احفاد السيد : الثار ( بأجزائها الإثنين ) الفصل السابع وستون 67 - بقلم ​رُقَيَّةُ الْأَكْبَرُ

المُنْعَطف الأول

﷽
اللهم صلّ علىٰ محمد وآل محمد

- اسْتَكْثِرُوا مِنَ الْبَاقِيَاتِ الصَّالِحَاتِ: التَّسْبِيحُ وَالتَّحْمِيدُ وَالتَّهْلِيلُ وَالتَّكْبِيرُ وَلَا حَوْلَ وَلَا قُوَّةَ إِلَّا بِاللهِ

- ﴿وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ أَمَلًا ﴾

سُبْحَانَ اللهِ
وَالْحَمْدُ لِلهِ
وَلَا إِلَهَ إِلَّا اللهُ
وَاللهُ أَكْبَرُ
وَلَا حَوْلَ وَلَا قُوَّةَ إِلَّا بِاللهِ

روايـــــة [ مُنْعَطف السادة ]

بقلمي انا الكاتبة [ رُقـَـيّــة الأكـَـبــر]

متابعة لحســـابي دعم الي وَزاتيّ oo_ll13

وَزاتيّ تصميمكم للرواية ما يصير هيج خلونا ندخل لــ 300 ألف بلشت بالجزء الثاني والرواية بعدهي ما صاعدة + التصويت كللش ما عاجبني
البارت الجاي انزلة من يصير تفاعل على هذا البارت

✨ التعب علينا والتفاعل ✨
✨ عليكم التصويت والتعليق أبين الفقرات ✨
✨ هو الدعم للقصة وهو الينسي الكاتب التعب ✨

﹉﹉﹉﹉﹉﹉﹉﹉﹉﹉﹉﹉
- بعنه البيت ريت البيت مَهجوم
ريت اكثَر بَعد من هالخساير
فراش الفاتحه لو شفته ملموم
بنص گلوبنه تلگه الچوادر

﹉﹉﹉﹉﹉﹉﹉﹉﹉﹉﹉﹉

"""" الفاروق الاعظم """"

طلعت من غرفتي وجنت نازل واللعب بالتليفون ملتهي

ولمن وصلتت للهول صدت عيني لگيت ام البنين گاعدة وبحضنها حيدرة

رحت وكفت كدامها وهتفت:

- صباح الخير

رفعت رأسها الي وصدت لعيوني وردت علية:-

أم البنين :- وعليكم السلام ورحمة الله وبركاته

- ههههه انا كلت صباح الخير بس على العموم كلشي مقبول منج!

:- ما انتبهت أبداً اعذرني

- لا بوية شسالفة ماعليچ لا تفكرين بس كليلي شلونه سيدنا الصغير؟

:- والله وياه وياه متعبني بس تعبة ححلو

- صحيح هذا عمرة تحسّين محتاجة احد وياچ ويساعدچ بالتربية والمسوؤلية وكلشي يشيل عنج

:- الله يرحم عَلي الهادي

- آمين يارب العالمين ويرحم موتانا وموتى المؤمنين اجمعين يارب ... ايي بنانة ليش كاعدة لوحدچ صدك وينها عمتي؟

:- امي راحت تسّوي چاي

- هاي جنط حيدرة شنو بيها؟

:- ملابس احتياط حليب حفاظات ألعاب وهيج

- خوش چا همزين موجودة حتى أسولف وياچ شوية وأشوف حيدرة
ها حبيبي سيد حيدر شلونه هذا الولد الحلو؟

مدّيت إيدي وداعبت خده الصغير وهوَ يضحك ويصيح بـ آغا آغا يحاول يوصل لإيدي

:- ههه فدوة لروحه اوليدي هذا مدلل العشيرة كلها من أول ما انولد الكل يموت عليه

- هوَ ورث الدلال من أمه الصراحة

غمزتلها وضحكت

- زين لعد خلي اگعد يمج شوية بعد وقت لطلعتي

گعدت على القنفة اللي يمها وشفتها صافنة بحيدرة اللي رجع يلعب بالخشخيشة مالته

أم البنين جانت دايمًا هادية مو مثل باقي بنات العائلة بيها سكون يريح العين

بس بذاك السكون اكو حزن خفي هذا الحزن اللي ما يكدر يخفيه أي شي حزن يخص علي الهادي الراح اتقبلت فكرة موته وبنفس الوقت اختارت تعيش لابنها

- شبيچ صفنتي؟

أم البنين تنهدت بتعب وعينها لمعت بدمعة خانتها مسحتها بسرعة قبل ما تشوفها عيني بس أنا شفتها

:- ماكو والله بس بـــ كل لحظة وكل حركة بحيدرة تذكرني بعلي الهادي چنت أحسب الأيام حتى يجي ويشوف ابنه اللي جان ينتظره بفارغ الصبر

- الله كريم هوَ برحمة الزهراء إن شاء الله وصدگي حيدر هوَ قطعة منه من تشوفينه كأنما هوَ گدامچ هسّه دورچ تربينه على كل الصفات الزينة اللي چانت بيه أنتِ گدها ما محتاجة أحد يعلمچ القوة

:- من مات ابوي واني محتاجة السند ما احتاج اليعلمني القوى بس فاروق اني محتاجة سند واللّه محتاجة سند مو بس سند بالتربية سند بالحياة سند يشيل عني ثگل غياب الأب عن ابني وسند يملي الفراغ بگلبي مو سهلة الحياة بلا رجل والرجل الي اختارة كلبي وملئ عيني راح بغفلة ماجنت ادري بيها وضنيتها حلم يقضة بساعة سمعت الخبر

- أعرف وهذا الشي اللي ما يخليني مرتاح عمتي فاطمة ما گالتلج شي عن الموضوع بس بيني وبين نفسي أگول لازم واحد يفتح هذا الموضوع وياج ولازم تعرفين خلصتي 4سنوات من عمرج كافي مو ؟

:- أي موضوع تقصد؟

- الزواج

رجعت راسها ليورة بسرعة وراحت حتى الابتسامة الخفيفة من وجهها كأنما الكلمة ثگيلة ومو ببالها أبد

:- فاروق يا زواج هذا؟ بعدني ما صارلي أربع سنوات من لبست الأسود على هدهد تريدني أفكر بغيره؟ هذا ابني أبنه هوَ كل حياتي واني مرتاحة عد أمي لا تجيب سيرة الزواج بعد

- لا تستعجلين بالحكم ولا امج ولا واحد يجبرج بس فكري بيها بعقل أنتِ بعدچ بأول عمرچ حيدر يحتاج أب يلعب وياه ويجيبه ويوديه وأنتِ تحتاجين رجل يسندچ الحياة ما توگف على شخص وبالشرع والدين ماكو شي اسمه وفاء بالوحدة طول العمر الأهم سعادتچ وسعادة ابنج

:- مو مسألة وفاء مسألة گلب ما يگدر يفتح بيبان مغلقة ومسألة طعم الحياة اللي راح وياه هدهد

بهاي اللحظة دخلت عمتي فاطمة الزهراء صينية الچاي بيدها وعيونها چانت حادة وتراقب الحوار من بعيد كأنما سمعت الجزء الأخير من كلامنا وجهها جان هادئ بس النظرة بيها شي من التعب والقلق

فاطمة الزهراء :- السلام عليكم خير شبيكم صوتكم صاعد؟ شبيها بنتي گالبة وجهها؟

الفاروق الأعظم :- وعليكم السلام ورحمة الله وبركاته هلا بيچ عمتي ماكو شي بس چنت أسولف وياها بمواضيع عامة

فاطمة الزهراء :- مواضيع عامة بنتي مو مال هاي سوالف اتركوها بحالها

أم البنين :- يمة فدوة اروحلچ أنا صعدت لغرفتي أرتاح شوية

گامت بسرعة وهيَ تشيل حيدرالكرار وطلعت من الهول تاركتني أنا وعمتي لوحدنا

عمتي حطت الصينية على الطبلة وگعدت بمكان أم البنين عيونها توجهت إلي بحدة

فاطمة الزهراء :- شگلتلها؟ گلتلها على الموضوع اللي چنت خايفة منه؟

الفاروق الأعظم :- أي گلتلها بس مو بالطريقة اللي خلتچ تتصورين أنا ما أجيت أگولها يالله وافقي أنا چنت أفتح وياها باب التفكير

:- يا باب فاروق؟ أنتَ تعرف شگد حبت علي الهادي وحياتهم چانت حلوة ومختلفة بنتي ما گامت تشيل الأسود تريدها تشيل الأسود مرتين؟ أول مرة على رجلها والثانية على حزنها إذا صار الزواج غصب عنها

- لا حشاچ أنا ما أريدها تتأذى بس المشكلة اني ما أريد أظل ساكت وهيَ ببالي

:- هيَ ببالك يعني أنتَ گاصدها بالذات من بين كل البنات؟

- عمتي أنتِ تعرفين شگد عزيزة عليه أم البنين مو بس بنت عمتي واني أشوفها أمينة على إسم علي الهادي وأمينة على تربية ابنه واني ما أريد غيرها أريد أستر عليها وأعتني بيها وبابنها

عمتي فاطمة ظلت ساكتة فترة تأخذ نفس عميق كأنما تحاول تهدي نفسها

واني ما نزلت عيني من عينها مصرّ على كلامي

:- بس أنتَ تعرف السادة تعرف عاداتهم وتقاليدهم زواج بنت الأرملة ما يكون بهالسهول وبعدين أنتَ بعدك ما مزوّج تريد تاخذ أرملة عدها طفل قبل ما تتزوج بكر؟

- كل هاي الأعراف ما تهمني أنا أريد أم البنين واني ما عندي مشكلة إذا الناس گالت أخذ أرملة واني أريدها هيَ وبس وحيدر الكرار ابني حاله من حال أي طفل يجيني

:- الموضوع أكبر من كلمتين يا فاروق بي كلام الناس اللي ما يرحم وفوگ كل هذا بي گلب أم البنين اللي بعدها يوجعها أنا ما أرفضك أنتَ خوش ولد وأبن اخوي وغالي عليه بس هيَ ما تقبل واني ما أجبرها خليها تاخذ وقتها سنة سنتين تلاثة لمن تنسى وتتعافى بذاك الوكت تعال وافتح الموضوع

- سنة وسنتين وثلاثة عمتي أنا مو گد هذا الصبر واني ما أريدها تنسى علي الهايظ بالعكس أريدها تجيب سيرته بالخير دايمًا وأريد أكون أنا السند اللي يخليها تتذكر علي الهادي وهيَ مرتاحة مو مكسورة

گمت من مكاني روحي جانت ضايجة من الرفض اللي چنت أشوفه بعيونها قبل ما تحچي يمكن چنت متأمل رد فعل أحسن وهتفت وياها

- لعد خليني أحچي ويا البشير قيصر وهوَّ يتصرف ما أريد أضغط عليها بس أريد أحط حبل المودة وأنتظر الإشارة منها

:- على راحتك يا وليدي بس أهم شي راحة أم البنين لا تكون أنتَ والزمن عليها

هزيت راسي بالإيجاب بس بگلبي لا

- الله كريم أنا طالع هسّه مع السلامة

طلعت من البيت وروحي شايلة همّ

همّ أم البنين اللي ما گاعدة ترتاح

وهمّ حيدر الكرار اللي چان لازم يحسّ بوجود أب حتى لو مو أبوه الحقيقي

هذا الحب اللي بگلبي الها چان لازم يلگى طريق للنور

ما أگدر أظل ساكت ما راح أسكت لازم أتزوجها وأصير أني الفاروق الأعظم اللي يكون سندها بهالدنيا

وصلت لسيارتي وصعدت بس ما شغلتها ظليت صافن على البيت أتخيل أم البنين وحيدر الكرار فوگ بالغرفة

كل وحدة بيهم شايلة همّ شكل

كلام عمتي يتردد ببالي هيَ ما غلطانة بس آني هم مو غلطان

شلون أگدر أشوفها تتأذى يوم بعد يوم وهيَ تحاول تچبر كسر ما ينجبر وأظل ساكت؟

مدّيت إيدي وطلعت موبايلي يمكن البشير قيصر يعرف شلون يتصرف بهيچ مواضيع حساسة

هوَ أكبر منّي وبي حكمه دگيت الرقم وبگلبي حسرة

- ألو قيصر؟ شلونك خوة شخبارك

البشير قيصر :- هلا فاروق چنت ناوي أدگ عليك خيرك؟ صوتك ما عاجبني

- عندي موضوع اريدك تدخل بيه

:- تمام انا بالبيت تعال الي

- خوش دقائق و تلكاني يمك

سدّيت التليفون وحسيت شوية راحة يمكن آني ما أگدر أقنعها

بس أكو ناس كبار يگدرون يفتحون الموضوع بطريقة تحفظ كرامتها وراحتها

أريد أكون أنا السند هذا كان عهدي لنفسي

درت مفتاح السيارة وشغلتها طلعت من المنطقة عيوني على المراية

آخر نظرة للبيت اللي بيَ قطعة من روحي آني فاروق وكلمتي لازم تصير راح أكون الأعظم بحياتها السند اللي ما راح يميل أبد

فاروق الأعظم چان يسوق سيارته وراسم بخياله خطة لكسر كل الأعراف اللي توگف بطريقه بالنسبة إله

هذا مو زواج تقليدي هذا وعد بالوفاء لرجل راح ووعد بالسند لامرأة بقَت حطّ إيده على گلبة

حسّ بقوة ما حسّ بيها قبل الموضوع بعد ما يخصّ فاروق وحدّه صار يخصّ عائلة واسم وطفل محتاج سند نَفسَ عميق وقرار حازم طلع منَّه وهتف وي نفسه :

- راح أكون السور اللي يحميچ يا أم البنين والله لو چان الأمر بإيدي چان ما خليت دمعة تنزل من عينچ بعد اليوم الصبر إله حدود وخلص حدودي انتهت راح تتزوجيني ورضاتچ راح تجيني لو بعد حين

﹉﹉﹉﹉﹉﹉﹉﹉﹉﹉﹉﹉

"""" عَـــلي الكــاظــِم """"

بوقت ما جنت كاعد بالصالة احجي وي أمي و علي الباقر و وضعي طبيعي ..

علي الباقر :- يعني هسة شنو راح تستمر بهذا شغلك؟

- مابيدي شيء خليني أستمر بيه وأشوف تاليتي وين

العلوية :- الله ينطيك الرزق بكل خطوة تخطيها وين ما جانت

علي الباقر :- اذا تحتاج أي شيء انا موجود ترى أساعدك واذا ما عجبك الشغل اني أسس الك مجال خاص واشتغل بي

- لا خوية حيل مرتاح بي الحمدلله عوفني بي

:- اذا مرتاح الحمدالله شنو نريد إحنا غير راحتك

بهذا الوقت سمعنا صوت صياح جاي من فوك جان صوت صياح بچي منة المنان مخلوط بصوت صيحات طيبة الزهراء طفر علي الباقر كدامي واني كمت اركض وراه صعدنا الدرج ركضة

العلوية :- أسم الله الزهراء القرآن شنوو الصوت هذا؟

علي الباقر :- بس لااا الحيوان كررهاا

- هيي علي الباقر انتظر

صعدنا بسرعة لفوك وبسرعة وكفنا كدام باب غرفة اخوي علي الصادق و دخل علي الباقر چفت دفر الباب و طب ولكينا علي الصادق جاي يضرب بزوجتة طيبة الزهراء و بنتهم منه المنان بفراشها تبجي

انا رحت وشلت الطفلة وحاولت اهدها وعلي الباقر بسرعة دفع علي الصادق و وكع بيه ضرب ويصيح عليه لان مد أيده على زوجته

علي الباقر دفع علي الصادق دفعة قوية بحيث وكع علي الصادق على الأرض علي الباقر جان مثل الأسد الهايج عيونه تطلع شرار والغضب جان مرسوم على ملامحه

علي الباقر :- لك أنتَ ما تتوب؟ ما تستحي على روحك؟ هم رجعت تمد إيدك على مرتك لك شبيك بالضبط؟ شنو هالظلم هذا؟

علي الصادق حاول يكوم بس علي الباقر لزمه من ياخته ودحمه بالحيط جان شكله يكسر الخاطر بس بنفس الوقت جان يستاهل طيبة الزهراء كامت من الكاع بسرعة ودموعها تنزل حاولت تكمش علي الباقر وتهدّيه

طيبة الزهراء :- لا علي الباقر فدوة عوفه لخاطر الله كافي راح يموت بإيدك

علي الباقر :- يموت خليه يموت هذا ما يستاهل يعيش مرتاح عدة كلشي وجاي يرفس النعمة برجلة ولك شلون هيچ وسوي لك هاي عرضك هاي بنتك كامت تصرخ من ورااك ماكو بگللبك ذرة رحمة؟

أنا جنت واكف يم فراش منه المنان حضنتها حيل چانت ترجف والشهگة كاتلتها وجهها أزرك من كد ما بچت ودموعها مغرقة خدودها الصغيرة همست يم أذنها:

- حبيبة عموو لا تخافين أنا يمج خلص اغدى الشر اهدي يا روحي

بَس هيَّ ما تسكت تزيد بالبراچي و تتچفّل صوتها يگطع الگلب

أمي صعدت ورا ما سمعت الصياح والدگ وجهها أصفر أول ما شافت ولدها حطت ايدها على صدرها وصاحت

العلوية :- يا الله دخيلك شنو هذا؟ كافي علي الباقر عوف أخوك كافي ولك كافي اترك اخيك وخر لي جاي عنه تردون تتذابحون جدامي

علي الباقر تلفت لأمي وترك علي الصادق اللي وكع كدامه بالكاع يتنفس بصعوبة ويحاول يجمع أنفاسه

علي الباقر :- شوفي يمة شوفي هذا ما يتغير هذا يريد يموتنا كلنا بالهم ما خليت شي ما سويته وياه شنسوي بعد؟

العلوية ركضت لعلي الصادق وحاولت تكومه وعيونها مليانة حيرة وخوف

العلوية :- گوم يمة گوم يا فتاح يا عليم گوم

علي الباقر مشى بعصبية وراح وكف يم الشباچ إيده جانت ترجف من الغضب

علي الباقر :- يمة هذا ابنج ما اريده ويانا بعد ما أريد أشوف وجهه ما آمن على طيبة الزهراء وبنتها يمه دقيقة وحدة

علي الصادق كام وكعد على حافة الچرباية ودم من شفته الجوة ينزف مسحه بإيده وتلفت لعلي الباقر بنظرة حقد وغضب مكسور وهتف وياه

علي الصادق :- أنتَ منو حتى تطردني هذا بيتي حالي حالك

علي الباقر استدار عليه بسرعة وراح باتجاهه بس أمي كامت وكفت كدامه ولزمت إيده

العلوية :- كافي وليدي لخاطري خلّي نرتاح مو مال دگ وصياح

علي الباقر :- يمة أنا ساكت طول عمري علمودكم بس هالمرة لا هالمرة ما أسكت هذا مو طبيعي هذا مريض يحتاج يتعالج

علي الصادق :- انا صرت المريض؟ لك أنتَ المريض أنتَ اللي ما عاجبك أحد يعيش مرتاحح

طيبة الزهراء :- اسكت علي الصادق اسكت مو كافي اللي سويته تريد تچذب عيون الكل؟ أنتَ هيّج جانت حالتك من بداية زواجنا ماتريد تقنع عقلك أنتَ جاي تدمرنا

منه المنان بحضني رفعت راسها الصغيرة وباعتلهم أنا لزمت وجهها وبستها وهتفت وياها

- أروح فدوة لهالعيون لا تخافين

علي الصادق سكت من طيبة الزهراء صاحت ورجع مدنك شكله جان خجلان بس بنفس الوقت مكابر

علي الباقر :- أنتَ تعرف زين شنو اللي جاي يصير والكل يعرف اليوم أنتَ راح تطلع من البيت تروح لأي مكان يعجبك بس هنا بعد ما الك مكان لحد ما تتعدل

العلوية :- وين يروح يمة وين يگعد بالشارع؟ هذا أخوك

علي الباقر :- يمة لو هذا أخوي ما يسوي اللي سواه لو عنده گلب ما مد إيده على مرته وخلّى بنته تبجي خلي يروح لأي مكان بس هنا ما يبقى أنا كل ما أطلع للدوام يبقى بالي يمهم ما أضمنه

علي الصادق :- وأذا ما طلعت؟ شنو تسوي؟ تگتلني؟

علي الباقر سكت بس عيونه جاوبت بمكان الكلام أنا حسيت بيه جان يريد يمد إيده مرة ثانية وصحت بيه لان ما اقبل على علي الصادق

- كافي علي الباقر كافي أنا راح أتصرف

حجيت بهدوء بس صوتي جان حازم كل واحد تلفت علية

- علي الصادق أنتَ كسرت گلب أمك وكسرت گلب مرتك وبنتك استوعب الاشياء الجاي تسويها ترى حرام عليك

العلوية مسحت دموعها وحضنت علي الصادق

العلوية :- يمة الله يهديك الله يرجعك النا مثل قبل جنت جنك البخت ليش هيچي اتغيرت يمة شنو الصار وياك سولفلي ليش هيج انگلب حالك موش هاي طيبة الزهراء الجنت تريدها الي طلبتها واخذتها حبيبي ها ليش هسة من اجت يمك صرت تنطيها كل الأذىٰ ليش صرت نسخة من أبوك؟

علي الصادق وكف باوع على طيبة الزهراء اللي چانت مدنكة وما تباوع عليه باوع على بنته اللي چانت بحضني ودموعها ما وكفت واجة واخذاها مني علي الباقر
وإخيراً باوع على أمي اخذ نفس عميق وطلع من الغرفة بدون ما يحچي ولا كلمة

الهدوء نزل بالغرفة بشكل مفاجئ بس جان هدوء مرعب مثل هدوء ما بعد العاصفة
علي الباقر طلع نفس طويل وكعد على حافة الچرباية وحط راس منة المنان على صدرة وهتف

علي الباقر :- تعبت والله تعبت هذا شوكت راح يرتاح ويخلينا نرتاح؟

طيبة الزهراء كامت على حيلها رتبت ملابسها وراحت يم بنتها منة المنان حطت ايدها على راسها وبدت تبچي وتحجي بصوت ناصي

طيبة الزهراء :- دمرني دمر حياتي شنو ذنب هالبنية تشوف هيچ شي؟

العلوية :- يا يمة لا تخافين أنا موجودة علي الباقر موجود علي الكاظم موجود كلكم بأمان

علي الباقر :- طيبات أنا آسف أنا ما جنت أريدج تمرين بهيج وضع بس وعد مني بعد ما يتكرر هذا الشي بعد ما نخليه يوصللكم

- طيبة شوفي لازم ترتاحين إنتِ ومنة المنان لا تخافين من شي.

بقينا بالغرفة لفترة طويلة لحد ما طيبة الزهراء هدأتها شوية ومنة المنان هم نامت بحضن علي الباقر بعد تعب وخوف

أمي راحت جابت مي وعصير لطيبة الزهراء وعلي الباقر صار يحجي بسوالف و مواضيع و حاول يغير الجو ويخفف عنها

علي الباقر :- طيبات أنتِ قوية لا تخلين هذا الموقف يكسرج فكري بمنة المنان لازم تكونين قوية علمودها

طيبة الزهراء :- الله كريم علي الباقر الله كريم

- أنا راح أنزل ليجوة أي شي تحتاجون صيحولي

العلوية لزمت إيدي وبعيوني شفت القلق والحزن

العلوية :- روح يمة الله يحفظك

نزلت لجوة وراسي جان مليان تفكير وضع علي الصادق جان صعب بس وضع طيبة الزهراء ومنة المنان أصعب

رحت للمطبخ شربت مي بارد وحاولت أجمع أفكاري

بعد فترة نزل علي الباقر جان شكله مرتاح نسبياً

علي الباقر :- الحمدلله ناموا تعال نطلع للصالة

كعدنا بالصالة مرة ثانية الهدوء جان سائد بس الهدوء اللي يخفي وراه هواي من الكلام

علي الباقر :- أنتَ ليش كتلي انا اتصرف

- حتى يقتنع ويطلع بدون مشاكل أنتَ چنت حيل عصبي وخفت تصير مشكلة أكبر تعرف إذا صارت ما راح نخلص من الندم

:- صحيح بس هذا لازم يتعالج مو حل بس يروح ويرجع لازم يواجه مشكلته

- أكيد أنا راح أحاول أحچي وياه بهدوء بس مو هسه لازم يهدأ ولازم نضمن طيبة الزهراء ومنة المنان أمانهم أولاً

:- أنا باچر راح أروح أدوّر على دكتور نفساني شاطر لازم نبدي بهذا الشي أنا متأكد السبب ورا هذا كله مو بس العصبية اكو شي

- الشيء الثاني ما يريد يذكره هو يعني بينه وبين مرتة لا ندخل بهذا الباب و أحسن شي تسويه شوفله دكتور والله يسهل خلّينا نكول يا الله

خلصنا حچي أني وعلي الباقر بالصالة والوقت چان يمشي ثگيل كُل واحد بينا باله مشغول باللي صار واللي راح يصير الهدوء بالبيت چان كاسر الدنيا بس چانت أكو ضجة مال أفكار وهموم علي الباقر ظل صافن وگال

علي الباقر :- لازم أفكر زين مو بس دكتور لازم حل جذري أخاف هالمرة تطلع من إيدي الأمور وما أگدر أحميها وأحمي منانة

- يا خوية لا تحمل نفسك أكثر من طاقتها إحنا كلنا وياك والله يسهل أنا گلتلك راح أحچي وياه بس مو هسه خليه يهدأ ويصفن شوية

:- راح تصير 12 بالليل وهذا علي الصادق ما بين وين صفة بوجهَه

- لا تخاف أكيد راح يجي هوَّ ما عنده مكان يروحله غير هذا البيت خليه يهدأ شوية ويصفّي باله

:- يصفّي باله؟ يا علي الكاظم هذا لو عنده نية يصفّي باله چان ما مدّ إيده على مرته كدامنا مرتين وثلاثة أنا خوفي لا يسوي مصيبة غيرها

- لا تفاول عليه علي الصادق مهما يكون يبقى أخونا إحنا لازم نساعده مو نتركه لوحده وهوَّ بهيج حالة كلام أمي اليوم هزّه شفت شلون طلع من الغرفة بدون ولا كلمة؟

:- هزّه لو ندمان ما أدري بس ندمه هذا ما يفيد إذا ما يجي من وراه تغيير حقيقي على العموم أنا صاعد أنام وباچر من الصبح أطلع أشوفلي دكتور زين أنتَ هم روح ارتاح

- ماشي خوية تصبح على خير.

چانت الساعة تقريباً بـ 11 بالليل الجو صار مشحون حيل وگمنا حتى نصعد وننام

أمي چانت گاعدة بغرفتها تدعي ما نزلت بعد اللي صار گلب الأم ما يتحمل يشوف ولدها هيچ

صعدنا الدرج ووصلنا يم الغرف ودخل كُل واحد لغرفته

﹉﹉﹉﹉﹉﹉﹉﹉﹉﹉﹉﹉﹉
علي الصادق ما طلع من البيت مثل ما طلب علي الباقر إخوانه چانوا يعرفون زين إن علي الصادق بالرغم من عصبيته وظلمه ما عنده مكان ثاني يروحله غير هذا البيت هو طلع من الغرفة بس مو من البيت كُله

علي الصادق بعد ما طلع نزل للحديقة الخلفية وظل گاعد وحده تقريباً ساعتين يشرب ماي ويدخن جكاير ويراجع اللي سواه چانت الكلمات اللي سمعها من طيبة الزهراء ومن علي الباقر خصوصاً من أمه مثل السچينة اللي تگطع بگلبه

ليش صرت نسخة من أبوك؟

هاي الكلمة تحديداً چانت توجعه أكثر شي أبوهُم چان قاسي وعصبي
وعلي الصادق طول عمره يكره هاي الصفة بأبوه وهسه هو دا يكررها بحق زوجته وبنته

حسّ بالذنب ذنب چبير مثل الجبل خصوصاً من تذكر وجه بنته منة المنان وهيَّ بحضن عمه علي الكاظم وجسمها يرجف من الخوف

گام علي الصادق ببطء وعاف باگيت الجكاير و الجداحة على المرجوحة وصعد الدرج بخطوات ثگيلة

وصل گدام الغرفة مالته وتردد شوي بس فتح الباب بهدوء وشاف طيبة الزهراء نايمة

رفع راسه ببطء وضل يباوع على طيبة الزهراء اللي چانت ملفوفة بالجادر ملامحها چانت تعبانة وجفنها مورّم من البچي

همس بصوت چان يمكن أول مرة يسمع نفسه يحچي بيه بهيج ضعف

علي الصادق :- طيبة الزهراء

هيَّ ما تحركت چانت متصنعة النوم

:- طيبة الزهراء گعدي لخاطر الله أريد أحچي وياچ

حَسّت بيه طيبة الزهراء بس ما فتحت عيونها خافت لا يكون جايب وياه عصبية ثانية

:- لا تخافين ما راح أسوي شي بس أريد أحچي

فتحت طيبة الزهراء عيونها على گيف وباوعت عليه بحذر ونظرة بيها عتاب سكتت منتظرة شنو راح يگول

:- أنا آسف والله العظيم آسف ما أدري شنو اللي صار بية حسيت بروحي واحد ثاني مو أنا من سمعت كلام أمي حسيت روحي بعالم ثاني

حَسّن من گعدته وگام شويه تقرب عليها بس بقى محتفظ بمسافة

:- أني مو هيچ صدگيني أني أحبچ وأحب هاي البنية الاجت منج بس شلون مديت إيدي عليچ ما أدري هيج يصير وياي مثل السحابة السودة اللي تچي وتغطي عقلي أنا أدري أدري الغلط كُله مني مو بس آسف أنا حقير حيوان شلون مديت إيدي عليچ؟ شلون خليت بنتي تبچي من وراي؟ أنا أحبچ والله العظيم أحبچ ما أعرف ليش هيچ يصير بيَّ ما أدري ليش فجأة أحسّ إن الدنيا تضيج بيَّ وأصيح عليچ وامد ايدي سامحيني لخاطر بنتچ سامحيني والله آخر مرة إنتِ الوردة مالتي والنعمة اللي الله رزقني بيها شلون أرفس النعمة برجلي؟

طيبة الزهراء نزلت منها دمعة حارة مسحتها بسرعة صوتها چان مختنگ

طيبة الزهراء :- الأسف ما يفيد بعد علي الصادق الضرب اللي ضربته والصياح اللي صيحته مو بس يوجع الجسم يوجع الروح هاي البنية شافت كلشي شنو ذنبها تعيش بهيج خوف؟

:- گتلچ آسف والله آسف صدّگيني هاي آخر مرة أنا وعد أقسم بالله هاي آخر مرة أنا تعبان ما أدري ليش گمت أصير هيچ

- إذا ما تدري لازم تعرف علي الباقر گال لازم تتعالج لازم تشوف دكتور ما يصير تبقى هيچ

:- أنا مو مريض!

- لا أنتَ مريض المريض مو اللي نايم بالفرّاش المريض اللي ما يسيطر على غضبه وعلى تصرفاته أنتَ جاي تدمّرنا

:- راح أروح بس مو علمود كلام علي الباقر علمودچ وعلمود منة المنان أنا أريد أرجع علي الصادق اللي أنتِ تردي أريد أرجع أبو منة المنان الهادئ

تقرب عليها أكثر وعيونه چانت بيها دمعة حابسة مدّ إيده بهدوء ولامس خدها وهمس وياها

:- گومي غيري ملابسچ وتعالي نامي يمي

- وين؟

:- تنامي يمي هنا خليني أحس بيچ اليوم حسيت روحي وحيد كل أهلي ضدي بس أني أدري انتِ الوحيدة اللي ما راح تتركيني

طيبة الزهراء سكتت شوية التردد چان واضح بعيونها بس شافت الندم بعيونه وشافت التعب وبعد دقائق من الصمت هيَّ گامت على گيف وغيرت ملابسها وراحت للجهة اللي يريدها

نام علي الصادق وهوَّ يحضنها من ورا حط راسه على چتفها وهمس بأذنها

:- لا تتركيني إذا عفتيني أضيع

- أنا ما أتركك بس أنتَ لا تخليني أندم على قراري

مرت الدقائق وهما ساكتين بس هالمرة الهدوء چان مختلف چان هدوء بيه اعتراف بالضعف من جهة وبيها أمل من جهة ثانية

علي الصادق ظل يحچي بصوت ناصي

:- تعرفين شنو اللي يكسر ظهري هيَّ هاي الأيام المو حلوة اللي نمر بيها أحس روحي مو كفو مادبرت أسعدكم ولا دبرتها وخليتج تحبيني أحس روحي فاشل بكلشي وهذا الإحساس يخليني أطلع حركتي بيكم

- مو صحيح أنتَ مو فاشل أنتَ محتاج ترتاح نفسياً علي اني أحبك ودليل حبي بنتنا كاافي لا تحمل نفسك أكثر من طاقتها

:- أنا راح أروح للدكتور راح أسوي اللي تريدوه بس أبقى يمي لا تعوفيني

- أبقى بس أريّد تشوفني بعينك هاي مو ضعيفة وتخاف منك أريد تشوفني أم بنتك وشريكة حياتك مو جيس ملاكمة تفرغ بيه عصبيتك

:- كافي لخاطر الله ما راح أكررها صدكيني

- ان شاءالله

:- نامي يابعد روحي

نومها بحضنه وغطاها زين وبقى يحچي وياها بهمس سوالف حُب قديمة ذكريات حلوة من خطوبتهم وأيام العرس چانت هاي اللحظة

بالنسبة لطيبة الزهراء مثل المطر اللي يجي بعد جفاف تحس بالأمان يرجع لـ گلبها اللي تعب من الخوف حست بدفو حضنه اللي چانت محتاجته بعد اللي صار نامت على صدره وهو نام وهو لازمها حيل مثل اللي يخاف على شي ثمين كلش

الجو بالغرفة تحوّل من حرب إلى هدوء مُرعب مشحون بالحُب المريض الحُب اللي يجي وياه أذى چبير بس يبقى حُب

﹉﹉﹉﹉﹉﹉﹉﹉﹉﹉﹉﹉
أما علي الباقر فدخل لغرفته غرفته هو يدري و چان يعرف كل زين إن علي الصادق راح يجي ويعتذر وطيبة الزهراء راح تصالحة لان هاي الدورة تتكرر كل فترة

علي الصادق يضرب

علي الباقر يدافع

طيبة الزهراء تبچي

علي الصادق يعتذر

ينامون سويَّة ويرجعون مثل قبل لحد ما تتكرر المشكلة

وهذا اللي چان يكسر گلب علي الباقر

علي الباقر تنهد تنهيدة چبيرة راح لفراشة ونام على ظهره سحب منة المنان اللي چانت نايمة يمه بكل هدوء ضمها لصدره

صار يحجي وهو يهمس لنفسه

- يا روحي يا بنت الروح شلون أگدر أخليهم يأذوچ؟

منة المنان چانت ريحتها مثل ريحة طيبة الزهراء ريحة طَيبة ومحبوبة علي الباقر غمض عيونه وبدا يسترجع ذكريات قديمة

تذكر أول مرة شاف بيها طيبة الزهراء چانت بكد جف الايد شلون شالها وشلون باسها بخدها وهي تبجي لأول مرة

وضحكتها چانت تاخذ العقل من أول نظرة إحساس چبير دخل لـ گلبة حُب چان صافي ونظيف مثل گطرات المطر

علي الباقر چان مؤمن بقضاء الله ونصيبه ما گدر يخون أخوه ولا گدر يخلي هذا الحُب الممنوع ينمو بگلبه حاول يدفن هذا الحُب بس ما گدر كُل ما يشوف طيبة الزهراء كُل ما هذا الحُب يرجع يصحى

قرر يبتعد قلل كعداته باالبيت حتى ما يشوفها هواي بس هيَّ صارت زوجة أخوه وصارت جزء من حياته

رجع وهمس وي نفسه وهو يشم شعر منة المنان

- ريحتچ ريحة أمچ

منة المنان چانت مثل النسخة المصغرة من طيبة الزهراء بعيونها الواسعة وبراءتها هذا اللي خلى علي الباقر يتعلق بيها بهالشكل

هيَّ بنته بالروح بالرغم من إنها بنت أخوه هو چان يشوف بيها طيبة الزهراء اللي ما گدر تكون إله

علي الباقر :- أني ما أگدر أسكت هالمرة مو لخاطري لخاطرچ إنتِ ولخاطر أمچ لازم أخلي علي الصادق يتعالج لو يتعدل لو اخلي امج تطلب بالطلاگ وأضمچ إنتِ وأمچ بعيني يگولون إنتِ عرض أخوك بس إنتي عرضي أنا همين أنتِ يا منة المنان بنتي الي مو بنت علي الصادق

ضمّها حيل لصدره وحسّ بهدوء غريب چان يگدر يحس بدگات گلبها الصغيرة وبنفسها الدافي
هذا هو الأمان الحقيقي بالنسبة إله نام علي الباقر وريحة منة المنان بـ خشمه ووعد بگلبه إن باچر راح يكون غير شكل راح يفتح باب جديد للحل حتى لو هذا الحل چان بيه أذى
لـ گلب أخوه المهم أمان طيبة الزهراء وبنتها
ناموا اثنينهم
هذا نايم وهو يحس بحُب يتجدد كل ليلة
وذاك نايم وهو يتأمل ببنت أخوه وكأنها قطعة من روحه قطعة من حُب قديم

﹉﹉﹉﹉﹉﹉﹉﹉﹉﹉﹉﹉
ثاني يوم الصبح گعدت العائلة كلها على ريحة الچاي والخبز الحار علي الباقر چان يسوي ريوگ وجهز السفرة كلها والعلوية جانت كاعدة تنتظرة يخلص

علي الصادق نزل بهدوء چبير باس راس أمه وگال

علي الصادق :- يمة أنا آسف والله العظيم آسف على البارحة

العلوية :- الله يهديك يمة الله يهديك

گعد على السفرة بعد ما نزلت غدير الله و علي الكاظم علي الصادق باوع على علي الباقر ونظرة الاعتذار چانت مبينة بعيونه

علي الصادق :- علي الباقر أريد أحچي وياك

علي الباقر وهو يشرب الچاي جاوب بهدوء

- مو فارغ لكلامك عندي شغل هواي بعدين نحجي عود بس أنا ما نسيت اللي گلتلك عليه

علي الصادق :- أنا أدري وراح أروح للدكتور أريد أتغير لخاطر طيبة الزهراء ومنة المنان

هنا نزلت طيبة الزهراء وهيَّ شايلة منة المنان اللي چانت مبتسمة بعد ما نامت مرتاحة شافت علي الباقر وهزت راسها إله بهدوء كأنها تشكره على كل شي سواه

علي الباقر هتف بضحكة وهو يباوع على منة المنان

- يا عمري إنتِ تعالي يمي

أخذها من أمها وگعدها بحضنه وبدأ يسوي الحليب مالتها

الوضع چان هادي بس كُل واحد من عدنا چان يعرف إن هذا الهدوء مجرد استراحة محارب

علي الباقر چان مصمم يغير وضع أخوه

وعلي الصادق چان يحاول يرجع نفسه القديم

وطيبة الزهراء چانت تنتظر على أحر من الجمر حتى تشوف شنو نهاية هذا الطريق المتعب

أما علي السجاد جان ما يدخل بأي شيء جان معتگف على نفسة وأولاده وچان يتمنى بس السلامة لهالعائلة المكسورة

﹉﹉﹉﹉﹉﹉﹉﹉﹉﹉﹉﹉
"""" رحمة الزهراء """"

بعد ما جنت ماخذة أجازة يوم من دوامي وكاعدة بالبيت لأن جان زُبير متأذي من الواجب ورجلة جانت تأذي حيل ماكدرت اتركة لوحدة خليت أحمد الدر يروح للروضة واني بقيت يم أبوه

ولمن اجيت وكعدت يمة صرت اللعب بشعرة وهو توه صحصح من النوم هتفت وياه

رحمة الزهراء :- شلونج يابعد ريتي صباح النور

- صباح النور جنوبيتي

:- ها يروح جنوبيتك

- شلونچ يروحي؟

:- بخير انا حبيبي بخير

- شنو حمودي وين؟

:- وديته للروضة ماحبيت اليوم يتغيب

- اههه زين سويتي

:- تكدر تكوم ؟

- شايفتني عاچز لهدرجة ؟

:- لا يروحي بس تعرف عضلة رجلك تعبانة ماريدك تضغط عليها أكثر وتتعب اكثر خليها تصير زينة

- لا يا غنوتي أنا بخير وأريد اكوم هسة واسبح لو تردين تسبحيني بحجة خايفة عليه

:- أكيد لا توكع بالحمام

- لعد كومي يلا اريد أسبح

:- ههههه لا تگيف روح أنتَ أسبح راح اجهز الك الحمام وملابسك

- بس اطلع اريد ريوگ طيب

:- چنك علية يابعد دنيتي تدلل

- الله لا يحرمني منج

كمت من يمه بسرعة وكتله

:- چا كوم يلا حبيبي راح أجهزلك الحمام

رحت للحمام بسرعة رتبت الأمور فتحت المي الدافئ وخليت المنشفة النظيفة والملابس اللي اختاريتها اله على علاگة الباب

هو جان واكف على باب الحمام ويتچي على إطاره ويباوعليّ بهدوء وابتسامة

:- تفضل يابعد روحي الحمام جاهز دير بالك على رجلك زين

- مو كتلك ما بيَّ شي بس انتِ ما تصدكين.
زين ما تساعديني؟ خاف أوكع

:- هههه لا عيني أنتَ سبع وما توكع يلا روح واني راح أجهز الريوگ أريده يكون جاهز بس تطلع

غمزلي وهو يدخل ورجع كال بصوت عالي شوية

- الريوگ أريده مثل وجهچ مشرق ومالح وحلو

:- صار تدلل يابعد عيني تدلل

نزلت للمطبخ لميت شعري بسرعة وبديت أشتغل جان الجو هادئ و بديت أسوي ريوگ دسم مثل ما يحب زُبير

سويت كيمر عرب وكاهي جبن مالح وزيتون وگطعت طماطة وخيار وبنفس الوقت خليت الچاي يتهدر على نار هادئة والچاي العراقي إذا ما يتهدر صح ما يسوىٰ

جنت صافنة وابتسم لا إراديًا زُبير هو جنتي وكياني كل التعب يروح من أشوفه مرتاح ومبتسم رغم كل الصعاب اللي مرت علينا بقينا سند لبعض جانت فترة إصابته صعبة خاصة أن هو رياضي وما متعود على الكعدة بس جان صبور ويحتمل

بعد شوية هيج بالنص ساعة دخل زُبير للمطبخ جانت المنشفة بأيدة ويده تمسح بشعره وشكل الماي يتساقط من شعره على كتفه جان منظره حيل جذاب ابتسمت له

وما حسيت إلا وهو يوكف وراي يخلي ذقنه على چتفي وأيده تحاوط خصري

:- يا ريحة الهيل والچاي شنو هل ريوگ الطيب هذا؟

- يا هلا بهل وجه الصبوح صباح الخير من جديد يا كل الخير تعال كعد لا توكف

راح زُبير كعد على الميز واني كعدت مقابيله بدينا نتريك على رواقق ونسولف

:- تسلم إيدچ يا ريحة الأهل كلها الريوگ يفتح النفس

- ألف عافية حبيبي أهم شي صحتك اليوم راح أحاول ما أخليك تمشي هواي

:- وشلون راح أطلع وياچ نتغدة ببرة؟

- لا عيني اليوم غدانا و عشانا هنانة وإذا تريد تتمشى تتمشى بمحيط البيت

:- يابه فدوة لـ هاي الكعدة والله الأجازة وياچ تسوى الدنيا كلها

- وأنتَ يمي ماريد من الله شيء بعد مكتفية و زيادة

چنا مكملين الريوگ تقريبًا ودا نشرب الجاي فجأة سمعنا صوت ضرب قوي على الباب البيت
زُبير تفاجأ احنا مو متعودين أحد يجينا بهل وقت

ومن الأساس من انتقلوا اهلي وأخواني محد يجيي لنا زيارة!! اني رأسن بالي انلطش وفكرت ابني أحمد الدر صار له شيء وواحد من الروضة هو الي اجه علينا

:- منو هذا؟ شنو هل طكة القوية؟

- والله ما أدري يمكن الجيران او واحد من روضة درتي لو شي صاير كووم افتح

:- يلا خل نشوف.

- على كيفك لا تستعجل رجلك آني أروح أفتح مو أحسن

:- لا لا ماكو داعي آني افتح ما أريد وحدة غيري يفتح باب بيتي

راح زُبير وهو يتچي شوية شوية وصلت وراه واني گلبي يدك بسرعة فتح زُبير الباب وبنفس اللحظة صارت صدمة قوية على وجهه جانت صدمة ما تنوصف

وكفت مرة بعز عمرها ملامحها تعبانة بس بيها شبه من زُبير لابسة ملابس عادية مبهذلة وواكفة والجنطة مال سفر مالتها يم رجلها جانت أمه الأم اللي جانت بالسجن بتهمة الدعارة من سنين

سناء :- زُبير يمّة

زُبير عيونه صارت نار وجهه اتخطف ما نطق بكلمة بس طلعت منه صرخة كلش قوية فز كلبي منهاا

:- شتردين؟!

سناء :- انا طلعت من السجن إجيت عليكم ما عندي أحد غيرك

هنا زُبير نسى رجله ونسى كل شي بس الصدمة والعصبية سيطرت عليه

:- اطلعي من بيتي مالچ مكان هنانة ما عندچ عائلة انتِ مو أمي أمي ماتت من زمان

- لا يمه لا تكول هيج اني ندمت أريد بس مكان أعيش بي والله تبت

:- روحي روحي شوفي التايهات اللي مثلچ روحي دوري على اللي ورطچ بالدعارة بيتي ما يدخل بي قذارة بيتي بي بنية علوية شريفة وابني الصغير

تقدمت انا بسرعة ولزمت إيد زُبير اللي جانت ترجف من الغضب وهمستله بهدوء

رحمة الزهراء :- زُبير على كيفك

:- ما أريدها رحمة ما أريد هذا العار يدخل بيتي

لزمت إيده حيل ولزمت إيدها ورفعت صوتي بس بهدوء وثقة

رحمة الزهراء :- تفضلي خالة

المرأة رفعت راسها مصدومة يمكن ما توقعت أرحب بيها بعد كل اللي سمعته جان زُبير حابس أنفاسه من الصدمة

رحمة الزهراء :- تفضلي للبيت ما يصير توكفين بالباب مهما كان

:- رحمة انتِ شدا تسوين؟ جاي تگولين لها تفضلي؟

- اسكت خل نشوف شنو تريد عيب توكف المرأة برة وهيَّ موش مرآة عادية هاي امگ

:- رحمة

- زُبير أسكت ... تعاي خالة فوتي ماعليج بــ زُبير تعاي وياي

ودخلت المرأة بخطوات تعبانة ودموعها ما وكفت دخلت للصالة خليتها تكعد وسديت الباب

ولزمت زُبير من إيده بقوة ودفعته شوية شوية حتى يرجع للمطبخ و دخلت وياه حتى أهدأ بيه حتى ما تتمادى المشكلة وهو دفعني شوي بعصبية ونتر بوجهي

:- رحمة دا أكلج طرديها ما أريدها بالبيت هاي مو أمي اللي أتمناها

انا لزمته من وجهه وخليت عيني بعينه

- أدري يروحي أدري بس مهما يكون هي أمك اللي جابتك للدنيا ما يصير تطردها بهل طريقة أبدًا ما يصير خطأ

:- رحمتي شتردين أسوي أحضنها أدخلها على وليدي؟ هاي أمي اللي راحت بالحرام

- لا ما راح تحضنها بس تسمعها خليها تحجي خليها تكول شنو صار بيها هي طلعت من السجن وهاي أصعب فترة يمكن ندمت وباب التوبة ما ينسد أبد

:- هاي حيل صعبة ما أكدر كل ما أشوفها أتذكر الشرف اللي داسته والشيء الي سوته رحمتي انا لهاي اللحظة ما متخطي الشيء السوتة هيَّ وأبوي فا شلون ترديني هسة اكابلها واكعد بنفس البيت هاي مو مرة هاي حية!

:- وأني رحمة الزهراء اللي أنتَ حاميه وستر عليه جاي أطلب منك طلب انطيها فرصة مو لعيونها لـ رب العالمين و لـ خاطر العشرة و لـ خاطر اسمك أنتَ زُبير كون قوي بس مو قاسي تخليها تبات ليلة تسمع حجايتها إذا شفت ماكو فايدة ذاك الوكت يصير خير

سكت زُبير جانت عيونه حمرا بس كلامي هدّاه شوية يعرف أني ما أطلب شي يضرنا يعرف أني صاحبة مبدأ

:- شتريدين أسوي؟

- تروح يمها مو وحدك أني وياك أسمع منها بهدوء ماكو داعي للصياح أنتَ هسه أقوى منها إذا جانت غلطانة لازم تسامحها إذا تابت

مشيت وياه دخلنا للصالة جانت المرأة كاعدة على القنفة مدنكة راسها وتشهك بالبجي

رحمة الزهراء :- خالة هاج اشربي ماي وارتاحي و كولي شنو اللي صار وشنو اللي خلاچ ترجعين؟

سناء :- يمه والله تبت صارلي سنين بالسجن عشت مرار شفت العذاب بعيني تذكرتكم تذكرت زُبير طلعت وما عندي مكان أروحله ماكو أحد يفتحلي الباب غير ابني

:- وشلون تردين نصدك شلون ذيج السنين كلها الجنتي تشتغلين بيها وين جنتي ما فكرتي بينا؟ ما كلتي اذا عرفوني الشرطة شنو موقفي كدام الناس وصورتي بعيون أولادي ؟؟

سناء :- ما أنكر الشيطان غواني والناس مو زينة بس صدكني رب العالمين فتحلي عيني أريد بس كم يوم أجمع نفسي أريد أخدمكم واخدم نفسي واغير منها

التفت زُبير عليَّ جانت نظرة كلها استفسار يطلب مني القرار

- زُبير رب العالمين يغفر ما دام هي تابت ما يصير نغلق الباب بوجهها هي أمك انطيها فرصة تعيش ويانا لفترة نشوفها إذا شفنا رجعت لطريق الغلط نرجع نحجي بس هسه أنتَ الأقوى أنتَ اللي تكدر تغيرها الرحمة هي اللي تخلينا أقوياء

زُبير تنهد تنهيدة قوية غلبه التعب على الغضب

زُبير :- تمام تكدرين تبقين بس بشرط
ماكو غلط
أي غلطة صغيرة ماكو رحمة ثانية وهذا البيت بي مرتي العلوية وبي ابني الميرزا احمد الدر ما أريد أي شي يأذي سمعتهم كلامي واضح؟

:- هاي هيَّ واضح يمه واضح والله يخليك بنتي رحمة شكراً شكراً الج

رحمة الزهراء :- لا تشكريني خالة أشكرِ رب العالمين اللي فتحلچ باب التوبة وأشكرِ زُبير اللي رجعتله الرحمة بگلبه

كمل زُبير كلامة وكام صعد للغرفة ورحت انا و أمه حتى ارتب الها غرفة من الغرف إحنا عندنا ثلاث غرف وحدة سويناها لأحمد الدر وباقي غرفتين نضفت الها وحدة منهن حتى تبدي حياة جديدة تحت چناح أبنها وتحت جناحي

وبعد ما هيَّ ساعدتني رتبت الغرفة كلها وكنستها وصعدت دبة ماي شمرت على الكاع و غسلتها و فرشتها ورشيت معقم بيها ومعطر و بخور شغلت وخليتها تكعد بيها

بعد ما كملت ويا خالة سناء ورتبت لها غرفة من الغرف اللي فوگ الغرفة الثانية بعد غرفة أحمد الدر دليتها على الحمام ونطيتها منشفة نظيفة وكلتلها ترتاح وتأخذ راحتها وإذا احتاجت شي بس تصيحني صوت تلكاني يمها هي جانت حيل تعبانة وشكلها منهك عيونها تحچي قصص

وطلعت أحس ظهري صاير نصين رحت للغرفة فتت لكيت زُبير كاعد على الجرباية دايخ وحاط إيده على راسه وجان شكله مو بس تعبان چان مكسور الغضب اللي شفته بعيونه قبل شوية صار رماد وهسه ما بقى بس حزن ثگيل

رحت يمه بهدوء نزعت الربطة الجنت شادتها براسي وذبّيته على الكرسي واجيت گعدت بصفه وحضنته من ورا حطيت راسي على چتفه ويديّ صارت تحاوط رقبته

- يا بعد حيلي وروحي يا غنوتي الحزينة

ما حچة شي بس حسيته تنهد تنهيدة طويلة مثل واحد يريد يطرد تعب سنين من روحه لزمت إيده القوية اللي جانت على راسه وخرّيتها بهدوء وبستها

- تره إني وياك على طول الوكت الشفته أنتَ مو سهل أدري بيك شگد عانيت حتى تتجاوز هاي الصدمة بس رب العالمين ما ينسى عبده الصبور وأنتَ جنت سند لروحك

زُبير حرك راسه بهدوء وهو عينه ما رفعها

:- رحمتي شلون گدرتي؟ شلون گدرتي هيچ تكونين قوية وتهدّين كل ذيج العصبية اللي جان تشتعل بيه؟ هاي المرأة اللي داسَت على شرفي وشرف عائلتي كلهن حتى ابوي ماجان أشرف منهاا شلون تريدين مني أشوفها وأگول هاي أمي؟

- إني ما أريد منك تنساها ولا أريد منك تحبها أو تنطيها حنان الأبن الي تريدة هيَّ إني أريد منك شي واحد بس تسامح مو لخاطرها سامح لخاطر نفسك أنتَ

:- أسامح؟ رحمتي أنتِ شدا تحچين هاي مو شغلة صغيرة حتى أسامحها وأطويها هاي
بصمة عار ظلت مطبوعة بگلبي وگلب الناس الي بالمنطقة القديمة طول السنين لج لهذا الوقت من امشي بشوارع المنطقة أسمع كلمة هذااا زُبير أبن سناء

- أدري والله يا روحي أدري بس أني ما گلتلها تفضلي لخاطر سواد عيونها آني گتلها تفضلي لخاطر رب العالمين باب التوبة ما ينسد أبدًا بوجه أي واحد ومهما كانت غلطتها چبيرة إنتَ شفتها چانت مكسورة وذليلة ما بيها ذاك الغرور القديم

:- شنو الضمان ما ترجع تغلط؟ شنو الضمان هاي التوبة مو چذب؟ أريد أضمن ابني أريد أضمنج أنتِ ما أريد أحد يشوف صورتي وياها ويتهمج بسبة سِمعة مو زينة

رحمة الزهراء رفعت راس زُبير بإيديها حتى تصير عيونها بعيونه اللي چانت حمرة ودايخة وهتفت وياه بصوت ناصي و مطمئن

- الضمان هو رب العالمين والضمان الثاني هو رحمتك وقوتك أنتَ أنتَ هسة بالبيت أنتَ سيد القرار أنتَ اللي أنطيت الشرط وأنتَ اللي گلت أي غلطة صغيرة ماكو رحمة ثانية شوف أنتَ مو چنت أقوى واحد بالموقف وهسة بيدك لو تظل هيج قوي لو ترجع ضعيف وتخلي الشيطان يسيطر عليك؟

:- لا بس العصبية تخبل الواحد

- أدري حبيبي أدري بس أنتَ رياضي تعرف إن القوة الحقيقية مو بالسرعة والضرب القوة الحقيقية هي بالسيطرة على النفس وبالصبر أنتَ انطيتها فرصة انطيتها كم يوم مو لخاطرها لخاطر إنسانيتك ولخاطر اسمك أنتَ إذا هي تابت رب العالمين يرحمها وإذا ما تابت أنتَ سويت اللي عليك ويصير خير أريدك تاخذها كـ أختبار قوة من رب العالمين الك

زُبير ظل يباوع بعيوني فترة طويلة يمكن جان يدور على شيء بــ كلامي أو يدور على الأمان اللي يضيع منه من تجي هيچ عواصف حط إيده على خديّ بهدوء وهتف

:- أنتِ جنّتي وسندي جنوبيتي من أشوفج هيچ قوية وهادئة أحس الدنيا كلها تهون هيچ أحس كلشي يرجع طبيعي لو ما أنتِ جان هسة البيت صار ساحة قتال

- آني أمنّتك على روحي وعلى سمعتي وعلى ابني وأنتَ إنسان تعرف شنو الصح وشنو الغلط إني مأمنة بيك وخلي ببالك الأم ما تتعوض حتى لو چانت عاصية إنتَ ما راح تخسر شي إذا رحمتها بالعكس رب العالمين يزيدك من فضله

:- زين وشنو أسوي هسة؟

- هسه تنسى الموضوع ولازم ترتاح لأن رجلك بعدها تأذيك هاي كلها ما چانت متوقعة وهيچ صدمة تتعبك أكثر من الواجب الصعب

:- وأنا مرتاح ماكو صدمة تعبتني

رحمة الزهراء ضحكت بهدوء وهي تبوسه على جبينه

- ههههه لا تكابر بس أنتَ عيونك شافت شي ما ردت تشوفه وهسة گلبت مزاجك بس أنا موجودة أعدّل المزاج اني راح انزل اسوي المواعين

:- تمام جنوبيتي

نزلت للمطبخ غسلت المواعين بسرعة ونظفت الميز ورتبته من جديد ولمن طلعت لكيت زُبير كاعد على القنفة بالهول وبيدة الريمونت وجاي يكلب بقنوات التلفزيون رحت وكعدت يمة وصرت اسولف وياه

ولمن كملنا سوالفنا على الهادئ ورجعت الحياة الطبيعية شوية شوية زُبير بدا يحس بالراحة وبالرغم من إن الغضب ما راح كله بس على الأقل هدأ و سيطر على الموضوع

زُبير استند على چتفي حتى يرتاح ورجله تحتاج راحة تمدد وهو يتنهد براحة وباوعت للوقت شفت الساعة صارت 11 هتفت وياه

- اروح اجيب أحمد الدر من الروضة؟

:- لا انا اجيبة

- لا اريدك ترتااح

:- رحمتي اسكتي انا اروح اجيبة وارجع بسرعة ما أريد أملج يمي أريد أشوف وجهچ

رحمة الزهراء ميلت راسها وهي تبتسم له

- تمام حبيبي سوي اليريحك بس لا تسوق حيل على كيفك ترى ابني وياك

:- ترى بالسيارة ابنج و روحج

- ههههه شووف علمود هيج لا تسوق بسرعة خليج تمشي على الــ 40

:- هاي هية نوصل الج باجر الصبح

- اي اوصلوا باجر الصبح ولا يصير الكم شيء

:- خلص تدلل علينا الست العلوية

- رايحة اشوف امك

تركت زُبير و رحت صعدت حتى أشوف خالة سناء لمن وصلت ودخلت الغرفة لكيتها چانت نايمة نوم عميق ما حبيت أزعجها سديت الباب بهدوء ونزلت جوا

وآني أنزل الدرج حسيت بالمسؤولية چبيرة على چتافي تره مو سهل إنك تستقبلِ أم زوجك بالبيت الي بي زوج تعبان من الماضي وأنا ما أعرف شلون اتصرف وي عمة!!حيل خفت وحسيت راح اتعب
بس
هيَّ إجت وراح تبقى بس هيَّ راح تعيش تحت چناح رحمة الزهراء وهنا القواعد تتغير
أنا أُمنع الغلط بالبيت وأنا أدافع عن سمعة بيتي

بس ان شاء الله يكون كلشي من البالي وما تطلع الأمور عن سيطرتي

﹉﹉﹉﹉﹉﹉﹉﹉﹉﹉﹉﹉
"""" آريـــچ الله """"

جنت اظن حياتي اتغيرت من بعد شردتي من البيت بس بعدين حسبت ان حياتي تغيرت من بعد زواجي بس هسة حسّيت ان حياتي صدك تغيرت من يوم الي صرت بيه أم لثلاث أطفال هم ايات نازلات من رحمٰن رحيم

صالي ايام كاعدة بالبيت لوحدي و لأن يم أهلي مطمئنة على روحي و حَيرام مطمئن عليه رايح و بالة مرتاح

المشكلة الشيطان ما يترك لهذا أنجبر عزيزي حَيرام يتركننا لايام و أيام حتى يتخلص من هذا الشر لان صار يطاردة وصار يحلم بكوابيس ومايرتاح لا بنوم ولا بكعدة

واني حالياً عندي شمس الحُسين و نور الحَسَن عمرهم كمل الــ ثلاث سنوات وراح ياكلون بسنتهم الرابعة

وهم حامل بس بداية حملي يعني شهري الأول والكُل جاي يتمنى الي ابطني بنت لأن محد حالياً عندة بنات بس طيبة الزهراء جابت منه المنان اما باقي إخواني كل خلفتهم ولد مَ شاءالله وانا هم وياهم عندي توأم ولد
لهذا دعواتهم على البطني تكون بنت وانا هم اريدها بنت اريد تصير مدللة امها و اميرة أبوها

جانت حياتي نوعاً ما هادئة نسبياً..

بس غصة إخواني وابوي جانت بكلبي ماكدرت اتناساها أبد!
شلت ألعاب أولادي الي تعبوا وناموا باوعت للساعة لكيتها صارت بــ 5 العصر صعدت لفوك دخلت للأولاد وطلعت الهم ملابس وسحلتهم من الفراش لبستهم وعدلت شعرهم ورجعت شمرتهم بفراشهم يكملون نومتهم الجذبية هههه

طلعت لغرفتي لبست الحجاب والعباية وصحت الهم صوت محد اجاني بس كلت

:- ميرزاتيي انا رايحة لبيت جدوو محد يريد يروح وياي؟

انفتح الباب وطلعوا من الغرفة سنافر اثنين ما يركضون يدعبلون ويصيحون

شمس الحُسين :- اناااا

نَور الحسن :- اناا اناا بيت جدوو ههييي

ضحكت وكعت بالكاع حضنتهم وعدلت ملابسهم ونزلت وياهم طلعنا ورحنا لبيت أهلي لأن مليت وانا كاعدة لوحدي اول ما فتت لجوة ركضوا ولدي لحضن امي واني رحت وحضنت طيبة الزهراء

شمس الحُسين :- إحنا اجينا جدة

نور الحسن :- بيبي

العلوية :- ياهوى ريتي يابعد عافيتي تعالوا يابعد چبديي ولكم اروح فدوة لهل ريحة

اريج الله :- شلونج يمة

- هلا يمة شلونج أنتِ

لكيت طيبة الزهراء كاعدة يم امي رحت وحضنتها حيل ومن اتقربت منها لاحظت الكدمات بوچها الي تحاول تخفيهن بالمكياج ..

طيبة الزهراء :- نورتي حيل مشتاقتلج

:- حبيبتي انا الأشوق شلونج

- الحمدالله

:- شنو هذا شبي وجهج.؟

- مابيه شيء

حطيت ايدي على حنچها وصرت أدور بوجها يمين و شمال واركز بعيونها لا البنت مو طبيعي وضعها مضروبة!
خزرت أمي وعطت بــ طيبة الزهراء

:- يمة شلون تقبليها على ابنج هيج يسوي ؟

العلوية :- اكدر عليه كلمرة أصيح عليه و احجي وياها يرد ونسمع صياح المگرودة شني البيدي أربطة بالشباچ واشد علگ ابو فاضل عليه ؟؟

:- هذا مو صاحي شبي انگلب وضعة هيچي ؟

طيبة الزهراء :- عوفيني أريج انا بخير

ماكدرت اتحمل منضرها وعود مخلية مكياج ما يبين شيء لزمت ايديها ححيل ونترت بيها

:- ليش تخلينة يتمادة وياج اخوي علي الصادق ليش هيج چاي يسوي ؟

طيبة الزهراء :- ماكدر اسوي له شيء

:- ما تكدرين شني ؟ استغفر الله ماكدر اعلي صوتي لا الأطفال يخافون لج طيباات لا تچفليني لج ليش هيج منطيته مجال ومخليتة يتجاوز وياج ليش ؟

- أريج انا ما مخليتة بس هو زلمة ماكدر عليه ادفعه شسوي هو مكتوب عليه اعيش هيج

:- لج شلون هيج تغيرتي نسيتي اللسانج وين راحت شخصيتج ارجعي ولج ارجعي هذيج طيبة الزهراء الي تفضح وتهجج الي يدوس الها على طرف

طيبة الزهراء نزلت راسها ما كدرت تباوع بعين أريج الله صارت تلعب بأصابع إيديها ودموعها كاتلتها بس ما تريد تنزلها كدام العلوية وأريج الله

طيبة الزهراء :- أريج الله يخليج عوفيني هي المشاكل تصير بكل بيت بس إنتِ ما تدرين شصاير بيناتنا

:- المشاكل تصير بس مو معناها الرجال يمد إيده على مرته ويشوه وجها وتجين تحطين مكياج حتى ما يبين شي إنتِ مو مرة ضعيفة إنتِ اللي علمّتينا معنى القوة شجاب هذا الضعف كله هسة؟ لج جان علي الصادق شكد يحبج؟ وين راحت سوالف الحب هاي؟

العلوية :- يمة أريج إنتِ تعرفين علي من ينكسر ظهره أو تتراكم عليه المشاكل ينگلب غير شكل الفترة الأخيرة ما مرتاح بالشغل ولا بالنوم وإبليس ما يگعد راحة

:- وشلون بالله ما مرتاح تعبان يجي و يفرغ عصبيته بـ طيبة الزهراء؟ هي شذنبهة إذا هو ما مرتاح يروح يطلع برا يغير جو مو يجي يكسر بخاطر مرته ويضربها ما أگدر أتحمل أشوفج هيچي يا طيبات وحق رب العالمين ما أگدر

شمس الحُسين ونور الحَسَن جانوا كاعدين يم العلوية يلعبون بألعاب بسيطة بس حسّوا بالجو المتشنج وكمشوا بملابس بيبيّتهم بخوف أريج الله باوعت لأولادها وشالتهم بسرعة حضنتهم حيل وهتفت وياهم

:- يروحلكم فدوة القوة والحيل اكعدوا العبوا وماعليكم جاي اسولف وي بيبي و خالة

تركت اولادها يلعبون ودارت نضرها لأمها و كملت كلامها

:- يمة هذا السكوت ما ينفع هذا يزيد الطين بلة أگوم هسة وأصعد لـ علي الصادق

العلوية :- يمة وين رايحة لا تسوين مشكلة أكبر إحنا حجينة وياه وهو اتفهم بس هستوة رجع من الدوام عصبي لا تخلين الموضوع يكبر أكثر

:- لا يمة ما راح أسكت ما راح أطلع من بيتكم وأنا أشوف أختي مطفية وعيونها مكسورة وأخوي عايش دور الزلمة المتباهي بقوته على مرته هاي مو رجولة هاي حقارة

طيبة الزهراء :- أريج الله يخليج لخاطري ما أريد مشاكل هو هسة بالغرفة وكال يريد يكعد لوحدة عوفي خليه يهدأ

:- إذا هو ما يحترمچ أنا أحترمج وإذا هو ما يقدرچ أنا أقدّرچ لا تخافين ما راح أخلي صوته يعلى بس لازم يعرف إن طيبة الزهراء وراها سند مو بس شاد حيلة ماعندچ لا اب ةلا أم واخوانج كلمن بديرة وجاي يلعب براحته خلي يعرف ان وراچ إحنا

أريج تركتهم صعدت الدرج وگلبهة يدگ بقوة ما متعودة تدخل هيج بخصوصياتهم بس منظرهة لـ طيبة الزهراء ما خلاهة تفكر غير بس بـ كرامة أختها

وصلت لباب الغرفة اللي جانت مسدودة ضربت الباب بقوة مو بهدوء

أريج الله :- علي الصادق إفتح الباب أريد أحجي وياك

ما جاوب وهي هنا صاحت بصوت أعلى

:- علي ما راح أروح إذا ما فتحت الباب وأگدر افتح الباب هسة بيدي وأدخل بس أريد أحترم خصوصيتك إفتح

بعد لحظات من الصمت انفتح الباب بهدوء فتح الباب علي الصادق ورجع كعد جان مبين عليه التعب والضوجة وبوجه تعصيب مو طبيعي من شاف أريج الله اتفاجاء

علي الصادق :- خير أريج شكو شبيج ما مرتاحة؟المن هذا الصياح كلة

أريج الله دخلت وسدت الباب وراها وباوعتله مباشرة بعيونه

:- أنا مرتاحة بس طيبة الزهراء مو مرتاحة

- شبيها طيبة الزهراء شتحجين؟

:- لا تسوي روحك ما تدري أنا ما جاية أسوي مشكلة أنا جاية أسأل سؤال واحد بس ليش إيدك چاي توصل لوجه مرتك؟

- أنا ما سويت شي وين شايفه اضربها إنتِ متوهمة طيبة إنجرحت بالشغل أو شي

:- ههههه علي أنتَ شگد تچذبت على نفسك لو تچذبت على اللي يمك بس عيونها ما تچذب والمكياج اللي حاولت تخفي بيه الكدمات ما يچذب طيبة الزهراء ما إنجرحت طيبة الزهراء إنضربت وأنتَ تعرف كلش زين هذا الشي

- وإنتِ شعليج هاي مشاكل بين الزوج وزوجته مو من حقج تتدخلين هيچي روحي شوفي مشاكلج وإنتِ وحَيرام

:- مشاكلي أنا وحَيرام ما بيها ضرب بيها خلاف وإذا حَيرام فكر يوم يرفع صوته أو إيده عليَّ ساعتها ما راح أسكت ولا راح أنتظر أحد يجي يدافع عني بس طيبة الزهراء مسكينة جاي تسكت وتتحملك وأنتَ مستغل هذا الشيء اذا ما لكيت احد يوكف وياها ويدافع عنها اكلك هي أختي ويعني مشكلتها مشكلتي ياخوية جاوبني بصراحة شصايرلك إنتَ مو علي اللي نعرفه علي اللي ما ينطي بـ طيبة علي اللي چان يتغزل بضحكتها شنو اللي خلاك تتحول لـ زلمة ضعيف ما يگدر يسيطر على عصبيته إلا بضرب حرمته؟

علي الصادق سكت ونزل راسه بدا عليه الإنهيار

- أنا تعبان أريج تعبان ما جاي أرتاح أصيح على روحي ما أگدر

:- التعب مو مبرر لـ كسر خاطر مرتك طيبة إنسانة مو چيس ملاكمة تتعب؟ روح للمرقد روح زور روح صيح بحي الله مكان فارغ وطلع كل الطاقة السلبية او روح نام بـ حضن أمك بس لا تروح لمرتك اللي المفروض تكون سكنك وتخليها تبچي وتخاف منك

- هي استفزتني گلتلها أكثر من مرة لا تدخلين بفلان موضوع وهي ما تسمع الكلام عصبت وما حسيت إلا وإيدي

:- لا تسويها بذمتها إنتَ اللي عصبت إنتَ اللي مديت إيدك إذا ما عجبك كلامها اترك الغرفة واطلع برا مو تمد إيدك تتذكر من چان جدي يعلمنا؟ گال الزلمة الحقيقي ما يقوى إلا على زلمة مثله أما مرته وبناته فـ ذولة أمانة بحوزته
علي إنتَ أخوي وأعرفك زين بس إذا تكرر هذا الشي والله العظيم ما راح أسكت لا أنا ولا إخواني ولا امي راح يسكتون طيبة الزهراء لها حق عليك إنتَ مو بس زوجها إنتَ حمايتها وأمانها هي كل اللي سوته حاولت توگف يمك وهذا جزاءها؟

- أنا آسف والله العظيم آسف أنا ما أگدر أعيش بدونها بس أحس روحي مو طبيعي أحس اكو شي بداخلي خربان

:- اعتذارك لازم يكون لـ طيبة الزهراء مو إليَّ روح إعتذر منها امسح دموعها وكون إنتَ طبيب جروحها اللي سببتها إنتَ بنفسك وإذا تحتاج مساعدة أو تحتاج تحچي أنا موجودة بس وعدني ما تمد إيدك عليها بعد

- أوعدج وحق الإمام الحُسين أوعدج

:- حافظ على الوعد كوم هسة وغسل وجهك روح لـ طيبة الزهراء وحچي وياها بهدوء وطمنها

- شكراً أريج

:- الشكر لله

طلعت من الغرفة بهدوء نزلت وشافت طيبة الزهراء كاعدة وساكتة راحت يمها وهمست الها

:- علي راح يجي يحچي وياج لا تعصبين ولا تعلين صوتج اسمعيه بهدوء وإنتِ تعرفين حقج لا تتنازلين عنه

طيبة الزهراء :- إن شاء الله يروحي الله يخليج

أريج الله نزل وكعدت يم أمها العلوية ولفت إيدها على كتف شمس الحُسين بينما نور الحَسَن جان لازك ببيبيته وملتهي بالـ اللعبة البسيطة مالته رفعت أريج الله عيونها تباوع على علي الصادق اللي نزل بهدوء مبين عليه كَسرة الخاطر والندم تقريباً مثل طفل مسوي شغلة غلط ومتردد يعتذر

علي الصادق اتقرب بخطوات بس بدل ما يروح مباشرة لـ طيبة الزهراء راح كعد يم أمّه

العلوية :- يمه علي موزين اللي صار طيبة الزهراء ما الها غيرك

علي الصادق :- آسف يمه والله ما چان قصدي مدري شصار بيه

أريج الله همست لأمها

:- عوفي يمه خليه هو يحلها

العلوية هزت راسها بتفهم وسكتت علي الصادق ظل شوية ساكت يتأمل طيبة الزهراء اللي جانت كاعدة كدامهم و راسها نازل وتلعب بأصابعها

علي الصادق :- طيبة

طيبة الزهراء رفعت راسها بهدوء عيونها مدمعة بس ما باوعت بعينه مباشرة صارت تطاير بنضراتها وهتفت

طيبة الزهراء :- نعم علي

- أعتذر والله أعتذر حقّچ عليَّ أنا ما چنت بوعيي ما أدري ليش داسوي هيچي.

طيبة الزهراء :- المشكلة مو بالاعتذار علي المشكلة بالوجع الوجع اللي بالگلب مو بالچسم يطيب صارلي كم سنة وياك عمري ما فكرت تصير هيچي وياي

- والله أحبچ إنتِ النفس اللي أتنفسه بس الشغل والمشاكل صارت تطاردني حتى بالنوم أحس روحي مو آني أحس شيطان دخل براسي وما يخليني أهدأ

أريج الله :- هذا كله ما يبرر الضرب علي المشاكل تنحل بالگعدة بالسوالف مو بالإيد طيبة مو بس مرتك طيبة أم لـ بنتك تكسرها وتهينها گدام عين بنتك. شنو الذنب اللي سويته؟

- أدري أدري أريج بس الله شاهد ندمان طيبة إسمعيني روحي ما تتحمل أعيش بدونچ أني أدور على علاج أدور على حل بس إنتِ بس لا تعوفيني و علي الباقر كال راح يشوف دكتور مو هيج انا مستعد أروح له

طيبة الزهراء :- يا علي منو گال أعوفك أنتَ ظهري وتاج راسي بس گلي شلون أعيش بخوف شلون أگعد يمك وگلبي يضل يدگ بخوف من اللحظة اللي راح تعصب بيها وتمد إيدك؟

- أعدل روحي بس إنتِ سامحيني

العلوية :- يمة طيبات سامحي يمة هو تعبان الشيطان يلعب بعقله أدعيله بالهداية واوكفي وياه

طيبة الزهراء سكتت شوية باوعت لعيون علي الصادق اللي جانت مليانة ندم حقيقي وبعدين باوعت لـ أريج الله اللي جانت تهز راسها بهدوء بمعنى إحجي اللي بداخلچ

طيبة الزهراء :- مسامحتك بس شرطي عليك إذا تكرر هالشي والله العظيم ما راح تشوفني بعد لا تخلي أولادنا يعيشون ببيت كله صياح وضرب روح لــ دكتور إنتَ محتاج ترجع لوضعك الطبيعي

- أوعدج راح اصير أحسن

بهاللحظة نزلت الدرج غدير الله ومبين عليها توهة كاعدة من النوم العصرونية بس أول ما شافت أهلها ابتسامة عريضة طفحت على وجها

غدير الله :- يـمَّـه... يـمّـه أهلاً وسهلاً شوكت إجيتوا؟

باوعت لـ أريج الله وهية تركض عليها حضنتها حيل

غدير الله :- أريج الـگَمَر يا بعد عيني مشتاقتلچ بگد رحمة الله شلونج يا حامل وشلونهم الـ سنافر؟

أريج الله :- يا هلا بـ ريحة العافية توهة صارت الدنيا بيها هواء طيب من إجيتي إحنا هم إجينه قبل شوية الحمدلله بخير نسأل عنچ

غدير الله :- الحمدلله اني بخير

باوعت لـ شمس الحُسين ونور الحَسَن اللي ركضوا عليها وحضنتهم وهمستلهم

غدير الله :- يا بعد خالتكم تعالوا بوسوني

باوعت لـ طيبة الزهراء اللي جانت تبتسم ابتسامة بسيطة

غدير الله :- طيباتي يا عيوني شلونچ اليوم؟

طيبة الزهراء :- زينة الحمدلله

غدير الله انتبهت على وجه علي الصادق العبوس وهتفت

:- شني شبيكم؟ شو حسّيت بالجو بيه شوية صمت مو طبيعي چنت نايمة وترى حلمت حلم مو حلو خير إن شاء الله

العلوية :- لا يمه ماكو شي بس چان علي وأريج يسولفون بشغلة بالبيت انتِ شعندچ نايمة لحد هسة؟

:- يمه انا وحدة مهدّود حيلي

راحت غدير الله وكعدت يم أريج الله ولزمت إيدها

:- يا يمة على هاي الإيد الناعمة اللي شايلة الدنيا كلها أريج والله بالي يمج وهسة من شفتج ارتاحيت حَيرام وين راح؟ اجة لو بعدة

أريج الله :- راح لـ طريق طويل كم يوم ويرجع إن شاء الله

:- زين هو شبي

- مااكو بس الشيطان يطارده وما يرتاح لهذا راح

:- اهاا الله يحفظه ويرجع بالسلامة زين سوّه ياخذله فترة نقاهة ويرجع أقوى زين والحَمَل شلونة؟ يا رب بنية أريد وحدة أسميها على إسم حلو

أريج الله :- هاي شنو هاي الكل يدعيلي ببنية ان شاء الله يا رب يتحقق التردوه عمت عيني على هل أولاد شلعوا گلبنا بس طيبة عندها المنان وهو هم شلع گلبها

طيبة الزهراء :- ههههه أي والله منة المنان لو نا علي الباقر مستلمها جان مدري شصار بيه بس والله هي كل حياتي

غدير الله :- إي شكو ماكو سولفولي صارلي هواي ما گاعدة بهالگعدة الحلوة ومجتمعين اايي اريجه ما گتيلي شوكت تسوون عزيمة لـ عيالچ؟ مشتاقة أشوف حَيرام

أريج الله :- من يرجع بالسلامة إن شاء الله بس أنتِ شنو وضعج؟ ما ناوية تبيضين وجهنا ونشوفج عروس؟ عيونچ الحلوة نريد نشوفها مكحلة

غدير الله :- وين أريج؟ ما شفت بعدني اللي يستاهلني مو كل من دگ الباب يصير زلمة أريد واحد مثل علي الباقر او علي السجاد مو مثل ....

باوعت لـ علي الصادق اللي ابتسم بإنكسار وكملت كلامها

:- يعني أقصد مو مثل بعض الشباب اللي يفكرون بس بـ مظهرهم

علي الصادق :- حقج غيمة الدنيا ما بيها زلم سهلة

أريج الله غيرت الموضوع بسرعة وهتفت

اريج الله :- المهم يا حلوات أنا إجيت حتى أشم هواكم وأرتاح أحس البيت بدونكم خالي

:- يا بعد عمري البيت منور بيچ و بـ أولادچ الحلوين شمس ونور تعالوا خالتكم تحبكم

سحبتهم يمها وبدت تلعب وياهم
علي الصادق ظل گاعد شوية يحاول يسترجع عافيته وشكله الطبيعي كام بهدوء وراح للمطبخ وبعد دقائق رجع جايب مي وشوية عصير لـ طيبة الزهراء و أريج الله

علي الصادق :- إشربي هذا زين لجسمچ

طيبة الزهراء باوعت لـ أريج الله اللي ابتسمت بتشجيع اخذت العصير وهمست له : شكراً

الجو بدأ يهدأ أكثر غدير الله بنشاطها وضحكتها اللي تشبه ضحكة أريج الله سحبت الضوجة وخلت الكل يبتسم

غدير الله :- أريج أتذكرين من چنة أطفال شگد چنة نتعارك على لعبة معينة؟

أريج الله :- هههههه أي وخاصة من تخافين وتروحين تركضين يم علي الباقر ووتضمين روحج ورا ظهره

:- ههههه ايي والله جنت اتبلى على العالم لأن شادة ظهري بي يدافعلي واني خطأ

العلوية :- اليوم عشاج يمنا اريجات ؟.

- أصلا نايمة اليوم يمكم

غدير الله :- اييي زين تسوين

- مليت النوم لوحدي

العلوية :- خووش خلي يرجعون إخوانج هسة واخليهم يسوون أحلا عشة تاكلين ايديج وراه

- امي خوش مشغلة الشباب

غدير الله :- كل واحد شغل معين يعجبونج ههههه

أريج الله حست بالهدوء رجع للمكان شافت علي الصادق لزم إيد طيبة الزهراء ومسح بأصابعه على ظهر إيدها عرفت إن كلامها أثر بي وإن طيبة الزهراء قوية وراح تعرف تحافظ على كرامتها وحياتها

لمّة العصر جانت حلوة لمة خوات وإخوان تجمعت على محبة على الرغم من المشاكل اللي صارت أريج الله شافت علي الصادق يحاول يرجع لـ طيبة الزهراء عرفت إن الحب اللي بيناتهم بعده موجود بس محتاج رعاية وإهتمام ضحكة غدير الله رجّعت الحياة للبيت و وجود شمس الحُسين ونور الحَسَن ببرائتهم طرد الظلال القاتمة أريج الله تنهدت براحة إطمنت على أختها وراحت الضيگة من گلبها رفعت عيونها لـ شمس اللي جان نايم على إيدها وهمست بداخلها

: يا ربّي أحفظ إخواني وأخواتي وطيّب خاطر طيبة الزهراء و رجّع حَيرام بالسلامة و خلّي اللي ببطني نور على نور

﹉﹉﹉﹉﹉﹉﹉﹉﹉﹉﹉﹉
""" الفاروق الأعظم """

رحت والتقيت باخوي البشير قيصر لكيته منتضرني بالبراني وانا أتأخرت عليه بسبب الطريق والازدحام وبعد ما نزلت من السيارة ودخلت للبيت ورحت للبراني وصرت كدامة ابتسم وضمني لصدرة وهتف وياي

البشير قيصر :- ياهلا بريحة صفاء الحسن الوحيدة

حطيت ايدي ورة ظهرة ورديت إله الحضنة وبعد ما أبتعد عني عتني من أيدي على الخفيف بشقة يعني وضحك وياي وهتف

:- ها ولك شمالك ؟

الفاروق الاعظم :- هههههه أريد احجي وياك

:- وأنا اسمعك وكلشي بيه يسمعك

- بشير أنتَ أخوي والجبير والكل يسمعك ويحسبلك ألف حساب وانا اقدرك و احترمك

:- أعرف هذا الحجي كلة ادخلي بالنضيف ورة هاي المقدمة شنو تريد

- أنا اريد أتزوج

:- ههه صدك تحجي ؟

- والله العظيم اريد اتزوج

:- ساعة السعد عندك وحدة تريدها لو انا أخطب الك على معارفي من الزلم الكفوو و خلفتهم جواهر ؟

- لااا انا عندي اريد وحدة معينة اريدك تطلبها الي

:- يلاا الله يبشرك أشر وإني أروح بس كولي منو هية و بنت منو وين اهلها وشكد عمرها وتدلل عليه

- هية عمرها ما يتجاوز الــ 23 سنة

:- كلش حلو عمرها مناسب الك مو صغيرة حيل زين وين اهلها وين شفتها

- بشير

:- عيونه لبشير و نفس روحه

- انا اريد اتزوج أم البنين

البشير قيصر ضل صافن بوجهي عيونه المليانة حنية صارت بيها نظرة ما عرفتلها مزيج بين الصدمة وعدم الاستيعاب چان الضحك اللي قبل شوية اختفى من شفايفه نهائياً

- بشير شني خوية شمالك صفنت هيچي؟

:- اهي عدها ولد صغير

- أي حيدرتي بس شنو علاقة هالشي بموضوعي؟

البشير قيصر رفع إيده وحطها على لحيته يمسح بيها بتوتر خطواته چانت رايحة جاية وكأنه ضايع وهتف وياي بصوت نااصي

:- يا فاروق يا خويه هذا الحچي ما ينحچي هيچ

- ليش ما ينحچي أنا شسويت غلط أنا طلبت بالحلال طلبت بنت عمتي وهي مرة كفو ومحد يعيب عليها

البشير قيصر وگف گبالي عيونه صارت حادة بس بيها أثر زعل ممزوج بقلق

:- يا حبيبي يا روحي أنتَ أم البنين أرملة السيد علي الهادي ابن عمنا وضلعنا صارله بس أربع سنوات بالضبط من توفى الله يرحمه يا أعظم أربع سنوات بس

- وهل اكو بالشرع أو بالعادات يمنع واحد يتزوج أرملة ابن عمه بعد انقضاء العدة؟ أنا ما چنت ناوي أتقدملها لو چانت عدتها ما خلصت كل شي صار بالحلال وهي مرة حرة هسة أبن عمي راح والله يرحمه ماكو شيء بيها أخذ الجانت مرتة واربي إبنه

:- فاااروق مو مسألة حلال وحرام مسألة عيب مسألة شكولون الناس يا أخوي أهلنا ما يتقبلون هذا الشي بسهولة أم البنين چانت زوجة علي چانت ريحة علي بالبيت شلون تريدها تصير زوجة الك بعده؟

گعدت على القنفة بتعب مدري منين جاني هالخوف من رد فعل اخوي البشير قيصر بس ما چنت ندمان على قراري

- يعني تريدني ياخوية أبقى طول عمري أباوع عليها من بعيد؟ أبقى أحبها بگلبي وأخاف أحجي؟

البشير قيصر گعد بصفي رجعت نبرته الحنينة بس بيها ثگل ولوم

:- تحبها؟ شوكت لحگت تحبها؟ انتَ طول عمرك ما تباوع على وحدة چنت تكول أني ملتهي أبني مستقبلي شوكت صارت هاي السالفة؟

- من أيام الفاتحة و من طلعت من السجن وشفتها شلون تعبانة چنت دائماً أحسها تستاهل الاشياء الأحسن الها هيَّ تستاهل الضحكة بعد وفاة علي صرت اروح واجي لبيت عمي حتى اوكف وياه أنا خوية أنا شفت بيها مرة ما تتعوض مرة شالت هم الدنيا وهي بعدها صغيرة هي ربّت حيدرتي ومحد يگدر ينكر تربيتها

:- يعني أنتَ تريدها علمود تعوضها لو علمود أنتَ تحبها؟ فرق السماء عن الگاع بين النيتين

- النيتين سوية يا بشير أريدها تسندني وأريد أسندها أريد أكون أب لحيدرة وأريدها تكون زوجتي وأم لأولادي أريد أفتح گلبها ما اطلع علي الهادي منه بس اخليها ترتاح وأشوفها بعيوني سعيدة ومحد يكدر يحجي عليها محد يگدر يلومني لو صرت أنا المسؤول عنها وعن ابنها

:- يا أعظم يا بعد عمري السالفة مو بس يم أهلنا السالفة يمها هي

- يعني شنو؟

:- البنية أرملة يعني مو بنية صغيرة بعدها بحلم العرس الأبيض هاي أم وعندها ولد من علي وهي لحد هسة ما رفعت الثوب الأسود من جسمها شلون حتتقبل فكرة زواج جديد؟
شلون حتتقبل فكرة تصير زوجة لأخو المرحوم؟ يا خويه هذا الحمل ثگيل عليها وعليك

- أنا مستعد أشيل هذا الحمل بس أريدك أنتَ تروح تخطبها أريدها تسمع منك

البشير قيصر سكت فترة طويلة چان يفكر چان يقارن بين حب أخوه وبين الحچي اللي راح يطلع من الناس

:- شوف أنا أخوك الجبير وما أرفضلك طلب لو چان برمشة عيني بس أنتَ تعرف أنا شگد أحب علي الهادي أنتَ تعرف غلاته عندي ومو من السهولة أشوف مرته اللي چانت قطعة منه تصير مرتك

- أنتَ بيدك تريح ضميري وتريح ضميرها يا بشير لو ما تصير من نصيبي صدگني راح تبقى بعيني وماراح أرتاح لو هي ما وافقت أرجعلك وأگولك سويت اللي عليه

البشير قيصر وگف وراح يم الشباك صار يباوع للحوش وصافن يفكر بكلامي الما جان بالحسبان وهتف وياي وهو منطيني ظهرة

:- زين فرضا أهلها عمامها شنو گالوا؟ أنتَ حاسب حساب شنو راح تسمع من سوالف؟ خطف مرية أخوه؟ جان حاط عينة على ارملة اخوة ؟ شلون ما استحىٰ؟

- خلهم يحچون أنا ما أهتم لكلام الناس اللي ما يراقبون ربهم أنا اللي يهمني أنتَ وأهلي وأهلها أنا أريد حلال وما أريد حرام أنتَ بس روح والباقي على الله

البشير قيصر التفت عليه عيونه رجعت بيها لمعه الحنية بس چانت لمعه واحد قرر يسوي شي صعب

:- خوش أنا أروح بس بشرط!

- شنو شرطك؟ أمرني

:- تگعد ويه عم ام البنين وتفهمه الوضع كله لأن حالياً هو ولي أمرها أنتَ اللي تحچي بالبداية مو أنا أنا بس أروح وأشوف شنو يگولون وأشوف رأي أم البنين هي شنو
مستحيل أفرض عليها شي مستحيل أگول هذا أخوي ولازم توافق القرار الأخير الها هي ولعمها اتفقنا؟

گمت من مكاني وتقربت منه لزمت إيده وبستها

- اتفقنا يا تاج راسي أنتَ السند والظهر أنا أسوي اللي گلت عليه بس أنتَ خليك مستعد تسمع حچي ما يعجبك

:- مو أنا البشير قيصر اللي يخاف من حچاية يا أعظم بس أنا الخايف عليك أنتَ الخايف من جرح يصيبك

- ما يصيبني شيء

باوعت الساعة چانت الدنيا ليل بس لازم أحچي ويه عم ام البنين هسة؟ هتفت وي البشير قيصر

- زين شوكت نروح؟

:- مو هسة لازم نختار الوقت المناسب يمكن الرجال هسه نايم أو مشغول بس قبل ما أحچي وياك أريدك تحچي وياها هي

- أحچي وياها هي؟ شلون يعني؟

:- يعني تتصل بيها وتگوللها أنتَ مو تحبها؟ مو تريد تتزوجها؟ من الأصول تگوللها أني متقدم الج ومتقدمة منكم مو تروحلها بخطبة رسمية وهي ما تدري بالدنيا وين صايرة

- ما أدري يا بشير خاف تستغرب خاف ترفض قبل ما تفكر

:- الرفض حجي ما يضرك الرفض أحسن من القبول الما بيه قناعة أنتَ إنسان واضح وصريح حچيلها بكل ثقة گوللها أني أريد أكون زوجج وأب لابنچ وهي مرة عاقلة وتعرف تفرز الحچي

سكتت فترة طويلة بس بعدين مدري منين إجتني شجاعة ما أعرف هيج طلعت فجأة وانزرعت بداخلي وهتفت وي اخوي

- زين أنا أخابرها هسة

البشير قيصر ابتسم هاي المرة ابتسامة حقيقية حط إيده على چتفي وهتف وياي

:- تمام يا أعظم أنا حروح أصلي ركعتين و أخذ استخارة وأدعي ربك يسهل أمرك ويسهل أمرها ويحنن گلبها عليك أنتَ ما تريد إلا حلال وربك وياك أتصل وانا رايح

- تمام يا فرهود الروح و الزود والعكازة

طلع البشير قيصر من الغرفة ضليت لوحدي إيدي چانت ترجف لزمت التليفون طلعت الرقم ضغطت على اتصال .. رن رن .. گلبي چان يدگ مثل الطبل لحد ما سمعت صوتها الحنون اللي هز گياني

أم البنين :- ألو؟ يا هلا الفاروق الأعظم؟ خير خويه؟ صاير شي؟

- ألو أم البنين شلونچ؟ وشلونه حيدرة؟

:- الحمد لله بخير أنتَ شلونك؟

- أم البنين أريد أحچي وياچ بموضوع موضوع يخصني ويخصچ

:- تفضل خويه آنا أسمعك خير ان شاءالله

- شوفي بنانة أنا أنا أريد أخطبچ

:- شلون يعني ؟

- اليعني أريد أتزوجچ أريد اخذج على سنه الله و رسولة

:- .........

الصمت جان صمت ثگيل چان يخنگني ثواني مرت چانت كأنما دهر كامل لحد ما سمعت شهگة صغيرة وتنهيدة حزينة
وهنا هي سدت التليفون بدون جواب وبدون صوت

﹉﹉﹉﹉﹉﹉﹉﹉﹉﹉﹉﹉
بعد مكالمة الفاروق الأعظم وأم البنين الي انتهت بصمت وشحوب رجع البشير قيصر إلى الغرفة وشاف أخوه ملامحه مخطوفة واللون طاير من وجهه كعد البشيرقيصر مقابله ينظر له بعمق وقلق

البشير قيصر :- ها أعظم حجيت وياها؟ شصار؟ ليش هيچي وجهك؟

- حجيت گلتلها أريد أتزوجچ

:- ياالله وشنو ردت؟ شگالت؟

- ما گالت شي بس سكتت سكتت وراها سديت الخط ما عرفت شنو معناتها هالسكوت رفض لو صدمة لو شنو بالضبط؟

:- هذا السكوت هذا يسموه حچي بلا صوت يا أعظم معناتها البنية متوترة ما مستعدة يمكن هذا الموضوع أصلاً ما چان بالها شوف أنا أردلك جواب نهائي قبل ما نوگع بمشاكل

- لا تكولي لا أنتَ وعدتني تروح تحجي ويا عمها

:- لكك إسمعني يا أعظم إسمع كلام أخوك الجبير أنا فكرت بالموضوع بين ما چنت برة الغرفة أصلي وأدعي فكرت بيها من كل الزوايا وأنا أگولك رأيي بكل صراحة هذا الزواج مرفوض وما أوافق عليه

- شنو المرفوض؟ بشير أنتَ چنت وياي قبل شوية

:- چنت وياك لأنك أخوي وطلبت مني بس بعد ما شفت وضعك وشفت رد فعلها الباهت وبعد ما گعدت وحسبتها زين هذا الزواج ما يصير وهذا قرار ما بيه رجعة عندي أسباب وأسباب چبيرة

- وشنو هاي الأسباب ولا تكلي الناااس لان منا لهنا ماراح اقتنع انطييني سبب من هاي الأسباب القوية !!

:- يا أعظم علي الهادي بعده ما نشف تراب گبره چانت عنده مكانة چبيرة بگلوبنا كلنا أم البنين لحد هسة لابسة أسود عليه هذا الراح تسوي مو احترام لروحه؟ صدگني هذا مو بس عيب هذا طعنة بظهر الميت الناس راح تگول أخوه ما صدّگ علي مات حتى يروح يخطب مرته هاي الكلمة وحدها كافية تخلي السالفة مرفوضة

- أنا ما طعنت بأحد أنا أريد أسترها وأستر حيدرة ابن علي!هذا ابنه وأني عمّه أريد أصير أب إله ومسؤول عنه

:- تسترها؟ يا حبيبي هي مستورة بعيالها وأهلها احنا كلنا أهل وكلنا نسند بعض هذا الشي مو مبرر أبداً أنتَ تريدها الك وأنتَ تريدها بأسرع وقت وهذا اللي يخلي النوايا مو واضحة للناس أنتَ تشوف أم البنين شنو؟ أرملة عندها ولد وهي لحد هسة عايشة بظل علي الهادي أنا أگولك هي لحد هسة تحب علي ما لحگت تنساه ولا لحگت تطلع من حزنها أنتَ تريد تصير زوج الها وهي لسة دموعها بعينها على الأول؟ أنتَ تقبل تكون البديل؟ الخلف؟ البنية متكسرة مو مستعدة تفتح صفحة جديدة وخاصة ويه أخو زوجها اللي راح هذا ثگل ما تتحمله النفس

- بس أنا أحبها وأريد أطلعها من هذا الحزن أريد أريحها!

:- أعظم هذا مو حب هاي كسرة خاطر ممزوجة بإعجاب والحب اللي يجي بهيچي وقت ما يدوم أنتَ راح تشوف علي الهادي بكل زاوية بالبيت راح تشوف صورته بعين ابنه راح تسمع حچي الناس كل يوم هذا مو طريق للسعادة هذا طريق للعذاب الك والها أنتَ تهدم حياتها أكثر مما بنيانها
أنتَ يا حبيبي بعدك ما مزوّج بعدك مكفوف ليش تقيد نفسك؟ ليش ما تشوف بنت صغيرة تكبر وياك؟ تختار وحدة تكون أول مرة تلبس ثوب العرس وياك تخلي أول ولد يسميك بابا وأنتَ ما عندك وياه منافس

- شنو المنافس حيدرة ابني

:- أي ابنگ بس أعظم بالگلب بالداخل راح يجي يوم وتصير مقارنات راح يجي يوم و حيدرة يحن لأبوه أنتَ شلون راح تحس وقتها؟ راح تحس إنك غريب راح تحس إنك مجرد ضيف دخل على عائلة چانت كاملة هذا مو مكانك يا خويه
وهاي الطامة الكبرى الناس صدگني ما راح يعوفوننا أحنا الناس تباوع علينا كـ زلم كفو إذا سويت هذا الزواج راح تصير على كل لسان راح يگولون الفاروق الأعظم عينه على نسوان عمامه

- بس والله هذا ظلم!

:- أعرف ظلم بس الناس ما ترحم راح تسبب مشاكل لا أول لها ولا تالي أهل علي الهادي شلون راح يتقبلون هذا الشي؟ راح يشوفونه اهانة لذكرى ولدهم أنتَ تفتهم شنو يعني أرملة الابن تتزوج بأخوه؟ هذا تدمير للروابط اللي بينا وبين بيت عمنا لهذا السبب أعظم بعد التفكير والگعده اللي گعدتها ويه ضميري أنا أرفض أرفض أروح وياك وأرفض أكون وسيط بهذا الموضوع ما أگدر أوافق على شي راح يهدّم بيتنا ويهدّم حياتك أريد أشوفك مرتاح أريد أشوفك معرس وفرحان بس مو بهذا الطريق

- يعني شنو؟ يعني أظل طول عمري ما أحصل على اللي أريده؟

:- لا يا خويه مو تظل ما تحصل أنا أخطبلك أحسن وحدة صدگني بنات حلال بنات بيوت شابات يچيبولك الخلف الصالح يعيشون وياك حياة نظيفة أنسى أم البنين ادعيلها بالرحمة والستر وهي خليها تربي ابنها هذا اللي چان لازم يصير وهذا اللي لازم يصير أنتَ تستاهل أحسن منها تستاهل بداية جديدة ما بيها ذكرى حزينة ولا بيها مقارنات فاروق أنا أطلب منك طلب أخوي إمسح هذا الموضوع من بالك إمسحه نهائي وأنا أخطبلك أول بنت تشوفها بعينك ما دامها بت أصول لا تكسر چلمتي أعظم لا تجيب لنفسك وجع راس

الفاروق الأعظم ضل گاعد بمكانه دموعه چانت محبوسة بصعوبة بس الغصة بگلبه چانت أكبر من إنه يگدر يخفيها رفع عينه لأخوه البشير قيصر واليأس چان واضح بملامحه

- بشير أنتَ تعرف شگد أنا عزيز عليك تعرف إني ما أريد أجيب وجع لــ راسي بس أنتَ ما تفتهم ما تفتهم إني شگد أحبها هذا مو إعجاب هاي حاجة روح بروح

:- أعرف يا خويه وأني أحب راحتك بس الحب اللي يكسر الكلب ويخلق المشاكل ما ينرادله وجود هذا مو حب هذا أخبال

- ما يخالف خلي الناس تحچي لحد ماتطلع روحها أنا سويتها بالحلال بشير أنا ما گتلك كل شي عن المكالمة

:- شنو ما گلتلي احچي گلتلي سدت الخط

- هي سدت الخط بس مو قبل ما تحچي.

:- شنو گالت؟ شبيها سكتت؟

- هي رفضت رفضت اكيد رفضت

:- الحمد لله شووف هذا دليل إن ربك يريد يبعدك عن هذا الطريق حتى هي البنية اللي أنتَ تريد تسترها هي ترفض ترفض لأن عقلها أكبر من حبك الها هي تحترم روح المرحوم أكثر منك هي ما تريد تكسر گلب ابنها

- بس هذا الرفض مو نهائي هذا رفض بسبب الظروف هي تحس بالذنب لو أنتَ رحتلها ووگفت وياي چان گدرنا نقنعها إن هاي الحياة لازم تستمر هي تحتاج سند

:- السند مو بالزواج فاارووق السند موجود واحنا كلنا موجودين شوف أعظم أنا أحچيلك كلامي الأخير أنتَ تريد تتزوجها وهي تحس إن هذا الزواج خيانة شلون تعيش ويه مرة كل ما تباوع عليك تشوف صورة أخوك المرحوم؟ زواج مبني على إحساس بالذنب ما يدوم أنتَ تريد تتزوج امرأة كلما تتقربلها تحس إنها تهين ذكرى علي الهادي أنتَ بهذا التصرف جاي تدمر روحها قبل ما تبني حياتك وهم أنتَ تحب حيدرة وتعتبره ابنگ بس أنتَ ما حسبت حساب هذا الولد من يكبر ويفتهم راح يجي يوم ويعرف إن عمّه تزوج أمه بعد وفاة أبوه يا أعظم هذا الچرح راح يبقى بداخل حيدرة طول العمر ما راح يفرح بيك كأب راح يشوفك كبديل باگ مكان أبوه واخذ ذكراه هذا الطفل اللي دافعت عنه قبل شوية أنتَ بيدك راح تأذيه أكثر من ما تفيده هذا مو مبرر للزواج حيدرة يحتاج عم حنون مو أب جديد يمسح تاريخ أبوه أنتَ عمرك 34 سنة أنتَ بعدك شباب حياتك گدامك ليش تربط نفسك بمسؤولية چبيرة مثل مسؤولية تربية يتيم وبنفس الوقت أنتَ ما متفرغ للزواج أنتَ عندك شغل عندك خطط أنتَ تحتاج زوجة تگعد وياك وتطلع وياك مو زوجة محملة بهموم الدنيا والأولاد والحزن أريد أشوفك مرتاح من البداية

البشير قيصر مد إيده ولزم إيد الفاروق الأعظم بقوة

:- الفاروق الأعظم يا خويه وضلعي هذا قرارها هي هي رفضت ما تريد تتزوج وهي تريد تحافظ على ذكرى المرحوم لا تحرجها أكثر ولا تحرجنا إعتبر هذا الموضوع ورقة وانطوت واني اكول لعمتي تشوفلك بنية وتخطبها الك بعيدة عن هاي المشاكل

- خلص بشير ما أريد أتزوج هسة أنطيني مجال

:- خوش انطيك مجال بس بشرط

- شنو هوة ؟

:- ما تفكر ولا تحچي بأم البنين بعد اليوم خليها بحالها خليها تربي ابنها هي اختنا وراح تبقى اختنا وأنتَ تستاهل السعادة اللي ما بيها حزن وكسرة گلب

- يصير خير ...

وگف البشير وطلع من الغرفة عاف وراه الفاروق الأعظم وحده بــ صراع بين حبه المرفوض وبين منطق اخوه ورفض أم البنين القاطع

﹉﹉﹉﹉﹉﹉﹉﹉﹉﹉﹉﹉
"""" شُـــبَــيْـر """"

رحت وفتحت المحل وبعد ما انا فتحتة بساعة كاملة شفت الوقت صارت الساعة بالـــ 9 الصبح ياالله شرفتني السُت زُمرد على الرغم من هية الي لازم تفتح المحل
دوامها يبلش بالــ 7 أتأخرت أتأخرت وانا جنت معصب من شغلة صايرة وياي وطلعت العصبية بوجه البنية

شبير :- اللهم صلّ على محمد وآل محمد شنو نزل عليج الوحي وكالج لازم تشرفيننا ؟

زُمرد :- آسفة أتأخرت شوية

:- شووية ؟ أتأخرتي شوية ؟ زمرد عليج ابو فاضل هاي للمرة شكد التأخير أصلاً اتعودت عليه انا من الأساس يلا ابوي هسة شنو العذر؟

- ماكو عذر جانت عندي حالة طارئة

:- زين الي هية

- ثق باالله قبل ساعة ابوي تخربط واجت الإسعاف أخذته وانا عفته واجيتك لأن خفت لا تعصب

:- لا إله إلا الله زمرد كاافي اعذار كافي

- باالله العظيم مو عذر هيَّ الحقيقة

:- شوفي ابوي اذا أنتِ مو گد الشغل لا تعطليني وياج اني مسلمچ محل ذهب كامل مو لعبة الشغلة لو بيها مجال للاهمال والتسخيت

- تمام أعتذر

:- زمرد

- نعم

:- انطيني المفاتيح الاحتياطية العندج و توكلي

- تطردني ؟.

:- اي وعود تكدرين هسة حتـى بــ12 الظهر تكعدين الله وياج

- تفضل و شكراً هواي الك

:- اني الي لازم أشكرچ يابة يالله

مدت إيديها وطلعت المفاتيح من جنطتها وإني أخذتهن منها واني أحس كل قطرة دم بيها غليان على هذا الاستهتار كل ظني جانت تريد تتعذر بأي عذر حتى لا أعصب عليها بس لو أعرف جانت حقيقة ليش كلبت الدنيا عليها هيچ؟
أستغفر الله ربي وأتوب إليه.

شبير :- الله يوفقچ وشُغل الله أوسع من يمي

زمرد :- بس جان ودي أعرف شنو الشي الي خلاك متصدكني وتصيح بوجهي؟

:- تدرين شنو المشكلة؟ ثقتي بيچ الزايدة كل مرة تتأخرين وماكو عذر يخليني أبتسم بوجهچ صار عندي إيمان إنه كل عذر تحچينه هوَّ مجرد فلم حتى تتخلصين من العقاب

- ما ألومك حقك بس هاي المرة صدگني تختلف أبوية...

:- سدي الموضوع زمرد كل واحد يروح بطريقة روحي شوفي أبوچ وإذا احتاجيت شي دگيلي بس الشغل بعد ماكو بينا

طلعت من المحل بدون ما تگول أي شي ثاني مشت خطوات باتجاه الشارع العام واني عيوني ظلت تلحگها حسيت بغصة بصدري چا لو صدگ أبوها تخربط؟ يا ربي شيصير بحالي إذا صار بيها شي من ورا العصبية مالتي؟
طلعت من المحل ورحت وراها بسرعة حتى ألحگها

:- زُمرد زُمرد انتظري

دارت وجهها ورجعتلي عيونها مدمعة وحمر ما چانت تبچي بس مبين عليها الظيم والقهر

زمرد :- شكو؟اكو كلمة تجرح وتكسر نسيت تكولها الي واجيت هسة تكملها لوتريد شيء مني؟

:- أريد أعرف شي واحد

- شنوو؟

:- صدگ أبوچ مريض؟

- ليش أصلاً تسأل؟ مو طردتني؟

:- جاي اسالج جاوبي

- اسأل نفسك شبير محد تجذب بشيء يخص ابوها

:- بوية جااوبي هسة!

- أي صدگ قبل ساعة وأمي واخواتي هسة وياه بالمستشفى واني اجيت لهنا لام ما جنت أريد أخسر هذا الشغل

:- يا الله أستغفر الله انا أسف زمرد أسف على كل كلمة طلعت مني كل ظني چنتِ تتعذرين

- كلنا بشر شبير ومرات نغلط روح شوف شغلك واني رايحة لأبوية

لزمت ايديها بقوة بس بعدها سحبت ايدي بسرعة بالغلط حطيت ايدي على ايدها رد فعل قوي مني حتى ما اخليها تروح لوحدها

شبير :- لا والله ما أعوفچ تروحين هيچ تعالي أول شي نروح للمستشفى نطمئن على الوالد وبعدين الشغل ربچ يحلها رواتبچ كلها راح توصلچ كاملة وهاي إجازة مفتوحة إلك

- شبير؟

:- ما أريد الضمير يوجعني أكثر اقبلي مني

- ماريد شيء منك ولا فلس

:- زمرد

- شبير أنتَ سويت العليك واني صح مو كد هذا الشغل مع السلامة

عافتني وراحت رجعت انا للمحل وحسيت بتانيب ضمير هسة هي شلها غرض وطلعت عصبيتي بيها ياالله
دخل اخوي شبر للمحل وصار يباوعلي وهتف وياي

شبر :: المحل فارغ

:- شتريدة يعني يغص غص هو هذا السوك

- وشبيك تنتر بكلامك ؟

:- ما انتر ما بية شيء صوتي طبيعي

- هذا كلة و تكول طبيعيي

:- ااي طبييعي

- ولكك اقصد المحل فارغ وين زمرد و عصام مو وقت دوامهم هسة ؟

:- عصام استأذن مني ميكدر يداوم اليوم و زمرد طردتها

صفن بوجهي وهو يستوعب الكلام الطلع مني جان يتحسس كلمة " زُمرد طردتها "
ولمن ادركها نتر بوجهي

شبر :- شنهي ولك طردتها

:- يعني شحتتها ما تچي بعد لهنا

- ولييش هيچي سوويت

:- أحسن لا تسألني

- شبير هاي البنت بالذاات الناس هم الطلبوا من ابوي علمود تشتغل هنا لك البنية كلش محتاجة هذا الشغل مو وقت عصبيتك

:- ترى لحگتها وكتلها ترجع وما قبلت

- كول والله

:- والله

- لا تخليني اسبك شبير يعني طارد البنت والله يعلم شنو حاجي وياها أنتَ والسانك الزفر هذا وتريدها ترجع ؟ هيَّ فقيرة فلوس بس غنية بكرامتها

:- ماادري مماادري طردتها وصارت

- واذا ابوي عرف

:- خلي يعرف شني لازم نتحمل شكولات هاي على والله ابو الناس طلبوا من ابوي

- شبير

:- هااا شبر

- وجعاااا رد مثل الاوادم

:- لا إله إلا الله كووول يروح شبير هاا يعيوني

- وگطع لهاي الروح النفسية

:- شبر غدي من وچهي لا اشمرك بالي برجلي

- لااا ما اروح انا أنتَ الراح تروح

:- وين اولي

- تولي لديار المگرودة الي شحتتها وترجعها لأن لو ابوي يعرف راح يطير ارگابنا

:- ما أروح ولا انزل روحي

- ترى أنتَ الغلطان

:- وشعرفك انا الغلطان أنتَ ماجنت موجود لو لازم تنصف المرأة وتوكف وي نصف المجتمع ضد أخوك!؟

- شبيه البنت الحايط يحجي وأهي ما ينسمع صوتها أنتَ الي اللسانك شطولة ومتبري منك تربية ألمعتز باالله السانك اللسان دلالة

:- مالك غرض بعمي ولا بلساني يلا

- شبير يلا حبيبي يلا يبعد الخوة يلا بداعة الحليب الطاهر الي رضعته

:- شنهيي؟ شككوو

- روح للبنية وردها وعلي ما اتخيل رد فعل ابوي لو يعرف وهم والله البنية مسكينة لا تخلي حوبتها تطلع علينه ما عايزين

:- لا حول ولا قوه الا باالله

- ادري بگلبك حَنين يلا يبعد اخوك رووح

:- يابوية شككد تللح لخاطر دينك رررايح

- عفية عليك لمصلحتك ما اتكبر أنا .. بس هاا مو تتكبر بالكلام اتذكر من تواضع الله رفعة

:- خلي يرفعك الك

- من طاح حظك اذا صدك هو أنتَ مغسول مغسول الحمدالله والشكر

تركت شبر لوحدة بالمحل وطلعت صعدت السيارة وطلعت بوجهي للبيت زُمرد جنت أختبر ذاكرتي اني مرة وحدة وصلتها لهلها وجنت أحاول اتذكر الطرق الي مشيت بيها ولمن وكفت بالشارع من شوارع المنطقة سألت واحد عابر وجانت مرة جبيرة بالعمر

شبير :- السلام عليكم يمة

- أهلا وسهلاً وعليكم السلام

:- يمة بس اريد أسأل عن بيت أبو زمرد

- بيت أبو زمرد ؟؟

شبير :- اي يمة والله انا ماعرف البيت شنو يسموه بس الرجال ابوها عندة بنت أسمها زُمرد هيج تجي بعمري بيضة حيل و شعرها لونه موروني مدري رماني هيج يعني وشوي طويلة يعني توصل لهنا يمي و ضعيفة حيل

- اها قصدك بيت شاكر ابو البنات

شبير :- ابو البنات؟؟؟

- اي ابني مو هَوَّ عندة بس بنات و وحدة من بناتة تنطبق عليها هاي المواصفات

شبير :- زين يمة وين بيتهم ؟

- خليك ماشي لكدام وعلى ايدك اليسرى روح للاخير تلگىٰ قبل الأخير ببيتين لون بابهم أخضر

شبير :- مشكورة يمة الله يحفضج ويحرسج

- كل الهلا بيك أبني بس ليش تسأل عليهم ؟

شبير :- والله يمة بنتهم زمرد تشتغل عندي ونسّت تأخذ راتبها واجيت انطي الها

- اهاا الله ينطيك العافية ويكثر من أمثالك يمة

شبير :- بعد روحي امي

عفت المراه وكملت طريقي على وصفها وصلت ووكفت كدام الباب لكيته لون بابة اخضر وجبير الباب صعدت الدرج ودكيت الجرس وضربت على الباب ودرت وجهي للشارع
وبعد دقائق سمعت الباب انفتح واجاني صوت صغير يكول

:: هاا عموو

درت وجهي وضحكت جانن بنات صغار وحدة واكفة كدام الثانية يباوعلي ونص مغمضات لان الشمس صايرة عليهن و ما شاء الله على الخلقة وكفت كدامهن وخليت الشمس بظهري حجبتها عنهن وحجيت وياهن

:- عموو انتن شنو اسمائجن ؟

لين :- انا اسمي لين وهَيّ أختي إيليا

:- بعد روحي عمو الله يحفضكم عموو أختكم زمرد موجودة ؟

إيليا :- أييي موجودة كاعدة جوة تريدها تعال أدخل

:- ادخل؟

هنا لين ضربت إيليا على راسها وصيحت عليها

لين :- شنو يدخل شبيج أنتِ لاا عمو ما تدخل أنتَ غريب وبابا وماما ما موجودين شنو تريد؟

:- هههههه بالحالتين اني ما راح افوت روحي صيحيلي اختج زمردة

إيليا :- هسة اصيحة الكك عموو

لين :- ايلي اوووكفي ولج والله لاكول لبابة يأدبج كم مرة كايل الج لا تتليگفين هيچي بالباب

طبت إيليا تركض وطبت وراها لين وهي تصيح عليها ضليت اني اضحك ومخلي ايدي على وجهي وبقيت انتضر دقائق هواي طلعت الي الست زُمرد وهتفت وياي

زمرد :- شبير ؟

:- شلونچ

- شجابك لهنا محتاج شيء ؟

:- اجيت اطمئن على الوالد

- مادري عنه من أخذوه لهسة محد يرد على إتصالاتي

:- من عقلج وبعدچ على التليفون تعالي ييولي نروح الهم

- لين و إيليا جوة لوحدهم

:- ماعندج وحدة هنا من الجيران يبقون يمهم؟

- لا اكدر اخليهم عند هاي صديقتي ..

:- خوش يلا جيبيهم خليهم عند الجيران وتعاي نروح نشوف ابوج ونطمئن عليه

- تمام دقيقة لاجهز نفسي و اجهزهن

:- منتضرج بالسيارة براس الشارع واگف

- خوش

رحت انا للسيارة وصعدت زمرد اخذت اخواتها للــ جيران
واجت صعدت وياي بالسيارة وكعدت بالخلف ولمن دست بانزين وطلعت لكدام صرت اباوع بالمراية لعيونها شلون صارن من القهر وعرفتها جانت بالبيت تبجي بحركة لان اجفونها جانت مورمة ..

حاولت أفتح وياها موضوع حتى شوي يرتاح صدرها لأن حسيت بيها شكد مخنوكة

شبير :- زين هَوَّ شبي ليش أخذته الإسعاف ؟

- شبير والله ما اعرف جنة على الريوك نسولف و نضحك فجأة هيج وكع وصار وجه ارزك والله ويمكن حرارتة صارت صفر لأن لمن لزمت أيده جاانت مثل الثلج

:- كولي ياالله ان شاءالله ماكو شيء كافي تبجين يمعودة

- منضرة ماجاي يروح من بالي

:- زمرد

- هااا

:- بداعة عزيز كلبج كافي لا تبجين خلص وعلي گطعتي گلبي الله موجود ترى بدل هاي الدموع ادعيلة

- يارب دخيلك فدوة أمشي بسرعة

:- 140 اكثر من هيج تردين؟

- ماادري خلّي نوصل بسرعة

:- مابقى شيء وصلنا بس الازدحام شوي مقيدني

- لااا مو وقتهااا الإشارة الحمرةة ياالله

:- ولچ أهدي ترى وترتيني أهدي كاافي

- تمام تمام هادئة هادئة مابية شيء

جان كل جسمها يرجف وهي حطت أيدها على حلكها وتحاول تهدأ بروحها بس جانت خايفة حيل لمن صارت الإشارة خضراء دست بانزين وسرعت ومشيت بكل ماعندي قوى ووصلنا للمستشفى نزلت تركض من السيارة وطبت للمستشفى تركض وشعرها يركض وراها ههه
طبيت انا وراها بهدوء وكعدت تسأل عن أبوها

زمرد :- أكو مريض وصل ليكم الصبح أسمة شاكر مصطفى وين نلاكي ؟

- تلكي بقسم الطوارئ

شبير :- تمام شكراً الكم

ركضت زمرد واني شوي ركضت وراها بعد ما وصلنا للقسم لكت أمها و اخواتها كدام باب الغرفة منتظرات الدكتور يطلع حتى يطمئنهن راحت زمرد الهن و حضنتها أختها وضلت تبجي وام زمرد ابتسمت بوجهي لأن هي سابقاً تعرفني انا صاحب المحل التشتغل بيه بنتها وتعرفت على امي

شفت الوضع حيل متأزم يمكن هَنَّ ما متعودات بس شكل الي اتعود على دخلة المستشفى والموت من هو وصغير الصار ويانه خلاني ما اتفاجاء لو اخاف من شيء يصير كدامي رحت شوي يمهن وهتفت وياهن

شبير :- ليش هاي الدموع؟

رملة :- اموت والله اموت اذا صار على أبوي شيء

ليلة :- لااا إلا ابوي لا يصير بيه شيء

شبير :- بنات هاي شبيجن امجن بيا حال لازم تقونها مو هيج ضعيفات اهدان شوية ويلا روحن يم امجن احضننها ولتخافن ماكو شيء ان شاءالله

ام ليلة :- تعالي يمة تعالي وأنتِ زمرد هم تعالي لحضني ماكو شيء ان شاءالله ابوكم قوي وراح يرجع النا أقوى من قبل بس صلن على النبي يمة

زمرد :- اللهم صل وسلم على سيدنا محمد

ليلة :- انا متاكدة ابوي راح يطلع بخير وسلامة

ضليت اباوع عليهن واني عيني تروح للباب خايف لا يطلع الدكتور ويشيل الهن مصيبة مالهن غير هذا الرجال هذني الــ 6 نسوان املهن بزلمة صرت اروح واجي لمن التفتت الي زمرد وهتفت وياي

زمرد :- تكدر تروح شكراً الك

شبير :- لا ماكدر أروح لحد ما اطمئن كلش

- انا اطمئنك

ام ليلة :- لااا زمرد ااشش محتاجين رجال يمنا هنا وخالج يراد له وقت ياالله يوصل ولازم يبقى ويانه واحد يتفاهم وي الدكتور لو يصير شيء هنا

شبير :- شفتي امچ تفهم اكثر منج

ام ليلة :- ما تقصر ابني .. صدك زمرد وين لين و إيليا

- يمة عفتهن عند صديقتي بيت ابو جمعة

ام ليلة :- ما قصروا صدك معادن الناس تظهر بوقت الشدة

زمرد :- انا رايحة اجيب ماي

ام ليلة :- يمة روح وياها لا تعوف اخيتك لوحدها

شبير :- تدللين يمّه أصلاً أبقي زمرد اني هسة اجيب ماي واجي محتاجات شيء ثاني؟

زمرد :- لا بس ماي

:- صار بعيوني

رحت الهن وجبت ماي واشتريت عصاير هم ورجعت لمن انطيتهن وضلينة ننضر طلع الدكتور باوعتلي أم زمرد وهتفت وياي وهَيَّ تاشر على الدكتور

ام ليلة :- يمة شبير!

شبير :- هاا دكتور بشر

ليلة :- دكتور احجيي شنوو

- المريض اتعرض لجلطة

زمرد :- أي وهسة؟؟

شبير :- زمرد ارجعي شبيج راح تدخلين بالدكتور صيري هيج زين دكتور هسة الوالد شنو وضعة؟

- سوينه النكدر عليه وحالياً هو فاقد الوعي اكدر اكللكم حالياً حالتة استقرت نسبياً بس ننتضرة لمن يصحىٰ ياالله اشوف وضعة على التمام بس لازم هسة ننقلة لغرفة خاصة لهيج محتاجين منكم تسوون الأوراق

شبير :- انقلوا المريض وكلشي يجهز الكم نكدر نفوت نشوفة هسة ؟

- تكدرون بس فاقد الوعي هَوّ ما يحس بوجود أحد بس ادخلوا حتى أنتم ترتاحون

شبير :- تمام دكتور مشكور ربي يحفظك و يوفقك

راح الدكتور و رملة و ليلة فاتن بسرعة ضليت اباوع الهن وهتفت وياهن

شبير :- رايح اشوف شنو مطلوب مننا واسوي ادخلن شوفن ابوجن

ام ليلة :- خلي زمرد تروح وياك خاف يطلبون معلومات لو شيء هي تمليهن

شبير :- تمام تعاي زمرد

رحنا اني و زمرد وسوينة اوراق المريض كلهن وكلشي يخص بقائة بالمستشفى ورجعت زمرد هي دخلت حتىٰ تشوف أبوها واني ضليت كاعد على كرسي الإنتظار ما حبيت افوت عليهن بس منظرهن كسر كلبي الحمدالله رجع ابوهن الهن وما نكسرن بية من هذا الموقف مادري شبية اتصلت على أبوي وسلمت عليه وسديت الخط بس هيج حبيت أسمع صوته

سديت التليفون وبقيت اباوع بالحياطين منتضر خاف أروح ويحتاجن شيء أقل شيء أسوي لــ زمرد هو هذا هي تحملت هواي مني ماكدر انا اتحمل هاي الكم ساعة يمهم؟

واني كاعد اتصل عليه عماد أبو خطيبتي ....

من الأدب أرد عليه بس من أدبي سديت التليفون بوجه وغلقت التليفون كلة من الأساس

شبر بالمحل كالي كلمة هسة أجت ببالي لمن كالي : تربية ألمعتز باالله

وهسة ادركت انا صدك تربية ألمعتز باالله مو بس صرت نفس أسلوب عمي لا صرت نفس تفكيرة اليمس شعرة مني وعبالة انا ضعيف وماكدر اردة اكسر ظهرة و ظهر اهلة حتى يشوف مو انا الي يستضعفوني واسكت
وعلى كولة المُربي مالتي : اطفي شمعة شبابهم
وهسة اشوف يا عماد بــ شنو راح يفيدك العناد مالتك خلي بنتك عندك أحسن
وانا السيد شبير أبن السيد البشير قيصر

انا اكسر واسحك والحك وما انكسر ...

﹉﹉﹉﹉﹉﹉﹉﹉﹉﹉﹉﹉
"""" المُعتزباالله """"

بعد السنوات النگضت و امي لحگت ابوي وعافتني وحيد بدنياي عفنا بغداد و الطراگيع الصارت ببغداد واجينا لهنا وسكنا بمجمع سكني وصار بيت عمي عبد الحسن واهلة بي
ويمة بيت لاريج الله و زوجها و يمنا بيت عمتي فاطمة الزهراء و اولادها و الفاروق الأعظم وياهم
وبيت الأصفاد ألحق و زوجته وياه وأمه لأن مايكدر على فراگنا هَوَّ
وبيت للبشير قيصر بس بعدة ما ساكن بي جاي يجهزة حالياً ساكن بغير منطقة مو بالمجمع الي إحنا سكنا بي

وأختي رحمة الزهراء بقت ببغداد علمود دوام زوجها + دوامها هيَّ هم اما انا بعد ما جار الزمن وياي عفت بيت عمي عبد الحسن و سكنت قريب منهم بنفس المجمع فرق بيتين وسكنت لوحدي لأن جنت اريد أبتعد ماريد أسمع صيحات ولا صوت أطفال عزلت نفسي عنهم

حياتنا انگلبت ١٨٠٪ منو يصدك ثأر غشيم هيج ياكل حيلنا ونحَن بعز شبابنا وهيج يطشرنا؟

فتحت عيوني اباوع لسگف كمت وسحبت حيلي سحب غسلت وجهي وسويت لروحي گهوة حتى اصحصح سمعت صوت إشعارات شلعت التليفون من الشحن وفتحته لكيت رقم غريب مراسلني حَسّيت بيه راجع لـــ چرح لهذا حضرتها

واتذكرت لمن رحمة الزهراء عرفت بيه احجي وي هاي البنية شكد فرحت وعبالها ان أنا أحبها وأريد اتزوجها وراحت هيَّ و طيبة الزهراء علمود يحجن وياها من وراي علساس اخطبها وانسىٰ الچرة وأبدي من جديد حياة جديدة وياها

و انا مو ابالي هيَّ ولا غيرها كلبي قفلته وضيعت مفتاحة

بس صدمتني رحمة الزهراء لّمَن هيَّ و طيبة الزهراء كالوا الها أن يردن يخطبنها الي وجان جواب چرح

:· تخطبوني لاخوكم؟ههههه ترى حبيباتي اني أشوف ألمعتز باالله مجرد منبع افلوس إلي لا أكثر ولا أقل لا زواج ولا هُمّ يحزنون

انا منبع أفلوس هههه نگتة حلوة والله ..
طفيت التليفون وخليت الكوب مال الگهوة على الميز مال المراية بالغرفة ورحت أخذت المنشفة و ملابس ودخلت للحمام أسبح بلگي ينغسل عقلي و أتناسىٰ الصار وياي ولمن خلصت سبح و طلعت من الحمام وكفت كدام المراية واني انشف بشعري دك التلفون

رحت يم الفراش وباوعت للشاشة بدون ما اشيلة لكيت المتصل " سگف گـلـبي "

ضانرسمت الضحكة على وچهي واخذت التليفون وجاوبت على الاتصال وطلعت مني كلمة

:- هلا بشمعة شبابي

علي الباقر :- صباح الخير

:- الخير كلة بوچهك و صوتك عگــازتي

- صمامي الرئوي معتزي وين أنتَ

:- والله انا توني كعدت ليش ؟

- ولك انزل وتعال لينة بسرعة خلصت ريوك توني والعلوية تريدك تتريك ويانه

:- اريد اطلع علولي

- شنهي تطلع ولك لا تخلي العلوية تفضحني وتفضحك حط رچلك وتعال لينه بسرعة وعوف هاي السوالف

:- خوش هسة البس واجيك

- لا تتعطل

:- شسالفة شغلة ثواني

- انتضرك جُكليتي هههههه

:- امشي لكك

سديت التليفون و فيرت شعري و لبست ورشيت عطر خفيف واخذت محفظتي و تلفوني ونزلت بسرعة طلعت للشارع لكيت جيرانة عمران وانطريت اسلم علية

:- صباح الخير عمي عمران شلونك؟

عمران :- هلا صباحك نور سيد أنتَ شلونك

:- انا بخير اذا أنتَ بخير عمي

- بعد روحي وليدي عساك دوم

:- تاج راسي

عفت عمران ورحت گبل دخلت لبيت عمي عبد الحسن لكيتهم فارشين بالطارمة و كاعدين

العلوية :- هسة ياالله نور البيت تعال يبعد بيتي تعال أكعد يمي

علي السجاد :- هلا عمي عزوز وين الغيبة

:- هههه منور بوجودكم و موجود انا بس شغل و دنيا وأسأل علي الكاظم شكد الشغل مطيح الحظ

غدير الله :- اصبلك جاي لو كهوة ؟

:- لا توني شربت كهوة اريد چاي خفيف

علي الباقر :- اليوم استراحة الك انت و أكظيم مرتاحين

علي الكاظم :- يحسدون الاصلع على شعر حواجبة خايبين شمالكم هو استراحة يوم واحد بالاسبوع

:- اي وعلي هو بس يوم واحد

غدير الله :- شنو شغلكم بي تعب؟

علي الكاظم :- بس تعب كولي طيحان حظظ على كولة عزوز

العلوية :- أنتم اختاريتوا انتم تتحملون

:- چا هو إحنا شنو مصبرنا على الزفت هذا ان إحنا الي اختارينة

العلوية :- يلا يمة أكل شسالفة لا تسولف بعد صاير عظم وچلد شني ولك

:- جاي اكل يمة

العلوية :- يمة طيبات قدمي الخبز شوي يم اخيج خلي ياكل

:- لا هذا اليمي كلش كافي مشكوة غاليتي

علي الصادق :- صباح الخير

:- صباحك نور يالنسيب تعال اكعد يمي

وبعد ما كملنا ريوگ طلعنا انا و علي الباقر لنتونس بالسيارة وي طلعتنا صادفنة كحلاء بنت عمران جيرانة و كذالك بنت جيرانة عزت الي هَيَّ أسمها سُكــر جانت واكفة بالشارع وتغسل سيارة أبوها

وكفت كحلاء كدامنا وهتفت

كحلاء :- السلام عليكم

علي الباقر :- وعليكم السلام خوية

:- أهلاً وسهلاً هلا بيج

كحلاء :- بس سيد الگي غدير الله بالبيت ؟

علي الباقر :- ليش هيَّ بالعادة وين تكون؟

كحلاء :- كلما اجي عليها الگيها عند عمتها لو بيت أختها واني أستحي أروح لهناك

:- لا خوية غديرات موجودة بالبيت روحي الها

كحلاء :- تمام شكراً أخذت من وقتكم

:- كل الهلا بيچ

بعد ما حركنا بالسيارة شوية تغير مزاجي نضر الي علي الباقر بطرف عينه وهتف وياي

- ها خير شبيك انعقج وچهك؟

:- مابية شيء

- خير ان شاءالله

:- يلا أمشي سرعة وشغل النا حمااسي

- تدلل سيد كلبي ألمعتز باالله

:- على راسي والله على راسي هههه

كملنا الحچي وعلي الباقر ظل صافن بوچهي مدري شاف الحزن بعيوني مدري شاف الذِكرى الشنيعة رجعت تدگ على راسي مثل الچاكوچ

- ترى ما مرتاح لوضعك ابد خيرك ولك؟ وچهك انگلب لونه ومو على بعضك

:- ماكو شي يا عيني بس التفكير يروح ويرجع

- على كيفك يا خوي

:- عوفها على ربك الدنيا دوارة يلا بلا هالسوالف شنهي السالفة اللي ردت تسولفها الي قبل شوية گلتلي نطلع

- أي صح چنت اريدك تروح وياي لمحل مال الألبسة اللي گلتلك عليه اللي بـ شارع ****

:- أي شبي

- لك اليوم منزلين تشكيلة جديدة تخبل مال شباب كُلش تلوگلك أريدك تختار وياي وحدة لإلـي وتاخذ لنفسك وحدة همّينا

:- بس يا خوي ما إلي خلگ للتسوق والله خليني أرجع لبيتي أحسن إلي

- ولك أنتَ ليش هيچ؟ شوكت تطلع من هالخنگة اللي حاط روحك بيها؟ ماكو فايدة من العزلة يا معتز أنتَ مو حاس بالوحدة اللي تاكلك؟ كُلنا هنا يمك!

:- الوحدة أرحم من وجع الـ ...

ما گدرت أكمل اختنگت الوحدة أرحم من وجع الناس الچانو قريبين، و وجع الثار اللي أخذ من عندنا أغلى الناس

- لا يمعود لا تگولها أصبر وتفرج والهم ما يدوم تدري شگد مشتاقين نضحك سوية مثل قبل؟ عمتي فاطمة الزهراء البارحة سألتني عليك وگالت يمة علي روح شوف المعتز بالله گلبي ما مرتاح عليه

بُتسامة حزينة رُسِمت على شفايفي

:- ههه الله يخليها إلي عمة السادة ماكو من گلبها

- يلا عاد گوم وياي نتمشى نشتري القميص ونشرب عصير رمان ونغير جو أريدك ترجع المعتزبالله اللي أعرفه العنيد اللي ما يكسره شي

:- هذا هو أقنعتني بس بالگوة ترا يلا شغل هذا الـ حماسي

- هسه تشوف شأسويلك

علي الباقر زاد سرعة السيارة وشغل انشوده عراقية عسكرية بصوت عالي ظليت أهز راسي ويا الإيقاع أحاول أبعد الأفكار السودة عن عقلي

- يا صمام كلبي ما دام علي الباقر وياك خلي الهم يولي

ظلينة نمشي بالسيارة والجو حار والشمس دگ على الجام والانشودة اللي شغلها علي الباقر جانت حماسية بس ما گدرت تغير شي من اللي بداخلي

چان بالي مشغول بهواي تفاصيل رحمة الزهراء وأخاف عليها من الغربة طيبة الزهراء الي احسها مو تمام أبوي وأمي اللي ما گدرت أوفيلهم دين التعب والتربية

علي الباقر شافني صافن مد إيده وطبطب على كتفي

- ولك وين صفنت مو كتلك اريدك ترجع العنيد الما ينكسر شمالك كلشوي وطاك صفنة؟

:- يا عنيد يا بطيخ الثار أخذ كُل شي يا علي حتى عزة نفسي أخذها و خلاني أدوّر على راحة بال ما أگيها بغير العزلة تدري؟ كل ما أگول هانت ترجع الطراگيع من جديد شفت الرسالة اللي دزتها چرح الصبح؟ حتى من هيَّ بَعيدة بعدها تريد تكسر گَلبي

- يا رسالة؟ ولك أنتَ لهسة تحجي وياها

:- لااا رقم غريب ما رديت عليه بس حسّيت بـ حقدها ورجعت حضرتها تتذكّر جوابها السخيف

علي الباقر سحب رِجلُه من البنزين وداس بريك خفيف التفت عليَّ وعيونه تچدح غضب

- ما عدها ذرة شرف ولك هذا كُل اللي فكرت بيه؟ بعد كُل اللي سوّيته علمودها؟ هاي ما تستاهل التراب اللي تمشي عليه أنتَ عفية عليك اللي حضرتها والله يعوضك الأحسن

:- أنا ما أريد غير راحة بال و ناس ما تغدرني

كملنا طريقنا وعلي الباقر حط إيده على الستيرن وبده يسولف سوالف مُضحكة بدت الضحكة ترجع لوچهي شوي شوي

وصلنا لشارع الكورنيش وگفنا السيارة واتذكرت الشارع اللي چان يجمعنا ببغداد بي ذكريات حلوة ومرّة

مشينا وإحنا نسولف عن ذكريات الطفولة وشلون چان عمي عبد الحسن يعزّلنا لما نسوي مشاكل بالبيت

ومرينة على محل يبيع فلافل صفنت عليه وانا بالي مو يمة بس الصفنة اجت عليه وهتف وياي علي الباقر

- تريد فلافل؟ يمعود شبيك صافن؟

:- لا يمعود وينة وين الفلافل مااشتهي

- هااا متاكد؟

:- اي والله امشينا

- نكمل يلا امشي ولا تصفن هاي الأيام وضعك حيل ما عاچبني

:- تدري يا علي؟

- لا ما ادري شنو

:- أحس روحي مو آني أحس الصار ويانه لبسني ثوب مو ثوبي وخلاني شخص ثاني

- ولك أنتَ المعتز باالله ما تتغير صح الحياة صعبة بس أنتَ اللي تختار شلون تعيشها لا تخلي الهموم تأكلك يا أخي فكر بنفسك فكر بعائلتك اللي هنا عمتي فاطمة الزهراء اولادها فكر بـ الأصفاد ألحق اللي ما گدر يعوفنا وسكن يمنا كلهم يحبوك

:- أحس شعور كلش غريب بداخلي راح يدمرني

- معتز لا تخلي هاي الأفكار تصيطر عليك كاافي تعال أسكن ويانه وعوف سالفة السكن لوحدك راح تتخبل

:- لا يمعود ماكو شيء بس هيج سوالف عابرة افكر بيهن ويرحن

- عززوز

:- ههههه شبيك باقري والله ماكو شيء تعال نروح للمحل يلا امششي شبيك انچفلت بمجانك

عتيت علي الباقر عت من ايده ومشينة وصلنا يم المحل مال الألبسة ودخلنا چان المحل هادئ بس بي شباب مرتبين جاي يختارون ملابس راح علي الباقر واتقدمني وصار يكلب بالملابس وهتف وياي وهو يسحب قميص

- شوف هاي التشكيلة تخبل مو؟

:- يلا أختار الي يعجبك وخلينا نطلع

ظلينة نختار قمصان وعلي الباقر كل شوي ويلتفت الي وبيدة قميص شكل ويهتف الي

- هذا يلوگلك هذا عليك أحلى من جسم علي الكاظم شوفة يجنن حتى اللون

:- اذا عجبك أخذه الي على حسابك

- غالي وغالي تدلل راح اخذ هذني اللونين حلوين ؟

:- مشيها يلا علي حلمان بالقمصان خوية

- صالي شهرين ما نازل للسوگ شمالك خليني أختار على گيفي

:- خوش يلا اختار

و بعد ساعتين من الدوخة والإختيار طلعنا من المحل ونحن مشترين ثلاث قمصان الي و بنطرونات أثنين و دشداشة و علي الباقر اشترى خمس دشاديش لأن اغلب لبسة دشداشة و قميصين وبنطرون وكلهن على حسابة ههههه

بعد ما طلعنا حسّيت روحي أخف شوي والضحكة رجعت التغيير حتى لو بسيط زين للگلب علي الباقر نظر لابتسامتي وهتف وياي

- ها شفت گلتلك نغير جو يلا هسه للسيارة حتى ما نتأخر على العلوية لازم نرجع نتغده يمها و ما أريدها تعصّب علينا

رجَعنا للسيارة بس هالمرة علي الباقر چان ساكت حسّيت بي شي

:- شبيك علي؟ هسة أنتَ الصفنت

- لا يمعود مابية شيء بس طرأ على راسي الفاروق الأعظم

:- شني شبي ؟

- مادري مدوخني شگد أحچي وياه ما يفتح گَلبه أحسّه يريد يگول شي بس خايف

:- الفاروق؟ شكو؟ هو وينه وين يخاف يحجي هذا يطك الطك وتكول يخاف؟

- قبل يومين شفته وحده و عيونه حمر سألته گال ماكو شي أنتَ تدري الفاروق الأعظم ماخذة السانة وعصبيتة ترى هو كلبه كلب طير ومن تجي للصدك تشوفة خجول وكتوم

:- مادري والله غريبة بس يمكن مشاكل بالشغل؟ لا تشغل بالك أذا شي مهم هو يحچي ما يظل ساكت وعندك البشير قيصر يحسّ بأخوه بيه شيء ويظل ساكت يمعوود فكر بنفسك ولا تفكر برجال عندة جبير نفس البيشر قيصر

- وعلي ما اكول غير الله يحسركم أنتم صايرين كلكم مدري شمالكم ما تعجبون

:- طلعنا مو الچيس موو ؟

- كللشش طلعتوااا وزايدد

:- ههههههه ماكو النا صگار بعد كلمن شاف حياته

- وعساس جنتوا تخافون حتى تكولون صگار

:- ااااييي هسة وين رايحين ؟

- راجعين للمجمع

:- زين تسوي

وصلنا للمجمع السكني وگفنا گبال بيت عمي عبد الحسن چانت الدنيا هادية والهواء حار بس بي شوية نسمة
نزلنا من السيارة وعلي الباقر شاف شي وراه بالشارع عيونه انصدمت سحبني من إيدي حيل

- ولك شوف هاي شنو؟

التفتت لگيت سيارة غريبة لونها أسود چانت واگفة گبال بيت الأصفاد ألحق ومنها نزل رجال غريب شكله مو مال هالمنطقة ما چان وحده چان وياه اثنين ثانيين واحد منهم چان يباوع بحقد ونضراتة تطاير بشرار وبيده تلفون

- يا ساتر ذولي منين؟ وشنو يريدون من الأصفاد؟

:- ما أدري بس هذا مو شكل ناس عادية هذا شكل أصحاب ثار خااف جماعة ابو حيدر ؟؟؟

- شنهييي لوين وين هذا يرجع وآله عين؟

:- مدري باقري شووف شكولهم .

- دقيقة

الرجال الغريب أخذ نفس وصفن كدام الباب لمدة ثواني بعدها اتقدم وراح يدگ الباب على بيت الأصفاد ألحق بـ دگة قوية كأنما يريد يكسره

- لازم نروح نشوف

:- لا يا علي مو هسه خلي نشوف يمكن ربعه لا تتورط هذا مو وكت الإندفاع

علي الباقر ظل صافن بس شاف الغضب بعيوني عرف إن إحساسي ما يچذب

- شنسوي عاد؟ ما نتركهم وحدهم وي أصفاد ألحق

:- إحنا دخلنا للمجمع وهُمَّ شافونا هسه نحسب خطوة خطوة إنتَ روح بسرعة وجيب سلاحك بدون ما أي أحد يعرف او ينتبه عليك وأنا أبقى هنا أراقب من بعيد

- مو خوش فكرة تبقى وحدك

:- يمعود مجمع هسة بس اصيح صوت يطلعون الكُل روح ولا تتعطّل

- خووش انتضرني

دخل علي الباقر لبيتهم بسرعة وأنا بقيت بظّلة السيارة عيوني على باب الأصفاد ألحق

نفتح الباب وطلعت صالحة زوجة الأصفاد ألحق مرعوبة لان أصفاد ألحق ماجان موجود بالبيت والرجال الغريب اللي چان يدگ الباب رفع صوته وگال بصيغة تهديد عالية كلش

::- گولي لـ الأصفاد يجي يحاچينا صارله سنين يتهرّب من الدين لو يدفعة هسة لووو... **

ما كمل جملته بس رفع بتهديد غمضت عيني بقهر

:- يا الله منين طَلعتلهم هاي المصيبة الجديدة؟ ماااا نريد نرتاحح ما نخلص يالله يعني المصيبة مو بالمكان المصيبة بينا حتى من انتقلنا المشاكل اجت ورانة

فتحت عيوني وحسّيت الدم يغلي بعروگي ما أگدر أتركهم وحدهم شنهي مرته تطلع وتفتح الباب لهذا الرچال الغريب شنهي ماعندي غيرة براسي زوجة أخوي تنعرض على الجبان هذا ما تحملت ورحت بدون ما انتظر علي الباقر وكفت كدام باب بيت أصفاد ألحق و خليت صالحة تفوت وسديت الباب وراها وهتفت وي الرجال ..

:- خخيرر شتريد خلي حچيك وياي

- ومنو أنتَ ؟؟

:- أخوه أصفاد ألحق

- وماجان عندي علم أصفاد ألحق عندة اخو زلمة

:- زلمة وغصب على رأسك فااهم لو لا

- لا تبيع شعارات براسي و روح چيب اخوك لا اسحلة بطريقتي

هنا هو رفع السترة مال القاط مالتة وطلعلي اسلاح الماي المخلي بحزامة والمفروض مني اخاف! ايدي أصلاً كامت ترجف شنو هاي يخرع بابا

رفعت حاجبي واني اباوع على اللعبة الي بخصرة وضحكت ورفعت عيني إله وهتفت وياه

:- يمعود نزل نزل سترتك فشلةة هسة اليشوفك شيكول فشلتنا أنتَ وبخاخ الماي هذا نزل واستر روحك

- هههييي

:- وحك هو علي رجفتتت لا فدوة لا تكتلني

سحب سلاحة وخلّاه بمكان كلبي لزمت رأس السلاح ورفعته خليت الفوهه مالتة بجبهتي وهتفت وياه

:- اذا جانت نيتك تريد تگتلني للموت لهذا خلي صوابك بهذا المكان لأن لو ترميني بصدري مناا لصبح ماراح أموت

- صيح أصفاد ألحق لا ارتكب بيك مجرزة هسة وابجي عيون امك عليك

:- عيون امي باجيتني من زمان اكتل يلا

- لا تتحداني وتسوي بيها مراجل اجينا لهنا قاصدين أصفاد ألحق

:- وتروح وأنتَ حباب يلا لو تكتلني وتروح لو تتادب وتلف روحك وتروح

- يا ولد بعدك صغير على الموت لا تلعب وياي

:- ههههههه يلا اكتلني ولا تخلي منظر شبابي يگسر خاطرك اني اريدك تكتلني

سّحب سلاحة ورجع خلّاه بالحزام وطلع هنا علي الباقر راحت انظاري إله والرجال أنتبه عليه لهذا هو هم دار عيونه وصار يباوع لأخوي وحط أيده على متني وهتف وياي

- وصلها لاخوك ما نعوفه وراه وراه واليوم كدام بيت اهلة ومايدري باجر وين نطلعله

ربت على چتفي وصعد بالسيارة وحسّيت روحي هيج انا رجعت الـ عنيد اللي گال علي الباقر عليه بس هالمرة للموت أو للمواجهة اجاني علي الباقر ووكف يمي يريد يفهم السالفة شنو نظرت لوجه وابتسمت وحضنته ليش مادري بس حضنتة

﹉﹉﹉﹉﹉﹉﹉﹉﹉﹉﹉﹉
- مانام على اخوته شگد حنين الميل
يفتر ساعه ساعه عليهم ويسأل

يَـــــتــــبــع ☜☞

لهنا وصلنا لهناية المُنْعطف الأول
رأيكم وَزاتيّ وتعليقاتكم الحلوة وتفاعلكم الي أحبة وتصميمكم ونشركم عن الرواية
وإن شاءالله اشوفكم بــ مُنْعطف جديد

16,433 كلمة

اللهم صلّ علىٰ محمد وآل محمد

- اسْتَكْثِرُوا مِنَ الْبَاقِيَاتِ الصَّالِحَاتِ : التَّسْبِيحُ وَالتَّحْمِيدُ وَالتَّهْلِيلُ وَالتَّكْبِيرُ وَلَا حَوْلَ وَلَا قُوَّةَ إِلَّا بِاللهِ

- ﴿وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ أَمَلًا ﴾
- سُبْحَانَ اللهِ
- وَالْحَمْدُ لِلهِ
- وَلَا إِلَهَ إِلَّا اللهُ
- وَاللهُ أَكْبَرُ
- وَلَا حَوْلَ وَلَا قُوَّةَ إِلَّا بِاللهِ

نسولف كلشي هنا وَزاتيّ لا يفوتكم

حسابي انستكرام