة خلاّ جو الغرفة دافي

- اتمنيت

همس بصوت جان كافي بس انا اسمعة

:- أيي

- شنو تمنيت؟

سألته بفضول وأنا أحس گلبي يدگ سريع من قربه

:- تمنيت تبقين كُـل سنيني الجاية يمي وبحضني و ما تفارگيني أنتِ الأمنية الكبيرة بحياتي غديرتي

لزمني من إيدي وسحبني يمه لصدرة و جاب السچينة وگص الكيكة

- يلّا يا عمري أول قطعة لأحلى مُدللة عندي

وخر عني شوية وگص قطعة كيكة صغيرة مدها إلي أخذتها من إيده وأكلتها

- تسلم إيدك يا روحي وهاي أول قطعة لأحلى مُكحل بالدُنيا

مديتله القطعة وخليتة ياكلها كلها وبقينا نتبادل الضحكات والهمسات الدافية حسيت بالوقت يركض بينا وهو يباوعلي بنظرات تخلي الروح تذوب

گعدنا على الچرباية وضل يسولفلي عن اليوم اللي فات وشلون چان ينتظر يطلع من الشغل حتى يجي يشوفني

:- لچ غديرتي أنا ما چنت أدري إنتي هيچ مسوية. لو أدري چان أجيت أركض من وقت كل خطوة بالبيت حسيتها حُب منچ

- أهم شي عجبك يا بعد روحي أنا أسوي كُلشي لأجلك غير عيد ميلادك يروحي

قرب مني أكثر صارت إيديه تلامس خدي بحنية

:- ولچ يمة يا فستان أحمر؟ هذا الفُستان يخليني أنسى الدنيا إنتي جمالچ ما ينوصف يالنايمة بروحي چنج حلم

نزّل راسه وباسني بوسة طويلة حسيت الدنيا وكفت بيها ابتعد عني شوية وبقى يتأملني

:- يَللا يا غديرتي خلي نعوف العيد والاحتفال عندي احتفال ثاني أريد أسوي احتفال يبدي بـ أنفاسچ وينتهي بـ ضحكتچ. ليلة ما تنامين بيها أبد مو گلتلچ؟

ضحكت بخجل بس عيوني چانت تحچي كُل الحُب اللي بگلبي إله

- أنمارييي

ما خلاني أكمل حط ايدة على حلكي بحنية ويمنعني من الكلام وهتف

:- ششش اليوم بس أنفاسنا هي اللي تحچي كُـل عام وأنتِ الحُب الوحيد بـ عمري

دفنت راسي برگبته وأنا أحس بحرارة أنفاسه وقوة إيديه اللي حاضنتني الغرفة صارت كلها حُب الشموع ظلت تحترگ بهدوء تتتاام وكضت الليلة على اكثر من خير

______________________★______________________

"""" البشير قيصر """"

وقت ما جنت كاعد بالهول اكلب بالكتب مال أولادي اشوف المادة مالتهم ماباقي شيء للدوام وجنت حاب اخذ نضرة على الراح يدرسونها كونها مرحلة جديدة من حياتهم

اجوا وكعدوا يمي وهتف وياي أبني

شُبير :- بوية

- عيونة لابوك أمرني

شُبير :- شكاعد تسوي

- ماكو يبوك بس انعجبت بالاحياء و جاعد اغازلها

شُبر :- هههههه لا بوية شُبير قصدة ليش حاضن الكتب مالاتنة من الصبح

- ولكم انتم هي السنة نضامكم اعفاء لو كورسات ؟

شبير :- لا بوية كورسات

- اها بعد أسهل أريدكم متفوقين هي الأحياء مالتكم اخذت نضرة عليها وهي الكيمياء هم بس مسائل شدولي حيلكم ومن بداية السنة اريدكم ضامنين انتقالكم للصف الخامس علمي وماريدكم تماشون السمعتهم موش زينة ولا تماشون الهامل دراستة ولا اليحب يتعارك ولا اليدخن أيدكم بأيدين بعض ولا تصاحبون أصلاً واحدكم صديچ الثاني كلش كافي موو لازم تخلون چوغة شباب وراكم الصحبة هذا الوقت ما وراها بس هچمان بيوت

شبر :- كلامك ترجية وبالاذن حطيناه

- عفية بأولادي وهسه كولولي شنو رأيكم بالمدرسة الجديدة قريبة عليكم لو لا؟

شبير :- اي بوية خوش مدرسة بس بيها مسافة شوية عن بيتنا.

شُبر :- واني سمعت المدرسين بيها زينين كلش وخصوصاً مال الرياضيات كلهم يمدحون بيه

- هذا اللي أريده منكم طريق العلم بوية يحتاج تعب وصبر من أول يوم لا تكلولي هاي سهلة وما يحتاج الها شيء ديروا بالكم تستهينون بأي واجب أو درس من ترجعون من الدوام أرتاحوا شوية وبعدها الدراسة ساعة ساعتين حسب المادة بس المهم ما تتراكم عليكم

شبير :- إن شاء الله بوية

- وهاي هم نصيحة أخيرة وكلش مهمة لا تخلون الهوسة مال الدنيا تشغل بالكم التلفزيون اللعب بالشارع المبايلات .. كلشي بوقته من تكملون دراستكم وواجباتكم ذاك الوكت تعالوا كولولي كملنا واني أشارككم باللعب والونسة المبايل بس للضرورة تتراسلون وية صاحبكم على واجب أو تتصلون بيه إذا احتاجيتو شي مو للغفلة والطكطكة طول اليوم

شُبر :- صحيح بوية و حقك ويانا المبايلات خربت هواي طلاب خطية

- أي بوية أريدكم ترفعون راسي بالنجاح والمعدل العالي أربعة وعشرين ساعة اني وامكم ندعيلكم ما أريدكم تضيعون هاي الدعوات أريدكم دكاترة مهندسين ضباط اللي الله كاتبه الكم الدراسة أولاً وكلشي وراها يجي

شُبير :- يا عيوني أنتَ كلامك هذا يخلينه نسهر الليالي نقرا لخاطرك

- فدوة لكلبكم وباجر ننزل للسوك وللمكاتب وشنو تحتاجونة انا وياكم وناخذة علمود شنووو يصير عندكم واهس للدراسة أكثر

شُبر :- صدك تحجي بوية؟

- اي بوية صدك چا ليش مو صدك شايل الكم واهس بداخلي جنت كل سنة احضر كلشي لتحرير عمكم الصغير وهي اول سنة دراسية هو ما موجود خليني اخلي واهسي بيكمم

شبير :- الله يرحمة ان شاءالله

- آمين

جميلة :- عائلتني الحلوة شدا تسوي ؟

شبير :- كاعدين وي ابونة

- لا وي جدكم چا ما تشوف كاعدين وي ابوكم

جميلة :- شبيك دمك ثكيل وي اولادي

- سوالفهم فاهية ما بيها ملح ليش معلمة ولدي هيج يحجون ؟

:- چا تريدني اسويهم دمهم ثكيل مثلك ؟

باوعت لجميلة وغمزت بعين وحدة

- هذا دمي ثكيل يروحي؟ تدرين غير ما أرتاح إلا من أضوجج شوية بالحچي

:- ما استغرب والله تضوجني هو انتَ وأولادك صايرين عليّ بس يله فدوه لعيونكم كولولي شنو جان حجيكم؟ أكو شي مهم؟

شبير :- لا يوم بس الأبو جان ينصح بينا على الدراسة والمدرسة الجديدة

شُبر :- وكال باچر نروح للسوگ نشتري كلشي نحتاجه

جميلة :- صدُك تحچي أبو شُبر؟ خوش فكرة زين تسوي بيهم حتى ينشد حيلهم عاد أني هم أروح وياكم لو لا ترى محتاجة كم شغلة للبيت والملابس

- چا شلون السوگ ما يحلى بلاچ هيَ نخلص مالتهم واغرضهم ونلتفت الج بنتي

شُبير :- نروح إحنا ؟ونعوف الكنااري هاا شبر ؟؟

- وين تردون ترحون ؟

شبر :- راح نمر على بيت جدي ونشوف عمي الفاروق الأعظم

جميلة :- بالكم لنفسكم

شبير :- وي عمي اكيد بخير يلا تضل يمكم العافية بوية

- الله وياكم

طلعوا الولد وجميلة أجت كعدت يمي وحطت راسها على كتفي ولزمت ايدي وهتفت وياي الأميرة مالتي

:- زين سويت ياروحي أنتَ حبيت فكرة باجر راح تاخذهم وتشتري الهم وكانهم اولاد صغار شفتهم شلون طاروا من الفرح أول مرة راح يجهزون لمدرستهم وي ابوهم

- لو يكبرون ويصير عندهم دگ جهال راح يبقون بعيني اولادي الصغار الازم انا امشي وياهم خطوة بخطوة وما اعوفهم ولا لحضة

:- جنت تعامل تحرير الله يرحمة هيج ؟

- اييي واكثر من هيج هسة هذولة زين يفارگون عيني تحريري جان 24س وياي ما فارگني ولا دقيقة ومن فارگني ليلة وحدة راح مني للأبد

حجيت وياها ودمعت عيني بلا ما أحس

- ابد ما نسيتة كليوم جي يجيني ويحجي وياي واتذكر كل تفاصيلة طلعت من ذاك البيت حتى لا كل كتر اشوف تحرير بي بس طيفة أجى وياي

:- الله يصبر گلبك أبو شُبر ويصبر گلوبنة كلنا هو روحه الطاهرة عد رب العالمين أحسن إله من دنية كلها وجع ومصايب وهسة هم الله رزقك بشُبير وشُبر ذولا راح يعوضوك عن كلشي بس أنتَ لا تحمل نفسك أكثر من طاقتك فدوة إلك ولصبرك

- شسوي هذا تحرير ابني الزغير اللي ما شبعت من ضحكته وسوالفه بس الحمدالله على كل حال وهذول اولادي نعمة من رب العالمين هي هاي اللي مصبرتني على فراگ تحرير و مؤمل ومثل ما عوضوني راح اعوضهم

:- أي يعيوني بشيري تحس روحك جاهز تروح وتزوهم بدورة السنة ؟

- جاهز وأصلاً منتضرها على نار لأن مشتاق ألهم ححيل اريد احجي وي تحرير واريد اشوف مؤملي شهيدي واريد اشوف أهلي كلهم الي ناموا هنا فرد نومة

:- بس انا ما راح اكدر اجي وياكم

- ليش ؟

:- مابية افوت مكبرة وهي السوالف اموت والله نفسيتي تصير 0 لهذا أبقى هنا

- بس جميلة كلنا راح نروح يعني ما تكدرين تبقين عند أحد من أهلي وين اخليج هنا لوحدج ؟

:- واذا ترى 16 سنة وانا عايشة لوحدي بدون احد

- هي قبل موش هسة ما اخليج وين اروح وبالي يضل هنا

:- يااا بشير مو طفلة انا شبيك حبيبي صدكني راح انتبه لنفسي

- أبد والله مااكدر ارتاح وأنتِ مو وياي واذا صار وياج شيء مااكدر اجي ولا اوصل الج بسرعة انسسي

:- بششير

- جميلة انسيي اذا ما تكدرين لاجواء المكبرة وهي السوالف عادي تبقين بالسيارة كاعدة ونحن ننزل ونفوت

:- اهاا

- ايي بس بهي الحالة اقبل ما تفوتين ويانة للمكبرة بس مل تبقين أنتِ بمحافضة وانا بمحافضة

:- يعني خايف علية وهيج ؟

- وليش مستهينة بمعزتج بكلبي ليش ما اخاف عليج لكيتج مشمورة بالشارع غيرر بنت كلبي أنتِ وام روحي

:- ياا فدوة لكلبك أنتَ كل الحنية بالدنيا شايلها بروحك

- جميلة عيوني أنتِ

حضنتني جميلة وضلت تهمس يم إذني بكل حُب واني أحس الدنيا رجعت ضحكتلي من وراها و ورا ضحكات أولادي چنت راضي بقضاء الله وقدره لكلشي مر علينة

و داعت تحرير الغالي ما يوم عاتبت ربي على الصار النا والوجع العشنة بي بس تبقى الغصة بالگلب فرگاهم والله كريم على الجاي

حضنت جميلة بقوة ردّيت الها الحُب اللي انطتني إياه من أول يوم رفعت راسي عنها وأيدي بعدهي لازمة إيديها

- تدرين شنو اللي يكتل بحياتنا ؟

:- شنو؟

- كُل شي يتغير ألوان الدنيا تروح وتجي أولادي يكبرون ويتعلمون الزمن يمشي بينا
بس هو يبقى بذاك المكان بعمره اللي راح ما يكبر

باوعت على مكان أولادي بالهول اللي هسه كانوا كاعدين بيه وكأنه بعدهم هناك وهتف وياها بصوت موجوع :

- شُبير راح يصير طالب صف خامس، وشُبر هم وأنا أدري تحريري لو باقي، چان هسة لازملي كتاب الأحياء ويكلي "بوية تعال حلّي وياي هاي المسألة" چان ضحكته مالية البيت

جميلة سحبت أيدها من أيدي وحطتها على خدي مسحت دمعة ما حسيت بيها من نزلت

:- كافي يروحي الله كاتب إله هيچ

- ما گايل شي على قضاء الله بس الغصة هاي ما تنبلع تعرفين شنو اللي يذبح؟ باچر من أروح يم كبره راح أگعد وأحچي وياه مثل كل مرة أگوله وليدي كبروا اولاد اخوك وما نسوك وكبروا عمامك وما نسوك بس بالسرّ بداخلي أگول تحرير أخاف تنساني أنتَ أخاف بس روحي اللي بقت متعلّقة بيك الدنيا كلها تمشي وتنسى بس أنا ما أريد ينساني

:- اسم الله عليك شلون ينسوك؟ أنتَ روحه أنتَ كل دنياه وروح مؤمل هم ويّا واهلك كلهم وياه هم ما ينسوك بس أنتَ جاي تتعب نفسك بهيچ حچي

- ما أتعبها هي تعبانة وخلصانة هاي الغرفة هذا الهول الجيران السوگ اللي كُل كتر بيه عطر تحرير چنت أحضّر إله هدوم الدوام القلم الجنطة وهسة راح أحضّر لأخوانه الوجع إنك تسوي الشي اللي چنت تسوي لأبنك الراح ترجع و تسويه لأولادك الباقين وتحاول تفرح بيهم بس بكل ضحكة اكو دمعة على الراح وما شاف شيء من حياته

جميلة نزلت دموعها بدون صوت وتنهدت :

:- فدوة لهيچ گلب يا أبو شُبر بس شراح أسوي بحالي أنا؟ من أشوفك هيچ أحس نفسي ما سويت شي حتى أواسيك

- وجودچ يمي مواساة كونچ مو بس زوجتي كونچ أم هاي العائلة اللي جاي أحاول ألملمها واعوضها عن الراح هذا يغنيني عن الدنيا كلها

اتقربت عليها أكثر وخليت راسي على صدرها وأني أهمس بصوت خفيف ما أريد أهزمه بس أريد أطلعه :

- أنا خايف من الچاي خايف أروح وأشوف أولادي يبچون على عمهم خايف أضعف كدامهم وما أصير السند اللي لازم أصيرة الهم يا ريت الكبور ترجع الراح النا حتى ما أحس بهيچ فراگ ووحشة

بقيت صافن بهيچ حچي وسكوت جميلة كسر گلبي أكثر من البچي عرفت هيّ هم بيها الوجع بس تحاول تخليني أقوى فبقت لازمة راسي وتمسح عليه بهدوء كأنها تحاول تمسح الوجع اللي صار بكل مكان بذاكرتي

:- يا روحي أنتَ لتعوّد گلبك على الخوف أنتَ السند وأنتَ الأمان أولادك يشوفون بيك القوة اللي تخليهم يمشون خطوة لگدام مو بس لخاطرك لخاطر اللي راحوا همين

سحبت إيدها من راسه ولزمت چفوفي بقوة وكملت كلامها

:- من تروح للمكبرة ما راح يشوفون أبوهم المكسور راح يشوفون الأب اللي ما نِسى بس عرف شلون يعيش لخاطرهم اخوانك أرواحهم الطاهرة ما تريد تشوفك هيج مهدود الحيل يريدون يشوفون إخوانهم قوي وعايش على غيابهم

- شسوي؟ بس هي الغصة ما تنبلع مرات أحس نفسي
اختنگ اختنگ من الشوگ!

:- الشوگ هذا لازم يصير قوة يا أبو شُبر تذكر أولادك الاثنين اللي الله انطاك اياهم من جديد تذكر الفرحة اللي شفتها بعيونهم من يشوفونك يمهم وتسوي كلشي وياهم تذكر اخوانك واولاد عمك الي ينادوك الشيخ لان يشوفوك جبيرهم والقوة الهم كل ذولة دينتظروك ما يردوك تضعف

باوعت بعيوني اللي بيها بحر من الوجع و همست

:- أنتَ مو بس أب إلهم أنتَ كل العشيرة مالتهم لا تخلي الغياب يكسرك حتى لا تتكسر العائلة كلها وراك

سكت شوية ظليت صافن بعينها يمكن جنت أدور على جواب لكلامها أو يمكن چنت أدور على روحي المكسورة

- جميلة

:- يا عيون جميلة أنتَ

- صدك تحجين يبت گلب بشير حقچ لازم أصير جبل ما يهزه الريح لخاطرهم أريدهم أقوياء ومتحملين المسؤولية من هسة

رفعت راسي من على صدرها ونضرت الها بعمق ابتسمت ابتسامة خفيفة وصلت لعيوني وهتفت

- فدوة لگلبچ ياريحة العافية أنتِ هم نعمة من ربي

بّست راسها وهي لزمت إيدي اللي حاضنتهَ سكتت الدنيا كلها بينا.

چان الوقت حَنين ودموعه باردة بس الحُب چان دافي دافي لدرجة يخلينا نتحمل كلشي صار وكلشي راح يجي

______________________★______________________

"""" أريــــج الله """"

نضرات إخواني اتوجهت صوب داسِم لمن عرفوني راح اتزوجة اندارلي علي الباقر وهتف وياي

علي الباقر :- راح تتزوجين هذا ؟

داسِم :- ششبي هذا

- لك أنتَ موش نفسك الشفتك على البحيرة ؟

داسِم :- ايي اناا

- أختي جانت ساكنة عندكم و بوقتها كلت النا محد أجانة

داسِم:- لأن خفت عليها اتذكر هي بأي حال أجت النا واجيتوا أنتم ثلاث زلم تدورون عليها خفت لا يطلع وراها شيء وتردون تأذوها واهي دخيلتي

بقيت صافنة لكلامهم وانا اكول بكلبي واعصر بطرف عباتي بأيدي علي الباقر لا تسوي مشكلة هسة الله يخليك

تعبت من المشاكل غمضت عيوني وخليت ايدي على راسي لأن صدعت حيل لزمني علي الهادي وهتف وياي

علي الهادي :- أغاتي أنتِ بخير

- ايي بس راسي مصدع من الصبح

علي الهادي :- اكعدي

- علي الباقر كافي مو وقت هذا الكلام

علي السجاد :- لا وقتة شنو سالفة زواجج هي ومنو هذا

علي الباقر :- هذا أبو الديرة الجانت أختنا بيها

داسِم:- اسمعوني إخوان انا أعرف أختكم وأعرف قصتها قسم لمن دخلت ديرتي ما حسبتها غير مماس و منسة أخواتي وهسة انا كدامكم اريدها بالحلال وبشرع الله ورسولة و الأذى اليصيبها قبلها تلكونة صايبني

علي السجاد :- تعذرنة والله بس نحن ما نعرفك شني أسمك شني عمرك منين أنتَ منهي عائلتك عشيرتك

:- اسمي حَيرام جميل عمري 30 سنة اهلي الماتوا ماتوا والي الله مدهم بالعمر عايشين بالخارج المحافظة وانا من عموم عشيرة الــــ ***

علي الهادي :- اهاا يعني تعرف الشيخ علي الـــ ***

:- أي اعرفة غير شيخ عشيرتي بس ما صحت الي الفرصة التقي بيه وجه لوجه

علي الباقر :- ريحانتي تعي وياي.

عفت داسِم أبين أيدين إخواني علي الرضا و علي السجاد و علي الهادي على ذمة التحقيق

طلعت لطارمة لمن وكفنا حجة وياي .

:- عود صدك تردين تزوجين هذا ؟

- شلون تريد اقنعك ؟

:- ماريد تقنعيني أريج الله هذا موش بشر

- علي الباقر شنو تحجي

:- لج لمن اجيت ادور عليج انا التقيت بيه واول ما اجت عيني بعينة اتحول منضرة بعيني وشفتة بشكلة بالبصيرة

- علي يمكن لان جنت خايف علية وبالك مشغول حيل هل خطاءت بالنضر مو ضروري ناخذ بسوالف البصيرة

:- هسسة البصيرة مو ضروري نأخذ بسوالفهااا ؟؟ أنتِ اختي لو متبدلة

- حبيبي مو هيج قصدي بس تعال وياي وانضرلة هسة واتمعن بالنضر اله شنو تشوف صدكني راح تشوفة نفسة

جنت فاهمة قصد علي الباقر بس ماكدرت اكول شيء هي حقيقة حَيرام وانا كاعدة واجملها بعيون اخوتي

:- أريج الله

- روحي وكل التعب البية

:- أكطعي سالفة الزواج هذا وخليني اخذج هسة واغدي بيچ لواسط ونكعدج معززة مكرمة عند خالي جابر شوفي تعرفيني انا ما متعود اجبرج على شيء ولا اريدج اجبرج ابد لهذا فدوة الج أنتِ جبيرة وواعية يا اخيتي اسمعيني ما مجبورة تتزوجين هيج نماذج وأنتِ حفيدة أحمد الصادق ولا مجبورة على أي شيء هذاك بيتج ومكانج ومحد يتدنالج لو يمس شعره منج

فكرت بكلام علي الباقر كلامة صحيح محد يكدر يتدنى يمي الي وانا هناك ولا مجبورة أسوي اي شيء

بس مماس!

وعدي لمماس وين موقعة بالقصة أنتَ كلتها ياخوية انا حفيدة أحمد الصادق وجدي ما علمنة نكسر الوعد الننطي لو نتراجع عن كلمة انطينها لشخص حتى لو نخسر نفسنا

ما اخيب ضن مماس بيه مثل ما صديقتي الوحيدة خيبت ضني

ولا أكدر اتخلى عن حَيرام بهذا الوقت بعد ما سمعت منة كلمة " احبچ يا مُنقذتي "

يسميني مُنقذتة ماكو مشكلة اذا كملت وياه بس المشكلة راح تكبت اذا تركتة هسة ورحت

بقيت افكر بكلبي وكمل أخوي كلامة وياي بهمسات

:- أريج الله انطيني سبب واحد يخليج تتزوجين هذا ؟

- خوية راح تسمعني

:- كلشي بعلي الباقر يسمعج

- انا اريدة ما انجبرت على الزواج منة انا طلبتة

:- شني أنتِ طلبتي

- اني طلب ان نتزوج وزين منة قبل بية وانا بهذا حالي خوية

:- هي شنييي و زين قبل بيج اريج ليش مستصغرة نفسج ؟

- ما مستصغرة نفسي بسس علي الباقر باوع علية شوفني زين ترى انا مو نفسي اختك الجانت قبل سنة لو سنتين علليي كافي الصار بية كاافي والله زين منة راح يتزوجني واناا ....

ماكدرت اكمل ادموعي نزلت صرت ابجي وامسح عيوني ما تحمل علي الباقر باس راسي وحضني حط راسي على صدرة وهتف وياي

:- أريج الله يا بعد نحري وبعد روحي التعبانة شجاج والله العظيم الزواج راح يزيد هذا شرف و شرف للي ياخذچ شنو زين القبل بيج؟ أنتِ الخير والبركة

بصوت مختنك ويشهك رديت علية

- ما تعرف الدهر شنو مسوي بية ما تعرف شصار بغيابكم راح من عمري هواي وتعبت حيل

رجع وهمس وياي بصوت حنون وقلق جان

:- بنيتي كافي بجي كافي والله ما يهون علية دمعة من عينج باوعيلي زين أنتِ أريج الله ورايحة تتزوجين رجال مو أي رجال رجال گال أختكم دخيلتي يعني هذا خوش زلمة بس خوفي مو منة انا

أرفعت راسي من صدره وامسح دموعي

- من شنو خايف يا علي؟

باوع لعيني بتعب وكالها بصوت متعوب حيل

:- خفت من شوفتي الة بالبصيرة خطفت كلبي هذاك اليوم واندعيت ما تطلعين يمة وهسة من شفتج هو التردين تتزوجينة خفت اكثر ياخوفي يطلع مو بشر مثلنا وما نشوفة على حقيقتة الا بعد ما طاح الفاس براس

بلعت ريــچي بصعوبة وضغطت على حنجرتي حتى اسعفتني بهي الكم كلمة

- علي الباقر حَيرام مو هيچ صدكني حَيرام غير هو حالة من حالنة ويمكن أحسن مننا لا تحكم علية هيج وتأخذ علية نضرة بس لأن أنتَ جنت خايف وما توچد عدل بذاك اليوم حسبتة موش زين

رفع أيدة و بدة يفرك وجهه بضيگ جان ما عاجبة الوضع النحن بي بس مثل الي جبر روحة ولفظ وياي بخنگة

:- الله يسمع منچ ويطلع ضني غلط زين

اتنهدت بالكلام وارتاحت نفسيتي هيج شووي واردفت وياه بأرتياح واني انضرلة بكسر رگبة وشوي ابتسامة بحياء

- يعني هسة راح تكلي مُبارك الزواج ؟

:- ههههههه واني اكدر اكلج لاا ؟

- تعرف اموت عليك

:- وتعرفين انا اعيش عليج

- زين خلينة نفوت لجوة هسة اتاخرنة على الشيخ

:- راح نفوت وراح تزوجين بس خلي ببالچ شي واحد يا أريج أنتِ مو وحدچ أحنة وياچ لو النار صارت جواچ أحنة نطفيها بضلوعنة ديري بالج على روحچ وگلبچ

طبطب على چتفي ورجع حضني بعد ما ابتعدت عن حضنة دخلنا يم إخواتي وداسِم

بقيت براسي أتأمل كلام علي الباقر

وأدعي من كل گلبي انو قراري هذا ما أندم عليه ولا يرجع يكسر گلبي من جديد

بعدها طلعوا اخواني و حَيرام ويردون يرحون للبراني يم الشيخ حتى يُعقد بعد ما وكلت علي السجاد وكيل عني

تركوني كلهم وطلعوا ورجعن بنات الشيخ و مرتة اجني و وكفن يمي الام خلت ايديها على اكتافي وحاولت تخفف التوتر الصاير بية وتخليني اضحك وجنا منتضرين يكمل العقد ليش جنت متحمسة الة ماادري

رغم ادري الراح اتزوجة شنو هَو! بس اتذكر جنت حيل فرحانة وبداخلي طايرة رغم التوتر والتعب الي طلع كلة بعيوني

______________________★______________________

"""" علي الباقر """"

أدركت ان خلص أريج الله ماخذة قرارها ومكثرة هم ما حبيت اضغط عليها لو اجبرها وازيد همها فوك الهم

تركت الأوضاع تمشي مثل ما مخطط الها وما أدخلت بعدها

دخلنا للبراني الشيخ جان كاعد يسبح كعدنة كلنا يمة اخذ هوية حَيرام و هوية أختي مجرد قرأ الاسماء

و أريج الله اختارت علي السجاد يصير الوكيل عنها وعقد القرآن على اكثر من خير

بعد ما خلص وبارك للعريس وبارك النا طلعنا كلنة دخلنا للغرفة البيها أريج الله بعد ما حرم الشيخ فاتوا لجوة

خليت أيد أريج الله بأيد حَيرام واتذكرت ابوي شنو يسوي بعقد كل وحدة من إخواتي سوت الها

علي الباقر :- اللهي بالميامين الهداة من بني هاشم بخاتم النبيين أخ الوحي أبا القاسم بمن صام بمن صلّى بمن صدق بالخاتم بمن أزر بالقرصً ثلاثاً وطوى صائم
بمن ردت لهُ الشمس ببابل والملاء عالم
بحق البضعة الزهراء وهي ست النساء فاطم
بحق البضعة الزهراء وهي ست النساء فاطم
بالمسموم بالمقتول ضلماً فالعن الضالم
بالسجاد بالباقر بالصادق بالكاظم با المسموم في طوسً علياً وابنه العالم
الهي بحق العسكرييّن والمنتظر القائم أجرنا من لضى النيران يا رحمٰن يا راحم
الهي اني اتوجه الك بحق هذا الاسماء واتوسل بهم اليك ان تبارك زواج هؤلاء
وتملئ حياتهم مودة ورئفة ومحبة وان تجعل حياتهم عامرة بذكرك وخشيتك ياالله واجعلهم من أصحاب الذرية الصالحة يا رحمٰن يا راحم

تركت أيدهم وحضنتني أريج الله لمن بعدت عن حضني خليت ايدي على خدها ومسحت ادموعها وهتفت وياها

:- منا وغاد صرتي أم بيت مسوؤلة علية أمام الله وامامنة كلنا اريدج كد هذا الشيء الي أنتِ اختاريتي لنفسج ولا تفكرين روحج وحيدة صارلج شيء تلكيني مزروع كدامج وعمري ودمي جوة رجلج

علي الهادي :- ولا عبالج هي هية راح ننساج صدكيني راح ترجعين ويانة ونحَن ما رضينة على هذا الزواج الا لأن أنتِ تردين بس لا تنسين شيء واحد 11زلمة سيد بظهرج واحدهم يضحيلج بعمرة واخذيها وعد من أصغر اخوانج يا أخت روحي راح ترجعين لديارج وراسج مرفوع حتى لو جان الثمن واحد بينا يخسر حياته ثقي بربج
... نموت احنا حتى أنتِ تعيشين ...

علي الرضا :- لا تفكرين بعبد الحسن ولا بأي بشر سمعج احجاية وهو ما يعرفج خليج هسة مركزة على حياتج وبيتج والسالفة الصارت حلها يمنا نحن راح نحل كلشي وراح نثبت للكل ان اختنا ماكو بأخلاقها

نضرت أختي لعلي السجاد وضحكت وهتفت وياه

اريج الله :- هاا اخوي الچبير ما تريد تكول شيء لأختك قبل لا تروح ؟

:- ههههه شأحجي شأكول انعگد اللساني كلشي كالوا بس أول شيء تعاي لحضني يا روح اخيج الجبير

راحت أريج الله من بين أيدية وحضنت علي السجاد وهو جان يبجي للمرة الأولى صحت الي وشفت اخوي بيها يبجي وهتف وياها وهو ضامها بصدرة

:- لو الدنيا كلها تصير ضدج و كلها تريد تأذيج تعوفيني الكل وتجين تدفنين روحج بروحي ما اخلي احد يتدنالج ابد وانا اخوج كل وأحد سولف عليج شهر بيج لو طلع كلمة هلكدها باسمج راح يدفع من دمة كل حرف بيها

علي السجاد شد على حضن أريج الله كأنه يريد يضمها بداخله ويحميها من كل شر

چانت دموعه تنزل بصمت دموع خوف مو ضعف خوف الأخ على أخته اللي تروح من بين أيديده مو بس زواج هذا زواج اختارته اخته بظروف صعبة

:- يا بعد روحي يا بنيتي انتِ مو بس أختي روحي تروح فدوة لضحكتج ديري بالج على روحج وصلاة الليل لا تعوفيها ربج أقرب إلج من كلشي تذكري بيت حَيرام صار بيتج بس باب بيت اخوانج عمره ما ينسد بوجهج إذا حسيتي بلحظة ضُعف بلحظة ضيم بس رفعي سماعة التليفون والله العظيم الدنيا كلة اكسرها على راس أي واحد يفكر يأذيج أنتِ هسة صرتي أمانة عد حَيرام وإذا قصر وياج بشي والله ما يلومني إلا لساني

فكت أريج الله من حضن علي السجاد عيونها مليانة دموع بس ابتسامة هادئة على شفايفها ابتسامة اللي متوكلة على ربها وواثقة بأخوانها

أريج الله :- يا بعد عمري انتم كلكم والله سندي و ضوا عيوني ما خفت ولا فكرت للحضة بيوم اخاف لأن اعرف منو وراي اعرف عندي 11 سيد زلمة ابن زلمة يسوون الدنيا وما بيها أنتَ و علي الباقر و علي الرضا و علي الهادي وكل أخوتي سويتولي
شي عمري ما أنساه أبد ما أنسى وگفتكم هاي ادعولي بس ادعولي الله يباركلي بخطوتي هاي ويجعلها فاتحة خير عليه

تقدم حَيرام بهدوء يباوع بعيون أريج الله بحب وتقدير وعيونه ما تخلو من الخجل من عظمة هاي العائلة ودموعهم على أختهم

حَيرام :- يا إخوتي علي الباقر علي السجاد كلكم أريج الله صارت روحي مو بس زوجتي أمانة الله وأمانتكم بركبتي ليوم الدين والله لو تطلب عيوني ما أتردد هي تدري شكد أحبها وأقدرها والله يشهد على كلامي إذا بيوم حسيتوها ما مرتاحة الباب هذا مفتوح وهالبيت هذا يظل مفتوح إلها بس أوعدكم أسوي المستحيل حتى ما تضطر ترجع إلا بزيارة وترجع لبيتها مرفوعة الراس ومبتسمة دعواتكم إلنا

علي الباقر هز رأسه لحَيرام بعيونه نظرة تحذير ممزوجة بثقة

علي الباقر :- كلمة وحدة بس أختنا ما تزعل ضحكة وحدة منها تسوى الدنيا هاي آخر وصية إلك هسه أخذ مرتك وروحوا بسلامة الله دير بالك عليها ترانا مو بعيدين هاا

أخذ مفتاح السيارة حَيرام صارت الغرفة تحت هدوء مخيف بس صوت الشهكات الخفيفة جان يكسره

أريج الله التفتت لأخوانها كلهم واحد واحد سلمت عليهم ودموعها تنزل بغزارة هالمرة دموع الوداع المؤقت مو نفس وداعها اخر مرة وياهم

من وصلت يم علي الهادي وعلي الرضا الصغار حضنتهم بكل قوتها

أريج الله :- أخوتي الزغار عينكم على أمي وأبوي وادرسوا زين أريدكم ترفعون راس أختكم بدراستكم واشوفكم أحسن دكاترة بالعراق لا تنسوني

علي الهادي : - ما ننساج أبد مو تنسينا أنتِ!

علي الرضا :- راح نجيب أعلى المعدلات حتى تفرحين بينا وراح نرد كل كلمة انگالت عليج وعد سادة

علي السجاد مسح دموعه وتقدم لزم أيد أريج الله الحاضنة لإيد حَيرام

علي السجاد :- يلا بوية توكلوا على الله باليمن والبركات

ويا هاي الجملة طلعوا من الغرفة العرسان و أريج الله التفتت لأخوانها النظرة الأخيرة نظرة حُب تحدي وشكر

وطلعت من البيت متوجهة لحياة جديدة ووراها ضيوف البيت اللي هم أخوانها واگفين على الباب عيونهم تودعها وكل واحد بداخله عهد

"نحن الزلم اللي بظهرها وعمرها ما تنذل ما دام النفس بينا "

انغلقت صفحة صعبة بحياة أريج الله وبدت صفحة جديدة صفحة كتبتها بإرادتها وقوتها

وبدعم من إخوة هم سندها وتاجها اخوتها بقوا واكفين بساحة البيت حزن الوداع على وجوههم بس فخر الاختيار والقوة مال أختهم مغطي على كلشي

وهم كذالك ودعوا الشيخ واتشكروا منة وطلعوا ليرجعون لبغداد

______________________★______________________

""" طَيبة الزهراء """

ماكو باليد حيلة هسة كلشي خلص وحيلتي الوحيدة هي علي الباقر جنت واثقة بيه ثقة عمية حيل

كملت تغير ملابسي وجهزت نفسي خليت مكياج خفيف ولبست حجابي و دخل ألمعتز باالله بعد ما فتح الباب وفات وكف كدامي

ما جان أكو دموع بعيني ولا جان اكو خوف بكلبي وكفت بصرامة كدامة طلع من جيبة أسوار مد ايدة ولفظ وياي

:- ألبسي هذا السوار

- مال منو هذا ؟

:- ألبسي هسة وبدون سؤال

- صدك معتز هيج تسوي؟

:- صدكيني وثقي لمصلحتج ماراح اخلي فلان وعلان يتحكم بيج

- أنتَ موجود محد راح يتحكم بية بوجودك اتراجع هسة بعد أكو وقت والله

:- انا ما دايم الچ ظهر ما دايملچ

- عزوز

:- طيبة يلا تعي وانزلي وراي .

عافني اخوي وطلع من الغرفه لبست السوار وخليتة بيدي

دخلت رحمة الزهراء نضرتها وعيوني مغوركة دمووع اجت علية وحضنتني وهتفت وياي .

:- هذا نصيبج من الدنيا يا روح اخيتج

- تشوفين قرار ألمعتز باالله صحيح ؟

:- هو خطأ طريقة الإختيار والوقت بس اختيارة انا اشوفة صحيح يعني علي الصادق اكيد صح شوفي طيييبات مستحيل ألمعتز باالله يختار النا شيء يضرنا بي والدليل ذاك اليوم سمع كلامج ومكالچ شيء سوة الي تردينة وطلع قرارج خطأ وهم ما كالج شيء جربي هسة امشي على كلامة و بعدين شبي علي الصادق

- مابي شيء بالعكس حيل لطيف وياي وما شايفة منة المو زين

:- چا ليش ما تردينة

- لأن ماريدة رحمة الزهراء ماريدة

:- اني أكول دامچ هيج محتارة أخذي استخارة وانزليي راح انتضرج جوةة تمام يروحي جمالج الطالعة بي

- تمام .

راحت رحمة الزهراء و انا كمت أريد أخذ استخارة قرآن بس طلعت كدامي المسبحة مال علي الباقر

الي خرزها ابيض و أسود على الرغم من انا ما احبها واضوج منها بس الخبيث مخليها بغرفتي اخذتها وسويت استخارة بيها

مو بالقرآن وطلعت نتيجة الاستخارة ( مخيرة )

بستها و عفت المسبحة على الطبلة ونزلت واني لابسة فستان مو صارخ كلش نازك بنفس الوقت لونة هادئ ولبست وياه ربطة ماخذة منة لون شوي

هذا الفستان هو جايبة الي علي الباقر هدية بعيد ميلادي وجان يريد يشوفني بيه وهسة راح يشوفني واني لابستة وانخطب للأخوه

لمن نزلت لكيت علي الباقر و اخوانة كلهم وامي و العلوية و الكل كاعد بالصالة
ماعدا علي الصادق و علي الكاظم ماجانوا موجودين

رفعلي عينة علي الباقر وما عرف ينزلها بقى صافن بية ضحك علي الرضا وهتف وياي

علي الرضا :- بووية شني جاينة العيد هنااا شني هذا الچمال يا ست الكل ؟

طيبة الزهراء :- لبس عادي ترى

علي السجاد :- باجر عيد واحنا ماعندنا خبر لو خطأ بالتقويم ؟

ألمعتز باالله :- العيد الييوم وباقيلة ساعة بس ويبلش

علي الباقر :- عيديش ؟

:- لا تستعجلون على رزقكم

أم رحمة :- يمة بناتي تعي يمي اللهم صلّ على محمد وآل بيت محمد

علي الهادي :- عين الحسود بيها عود طگطگوا حرمل عليها لا تنحسسد البنت بووووييييةةة

ام البنين :- من البس شيء حلوو ما تطلعلي هيج رياگشن ؟؟

علي الهادي :- ترى چي اقلد على خالتي شمالچ الغيرة عندج دوم متفعلة

- ااشش حتى تقليد لا تقلد اكتفي بالنضر

ام رحمة :- ولككك ما تستحي تقلد علية وانا خالتك ؟

علي السجاد :- اااييي والله ولكك تريد نعيد تربيتك ؟؟

ام البنين :- لحد يصيح على رچللييي ترى نعوف الكم البيت ونهچ

العلوية :- وين ترحون ؟

- لأي مكاان بس محد يصيح على رچلييي

رحت و كعدت يم امي وعيوني بحركة وألم تصد لعلي الباقر الي متونس بالنضر اي وميدري شنو منتضرة

اندك الباب واندك كلبي وياه خفت لا علي الصادق و علي الكاظم أجووي

كام ألمعتز باالله و فتح الباب فاتوا للصالة عمي عبد الحسن و جدي عيسى الصادق
وابنة مؤيد لمن دخلوا كام الهم علي الباقر وهتف

علي الباقر :- شچاي تسوون هنا هذول الثلاثي المشوؤم شني چابهم ؟

عيسى :- أنتَ نسيت تربيتك كلش هذول هم جدك وابوك يا سيد يا ابن الأصول

:- انا ابن أصول غصب عنك وعن أبنك يلا انطونا عرض أجتافكم واتوكلوا منناا

عبد الحسن :- علي الباقر لا تزودهااا اكعد واسكت

:- لااا مارااح اكعد ولا راااح اسكت ولا عبالك سالفتك وي امي ترى سكتت الك بس لأن هي تريد هيچ وهسة اطلعوا يلااا بيتنا ما يتشرف بيكم بررة

عيسى :- علي الباقر لا تخلينا نخلي جواك خط احمر

:- وحگ هو علي اذا ما طلعوا هساع انا الي اخلي الناس من تنشر صوركم تخلي فوكهن خط أسود

علي السجاد :- علي الباقر اكعد خلي نشوف ليش چايين وشنو يردون

علي الهادي :- لا تحط فوك النار حطب باقري أكعدد خلينة نسمع

:- ما راح اسمع شيء من هذول خلهم يطلعون لا النار هناا هسةة تشتعل كولوا الهمم يطلعوون

طيبة الزهراء :- علي الباقر كاافي اكعد وخليهم يحجون اليردونة ويرحون سبيت الدنيا بصوتك وحركت دمك على شيء مالها داعي

:- هَي هية صار سكتت يلا خلصونة شني عندكم ؟؟

بعد كلامي وياه ابتعد عن علي السجاد و علي الهادي الجانوا لازمينة وكعد

كعدنا كلنا و كدامنة صاروا عبد الحسن و عيسى ومؤيد وكلنا منتضرين يسولفون ونعرف شني عندهم وأردف وياهم ألمعتز باالله

ألمعتز باالله :- أييي استرسلوا بالچايين علمودة ؟

عيسى :- الله عز وجل كال ﴿ وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَلِكَ لَآيَاتٍ لِّقَوْمٍ يَتَفَكَّرُونَ ﴾
ولأن بنعمة رب العالمين تتم الصالحات جايين على سنة الله وجدكم رسولة الكريم طالبين أيد اخيتك الكريمة طيبة الزهراء الى ابنا علي الباقر

عم السكوت ملامحي تغيرت صرت انضر لعلي الباقر الي من الصدمة كعد عدل وصار يباوع الهم وكان السانة انعكد مابيه يلفظ حرف واحد

شنو دا يصير عزوز يكلي بليل راح تنخطبين لعلي الصادق وهذول يخطبوني لعلي الباقر اكو لعبة اكو شيء بالسالفة هي

ما حجيت شيء ابد جنت منتضرة أفهم السالفة على الآخر حتى افهم واعرف شنو أكول شنو احجي

هتف علي الباقر وي سكوت الموجودين كلهم

:- شكووو منوو تخطبون المنن ؟ منين طلعتوا بهي السالفة هسااع ؟

ألمعتز باالله :- خلصتوا كلامكم هسة ؟

عبد الحسن :- منتضرين نسمع قرارك شنو علي الباقر اخوك و تعرفة

:- زين هسة انا سمعتكم وخليتكم تكملون بدون ما اقاطع احد بيكم صار دوركم تسمعوني للآخر وبدون ما احد يقاطعني

عيسى :- كول يلا

:- على عيني أخوي علي الباقر والي أشرف يصير أخوي و صاحبي وفوكهن نسيبي بس للأسف مااكدر انطيكم مالكم قسمة يمي

عبد الحسن :- وليش ما تكدر تنطينة ؟

:- لان باختصار تام طيبة الزهراء حاجي بسالفتها وي علي الصادق ومنطيها آلة وتصدك بربك باجر هو عقد قرآنهم وحتى أختي هي الفصعونة تحبة وتريدة مااكدر اكسر كلبها

عبد الحسن :- علي الصادق ؟

:- أتخيل عليي الصادق بذاات نفسة راح يأخذ البنت الي أنتَ ردتها لإبنك بس يلاا ولا يهمككك ما راحت لغريب يبقون إخوان يعني أنتَ ما خسرت شيء طيبة الزهراء بقت چنتك

عبد الحسن :- يعني راح تزوج اختك لعلي الصادق يا المعتز باالله مو هيج ؟ سويتها شغلة اعنااد

:- وسبي زينب ايييي يا عمي ايييي شمالك ما متقبل الفكررة اختيي راح تأخذ ابن عمي علي الصادق بالك لا تنجلط خف على كلبك ترى دخلت الـ 60 من عمرك أنتَ موش ذاك الاولي حتى تعصب ويحترك دمك هيج بسهولة

علي الرضا :- زين بوية ننطيك الأقوى ؟

علي الهادي :- لااا رووضضيي على كيفك لا ينجلط ويروح بيها ونتيتم ابونا هذا مو كليوم يصح النا أبو

علي الرضا :- لااا والله إلا انجيبة بيها هي خربانة خربانة اليوم ترى يا بوية علي الصادق و علي الكاظم ردو لبيتهم و ديرتهم وسكنوا ويانة هنا

عبد الحسن :- شگاعد تحجي هي الشغلة بمزاجكم ؟ لو على بالكم طلعت من البيت هي هية خلص عفتة لأم طيرة ؟ هذول ما يدخلون بيتي وانا حالف وقاسم

العلوية :- موش بشورك البيت هذا بيت جدهم و ورث ابوهم يعني ورثهم حالهم حال البقية هنا منا وغادي اولادي ما يعتبون عتبة الدار هذا ولا تغمض عينهم برة البيت

عيسى :- والله خوش مسوين عصابة هنا تعيشون اليعجبكم وتزوجون اليعجبكم وماعندكم جبير تردون الة ولا أي شيء هاااا ؟

ألمعتز باالله :- ليش عندك اعتراض جديي ؟؟

عبد الحسن :- واضح حيل طالعة عينكم نسيتوا منو انا وشكدر أسوي هاا ولكم كبرتوا وصار عدكم الجرئة تداهروني

علي الباقر :- لا ما نسينة منو أنتَ، أنتَ عبد الحسن التريدة يصير أنتِ الي منعت مرة اخوك توصل وترجع لبيتها واولادها أنتَ الي جبرت ابن اخوك يحبس اختة بحجة الخوف وخليتة يحرمها من أبسط حقوقها أنتَ نفسك الي حتى أبن عمك سعيد ما سلم من شرك أنتَ الي كضيتها علينة تسوي عداوات وي الناس مالهن اي داعي أنتَ نفسك الي ابوك ما خلص منك ولا من اسوالفك خليتة حتى غضب يغضب عليك أنتَ عبد الحسن الي تريدنا نطلع عبيد الك شتريد نسوي لك حتى اختتيي اختييي ما كدرت تخلص روحها من فعايلك الغلط موش بالسوتة اختي الغلط من الأساس مكبوت بيك أنتَ.. انا راح اصعد هسة انزل ماريد اشوفكم هنا لا علية وعلى اعداىي وما يهمني أحد لا ابو ولا جد

عافنة علي الباقر وصعد وانا ما متقبلة شيء من الصار وهم متفاجاة يعني بأذانة سمع باجر عقد قرآني من علي الصادق ما علق على هذا الموضوع ؟

صرت اشوف شلون شرارة الحقد والبغض تطير من عيون عبد الحسن بس ما شفت نضرات التحدي و الإصرار بعيون علي الباقر الجان المفروض يدافع لحبة هو راح يخسرني

راح يشوفني أصير لأخوه وماا كال شيء! لا هي ما مترجيتها منك كل أملي بيك علي الباقر لا تكسرني هيج لالا

ظل السكوت معلك بالصالة والكل يباوع على مكان علي الباقر الفارغ و على طيبة الزهراء اللي دموعها صارت تحفر خدودها بس ما تنزل

عبد الحسن يصيح بصوت هز البيت

:- شفتووو؟ شفتوو ابنكم شلون يتجاوز؟ هذا تربيتج يا علوية؟

ردت العلوية عليه بصوت هادئ وثكيل

:- تربيتي أحسن من تربيتك ابني ما يبيع إخوانه ولا يهدد بيهم ابني يتجاوز بالحق وما يسكت على الباطل! روح شوف نفسك وشوف ابنك علي الصادق شسويت بيه لحد ما هديت حيّله وطلعته من البيت وهسة جاي تخطب بنت ابني قبلك خطبها حتى فرحتة تريد تاخذها منه

عيسى :- يا المعتز باالله أنتَ شكاعد تسوي؟ جاي تخرب على روحك وعلى أختك! علي الباقر يريدها وأنتَ جاي تسويها عِناد

ألمعتز باالله :- عمّي وجدّي أنا اللي أسوي المصلحة لأختي وأختي تريد علي الصادق وهالشي ما بيه عناد علي الصادق رجال وما بيه عيب وطيبة الزهراء
(باوعلها نظرة سريعة وحاسمة) هي اللي اختارت

طيبة الزهراء رفعت عيونها باستغراب للمعتز باالله هي ما اختارت علي الصادق هو اللي فرض عليها

طيبة الزهراء بهمس ما ينسمع بس هي تسمعه

:- يا جذّاب!

عبد الحسن يهز إيده بيأس وغضب يردف

:- زين يا معتز أخذت الكلمة بس هاي الليلة ما راح تمر على خير خلينا نشوف شنو راح يصير دامك اختاريت هذاك المغضوب علية

كام عبد الحسن وعيسى ومؤيد طلعوا من البيت والشر يتطاير من عيونهم

صعدت طيبة الزهراء تركض لغرفة علي الباقر و دموعها نزلت مثل الشلال لكت علي الباقر كاعد على قنفة صغيرة بالغرفة مدنك راسه وحاط إيده على كصته

اردفت طيبة الزهراء بصوت يرجف من القهر

:- لييش ما حجيت شي ليش ما دافعت عني؟ ليش ما كلت إني أريدك؟ ليش خليتني لأخوك؟

هنا علي الباقر يرفع راسه عيونه حمر بس ما بيهن دموع ينضر الها ببرود غريب

- شنو جنتي ترديني أسوي؟ أضاربهم ؟ أكسر كلمة أخوج وهو خطبج لأخوي؟

:- تكسر كلمة أخوي؟ وأنا؟ ما كسرت كلبي بهالبرود؟ أنتَ تعرف إني أحبك!

- وشنو الفايدة؟ المعتز باالله خلص كلشي انطاج لعلي الصادق وبعدين علي الصادق خوش ولد

:- خوش ولد ؟ لككك انااا ما أريد الخوش ولد! أريدك أنتَ! ليش ضليت سااكتت ليش ما حجيت شيء جووة علي الباقر ليش هيج سويت بية راضي على كلشي كالة المعتز باالله ؟

كام علي الباقر وجان يحاول يجر النفس ورجع نضر لطيبة الزهراء وكأن توه شافها مو قبل شوي حجة وياها حسسها كانها توها فاتت علية للغرفة جان مو طبيعي ابد
رد وكاللها

- ياهلا بضوة عيني

:- اذا انا ضوا عينك ليش وافقت على كلام ألمعتز باالله جوة

- ما وافقت انا

:- بس أنتَ ضليت ساكت علي الباقر سكوتك كسرني سكوتك يعني رضاك

- طيبة أنتِ هم ضليتي ساكتة شنو يعني موافقة على زواجج ؟

:- انا بنت لك أنتَ تدري بخبال ألمعتز باالله اذا رديت علية يحفر قبري مااكدر اعاند انا سكتت لان جان كل ضني بيك راح تسبي وراح تكلب الدنيا وتكول الهم انا احب طيبة وما راح ياخذها غيري!

- طيبات و انا مثلج حالي من حالج مااكدر اكسر كلام ألمعتز باالله هَو هسة يريد يزوجج علي الصادق لأن ابوي طلب ايدج إلي سواها سالفة عناد ما تعرفين عقلية اخوووج شايل عقل طير يفكر بس لليوم ما يفكر لباجر

:- شنو يعني ما تكدر تكسر كلام ألمعتز باالله ؟
علي الباقر أنتَ زلمة كل الساكن بهذا البيت يحسبون الك ألف احساب ومن ضمنهم ألمعتز باالله شنو ماتكدر تكسر كلامة تكدر تسوي كلشي بس كول أنتَ متريد لك أنتَ لو تخلي شيء براسك لو تحت سابع أرض تطلعة وتسوي الك هسة صرت وياي ما تكدر تكسر كلام اخوي وصار ألمعتز باالله يخوف

- طيبات افهميني زواجي منج راح يخسرني علاقتي باالمعتز باالله واني اخسر روحي ولا أخسر اخوي لا تطلبين مني هيج

:- علي الباقر صدك تحجي لو جي تفرها على عقلي باع كلبي والله چي يحترك مثل خيم زينب الله يخليك علي الباقر لا تصير الشمر وتزيد هي النار اخذلي دور الكافل لو لمرة وحدة بسس وطفي نار كلبي بماي حُبك تعال وياي هسة انزل وكول الهم طيبة الزهراء راح تتزوجني غصب على اليرضى و الما يرضى تعاال العباس عليك علي الباقر تعال وياي يلا وسويها خلينا ننزل الهم قبل لا يخرب كلشي تعاال

هنا طيبة الزهراء لزمت ايد علي الباقر وجانت تريد منه ينزل وياها حتى الكل يعرف ان هم ما لبعض

ثبت نفسة علي الباقر وسحب ايده من ايدها وهَي التفتت إله وصارت تنضرلة وادموعها عشرة عشرة على خدها

همس وياها بصوت مخنوك بس صايبة الجمود

- اذا انا سويت الأنت تردينه هسة وأخذتج غصب عن الكل عبد الحسن راح يفرح لان راح يصير الي يريدة وهذا الشيء راح يكسر ألمعتز باالله و مو علي الباقر اليكسر إخوه طيبات انا مستعد اخسرج واخسر كلبي بس ما أخسر اخوي واخلي ابوي يتشمت بيه فوك كشرته على وهج الطف

مالت براسها وهي تستمع لكلمات علي الباقر الجانوا مثل البسامير التندك بجدار كلبها ومن خلص كلامة وسكت ولاحضت ماعندة شيء يحجي بي بعد
مسحت ادموعها وهتفت وياه بصوت يرجف ومبحوح

:- مستعد تخسرني ابا الحسن ؟

ابتسم بوجهَ علي الباقر و هتف بكلبة : سبق الها واتخلت عني وخسرتي بدون سبب وهسة انا عندي أسباب كلش قوية راح تخليني أكسر كلبي واخلي بي جرح يبقى ينزف لمماتي بس المهم ما اخسر اخوي

هتف هي الكلمات بصوت محد يسمعة بس كلبة و عقلة بس رجع وحرك شفايفة بصوت المقابل يفرزنة وطلع كلماتة

- طيبات عادي اخسرج مو قبل فترة أنتِ خسرتيني هسة دوري انا اخسرج

:- علييي أنتَ خليت هذا رد فعلك بس لأن انا اتخليت عنك لخاطر آدم ؟

- لاااا رد فعلي هذا مالة غرض بشي منوو هذا آدم وابيش الكيلو مالتة ؟اصلا اذا ذاك اليوم حضرتج اتخليتي عني لأن ماكدرتي تسيطرين على مراهقتج اليوم انا اتخلى عنج لان ماريد أخوي يكرهني واخسرة
طييباات لا تعاتبيني قبل ما تركزين أبين التخلي مالتي والتخلي مالتج أنتِ سويتها تلبية لرغباتج لان مكدرتي تسيطرين ، وانا هسة سويتها تلبية لأخوي
انا المكسور بهي القصة ومحد غيري

:- يعني كلامك هسة هيجج وهذا تفكيرك ؟

- أنتِ وصلتي لهذا الحد وخليتي هيج يصير جنتي تكدرين تديرين وجهج وترحين بدون رجعة بس أنتِ اختاريتي ترجعين

:- هههههه تمام علي الباقر تمام اذا أنتَ مستعد تخسرني فأاحب اكلك أنتَ من البداية ما عرفت تحبني ولا أصلا حبيتني ولا تعرف شلون الواحد يحب وراح اقبل صدك بهذا الزواج وما اسمع ألمعتز باالله أي معارضة والله شاهد على كلامك هذا
راح اتزوج وبعينك راح تشوفني بالابيض لاخوك وراح اجي واسكن هنااا وراح تتحمل تشوفنا كل يوم ومو بس هيج وعد اخليك أنتَ تسمي اول طفل الي وراح اكسرك بدال هي كسرتك الي الف كسرة حتى تعرف شنو معنى كلمة مستعد اخسرج شوف هي مجرد كلمة طلعت منك بس والله اخليك تحس بيها وبكل مشاعرها وأنتَ تباوع لنفسك وتشوف صدك خسرتني يا علي الباقر يا ابن عبد الحسن لكك صرت ما تفرق شيء عن ابوك بچسارة الكلب
ولوو ليشش احجي ولييش اتعب نفسي ومن الأساس صدكك ليش اجيت لهنااا لك انا شنو اجيت اترجة منكك وأنتَ أبن عبد الحسن ؟

تكول الة :- كلشي بَيدك جان مُمكن
وانتَ ماقدمت لليهواك كلمه

عافتة ونزلت بقى يباوع عليها راد يحجي راد يصيح الها بس سكت واتراجع لورة وكعد وصار يفكر بينة وبين نفسة :

انا هسة خسرت حُب جنت منتضرة 15 سنة يكبر
انا هسة خسرت حُبي وكسرت كلبي علمود حليب خوتنا يا ألمعتز باالله يضل بخير
خسرت طيبة ومو بسهل علية اخسرها بس خسرتها علمود الإخوة الي فنى عمرة السيد احمد الصادق بزرعها بينة ما تنمحي اتحمل خسارتج
واتحمل جرحي الينزف

بس ما اتحمل يعاتبني جدي بيوم القيامة لأن ما جنت كد وصيتة التركها وراح

وتعيريني يا طيبة الزهراء چي انا أبن عبد الحسن ؟
وأنتِ اكثر وحدة تعرف انا ما ورثت من ابوي شيء ولو ورثت جان ما حنيت على اخواني ولا ضحيت علمودهم

لا يا طيبة الزهراء لا خطأنة هواي علي الباقر تربية احمد الصادق ومو عبد الحسن
مستحيل اصير مثل أبوي لو اعرف انا أصير چتال روحي

نفض علي الباقر هاي الأفكار من راسه وگام وگف يم الشباج عيونه مدمّعة بس يحاول يكبس الدمعة بالقوة صوته طلع خافت وهو يحچي وي نفسه :

بس يا گلبي يا گلبي ادري بيك ما ترييد تقتنع بالي سويته شراح تسوي من تشوفها كل يوم كدامك؟ تلبس الابيض لغيرك؟ شراح تتحمل من تجيب الطفل وتسميه أنتَ؟ هي ما چانت تهدد هي چانت تتوعّد بعذابي وصدگ راح تسوي لان طيبة الزهراء اذا خلت شي براسها تسويّه

هي گالت : أنتَ من البداية ما عرفت تحبني ، لا يا طيبة أنا حبيتچ لدرجة ضحيت بيچ حتى لا أشوف أخوي مكسور الحب مو بس أخذ الحب تضحية بس تضحيتي هاي طلعت قاسية عليچ وعليَّ

چانت ايده على الشباك وعيونه باللا مكان وفجأة انفتح باب الغرفة بهدوء التفت علي الباقر بسرعة وشاف المعتز بالله واگف بالباب وعيونه ما تنوصف
بيها حزن وبيها عتب وبيها شي غريب

تعدل علي الباقر بوگفته وگال ببرود مصطنع:

- خير معتز؟ محتاج شي؟

دخل المعتز بالله وسد الباب وراه بهدوء تقدم خطوتين ووكف كدام علي الباقر وهتف .

:- ابد ما تخيلتها منك ياخوية كلهذا الفترة وأنتَ مخلي عينك على أختي من شووكت عشكتها بلة ؟

أخذ علي الباقر يرد علية وبدون ما ينضرله أصلا

- ماعندي هيج شيء ومستحيل انضر لعرضك

:- دام هذا حجيك چا عبد الحسن شلون وصله واجه وطلبها الك اذا أنتَ ماجنت تريدها ؟

اندار اله ونتر بوجه ألمعتز باالله

- معتز انا موش طفل حتى أروح لأبوي واكلة اريد افلانة روح اطلبها الي انا لو جنت اريد طيبة جان اجيت وحطيت عيني بعينك وكتلك أريدها لا اخاف ولا اهتز وأنتَ ادرى بهي السالفة

:- چا يعني عبد الحسن من راسة اجاني وخطبلك طيبة الزهراء هو لو ميدري بيك تحبها وتريدها جان ما سوة هيج ولك علي الباقر طيبة الزهراء طفللةةة .

ضحك علي الباقر وضحك من كلبة بعد كلام ألمعتز باالله هذا على كد ما جان مكسور ضحك وهتف وياه

- لا والله صدك! هسة عرفت ان طيبة الزهراء طفلة لمن انطيتها لادم وطلكتها ما جانت طفلة لمن هسة تريد تنطيها لعلي الصادق موو طفلة بس چي وصلت السالفة يم علي الباقر صارت طفلة مو هيچ ؟

رفع حاجبة ألمعتز باالله واردف بصوت حسم

:- يعني جنت تريدها! أنتَ علي الباقر تحب طيبة الزهراء اختي

رفع علي الباقر راسة لفوك جرّ النفس قوي ورجع عاين للمعتز باالله ماكو شيء ينضم بعد ولا نخاف من شيء و هتف وياه

- ايي احبها مو صالي يوم لو يومين عزوز انا عاشق طيبات من انولدت وانحطت رضيعة أبين ايدية وأذنت الها انتضرتها سنة على سنة وحبي جان يكبر وياها وجنت مقرر انا اجي واخطبها منك بس مااعرف شلون ابوي اتغافلني وراح وطلبها الي رغم انا والله شاهد علية محد يعرف بموضوع اريد اتزوجها ولا طلبت من أبوي ولا حجيت وياه وما حطيت عيني على عرضك ياخوية مااكوو مثل حُبي لطيبات جنت اخاف عليها من نفسي ولحد هي الثانية انا احبها وأخاف عليها

ضحك ألمعتز باالله بوجه علي الباقر وهتف وياه بحقد و نضرة جان علي الباقر أول مرة يشوفها بعيون أخوه

:- چا همزين كلتلي الحمدالله طلعت تحبها وتريدها مااريد اكون بس انا الخسران وما اريد بس انا الاتعذب دامك تحبها وتريدها راح اخليك تشرب من نفس الكلاص الي شربت منة انااا من ورة ابوك مثل ما خطف حُب عمري و حشيشة كلبي راح اخطف حُب عمرك وصمام كلبك مثل ما ابوك جعل وهج الطف تتزوج وانا الاحبها واريدها راح اخلي طيبة الزهراء تتزوج وأنتَ تحبها وتريدها والفرق بيني وبينك انا راح اشوف وهج الطف وي غيري وبعيدة علية ويمكن ما تصح الي الفرصة اشوفها بعد اما أنتَ راح تشوفها وي اخوك وكليوم راح تشوفها كل ما تكعد الصبح على الغدة على العشة راح تشوفها

- أنتَ حاقد على ابوي انا وطيبة الزهراء شنو ذنبنا ندفع الثمن ؟

ألمعتز باالله هنا طاحن ادموعة وصار ينتر أبوجه علي الباقر وهو يضرب على صدرة ويأشر على نفسة

:- أنا شنو ذنبي علي الباقر اناا شنو ذنبي ولك ضاع حبي وراحت وهج من ايدي بدون شعور انا شنو ذنبي شماخذ وي ابوك شنو المنطي حتى عبد الحسن يسوي هيج بية ؟

- وأنتَ حسيت بهذا الشعور والانكسار تكوم تكسرنا انا وطيبات على كسرتك ؟

:- ليش البشير قيصر ما منع أخته تتزوج هو يدريني احبها وانا طلبتها منة ليش المطلوب مني بس أنا اتنازل واخلي أختي تتزوج على مزاجكم ليش محد اتنازل الي؟

- لان وهج الطف هي الما تريدك تريد البشير يجبر اخته تتزوجك

:- لا وهج الطف تريدني وتحبني بس العله ابوك دخل ابيناتنا وخلاها تتزوج هذا خليفة علمود أمها

- معتز ترى ابوي اتقصد يخطب طيبات الي مو حباً بية ولا لسواد عيوني لو يريد يشوفني متزوج ومرتاح ولك افهم عقلية عبد الحسن هو يدريك ما تسمع كلامة لهذا اختار طيبات وخطبها الي حتى ترفضني أنتَ وتخرب علاقتنا

:- وهي انا راح أطيحة بالحفرة الي حفرها بيدة وراح ازوج طيبات لأكثر ابن يحبة أهو ويموت علية

- اذا أنتَ تريد علي الصادق هي هية أنسى انا احب طيبات وراح اطلعها من بالي و كلبي مو شيء طيبات كدام صحبتنة

:- بس انا لااا .. مااكدر اخلي كلبي جبير مثل كلبك لو اشوفكم بأمس الحاچة الي يا أولاد عبد الحسن ما يرف الي چفن الكم ولا التفتت الكم حتى

وخر ايدي الجانت على ايدة وطلع من الغرفة ما جنت اريد اشوف نهاية خوتنا وصداقتنا هيج تنكتب

ماريد اخلي عبد الحسن يدخل ويخرب شيء جدي راح وهو همة الوحيد يحافظ عليه

ماراح اخلي نفس السادة هيج يصير بيه

ادري يا معتز هذا الكلام موش من كلبك أنتَ أترف من ان تحقد علينة لو هيج تعوفنة لا تعرف كلش زين مالنة غرض بسوالف ابونة بس الزمن حكم علينة نصير بأسمة .

خطيت خطوات مكسورة ونزلت على الكاع فرشت السجادة ومضيت ساجد لربي استغفرة لكل نضرة صارت لطيبات غير شرعية

استغفرة لكل تفكيري بيها حيل استغفرت انا جنت متحمل ذنب حبي لطيبات وجانت هي الوحيدة المستعد اتحمل عقاب ربي علمودها

بس هسة ادركت ان الشيء الما يرضي الله نهايتة ما ترضيك

رحت وفتحت الميز وطلعت كتابي الأسود الي بالعادة اكتب اذنوب يومي بي

طلعت ورقة جديدة وكتبت بخط جبير وواضح أسم طيبة الزهراء

راح تبقى أعظم اذنوبي

______________________★______________________

"""" عَلــي السجاد """"

تركتهم كاعدين بالصالة وصعدت لفوك بعد طلعة ابوي جنت محتام على شوفة علي الباقر بعد قرار ألمعتز باالله الغير واعي

بس حبيت اتركة لوحدة هليلة هي لان ادري صعبة وماريد ازيد همة هم بسوالفي
دخلت للغرفة لكيت لينا على الجرباية جي تلاعب علي التقي و علي النقي

و نور الزهراء بالكاع بيدها طوبة شوي جبيرة حيل نايمة على ظهرها وجي تخلي الطوبة بحلكها وتطلعها

رحت واتمددت يم نورايتي واخذت الطوبة من ايدها وبستها بحلكها وضحكتها ملت الغرفة بس حسّت بية

شلتها وانا النمت بالكاع على ظهري وخليتها على صدري بدت تلعب بديها الاصغار بلحيتي واني ذايب بيها

واحجي وياها وهي هم تحجي وياي وجانت ترد علية ب اغا ادد انييي
ماجانت تكدر تحجي ولاا كلمة بعدهي بنيتي توها كملت الـسبع شهور من عمرها وصارت 8شهور

بقيت ابوس بنحرها ولمن لينا نومت إخوانها وخلتهم بالمهد مالتهم اجتي الي حتى تأخذ نور الزهراء من ايدي و تنومها كمت وكعدت عدل انطيت نوارة لامها بعد ما اكلتها أكل

:- يمااا نووارتييي يردون ياخذونج منييي يا قزح عيوني يلا باباتيييي صاار وقت النوم يلا حبيبتي رووحييي نامييي يبعد روح ابوج ولا تشعلين كلب مامة

حطتها لينا على الجرباية وكمطتها واجيت انا اتمدتت يمهن بالجرباية وهي هم نامت وخلّت نور الزهراء بالنص على ما تدوخ وتنام مديت ايدي الهن نام لينا على ايدي وأيدي الثانية صارت على بطن نورايتي

واردفت وياي لينا .

:- هوسة هواي صارت جوة خير ؟

- ابوي حضر ويمج الحساب تردين الوضع يضل هادئ

:- اهاا الله يهدي سرة ابوك

- أنتِ عود ليش حابسة نفسج هنااا ما تنزلين تكعدين يم البنات يم امي شبيج لينا

:- مابية والله كلش مكتفية كاعدة هنا وي أولادي وهي هية ما اريد شيء

- بس هم ما يصير هيج يعني تعرفين امي ما تكدر تصعد هذا الدرج كلة على الأقل حسّي بيها واخذي الأولاد وانزلي الها لجوة ميصير هيج من خلفتي لهسة يمكن أمي مرة لو ثلاثة لاعبت الأطفال ترى جي يشتاقون الهم ميصير هيچ صاير شيء اكو شيء مخليج هيج مبتعدة عنهم ؟

بقيت صافن بوجه لينا اللي جانت عيونها بيها تعب بس ما تنكره وراسي أشتغل يحاول يلكى الها عذر بس ما جان اكو عذر مقنع يبرر هالـ حبسة

هي سكتت شوية، مدّت إيدها تعدل الكماط على نور الزهراء اللي بدت تتنفس بهدوء أكثر وعيونها ضلت على بنتنا

وهتفت وياي لينا بصوت ناصي وتعبان

:- ماكو شي علي والله ماكو بس الهوسة جوا تتعبني أنتَ تعرف ثلاث جهال بعمر واحد عندي شوف نور الزهراء ما شاء الله تريد كل شي الها وعلي التقي وعلي النقي ما يكعدون راحة أخاف أنزل تصير هوسة أكبر وتصير صياح وعياط والكل يتوتر هنا بالغرفة أحس كل شي مسيطر عليه

تنهدت هي وكمّلت :

:- غير هيج ما أريد أصير ثكيلة على أحد أمك خاف تتعب من الجهال أو البنات يتضايقن لهذا أريد راحتي وراحة جهالي وبس

هزيت راسي بقلة حيلة أعرف لينا كلش حساسة وتخاف على مشاعر الكل بس مرات هذا الخوف يخليها تبالغ

- وهيج عازلة نفسج هَي اللي جاي تجيب الراحة؟ لينا أمي وبناتي وأهل البيت كلهم يحبونج الأم ما تتعب من جهالها وهذول ذوله أحفادها! والبنات يركضن ركض علمود يشوفون جهالج ويلعبون وياهم أنتِ جاي تمنعين الفرحة عليهم وتمنعين نفسج من المساعدة تدرين شكد مشتاقة أمي تلعبهم وتنومهم

حجيت بهدوء بس جان اكو عتب بصوتي وكملت كلامي

- باجر الصبح أني آخذهم لـ أمي من يكعدون وتنزلين ماكو نقاش ما يصير
هالـ جفاء هذا مو حلوة بحق أحد إذا على الهوسة عود اني أسكتهم

ابتسمت شوية حتى ألطف الجو وحطيت إيدي على خدها وهتفت وياها

- تعرفين أني أحب هالهدوء اللي بالغرفة بس هذا الهدوء يصير أثكل وأثكل إذا جان وراه بُعد عن الأهل ما أريدج تحسين نفسج غريبة أو ثكيلة ببيتج أنتِ كل البيت

عيونها دمعت شوية وحطت إيدها على إيدي وهتفت وياي لينا بصوتها الكلة حنية

:- أنتَ أحسن واحد بالدنيا الله لا يحرمني منك يا أبو نور الزهراء ماشي باجر أنزل وخلص ما أعزل نفسي بعد بس مو تزعل مني انا بس هالـ فترة الـ أولانية كلش تعبتني والنفسية جانت تعبانة أعتذر

- فدوة لهالـ اعتذار روحي بس أريدج قوية وأريد ضحكتج الحلوة تملي البيت مو بس هالغرفة يلا حبيبتي غمضي عيونج خلي النوارة تنام وأنتِ هم نامي باجر ورانا يوم طويل نامي يقزح عيوني

ضميتها عليّ أكثر ونمت على ريحة لينا ونور الزهراء حسيت بإيدها لفت إيدي وحسيت بنفسها هدأت نحن الإثنين صرنا بنفس الغفوة وبنصنا قطعة من الجنة

كل الـ تعب مال يوم كامل راح بلحظة وحدة يم زوجتي واولادي وبالخصوص نور الزهراء ماادري شنو السر الموجود بيها صدك لو كالوا البنت رحمة

بالليل فزيت على صوت خفيف لينا جانت غاطة بالنوم ونور الزهراء ساكتة بس سمعت صوت

يمكن من مهد علي النقي طلعت إيدي من تحت لينا ورحت للزاوية علي التقي جان مغمض عيونه وساكت

بس علي النقي عيونه مفتحة وصافن بالسقف بس أول ما شافني ابتسم ابتسامة بسيطة هزت گلبي شلته بهدوء ورجعت كعدت على الجرباية

واردفت وياه بهدوء و همس

- شبي حبيبي النقي ليش كاعد تريد تلعب؟

حطيته على صدري وبدت أصابعه الصغيرة تتلمس وجهي هذا هو الحب الي ما ينمل منة الجهال ذوله شمعة كلبنا وقزح عيوننا

صرت اباوع للينا النايمة وكأنها ملاك بريئ تذكرت ان عليّ أكون سندها وظهرها
وان شاءالله هذا اللي راح يصير

رجعت علي النقي للمهد ماله بهدوء بعد ما هو شوي داخ وصار يغمض عيونة ويفتحهن وطبعت بوسة على جبهتة وواحدة ثاني على جبهة أخوه علي التقي

رجعت لـ نوارة وهم شلتها وخليتها بالمهد مالها
و ضميت لينا بقوة ونمت مرتاح

______________________★______________________

طلع صباح يوم جديد
يوم يمكن يكون صعب على علي الباقر و طيبة الزهراء

وبنفس الوقت يكون حلو بمرارة على أريج الله الي باتوا اول لليلة الهم خارج القرية

وجان اليوم هو يوم الجمعة 29_9

وجان باقي للموعد الحددة سائد جبران فقط شهر في 12_11 لازم يرجعون لينا و انمار ويتركون كلشي وراهم ...

______________________★______________________

"""" أريج الله """"

طلعنة من الفندق وصعدنا السيارة وجنا متوجهين للقرية وجنت حيل مرتاحة وفرحانة بنفس الوقت لان الليلة الي فاتت خليت حَيرام يصلي وياي صلاة الليل

جنت حاسة ان خلص انا كدرت أغير حَيرام 180درجة وارجعه هو هو القديم

وقت ما جان يسوق خليت ايدي على أيدة وهتف وياي

:- تردين نرجع للفندق ؟.

- ليش؟

:- ههه شنو اليش خلينة لوحدنا شعندة بالقرية ودوختها

- لا صدك!

:- ايي والله ترى ما شبعت منچ

- خلينا نرجع للقرية أحسن ما رتاحيت بالفندق أمس

:- هاااا ويعني ترتاحين بالقرية علية هذا الحجي مُنقذتي

- لا عمي القرية ارحم من الفندق شنو أمس ولا غمضتلي عين خايفة واترعد لا يشوفنيي احد لو ابوي يوصل الة خبر لان شفت الننااسس الجانت موجودة وعلي متت رعب حَيرام

:- تخافين وانا جنت وياج ؟ واني من شفت الخوف بعيونج بالغرفة كل ضني لأن أول ليلة النا ومتوترة ما جنت ادريج هيج تفكرين

- حسيت روحي بعرين أسود والله اباوع بالوجوه صرت أحس روحي شايفتهم بس وين ماادري لهذا خلينة بعد لا نطلع من القرية أحسن النا وأمان الي هم

:- يعني اريج هسة القرية امان الج اكثر مني

- لاا بس شعور غريب انتابني وحتى اتجاهك اجاني شعور حسسني انا مجرد وقت بحياتك

:- ولج غير أنتِ نَجمتي و كِيانتي و سَواة العين و نگطة نَظري و هدوتي و المَرمر حگ حَيرام ؟ مجرد وقت شنو ؟

- هذول كلهن انا ؟

:- چا شعبالج شنو أنتِ عندي

- شوكت حفضتهن هذني منو علمك عليهن ؟

:- ليش ما يطلع مني ؟

- ههههه ابدد موش اسوالفك كلي منو كالك عليهن .؟

:- باع امانة الله

- امانة الله ؟ تطور ملحوظ ههههه

:- ياربي غير عاشرتج بعد شوي اكعد أحلف لغيرة بالعباس

- لا هي هية حتى تفجرنا بالقرية

:- ايي والله هههههه

- ايي نرجع لسالفتنة

:- أنتِ كل سالفة تطلع من شفايفي

- ترى مااحب هي السوالف

:- هو أنتِ غير هسة كلبچ چي يركص على سوالفي وتكولين ما تحبيهن

- ههههه وشعرفك كلبي يركص شنووو أنتَ شايفة ؟

:- هدوتي تعرفيني أحس بيچ واعرف البيچ كلش زين

- وشلون بلة ؟

:- تسألين حَيرام شلون ؟

- أيي كُلي شلون بلا؟ أريد أشوف شمدى معرفتك بية

:- هههه أول شغلة عيونچ البارحة بالغرفة چانت تحچي مو بس خايفة چانت بيها لمعة فرح من صليتي چانت روحچ مرتاحة وهسة من گتلي مجرد وقت بحياتك عيونچ زعلت وحچت عتاب بس بنفس الوكت چانت تريد تسمع عكس هالحچي

- يا ستار! كل هذا بس بعيوني؟ يعني چنت حاس بية من چنت أريد أغيرك؟

:- حَيرام يحس بكلشي يخص أريج الله وأي چنت حاس بس عفتچ على راحتچ ردت هذا التغيير يجي من گلبچ ومن إيمانچ بيّة مو بالغصب لو تحسي نفسج مجبورة وصدگيني مو مجرد وقت أنتِ المدة كلها

- زين وهاي الكلمات الحلوة منين جبتها؟

:- چا الـ سَواة العين و الـ نَگطة نظري هاي تعلمتهن من روحي وگلبچ مو گلتلچ أنتِ عندي شي چبير؟ وذاك الحچي

غمزلي و ضحك وكمل كلامة

:- ذاك الحچي من واحد يعشك ويهيم لسانه يوگف بس گلبة هو اليحچي وهالكلمات چانت حچي گَلبي

- عود هَي صدگ؟ لو تضحك علية.

:- وداعة إيماني البيچ صدگ وصدگيني ما أريدج تخافين بعد القرية أمانة وحَيرام أمانة أكبر من اليوم ما أطلع بيچ بعد لحد ما تنحل هي السالفة كلها يالله خليني أرجع أشبگ إيدچ تبرد ايدي اذا ما لزمتچ إذا ما لزمتها

- لا عاد مو هيچي

:- أيي هيچي وأكثر يلا وصلنة تقريباً اليوم ماكو فندق اليوم بس أريج وحَيرام وريحة تراب القرية

- الله أحسن بهواي

:- أي

أخذتنا السكتة وكملنا طريقنا وصلنا القرية نزل من السيارة وخلاها يم البحيرة
ولزم ايدي ومشينة للقرية ودخلنا لجوة

ونحن على اعتابها استقبلتنا الست غَيرة !!

وكفت كدامنا وصارت تباوع لأدينة الي جانن متشابكات رفعت نضرها لحَيرام وهتفت وياه بأستغراب

غيرة :- شنو چي يصير وينك أمس وهذا المنضر ششنو ؟

حَيرام :- أقمار اسبقيني للبيت

- بيتي ؟

:- بيتچ شنوو لاا بيتي روحي جيبي أغراضج وخليهن ببيتي

غيرة :- شكوو بيتك شكو تخلي اغراضها شنو صاير ؟

- انا و حَيرام اتزوجنا أمس

غيرة :- هاااا داسِم

:- ما لحگت انطي خبر لأحد لهذا سويت كلشي على السريع وهي اجيناكم

غيرة :- داسِم الحگني بسرعة

عافتنة وراحت هتفت وياه

- ما راح تصير مشكلة موو ؟

:- لااا فررااغ لا تحسبين له حساب روحييي جهزي غراضج من البيت على ما اجيج

- تمام بالك لنفسك

:- وأنتِ هم هدوتي و مُنقذتي

اتوجهت للبيت وردت أشوف مماس بس لكيتها رايحة وي زوجها خارج القرية لهذا رحت للبيت مالتي و دخلت وصرت أجمع بس بأغراضي المهمة مثل القرآن وكتاب الحصن الحصين وشوي ملابس
على الكتب مالتي الجابهن الي حَيرام وصرت انتضر حَيرام يجي حتى يشيل وياي مااكدر اشيل هذني انا

وبنفس الوقت جان بالي يمة وخايفة علية لا تطلع هي الحية غيرة تسوي شيء لو تكلبة علية شنو اترجئ من سحارة

بقيت أتأمل حَيرام ما يتأثر بخالتة ياربي .

______________________★______________________

"""" طيبة الزهراء """"

فزيت الصبح وجنت ماريد افز ولا اريد اباوع للشباچ واشوف ضوا يوم الجمعة طالع بس فزييت وشفت وجان تليفوني يدك

مسحت اعيوني بدية و اخذت التليفون من الطبلة ولكيت المتصل علي الصادق ضغطت على الرد وخليت السماعة على آذاني

:- الوو

- ها طيبات شلونج

:- بخير الحمدالله وأنتَ شلونك

- بخير دامچ بخير

:- عساك دوم

- شنو جنتي نايمة ؟

:- اي والله توني كعدت

- أمبين من صوتج

:- شنو متصل خيرك بيك شيء ؟

- ايي والله اتصلت اريد اسالج

:- شنوو

- أنتِ مقتنعة بهذا الزواج

:- شلون يعني

- يعني ترديني ؟

:- ايي

- متأكدة ماريدج تسوين شيء لخاطر أحد ولا أريد افرض نفسي على أحد

:- اذا ما أريدك جنت اكدر اكول لا أنتَ ما تنرفض صداقي

- هههههه الله يريح كلبچ مثل ما ريحتي كلبي هسة يلا يمعودة جهزي روحج الساعة 4 العصر تلكيني بالباب انا والشيخ وباجر نروح للمحكمة

:- تمام

- يلا حبيبتي صحصحي وانزلي اتريكي

:- تمام

- في أمان الله

:- الله وياك

سديت الإتصال وكمت سحلت روحي سحل باوعت للمراية لكيت عيوني مبگگة ياعلي شصار بيهن من البجي امس

اخذت ملابس من الدولاب ونزلت أسبح بالحمام الجوة لكيت امي و خالتي كاعدات بالصالة يلعبن وي اطفال علي السجاد ويمهن لينا

دخلت للحمام كملت وطلعت الهن كعدت بالكاع يم امي وانداريت الها كعدت تنشف شعري ومشطتلي سوتلي زيتونة

من كملت باستني بخدي من جهة ظهري

اخذت المشط و الخاولي من ايدها ورحت للمطبخ سويتلي ريوك خفيف لان الساعة جانت ما تقارب الــ 10 الصبح الكل طالع وحتى رحمة الزهراء طلع چاي زاچل ماخذها

لكيت بس بنانة اجت حضنتني وأردفت

:- چعدة العلوياتت اليوووم عرسهاا راح تصيرين مرة متزوجة

- هههههه ان شاءالله

:- وعلي ادعيلج من كلبي الله يتممها عليج وما ينكسر كلبج بعد

- الله يسمع منج

:- شوكت راح يجون يعقدون ؟

- العصر ان شاءالله

:- الحك اجهزلج حبشكلاتت

- لا مااريد شيء امي كالت لخالتي لا حفلة ولا طكطكة

:- هي شنو لييشش بلة ؟

- لااا يمعودة مصيبة أريج لهسة حارة بالمنطقة ترديهم يسمعوننا نطك ونعرس هم ما يصير

:- و طُززز شعلينة بالننااسس فرحتنا جبيرة وما تنضم بيكم شنو العريس أبنا والعروس بنتنا

- انا ماراح أقبل وأختي أريج الله شنو

:- هسة أريج الله يكون وياها أن شاء الله بعيدة وبس ربنا يعلم حالها هم نحن ما يصير نكسر فرحتكم على نوكف حياتنا على شيء الله كتبة النا

ظليت صافنة عليها بنانة حقها تفرح هي اتربت وياي وتريد تشوفني عروس
بس مصيبة أريج مو هينة ظليت ساكتة آكل الريوگ وهي تحجي

:- يعني طيبات حتى لو ما تسوون حفلة لبسوا بدلة بيضة عالأقل سوي مكياج خليني أعدلج أريج لو هنا جان ما رضت هيج تطلعين بسيطة تعرفين أختج أنتِ

- يا روحي يا أريج الله يذكرها بالخير. ما أدري بنانة أمي حجت هيج واني ما أريد أكسر كلمتها وبعدين هو الشيخ راح يعقدلنا بالبيت وبعدين للمحكمة مو وكت زفة وطبل

:- زين عليش مستعجلين هيج؟ جان انتظرتوا كم يوم

- علي الصادق ما قبل هو والمعتز يردون هسة وهم هو خوش رجال يعني

:- أي والله خوش رجال والكل يحبه واني احس هو من زمان رايدج بس أنتِ جان گلبج مو يمّه

- وطلعت من نصيبة انا

:- ودام طلعتي من نصيبة يعني من هسة لازم نبدي نجهز حتى لو ماكو حفلة لازم تطلعين أحلى عروس! خلي أروح أحضر ملابسج

- لا بنانة عفية لا تتعبين روحج عندي فستان بسيط.

:- يا فستان بسيط هذا عرسج خلي كل المنطقة تشوف طيبة الزهراء ما انكسرت ولا ضعف گلبها بالعكس صارت أقوى وأحلى خلي أروح أصعد أختارلج فستان أبيض ناعم

بنانة ركضت صعدت الدرج و طيبة الزهراء ظلت تبتسم وتباوع وراها رغم كل شي بنانة عرفت شلون تزرع الفرحة بگلب طيبة الزهراء

بقيت شوية بالمطبخ وظلت تساعد امها وخالتها بالغدة الساعة صارت بـ 1 الظهر راحت صعدت فوگ لگت بنانة ( أم البنين ) مطايرة الفساتين ومطلعة فستان أوف وايت حلو وناعم مو مال حفلات جبيرة بس كلش مرتب

وهتفت أول ما شافت طيبة الزهراء كدامها

:- يله يا عمري خلي نبلش نرتبج بس غسلي شعرج مرة ثانية جهزي نفسج واني راح أروح أگول لخالاتي تسويلنا كيكة صغيرة على گدنا بلكت خالتي توافق وتلحك تسوي

- تمام يروحي

مرت الساعات وكأن الدقايق تركض بنانة ما خلت شيء ما سوته سوت لطيبة تسريحة بسيطة ومكياج هادي وحلو يبرز جمالها الهادي صارت طيبة تباوع بالمراية تشوف وحدة ثانية وحدة مستعدة تبدي حياة جديدة

الساعة 3:45 بعد الظهر.

نزلت طيبة من الدرج شافتها أمها وخالتها، عيونهن دمعت بس ما حجن شي الكل التمّ

أم رحمة وهي تمسح دمعتها :- مُبارك عليج يمه الله يفتحها بوجهج.

- الله يخليج يمه.

سمعوا صوت هورن خفيف بالباب

أم البنين :- صلوا يا عمري سمي باالله واطلعي اريدج تصيرين أقوى عروس مثل ما أنتِ هسة أحلاهن

- هههههه ان شاءالله

راحت طيبة ويا أمها و أم البنين وخالتها للديوانية وشافته كاعد علي الصادق لابس دشداشة بيضة حلوة وعيونه تلمع من شافها وجانوا كل إخوانة موجودين يمة ماعدا علي الباقر

كأن الدنيا كلها رجعت تدور كعدت طيبة الزهراء يمه والشيخ بده يحجي ويقرأ الآيات والكل رفع إيده يدعي

الشيخ (بصوت جهوري) :- هل أنتِ يا طيبة الزهراء بنت الحسن المجتبى موافقة على الزواج من علي الصادق ولد عبد الحسن على سنة الله ورسوله وعلى المهر المعلوم؟

- نعم أنا موافقة

الديوانية كلها سكتت بس صوت الشيخ هو اللي يتردد بالغرفة علي الصادق كاعد ينتظر كلبه يدك مثل الطبل عيونه ما نشالت من طيبة الزهراء اللي كاعدة يمه لابسة فستانها الأبيض البسيط وطالعة مثل كَمرة ليلة أربعطعش

الشيخ بصوت جهوري مرة ثانية :- هل أنتِ يا طيبة الزهراء بنت الحسن المجتبى موافقة على الزواج من علي الصادق ولد عبد الحسن على سنة الله ورسوله وعلى المهر المعلوم؟

- إي أنا موافقة.

الكل بالغرفة طلع شهكة فرح بسيطة بس علي السجاد و علي الهادي و علي الرضا جانوا ما مرتاحين للچي يصير لأن يعرفون علي الباقر شكد يريدها ويحبها

وأمها وأم البنين وخالتها دموعهن نزلت من الفرحة مسحنها بسرعة حتى محد يشوفهن علي الصادق حس الدنيا صارت ملكه بهاي اللحظة راد يكوم يهلهل بس لزم روحه

عقد القران خلص وبدأ الشيخ يهنئ للعرسان

الشيخ :- بارك الله لكما وبارك عليكما وجمع بينكما في خير

الكل صاح بصوت واحد: آمين يا رب العالمين

علي الصادق التفت على طيبة الزهراء ضحكلها ضحكة تضوّي الدنيا همسلها بصوت ما يسمعه بس هي :- « وأخيراً صرتي حلالي يا بعد روحي »

طيبة الزهراء جاوبته بنفس الهمس: «اييي غير حظي الحلو جابني يمك يا علي »

الشيخ مد إيده صافح علي الصادق وكال :- مُبارك وليدي ربي يهنيكم

:- الله يبارك بيك شيخنا العزيز وممنون منك

النسوان بدت تهلهل والهلاهل صارت تصعد للسما العلوية راحت و باست طيبة الزهراء وكالت : يا هلا بچنتي الحلوة اليوم صار عندي بنية ثانية.نورتي بيتنا کَـ زوجة لابني مو جعدة العلويات يا عمري

أم رحمة :- الله يهنيهم يا أختي و بنتيي طيبة تستاهل كل الخير وهم اوليج علي وليدي والنعم منه

بعد ما خلصت المراسم العائلة كلها كعدت والكل يسولف ويضحك الديوانية صارت تضج بالحياة

العلوية التفتت على أم البنين وغمزتلها وهتفت :- شفتي عيون علي شلون تلمع بيها؟ يكلك چنه صارله سنين ينتظرها

أم البنين ردت وهي تضحك :- إي والله چان راح يموت من الخجل والفرحة سوية يستاهلون كل الخير

علي الصادق وطيبة الزهراء كاعدين بصف بعض يسولفون بهمس

:- ها حبيبتي صدگ طلعتي موافقة لو چنتي خجلانة ومجبورة؟

- لااا يعني تگدر أنت تجبرني على شي لو ما رايدتك من كل كلبي چان ما جيت لهنا ولا كعدت هي الكعدة كلها علمودك

:- يا روحي أنتِ ربي لا يحرمني منچ جهزّي روحچ يا حلوة بعد جم يوم ونصير بيت واحد

طيبة الزهراء ابتسمت وهزت راسها وهي تشوف الفرحة بعيونه تدري الأيام الجاية كلها خير وسعادة وياه وتتمنى هذا الشيء .

______________________★______________________

وصل خبر عقد القرآن لغدير الله وجانت تريد تروح وتشوف شنو الصار وشنو التغير شلون بدل ما يكون العريس علي الباقر صار علي الصادق

بس انمار رفض روحتها وطلب منها تروح الهم بالوقت الچاي وتبقى يمة بهذا الوقت ..

لكن رحمة الزهراء ماكدرت تهچد وتستقر جبرت زُبير يرجعها لأهلها لحد ما تطمئن كلش على اختها ياالله تجي للبيت

وبسبب خوفة على الحمل وعليها انجبر يوافق وما بيه يحجي شيء لأن مايريد يزعلها لمن وصلت رحمة الزهراء لبيت أهلها وجانت الساعة تقارب الـــ 8 بليل

ولگت البيت عاچ بخبر طلعة لينا من وقت العقد ماخذة نور الزهراء وطالعة وعايفة تليفونها بالبيت وما يعرفون وين راحت

جانوا كل الشباب طالعين يدورون عليها و العلوية كاعدة بالصالة مهدود حيلها وخايفة على چنتها و حفيدتها

وأم البنين و طيبة الزهراء اخذوا علي النقي و علي التقي وراحوا لفوك حتى لا يتوترون الأطفال من الموقف الصار .

______________________★______________________

- خاف اموت وما اشوفك
دربالك على قزح عيونك لا يذبلها الغياب
وخاف اروح وما ابوسة تدري بية شكد احبة
حطلي خدك ع التراب ومن تخلص الفاتحة بس گول احبچ يا قزح عيني
حتى توصلني الاحبچ بالثواب .

______________________★______________________

- بَعدنا نفزّ مِن توصل رسايلكِم ، بَعدنا نخاف أكثر لا نضيعكَم
ما ننسَاكم شما صَار ، صَوركم تارسات الدار
بَعدنا نموت إذا واحد يزعلكِم ، بَعدنا نضيع إذا شفنا ملامحكَم .
______________________★______________________

بوقت الجانت لينا تغير ملابس نور الزهراء اتصل ابوها ( سائد جبران )
عليها حاولت تتجاهل الإتصال لان اخذت وعد على نفسها تكمل حياتها طبيعي وي علي السجاد رغم هي تعرف هذا مستحيل

بس جانت تحاول ...

ولمن استمر سائد بالاتصال اخذت التلفون وجاوبتة بنتر

:- هاا شنو تريد بوية ؟

- صوتچ

:- أعتذر بس ملتهية انا هسة

- وبيمن ملتهية ؟

:- جي اغير لبنتي نور اليوم عندنا حفلة صغيرة

- حفلة شنو ؟

:- عقد بنت الحسن المجتبى على ابن عبد الحسن

- يعني هسة البيت هوسة محد يمج ؟

:- أيي الكل بالديوانية كاعدين واني اريد اجهز نور الزهراء وانزل الهم

- زين تعاي هسة الي راح ادزلج العنوان

:- شنو اجي الك لااا مااكدر اطلع

- تعاي هسة ما تتاخرين دامهم ملتهين اطلعي وتعاي يمي وجيبي وياج نور الزهراء وحتى من ترجعين تكولين الهم صخنت او صار بيها شيء وطلعتي بيها للمستشفى ما جنتي تردين تخربين فرحتهم

:- بوية مااكدر

- كتلج تعااي لا تخليني انا اجي لباب البيت احترمي نفسچ وتعي

:- خلص چااية

سدت التليفون وبقت تتأمل شنو سائد يريد منها؟ وبعد ما سمعت كلام بسمة وشگت ان معقولة سائد هو القتل اهلها صارت هي تريد تروح

لان كم سؤال براسها لازم تعرف جوابهن ..

كملت تغير لنور الزهراء وهي غيرت ملابسها بسرعة ولبست واخذت بنتها وطلعت من البيت ونسّت تليفونها بالغرفة بعد ما أخذت منة العنوان

أول ما طلعت للشارع مشت للطريق العام واخذت تكسي انطتة العنوان التريد تروح عليه ولاحضت تليفونها ما موجود بس بعد ما بيها ترجع

نامت نور الزهراء على رجليها ( بحضنها ) ومشت التكسي بدت لينا تمشي ايدها على شعر بنتها وهي تهوجس بسوالف الطريق

ولمن وصلت للمكان الانطى الها سائد جبران نزلت من التكسي ولكت كدامها نفس المستودع بس هو مو مستودع

دكت الباب وبعد ثواني ضمت نور الزهراء لصدرها ولان جانت نايمة خلت راسها على كتفها وانفتح الباب وطلع كدامها اخوها بندر

دخلت وهو سد الباب وراها ولكت أبوها سائد جبران كاعد على كرسي كدامها وكدامة طبلة بيها اسلحة ( مسدس ، خنجر )

ما خافت ولا رعد كلبها بس شدت نور الزهراء اكثر على صدرها وبلعت ريچها واردفت وي ابوها

:- ها بوية ؟

- يا هلا بليانة يا هلا بعيون ريم الفلا

:- هلا بيك بوية

- شلونچ غزالتنة ؟

:- اني بخير الحمدالله

- عساچ دوم يا بنتي يا غزالتي هي بنتـچ اسمها نور الزهراء ؟

:- أييي

- انطيني اشوفها بلة طالعة عيونها ريم عليج ؟

رجعت خطوة لورة وبعدت أيد سائد جبران عن ظهر بنتها نور الزهراء وهتفت وياه برعب و صوت مهزوز

:- لاا بوية مو هسة نوارة نايمة ماريد افززها كافي الليل كلة تبجي لان اسنانها بدت تطلع

- خطية الله يساعدها خليها نايمة

:- ليش جنت تريد تشوفني ؟

- نسيتي روحج يمكن وكلت دامج نسيتي انا اذكرج

:- شنو نسيت ؟

- مكانج مو ابيت عبد الحسن شني صايرة الهم الچنة المطيعة نسيتي نفسچ ؟

:- بوية

- ااااشش ولا اسمع نفسس ليناا ولا اسمع حسج ان جان أنتِ او اخوج هذذذاك الهايم وطاير

:- نحن سوينة الاأنتَ تريدة خلص خلينة بحال سبيلنا ليش تريد تدمر حياتنا ؟

- واني كتلكم روحوا فترة ومرجعكم الي ما كلت روحوا واكتشفوا ذاتكم هناااك وصيرولي من السادة

:- بوية انا صار عندي أطفال ودنيا ماكدر اعوفهم بس أنمار يكدر ماعندة شيء اسحب ابنك أنمار واتركني انا

- ما اسحب واحد واعوف واحد أنتم الاثننين راح ترجعون وغصب عليكم

لمن شافت لينا ان ابوها خلص مصر ومقرر ان لازم يرجعون اتغيرت ملامحها وياه وبدت تشد بالكلام وصوتها يرتفع ونترت وياه بسؤال

:- يدور براسي سؤال واريد تفسير اله؟

- وشنو هو؟

:- امي وابوي أنتَ قتلتهم !

- شنو جاب اهلج لراسج هسة

:- بوية ترى بسمة صارت ببيتها ببيت زوجها صفاء الحسن واجت كعدت يمنا وسلفت قصتها وشلون عبد الحسن ضلمها وسولفت شلون أنتَ قتلت صاحبك واخذت بنتة
البنت هي انا مووو ؟

- هههههههه بسمة رجعتتت

:- البنت الي أنتَ قتلت اهلها انااا

- اتخيل عبد الحسن شلون وضعة هسة وهو يشوف كلشي راح من ايدة

:- سألتك جاوبني لا تغير الموضوع البنت الي أهلها ماتوا انااا مو هيچ ؟

- ااايييي أنتِ شنو يعني عبالج راح أخاف واكلج لااا مو أنتِ لااا أنتِ الطفلة وانا قتلت امج وابوج شعندج هسة ؟

:- ششــ.. شــلووون شللووون قنعتني السادة هم القتلوا أهلي ؟ لك شششلون اههه اناا قتلت ثلاث أنفس منهم انا من وراك شلت ذنب ثلاث أرواح!

- مو من وراي من ورة غبائج وحقدج انا سولفت الج سالفة وأنتِ طرتي بيها جنتي تسوين كلشي برضاتج لا لازم عليج شيء ولا اهدد بيج

:- بس أنتَ جنت غاسل عقلي اكييد جنت امشي هيج

- عَجل لا تلوميني لومي نفسج الي صدگت

ارتفع صوت لينا وهي تضغط على نور الزهراء اللي بدت تتململ بخفة وتكعد
وصارت عيونها تباوع على أبوها سائد بعصبية وقهر وحسرة على السنين اللي راحت.

لينا بصوت يرجف من الغضب والقهر هتفت وي ابوها

:- قتلت نفس بريئة بيا ذنب قُتلت أرواح بحسابك أنتَ أنا بس أداة چنت!

رد سائد بهدوء مخيف بوقت الجان منتچي على الكرسي وبيده خنجر صغير يفر بي

- الأداة اللي ما بيها عقل تلوم صانعها ما علمناچ على الضعف لينا القتل فن والموت هو الثمن الطبيعي للأخطاء مو أني اللي غسلت عقلچ عقلچ هو اللي چان فارغ ومهيأ ينغسل أنتِ اللي ردتي انتقام وأني چنت بس المخرج اللي طلعچ من غرفة الانتظار

هنا لينا تتقدم خطوة وهي تحس بالخطر يتزايد

:- أگلك شنو ردت؟ردت أعيش بسلام ردت أهل ردت حماية أنتَ سويت كل هذا حتى تستغلني حتى تكسر ظهر عبد الحسن وأبنه حتى تاخذ الثار اللي ما يخلص من كلبك المريض

- الثار مو مرض الثار حق! حق اللي انظلم وحق اللي انعافت روحه بالطين وأنوب شني شني اللي حصلتي يم عبد الحسن؟ حب وزواج وأطفال؟ نسيتي دموع أمچ وأبوچ اللي چنت أحچيچ بيهه كل يوم نسيتي الحقد اللي زرعته بروحج وبگلبچ

:- ما نسيت بس شفت غير دنيا شفت الحب والرحمة بالبيت اللي ردت أهدمه شفت اولاد عبد الحسن حبابين الشايلين حُب بداخلهم لاهلهم ما ينوصف
حتى علي السجاد چان طيب وماكو منةة

تتردد لينا وهي تذكر اسم علي السجاد وتحس بذنب عميق يثگلها

- الحب والرحمة چذبة يخترعها الضعيف حتى يعيش وهذولة كلهم عبد الحسن وولده أدوات أدوات راح يرجعن لمكانهن الصحيح يا إما تحت التراب يا إما تحت إيدي!

:- لا تچيسني ولا تچيس بنتي أني بعد مو الأداة مالتك أنا أم! وراح أحمي أطفالي بكل قوتي وبكلشي عندي

- الأمومة ضعف جديد مو قوة أطفالچ الحلوين اللي حابين يشوفوني؟

:- شتريد تسوي شتريد بينا كول حتى أرتاح من هالقلق اللي عايشين بي!

- أريدكم ترجعون أريد لينا وأنمار تحت جناح أبوهم واريد هذول اطفالچ بين حضني وادية يتربون انطيني نور الزهراء

:- ما راح أرجع أنمار خليه يرجع وحده! عوفني بحالي! بنتي اللي على كتفي حفيدة لعبد الحسن أنتَ دتهدد حياتها دتهدد سلامتها

- غلطانة يا ليانة اللي يهدد حياة بنچ أنتِ أذا ما رجعتي إذا ما سويتي اللي أطلبه إذا فكرتي تخونين صدگيني ما راح أقتل بس عبد الحسن راح أبدأ بـ... نور الزهراء الحلوة وبعدين إخوانها. وبعدين عبد الحسن اللي يتخبل من يشوف أطفاله يموتون كدام عينه

سائد هنا يرفع يده وبسرعة يلزم لينا من حجابها للي بظهرها بخفة ويقربها بالقوة تجاهه.

- لا تخليني أختار أرجعي وإلا... راح أدمر كلشي يخصچ أرجعچ لـ... الدم والتراب أختاريلچ نهاية حلوة

:- مااراح أرجع الك ولا راح اسوي كلشي انا راح اطلع منااا وارجع لبيتي واطفالي و الي تريد تقتلهم غصباً عليك راح تشوفهم يكبرون كدامك .

- تردين تسويها شغلة تحدي ؟

:- وخر ما تكدر تسووي أي شيء ما تكدر وخر عني هذا بس تهديد أنتَ بس حجي لو تكدر تسوي شيء جان أنتَ الي قتلت تحرير وأنتَ الي قتلت الحسن المجتبى مو تدزني انا حتى اقتلهم يا ضعيف

- كتيلي شلون قتلتي تحرير ؟

:- ليش ؟

- لان راح اقتل بنتج البحضنج بنفس الطريقة

سحب سائد جبران لينا من حجابها حيل وهي ضامة نور الزهراء اتقدم بندر ولزم لينا من ورة وثبتها وسد حلگها بيدة

وسائد جبران أخذ نور الزهراء وخلاها بالكاع وصار لينا تسمع صوت مناغا بنتها وهي تبجي وأول ما بدأ سائد خنگ نور الزهراء بيده وهي جانت تحاول تدفع بندر وتبعده عنها حتى تلحگ على بنتها بس مجانت تكدر هو جان أقوى منها

وصارت تشوف شلون لون وجه بنتها صار ازرك مثل ما صار بتحرير وشلون رجليها وكفت مثل ما وكفت رجلين تحرير

ما اكتفى سائد بخنكها وماتت نور الزهراء أبين ايديه لاا سحب الخنجر مالتة ونحرها من ركبتها وخلى ملابسها تصير كلها دمها

لحضة بحياة لينا وكف عندها كلشي .

حسّت بضربة قوية اجت على راسها من ورة جانت من بندر وكعت بالكاع مغمي عليها وسائد جبران و بندر اخذ كلشي بس خلع القميص مال نور الزهراء تركة بالكاع واخذ جثتها واخذ أدوات السلاح كلهن وطلع وي ابنة

ولينا جانت ما تعرف شنو الصار جانت بغير عالم

______________________★______________________

"""" أريج الله """"

بعد ما اجاني حَيرام وساعدني بالغراض والنقل رحت وياه لبيتة الجديد مو بيتة التارسة سحورة واطبورة

طلب مني ارتب غراضة وغراضي علما يرجعلي ضليت بالبيت لوحدي واني وارتب چفتت علية غيرة

وجانت شرارة الحقد من عينها واضحة دفعتني حييل وكعت بالكاع ووكعت المزهرية البيدي

صرت مااعرف اكوم حيل اتاذيت بالوكعة وهي بدت تصيح علية

غيرة :- شنوو حاسبة رووحج منو أنتِ حتى تاخذين ابني داسِم مني لج بالاحلام فهمتي بالأحلام تاخذين داسِم وتصيري مرتة ما نعرف أصلج وفصلج اجيتي بيوم وليلة وتردين تأخذين الاولية ؟؟
لج ما تكر عينج امحيج شايفة وجع اول البارحة الصار بيج اخلي يصير اضعافة اذا عبالج راح تتهنين وي ابني لو تموتين ما اخليج وياه
لچ أنتِ حتى ما تعرفين نفسج بنت منووو شنو اجيتي تذبين روحج على داسِم من بعد ما شفتني محد مكلبچ ؟

:- لج انا الي شرفت داسِم من قبلت اتزوجةة

- وليش حضرتج بنت الأفندي لو بنت الشيخ ؟؟

:- لججج اناا علووييةة حفيدة السيد احمد الصادق

______________________★______________________

- ليَش ما مَليت مِنهُم ؟ وليَش ما مات الحَنين
شِعاجبك باقي بدَربهُم عاچبَك هذا الوَنين ؟
عيش يا گلبيّ مِثلهُم هُمه طين وانتَ طين .

يـــــــتـــــــبـــــع ........

______________________★______________________

[ جلسة صغيرة كلام لرواية عن لسان الأبطال ]

{ والله طاح حظ الثأر اللي ما يخلّي بيت مرتاح أحنه شذنبنه نعيش بظل هالخوف؟ چنّه ورد مفتح إجوّا العاصفة شلعونه من أساسنا دمانا صارت ماي تنذب كل يوم بـ إسم جدنا وعيونّا نشفت من الدمع المصيبة مو باللي راح المصيبة بـ اللي عايش بـ قهر كل يوم ينتظر الرصاصة اللي ما تدري منين تجيه ياليل الثارات ما تخلص متشوف الزغير الينچفي بـ لا ذنب؟ خلصت عائلة السيد احمد وخلصت الفرحة وبقى بس اسمنا مكتوب على صواني الفاتحة }

______________________★______________________

انتهى البارت 56
اتركوا أثر حلوة وراكم بتصويت تقدير للتعب

وكذالك توقعاتكم باقي فقط 4 بارتات وتنتهي الرواية الي اتعلقت بيها مادري شلون راح افاركهم

تعلقاتكم قلبي وتصويتكم يهمني 🫶🏻

15،668 كلمة

حساباتي لتواصل وياي ولتكبر عائلتنة

الانستكرام :-

التيك توك :-

قناتنا التلكرام :-