احفاد السيد : الثار ( بأجزائها الإثنين ) الفصل السادس وسبعون 76 - بقلم ​رُقَيَّةُ الْأَكْبَرُ

﴿ وَالْبَاقِيَاتُ الصَّالِحَاتُ ﴾
- سُبحــانَ الله
- الحمــــدُ لله
- لا إلهَ إلا الله
- اللهُ أكبـــر
- لا حَول ولا قوة إلا بالله
- سُبحــان الله العَظيــم
- سُبحــان الله وبِحَمـده
- أستَغفِــر الله وأتوبُ إليه
- اللهُمَّ صلِ علّى مُحمد وآل مُحمد

مُتابعة لحســابي حتــى ندخل رقم جديد

التعب علينا والتفاعل عليكم التصويت والتعليق أبين الفقرات كلش مهمة هو الدعم للقصة وهو الينسي الكاتب التعب التصويت كلش ما عاجبني مو حلو ...

والمصممات لا تقصرن هم الرواية تستاهل 🎀🌸

الما تصوت للبارت وتعلق على الفقرات كون تطلع حباية بخشمها( الا هيچ ياالله تجن وياي )

- دومًا ما أخاف من أن يشكل اهتمامي ثقلًا.
كأن يُرى كثرة سؤالي فضولًا لا حبًا، وكثرة مكالماتي فراغًا لا تفضيلًا، وكثرة كلامي ثرثرة لا راحةً واستثناءًا. لطالما كانت ترعبني فكرة أن أهتم بشخص؛ لا يرى اهتمامي إلا عبئًا ثقيلًا لا يقوى على حمله •

﷽
اللهم صلّ علىٰ محمد وآل محمد
~~~~~~~~~~~~~~~~
٭٭ حَوراء ٭٭

بس الخوف جان يدفعني دفع صعدت الدرج وأنا ألهث أحس گلبي راح يطلع ودموعي أخيراً نزلت تحرگ خدودي
دخلت لغرفتي وقفلت الباب وراي بكل قوتي ذبيت روحي ورا الباب أسمع دگات گلبي مثل الطبل براسي ما مرت ثواني ولحگني سمعت خطواته على الدرج وهو يركض

ضرب الباب بجتفه بكل قوته الباب الخشب جان يهتز وأنا لازمة القفل بإيدية الترچف أبجي وأتوسل بصوت مخنوگ

حوراء :- حگم عوفني الله يخليك لا تسوي هيج أنا عرضك أنا أمانة برگبتكم يمةةة بويةةة وينكم شوفوا شيسوون بحوراء

حگم :- افتحي الباب ولج عبالج تنهزمين مني؟ البيت بيتي وأنتِ ملكي أبوج مات وراح محد يخلصج مني اليوم افتحي لا أكسره على راسج

ضرباته صارت أقوى وصوت القفل بدأ يطگطگ جان يضرب الباب برجليه وبأيديه مستغل غياب أبوه ومستغل ضعفي وكسرة جناحي أنا جنت گاعدة بالگاع ضامة رجلي لصدري وأباوع للباب اللي كاعد ينخلع كدام عيني

فجأة ويه وحدة من ضرباته القوية القفل طگ والباب انفتح وشفت عيونة الحمرة تباوع لي بحقد وشهوة غريبة

حوراء :- يااااا ربييييي انقذنيييي يابةةةة وينكككك؟

كمت من مكاني وسديت الباب بوجه وصار يدفع بيه وأنا جنت أدفع بالباب بكل جسمي بس هو جان أقوى أقوى بهواية وبذيج اللحظة اللي فقدت بيها الأمل وأنا أشوف الباب يندفع وحگم راح يكدر يفوت للغرفة هنا فقدت الأمل

بس فجأة وگف كل شي

دفعني طيحني على الكاع ودخل رگع الباب لزمت ثوبي وصرت اسحب بروحي وانا اهز براسي بــ لاا لااا لا تتگرب مني بس ماجان يحسّ ولا شيء فجأة صوت سيارة برا بباب البيت سمعت صوت هورن عالي وراه صوت صياح زلمة

حگم جمد بمكانه سحب إيده من شعري والتفت لورا بــ خوف و رعب وأنا رغم الرعب رفعت راسي وأسمع صوت أعرفه كلش زين صوت جان بالنسبة إلي حبل نجاة بنص الغرگ

جان الصوت يقرب أكثر وأكثر وكان صاحب الصوت يصعد ولمن وكف بباب الغرفة مالتي صاح بيه

- ولك حگگگگم والله إذا مسيت شعرة منها اليوم أهجم البيت على روسكم!

جان هذا صوت ذو الفقار بس هالمرة ما جان صوته الهادئ الي متعودة علية بــ الجامعة جان صوت جهوري يخووف حيل غمضت عيوني وحسيت بروحي تنسحب مني الوجع والخوف والدموع خلوني أفقد التوازن دخل ذو الفقار و أبوه سيف علي ودفعوا حگم ودخلت غادي وراهم تركض واجتني حضنتي

غادي :- يابعد روحيي يابعد عمري مشتاقتلج هاي شنو صايرلج؟

حجيت وياها واني اشهك بالبجي وامسح عيوني وباوع لــ عمي سيف علي وهتفت بصوت مخنوك

حوراء :- استضعفووني استضعفووني هووواي بس ماتوا اهلي استضعفووني

غادي :- محد يگربلج ونحن كلنا وياچ اني أجيتچ والحسين محد يدنالج بس عزرائيل يابعد عمرييي

أخذت غادي وضمتني لــ صدرها وهية تسمح على راسي ولمن رفعت راسي من صدرها شفت سيف علي راح باتجاه حگم وكف كدامه وضربة راجدي خلاني اغمض عيوني من صوتة وقوتة سطرة سطرة الحمزة وصار يصيح علية ويرزلة على سوايتة السودة وياي وأنا بنت عمة ولازم اصير عرضة وشعر شواربة

سيف علي :- ولك عار ولك هاي عرضك هاي أمانة عمك المات بدل ما تصيرلها سند صاير عليها ذيب؟ والله وتالله لو ما خوفي من الله لجان هسه دفنتك بمكانك وما يرفلي جفن

حگم راد يحجي راد يرفع عينه بس ذو الفقار هجم عليه مثل السبع عيونه جانت كلها بلون دم وشرايين رگبته بارزة راد يملخه بيديه وصاح بيه

ذو الفقار :- ولك نذل شلون تجرأت؟ شلون مدت إيدك الوصخة عليها اليوم أطلع حليب أمك من خشمك

ذو الفقار جان يريد ينهي حگم بس عمي سيف علي لزمه بكل قوته حصر ذو الفقار بظهره وهو يصيح

سيف علي :- على كيفك يابة لا توسخ إيدك بهذا الساقط هذا حسابه يمي مو إنتَ التكتله وتدخل سجن بسببه اترك الجيفة لصحابها

أنا جنت بحضن غادي أرجف جسمي كله يختض ودموعي ما بطلت تنزل أحس روحي مكسورة كسر ما ينجبر غادي جانت تشد عليه تبوس براسي وتمسح دموعي وهي تهمس

غادي :- اششش يا بعد طوايفي راح الخوف والله لو يمد إيده مرة ثانية أگصها وأعلكها على باب الحوش كافي يا روحي إحنا هنا

عمي سيف علي دار وجهه على حگم وتفل بوجه وصاح بيه

سيف علي :- انزل گدامي انزل لا بارك الله بيك ولا بلي خلفك والله يا محمد لو أدري هيج ربيت لجان تبريت منك من زمان انزل ولككك

طلع كدامهم ونزلوا هم الزلم وشالتني غادي ونزلت وياها صرت امشي وانزل على الدرج حگم يمشي گدامنا مثل الچلب المذلول وذو الفقار عينه ما فارگت گفاه عبالك ينتظر غلطة حتى يهجم وغادي لازمة إيدي بكل قوتها ترفعني كلما أحس رجلي تخوني جنت افكر شنو الي جابهم وشلون اجوني بهذا الوقت؟ الله دزهم الي مادري بعد ماجان بيه الحيل افكر
وصلنا للصالة وهنا جانت الصدمة الأكبر

شفت عمي محمد أبو حگم گاعد وحاط رجل على رجل وبيده استكان الجاي مادري شوكتت رجع ولا كأنما ابنه جان يريد يهجم على عرض أخوه فوگ من شافنا ما گام ولا فز بس باوع ببرود يذبح عمي سيف علي وگف بنص الصالة وصاح بيه بصوت عالي

سيف علي :- ها محمد؟ شفت ترباتك شسوت شفت ابنك شجان يسوي باليتيمة فوگ؟

عمي محمد حط الاستكان على الطبلة على كيفة ومروق هم ولاعبالك ورفع عينه لعمي سيف علي وگال ببرود يگطع الروح

محمد :- والله يا سيف علي لا تسويها سالفة عريضة البنية چبيرة وحگم شاب والبيت ضيك أكيد تزين له نفسة واناا واحد مالي خلگ وجع راس ومسؤولية بنات و إنتَ تدري ليش اتصلت بيك وجبتك لهنا

أنا هنا جمدت بمكاني اتصل بيه؟ يعني عمي سيف علي ما اجه هيج لوحدة جاي من إتصال من عمي محمد والصدفة سيف علي باوعلي بنظرة كلها قهر ورجع باوع لــ عمي محمد وكال

سيف علي :- ادري بيك بعت غيرتك بس ما عبالي تبيع عرضك بفلوس

عمي محمد گام ووكف باوعلي بنظرة استحقار وهتف وي عمي سيف علي

محمد :- حوراء مالها مكان هنا بعد أنا ما أتحمل مسؤولية وحدة سيف إحنا اتفقنا تأخذها وتزوجها لابنك ذو الفقار لو إبنك صُهيب او انطيها لابن صديقي واريدك تدفع المهر اللي حجينا بيه وتخلصني من هل الهم البيت يحتاج ترميم وحگم يريد يتزوج وحوراء عبء ما أريده

كلمة عبء نزلت على راسي مثل الرعد عمي؟ لحمي ودمي؟ يبيعني؟ يساوم على مستقبلي علمود ترميم بيت؟ صحت بصوت مخنوگ والشهگة ذبحتني

حَوراء :- يابةةةة شفت يا بوية؟ عمي يبيعني؟ عمي اللي وصيته عليا يگول عني عبء؟ الله لا يوفقكم الله يحرك گلبكم مثل ما حرگتوا گلبي

ذو الفقار من سمع كلام عمي محمد تخبل راد يروح عليه بس أبوه لزمه وصاح

سيف علي :- اسكت ذو الفقار

سيف علي تقرب من عمي محمد وهتف وياه

سيف علي :- هذا السعر اللي ردته انطي الك وزيادة عليه ثمن الغيرة اللي بعتها حوراء من اليوم ما تمس لاسمك بصلة حوراء صارت بنتي وچنتي وحرمة ذو الفقار بـ وصاية الله و النبي محمد

عمي محمد عيونه لمعت بالفرح من سمع بسالفة الفلوس حگم جان واگف بزاوية يباوعلي بحقد عبالك خسر لعبة جان يريد يلعب بيها ذو الفقار تقرب مني جان وجهه مكلوب بس عيونه من باوعتلي صار بيها حنان غريب همس بصوت مسموع

ذو الفقار :- حوراء وحق من سوه هالحق ما تمسين ضيم طول ما أنا أتنفس المهر اللي دفعه أبوي مو ثمنج إنتِ ما تتقدرين بثمن هذا ثمن خلاصج من هالزبالة

غادي :- سودة بوجوهكم كون الحسين يسطركم سطر هاي اليتيمة هيج تسوون بيها

عمي سيف علي لزم إيدي جانت إيده دافية وبيهه حنية الأبوة اللي افتقدتها كال إلي

سيف علي :- بوية حوراء امسحي دموعج إحنا أهلج واليوم بالذات انولدتي من جديد ذو الفقار زلمة وخيال وما يرضى عليج الهضم

حَوراء :- ياخطبة هاي وأربعينة اهلي بعدهم يا أربعين السابع بعدة شنوو زواج شنو تبيعني عمي؟؟

محمد :- ما مجبور أشيل همچ أنتِ مسوؤلية بركبتي وانا طلبت منهم مهر وهما مارفضوا وبعد شوي راح يجي الشيخ يعقد الچ ولهذا وترحين وياهم ما تضلين الليلة هنا

:- بعتني ... ياعمي ياااخوو ابوي يااحزام ظهري ذبيتني هيچ علمود شنو بس كم فلس؟؟

- اليوم لو باچر أنتِ خدامة لبيت رچلج ازوجي وخليني احل مشاكلي بالفلوس لا تصيرين صدك خدامة عندي وعند حگم

:- بس اريد أعرف منك شنو راح تجاوب على ابوي من يسالك علية؟ لا تنسى ابوي راح وهو مامن ومطمئن لأن يعرف عندة أخوه وهو الوالد الثاني لبنتة

- أبوچ راح وارتاح منچ وذباج على كلبي باوعي ولج توافقين وتتزوجين لا عيشتج هنا تصير سودة وفوك الراح أسوي بيچ انا شايفة هذا الذيب الهايچ اخلي ينهش بچسمج ومايكول كاافي ليل نهار

وگف الزمن بية عند ذيچ الكلمة التفتت لعمي محمد ردت أدور بوجها ملامح أبوي ردت أشوف ذرة من شيبة أبوي الغالية بوجه بس ما شفت غير سواد وحقد وعيون تلمع بطمع الفلوس چان يحچي وهو يهز بإيده وكأنما گاعد يبيع قطعة أثاث مو عرضة وبنت أخوه اللي ما صار لروحه أربعين يوم تحت التراب صحت بوجها والصوت طلع مني مكسور

حَوراء :- ولك عمي يا بوية الثاني هيچ؟ هيچي هانت عليك حوراء؟ ولك أنا اللي چنت أركض وأجيبلك الماي من تگعد يم أبوي أنا اللي چنت أگول عمي وأحس بظهري سند شلون گلبك طاوعك تگول لحگم ينهش بية؟ ولك حگم أخوي حگم من لحمي ودمي

حگم من سمع كلام أبوه رفع راسه وباوعلي بنظرة نصر ابتسامة خبيثة انرسمت على وجهه وهو يباوع لــ ذو الفقار ولعمي سيف علي وكأنما يگوللهم

: حتى لو أخذتوها أنا كسرت نفسها

ذو الفقار ما تحمل أحس بي صار بركان راد يطفر عليه بس سيف علي لزم زندة بقوة وگاله بصوت ناصي

سيف علي :- الزم نفسك يابة العار ما يتلاوة وياه العار ينشمر له فلوس وينداس بالنعال خل نخلص البنية

عمي سيف علي طلع لبرة ودقائق رجع ودخل وبأيد ترجف من القهر والاشمئزاز طلع فلوس جابهن من السيارة شمرها على الطبلة كدام عمي محمد و عمي محمد مد إيده بسرعة لمهن وهو يضحك ضحكة مكتومة وبدأ يحسب بيهن كدامنا ولا استحه من شيبته ولا من دموعي ولا من سيف علي

بذيج اللحظة حسيت روحي فعلاً انباعيت صرت بضاعة اشتراها الغريب وباعها القريب غطيت وجهي بإيدية الثنين وگعدت بمكاني بالگاع أشهگ وأصيح

حَوراء :- يااا بويةةة تعال شوف أخوك شسوي بية تعال شوف حزام ظهرك شلون انگطع وصار سچينة بگلبي يمةةة وينچ؟ يمة البيت انباگ وأنا انبعت وياااه

غادي لزمتني شالتني من الگاع وهي تبچي وياي تمسح على ظهري وتگول

غادي :- كومي حوراء كومي يا بعد أختچ هذا البيت صار نجس هذا البيت ما بي ريحة أهلچ ريحة الطمع والذلة تكتل هنا أمشي ويانا والله ذو الفقار يحطچ بعيونه والله أبوي سيف يخليچ أميرة لا تبچين على واحد باع دينه وعرضه بجم فلس

التفتت لعمي محمد وهو يلم الفلوس وگتله بصوت يرجف

حَوراء :- الفلوس اللي أخذتها يا عمي هاي مو مهر هاي نار راح تاكل بيك وبأبنك هاي حوبتي وحوبة أبوي المأمن بيك والله ما أحللك ولا أوهبلك ليوم الدين كل فلس أخذته هو گطعة من چفني ومن شرفي اللي ردت تبيعه

محمد :- الشيخ بالطريق يجي يعقدلكم وتوكلوا ما أريد أشوف خيالچ بالبيت ورا الساعة بالعشرة

سيف علي :- أمشي يبوي أمشي حوراء لا تردين عليه هذا مو عمچ هذا غريب واليوم مات بالنسبة ألچ

طلعت لبرة كعدت هناك والليل چان أسود نفس سواد كلب عمي الهوا چان بارد ذو الفقار چان واگف يم الباب عيونه تجدح نار يباوع للحايط وما يباوعلي أدري بي مستحي من الموقف مستحي شلون يخطب وحدة بظرف مثل هذا وبطريقة تشبه البيع والشراء

إجا الشيخ دخلت للغرفة وهم كعدوا بالاستقبال البراني عمي محمد چان هو الوكيل وكأنه صدگ ولي أمر الشيخ بدأ يقرأ بالآيات وأنا چنت أسمع وما أسمع الكلمات چانت تمر على أذني وما تمر وسمعت الشيخ من ورة الباب كال

:- هل تقبلين يا حوراء؟..

سكتت غصيت بعبرتي شلون أقبل وأنا گلبي ممرود؟ شلون أقبل وأبوي ما كمل أربعينه؟ غادي همست بأذني

غادي :- گولي نعم حوراء وافقي حتى تخلصين من ذول الوحوش ذو الفقار هو نجاة الچ وافقي يا روحي

غمضت عيوني وكلت بكلبي روحي حَوراء هذا ذو الفقار سبع ويصونچ نزلت دمعة حارة وگلت بصوت يادوب ينسمع

- نعم.. وأنتَ وكيلي يا شيخنا

انتهى العقد وباركوا للكل بس الفرحة چانت ميتة ذو الفقار گام وگف كدام عمي محمد وگاله بحدة

ذو الفقار :- حوراء صارت بـ ذمتي وصارت عرضي وحق الإمام علي إذا لمحت خيالك أو خيال ابنك الساقط قريب منها أو سمعتكم جايبين طاريها بحچاية ناقصة لأمحو أثركم من الدنيا الفلوس اللي أخذتها أعتبرها ثمن تذكرة لجهنم

صعدت لغرفتي ساعدتني حَوراء ألم ملابسي و غيرت هدومي الي لابستهن ونزلنا انا وياها وطلعنا من البيت التفتت لآخر مرة شفت غرفتي شفت الشباك اللي چنت أباوع منه وأحلم بمستقبلي شفت ذكريات طفولتي وهي تتهدم كدام عيني

صعدت بالسيارة ورا وغادي صعدت بصفي تلمني بحضنها ذو الفقار صعد يسوق وعمي سيف علي بالصدر

السيارة مشت وأنا أحس روحي جاي تنسحب من مكاني البيوت بدأت تختفي وصوت عمي محمد بعده يطن بذني

ذو الفقار باوع بالمراية شافني وأنا أشاهگ گال بصوت هادئ

ذو الفقار :- حوراء امسحي دموعچ والله العظيم من هاي اللحظة إنتِ مو تعب على أحد إنتِ تاج راسي وإنتِ الحرمة اللي راح أصونها بروحي المهر اللي اندفع هذا بس حتى نسد حلگ الچلب وإلا إنتِ مهرچ الدنيا وما بيها لا تعتبرين هاي أنتِ انباعيتي ابد لا تفكرين هيج

عمي سيف علي التفت عليّ وگال

سيف علي :- بوية إنتِ بنتي ومن باچر معاملتچ معاملة غادي وصُهيب وذو الفقار إذا يوم غثچ بكلمة أنا اللي أوگف بوجه ارتاحي يبوي اليوم نامي وأنتِ مأمنة ماكو حگم وماكو خوف وراح اسويلج عرس تحجي بيه الديرة

وصلنا لبيت عمي سيف علي بيت چبير وبيه ريحة حلوة
نزلت وأنا أحس رجليّ ما تشيلني دخلت للصالة وغادي ركضت جابت لي مي ذو الفقار بقى برا يحچي وية أبوه بصوت عالي، جانوا متوترين من اللي صار

غادي :- تعالي حوراء غرفتي جاهزة تنامين يمي اليوم باچر نسولف باچر نخطط باچر ننسى كل السواد الشفتي

دخلت للغرفة ذبيت روحي على الفراش چنت تعبانة تعب مو بس بالجسم تعب بالروح غمضت عيوني وانا أحس معقولة صدك هذا كلة بس بيوم واحد ؟؟؟ يصير وياي كلهذا بيوم بسس غمضت عيوني ورجعت اتخيل الصار وياي

فجأة سمعت دگة خفيفة على الباب جانت دگة ذو الفقار صاح بصوت ناصي من ورا الباب

- غادي حوراء نامت؟

غادي فتحت الباب شوية وگالت له

- لا خويه بعدها گاعدة بس تعبانة

ذو الفقار مد إيده انطى لغادي علاگة بيها أدوات صيدلية ولفافات وگال

- شوفي إيديها چانت لازمة القفل بقوة شفت دم على أصابعها وهي تنزل نظفي جروحها وخليها ترتاح وگولي الها ذو الفقار يگول حقچ راح يرجع ومحد يكسر جناحچ و سيف علي موجود

غادي سدت الباب وأجت يمي شافت إيديني فعلاً كانت مجرحة من ضغط القفل والباب بدأت تضمد بيهن وأنا بس أباوع للسگف

حسيت بذيج اللحظة رغم الوجع ورغم اليتم ورغم خيانة القريب اكو خيط أمل ذو الفقار ما چان مجرد زوج انفرض عليّ بالفلوس چان حبل نجاة حقيقي بس السؤال اللي چان ينهش بگلبي
هل راح أگدر أحبه؟
هل راح أگدر أنسى إني انبعت بفلوس كدام عينه؟

نمت وأنا أحلم بأبوي فزيت والدموع تترس عيني باوعت للساعة چانت بـ 3 الصبح البيت هدوء بس صوت المطر بدأ ينزل برا كأنه السماء جاي تغسل الوجع اللي بكلوب الناس بمايها النازل

رفعت راسي للسماء ومديت ايدي انتىرست بماي المطر وهتفت وي نفسي

- يا ربي أنتَ الشفت وأنتَ الدرية أنتَ حسبي ونعم الوكيل
بـ محمد وحگم يا ربي قوي گلبي وصبرني على اللي جاي

اخذت ايدي ومسحت وجهي بالماي ودخلت لجوة رجعت صعدت لفوك استحيت لا يكعد واحد ويشوفني وياخذ علية نضرة صرت افتر بالبيت من أول يوم

دخلت للغرفة ورجعت رفعت الغطة ونمت يم غادي ولان كلبي وجسمي يوجعني جان مديت ايد غادي وحطيت راسي عليها وغمضت عيوني حتى بلكي ارجع وانام وباجر نشوف شنو اليصير بية ووين يصير مصيري

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ أم البنين ٭٭

بوقت ماجنت بالغرفة خليت حيدرة ينام وكعدت يمة اللعب بشعرة وأني أحس حيل قسيت وي ألفاروق الأعظم بس خلي هناك أحسن إله كلش هواي هناك الأجواء مطمئنة من ناحية الإيمان بالخصوص هَوَّ راح يم سيدة الصبر

ماجنت قاصدة أي أذية لــ الفاروق بس حسيت كافي جذب عليه لازم يشوف أبوه ولازم يعيش حياته الحقيقية ويشوف ناسة منو هَُمَّ جان البيت هدوء وأخذت أدعي بكلبي كون الله يفتحها بوجه ومايبقى هواي ان شاءالله أيام أو أشهر ويرجع بس خلي يأدب البشير قيصر و إخوانه شلون جذبوا عليه

بهي الاثناء سمعت طربگة انخمش كلبي وبعدها سمعت صوت البشير قيصر جوة بالصالة من بعد ما جنت اسمع بس صوت صياح المرتضى الأمير صاح البشير قيصر بعلو صوته

البشير قيصر :- وووينهاااا؟؟؟

فاطمة الزهراء :- شنهي ولك هاد على منهو؟

البشير قيصر :- عمة أنتِ خليج بعيدة بنتج وينهاااا ام البنين وين ؟

- بنتي تاج راسك فوك بغرفتها شنهي تريد منها ولك؟

:- اليوم انا چتالها ...

المرتضى الأمير :- بشير أحترم نفسك

حامد المتقين :- بشيررر كتلك أعصابك اكسر ايدك اذا مسيت أم البنين لا تنسى هية أختي

:- أختك بنتج اليوم انا جتالها وروح الحسين ما اخليها هچمت بيتي

فاطمة الزهراء :- اوكف بمجانك ولك شنهي الدنيا هيتة عندك لو حسبالك كبرت؟

جان هذا آخر شيء سمعتة غطيت حيدرة وكمت من الفراش حطيت الحجاب على راسي وانا أسمع البشير قيصر الشيطان بين عيونة مامستهدي برحمن جاي الي يصيح ويصعد الدرج و اخوي حامد المتقين و المرتضى الامير يركضون وراه

وبلا احم ولا دستور دفع الباب ودخل الي صار كدامي

انفتح الباب بضربة قوية ودخل البشير قيصر وعيونه تجدح نار وجهه مگلوب والشر يتطاير منه سحبت حجابي عدلته ولميت روحي بس ما دنكت وأنا عيوني بعيون البشير قيصر اللي وجه السلاح بوجهي وبلا أي رحمة صاح بصوت

البشير قيصر :- اليوم أذبحچ ولچ إنتِ شنو من ملة؟ شنو من گلب عندچ؟ تهجمين بيوتنا وتطشرين شملنا وتكولين للفاروق الأعظم الحقيقة المضمومة من سنين؟

وكفت كباله والرجفة بگلبي بس ما خليته يسيطر عليه
حامد المتقين والمرتضى الأمير وصلوا يلهثون حامد المتقين شمر روحه كدام السلاح وحاول يحضن البشير قيصر حتى يبعده عني وصاح بي

حامد المتقين :- بشير استهدي بالرحمن السلاح هذا موش لعب ولا تنسى هاي أختي وعرضي تنزل سلاحك لو والله واحد يذبح الثاني اليوم أختي ما تنمس منها شعرة لو تحرك البيت موش بس تهجمة

المرتضى الأمير :- بشير مو هيج المرجلة خلي اختي تحجي والحك ينسمع نزل السلاح لا تروح بيها

أنا دفعني القهر صحت بيهم والدمعة بطرف عيني بس صوتي ما اهتز

أم البنين :- عوفوه خلي يكتلني إذا الكلمة الصدك جتالها السلاح فآنه ميتة من يوم الشفت الجذب بعيونكم بشير إنتَ تلومني لأني كلت للفاروق الأعظم أصلة وفصلة؟ تلومني لأن فكيت قيده من جذبكم؟ الفاروق عاش عمره بيت السادة على باله هو منهم وتاليها يطلع متبنى وإنتوا ضامين عليه حتى يظل تحت إيدكم؟

البشير قيصر دفع حامد بقوة وتقدم خطوة لولا المرتضى الأمير لزم السلاح من فوهته وحرف اتجاهه للگاع صاح البشير قيصر وهو يرجف من العصبية

البشير قيصر :- ولچ إحنا ربيناه إحنا سويناه زلمة الفاروق الأعظم أخونا بالدم وبالروح شنهي الفايدة من نبش المكابر؟ هسه هو وين؟ شمع الخيط واختفى هج من ورا لسانچ المسموم إذا صار بي شي وحق علي بن أبي طالب ما يردني عنچ لا أخ ولا عمة

ضحكت بوجع ضحكة مليانة قهر وكمت أمشي باتجاهه وهو السلاح بيده ما خفت الموت صار أهون من شوفتهم وهم يمثلون دور الضحية

أم البنين :- إي ربيته حتى يظل فاروقكم اللي يحمي ظهركم ربيته حتى يضحي علمودكم وما تحتاجون لغيرة مضحي تقراون قرآن وكاتلين روحكم بالصلاة والصوم بس نسيتوا إن الله يحب الصادقين الفاروق الأعظم راح لمكان مُقدس راح يدور على روحه الضاعت بسنين الجذب راح للمكان اللي ما يضيع دخيل بيه وهناك راح يعرف قدره الحقيقي مو قدره اللي رسمتوه إله بالوهم إنتو خفتوا يروح لأن تعرفون قيمته مو لأن تحبونه كأخ

أمي فاطمة الزهراء دخلت للغرفة وجهها أصفر بس ما مهتمة ولا خايفة وكفت بالوسط وباوعت للبشير قيصر نظرة خلتة السلاح ينزل غصب عنه

فاطمة الزهراء :- نزل سلاحك يا ولد بيت السادة ما ينهان بي نسوانه والسلاح مصوب عليهن بشير أم البنين غلطت لو كالت الصدك؟ الصدك مر وإحنا جرعنا المرارة لأن بنينا بيتنا على رمل الفاروق الأعظم مو ابنا بالنسل بس ابنا بالتربية وجذبتكم هي اللي طشرته مو حجايتها

البشير قيصر :- عمة حتى إنتِ؟ هاي خربت بيتي الفاروق الأعظم جان يصدكني بكل شي هسه صار يشوفني جذاب صار يشوفني غريب شلون راح أواجه الناس؟ شلون راح أواجه روحي؟

أم البنين :- تواجههم بالحق بشير تروح تدور عليه وتعتذر منه مو تشيل سلاحك على مرة لأن كشفت غطاكم الفاروق الأعظم إنسان مو ملك الكمم أنا ريحته من ثكل الجذب خليته يواجه قدره وهو حر مو عبد لجذبتكم

حامد المتقين أخذ السلاح من إيد البشير قيصر اللي استسلم وكعد على الكرسي وحط راسه بين إيديه يشهك بقهر المرتضى الأمير باوعلي بنظرة عتب وهمس الي

المرتضى الأمير :- سويتيها يا أم البنين بس السعر جان غالي
كلامچ جان سيف بس السيف يذبح الصوبين البيت انلجم

أم البنين :- ميهمني شيء المهم الفاروق الأعظم يرجع وهو مقتنع مو يرجع وهو مغدور أنا راح أصلي وأدعي وبسيدتي ومولاتي أم البنين الفاروق يرجع بس يرجع سيد نفسه مو سيد بالاسم اللي فرضتوه عليه

بسبب الصياح و كل الضجة الي سويناها فــ التفتت على ابني حيدرة رحت يمة و شلته وحضنته جان يرجف حيل وخانس حتى خايف يبجي من الوحش الكدامة البشير قيصر كام وهو يجر بجرار النفس باوعلي أخيرة مرة وهتف وياي

البشير قيصر :- إذا ما رجع الفاروق الأعظم يا أم البنين اعتبري وأحد أخوانچ مات واعتبري هالبيت صار عليچ حرام

طلع من الغرفة ووراه حامد المتقين يحاول يهدي بي المرتضى الأمير بقى واكف باوعلي وباوع لــ أمي وكال

المرتضى الأمير :- يمة عزيزة جوه منهارة خايفة عليچ روحيي طمني گلبها وكوليلها السالفة مرت لأن اذا أتصلت على أخوها صيوان وكالت له السالفة خلصنا من اللسان البشير قيصر بس ما نخلص من صيوان

طلع المرتضى الأمير وطلعت امي نزلت وراهم الدرج جان شفت عزيزة واكفة تبجي وتمسح بدموعها. رحت حضنتها وما حجينا شي السكوت جان أبلغ من كل كلام البيت جان صدك هوسة والكلوب محملة وعرس علي الكاظم صار على الأبواب بس الغصة أكبر من الفرح

كعدت يم أمي فاطمة الزهراء اللي جانت تسبح بسبحتها والخوف على الفاروق الأعظم مبين بــ تجاعيد وجهها بست إيدها وكلت

أم البنين :- يمااه سامحيني إذا غثيتج بس الفاروق الأعظم جان لازم يعرف الصدك يحرر صاحبه حتى لو جان الوجع ماله حدود

فاطمة الزهراء :- يا يمة الصدك ببيت السادة ثمنه غالي الله يستر من الجاي والله يرد الغايب بجاه مكسورة الضلع الله يسامحك ياخوي لو مزعل إسراء بذيچ الليلة وتحمل وجعها وزعلها عادي ولا هاي السالفة التعبانة الي ورثتها لسنين

باوعت لأمي فاطمة الزهراء وهي تفر بسبحتها ودموعها تنزل كلتلها بصوت مخنوك

ام البنين :- يمة اللي يبني بيته على جرف جذب لا يلوم السيل إذا هدمه أنا ما ردت أطشر الشمل بس ردت الفاروق الأعظم يوكف على أرض صلبة الجذبة حبلها كصير يمة ولو ضمتها السنين تاليها تطلع وتكتل أصحابها بدم بارد

دنكت راسي وبست إيد أمي مرة ثانية لمتني لصدرها ودموعها نزلت حارة على جفي كمت من يمها وأنا أحس وجع بظهري مو طبيعي جنه جبال الدنيا كلها انحطت عليه

رحت لغرفتي شفت حيدرة غافي بس فزاته ذيج مالت الخوف بعد كطعت نياط كلبي تمددت بصفه غمضت عيوني وعصرتهن حيل وكلت بگلبي

ام البنين :- يا بو فاضل أنا سموني على اسم أمك الحرة وأمك ما يوم ذبت حجاية باطل أدري الجرح غمج وأدري السيف اللي ضربت بيه جبير بس الموت بالصدك أرحم بمليون مرة من العيشة بجذبة الفاروق الأعظم مو طير بقفصهم الفاروق الأعظم حر والحر لازم يعرف ساسه ومنين هو

كمت عن الفراش ورحت يم الشباچ جان الهوى بارد يطرد خنگة الغرفة باوعت للسماء تأملت بيها ونزلت دمعتي والله انا مو هيج مو بداخلي سم والله العظيم ماردت يصير هيج بس جنت اريد مصلحة الفاروق الأعظم صرت بعيونهم خرابة بيوت؟؟ وينك علي الهادي وينك من رحت وحياتي ما صفت
يا أم البنين دخيلج ردي الغايب وبردي كلب العطشان للحق إذا جان ثمن جلمتي ضياع بيتي فـ أنا نذرت هالبيت لخدمتج بس كون الفاروق الأعظم يرجع وهو رافع راسه مو مكسور خاطر من ناس حسبهم أهله

نزلت دمعتي مسحتها بجفي ورحت فرشت سجادتي ذيج الليلة ما نمت جانت ليلة صلاة ودموع وأنا أنتظر الفجر يطك وعيوني على الباب بلكي يجي خبر يطفي النار اللي وجت ببيت السادة وما أظنها تنطفي بسهولة ليش ما متت وره ما ماتت روحي؟ ليش ضليت عايشة والمن لــ حيدرة؟ هو ما اظنه بعازتي! عندة أهلة وعمامي اذا اجتمعوا عليه ينسونه حضوري و موتي اااخ ياكلبي شنو الجاي يصير وياي اخخ

يا أم البنين دخيلج يالمنتضرة ابنچ لچن ما رد يمج أنا نخيتج بكسرة خاطري وبدمعة يتيمة الفاروق الاعظم أمانة عند سيدة الصبر وأدري الما يضيع يمها ما يضيع يم الله خليهم يزعلون خليهم يهجرون بس كون الفاروق الأعظم يرجع وهو سيد نفسه مو عبد لجذبتهم

لفيت السجادة وكمت رحت تمددت يم أبني وحضنتة حيل بقيت ابوس بشعرة لأن هو الأمان وآخر شيء خليت رأسي بـ شعرة وبقيت اتنفس وغمضت عيوني بلكي يطر النوم عليهن

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ مَـــــلاك ٭٭
المنبه جان يدك بإذني بس عيوني ما جانت تريد تفتح الغرفة والبيت هدوء مو طبيعي وهلشي جان سبب رأيسي للنوم في هناء على الرغم من ضوا الشمس كوة عابر من الشباچ اليوم مو مثل كل يوم اليوم الفرحة غييرر لأن العد التنازلي بدأ.. باقي 8 أيام بس وأودع حياطين هاي الغرفة وأودع طفولتي واصير امراءة متزوجة

كمت من الفراش، لميت شعري وسويت ذيل حصان سريع بدأت أرتب بغرفتي بهمة أريد كل زاوية تبقى نظيفة أريد ذكرياتي هنا تترتب مثل ما أريد حياتي الجاية تترتب شلت الدبدوب الجبير اللي جان هدية نجاحي وصرت ما انام إلا هو يمييي حطيته بمكانه ومسحت الميز صفنت على روحي بالمراية معقولة يا ملاك؟ كبرتي وراح تصيرين حرمة السيد علي الكاظم ؟

ابتسمت غصباً عني من ذكرت اسمه السيد علي الكاظم مو بس خطيبي أحس بي الأمان كله فرق العمر الـ 20 سنة اللي بيناتنا اللي الناس تضل تحجي بي أني أشوفه هو السور اللي راح يحميني. هو يحبني بطريقة تخليني أحس روحي ملكة مو طفلة رغم اسلوبة وتربيتة وعمره اللي عبر الــ ثلاثين بس وياي يصير أرق من النسيم

نزلت الدرج أركض، ريحة خُبز أمي وريحة الطبخ تارسة البيت لكيتها واكفة يم الطباخ تسوي غدة وبنفس الوقت تلملم غراض الريوگ علمود تغسلهم

ملاك :- صباح الخير يالعافية

:- صباح النور يا بعد أمج.

- يمة محتاجة مساعدة؟اليوم طاقتي فول كوليلي شسوي؟

:- لا يمة تسلمين كلشي مخلصته. بس روحي للبراني أبوج من الصبح كاعد وينتظرج

- خيير ان شاءالله تعرفين شنو يريد؟؟

:- لا والله يكول أريد أحجي ويه ملاك بموضوع

- اهاا تمام يمة

كلبي وكع بطني بابا يريدني؟هو نادراً ما يصيحني للبراني الصبح إلا إذا جان اكو شي مهم عدلت هدومي وأخذت نفس ومشيت باتجاه البراني

فتحت الباب على كيف شفت بابا كاعد وجهه بي هدوء يعني لا معصب ولا شيء بس عيونه بيها لمعة خوف الأم على ضناها من شافني ابتسم وأشرلي أكعد يمه

عمران :- تعالي يابة ليش واكفة بالباب تعاي اكعدي تعالي يا ملاك الروح كعدي هنا يمي

رحت بست ايدة وكعدت يمة وهتفت وياه

- ها يابة خير إن شاء الله؟أمي تكول ردتني

سكت بابا شوية فرك بايديه وبعدين سكت شوية و باوع بعيوني وكال

عمران :- ملاك بنيتي الأيام جاي تمشي ركض ماباقي إلا سبوع ويوم وتطلعين من هذا البيت لبيت رجلج السيد علي الكاظم والنعم منه رجل دين وأخلاق وعلم وأني ما انطيته إلج إلا لأني أدري بي راح يخليج بعيونه ويخاف الله بيج بس بنيتي الزواج مو بس بدلة بيضة وحفلة

أني نزلت راسي خجلانة ومستحية بس أسمع كل كلمة يكولها بتركيز ومتوترة هم وكمل كلامة بابا

عمران :- أنتِ بعدج صغيرة السيد علي وعدني راح ينتبه عليج ويباريج وهسه أريدج توعديني أنتِ التربية هي سلاحج لا تخلين مسؤولية البيت والمشاكل تنسيج تربيتج وتطلعين لسانج الزواج يريد صبر يابة الحياة مو دائماً وردية راح تواجهين أيام صعبة وأيام بيها سوء فهم هنا تبين قوانين الزواج الحقيقية وهي الصبر والحكمة والكلمة الطيبة

ملاك :- يابة والله أدري ومقدرة بس أني خايفة خايفة أقصر خايفة ما أكون كد المسؤولية

لزك بابا إيدي وعصرها بين إيديه الكبار الخشنة اللي شبعت تعب علمودنا وكال

عمران :- لا تخافين دامج تخافين الله وتعرفين قدر نفسج مراح تقصرين السيد علي يموت عليج واضح من عيونة وأني مطمئن لأن أدري بي خوش إنسان هو مو بس زوج هو راح يكون أب وأخ وصديق الج بس تذكري بيتج هو مملكتج وصيانتج لسرج ولرجلج هي أساس سعادتج وراحتج طول العمر

حسيت بغصة بكلبي من كلام بابا الهادئ والحنين ردت أبجي بس حبست دموعي بابا جان يحجي وعيونه تحجي قصة خوفه عليّ هو يدرك إن طفلته المدللة راح تروح لمكان ثاني لشخص ثاني يشاركها بتفاصيل يومها بالخصوص وانا بزر كعدتة واكثر وحدة شلعت كلبة بطفولتي ولحد الآن شالعتة وراح اشلعة بفراگيي

عمران :- يابة ملاكي علي إنسان صاحب مبدأ ومن يشوفج حريصة على بيتج وعلى اهلة راح يشيلج فوك راسه كوني له أمة وأخته و أخوه وصديقة وحبيب وزوجة وطفلة راح يكون الج عبدا لا تخلين العناد يدخل بينكم ترى المرة الذكية هي اللي تمتص غضب رجلها بابتسامة

ملاك :- ان شاءالله بابا

:- والبنت يابوية تراهيي تطلع من بيت اهلها بالابيض وتدخل بيت زوجها بالابيض وما تطلع من بيت زوجها الا بالابيض واذا شاء القدر فــ ترجع لبيت اهلها بالاسود غير هذني ماكوو

كمت وحضنت بابا حيل شميت ريحته اللي هي ريحة الأمان بالنسبة إلي وهتفت وياه

ملاك :- وعد يابة راح أرفع راسك وراح أكون مثل ما تتمنى وأكثر والسيد علي الكاظم بعيوني مثل ما أني بعيونه

عمران :- ادري بيج باباتي

:- تريد شيء ثاني بويةة؟؟

- لا بناتي

:- رايحة انا حبيبي

- حافظج الله

طلعت من البراني وكلبي يدك بسرعة رحت ركض لغرفتي طلعت الموبايل شفت رسالة واصلة من علي الكاظم كاتب بيها

:- صباح الخير يا ملاكي ماباقي هواي ونلتقي تحت سگف واحد دعواتي الج بكل خطوة

ابتسمت ودمعت عيوني صدك الحياة غريبة شلون بلحظة ننتقل من عالم الطفولة لعالم المسؤولية بس بوجود إنسان مثل السيد علي الكاظم وبدعوات بابا أحس الدنيا كلها بيدي

رجعت كعدت على جربايتي باوعت للرزنامة المعلكة بالحايط رحت الها وشخطت على يوم اليوم باقي 7 أيام يعني صارت بدأت أتحضر نفسياً مو بس للبدلة والصالون لا بدأت أتحضر أكون المرة اللي تلوك باسم السيد علي الكاظم صحيح الخوف موجود أي نعم بس الحب والثقة اللي بگلبي وبگلب علي الكاظم تخليني أمشي للگدام وما ألتفت وراي إلا بشوگ لبيت أهلي

هنا سمعت رنة تليفوني إتصال رحت وكفت يم الجرباية وشلت تليفوني لكيت علي الكاظم يتصل علية! أخذت نفس عميق وتحمحمت حتى يبين صوتي طبيعي وفتحت الخط بـ ألو عود ناعمة ومترددة وخجلانة سمعت صوته وهو يرد عليه

علي الكاظم :- يا بعد هالألو وراعيها شلونج يا ملاك روحي؟

:- هلو سيد الحمد لله إنتَ شلونك؟

- أني بخير من سمعت هالصوت الصغيروني اييي شسويتي اليوم؟رتبتي غراضج؟لو بعدج دايخة بزمانج؟

:- رتبت غرفتي وبعدين تعرفف بابا صاحني للبراني وضل يحجي وياي

- حجى وياج عمي؟ أدري بي قلبه عليج ويخاف عليج مني بلة شگالچ بنيتي؟

:- سيد بابا يحبك هواي بس يكول إني صغيرة ويوصيني بالصبر يكول الزواج مو بس حفلة الزواج مسؤولية وأني خايفة

- ملاكي الملكة اسمعيني زين يا بعد عيني أنتِ صدك صغيرة بالعمر بس بگلبي إنتِ جبيرة حيل ابوج عنده حق يخاف لا تنسين إنتِ گطعة من روحه وأني أعاهده وأعاهدج كدام الله إني ماراح أكون بس زوجج راح أكون السند اللي تنتچين عليه من تميلين وأنتِ خط أحمر ملاك أني ما أريدج تطبخين وتنظفين وبس ترى أني أريدج شريكة روحي وعقلي

:- سيد إنتَ ليش هيج تحبني؟ يعني أني بعدني طفلة بالنسبة الك وإنتَ سيد وعاقل والناس كلها تهابك وتكدر تأخذ الأكبر مني والإحسن مني بــ هواي

- هههه ملاكي الحب ما يعرف أعمار أني شفت بيج البراءة اللي فقدتها من الدنيا شفت بيج الروح اللي ترد روحي لا تكولين طفلة إنتِ أميرتي وباقي بس 192 ساعة وتصيرين بذمتي وأكدر أشوفج كل يوم وأسمع سوالفج وأشاركج كل لحظة لا تخافين من الزواج ولا تخافين من سوالفة قانوني أني وياج هي الحب والرحمة راح نكبر سوية وأعلمج وتعلميني

:- تدري سيد كلامك يريحني هواي أحس الدنيا صغرت وصار الأمان كله بصوتك

- وهذا هو المطلوب أريدج تنامين وانتِ مرتاحة راح أجي آخذج من بيت أهلج وأسوي لج عرس تسولف بي السلف كلها ... ملاك؟

:- نعم سيد؟

- أحبج يا أغلى ناسي

:- لازم أروح هسة سيد يلا

- تمام عزيزة روحي وعيوني

:- ديربالك على نفسك سيد

- تخافين عليه؟

:- شلون مااخاف عليك؟

- يابوية ههههه ليش تخافين علية؟

:- ههه شسالفة سيد غير زوجي ووو

- كملليي ووو شنوو؟؟

:- راح ارووحح

- اووفف منج اووف

:- لا تنسى

- شنو يابعد عيوني

:- بالك لنفسك

- أنتِ نفسي وانا داير بالي عليچ

:- يلا حروح سد الإتصال

- ما أسد انا تردين أنتِ سدي

سديت الخط واني حاطة الموبايل على صدري أحس بدكات كلبي تتسابق كلام بابا جان الوعي وكلام علي الكاظم جان الاحتواء اليوم فهمت إن زواجي من السيد علي الكاظم مو نهاية طفولتي بل بداية لرحلة جديدة راح أكون بيها أقوى بطلة في روايتي الخاصة وبضهري سند ما يميل

8 أيام وراح تبدأ قُصة السيد وملاكة قُصة مبنية على الاحترام الفرق بالعمر جان جسر لــ الخبرتة والحناني مو حاجز نمت على الچرباية وغمضت عيوني اتخيل اليوم الأبيض وبحياة مليانة استقرار وأني متأكدة إن خياري جان هو الأصح لأن سيد علي الكاظم مو بس خطيبي هو قدري الجميل

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ شُـــبـــر ٭٭
أول مارجعت للمحافظة قفلت على روحي الباب وحتى جامعة مارحت وبقيت بغرفتي لا حجيت وي أحد ولا نزلت لأحد وحتى لمن امي اجت تدك عليه الباب اصلا ما جاوبتها وأبوي مو مهتم الي أصلا لان راسة وتفكيرة صار بــ أخوه الفاروق الأعظم

وبعد النوم الطويل كمت من فراشي وما نسيت المنضر بالمستشفى وجنت احاول افكر باشياء أهم حتى أنسى حوراء
وما افكر بيها للن كافي ذلة بكل مرة جانت تختار ذو الفقار واني حاط روحي بالنص شكوو لهدرجة انا بلا كرامة؟ لهدرجة ماعندي إحساس كاافي البنت ماتريدني موش لزگة اهييي الله يسعدها بالختارتة وفضلتة عليه

كمت سبحت ولبست هدومي ونزلت لكيت البيت محد بيه أبوي مدري وين طالع وامي هم طالعة وماخذة جهاد الحسين وياها و شبير يمكن بالمحل لان الوقت جان صبح وهو ماعندة بس المحل يگضي يومة بيه ويشوف رزقة طلعت وصرت أفتر بسيارتي بعدها وكفت ونزلت من السيارة وكعدت على البدي مالتها صرت أشم هوى وطفرت من البدي وصرت واكف يمها أدخن وأقرأ بيني وبين روححي

شبر :- عمري شمعة وذابت بنار انتظارك
وليلي صبري يرتقب طلعة نهارك
ياحبيب الروح دليني على دارك
مثل قيس أريد اعتني والثم جدارك
شووقيي .. يتخطى قانون الزمن
شووقيي .. منذور الك يا ابن الحسن
شووقيي .. وسألني كل لحظة التمر وينك؟؟

ما احس إلا رجال حاط ايدة على متني من وراي يكمل القصيدة بصوته

:- مسجد السهلة انشدة عن بكائي
او خلي فجر الجمعة يوصفلك دعائي
رغم تقصيري ورغم شدة جفائي
اندبك يبن الحسن دايم ندائي
بسمك .. تدري شكثر صاح الكلب
بسمك .. كم وردة زارع بالدرب
بسمك .. يالمهدي خلصت العمر وينك؟

درت وجهي لكيتة رجال جبير حيل بالعمر ومن هذول الزلم الي يدفعون عربانة ويبيعون عليها ملابس واحذية لاارادي لزمت أيده وبستها بعد ما اعتذر مني

:- أعتذر منك وليدي

شبر :- اعوذ باالله حجي على بختك على شنو تعتذر مني

:- لان دخلت هيج وقريت وياك

- بلعكس صوتك احلا من صوتي غرت منك

:- والله ياوليدي قصائد باسم القديمة دواء لكل مجروح اقرأ بيهن هواي

- شلون عرفت انا مجروح؟

:- نبرة صوتك وهاي الدمعة الزلمة الي بعيونك كفيلة تحجي كلشي

- ههههه يمكن لان أنتَ حجي وشايف كلشي بدنيتك بسرعة عرفت شنو بيه بس من عيوني

:- والله يا أبني الخالقك يعرفك أكثر من نفسك اتقرب إله وراح تشوف شلون كلشي بيك يتصلح لوحدة شوف ربك شكد رحيم كلشي التريدة والما تريدة ينطيك بس بالمُقابل يريد بس نكول الحمدالله ياربي ونصلي له بس انا إحنا نطلب منه بلاوي

- زين حجي أنتَ هسة حامد الله؟

:- مليون مرة الحمدالله والشكر

- سؤال حجي يعني هسة أنتَ ليش حمدت الله هو ممنطيك شيء يعني رجال مثلك بهذا العمر والشيبة مالتك كاعد جاي تچر بهل عربانة وتبيع شنو منطيك حتى تحمدة؟؟؟

:- لااا منطيني كللشيي لك هي بس هاي دفعة العربانة على كولتك بهذا العمر والشيبة أحمد الله وأشكره عليها لأن منطيني العافية والقوة غيري مايكدر يشيل كلاص

- الله ينطيك العافية ويطول بعمرك ان شاءالله

:- دك باب الحُسين ياابني مايرد أحد مهما جانت ذنوبة دك باب الحُسين هَوّ الرحمة النزلها رب العالمين علمودنا وأول رحمة الله تتطشر بالكاع هم علمودنا ... أتوجه للــ الحسين واطلب التريدة بس بالمُقابل سويلة شيء يحبة

- شنو يحب الحُسين؟

:- الي ترك الحرب علمودها .. الله يحفظك أبني مع السلامة

- الله وياك حچي

مشه الحجي وتركني واكف بمكاني جنة مو بشر جنة رسالة سماوية نزلت بوكتها بالضبط حتى تلملم شتاتي بقيت واكف أعاين على ظهره وهو يجر عربانته ذبيت الجكارة من أيدي ودست عليها بقوة جنها هي الذلة اللي جنت حاس بيها تجاه حوراء

ركبت سيارتي بس هالمرة ما رحت لفرعنا ظليت أفتر بالشوارع والكلمات مالت الحجي ترن بأذني

دك باب الحسين.. هو الرحمة

وصلت للبيت دخلت للغرفة شمرت مفاتيحي وعيوني أجت على تربة الحسين المخلية على الميز توضيت وبكل غسلة وجه جنت أحس الماي مو بس يغسل وجهي جان يطفي نار بصدري صارلها فترة تاكل بيه

فرشت السجادة وأول ما كبرت وصحت الله أكبر حسيت الدنيا كلها صغرت حوراء صغرت ذو الفقار صغر وحتى جرحي اللي جنت أشوفه جبل صار ذرة رمل

خلصت صلاتي وبقيت كاعد لزمت السبحة وبديت أسبح بس عيوني جانت تجري رفعت أيدي لفوك وكلبي جان يحجي قبل لساني

:- يا ربي يا أرحم الراحمين أنا السيد شُبر العبد الضعيف اللي تاهت بيه السبل ربي أنتَ تدري باللي بگلبي وما يحتاج أحجي بس أنا جيتك مكسور جيتك أريد جبرك يا رب البنت اللي جنت أظنها سعادتي طلعت هي وجعيي وأنا هسة ذبيت حملي كله يم بابك

سكتت شوية غصيت بالعبرة وتذكرت كلام الحجي عن الشي اللي يحبه الحسين

:- إلهي بحق الحسين وبحق الصلاة اللي ترك الحرب علمودها ثبتني لا تخلي الدنيا أكبر همي أنا جنت أركض ورا سراب وجنت حاط روحي بمكان مو مكاني يا رب عوفني من حوراء وعوفني من ذو الفقار أريد بس شُبر يرجع مثل ما جان صافي ما بيه غل ولا بيه ذلة لبشر يارب وانطيني الي أنتَ تشوفة مناسب الي وأنتَ كاتبة من قسمتي

نزلت أيدي ومسحت وجهي بالتربة حسيت براحة غريبة جن حمل وانزاح عن صدري باوعت لروحي زين وجهي تعبان عيوني منفوخة من السهر والقهر

:- كافي يا شُبر لحد هنا وينتهي دور الضحية الحسين ضحى بكلشي علمود المبادئ وأنتَ جاي تذل روحك علمود وحدة ما شافت بيك غير احتياط؟ لا والله أنا ابن أبوي وأنا خادم الحسين والخادم ما ينذل لغير سيده

طلعت من الغرفة نزلت للمطبخ سويت شاي وبقيت أنتظر أهلي يرجعون جنت أفكر بــ أبوي وأخوه الفاروق الأعظم يوزن الأمور بعقله وأنا جنت أوزنها بس بگلبي

فتحت الموبايل لكيت رسائل وصور قديمة جانت ايدي ترجف مسحت كلشي كل صورة كل كلمة حلوة جنت أظنها صدك وكل رقم يذكرني بيها

سويت حظر لكل طريق يوصلني الها مو كرهًا بس حبًا لروحي اللي ضاعت بهالدوامة

:- الله يسعدج يا حوراء ويه اللي اختاريتيه بس من اليوم شُبر صار بغير عالم عالم ما بيه ذلة عالم أساسه الحمد لله اللي علمنياها الحجي صاحب العربانة

سمعت صوت باب البيت انفتح رجعت أمي وجهاد الحسين رحت استقبلتهم بابتسامة أمي انصدمت من شافتني طالع من المطبخ واضحك

جميلة :- يمة شُبر؟ الحمد لله شفتك هيج

:- هيج شنو؟؟

- يعني اليوم وجهك منور؟

:- يمة جنت مريض وشافاني الحسين

- أنتَ زين يمة ؟

:- اييي يروحيي وهم من باجر راجع لجامعتي وخل يولي كل ضيم فات

- الله يبشر ايامك بالخير

جهاد الحسين :- شبربر

:- عيوني يابعد شبربر تعال لحضني ولك مشتاقلك ... يمة ابوي يجي اليوم؟

- لا وين يحسرتي ابوك من راح عمك وهو لا ليلة ليل ولا نهارة نهار شوفة هسة وين كاعد ويبجي

:- شنهي ماكو خبر من عمي؟

- ابد فص ملح وذاب ومدري شحجي علية هذاك ميكول هذول تعبوا عليه ربوني كبروني داروا بالهم عليه لااا طلعنا نحن الغلط وهو الصح ودار وجه وراح استغفر الله خاف جان عايزة التمت على ابوك

:- ان شاءالله يرجع

جهاد الحسين :- شنوو عمو فوفو وين؟

- حبيبي ماكو شيء شبر أخذ أخوك واصعد العب وياه على ما اسوي الغدة على السريع

:- صار يمة

شلت جهاد الحسين على جتفي جان يضحك وضحتكه ترد الروح صعدت للغرفة لعبت وياه بالسيارات الصغيرة وهو يركض ويصيح طاط طاط وأنا عيني عليه وبالي يم أبوي
أبوي هذا الجبل اللي ما هزته ريح هسة مكسور على أخوه؟ الفاروق الأعظم مو بس أخو أبوي جان قطعة من روحه وتاليها الفاروق الأعظم اختار دربه ومشه بلا وداع

نزلت جهاد الحسين يم أمي بالمطبخ وجان البيت و طلعت للحوش كعدت على الدكة لزمت مسبحتي وظليت أفر بيها فجأة انفتح الباب دخل أبوي

جان يمشي وراسه بالكاع خطوته ثگيلة وعيونه غايرة من السهر أول ما شافني وگف بمكانه باوعلي نظرة طويلة نظرة بيها عتب وبيها حزن وبيها تساؤل

البشير قيصر :- ها شبر شو طالع من غرفتك؟ حسبالي متت وجنت أنتظر وكت الدفن

كلماته ما جرحتني مثل قبل لأن عرفت الوجع اللي بگلبه هو اللي يحجي گمت من مكاني تقربت منه لزمت أيده وبستها

شبر :- جنت مريض وحق الحسين واليوم ياالله صرت زين

- طبت؟ شبر ابني العمر يركض وإحنا نركض ورا ناس ما تلتفت إلنا أخوي ضيعني وأمك سولفتلي وكلتلي أنتَ ضيعت روحك ورا ذيج البنت

:- بوية الفاروق أخوك ودمك ومرجوعه الحضنك لو طال الزمن أما أنا فاعتبر شبر القديم مات ودفنته بيدي الصبح من باجر أنا ابنك اللي يرفع راسك لا بنت ولا غيرها تكسرني

أبوي سكت مد أيده وطبطب على چتفي بقوة

البشير قيصر :- اريدك سبع يابوي أريدك زلمة خشن الدنيا ما ترحم الناعمين

:- فوت بوية امي بالها يمك

- أخوك شبير رد لو لا؟

:- لا بعدة

- فوت وراي لا تظل هنا عود حزين وتدخن

:- لا بوية هياتني داخل وراك

كعدنا نتغدة كلنا سوة بس شبير ما رد جان بالمحل وثاني يوم الصبح كعدت وي أذان الفجر صليت ولبست قميص رتبت شعري ورشيت العطر اليوم ركبت سيارتي شغلت قصيدة
يا كعبة الرزايا لـــ باسم الكربلائي وحسيت الكلمات تملأ فراغات روحي وصلت للجامعة نزلت بكل ثقة أول ما دخلت شفتهم ذو الفقار وحوراء جانوا واكفين ولازم أيدها استغربت جانت لابسة أسود رحت انا و مشيت من يمهم مباشرة لا مو بس مشيت سلمت بصوت عالي وواضح

شبر :- صباح الخير شباب شلونكم؟ شني حوراء صالج فترة ممداومة؟

ذو الفقار :- أهلا سيد شبر حوراء جانت ممداومة لان أهلها ماتوا وهسة صارت زينة

:- البقية بحيااتچ ماجنت أعرف ان شاءالله هسة أنتِ بخير؟

حوراء :- حياتك الباقية لا الحمدالله بخير

ذو الفقار :- شنو ماتريد تبارك النا؟

:- على شنو؟

حوراء :- أنا و ذو الفقار عقدنا أمس وحالياً نحن مزوجين وزفتنا بعد ثلاث ايام

:- مو اهلج توهم ميتين؟؟ شنهي زفة آخر الزمان

ذو الفقار :- ابوها وصاني عليها لهذا راح اتزوجها

:- مبروك عليكم ان شاء الله حياة سعيدة

ضحكت بگلبي ضحكة كلها مر باوعت لذو الفقار وهو لازم إيدها بقوة جنه خايف أطير منه وحوراء؟ حوراء جانت تباوع للكاع ذيچ العيون اللي جنت أضيع بلمعتهن هسة صارن غريبات جنّي أول مرة أشوفهن

تعجبت على روحي شلون باركت الهم؟؟ وين شبر اللي جان يختنك إذا شاف خيالها؟ وين شبر اللي جان يبجي بالليل مثل الطفل لأن حوراء ما ردت على رسالته؟
ذو الفقار ابتسم ابتسامة نصر عباله كسرني ما يدري إن الكسر اللي بگلبي صار درع

ذو الفقار :- تسلم سيد يوم الألك ونفرح بيك بس لا تنسى العزيمة قائمة أنتَ من أهل الدار

:- أكيد أهل الدار ما يحتاجون عزيمة بس تدري يا ذو الفقار؟ أهل الدار كلمة جبيرة مرات الواحد يظن روحه صاحب دار وهو مجرد خطار عابر يالله من رخصتكم عندي محاضرة والبقية بحياتج مرة ثانية حوراء الله يصبرج على فقد أهلج وعلى اختيارچ

عفتهم ومشيت ما التفتت وراي لأن اللي يلتفت ورا يعثر دخلت للقاعة كعدت بآخر رحلة المكان اللي جنت أكعد بيه وأصفن على ظهر حوراء وهي كاعدة كدام هالمرة فتحت كتابي وطلعت قلمي وبديت أكتب بس ما كتبت ملاحظات المحاضرة

كتبت ... اليوم شُبر اتبرة من آخر ذرة ضعف

خلصت المحاضرة وخلصت الجامعة ركبت سيارتي وطلعت من الجامعة وأنا أحس روحي طير انفتح قفصه رحت للمحل مال شبير لكيته كاعد وبيده دفتر الحسابات وجهه مغيمم

شبر: ها خويي شو وجهك مكلوب؟ الرزق يحب الوجة البشوش

شبير :- شبر؟ أنت هنا؟

:- شني الأخبار؟ ابوي شلونة شفتة الصبح؟

- أبوي؟ أبوي ضايع يا شبر الفاروق الأعظم كسر ظهره كسر ما ينجبر بسهولة البارحة لليل هو كاعد بالحوش يحجي وي روحه تدري شنو يكول؟

:- شنهي؟

- يكول فاروق انا ربيتك بدموع العين يا فاروق وتاليها تتركني وتروح هيجي ما متفقين هيجي

:- اففف الله كريم خويي المرجوع لأصله بس تدري؟ إحنا لازم نصير سنده أبوي هسة محتاجنا أكثر من قبل عوفك من الدفاتر كوم خل نروح نتغدى وياه ونحسسه إن السبع خلف سباع مو بس الفاروق الاعظم هو ولده

- زين ما نسوي ... زمرد عينج على المحل علما يجي سعد خوش

زمرد :- لا توصي سيد

رحنا للبيت لكينا أبوي كاعد بالهول وهو صافن بالفراغ تقربت منه كعدت يم رجليه

شبر :- بوية الله بالخير

البشير قيصر :- ها شبر شوكت جيت من الجامعة؟

:- جيت يابوي وهذا شبير وياي اليوم ما نعوفك وشتريد من عدنا إحنا حاضرين بس أشر بيدك بوية

البشير قيصر:- هسة أكدر أكول عندي زلمة بالبيت

شبر :- بوية الفاروق الأعظم إذا راد يرجع يلكى بيت مفتوح بس يلكى زلم غير الزلم اللي عافهم

صعدت لغرفتي اغير هدومي حتى انزل الهم طلعت موبايلي لكيت رسالة من رقم غريب فتحتها جانت من حوراء كاتبة بيها

حوراء :- شبر سامحني أنا أدري جرحتك بس ذو الفقار جان الأمان اللي أحتاجه بوكت ضياعي

ضحكت بصوت عالي ضحكت على روححيي مسحت الرسالة.

شبر :- يا أمان يا حوراء الأمان اللي يبدي بكسر كلب إنسان حبج بصدك هذا مو أمان هذا سجن الله يهنيج بسجنچ وأنا خليني بهيامي ياالله الحمد لله الحمد لله على كل شدة كشفت لي الصديق من العدو الحمد لله على كل جرح خلاني أعرف طعم الشفاء الحمد لله اللي خلاني ابن البشير قيصر مو تابع لأحد

وهيج سديت صفحة حوراء وفتحت صفحات الحياة حياة بيها تعب وبيها شغل وبيها خدمة وبيهاا دراسة بس الأهم من هذا كله حياة بيها كرامة على شنو اذل روحي إلها وهية مو بحالي أصلا وباول فرصة راحت للتحبة وحتى اربعين اهلها ما طالعين شعلية بيها بعد كافي تفكير انا لــ شبر الصادق وماراح اصير ذليل لأحد وراح أعترف واطوي الصفحة واكول
" مُبارك عليك يا ذو الفقار فزت بكلشي فزت عليه وفزت بكلبها "
كدر ياخذ كلشي مني ... حوراء جانت كلشي بالنسبة الي وصارت حلالة وعلى ذمتة لهذا هو جردني من كلشي بقتلي بس الباقي من كرامتي خليني الملمها وامشي بيها للوقت الجاي ابوي محتاجني هسة اكثر من أي وقت

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ طيبة الزهراء ٭٭

كملت غسيل مواعين وي غديرالله امواعين العشاء وونشفت ايدي وصعدت لفوك للغرفة دخلت لكيت علي الصادق واكف على الشباچ يدخن والهوة اليكص العظم يدخل للغرفة رحت يمة سحلتة من ايدة وسديت الشباج وسحبت البردة وهتفت وياه

طيبة الزهراء :- البرد راح ياكل عظامك تعال ارتاح

علي الصادق :- طيبات تدرين الليلة جاي أحس بشعور غريب؟

:- شنو نوع الحساس هذا؟

- مادري احساس غريب حيييل بس تعرفين ليش؟؟

:- ههه ليش يا بعد بيتي؟

- أني أباوع بوجهج اريد اكلج اعذريني يا علوية أدري الساني جان سيف وطبعي جان نار وأدري ذبلت وردة شبابج بعصبيتي اللي ما إلها داعي

:- أنتَ تعرفني عمري ما شلت بگلبي عليك بس جان يوجعني إنك ما تشوفني جنت تشوف بس عصبيتك و غيرتك وتفرغه بيه وأني اللي مالي ذنب غير إني ردت أرضيك بكل الطرق

- اسمعيني الليلة أريد أحجي كل اللي بگلبي شوفي انا جنت أجي للبيت وأطلع كل تعب الدنيا بيج جنت أظن إن الرجولة بالصوت العالي وبالسيطرة بس اكتشفت إن الرجولة الحقيقية هي هاي اللحظة لحظة اعترافي إني بدونج ولا شي
أنتِ مو بس زوجتي أنتِ العلوية اللي بحوبتها الله مايوكف وياي شكد جرحتج بكلمات؟ شكد نمتي ودمعتج على خدج بسببي؟ الليلة أريدج تمسحين كل ذيج الأيام من ذاكرتج أريدج تبدين وياي صفحة بيضة مثل كلبج

:- أنتَ تدري غلاتك عندي المشاكل جانت مثل الغيمة السوداء اللي غطت شمسنا بس خلص لازم الشمس تطلع بنص الليل كلامك هذا ينسيني كل صيحة وكل زعلة

- والله لو بيدي ما أقصر من اليوم عهداً عليه ما تسمعين مني غير تدللين ويا بعد روحي أريد أعوضج عن كل لحظة خوف حستيها مني اريدج تنامين وأنتِ متطمنة إن علي الصادق هو سندج مو اللي يكسر خاطرج

:- تدري أصعب شي جان يمر عليه مو العصبية لا جان الغربة الي احس بيهت يمك وبعيونك على الرغم من أحنا بنفس البيت جنت بس جنت أحس بيناتنا حايط بس هاي الليلة أنام بيها وأني ما شايلة هم شراح يصير باجر

- باجر راح يكون أحلى يوم راح نكعد وماكو شي يكدر يخرب بيناتنا تعرفين لمن باوعت عليچ وأنتِ تصلين كلت لنفسي علي الصادق شلون تفرط بهيج جوهرة؟
أنتِ صبرتي عليه صبر أيوب وهسة أجه وكتي حتى أجازيج على هذا الصبر يا علوية أنتِ الأمان اللي جنت أدور عليه وأني ضايع بعصبيتي أنتِ طيبة الزهراء وانا السيد علي الصادق الليلة أعلن استسلامي كدام حبج وصبرج لا عاد اكو سيد علي الصادق العبوس ولا اكو صياح اكو بس أنا وأنتِ والهدوء اللي يستحقه گلبج

:- هههههه انعگد لساني والله العظيم سيد ماعرف شنو اكووول لو شنو االحجي الي لازم احجي بهذا الوقت عليي تعرف صالي شكد منتضرة هاي كلماتك؟؟ الله لا يحرمني منك ويخليك خيمة فوك راسي المهم عندي هسة إننا تصافينا والماضي مات مو صح؟؟

لزم ايدي علي الصادق واخذني لحضنة حط راسي على صدرة وايدة صارت على شعري وضغط على راسي وهتف وياي

- صح الصح الماضي مات واندفن يا بعد حيلي الليلة نبدي قصة جديدة بطلها الحب وعنوانها الحنان نامي طيباتي نامي وأني حارس أحلامج الليلة وكل ليلة وراح اعوضچ على الطفلين الي راحوا بسببي

:- ماريد احبل

- ليش يابعد حيلي؟!

:- شفت بعينك حبلت بــ منة المنان وصارت بنت علي الباقر مو بنتنا ولمن الله كتب الي وحبلت مرة ثانية طاح لان ضربتني ولمن حبلت مرة ثالثة هم طاح والسبب أنتَ يمكن الله يعرف اذا صار عندنا ولد يصير مثل منة المنان لهذا الله ماحاي ينطينا طفل!

- يعني ماتردين مني طفل بعد! ماتردين تخليني أبو أطفالچ و بيتچ أعرف غلطت والله وروح الطفلين برگبتي بس اعذريني اعذريني ماجنت بوعي والله كرهتي الطفل مني مووو ماتردين بعد تحبلين مني كرهتيني

هزيت راسي ودمعتي نزلت غصب عني وإحنا جنا واحد يكسر بالثاني تقربت منه أكثر دفنت راسي بصدره ردت أشم ريحة الأمان اللي انحرمت منها هواي

:- لااا عليي لااا انااا من گلت ماريد أحبل مو لأن أكرهت الطفل منك ولا كرهتك لا والله ياهو اللي يكره ريحة الجنة ببيته؟ بس تدري الخوف شيسوي بالبشر الخوف يخلي الواحد يبني حايط بينه وبين الفرحة حتى لا تنكسر وتجرحه
أنا من شفت منة المنان كبال عيوني وشلون صارت لغيرنا گلت يمكن حظي هيج يمكن مكتوب عليه يربيها غيري وأنا گلبي محروك ومن طاح الأول بحرگة دم والثاني بضربة إيد تدري شنو جنت أحس؟ جنت أحس الله جاي يگولي طيبة الزهراء هذا البيت بعده ما صار أمان للطفل أنتَ هسة جاي توعدني بصفحة بيضة وأنا أريد أصدگك والله أريد أصدگك من كل روحي بس علي الجرح اللي بالروح ما يطيب بكلمة اعذريني بيوم وليلة أريد أشوف بعيونك علي الصادق اللي يحبني صدگ مو بس وقت الهدوء أريده وقت العصبية هم يحبني أريد الطفل اللي يجي يجي لبيت يسمع بيه ضحكتنا مو صياحنا أريده يشوف أبوه يبوس إيد أمه مو يرفع إيده عليها علي الصادق أنا تعبت من دور الصبورة الليلة أريد أكون بس طيبة الزهراء طفلتك المدللة اللي تخاف من الهوى العالي وأنتَ لازم تدللها توعدني؟ توعدني إن الجوهرة اللي سميتني بيها ما تنخدش مرة ثانية؟ لأن إذا انخدشت المرة ما أظن راح يبقى منها شي يتصلح أنا ميتة بيك وأحبك حب العلوية لجدها بس السنين اللي راحت أخذت من عافيتي هواي تعرف جنت كل ليلة أصلي وأدعي أگول يا ربي أهدي عليي الصادق يا ربي اجعلني بعينه أجمل النسوان وأطيبهن والظاهر دعائي اليوم استجاب ماريد اي شيء بهاي الدنيا أريد هاي الكلمة الحلوة أريد هذا الحضن اللي يحسسني إني ملكة زماني والطفل؟ الله كريم إذا الله شافنا صرنا صدگ روح وحدة وجسد واحد هو الرزاق هو اللي يعوضنا بقطعة من روحنا تشبهك وتشبهني بس هالمرة تتربى بحضنا مو بحضن الغربة

سكتت شوية رفعت راسي وباوعت بعيونه جانت مدمعة علي الصادق القوي السيد المهيوب عيونه مدمعة بسببي مسحت دموعه بأصابيعي الترجف وكملت كلامي وياه

:- عللييي عاهدني كدام الله إنك تكون الغطى مالي لا تخليني أبرد مرة ثانية بمشاكلك الدنيا برة توجع بس بيتنا لازم يكون هو الدفو

- أنتِ محللتني؟

:- أنا مسامحتك مسامحتك على كل دمعة وعلى كل جرح وعلى كل لحظة غربة عشتها وياك تحت سگف واحد

- تحبيني؟

:- أحبك يا سيد گـــلبي

- شكد تحبيني؟

:- أحبك بكثر ما صبرت وبكثر ما تمنيت هاي اللحظة خلينه ننسى كلشي ونبدي من هاي الدقيقة أنا وأنتَ والهدوء اللي يستحقه گلبي وگلبك اريد أحس بالأمان عليي اريد الأمان

ضغط على راسي وباسني من كصتي وحسيت ذيج الساعة إن الدنيا كلها صارت بيدي نمت بحضنه وأنا أسمع دگات گلبه وهو جان يكلي

- أمان أمان أمان أمان يابعد حيلي أمان أمان

غمضت عيوني ولمن مشة ايدة على خدي لزمت ايدة وبستها وخليته على شفايفي ونمتت وانا كلش مرتاحةة كلشش هوواي

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ شُبـيــِـرْ ٭٭

كفيت غراض المحل وانكسر ظهري مرض عصام خلاني أحس بقيمتة لأن شغلة كلة صار عليه صح جبت له بديل بس هذا بارد .. مو نفس عصام الجان يركض اربع وعشرين ساعة ومايصيح تعبت ويشيل كلشي ويرتب ويسوي كلشي بدون ما يخليني اكلة سوي هذا وشيل هذا اما هذا البديل طلع ابو روحي

وبالوقت الي افتر بالمحل دخلت زَمُرد للمحل ونزعت القمصلة وسدت المظلة المطرية وخلتها يم الكرسي وحطت القمصلة وجنطتها وهتفت وياي وهي تعدل شعرها

زَمُرد :- صباح الخير سيد

شُبـيـِرْ :- ياهلا صباح النور والخير

:- أساعدك بالترتيب؟

- لااا بس هاچ سجلي هذني الحسابات مال آخر سبوع من الحاسبة للسجل

:- صار سيد تدلل عليه

- ممنون وعاشت أيدچ

كملت ترتيب و زَمُردة انشغلت بالنقل والحسابات وهية مركزة علمود لا تغلط لان الخطأ محسوب عليها ومااقبل هيج أخطأء بالحسابات انا صرت عيني على البضاعة وبيا مكان احطها وعين عليها ..

استغفرت ربي وطلعت تليفوني جنت مخلي خلفية التليفون مالتي صورة شبر وهو شايل جهاد الحسين بــ شهر محرم الحرام وقت المشاية

وانتبهت على الوقت و اليوم وشكد مصادف اليوم هوة يوم الأربعاء 25 ديسمبر 2024 ما باقي شيء وندخل سنة جديدة

استغليت الفرصة وانا اريد أفتح موضوع وياها بس ماريد إحساسها اني ميت على السوالف وياها يعني صرت احجي وياها وانا مامهتم عود اردفت وياها

شُبِـيـرْ :- أكول زَمُردة

زَمُرد :- كول سيد

- وين ترحين برأس السنة؟

:- قبل العيد بيومين نروح نسافر لعند خال أمي في دهوك هناك نسوي رأس السنة

- بالعادات المسيحية تحتفلون؟

:- هههههه ترى سيد عيد الكريسماس عيدنا بس أنتم الي دحجتوا نفسكم وصرتوا تحتفلون بيه وتشدون نفسكم حتى أكثر مننا

- هم صح بيها وجهة نضر

:- أنتَ وين تحتفل سيد؟

- ماكو ما أحتفل انا

:- صدك؟؟.

- وأبن البدوية

:- بس ليشش؟ يعني وين تقضي رأس السنة؟

- هاي من رجعنا لهنا انا واخويي جان عمرنا ١٦سنة صرنا كلــ سنة عمي السيد علي الباقر يجمعنا بالبيت الساعة 10 بليل ويبقى يدعي لمن ندخل السنة الجديدة

:- اووو نحن چنا هيچ نقضي السنة بالكنيسة بس من طلبنا خال أمي ورحنا عندة صرنا كلــ سنة نروح له

- لو باقين على طقوس المسيحية وتكضون السنة بالكنيسة أحسن الكم بهوااي

:- اهااا ليشش

- هيچ

:- سيد

- عيني زَمُردة

:- ولو السالفة غير موضوعنا وبعيدة عنه بس هسة وانا اباوعلك اتذكرتها

- شنو تذكرتي؟؟

:- تذكرت لازم اشكرك

- على؟؟.

:- هذا الحيوان اجه لبيتنا وطلگ أختي ومو بس طلگها انطاها الغايب وكال كلشهر رتح يدز الها مبلغ معين لان اختي باسمها نص البيت العايش بيه الحيوان وهو مايريد يبيع حصتة ولا عندة الفلوس الكافية مال حصة اختي الي هية ٢٢مليون علمود هيج راح يصير كلشهر يدز الها مبلغ لمن يكمل حصة اختي وتحول النص بأسمة

- ألف الحمدالله والشكر الله يريح كلبكم كلكم ان شاءالله وكولي الها لا تحول شيء بإسمه لمن يكمل المبلغ كلة

:- اييي حتى ابوي كال اله هيج ما تحول الحصة بأسمة لمن يخلص الفلوس كلهن وهو مثل الچلب وافق

- الحمدالله

:- بس سيد أنتَ شلون خليت هذا المستجلب هيج يتغير؟ وهم لمن اجانة جان وجهَ بيه آثار ضرب!!

- ههههه ماسويت له شيء بس كرصة أذن وطلع الرجال خوش واحد يسمع الكلام ما تعبني

:- مسوي وجهَ خريطة وتكول ما تعبني!

- ما تعبني لان ما اشتغلت عليه بيدي هسة المهمم اجاكم الحق وخلصتوا من هيچ حيوان

:- بس سيد أنا خايفة عليك

- ليش الخوف؟؟

:- مااظن هذا راح يسكت!

- زَمُردة

:- عيوني

- انا تربية جميلة وماعلمتني جميلة نسكت على الحق ولا علمتني اشوف الضلم واغض النضر عنه تتبرى مني جميلة اذا عرفت

:- انا هسة عرفت أسم أمك يعني اصيحلك أبن جميلة!

- عادي كلعمري يصيحولي أبن جميلة لأن ماعندي أبو ومن رجعت صاروا يصيحولي ابن السيد
من تالي صرت أبن البشير قيصر بعد ما عشت ١٦سنة انا أبن جميلة

:- تحچيلي قصتك!

- قصتي يراد الها قصة

:- شلون ضبطتها؟؟

- زَمُردة

:- عيوني

- الحسابات خلصيهن وأنتِ عيني

:- صار سيد تدلل عليه

- هسة أنتِ عيني خليج بشغلج والتهي بيه

اندارت زَمُرد تسجل بالحسابات وأنا كملت تجهيز كل البضاعة والتصاميم الجديدة بالجامة مال العرض على راس السنة والعيد

ولمن دخل البديل عن عصام الي هو رفيق صرت انا مثل المُعلم اليحجي وي الطالب مالتة كلــ شوية ويكلي وين أحط هاي عبالك أول مرة يداوم وياي وكلشي مايعرف

وسمعت صوت رسالة وصلتني على التليفون رحت وفتحتها لكيتها من شُبر كاتبلي

شُبر :- نذرييي تعال الية حضرت بس محاضرتين وماكدرت اكمل طلعت من الجامعة واريدك هسة تجيني لأن حيل دخت كلــش هواي الدنيا جاي تفتر بيه وكفت السيارة لا اسوي حادث تعال بسرعة نذري

ودزلي العنوان من قريت الرسالة ووصلت لكلمة ( ترى دخت حيل ) وبعدها قريت ( الدنيا جاي تفتر بيه ) حسيت الدم صعد لراسي مااعرفت شسوي أخذت السويچ وتليفوني وسحبت القمصلة وطلعت على السريع

حيل خفت عليه هذا شبر نص روحي وعيوني اذا صار له شيء اتخبل وين انطي وجهي؟

مشيت بسرعة بالسيارة ولمن وصلت لكيتة كاعد بالسيارة ومخلي راسة على الستيرن نزلت من سيارتي وركضت له فتحت الباب وحطيت ايدي عل چتفة ورجعتة على الكرسي وصرت اضربة راجديات حتى يكعد بس جان فاقد الوعي

شلت السويچ من سيارتة وقفلتها واخذت شبر عبرته الشارع وصعدته بالصدر بسيارتي ورجعت الكرسي شوية لورة ولبستة حزام الامان علمود ختف كلشي يصير تطلع طسة بالشارع لو شيء لا يرجع لكدام وينضرب لان جان فاقد الوعي ولا يدري بالدنيا يمة طشت لو رشت

صعدت انا ومشيت بيه وانا مخلي ايدي على خدة تضرب بيه علمود يكعد وصلت للمستشفى ونزلت ضليت أصيح أصيح لمن اجوني الممرضين وجابوا السدية واجوني يركضون

دخلنا نركض بيه دخل للطوارئ ودخلت الدكتورة قاست نبضات كلبة وسوت له فحص ضغط و سكر وضربتة إبرة وشكلت له كانونة وحطت له مغذي وانا جنت ارجف بشكل هستيري كل جسمي ينگث

شلت اخوي مثل السعفة بين ايديه لا حس ولا نفس عن ياقوة لازم أكون بيها تحجون؟؟ شنو الوصل اخوي لهاي الحالة؟ شنو الضعفة هلكد من عمري على عمرك ان شاءالله

الدكتورة من انتبهت عليه عود رادت تهديني اردفت وياي

:- ترى مجرد صايب المريض هبوط هسة يخلص المغذي و أن شاءالله يكعد بخير وسلامة أهدأ لا توكع أنتَ علينا

شبير :- يعني دكتورة اخوي مابية شيء لا ضغط ولا سكر ولا أي شيء خطر بس هبوووط!!

:- صدكني بس هبوط

صفنت بوجه الدكتورة الكلمة طلعت منها سهلة مجرد هبوط بس هي ما تدري بگلبي شصاير بيه
گعدت على الكرسي بصف السدية وعيوني ما فارگت وجهه لزمت إيده الباردة وحطيتها بين إيدياتي ردت أنقل له شوية من حرارة دمي وهتفت وياه وانا ابوس ايدة

:- أگعد يا بعد نذرك الدنيا بلياك ظلمة.

مرت الساعتين وكأنها سنتين الممرضين يروحون ويجون رمش بعيونة وأنا فزيت من مكاني گربت يمه وحجيت بصوت وياه

- شبر بعد روحي شبر تسمعني؟

فتح عيونه على كيف عيونه اللي جانت دايمًا تلمع هسة عويناته ذبلانة وتعبانة باوعلي بنظرة وهتف بالگوة وكالي

شبر :- أنا وين؟

عصرت إيده حيل وهتفت وياه حتى لا يتعب روحة بالكلام

شبير :- لا تحجي شي ارتاح أنتَ بالمستشفى لا تخاف أنا يمك

سكت شوية والدمعة نزلت من طرف عينه دمعة حرگت گلبي قبل لا تحرگ خده عرفت السالفة مو سالفة تعب عادي ولا سالفة هبوط لان مماكل شيء وطالع بسرعة السالفة جبيرة والوجع مو بجسمه الوجع بوسط روحه

بعد ما خلص المغذي وشوية استعاد عافيته الدكتورة قبلت لنا نطلع بس بشرط يرتاح وياكل زين ساعدته يگوم جان جسمه يرجف سنده عليه وخليت إيدي ورا ظهره صعدته بالسيارة وبقينا ساكتين طول الطريق ما ردت أضغط عليه بس السكوت ووضعة جان كفيل أنه يكتلني ويخنكني حيل هم!

وصلنا قريب على الشط وكفت السيارة ونزلت الجامة الهوا البارد مال كانون الأول ضرب وجوهنا باوعت له واردفت وياه

شبير :- شبر أنا عضيدك وأنا نذرك تدري بية ما أعبر السالفة إذا ما أعرف شبيها روحي شنو اللي وصلك لهنا؟ شنو الكسر ضلعك وخلاك تطيح هاي الطيحة؟

شبر غطى وجه بإيديه ومسح وجه واردف وياي بصوت بالكاد مسموع من كد ما جان مخنوك ومتعوب

شبر :- راحت يا نذري راحت وتزوجت بعد أيام عرسها وأنا مثل الجبان رحت ووكفت من بعيد شفتها وهية تمشي وياه شفتها وهي ايدها بأيد غيري الدنيا دارت بية ليش شبير؟ ليش اللي نحبهم يمشون ويخلونا؟

سكتت للحظة بلعت ريچي وأنا أحس بحرگة دمي على حاله لزمت چتفه ودرته عليه وهتفت وياه

- باوعلي شبر باوع بعيني أنتَ السيد شبر الصادق المرة اللي تبيع حبك وتلبس الأبيض لغيرك وهي تدري بيك ميت عليها هاي ما تستاهل دمعة وحدة من عيونك الله ستر عليك منها لأن اللي تتركك بنص الطريق ما ترهملك سند بالعمر

:- بس أحبها شبير والله جانت كل دنيتي والله جانت سمرتي بس هو اخذها هو ما يستاهلها لو يستاهلها جان والله ماااحجيت ولا نقهرت بس ما يستاهل شعرة منها

- أدري تحبها وأدري الوجع يگص روحك هسة بس الرجال ما يطيح علمود مرة باعت حبة أنتَ عندك مستقبل عندك أهل عندك أنا باجر الشمس تطلع وتعرف إنّ الله ما سد بوجهك باب إلا ليفتح لك بيبان من رحمته امسح دموعك عيب على أبن السيد ينزل دمعة للي ما تقدر قيمته وخلي تولي م يستاهلها تستاهل هي لان هي الي عافتك وختارتة خلي تتحمل

:- شبير

- شبر أنتَ اسمعني هسة ماريد أسمع حسك لاتخليني اروح وافجر الدنيا بيها وبالي أخذها اشششش لا تحجي

شفت الوجع بعيونه ما يروح بالحجي بس شغلت السيارة ودرت طريقي لمكان معين وهتف وياي

:- وين رايحين؟

- رايحين نغير جو نطلع هذا التعب اللي بصدورنا اليوم ماكو رجعة للبيت ولا اكو تفكير باللي راح اليوم أنا وأخوي وبس

أخذته لمطعم طلبنا أكل بس هو ما مد إيده بقيت أحجي ويا بصور قديمة وبمواقفنا بالصغر وعن زمردة وشلون تعبتني بالمحل وعن رفيق الغبي اللي جابوه بدال عصام بدت الضحكة تطلع من طرف حلكه غصب عنه

- تدري شبر الدنيا هاي مثل المحل

:- شلون

- يعني بضاعة تروح وبضاعة تجي المهم صاحب المحل يبقى واكف على طوله أنت هسة لازم تنفض تراب الماضي من هدومك ٢٠٢٤ جاي تخلص خل تروح بكل وجعها وبكل ناسها اللي ما وفوا وما كملوا ويانة وخلينا ٢٠٢٥ لازم ندخلها واحنا أقوى

:- ان شاءالله

بدت الدنيا تمطر خفيف ريحة التراب والمطر يابويةةة احلااا اجواء اموت على ريحة التراب من يتبلل

شبر :- يمكن كلامك صح يمكن جان لازم أنكسر حتى أعرف قيمتي عند الله وعندك حاولت أصير قوي حاولت اكول لروحي انا المهم كرامتي وتولي حوراء والجاب حوراء بس شفت بعينك بس داومت اليوم نسيت كلشي وما تحملت منضرهم سوة ومتتت بس المهم أنتَ نذري وياي لان لولاك جان هسة أنا بخبر كان

- أنتَ روحي وهسة شرايك نطلع أنا وياك لمكان بعيد بالعيد؟ نسوي طقوسنا الخاصة ندعي الله يريح بالنا ونبدي صفحة جديدة

:- هاي هي التريدة نذري

- يلا كمل أكل حتى نرد للبيت يابعد روحيي

رجعنا للبيت نزلت من السيارة وأنا أحس بحمل ثگيل انزاح عن صدري شبر رجع يمشي على رجله وأنا رجعت الرجال اللي ما يكسره شي ما دام أخوه بخير

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉

٭٭ بـــعد مـــرور أربـــع ايــــام ٭٭

يا طَعم يا ليَلة مِن ليّل البَنفسج
يا عِذر يَمامش بَمامش وأحِبك
طَبع بگلبي مِن أطباعِك ذهِب
تِرخـص، أغـليَك وأحِـبك
أنا مِتعلم عِليك هِواي، يا سوله سگتي
ويا طَواريك مِن الظلمه تِـجيني
چانن ثيَابي عِلي غُِربة گبل جيَتك
ومِـستاحِش مِن عِيـوُنِي ..

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ حَـــوراء ٭٭

وبعد الوقت الي مر أصر عمي سيف علي ان يسوي عرس كدام الناس واليوم هو يوم عرسي وانا بيا حال!! خلوني انزع الأسود ورحنا للصالون وانا ما شفت ذو الفقار حتى من طلعت من البيت ما شفتة كدامي

وصلنا للصالون وتذكرت انا نسيت هواي غراض بالبيت لهذا اسماء زوجة عمي سيف علي اتصلت على عمي وكالتلة يدز البدلة و الأغراض الي نسيتهن للصالون

وما خلصت من اللسان غادي الي فرحانة أكثر مني وضلت تهوس فوك راسي

غادي :- هاايي فرحتنا الچبيرة

حوراء :- متوترة

:- حقچ حبيبي غير اول مرة تتزوجين

اسماء :- يوم الالج غاديي

:- لااا انا مطولة

اسماء :- بسس حجي أنتِ يلا حوري كملي مكياجج وفوتي غيري ملابسج وهاي الأغراض دزهم سيف علي

حوراء :- اييي هم زين وصلن على وقت يلا حفوت اغير ملابسي واطلع اسوي مكياجي انتم سون قبلي

أسماء :- تمام اذا حتاجيتي مساعدة باللبس كوليي

غادي :- لا تتاخرين واااييي متحمسسة

حوراء :- أن شاءالله

راحت حوراء للغرفة وبقن غادي و اسماء يسولفن ...

غادي :- عرس أعز صديقاتي و اخوويي ياربي ولا بأرض الأحلام هلشيء يصير

اسماء :- تعرفين حتى انا مامصدكة بعد هذا الوقت راح اشوف ذو الفقار اليوم عريس ويكحل عيوننا

:- والله طلع مو هين هذا ذو الفقار صام صام وفطر على قالب تحمل جميع الحلويات والسكريات

- اوفف منجن يالبنات لو وحدة غريبة متكولن هچي عليها بس لأن صديقة كلبچ

:- ههههههه اكييدد غير حووري تستاهلل

- اخوج هم يستاهل

:- اي شوية بس حوري هواييية

طبيت انا للغرفة وفتحت الصندوق وطلعت الغراض النسيتهم بعد ما طلعت البدلة وكعت ورقة بيضة بالكاع من الصندوق شلتها وحطيت البدلة على صفحة وفتحت الورقة لكيت مكتوب بيها

( الذكريات سوف تبقى بيننا حية لا تموت حتى ولو لم نلتقي مرة أخرى ... نجحت الايام في ان تفرقنا لكن أرواحنا سوف تبقى معاً صورتك ستبقى أمام عيني طوال الوقت حتى لو لم أراك مرة أخرى ... خياري في المغادرة ليس له تأثير على مدى كونكِ محبوبة او مرغوب بكِ فــ قلبي لم يعد يشعر في حماسة الارتباط بعد الآن أريد ان أبدأ فصلي التالي من دونكِ وبعيداً عنكِ أنتِ الآن حُرة ... )

بعد هاي الرسالة وكعت بالكاع بحالة صدمة ووكعت سراحية الماي ونكسرت وعلى صوتها دخلن غادي و أسماء الي ولکني بالكاع ابجي والورقة بين ايدية وانا اشهك

غادي :- شكووو حووريي شبيچ؟؟؟

أسماء :- يمةة أسم الله بنيتي شبيچ؟

حوراء :- رراااحح رراااحح ....

٭٭٭٭٭٭٭٭٭٭

طلعت من بيتنا علمود أروح للبيت الثاني والدنيا بليل واني أمشي والشارع جان يصفر بيه الطير ولا واحد بيه عدلت عباتي وصرت أمشي بتراهي

حسيت بأيد رجال لزمت زند ايدي من خلفي وكلبني خلاني وجه بوجهي وجان متلثم اخترعت ردت أصيح حط ايدة على حلكي ونزع اللثام وكال

:- اششششش هذا انا لا طلعين صوووت

- شرجعك؟؟؟؟

يــــتــــبـــع

- واعوفَك للزمَن تلويك الأيام
بضلَك باچر يبين انكسارَك
تظن الذكريات تعُوفك بخِير
محطة تمُرها يوميه بقطارك
وتذگرني بشكو شلونك بالوجوه
ويُصفى الندَم عِنوان بشِعارَك .

متابعة لحسابي ندخل رقم جديد

لهنا وانتهى المُنْعَطف العاشــِر 🌊🌊
رأيكم وَزاتيّ وتعليقاتكم الحلوة وتفاعلكم الي أحبة وتصميمكم ونشركم عن الرواية أهم شيء التصاميم والنشر حسب التفاعل اني حيل جاي اتعب بالكتابة وابسط شيء التصويت ماجاي تصوتون التفاعل ما عاجبني حيل 👎🏻👎🏻👎🏻

وإن شاءالله اشوفكم بــ مُنْعطف جديد

10,633 كلمة

اللهم صلّ علىٰ محمد وآل محمد

قناتي التلكرام موجودين بيها الأبطال

وهذا حسابي الانستكرام ننشر بيه كلشي

- اسْتَكْثِرُوا مِنَ الْبَاقِيَاتِ الصَّالِحَاتِ : التَّسْبِيحُ وَالتَّحْمِيدُ وَالتَّهْلِيلُ وَالتَّكْبِيرُ وَلَا حَوْلَ وَلَا قُوَّةَ إِلَّا بِاللهِ

- ﴿ وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ أَمَلًا ﴾
- سُبحــانَ الله
- الحمــــدُ لله
- لا إلهَ إلا الله
- اللهُ أكبـــر
- لا حَول ولا قوة إلا بالله
- سُبحــان الله العَظيــم
- سُبحــان الله وبِحَمـده
- أستَغفِــر الله وأتوبُ إليه
- اللهُمَّ صلِ علّى مُحمد وآل مُحمد