احفاد السيد : الثار ( بأجزائها الإثنين ) الفصل الثامن وستون 68 - بقلم ​رُقَيَّةُ الْأَكْبَرُ

﷽
اللهم صلّ علىٰ محمد وآل محمد

- اسْتَكْثِرُوا مِنَ الْبَاقِيَاتِ الصَّالِحَاتِ : التَّسْبِيحُ وَالتَّحْمِيدُ وَالتَّهْلِيلُ وَالتَّكْبِيرُ وَلَا حَوْلَ وَلَا قُوَّةَ إِلَّا بِاللهِ

- ﴿ وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ أَمَلًا ﴾
- سُبْحَانَ اللهِ
- وَالْحَمْدُ لِلهِ
- وَلَا إِلَهَ إِلَّا اللهُ
- وَاللهُ أَكْبَرُ
- وَلَا حَوْلَ وَلَا قُوَّةَ إِلَّا بِاللهِ

روايـــــة [ مُنْعَطف السادة ]

بقلمي انا الكاتبة [ رُقـَـيّــة الأكـَـبــر ]

متابعة لحسابي oo_ll13

✨ التعب علينا والتفاعل عليكم ✨
✨ التصويت والتعليق أبين الفقرات ✨
✨ هو الدعم للقصة وهو الينسي الكاتب التعب ✨

﹉﹉﹉﹉﹉﹉﹉﹉﹉﹉﹉﹉
- يدخان الجكارة الماعفت ريتي يالمخليني اتيه وجوه اهل بيتي يا شيب الراس يابواك عافيتي كون الدمع ينباع واجمع وعدة ينعصر ست مرات وجه المخدة

﹉﹉﹉﹉﹉﹉﹉﹉﹉﹉﹉﹉
"""" مَــــلاك """"

لمن سُكرة كملت غسل سيارة بابا ودخلت النا جنا اني و أختي نوف كاعدين بالصالة وامي ورانة جاي تنضف ولأن صار الجو شوي تراب من الگنس والبيت مسدود ولا شباچ مفتوح اختنكت أختي نوف و رگضت الها سُكر وجابت لها جهاز النفس وهتفت وياها

سُكر :- هاج نونة اتنفسي على گيفج

زينة :- شعندج كاعدة يمي أريد انضف براحتي اصعدي لغرفتج

ملاك :- صدك هنوفة تعالي نصعد لفوك صارت ترابة هنا افتحي الشبابيچ ونضفي براحتج مامة

زينة :- يلا اصعدن گلجن خفة وراحة الي الله وياچن عزيزات بيتي يلا لفووك

بعد ما صعدنا انا وأخواتي و دخلنا الغرفة كعدت سُكر كدامنه وعلى العكس من طبيعتها هيَّ ما تسكت أبد مثلي خبالها وازود بس هاي المرة جانت ساكتة لهذا خفت عليها و نوف هم لاحضت هذا السكوت المخيف وهتفت وياها وهيَّ تلزم أيدها

نوف :- هاا سُكرتنا ضايجة ؟

سُكر :- لااا

ملاك :- لا وعز الله ضايجة

:- باعن بنات

نوف :- باوعنه احجي

:- شوفن وانا جوة جاي اغسل سيارة بابا شفت كحلاء واكفة يم السيد علي الباقر

نّوف :- يا طرگاعة السيد الي اجتنا مدري منين وماراح نخلص منها

ملاك :- اوكفي اوكفي السَيد مو مال هاي السوالف شنو واكفة يَمّة ؟

:- شوفي هيَّ ما واكفة وياه هيج بهذا المنظر يعني واكفة واكفة

نوف :- عَجل بيا منضر تقصدي ؟

:- لااا بناتت شوفن هَوّ جان بالسيارة صاعد وهيَّ اجت وكفت يَم السيارة وحجت وياه

ملاك :- اهااا هنا الحجي موو اكول علي الباقر ماعندة هيج يعني لو مثلاً كلتي علي الكاظم ما أستغرب تطلع منه هلسلبوح هذا بس مو السيد علي الباقر

نوف :- بس أي ماجان قصده يوكف وياهاا عادية يعني

:- لااااا مو عااادية ولچن وكفت يمة تعرفن شنو يعني هيجج صار قد قد وي وجهة يعني اتقربت منه يعني سمعت صوته عن قرب شافت ملامحة عن قرب ولچن باوعتتت لعيونه الزيتونية الي حسّرة عليه اباوع عليهن وهي باوعت الهن هيج كدامها صارن وصوته اجة بأذنها سلمت عليه وهو رد السلام

نوف :- اتخبلتي اثبتي خلي نحجي

:- شنووو شنوو

ملاك :- هيَّ شعدها يعني ليش وكفت وياه شتريد؟

:- بـــربــ٭٭٭

هنا نوف ضربتها على حلگها بسرعة واني من الصدمة عطت بيها بسرعة

نوف :- شبيج ومرض

ملاك :- السانچ فالت يا فالته

:- اااييي والله عَجل شعدها واكفة يمة وترى ماجان لوحدة

ملاك :- ليش منو جان وياه ؟

باوعت سُكر لــ نوف وضحكت و غمزت الها وهتفت

:- جان وياه بالسيارة السيد ألمعتز بالله

نوف :- شنووو شعندة شكوو ؟

:- هاااا ضلي ساعة مشتعلة حركة محد مهتمة وهسة من سمعتي ألمعتز باالله انبز كلبچ صرختي شعدها واقسم عليج أنتِ الثانية لو كايلة علي الكاظم وياه جان طفرتي من الشباج للشارع وخنگتيها

ملاك :- وانا شلي غرض بــ علي الكاظم اكول هاي سوالفچن مال الحب والغرام بالسادة الي ما صار الهم بس كم شهر كاعدين هنا بطلنها لا يلاحظون عليچن ترى زحمة صاروا جماعة بابا شيكولون بناتة خفيفات؟ والله عمران يعيد التأهيل من جديد ترى الخيزرانة لهسة بالتبريد ..

نــوف :- صدك سُكرة كافي هاي السوالف شنو يعني أنتِ مشتعلة عليه هنا وهَوّ لا شاايلج من كاعج ولا يدري الله وين حاطج

سُكر :- بس اريد أفهم شنو ناقصني ؟ عيون شعر طول شنو شنو؟

ملاك :- هسة تردين تقنعيني راح تخلين السيد علي الباقر يباوع الچ ؟

نوف :- صدك والله هذا شفته انا من سكنوا هنا لهسة لا هو
ولا أبن عمة السيد ألمعتز باالله طخوا رأس لو رفعوا عيونهم شايفين نفسهم

سُكر :- اناا ماعلية بهذا السلبوح اليهمني السيد علي الباقر بس انا أريده يطخلي ويتوسل بيه ويحبني ومايشوف غيري

ملاك :- تحجين عن السيد علي الباقر لو غيرة؟

:- لا هَوو السيد علي الباقر أبن السيد عبد الحسن ماكو غيرة

نوف :- عَجل بأحلامچ هذا الكلام يصير

:- وإذا صار؟

- ما يصير

:- واذا صاار تراهني ؟؟

- أراهن

:- تمامم اذا فزت بالرهان وخليت السيد علي الباقر يطخ الي شنو اريد تسويلي حتى لو تصيري مثل خدامتي

- تمامم اذا فزتي

:- واني واثقة راح افوز

- نشوف الأيام كدامنا

:- خووش الله كريم

ملاك :- شلة مخابيل والله مكانچن مستشفى المچانين ولن عني

عفت أخواتي ونزلت عنهن مريت على الإستقبال لگيت أبوي متمدد ومخلي أيده على جبهتة طلعت منة بهدوء وحطيت الحجاب على راسي ورحت لبيت السيد عبد الحسن وهَمّ من سكنوا هذول جيرانة الجدد أهلي حفضوني اذا ضيعوني يلگوني أبيت السيد عبد الحسن ألعب وي حفيدتهم منة المنان التاخذ العقل باب الحوش مالتهم دائماً مفتوح مدري شنو فا دفعت الباب ولكيت كاعد علي الكاظم و بين رجليه مخلي ولد
عيونه خضر ماشاء الله عليه و شعرة كيرلي
وكفت كدامة لأن هَو جان كاعد بالعتبة مال الباب هتف وياي وأنا واكفة اباوع عليهم

علي الكاظم :- ها شمالج عجبج الوضع ؟

مَـــلاك :- منين افوت من عب الباب غير تزيح عن الباب شوف روحك وين گاعد

:- تعاي فوتي

عود زاح روحه عن الباب اتندنى شوية وحيل نرفزني ضل يلاعب الطفل ومنتضرني افوت

:- اميري ولك أمور ... هااا ما تفوتين؟

- أنتَ تحچي صدك لو تشاقة وياي يعني؟؟

:- شني ما تدخلين

- ترىٰ حضرتك مانزحت بس شلت روحك ورديت كعدت

:- لا إله إلا الله

- ترىٰ شلعت گلبي

:- احح صدك؟

- ومرض شبيك؟

:- مرض اليمرضج شكووو تغلطين السانج متبري

- باع اني أعترف بلحضة من اللحضات الساني يفلت وياك بس أنتَ تبقىٰ سيد ودخيل بختك مابية تشور بيه والله اني بنت إفقيرة من البيت للبيت ماعندي منا ومناا بس اني بيه طبع مو حلو تعرف شنو؟

:- ما يهمني

- لا يهمك ولازم تعرفه علمود ما تعصب لو تضوچ مني واني بدون قصد والله

:- وشنو الطبع هذا بس فضيني !

- باع اني من اتنرفز اكوم الف واعچن بالحچي ماعرف شنو اخوط

:- يا ستار يعني هسه انتِ متعصبة ومتنرفزة؟

- أي طبعاً متنرفزة صارلي ساعة واكفة گدامك والباب مال حوشكم هذا الواسع ما بيه مجال أفوت منه وأنتَ لازگلي بالزاوية وأنا استحي وأجبر روحي أحچي وياك بـصوت ناصي علمود لا الناس تسمع وتالي تگولي تعاي فوتي وتزيح روحك شبر وتظل تباوع شگول عليك غير شلعان گلب وصدگ ترى شلعتلي گلبي من الأساس من يوم الي شفتك بيه وأنتَ بس تحرجني وتخليني أحس نفسي مخبلة لو متهورة

علي الكاظم ضحك بخفّة وهو يباوع بعين الولد الي بحضنه

:- اححح عيني كل هذا بگلبج؟ زين انتِ ليش ما تگولين
لو سمحت سيد علي الكاظم ممكن تزيح روحك شوية لأن ما أگدر أفوت؟
ليش هاللّف والدوران والجرأة الزايدة بالحچي؟ ترى اني مو صاحبچ ولا أگدر أتقبل هالنبرة مال السان متبري وياي

- يوووه ترى أنتَ هم حچيك يصطّر الراس صطر بلة هاي زيحتك الشبر هاي شتفيد؟ لو لازم أضل أترجاك وأنتَ تستهزء بيه گدام هالأمير الحلو

مديت ايدي اريد اخلي ايدي على شعرة الكيرلي بس هو بعد راس الولد واني سحبت ايدي هو نضر الي بطرف عينة ورجع دنك وهتف وياي

:- لا تمدّين إيدچ ع الولد وهسه انچبي وفوتي من هالباب ولا تكثرين حچي

انصدمت و سكتت للحظات وانا اباوع عليه بنظرات ما بين العصبيه والإحراج تنهدت تنهيدة طويلة كاني جنت اريد اطلع بيه كل عصبيتي

- شگد ثگيل دم!

:- گلت انچبي وفوتي لو أحچي ويه ابوج وأگله بتكم ما تعرف تحچي ولا تحترم الأكبر منها؟

هالكلمة رجعتني لـأرض الواقع أنا فعلاً ما اريد أحد يحچي على تربيتي وانا حيل احب ابوي ومستحيل ازعلة

- لا لا تحچي هسه أفوت بس بعد مو تگول انچبي عيب عليك سيد أحترم نفسك تگولها بتعابير چنك صديقي مو جار جديد بيناتنا رسميات ولازم ثــكل

:- لا تخافين اني أهلي ربّوني زين وأعرف شلون أحچي بس أنتِ لسانچ هو الي يجبر الواحد يحچي مو زين امشي فوتي يلا

﹉﹉﹉﹉﹉﹉﹉﹉﹉﹉﹉﹉
مشت ملاك ضايجة روحها ومرّت بصعوبة من يم علي الكاظم الي كاعد بالعتبة بشكل شبه كامل حسّت بـ قرب المسافة بشكل مزعج بس تجاوزته ودخلت للصالــة استغفرت ربها بينها وبين نفسها ونفضت إيدها مثل الي تريد تنفض كل الموقف المزعج هذا من بالها

دخلت للصالة مال بيت السيد عبد الحسن هذا البيت الي تحسّه بيت ثاني الها صاحت بصوتها الحلو الطفولي المعتاد:

مَـــلاك :- يوووم الحجية خالة غدير الله طيبة الزهراء وينكم؟

طلعت العلوية الها و ردت عليها طلعت من المطبخ جانت تغسل المواعين ومسحت إيدها من المي

العلوية :- يا هلا بـ بنيّتي وينچ يا ماما صارلي شگد ما شايفتچ تعاي يمه فوتي جوه شبيچ واگفة بالباب؟

مَـــلاك :- يا خالة أنتِ شلونچ ومَنّوشة وينها؟

:- الحمد لله يا يمه بخير من الله أبوج شلون صار اليوم؟
كلت للسادة يروحون ويشوفوه مَنّة المنان هسه نايمة خطية بس تعاي فوتي نسويلچ چاي وتصعدين للبنات

مَـــلاك :- لا خالة الچاي ماله داعي بس أريد أشوف مَنّوشة أريد العب وياها
وأبوي؟ هو هسه تعبان شكله الوضع مو تمام ويا دوامه

:- يا بعد جبدي الله ينطيه الصحة والعافية ويشافيه من كل تعب فوتي اصعدي يمة منوشة بالغرفة روحي أگعدي يمها لمن تگعد خطية ما تحب تنام وحدها

مَـــلاك :- تمام خالة

ملاك راحت لغرفة مَنّة المنان فتحت الباب بهدوء وشافت مَنّة نايمة مثل الملاك شعرها نازل على عيونها وجها طفولي وبريء كعدت على طرف الچرباية وبدأت تلعب بـ خصلة من شعر مَنّة المنان بخفة

﹉﹉﹉﹉﹉﹉﹉﹉﹉﹉﹉﹉
علي الكاظم دخل للصالة بعد ما تأكد إن ملاك دخلت شال الولد الصغير الي بحضنه أمير المؤمنين أبن أصفاد الحق
وبدا يمشّي إيده على شعره الكيرلي وينطق بهمس:

علي الكاظم :- يمه فدوة لـعيونك الخضر يا توم روحي شگد شفت مناظر حلوة بس عيونك غلبّتهن أنتَ يا سيد الأمير الي تخبّل

العلوية :- يا هلا شلونة الأمير تعب منك مو تعبتة

:- حبيب روحي هذا أبن الغالي وين اتعبة عمت عيني

العلوية :- انطينياه كافي بقىٰ عندك هواي

:- چا غديرة و اريجة وين البيت صنطة؟

العلوية :- كلهن فوك توهن صعدن

:- اهااا تمام

العلوية :- محتاج شيء ياامك؟

:- لا حبيبة روحي أنتِ محتاچ بس رضاچ بس ملاك دخلت وينها؟

- اي توها صعدت لغرفة منوشة شنو شبيها ؟

علي الكاظم ابتسم لـ أمه وهو يبوس راس الطفل و ضحك ضحكة نزل أمير المؤمنين وبدأ الولد يحبي ويناغي التفت لأمه وهو يعدل بـ ياخته وهتف

:- يمة هي هاي ملاكج يرادلها إعادة تأهيل بالحجي لسانها أطول منها واكفة بالباب وتريدني أطير حتى تفوت ومن نحجي وياها تظل تصفط حجي ما ادري منين تجيبه

- يا يمة لا تظلمها ملاك فطيرة ونيتها صافية وهي تحبنا ونحبها يجوز انتَ شاقيت وياها اعرفك سوالفك نحسة يمة

:- يمة أنا شلي غرض بيها؟ هي الي بدت بس يالله

- تراهي طفلة تخلي عقلك بعقل طفلة

:- ياصبر أيوب خلص يمة ما احاجيها

- عفية عليك كبر عقلك ، وشغلة ثانية ترى أبوها خطي حيل متاذي أخذ إخوانك بليل وشوفوا واجب هذا

:- ان شاءالله

- فدوة لعيونك اروح انا امي أنتَ

بقت ملاك فوك كاعدة يم مَنّة المنان وصافنة بوجها الطفولي بس بالها مو يمها بالها يم علي الكاظم وشلون نرفزها بكلامه

تحجي ويه روحها بـهمس

:- يعني فوك ما سيد وعود ثكيل لسانه يغزي بس والله يا ملاك انتِ هم السانج يرادلة كص شكو جفصتي وياه وكتيلة شلعت كلبي؟ هسه شيكول عليه؟

بهاي الأثناء مَنّة المنان بدت تتحرك بفراشها وفتحت عيونها شافت ملاك كاعدة يمها ابتسمت بـنعاس ومدت ايدها الصغيرة لـ وجه ملاك

ملاك :- يا بعد روحي كعدت اللوزاية مالتي تعاي يروحي تعاي عوفي النوم وخلي نلعب اليوم طك گلبي من ورة المخابيل الي عندي والي بالباب

شالتها ملاك ونزلت بيها جوة وهي تضحك وتسولف وياها نست كل العصبية بس اول ما وصلت لنهاية الدرج وشافت علي الكاظم واكف يسولف ويه أمه رأساً سكتت ولبست وجه الثكل وحطت طرف الحجاب على حلكها حتى لا تبين ضحكتها

علي الكاظم باوعلها بطرف عينه وبصوت جان عبالة بس امة تسمعه گال

:- ها نزلت أم اللسان ان شاءالله بخير؟

هنا ملاك خزرته وعبرت من يمه بـسرعة وردت عليه

ملاك :- الحمد لله دامنا بعيدين عن ناس معينة أحنا بألف خير

العلوية ضحكت على حركاتهم وكالت :

العلوية :- تعاي يمة ملاك تعاي اكعدي وعلي يمة روح شوف شغلك لا تظل تنبش بالحجي ويه البنية

طلع علي للحديقة وهو يضحك على طفوليتها وملاك كعدت يم العلوية بس عيونها جانت تراقبه من الشباك وهي تحس بـ شعور غريب خلطة بين الحقد عليه وبين هيبة شخصيته الي غصباً عنها تحترمها وضلت تلاعب منة المنان وتحجي وي العلوية

﹉﹉﹉﹉﹉﹉﹉﹉﹉﹉﹉﹉
"""" صَــــيوان """"

كعدت الصبح على ما غسلت وصحصحت طلعت جكارة وصرت ادخن كدام الشباج شفت أبني صمود جاي يركض برة البيت خفت عليه لا يتعور نزلت بسرعة لكيت امي و درية و تكتم كاعدات يتريكن بالاستقبال نسيت صمود ونسيت كلشي كدام هاي الصدمة الثلاثي هذا مجتمع وهدوء ؟؟؟ الله يغير حال العراق مثل ما غير حالهن بيوم وليلة وحسيت روحيي حسدتهن
وكفت بمكاني الجكارة بيدي والشرار مالتها كاد يوكع على الردان باوعت عليهن چانن كاعدات وحدة بصف الثانية والهدوء چان يكتل هدوء يسبق العاصفة مثل ما يكولون
بس ما هنيت بنظرتي لان فجأة أمي نزلت الاستكان من ايدها بقوة خلت الصينية ترن وباوعت لــ درية بنظرة ما بيها ذرة مودة وهتفت وياها

أم دهام :- اي عيني طبعاً انتِ تضلين تاكلين وتتمضحكين وابني صمود مصلوب بالشمس برة لا حسيتي بي ولا كلتي هذا طفل خطية يتعور

درية :- والله يا عمة صمود طالع على عمامه جني ما يهدأ وبعدين مو بس انا أمة أنتِ هم حبوبتة ما تشوفينه

:- ابنج هذا واذا وأحد بينا لزمة تشيطين هسة صرت حبوبتة وهو انت شترجى منج بس شاطرة تلبسين الثوب المخصر وتكعدين تتفلسفين براسي؟

تكتم هنا حاولت تلطف الجو بس هي هم جانت شايلة بگلبها على درية بس يمكن لأن شافتني واكف سوت روحها اللطيفة والودودة

تكتم :- يا جماعة الخير استهدوا بالرحمن شبيجن تراضيتن البارحة وتعاركتن اليوم؟

درية التفتت على تكتم مثل اللبوه

درية :- أنتِ سكتي تكتم لا تبيعين براسنا مثاليات أنتِ أكثر وحدة تحب المشاكل بس تسوي روحها فقيرة.

أنا هنا ما كدرت أتحمل دخلت بنصهن وصحت

صيوان :- يا ستار يا ربي شنو السالفة؟ نزلت من فوك شفتكم ملائكة شو بدقيقة كلبتوا شياطين؟ صمود برة أنا شفته هسه أروح أجيبه بس فضنها لهل السالفة!

أمي وكفت نفضت دشداشتها وكالت لدرية

:- اسمعي ولج درية بيت صيوان ما تمشي بي كلمتج أنا هنا الچبيرة وأنا اللي أقرر بيه واسلوبج هذا اذا ما تغيري وتتربين أنا أربيج

درية طفرت وجها صار أحمر

درية :- تربين منو؟ والله يا خالة لو ما الاحترام الچ جان جاوبتج غير جواب بس صوچي أنا عبالي صرنا أهل وأثاري الحية ما تغير جلدها

هنا تكتم بدت تبجي بس مو بجي مال قهر لا بجي مال ضغط ومكر

تكتم :- شوفوا حظي أنا اللي ردت أجمعكم أنا اللي سويت الريوگ تاليها هيجي جازوني؟

عفتهن يتناكرن وطلعت أركض ورا صمود لكيته يم الساچية وجهه كله تراب ولازم بيده سكمج ويسحل بي شلته وطبيت بس ما دخلت للاستقبال رحت كبل للمطبخ غسلتله وصعدت لفوگ للغرفة ولبسته هدومه

كلت بگلبي : هذا البيت شوكت يهدأ؟ ابوي جان شايلنا شيل من مات البيت صار مثل السفينة المخروبة كل وحدة تريد تطلع هي الربان ياالله

خليت صمود ينزل لأمة وانا طلعت من البيت ردت بس أشم هوى رحت للسوگ مريت على كهوة أبو نزار
السوك جان مليان ناس والروائح مختلطة بين ريحة السمج المسكوف والتوابل كعدت بصف أبو نزار وطلبت استكان چاي

أبو نزار :- ها صويحب شو وجهك مكلوب؟

:- أخ يا بو نزار تعبت من كلشي وصاير مثل هاذا المثل الكل يتفيأ بظلي بس محد يرحمني

بينما أنا كاعد شفت واحد غريب بالسوگ لابس قاط مرتبة وشايل جنطة جلد هذا مو من منطقتنا ولا هيئته هيئة واحد جاي يشتري خضرة خطرت ببالي سالفة رحت عليه وهتفت وياه

صيوان :- السلام عليكم ..

- أهلا وسهلاً تفضل أخوي

:- ممكن تعرفني بحضرتك؟

- أهلاً بيك أستاذ أنا المحامي عبد الستار

هنا الدنيا دارت بيا وصية؟ الوالد الله يرحمه جان يملك بس هذا البيت والبستان والكل يعرف الورث شلون يتوزع بس جنت محتاج محامي؟ أخذته على صفحة وحجيت وياها هو ابتسم و وافقني الرأي

رجعت للبيت والمحامي وياي دخلنا وجان الهدوء لسه مسيطر بس هالمرة لأن العركة انتهت بـ زعل صامت انطيت خبر مُسبق والكل انتضرني بالصالة وهن لابسات العبي ودخلنا من شافوا المحامي الكل وكف أمي عدلت شيلتها وتكتم كعدت بصفحة تباوع بحذر

المحامي كعد بالنص طلع أوراق رسمية وبدأ يحجي بصوت رزين

عبد الستار :- يا جماعة المرحوم أبو دهام قبل وفاته بشهر سجل وصية وطلب ما تنفتح إلا بعد مرور فترة طويلة على وفاته واليوم اجه وقتها

أم دهام :- شكو يمة المرحوم شكاتب؟ لا يكون بايع البيت؟

المحامي :- لا خالة البيت موجود بس المرحوم مخلي شرط البيت والبستان يتحولون بأسم حفيدة الأول وما يحق لأي وحدة منكم تتصرف بـ فلس واحد ألا إذا وافقتوا كلكم على العيش سوية بسلام وبدون مشاكل لمدة ستة أشهر قادمة وبإشراف السيد صيوان

درية :- يعني شنو؟ يعني أنا وتكتم وخالتي لازم نضل وحدة بوجه اللخ؟

المحامي :- وبشرط إضافي إذا وحدة منكم سوت مشكلة وثبتت عليها حصتها اللي تركه المرحوم الها تروح للثانية

أنا باوعت عليهن شفت وجوههن تغيرت السالفة صارت بيها فلوس و ورث

أمي اللي جانت قبل شوية تريد تطرد درية كامت وراحت لدرية لزمت ايدها وكالت

ام دهام :- يمة درية أنتِ جنتي الغالية وأنا مثل أمج شجابنا على المشاكل؟

درية :- طبعاً خالة أنتِ البركة مالتنا وأنا أصلاً جنت أعصابي تعبانة من ورا صمود

تكتم :- الحمد لله الله صفى الگلوب كومي درية كومي خالة خل نسوي غدا معتبر للمحامي

أنا ضليت أضحك من كل گلبي

:- أخ يابة حتى من تحت التراب تعرف شلون تديرهن سويت بيهم جمعتهم تحت سقف واحد غصباً عليهم

مرت الأيام الأولى ورا جية المحامي والبيت صار جنة أمي تسوي الچاي ودرية تنظف وتكتم تطبخ بس أنا جنت أعرف هذا كله تمثيل جانت وحدة تباوع للثانية بمكر ينتظرون الغلطة

طلعت لبرة وشلت الكرسي خليته بنص گاعي بليل وطلعت للجكارة الثانية باوعت للسماء جان القمر طالع وبين الغيوم تذكرت كلام أبويه الله يرحمه

: يا وليدي النسوان مثل الماي إذا ركد يرويك وإذا جرى يغركك وأنت لازم تكون الجرف اللي يحميهم

ضحكت وطفيت الجكارة وبعد ثلاث ساعات من الكعدة لوحدي ودخلت أنام صعدت للغرفة ودخلت لكيت درية مخلية الأمير عباس يمنا منومته بحضنها وتلعب بشعرة تمدد يمها ونمت على نصي حطيت ايدي على جبهَ أبني وهتفت وياها

صَيوان :- شبي أميري ؟

درية :- أمس حلمان وخايف وهسة طلب ينام يمنا

- اروحله فدوة چا اني راح انام هنا

:- على الأرض ؟؟؟

- اي درتي حتىٰ تأخذين راحتج أنتِ وأميري وجيبي صمودي هم لا يغار

:- صيوان بيك شيء ؟

- لاا سوي الكتلج علية نامي يم اولادج وانا من الأساس راح انزل وانام بالديوان

:- اوكف

- نضري و عيوني

:- شبيك يروحي ضجت لأن الأمير يريد ينام يمي ؟

- لج اضوج شني ؟؟ ما تاكلين تبن ترى ولدي هذول

:- چا شبيك طنكرت وتغير مزاجك

- والله ما ضجت بس صدك اريدج تنامين وي صمود و الأمير عباس وانا انام هنا يمكم بالكاع أو أنزل للديوان؟

:- لاا خليك هنا أريدك يمي تدري بيه ماكدر اغمض بدون ما اشوفك

تقربت يمها بست راسها وشميت ريحة البخور الي دائماً تترس ثيابها وشعرها كلام أبوي الله يرحمه جان بعده يدوي براسي مثل صدى ناعم، ودرية هي مايي الصافي الي أريد أرتوي منه بس الليلة جان بالي مشغول مو زعل بس صفنة زلمة شايل هموم الدنيا وما يريد يبينها لأهل بيته

فرشت فراشي بالكاع بصف الجرباية تمددت وعيوني على سقف الغرفة ودرية عيونها مانزلت عني

صيوان :- نامي بوية نامي وريحي بالج باجر ورانا كعدة غبشة وعندي كومة شغل بالبستان واليوم الأمير محتاج حضنج أكثر مني

درية :- صيوان وجهك ما يكول بس شغل البستان عيونك بيهن حجي هواي وأدري بيك من تطلع تدخن جكارة ورا بعض يعني اكو شي شاغل بالك سولفلي مو أنا جرفك وملاكك؟

ضحكت ضحكة خفيفة والتفتت عليها وأنا متجتف

صيوان :- ولج تذكرت حجي الوالد

- شنو شبي؟

:- يوم جان يكول النسوان مثل الماي وأنا الليلة شفتج الماي الي غسل تعب يومي كله بكلمتين بس والله يا درية الدنيا صايرة ركض وأريد أمن لهذول الزغار حياة ما يذوگون بيها المر الي ضكناه

درية نزلت من الجرباية بهدوء كعدت بصف فراشي على الكاع سحبت ايدي وباستها

- صيوان أنت ما مقصر البيت عامر بوجودك والولد كاعد يكبرون بعزك لا تحمل نفسك فوك طاقتها شوف الأمير شلون نايم ومطمئن تدري ليش؟ لأن يدري أبوه سياج البيت

بقيت ساكت أتأمل ملامحها تذكرت شلون جانت أيامنا الأولى
وشلون جانت ماتريدني بس انجبرت تضل وياي لجل ما تبتعد عن صمود ولا ترجع لابوها

صيوان :- درتي تذكرين أول ما تزوجنا؟ جانت الغرفة خالية وباردة وهسة الخير زاد بس الهموم كبرت وياها أخاف على الأمير عباس من باجر أخاف عليه أريده يطلع سبع صلب مثل الجرف ما تهزه ريح

درية :- يطلع مثلك والله يا صيوان لو طلع ربعك أنا أكون أسعد وحدة بالدنيا كوم كوم اصعد يمنا الأمير عباس غفه وما يحس وصمودي بحضن جدته جوه لا تنام على الكاع وتخلي كلبي يوجعني

:- لا يا بعد حيلي هنا أرتاح

- ترتاح بعيد عن حضني؟

:- اتمددي يمي هسة ومن تنعسين اصعدي نامي يم أميري

- جنك على هاي

:- أريد أحس بيج وبريحة جهالي قريبين مني تدريين الليلة الجو بي نسمة غريبة ذكرتني بليلة ولادة الأمير عباس جانت مطر وطين وأنا أركض بيج للمستشفى وكلبي بين ايديه

- هههههه شلون أنسى وانا اضرب على ايدك واصرخ ميته حسيتة راح يطلع من حلگي

ضحكت ضحكة مكتومة حتى لا يگعد الأمير عباس وسحبتها من إيدها خليتها تمدد بصف فراشي على الگاع الجو جان بي برودة خفيفة بس دفو أنفاس درية وقربها مني جان يسوى الدنيا وما بيها حطت راسها على زندي وإيدها استقرت على صدري تسمع دگات گلبي اللي جانت تدگ مثل طبول الحرب من كثر التفكير

- شنو حسيت بوقت ولادتي بالأمير عباس ؟

صيوان :- يول يا درية ذيج الليلة ليلة ولادة العباس جانت اختبار لرجولتي قبل لا تكون اختبار لصبرج المطر يصب صب والسيارة تغرز بالطين وأني عيوني عليج وعلى الطريچ جنت خايف أفقدج وأفقد الأمانة اللي بطنج من طلع للدنيا وشفت وجهه حسيت روحي انولدت من جديد بس تدري الغصة وين؟

- وين يابعد عمري؟ ليش الغصة والولد بحضنا والحمد لله؟

:- الغصة من أتذكر كلام يكول الولد سند بس السند يراد له گاع صلبة يوكف عليها وأني هاي الأيام جاي أشوف الگاع تهتز تحتنا السلف تغير النفوس ضاجت والناس كامت تاكل ببعضها لجل الفلس أخاف يجي يوم والأمير وصمودي يلكون نفسهم بنص عاصفة وأني مو موجود حتى أصير الهم ساتر

- اسم الله عليك من الموت عمرك طويل يبو الصمود والأمير لا تحجي هيج وتفطر گلبي أنت الساس والراس وإذا على الدنيا فربك موجود صير أنت السبع وهمه يصيرون وراك ذيابة وبعدين ليش كل هذا الخوف الليلة؟ صاير شي بالديوان؟ لو سمعت حجاية غثت كرامتك؟

تنهدت حيل وطلعت حسرة من جفوفي چنها نار عدلت كعدتي ودرية لزمت متني تمسح عليه بحنان يمتص كل التوتر

صيوان :- اليوم بالديوان جان الحجي سم عمامي يطالبون بحلال قديم ويدعون إن أبوي الله يرحمه جان كاتم عليهم أراضي أني أعرف أبوي جان حگاني وما يمد إيده على فلس حرام بس النفوس الوصخة تريد تشوه سمعته حتى ياخذون اللي مو الهم باوعت بوجوهم شفت الطمع يلمع بعيونهم مثل عيون الغربان فكرت بالامير عباس وصمود باجر من يكبرون راح يلكون عمامهم لو يلكون وحوش؟

- خليهم يحجون السالفة اللي بيها حق ما تضيع وأنت سبع تعرف شلون توكفهم عند حدهم بس لا تخلي هذا الهم يبعدك عنا شوف الأمير نايم ومبتسم عبالك يدري أبوه جاي يسهر ليل ونهار لجل راحته

:- أنا مو خايف من المواجهة أنا خايف على طهارة گلوبهم أريدهم يطلعون زلم أصحاب مبدأ مو زلم أصحاب جيوب درية لمن نزلت البستان شميت ريحة طين مبلل تذكرني بطفولتي من جنت أركض ورا أبوي بالبستان وهو يگولي
يا بوية الشجرة اللي ما تمد عروگها بالگاع يطيرها أول ريح وأني أريد أمد عروگي بيكم أنتم بستاني وحلالي

سكتت شوية وبديت ألعب بخصلات شعرها اللي جانت تفوح منها ريحة البخور هاي المرة هي اللي سكتت وبدت تباوع للسگف وياث كأنها جاي ترسم وياي خارطة المستقبل

درية :- تذكر من جنت ترفضني؟ من جنت تعاملني بجفاء لأنك جنت تعتقد إني مجبورة عليك؟

صيوان :- ايي جنت أگول شسوي بوحدة عيونها دوم مدمعة وتريد تشرد؟ جنت أشوفج طير مكسور الجناح وأني ما أحب الضعف بس ما دريت إنج أنتِ اللي راح تصيرين جناحي اللي أطير بيه

- أني ما جنت ضعيفة صيوان. جنت تايهة والتايه من يلكى مرسى يذب همومه كلها بيه وأنت جنت مرساي رغم قساوتك ذيج الأيام بس جنت أحس بيك حنين جنت أشوفك شلون تداري حلالك وشلون توگف للغريب قبل القريب ذيج الساعة عرفت إن صمود والأمير راح يعيشون بظل رجال صدك

:- والله يا درية لوما وجودج جان هسة صيوان ضايع بالدواوين والجگاير أنتِ اللي رتبتي حياتي بس الليلة گلبي يلعب عبالك أكو غيمة سودة راح تمر على السلف البستان صار له يومين يصوفر والماي جاي يقل هاي علامات مو زينة

- يمعود اذكر الله صدكني هاي أفكار براسك ماكو شيء

كمت من الفراش رحت للشباك فتحته شوية الهوى البارد دخل للغرفة وجان السلف غارگ بالظلمة بس ضوا خفيف من البيوت البعيدة

صيوان :- شوفي السلف يا درية هدوء يسبق العاصفة
صمود لازم يتعلم من هسة شلون يركب الخيل وشلون يشيل السلاح وشلون يثمن الكلمة قبل لا ينطقها باجر راح أخذه وياي للبستان أريده يشوف التعب أريده يشوف شلون النخلة تنطي تمرها بس بعد ما تشرب من عرك الجبين

درية :- صمود عمرة 7 سنوات بس بعده زغير صيوان خليه يشبع لعب لا تحمله همومك وأنتَ بعز شبابك باجر يجي وقته ويتعلم هسة هو محتاج يحس بيك أب مو معلم

:- لا العمر يركض أنا بعمره جنت أسرح بالغنم وأعرف أفرق بين الذيب والچلب الدنيا ما ترحم اللي يتأخر بتعلم دروسها صمود أريد جدته تعلمه هم مثل ما علمتني مو بس الدلال العز اللي عايشين بيه لازم يعرفون ثمنه

- ثمنه غالي وأدري بيك جاي تدفعه من صحتك ومن أعصابك كافي تفكير تعال ارتاح باجر وراك غبشة والعمال ينتظروك وعمامك أكيد راح يجون يكملون حجي اليوم ارتاح حتى تكدر توكف بوجهم بظهر صلب

رجعت تمددت بصفها بس هالمرة سحبت الغطا علينا ثنينا

صيوان :- تدرين رغم كل شي أنا أسعد رجال عندي حرمة مثلج وعندي سباع يملون علي البيت الدنيا خل تروح وين ما تريد ما دام بابي مسدود عليكم وأسمع أنفاسكم خل الأرض تزلزل تحت رجلي ما يهمني.

درية :- هذا هو صيوان اللي أعرفه الرجال اللي ما تهزه ريح نام يابعد عيوني نام وخل أحلامك وردية مثل وجه الأمير

غمضت عيوني بس عقلي جان بعده يشتغل تذكرت كلام أبوي الكالة لــ دهام لمن قرر يتزوج

:- إذا ضاجت بيك ارجع لبيتك تره الحرمة الصالحة هي القبلة اللي تدليك طريق الراحة

وصدگ درية جانت قبلتي قبل لا أغفي بست إيدها

و مرت الساعات وأحنا نسولف نفتح دفاتر قديمة ونسد ثغرات الخوف بالضحك والذكريات درية ماملت من الحجي جانت تسمعني وكأنها أول مرة تسمع قصصي الفجر بدا يشكشك وصوت الأذان بدأ يرتفع من بعيد

صيوان :- كومي صلي يا وجه الخير أنا راح أنزل أتوضأ واصلي جوة

درية :- ما تريد اسويلك شيء؟

:- سويلي چاي مهيل من أيدج

- تامر أمر يا أبو الأمير بس وعدني ما تشيل هم وحدك بعد شكو غيمة تمر ببالك احجيها الي لا تخليها تمطر بداخل كلبك وتأذيك

بست جف ايدها وكمت وكفت يم الجرباية باوعت للأمير عباس جان نايم ومبتسم يمكن جان يحلم بحلم حلو بعيد عن الخوف الي خلاه يجي يمنا عدلت الغطى عليه وطلعت من الغرفة وأنا أحس روحي خفيفة

نزلت توضيت وصليت بالديوان و كعدت بوحدي شعلت ضوا خفيف وباوعت لصور أبوي المعلكة

: سمعتك يبا صرت الجرف ودرية هي الماي الي يحييني والولد؟ الولد هم الأمانة الي راح أحافظ عليها برموش عيوني

طلعت لبرة الهوا الصبح جان يطك بالوجه ويجدد الروح شغلت الماي بالكاع و رجعت للبيت لكيت الريحة تفتح النفس درية محضرة الريوگ وصمودي كاعد يفرك بعيونه بصف أخوه الأمير الي كعد مصحصح ويضحك

الأمير عباس :- بابا

- روح ابوك

الامير عباس :- حسيت بيك بالليل وأنت تحط ايدك على راسي عبالي حلم ههههه

شلتة وحضنته وبسته من راسها وهتفت وياه

- لا مو حلم يا سبع أنا وياك دوم صير قوي ولا تخاف من شي طول ما أنا أشم الهواء

كعدنا كلنا على السفرة.جانت اللمة تسوى كنوز الدنيا باوعت لدرية غمزتلي بضحكة خفيفة وكأنها تكلي شفت شلون انحلت؟

درية :- صيوان اليوم لا تتاخر بالبستان راح أسويلك مركة شجر الي تحبها

صيوان :- صار يا بعد عيني اليوم الدنيا عيد

طلعت من البيت وبداخلي يقين أن كلام أبوي جان دستور مو بس حجي النسوان صدك ماي ودرية جانت الماي الي يروي شجر حياتي وأنا لولاها جان الجرف انهار من زمان

واني بالباب رن تليفوني طلعته ولكيتة القائد يتصل علية فتحت الخط وهتفت وياه

صيوان :- نعم سيدي

- لازم تجي للمركز هسة

:- تمام سيدي

سديت الخط وما حجيت شيء ركضت رگبت السيارة وبوجهي رحت للمركز لكيت القائد مجمع الشعبة كلها ولمن اكتملنا كلنا كعد كدامنا وهتف ويانة

صيوان :- السلام عليكم

أرشاد :- شصاير ؟

فرهاد :- العلم عند الله وعند القائد

هرم :- أكيد إنذار

ارشاد :- حتى بالاستراحة؟؟

صيوان :- هذا حضنا بعد

بهذا الوقت دخل القائد بعد ما أدينة التحية حط الملف كدامنا وهتفت وياه

صيوان :- شنو هذا سيدي؟

- قضية

أرشاد :- قضية شنو سيدي ؟

- هاي القضية حساسة شوي استريحوا واسمعوني

هرم :- نعم سيدي

- القضية هاي تخص بنت أسمها بتول أسعد قبل أسبوع انتقلت لــرحمة ربها
التقرير الطبي يكول ماتت بنوبة قلب وأمها اجت تشتكي وتكول بنتها ماتت على إثر اعتداء وبعد تشريح جثة الضحية لكوا آثار خياطة على جسد بتول يعني البنت متعرضة لعملية جراحية والخياطة على جميع انحاء جسمها

فرهاد :- هسة انا دخت شنو يعني؟

هرم :- أكو شيء خطأ بالقضية

- هاي القضية الكم وخلال مدة لازم تنتهي وأشوف النتائج

هنا اني بقيت ساكت استمع وافر القلم بيدي وما سكت الملازم إرشاد الا وأدخل وحجة وياي

أرشاد :- سيادتك ماا سمعتنا صوتك؟شنو رأيك بالقضية ؟

صيوان :- القضية كلش واضحة ومابيها اي خطأ

هرم :- شلون اشرح النا القضية بيها باب وباب شلون مابيها خطأ

:- طبعاً أنا ماريد أفتي من يمي بس على خبرتي والقائد يحجي تحللت القضية براسي ركزوا وياي يمكن يكون التقرير الطبي صحيح بتول ماتت بنوبة قلب وبنفس الوقت كلام والدتها صحيح بتول تعرضت للاعتداء وماتت على إثارة

- وشلون تصير هاي سببين للموت؟

:- يعني سيدي بنت جسدها ضعيف وتعرضت لاعتداء قوي موأكد ما تتحمل وتجي نوبات قلب وهلشيء وارد كللش
بس مشكلتنة وين

فرهاد :- وين؟

:- مشكلتنا هي منو الي كال لــ دكتور يكتب بهذا التقرير بس نوبة قلب ما كتب سبب يعني البنت سيدي شكد عمرها؟

- 17 سنة

:- شوفوا يعني بنت بهذا العمر وينها وين النوبات؟؟

هرم :- تمام ويمكن موضوع الخياطة الي على جسمها يمكن يكون دليل نفس الناس الي اعتدوا عليها هم نفسهم الي هددوا الدكتور وهم نفسهم تاجروا باعضائها بعد موتها

أرشاد :- على تفكيركم هذا يعني إحنا هسة وي تجار أعضاء

- مو شرط يمكن خلية كاملة شيء أكبر من فقط متاجرة

فرهاد :- منين نبدي هسة؟

- أريدكم هسة بقيادة الضابط العسكري المؤتمن ( صيوان )
تحيلون الدكتور و ام الضحية لتحقيق واريدكم بأصغر مصدر ضوة تلزمونة وتمشون علية

صيوان :- ان شاءالله سيدي

- الله يقويكم

طلع القائد وضليت اني والجماعة كاعدين وأحد يباوع بالثاني وطكيت صفنة خوش لمن ربت على چتفي إرشاد و هتف وياي

أرشاد :- صفنت سيدي الصفنة موش الك

- روحوا لبيت بتول وأي شخص يطلع كدامكم جيبوا الي وخلوه بغرفة التحقيق واريد نص يرحون للمستشفى ويحضرون الي الدكتــور و واحد بيكم يسويلي ملف كامل معلومات وصور عن بتول أسعد

هرم :- حاضر سيدي

طلعوا كل واحد بيهم لشغل الي انطيتة اله و بقيت منتضر واني احس بإحساس غريب إتجاه هاي القضية
وجنت اريد اخلصها بأسرع وقت ليش ماجنت أعرف...

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
"""" شـــبيــر """"

من صدكت على الله طلع الصبح طلعت بسرعة ونزلت الدرج ركض حتى أروح للمحل شافتني أمي و وكفتني

جميلة :- يا صباح الخير!!!

شبير :- هلا يمة صباحج نور

:- وينن هيج طاير شعندك

- ماكو والله يمة بس أتأخرت لازم افتح المحل

:- اها خوش الله يفتحها بوجهك من كل باب

- بعد رأسي دعائج كافي يا جنتي

:- بس ثواني قبل لا تروح

- هلا يمة

:- حجيت وي أبو هدى؟

- خير شيريد؟

:- امي أنتَ أمها اتصلت علية وتكلي زوجها دا يتصل عليك وأنتَ ما ترد شبيك وي عمك يمة؟

- ماهو عمي لا تكولين عمي

:- يا يمة غير ابو زوجتك شنو ماهو عمك؟شنو تريد تصيحلة خالي

- يمة لا تخليني اتعصب من صبح الله خليني متفائل ورايح استرزق الله يخليج

:- شنو الله يخليني غير تفهمني شنو تريد البنت لا هيچ تضل معلكها شنو لعبة عندك البنات وعند اخوك؟؟

- خوش چا من تتصل بيج مرة ثانية أمها كولي الها شبير مايريد بعد هدىٰ و اذا شبر بعدة يريد رشى فا براحته اخذوا منهم بنت وحدة بس اني بعد ماريد اتزوج

:- اوكفف اووكفف شني ماتريد تزوج بعد ؟؟ شنو عبالك لعبة لو شنوو؟؟

- لا يمة مو لعبة بس إبدال ما اتزوجها ونتطلك من هسة سترت روحي وسترت البنت وياي و عفتها

:- شبير اوكف احجي وياك

- من أرجع من أرجع أتأخرت باااي

:- لككك شبييررر

عفت أمي وراي وطلعت من البيت صعدت السيارة ورحت للمحل فتحتة وكعدت بي واني مخلي تليفوني بعيد عني وبعد ما اجيت انا بنص ساعة فات عصام
سلمت علية وراح يرتب بالمحل ويسوي شغلة واني اباوع على الساعة وبعد ما صارت بالــ 10 الصبح اندار الي عصام وهتف وياي

عصام :- سيد شبير

- عيوني

عصام :- ششنو زمرد مستأذنة؟

- اهاا لاا

:- الوقت فات وهيَّ لهسة ما جاية

- خلها

:- اهاا تمام

- اني طالع بشغل أنتَ بالك للمحل تمام

:- لا توصي باب رزقك رزقي منه

- استودعتك الله ما أتأخر

طلعت من المحل ووكفت بالباب ولمن اجوي مجموعة يردون يفوتون دنگت وانزحت عنهم لغاد فاتوا للمحل واني صعدت السيارة وما جنت اعرف روحي شنو اريد! دست بانزين وما لگيت روحي الا ورحت لبيت زمرد وكفت باب ونزلت دكيت على الباب وانتضرت يفتحون الباب
وسمعت صوت فتح درت وجهي بسرعة ولكيت إيليا كدامي ضحكت الها وهتفت وياها

ايليا :- هاا عموو

شبير :- حبيبتي زَمُرد وينها

- عمو أختي كاعدة جووة تفوت

:- ههههه لا حبيبتي ما يصير تكولين للرايح والجاي تعال فوت مايصير

- اصيحلك زَمُرد؟

:- صيحيها الي

- أوكِ أوكِ

دخلت إيليا ترگض و بقيت انا اباوع للشارع ورفعت راسي اباوع لبيتهم وشكلة الخارجي وطلعت زَمُرد جان شعرها رطب وصاير كيرلي لأن متبلل وهتفت وياي

زَمُرد :- ما ملاحظ ان رجلك أخذت على الچية لهنا؟

شبير :- مو أنتِ لو تسمعين كلامي ما تجبريني اجي لهنا كليوم

- ويعني حضرتك راح تظل تجي لهنا كل يوم؟

:- اي كل يوم اذا ما اقتنعتي واجيتي وياي

- اجي وياك لوين؟

:- ترجعين للمحل ولشغلج

- وشنو انا اشتغل عندك وتتحكم بية

:- اي صدك تشتغلين عندي چا شني انا أشتغل على أيدج

- سيد شبير روح منا دخيل جدك

:- زَمُرد والله أبوي يفضحني إذا عرف انا طردتچ وبوية ساعة غضب سامحيني كاافي مشاكلي وي أبوي مابية بعد مشكلتچ

- يعني ابوك راح يسويلك مشكلة اذا ما رجعت؟

:- اييي والله

- لعيون السيد انا راح أرجع لأن ماريدة يعصب

:- أروح فدوة لعيون أبوي يلا روحي غيري ملابسچ وروحي للمحل تلگين عصام هناك

- اوكِ

انداريت اريد أروح سمعت صوتها يصيح بأسمي بهمس انداريت وعيني صدت لعيونها

زَمُــرد :- سَيــد شُـبَيرْ

:- اهلين

- هو بس ممكن أطلب طلب

:- كولي

- تكدر تنتضرني بالسيارة توصلني للمحل يعني اذا تكدر بس اذا مستعجل وتريد تروح تكدر تروح

:- لا عادي اوصلج

- خاف عندك شيء وانجبرت بية

:- لا ماعندي شيء

- هوو لااا لا رووح ماريدك تتأخر انا راح أخذ تكـــسي

:- راح انتضرج بالسيارة اذا ما تردين تثكلين علية لا تتاخرين وتعطليني

- لا لتاخذ بكلامي خلص سيد روحح

:- زَمُرد

- نعم ؟

:- روحي بوية روحي غيري وتعاي بسرعة اني انتضر بالسيارة

- لا شغلة نص ساعة تلكاني يمك

عافتني وفاتت صعدت السيارة وطلعت تليفوني أضيع وقت بيه لحد ما تجي زَمُرد ولكيت رسالة من ابوي عرفت أن أمي حجت له فتحت الرسالة لكيته كاتبلي

البشير قيصر :- اذا ما رجعت هسة للبيت يصير الما يعجب وصباحك يصير أضلم يلا بوجهك وتعال ليه بسرعة تعرفني صبري گصير

قريت الرسالة وسديت التليفون وشمرتة بالكرسي مال الصدر وبعد ساعة كاملة صعدت زَمُرد بالخلف وهتفت وياي

زَمُرد :- أعتذر للــتأخيــر

:- لا عادي افتحي الباب وردي سدية بكل قوة

- تمام

فتحت الباب ورجعت سدتة و دست بانزين وطلعت على الشارع وايدية على الستيرن وكلما تصد عيني للمراية أشوف زَمُرد تباوعلي وتدير عينها للشباچ تباوع للشارع وحَسّيت عليها تريد تكول شيء مّبين من وجهَ أكو كم كلمة غاصة ببلعومها كَسِّرت حاجز السْكوت وهتفت وياها

شُبيَرْ :- تردين تكولين شيء ؟

زَمُرد :- لااا

:- اهاا حسّيت عليچ تردين تحجين فد شيء بس اذا عندج شيء تردين تكولينة فا كولي عادي لا تظلّين حابستة بصدرج مو زين عليچ

- ههههه هو صحيح بس انتبهت عَلّىٰ أيدك أنتَ خاطب لو هذا مجرد خاتــم لابسة

:- لا انا خاطب مو مجرد خاتــم

- يعني حتـى هذا الكتر البيدك منها؟

:- لا لا مو منها الكتر هذا من عمتي لبستني انا وأخوي وطلبت ما ننزعة

- الله يحفضكم ... شوكت تتزوج

:- مابقىٰ هواي

- الله ييسر الك

:- تسلمين

- عن حُب ؟

:- شنيي؟

- قصدي تزوجتها عن حُب ؟

:- لا مو حُب بس انا الي اختاريتها

- ولو سألت هواي وتدخلت هواي بس شلون مو حُب و أنتَ الختاريتها؟

:- هَيَّ تصير أقارب العلوية الچبيرة والعيد من أجو النا وشفتها وهم هَيَّ وي أختها توأم وصغار لهذا أبوي خطبهن وماصارت أي مشاكل او اعتراضات

- حلو توأم لــ توأم

:- ايي هيج

- الله يفرح كلبك ويقر عينك بهذا الزواچ

:- الله يسمع منچ ويرزقچ ابن الحلال أنتِ همّ

- ان شاءالله

سكتت ودارت وجهَ صفح عني وانا هم سكتت وكملت طريقي نزلتها كدام المحل وطلعت بوجهي للبيت حَتــىٰ اشوف أبوي شنو يريد وليش معصب

وصلت للبيت ونزلت والوجعة بگلبي من كلام السيد أعرف أبوي من يضوج يگلب الدنيا وطببتي للبيت بهيج وقت معناها راح أواجه عاصفة دخلت للهول لكيته كاعد وبيده السبحة يفر بيها بسرعة وأمي كاعدة بصفه وجهها ميتفسر

شبير :- السلام عليكم

البشير قيصر :- وعليكم السلام هلا بالسيد هلا بالي يسوي بكيفه وما يحسب حساب لجبير ولا لصغير

دنگت راسي وهتفت وياه

- بوية استهدي بالرحمن شكو شصاير؟

البشير قيصر :- شصاير؟وبعدك تسأل ولك الي صاير إنك تريد تفشلني وي الوادم تريد تكسر كلمة أبوك؟ أمك تكول ميريد هدى شني السالفة لعب جهال هي يوم تريد ويوم ما تريد؟ هااا شبير شني السالفة الترددت على لسان أمك؟ تريد تكسر كلمتي وتكول ماريد البنت؟

دنگت راسي حاولت ألملم كلماتي حتى ما تطلع بصورة استهتار بس السالفة جانت تخص كرامتي وسلطتي كرجال

شبير :- بوية المسألة مو كسر كلمة ولا هي لعب جهال بس أنا هدى ما أكدر أكمل وياها

البشير قيصر :- وليش يا سيد؟ البنت بت ناس وأبوها نعم الرجل وجمال وأخلاق وعلم شطلع بيها هسة وخلاك تعوفها؟

شبير:- طلع بيها لسان يا بوية البنت رفعت صوتها علية بآخر مكالمة وتجاوزت حدودها وأنتَ علمتني إن الزلمة هيبته بكلمته والمرة الما تحترم رجلها وهي بعد هي بالخطوبة باجر شتسوي من ينسد علينا باب واحد؟

أبوي سكت لحظة شفت ملامحه تغيرت لأن يعرف نقطة ضعفي هي الاحترام وهو نفسه ما يرضى بالاهانة

البشير قيصر :- رفعت صوتها بيا حق وشحجت؟

شبير :- الحجي ما ينكال يا بوية بس المختصر مفيد بنت ما توقرني وأنا بعدني ما صاير رجلها رسمياً يعني ما تلزمني أنا السيد شبير ما عاشت المرة الترفع صوتها بوجهي وأنا ساكت عفتها لخاطر كرامتي

:- يا بوية شبير البيوت تنبني بالصبر مو بكل كلمة نهدها

شبير :- الصبر على الظروف يا بوية مو على قلة الأدب أنا قررت وما أريد أظلمها ولا أظلم نفسي ومثل ما كلت لأمي سترت عليها وعفتها بالحسنى قبل لا نوصل لطريق مسدود

:- والناس؟ وعمك أبو هدى شحجي وياه وأنا المنطي كلمة؟

شبير :- كولة القسمة ما صارت والكلوب ما تآلفت أحسن ما نتزوج شهر ونطلك وتصير الفضيحة فضيحتين

أبوي دار وجهه عني وهو يفرك بلحيته عرفت إني كدرت أقنعه بمنطق الكرامة بس جرح كلمته كدام الوادم جانت بعده مُأذيه

البشير قيصر :- روح شبير روح هسة من كدامي خلي أفكر شلون أرگع هالسالفة وي الرجال بس حسابك وياي بعدة ما خلص لأن الاستعجال بالقرار مو من شيم الكبار

عفته وصعدت وانا أحس جبل وانزاح عن صدري رحت لغرفتي شمرت روحي على الجرباية وأنا أباوع للسگف فكرت بـ هدى وبطريقة كلامها وفكرت بـ زمرد وهدوئها

بس دقيقة شبير شمالك كمت تخوط وتخربط شجاب هاي على هاي؟ ليش هسة اجت زَمُرد ابالي وست الها مقارنة بـ هُدىٰ؟

غمضت عيني وأنا أسمع صوت أمي وهي تحاول تهدي بأبوي بالهول عرفت إن حياتي بدت تاخذ مسار جديد مسار أنا رسمته بإيدي حتى لو جان الثمن غالي

ما جان بية نوم بس حسيت بتعب وتمددت ولأن ما نمت من وقت وكاعد من الصبح أول ما غمضت عيوني غفيتت وما كعدت ولا فزيت إلا من أجاني شُبر وكعدت على الهزة مالتة الي رفعت راسي ومسحت عيوني بيدي وهتفت وياه

شُبَيرْ :- خيرك خيرك شكو ؟

شُبر :- جاي اكعدك

- أكو بني آدم صاحيي وعقلة تمام كامل يكعد هيج من النوم؟

:- ولك جنك ميت موش نايم خفتت عليك مو زين ما صحت لهلي عبالي صالك شيء

- لا عمي والله أنعم الله عليك ياروحييي كلش مشكور على خوفك هذا ولككك وخر عني لا ارفسك هسة

:- هسة انا طلعت خطأ هاا الصوچ بية؟

- شعندك مگعدنيي؟

:- عمامي راح يجتمعون كلهم وكلت نروح الهم مشتاق لكعدتهم ترىٰ

- ويمتا يجتمعون بــ رجب لو بــ شعبان ؟

:- لا هذا ولا هذا اليوم بليل

- لك اليوم بليل ومن هسة مكعدني؟!

:- عزيزي شعبالك أبيش الساعة؟؟

- مادري بيش تطلع بالـ 12 موو

:- ترىٰ الساعة 5 المغرب راح ياذن

- الله عليك

:- والعباسس ما تشوفني خفت عليك شفتك من الصبح نايم ما طلع حسّك

- ياعلي مااا حَسّيت عَلّىٰ روحي والله على بالي صالي بسّ 5 دقائق نايم

:- شووف صالي شكد واني اكلك عدل نومتك عدلهاا بس حضرتك لااا عود كبرت صرت جگاير وسهر لو يدري بيك ابوي والله بس ابوي علاجك

- أكول انجب يلا وخر عني

:- اي عفية كوم أسبح خيستك طلعت

- الصبح سبحت ترى

:- هاا وتريد ما تسبح للسبوع الچاي؟

- جاي أكلك لا تكول خيستي طلعت

:- لكك مو انخمدت ومتغطي بهذني تراك حمضضت يلا كوم واسبح

- شُبر

:- هاااا

- أنتَ راح تتزوج رَشىٰ ؟

:- أنا سمعت بهذا الموضوع من أبوي وعرفت بيك ما تريد هُدىٰ

- اي هاي سالفتي شبر خوية لا تربط روحك وياي إذا أنتَ ما تريد تعوف المحروسة كمل وياها ولا توكف قسمتك على قسمتي انا و هدى ما تراهمنا ما يعني أنتَ ورشى مصيركم نفس مصيرنا

:- تريد رأييّ بهذا الموضوع

- أكيد رأيك هَوّ المهم والــ يمشي على آرائنا

كام من يمي وراح سحب شُبر الكرسي وكعد كبالي شبك أصابعه وصفن بوجهي صفنة طويلة كأنما يريد يقرا اللي بگلبي قبل لا ينطق حرف واحد

شُبر :- شبير أنتَ تدري بية أنا مو من أهل العواطف والدراما بس السالفة مو سالفة رشى وهدى السالفة سالفة بيت لا تنسى أبوي من خطبهن إلنا جان يريد يلمنا ببيت واحد ونسابة وحدة حتى نصير حزام ظهر لبعضنا

شبير :- وإذا البيت بنيانة مغشوش يا خوي؟ تظل تبني فوگاه لحد ما يوكع على روسنا؟ أنا ما ردت أهدم فرحتك بس رشى وهدى وجهين لعملة وحدة وأنا طبعي ما يرهملي اللسان الطويل والمرة التمشي كلمتها عليّ

- أدري ورشى مو أحسن من أختها نفس الطينة بس أنا جنت أكول ميخالف لخاطر كلمة أبوي ولخاطر ما أكسر بخاطر العلوية بس من شفتك أنتَ السيد أخوي القوي الشخص اللي ما تهزه ريح وكفت بوجه الكل وكلت لاا هنا وكفت وراجعت حساباتي

:- يعني شنو؟ راح تعوفها؟

- العصر من جنت أنتَ نايم كعدت يم ابوي وكتله انا
بوية شبير أخوي وهو ميزاني إذا هو شاف هالعيلة ما تناسبنا فأنا وياه على الخط

:- هههههه وابوي شنو سوة؟

- أبوي شاط وناط بس من حجيتله عن سالفة الاحترام سكت الظاهر كلامك وياه الظهر جاب نتيجة

:- عفية بيك الزلمة مو بس شوارب وطول الزلمة موقف والمرة اللي ما تعرف قدرك وأنتَ ببيت أبوك باجر تذلك وأنتَ ببيتها

- وهسة شراح نسوي وي عمامي؟ الليلة الكعدة راح تصير حامية وأبو هدى بعد شوي جاي النا يريد يفتهم السالفة

كمت من الفراش وسحبت المنشفة وجنت اريد افوت أسبح

:- يفتهم واليسمع يسمع أنا الحق وياي وما دامي ما مسوي مكسورة راسي يظل مرفوع روح أنتَ تحضر وأنا راح أسبح وألبس وأطلع سيد شبير اللي يعرفونه مو هذا التعبان اللي شفته هسة

- خوش راح انزل هسة انا

:- تمام

طلع شبر واني دخلت سبحت وطلعت لبست دشداشتي البيضاء وعطرت بـ دهن العود اللي يحبه أبوي و نزلت للهول جانت الريحة بخور وأبوي كاعد والسبحة بيده بس ملامحه جانت أهدأ من الظهر باوعلي ودنك كام أول ما شافني وطلع للبراني طلعت وراه لكيت أبو هدى جاي وي اولادة وكاعد شبر يمه

رحت انا وكعدت بصف شُبر وعيني صارت بعين أبو هدى جان وجهه أحمر من المستحى ومن الزعل كام شبر وصار يفر علينه بالگهوة وبدا الحجي يفتح باب وباب

أبو هدى :- أبو شبر أنتَ تعرف غلاتك عندي وتعرف إني نطيتك بناتي وأنا مغمض بس اللي صار اليوم وكسرة خاطر البنات هاي ما تهون عليّ شبير وليدي شنو شفت من هدى حتى تنهي كل شيء بلمحة بصر؟

كل الكاعدين سكتوا العيون كلها صارت عليّ شفت شُبر عصر ايده وأبوي باوعلي ينتظر ردي عدلت غترتي وكتله بصوت هادئ

شبير :- عمي أنتَ على راسي ومعزتك من معزة أبوي والبنت عرضي وشرفي بس الزواج مو بس حلقة وعقد الزواج مروءة وبنتك الله يحفظها تجاوزت حدود المروءة بالحجي وياي وأنا يا عمي ربيت بمدرسة البشير قيصر اللي علمني إن الرجال هيبته بلسانه والمرة سترها بعقلها أذا من هسة لسانها طال باجر شلون أأمنها على بيتي واسمي؟

أبو هدى دنك راسه ما لگى رد اخوانها كلهم صاروا يهمسون بــ حقك سيد المرة لسانها حصانها

عفتهم يتناقشون وطلعت برا المضيف أتنفس هوى طلعت تليفوني مادري ليش وبلا شعور رحت لاسم زَمُرد بالواتساب شفتها نشط الآن ترددت بس كتبت الها

:- رجعتي للبيت؟ وشلونه الشغل جان؟

ثواني واجاني الرد وكأنها جانت تنتظر الرسالة مني وكتبت الي

- اي سيد وصلت من زمان والشغل ماشي لا يظل بالك أنتَ بخير ما رجعت واجيت للمحل!

ابتسمت بنص الضلمة وحسيت براحة غريبة كتبت لها

:- بخير دام الشغل بأيد أمينة أنا بخير.

سديت التليفون وخليته بجيبي رفعت راسي للسماء جانت النجوم تلمع وصوت السوالف والمناقشات جوة يوصلني مثل الصدى البعيد حسيت بروحي خفيف كأنما قيود حديد جانت لافة على صدري وانفتحت

بينما أنا واكف طلع شبر وراي وجهه جان متبشر تقرب مني وطكني على كتفي بخفة

شبر :- ها يا سبع شو اشوفك تبتسم وية النجوم لا يكون السالفة كبرت براسك؟

شبير :- لا يولي بس حسيت براحة شصار جوة؟ عمك أبو هدى بعده زعلان؟

- والله يا شبير أبوي ما قصر حط النقط على الحروف گالهم بناتكم عدنا معززات مكرمات بس القسمة نصيب والنفوس ما تآلفت وما نرضى لوليدنا ياخذ وحدة تكسر بكلمته الرجال اقتنع وأخوانها استحو من السالفة خصوصاً من عرفوا السالفة بيها طولة لسان

:- الحمد لله أهم شي ما نطلع مكسورين كدام الوادم ولا نكسر بيهم بغير حق

- وهسة؟ شراح تسوي

:- باجر من غبشة أنا بالمحل الشغل هو اللي ينسي الواحد همومه

- صدكك نام يلا أصعد

:- جا وجمعت عمامي؟

- عمي أصفاد صايرة وياه مشكلة فاا التهو وياه

:- يعني ما ينجمعون هسة

- لااا

:- همززين تعبان اريد انام

عفت الكل وصعدت لفوك عبالي راح نروح لعمامي هل بدلت و زهبت روحي بس يلا عادي أهم شيء أنام هسة واشبع نوم و ثاني يوم الصبح كعدت بنشاط ما حاس بيه من زمان لبست القميص النيلي والبنطرون الأسود رتبت شعري وتعطرت ونزلت أمي جانت بالمطبخ تسوي چاي باوعتلي بنظرة بيها عتب وبيها محنة بس ضحكت وي ضحكتي وهتفت وياي واتقربت وبست رأسها

جميلة :- ها يمة اشوفك اليوم وجهك منور عساها دوم مو يوم

شبير :- ببركة دعائج يا غالية يمة لا تزعلين مني باجر تعرفين إني سويت الصواب

:- الله يكتبلك الخير يا وليدي بس كون ما تطلع أكو وحدة جديدة داخلة على الخط!

- لا يمة شدخل؟

:- يمة ترىٰ الأم تحس وأنا أدري وليدي من يصفن ويضحك للتليفون يعني أكو شي جديد دخل حياته

- أتأخرت على المحل

:- اي اشرد اشرد

عفتها وطلعت بسرعة وجهي صار نار من الفشلة صعدت السيارة وشغلتها والطريق كله أفكر بكلام أمي هل فعلاً اكو شيء تغير بحياتي؟ اكو وحدة بدت تاخذ مكان بتفكيري؟
أنا توني طالع من خطوبة فاشلة معقولة أدك باب ثاني بهالسرعة؟
وصلت للمحل جانت الساعة بـ 9:00 نزلت شفت عصام واكف يمسح بالجام الخارجي

شبير :- صباح الخير عصام

عصام :- هلا بسيدنا صباح الأنوار اليوم من وكت؟

:- اي والله ردت أشرف على البضاعة الجديدة زمرد وصلت؟

عصام :- اي جوة دترتب الرفوف الجوانية

دخلت للمحل جانت ريحة العطر مالتها تملي المكان ممزوجة بريحة الذهب شفتها واكفة لابسة صدرية ولامة شعرها الكيرلي بطريقة عفوية جانت دتحاول توصل لرف عالي تقربت منها وهتفت وياها

:- أساعدج؟

زمرد :- سيد شبير صباح الخير لا عادي

تقربت منها وأخذت العلبة من إيدها وخليتها بالرف العالي التفتت علية بابتسامة خجولة عيونها جانت تلمع بلمعة غريبة اليوم وكأنها مرتاحة لرجعتها للمحل

زَمُرد :- تسلم سيد تعبتك وياي

شبير :- التعب راحة للي يقدره ها بشري اليوم الوضع أحسن؟

- كلش أحسن تعرف سيد البارحة فكرت بكلامك، وحسيت إني فعلاً جنت محتاجة أرجع لهنا الشغل مو بس رزق الشغل كيان للمرة

:- عفية بيج هذا الكلام اللي يبرد الگلب

وكفت كبالها الموقف جان هادئ بس بداخلي عاصفة بدت تهدا وتتحول لشي ثاني شي ما أعرفه أو يمكن خايف أعرفه طلعت من جيبي علبة صغيرة مخملية خليتها على الميز كبالها

زَمُرد :- شنو هاي سيد؟

شبير :- هاي هدية بسيطة بمناسبة رجعتج للمحل وبمثابة اعتذار عن أي غثيثة بدرت مني بذاك اليوم

فتحت العلبة جانت عبارة عن سوار ناعم كلش عليه نقشة ناعمة ومرتبة رفعت راسها وعيونها مدمعة

زَمُرد :- بس سيد هذا هواي وماكو داعي للاعتذار.

شبير :- لا هواي ولا شي هذا من شغل إيدي والذهب ما يلبس إلا الذهب

سكتت لحظة وبس صوت الساعة بالمحل يدك حَسيت بنظراتها تدور جواب لسؤال هي ما سألته وأنا هم جان عندي ألف سؤال بس هالمرة قررت أخلي الأيام هي اللي تجاوب

شبير :- يلا عصام ينتظرنا برة خلي نفتح باب الرزق واليوم أريد همتج وياي أكو زبائن جايين على مود طلبات خاصة

زَمُرد :- من عيوني سيد تدلل

طلعت للباب وأنا أحس الدنيا بدت تضحكلي من جديد مو بس لأن خلصت من سالفة هدى ولا لأن أبوي رضى عني بس لأن حَسيت بروحي لكيت المكان اللي أرتاح بيه والروح اللي تفهمني بدون ما أحجي هواي

فتحت باب المحل على وسعه والشمس دخلت تملي المكان باوعت لزَمُرد اللي بدت تشتغل بهمة وابتسمت بيني وبين نفسي

:- شبير الظاهر الصبح اللي جنت تنتظره توه طلع

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
"""" غدير الله """"

كعدت لوحدي بالغرفة بعد ما رديت باب الغرفة علية حتى لا احد يدخل وكعدت على الجرباية واني أحس نفسي صايرة نفسية هاي الأيام مادري شبية من يوم العرفت انمار طلع واني وضعي مو طبيعي شنو غدير تردينة يرجع بعد السواه؟ من عقلج تفكرين بيه وتخلينة ياخذ حيز من تفكيرج؟
ولج اختج واخوج وبنت اخوج وعمج و ابن عمج وبنتج كلهم ضاعوا من وراه ورا اهلة وأنتِ كاعدتلي هنا ومهمومة وتفكرين بي؟ ليش لو ما فعلة أبوه بأختج جان حسّ ابوج و اخوج لهسة بالبيت
ليش كل الوقت جاي تطلعين له اعذار واعذار حتى بس تشوفينة غدير اشتاقيتي لعيونه؟ هو انطاج بس الحب وسلب منج كلشي صحتي و عافيتي و اهلي واماني وكلشي
جنت كاعدة ابجي بصمت واحجي بكلبي وكمت للكنتور فتحتة وطلعت العلبة فتحتها وجانت صورنا انا وانمار بالعقد والعرس وصور عادية بالبيت ومن بين الصور موجودة مراسيلة الي جان يدزهن الي ..
رجعت وفتحت أول رسالة دازها الي .. ورجعت وقريتها للمرة المليار

أنمار :- غديرتي السجن الحقيقي ليس هذه الجدران بل كوني الشخص الذي آذاكِ أنا سجين ذنب لا يغفره إلا قلبكِ
كل يوم يمر هنا هو ثمن أدفعه مقابل الدموع التي لم يكن يجب أن تسقط من عينيكِ سامحيني يا روحي على جهلي وعلى الانتقام الذي ظننته قوةً فكان ضعفًا الندم نار لا تنطفئ وغيابكِ وقودها أدركتُ متأخرًا أنني كنت أُحارب نفسي حينما كنت أُحاربكِ أنتِ النور الوحيد الذي أتمسك به في هذا الظلام فهل يكفي النور ليغفر الظل؟ أُحبكِ الآن بصدقٍ مرعب بصدقٍ لا مجال فيه للتراجع أو التكذيب أنتِ لم تعودي هدفًا للانتقام بل أصبحتِ السبب الوحيد الذي يجعلني أرغب في الخروج من هنا ومن ذاتي القديمة أنتظرُكِ كما ينتظر السجين الحرية بل أكثر حريتي هي في أن أستحق نظرة رضا واحدة منكِ وحدها رسائلكِ هي ما يكسر عتمة الزنزانة وكأنها ضوء الشمس الذي يتسلل من شق صغير في سقف العالم أنتِ الوفاء الذي لا أستحقه والقلب الذي لم يعرف كيف يتخلى كيف أحبكِ بعد أن دمرتكِ؟ هذا هو السؤال الذي يقتلني أعدّ النجوم كل ليلة رغم أني لا أراها لأني أعرف أنكِ تنظرين إليها هذه هي صلتنا الوحيدة بالعالم الخارج وبالأمل لو كان بإمكاني أن أُرسل لكِ أنفاسي بدلاً من حبري لفعلت لأن كل شهيق وزفير هنا يحمل اسمكِ ويزفر الندم أنا هنا جسدٌ خلف القضبان وروحٌ تائهة تبحث عن نافذة في عينيكِ لتطل منها على الحياة من جديد
لا تخافي على قلبي هنا إنه معكِ يسكن في صدرك وهذا أمانه الأبدي غديري يا من كنتُ ظالمها وصِرتُ أسيرها كم أكرهُ اليوم الذي قررتُ فيه أن أُحاربكِ الآن وبعد فوات الأوان اكتشفتُ أنني ما كنتُ أستطيع أن أعيش إلا بضوء عينيكِ أنتِ الوحيدة التي بقيتِ رغم كل شيء وظللتِ تنتظرين رجلاً لم يكن يستحق الانتظار لا تكتبي لي عن تفاصيل يومكِ السعيد اكتبي لي عن غضبكِ عن وجعكِ الذي سببتهُ لكِ أريدُ أن أحمل كل ذرة ألم لكِ عن بعد لعلّها تُطهر روحي القذرة أُحبكِ أُحبكِ حدّ الندم وحدّ الهلاك
أنمارك السجين لعينيكِ

جان كليوم وهو بالسجن يريد مني ادزلة مكتوب بس اني جنت اتجاهل ما دزيت له ولا رسالة وحدة ولا وحدة جنت أكابر جنت انجرح وي كل رسالة يدزها الي وهسة هو طلع من السجن ومادري بيه وين طلع وراح يعيش حياتة بس وحياتي انا شلون اعيشها؟

نزلت دموعي وحركت خدي المكتوب جان يرجف بيدي وكأن كلمات أنمار جاي تنبض مو مجرد حبر على ورق

أنمارك السجين لعينيكِ قريتها وغمضت عيوني بقوة تمنيت لو أكدر أمسح هاي الجملة من ذاكرتي مثل ما هو مسح مستقبلي ومستقبل أهلي بلمحة بصر

ذبيت المكتوب على الجرباية وكأنه قطعة نار جوتني كمت وكفت كدام المراية باوعت لوجهي هاي مو غديرالله اللي جانت تضحك والوجنة مالتها وردية هاي وحدة غريبة وحدة العجز أكل ملامحها صحت بصوت مكتوم

:- ولج كافي كافي تضعفين!

بس الضعف جان أقوى مني لان الوجع مو بس بقلبي الوجع بكل ركن بهالبيت بكل صورة لأخوية وبكل دمعة نزلت من عين امي على أبوي قبل لا يروح

رجعت كعدت على الكاع لميت الصور وحضنتهن لصدري تذكرت أول يوم شفته بيه جانت عيونه تحجي حب شلون كدر يمثل هالدور بإتقان؟
شلون جان يبوس ايدي وهو بداخلة يخطط يهدم بيتي؟

فتحت العلبة مرة ثانية طلعت صورة عرسنا جنت لابسة الأبيض وهو جان يباوعلي بنظرة كمت أفسرها هسة نظرة المنتصر جان منتصر عليه وعلى براءتي ذبيت الصورة وحسيت غصة ببلعومي خنكتني الحيرة تاكل بروحي هو طلع هسة وين راح؟ المن راح؟ أكيد راح لبيته لأهله اللي جانوا السبب بكل دمارنا زين واني؟ شنو ذنبي أبقى محبوسة بسجن الذكريات وهو يتنسم الهوى بره؟

صار صراع داخلي براسي صوت يكول روحي شوفي عاتبي فرغي النار اللي بصدرج بوجهه خليه يشوف شسوى بيج!

وصوت ثاني يصرخ بوجع ولج يا وجه هذا التروحين بيه؟ نسيتي أخوج؟ نسيتي بنت أخوج اللي راحت وما نعرف وين صفت بيها الدنيا؟ نسيتي كسر خاطر إخوانج ؟

كمت أمشي بالغرفة يمنى ويسرى الغرفة خنكتني الحيطان بدت تتقرب عليه هيج احسها راح تنطبك علية فتحت الشباك جان الجو مغيم والنسيم بارد يضرب بوجهي بس ما يطفي النار اللي بضلوعي تذكرت حجاية جان يكولها إلي

انمار :- غديرتي بعد تربيتي أنتِ وطني والواحد ما يخون وطنه

ضحكت ضحكة مكسورة كلت بصوت

:- خنت الوطن وهجرت أهله يا أنمار وتركته خرابة!

فجأة سمعت صوت هورن سيارة بالفرع كلبي فز ركضت للشباك واني كلي رجفة خفت يكون هو وخفت ما يكون هو باوعت من ورة البردة جانت سيارة غريبة مارة رجعت لوره وسندت ظهري ع الحايط وأنفاسي تسارعت

:- ليش هيج خايفة يا غدير ليش هاللهفة المخلوطة برعب؟

فكرت بكلامه بالمكتوب يكول أريد أحمل كل ذرة ألم لج
زين شلون يشيل ألم موت الغوالي؟ شلون يشيل حسرة أبوي؟ الندم ما يرجع الميت ولا يطفي نار الفكد

قررت أسوي شي لازم أحسم هذا الصراع طلعت العلبة وشلت كل الرسايل وحدة وحدة ردت أحركهن، ردت أشوف حبه يتحول لرماد كدام عيني مثل ما حول حياتي لرماد

شعلت الجداحة قربت النار من طرف أول رسالة النار بدت تاكل بالورقة بس ايدي وكفت ما كدرت ذبيت الورقة بالكاع وطفيتها برجلي واني أشهك بالبجي

:- ما أكدر حتى كرهي إلك ضعيف يا أنمار ليش هيج سويت بية؟

مرت الساعات واني كاعدة بمكاني الظلمة لفت الغرفة بس ما ردت أشعل الضوة الظلمة تشبه حالي شلون اذا شفتة شلون راح أباع بوجه وما أشوف ملامح المجرم اللي كسر أهلي؟

الحياة صارت عبارة عن لو

لو ما حبيته

لو ما صدكته

لو ما دخل لحياتنا

بس لو ما تعمر بيت كلمة لو تزيد الوجع وجعين

كمت غسلت وجهي بمي بارد ردت أصحصح باوعت لنفسي بالمراية مرة ثانية شفت وحدة ثانية وحدة قررت إن الضعف لازم ينتهي

:- أنمار طلع واني لازم أطلع من سجنه اللي بگلبي إذا هو سجين جدران اني جنت سجينة أوهام

بس السؤال اللي جان يلح عليه

:- وينك هسة يا أنمار هل فعلاً ندمان لو جاي تخطط لضربة ثانية

الشك جان ياكل بالثقة مثل السوس تذكرت لمسة ايده وكلماته المعسولة وكل حرف جان يدزه من السجن

لميت الرسايل مرة ثانية بس هالمرة ما ردت أحركهن ضميتهن وطلعت للحديقة نزلت جان الهدوء قاتل

صرت افتر واني أحس حمل ثكيل انزاح عن صدري بس بنفس الوقت أحس بفرغ مخيف أخذت شوية نفس نضيف وبعدها رجعت دخلت للبيت و رجعت لغرفتي رديت الباب وتمددت على الجرباية

غمضت عيوني وحاولت أنام بس جان صوته يهمس بذاني فزيت مرعوبة التفتت يمنى ويسرى ماكو أحد بس ريح قوية ضربت الشباك وخلته يصدر صوت مزعج

عرفت بذيج اللحظة إن التحرر من أنمار مو بكلمة التحرر يحتاج عمر كامل من النسيان وإني هسة بدأت أول خطوة بطريق طويل ووعر

مرت الأيام واني أحاول أرمم شتات نفسي كل ما أسمع طاري السجن أو العفو أو أي خبر كلبي يرجف بس أسيطر على نفسي
وفي يوم من الأيام وأني كاعدة بالهول سمعت دكة باب غريبة بس دكة مو غريبة على مسامعي دكة جانت إلها رنة خاصة بقلبي
وكفت رجلي ما شالتني جنت خايفة حيل وعبالي واحد من إخوتي طلعت بسرعة وجان الهوى يطير شعري حطيت الحجاب على راسي وفتحت الباب على كيفي وشفت خيال زلمة واكف عيونه جانت تلمع بدموع ونكسار جانت فتحة الباب كلش صغيرة وبس عيوني طالعة سديت الباب وكلبي يدك طبل صارت كدامي عيون مكحلة!

لفيت حجابي عدل وباوعت لملابسي مابيهن شي فتحت الباب وبقيت اباوع له اي هذا هو أنمار اندار الي وما حجه ولا كلمة بس باوعلي نظرة اختصرت كل الرسايل اللي قريتها

وكفت كدامه لا اني اللي كدرت أسد الباب بوجهه ولا اني اللي كدرت أركض لحضنه جنه واكفين بين عالمين عالم الحب القديم وعالم الدمار اللي صار بيناتنا

كلي بصوت مخنوك صوت تعبان من سنين السجن والقهر

أنمار :- غديرتي اجيت بس أشوفج وأروح ما أستحق أبقى بس ردت أتأكد إنج بعدج تتنفسين

باوعتله بقهر ورديت عليه بكلمة وحدة

غدير الله :- أتنفس يا أنمار بس الهوى اللي تركتلياه جان كله دخان وحرك

سكت أنمار نزلت راسه للكاع وهو يفرك إيديه ببعضهن هاي الحركة اللي جان يسويها من جان ينحصر بالزاوية أو من يحس بوجع ما يكدر يوصفه الهوى جان يصفر بيناتنا وصوت أنفاسي وأنفاسه جانت هي الوحيدة اللي تكسر هدوء الفرع رفعت راسي للسماء جانت الغيوم مثل الهم اللي بصدري ورديت شعرة طفرت من جوه الحجاب واني أحس بنظراته تاكل بملامحي يريد يحفظ كل تجعيدة صارت بوجهي بسببه
أنمار حجه بصوت يرجف صوت ما يشبه القوة اللي جان يتدعيها كبل

أنمار:- غديرتي أدري الكلمات صارت رخيصة وأدري حجيي ما يرجع اللي راح ولا يبرد كلبج ولا يرجع ضحكة بيتكم اللي انطفت بسببي وبسبب أهلي بس وحق ذيج الليالي المظلمة بالسجن وحق كل دمعة نزلت من عينج وأنا السبب بيها أنا ميت وأنا عايش غديرتي لا تبقين واكفة بالباب ولا تكليلي فوت لأن أدري هذا البيت محرم عليه عتبتة بس اتوسل الج طلب واحد ولخاطر كل لحظة صدك عشناها تعالي وياي

باوعتله باستغراب خلطة من الخوف والشك صعدت لراسي

غدير الله :- وين أجي وياك أنمار؟ أنت نسيت روحك؟ نسيت أنا منو وأنت منو؟ وإخواني لو دروا بيك واكف هنا يذبحوك روح أنمار روح الله يستر عليك وعلينا الكلب انكسر والمجبور ما يرجع

تقرب خطوة بس وكف من شافني رجعت ليورة مد إيده بالفراغ وكأنه يريد يلمس طيفي

:- بس لهالمرة والله ما ألمس طرف ثوبج اكو مكان لازم تشوفينه مكان راح يحجيلج اللي لساني عاجز يكوله سيارتي براس الفرع وما نبتعد بس ربع ساعة ونرجع غديرتي أنا طالع من سجن وجاي أدور مفتاح سجن روحي بكلمة منج إذا ما جيتي راح أبقى طول عمري تائه لا ميت وأرتاح ولا عايش وموجود

ترددت الصراع اللي بداخلي صار مثل العاصفة. عقل يحجي بصوت اخوية الميت وكلب يبجي بصوت غديرالله اللي جانت تغفى على صوته فتت لجوة ولبست عباتي ونزلت شافتني وامي سالتني

العلوية :- خير ان شاءالله ؟

غدير الله :- يمة رايحة لبيت كحلاء هسة أرجع

- لا تتاخرين

:- ان شاءالله

طلعت ورديت الباب وراي وأنا أحس باني جاي اسد باب حياتي المستقرة وأمشي للمجهول مشينا لراس الفرع جانت سيارة واكفة صعدت وره ما ردت أكعد بصفه ردت أحسسه بالمسافة اللي صارت بيناتنا المسافة اللي مو بالكيلومترات بل بالدم والدموع حرك السيارة بهدوء وما حجه ولا كلمة جان يسوق وعيونه بالمراية تراقبني كأنه يريد يتأكد إني مو حلم وراح يختفي

وصلنا لمكان قريب من الشط بستان مهجور وأطرافه صايرة سكراب بس اكو شجرة سدر جبيرة وكفت السيارة يمها نزل وفتح لي الباب بكسرة خاطر نزلنا وكعدنا على دكة صخرية كبال الماي الشط جان يجري بهدوء يغسل جروح الكاع بس ما يغسل جروحي أنمار كعد بعيد عني بشبرين دنك راسه وبدا يحرك بالحصو اللي بالكاع

أنمار :- غديرتي تدرين أول شي سويته من طلعت من السجن شنو؟ ما رحت لبيتنا ولا شفت إخواني اللي جانوا ينتضروني بالهلاهل رحت للمكان اللي ضاعوا بيه أهلج رحت أدور على أثر أنا السجن علمني إن الحقيقة مرة بس الجذب يكتل صاحبه ألف مرة باليوم

التفتت عليه عيوني تجدح نار

غدير الله :- وهسة جاي تكلي دورت؟ بعد شنو؟ بعد ما السنين أكلت من عمرنا؟ أنمار أنت تدري أبوي مات وهو يشهك باسم أختي تدري أمي صار عندها سكر وضغط وبقت بس تصلي وتدعي الله يجمعها بيهم لو حتى بكبر؟ جاي هسة تبرر؟

أنمار غطى وجهه بإيديه وصوته طلع مخنوك بالبجي أول مرة أشوف أنمار يبجي بهيج قهر

:- والله ما جاي أبرر غديرتي أنا جنت غبي جنت طفل بلبس رجال صدكت كلام أبوي وانتقامه العمى عيوني عبالي الوفاء لأهلي هو إني أدمر أهلج بس بالسجن من جان الليل يطول جنت أتخيل وجهج وأنتِ تضحكين وبعدين أتخيل وجهج وأنتِ تصرخين من عرفتي الحقيقة هذا المنظر جان ينهش بضلوعي أكثر من سياط السجان

- ليش رجعت هسة وجاي تسوي هيج؟ تريدني أسامحك؟

:- لا تسامحيني لا هسة ولا بعد مية سنة أنا ما أستحق السماح انا بس أريد أكون انسان كدامج لمرة وحدة أريد أغسل القذارة اللي لزكت بطلعتي وبأهلي غديرتي أنا بعت البيت وبعت كل شي أملكه وسجلت لج جزء من الفلوس باسمج مو تعويض لأن ماكو شي يعوض بس حتى ما تحتاجين أحد وأنا مو موجود

- الفلوس ما ترجع الضحكة أنمار الفلوس ما ترجع غدير القديمة أنت كتلتني وطلعت بجنازتي

وكف هو هم وصار كبالي بس هالمرة جان اكو انكسار بوكفته يكسر الصخر

:- غدير السجين من يطلع لو يرجع يذنب لو يتوب توبة نصوحة وأنا توبتي هي أنتِ أنا راح أمشي بطريق طويل طريق أدور بيه على ضياعنا اذا لكيتهم راح أرجعهم ليدج وأختفي من حياتج للأبد لأن وجهي ما يسوه تباعين بيه وإذا ما رجعت عرفي إني متت وأنا أحاول أصلح اللي انكسر

حسيت بغصة بكلبي كرهي إله جان مثل الجبل بس كلامه بدأ يفتت بهذا الجبل النحر الندم العيون اللي ذبلت من البجي كلها جانت تكول إن هذا الرجال مو هو نفسه اللي خدعني بس الجرح غميچ والدم اللي نزل ما يجف بكلمتين

- أنمار

:- عيون أنمار يا بعد كل أهلي اللي خذلتهم

- أريد أسألك سؤال واحد وجاوبني بصراحة اريد تجاوبني بصراحة السجين اللي ما عنده شي يخسره

:- اسألي

- أنت بيوم العرس جان اكو ذرة حب بگلبك لو جانت كلها تمثيل؟

غمض عيونه بقوة

:- والله وحق من خلا روحج تسكن روحي جان الحب هو الحقيقة الوحيدة بذيج الليلة جنت أحارب نفسي أكول لا تحبها يا أنمار أنت جاي تهدمها بس الكلب جان أقوى جنت أبوس إيدج وأنا أتمنى الزمن يوكف وما يجي باجر اللي راح أنفذ بيه خطة أبوي أنا جنت الضحية والجلاد بنفس الوقت جنت أعشقج حد الهلاك وهالشي هو اللي خلاني أتعذب بالسجن أضعاف غيري جنت أشوف وجهج بكل زاوية بالزنزانة

سكتنا ثنينا الشط جان يطك بالجرف وصوت طيور غريبة بدت تطلع بالغروب كلت له بجمود حاولت أصطنعه

- لازم أرجع للبيت

:- أدري راح أرجعج بس أمانة يا غديرتي لا تشكين الرسايل خليها عندج مو علمودي بس علمود تذكرين إن اكو واحد جان يحبج لدرجة إنه دمر نفسه وهو يحاول يدمرج خليها شاهدة على حوبتج اللي طلعت بية

رجعنا للسيارة الطريق جان أطول بالرجعة كل حرف حجاه جان يدك براسي مثل البسمار وصلنا لراس الفرع نزلت وبقيت واكفة هو بقى بالسيارة ما نزل بس نزل الجامة وباوعلي

:- غديرتي إذا سمعتي خبر مو زين عني لا تبجين بس كولي الله خذ حقنا وإذا سمعتي خبر زين عرفي إن دعواتج الصادقة هي اللي فتحت لي الأبواب

ما جاوبته مشيت سريع للبيت كلبي جان يدك بكل قوته فتحت الباب ودخلت رديته وراي وسندت ظهري عليه كعدت بالكاع وأنا ألهث دخلت لجوه لكيت إخواني كاعدين يم امي عفتهم وصعدت فوك لغرفتي دخلت وقفلت الباب ورحت للكنتور وطلعت العلبة

فتحت العلبة مرة ثانية طلعت الرسايل ريحة السجن وريحة حبره وريحة الندم جانت تطلع منها

باوعت لصور أهلي المعلكة ع الحايط وباوعت للرسايل بإيدي الحيرة جانت تذبح هل ممكن للظلم أن يتحول لعدالة؟
هل ممكن للندم أن يحيي ما مات؟

مرت ذيج الليلة وأنا ما غفت لي عين جنت أسمع صوت سيارته تفتر بالفرع بين فترة وفترة كأنه جان يحرسني أو كأنه ما كادر يفارگ ريحة المكان اللي بيه ريحتي

طلعت للحديقة لمن عجزت عن النوم باوعت للسماء جانت صافية لأول مرة من سنين رفعت إيدي ودعيت مو بس لموتاي دعيت لكل روح تعذبت بهالقصة وبداخلي صوت جان يهمس

:- يا غديرالله النور فعلًا كدر يغفر للظل بس الوجع يبقى ندبة ما تموت

بقيت أنتظر أنتظر خبر يبرد الكلب أو خبر ينهي هاي الحكاية اللي بدت بحب وانتهت بدمار وبيناتهما رجل ضيع نفسه حتى يلكه نفسه بعيون المرة اللي ظلمها

وحسيت بذيج اللحظة إن الحساب لسه ما خلص وإن قصتنا بدت تاخذ مجرى جديد مجرى ما بيه رسايل بيه مواجهة الحقيقة المرة

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
"""" عــلــي الرضا """"

أتذكر لمن صعدت الطيارة واخذت مقعدي جان يم الشباج فتحتة وصار الهوى يدخلي و اقلعت الطيارة صرت اشوف حياتي البقت جوة واني أعلن نهاية لقُصتــي بالنسبة الي

هيَّ هاي الحياة انتقمت مني بشكل قاسي كلش جبرتني اعوف دياري وكلشي جبرتني

طارت طيارتي وابتعدت حيل وصرت اشوف رسم الأرض الي انا بيوم من الأيام جنت ساكن عليها الأرض الي جنت بيها حقيقي كلشي جان حقيقي ضحكاتي و مشاعري الي وكفت على رجال واحد وهو أخوي من بعدة ما بقت عندي مشاعر
اوقاتي الصعبة و اوقاتي الحلوة كلشي عفتة وكل ذكرياتي بقت على أرض العراق أما انا طرت بعيد عنهن وصار الطريق مرسوم كدامي واحتاج بس أمشي عليه ..

غمضت عيوني واني أتأمل يتصلح كلشي وياي والحياة تضحكلي بيوم من الأيام وارجع وأشوف عيون أخوي وتوامي علي الهادي الي صارن تحت التراب وارجع واسمع صوته وصوت ضحكاتة ما جان عندي الوقت الي يخليني أكول له اني هووواي أحبه واني ماريد أخ توأم غيرة بس اكدر اكول اله هسة واني عندي الثقة الكاملة ان هو يسمعني اريد اكوله

ياخوية اني انتضر يوم اشوفنك بيه اني انتضر اللقاء الراح يجمعني بيك الي راح يرسمة النا القدر والأيام واني هسة بفارغ الصبر لجيتك وحضنك يابعد روح اخوك ونصي يا سيد كلبي المبجل هيج تعوف أخيك الي هو ما يكمل الا يمك!

طبعاً انا كملت دراسة الطب واتخرجت من جامعة القاهرة وبعدها وبلا ما ارجع لهلي من مصر سافرت لــ السويد واستقر بية الحال هنا سكنت بشقة لوحدي اني صممتها على مرامي غلقت كل الشبابيك بلاصق أسود بحيث صار ما يفوت الضوء الا انا افتحهن واشتريت أغراض تكفيني شهرين لكدام حتى لا اطلع ولا اختلط بأحد وقفلت البباب بقفلين وبعدت القفل عني حتى لا تصير بية حشرية الا أفتح الباب

وصرت بالبيت لا اطلع ولا امشي وأخوي علي السجاد جان يحول الي فلوس أبين فترة و فترة وجنت اغلق تليفوني لأسابيع ومرات لأشهر لأن ماجنت اريد أتواصل وي احد من إخواني او وي اصدقاء الجامعة الي من كملت وهم محسسيني بنقص كلما امر من يمهم أسمع كلمة
* هذا جان يداوم وي أخوه التوأم

سحبت شكو صورة تجمعني بـ علي الهادي وعلگتهن بكل مكان وترست الفريزر كرتونات مو كرتون وأحد من حليب الموز الجان يشربة حبيب روحي ورفيجي
شلت كل المرايات من البيت ماريد أشوف وجهي انا وعلي الهادي توأم متطابق بس الفرق الوحيد علي الهادي عيونة جوزية انا عيوني خضر

ختمت التلفزيون كلة لأن حياتي صارت بس علية الهدوء بية كبر وكبر حيل اتعودت علة العزلة رغم قساوتها ومرت الأيام واجت الأيام واني حالتي نفسها عايش على دوامة الماضي

مرت ثلاث سنوات على ذيج اللحظة اللي سديت بيها الباب ثلاث سنوات و الشقة صارت هي العالم كله بالنسبة إلي الأسود اللي لزگته على الشبابيك صار مو بس يمنع الضوء صار يمنع حتى مرور الزمن جنت أحس بروحي عايش بـ قنينة معزولة عن الكون لا ليلها ليل ولا نهارها نهار

جنت أكعد الصبح أو يمكن جان ليل ما أدري أفتح الفريزر أطلع كرتونة حليب موز طعمها جان يذكرني بريحة
علي الهادي أشربها وأني أباوع لصورته المعلكة كبالي وجنت أتحاشى أباوع لأي سطح عاكس لأن أدري الوجع اللي بصدري راح ينفجر إذا شفت نص وجهي الثاني بالمراية

بس بيوم من الأيام وكفت كبال الشباك اللي بالصالة جان أكو طرف من اللاصق الأسود نازل طالع منه خيط رفيع من ضوء الشمس السويدية الباردة هذا الخيط جان مثل السهم اللي اخترق عزلتي مديت إيدي لمست الزجاج البارد وحسيت فجأة بغصة خنكتني سألت روحي

:- يا علي الرضا هو علي الهادي لو جان بمكانك جان قبل يشوفك هيج؟.

بذيج الليلة حلمت بيه شفت علي الهادي واكف بساحة الجامعة بالقاهرة لابس الصدرية البيضاء ونفس الضحكة اللي تضوي وجهه جان يباوعلي وعيونه الجوزية بيها عتب ما حجه شي بس أشرلي على السماء وضحك هذيج الضحكة اللي جانت تهز الدنيا فزيت ودموعي تبلل المخدة

كمت وبدون وعي رحت للباب ايديه جانت ترجف وأني أفتح القفل الأول وبعدين الثاني صوت القفل وهو ينفتح جان مثل صوت كسر القيد طلعت للممر الهوى البارد ضرب وجهي جان الفجر توني طالع بجمال وهدوء السويد مشيت بالشوارع الفارغة رجليه هي اللي جانت تقودني لحد ما وصلت لبحيرة قريبة من منطقتي

كعدت على دكة خشب وفتحت تليفوني اللي جان مغلق لأسابيع مئات الرسائل من علي السجاد ومن أخواني رسالة أخيرة من علي السجاد جانت تكول

:- يا خوية علي الهادي راح بجسمه بس روحه باقية بيك أنت طبيب والناس محتاجة لهاي الروح لا تكتل حي وميت سوه

الكلمات هاي جانت مثل الصدمة الكهربائية تذكرت دراستي تذكرت التعب والسهر تذكرت حلمنا اني وعلي الهادي نفتح عيادة ونسميها عيادة التوأم
رجعت للشقة بس هالمرة ما دخلت كـ سجين بدأت أشلع اللاصق الأسود عن الشبابيك واحد ورا الثاني الضوء جان يكتسح الغرفة يطرد الظلمة اللي عششت بزواياها شفت الصور ومسحت الغبار عنها ما شلتهن بس رتبتهن بطريقة تخليني أبتسم من أباوعلهن مو أبجي

رحت للحمام وبأيد ترجف باوعت للمراية لأول مرة من سنين شفت وجهي تعبان شاحب لحيته طويلة بس شفت
علي الهادي بعيوني رغم ان عيوني خضر وعيونه جوزية بس النظرة هي نفسها الروح هي نفسها

قررت أرجع أمارس مهنتي السويد بلد يحترم العلم وبما إني خريج القاهرة وبمعدل عالي بدأت أقدم على معادلة شهادة وتدريب بالمستشفيات أول يوم لبست بيه الصدرية البيضاء بالسويد حسيت بكتفي ثچيل كأنما علي الهادي خلى إيده عليه ويكول الي

:- عفية عليك يا سبع

اشتغلت بمستشفى بمدينة ستوكهولم جنت أتعامل وي المرضى مو بس كطبيب بل كإنسان جرب أقصى أنواع الوجع وبمرور الوقت صرت معروف أبين جماعتي بالمستشفى
بـ الطبيب العراقي صاحب العيون الخضر اللي يداوي القلوب قبل الأجساد

تواصلت وي أهلي وي علي السجاد بجيت وياه ساعات على التليفون وكتله

:- يا خوية علي الهادي ما مات الهادي عايش بكل نبضة بكلب مريض أنقذه وبكل دعوة تجيني من غريب

بعد مرور خمس سنوات على سفري وگفت مرة ثانية بالمطار بس هالمرة مو مطار القاهرة ولا مطار ستوكهولم كمسافر بلا عودة جنت راجع للعراق بزيارة

نزلت بمطار بغداد شتميت ريحة التراب اللي جنت مشتاق لها رحت كبل لـ وادي السلام وكفت كبال گبرة حطيت إيدي على المرمر البارد وفتحت ماي الورد صبيت شوي منه على القبر وضحكت بمرارة سولفتله كلشي كتله عن السويد عن المرضى عن شقتي اللي صارت تمليها الشمس كتله إني ما نسيت وعدي وإني راح أبقى أعيش عمر واحد لروحين

طلعت من المقبرة والشمس جانت تغيب وترسم خطوط ذهبية بالسماء حسيت براحة ما ضايگها من سنين علي الرضا ما نسى قصة حزنه بس تعلم شلون يحول هذا الحزن إلى جسر يعبر بيه للناس

الحياة ما انتقمت مني يا خوية الحياة اختبرتني بأغلى ما عندي وعلمتني إن الحب الحقيقي ما ينتهي بالتراب بل يبدي من جديد بكل ضحكة طفل أشفيه وبكل دمعة أم أمسحها

أني هسة علي الرضا الطبيب اللي شايل بجيبه صورة توأمه وبالكلب شايل أمل ما يخلص بلقاء ثانٍي بس مو تحت التراب بل بمكان أطهر وأجمل وين ماكو فراق ولا وجع

من طلعت من المقبرة جان گلبي يرجف أكثر مما رجف وأني أصعد الطيارة قبل سنين الطريق من النجف للمحافظة جان عبارة عن شريط ذكريات يمر گدام عيوني وصلت لفرعنا شفت البيت مو نفس الباب

نزلت من السيارة رجلية ما جانت تشيلني وصلت للباب مديت إيدي أدگه بس الباب انفتح قبل ما ألمسه جان علي السجاد هو اللي فتحه يمكن جان يحس بگلبه إن روضيهم وصل

وكف علي السجاد انصدم عيونه غورگت دموع صاح بصوت مخنوگ

علي السجاد :- يا أهل البيت علي الرضا رجع يا يمة علي الرضا بالباب!

بلحظة صار البيت عبارة عن ركض وصياح وهلاهل مخلوطة بجي طلعت العلوية شيلتها بيضة مثل گلبها بس وجهها ذبلان من كثر ما بجت على الهادي وعليَّ من شافتني وگعت منها المسبحة ركضت عليها ذبيت روحي بين رجليها حضنت ركبتها وأني أشم ريحة الهيل والعباية اللي جنت مشتاق لها بكل ذرة بجسمي

العلوية :- يا بعد حيلي أميمتي يا ريحة الهادي يمة يا رضا هيج تسوي بينا تعوفنا كل هالسننين وتعيش بالغربة وحيدك؟ ولك يمة الفگد واحد وأنت سويتهن ثنين بغيابك!

علي الرضا :- سامحيني يمة والله جان الوجع أكبر مني رحت أدور على وجهي الضاع مني ويه الهادي بس هسة رجعتلكم رجعت وانا شايل روح الهادي بصدري

بعدها بدوا الإخوان يتجمعون حولي واحد واحد جان مشهد يهز الجبل
علي الباقر هيبته ورزانته ما منعته من إنه يحضني بقوة لحد ما سمعت طگطگة ضلوعي گال وعيونه تجري

علي الباقر :- نورت بيتك يا دكتور السند رجع والدار اللي أظلمت وراكم اليوم ضوت بيك

اما علي الصادق جان يضحك ويبچي بنفس الوقت يباوع لوجهي ويدقق بملامحي وهتف وياي

علي الصادق :- ولك يا رضا صاير سويدي صدگ بس عيونك عيونك بعدهن يحملن حزن العراق كله الحمد لله على سلامتك يا خوي

علي الكاظم اجه حضني وبقة يبچي مثل الطفل

علي الكاظم :- روضيي جنت أروح لغرفتك أنت والهادي أگعد على فراشكم وأگول هسة يرجعون هسة يگعدون يقرون سوه لا تعوفنا بعد فدوة لعينك

المعتز بالله جان واگف على صفحة يحاول يبين قوي بس دموعه فضحته تقرب مني وباس راسي وهتف

المعتز باالله :- يا رضا أنت مو بس أخونا أنت قطعة من الهادي مشت على الأرض جيتك هاي ردت لـ المعتز عزته

گعدنا بالديوان والكل جان موجود علي السجاد جان عينه ما تنزل من وجهي كأنه يخاف أختفي مرة ثانية العلوية جابت صينية العشاء اللي تحبها بس اللكمة جانت تغص بالبلعوم من نتذكر المكان الفارغ اللي جان يكعد بيه عليه الهادي

علي السجاد :- رضا سولفلنا شلون عشت هناك؟

دنكت راسي وأخذت نفس عميق

علي الرضا :- سجاد الغربة مو بالبلد الغربة جانت بداخل روحي جنت أحس إذا فات الضوء راح يفضح فراغي جنت أشوف الهادي بكل زاوية وأخاف أطلع للناس ويشوفون نص إنسان بس هسة ومن شفتكم عرفت إن الهادي ما يريدني أصير ظل يريدني أصير ضوء مثل ما هو جان

علي الباقر :- عفية عليك أنت هسة طبيب واسمك يرفع الراس علي السجاد سولفلنا على نجاحاتك بالسويد وجنا نرفع راسنا ونگول هذا أخونا

بوسط الكعدة والكل فرحان برجعتي باوعت لوجوه إخواني واحد واحد شفت بيهم ملامح من أبوي الله يرحمه ولمسات من حنان الهادي كلت بصوت واضح

علي الرضا :- يا إخواني يا عزوتي أنا قررت ما أرجع للسويد أستقر هنا للأبد أنا راح أفتح عيادة هنا بوسط المحافظة السويد علمتني الطب بس العراق هو اللي علمني الإنسانية والوجع أريد أداوي الناس اللي تشبهنا اللي فقدوا أحبابهم وما لگولهم مداوي

العلوية هلهلت من الفرح والإخوان گاموا وباسوني واحد ورا الثاني بذيج اللحظة حسيت إن القفلين اللي سديت بيهم بابي بالسويد انفتحوا للأبد بـ مفتاح المحنة واللمة

صلينا الفجر جماعة بالبيت علي الباقر صار إمام بينا واحنا الخمسة وراه جان ناقصنا واحد بس جنه نحس بـ علي الهادي واكف بالصف ويانا كتفه بكتفنا

من خلصنا صلاة طلعت للحوش شفت النخلة وبدت خيوط الشمس تطلع مديت إيدي لجيبي طلعت صورة الهادي وبستها همستله واحجي وي الصورة

:- أرتاح يا خوي أنا وصلت والبيت اللي جان ناقص هسة كمل بيك بروحك الطيبة

انتهت قصة علي الرضا الحزينة وبدت قصة الطبيب علي الرضا اللي صار معروف بالمنطقة بـ طبيب الروح اللي يداوي جروح الناس وهو شايل بگلبه أكبر جرح بس محوله إلى ورد وياسمين

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
""" شُبـــر """

نحَن بشهر الــ 12 والي قاهرني هَوَّ أن شبير ما قبل يكمل جامعة من نجحنا من السادس ترك الدراسة وفتح محل ذهب لأن واهسة بهذا الشغل هو وأبوي ما حَب يضغط عليه ابد بس لمن انا ردت اصير وياه بالمحل ابوي ما قبل وكال اقلها واحد بيكم يكمل جامعة لهذا وكعت عليه وصرت لازم اني الي اكمل لهذا مشت وصرنا بمفترق طرق اني رحت أشعة و سونار وهَوَّ صار صاحب محل ..
وانا حالياً مرحلة ثانية لمن رحت للجامعة والجو جان برد ما نحَن بنص ديسمبر صفطت سيارتي و نزلت استقبلني صديقي صفوان ..

صفوان :- وأخيراً أجيتتت

شبر :- شنو شبيك؟

- ضلي ساعة منتضرك و حوراء و غادي أجوي

:- ما تملل أنتَ دخيل الحمزة

- عنديي امل اني ما احتاج أمل من شيء

:- صفواان

- شبر خلص حــ روح أرجع ملزمة حوراء

عافني صفوان وراح ضليت امشي وراه بس مو يمة بظهرة وجانن غادي و حوراء واكفات ويسولفن راح صفوان وكف يمهن وهتف .

صفوان :- السلام عليكم

حوراء :- وعليكم السلام والرحمة

غادي :- أهلاً وسهلاً خيرك چاي ؟

- إجيت انطي الملزمة لــ حوراء واشكرها

حوراء :- لا عادي لا شكر على واجب

غادي :- بس شلوون انطتك المحاضرة مالتها واليوم عندنا أمتحان بيه!

- هيَّ انطتة الي

حوراء :- خلص خوية تكدر تروح

- عن أذنكم

:- الله وياك

ضليت اباوع عليهم ومن اتجه الي صفوان سحبني من أيدي وهتف وياي وهو يضحك ..

- يلا شبر امشينة للكفتريا

مشيت ويا صفوان وأنا بالي مو يمه بالي يم هاي غادي وشلون تحجي بحدة عبالك الدنيا واكفة على ملزمة دخلنا للكفتريا الريحة جانت تخبط بين ريحة الهيل مالت الشاي وريحة المعجنات الحارة صفوان سحب الكرسي وكعد وهتف وياي

صفوان :- شبيك شبر؟ شو وجهك ثكل من شفت البنات لو لأن حوراء نطتني الملزمة وغادي اشتعلت عده الغيرة؟

شبر :- يا غيرة يا صفوان أنتَ هم صدك تحجي؟ البنية خايفة على دراستها وأنتَ بصراحة جاي تلعب لو ما الوالد ضاغط علية جان هسه أنا بالمحل مو كاعد هنا أنتظر محاضرة الأشعة

- دكول يا الله شبر أنتَ هسه دكتور المستقبل والذهب ملحوك عليه المحل موجود وأبوك موجود الله يحفظه بس الشهادة سند يمعود

بين ما جنا نحجي فاتوا غادي وحوراء من يم الطبلة مالتنا غادي جانت تمشي سريع ومبينة متنرفزة بس حوراء باوعتلي وابتسمت ابتسامة خفيفة كأنها تعتذر عن أسلوب صديقتها

غادي :- حوراء كتلج لا تنطين محاضراتج لأحد تاليها نركض ورا الولد حتى نلم دراستنا!

صفوان راد يرد بس لزمت أيده وكتله

شبر :- عوفها صفوان خليها تحجي الناس أجناس وأكو ناس تشوف الدراسة معركة مو علم كوم خلي نجيب كهوة الجو صار يكسر العظم وأنا أحتاج شي يصحصحني قبل لا تبدي المحاضرة

وكفت وأنا أعدل ياخة قميصي باوعت بوجوه الطلاب الكل مستعجل والكل يركض ورا حلمه وأنا بداخلي صراع بين شبر الصايغ وشبر التقني
بس يلة خل نشوف هذا اليوم وين راح يودينا لمن راح صفوان لجيب كهوة اني شفت حوراء طلعت مستعجلة وكأنها نست شيء وضلت غادي كاعدة لهذا استغليت الفرصة وعفت صفوان كاعد بالكفتريا وطلعت ورا حوراء جانت تمشي بحديقة الكلية والبرد يضرب بوجها صحت بصوت عالي

شبر :- حوراء لحظة بس

وكفت والتفتت عليه ملامحها جانت جامدة مثل جو ديسمبر

حوراء :- نعم شبر خيرك؟ صفوان ورجع الملزمة بعد اكو شي؟

تقربت منها واني ضام ايدي بجيوب القمصلة

- لا ماكو شي بس ردت اشكرج لأن انقذتي صاحبي بس بنفس الوقت ردت اكلج مو داعي هاي النبرة مالت تفضل واكدر تروح ترا احنا زملاء مو جايين نطر منج

:- زملاء شبر الزملاء هم اللي يحترمون وقت المحاضرة ويقرون مو اللي يقضون وقتهم بالمحلات وبالسيارات ويجون قبل الامتحان بيوم يدورون ملازم غيرهم انت وشلتك عبالكم كل شيء ينشري بالفلوس!

- لحظة لحظة منو جاب طاري الفلوس؟ وبعدين شنو قصدج بـ انت وشلتك؟ ترا انا لولا ابوي وضغطه جان هسه انا بمكاني الصح بين الذهب والموازين مو كاعد اسمع محاضرات مملة واشوف ناس شايفة روحها علينا بس لأن حافظة كلمتين بالملزمة

:- مملة؟ اذا الطب والاشعة عندك مملة ليش جاي ليش تضيع مكان واحد جان يتمنى يكون بمكانك شبر انت انسان مستهتر عبالك الحياة كلها ونسة وطلعات وما عندك اي مسؤولية تجاه مستقبلك

- مستقبلي؟ انا بانيه بيدي وبفلوس تعبي وتعب ابوي مو بملزمة انطيتيها لصفوان وذليتينا بيها ترا الشهادة ورقة بس الشغل هو اللي يسوي رجال وأنتِ حضرتج خليج بكتبج عسى ولعل تفيدج لما تصيرين مجرد رقم بالوظيفة

:- انت فعلاً شخص ما يتفاهم وياك عبالي بيك شوية وعي بس طلعت صدك صاحب محل وعقلك ما يطلع من حدود السوك

دارت وجها ومشت بسرعة تركتني بنص الحديقة والطلاب يباوعون علينا جان كلبي يدك سريع من العصبية مو لأن غلطت علية بس لأن كلامها نكس جرح بداخلي جرح اني فعلاً بمكان ما اشبهه بس كبريائي ما سمحلي انكسر كدامها

″″″″″″″″″″″″″″″″″″″″″″

بالوقت الجان ذو الفقار كاعد بالكفتريا اجة عليها أخوه صهيب وكعد يمة وشافة شلون صافن على الملزمة

صهيب :- شبي الحلو صافن؟

ذو الفقار :- ماكو شيء أفكر بالامتحان متوتر حيل ما درست عدل

- يعني بس هذا همك الامتحان!

:- أكو أهم من الامتحان حتى نشيل همة؟

- أي اكوو ههههه .. اشاقة اعوذ باالله من تفكيري

:- صدك والله اعوذ باالله من تفكيرك

- اي عفية اتعوذ من الشيطان حتى يروح

بهذا الوقت أجن أمنية و صديقتها وكعدن يمهم كلب وجه صهيب وهتف وي ذو الفقار

صهيب :- كتلكك اتعووذ من الشيطان

- اححح صهيل

ديفيان :- متشوف شر اشرب ماي

أمنية :- صحة صحة

ديفيان :- شنو فقار شبيك ؟

- مابية غير العافية

صهيب :- اخوي خطية شايل هم الامتحان

أمنية :- ياريت نحن نفس القسم

ذو الفقار :- أعوذ باالله

صهيب :- لا سامح الله

ديفيان :- شنو هاي ما تردونا وياكم؟

- لا بس قسمنا صعب وما يلوك عليكم أنتم لازم تدللون مو يصعب عليكم شيء انا حيل اختنكت صُهيب أبقى يم البنات

صهيب :- تمام خوة

ديفيان :- مابية شيء

أمنية :- انا رايحة أشوفه ديفيان أبقي يم صُهيب

ديفيان :- لا تتأخرين يگـــلبي

بالوقت الي جانت بيه حوراء و غادي يتمشن شافن ذو الفقار طالع ومخنوك حوراء تركت غادي وركضت إله وحطت أيدها على متنة بلوقت الجان هو مدنك وحاط ايديه على رگبتة
( الرضفة ) ويتنفس بصوت عالي

حوراء :- فقاار خير شبيك؟؟

- مااعرف متوتر مخنوك صدري يوجعني

:- أرفع راسك افتح صدرك يلاا

- ياالله

:- سوي الي أنا أسوي شوف أخذ نفس شهيق اخنگ روحك أربع ثواني يلا هسة طلع الهوى زفير اخنگ روحك أربع ثواني يلا اتنفس شهيق اوكف زفير اوكف

بعد ما حوراء ساعدته ووضعة صار تمام هتفت وياه :-

ذو الفقار :- شكراً الچ

حوراء :- شسالفة غريبة عليك انا حتى تشكرني بس اريد أعرف ليش صار وياك هيچ ؟

- مااعرف هيج فجأة اختنگت

:- زين أنتَ أخذت علاجك ؟

- حوووراء

:- تمام فقار اسفة على التدخل بس خايفة عليك بعد هاي الحالة

- شكراً الج ولرگضتج وخوفج علية شكراً لكلشي سويتي عن أذنج

:- لا تشكرني الله وياك

بعد ما راح ذو الفقار دارت حوراء وجها حتى تروح وما تحس الا شخص شاخطني من أيدها من ورا ظهرها صارت عيونها بعيون بنت حوراء ما تعرفها بس البنت هاي أمنية

حوراء :- خير خير منوو حضرتج وشلوون هيچ تاخذيني من أيدي

- انا أمنية غزال أنتِ الي منو

:- انا حوراء ستار مهدي

- منين تعرفين فقار ؟

:- أسمه ذو الفقار سيف علي مو فقار

- منين تعرفينة؟

:- نفس القسم و اقاربي

- هو صديقي

:- وشعلية انا اذا هوة صديقچ هو أقاربي ولمن شفتة بهي الحالة أنجبرت أدخل لاطمئن عليه

- ومعليچ بي بعد

راحت حوراء وعافت أمنية واكفة ورجعت لصديقتها غادي ومشت بيها وبعد ما صُهيب فر الجامعة على أخوه ذو الفقار وبعدها راح لقسمهم لگى كاعد على كرسيه ومنتضر المحاضرة تبلش راح وكعد يمة

صُهيب :- أنتَ هنا واني ادور عليك برة

ذو الفقار :- منتضر المحاضرة ماضل شيء وتبلش

:- يول مصخن شبيك المحاضرة تبدي الساعة تسعة وهسة الساعة 7:35صَ بعد ساعة ونص للمحاضرة

- ضلعي ماعرف شبيه تايه بزماني حتى الجامعة مالي خلكها

:- نطلع أمبين عليك هواي مخنوگ

- لا يمعود الامتحان الفات ضيعته مابيه هذا هم يضيع

:- توك كلتلي مدارس شيء بلة شتريد تكتب هاا شتجاوب جنت كاعد بالكفتريا واجت الشيطانة امنية مثلاً ؟

- بس لو اعرف ليش ما تحبهن؟

:- هيج الحب من الله وسبحانك ربي ما ذب حب بكلبي لهاي البنية ماارتاح الها احسها ملعبة مو راحة من سوالفها هي وصديقتها

- كاافي يمعوود صُهيب انفتحت عليه ما عرفت تسكت!؟

:- شنو شكلت انا؟

- مكلت شيء بس عرض البنت سحلته بالكاع

:- رحم الله امرئ ابعد الغيبة عن نفسة

- كوم اطلع خلي احفظ كم كلمة

:- قبل لا اطلع

- خير

:- منو البنية الوكفت وياك من طلعت من عدنا؟

- ليشش

:- أكول رجعت النا أمنية شاحطة منها ومن كلتلها منو هية كالت السمرة واخذت ديفيان وراحت

- طلعت مختنك واجتني حوراء

:- يا حوراء ؟

- كم حورراء عدنا بنت ستار مهدي

:- اها السمرة ههه صدك والله سمرة

- خلصت من أمنية انداريت هسة على حوراء

:- لااا عمي حوراء خووش ابنية تتااج على الرراس

- يلا اطلع وسد الباب وراك

:- اكول فقار صيح الها خليها تدرسك سجاجة هية

- اطلع ولك وفضني

طلع صُهيب وهو يضحك سد الباب وراه وترك ذو الفقار يصارع أفكاره ذو الفقار ذب الكتاب من إيده ما گدر يركز بكلمة وحدة صورة حوراء وهي تركض عليه وخوفها الواضح بعيونها ما غابت عن باله وبنفس الوقت كلام صُهيب عن أمنية خلاه يتنرفز

بمكان ثاني بالجامعة جانت حوراء تمشي وي غادي بس بالها مو وياها وجهها مگلوب ومبينة واصلة حدها من الموقف الصار

غادي :- حوراء صارلي ساعة أحچي وياچ وين رحتي؟ وهاي البنية منو الجانت واگفة وياچ وتناترين بيها؟

حوراء :- ما أدري غادي وحدة تگول اسمها أمنية جاية تحاسبني ليش واگفة وي ذو الفقار عبالك القسم ملك صرف لأبوها

:- أمنية هاي صديقة صُهيب وذو الفقار دايماً نشوفها وياهم بس شبيها وياچ؟

- ما أدري شبيها فوگ ما الولد جان راح يروح من إيدينا من الخنكة جاية تسألني منين تعرفيه ناس فارغة والله

بينما جانت حوراء تحچي شافت صُهيب طالع من الممر شافها وابتسم وسوى روحه يمشط بشعره تقرب منهم وهو يضحك

*صُهيب أخوه ذو الفقار و أخو غادي بس غادي اصغرهم وهي بعمرها بالجامعة اما ذو الفقار جماعتة متخرجين و صُهيب جماعتة مرحلة ثالثة

صُهيب :- ها حوراء اشوفچ اليوم صايرة إسعاف فوري بالجامعة عاشت إيدچ على الموقف وي ذو الفقار هههه

حوراء :- واجبنا صُهيب أقاربي وما گدرت أعوفه بهيچ حالة بس گلي هاي صديقتكم أمنية شبيها مخبوصة؟

صُهيب :- أمنية؟ هاي تغار من خيالها عوفيچ منها بس تدرين ذو الفقار هسة كاعد بالقاعة وحاصر روحه والامتحان مادة صعبة وهو ماداارس شي لو تروحين تراجعين له كم كلمة بلكي ينجح بفضلچ

- لا صُهيب كافي المشاكل الصارت خليني بعيدة أحسن

صُهيب :- والله ياحوراء الولد راح يرسب وأنتِ تعرفين ذو الفقار إذا قفل بعد ما يفتح الكتاب ساعديه لخاطر القرابة عاد

حوراء ترددت باوعت لغادي اللي هزت راسها بمعنى
*روحي ما بيها شي
تنهدت حوراء وقررت تروح بس بداخلها جانت خايفة من مواجهة ثانية وي أمنية أو حتى نظرات ذو الفقار اللي بدت تتغير تجاهها

رجعت حوراء للقاعة فتحت الباب على كيفها لكت ذو الفقار حاط راسه بين إيديه والكتاب مفتوح على صفحة وحدة ما گلبها

حوراء :- ذو الفقار

رفع راسه بسرعة عيونه جانت تعبانة بس أول ما شافها فز

ذو الفقار :- حوراء رجعتي؟

حوراء :- صُهيب گلي ملحگت تقرأ والامتحان ماباقي له شي عوف الضوجة هسة وطلع الملزمة خليني أشرح لك المهمات بلكي تعبر

- ما لي واهس حوراء أحس الدنيا طابگة على صدري

:- ماكو هيچ حچي أنتَ سبع يلا افتح صفحة 40 هاي الرسمة جاية مية بالمية ركز وياي وعوف الدنيا ورا ظهرك

بدت تشرح له بصوت هادئ وهو يباوع عليها أكثر مما يباوع على الكتاب جان يحس إنُّ وجودها هو العلاج الحقيقي مو بس لضيق نفسه بل لكل شي بحياته بينما جانت حوراء مندمجة بالشرح وتأشر بالقلم على النقاط المهمة وذو الفقار يحاول يركز بصوتها الهادئ اللي جان يطرد التوتر من گلبه انفتح باب القاعة بقوة

دخل السيد شبر أبن البشير قيصر و وراه صفوان ثنينهم من النوع اللي يدورون الزلة على ذو الفقار لأن محبوسين منه وكفوا بباب القاعة وشبر طلع ضحكة مستفزة وهو يباوع يمنى ويسرى

شبر :- أوووه شلون صايرة القاعة اليوم قاعة دراسة لو قاعة تعارف خاص واحنا ما ندري؟

ذو الفقار فز ملامح وجهه تغيرت وصارت حادة وحوراء لمت ملازمها بسرعة وهي تحس بدمها صار يغلي بوجناتها من الفشلة

صفوان :- والله ياشبر الظاهر السمرة عايفة محاضراتها وجاية تنطي دروس خصوصية بالمشاعر بس غريبة القاعة فارغة شعدكم وحدكم؟

ذو الفقار :- صفوان لسانك لا يطول زايد احترم نفسك واعرف وي منو كاعد تحچي

شبر :- ليش يابة شگلنا احنا؟ بس والله عيب بنت ستار مهدي اللي يضربون بيها المثل بالثگــل تاليها كاعدة وية الشباب بالقاعات الفارغة باجر شراح يگولون بالقسم لو صاير هسة الشرف ينباع بالرخيص وية أول ضيجة صدر؟

حوراء وكفت على حيلها إيدها كانت ترجف بس مو خوف جانت ترجف من الصدمة والإهانة عيونها غلغلت بالدموع بس ما نزلتها

حوراء :- أنا أشرف منكم ومن اللي خلفوكم ذو الفقار ابن عمي وتعبان وجيت أساعده أنتم عقولكم مريضة وما تشربون إلا من الماي الوسخ

صفوان :- أبن عمج؟ إي خوش حجة والله بس هاي الحركات متمشي علينا باچر الصور والكلام يوصل لكل الجامعة ونشوف ابن عمج شيسوي لج من تطلع سمعتج بالكاع

ذو الفقار ما كدر يتحمل أكثر دفع الكرسي بقوة وطلع من مكانه مثل الأسد صار وجهه بوجه صفوان ولزمه من ياخته بقوة خلت صفوان يرتفع عن الكاع

ذو الفقار :- والله يا صفوان إذا حرف واحد طلع عن حوراء أو لسانك جاب طاريها بمكان أدفنكم هنا وبالقاعة هاي حوراء تاج راسكم والي يمس شرفها يمس شرف ذو الفقار افتهمت لو لا؟

حوراء ما كدرت تتحمل تسمع أكثر لمّت غراضها وركضت لبرى القاعة وهي تبچي بقهر تركت وراها عاصفة من العرك اللي جان ممكن ينتهي بدم ذو الفقار جانت عيونه تجدح نار وإيده لافة على رگبة صفوان بقوة خلت أنفاس شبر تضيچ شبر راد يتدخل بس ذو الفقار دفعه بصدره لوره وهو يگول بصوت يرجف من العصبية

ذو الفقار :- ولا خطوة لا أكسر وجهك هسة

شبر رغم الموقف اللي هو بيه جان الكبرياء والمال معمي عينه حاول يسحب إيد ذو الفقار وهو يضحك ضحكة صفرا ضحكة واحد يحس روحه فوگ القانون وفوگ الناس

شبر :- كااافي هدة ذو الفقار لتسوي روحك عنتر بن شداد براسي ترى السالفة خلصت والبنت سمعتها صارت على كل لسان وأنت تعرفني إذا ردت أحچي أخلي القسم كله يتنوع عليها بس انا ما سويت هيج لهذا اكلك وخر عنها ذو الفقار لان أدمرك والله العظيم إذا انذكر اسم حوراء بكلمة بسبب قربك منها أخلي مستقبلك ينتهي هنا حوراء عرضي والي يمسها يمسني

ذو الفقار :- عرضك يا عرض هذا اصحى على نفسك أنت وين وهي وين؟ حوراء بنت ستار مهدي إنسانة فقيرة حالها حال المساكين لبسها حالها عيشتها كلها توحي بإنها من طبقة ثانية غير طبقتكم أنت ابن السيد البشير قيصر سياراتكم وهيبتكم وفلوسكم تروح تذب روحك على وحدة حتى تليفون مثل الناس ما عندها؟ اسمعني زين أنا دا أحذرك كــ صديق مو كــ عدو هاي البنت مو من مستواكم الفقير من يتقرب من الغني لو يطمع بفلوسه لو يلوث سمعته وأنت هسة جاي تضيع هيبتك وية وحدة سمرة وفقيرة شيبعدك عنها؟ الجامعة كلها راح تضحك عليك يگولون السيد شبر عاف بنات العز ولحگ وحدة من وره السدة!

شبر جان يباوع لــ ذو الفقار بقرف وكأنُّ ديشوف حشرة كدامه تقرب منه خطوة وحدة وصار صوته هادئ لدرجة مخيفة هذا الهدوء اللي يسبق العاصفة

شبر :- خلصت سمومك؟ اسمعني المستوى اللي تحچي عنه هو مستوى العقول وأنت عقلك جوه قندرتي حوراء اللي تگول عنها فقيرة تملك كرامة وشرف وعزة نفس أنت بفلوس أبوك وعشيرتك ما تشتري ذرة منها الفقر مو عيب العيب هو النذالة اللي بدمك

ذو الفقار :- شوف الكرامة متوكل خبز نصيحة أخيرة ابتعد عنها لأن ذوقك صاير كلش رخيص ومو من مستواك.

بهاي اللحظة شبر ما گدر يسيطر على نفسه ضربة وحدة من إيده بوكس نزلت على وجه ذو الفقار خلته يترنح ويضرب ويوگع بالكاع صفوان راد يصيح بس نظرة شبر سكتت

ذو الفقار گام وهو يمسح الدم من حلگه عيونه جانت مليانة غل وحقد باوع لــ شبر وتفل بالكاع وهو يگول

:- الايام بيناتنا شبر والسمرة مالتك راح تدفع الثمن غالي

طلعوا شبر وصفوان وتركوا ذو الفقار يغلي النفس رجع يضيق بصدره بس هالمرة مو من المرض بل من القهر على حوراء
حوراء اللي جانت تضحّي بوقتها حتى تدرسه تاليها تنهان بسببه
ركض ذو الفقار لبرى القاعة يدور عليها بالممرات جانت الجامعة بدت تزدحم بالطلاب بس عينه جانت تدور على عبايتها السودة على مشيتها اللي جانت دايمًا بيها هيبة رغم بساطتها

لگاها واگفة بزاوية بعيدة قريبة من الحديقة الخلفية جانت غادي واگفة وياها وتحاول تهديها وحوراء جانت مغطية وجها بإيدها وتبچي بصوت مكتوم أكتافها جانت تهتز من القهر

تقرب ذو الفقار بخطوات ثكيلة حاس بالذنب ياكل بگلبه

ذو الفقار :- حوراء..

حوراء أول ما سمعت صوته مسحت دموعها بسرعة وحاولت تبين قوية بس عيونها جانت حمرة ووارمة

حوراء :- ليش لحگتني ذو الفقار؟ روح روح كمل دراستك وعوفني بحالي شفت شصار؟ شفت الكلام اللي انسمع أنا بنت ستار مهدي اللي محد تجرأ يباوعلي بنظرة مو زينة تاليها هذول النذلاء يحچون بشرفي!

ذو الفقار :- حوراء والله ما أخليهم والله لأربيهم واحد واحد لا تهتمين لكلامهم هذول ناس مرضى

وگفت حوراء وهي تمسح دموعها وصوتها يرجف مو من الخوف بل من حرگة الگلب ذو الفقار جان واگف گبالها وجهه محقن وعينه بدت تورم ومكان الضربة صار أزرق ونازف منه شوية دم بصف شفته

حوراء باوعت لوجه وفزت نست قهرها وتقدمت خطوة وهتفت وياه

- ذو الفقار هذا شنو بوجهك شبر شسوى بيك ليش هيج وجهك صاير؟

ذو الفقار دار وجهه عنها ما رادها تشوفه بهيچ ضعف مسح طرف شفته بيده وكال بصوت مخنوگ

:- ماكو شي حوراء ضربة بسيطة وتعدي المهم أنتِ لا تخلين كلامهم يأثر بيج والله يا حوراء لو ينطوني عمري كله ما أسمح لواحد نذل مثل شبر يمس شعرة منج

حوراء نزلت دموعها من جديد بس هالمرة قهر على ذو الفقار

- ليش دخلت نفسك وياه بمشكلة ذو الفقار أنت تعرف شبر منو وتعرف سلطة أهله وفلوسهم ليش تخلي روحك بحلگ السبع علمودي مالي ظهر بالجامعة غير سمعتي وهسة شبر وصفوان راح يملون القسم حجي علينا

ذو الفقار تقرب منها ونبرة صوته صارت حادة وبيها خوف حقيقي

:- حوراء اسمعيني زين وافتهمي كلامي شبر مو الشخص اللي تظنينه شبر مو جاي يدور حب ولا جاي يدور زواج شبر شايف الدنيا كلها بفلوسه ويشوف بنات الناس مجرد ونسة يگضي بيها وقت هو تقرب منج لأن شافج ثگيلة وراد يكسر هذا الثــگل حوراء أنا أخاف عليج من نسمة الهوى شلون ما أخاف عليج من ذيب مثل شبر؟ الضربة اللي بوجهي فدوة الج بس المهم تبتعدين عنه هذا الشخص إذا حط وحدة براسه يدمرها وما يرف له جفن

حوراء باوعتله بحيرة جانت تحس كلام ذو الفقار صحيح بس بنفس الوقت جانت تحس بظلم جبير

- بس هو ليش هيج حاقد عليك وليش يحجي عني بهالطريقة أنا شنو سويت؟

:- حاقد عليّ لأن وكفت بوجهة لأن كتله حوراء خط أحمر حوراء شبر يريد يثبت لنفسه ولصفوان إنه يگدر يوصل لأي شي يريده بالمال والجاه وأنتِ بالنسبة إله تحدي فدوة أروح لروحج لا تنطينه مجال ولا تخلين طيبة گلبج تخدعج بكلامه لو بضحكته هذا ذيب ولابس جلد بشر

غادي اللي جانت واگفة وقريبة وتسمع تدخلت بصوت ناصي

غادي :- خوية ترى حوراء تعبت خليها تروح ترتاح والضربة اللي بوجهك لازم تروح للمستوصف يطهرونها شبر ما راح يسكت وأمنية من جهة ثانية كبت النار الوضع تأزم بالجامعة اليوم

:- أخذيها غادي أخذيها وطلعيها خلها ترتاح لا تخلين أحد يشوفها وهي بهيج حالة وأنا منا وللإمتحان الله كريم

حوراء وهي تمشي دارت وجها على ذو الفقار وكالت بكلمات مخنوكة

- ذو الفقار دير بالك على نفسك ولا تدخل بمشاكل ثانية علمودي أنا ما أسوى تضيع مستقبلك وتدخل بصراعات وية هيج ناس

:- أنتِ تسوين الدنيا وما بيها يا حوراء روحي الله وياج

بعد ما راحت حوراء ذو الفقار رجع للقاعة بداخلة نار تغلي جان يحس بضيچ صدره يرجع هالمرة التفكير بحوراء وبشبر هو اللي جان خانگه دخل للقاعة لگى صُهيب كاعد وينتظره أول ما شاف وجه ذو الفقار طفر من مكانه

صُهيب :- ولك هاي شنو ذو الفقار منو سوى بيك هيج شبر مو؟ والله اليوم أحرك الجامعة على راسهم

ذو الفقار لزمه من أيده

- اكعد صُهيب مو وقت عصبية شبر وصفوان ناوين على نية مو زينة حوراء سمعتها بخطر والولد يريد يكسرني بيها صُهيب أنا لازم أحميها حتى لو اضطر أترك الجامعة كلها

صُهيب :- تترك الجامعة أنتَ صاحي لو الضربة أثرت على عقلك؟ ذو الفقار حوراء بنت عاقلة وتعرف تصرف وشبر خل يولي هو وفلوسه الجامعة مو ملكه بس أنت لازم تثبت الامتحان مابقى له شي أقرأ ذو الفقار أقرأ واكسر عينهم بنجاحك

ذو الفقار لزم الملزمة بس الكلمات جانت تتطافر كدام عينه صورة حوراء وهي تبجي وصورة شبر وهو يضحك ضحكته المستفزة جانن يطاردنه بكل لحظة

بمكان ثاني بالجامعة جان شبر واكف وية صفوان وأمنية قريبة منهم وجهه جان يجدح نار من العصبية رغم هو اللي ضرب ذو الفقار

شبر:- شفت شفت الفقير شلون يتطاول؟ ذو الفقار عباله كاعد بيت خلفوه ويحاسبني على منو أحجي ومنو أصاحب

صفوان :- شبر السمرة هاي صدك سوت له سحر الولد بايع روحه علمودها تگول عرضه وشرفه بس طبعاً يدافع عنها ما شفت شلون جانت كاعدة وياه بالقاعة والباب مسدود هاي البنت تمسكنت لحد ما تمكنت من ذو الفقار وهسة تريد تسوي نفس اللعبة وياك شبر لا تصدگ بدموعها هاي السمرة تريد تضمن فقار باهتمامها وتريد تحرگ كلبك ناحيتها عود هي الفقيرة المسكينة

- حوراء أنا أعرف شلون أتعامل وياها وذو الفقار حسابي وياه عسير راح أخليه يعرف إنُّ التقرب من شي يخص شبر يعني الانتحار

مرت الساعات والامتحان بدأ ذو الفقار دخل القاعة جانت عينه وارمة وبالكاد يشوف بيها بس جان مصر يمتحن حوراء جانت كاعدة كدامه بس بالها جان يم ذو الفقار كلما تذكر كلامه وخوفه عليها تحس بغصة بگــلبها

بعد الامتحان طلعت حوراء بسرعة رادت بس توصل للبيت وهي تمشي بجهة الكراج طلع كبالها شبر بسيارته الضخمة وگف الطريق عليها

نزل الجامة وكال بنبرة استهزاء

شبر :- ها حوراء؟ شفتي أبن عمج شصار بحاله؟ هذا مصير كل واحد يحاول يصير بطل براسي نصيحة مني لا تخلين ذو الفقار يضيع مستقبلج ومستقبله أنتِ حلوة والسمار اللي بيج يجنن حرامات تضيعين وية واحد فگر ما عنده بس الربو وضيج النفس

- سيد شبر الفگر مو بالفلوس ألفگر بالأخلاق والتربية وذو الفقار يسواك ويسوى عشيرتك بموقفه وشجاعته وخر من طريقي لا ألم الجامعة عليك هسة

:- تلمين الجامعة؟ جربي وشوفي منو يصدگج يالله فكري بكلامي ترا العز ينتظرج بس لو تشغلين عقلج

حرك سيارته وطلع شخط وترك حوراء تغلي من القهر بهاي اللحظة اجه ذو الفقار يركض جان مخلص امتحانه وشاف شبر واگف يمها ذو الفقار وهو يلهث وصدره يصوفر

ذو الفقار :- حوراء شگالج شحجي وياج والله لو غاثج بكلمة هسة أروح أدعم سيارته بسيارتي وأنهي الموضوع

- كافي ذو الفقار كافي فدوة أروحلك لا تسوي شي الولد يريد يجرنا للمشاكل يريدنا نغلط حتى ينهينا خل نمشي من هنا خل نطلع من هالجامعة المسمومة

ذو الفقار باوع بعيونها شاف الخوف نزل راسه وتنهد

:- صار يا حوراء بس وحق هذا الله شبر إذا ما خليته يندم على كل كلمة كالها بحقج ما أسمى ذو الفقار

طلعوا ذو الفقار وحوراء من باب الجامعة الشمس جانت بدت تغيب والجو صار بيه برودة خفيفة جانوا يمشون واحد بصف الثاني بس بينهم مسافة

ذو الفقار حط أيده على صدره النفس بدأ يرجع طبيعي تدريجياً بس الجرح اللي بگلبه وبوجه جان بعده ينزف حوراء جانت تمشي وهي مدنگة تحس بالذنب لأن هي جانت السبب بكل هالدوامة بس بنفس الوقت جانت تحس بأمان غريب وهي بصف ذو الفقار

- ذو الفقار شكراً على كلشي وشكراً لأنك شفتني تاج راس بالوقت اللي غيرك شافني بيه رخيصة

ذو الفقار باوعلها بنظرة أخيرة قبل ما يوصلون لمكان الخطوط

:- حوراء، أنتِ مو بس تاج راس أنتِ النفس اللي أتنفسه بالوقت اللي الدنيا كلها تخنگني روحي الله وياج وباجر نلتقي بظروف أحسن

راحت حوراء وضل ذو الفقار واكف يباوع لاثرها وهو يعرف إنُّ المعركة وية شبر بدت هسة وإنُّ الأيام الجاية راح تكون أصعب بهواي من ضيگة الصدر اللي جانت تجيه مسح الدم اللي يبس على شفته وابتسم بوجع وهو يگول بنفسه

:- لخاطر اشوف عيون شبر تبجي راح اسوي كلشي لعيونج يا حوراء الدنيا كلها تهون عندي وقت الأشوف هذاك السيد مهزوز ومكسور حتى لو انجبرت اسلب برائتج ....

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
""""" علي الباقر """""

رجعت للمجمع وكفت سيارتي وما دخلت بيها ودخلت اتمشىٰ ولمن مريت علىٰ بيت جيرانة جانت بنتهم سُكر كاعدة بالباب وتلعب بالبزونة وأول ما وصلت الهم طفرت البزونة علية مدري هيَّ تقصدت تشمر البزون وانا عندي فوبيا من البزازين نززيت منها وصرخت وگلبي صار يدگ بالبلعوم
لزمت الحايط وأنا أحس روحي راحت ورجعت سُكر طگتها بضحكة ونست حتى البزونة گامت تصفگ بإيدها وتگول

سُكر :- عزااا عَلييي معقولة هيبة وطول وعرض وتخاف من بزونة صغنونة؟

عدلت ياخة قميصي وأنا أحاول أسترجع نفسي بعد ما نزيت

- ولج سُكر هاي شسوويتي ولله لو ما جيرانة جان حچيت غير حچي ترى انا أطفر من خيالي إذا شفت بزونة النوب تشمريها علية؟

ضحكت بـدلع وهي تلم خصلات شعرها ورجعت شالت البزونة

:- والله ما شمرتها هي طفرت من وحدها وبعدين أنت ليش تمشي وتتمخطر جان فتت بالسيارة وفضيتها

باوعتلها بنظرة عتب ممزوجة بضحكة خفيفة

- ردت أتمشى گلت أشم شوية هوى ما دريت الهوى راح يجي بصفة بزونة مفترسة يلة عيني هنيالكم على هاي الضحكة أنا رايح لا تطلعلنا وحدة ثانية وتخلصين علية اليوم

صرت أسمع ضحكتها وراي التفتت لگيتها بعد ببابهم تباوعلي وتلوح بإيدها بس هالمرة البزونة جانت بالگاع أشوه

دنكت سكر وشالت البزونة من الكاع وهي تباوع لعلي الباقر بنظرات بيها لمعة شقاوة وعلي الباقر واكف يمسح بوجهة ويحاول يرجع نفسه الطبيعي الجو جان هادىء بالمجمع بيت سكر جان بالضبط كبال بيت السيد علي الباقر والشارع اللي بيناتهم نظيف وهادىء بس هذا الهدوء جان يسبق العاصفة

بينما سكر دتفتح حلكها حتى تشاقه وياه مرة ثانية انشگ هدوء المجمع بصوت صرخة مرعبة صرخة مو طبيعية بيها وجع وخوف وضياع صرخة خلت الطيور تطير من فوك الأشجار وسكر تجمدت بمكانها والبزونة طفرت من ايدها وانهزمت لداخل الحديقة

سكر اتحركت واتقربت من علي الباقر ولزمت زندة وهي ترجف

سُكر :- عزا بعيني عَلييي شنو هذا الصوت يا ستار ياربي أحد انذبح أحد صارله شي؟

علي الباقر وجهه گلب أصفر عيونه راحت مباشرة للبيت اللي بصف بيته بيت السيد المعتز بالله ابن عمه وأخوه اللي ما جابته أمه المعتز بالله جان يعيش لوحده بهذا البيت يعاني من اضطرابات نفسية حادة و سيزوفرينيا وبفترات الهيجان جان يفقد السيطرة على نفسه تماماً

علي الباقر :- هذا عزوز هذا صوت المعتز بالله

سكر عيونها دمعت من الخوف

:- عزة ليش هيج يصرخ؟عَلليييي الصوت يگطع الگلب روحله فدوة خاف يسوي بنفسه شي

علي الباقر ما انتظر ركض باتجاه بيت المعتز باالله وسكر مشت وراه بضع خطوات وهي خايفة بس الفضول والقلق أكلوها علي الباقر وصل للباب جان مقفول من الداخل وصوت التكسير بدا يعلى صوت مواعين تتكسر كراسي تنشمر وصوت المعتز وهو يصرخ بكلمات غير مفهومة

ألمعتز باالل :- عوفوني لا تتقربون ليش جيتوا؟ اطلعوا برة!

علي الباقر صار يضرب على الباب بكل قوته

علي الباقر :- معتز افتح الباب أنا أخوك علي معتز بالله اسمعني ماكو أحد وياك أنت وحدك وأنا يمك افتح الباب يا بعد نحريي

الصرخات هدأت لحظة وصار بدالها صوت نحيب وبجي يكسر الصخر علي الباقر طلع مفتاحه الاحتياطي اللي دائماً يخليه وياه لهيج حالات طارئة لأن هاي مو أول مرة يصير وي ألمعتز باالله هيچ ايده جانت ترجف وهو يحاول يدخل المفتاح بالقفل سكر جانت واكفة وراه بمسافة مخلية ايدها على حلكها وتدعي بصوت

سُكر :- يا ربي احفظهم يا ربي سترك

انفتح الباب وريحة البيت جانت خنكة ظلام دامس والبردات مسدودة علي الباقر دخل وهو يصيح

:- معتز؟ وينك؟

لگاه كاعد بزاوية الغرفة لازم راسه بايديه ويرجف الغرفة عبارة عن حطام الصور مشكوكة والكراسي مكسرة

علي الباقر تقرب منه بهدوء كعد بالگاع بصفه مد ايده ولمس كتفه بحنان

:- أنا هنا علي الباقر وياك معتز باوعلي ماكو شي يخوف

المعتز رفع راسه عيونه جانت غارگة بالدموع وجواها سواد يوجع الگلب باوع لعلي الباقر وكأنما ديشوفه من بعيد

المعتز باالله :- علي ذولي يردون ياخذوني كول الهم يعوفوني أنا ما سويت شي

علي الباقر حضنه بقوة وبدا يقرأ بآذنه آيات قرآنية وصوته يرجف

:- ماكو أحد والله ماكو أحد هذا بس تعب أنت سبع أنت السيد المعتز بالله تذكر شكد حاربنا سوة؟

سكر جانت واكفة بباب الغرفة المنظر خلاهة تنسى شقاها وتنسى كلشي شافت جانب من علي الباقر ما جانت تعرفه جانب الأخ المكسور على أخوه والسند اللي يحاول يرمم روح محطمة

بعد فترة من الهدوء المعتز بالله بدت أنفاسه تستقر وعلي الباقر بقى حاضنة لحد ما غفى بمكانه من التعب النفسي والجسدي علي الباقر رفعة وخلى ينام بفراشة وغطاه وطلع من الغرفة وهو يمشي بخطوات كأنما شايل جبل على ظهره

طلع شاف سكر واكفة تنتظره عيونها تحجي ألف كلمة

علي الباقر :- أسف سكر روعناج بس المعتز حالته دتسوء والعلاج ما ديسوي شي

سكر تقربت منه ولأول مرة حچت بصوت هادىء

سُكر :- لا تعتذر علي المعتز أخونا كلنا بس أنت لازم تدير بالك على نفسك أنت هم بشر مو حديد

طلعوا من البيت و صاروا بالشارع بدون ما يرد عليها علي الباقر باوع لبيت سكر وباوع لبيته وحس الغربة مو بالمكان الغربة بالروح اللي دتتألم جوة

علي الباقر سد باب بيت المعتز بهدوء والتفت لسكر اللي جانت واكفة تحت ضوا الشارع الخفيف

علي الباقر :- تدرين يا سكر أحياناً أحس البزونة اللي أخاف منها أرحم بهواي من الوحوش اللي دياكلو بـ روح المعتز من جوة أنا أخاف من بزونة بس هو جاي يواجه كون كامل من الخوف وحده

سكر ما جاوبت وما عرفت شتجاوب وشلون تخفف عن علي الباقر بس اكتفت بــ هزت راسها بحزن وعلي الباقر مشى لبيته وكل خطوة جانت تثگل وكأن جدران المجمع السكني دتضيچ عليه وبقت سكر واكفة بمكانها تباوع لبيتين
واحد بي حب مكتوم وواحد بي وجع مسموع
وبينهم شارع طويل ما ينتهي

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
- أمس بالليل طيفك مر بالعيُون
وَكَعدت وَيَّاك ساعة وعاتبيتَّك
فجأة ورَاحِ طِيفك
وفزتِ الروح
كلبت الليل كَلة ومالكيتَك ..

يَـــــتــــبــع ☜☞

لهنا وصلنا لهناية المُنْعطف الثاني
رأيكم وَزاتيّ وتعليقاتكم الحلوة وتفاعلكم الي أحبة وتصميمكم ونشركم عن الرواية أهم شيء التصاميم والنشر حسب التفاعل اني حيل جاي اتعب بالكتابة وابسط شيء التصويت ماجاي تصوتون

وإن شاءالله اشوفكم بــ مُنْعطف جديد

16,786 كلمة

اللهم صلّ علىٰ محمد وآل محمد

- اسْتَكْثِرُوا مِنَ الْبَاقِيَاتِ الصَّالِحَاتِ : التَّسْبِيحُ وَالتَّحْمِيدُ وَالتَّهْلِيلُ وَالتَّكْبِيرُ وَلَا حَوْلَ وَلَا قُوَّةَ إِلَّا بِاللهِ

- ﴿وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ أَمَلًا ﴾
- سُبْحَانَ اللهِ
- وَالْحَمْدُ لِلهِ
- وَلَا إِلَهَ إِلَّا اللهُ
- وَاللهُ أَكْبَرُ
- وَلَا حَوْلَ وَلَا قُوَّةَ إِلَّا بِاللهِ

قناتي نسولف كلشي بيهَ

وهذا حسابي الانستكرام